رواية احفاد عمران – الفصل الثالث والثلاثون
أحفاد عمران
بارت _33_
غرفتك هيَ هيَ وحتى الهدوم
بعد منك عطر بيهن يغازل
بعد كل ذكرياتك ساكنه وياي
بس أصفن گبل على البال مريت
اموتً ألف موته بعتبه الدار
لأن كل ذكرياتك ساكنه البيت
•~•~•~•~•~•~•~•~•~•
ريم…
بحرگه سريعه رفع ايده حمزه ولطشها
براشدي على وجهه كدام الكل رجع هوه
يدور بالمجرات كل احنه مادخلنا لأن
حمزه جبير ويعرف يتصرف وياها
ضل يدور بالجرارات ورجع على
السنك وصدك لكه سجينه اخذها
واخلاها بأيد ليان وهو يحجي بحرگه كلب
حمزه:: يله يله موتي نفسج وخلصينه منج
راحت بسرعه عمه زهور تقربت عليهم
واخذت السجينه من أيد ليان وشمرتها
بالسنك وليان بس صافنه من ضربه
حمزه وماانطت أي رده فعل صاحت
عمه زهور على حمزه
عمه زهور:: حمزههه تخبلتتتت تشجععع
اختككك تكتل نفسها
عمه اقبال:: شبيك يمه مو تدري بيها
مخبله وتسويها
ماحاجاهن وخالاته ولا كان موجودات
ولا وحده حجت سحب حمزه ليان من
زندها ومشه بيها الصاله وكفو شويه
بعيد على عمه صابرين وصاح بيها
وهو يجر بيها هيج وهيج
حمزه:: ترديننن امججججج تنحرمممم
منجججج مثللل مانحرمتتت من عمرررررر
ليان صارت تبجي وعمه صابرين انتهت
من البجي بس ماكتفه حمزه رجع جرها
بقوه ودخلها الغرفه وياشر على جمانه
حمزه:: مو هايييي جمانه إلي تكولين
عليهاااا أنا اربيهااا وأنا اداريهااا هااا
هيه لووووو موووو هيهههه
ماتحجي بس تهز براسها أي ودموعها
شلال رجع حمزه قربها على جود النايم
على الجربايه وهو يكول بصياح
حمزه:: موووو هاذا ابنجججج الماصاله
شهريننن من ولدتييي لو أنا غلطاااانننن
عمه اقبال:: ولك يمه عوفها شبيك وياها
حمزه:: لا خلوهاااا هيه الحجتتت وهسه
خلي تسمععع
قربها اله ولازم اكتافها بيده الاثنين
وهو يحجي
حمزه:: بهل بساطه تكولين اكتل نفسي
واخلصكم ولجججج بكلب بارد
تكوليننن هيج
ليان ببجي:: م…كدر والله ماكدر.. عمر
عمرر بسببي اني السبببب بموتههه
حمزه:: أش آش انتِ مادخلج مادخلج
أنا أنا صوجيي وخليته يسوق
ليان:: اني انييي من ورايييي طلعتوووو
من البيتتتت ولكمممم اني المفروض
اموت ليششس الموتتت أخذ عمررر
ليش مااخذنييي
ضمها الصدره حمزه وهمه ثينهم يبجون
وااحد يكول الثاني أنا السبب بموته…..
•~•~•~•~•~•~•~•~•
فرح….
رجعنه البيت وإني كبل رحت طلعت
ملابسي السود ودخلت الحمام اسبح….
طلعت ومشطت شعري وكبل نمت……..
مر اليوم عادي وثاني يوم من الصبح
كعدت وفتحت تلفوني دخلت على
محادثتنه اني وحمزه وصرت ارجع
بيها وابتسم على سوالفنه وحجينه
بس ماترددت وكتبت اله
_شلونك شلون صار رأسك بعده يوجعك
وطفيت التلفون كمت الحمام غسلت
وجهي وغيرت ملابسي واجاني اشعار
على تلفوني رحت كبل عليه وبالي حمزه
فتحته بس خاب ضني من لكيت الرساله
من صديقتي وشفت حمزه قاري الرساله ومامجاوب عليه طفيت جهازي وكبل
نزلت جوه……..
