رواية بنات المنشاوي الجزء الثالث – الفصل العاشر
بارت ١٠
بقلم خلود وائل 🌻
اقترب بزوغ الفجر ولازالت نغم تجلس مستيقظه والالم يجتاح جسدها وبرفقتها هايا تهون عليها
هايا : والله ماعارفه بتحبيه علي ايه دة بيرزعك كل مقلب والتاني علي نفوخك يلففك حوالين نفسك
نغم : اسكتي بجي مقدر ومكتوب دونا عن الخلق كلياتهم قلبي اختار المعدول اخوكي اچولك ايه بس منتي مچربتيش تتشندلي وتحبي من طرفك وبس
عبثت ملامح هايا ثم هتفت لنفسها” ليكي حق تقولي كدة بس صدقيني محدش اتوجع بحب من طرف واحد قدي ”
نغم : انتي يا ابله چومي ادهنيلي قفايا تاني علشان عيوچعني جوي
هايا : قصدك ادهنهولك خامس مرة ايه يابنتي مكفايه بقي
نغم : هقول ايه بس ياربي مهو ال يدة بالنار مش كيف ال يدة بالميه الباردة چومي فزي جوام يلاه
هايا : امري لله يارب اهديهم بقي انا زهقت منهم
نغم : والله مهفوتهالك ياحمزة ولازمن تدوق ال عملته فيا دة
هايا : يختي اسكتي واتهدي بقي هو انتي فيكي حيل
نغم : اااه براحه عتدهني وش دوكو !!
_________________________________
في أحدي مقاهي نيويورك كان يجلس يونس برفقه مجدي ويتناول قهوته بهدوء بينما يتصفح اللابتوب امامه اما عن مجدي فكان منشغل بمطالعه الفتيات الشقراوات علي الطاوله المجاورة لهم
يونس وهو يتابع عمله باهتمام : انا بقول تقوم تاخد رقمهم وتريحني
مجدي : هاه… لا دة انا بتأمل في ابداع الخالق في خلقه سبحان الله العظيم
يونس : تصدق انا قشعرت من كلامك ياميجو لا إله إلا الله
مجدي : طب والله انت ظالمني ياونوس
يونس : ربنا يكفينا شر الظلم وخليك في حالك وركز في شغلك خلينا ننجز ونرجع مصر بقي انا زهقت
مجدي : ولعاشر مرة انا عند رأيي فيك وانك فقري حد يزهق من امريكا يا جدع دة انت عجيب
يونس :ياأخي اتق الله و____
قطع باقي كلماته رؤيته لفتاه تشبه تلك الفيروز لمرة أخري تجلس بالجهه الاخري من المقهي وبرفقتها فتاتين ..ظل يصوب نظرة ناحيتها اكثر ليتأكد مما يراه ليقطع تركيزة يد مجدي التي تلوح امام عينيه
مجدي : هلووو ايه ياشيخنا روحت فين دة التركيز في الشغل وتقوي الله ال عمال تنصحني بيهم من الصبح
يونس : احم … خليك في خيبتك واسكت اشرب يلا العصير خلينا نمشي
مط مجدي شفتيه بأذعان واكمل عمله بينما ظل يونس يسترق النظرات يحاول التأكد ان كانت هي بالفعل ام مثل المرة الماضيه
مجدي بمرح : يالهوي علي التركيز ياولاد حاجه اورجانيك
يونس بغيظ : يابني خليك في ورقتك واسكت
مجدي : الله منتا روش وليك في النظرات اهوة امال قارفني كل شويه غض البصر غض البصر لما زهقتني
رمقه يونس بغضب وسكت كلاهما واكملا عملهم بتركيز قطعه هتف فتاه بنبرة مودعه مرتفعه نسيبا طرقت مسامع يونس ” good buy fayrooz” ( مع السلامه يافيروز )
اتجه بنظرة سريعا ناحيه الطاوله فلم يجد سوي الفتاتين فنهض مهرولا ناحيه باب المقهي ومضي بصع خطوات يبحث عنها متجاهلا نداء مجدي : يونس … يوونس في ايه !!
