رواية بنات المنشاوي الجزء الثالث – الفصل الرابع
بارت ٤
السلام عليكم ورحمه الله وبركاته ❤️ جيالكم ورقبتي قد السستمه 😂⚡بعتذر جدا عن الكام يوم ال وقفت كتابه فيهم بعد ماعلقتكم بكام بارت 🙈💔بس والله غصب عني الراوتر كان عطلان والفني لسه مصلحه النهاردة 🥺 بينا ننطلق علي البارت بتاعنا أحبابي في الله 😂💗💗
بقلم خلود وائل 🌻
اشرقت شمس اليوم التالي علي الجميع ومن بينهم دعاء التي كانت تجلس علي طاوله الافطار شاردة الذهن ويبدو عليها الأرق وقله النوم بينما انتبه لها فارس ليحمحم قائلا:خبر ايه يادعاء من امبارح معچبانيش واصل لساتك راسك عتوچعك ولا ايه؟
دعاء : الحمد لله
نغم بمداعبه:وة كل ده قلقانه علشان نتيچتي قربت تطلع
فارس بحنان:انتي مينقلقش عليكي واصل ياست البنات قدها وقدود
نغم :بنت ابوي صوح
زين:مالك يما اچيبلك الحكيم نطمن عليكي
دعاء:لاه ياحبيبي اني زينه بس حبه صداع وهيروحو لحالهم
صفيه بوهن :خلي البت فتحيه تعملها كوبايه جنزبيل تعدل دماغها دي عنيها حمرا كيف كاسه الدم يانضري
مال فارس نحوها بجذعه وهو يترأس المائدة وهمس :خلصي فطور وحصليني في المكتب نتحددت براحتنا وأعرف مالك حالك متشندل ليه اكدة
دعاء:أني بخير يافارس اتطمن عاد
فارس بشبه ابتسامه: لما بتكدبي عيونك عتهرب مني ومعوزاش تبص لعيوني بكفياكي كدب علي الصبح اكدة
ابتلعت مافي حلقها بتوتر وانهت طعامها ثم نظرت لريان وهتفت بعدما غادرهم فارس: ريان ولدي عوزاك بكلمتين
ريان بطاعه:حاضر يما انتي تؤمريني
دعاء بحيرة في امرها:الأمر لله وحدة ياحبيبي
انهي الجميع طعامه واتجه كل منهم لمزاوله مهام يومه اما عن دعاء فقدم تؤخر الاخري لتنتهي بجلوسها برفقه ابنها ريان بالحديقه الخاصه بالقصر
ريان باهتمام:خير يما چولتي انك رايدة تتحدتي معاي بموضوع مهم
دعاء بتوتر:ايوة صوح ياحبييي …. چولي ياريان هو اني يعني لو طلبت منيك حاچه تعز طلبي !
ريان بدهشه:وة … كانت حصلت ميتي يما وعز عليا طلبك قولي رايدة ايه دلوك وانفذهولك في التو واللحظه
ابتلعت مافي حلقها بتوتر أرهقها ثم هتفت:تتچوز العروسه ال اختارهالك ابوك وتنسي بت السلانتي دى
اتسعت عينا ريان بدهشه تملكت كيانه ثم هز راسه بأستنكار وعدم استيعاب لما تتفوة به والدته لتنهض هي من مجلسها وتجلس بجوارة علي الأريكه وتمسك بكفي يدة بحنان وتهتف بنبرة مهزوزة:ياضي العين يوم المني والفرح أني أشوفك عريس ومع البنيه ال قلبك اختارها
ريان بمقاطعه:طب مالها ال قلبي اختارها يما أنتي تعرفيها عاد ذنبها ايه تكسري فرحتها طب وأني ابنك وضناكي ..ثم أكمل بنبرة حزينه:دة اني لسه عشيه كنت عحكيلك كيف ببقي حالي لما بشوفها او اسمع صوتها يما أني مخابرش أيه الحديت ال عتچوليه دة وليه حالك اتبدل اكدة مكنتي زينه لما حكيتلك عنيها
دعاء بمرار:اختار اي واحدة ياولدي الا دي
ريان وهو يسحب يديه من بين اناملها:يبچي أعيش لحالي وبلاه جواز
دعاء:عتترهبن يعني ولا إيه!