•~•~•~•~•~•~•~
ريم….
مرن ست أيام على وفاه عمر واحنه
يمهم لأن النسوان رايحات رادات
حمزه صار يروح البيت اهلي يبات
اهناك ومايجي اهنا بس شويه
يكعد يم ليان ويرجع يطلع ومانشوفه
ليان ماباقي شي صاحي بيها انتهت
نهائيه وبهل ست ايام ذبلت ليان
وصارت نهار كله بس تصفن أكل
تاكل لكمه وحده باليوم بطلاع الروح
اسمر حاول يحاجيها ماكو ماتسمع من
أحد بس رغم هاي ضروفها وبنص حزنه
ماهملت لا جمانه ولا جود وهيه إلي تهتم
بيهم ماخلت شخص يدير باله عليهم غيرها
باليوم الثالث كلها رجعت البيوتها
خالاتها ونسوان خوالها واهم شغله
الحيه هم رجعت وماضلت اهنا وبس
اني وعمه زهور باقين اهنا علمود
النسوان التجي وهم انضف البيت
اني وياها
زيد مخليته بالغرفه يم ليان عود جمانه
لأن إذا خليته بالكاع وحيده جمانه تكتله
وتخلي يصرخ عليه لازمه وصله بيدي
وامسح بالكاونتر صاحت عليه عمه
صابرين بصوت كوه سمعته
عمه صابرين:: يمه عوفي أنا انضفه
اكعدي انتِ
ريم:: لا عمه شنو السالفه اني انضفه
ضليت امسح بي لحد ماخلصته وغسلت
السنك باجر السبعه ولازم نخلص اغلب
الأشياء اليوم حتى مايخبصونه النسوان
باجر عمه زهور جانت تكنس بالاستقبال
رحت عليها كتلها
ريم:: عمه شوكت نفلس التمر
عمه زهور:: هسه نخلص ونفلسه وهم
ادز حمزه يجيب فريحه ويانه
ريم:: خاف خالو مايقبل
زهور:: شنهي بكيفه مايقبل البنيه بنيتنه
وجنتنه
ريم:: أي وآلله عمه دزي واحد يجيبها
هم خطيه اهناك بالبيت وحدها
وماعدها أحد
فرح الوحيده البيت خالو من جانت
صغيره شكد راجعو دكاتره حتى يصير
عدهم اطفال بعد بس رب العالمين
مارزقهن غيرها جانن خالاتي يروحن
عدهم ويكولن الخالي يزوج علمود
الاطفال بس هو جان مكتفي ببفرح
ومااهتم الهن ولا دار بال وعمه فاطمه
هم كلش طيبه وماعدها شي اسمه
حقد أو شي
•~•~•~•~•~•~•~•~•
فرح…….
كاعده بالغرفه واعزل بملابسي ضميت
لالوان وخليت الأسود لأن أني بعد لابسه
أسود ليش اخليهن فاكلت اضمهن احسن
دك تلفوني كمت عليه وعفت الملابس
شفت المتصل ريم كبل رديت عليها
فرح:: الو ريم
ريم:: ها فرح شلونج
فرح:: ممم شعجب اتصلتي هسه انتِ
مو ببيت عمو جاسم
ريم:: أي أي اهناك وعمه زهور كالت
راح ادز حمزه عليها يجيبها
فرح بفهاوه:: يجيبمن
ريم:: يالثوله يجيبجج
فرح:: ها لا اني ابوي مايرضه
ريم:: هلووو وهيه بكيف ابوج
فرح:: ريم شبيج هيج تحجين انتِ صاحيه
ريم:: أي أي صاحيه ماعليج وهسه
اسمعي زين تروحين وتكولين لعمه
فاطمه حمزه راح يجي ياخذني
وتلبسين وتكعدين اتانينه
فرح:: لا لا ماراح يرضون واصلا هيه
أمي كالت بيوم السبعه عود روحي من
الصبح عاوني البنات
ريم:: شلوننن راح تخليني اطلع الها من
الجهاززز ولهجججح غير انريد انكمل
الشغل اليوم قبللل ماتجي الحيايه باجر
فرح بستغراب:: ياحيايه
ريم:: فرح فدوه اروحلج بطلي فهاوه
وهسه سوي مثل ماكتلج بسرعه
فرح:: ري….
