رواية احفاد عمران – الفصل الثاني عشر
#احفاد عمران
بارت _12_
………………………………
صغار جنه وكلشي بـ عيون
الصغار يصير جنه يامراجح الهوى
لاخن كمرنا
وياك دواليب الخشب رجعن عمرنا
……………………………….
“” ليان””
ابتعدت عنها وهي صارت تدير براسها
مبينه راح تكعد شوي وطلع صوت بجيها
كمت اخذتها بحضني وصرت اسكت بيها
شوي وسكتت ونامت هم وخرتها من
حضني أريد اخليها على الجربايه
رجعت بجت رجعتها الحضني ونومتها
باوعت عليها ورفعت ايدي مشيت اصبعي
على شعراتها وصرت ارتب بيهن
فجأة لكيت روحي ابتسم واني العب
بشعراتها ميلت راسي إلها وصفنت عليها
شكلها كلش بريئ
ولطيف عيو
نها كبار
وحلوات وعدها رموش اثخان خشمها
وشفايفها صغار
رفعتها الوجهي وصرت اطبع بوسات على
كل جزء بيها حسيت ارتاحيت يمها بلرغم
ماردتها وما طايقتها بس نقطة ضعفي
الاطفال ماكدر اتحمل اشوف طفل وما
اخلي بحضني همستلها
_ماكدر ماكدر كلشي اسوي اني ضعيفه
حضنتها حيل ونزلت دمعتي مهمه يكن
هاي تضل طفله وهي مالها دخل بمشاكلنه
ماردت اسوي شي اخلي ربي يغضب عليه مستحيل
نتبهت عليها صارت تفتح بعيونه الصغار
شوي شوي وضهرت الي عيونه زرك مثل
البحر ابتسمت الها ورجعتها على الجربايه
وكمت اخذت جرجف من عمتي وطبكته
لأن أضن لأحد الان كلشي مامشترين الها
اخذته ورحت الصاله خليته بالكاع ورجعت
عليها شلتها وطلعتها ونزلتها على كيفي
وهي تتحرك دور واحد يحل الها الكماط
لأن خطيه لافينه تلفف حللتها وخليتها
براحتها واني هم ضليت كاعده يمها
بنص ساعه
ندك باب المطبخ مبين واحد منهم لأن
داخلين جوه ويردون واحد يفتح الباب
كمت اني وعيوني على “جمانه” فتحت
الباب صار بوجهي اسمر وهم شايل
اشيائات وخرت على صفحه وهو دخل
قفلت الباب ودخلت لكيته يباوع على
بنته الي كاعده وفاتحه عيونها وتلعب
انتبهت عليه ذب حسره وصعد فوك
وهو شايل الغراض الي ماعرف شنو هنه
-شماله هذا ماكال بنتي ابوسها عابت
اي والله
رجعت كعدت يمها وماهتميت اله وشنو
جاي يسوي فوك ضليت العبها وضحكها
واني اعرف هي بهيج عمر ماتشوفني…….
شوي ونزل اسمر باوع عليه واردف
اسمر:: صعديها فوك بكركوتها ونوميها
ورتبي ملابسها
ليان:: هاي بنتك اخذها وصعدها ونومها
ورجع رتب ملابسها اني شنو دخلني
ماحاجاني وراح المغسله يغسل
وصاح عليه
اسمر:: أنا طالع لا تقفلين الباب شوي واجي
واني هم مارديت عليه راح طلع واني شلت
جمانه ودصعد الدرج بايه بايه وخايفه
عليها لا توكع لأن أول مره اشيل طفل
واصعد بي درج وصلنا الغرفه بخير
وسلامه وفتحتها ونصدمت من شفت
مرتب الكركوت وملابس أطفال مكومه
على الجربايه
ومهوس الغرفه تهوس
مشيت خليت جمانه على الجربايه ورجعت
على الكركوت زحفته خليته بصف الجربايه
باوعت على الملابس ضحكت بكلبي
ومشيت لكنتور طلعت ملابسه المعقجه
وشمرتهن بالكاع
