رواية عندما يغيب العقل – الفصل التاسع
حليمه…بقيت أسبوع بدون مسواك
اطبخ اي شي وامشي نفسي
اتصل علي مايرد انقهرت على نفسي ليش اخذ الراتب
توقعت يريد يتسوك ويكون المصرف بايده
اتصلت علي مرتين مايرد
المره الثالثه
حليمه…الووو فاضل وينك
فاضل…خير شكو شتردين
حليمه….وين الراتب صار اسبوع بدون اكل
فاضل…صرفته دبري نفسج
حليمه…منيين أدبر نفسي الذهب اخذته الراتب عندك
منيين ادبر نفسي
قابل اشتغل حتلو اشتغل بهذا عمري منو يشغلني
فاضل…لا دوخيني بعد لا تتصلين لان عندي شغل
حليمه…ياربي هذا شبي تغير عليه ليش هيج يتصرف وياي
اني ما غلطت بحقه
هسه شلون شلون راح أدبر نفسي
رحت على ام ايمن
ام ايمن..هلو خاله تعاي تفضلي
حليمه…الله يسلمج
ام ايمن. من زمان مااجيتي عدنا
حليمه.. اني جايه وكلش مستحيه منج
ام ايمن…ياا ليش مستحيه الله يستر انتي مثل امي
الله شاهد عليه شكد احبج واحترمج
حليمه…اني هم احبج مثل بنتي
ام ايمن…شنو هذا الجمال مااعرف اكو شي متغير بيج
بس مااعرف شنو صايره حلوه
حليمه…بعد كلبي انتي الحلوه
ام ايمن كولي خاله اامريني
حليمه…اني استلمت راتبي بس انباك مني مدري وكع
المهم اني محتاجه ٢٥ اريد اتسوك وبس استلم الراتب بيج خير ودللي
ام ايمن…بس ٢٥ يااا سهله مو تدللين من عيوني
دخلت البنيه جوه ورجعت طلعت بيدها فلوس
ام ايمن…هاج خاله ذني ٤٠ الف جوه ايدي ومن يجي ابو ايمن ادزلج بعد
حليمه…لا ٢٥ كافي
ام ايمن….ولله مايرجعن وحتى لا ترجعيهن شنو قحط
حليمه…ولله مااعرف شلون اجازيكم
ام ايمن…خاله حبيبتي اي شي تحتاجي تعاي وبيج خير ودللي
حليمه…الله يكثر خيركم
جمانه السعيدي
حليمه…اخذتهن وطلعت كبل للسوك جبت دجاجه ونص كيلو لحم وفواكه ومخضر بلباقي
رجعت للبيت طبخت عشا
اتصلت على فاضل
حليمه…هااا فاضل تجي للعشى
فاضل…اي اجي لان عندي وياج موضوع كلش مهم
لازم نحجي اني وياج
حليمه ما تعشيت بقيت منتضرته للعشره بليل يله اجا
دخل شكله عصبي وضايج
حليمه…هله بيك اني زعلانه هيج تعوفني بدون مسواك
رحت اتقرضت من الجيران فلوس وطبخت
فاضل…عوفي هاي الخرابيط عنج مو تزعلين على اساس بت العشرين
الي بكدج زوجن احفادهن
كاعده تتنغوص ست حليمه زغيرونه
حليمه…كلش انكسر خاطري من كلامه سكتت
فاضل…باعي واسمعي كلامي كلش زين
حليمه…قبل لا تحجي رجعلي البطاقه اني ماعندي مصدر دخل غيرها
بعدين وين صار المشروع
فاضل…انجبي واسكتي اي مشروع ماكووو
والبطاقة بعد انسياها ماترجع هذا الراتب من حقي
حليمه…شنو من حقك ولله اشتكي عليك شنو تاخذ الذهب والراتب
فاضل…اكوم اكسر راسج فهمتي لو لا
انتي انطيتني الذهب بمزاجج اني ما جبرتج تنطيني شي
والراتب هذا هواي عليج
وحده عجوز ساكنه وحدها شلها بهذا الراتب
حليمه…شوف لاتكول زوجتي وتحبني وراح تسكت
اروح اشتكي عليك واكول باك البطاقه والذهب مالتي
جمانه السعيدي
فاضل…روحي اشتكي واني من باجر انشر كل صورج ومقاطع الفديو الي عندي
