رواية بنات المنشاوي الجزء الثالث – الفصل الثاني والعشرون
بارت ٢٢
بقلم خلود وائل 🌻
كانت تجلس فضه بغيظ مكتوم تبدي عكسه تماما وتبتسم بمهارة لزين بينما تختلس النظرات الحاقدة بين التارة والاخري نحو ريان وابرار الذان تحاوطهما السعادة وتقطر اعينهم فرحه
ريان : يبووي عليكي طلعتي چمر چوي عن قريب يابت الناس
ابرار بخجل : وانت كنت شايفني حلوة من بعيد ؟
ريان : عمري مشفت غيرك ياابرار وبحياتي مفرحت بقرب حد مني اكدة كيف منا فرحان دلوك ده انا كنت بطلبك من ربنا بالاسم في كل صلاه
ابرار بدهشه : انت تعرفني من ميتي ! اققصد يعني لساك شايفني من سنه واحدة وتخاطيف اكدة
ريان بهيام: لاه يامهجه قلبي أني شفتك بأول يوم بالچامعه واني عوصل زين اخوي ويومها انتي كنتي لابسه فستان بمبي وفيه ورد ابيض صغير اكدة وشنطه صغيرة علي الچمب اكدة
ابرار بتفاجئ : وة لساك فاكر كنت لابسه ايه
ريان : ولساتي فاكر كيف كان حالي ساعتها ..ثم اكمل بنظرة حانيه .. أني بحبك چوي ياابرار ووچودك جمبي دلوك نعمه لساتي ممصدقهاش
اسبلت ناظريها ارضا بخجل شديد ذادها جمالا وعشقا بأعين ريان بينما تلك الحربائه الملونه تستشيط غضبا علي الجانب الاخر
زين : مشاء الله طلعتي حلوة چوي يافضه
فضه : من يوم يومي وأني زينه البنات
زين وهو يعقد حاجبيه : ايه التواضع دة !
فضه : بچول ايه يازيني انت لساك مخابرنيش ولما يوحصل هتفرح بيا چوي
زين بأستغراب: زينك !
فضه بابتسامه : ايوة مش راچلي وتاج راسي ولا إيه
زين مجاملا اياها بابتسامه : تعيشي يابت الناس
فضه : الا صحيح انت ليه مرضيتش تحدد جوازنا مع اخوك بنفس اليوم اققصد يعني ابوي بلغني انك طلبت نطول في الخطوبه دى
زين : ومالك مستعچله ليه اكدة
فضه : اني مش مستعچله ولا حاچه بس يعني خطوبتنا بيوم واحد ليه ميكونش كمان الفرح
زين : بكفايه تكون الخطوبه سوا امي خلفت كل واحد فينا لحاله ومن حقها تفرح بكل واحد بكيفها وكمان اخوي وعروسته ليهم نفس يعيشو يومهم لحالهم ولا ايه
فضه بأمتعاض : ايوة امال
كان حمزة يقف برفقه يونس يتبادلون الاحاديث وأعين حمزة منطلقه تجوب المكان كعادته الفاسدة
يونس : مجدي كلمني وبيقول اننا لازم نرجع في اققرب وقت
حمزة : ليه ياعم في ايه ..ثم اكنل وهو يلتفت بناظريه برفقه فتاه مارة بجانبهم هاتفا لها بوقاحه : يامساء القنابل ممكن نتقابل
امسك يونس بوجه حمزة وجذبه نحوة لينظر اليه هاتفا بحدة خفيفه : انت عبيط يابني انت ناسي احنا فين
حمزة : في البلد هنكون فين يعني انا لسه مخرفتش سيبني بقي اشوف شغلي
يونس : تعالي هنا يامجنون عاوز تشقط واحدة من بنات الصعيد ال اصغر شنب غي عيله اي واحدة فيهم يقف عليه الصقر
حمزة : ياعم فكك من ال يشكك متبقاش اوڤر دة البنات دول اطعم الكائنات طب بص شوف الفرولايه ال هناك دي تتاكل اكل بالله