وأخذت ملابس جمانه
وصرت اصفط بيهن رتبتهن كلهن وجمانه
تلعب باوعت ملابسه بالكاع شلتهن وطلعت
من الغرفه شمرتهن كبال غرفه ريم ورجعت
الغرفه شلت الكراتين ولجياسه
بس مانزلتهن ماكدرت جمانه تضل
وحدها وكلت هو ينزل مو بس يوصخ
علينه طلعتهن من الغرفه هم ورجعت
رتبت الغرفه كلها باوعت على جمانه لكيته
نايمه عدلت كركوتها وخليت المخده
الصغيرونه وخليتها رحت لفلفت ايدها
على كيفي وشلتها خليتها بالكركوت مالها
شغلت التلفزيون وخليته على القرآن
وتمددت اني هم بقيت صافنه على السكف
_اني شجاي اسوي
_جاي اداري بنت زوجي
_بس هيه مالها ذنب
_تبقة بنته لاسمر
افكاري ملخبطه وماعرف شنو اسوي
وشلون اتصرف مليت لا اكو أهل
يسندوك ولا اكو زوج
سمعت صوت الباب ويدل على أن انفتح
انداريت لكيت اسمر يباوع عليه بنظرات
عصبيه حجه بصوت وهو صاك على اسنانه
اسمر:: تعاي وراي
كلبت عيوني وكمت ورا أريد اشوف
شعنده طلعت وسديت الباب على كيفي
كتفت أيدي الصدري واني اتاني يحجي
اشر إلي بايده على الملابس إلي مرميات
بالأرض وصاح بيه
أسمر:: شنووو هااايييي
ليان بهدوء:: عفوا شنو
عوج حلكه وصار يقلد عليه
اسمر:: عفواا شينوو
ضحكت بكلبي عليه لأن اعرف بي عصبي
من وره الملابس ويحجي بكيفه
ليان:: اوو ماعندك سالفه ارجع الغرفه احسن
انداريت عود ردت ادخل الغرفه وصاح بيه
اسمر:: لياننن
ليان وهي تلتفت إله:: خيرررر
اسمر:: لتصيحين…… وهاي الملابس هس
اتشيليها وترجعيها المكانها
ليان:: استاذ اسمر أي اوامر ثانيه
اسمر:: ليان بدون حجي ويلا مثل ماكتلج
ماتحملت شنو هذا جاي يامر وعبالك اشتغل
عنده رفعت اصبعي بوجه واني احجي
ليان:: شوف ترا اني مو خدامه عندك
افتهمت وثاني شي ذني الملابس ميرجعن
للغرفه وحتى أنت ما تدخل لهاي الغرفه
افتهمتتت
خزرني ورفع ايده لزم اصبعي حيل حسيته
نكسر وحجيه بعصبيه
اسمر:: صوتج ميعله واصبعج ما يرفع لا
قسم بالله العظيم اكسره الج
عاف أيدي وراح بتجاه الملابس صحت عليه
ليان:: يله لم ملابسك ودخل غرفه اختك
وبعد لا تشوفونه وجهك
اسمر وهو داير وجه عني:: شكالولج ميت
على شكولج
ماجاوبت وعندي أهم شي وأخيرا سويت
إلي براسي وبعد ماخلي يدخل الغرفه
رجعت الغرفه دخلت وصرت أغني
_مسيطره همشيك مسطره
رحت الجربايه ومددت مرتاحه واني
احجي وي نفسي
_ أي أي ياسمر غرفه واخذناها بعد وبعد
مر سبوعين صرت اني إلي اهتم بجمانه
لأن أصلا لاحضت على الكل محد رايدها
ولا أحد طايقها اسمر بعيادته من الصبح
لليل وقليل اشوفه واصلا مايتقرب الجمانه
ولا حتى يسئل عليها ولا كأن هي بنته عمتي يوميه رايحه لو سوك لو جوارين وحتى إذا ماعدها شي عادي تلبس عبايتها وطير
مرن يومين جنت كاعده اني يم جمانه
بغرفتنه وماسمعت غير عمتي تصيح عليه
كمت اخذت جمانه بحضني ونزلت على
كيفي
بعدني منازله كل الدرج ونتبهت
