رواية احفاد عمران – الفصل الثاني والثلاثون
أحفاد عمران
بارت _32_
•~•~•~•~•~•~•~•~•~
بجيتي شگد دمع ياعيني گافيج
الغايب مايرد مايرجع يعود
لا اااه نفع ولا ونت اليل
لا طب نلكه لجروحي وتهود
على فراگ المشو بعدج ترابين
تره درب المشوله بابه مسدود💔
•~•~•~•~•~•~•~•~•~
فرح….
فرح:: اخخخ أيدي
بس حمزه ماهتم إلي بالعكس كمل طريقه
ومشه غوركت عيوني بالدموع رفعت
أيدي شفتها مشخوطه ماهتميت إلها
مسحتها بأيدي الثانيه وكمت نفضت
ملابسي من التربان إلي صار بيهن
ومشيت دخلت البيت
كم مره موجودات بالصاله وامي جاي تعدل بعبايتها رحت الها وكلت
فرح:: يمه نروح؟
امي:: أي يمه أنا رايحه بس أنتِ ضلي يمه
فرح:: لا….
امي:: يمه أنتِ بالنهايه جنتهم وبنيتهم
ضلي اهنا خطيه يم ليان هم وراها
ثنين جهال وعمتج هم خطيه
فرح:: ابويه ماراح يقبل
امي:: يقبل يمه أنا احاجي….يله يمه أنا
رايحه ومثل ماكتلج
فرح:: الله وياج
طلعت أمي واني أحس نفسي صرت غريبه
بينهم شلون راح اضل وبين عمات وخالات ليان
رجعت المطبخ لكيت ريم تحجي بالموبايل
بصوت ناصي ويمها إلياس زوجهه بس
خطيه اني دخلت المطبخ هوه طلع ضل
واكف بس من برا عاد هيه خلصت
مخابره وطلعت انطته إله
ورجعت دخلت وسدت الباب
ريم:: اخخ راح يشلع كلبي
فرح بستغراب:: منو
ريم:: زيد مشيبها العمته وماراضي
يرضع غير ممه وحده
فرح:: جيبي اهنا احسلج
ريم:: لا وين لازم اضل مكابلته وكاعده مايكعد
فرح:: هوه يمشي
ريم:: لا بس يزحف
ضلينه ساكتين بس ضلينه على وكفتنه
شويه ودخلت نفس البنيه أم المكياج
بس جانت مغسله ووجهه ومخليه بس
الحمره البحلكها حمرههه طوخ جانت
باوعت ريم عليها وكلبت عيونها منها
_ ممكن تنطيني مي
اشو هاي تباوع عليه وتحجي ماكلت
والتفتت داريد انطيها كلاص مي بس ريم
ريم:: مو بعيد عليج حبيبتي اخذي بدال
ماتطلبين
ضليت واكفه ولا اني منطيتها ولا اني
ممطيتها عاد هيه اخذت بكلام ريم
ومشت اخذت كلاص فتحته وشربت
شويه وباوعت علينه ثنينه
_هم شفتن اسمر
ريم:: عفوااااااا
_ هه شبيج سئلنه
ريم:: ومنو انتِ وسئلين على اخوي
_اهووو شلون طلابه هاي
ضلن وحده ترد على الثانيه واني بس
صافنه عليهن مثل الاطرش بالزفه مافاهمه
شي منهن وحتى راسي صار يوجعني من
الصوت العالي لأن مامتعلمه على هيج
ضجه خليتهن ووطلعت من المطبخ
بالصاله جانن ماكو احد غير الاقارب
وإني هم ماعرف بينهن هواي
رحت الغرفه لكيت ليان كاعده وصافنه
وكبالها جود محلل يلعب وجمانه تلعب
تلعب بتلفون ادوس بي وهيه كلشي
ماتعرف خليت وكعدت يمها على الجربايه
خليت راسي على تاج الجربايه واني
ضليت افكر بحمزه شبي شنو هاي الجروح
زين هو ليش لحد لان ماداخل البيت
وشنو جان سبب موت عمر هواي
اسئله بس ياهو ليجاوب عليهن………
•~•~•~•~•~•~•~•~•~
ريم…..