يونس بغيظ : يااخي اتق الله هتقول لربنا ايه
حمزة : الله انا عملت ايه الوقتي دة انا بتأمل في جمال خلق الواحد الأحد
يونس بسخرية : لا إله إلا الله … طب ركز معايا الله يهديك
حمزة بملل : اطربني ياحبيب اخوك عاوز من ام حمزة ايه
يونس بعمليه : تيم ابن عمك كلمني امبارح وبلغني ان في كام شحنه لينا متعطله في المينا بسبب حوارات فاضيه والنهاردة مجدي كلمني وقال ان حد من حبايبنا ال في الضرايب بلغه ان في حد بينخرب ورانا وانا مش راضي ابلغ ابوك ولا عمك
حمزة : فعايزني انا ابلغم يازين مااختارت والله
يونس : لاياغبي
حمزة : الله يكرمك ياحبيبي
يونس : الحوارات دى كلها فكسانه وتخلص بمكالمه تليفون بس انا مش مرتاح حاسس ان في حاجه غلط وفي حد ناوي علي الأذيه
حمزة بجديه : انت مش ماشي في السليم وكل حاجه تمام ومراعي ربنا
يونس : الحمد لله
حمزة : يبقي تفكك من الهري دة كله وامشي عدل يحتار عدوك فيك ومتشغلش ابوك ولا اي حد بالليله دى كلها وخلص انت وتيم من سكات
يونس : تمام… اعمل حسابك سارة مرات تيم هتولد الاسبوع ال جاي جهز هديه تليق بيها
حمزة : ياعم انت حد مسلطك عليا حد قالك اني فاضي للكلام دة
يونس بتعمد اغاظته : ايوة ابوك ال قالي سلام ياموزة
حمزة بنرفزة : متقولش موزة
من زاويه اخري ****
نغم بغليان داخلي : شايفه شايفه ياهانم اخوكي وعمايله
هايا : وانا مالي ياستي ولا مقدرش علي الحمار
نغم : فعلا هو حمار والله وعينه فارغه عمال يعاكس طوب الأرض
هايا بمرح : صراحه السيراميك تحفه بيلمع كدة
نغم : هايا انتي هتحرقي شويه الدم ال لسه فاضلينلي من اخوكي
هايا بقهقهه : بهزر معاكي يابنتي فكي وفرفشي كدة دى خطوبه اخواتك الاتنين
نغم : لا مش قادرة لازم احرق دمه كدة كتير عليا انا ضغطي علي
بعد دقائق اتجهت نغم نحو حمزة واخبرته بأنها لم تحضر هاتفها من السيارة وانها بحاجه اليه وطلبت منه ان يرافقها للخارج ففعل مثلما طلبت منه ثم اتجهو نحو سيارة والدها وطلبت منه ان يدلف للداخل ويبحث عن الهاتف ففعل مثلما طلبت ولكنه تفاجئ بأنها اغلقت السيارة اوتوماتيكيا بالمفتاح فأعتدل في جلسته سريعا والتفت نحوها من خلف الزجاج وضربه بغيظ عدة مرات
حمزة : افتحي يازفته انتي والله لربيكي
نغم بحركات بهلوانيه : نعم بتقول ايه مش سامعاااك علي صوتك
حمزة وهو يضرب الزجاج : قلتلك افتحي
لوحت بيديها ساخرة ثم دلفت للداخل اما هو فتملكت نيران الغضب منه وظل يضرب الباب ولكن دون فائدة بينما اتجهت هي نحو بضع العمال الذي يعملون لدي والدها وهتفت بذعر مصطنع : الحقوني ياخلق الحقوني
احد العمال : خبر ايه ياست البنات
نغم : روحت اچيب طلب لأبوي من عربيته لقيت فيها حرامي فتحها وكان ناوي يهرب بيها فقفلت الباب بسرعه عليه وچيتلكم طوالي تنچدوني
عامل ١: مين الحرامي المخبل دة بينا يارجاله نعلموة الأدب