يمنه بيت اختها درت عيوني ورفعت
راسي وعدلت جمانه بحضني ونزلت
وصحت
_السلام عليكم
_وعليكم السلام
سلمت على اختها العمتي وعلى بنت
اختها على مااعتقد ماعرف اسمها شنو
وكعدت يمهن على القنفه واني بيدي
جمانه مر ربع ساعه من سوالفهن
وضحكهن واني بس صافنه عليهن
شويه وجان تكمز هاي البنيه وجتي
كعدت بصفي وضلت تلاعب بجمانه
جانت بنيه حلوه هواي بس كلبي
مارتاحلها أبدا شوي وحجت امها
وي عمتي
خاله اسمر:: عيني ليان يمه هاي ياسمين
تصير بتي
ليان:: أهلا خاله هلا بيج وبيها
رجعت التفتت على عمه سناء واردفت
خاله اسمر:: والله يوميه تكلي تعالي
وديني لبيت خاله سناء اريد اتعرف
على ليان
وهم اشوف الطفله
عمه سناء:: ياعيني خو اجيبها شتردين منها
خاله اسمر:: أي والله وكلت هم وي ليان
هسه هم تضوج وحده ونوب وياها
جمانه هم تساعدها ياسمين
مارتاحيت الكلامها شنو تضوج شنو
تساعده بجمانه يعني راح تبقى اهنا
هلا هلا حجيت وإني اكوم
ليان:: من رخصتكم جمانه صار وكت نومها
عمه سناء:: روحي نوميها
خاله أسمر:: مرخوصه عيني
صعدت فوك ودخلت الغرفه خليت جمانه
على الجربايه وضلت هي تلعب واصلا
جذب مو وكت نومها واصلا هي توها
كعدت بس ماعاجبني ابقه جوه وياهم
ضليت الاعب بجمانه إلي حسيتها جزء
مني ومن روحي
ندك باب الغرفه وقبل لا احجي واكول
منو انفتح ودخلت ياسمين وهي الضحكه
شاكه حلكها على شنو ماعرف
ياسمين:: عادي اكعد اهنا
ليان:: عادي كعدي
جتي وكعدت وين بصف جمانه وصارت
تلزم بايده وتلاعب بيها
ماهتميت باوعت
على الساعه صار وكت اسويلها الممه لأن
كل ساعتين ممه باوعت الممه مامغسوله
انداريت على ياسمين وكلت
ليان:: عادي تضلين يمها بين ماغسل
الممه مالتها
ياسمين بابتسامه خبيثه:: أي أي عادي
اخذته المميه ونزلت وإني كلبي يم جمانه
أحس خايفه عليها منين ماعرف نزلت
جوه جانت خاله أسمر ماموجوده يعني
رايحه اهمداها مااخذت بتها وياها المن
عايفتها غسلت المميه بسرعه وصعدت
وجان اشوف…
ياسمين شايله جمانه من ايدها وعود
تلاعبها وهي راح تخلعها اليدها طفرت
عليها واخذت جمانه بحضني وصحت
بوجههه
ليان:: مخبلههه انتيييي شلون هيج تشيليها
ياسمين:: شبيج ترا ماسويت إلها شي
بس شلتها
ليان:: شلتيها شنو انت شايفه نفسج شلون
جنتي شايلتها لو لا
ياسمين:: اهووو كاافي كلبتيها علينه الام
الحنونه والي تخاف على بتها اذكري ترا
هي مو بتج فلا ياخذج الدور ليورا
ليان وهي اتاشر للباب:: ياسمين اطلعي برا
ياسمين بتحدي:: الا اندمج على هاي
طردتج الي
ليان:: اطلعي رجآء
طلعت واني جنت حاضنه جمانه بقوتي
وكأن اريد ادخلها الكلبي وماريد أحد
يمسها باوعت عليها فاتحه عيونه
وصافنه ابتسمت الها ونزلتها لكركوت
مالتها
ليان:: مستحيل بعد اعوفج وحدج
سويت الها ممه لأن جنت مخليه ترمز بي
مي دافي والحليب كلهن بالغرفه حتى ماضل
