رواية بنات المنشاوي الجزء الثالث – الفصل التاسع
بارت ٩
بقلم خلود وائل 🌻
أشرقت الشمس تنير الارجاء تزامنا مع وصول عائله صقر وعائله الحديدي لقصر المنشاوي وقابلهم الجميع بحفاوة وترحاب شديدين كعادتهم كلما قدمو للبلدة ومن بين الثنائيات التي تتبادل أطراف الحديث كانت تقف هايا برفقه نغم جانبا
هايا : اش اش ايه الشياكه دي كلها ياغيمو
نغم : حلوه العبايه
هايا : جميله جدا ولونها حلو بجد
نغم : يكش البعيد ياخد باله
هايا : ايوا قولي كدة بقي متشيكه علشانه
نغم : امال علشان مين يااذكي اخواتك
اقترب منهم حمزة وهتف : واقفين علي جنب بتتودودو في ايه انتو الاتنين وسايبين الشنط برة
نغم بصياح : حيلك حيلك انت مفكرني خدامه ولا ايه
حمزة بقصد اثاره غيظها : ايه دة الصوت دة انا عارفه … ايه ال عملاه في نفسك دة ياصندوق لابسه شوال بطاطس ليه كدة
نغم بغيظ : شوال يلمك و يشقلبك ياحمزة ياابن الحديدي انت عارف عبايتي دى بكام
حمزة : يختي اتلهي هتلاقيها ب ميه جنيه من التوحيد والنور هو ال ذيك بيعرف يلبس اققعدي في جمب وابكي علي حالك في صمت
نغم : حد يلم الواد دة من اهنيه
حمزة بدندنه : الولا دة ااااه هيجنني ااااه الولا دة الولا دة
مطت شفتيها بضيق بينما خلع نظارته الشمسيه ودلف للداخل متجاهلا البركان الذي اشعله بداخلها
هايا : متزعليش نفسك ياغيمو منتي عرفاه عبيط
نغم بحزن : نفسي ياخد باله مني او يحس بيا ياهايا انا مستنيه نتيجتي تبان بس علشان جيتكو دى واعرف اشوفه انتي عارفه اني بقيت اذاكر واضغط نفسي علشان اجيب مجموع عالي واعرف ادخل الكليه ال انا عيزاها واعرف اشوفه براحتي واطمن بقربه مني
هايا : طب اهدي بس دة اليوم عيد تعالي معايا ربنا يهديكي نقعد مع الناس ال جوة دول وننبسط شويه ولو العبايه مش عجباه سيبك منه وافضلي لابساها بردو خليكي واثقه في نفسك وتعالي شوفي بقي جبتلك ايه بالمناسبه السعيدة دى
نغم بفرحه طفوليه : جبتيلي انا ؟ هيييه تعالي ياهيوش ياجميله اوي
مر اليوم بسعادة غامرة عمت الأجواء ومحت قليلا الغمه التي حلت علي القصر وفاضت جموع الفقراء والمساكين وكذلك الاعيان للتهنئه والاحتفال والاستمتاع بالموائد الشهيه التي اعدها فارس حمدا لله علي ماوهب من نجاح لأبنته وفي نهايه اليوم اجتمعت العائله في سهرة ببهو القصر يتسامرون في احاديث عامه ويضحكون ومن بين الحديث هتف محمد: ها يانغم مجموعك بسم الله مشاء الله يخليكي تدخلي الجامعه ال نفسك فيها ناويه علي ايه
نظر الجميع لنغم بأهتمام بينما هتفت بثقه : انا عاوزة ادخل صيدله
سيف : اشمعنا يا نغوم
نغم : لأسباب كتير ياعمي منها أني حابه المچال يعني هيكون عندي خبرة بكل تخصصات الطب واققدر افيد اي حد واعرف تركيب الادويه زين وفي المستقبل انشاء الله اعرف اهتم بعيالي كيف خالتي ورد مشاء الله كل حاچه واعيه ليها ودايما بتفيدنا كلياتنا
ورد : بس صيدله صعبه ياحبيبه قلبي مش سهله ذي ماانتي متخيله
نغم بثقه : ياخالتي عزيمه الإنسان واصرارة علي تحقيق ذاته في مكان وبيئه هو من چواته متوكد انه اتخلق عشانها هيخليه ينحت الصخر لحين ماينول المراد
زين : واخرتها إيه هتتچوزي وتتستتي بردك كيف خالتك ورد وشهادتك تعلچيها بمسمار صلب بنص الحيطه
نغم : وة أني اتستت ليه إنشاء الله ومين عيفتح سلسله صيدليات المنشاوي عاد أنت ولا إيه يابتاع التچارة
زين : مالها التچارة مش كليه الشعب وچامعه ابوي وامي واخوي ريان !
