رواية راعوث – الفصل الثالث
– كوه كاتمه ضحكتها ، هلا خاله هلا حبيبتي وجهت نضرها لافراح ، خطار لو اخيتج؟
افراح :- لا اختي
– تباوعلي من فوك لجوه وكالت ها طبيت امشي كوه خاف يشوفن الطين من وره فضيحه ركضت للحمام ذبيت كل ملابسي وسبحت من جديد كملت لفيت المنشفه على جسمي سمعت صنطة مبين راحن النسوان صحت افراح
افراح :- رقيه روحي شوفيها شتريد
رقيه :- ها شتردين
راعوث :- فتحت الباب وكلتلها ملابس باوعتلي باستغراب ومشت بقيت منتضرتها ثواني واجت افراح بيدها ملابسي نطتنياهن ردت اطب اسد الباب صاحت
افراح :- اوكفي
راعوث :- ها
– هاي شنو الخراميش؟
– وينهن
– هذني بجسمج شو تعاي هاي كل جسمج بي هيج
راعوث :- اي بس مو هواي
افراح :- الهن سبب؟
– لا اكعد الصبح الكاهن هيج
– ليش ساكته ماتكليلي
– اشوف شي مايستاهل يمكن اني بليل احك مكان دوده او شي واتخرمش مو صحيح
– الله اعلم لبسي يله بارده
– لبست وطلعت لكيت ابرار تباوعلي بخوف وتريد تضحك ، جلللللبه ليش عفتينيييييي ليششش هاااااا
ابرار :- ختلت وره افراح واباوعلها
راعوث :- جماله الفاهيه هدت العلاكه وركضت والله لو اني ابقه لازمتها لزمه كله ولا الرمان اني صوجي انطيتج العلاكه والله صوجييي
افراح :- اي تعاركن عيني تعاركن عبالك مالي وجود وليش ماكلتلي من طلعتن شوفن هيج يصير بيجن من ماتكللي على شي تردن تسونه
راعوث :- سكتت ودنكت راسي
افراح :- هاي اخر مره الجن اطلعن بدون ماتكللي خوش
راعوث :- هزيت راسي بـ اي
افراح :- تدرن هاي مين النسوان
شمس :- مين
افراح :- من العماره جايات هنا خطار هم يدورن نسوان وهم مسيرات كرايب بيت ام جاسم كايلتلهن بهاذه البيت بنيات وحلوات ونادرات وجايات بحجه القماش يشوفن
شمس :- وخطبن؟
افراح :- اي خطبني بس ماريد اتزوج اني ووحده حجت براعوث
راعوث :- منو هاي يا ام حلك
افراح :- هاي الكاعده يمي خطبتني وهذيج الكاعده هنا يم باب المطبخ رادتج
راعوث :- ام وجه مربع هيه هيج ابنها شلونه
افراح :- انجبي ولج لا تعيبين على خلقة الله والله اذا لزمتج اويلييي اعضج عضه
راعوث :- اي والله شكو جايات من العماره لهنا علمود يخطبن ماكو نسوان لو هاذا هم حضنه
افراح :- راح انطيج اصلاً اني وافقت
راعوث :- افراااااااح
افراح :- باوعتلها رادت تبجي ، اي جا شنسوي بيج راح ابيعج عيشي يمهم هيه المره تصير امج ورجلج يحبج ويشتريلج مو تكولين اريد ثمانيني ، تسمعني والغصه خنكتها
شمس :- اي هيه المره بعد ماتعوفها حضري ملابسج وغراضج حتى ترحين وياها
افراح :- تعاي تعاي والله جذب يروحي جذب اشاقه وياج تريد تبجي عافتني وطبت للغرفه يا والله اشاقه شلون انطيج انطي شمس ورقيه وبعدين انتي
راعوث :- عفتها ورحت للغرفة كعدت وحضنت روحي وافكر بالمجلوب وبهمسه المقرف ثواني اجه بالي الموقف من وكعت والحجي يضحك ضحكت واحس كلبي مقبوض
– الضهر سمعت صوت ابوي يحجي ويا البنات شجابه ابوي؟ طلعت وانصدمت بمنضر ابوي كاعد مدنك راسه حاطه بين ايده ويبجي ويحجي
– تعبت بويه تعبت ماكو شغل ما متوفق بشغلي رزق ماكو منو يشتري هاي الزباله الابيعها هذني مو غراض كوم من الزباله وفوك كل هاذه اجه ابو الايجار يكلي صارلك اربع اشهر مادافع وين اروح بويه فهموني انتحر واخلص من هاي الديون اعوفكم واشرد اروح لمكان محد يندلني بي تعبت انهد حيلي كاعد بالمحل من الصبح للعصر ماحصل بس عشره لو خمسه واني متحمل البرد والتعب وكسرة الضهر واكول الحمدالله بس هذني اليومين ماكو فلوس ماكو راح انطيجن والله اريد أمن عليجن اريد اموت مرتاح خايف احس اجلي قريب اريد اشوفجن بيت رجولتجن واموت