اصعد وانزل واعوف جمانه وحده رضعتها
الممه ورحت الكنتور طلعت الها لبسه
وطلعت بودره وحفوضه ومشطها لاصغير
وطلعت كتر هم اسويلها ستوته لأن شعراها
ثخين وهم حتى متنضب على شعرها
وتاذيها
خليتهن على الجربايه ورحت
صحت العمتي من فوك
ليان:: عمه سنااااءءء…….عمهههه سناااءءءءء
عمه سناء:: خير خير شكووو
ليان:: تعالي سبحي جمانه
عمه سناء:: خليها بعدين
ليان:: عمه دتعالي ياعمه يابعدين اريد
انومها وهم رضعت هستوها
ماحاجتني وصعدت ضحكت ورجعت
الغرفه شلت جمانه لحد
لحد مادخلت
هي الغرفه باوعت عليه وكالت
من ورا خشمها
عمه سناء:: جيبيها جيبيها مدبرين شي
ليان وهي تنطيها الطفله:: ديله ياعمه
هسه انتي شمسويه هوه بس سبحيها
واني البسها
اخذتها مني ودخلت الحمام شويه
وسمعت جمانه تبجي وهاي كلعاده
من تسبحها تبجي ضليت اعزل
بالغرفه لحد مطلعت انطتني
ياها ونزلت كبل
هواي انقهر على جمانه لا من جد يحبها
ويسئل عليها ولا من جده تخاف وتهتم
بيها ولا من ابو
اسمر من اجيت لهذا
البيت اليوم اني ماشفته متقرب للجمانه
ولا لامسها
خليت جمانه على الجربايه وصرت
اخلي الها بودره والبس بيها جان
جو كلش حار وخطيه هي تتكمط
لأن صغيره لبستها نفنوف صغيروني
وخفيف هم ولبستها الحفوضه الله
ينطيها عمتي علمتني كلشي اسوي
الها بس حتى تخلص هيه من مسوليتها
مشطت شعرها وشديته الها
باوعت عليها طلعت تخبل حرامات
ماعندي موبايل اخذ الها صوره بس
كلت يلا بس اشوف اسمر اكله يجيبلي
موبايل كمطتها وكبل نامت خليتها
بكركوتها وكمت نزلت جانت عمه
سناء كاعده هي وياسمين ماحجيت
شي دخلت المطبخ وردت احضر العشه
بس بعدين صفنت وكلت
-التريد عشه تكوم وتسوي بايدها اني شعليه
طلعت من المطبخ وكعدت يمهن بصاله
ضلن هن يسولفن واني بس استمع ماشارك بحديثهن شوي ونفتح باب المطبخ مادرت
وجهي ولا باوعت منو جان بس سمعت صوته
اسمر:: السلام عليكم
عمه سناء:: وعليكم السلام هلا يمه
ياسمين وهي تكوم:: هلو سموري شلونك
اجتني الضحكه بس ماضحكت وبس
انرسمت ابتسامه على وجهي انداريت
اله واشرت براسي عليه انو يلا جاوبها
باوع عليه ورجع باوع على ياسمين واردف
اسمر:: هلا هلا
ودنك راسه وصعد كبل فوك واني اتذكرت
أن لازم احجي وياه كمت وردت اصعد فوك
بس استوقفني صوت ياسمين
ياسمين:: ها ليان وين صاعده تعالي ضلي يمنه
ليان وهي تصعد للدرج:: رايحه اشوف جمانه
ماهتميت الها اصلا هي منو وتكلي
تعالي ولا تصعدين امرها مو طبيعي
وصلت الغرفه ريم بس ترددت افتحها
دكيت الباب على كيفي ماكو صوت
رجعت دكيته هم ماكو صوت مديت
أيدي اليده الباب وفتحت الباب على
كيفي ودخلت ماكو أحد
باوعت على
باب الحمام هم جان مفتوح يعني
مو بالحمام استغربت وين راح وهو
توه صعد
انداريت على غرفته لكيت الباب شوي
مفتوح يعني يم جمانه!!
