رواية عندما يغيب العقل – الفصل الثالث
حليمه….رحنا الدكتوره نسائيه بعد الفحص والتحاليل
أكدت اني ماعندي شي
واي سبب يمنع الحمل ماكووو
رجعنا للبيت واحنا مستبشرين خير على أمل يصير حمل
بما ان ماكو مانع للحمل
خلصت سنه بعد زواجنا وكلشي ماكوووو
رجعت عمتي اخذتني الغير دكتوره أكدت نفس كلام الدكتوره الاولى
اني ماعندي اي سبب يمنع الحمل
هلمره الدكتوره من عرفت اني صار سنه مزوجه بدون اطفال وشافت التحاليل
طلبت من عمتي تخلي صافي يسوي تحاليل احتمال الخلل من صافي مو مني
بس عمتي ما قنعت شلون الخلل من صافي والمره هي الي تحبل وجيب
رجعنا للبيت عمتي ضايجه من كلام الدكتوره
صافي…هااا حجيه بشري
عمتي…هاي الدكتوره ما تفتهم
صافي…ليش هاي احسن دكتوره والكل يحمد بيها
عمتي…ما تفتهم هي كوه تكول حلومه مابيها شي خل زوجها يحلل
صافي…هاااا
عمتي…مو اكلك ما تفتهم هي المره تحبل واجيب الرجال شعلي
صافي…بسيطه اذا على التحليل
عمتي…شنو بسيطه انت مابيك شي وحلومه مابيها شي
هسه تحبل وكول امي كالت
حليمه….دخلت للغرفه بس كلش ضايجه اكثر شي من عمتي
لان ما تقبل تقتنع اني مابيه شي
صافي…ليش ضايجه بعدج زغيره وهسه تملين من الجهال
حليمه…الله كريم
صافي…الشهر الجاي من استلم الراتب اروح اسوي فحص
واذا طلع من عندي السبب واكو علاج
اتعالج اني هم اريد اطفال مو بس انتي
حليمه…انشاء الله
جمانه السعيدي
حليمه…هذا الشهر كنت متئمله اطلع حامل وكنت احسب يوم يوم بس كلشي ماكووو
من نزل الراتب راح صافي الدكتور اخصائي
وسوا تحليل خصوبه وبقينا منتضرين النتيجه
وهنا كانت الكارثه صافي طلع عقيم وماكو امل واحد بلميه يصير اب
واي علاج راح ياخذه راح يأثر على جسمه وعلى حالته النفسيه بدون فائده
رجع سوا تحليل بغير مختبر ونفس النتيجه
بيومها رجع وجها اسود هلكد ما ضايج دخل للغرفه
ونام بدون حتى مايغير ملابسه ولا ياكل
دخلت للغرفه..
حليمه…صافي ليش ضايج
صافي…مابي شي عوفيني بحالي
حليمه…شلون مابيك شي زوجي واعرفك طلعت نتيجة التحليل مطابقه
صافي…عوفيني الخاطر الله
حليمه…ميخالف أملنا برب العالمين مراح ينسانا
صافي…ليش تلحين اطلعي برا
حليمه …طلعت برا بس مانزلت جوا طلعت بالسطح وكمت ابجي ابجي بصوت وحركه
معقوله اني مراح اصير ام وصافي مراح يكون اب الاولادي شلون اني وصافي راح نبقى هيج
لوبس طفل واحد ولله صافي راح يكون احسن اب بلدنيا كلها
بقيت للاذان واني كاعده بلسطح ابجي
المشكله هيج قضيه مايصير بيها اي تدخل اله رحمة رب العالمين جمانه السعيدي
انفتح باب السطح صافي يدور عليه
صافي…هاي انتي هنا نزلت ادور عليج جوه
حليمه…مسحت دموعي
صافي…تبجين ماعاش الي يبجيج واني موجود
حليمه…. الحمد لله هاي قسمتنا من رب العالمين
اجا قرب كعد بصفي
صافي…شوفي اني شكد احبج واموت عليج انتي عندي اعز من روحي بس مااقبل تبقين حزينه
اذا تردين اطفال ننفصل وروحي ازوجي بعدج زغيره
ومن خقج تصيرين ام
حليمه…خليت ايدي على حلكه لاتحجي اسكت
اني مااكدر اعيش من دونك انت عندي اعز من الاطفال
واذا رب العالمين ماقاسملي اصير ام
حتلو ازوج غيرك مراح اصير ام
اني ضايجه عليك أكثر ما ضايجه على نفسي
معقوله واحد شايل كل هاي الحنيه مايصير اب
والسكارا والمخربطين وأولاد الحرام يصيرون ابو فلان وعلان
صافي…كلشي قسمه من ربج والحمد لله على كل حال
اني مراح اسكت راح اخذ علاج بلكت رب العالمين يلتفت علينا
نزلنا جوا صلينا واني بديت احضر العشى
اباوع عمتي كاعده على السجاده تدعي وتبجي
انتظرت رب العالمين يلتفت علينا الخاطره
هاي ام وعائها مستجاب