حمزة هامسا ل أنس : اختك ناويه تفتح صيدليه وتصرف العلاج للبني ادمين غلط وتجيب اجلهم
أنس : اسكت الله يرضي عنيك لتسمعك وتبچي ليله
نغم : عتجولو ايه عاد متسمعونا
حمزة بتهكم : كنت بقول يعني انتي المفروض تدخلي طب اسنان واهو تبقي دكتورة اسنان قد الدنيا المريض من دول يجيلك تفتحي بقه علي الاخر وتمسكي تخلعي سنانه سنه سنه وبكدة مش هيشتكي من حاجه تاني طول حياته وتبقي جبتي الحل الأمثل لكل مشاكل الأسنان
انفجر الجميع ضاحكا علي حديث حمزة الاخير بينما هي صكت اسنانها غيظا منه
فارس : نغم رايدة تدرس بچامعه القاهرة ومحكمه رأيها فقلت اچولكم يمكن حد فيكم يعقلها شويه
عاصم : دي القاهرة تنور بيها طبعا يافارس وان ماشالتهاش الارض تشيلها عيني
فارس : وة اباي عليك انت عتچمد قلبها ولا إيه
سيف : فين المشكله يافارس جامعه القاهرة احسن جامعه في مصر وانا ليا فيها معارفي بحكم اني اشتغلت فيها زمان وهتبقي متطمن عليها اكتر
ريان : وة خبر ايه يانغم وهي چامعات سوهاج والمحافظات ال چارنا قصرت معاكي بأيه
أنس : تكونش چامعه القاهرة دى نقلوها امريكا وأني مخابرش
زمت نغم شفتيها بتبرم وانزعجت حقا من اعتراض اخويها الذي أوشك ان يضيع مخططاتها هباء بينما هتفت ورد : وايه يعني ياحبايبي اما نغم تقدم هناك فين المشكله انا كنت اتمني ادرس فيها وانا بسنها
زين : وليه الغربه والبهدله ياخاله من اصله ؟!
آيه : سيبوها علي راحتها ياجماعه طالما حابه الجامعه دى بالذات ولا ايه رايك يادعاء ساكته ليه ؟
دعاء بهدوء: مليش رأي ال ابوها يچول عليه يمشي
نظرت لها ورد وآيه بحيرة فهي ليست بعادتها ثم نظرو لبعضهم البعض بتأكيد ان هناك خطب ما
محمد : لو قلقان عليها ياعمي فأحب اطمنك انه لو حصل نصيب وجت القاهرة هتكون عندنا طبعا وبكدة ملكش حجه
فارس : ياولدي انا مرايدش الموضوع دة واصل بس هي محكمه رأيها فقلت اخبركم لعل وعسي حد فيكم يرچعها عن تفكيرها طلعتو عتچوها كمان وكمان
سيف : فين المشكله يافارس الموضوع بسيط وهتكون وسطنا ومتطمنين عليها متقلقش وكمان هايا هتكون معاها في الجامعه وهيروحو ويجو سوا
محمد بمرح : انت هتقطع عليا ولا ايه ياعمي انا ال قلت تجيلنا الاول
ورد : ايوة صح ياسيف نغم هتقعد عندنا
فارس : مشكورين ياچماعه بس أني هأجرلها شقه لو حوصل نصيب
عاصم بجديه : انت بتشتمنا ولا ايه !