فجأة سدته بوجهي وإني ماعرف شلون
اتصرف لو شلون افتح الموضوع وي أمي
ومعقوله توافق بين أكيد اتوافق قابل إني
رايحه اتسله غير داريد اساعدهن خليتها
على الله وذبيت تلفوني نزلت جوه لكيتها
بالمطبخ كاعده وتثرم كرفس ماعرف المن
كعدت يمها بالكاع وكلت
فرح:: احم يمه حمزه راح يجي ياخذني
باوعت عليه بستغراب وحتى البيدها عافته
أمي:: وين
فرح:: ها مو اليوم عمه زهور وريم راح
يخلصن هواي اشياء وخابرتني ريم كالت
تعالي ساعدينه
أمي:: روحي يمه
فرح بصدمه:: يعني اروح
أمي:: أي روحي
فرح:: وابوي
أمي:: خلي عليه
ابتسمت الها وكمت بسرعه رحت الغرفتي
طلعت تراك اسود وطلعت نفنوف وحرت
شنو البس ونوب قررت البس النفنوف
احسن عيب من الولد خاف هم اهناك
اخذت النفنوف ولبسته رجعت لفيت
شالي ودكيت على ريم كبل جاوبت
فرح:: ها وينه شو لحد لأن ماجاي
ريم:: ها مو مايكدر يجي دزيتلج أسمر
هسه يوصل الكم
فرح:: خوش
سديته منها وجذب اكول مانقهرت متت
بدمي بس شنو اسوي بالنهايه أخو المات
والأخ ميتعوض وإني عاذرته على
تصرفاته وتجاهله ألي
•~•~•~•~•~•~•~•~•~•
ريم…..
دزت عمه زهور على حمزه واجه وكف
باب المطبخ وهو لابس تراك اسود
وشماغ بعده على ركبته من يوم الفاتحه
عمه زهور:: عمه رايدتك بخدمه
حمزه:: شنو محتاجه
عمه زهور:: تروح تجيب فرح
حمزه بستغراب:: شسوون بيهاا
عمه زهور:: شنو شنسوي بيها حمزه
صاير ماتعرف تحجي
حمزه:: اعذريني عيوني عمه بس أنا
رايح وي عمي جاسم انجيب المواد
طلع وعاف عمه زهور وهيه ماراده عليه
التفتت إلي عمه زهور وهيه تباوع إلي
تريدني احجي
ريم:: شنو عمه شبيج
عمه زهور:: ذول صاير بينهم شي
ريم:: ياهمه
عمه زهور:: لصيرين فطيره واحجي
وإني اهنا يله عرفتها تقصد حمزه وفرح
ريم:: ماعرف إني بس إلي أعرفه مابينهم
شي وعلاقتهم حلوه بس هسه إني هم
أحس بينهم شي ومايتحاجون
عمه زهور:: الله يهديهم
ريم:: امين
عمه زهور:: لعد راح ادز عليها أسمر
ريم:: أي عادي أسمر مايكول خطيه ويروح
دزت عمه زهور على أسمر وكالت اله
يروح يجيب فرح وخطيه ماكال وراح
رجعنه احنه كعدنه بالصاله خابرت فرح
وكتلها أسمر يجيج وحسيتها ضاجت
بس شنسوي
طلعت ليان من الغرفه شايله جود
وبسرعه تمشي المغسله كمت وراها
المغسله لكيته متقيئ عليها وعلى نفسه
وهيه تغسله رجعت وملابسها وملابسه
مبللهوحارت وإني كبل كتلها
ريم:: جيبي جيبي
انطتني يا وعمه زهور كالتله
عمه زهور:: عمه انزلج ملابس
ليان:: لا لا إني اجيب
راحت صعدت فوك على كيفها وعمه
زهور كامت اخذت جود من يمي وراحت
الغرفه تبدله واني هم رحت وراها لكيت
زيودي نايم وجمانه تلعب بلعابه باوعت
على عمه صابرين شاده راسها وكاعده
تقرأ قران عفتهن ورجعت بالصاله كعدت