ضلينه إني وميس وحده ترد على الثانيه
ومابينا إلي تسد حلكها وتنسحب اخير شي
إني عفتها ولحكت فرح الغرفه لكيتهن هي
وليان ثنينهن صافنات كعدت إني هم
وصفنت على جود شون يلعب ضليت
اخلي بأيدي بايد جود واتقرب عليه
ابوسه واشمشمه حسيته زيد وإني
مشتاقتله ضليت وي جود
رفعت راسي عليهم ليان تباوع الجمانه
شلون تلعب بالموبايل بس فرح نايمه
مرجيه راسها على الجربايه ونايمه انتبهت
لايدها بيها شخط جبير استغربت هاي
شوكت وشلون انشخطت لان جان الجرح
مبين عليه جديد مو قديم لأن بي حمار
وشبه دم طالع منه باوعت لليان وهمست الها
ريم:: ليان تعرفين جرح فرح من شنو
ليان:: ياجرح
اشرت الها على ايد فرح وهيه باوعت عليها وعجت حواجبها
ليان:: ماعرف منين بس باين عليه توه جديد
ضلينه اني وليان كاعداات واني كل
شويه اروح ادز على اليأس يخابرلي على
نرجس اطمئن على زيد واخير شي من
عرفته نام يله ارتاحيت وخطيه نرجس
هم مريضه وهم اني شلعت كلبها بزيد
بس كلت الصبح اخلي اليأس يجيبه
ماخلي بعد خطيه
ليان غيرت الجود ونومته بس جمانه
شلعت كلبها بس تصرخ وهيه البيها
مكفيها عاد اني اخذتها وضليت افتر
بيها بالبيت كله يله نامت على كتفي
ورجعتها الغرفه نومناها ضلينه بس اني
وليان كاعدات ومناك عمه صابرين
وعمه زهور وكلها نايمه
ل6 الصبح كمت طلعت من الغرفه كلها نايمه بالصاله رحت المطبخ لكيت عمه زهور
عمه زهور:: يله بنيتي عاونيني حتى
بسرعه نخلص
ريم:: بس عمه ليش بهيج وقت
عمه زهور:: ياعمه لعد شوكت غير
انلم ادينه بسرعه هسه نص ساعه
وتصير النسوان اطب
هزيت راسي بمعنى أي وصرت احضر
وياها ريوك لحد ماخلصنه اجه محمد
واسمر ونقلو الزلم وعمه زهور راحت
كعدتهن النسوان و جني نقلن النسوان
الريوك سويت صينيه صغيره واخذته
الغرفه لكيت ليان دترضع جود طبيت
وخليت الصينيه على الجربايه الا أن
كملت قربتها الها
ريم:: يله تريكي
ليان:: ماريد
ريم:: شنو ماتردين اكلي يله
ليان:: اوو ريم ماشتهي
ريم:: انتِ مايفيد وياج اروح اصيح عمه زهور
ليان:: لا لا تصيحين
ماسمعت منها كمت طلعت من الغرفه
وضليت ادور على عمه زهور الا أن
لكيتها تعزل بالاستقبال رحت يمها
ريم:: عمه تعالي لليان
عمه زهور بستغراب:: شبيها
ريم:: عمه ماترضه تاكل وهيه من
البارحه ماماكله
عمه زهور:: شنو هيه على كيفها
ذبت البيدها وبوجهه الغرفه دخلت
وإني وراها امشي راحت على ليان
الجانت على كعدتها وقربت الها الصينيه
عمه زهور:: اكلي
ليان:: ماشتهي
عمه زهور:: اكلي كتلج
ليان:: عمه والله ماشتهي
عمه زهور:: أي أي موتي لابنج هم ورا
عمر موتيي
ليان:: عمههههه
عمه زهور:: عمعامه تعمجج ولهجج
ليان:: عمه شنو هاذا الحجي
ضربتها عمه زهور على راسها
عمه زهور:: شنو هاذا الحجي… لعد إلي
أنتِ جاي سوينه حجي هاذا بله…. يله
