رواية القسوة تشع من عيناه الفصل الثامن عشر 18 – بقلم الكاتبة زهرة

رواية القسوة تشع من عيناه – الفصل الثامن عشر

بارت 18

تسريع الأحداث ..

 

بعد مرور 7 اشهر بطني صارت شكبرها مهاب زين وياي بس بعدني اكرها وماطيقه ولا سامحته وهوه مدللني ويشتري كلشي بخاطري وخاطر ورده شيبته بالوحام بس هوَ ابد ما مل ولا يوم من هذني الاشهر مد ايده عليه وضربني نهائيًا

 

اما عن عبيس لهسه يريد ساره ويبجي عليها بس ماينطو ابد رافضين بعد كل الصار

 

ورده سجلها مهاب صف اول بنيتي الحلوه كل ما تذكر اهلي نحاول انسيها بس بيوم من الايام اجتني كالتلي

 

ورده :- شنو يعني جنه صديقاتي يكولن اهلج راحو للجنه

 

كعدت وسولفتلها وفهمتها عن الموت كلشي وفهمتها راح يجي يوم نروحلهم خافت بالبدايه وبقت تبجي بس طلعناها وشترينالها وسكتناها وبقت تتقبل الموضوع شويه شويه ..

 

كاعدين نتريك اندك الباب اجت صديقات ورده وهيه انخبصت كامت غسلت ولبست جنطتها كمت وراها وصلتها للباب بستها وراحت للمدرسه قريبه علينه وتروح ويا صديقاتها ماتقبل مهاب يوصلها

 

سديت الباب ورجعت للمطبخ وعثرت بالباب مال المطبخ وكعت وصرخت بعلو صوتي صار الم بطني مو طبيعي ومهاب بعد مايلحك ركض بيه للمستشفى وام رافت اصيح ورانه تريد مهاب ينتظرها

 

ومهاب فاقد كل باله يم الطفل اخذني للمستشفى شافتني الدكتور وگالت

 

– احتمال اصير عدها ولاده مبكره لا تكوم خليها مرتاحه بس خلوها تنام اكو واحد بالبيت يساعدها

 

مهاب :- اي اني موجود بس خلي اجيب بالسلامة

 

– ان شاء الله الله يسهل الها

 

شدولي كانونه ومغذيات وابر شكد من كد ما ماخذه علاجات وابر تعودت عليهن كمت احسهن روتين جان حملي حيل صعب اتمنيت يصير عندي اسقاط اتمنيت بس ما صار

 

رجعنه للبيت وجان تلفونه بالبيت ما ماخذه ومن فتحه لكه الامة مكلوبه وخالتي ام رافت مو بالبيت وكلها تتصل عليه جاوب ؏ رافت رفع تلفونه ايده ترجف فاك عينه جان حاس وصوت رافت وصل الي صاح

 

رافت :- مهااااب امي ماااتت

 

وهوه ما حجه ايشي طلع يركض اخذ سيارته وطلع من البيت ماكو شويه ورا واخواته ومرت رافت اجن للبيت وحده تجرني من الثانيه تسألني شصار وشلون ماتت واني فاكه عيني مامستوعبه كلشي

 

لحد ان اجو جايبين تابوتها خلو بناتها يشوفنها لاخر مره واخذوها ومهاب طلع يركض ورا التابوت يدك ؏ صدره ويصرخ

 

– ولج يممممممه

 

ملخ روحه شك قميصه يبجي وعباس يجر بي بس يريد يوخره لان راد يتخبل يريد يطلع امه من التابوت جره عباس كوه دخله للبيت ومهاب يضرب بعباس فاقد يملخ بي يصرخ

 

– ولجججج يممممه المن عفتي هذا البيت ولج يممممه تعاي شوفي البيت اظلم بدونج يمممه بعدني محتاجج ياروحي يايمه بعدني ماشبعت منج بس رجعيلي بس يوم واحد ولج يمممه عوفوني اروح راح يدفنوهاااا راح يطمها التراب

 

– ولك عبااااس امي بعد ماشوفها لا هاااي صعبه شلون شلون ولك عباس كلي جذذذب موت امي احلفك بعزيزة روحك تكلي جذب وامي مابيها شي جذبو عليه عليك الحسين عباس جذب عليه كلي هسه تجي

 

– يممممه ليش رحتيييي ليششش مو كلتي اريد اشوف جهالك والله بقالها بس شهرين وتجيب ابوس ايدج يمه رجعيلي بس حضني بنيتي وشوفيها ولك عباس شلون اطب للبيت بعد

 

ترف :- موت خاله ام رافت عقلي ما كادر يستوعبه اكول خاف يشاقون خاف حلم وهسه افز منه بس كلشي جاي يبينلي هذا واقع مو حلم

 

صعدت للغرفه خنست بصف الميز سديت اذني حيل اردد بسم الله واقرا سور وايات بكلبي ارجف من صوت صياحهم ودموعي تنزل لا ارادي

 

واني افكر معقوله ماتت؟ شلون عقلي يستوعب بعد ماشوفها شلون راح تختفي من بيناتنا بدون لا تكول ولا تودع ؏ غفله ماتت

 

بعد منو يصيح عليه منو اكعد الصبح الكاها منتظرتني اسويلها ريوك بلحظتها حسيت البيت انهدم وحتى البيت يبجي عليها

 

سديت اذني حيل واني اتذكر موت اهلي وشصار بحالي من سمعت بخبر موتهم خطيه مهاب بناتها رافت شراح يصير بيهم گلبي احسه راح يوگف ..