اتاني بفرح تجي مرت بالنص ساعه يله
اندك باب المطبخ كمت بسرعه فتحته
وطلعت فريحه بوستها ودخلت بس
أسمر جان واكف
ريم:: رايد شي
أسمر:: جمانه إذا كاعده جيبيها إلي
ريم:: أي أي كاعد تلعب هسه اجيبها الك
دخلت جوه لكيتها فوك راس عمه زهور
وتريد تلزم بايد جود وعمه زهور توخرها
ماتخليها رحت عليها واخذتها وهيه تكمز
ادور تنزل من ايدي بسرعه مشيت ورحت
لاسمر وهيه من شافته صارت تبجي وتفتح
بايده اله عود تعال اخذني انطيته اله وإني ضربتها على راسها بخفه وكتلها
ريم:: ياملعونه ماتردين عمتج
أسمر:: جود شلونه
ريم:: بخير
أسمر:: يله انا رايح شويه وارجعها
ريم:: خوش
راح وإني سديت الباب وره رجعت الصاله
لكيت عمه زهور يم فرح شوكت جتي مو
جانت تبدل الجود كعدت يمهن وكبل كتلها
ريم:: عمه شنهي طياره شبسرعه كملتي الجود
عمه زهور:: خايب ماترحين مني عبالجن
احنه مثلجن ساعه تبطن بجاهل وآخر
شي مادبرنهاا
ريم:: ياعمه هسه إني شنو حجيت…. فريحه
ذبيها الصايه شبيج ماختنكتي
فرح صافنه ورايحه الغير عالم باوعت
على عمه زهور هم تباوع عليها وهاي
على صفنتها وهنا إني وعمه زهور اتاكدنه
أكو شي صاير بينهم
عمه زهور:: فريحه يمه
فرح بفزه:: ها وياي
ريم:: شبيج فرح
فرح:: مابيه شئ
ضلت عمه زهور تحجي وياها واني منتبها
عليها هيه مو تمام شبيها كلت بس نضل
وحدنه احجي وياها واشوف شبيها صاحت
عليه عمه زهور
عمه زهور:: كومي ريمه كومي جيبي التمر
خلي نفلسه ونسوي غير شي
ريم:: اي عمه
كمت رحت المطبخ اخذت كارتون التمر
واخذت صينيه ووديتهن الصاله ورجعت
اخذت بكاصات صغار دهن حتى ميلزك
بالادين وكعدنه احنه نفلس ونفلس
ونفلس لحد ماخطرت على بالي ليان
وينها صعدت هيه نزلت لو بعدها فوك
سئلت عمه زهور
ريم:: عمه ليان نزلت لو بعدها فوك
عمه زهور:: لا لحد لان مانزلت
ريم:: لعد اكوم اشوفها
عمه زهور:: اي بنيتي روحي شوفيها وين
هزيت براسي بمعنى أي وكمت المغسله
غسلت ايدي وصعدت فوك دكيت باب
غرفتها ماكو جواب فتحته ودخلت مالكيت
احد بس لكيت ملابس السود مشمرات
على الجربايه رحت الحمام وهم دكيته
واني احجي
ريم:: ليان انتِ اهنا…..ليان جاوبيني….راح
ادخل عليج
هم ماكو رد فتحت الباب هم ماموجوده
ستغربت هاي وين راحت مو كالت بس
اغير ملابسي مشيت طلعت من الغرفه
ورحت الغرفه حمزه دكيت بابها وفتحته
هم ماموجوده باوعت لغرفه عمر واخذت
حسره خليت ايدي على يده الباب وردت
وه افتحه بس مانفتح رجعت احاول ماكو
دكيت ألباب. واني احاجيها ومتاكده
هيه بالغرفه
ريم:: ليااان افتحي الباب لياااننن
ماكو صوت هدوء تام داخل الغرفه
ضليت ادك واحجي بس ماكو صوت
خفت عليها لا تسوي بنفسها شي
ونوب داخل غرفه عمر ركضت