اكعدي اكلي بدون صوت
نزلت ليان دموعه وخرت الصينيه
من كدامها وهي تكول
ليان:: ماريد أكل ماريد ليش اجبروني
كعدت يمها عمه زهور واخذته الحضنها
بجت وياها بس مابينت الها جاي تبجي
وخرته من حضنها وصارت تمسح على
شعرها
عمه زهور:: ياامي لا تسوين بنفسج هيج
خلت ليان راسها على كتف عمه زهور
وشبعت بجي وعمه زهور بس تسمح
على راسها ودموعهاا تنزل وي دموع
ليان ماتحملت اني هم بجيت بس
طلعت من الغرفه بسرعه ورجعت
المطبخ غسلت المواعين الموجوده
ماحس غير فززني دكت باب المطبخ
عدلت شالي وفتحته ضهر كدامي إلياس
هو وشايل زيد وهاذا دموعه بعيونه
واول ماشافني شمر نفسه عليه اخذته
اشم وابوس بي
ريم:: يمههه حبيبي يروح امك
ألياس:: ريم دزي وحده دتجيب ملابس
لحمزه يريد يسبح
باوعت عليه باستغراب
ريم:: ها أي هسه اني اروح اجيبله
إلياس:: شنو تجيبيله انتِ بكيفج
ريم:: غير أنتَ كلت يريد ملابس
إلياس:: وشنو تردين انتِ تروحين
تجيبين ملابس لرجال
ريم:: اهو إلياس حتى بهاي حطيت بيها
إلياس بامر:: والله وقسم بالله العلي
العظيم ياريم إذا لكيتج انتِ رايحه
الغرفه ووجايبه ملابس رجليج تتكسر
كلبت عيوني منه ورجعت على زيد
ابوس بي كد مامشتاقتله بس إلياس
شيسكته إذا ما تأكد
إلياس:: سمعتيي
دخلت عمه زهور وجتي بوست
واليأس استغل الفرصه
إلياس:: أم أحمد رحمه لامج وابوج
بس تجيبون ملابس الحمزه
عمه زهور:: يمه هوه وين حمزه خلي
يجي يسبح بحمامه
إلياس:: راح البيت خالي جاسم وأنا
رايح شوي وجاي اخذله الملابس
راح وعافنه ضلينه نعزل بالمطبخ
وزيد بايدي……
•~•~•~•~•~•~•~•~•~
فرح……
ايد صغيره وناعمه تلامس وجهي فتحت
عيوني جمانه كاعده فوك راسي وتمد
ايدها على وجهي قربته عليه وبستها
باوعت بالغرفه جانت بس ليان على
كعدته بس كاعده ومخليه ايدها على
راس جود اطبطب عليه مبين فاز
ودترجع نومته وجمانه تروح وترجع
شوي عليها وشوي عليه وهيه تريد
بس تكعدها حتى متفزز جود
فرح:: هيه هيج وقت يوميه تكعد
ليان بصوت خافت:: لا بس لأن اصوات
هسه ترجع وتنام
عدلت شالي على راسي وطلعت من
الغرفه باوعت بالصاله كلها كاعده
وعمه صابرين تبجي وتنوح رجعت
رحت المطبخ لكيت ريم حاضنه ابنها
وتبوس بي وعمه زهور يمها يحجن
دخلت اني ودخلت عمه اقبال وراي رئسن
عمه اقبال:: ها يمه منو جاب زيد الج
ريم:: عمه إلياس
عمه اقبال:: سبحي يمه تعرفين نرجس
ماتكدر عليه وخطيه يبقى بدون سبح
ريم:: عمه إلياس ماجايبلي ملابسه
شلون اسبحه
عمه اقبال:: هسه أنا ادز أحد يجيب
غراض إله
ضليت واكفه يمهن وعمه زهور
باوعت عليه وكالت
عمه زهور:: تعالي بنيتي تعالي تريكي
فرح:: تسلمين عمه بس ماشتهي
ريم:: عمه هسه يجي إلياس
عمه زهور:: ها أي…. فريحه يمه اصعدي
الغرفه حمزه جيبيله ملابس وتعالي
