رواية بنات المنشاوي الجزء الثالث الفصل الثالث 3 – بقلم خلود وائل

بقلم خلود وائل 🌻

فيروز بأختناق:نعم!!

هناء:يابنتي الله يهديكي الواد بيحاول يراضيكي بأي شكل وانتي حيطه سد مبتفهميش انتي بقيتي عامله كدة ليه من امتي وانتي بالقسوة دة حرام عليكي يافيروز ال بتعمليه فيا دة

فيروز بحزن:ياماما علشان خاطري افهميني

هناء:ولا كلمه زيادة الموضوع دة اخد اكتر من حدة وقسما بالله ان مافردتي وشك وطلعتي لخطيبك وخرجتي معاه لهيكون في معامله تانيه ومش هخليكي تسافري وبناقص علام خالص

فيروز بأنكسار:بقي كدة ياماما…. عموما حاضر هعمل ال يريحك

بعد دقائق بدلت فيروز ملابسها ودلفت لخارج الغرفه واتجهت نحو يوسف الذي استقبلها بهدوء وجلس برفقتها عدة دقائق ثم اتجهو سويا لأحدي المطاعم

يوسف:مالك يافيروز

فيروز:مالي! منا حلوة اهوة

يوسف:انا مش قصدي الوقتي بس انا اققصد من ساعه مارجعتي من السفر وانتي حالك متغير خالص جيت استقبلك من المطار مكلفتيش نفسك حتي تضحكي في وشي قلت تعبانه من السفر رحنا فرح منال ولا كأنك تعرفيني قلت معلش غايبه بقالها زمان ومحروجه مني امبارح عمال ارن عليكي طول الليل وانا متأكد انك صاحيه ومردتيش عليا والوقتي قاعدة مبوزة … انهي جملته وتبدلت ملامحه للضيق والجديه ثم اكمل:انتي سبق وقولتي انك شيفاني اخوكي الكبير ومش قادرة تتقبلي فكرة اننا هنكون زوج وزوجه وانا حاولت ابعد لكن مقدرتش انا بحبك يافيروز ومش هفرط فيكي ابدا

فيروز: وانا كمان بحبك يايوسف لكن كاخ او حتي صديق لكن اكتر من كدة لا

يوسف:ادي لنفسك فرصه وافتحيلي قلبك وصدقيني الحب ال ميجيش قبل الجواز بيجي بعدة

فيروز بهدوء:بيجي اكيد يايوسف لكن في اغلب الاوقات بيكون تعود او عشرة او حتي اعجاب متبادل وبنترجمه علي انه حب

يوسف وهو يقطب حاجبيه:مفيش امل للدرجه دي يافيروز

اشاحت فيروز بوجهها للناحيه الأخري وملامح الضيق تكسو وجهها بينما هتف هو بحنق:كلي الأكل برد

مرت ساعه علي الغداء الذي يوصف بالكارثي ثم عادت فيروز لمنزلها برفقه يوسف ودلفت سريعا لغرفتها وجلست تبكي بشدة اما علي الجانب الأخر في ڤيلا الحديدي فكانت آيه تجلس في الحديقه تحتسي كوب الشاي وانضم لها سيف وجلس بجوارها بينما أسندت رأسها علي كتفه براحه ومرت دقائق الصمت ليقطعها سيف هاتفا:قلبي سرحانه في أيه كدة

اعتدلت آيه باهتمام ونظرت له بمرح هاتفه:هتصدقني لو شاركتك في حاجه اخدت بالي منها!

سيف وهو يضع ذراعه في مؤخرة عنقه ويميل براسه عليه :هصدقك حتي لو بتكدبي ياغرامي ها لاحظتي ايه بقي واخد تفكيرك كدة

آيه :اليومين ال فاتو طبعا اكيد اخدت بالك من عمايل نغم وحمزة وجنانهم

سيف بقهقهه:ومين بس ماأخدش باله دول جنانهم مسمع من وهما عيال صغيرة أشمعنا الوقتي

آيه: امبارح كانت بتقوله ياابن الحديدي وهو يقولها يابنت المنشاوي ونقارهم وعمايلهم مع بعض فكرتني بيك وبنفسي زمان

سيف ممازحا:طول عمرك مجنناني

آيه:والوقتي

سيف:لاااا الوقتي بقيت متيم بيكي … بس اشمعنا انا وانتي دول اخوات وبيهزرو مع بعض عادي مش حاجه جديدة علينا

آيه بأهتمام:مهوة ال انت مش واخد بالك منه ياحبيبي ممكن يكونو بيحبو بعض ذينا وهيعيشو نفس قصتنا انا حاسه انهم هيكونو سيف وآيه من تاني