ووكفت يم الدرج وصرت اصيح
على عمه زهور
ريم:: عمهههه لياننن غافله الغرفه على نفسها
ورجعت ادك بالباب مادري اذا حجت
صاحت كل شي ماعرف شي والي أريد
اعرفه ليان ليان ليش غافله الغرفه على
نفسها التفتت لكيت عمه زهور خطيه
تركض تريد توصل وماعرف منين اجه
اسمر وراها الي سوه الدرج بايتين
واجه بسرعه وخرني من الباب
وصار يدك عليه
اسمر:: لياااننن افتححيييي
ريم:: م..اكو ماأجاوب
عمه زهور:: ولك يمه بس لا مسويه
اسمر بصياح:: نسخههه مفاتيححح
واخيرا صعدت فرح وهي تكول
فرح:: هاي هاي
اجتي وانطت المفاتيح الاسمر كبل واني
استغربت منين جابت المفاتيح
ريم بهمس:: منين جبتي مفتاح
فرح:: رحت العمه صابرين
فتح اسمر الباب ودخل على السريع
واحنه دخلنه ورا ونصدمنه واحنه
نشوف ليان لابسه ملابس عمر ونايمه
على جربايته وعيونها شلال رغم هيه
مغمضه عيونه بس دموعهه تنزل
مسح وجهه اسمر وتقرب يمها كعد
بالكاع وعمه زهور لزمت كلبها وضلت
واكفه مخترعه
عمه زهور:: يمه بنيتي ليش غافله على
نفسج الباب
مابدر منها أي شي وبس تبجي اسمر مد
ايده وصار يمسح على شعرها ويحاجيها
بهمس ماكدر اسمع شنو ايكول الها عمه
زهور اشرت النه نطلع واني وفرح وعمه
انسحبنه وطلعنه من الغرفه وسدينه
عليهم الباب
فرح:: الله يساعد كلبها والله خطيه
ريم:: الأخ عزيز وهو جان اقرب الها
فرح:: الله يرحمه
ريم+ عمه زهور:: الله يرحمه
عمه زهور:: يله بنيات خلي ننزل نكمل
حتى نخلص بسرعه
فرح+ ريم:: يله
نزلنه ورجعنه كعدنه نفلس التمر نسوي
حلاوه بالسمسم علمود السبعه ضلينه
كاعدين على كعدتنه وعمه صابرين
على كعدتها على {القرآن الكريم}
سوينه 5 جياس ولا أسمر ولا ليان محد
نزل جوه وعمه زهور ماخذته وي فرح
سؤالف وحجي على حمزه وليش هيج
وليش هيج وفرح ماتحجي شي غير
“مابينه شي” وعمه زهور تكللها لا
بينكم وضلن يحجن
أسمر:: حضرو ملابس ليان
التفتنه كل احنه عليه جان دينزل الدرج
وهو يباوع علينه
عمه زهور:: شسوي بيهن يمه
أسمر:: عمه رحمه الوالديج تحضريهن
ليان ماتضل اهنا
عمه زهور:: لعدد وينن تروح غير بيت اهلها
أسمر:: هاي هيه تكضي لسبعه اهنا وترجع
شكو باقيه
عمه زهور:: أسمر أنتَ عاقل
أسمر:: أي لعد تردونه اضل اهنا حتى
تموتتت من حزنهااا وقهرهااا
عمه زهور:: اسم الله عليها شبيك اسمر
اسمر:: البنيههه تنتهييي اهنا شبيكممم
ماتفتهمونن علي…
ريم:: أي اسمر اخذها احسن بس اتضل
اهنا اسم الله عليها يصير شي بيها
فاتاخذها احسن
فرح:: أي صح احسن اطلعوها من البيت
لأن إذا اضل اهنا تدمر ليان
باوعت عمه زهور عليه ورجعت على
فرح هم وذبت حسره وهيه تكول
عمه زهور:: بالي تشوفه يمه
اسمر:: حضرو ملابسها إلي اوديهن
البيت وره السبعه اخذها ماخليها….. ريم