عامل ٢: لازمن نخلصو عليه
نغم بقلق : لاه ياچماعه براحه عليه عرفوة غلطه بس
اتجه العمال نحو السيارة بينما ابتسم حمزة اخيرا عندما وجدت السيارة قد تم إلغاء القفل الاوتوماتيكي الخاص بها فقام بفتح الباب سريعا وهبط منها ليصتدم ببنيه جسديه قويه تقف خلفه فأمعن النظر ليتفاجئ بأربعة من الرجال يحاوطونه
حمزة : خير يارجاله متجمعين عند النبي
لكمه قويه تلقاها اسقطته ارضا اما بالداخل فكانت تجلس نغم برفقه العائله بهيئتها البريئه
ورد : وبعدين لت اتحايل علي عاصم وكالعادة رفض
دعاء : حقه يرفض ياوليه انتي في واحدة بالدنيا تروح تقعد حدا بتها طول شهور الحمل
ورد : قلقانه عليها اوي يادعاء دى حامل في تؤام اللهم بارك وعلي طول هبطانه ونايمه وجوزها رافض انها تيجي تقعد عندي
هايا : طب ماتخلي عز يجي معاها ياخالتو والبيت كبير مشاء الله
ورد : قلتله ياحبيبه خالتك بس بردو رفض هو شهادة لله بيعملها كل حاجه في البيت علي قد مابيقدر بس دة راجل في الاول والأخر وانا عاوزة سعادتهم
آيه : سبيهم علي راحتهم ياريري ومتنسيش ان دة اول حمل وهما عاوزين يشاركو بعض اللحظات دى بس انتي تابعيها وروحيلها كل يوم وربنا يكملها علي خير يارب
جميعهم : يارب
ورد : امال حمزة فين مش شيفاه من بدري ؟
آيه : جايز في التويلت ولا حاجه
نغم بهمس : دة بيتنفض أحلي تنفيضه برة
هايا بهمس : بتقولي حاجه
نغم : انا لا ابدا
انتهي الحفل وعاد الجميع لمنازلهم وبقصر المنشاوي صعد الجميع لغرفته وها هي نغم تدلف لغرفتها برفقه هايا وتضئ الأنوار لتشهق من هيئه حمزة البائسه وملابسه الممزقه وكيس الثلج الذي يضعه علي جبهته
هايا بلهفه : حمزاااة حبيبي مالك حصلك ايه انت كويس
حمزة :_________
جلست هايا بجوارة مردفه : طمني بالله عليك ايه ال عمل فيك كدة
نهض من مجلسه متجها نحوها وشرار الأنتقام يتطاير من عينه ثم توقف بمحاذاتها واردف بنبرة بثت الرعب بداخلها : انا صبرت عليكي كتير ودة مش طبعي بس انتي نكشتيني وحضرتي أسؤ مافيا مترجعش تعيطي ياقطه
ألقي جملته وغادر الغرفه بينما تملك منها القلق والتوتر
هايا بحزن : انتي ال عملتي فيه كدة
نغم : مش بالظبط كدة يعني
هايا بصياح : انتي اتجننتي يانغم عاوزة تموتيه ولا ايه دة اخويا لو مش واخدة بالك والجنان ال بتعملوة دة لازم يقف والوقتي حالا والا والله هعرف بابي وعمي فارس وانتو حرين
نغم بضيق : انا عملت ايه الوقتي
هايا : انتي سهدمتيه حرام عليكي جالك قلبك اذاي وانتي بتقولي بتحبيه
نغم بدموع تلمع بمقلتيها: انا مبقولش انا فعلا بحبه والنار بتاكل في قلبي كل مااشوفه بيبص لغيري كل شويه حطي نفسك مكاني مرة واحدة وشوفي هتتوجعي قد ايه لما تكوني بتحبي وحبيبك ولا داري بيكي
هايا بألم برعت في إخفائه : وحتي لو غيرانه عليه متوصلش لل انتي عملتيه دة
نغم: يعني انتي شايفه ان انا غلطانه !