ريان بأختناق:ليه يما !! ليه ابرار لاة وأي واحدة غيرها ماشي
دعاء بحزن:من غير ليه ياولدي
ريان:يما متحكميش عليا اعيش العمر حزين وتچوليلي من غير ليه
دعاء:بعيد الشر عنيك ياحبيبي متچولش اكدة
ريان وهو ينهض من مجلسه بضيق شديد:أمال اچول ايه ليله امبارح كنتي طايرة من الفرحه ودلوك عتچولي لاه وعتداري عني مريداش ابرار ليه … نهايتها ايه الألغاز ال عتتحددتي بيها دي يما خليكي دوغري معاي وچولي في ايه علشان يكون بمعلومك اني لو متچوزتش ابرار مهكونش لغيرها واصل
دعاء وهي تقف بمحاذاته وأعينها تلمع بالدموع:ياولدي متفتحش علينا ابواب النار ال انقفلت زمان وارتاحنا منيها وهو يعني ال خلق البنيه دي مخلقش أحلي منيها
ريان :لاه خلق يما بس دي الوحيدة ال رايدها قلبي ويستمني يوم ماتبقي حلاله
دعاء:ياريان متتعبنيش معاك عاد
ريان :قولي يما مدرايه ايه عني وأيه ال حوصل زمان مخليكي مريداش ابرار
صاحت دعاء :انت عتنصبلي المحكمه ولا ايه قلتلك البت دى لاه يعني لاه فاهم
ريان بحنق:حرام عليكي يما هي ذنبها ايه
دعاء:ذنبها انها بنت سعد السلانتي
تملكت مشاعر مختلطه من الحيرة وعدم الفهم من ريان وقطع لحظات التشاحن صوت اقتراب نغم وتوقفها بقربهم
نغم:يماااا … يماااا… أنتي اهنيه وابوي عيناديكي
مسحت دعاء خيوط الدموع التي انسدلت من مقلتيها و انسحبت بخطوات سريعه متجهه للداخل بينما نظرت نغم لأخيها الذي يبدو كبركان علي وشك الانفجار واقتربت منه بحذر وهي تهتف بهدوء:مالها امك يا ريان
ريان:_____
نغم بتوتر:ريان عكلم حالي كتير ولا ايه!
ريان : اقفلي خشمك وغوري علي اوضتك دلوك
رفعت حاجبيها بتوتر بينما تتبعت بمقلتيها خطوات اخيها للداخل وهرولت سريعا ناحيه غرفه زين لتخبرة بما استشعرت حدوثه
______________________
في شركه الحديدي وبغرفه الاجتماعات يجلس كل من ( سيف . سامر . باهر . تيم . يونس . مجدي ) علي الطاوله البيضاوية الشكل المخصصه للأجتماعات وبرفقتهم السكرتيرة الخاصه بسيف ( روان ) والأخري الخاصه بسامر ( ميرنا)
سامر وهو يتصفح بعض الاوراق: حاول متضيعش الصفقه يا يونس احنا محتاجينها بأي شكل
يونس:متبعت تيم مكاني ياعمي هو اكبر و يعرف عني
سامر بحزم : وانت عيل يابابا ولا ايه متنشف كدة ياحبيبي بقالك كام سنه هنا في الشركه ولا تكون دي اول مرة تسافر وانا مش واخد بالي!