اعتدل سيف في جلسته وأمسك بيديها وهتف وهو ينظر لها باهتمام:ياجنتي دول لسه عيال صغيرة نغم في تالته ثانوي وحمزة في تالته جامعه والجنان ال بينهم دة اخوة وعشم مش حب ذي ماانتي فهمتي وكون انك تفكري ان هيكون في آيه وسيف تانيين فمستحيل يكررهم الزمن تاني ولو حصل فحمزة ابني ممكن يكون ذيي او أحسن حتي علشان واخد چيناتي اما أنتي ياملاكي فمظنش أن هيكون ذيك ولا يشبهلك اي واحدة خلقها ربنا سبحانه وتعالى علشان أنتي جنته ال خصني بيها فهمتي

آيه بسعادة:هتفضل لحد امتي كدة تقلب الكلام لحب فيا وتنسيني اصلا انا كنت بقول ايه

سيف بضحكه عذبه:هو انا ليا مين غيرك يعني أنتي مراتي وحبيبتي وصاحبتي ومامتي وبنتي ذيك ذي هايا بالظبط وبعدين يعني انا سميتها اسم شبهك ليه مش علشان بحبك ومقدرش افكر غير فيكي

آيه:ياعم سيف خف عليا شويا أكاد من فرط الجمال اذوب والله

سيف:انا دوبت فيكي من زمان اوي

آيه بأبتسامه واسعه:طب انت سبتلي ايه بقي ارد عليك بيه 😂

سيف :مترديش يا قمري كفايه وجودك جمبي دة عندي بالدنيا بحالها

(يابختك ياآيه والله🙏🏻😍)

______________________________

في اليوم التالي مساءاً في قصر المنشاوي كانت دعاء تقف امام باب غرفه ريان وهي تحمل بين يديها طبق ملئ بفاكهه التين التي يحبها ابنها ثم طرقت الباب ⚡⚡ ودلفت ماان سمح لها بالدخول

ريان:ادخل يلي عتخبط

دلفت دعاء بوجهها البشوش وجلست بقرب ابنها بينما اغلق اللابتوب ووضعه علي الطاوله ونظر لوالدته بأبتسامه

ريان:ست الناس بنفسها چايه لحدي بالتين ال عحبه

دعاء:وأني ليا مين غيرك انت وخواتك ياضنايا

ريان وهو يقبل جبهتها:ربنا يخليكي لينا ياحبيبتي

دعاء وهي تطعمه بيدها:بسم الله ياقلبي…… مطرح ميسري يمري وينبت صحه وسلامه

ريان وهو يمصغ التين:وة ايه الرضا دة كله

دعاء بتصنع العبوس:وة من ميتي كنت مش راضيه عنك ياواد انت

ريان بقهقه:مش قصدي يما بس چايه بنفسك مستاخري وعتوكليني بيدك لازمن في موضوع مهم عوزاني فيه

دعاء:طوالي فاهمني اكدة

ريان:قولي ياست الناس عاوزة ايه عاد

دعاء بأبتسامه:صراحه ياريان ياولدي من ليله فرح منال بت خالتك واني مستمنيه أفرح بيك وازفلك عروستك لحد باب اوضتك وأمني عيني بيك وانت عريس

ريان بابتسامه:بس اكدة يما .. انتي تشوري بس

دعاء:صوح ياولدي رايد تتچوز

ريان:خبر ايه يما أني كبرت وبقيت راچل قد الدنيا ولت لساكي شيفاني عيل

دعاء:راچل وسيد الرچاله كمان بس يعني …

ريان وهو يعقد حاجبيه:يعني ايه!!

دعاء وهي تشير ناحيه قلبه  :مفيش واحدة اكدة ولا اكدة قاعدة اهنيه ومربعه ولا حتي شاغله البال والعيون

دني ببصرة قليلا وابتسم ثم مد يدة وتناول حبه من طبق الفاكهه وتناولها بتمهل

دعاء بتعجب:متچول ياولدي باينك حاطط عينك علي واحدة ومكتم

ريان بخجل :والله يما … اني يعني … هو فيه واحدة اكدة

دعاء بسعادة:ياألف نهار ابيض هي مين مسعودة الحظ و النصيب دي ياولدي فرحت قلبي ربنا يفرح قلبك

ريان:طولي بالك عاد مش لما ابوي يقول انه رايد يچوزني

دعاء بسعادة غامرة:دة يوم الهنا والمنا يولدي ابوك بذاته هو ال طلب مني احددتك وحالف ليخطبلك احلي واحدة في البلد