هايا : ولازم تعتذري كمان ومش علشان خاطر غلطانه لا دة علشان تتجنبي المصيبه ال انتي حطيتي نفسك فيها
نغم وهي تهز كتفيها بغرور : ولا يهزني
هايا : طب مترجعيش تعيطي لما يكرهك اكتر واكتر ويتجوز غيرك
نغم : لا الله يحبك ويرضي عنك الا كدة
هايا : يابت انتي مخك لاسع مستنياه يحبك اذاي بعمايلك دى انتي برج الثور !
نغم : يوووة بقي
هايا : هتفضلي مدب طول عمرك امشي اتفضلي قدامي نلحقه قبل ماينام
نغم وهي تمضي برفقتها : ومين قالك انه هيعرف ينام اصلا دة واكل علقه الموسم
هايا بقله حيله : منك لله
توقفت كلتاهما امام باب غرفه أنس وطرقت هايا البابوبعد ثواني فتح لهم أنس الباب وسمح لهم بالدخول
هايا : حمزة فين ياأنوس
انس :چوة عيتسبح وزمانه چاي اققعدو اهنيه
جلسو سويا يتسامرون قليلا إلي ان دلف حمزة من المرحاض مرتدي بنطالا قطنيا ذو لون وردي فاتح وتيشرت بلون ابيض فقهقهت نغم لااراديا هاتفه : اذيك ياسوسن
لم يعيرها اهتمام ثم اتجه لتصفيف شعره بينما لكزتها هايا لتصمت وجذبتها من معصمها واتجهت نحوة
هايا : نغم ندمانه علي التخلف ال عملته معاك ومصممه تعتذرلك قبل ماتنام علشان قلبها وجعها جامد اوي علشانك
نظرت لها نغم بدهشه من حديثها بينما رمقها حمزة ببرود واردف وهو يمرر المشط بين خصلات شعرة :انتي ندمانه وقلبك وجعك
نغم بلامبالاه : وحياتك ياخويا ولا حوق معايا حاجه يكش تولع لو عاكست بنات تاني انا جايه هنا اصلا غصب عني
وضعت هايا كفي يدها علي وجهها بنفاذ حيله بينما وضع حمزة المشط من يدة والتف بجذعه نحوها ثم خطي بضع خطوات باردة تجهها جعلتها تتوتر قليلا وتخطو للخلف بينما هو مستمر في التقدم
حمزة: ولما محوقش معاكي حاجه جايه هنا ليه
نغم بأستفزاز وهي تتراجع للخلف بهدوء : جايه اوضه اخويا ليك شوق في حاجه
حمزة وهو يتوقف بعدما اصبحت هي خارج الغرفه : انتي ال جبتيه لنفسك ..ثم اغلق الباب بوجهها دفعه واحدة
هايا من الداخل : حد يزعل من نغم ياحمزة دى نغم
أنس : رزق الهبل على المچانين ياخيتي هي نغم وهو حمزة
لم يهتم حمزة لحديثهم ثم غادر الغرفه متجهها نحو الحديقه ومضي الليل واشرقت شمس الصباح بسرايا السلانتي وهاهي نعمه تتناول طعام الافطار برفقه العائله وتتابع ابرار التي تحيطها هاله من السعادة
نعمه : شيفاكي مشاء الله وشك منور كيف البدر ياابرار
ابرار بأبتسامه : ربنا ميحرمني منيكي يما
سعد بمداعبه : وة بچي اكدة طب امك دى مكانتش رايدة الچوازة دة من اصله
نعمه : ولساتني عند رأيي وخايفه علي بتي مشفتش العقربه سلفتها امبارح قطعتلها فستانها كيف
سعد : وة خلي عندك حسن ظن ياام ماجد دى البنيه متقصدش
نعمه : لاه تقصدواني بعيني دول شيفاها وهي عتدوس علي فستان بتي ولولا الملامه كت چبتها من شعرها تحت رچلي