هاج هذا التليفون شوفي شوفي نفسج شلون تراهقين
شلون لابسه ملابس نوم ونايمه بحضني
لو هاج هذا مقطع الفديو وانتي بعلاقه كامله وياي
موعيب عليج مره جبيره تتصرفين هيج تصرف
حليمه…من شفت المقطع احس كلبي وكف شلون صورني واني ماادري شلون سمح النفسه هيج يسوي
حليمه… كمت اصيح علي امسحه امسحه ما تستحي هيج تصورني انت زوجي واني مامسويه شي غالط
فاضل…زوجج هههه هههه ضحكتيني شلون زوجج
وين العقد الي يثبت احنا مزوجين
حليمه…شنو يعني
فاضل…يعني ضحكت عليج يعني من شفتج وحدج
وعندج بيت وذهب وراتب قررت اضحك عليج
سئلت عنج وعرفت كلشي يخص حياتج
بصراحه جنت اضحك عليج
جمانه السعيدي
حليمه…كوم اطلع برا اطلع من بيتي حرامي
فاضل…حتى هذا البيت هم اريده اني كاعد بغرفه وحده بيت اهلي ومكسر تكسير اني وزوجتي وجهالي
وانت وحده عجوز كاعده بيت وحدج
حليمه…لو تموت مااطلع من بيتي
كوم اطلع من بيتي الله ياخذك
فاضل…لا اطلعين وانتي الممنونه فهمتي لو لا
اللج يومين باجر جمعه والسبت الأحد تفتح المحكمه
ترحين تحولين البيت من اسم صافي
الاسمج وبعدين ترجعين تحولي بااسمي
اذا يوم الأحد خلص انتي ما محوله هذا البيت بااسمي
ادز ذني المقاطع الاخوانج والاختج
والولد عمج والاقاربج والشارع هذا واحد واحد
خليهم يعرفون حقيقتج
اذا مااخلي الناس كلها تتفل بوجهج
مره عجوز تضحك على ولد شاب وتخلي ينام وياها بلحرام
فكري زين وديري بالج تتهورين
البيت يتحول بااسمي وثاني يوم اطلعين من البيت ماتاخذين غير ملابسج
كلشي ما تاخذين من هذا البيت اريد اجيب زوجتي وجهالي ونكعد هنا
حليمه…دموعي نزلن من كلامه شكد حقير ونذل
معقوله اني سمحت الواحد مثله هذا يضحك عليه
ويقشمرني بكم كلمه من كلام الحب
بهذا عمري تنتشر صوري ومقاطع فديو واني بهيج وضعيه
اكتل نفسي ولا اشوف نضرات العالم اليه
فاضل…اعتقد سمعتيني زين يومين اذا يوم الأحد خلص
وهذا البيت مو بااسمي
ثاني يوم تلكين نفسج على الشرقيه وعلى كل الفضائيات
فضيحه مالها مثيل
عجوز مراهقه تدخل بعلاقه مع شاب يصغرها ٢٥ سنه
وساعته شوفي شراح يصير بيج
ههه عجيز ولا عبه لعب
فكري زين حولي البيت باسمي وأخذي ملابسج واطلعي
ولا ادمر حياتج تدمير
حليمه…كمت ابجي ووين اروح وين اسكن
فاضل…الجهنم الحمره شعليه بيج وين ماتردين روحي
الي بعمرج يرحون دار العجزه
دار العجزه سمعتي لو لا ياااعجيز صدك عجوز بدون عقل
طلع فاضل من البيت حسيت الدنيا صارت ضلمه
صدك جذب اني شسويت بنفسي
هاي تاليتي تنتشر صوري شلون راح اباوع بوجه اخواني
سميره شراح اكووولها
محد راح يصدكني شما بررت
حتى عقد زواج ماعندي شلون عفت واحد حقير مثل هذا يضحك عليه
ماكدرت انام بس ابجي
ورطت نفسي ورطه مراح اكدر اطلع منها ابد
للصبح واني كاعده لا اكل ولا شرب ولا نوم
محتاره بوكتي ماعندي غيرك يارب انت تعرف هذا
الحقير ضحك عليه
ولعب على مشاعري بعمري مافكرت اعصيك