ريان :لاه يما هي واحدة بس ال قلبي رايدها

دعاء:طلباتك اوامر يانضري جولي بقي مين البنيه دة بت مين ولا دارها حدا فين ولا الأول چولي عرفتها ميتي وكيف؟

ريان:وة وة براحه عاد يما هچولك كل حاچه بس واحدة واحدة عليا

دعاء:اعذرني ياضي العين بس الفرحه مسيعانيش واصل

ريان برزانه:هي زميله اخوي زين في الچامعه وشفتها كام مرة من ايام الثانويه اهنيه في البلد ولما كنت افوت علي زين واجيبه في طريقي واني راچع القصر كنت اشوفها صدفه ويعني … يعني سالت عليها اخوي قالي اسمها و كل حاچه يعرفها عنيها

دعاء بسعادة:كمل ياولدي عتحبها عچبتك نخطبهالك چولي وسر قلبي

ريان :صراحه يما البت حلوة ونغشه اكدة وضحكتها عتخلي قلبي يرقص رقص بمطرحه

دعاء:وة وة كمان شفت ضحكتها لاااه دة بينه موضوع واعر وانت مداري عليا

ريان :لاه لا واعر ولا حاچه انتي ال دماغك راحت لبعيد

دعاء : طب مش ناوي تعرفني اسمها ايه ست الصبايا الملاح ال عتخلي قلبك يرقص بمطرحه

ريان بفرحه:اسمها ابرار

دعاء:حلو اسمها چوي .. ابرار ايه يا ضي العين؟

ريان:ابرار سعد هارون السلانتي

تلاشت ابتسامه دعاء تدريجيا و مرت امام عينيها دقائق وايام لا تسعد لذكراها  وتفننت ذاكرتها بسرد ما ألت اليه الامور بينها وبين فارس بسبب سعد لتفيق من شرودها علي صوت ريان

ريان بقلق:يما … يما روحتي لفين عاد

دعاء بتوهان:هاه … معاك ياولدي معاك

ريان:امال سرحتي لفين اكدة

دعاء:لاه مسرحتش ولا حاچه

نهضت دعاء من مقعدها وعلامات التوتر تتملك منها وكذلك نهض ريان ليقف بمحاذاتها متعجبا من تبدل حالها المفاجئ

ريان :مالك يما انتي زينه!!

دعاء:زينه ياولدي أني رايحه اطمن علي باقي اخواتك قبل ماانام

ريان:اني قلت حاچه زعلتك ولا ايه

دعاء وهي تربت على كتفه:لاه يولدي أني بس رايدة انام

ريان :طب قلتي ايه ؟ اقصد يعني رايك ايه في ابرار عتچولي ل ابوي وتفرحيه

ابتلعت مافي حلقها بغصه وهتفت بنبرة مهزوزة:ح..حاضر ياريان هچوله

ريان:ربنا يخليكي ليا ياست الناس

دعاء :تصبح علي خير ياحبيبي

ريان:وانتي من اهل الخير ياحبيبتي

غادرت دعاء الغرفه متجهه نحو جناحها دون ان تمر علي باقي ابنائها كعادتها ودلفت لجناحها وسريعا اعتلت السرير واطرقت بنظرها نحو الفراغ بينما تعجب فارس من حالها واتجه نحو السرير وجلس بقربها من الناحيه الاخري

فارس:حبيبتي

دعاء بتيه: ها …. عاوز حاچه يافارس

فارس:مالك يادعوتي الحلوة دخلتي طوالي علي السرير انتي تعبانه ولا حاچه

دعاء:راسي عتوچعني شويه

فارس:لحظه واچيبلك حبايتين يظبطو دماغك

دعاء وهي تمسك بيدة تمنعه من الحركه:لاه اني بس هنام شويه والصبح إنشاء الله هبقي زينه

فارس:فيكي ايه ياروح قلبي حالك معاچبنيش

دعاء:اطمن يافارس اني زينه بس رايدة انام تصبح علي خير

فارس وهو يدثرها:تلاقي خير وهنا ياعمري

تصنعت دعاء النوم ليطمئن فارس ويغط في ثبات عميق بينما خاصم النوم مقلتيها طوال الليل وهي تفكر في عواقب القادم المجهول

____________________________

في منزل ورد كان يجلس عاصم خلف مكتبه ينهي بعض الاعمال الورقيه بينما دلفت ورد حامله بين يديها كوب من العصير وبجوارة طبق ملئ بالكيك الذي تبرع بأعدادة … تقدمت نحوة ووضعت الصينيه من بين يديها بالقرب منه قائله: حبيبي ال مخلص علي نفسه في الشغل