 

اخذوها دفنوها ومن اجه مهاب من الدفن دخل الغرفتها يصرخ ويحضن بفراشها ويبجي والبنات حاولن يطلعنه مايقبل صاحو العباس لان هوَ اقرب صاحب لمهاب وبس هوَ يحبه ويفهمه اكثر من اخو ..

 

عباس :- كافي خويه كافي كول يالله كلنه ؏ هذا الطريق هم السابقون ونحن الاحقون شد حيلك وكوم بعد اخيك انته عندك عائله خطيه مرتك حامل اذا اشوفك هيجي تعبان ومهدود حيلك شيصير بيها

 

– كوم ياخويه كوم وكول الله يرحمها ويسكنها فسيح جناته الله يصبرك يشهد الله اني امك وابوك مو بس صاحبك بس تحتاج شي تعال عليه اني مو كايلك من زمان اني اهلك وبيت اسرارك مثل ما اتحملت فراك ابوك تحمل فراك امك وها انه احلفلك بحك ابا الفضل ماعوفك وللدوم وياك

 

مهاب :- بداعت امك بداعت امك لا تعوفني عليك مصيبة زينب لا تموت وتعوفني وحك الحسين اموت وراك لا تعوفني الكل عافني بقتلي بس ترف وانته لا تعوفوني والله اموت من الفقدان ابوس اديك عباس لا تعوفني انهد حيلي عبااس ماريد انكسر انكسرت هواااي

 

عباس :- والله ماعوفك لمن تموت اموت وراك يابعد اهلي كوم مهاب عيب الزلم برا اخوك رافت وحده هم هوَ مصدوم كوم سانده وقوي اني اعرفك مهاب القوي المايكدر عليه بس الله كوم صليلها وادعيلها بالرحمه يابعد اخوك

 

ترف :- انفتح الباب ودخلت عليه مياسه تبجي عيونها دم لمتني بحضنها تمسد ؏ ضهري وتصيح

 

مياسه :- ولج ترف امي راحت بعد منو يتلكانييي من اطب للبيت انهد حيلي ترف امنه راحت راحتتت بعد مانشوفها بعد ماشوف وجها الجنه عافيه يمممه ياسين ؏ اسمج ولج يمممه معقوله جاي يحضرون فاتحتج سوده بوجهي

 

ترف :- متاكده خاله ماتت

 

مياسه :- يمممه الله يسمع من حلكج وتطلع عايشه خاف بعدها عايشه ودفنوها ولجج ترف صارت امي جوه الترااب سوده عليييه ييمه جعلني ميته بمكانج

 

جوا انخبصو يصيحوها وهيه نزلت ركض واني كاعده جسمي كله يرجف ماريد انزل اخاف اخاف احس جاي يصير شي رعب جوا مو نسوان يبجن ويصيحن

 

الضهر وقت حلت المدارس واني عيني ؏ الباب خايفه ؏ ورده لمن انفتح الباب ودخلت ورده فاكه عينها ركضتلها حضنتها حيل

 

ورده :- شنو هاي الناس العدنه ليش يبجون اخاف ترف

 

ترف :- لا تخافين ماكو شي

 

ورده :- شبيج ترف كليلي ليش النسوان اصيح

 

ترف :- خاله ام رافت

 

ورده :- شبيها خاله

 

ترف :- راحت للجنه مثل ماما

 

ورده :- يعني ماهيه جوا ويا النسوان؟

 

ترف :- لا لا راحت ياروحي راحت لا تخافين اني مو كلتلج الحباب وماعنده سيئات من يموت يروح للجنه وسولفتلج الجنه شكد حلوه

 

سكتت لميتها ع صدري خنست شويه يمي طفله ما فاهمه شي گالت
– اروح العب ويا بنات مياسه

 

ورده :- عافتني ترف نزلت جوا اباوع ؏ الوجوه اول مره اشوفها يبجن ويلطمن كانما بيبي ام رافت جانت عايشه وياهن طلعت لبرا اباوع ؏ عمو مهاب اول مره اشوفه بهذا الوضع

 

وگف بصفه عباس ضرب ؏ كتفه وگـال
– بطل اخوي روح البس اسود ناسي نفسك الناس جاي تجي ناس هواي فشله

 