شويه وصعدي الها خلي تغير ملابسها
وتنزل لا تخلينها فوك
باوعت له وهزيت راسي بمعنى أي طلع
هوه من البيت ورجعت فرح وعمه زهور
على التمر صفنت وضليت اباوع بالصاله
شو ماكو جمانه معقوله مامدخلها جوه
باوعت على فرح وكبل كتلها
ريم:: فرح شنو اسمر ماجايب جمانه
فرح:: لا جابها…. عزا هاي وينهاا
رحت كبل المغسله غسلت أيدي على
السريع وجتي وراي فرح هم غسلت
ايدها وصرنه ندور عليه وعمه زهور
تصيح علينه
عمه زهور:: خايبات شبيجن هيه طفله
وين تروح
ريم:: ياعمه بس لا طلعت برأ لأن من
نزلنه جان باب المطبخ مفتوح
فرح:: لا ماضن طلعت…. خلي اشوفها
خاف يم عمه صابرين
وكفت مخليه اديه على خصري ومحتاره
وين جمانه بس لا طلعت وخايف خاف
صدك طلعت بس فرح راحت الغرفه وكفت
بنص الغرفه واشرت إلي اروحلها استغربت ومشيت الها دخلت الغرفه لكيت جمانه
حاضنه جود ونايمه مي بارد ونزل على
كلبي لأن جنت خايفه عليها
تقدمت ردت اوخرها بس عمه صابرين كالت
عمه صابرين:: عوفيها خليها حاضنته
فرح:: مو خاف تنكلب وتصير فوكه
عمه صابرين:: ماعليها شي يمه عوفنها
وصدك عفناها ورجعنه كلنا العمه زهور
عليها شلون حاضنته وهيه هم كالت
احسن حتى تصير المحبه بينهم من
هسه ومن تكبر ماتصير تغار منه……..
شويه وهم عفتهن وغسلت أيدي زين من
الدهن وكتلهن راح اصعد لليان وصعدت
فوك لكيت اسمر مخلي الباب مفتوح
عليها مشيت ودخلت الغرفه لكيت ليان
على نومته وبعدها بملابس عمر والله
كسرت خاطري وماكعدته خليتها على
نومتها ومشيت نزلت كلت العمه زهور
وهم نفس تفكيري …
•~•~•~•~•~•~•~•
فرح……..
كملنا التمر وكامت عمه زهور خلت نجانه
فافون جبيره على الطباخ وخلت دهن
وطحين وضلت تخلط بي لحد ما صار
لونه حليبي وضفنه اله التمر وضلت
تحرك بي رجعنه خلينه وصله بالكاع
وخلينه النجانه عليها وضلت عمه زهور
تخلط بالجفجير وريم كاعده وتسئل
ريم:: زين عمه هسه شنو راح تضيفين
عليهن اشو هاي راح تصير حصوايه
عمه زهور:: خايبه ماتسكتين شمعلمج
أنتِ بهاي الاشياء
فرح:: صدك عمه شنو راح تضيفيلها
عمه زهور:: دشوف نوب صايرات ثنين عليه…..دخبطلي حليب بكلاص
ريم:: حليب طوز
عمه زهور:: اي
فرح:: مانندله راح اجيب من حليب
جمانه نيدو
ريم:: اي روحي جيبي
عفتهن ورحت للغرفه لكيت عمه صابرين
اطبطب على راس جود وجمانه تقربت
عليها وهمست بصوت ناصي
فرح:: عمه شنو كعدو
عمه صابرين:: جود تحرك وخفت لا يكعد
اخته
هزيت راسي واخذت قوطيه الحليب
ورحت المطبخ اخذت سراحيه خليت
بيها مي وفتحت قوطيه للحليب ولكيت
بيها قليل
فرح:: عمه هاذا شويه يمكن مايكفي
عمه زهور:: شو شوفيني
قربت القوطيه الها وهيه كبل كالت
عمه زهور:: خبطي خبطي