فرح:: اني
ريم:: عوفيها عمه اني راح اصعد
اجيبله هاي مادبرها
عمه اقبال:: دكعدي انتِ….. امشي بنيتي ف
ريحه روحي جيبيله
هزيت براسي أي ومشيت تحت انضار
الكل بعدني دااريد اصعد الدرج ورجعت
الهن المطبخ التفتن عليه
عمه زهور:: ها حبيبه شو رجعتي
فرح:: عمه هيه وين صايره غرفته
ريم:: بصف الدرج مال القاط الثاني
رجعت مشيت وصعدت فوك باوعت
هنه ثلاث غرف وريم كالتلي بصف
الدرج خليت ورحت فتحتها ودخلت
جانت جربايه أم النفر بس مرتبه
وكنتور وميز بس كل شي بالغرفه
مرتب بشكل حلو
تقربت على الكنتور وفتحت الباب جان
بي تراكات وهيج ملابس رجعت الكنتور
الثاني أكو دشاديش إله اخذت دشداشه
سوده ورجعت الكنتور ادور واخذتله
ملابس داخليه هم وطلعت من الغرفه
نزلت جوا وجانت كل الانضار عليه
وبالك مسويه جريمه شايله الملابس
بيدي ودخلت المطبخ بعدهن هنه
بالمطبخ انطيت الملابس العمه زهور
ووكفت يمهن اجه محمد وانطتهن
اله ومن عمه اقبال سئلته على حمزه كال إلها
محمد:: مايجي
عمه اقبال:: شنو هوه مايجي بكيفه
محمد:: عوفي عمه خلي وحده شويه
عمه زهور:: يمه وليدي حاجو احجو
ويا إنتو لا تلهسون بي خلي يرجع
محمد:: خير أن شاء الله يمه
طلع واحنه على السريع لملمنه البيت
وهاي ميس بس تتمايع علينه ريم
خلصت منها وراحت على زيد بس
إني لا وين اخلص
وصدك شويه وصارت النسوان تجي
واحنه بلشنه بالمي والجاي جتي
علينه عمه زهور وهي تكول
عمه زهور:: بنياتي عوفن البيدجن
وتعالن نشرح المواد علمود الطبخ
وفعلاً كل احنه طلعنا وحتى ريم
خلت زيد يم أبو وجتي ويانه وميس
هم موجوده واحنه نشرح بس انفتح
الباب مادرت وجهي ولا شفت منو
وبالي كله لو إلياس لو محمد بس
عمه اقبال كبل كمزت وهي تكوله
عمه اقبال:: البقيه بحياتك عيوني عمه
حمزه:: البقاء الله
كبل رفعت راسي باوعت عليه جان لابس الدشداشه السوده إلي دزيتها اله وهم
لاف الشماغ على ركبته وشعره النازل
ووجههه احمر وعيونه مورمه ومنفوخه
فززني من صفتني وهو يباوع لميس
ويكول الها
حمزه بصوت كوه ينسمع:: خويه ميس
بلا زحمه عليج جيبيلي حبايه براسيتول
عمه زهور بسرعه:: كوميي فريحه جيبي
الحمزه
ذبيت الابيدي وردت اكوم بس
استوقفني صوته وهو يكول
حمزه:: مايحتاج
رجعت لزمت السجينه وصرت اشرح
بالبصل وعيوني مغوركه من الدمع بس
ماجان من البصل لا جانن من حرگت
كلبي راحت ميس وجابتله وجايبه
ويا الحبايه مي وهوه ضليت إني
اشرح واشرح ودموعي تنزل رجع
طلع هوه وريم تقربت عليه تهمس
ريم:: شنو صاير ليش تجاهلج
فرح ببجي:: ماكو هيج حجي
ريم:: وانتِ شبيج تبجين
فرح:: ماتشوفيني كاعده اثرم بصل
انتبهت العمه زهور وعمه اقبال وحده
تباوع على الثانيه وإني أحس نفسي
طمست بالفشله من بس تفشلت بس
ماعهاذا عذرته وكتمت
{{شويه نختصر}}