مهاب :- ولك عبااااس راح البس اسود ؏ اميييي عبااااس

 

كعد بالكاع يزلغ خدوده مثل النسوان ويصيح

 

مهاب :- يمممممه البس اسود عليج عساني ميت ولا شايف فاتحتج يممممه شسويتي وين رحتييي تردين تجيني ياروحي يايمه خفتي ؏ مريتي واجيتيني تخافين ؏ ابني يمه ماكدر اكول عليج الله يرحمج يمه ماكدر اكول اتوفيتي اخاف يمه

 

– بعدني محتاجج تعاي يممممه انتِ لبسي عليه اسود ودكي ولطمي ؏ كبري ليش اني البس عليج اسود يممممه

 

عباس :- بروح ابوك كافي مهاب بروح ابوك

 

دخل لجوا وگـال المياسه
– مياسه اريد اصعد لفوك خاف نسوان مفرعات

 

ومياسه حضنته حيل تبجي بعلو صوتها
– خويه انكسر ضهرنه لا ام بعد ولا ابو تيتمنه

 

مهاب :- اني موجود خويه انه حزام ضهرجن ماخلي واحد يدنالجن البيت يبقى بيتجن شوكت ماتحسن روحجن محتاجات امي تعالن ليه

 

مسح دموعها وراحت اخذتله طريق دخل عمو مهاب واني رحت كعدت يم بنات مياسه خانسات يردن يبجن خايفات ..

 

ترف :- دخل مهاب راح للكنتور طلع ملابسه كلهن شمرهن بالكاع اخذ قميص اسود ولبسه ولا باوعلي ولا كانُ اني موجوده بالغرفه لبس وطلع

 

للعصر وصوت النسوان واصل لفوك اول مره اعيش هيج اجواء حتى بوفاة امي وابوي ماشفت هيج شي جان كلشي يصير بالنسة اليه رعب ..

 

مها :- عيني مياسه وينها هاي جنتكم شنو ما عاجبها تنزل تضايق عيني لو شنو الموضوع شو ماشفت خلقتها من الصبح لهسه

 

مياسه :- مو وكت سوالفج مها والله راسي راح ينفجر ترا ام رايحتلي مو دجاجه حتى اكعد افكر بترف ليش ماتنزل

 

ترف :- كاعده وانفتح الباب التفتت فاكه عيني شفتها مها

 

مها :- ها شو كاعده وحدج لا نزلتي لا كلتي جا شكد ماتستحين ، كومي يلا نزلي جوا فضحتينه

 

ترف :- يعني لازم انزل

 

مها :- اي لازم عيب

 

كمت نزلت لجوا باوعت ؏ النسوان بالصاله رجف گلبي من لبسهن الاسود كله بقن صافنات عليه طفرت وحده وگـالت

 

– يا معزايه ماعندج ثوب اسود

 

مياسه :- يالله شنزلج امشي امشي

 

صعدت لفوك دخلتني للغرفه وسدت الباب
– شنزلج انتِ حامل مو زين عليج وماعندج ملابس سود المن نزلتي

 

ترف :- مها كلتلي

 

باوعت لايدها مخرمشه من الطول للطول والدم يابس عليهن
– هاي شبيها ايدج

 

سكتت ما جاوبتني تباوع لايدها ودموعها عشره عشره ؏ خدها عافتني ونزلت جوا ولليل ماخلصو الخطاطير لمن بقو بس كرايبهم يباتون

 

مهاب :- بعد اخيج سويلي لفه جوعان

 

مها :- تدلل

 

ترف :- انفتح الباب ودخل مهاب عيونه حمر مايكدر يخلي عينه بعيني انطاني لفه وگـال

 

مهاب :- هاج بويه اكلي

 

اكلتها ميته جوع وهوه راح سبح وطلع نام ؏ بطنه ؏ جربايه واني كاعده بصفه اباوع عليه كلب روحه وسحبني الحضنه جسمه نااار نار واني بااارده گال بغصه

 

مهاب :- لا تعوفيني

 

ترف :- شلون اتوفت

 

مهاب :- اجرت تكسي ورايحه الغير مستشفى ماتدري ومن مالكتنه طلعت للشارع عبرت الشارع وداعمها لوري وفالت

 

ترف :- جانت جايه علمودي

 

مهاب :- اخخخخ اي

 

سكتت سحبني الحضنه حيل ولا اني نمت ولا هوَ نام الليل كله اسمع صوت صياحهن بأذني من كد ما سمعت صياح ومهاب كل ما ينام يفز عركان وبعد مايكدر يرجع ينام اسوء الليالي العشتهن هنه موت اهلي وموت خاله ام رافت البيت متروس ناس بس بعيني فارغ ..

 

 

الفصل التالي اضغط هنا

يتبع.. (رواية القسوة تشع من عيناه) اضغط على اسم الرواية لتجد الفهرس كاملاً بجميع الفصول.