رواية عندما يغيب العقل – الفصل الثاني
حليمه….يوم الحنه كانت حفله عائليه ماحضر بيها بس اهلي والاقارب وأم صافي واخته
حنه بسيطه لبست ثوب سمائي وفتحت شعري
امي حنت ايدي
الحد هاي اللحظه واني ماشايفه العريس
بس فرحانه راح ازوج
ثاني يوم ام صافي جابت بنيه تقريبا عمرها ٣٥
كالت هاي ام الصالون تمكيجك وتلبسج بدله
طبعا بدلة العرس من محل عمي ابو صافي لان هو قماش
وخيطتها خياطه كرديه بيتها يم عيالي بس تخبل
عبالك موبدله فصالها يخبل
المهم البنيه ام الصالون لبستي البدله وبلشت تمكيجني وترتب شعري
طلعت وحده ثانيه
شكلي كله تغير على المكياج وقبلها اني حفيت وجهي
طلعت عروسه مختلفه
اجت الزفه نزلو البركع على وجهي وفوكا وصله بيضه
ثكيله حتى لحد يشوفني العريس مااجه
هيج جانت التقاليد ام العريس تروح اجيب العروسه
من بيت اهلها
اكيد اكو سيارات بيهن زلم من أقارب العريس وابو العريس كان موجود
جمانه السعيدي
بيومها ابوي واخواني اختفو من البيت
قبل عيب الرجال يحضر عرس بنته
طلعتني ام صافي صعدتني بلسياره امي كعدت بصفي
وأم صافي كعدت بصف امي وعمي ابو صافي كعد بلصدر
اول ماصعدت كال مبروك بنيتي الف مبروك
مارديت علي لان استحي امي ردت بمكاني
امي…الله يبارك بيك ويحفظك مبروك عليكم الله يتمم عليكم بلخير والفرح
وصلنا للبيت والهلال اشتعلت ذبحو خروف جو رجليه دخلوني غرفتي والحبايب يركصن ويهلهلن
غرفتي كلش حلوه خشب صاج مشتغلي تسكام
امي خلت ملابسي بلكنتور وسميره عدلت البركع
وطوخت الحمره
جابو العشى كعدن الحبايب يتعشن بغرفتي وريحة الاكل
ترست الغرفه ريحة اللحم والخبز والتمن
من خلصن اكل سميره نزلت جابت بخور من عمتي وشعلته بلغرفه حتى تروح ريحة الاكل
شويه وكالت راح يزفون العريس
بس سمعت هاي الكلمه كلبي كام يدك سريع لزمت امي من ايدها
حليمه… يمه فدوه لا تعوفني
امي… لا مااعوفج هسه اوصي صافي عليج
حليمه…لا ابقي وياي
امي…هااا ابقي وياي لا ماابقى وياج العرس مابي شراكه
هذا عرسج مو عرسي
جمانه السعيدي
حليمه….نزلن البركع على وجهي واني اسمع زفة الولد
وصوت الهلال قرب على غرفتي
كلبي كام يدك سريع
دخل صافي واني مدنكه كمت ارجف كلني
امي…مبروك خاله منك المال ومنها العيال
صافي…الله يبارك بيج خاله شكرا
امي…حلومه هاي الزغيره المدلله دير بالك عليها
صافي…اخليها بعيوني تدلل
حليمه…طلعت امي وصافي طبك الباب وراها
واني بعدني واكفه ومدنكه والبركع على وجهي
قرب عليه صافي وشال البركع واني كمت كلني اختض
صافي… مبروك
حليمه…بعدني مدنكه وماحجيت اي شي هاي اللحظه الها رهبه واني جنت خايفه
باسني براسي وقرب ايده رفع راسي بقيت منزله عيوني
صافي…ليش هيج خايفه اني زوجج
حليمه…ماحجيت اي شي
صافي….يله تبدلين
حليمه….ماحجيت اي شي
سحبني كعدني على الجربايه
صافي…شو ارفعي عينج
حليمه…ترددت بعدين هو رفع راسي ورجع كال ارفعي عينج
رفعت عيني ونزلته بسرعه
صافي…اني شكد صار منتضر هاي اللحظه
من اول مره شفتج بيها كلت اي هي هاي هاي الي اريدها