ضلينه احنه نثرم وشويه وجتي
الملايه لأن الفاتحه يوم ونص ولازم
تختم على الضهريه خلصنه احنه وجوي
الشباب اخذو المواد واحنه إني وريم
الوحيدات إلي كضيناها بالمطبخ مي
وجاي وحده تجيب وحده تودي وصارت
الملايه تقرأ ماكدرنه نحضر الختمه بس
نسمعه ونسمع نحيب عمه صابرين
ووليان ومحمد كالساعه يجي ياخذ جاي
محمد:: يله فرح شسالفه
فرح:: أي أي
صبيته على السريع ونطيته إله
ردت اسد الباب بس انتبهت باب
الشارع مفتوح باوعت على حمزه
جان كاعد على كرسي بس مو
بالجادر لا كاعد يم باب البيت
ومخلي شماغه على عيونه ويبجي
طلع محمد وسد الباب وإني هم
سديت باب المطبخ
ختمتها الملايه وليان انتهت من البجي
وتخربطت علينه مرتين وعمه صابرين
ماعرف شنو احجي عليها انتهت عمه
صابرين بفراق عمر انتهو جرح ونفتح
ماضنه يتخيط
وصبو الغده والبيت يشك ويبلع من
الناس والنسوان الكومه بحيث حتى
فوك بالصاله كعدن بس بالمطبخ
ماكعدن لحد ال,2 ضهر صاحو النه
نغسل المواعين
عمه زهور كالت روحن اغسلن الواعين
وأنا اهنا انضف المطبخ
اخذنه زاهي وجلافات وطلعنه
نغسل ونغسل ونرجع اليورا كومه
كدوره وصياني ولحد ماخلصنه
بدن النسوان يخفن واحنه عزلنا وشلنا
كلشي انتاني البقيه يمشن حتى نغسل
البيت لأن صار كله دهن وماينكعد بي
لحد ماراحن وغسلنه كله من فوك
ليجوا وخلينه عمه صابرين ووليان
بالغرفه كاعدات لحد ماكملنه غسل
ومسحنه البيت لمعنه تلمع يله كعدنه
شويه بالصاله جانت حتى أمي موجوده
وعمات وزوجات عمام ليان ووياهن
خالاتها ماسمعنه غير عياط جمانه
وجود بنفس الوقت باوعت عليه أمي وكالت
أمي:: كومي يمه كومي شوفيها
خطيه
هزيت براسي أي وكمت الغرفه لكيتها
جاي تسوي ممه الجمانه وهاي تلزم
برجليها وتبجي وهذاك على الجربايه
ويصرخ عمه كاعده تقرأ قران رحت
على جود وشلتها واني احاول اسكت
بي بس ماكو
فرح:: اششس…. ياعيني شبيك
واخيرا سوت الممه الجمانه وشالتها
على كيفها صعدته على الجربايه وانطتها
ممتها ورجعت على جود اخذته ترضعه
واني وكفت اصفط المصلايات وخليتهن
على الكرسي وسمعت صوت أمي
دتصيح عليه….
طلعت من الغرفه وباوعت عليها
أمي:: يله يمه ابوج دز علينه
عمه زهور:: دخليها ياام فرح
أمي:: لا والله ابوها مايرضه بارحه
كوه عليه قبل
عمه زهور:: على راحتكم هيه فروحه
ماحاجه نكول عليها تعالي هيه أم البيت
وشوكت ماتجي مرحب بيها
فرح:: تسلمين عمه
رحت المرايا ولفيت شالي عدل ورجعت
الغرفه ودعت عمه صابرين مارضت ارجع
بس كتلها ابويه مايرضه اضل ازيد
وودعت ليان واخذت صايتي وطلعت
من الغرفه لكيت أمي متانيتني ودعت
الكل وطلعت وراها
جانو الشباب كلها بالطارمه دنكت
راسي ومشيت ورا أمي بس صدت
عيني على حمزه واكف صفحه ويدخن
كلت بكلبي “” هاذا من شوكت
يدخن “” ونزلت راسي ومشيت…..