معقولههه
ستغربت لأن هو أصلا ماعليه بيها
معقوله صدك ويطلع يمها تمشيت
خطوات بطيئه الغرفته
دخلت على
كيفي باوعت جان كاعد على الجربايه
ومكابل الكركوت مال جمانه ومنطي
ظهره الباب ويحجي وي جمانه بس
مامنتبه اني موجوده
اسمر:: أنتِ امانة رسل يمي
_اعرف تحتاجين الحنان والاهتمام من
الام بس ليان ماراح تقصر وياج أنا
اعرف وراح تكون الج الام والاخت
وصديقه
_دائما نامي وانتِ مرتاحه لأن ليان
موجوده بحياتج
لا اراديه نزلت دموعي واني اسمع كلامه
طلعت شهكتي بدون قصدي وكبل التفت
عليه شافني ابجي اجه عليه بسرعه وهو
يحجي بنفس صوته الحنون
اسمر:: شبيج ليان
ماچن كالي شبيج وعبالك كالي زيدي
بعد بالبجي ضليت ابجي واشهك وهو
ماعرف شيسوي ولا يعرف ليش ابجي
كبل لا اراديآ اجه حضني حيل وضمني
الصدره
واني هم جنت محتاجه هذا
الحض رفعت أيدي وحضنتها بقوة
وضليت ابجي على شنو ومنو ماعرف
بس أحس كلشي انجمع اكبالي وكلشي
انعاد عليه
بس فجأة دفعته حيل وصحت بوجه
ليان:: وخررر عنييي لا تلمسنييييي
اسمر بصياح:: تخبلتييي
ليان:: أي أي تخبلت بس لا تتقرب مني
راد يحجي بس فجأة صار صوت يم
الباب وسمعنه ثنينه صوت ياسمين
وهي تكول
ياسمين:: ليان ليان عمه تكول شكو شصاير وتصيح
باوع عليه اسمر بخزره وكان يكلي ها عاجبج سمعو صوتج فرك راسه وفتح الباب وحاجه ياسمين
اسمر:: رجال ومرته ماكو شي
ماشفتها لان جنت صفحه بس اسمع صوتها
ياسمين:: ها لعد روح اكول الخاله سناء
ماكو شي
ماحاجاها وسد الباب باوعت عليه وخزرته
ليان:: اطلع
اسمر:: وين أروح
ليان:: الغرفه ريم وين يعني
اسمر:: ماكدر بعد
ليان بصيحه:: عفواااااا شنووووو ماتكدررر
اسمر:: ياسمين يمنه يعني اكيد ماراح
نعوفها تنام جوه وعلى الأرض
ليان:: عادي وإذا نامت بالأرض راح
تنكال…. ويلا ممكن تطلع
اسمر:: الحجي وياج صدك مايفيد
عافني على وكفتي وراح تمدد على
الجربايه باوعت عليه واردفت
ليان:: أي نام عادي بس ماتنام على الجربايه
اسمر:: أي كملي
ليان بهدوء:: ماكو داعي اكمل افتهمت المقصود……
تجاهلني وكام فتح الباب وطلع رحت
كعدت على الجربايه اشو شوي ونفتح
الباب دخل وبيده ملابس هنه وتعاليكهن
راح الكنتور علكهن واخذ تراك أسود
وراح الحمام يسبح كعدت جمانه بهل
أثناء كمت سويت الها ممه وشلتها
خليتها بحضني وكعدت على السرير
ونطيتها الممه ترضع طلع اسمر باوع
علينه ودار وجهه راح المرايا يمشط
ويعدل وفتح المجر مال الميز طلع عطر
اذكرت اني كلهن ذابتهن خطيه راحت
عليه العطور مالته باوع عليه واردف
اسمر:: شنو سويتن عشه
باوعت عليه وكلت إله ببتسامه
ليان:: ماسوينه
عكد حواجبه وحجه شبه صوت بعصبيه
اسمر:: صدك تحجن عود
ليان:: مجذبين عليك من قبل
اسمر:: راح اجيب عشه من برا…..
ماتستحن يمجن خطار وكاعدات
ليان:: ديله هسه هوه الخطار منو
اشو هيه بنت خالتك
اسمر:: رايح أنا…… محتاجه شي ال جمانه
باوعت عليه وهاي أول مره يسئل
عليها وإذا جانت محتاجه شي
ليان:: خلي تكمل رضاعه واني اكلك
كعد على الكرسي وبقى ينتظر كملت
رضاعه جمانه وخليتها بكركوتها وكمت
ضليت ادور بجرارات وهو ولا كال
شنو تردين بقه ساكت أخير شي لكيت
الاريده دفتر وقلم اخذتهن وكعدت
على الجربايه وصرت اسجل إله
_حليب
_حفوظات
_بودره بدون عطر
_ملهي
_موبايل
شكيت الورقه وكمت قدمتها إله اخذها
بدون مايباوع بوجهي وصار يقراها
وكمز من يمه
اسمر:: موبايل شنوووووو
ليان:: شنو موبايل شنو اريد موبايل
اسمر:: ماكو موبايل
مشه بتجاه الباب وديريد يطلع صحت عليه
ليان:: اسمر أن دخلت هذا الباب
وماجايبلي موبايل بنتك ماتقربلها
واخليك أنت تكعد تسوي مميات الها
ماندار عليه ولا كأن اني حجيت خله
وراح واني هم كلت اضل ع قراري………
////////////////////
“”ريم””
مرن ثلاث اسابيع والياس ماعاجبني
ابد صاير هواي يصفن ويخابر هواي
ومن اسئله منو يكول نرجس واني
مكتفيه بحجيه ولازم اصدكه بس…
جنة كاعدين كل احنه سوه بصاله
ونسولف ونضحك جانت دنيا ليل
وبعدها باول تعلولتها فجأة اندك
الجرس كام إلياس فتحه وشويه
وجان نسمع صوت ضحكه نرجس
وهي تكول
نرجس:: شنهي أنا محد يسئل عليه
ضحكت عمه اقبال وكامت عليها وضلت
تبوس بيها “” طبعا نرجس منطيها
لغريب ومو دائما تجي”” لزمت بطني
إلي جانت واصله الحلكي وكمت
سلمت عليها وطلعت هلمره جايه
وراح تضل يمنه كلش فرحنه بيها
ولأن صار هواي ماشايفينها
بليل جنه بس إني وياها كاعدين سهرانين
وكلها نايمه وفجاة خطر على بالي اسئلها
ريم:: اكلج نرجس
نرجس:: ها عمري
ريم:: شعجب ادكين هواي على إلياس
بهاي الفتره أكو شي صاير!!