مجدي ممازحا : وها هي المباراة تنطلق صافرة البدء والنتيجه واحد ل أونكل سامر وزيرو ل يونس والأجواء متحمسه وال____
قاطعه سامر بنظرات تحذيريه اسكتته بينما اكمل هو: اونكل دي لما تكون في البيت او النادي يابابا انما انا هنا سامر الحديدي رئيس مجلس ادارة الشركه فاهم يابشمهندس ولا اعيد تاني
مجدي :ايه يا جماعه هتسيبوة يبيع ويشتري فيا كدة محد يحجز ياجماعه
سيف وهو يخلع نظارته ويضعها امامه علي الملفات : جهز نفسك هتسافر مع يونس ومش عاوز اي غلط يامجدي تمام
مجدي وهو يبتلع مافي حلقه : تمام يابشمهندس
انتهي الاجتماع واتجه كل منهم لمكتبه عدا مجدي الذي اصطحب يونس واتجه لمكتب تيم وجلسو سويا
مجدي:ابوك دة نافخني ومطلع روحي ياتيم
تيم :معلش يابيضه استحملي شويه
مجدي بحنق:يبااي عليك عيل خنيق والله انتو مافيكو غير حمزة
يونس :عيل! بزمتك شحط طول الباب وعرضه ومخلف بنوته عندها سنتين ومراته حامل وتقول عليه عيل دة انت ال عيل بالله
مجدي:ياعم فكك الكلمه مش هتلزق متيجو نسهر سهرايه حلوة كدة قبل مانسافر
يونس:لا بجد مش فايقلك انا ورايا مليون حاجه هلحق أخلصها قبل ماأسافر
مجدي : وانت يابيه
تيم : لا مش فاضي والله
مجدي:أنت هتعملي فيها ام العروسه فاضيه ومشغوله ! يعني محدش هيسهر معايا
تيم:لم نفسك يامجدي ها مراتك شبه بتراقبك وكل يوم تكلمني تسأل عليك خاف علي نفسك وعلي ابنك
مجدي:طب والله انا غلبان
___________________________
في ڤيلا الحديدي عاد حمزة من الجامعه وجلس برفقه والدته قليلا ثم ارتقي درجات السلم متجهاً لغرفته ثم خلع ملابسه وارتمي علي السرير ومضت دقائق ثم التقط هاتفه يچيب المتصل
مجدي:برنس الليالي ورمانه الميزان
حمزة بأبتسامه:ميجو حبيبي
مجدي:وراك حاجه الليله يسطا
حمزة:معاك يازميلي
مجدي:حبيب اخوك ياحموز انا قلت بردو محدش ليه في الفرفشه غيرك في العيله دى كلها
حمزة :تيم ويونس نفضولك ولا ايه
مجدي: اندال يبني تقول ايه
حمزة: ماعلينا هنروح فين
مجدي : النهاردة خطوبه واحد صاحبي و الحفله اوبا اه جاي ولا
حمزة :انا قتيل الحفله دى ياميجو
مجدي :حبيبي نتقابل بليل سلامات
حمزة :سلام
اغلق الخط ونهض من مجلسه واتجه نحو خزانه ملابسه يبحث عن رداء أنيق يرتديه الليله ليخطف به انظار الفتيات كعادته وفتح الجزء المخصص ب ملابس المناسبات الأنيقه وانتقي بليزر بلون رمادي واتجه نحو المرآه وارتداه وهو يهتف:قمر ياواد ياحمز____
ابتلع باقي جملته عندما وجد البليز ممزق من الاكتاف و به بعض الفتحات الجانبيه لتجحظ عيناه من الدهشه ويخلعه سريعا وهو ينظر اليه بضيق شديد ثم ألقاه علي السرير واتجه نحو الخزانه مرة اخري وامسك بأخر ذو لون اسود ليرتديه ويتفاجئ به بنفس حاله السابق فيلقيه ارضا بغيظ ويخرج الأخر والأخر ثم يصيح بحدة: نغاااااااام
دقائق وارتفعت طرقات الباب ⚡⚡⚡ ثم دلفت هايا وهي ممسكه بمج بين يديها ثم هتفت بقلق:مالك ياحمزة بتزعق لمين كدة
اتجه نحوها ودفعها جانبا بينما تأوهت من سقوط المشروب الساخن الخاص بها عليها لكن دون اهتمام من اخيها ليهبط للأسفل بغيظ متجهها نحو والدته ليهتف بنبرة حادة: ماما
آيه :ايوة ياحمزة مالك كدة
حمزة: احنا هننزل البلد امتي؟
آيه : بلد ايه؟
حمزة: ماما متجننيش احنا نعرف كام بلد
آيه :حمزة اتكلم معايا بأسلوب كويس والا انت حر
زفر بضيق وحاول تملك اعصابه ثم اردف:حقك عليا ياماما بس عرفيني هنروح سوهاج امتي
آيه بتعجب:هنروح ليه ياحبيبي ما خالتك كانت لسه معانا من اسبوع في فرح منال
حمزة :قصدي يعني علشان نبارك لنغم علي نتيجتها وكدة
آيه: آه لسه بدري عما نتيجه نغم تطلع بس حاول تجبلها هديه حلوة انت واختك عما نبقي نروح هناك
حمزة وهو يصك اسنانه بغيظ :طبعا دة انا هجبلها هديه تطلع من نن عنيها
آيه:يابني اختار الفاظك اسمها تعجبها تفرحها مش تطلع من عنيها !