•~•~•~•~•~•~•~•~•~
ريم…..
راحت فرح وعمه صابرين كعدت
بالصاله وكابلنها عماتي ينعن ويبجن
وليان بالغرفه ماتطلع منها
حجت عمه صابرين من بين
بيجها وهيه كوه كوه نسمع حسها
عمه صابرين:: وين حمزه
عمه زهور:: برأ يم الزلم
صارت تضرب على رجلها وتبجي
زيد نايم بحضني كمت الغرفه أريد
اخلي على الجربايه لكيت ليان كاعده
وراجيه نفسها على الحربايه وعيونها
تصب صب دموع نزلت زيد على
الجربايه ورحت يمها كعدت
ريم:: ليان..
ليان:: يعني هسه بعد عمر ماشوفه
ريم:: ليان الله…..
ليان:: ليش عافني مو كال ماعوفج
ريم:: الله يرحمه ليان لا تسوين بنفسج
هيج ولج عمه صابرين موزين عليها
عدها سكر
بهل اثناء ماعرف شصار بس سمعنه
صيحه عمه صابرين كمزت بسرعه
وطلعت ومن الغرفه وليان هم خطيه
طفرت وراي عبالها صار شي على عمه
صابرين طلعت ولكيت حمزه حاضنها
ويبجي هوه وياها وليان كعدت بالكاع
وهم صارت تبجي بس مخليه ايدها
على حلكها ماتنسمع بجيتها
عمه صابرين:: اخ يايمه اخ
حمزه:: يمه خويه راح راح عمر راح يمه
من بين البجي والعياط كسرت
سكوتها ليان وهيه تصيح على عمر
ليان:: شلون شلون ماتتت حمزهههه شلونننن عافنيييي عمررر شلووننن عافننيييي
رفع راسه حمزه من حضن عمه صابرين
وهوه وجه مصبوغ أحمر
باوع على ليان إلي مخليه ايدها
على وجهه وتبجي كام بسرعه
وكعد يمها حضنها وهي تكله
ليان:: كلي فدوه كلي شون مات
عمر شلون مات وعافني
•~•~•~•~•~•~•~•~•~•~•~
حمزه…..
بأجر يصادف يوم 5/7 ويصادف ميلاد
عزيز روحي عمر خابرتني ليان قبل يوم
تريد تحتفل بعيد ميلاد عمر وتسويها
مفاجه ما خليت بخاطرها واتفقت
وياها اخذ عمر ونطلع وهي ترتب
الاشياء التريدها
طلعنه بثمانيه بليل اتصلت على أسمر
يودي فرح يم ليان لان رادت البنات
وياها وانا اخذت عمر ورحنه يم محمد
شويه وبعدها طلعنه نفتر بالسياره ماجان
خاطر بالي مكان نروح اله ضلينه ندور
ونفتر بشوارع بغداد والهوى يدخل من
الشباك يبرد الكلوب بس ما يبرد ضحكته
عمر ما يعرف يكعد كل شوي يريد شي
عايش بعفويته مثل الطفل الصغير
عمر:: أسمر وكف السياره
حمزه:: شنو لعب هيه
عمر:: دنطيني يا اخي الغالي شنو تخاف
على سيارتك
حمزه:: انجب لك
وكفت السياره غصبن عني لان اذا زعل
عمر يزعل وما يرضه ابد نزلت وهو نزل
وتبدلنا الاماكن صعد هو وضحكته ما
تفارقه ضحكه من القلب تخلي كل التعب
يروح عبالك الدنيا كلها تضحك وياه
مشه بينه بالسياره واني كل شوي
اضحك من تصرفاته ما اعرف وين
رايحين المهم ما نرجع بعد للبيت
راسلت فرح وكلت الها راح ادك
انطيني ليان دزتلي اوك ودكيت
طلعلي صوت ليان بس ما كدرت
احجي الصوت بدا يرتجف
ليان:: ها حمزه خوما اجيتو
حمزه:: همم لا لا
ليان:: اي عفيه شويه اتأخرو شويه بعد