كنت اريد اعيش حالي حال الناس
يارب ساعدني لو تاخذ امانتك موتني حتى اخلص من هاي الفضيحه وهذا العار
المن احجي شلون شراح اكول الخواني تالي عمري جبتلكم العار للصبح عيني ماغمضت راسي كام يوجعني من كد التفكير والقهر
كاعده بمكاني وابجي
اندكت الباب الساعه ١١ الصبح
خفت افتح الباب دزتلي رساله ام ايمن كالت افتحي الباب
الجهال جاي يدكون
فتحت الباب
ابو ايمن جايبلي مسواك لان سمع راتبي ضايع
ما مخلي شي ما جايبه اليه ركي بطيخ دجاجه لحم
مخضر من كل شكل فواكه
دخلوهن الجهال جوه وطلعو
كعدت بلكاع عفت كلشي بمكانه وويني وين الاكل
اني ضعت شلون بيه
جمانه السعيدي
كمت ابجي ابجي بحركه اني شسويت بنفسي
جنت عايشه ملكه وضايجه لان وحيده
سمعتي طيبه والناس كلها تحترمني واكول وحيده وضايجه وكعت نفسي بير مراح اكدر اطلع منه
ضعت كلشي ياريت الزمان يعود بعمري مراح
ادخل واحد مثل هذا قذر الحياتي
شلون عفته يضحك عليه ابجي وادعي رب العالمين يطلعني من هاي الشده
باب البيت بقا مفتوح بس مردود رد ورا جهال ام ايمن لمن طلعو
هلكد مااافكر بمصيبتي حتى الباب نسيت اسده
صليت صلاة الضهر وبقيت كاعده على السجاده وادعي ربي
كلشي مااريد بس رب العالمين يسترني
عندي اموت اهون ولا واحد يشوف هاي الصور
سمعت الباب انفتح ودخل فاضل يسولف ويضحك
كمت من السجاده
دخل عليه فاضل وزوجته
فاضل…تعاي حبيبتي شوفي بيتج
هي دخلت بس شافتني كامت تضحك
زوجت فاضل…يااا هاي العجيز الي جنت تضحك عليها
خرب عرضك ولك هاي مره جبيره
فاضل…المهم وكعت لو لا أخذنا الذهب والفلوس
وهذا بيتنا راح ننتقل اله بااقرب وقت
زوجت فاضل…لا تنسى الفضل اليه اني الي خليت الخطه
فاضل…اكيد لو ما انتي تخططين كلشي مااكدر اسوي
النسوان ماتكدر عليهن غير النسوان
زوجت فاضل….زين خوش بيت بس يحتاج صبغ
فاضل…اي اصبغه واجيبله كهربائيات جديد
حليمه..اني واكفه بس دموعي تجري جاي يحتلون بيتي كدامي
طلعت ايدها زوجت فاضل لا بسه البتوت مالاتي
وتاشر على الحايط
هنا نخلي ساعه وهاي البرده مااريدها
لابسه ذهبي وجايه تاخذ بيتي جمانه السعيدي
اني شكد جنت غبيه ليش هيج الطيب ماله نصيب بهذا الزمان الزواج مو عيب
العيب واحد مثل هذا يضحك عليه
حضنها كدامي ويبوس بيها
التفتت شافت المسواك بعده بلكاع
زوجت فاضل…شوف المسواك تاكل ركي وبطيخ
شوف الحم والدجاج
فاضل…يله تعاي ناخذ هذا المسواك شيلي هاج ذني
العلاكتين واني اشيل الباقي
حليمه…شالو المسواك اخذو وطلع
اااخ اااخ شسويت بنفسي شلون بيه وين اروح
منو الي راح يفهم وضعي منو يصدقني
شلون راح اطلع نفسي من هذا المازق
ياحيف على عمري الي خلصته امشي على السراط المستقيم ولمن غلطت
غلطتي هاي راح اضيعني
الهي مسني الضر وانت ارحم الراحمين
الفصل التالي اضغط هنا
يتبع.. (رواية عندما يغيب العقل) اضغط على اسم الرواية لتجد الفهرس كاملاً بجميع الفصول.