التفت حمزة عائدا نحو غرفته ولكنه تروي وطرق باب غرفه اخته ودلف للداخل ليجدها جالسه بأحدي اركان الغرفه فحمحم وجلس بقربها
حمزة :انا آسف
هايا بلا مبالاة: عادي حصل خير
حمزة :ماخلاص بقي قلتلك آسف مش هتحايل عليكي
هايا: طيب قوم امشي بقي
حمزة وهو يمسك بتلابيب ملابسها من الخلف:حقك عليا بقي ولا لازم اشعلقك في السقف
هايا:فكك انا زعلت منك
حمزة: قلت كام مرة لما اكون متضايق محدش يقرب مني ولا يكلمني
هايا:انا سمعتك بتزعق فقلقت عليك وجتلك جري انا غلطانه اصلا
حمزة:ماقولنا خلاص بقي متبقيش قفوشه ٢٠٠ جنيه حلوين
هايا:ميجيبوش صن بلوك اصلا
حمزة :٣٠٠ اخر كلام
هايا : ٤٥٠ ومش هجيب ثيرة لبابي
حمزة: بت انتي طماعه
هايا :دة اسمه حسن استغلال الفرص
حمزة :طب هديكي فرصه واستغليها كويس وعنيا ليكي
هايا بأهتمام:كلي أذان صاغيه يا برو
حمزة :نغم بنت خالتك نفسي ومني عيني اجيب مناخيرها الارض نفسي ارزعها مقلب يخليها تلف حوالين نفسها بدل مهي ذي القطط بسبع ارواح ولا بيأثر فيها حاجه وعماله تحرق دمي وانا لسه في زهرة شبابي يرضيكي كدة اخوكي يتعمل معاه العمايل دى يا هيوش
هايا :لا بقولك أيه يانحله لا تقرصيني ولا عاوزة منك عسل طلعني من وسطكو انتو الاتنين الله يخليك وياسيدس مش عاوزة منك فلوس انا اصلا مسمحاك
حمزة :بقي كدة بتبعيني علشان البت دى
هايا : ياميزو والله نغم طيبه خالص وبتعزك يعني بس بتحب تنكشك
حمزة وهو يتذكر ملابسه الفخمه الممزقه :تنكشني دة انا هساويها بالأسفلت استني بس عليا وعرفيها لما تكلمك أني مش هعدي عملتها دي بالساهل
هايا :ربنا يهديكو بجد
غادر الغرفه وهو يتوعد بينما علي الجانب الأخر بقصر المنشاوي وتحديدا بغرفه زين
نغم :زين يازين
زين :ايوة يانغم تعالي
نغم :ألحق
زين :خبر ايه
نغم: امك كانت عتتحدت مع ريان بالچنينه وابوك بعتني اچولها تروحله المكتب ولما روحت لقيتها محموقه چوي وريان كانه مضروب علي راسه والحكايه بينها واعرة
زين :وبعدين!