اني شكد ثكيل ومالي شغل بلنسوان بس بيومها بقيت امشي وراج منا لمن دخلتي بيتكم
حليمه….من سمعت هذا الكلام رفعت عيني علي
صافي…تذكريني
حليمه…هزيت راسي لا
صافي…شوفيني زين
حليمه…رفعت راسي
صافي…هااا اذكرتي ترا مصار هواي بيومها جنتي
تمشين بلشارع ماعرف وين جنتي
شكلج يخبل بقيت امشي وراج منا لمن دخلتي بيتكم
حليمه…رفعت عيني صارن عيوني بعيونه دنكت
صافي.. ليش الخجل ترا انتي زوجتي
لو تدرين اني شكد فرحان بيج من دزيت امي بقيت كاعد على نار يمتى امي ترجع وتكول موافقه
صافي…يله اساعدج تنزعين البدله والبركع
حليمه…رجعت ورا ابتعدت عنه وكتله لا
صافي…شنو لا
حليمه…اني ابدل وحدي من تطلع
صافي…بس اني مااطلع
حليمه…ابقى بلبدله ماانزعها
صافي…شلون تبقين بلبدله واني موجود
حليمه…قرب عليه وبدا يفتح بلبركع وينزل الماشات
صافي…الله عطرج طيب
نزل البركع وبدا يفتح بشعري
ريحت شعرج ولونه يخبلن الله شنو هلشعر الحلو
شوفي ممنوع تكصين شعرج ابد
حليمه.. اي مااكصه
صافي…يله اني راح ابدل واطلع وانتي بدلي براحتج
بدل صافي لبس دشداشه بيضه وطلع
بس طلع دخلت امي
امي…يااا ليش مانزعتي البدله
حليمه..مااكدر
امي…اني اساعدج تعاي نزعت البدله ولبست ثوب نوم طويل ابيض جمانه السعيدي
امي…صيري حبابه واسمعي كلام زوجج حتى يحبج
حليمه…اي
تقريبا نص ساعه ورجع صافي جايب العشى وجاي
امي بس شافته طلعت من الغرفه
صمم صافي ناكل اني ويا سوه
بدا يوكلني بايده حسيت كلبي مطمن وراج الخوف مني
من هاي اللحظه بدت حياتنا الحلوه
صافي ماكان بس زوج اليه
صافي زوجي وابوي واخوي شكد حنيين
عبالك احبه من زمان ولا عبالك زواجنا تقليدي
فتحت عيوني علي تعلمت كلشي على ايده
دللني دلال ماصاير اذا اطلب ثوب يجيب ثنيين
اذا اطلب عطر يجيب ثنيين
اذا اتمرض بتمرض قبلي حتى اهله يحبوني ويحترموني
صرت اني ام البيت من اول مادخلت البيتهم
انظف واطبخ وارتب
كل الي يريد شغله يصيح حلومه وينج
حتى عمي حيل يحبني دائما يكول انتي انتي مو حليمه
انتي نعيمه انتي نعمه من رب العالمين
صافي مرات يتشاقى وياي
صافي….انتي يمكن ساحرتني خليتني اركض وراج
تالي بلعرس نكرتي تكولين مااذكر
علينا ما تذكرين هو انتي جنتي مخططه تزوجيني
حليمه….لا ولله اني الحد العرس ومااعرف انت العريس
صافي…ذني مو عليه انتي ساحره
حليمه…اسم الله من السحر
صافي….اعترفي شلون خططتي تزوجيني
حليمه….اني اصلا مااعرفك شلون اخطط ازوجك
صافي….مو كشفنا العبه اعترفي
حليمه….ليش تلح
صافي….مااعوفج اله تعترفين
حليمه…..زين ذكرتني اني احبك من زمان من عمري خمس سنيين احبك
صافي…اي هيج اعترفي وصيري حبابه
حليمه…اصلا اني فعلا احبك وماحبيت واحدغيرك غير انت ابو بيتي شعندي غيرك
فات ست اشهر وماكو حمل وبدا السؤال الممل يتكرر
ليش ماكو اطفال ليش حليمه ما حملت
قررت خالتي تاخذني للدكتوره حتى تشوف شنو اسباب
تأخر الحمل
الفصل التالي اضغط هنا
يتبع.. (رواية عندما يغيب العقل) اضغط على اسم الرواية لتجد الفهرس كاملاً بجميع الفصول.