سيف ممازحا: لا دة غلط وانا مستنيه يغلط من بدري
زين : احنا منچدروش علي زعلكم يا عمي بس ابوي يقصد يعني__
عاصم مقاطعا : لايقصد ولا ميقصدش نغم هتقدم في جامعه القاهرة وهتسكن معانا وخلص الكلام
فارس : بس ياعاصم ___
محمد مقاطعا : خلاص بقي ياعمي ولا هتقلق عليها وسطنا كمان
شعرت نغم بالأحباط لفشل ما تسعي إليه بينما انتبهت هايا لملامحها العابسه وهتفت سريعا : طب ياجماعه بالعقل كدة انا في نفس الجامعه ونغومه التوينز بتاعي ومابنصدق نتلم علي بعض وتقولولي هتقعد عن خالتو بقي دة اسمه كلام
ورد : لا متحاوليش كفايه انها هتعوضني غياب منال ولا ايه يانغم
نغم : أني تحت أمرك ياخالتي
هايا بأصرار : معلش يا خالتو هتبقي تجيلك يوم ويوم ونقسم الايام سوا
سيف : وليه المشورة دى يابنتي نغم تأنس وتنور وتبقو سوا مع بعض وتروح لخالتك ورد وقت ماتحب لكن الأقامه عندنا دة بعد اذنك طبعا يافارس
فارس : كتر الف خيركو كلكم ياغوالي بس عنتعبوكم معانا
حمزة بهمس ل أنس في الخلفيه : أختك هتيجي تقعد عندنا دى هتبقي سنه مايعلم بيها ألا ربنا ابوس ايدك اتصرف
أنس وهو يهز كتفيه : اعمل ايه عاد ! دول اتفچو خلاص
حمزة : لا انا كدة بضيع ياوديع دة انا وهي مبنقعدش في مكان غير وبنولع في بعض والأماكن المحيطه أمال لما نبقي في بيت واحد هنعمل ايه
أنس بتمثيل التأثر : مقدر ومكتوب يخوي
حمزة بأستياء : مكتوب علي نفوخها البعيدة اوووف
انتهت السهرة بعد عدة ساعات طويله واتجه الجميع لغرفهم استعدادا للنوم وقبل ان تفتح نغم باب غرفتها برفقه هايا استوقفها صوت حمزة وهو يركض للحاق بها
حمزة وهو يلهث : نغم ..نغم… استني
استدارت له بقتور وهي تربع ساعديها امام صدرها قائله : نعمين وحته
حمزة وهو يلتقط أنفاسه: حت نينك ياشيخة
هايا : عيب ياحمزة اعقل بقي دى مبروك ال جاي تقولها
حمزة : مبروك ولو أني حاسس ان النتيجه دى ملعوب فيها بس عمتا اتفضلي هديه النجاح
ابتسمت نغم ولم تعقب علي حديثه وتناولت حقيبه الهدايا التي ناولها اياها بفرحه داخليه حاولت ابداء عكسها
نغم : شكرا انك اتكرمت وافتكرتني ولو بحاچه بسيطه
حمزة بأستنكار : انا ولا افتكرتك ولا نيله دى امي هي ال عماله تزن علي دماغي هات هديه ل أسمها ايه بنت خالتك وبعدين بسيطه دي تبقي بنت جارتك الهديه دى دافع فيها دم قلبي ومتاخديش
تبدلت ملامحها للعبوس بينما هتفت هايا : يابني لم نفسك بقي متعرفش تكمل جميلك للأخر ابدا البنت كانت وردة الوقتي
حمزة : والوقتي بقت صباح ؟! ههههههه
هايا : مفيش فايدة فيك
حمزة بمرح : ولا عايدة وحياتك تصبحو علي خير انتي وهيا واة يارب الهديه تعجب جنابك دة انا مختارهالك بكل حب اه والله
القي كلمته الأخيرة وهو يطالعها بتوعد استشعرته هي ودلفت سريعا لغرفتها وتبعتها هايا وجلسو سويا علي الأريكه والحقيبه بيد نغم
نغم وهي تناول الحقيبه ل هايا : خدي افتحيها انتي
هايا بتعجب : متفتحيها يابنتي خايفه ليه كدة
نغم : وة مشفتيش نظرات اخوكي كانت كيف اكيد العلبه ال چوات الكيس دة فيها مقلب من مقالبه
هايا : لا يابنتي انتي ظالماه افتحي بس خلينا نشوف جاب ايه
نغم : لايمكن افتحيها انتي
تناولت هايا الحقيبه بقله حيله واخرجت صندوق ورقي يحمل شعار المحل وقبل ان تقوم بفتحه انتفضت نغم من مجلسها ووقفت علي بعد خطوات من هايا
هايا بتعجب : مالك قومتي ليه كدة !