نغم :بعدين امك فاتت لجوة وبعديها بهبابه دخل وراها ريان واني خايفه چوي
زين :وهما فين دلوك
نغم :باينهم في المكتب
زين : بينا نشوف ايه الحكايه
بالاسفل قبل دقائق دلفت دعاء لمكتب فارس وجلست برفقته في الصالون الجانبي الملحق بالغرفه الفارهه
فارس:وة عيونك مدمعه اكدة ليه
دعاء:مفيش ياحبيبي دى هبابه هوا لفحت عيوني متحملش انت هم عاد
فارس :دعاء .. بلاه اللف والدوران وچولي خبر ايه من امبارح وانتي معچبانيش واصل
نظرت له بترجي ثم هتفت بتوتر : چولي يافارس من كام سنه فاتت وقت ما هملت القصر اني وخواتي وكل الظروف وقفت ضددك وكان چوازنا مستحيل أنت چواك حسيت أننا هنفترچ وبعمرنا مهنكون لبعض ؟
فارس بتعجب:لزمته ايه الحديت دة دلوك
دعاء: في حاچه لازمن نتحددتو فيها بس قبلها چاوبني علي سؤالي
فارس :لاه يا دعاء أني بعمري محسيت أننا هنفترچ بأي شكل لأنك جوات قلبي ♥️
أغمضت عيناها وابتلعت لعابها بغصه مؤلمه وهتفت :طب لو الزمان انعاد تاني بظروف تشبه لنا ومع حد من عيالنا تعمل ايه ؟
قطب حاجبيه وهتف: خبر ايه ياام ريان فوتي بالموضوع علي طول من غير لف ودوران
دعاء وفؤادها يرتجف من الرعب: ح.ح.حاضر
طرقات الباب ⚡⚡⚡⚡
فارس :مين؟
ريان من الخارج : أني يبوي
تسارعت دقات قلب دعاء بينما دلفت ريان بعدما سمح له والدة بالدخول
فارس:تعال ياولدي
اقترب منهم ريان ونظر بهدوء لوالدته بينما ترجته هي بنظراتها أن لا يتحدث بما ينوي ولكنه نظر لوالدة وهتف :اني چاي أسألك يبوي لو انت ال رافض الموضوع من اصله تخبرني ليه ؟
فارس بعدم فهم:موضوع ايه ياريان
دعاء لريان :اسكت انت خالص دلوك وبعدين نتحددت
فارس :تتحددتو في ايه يادعاء
ريان :لازمن حد فيكم يچاوبني ودلوك
فارس بحدة :خبر ايه انت وهي عمالين تحددتو بعضكو ولا كأني واقف بيناتكم
ريان :أنت علي راسي يبوي بس __
فارس مقاطعا :مبسش انطق علي طول
ريان: ليله امبارح أمي چت لعندي وحكت معاي انكم عاوزين تچوزوني وسألتني اذا كان ببالي واحدة معينه واني چولتلها علي واحدة رايدها تكون مرتي
فارس بفرحه : وماله ياولدي أنت بس تشاور وأني اچيبها لحدك عروسه
ريان بحسرة :مني شاورت يبوي بس امي مرضياش
اتجه فارس بنظرة لدعاء وهتف بلوم :خبر ايه يادعاء مرضياش ليه مش انتي ال جولتي نسأله لأول چايز يكون عيحب واحدة اكدة ولا اكدة
دعاء بأنطفاء : سألته مين الواحدة دى
التفت فارس لريان وهتف بأبتسامه :بت مين ال تنسعد دي ياولدي
ريان :بت سعد هارون السلانتي يبوي
تلاشت ابتسامه فارس تدريجيا وبهتت ملامحه ومرت أمام عيناه ما فعله سعد من قبل لتشتعل بداخله نيران الغيرة والكراهيه ….💔
_________________________
في القاهرة أنهي محمد التعاملات الماليه الخاصه بعمل والده واتجه نحو مكتبه الكائن بأحدي البنايات السكنية وجلس برفقته هو والمقاول