ظل ينظر حوله ولكن الشارع ملئ بالمارة فلم يميزها وكانه يبحث عن ابرة وسط كومه من القش فعاد مرة أخري لمجلسه بضيق
مجدي : انت في ايه يابني بقالك كام يوم مش علي بعضك
ارتفع صوت رنين هاتف يونس فأجاب سريعا دون ان يري من المتصل وماكانت سوي مليكه
يونس بحنق : هلوو
مليكه : جود مورنينج بتوقيتك ياقلبي
يونس وهو يزفر انفاسه : اهلا مليكه اذيك
مليكه : حرفيا بقيت احسن لما سمعت صوتك وحشتني سووو ماتش
يونس : عاوزة حاجه يامليكه انجزي
مليكه بتعجب : في ايه يابيبي متكلمني حلو انت كويس
يونس : انا مش بيبي قلت قبل كدة زفت مليون مرة ايمي يونس ونبهت متتكلميش معايا بالاسلوب دة انا خطيبك مش جوزك واققفلي الوقتي علشان جايب اخري سلام
اغلق الخط مما أثار غيظها وصفع الهاتف علي الطاوله ثم اعلق اللابتوب ووضعه بحقيبته وبرفقته بعض الملفات ثم ترك الفاتورة وغادر المقهي وتبعه مجدي مهرولا
مجدي : يونس .. يونس استني الله يهديك .. طب متزعلش مني .. ميبقاش خلقك ضيق كدة ….ياعم انت بكلمك
ركب كلاهما السيارة وظل يونس شارد الذهن لايعلم لم تملكه الضيق ولم هاتف مليكه بتلك الطريقه إلي ان عاد للفندق متجنبا الخوض في الحديث مع مجدي وبعد عناء طويل من التفكير المرهق لعقله استقر علي سريرة ممسكا بهاتفه يحادث مليكه
يونس : ياستي أنا أسف متزعليش مني
مليكه : يونس احنا بقالنا قد ايه مخطوبين
يونس بحيرة : امممم حوالي خمس شهور ؟
مليكه : لا يااستاذ بقالنا ٨ شهور ونص مخطوبين مفيش مرة سمعتني فيهم كلمه حلوة وحرفيا بتتفنن في حرق دمي كل اما تشوفني بجد انا تعبت من افعالك
يونس بتنهيدة : طب اعمل ايه علشان ارضيكي
مليكه : خليك في المود واسمع كلامي نخرج كل يوم سوا بعد ماتخلص شغلك ونسهر كل ويك اند سوا للصبح و___
يونس مقاطعات : طبعا انا تعبان طول اليوم ومش قادر افهمك اني مش بتاع الكلام دة كله ذي كل حوار مابينا وافضل اعيد واذيد وفي الاخر بتتقمصي وتقفلي السكه في وشي وانا كالعادة هاجي علي نفسي واصالحك صح
مليكه :_____
يونس : فأختصارا للوقت والمجهود انا اسف عن كل حاجه وحشه زعلتك وبجد انا مضغوط الفترة دى وياريت تقدري دة واوعدك لما ارجع مصر هنخرج في يوم نتغدي سوا او اققولك خليها يوم عيد ميلادك ال هو اصلا الاسبوع الجاي ايه رايك
مليكه بفرحه : بيبي ثانك يو سو ماتش انك فاكرني اي لاڤ يو بجد
يونس وهو يضع كفه علي جبهته بفقدان امل في اسلوبها : طبعا مش ملوكه حبيبتي
مليكه : علشان تعرف ملوكه بتحبك قد ايه انا نزلت النهاردة وعملت شوبينج وجبت كام ميني دريس هيعجبوك اوي
يونس : وجايه علي نفسك ليه كدة
مليكه بضيق : يوووة بقي اعمل ايه اكتر من كدة ياربي اتنقب علشان اعجبك
يونس بابتسامه : ياريت والله
مليكه : اتس سو اوڤر بجد يونس تصبح علي خير
يونس : احنا لسه بالنهار !