افراح :- اسم الله عليك بابا شنو هاذه الحجي احنه واكفين وياك مانريد لا غده ولا عشه ناكل خبزه ونام اجمع الفلوس و انطيهن لرجال واني عندي خمسه وعشرين مجمعتهن هسه انطياك لا تنقهر
ناصر :- لا ما اخذ فلوس منجن هاذه شغلج تعبج واجي اني اخذه منج خليهن اشتري بيهن ملابس شي الج اني راح اداين شسوي
افراح :- بابا انته تسد دين وتفتح دين
ناصر :- شسوي بويه وين اروح وين انطي وجهي
افراح :- الله كريم تدبر ارتاح ولا تفكر بينه
راعوث :- كلنه نستمع لافراح وابوي وساكتين مانطقنه بكلمه مجرد ناخد حسرات كامت افراح للمطبخ كمت وراها شفتها واكفه يم السنكي وتبجي رحت يمها ضربتها على كتفها بخفة ايدي
افراح :- مسحت دموعي وكلت بصوت مخنوك ، ها راعوث شتردين
راعوث :- لا تبجين ، اخذتني لحضنها وحضنتني حيل
افراح :- والله خطيه ابوي شايفه حالته شايفه عيونه من كال اريد انتحر حسيت كلبي انقبض خايفه على ابوي اذا راح منو النه والله الناس وحوش ياكلونه اكل واحنه كلنه بنات ومالنه سند
راعوث :- احنه سند لبعضنه واذا شنو يعني بنات نكدر نعيش والسبع يتقربلنه واصلاً بابا مايعوفنه بعده صغير اسم الله عليه مايصيرله شي
– جا هيه مو بالعمر تره القهر هم يموت الانسان التفكير القلق الخوف هذني يحطمن يموتن
– لزمت وجها باثنين ادين وابتسمت وكلت بصوت هادئ ، انشاء الله مايصير شي اخذت ايدي باستها وراحت طلعت طماطه وبصل شراح تسوين
– طماطه كلي وخبز وجاي
– لاااجعه
– ههههه من عيوني
– اشتغلنه سوه ونسولف سوينه الاكل اخذته وكعدنه سوه ناكل بس هاي المره هدوء لان جان راس ابوي يوجعه محد حجه شي اكلنه وكملنه كام ابوي يسبح والبنات بالغرفه بارده وافراح تخيط يمهن واني بالصاله ارجف من البرد لابسه بجامه وبدي ولابسه الكلاو وفوكاه قمصله وبعدني بردانه سمعت الباب تندك طلعت ارجف فتحت الباب وحسيت ايدي لزكت بالباب من كد ما بارده باوعتله جيرانه ابو جاسم شابكه ايدي واطكطك بسنوني
– هلا عمو تفضل
– هلا بيج عمي شفت ابوج اجه موجود هسه بالبيت
– اي بس جاي يسبح
– جا اني رايح شويه واجي مو يطلع عندي حجي ويا
– خوش عمو
– يله ثيمالا
– راح سديت الباب وطبيت للغرفه
افراح :- ها منو
راعوث :- ابو جاسم مدري شعنده ويا ابوي كلتله جاي يسبح كال شويه واجي
افراح :- خير ان شاء الله
راعوث :- حسيت بدوخه وتعب كعدت بالكاع ولزمت راسي ، اخخ اخ
افراح :- ها يمه راعوث بسرعه هديت القماش وكمت
– مابيه شي مابيه بس صداع
– اسم الله خاف اخذتي برد كلساعه وطلعتي كعدي استجني تفرفرين بالحوش
– صحت بوجها ، ما فريت بس فتحت الباب وخري عني لا تكمشيني ودفعت ايدها
– صاحت بوجهي صدمتني سويت روحي زعلت منها وكمت رجعت اخيط هيه ولا اهتمت اخذت مخده ونامت على بطنها
شمس :- راعوث لا تنامين على بطنج حرام نامي عدل ، ماحجت وبقت على وضعيتها
افراح :- اشرتلها بمعنى عوفيها
راعوث :- احس تعبانه وجسمي متكسر وصداع كمت اغفي واسمع صوتهن يحجن ثواني وصار صوتهن بعيدد صوت وشوشه باذاني واحس بانفاس حاره على ركبتي وعيوني اريد افتحهن ماكدر احس واحد مقيدني رعشه بجسمي لمسات خفيفه احس بفروة راسي لمسات اريد اكعد من هاذه الكابوس اريد احرك ايدي اضرب نفسي حتى اكعد بس ماكدر اريد ابجي اصرخ بس اكو احد مقيدني اريد وحده من اخواتي تكعدني بس محد تدري بيه عبالهن نايمه الصار بس ثواني واني احسه ساعات وايام فزيت مرعوبه باوعت على اخواتي يحجن وما انتبهن اليه غمضت عيوني ونزلت دمعه حاره على مخدتي واني افكر بس اني يصير وياي هيج اخواتي هم مايكدرن ينامن ويصير وياهن مثلي اخاف اكول لاخواتي واخاف يطلع شي تافه ومجرد كوابيس سمعت صوت ابوي وابو جاسم بره كلنه خنسنه نريد نسمع شيحجون وره نص ساعه وطب ابوي كعد يم افراح وحجه