عاصم :كدة متبقاش غير التسليم يا استاذ لطفي
لطفي بضحكه سمجه : هههه ايوة يابشمهندز دة مشروع العمر كله ولا ايه ياشيخ
نظر له محمد بضيق وهتف: انا اققل بكتير من اني ابقي شيخ يا استاذ لطفي وعموما ربنا يرزقك ويرزقنا يارب
لطفي :متاخدلك شقه علشان تتجوز فيها فرصه و يابخت من كان النائب عمه
انهي حديثه وهو ينظر ناحيه عاصم بينما هتف محمد :لا شكرا انا شقتي في بيت ابويا ومش هبعد عنه ابدا
لطفي وهو يحك ذقنه : ومالو مش عيب ياحبيبي
محمد وهو يمسك بأحدي الملفات: الا قولي يا استاذ لطفي هو ليه كل التعاملات بأسم بابا وبس انا مش شايف اسم حضرتك في اي عقد خالص ولا حتي شاهد
لطفي بتوتر : ها .. منا عرفت البشمهندز قبل كدة أني مليش في الورق والكلام دة انا مقاول وبناوله الفلوس وهو اسم النبي حارسه وصاينه بيرسم ويخطط ويجيب زمايله وكل ال شغالين هنا في المكتب وبنولي العمارة ذي منتا شايف الله اكبر خمسه وخميسه في عين العدو
محمد : ايوة بس علي الأققل تضمن حقك مش غريبه دي يعني أنك ممعاكش اي ورقه تثبت شراكتك معانا !
لطفي بتبرم : ايوة مش غريبه مهو البشمهندس عاصم يتأمن علي روحي وانا مغمض مش حبه فلوس وبعدين علي راي المثل داري علي شمعتك تئيد وانا احب اداري نفسي من الناس وكتر كلامهم
محمد : بس ___
لطفي مقاطعا : جرا ايه يا بشمهندز هو ابنك مورهوش غيري النهاردة ولا ايه
عاصم :بيدردش معاك عادي يالطفي بيه هو بس خايف عليك
لطفي :انا عرفتك نظامي يابشمهندز من اول يوم وال اوله شرط اخرة نور
عاصم :حصل خير يالطفي بيه حضرتك تقدر تتفضل
لطفي بغيظ من محمد : فوتكو بعافيه
دلف لطفي للخارج بينما نظر عاصم لمحمد بعتاب :ايه يابني انت مبترحمش الراجل كل مابتشوفه ليه كدة!
محمد : يابابا الراجل دة مريب اوي وانا مبرتاحلوش ابدا
عاصم :خلاص ال مابينا خلص وكلها شهرين تلاته بالكتير وينتهي تسليم الوحدات ومش هنشوفه تاني
محمد :علي الله
بالاسفل استقل لطفي سيارته وامسك بهاتفه وضغط بعض الازرار واجري اتصالا هاتفيا بأحدهم
لطفي :الوووو ايوة ياغالي
جلال: ايوة عملت ايه
لطفي :كله ألسطا اللوكس وكلها كام شهر وتسمع احلي خبر
جلال: خلصت ال قولتلك عليه
لطفي:عيب ياباشا هو انا تلميذ
جلال: لا يخويا مش تلميذ المهم ميكونش حد حس بحاجه
لطفي :صراحه الواد ابنه ال عاملي فيها شيخ دة مبينزليش من زور وكل مايشوفني يمسكني سؤال ورا التاني لما خنقني ذي ميكون حد مسلطه علينا
جلال :متقلقش هنتعامل معاه
لطفي: طب وانا ياباشا مش هتشوفني بحاجه
جلال:انت مبتشبعش ابدا يالطفي.. عموما روح المكتب وخد الظرف ال سبتهولك مع السكرتيرة
لطفي وقد اتسعت ابتسامته:ربنا يخليك للغلابه يابيه
الفصل التالي: اضغط هنا
يتبع.. (رواية بنات المنشاوي الجزء الثالث) اضغط على اسم الرواية لتجد الفهرس كاملاً بجميع الفصول.