مليكه : هنا بليل سلام
يونس : سلام
اغلق الهاتف والقاه بجوارة واستلقي برأسه علي الوسادة وهو يستعيد بذاكرته تلك الليله حتي قطع حبل افكارة رنين هاتفه ⚡⚡⚡⚡
يونس مجيبا بسعادة : ميموو ال منفضلي
محمد : مفتقدك جدا ياشق
يونس : بأمارة منتا مهيص في الفطير المشلتت عندك ومفتكرتني حتي برساله
محمد : حبيبي 🤩
يونس : ايه الجديد عندك
محمد : لاء الجديد شديد بصراحه الحرب قايمه هنا بين حمزة ونغم وهيموتو بعض
يونس بأبتسامه جانبيه : عملو ايه المجانين دول تاني
محمد : نغم ياسيدى عملت شاي حمزة بملح بدل السكر واخوك شربه و بسرعه راح مرجعه تاني قدام الرجاله واحنا قاعدين وصراحه منظرة كان كلوت خالص وطبعا مسكتش قوم ايه بقي يروح واقف علي السطح فوق تراس اوضه نغم و رامي شويه بريل في الأرضيه ونادي عليها كأنه تحت وبيستغيث بيها وهي طلعت تجري تشوف في ايه وهوب دبل كيك علي وشها
يونس : دول مجانين وهيمتو بعض في مرة انا متأكد
محمد : خد عندك المفاجاه دى نغم نجحت بمجموع كبير وناويه تقدم في جامعه القاهرة وبباك مصمم انها تقعد عندكم مع هايا
يونس وقد اتسعت عيناه من هول الدهشه : لا بتهزر حمزة ونغم في بيت واحد يامنجي من المهالك يارب
محمد : ههههههه كان نفسي تشوف اخوك ساعه ماعرف ياعيني وشه بقي يجيب ألوان
يونس : من الحسرة 😂
محمد : حقيقي ربنا معاكو دة النهاردة مسك تليفونها وحطهولها في دورق العصير خلاها تجري وراه بالشبشب
يونس : بالشبشب !!
محمد : انا وعمي فارس بقينا نحجز دة الدم كان للركب انت حقيقي مش متخيل انتو داخلين على ايه بجد ربنا يكون في العون
يونس بفتور : الحمد لله اني مش معاكو يابني
محمد : صوتك مش عاجبني مالك يا يونس
يونس : بصراحه انا تايه يامحمد ومحتاج خطبه حلوة من بتوعك يريحو قلبي
محمد بحماس : ثبت عن النبي صلى الله عليه وسلم في دعاء الكرب والهم ما فيه غنية مثل ما أخرجه أحمد عن عبد الله بن مسعود أنه قال: قال رسول الله صلى الله عليه وسلم: “ما قال عبد قط إذا أصابه هم وحزن: اللهم إني عبدك وابن عبدك وابن أمتك، ناصيتي بيدك، ماض في حكمك، عدل في قضاؤك، أسألك بكل اسم هو لك، سميت به نفسك، أو أنزلته في كتابك، أو علمته أحدا من خلقك، أو استأثرت به في علم الغيب عندك، أن تجعل القرآن العظيم ربيع قلبي، ونور صدري، وجلاء حزني، وذهاب همي. إلا أذهب الله همه، وأبدله مكان حزنه فرحا. قالوا: يارسول الله ينبغي لنا أن تعلم هؤلاء الكلمات؟ قال: “أجل ينبغي لمن سمعهن أن يتعلمهن”
يونس بهدوء :اللهم إني عبدك وابن عبدك وابن أمتك، ناصيتي بيدك، ماض في حكمك، عدل في قضاؤك، أسألك بكل اسم هو لك، سميت به نفسك، أو أنزلته في كتابك، أو علمته أحدا من خلقك، أو استأثرت به في علم الغيب عندك، أن تجعل القرآن العظيم ربيع قلبي، ونور صدري، وجلاء حزني، وذهاب همي