نغم : افتحيها يلا
هايا : محسساني ان فيها قنبله انتي اوفر اوي بجد
نغم : ياستي خوديني علي قد عقلي
هزت هايا كتفيها بتعجب ثم فكت رباط الستان المنعقد بشكل فيونكه ثم رفعت غطاء الصندوق ثم تعالت صرخاتها أثر اندفاع مياه ملونه بألوان زاهية متعددة وكانها طلاء حوائط تنبعث من الصندوق وتستقر بوجهها وملابسها
هايا :ااااه ..نننن..نغااااام.. االحقيني …..ااااه
نغم : شفتي انا كان قلبي حاسس والله اخوكي دة سو ميچيش من وراة خير ابدا وال علي راي المثل الحدايه معتحدفش كتاكيت
هايا : انتو بتعملو زفت مقالب في بعض انا مااالي ياناس اه ياربي انا غرقت دهان
نغم وهي تنفجر ضاحكه علي هيئه هايا التي اختفت معالمها وأصبحت مغطاه بألوان كثيرة : جومي جومي طوالي اتسبحي وغيري خلجاتك بسرعه قبل ماالالوان دى تنشف عليكي وتبجي كيف البلياتشو
هايا وهي تلكزها في كتفها : انا مالي بيكوو انا ماالي
نغم : 😂😂😂😂😂
دلفت هايا للمرحاض وغابت دقائق ثم عادت مرة اخري بعد ان تحممت وبدلت ملابسها لتقع بزرقاوتيها التي ورثتها عن والديها علي نغم وهي تطالع نفسها أمام المرآة بفرحه طفوليه وهي ترتدي فستان غايه في الجمال ذو لون بندقي يناسب عيناها وخصلات شعرها
هايا : ايه الفستان القمر دة
نغم بسعادة غامرة : حلو عليا بجد
هايا : جميل اوي كأنه متفصل مخصوص ليكي
نغم : دة ال حمزا جبهولي جميل اوي زوقه طلع حلو
هايا بتفاخر : مالازم يطلع حلو مش اخويا !
امسكت نغم بالصندوق بغيظ وألقته بوجه هايا التي تفادته وهي تهتف : مجاش فيا
لتمسك نغم بغطاء الصندوق وتقذفه بوجهها مرة اخري علي حين غفله ليصتدم بوجهها
هايا : ااه جه فيا
ظلت نغم تتأمل الفستان بأعجاب حتي شعرت بالحرارة تسري في جسدها
نغم : الجو حر ليه اكدة علي التكييف ياهايا
هايا : سلامه النظر التكييف ٢٢ هعلي اكتر من كدة يبقي نجيب بطاريق مدغشقر تقعد معانا
هايا وهي تحك اكتافها : امال اني حرانه ليه اكدة
هايا : غيري والبسي بيجامه مريحه
أصابت نغم حاله من الحكه الشديدة في سائر جسدها واصبحت تحكه بعنف كمن لم تستحم قط حتي اصطبغ باللون الاحمر القاني وزرفت الدموع من عينيها بتألم
نغم : ااااه جسمي بيوجعني اوي ياهايا واتملي حبوب فجاه وحاسه اه هيتقطع من الهرش
هايا : قلتلك غيري والبسي حاجه قطن
نغم : الجو مش صعب للدرجه دى وبعدين الفستان عامل ذي النار ال بتكويني
هايا : طب بطلي بقي وقومي غيري
بدلت نغم ملابسها سريعا وظلت علي حالتها التي اذدادت سؤ وانتهي بها الأمر تتحمم بماء بارد لتهدء قليلا وانما بدون فائدة حتي انها تناولت اقراص مضادة للحساسيه ووضعت مرطبات كثيرة للجسم ولكن لم تهداء ولو قليلا ودقائق مرت ثم صدع صوت هاتفها برساله نصيه محتواها ” معجون الاسنان مفيد للحرايق 🔥✌🏻”
وجميعنا نعلم من مرسل الرساله
نغم بغيظ بلغ اقصاه : حمزاااااااه والله مهعديهالك والله مهسكت
انهت جملتها وهي تصك اسنانها وتتألم من أثر حك جسدها بقوة
___________________________
في غرفه ورد وعاصم
جلست بجوارة علي السرير تتصنع الحزن ليرمقها هو بنظرات معاتبه هاتفا : المفروض انا ال ازعل مش انتي
ورد : لا انا ال زعلانه واوي كمان وانت ولا معبرني
عاصم : ياورد مينفعش كل يوم والتاني تروحي لبنتك
ورد : بقت بنتي لوحدي الوقتي !