خبطت الحليب ونطيته الها خلته على
التمر ورادت راشي هم ضلينه ندور لحد
مالكينه وهم خلينه الها وهيه لبست كفوف
لأن التمر لحد لأن حار بعده وصارت تخبط
أو بلامختصر مثل التعجن وتطلع نوه
وتصيح علينه
عمه زهور:: هوه هاذا تفليسجن كله
نوا…..اني شجاني مكعدجن وياي
تفلسن لو باقيه وحيدي
اني وريم وحده صافنه بوجه الخ
مصدومين من حجيها ساعتين واحنه
نفلس بي واخير شي هيج تكول ريم
ماسكتت وكبل كالت
ريم:: عمه أنتِ مو جنتي كاعده ويانه
يجوز ذني النوه من الفلستي
عمه زهور:: ولهجج مريمه
ريم:: خلي أروح اسوي ممه لزيد حتى
يضل على نومته
راحت وعافتنه وحيدنه طلعت السمسم
اني وخليت طاوه على الطباخ وخليت
سمسم احمسه شوي يحومر ضليت
احمس بي بس نتبهت هاذا كلش
قليل على كميه حلاوه التمر السويناها
فرح:: عمه هاذا السمسم قليل وماراح يكفي
عمه زهور:: هسه همه بالمسواك شويه
ويجون وإني كاتبه الهم على السمسم
فرح:: خوش لعد اكمل هاذا ومن يجيبون
ارجع احمس شويه
عمه زهور:: أي يمه
حومرته شويه وسديت الطباخ وعمه
زهور هم خلصت وبقه بس نلكلكهن “”
إلي ميعرف يعني شنو يسونها دوائر””
دخلت علينه ليان عيونه حمره ودموع
بيها وجانت مبدله ولابسه دشادشه
سوده وشال مخليته على راسها
باوعت لعمه زهور وكالت الها
بصوت مخنوك
ليان:: عمه شنو جاي تسون
عمه زهور:: بنيتي حلاوه الباجر
ليان:: عمه أريد اشارك بثواب عمر
نزلت دموعه على خدها وهيه تمسح
بيهن بس مو راضيات يخلصن
عمه زهور:: أي يمه روحي اكعدي بالصاله
هسه احنه نجيب الحاجات ونجي
هزت راسها وراحت كعدت بالكاع اتاني
بينه وعمه زهور اخذت النجانه وراحت
واني خليت السمسم بصينيه صغيره
وضليت ادور على صينيه حته نخلي
بيها بس مالكيت ضليت ادور وأخير
شي فتحت باب بالكاونتر لكيته بي
كله صواني اخذت وحده واريد ارجع
بس بنفس الوقت انفتح باب المطبخ
وكبل سمعت صوته
حمزه:: بس كاسات مي بارده
درت وجهي وباوعت عليه وهو بس
انتبه اني إلي موجوده ماحاجاني وكبل
راح اخذ صينيه من الكاونتر وتقرب على
الثلاجه
فرح:: خلي اني اخليهن الك
حمزه:: مايحتاج
فتح الثلاجه وصار يشيل الكاسات
ويخلي بالصينيه اجت عيني على أيده
مالابس حلقته ليش هوه ذبها لو ناسيها
معقوله ترس الصينيه وطلع واني رجعت
فتحت كارتون مي وخليت كاسات بدال
الخذهن وشلت الصينيه ورحت يمهن
عمه زهور:: خايبه وينج
فرح:: ها مو حمزه اجه اخذ مي
عمه زهور:: جاب سمسم
فرح:: مادري
عمه زهور:: اكعدي لعد
كعدت يمهم وعمه زهور وليان صارن
يلكلكن ويخلن بالسمسم واني اقلبه
بايدي علمود يتلبس بي السمسم وارتبه
بالصينيه طلعت ريم من الغرفه وجتي
ويانه صارت وياي تسوي
سوينه صينيه كامله ورجعت للمطبخ
اخذت الصينيه ورجعنا نسوي لحد
