رواية عندما يغيب العقل – الفصل الرابع
حليمه….الفتره الي بعد وفاة صافي كانت الناس قريبه مني وخاصه الاهل والاقارب
كنوع من المواساة وحتى لايعوفوني وحدي
او يمكن كنت كاسره خاطرهم
كانو يسئلون عني ويجوني كل يوم أو يومين
بس بعدها كلمن رجع الحياته ونشغلوالله عني
تمر ايام واسابيع محد يسئل علني
يطك كلبي اتواصل وياهم مرات يردون على المكالمه ومرات يجاهلون الاتصال
عشت وحده فضيعه الايام متشابها والاكل نفسه
والروتين المتكرر ممل بلنسبه اليه
يجون عليه الجوارين ويذكروني الله يكثر خيرهم
من تنزل فاكهه جديد يجيبولي وياهم
وياا اول طبخة باميه وسبيناغ يجيبولي ماعون
اذا اكو مناسبه بلشارع يعزموني
العالم الطيبه تحاول تساعدني اتخطى هاي الوحده
والملل
بس كل هذا واني عايشه وحده فضيعه
اخاف اذا اسمع صوت بليل اقفل البيبان وانام من وكت
لو اكعد اكلب بلتليفون شويه وانام
دائما اتخيل يمكن اموت وحدي بلبيت ومحد يعرف اني ميته
اكو عندي جاره عمرها بلتلاثين زوجها محامي
انسانه راقيه بشكل اذا ما تسمع صوتي لو تشم ريحة طبخ
تصعد على الحايط وتصيح عليه
الف مره وصيتها خاف اموت اريدها تذكرني مااريد اموت وتطلع ريحتي بلبيت ومحد يعرف عني شي
من كد الكئابه كنت اتخيل نفسي ميته
هواي مرات واني اتخيل نفسي ميته
اني فعلا ميته لان حياتي خاليه مابيها معنى ولا هدف اعيش علموده
حتى اتندمت لان ما نفصلت عن صافي وصار عندي اطفال
يعني لو منفصله وصاير عندي طفل واحد اهون الف مره من هذا وضعي
وقابل صافي شكو علي يزوج وحده ارمله مطلقه
ويعيش وياها ليش بقيت متمسكه بوضعي
ليش ما نقذت نفسي من هذا المأزق
كل هاي الأفكار كانت تحاصرني وتشل تفكيري بليل ولنهار
بحيث صرت انسانه عايشه وبس
ماكو اي هدف عايشه علموده
اكل وانام وانام واكعد اكل عايشه بحلقه تفتر وما تنتهي
كلما احاول اتواصل وياا اهلي الكاهم مشغولين
اكيد مشغولين لان حياتهم ما تشبه حياتي
عدهم اطفال عدهم مسؤليات مو مثلي كلشي ماعندي
ضاله اتذكر الماضي واعيش على الاطلال
جمانه السعيدي
كل الي يشوفني يكول شلون انتي كل هذا الجمال وعايشه وحدج حرامات
كنت دائما اسمع هذا الكلام وخاصه من النسوان
الي بلشارع والي يعرفني من زمان
طبعا اني بقيت محافظه على جسمي بس شويه زاد وزني
لان اني لا حملت ولا جبت يعني شكلي مقبول
حتى واني على أعتاب الستين
شكلي مقبول لا سمنت بزياده ولا جسمي ترهل
بالاضافه اني بكل عمري ما شتغلت شغله متعبه تغير عليها حالي النسوان اكثر شي يخرب جسمها الحمل والولاده
واني لا حمل ولا ولاده
اني كنت ملكه ويا صافي ابد مايقبل اتعب
ولا يكلفني شي فوك طاقتي دائما نطلع ونتونس
ونغير جوووو
مايحب يشوفني ضايجه
جمانه السعيدي
المهم فات سبع سنوات بعد وفاة صافي كلشي ما تغير من وضعي اني على نفس الوحده والملل ما تغير شي
ولا صار شي جديد بحياتي
الحد ما اجا اليوم الي بدت وياا اكبر غلطه غلطتها بحياتي
خلصت ٦٠ سنه واني امشي مثل المسطره
وبعمري ما غلطت بحق نفسي ولا بحق اي احد
هذا اليوم كان بداية غلطه عمري
كل عمري ذكيه وافهم الأشياء وهي طايره
بس هاي المره الأولى والوحيده الي يغيب بيها عقلي