نرجس:: انااا ادك ولج شوكت
ريم:: شبيج حتى اليوم دكيتي
نرجس:: أنتِ تعرفين نوبه وحده دكيت
عليه من ذيج جيتي وبعد ماداكه واصلا
ماعندي موبايل صار سبوعين انكسر
ماعرف إذا هيه جانت صدمه شي بس
إني جنت كاشفته يجذب عليه ومليون
مره حاولت اخذ موبايله بس هو دائما
شايله بيده بس بعد كلام نرجس اتاكدت
كل شكوكي جانت بمكانها ضلينه إني
ونرجس ل3بليل كاعدين بس أخير شي
هيه نعست واني هم صرت اغفي
نرجس:: يله يابه روحي يم رجلج خل انام
ريم ببتسامه:: تصبحين على خير
نرجس:: وانتِ من أهل الخير
عفتها وكمت صعدت فوك فتحت الباب
باوعت الكلوب بعده مشتغل يمكن مانايم
أصلا رحت الكنتور طلعت دشداشه خفيفه وعريضه حتى ارتاح بيها بالنومه
ودخلت الحمام لبستها وطلعت رحت
على صفحه الجربايه ونمت ونطيته ظهري………
///////////////////////
“”ليان””
مانزلت وضليت اعناد بي كاعده بالغرفه
وحدي وجمانه نايمه ضجت حيل وكلت
هاي هيه كلشي ماراح تحصلين كمت
وطلعت من الغرفه بس فتحت بابها
خاف جمانه تكعد حتى اسمعها
بعدني مانازله وسمعت صوتهم ومن
ضمنهم صوت أسمر
_يعني راجع وما جايب إلي موبايل
خليت ورجعت الغرفه وغفلتها علينه إني
اعلمك وتريد تنام بالغرفه هم اوكفلي
ضليت كاعده بساعه واني فوك واسمع
سوالفهم متت بدمي من القهر شنو إني
اهنا مامخليلي أي اعتبار انهاريت وماصرت
اعرف اتصرف كمت على الميز وبحركه
سريعة ذبيت إلي عليه كله وصحت
بصوت عالي
_اللههههه ليوووفقكممممم
_اللههه يياخذكممممم
على صوتي كعدت جمانه وصارت
تبجي بس ماهتميت الها وكعدت
بالكاع لميت رجليه الصدري وكعدت
ابجي جمانه تبجي صفحه واني ابجي
صفحه
صار يندك الباب بقوه كمت حيل مابيه
كوه امشي فتحت الباب بس ماشفت
منو إلي جان يدكه ومشيت الحمام
دخلت وقفلت عليه الباب وكعدت
ورجيت ضهري على الباب وضليت
ابجي واشهك أحس انتهيت رفعت
أيدي على الحايط وكوه سندت
نفسي وكمت واحجي وي نفسي
_كل إلي ديصير بيه خطيتي بركبتك جدو
شغلت الدوش وسبحت وتذكرت ماجايبه
ملابس اخذت برنصه ولبسته ولفيته
عليه لف طلعت من الغرفه واني بالي
كله طالع
بس جان العكس لكيته كاعد على الكرسي
ويهز برجله ماباوعتله ومشيت بتجاه
الكنتور أخذت ملابس ورجعت الحمام
بدلت وطلعت لكيته على نفس كعدته
تجاهلته وباوعت بالكاع لكيت المشط
اخذته ووكفت على المرايا امشط
ماتحمل وكام وكف وراي يباوع عليه
بالمرايه ويحجي
أسمر:: ليان شبيج
ماهتميت وكأن مو موجود ضليت
امشط شعري وهو ضل على وكفته
أسمر:: مو احجي وياج
ليان بدون اهميه:: نعم
اسمر:: نعم الله ضلوعج
انداريت على الكركوت ماكو جمانه
التفتت إله وكلت بستغراب
ليان:: وين جمانه!!