– بويه افراح انتي بنيتي الجبيره العاقله الفاهمه انتي كبرتي ولازم تكملين نص دينج ولا تفكرين بيه ولا باخواتج شمس موجوده هم مره وتفهم وتعرف تطبخ وكلجن بنياتي الكبار وتعرفن كلشي تسون ونادرات بس لازم اطلعجن جاين عليج ناس من العماره خوش ولد وجبير وفاهم وهوه مهندس يعني خير من الله وعنده بيت وحده ويعيشج ملكه والله يبويه احسن من هاي العيشه وانتي شكد ما طلبين مهر اطلب منهم واذا رفضتي يبويه والله انتي ماتحبيني وتردين تموتيني وازعل وياج واصير مو خوش وياج والله العظيم
افراح :- تجبرني على الزواج
– لا بويه بس لازم تزوجين افهميني بويه والله تعبت والله التفكير بيجن كتلني راح اموت منو يبقه الجن
– بس اني ماريد اتزوج بابا لمن اشوف اخواتي متزوجات وعايشات براحه عود بعدين افكر اتزوج
– يابعد عافيتي يبويه وافقي علمودي يبعد كلبي والله ما اعوفج اخلي يوميه يجيبج بس انطيني الموافقه عاد تساعديني تنطيني فلوس والله ناس متمكنين
افراح :- دنكت وودي ابجي حايره شسوي
ناصر :- فكري براحتج ولا تستحين اني ابوج كولي موافقه او لا وهسه كايم وانتي فكري براحتج
افراح :- طلع ابوي واني بقيت صافنه
شمس :- والله وافقي افراح والله ارتاحي عيشي حياتج جبتيها من الصغر تربينه وتعبتي علينه وتشتغلين وتركضين ركض راح تموتين يعني لمن تصيرين مره جبيره وتاخذيلج واحد مزوج لو مطلك لا تكدرين تمشين لا تزورين لا طلعين وتجيبين جهال وهم تكعدين تربين اتزوجي هسه شوفي حياتج طلعي تونسي يعني لمن يجي رجال فقير يشتغل عربنجي لو شغله مثل ابوي توافقين شيصير تاخذين مهندس تنكلب الدنيه وافقي والله اني هنا اصير امهن الثانيه وكبرن كل البنات حتى ابرار شوفيها صارت مره وراعوث همين هوه انتي خايفه عليهن اعرفج بس والله كبرن وفهمن وافقي لخاطري عفيه افراح
افراح :- خايفه اني بعيده عنكم واخاف يطلع مو خوش رجال
شمس :- الله كريم اتزوجي واحنه مانعوفج ابد والله بابا يجيبنه الج اني اجمع فلوس واخلي يجيبنه
افراح :- باوعت على ابرار وراعوث وخنكتني العبره والدموع ترست عيوني هستوني انتبهت لسنين شلون تركض هذني الطفلتين عافتهن امي بحضني صارن كبار وراح اتزوج واعوفهن هذني الربيتهن واني بعدني محتاجه تربيه صايرات هلكبرهن وصديقات سوه الجانن يتعاركن وينامن يبجن لان ياكلن ضربه مني راح اعوفهن احس كلبي انقبض
راعوث :- كمت يمها حضنتها ، ما جان قصدي اصيح عليج ضايجه مني
افراح :- شلون اضوج منجن بناتي انتن ربيتجن بهاي ايدي هذني عيوني شافت من زحفتن ومن مشيتن ومن حجيتن ومن لعبتن ماحس اخواتي انتن احس كلجن بنياتي ولا ازعل منجن ولا اضوج والله
راعوث :- لا تخافين علينه اتزوجي احنه صرنه كبار اكيد نضوج من ترحين بس عادي نكدر نجيج او تجينه مو مثل ماما الله يرحمها واني احبج واموت عليج ولا تفكرين بينه فكري بنفسج وبس
افراح :- يا كلبي انتي اخذتها لحضني وحضنتها حيل ومبتسمه على تربيتي وكلامهن فدوه رحتلهن وحده وحده شلون اعوف هاذه الجمال شلون ما صبح على هاي العيون ها ولج امووت اذا ماشوف عيونج الحلوات
– اخذي صوري وابقي باعي بيهن
– ههههه مايصير اخذجن كلجن
شمس :- عود اذا عنده اخوان خطبينه الهم
افراح :- اكيد والله ياريت
شمس :- يعني وافقتي؟
افراح :- رمشت مرتين وابتسمت ، خلي اشوفه ويشوفني
شمس :- الله يسعدج يارب
– بقينه نسولف بالموضوع العصر واندكت الباب اجت ابرار ركض ، هنه النسوان شلون افراح افتح الباب عزه باع الصاله فشلله
افراح :- عزه العزاني ركض شيلن الغراض
– صارت ركضه وافراح طبت بدلت وعدلت روحها وطلعتلهن فتحت الباب …
الفصل التالي اضغط هنا
يتبع.. (رواية راعوث) اضغط على اسم الرواية لتجد الفهرس كاملاً بجميع الفصول.