ماجد : روقي يما وبلاه الحديت دة اكدة عتخوفي خيتي منيها
نعمه : مين دى ال تخاف ياماجد بت ياابرار
ابرار بأنتباه : ايوة يما
نعمه : لو ربنا كتبلك چواز بالعيله دى تحطي عينك بوسط راسك وتعرفي الىمتنسمي دى مقامها فاهمه
ابرار : خبر ايه يما أني رايحه خرب ولا رايحه اتچوز
نعمه: اسمعي كلامي انتي طول عمرك علي نياتك اكدة والبت دى صفره وأني ممرتحالهاش واصل
سعد : چولي حاضر ياابرار يابتي أني خابر امك زين طالما قالت حاچه هتدنها وراها طوالي
ابرار بأبتسامه : حاضر يما
نعمه : افطري يانضري انتي صابحه معچبانيش النهاردة منمتيش ولا ايه
ماجد بمشاكسه : ايوة يما سهرانه طول الليل عتحددت عريسها
نعمه : اممممم چولتيلي إياك
__________________________
أتي اليوم التالي وغادرت نغم برفقه عائله الحديدي ومضت الايام التي لم تخلو من مشاحناتها مع حمزة كعادتهم إلي ان حلت تلك الأمسية التي اجتمعت فيها جميع افراد العائله امام التلفاز عقب صلاه المغرب
سيف : امال فين نغم ياهايا
هايا: كانت بتكلم خالتو دعاء ونازله ورايا علي طول
نغم وهي تدلف للغرفه بمرحها المعتاد: السلام عليكم اهل البيت
جميعهم : وعليكم السلام ورحمه الله وبركاته
حمزة بتمتمه : كنت افتكر ربع كفته ع الفحم طالما انت مبروك كدة
يونس : بتقول حاجه ياميزو
حمزة : اشش أسكت الشيخ بداء اهوة
آيه : لسه هيقراء قرآن اول وبعدين يهني السادة الحضور وبعدها يقول الرؤيه
سيف : كل سنه واحنا بخير وستر من ربنا ياولاد
جميعهم : وانت بألف خير وسعادة يابابا
حمزة : بس انا حاسس ان رمضان بكرة
نغم معترضه : لا بعد بكرة
حمزة : انتي ايش عرفك كنتي بتشتغلي في دار الإفتاء المصرية
نغم وهي تستريح في موضعها وتفرك ابهامها في اصبعيها السبابه والوسطي بحركه مماثله لحديثها : تحسه كدة مش لسه هلت اجوائه وروايحه
حمزة : وهو رمضان بقي ليه روايح اليومين دول
نغم : ايوة ليه ياعديم الإحساس دى حاجه كدة روحانيه
يونس : علي فكرة نغم بتتكلم صح
حمزة : طب ايه رأيكو ان رمضان بكرة هه
نغم بحماس : طب تراهني
حمزة : اشطا الخسران يدفع للكسبان ميتانيه
نغم : لا رهان الفلوس حرام … ال يكسب الرهان ينفذ للكسبان خمس طلبات
لمعت عيني حمزة بمكر ثم اردف : ومالو ثم اكمل هامسا : انتي ال جيتي بنفسك ولا الهوا ال رماكي دة انا هوريكي النجوم في عز الصبح مش الضهر
آيه : بس بقي انت وهي المفتي بيتكلم اهوة
تابع الجميع حديث فضيله المفتي بأهتمام وترقب شديد حتي حانت اللحظه الحاسمه حينما هتف المفتي ” غدا المتمم لشهر شعبان ”
نغم بفرحه طفوليه : هيييييه انا كنت حاسه والله دي مش اجواء رمضان
هايا بسعادة : كل سنه وانتو طيبين
آيه ببكاء : رمضان كريم ياولاد
يونس وهو يحتضن والدته ويقبل جبينها : الله اكرم ياحبيبه قلبي امسحي الدموع الغاليه دي