عاصم : لا حول ولا قوه الا بالله … ياورد انا شايب هموم الدنيا فوق راسي الله يرضي عليكي متزوديش في همي
ورد : بقي انا ال هزود في همك ياعاصم
عاصم : ايوة ياورد اما تبقي بتتلككي علشان نتخاصم وتزعليني يبقي بتزودى في همي وانا فيا كفايتي
ورد بتأثر لحاله : مالك بس ياحبيبي شاركني همك وافتحلي قلبك يمكن اخفف عنك
عاصم : اتمني ياورد تخففي عني مش تبقي سبب زيادة لتعبي
ورد بحنق : متوجعنيش بكلامك انا معملتش حاجه غلط استاهل عليها المعامله دى كل دة علشان بتطمن علي بنتي الوحيدة
عاصم : بنتك الوحيدة اتجوزت وبقي مسؤله عن بيتها وجوزها وليهم حياتهم ومساحتهم الشخصيه ال احنا لازم نحترمها ونقدرها ومفايه جدا زيارتين في الاسبوع او واحدة حتي واتطمني عليها بالتلفون وسبيها تعيش حياتها كفايه اني كنت خانقها هي وجوزها في خطوبتهم
ورد : اه عادتك ولا هتشتريها
ابتسم عاصم واردف : الصح صح ولو اختلفت عليه كل الأمم ودى بنتي وخته من روحي فاهمه
ورد : وانا !!
عاصم بأبتسامه جانبيه : شامم ريحه غيرة
ورد ممازحه : غيرة ولا بويه
نظر لها عاصم بملل ثم التفت للجانب الاخر واستلقي مستدا للنوم بينما هتفت ورد : عاصم !! والله كنت بهزر
_____________________
في غرفه فارس و دعاء اتجه نحو التراس وجلس بداخله علي احدي المقاعد شارد الذهن بينما انضمت له بهدوء لا يعكس مابداخلها وسحبت كرسي أخر وجلست علي مقربه منه
دعاء برزانه : واخرتها معاك ياواد عمي
فارس وهو يصوب نظرة للفراغ : اتلاشيني دلوك لجل يدوم الود بيناتنا يابت عمي
دعاء بحزن : البعد بيولد الچفا وانت قادر علي البعد ولو ناسي تفكرك الايام
فارس : لاه يعني لاه
دعاء بترجي : الله يراضي قلبك المحتار توافق ولدك كيف الجمرة ال عتحترج بوسط النار منين چايب القساوة دى عاد
فارس وهو ينظر لها : مخبراش منين ! ولا فاكرة نفس الايام ال رايدة تفكريني بيها معتفكرنيش بال كانو فيها
ابتلعت مافي حلقها بغصه وهتفت بنبرة مهزوزة : أني وانت بعمرنا مهننسي مهما حاولنا بس السنين بتهون ومش كل بعيد رايد القرب ولا كل من فارق رايد يعود
نظر لها بتمعن وهتف والحزن يعتصر فؤادة : خابرة ليه ببعد عنيكي كل ما نتخانق سوا
دعاء باهتمام : ليه ياضي العين
فارس : عتذكرها واتذكر كيف ماتت بحضني واتذكر اخوي ال انعدم وأخوي التاني ال اديله سنين طويله مراضييش يشوفني ولا قابل الزيارة و قلبي يوچعني علي كل لحظه فارقتك فيها زمان والوجع الاكبر لما اتذكر ولد المركوب دة وهو عيتغزل فيكي قدامي ساعتها النار عتشيلني وتحطني والماضي كله يطاردني وكأنه حالف ليفتح بابه من تاني وولدي ال عيدورله علي المفتاح
نظرت له بحيرة ولم يمنحها عقلها اجابه تناسب الموقف فأثرت السكوت بينما شرد هو مرة أخرى في الفراغ ونيران الماضي تضرم خلايا تفكيرة
الفصل التالي: اضغط هنا
يتبع.. (رواية بنات المنشاوي الجزء الثالث) اضغط على اسم الرواية لتجد الفهرس كاملاً بجميع الفصول.