نظر لها عاصم بحب قائلا:معلش ياروحي غصب عني والله خلاص تسليم الوحدات قرب وعندي شغل كتير اوي لسه مخلصش

ورد وهي تناوله كوب العصير:خمسه راحه مش هيعملو حاجه

عاصم:الراحه دي مبشوفهاش غير معاكي ياوردتي

ورد:ياما كان نفسي محمد يبقي معماري زيك ويقف في ضهرك ويخفف عنك الحمل ياحبيبي

عاصم وهو يتناول الكعك بأستمتاع:لو كنت غصبت عليه مكانش هيحب الشغلانه ذيي وبالتالي مش هيوفي ليها لكن هو حب مجاله واتخصص فيه وربنا كرمه وكل سنه بيتخرج بأمتياز …. ياحبيبه روحي لازم الاختيار يكون نابع من القلب علشان نطلع أحلي ماعندنا

ورد:دة ايه العمق دة ياعصوم

عاصم:انا عميق اصلا من زمان وهناء كانت مسمياني عاصم العميق

ورد:عاصم العميق ولا عاصم الانيق

عاصم:اممم بتألشي سيادتك

ورد:انا اخص عليك ياصاصا

دلف محمد لغرفه المكتب بعدما طرق الباب مقاطعا اياهم

محمد:السلام عليكم ورحمه الله وبركاته

كلاهما:وعليكم السلام ورحمه الله وبركاته

محمد وهو يضيق عيناه:امي وابويا وعصير وكيك وفي المكتب لوحدهم اااه ياقلبي ليه كدة بس ياماما

عاصم:بس يامولانا لحسن دمعتي قريبه

محمد:ماشي علشان خاطرك بس ياحج المرة دى

ورد:وانا مليش خاطر ولا ايه

محمد: ياخبر ابيض دة انتي ليكي٣ خواطر يا ماما

عاصم:وانا يلا طب اعمل حساب لقعدتي!

محمد بأبتسامه :يابابا ياحبيبي ان خاطرك جوة في قلبي قبل مايكون علي راسي لكن هحكيلك حاجه بسيطه عن رسولنا الحبيب صلي عليه

كلاهما:عليه افضل الصلاه والسلام

محمد:البخاري رضي الله عنه وارضاه في الادب المفرد قال حدثنا سعيد بن ابي مريم قال : اخبرنا محمد بن جعفر بن ابي كثير قال : اخبرني زيد ابن اسلم عن عطاء ابن يسار

عاصم مقاطعا:يابني انا اتلغبط كدة

محمد مقهقها:حاضر الحق عليا بجبلك اصل الكلام عموما ياسيدي  … عن ابن عباس انه جه رجل للرسول عليه الصلاة والسلام وقاله :اني خطبت امرأه فابت ان تنكحني فخطبها غيري فأحبت ان تنكحه فغرت عليها فقتلتها فهل لي من توبه؟ رد عليه الحبيب المصطفى وساله :هل امك حيه؟ فقاله لا  فقاله : تب الي الله عز وچل وتقرب اليه مااستطعت

فسأل ابن عباس :اشمعنا سأل عن الأم فقاله: والله ماعلمت عمل اقرب إلي الله عز وچل من بر الوالدة … عرفت ليه يابابا ست الكل ليها خواطر زيادة ودة عن حديث الرسول عليه الصلاة والسلام من احق الناس بحسن صحبتي مجبتش حاجه من عندي

عاصم بفخر بأبنه:كل ما بتشرحلي حاجه في الدين بكون فخور بنفسي اني ابوك يامحمد ربنا يباركلنا فيك ياحبيبي

قبل محمد جبين والدة ثم اردف:نسيتني والله انا كنت جاي ليه اه كنت جاي ادوق الكيك هاتي ياماما انا واقع من الجوع

ورد :اتفضل ياحبيبي

عاصم:عاوزك بكرة تيجي معايا تتفرج علي البرج السكني بعد ماخلص ونبداء تسليم الوحدات

محمد: انشاء الله هخلص كليه وهقابلك هناك

عاصم:و بالمرة نعدي علي البنك نخلص معاملات لطفي المقاول

محمد:لا يابابا معلش روح انت مع الراجل ده انا مبرتاحلوش نهائي معلش

عاصم:يابني احنا هنناسبه

محمد:معلش علشان خاطري انا لله كدة مبحبش اتعامل معاه بأي شكل

ورد:معلش ياحبيبي علشان خاطر بباك وقته ضيق

محمد بقله حيله:أمري لله

___________________________

هاااي ياقمرات 💚💚 البارت صغنن انا عارفه هعوضكو انشاء الله 🔥✌🏻بس التفاعل مزعلني اوي😭🌚