نغم : بتعيطي ليه ياخالتو سيبي العييط دة لحمزة من ال هيحصله
جميعهم : 😂😂😂😂
هايا وهي تحاوط والدها بذراعيها : من العادات الرمضانيه الجميله في بيتنا ياستي ان أول ماالرؤيه تبان مامي تعيط
نغم بأبتسامه : فيكي چينات من دعاء تصدقي
حمزة : مهم اخوات ياغباء
نغم : لا دة انت تقف انتباه وانت بتكلمني دة انا ليا عندك خمس طلبات بحالهم
حمزة : حيلك حيلك دة مصباح علاء الدين كان ليه ٣ امنيات انتي فاكرة نفسك مين
نغم بثقه : لا انا مش فاكرة انا عارفه انا مين انا نغم المنشاوي
مال سيف علي آيه قليلا ثم همس : انا شفت الحوار دة فين قبل كدة من حوالي كام وتلاتين سنه
ابتسمت آيه وهمست له : مش قلتلك دول النسخه التانيه مننا
سيف بعشق : انتي مفيش منك ياأيوو انتي ملاكي
حمزة بنبرة مرتفعه ليجذب انتباههم : عصافير الحب تضم معانا هنا وتشوف الهانم ال اشترتني عبد عندها
سيف بقهقهه : براحه عليه يانغم انتي عرفاه طري شويه
نعم : من عنيا ياعمي
حمزة : مين دة ال طري ايه ياابو السيوف لا دة انا رجوله اوي واعجبك
سيف وهو يحك جانب وجهه بعدم اقتناع : امممم طب شوف طلبات نغم ونبقي نشوف الكلام دة بعدين
حمزة بصدمه : هه ايه دة انت بتسلمني تسليم اهالي للمفعوصه دى وكمان مصمم اني عيل بقي كدة ياحجيجه
سيف : ياابني ارتقي شويه واتكلم ذي خلقه ربنا ايه اسلوب السرسجيه دة
حمزة مندفعا : اصل الطريقه دى بتجيب مع المزز في الشقط يابابا
اتسعت عيني سيف مردفا : كلمه غلط كمان وهبيتك في الشارع ومن بكرة الصبح تكون مرمي في المكتب وسط زمايلك فاهم
حمزة بأدب : انا اسف يابابا
يونس : الاستاذ مش عاجبه مكتبه يابابا
سيف ساخرا : ليه ان شاء الله كنت فاكر انك هتدخل المجموعه من اوسع ابوابها لا يامحترم انت هتجيبها من تحت وطالع
حمزة : طب علي الأققل يابابا يبقي ليا مكتب خاص بيا مش في وسط الموظفين
سيف : معلش بس معنديش وسايط يابيه وقبل منك كان اخوك وابن عمك خليتهم يسفو التراب قبل مايبقو اصحاب مكاتب وعربيات اما حضرتك متدلع حبتين بس ملحوقه
حمزة : ايه يابوب دة انا اخر العنقود
سيف : الساعه سبعه بالدقيقه تكون في الشركه
حمزة ممازحا : سبعه سبعه ونص
سيف : حمزة
حمزة : حوش صاحبك عني
قهقه الجميع من بينهم سيف الذي برع في إخفاء بسمته وصرف نظرة للأمام محدثا يونس
سيف : بكرة ان شاء الله تخلص شغلك بدري وتجيب طلبات الكراتين وتيجي هنا تجهز كل حاجه وتخلص قبل صلاه التراويح تمام
يونس بعمليه : تمام
آيه : فرح كلمتني النهاردة وقالتلي ان مرات تيم احتمال تولد كمان يومين
سيف : يعني مش هيجو بكرة مع الاولاد ؟
آيه : معلش ياحبيبي سيبهم علي راحتهم اكيد تعبانه ومحتاجه ترتاح دى هتولد بقولك وتيم لازم يكون جمبها في وقت ذي دة
نغم بهمس : بت هو ايه ال هتعملوة بكرة دة !