ماسوينه ثلاث صيني
واحنه بعدنه كاعدين بالصاله طلعت
جمانه من الغرفه وهي كوه تمشي
بعدها منعسه بس من شافت ليان
طفرت عليها وحضنتها من وره
وهي تصيح
جمانه:: أما أما
عمه زهور:: تعالي حبيبتي يمي
هزت بكتافها ما وضلت حاضنه ليان
وتبوس بيها قربته ليان وخلتها بحضنها
وهاي تحضن بيها بالك ماشايفتها صار
الها هواي
بهاي الاثناء دخل حمزه وصعد فوك
وحتى ماحجه ولا انتبه منو بالصاله
أصلاً باوعنه كلنا وحده بوجه الثانيه
وحتى ليان
ليان:: شبي
ريم:: ماعرف
عمه زهور:: روحي فريحه شوفي شبي
فرح:: لا شنو اشوفه هو هسه ينزل
ريم:: دروحي هسه شنهي انكلبت المستحه
فرح:: لا قابل شكو واصعد اله
ليان:: فرح روحي شوفي فدوه
عمه زهور:: دروحي يايمه قابل شتخسرين
ماعرف بس حسيت بالخجل وهنه
يكولن الي روحي شوفي هسه اني
على شنو اروح اشوفه قابل صايحني
واروح اشوفه بس انجبرت اروح
واشوفه
كمت وعفتهن صعدت على الدرج
واني افكر بيني وبين نفسي شنو
احجي شنو اسوي كُلش خفت بس
تشجعت وكفت كبال غرفته ومتردده
ادك الباب بس ما هيج دكيت ألباب
مااجاني رد حجيت بصوت ناصي
واني ادك بالباب
فرح:: حمزه عادي ادخل
ماكو صوت ولا سمحلي بالدخول بس
فتحت الباب ودخلت ماموجود جان
بالغرفه ستغربت هاذا وين بس عرفته
بالحمام لان بين صوت المي كلت اتاني شويه
وكفت كبال المرايا وانتبهت على نفسي
صاير عندي هالات سود جوه عيني
ووجهي صاير كركم هاي ليش هيج
صاير طلع حمزه من الحمام وفززني
كبل درت وجهي إله وصار هو مقابيلي
لابس جان تراك اسود اول ماانتبه إلي
عكد حواجبه وكال بستغراب
حمزه:: انتِ شسوين اهنا
فرح:: ها
حمزه:: شسوينن اهناااا
فرح:: شبيك تصيح
حمزه:: كتلجج شسوين اهنا
نزلت راسي وضليت ساكته ماعرف
شنو اجاوب وهو تقدم عليه وكال
حمزه:: اطلعي برأ
رفعت راسي اباوعله بصدمه يطردني
فرح:: تطردني؟
حمزه:: اطلعي برأ
فرح:: حمزههه شبيكك
حمزه:: شبيه
تقدمت عليه واني دموعي نزلت على
خدي رفعت أيدي الترجف ولزمت
وجه واني احجي
فرح:: حبيبي شبيك ليش هيج صاير
وياي ها مزعلتك اني كلي فدوه
رفع ايده ولزم بيها أيدي دار وجه صفحه
ونزل أيدي من وجه وهو يكول
حمزه:: اطلعي
ماتحملت بروده وطريقه كلامه وكبل صحت بي
فرح:: ليشش هيججج تسوييي بيههه إذا ماتريدنييييي احجييييي ليشششش اضلللل ساكتتتتت احجيييي
حمزه::: أي أنا ماريدججججج
ماعرف شنو إلي صار بس كبل
نزعت حلقتي من أيدي وشمرتها
على صدره واني اكول بصوت
كوه طلع من حلگي
فرح:: المايريدني اني هم ماريده….
يتبععع……….
•~•~•~•~••~•~••~•~
الكاتبه ضحى اليوسف
أحفاد عمران
الفصل التالي: اضغط هنا
يتبع.. (رواية احفاد عمران) اضغط على اسم الرواية لتجد الفهرس كاملاً بجميع الفصول.