حمزه:: هممم يله ثيمإلا
سديته منها وعيوني راحت للطريق
كلشي طبيعي بس بثواني تغير كلشي
رفعت راسي والسياره المقابلنه دخلت
بسيارتنه صوت قوي شراره دخان
صرختي طلعت من كلبي
حمزه:: عمرررررررر
انكسر كل شي الحديد الزجاج وحتى
كلبي صوت الحادث ويا صوت أنفاسي
الدم نزل على وجهي ما حسيت بنفسي
بس شفت عمر راسه نازل والدم من
جبينه ايدي راحت عليه بدون ما احس
حمزه:: عمر عمر رد عليه تره ما اتحمل
عمرررررررر
ماكو صوت بس نفس خفيف ودمعه
نزلت من عينه دمعة وداع حسيت الدنيا
سكتت والناس صارت ضباب الصوت
بعيد والهوى بارد ويده بعدها بإيدي
يوم 5/7 اليوم المفروض نضحك بيه
نغنيله نفرح بيه صار يوم الوجع يوم
فقدت بيه جزء من روحي
•~•~•~•~•~•~•~•~•~•
ريم……
رفعت ليان راسها من حضنه عيونها
مفتوحه على وسعهن الدموع متجمعة
بعيونها وصوتها يطلع مهزوز ضعيف
ماينسمع إلا بصعوبة
ليان:: بب… سببي أي عمر مات بسببي
جسمها كله يرجف كامت بسرعه ابتعدت
عنه وكأن النار تاكلها من داخل بس
حمزه كام أسرع منها حضنها وضمه
لصدره كأنه يريد يحميها من نفسها
حمزه:: اشششش ولجج أنا السبب أنا جان المفروض ما أخذ بحجيههه أنا السبب بموته
ايدها جانت ترعش وهي تدفعه من
صدره وصرخت بصوت هز البيت
كلها دموع وانكسار
ليان:: ولكمممم انيييي السببب بسبببيييي خسرتتتت اخوي
ركضت وكعدت يم رجلين عمه صابرين
لزمت ايدها وضربت بيها وجهها والدموع
ماوكفت
ليان:: يمههه ضربيني يمهه يمهه بسببي
خسرتي ابنجج يمههه يمهه بسببي
بسببي عمر ماتتت يمههههههه اخخخ
يابههههه وينكككك
الكل انهار وياها كأنهم هسه يله سمعو
بخبر وفاته عمه صابرين غطت
وجهها بشيلتها وصارت تبجي
وصوتها يطلع مكسور وليان
تخبلت وبدت تفلت من كل شي
عمه زهور وعمه اقبال تقربن عليها
وهنه مدمعات
عمه زهور:: ولجج يمه كومي لسوين
بنفسج هيج
ليان:: اخخخخ عمههههه لو تعرفين
الناررر المشتعلههه بكلبيييي عمهههه
اخووييي راححح بسببي اخخخخخخ
يابههههه
تقدم عليها حمزه حضنها بقوه يحاول
يسكّن رعشة جسمها بس هيه دفعته
بيديها الترجف وركضت للمطبخ
ودموعها تغطي وجهها لحكها
حمزه وهو يصيح وصوته مكسور
حمزه:: ليااانن
عماتي ركضن وراهم واني هم مشيت
المطبخ لكيت ليان تدور بالجرارات
وتصرخ وصوتها مليان يأس
ليان:: وينهننننن
عمه رنا بخوف عليها:: شنو هنه يمه
ليان:: السجاجين السجاجين وينهننن
لزم ايدها بقوه حمزه يسألها وصوته يرتجف
_شسوين بيهن
ليان:: أريد اموت نفسي واخلصكم مني
بحرگه سريعه رفع ايده حمزه
ولطشها براشدي على وجهه
والدموع بعينه………
يتبععععع……..
•~•~•~•~•~•~•~•~•~•
الكاتبه ضحى اليوسف
الفصل التالي: اضغط هنا
يتبع.. (رواية احفاد عمران) اضغط على اسم الرواية لتجد الفهرس كاملاً بجميع الفصول.