محمد : دايما قول الدعاء دة وربنا سبحانه وتعالى هيفرج كربك وهيزيح الحيرة والغمه عن قلبك ولما تيجي بالسلامه لينا قاعدة سوا
يونس : حقيقي مفتقد كلامي معاك انت الوحيد ال بتفهمني وكلامك بيريح قلبي
محمد : ربنا يرضي عنك وعني ويريح قلبك وقلب كل محتار يارب
يونس : يارب
_________________________________
أشرقت شمس الصباح في مصر معلنه قدوم الصباح واجتمعت العائله بأكملها علي مائدة الطعام التي يترأسها فارس وبعد قليل انضم لهم حمزة وهو يطالع نغم بنظرات انتصار وهو يقترب من الطاوله ليسحب كرسيه فيجدها تبتسم له ببرود كأنها تخطط لشئ ما فتوقف مكانه وضيق عينيه بشك وفحص المقعد الخاص به ثم قام بهزة عدة مرات بينما تبسمت هي بخفه
حمزة : أنس .. بقولك متيجي تقعد هنا مكاني
أنس وهو يمضغ الطعام : اقعد متخافش هي هتفطر وهتخرچ والدار أمان النهاردة
حمزة : يسطا ريحني واسمه كلامي
فعل أنس مثلما طلب منه حمزة وبدلو الأماكن سويا وبداء حمزة بتناول طعامه ثم مد يدة ناحيه الطبق الملئ بشرائح الخيار فتلاقت أعينهم ليشعر هو بالأرتباك من نظراتها الباردة المصحوبه بأبتسامه مبهمه فتراجع سريعا خوفا من ان تكون قد وضعت شي بالخيار واتجه نحو طبق أخر ملئ بالبيض المسلوق لتتسع ابتسامتها الماكرة فينسحب سريعا متمتما بحنق : دة انا أكول عيش حاف أحسنلي الصحه مش بعزقه منك لله يابعيدة
تناولت هي طعامها بأستمتاع ثم اردفت : أني هفطر و هروح أطل علي ابتسام يبوي اني وهايا كيف ماخبرتك امبارح
فارس : السواق عيستناكو برة متعوچوش هناك
نغم : من عيوني يبوي هو اني اققدر بردك استأخر واهملك البيت لحالك
انهت كلمتها الأخيرة وهي تخصه بالنظرات المتوعدة ليحاول تصنع الجمود اما بداخله فحقا قد تسلل الشعور بالقلق لحواسه ولا يتوقع كيف ستوجه إليه الضربه القادمه بعدما جعلها تتألم طيله الليل وأثار الأحمرار لازالت علي وجهها
هايا وهي تميل عليها بهمس : خفي بقي زمانه دمه اتحرق وهو بيفكر هتعملي ايه
نغم بهمس هي الأخري : مش قد اللعب يرفع الرايه البيضا .. يلا خلصي فطورك وخلينا نروح لبسومه اتوحشتها چوي
انهي الجميع فطورهم واتجه كل منهم لوجهته وهاهم الفتيات يجلسن بالحديقه يتناولن شاي الصباح
ورد : ياااه يابنات سنين العمر فاتت تجري هوا
آيه : كنا زمان لما نزهق من عمك وعمايله نيجي نقعد هنا ونشكي همومنا لبعض
ورد بمراوغه : لفت الدنيا ودارت ولسه احنا وقعدتنا ذي ماأحنا
آيه: بالظبط ..أحلي حاجه بين الأخوات انهم سند وعزوة لبعض حقيقي البنت ال معندهاش اخوات بنات فايتها كتير
دعاء بحزن يكسو ملامحها : مش لازمن ياخيتي العزوة والامان والسند عنلاقيهم في راچلك الحنين او بت قلبك او حتي ولدك ال عيطبطب عليكي في وقت ضيقتك .. الحنيه معتنشراش وياما خوات باعو بعضهم في الوش حبايب ومن ورا الضهر عدوين