صار وياي شي محاسبه حسابه
ولا كدرت اسيطر علي
بيومها طفت الكهرباء والمولد مااجا البيتي
اني شلوني ضايجه كلش والنوب الدنيا ليل وضلمه
انتظرت ما شغل الناس كلها اشتغلت المولد بيتهم
اله اني ضلمه
لبست رداء وحجاب ورحت على ابو المولد
وصلت الباب مسدوده باب غرفة المولد
دكيت الباب
طلع ولد شاب عمره ٣٥ سنه ضخم صاحب لحيه وشوارب
لابس تراك نيلي باوع عليه
فاضل…نعم تفضلي
حليمه….عيوني البيوت كلها اجتها المولد بس بيتي اضلم
فاضل….وين بيتج
حليمه…بهذا الفرع اني مااكعد بلضلمه اخاف
فاضل….دقيقه اشوف جوزتكم مشتغله
من رخصتج بسم منو الجوزه
حليمه…باسمي حليمه
فاضل…ماكو جوزه بسم حليمه
حليمه.. خاف بسم ام حسن
دخل باوع ورجع اي اكو جوزه بسم ام حسن بس مشتغله
حليمه…يمكن الخلل بلواير مو من الجوزه
فاضل….اكيد لان اني من يمي الجوزه مشتغله
حليمه…فدوه تعال شوفها واني انطيك تعبك
فاضل…بس اني وحدي مااكدر اعوف المولد وهو مشتغل وين ابنج زوجج خل يجي
حليمه….ماعندي لازوج لا ولد
فاضل…ولا اي واحد
حليمه…عايشه بطرك عمري بهذا البيت
فاضل….الله يساعدج زين روحي اني راح اتصل بولد صديقي يجي يبقى بمكاني هنا لان مااكدر اعوف المواد
كلشي يصير
واجي اشوف الخلل وين
حليمه…بس مو تتأخر عليه لان راح ابقى واكفه بلشارع اخاف ادخل للبيت وهو اضلم
فاضل…هسه جاي وراج
جمانه السعيدي
حليمه…رجعت للبيت لكيت ابو ايمن واكف بلباب
الولد المحامي جارنا هو وزوجته
ابو ايمن….هااا ام حسن بيتج اضلم
حليمه…يمكن مكطوع الواير هسه يجي الولد يشوفه
ام ايمن…قلقنا عليج من شفنا بيتج اضلم
حليمه….اي ولله محد غيركم يذكرني
ابو ايمن…تعاي ادخلي منا لمن ترجع الكهرباء
تعاي تعشي ويانا
حليمه…لا شكرا انتظر الولد يجي واشوف الخلل وين
ابو ايمن…اني اشوفه ادخلي مالج شغل
حليمه…لا عيوني فدوه العينك قابل تعزمني هذا بيتي
ام ايمن… خاله ام حسن تعاي ادخلي تعشي ويانا
حليمه…هذا الولد ابو المولد اجا
راسا رن تليفون ابو ايمن اخذ التليفون ودخل يحجي
بس ام ايمن بقت واكفه بلباب وياي
اجا فاضل ابو المولد بيده درج يمشي ويتبع الواير منا لمن وصل يم بيتي
فاضل….الواير مابي شي ممكن اشوف الجوزه بيتج
حليمه…اي تفضل دخلت واني مشغله لايت وهو يمشي وراي
بلمدخل اني خاله كابينة الكهرباء وبصفها الجوزه
فاضل…خلي الضوه هنا خل اشوف الجوزه
خليت الضوه
فاضل…هاي الجوزه عاطله تحتاجين وحده جديده
حليمه…وهسه شلون ابقى ضلمه
فاضل….انت فعلا وحدج هنا ماكو احد وياج
حليمه….اي وحدي
فاضل…وين زوجج
حليمه…توفا قبل سبع سنوات
فاضل…الله يرحمه انتضري اني عندي جوزه اروح اجيبها وارجع اشدها بمكان هاي العطلانه
من هاي اللحظه الشيطان خله خطه بعقل فاضل شلون يستغل حليمه
لان من لزمت اللايت ورفعت ايدها
فاضل سمع صوت البتوت الذهب
الي صوتهن كان واضح وقريب من اذنه
وشاف المحابس والحلقه بأيد حليمه
مره جبيره عايشه وحدها وعدها بيت وذهب
هاي فرصه ما تتعوض
لازم يحاول يستغلها ابشع استغلال
الفصل التالي اضغط هنا
يتبع.. (رواية عندما يغيب العقل) اضغط على اسم الرواية لتجد الفهرس كاملاً بجميع الفصول.