جمانه السعيدي
من بعدها بدا صافي رحلة علاج متعبه
بسبب العلاج صار جسمه منفوخ وزاد وزنه وحالته النفسيه تعبت سنتين ياخذ علاج بدون فايده
وعمتي الي حانت تكعد وتكوم تحجي بلاطفال من عرفت السبب من صافي سكتت
ازوج حماي الازغر من صافي
من اول شهر زوجته طلعت حامل بس ضمت عليه
تخاف احسدها
من بينت بطنها كالت مااعرف اني حامل توني عرفت
من جهزت ملابس الطفل
تشتري وضمهن عني خاف اشوفهن
هاي الأشياء اضوجني حيل
اني من نزلت للسوك اشتريت قماش ابيض وأخذته للخياطه حتى تخيط الها حضينتين و٣ ثياب
وعصابة طفل من كملن جبتهن وانطيتها
من شافتهن تفاجئت بيهن
بعمري ماباوعت عليها بعين حسد بلعكس كنت اتمنالها الخير
بس هي كانت تخاف مني
كلشي ما ناقصني صافي ما مخليني محتاجه شي
مدللني دلال ماصاير
بس شغلة الطفل كانت ناقصه علينا
ازوج حماي الثاني والبيت صار بي جهال يلعبون
بس مو اولادي اني وصافي
اولاد نسوان غريبه يعيرني بلخلفه ويخافن احسدهن
يعيرني بحظي ونصيبي
صح اضوج بس من اشوف صافي شلون يعاملني ويحبني
انسى كلشي جمانه السعيدي
مرت السنيين تركض ركض مات عمي وبعده بسبع سنوات ماتت عمتي
والبيت انباع وتوزع حصص
اني وصافي اشترينا قطعه ١٠٠ متر بوقتها صافي سحب قرض وبنا بيتنا ونتقلنا نعيش بي
من بعدها ابوي مات وامي لحكته واخواني طلبو اتنازل عن حصتي بيت اهلي
لان اني ماعندي اطفال وعندي بيت وزوجي عنده راتب
ليش اخذ منهم حصه
كل كلامهم اليه كان يوجعني بشكل مومعقول
رحت تنازلت عن حصتي الهم
فعلا اني شسوي بحصتي ماعندي اطفال مثلهم يورثني
بعد كل هاي السنيين بطلت احجي بموضوع الاطفال
لان هذا حد قسمتنا من رب العالمين
لو تجري جري الوحوش غير رزقك ما تحوش
واحنا هذا حد قسمتنا من رب العالمين
جمانه السعيدي
بهاي المنطقه علاقتي ممتازه ويا الجوارين
كلهن يزورني واذا عدهن مناسبه يعزمني
بطلت اسمع اسم حليمه
كل المنطقه تصيح ام حسن يصيحن ام حسن حتى لا يجرحني لو يحسسني بنقص
الحمد لله على كل حال
مرت بينا السنيين تركض واني وصافي مثل مااحنا
ما تغيرت علاقتنا
علاقه حلوه مابيها تعب مابيها حقد واستغلال فرص
علاقه طيبه
الحد ما وصلت عمر ٥٣ بوقتها صافي كان عمره
٦١ سنه ماكو غيرنا بهذا البيت
واحد مكابل الثاني البيوت الي بصفنا انبنت بأحدث موديل
والشارع تغير
بس احنا بيتنا باقي مثل ماهوووو
صار قديم بناء قديم وبسيط بلنسبه الباقي البيوت
بس احنا قابلين وراضين
المن نعمر والمن نبني ماكو احد يخلفنا بهذا البيت
ياريت لو باقين على هذا وضعنا جان هواي احسن
بس صار شي ما متوقعته صافي وكع مريض
وصرنا نعوف بيتنا ونام بلمستشفى كل أسبوع
انام ليلتين لو اتلاثه بلمستشفى
وفلوسنا كلها على الدكاتره والادويه
سنه كامله اتبهذلنا وحالنا اتغير وصار حسره علينا الفلس
إخوانه يجون بس يشوفونه ويرحون
واذا يجيوب شي يجيبون كيلو فواكه
بعت كم قطعه ذهب حتى اشتري علاج
سنه كامله واني عايشه بقلق خاف صافي يموت ويعوفني
الحد ما مات صافي
مات اكثر انسان حنيين وكلبه طيب
عشنا أربعين سنه سوا بعمره ما زعلني
لو حجا عليه لو على اهلي
كان يعاملني احلى معامله بلدنيا
فعلا كنت احس نفسي اميره عايشه بقصر
من جان صافي موجود
شلون راح اكابل هاي الحيطان واكعد ماادري
منو راح يذكرني ويمر عليه
منو يسئل عني منو يسئلني اذا محتاجه شي
من جان صافي عايش محد يمر علينا اله مناسبه
هسه بعد مات صافي منو راح يذكرني من بعده
الفصل التالي اضغط هنا
يتبع.. (رواية عندما يغيب العقل) اضغط على اسم الرواية لتجد الفهرس كاملاً بجميع الفصول.