آيه : شاركينا همك وهوني علي نفسك يادعاء
ورد بحنو : ربنا خلق لكل واحد طاقه وانتي طول عمرك حموله كفايه عليكي كدة وطلعي ال جواكي يادعاء
آيه وهي تربت علي كفي يدي دعاء : احنا اخواتك وعزوتك أحكيلنا ايه بس ال تاعبك ومشقلب حال القصر كدة دة حتي نغم مطفيه ومش عارفه تفرح بنجاحها مالكو كلكو في ايه بجد
دعاء والدموع تلمع بمقلتيها : الهم ال أني نعياه مينحكيش واصل
ورد : طب طمنينا عليكي
دعاء : اطمنو أني بخير طول ماانتو حواليا
آيه : ربنا يديم لمتنا … ثم نظرت لورد بقله حيله
دعاء بحزن : اتطمنو قلتلكم أني زينه ملهوش عازة تبصو لبعضكم اكدة
ورد : براحتك يادعاء احنا مش هنضغط عليكي طالما مش حابه تحكي
فاضت الدموع من عينيها فهتفت آيه بحزم : لا لازم تحكي وتطلعي ال جواكي ولا عايزة تعيشي الكبت ال انا عشته زمان وضيعت فيه احلي سنين عمري … أياكي تسيبي الزعل والنكد يستحوز عليكي أنتي كدة بتدمري نفسك يادعاء فوقي واققفي وواجهي بطلي الانهزاميه ال انتي فيها دي ولو عوزاني اتدخل انا ممكن اكلم فارس بس انا مش فاهمه اصلا هو ايه ال حصل
دعاء : ال حوصل ************
ورد : ياااااه بقالكو كل المدة دى بحالكو دة ومفكرتيش تشاركي همك مع واحدة فينا ليه يادعاء؟
دعاء : كل واحد بيه كفايته ياورد
آيه : وناويه تعملي ايه ؟
دعاء : العمل عمل ربنا
ورد: فوقي بقي هتفضلي مكتئبه كدة وسايبه جوزك مخاصم ابنه وعلاقتك بيه متوترة لحد امتي ولا عاجبك منظرك دة وحالك ال وصلتيله
آيه : فوقي يادعاءونصيحه لوجه الله متخسريش ابنك ولو فعلا بيحب البنت دي وعايزها اققفي جمبه وسانديه
ورد بدهشه : علي حساب جوازها هي ياآيه !
آيه بعقلانيه : خلينا متفقين أن الراجل لما بيحب بجد عمرة مهينسي حبه ولو كان الحب دة كبير ووصل لمرحله ال العشق هيكون في حل من الاتنين يأما ريان مش هيفكر غير في سعادته وبس وهيعادي ابوة وعيلته وهيتجوزها يأما هيمشي ورا ال انتو عاوزينه ويريحكم ويعيش عمرة موجوع وصدقيني هيجي يوم ولو بعد عمرة بحاله وهيفكر في راحته وهيتجوزها بردو لو كان ليه فيها نصيب فأنا بقولك من بدري اققفي في ضهر ابنك وكوني ليه السند ال هو محتاجه واوعي تتحديه وتوريله قساوة قلبك خليه يشوف منك الحنيه
ورد : طب وفارس ؟!
آيه : فارس طيب بس غيور جدا والنوعيه دى هي نفس نوعيه سيف وحقيقي هو دة التحدي بس انتي لازم تتحركي عيلتك هتروح منك بسلبيتك دى انا مش عارفه راحت فين دعاء ال عقلها يوزن بلد
دعاء : دعاء متشتته تايهه في دوامه مابين زمان ودلوك ..تعرفي ان فارس أوقات كتيرة بيكون قاعد لحاله واول ماأطل عليه عيونه تدمع ويبچي مخنوق ومطايقش روحه
ورد بتفهم : عتفكريه بمرام !