اسمر:: جوا يم أمي
ليان وهي تمشي بتجاه الجربايه:: يي
زين أريد أنام وراسي بارد
اسمر بتسائل:: يعني بعد ماجيبها الج
راح تنامين
ليان:: اخذها يمك….. من تطلع سد الضوء
تمددت على الجربايه وتغطيت انطيت
ظهري الباب شوي ونطفه الضوء ونسد
الباب نزلت دمعتي حاره على خدي
عضيت ايدي حتى ماتطلع شهكاتي
بس ماكدرت اكتمهن وغفيت واني
دموعي على خدي…..
كعدت الصبح كمت من الجربايه باوعت
على الغرفه هوسه فركت عيوني ورحت
الحمام غسلت وجهي وشلت شعري كبه
وصرت الملم بيها ….
نزلت جوه جانو كاعدين على الريوك
كعدت وياهم بدون كلام
خلصو وكامو همه ووياهم ياسمين
واني اكلت لكمتين
وكمت لميت المواعين وغسلتهن
ضل بالي وكلبي يم جمانه رحت
على غرفه عمتي ماكو سئلت عمتي
إلي جانت كاعده يم ياسمين ودك
سوالف وضحك
ليان:: عمه وين جمانه
باوعت عليه ورجعت كلبت عيونها وجاوبتني
عمه سناء:: بغرفه ريم
ستغربت شسوي بغرفه ريم ومنو وداها
بس بعدين تذكرت يمنه ياسمين الجلبه
اكيد استغلت الفرصه واخذها صعدت
فوك واني روحي تريد توصل الها ونفسي
رايد يشتم عطرها
فتحت الباب ولكيتها نايمه على السرير
إني شفتها لو چن ردت روحي مشيت
بخطوات سريعه وشلتها ضميتها
الصدري واني
ضميتها الصدري واني مخليه راسي
بركبتها اشم بيها اخذتها ومشيت طلعت
من غرفه ريم ودخلت الغرفتنه نزلتها على
السرير وحللتها طلعت ايدها وصارت
تتمغط ابتسمت واني اباوع عليها
ماجنت اعرف راح احبها الهاي الدرجه
فكرت نفسي راح اكدر اكرها بسبب
اسمر وبسبب الي صار ويايه بس هسه
احس يومي بلا معنى بدونها صرت
احسها جزء مني واحسها “”بنتي””
اندك الباب وصحت “ادخل”
انفتح الباب ومدت راسها ياسمين
ضحكت وكالت
ياسمين:: ادخل اكعد يمجن
ليان:: دخلي
جتي كعدت وصارت تلاعب جمانه
بالنص ساعه واحنه كاعدين بس
فجاة جمانه صرت تتقيئ باوعت
عليها بصدمه واني اشوفها تتقيئ
بالون اصفر كامت ياسمين وصاحت
على عمه سناء
بس للصدمه الأكبر جان اسمر هم
موجود دخلو ثنينهم الغرفه واني
على صدمتي اباوع الجمانه
ودموعي صارت تنزل على
خدي
تقربت عمه سناء على جمانه وصاحت
بوجهي
عمه سناء:: شسويتي الطفلههه الله
ليوفقج ولججج شسويتي
ليان ببجي:: ماسوي……..
بعدني داريد اكمل كلامي واجه أسمر
لزمني من اكتافي حيل ولغضب باين
على وجهه صاح بوجهي
اسمر:: تردين تخلصين منها مووو
هزيت براسي بمعنى لا وإني دموعي
تنزل عشره عشره وايدي ترجف…
يتبعععععع………
////////////////////////
الفصل التالي: اضغط هنا
يتبع.. (رواية احفاد عمران) اضغط على اسم الرواية لتجد الفهرس كاملاً بجميع الفصول.