هايا : بصي ياستي بابا عادته كل سنه بيعمل كراتين فيها حجات اكل مكرونه وزيت وسكر وفراخ ولحمه وحجات من دى وبيجيب الطلبات دى مشاء الله بكميات كبيرة واحنا نقعد بقي طول الليل نعبيها ونجهزها ويونس وحمزة وتيم بيطلعو كل واحد بعربيه يفرقوها ويرجعو يصلو ونفضل سهرانين لحد السحور وصلاه الفجر
نغم بحماس : الله حلو اوي الكلام دة انا عاوزة اعمل معاكو
هايا : اكيد طبعا دة انتي هتتفحتي وكمان تيم ومراته مش هيجو يبقي هنتعب لوحدنا
نغم بأستفسار : طب ليه عني سيف مثلا مبيتبرعش بالمبلغ لجمعيه مختصه بالكلام دة او حتي يجيب حد يجهزله الكراتين ويوزعها
هايا : لسببين الأول احنا كلنا بنحب نعملها بنفسنا وبنفرح جدا ودي عاده بقالنا سنين طويله بنعملها والسبب التاني بنحب ناخد الأجر علي إطعام الطعام وتجهيزنا ليه وبصراحه مش كل الجمعيات مضمونه اوي يعني فخلينا في السليم
حمزة : انا طالع فوق اذاكر لما العشا يجهز ابعتولي
ارتقي درجات السلم بعدما استاذن الجميع ثم دلف لغرفته وماهي الا لحظات حتي عاد للباب مرة اخري بعدما سمع طرقاته ⚡⚡⚡
حمزة وهو يفتح الباب : خير
نغم وهي تضع كف يدها مربعا امام فكها وتحرك سبابتها صعودا ونزولا علي فمها بتفكير وعيناها معلقتين بزاويه متصنعه الحيرة : امممم ..في صيغه احسن من كدة يعني مثلا تحت امر معاليكي .. حضرتك تؤمريني بأيه كدة يعني
حمزة وهو يستند بساعدة علي الباب : الأمر لربنا وحدة واخلصي بدل مااخلي الباب يسلم علي معاليكي
نغم وهي ترفع طرف حاجبها بغيظ : طب البس ياكتموتو علشان خارجين
حمزة : مين دول ال خارجين ياحلوة سمعيني كدة
نغم بفرحه : حلوة ! الله يكرم اصلك ..احم انا وانت وهايا خارجين
حمزة : لا دة عند ام لطفي ال بتئيد وتطفي عرفاها
نغم بسماجه : اسمع عنها ويلا بلاش غلبه علشان دة اول طلب هتنفذة ولو رخمت عليا هطلب منك طلبات قهريه
حمزة بلامبالاه : ال يبقي ينفذلك بقي
نغم : اوكي طب متتأخرش ياقلب خالتو علشان عمي سيف مستنيك تحت
حمزة بأستعباط : مستنيني ليه
نغم بمجاراته : لا ابدا عاوز يقيم الاوتفيت بتاعك
تنهد حمزة ثم اغلق الباب بهدوء متجنبا ضيق والدة وبعد فترة كان ثلاثتهم بالسيارة عاي الطريق
حمزة بتأفأف : الظريفه هانم طويله العمر عاوزة تروح فين
نغم بسعادة : ايوة كدة علشان اجبلك البونبوني اطلع بينا علي شارع المعز
حمزة : 🙄🙄🧐🧐
_______________________________
غبت يومين العيد محدش سأل عني شكرا بنك مصر 💔🙏🏻 بارت طويل اهوة علشان اتأخرت عليكو
الفصل التالي: اضغط هنا
يتبع.. (رواية بنات المنشاوي الجزء الثالث) اضغط على اسم الرواية لتجد الفهرس كاملاً بجميع الفصول.