دعاء : ودة ال هو عامل حسابه لو ريان اتچوز البت دى مخبراش ممكن يعمل إيه ولا أني حتي ممكن اعمل ايه
آيه : انا هقولك تعملي ايه
____________________________
غادرت الفتاتان المنزل واتجهو سويا لمنزل ابتسام صديقه نغم منذ الطفوله فهي ابنه كريم صديق والدها وذراعه الايمن وهي فتاه حسنه الخلق علي قدر عال من الجمال
هايا : وانتي كمان ناويه تسوقي الجنان وتقدمي في جامعه القاهرة ذي صاحبتك
ابتسام : لاه ياستي مين ساب دارة وراح لدار چارة فقد قيمته وانقل مقدارة
نغم بتهديد مرح : عتچولي حاچه يابت انتي
ابتسام : لاه لاه معچولش .. ربنا علي الظالم والمفتري ياشيخه دة ولد خالتك حمزاوي دة كتر الف خيرة انه متحملك بغباوتك دى
نغم وهي تضع قدم فوق الأخري : غصب عنيه يتحملني هو عيلاقي ذيي فين بس
ابتسام : الحلاوة في السوق مرطرطه ياخيتي عيتلم عليها الدبان
نغم : حد يطخ البت دى عيار ويريحني منيها عاد
هايا : تسلمي ياسوما أخيرا لقيت حد يقدر علي المفتريه دي
ابتسام : رقمي معاكي لو احتاچتي ايتها حاچه تخصها حددتيني طوالي دي كتالوجها معاي أني
هايا : اسكتي نسيت احكيلك عمل فيها ايه امبارح
ابتسام : چولي شوقتيني والله الواحد عيستني انهم يتقابلو في مناسبه عشان يسمع مقالبهم في بعض ويضحك من قلبه دول كيف القط والفار
هايا : حمزاوي ذي مابتقولي عليه جابلها هديه فستان حلو اوي
ابتسام : وة الصلح خير جوم اتصالح ياجميل
لوت نغم شفتيها ولم تعقب
هايا : وبفتح العلبه لقيت الوان دهانات غرقتني والمفروض انها هي تكون مكان بس مش مشكله هو طلع ناصح وحب يديها الأمان بالحركه دى فهي اتطمنت واخدت الفستان بسرعه تلبسه ومن كتر ماعجبها فضلت واقفه بيه يجي ساعه قدام المرايه بتحلم بيه وهو جمبها عريس باين 😂😂
ابتسام : الجعان بيحلم بسوق العيش . كملي يابتي
هايا : لبست الفستان من هنا وجالها جرب من هنا وعينك ما تشوف الا النور جسمها ورم وبقت حالتها حاله وكانت ليله معاناه امبارح
انفجرت ابتسام ضاحكه وامسكت بمعدتها من شدة الضحك بينما هتفت نغم : اضحكي علي خيبه صاحبتك كمان وكمان بس والله مهفوتهاله وزمانه عيلف حوالين نفسه دلوك ومبقاش نغم ان مجبته مشندل علي بوزة هه
______________________
هااي ياقمرات 💚💚 الحمد لله الكابل اتصلح والنت اشتغل 🙈 واشتراك الشهر راح علينا 😂😂🌚بس ماعلينا 💙انشاء الله هنزل الروايه يوم اه ويوم لا تمام 😍وانا عارفه ان لسه مدخلناش في احداث كبيرة بس كل دة هيتبني عليه ال جاي ذي ماعودتكو ومتحسوش ان الروايه بتجري مننا 🌻💗ويارب يارب تكون حلوة وتعجبكو 💝ومتنسوش الڤوت القمر ⭐ بتاعي وكومنت صغنن كفيل أني منامش من الفرحه 🙈🥰♥️♥️
الفصل التالي: اضغط هنا
يتبع.. (رواية بنات المنشاوي الجزء الثالث) اضغط على اسم الرواية لتجد الفهرس كاملاً بجميع الفصول.