رواية تراث النهروان – الفصل الرابع والثلاثون
part-34
دخلت للغرفه وسديت الباب، حضنت رجلية لصدري ومددت
احس اريد ماما، مشتاقتلها بس بسبب الحظر ماتكدر تجي
احس روحي مالي خلك لـ شي واريد بس اشرد منهم كلهم وانعزل وحدي
اعرف بــارون مراح يوافق على هُـمام بعد مستحيل
ولا هُـمام راح يسكت ويعوفنه لان هو من يوكف كدامي عيونه تدمع من الحب شلون ينسى بهاي السهوله
ضليت مدده على الجرباية شوية وسمعت باب البيت انسد
عرفت اجه بــارون، شوية واندك باب غرفتي وانفتح الباب
ابتسمت وكمت من شفت بــارون رحت حضنته وهو ضمني لصدره وايده تمسد على ظهري
– لا تضوجين اني لو اعرف بي فايده الج اوافق
بس اعرف
ماراح ترتاحين ويا هُـمام ولا اهله لا تضوجين مني.
نـــهروان – ماضايجه منك بــارون بس اني نفسيتي تعبانه.
– تعاي انطيج علاجج واحجيلي شنو المتعبج.
جرني من ايدي
يمشيني لـ برة الغرفه، كعدني على التخم وطلع علاج انطاني منه
اخذتهن، ومددت على رجله وهو كام يلعب بشعري
– لا تضوجين من شي وتضمين بداخلج اي شي يصير وياج سولفي اليّ واني اساعدج بي
لا تضمين بگـلبچ روان.
نـــهروان – مو اضم بگلبي بس مرات احس ماعندي الطاقة الكافية حتى احجي.
– ميخالف روان حاولي تحجيلي شوكت ما تحسين نفسج محتاجه تحجين لـ احد.
هزيت راسي ساكته وهو ضل يلعب بشعري ويسولف ويا سيف
ضليت نايمه على رجله لحد ما غفيت بمكاني
وفزيت ثاني يوم الصبح
كعدت اتلفت بالهول وافرك بعيوني بسرعه
– ليش دائمًا احلم بي ليش!
فركت وجهي بسرعه وكمت باوعت للساعه وكمت للمطبخ
غسلت وجهي ورجعت للهول، لكيت بــارون وسيف نايمين بالهول يمي
رجعت مددت بفراشي اراجع الحلم الي حلمته
ما اتذكر منه شي
بس اتذكر تُـــراث موجود بالحلم.!
” بــرهــوم ”
من كمل كلامه آدم بعدني اريد ارد عليّ واحاجي
التفتت بسرعه من شفت بـــراء وكفت فاقده بالكاع
سديت التلفون وركضت بسرعه عليها
شلت راسها من الكاع اطبطب على خدها واصيح
– بـراااء بـراااء ماابي شي تُـــراث براااء.
شلتها من الكاع بسرعه وحطتها على التخم
جبت
مي ارد على وجها شوية شوية واطبطب على خدها
– بـــراء بـــراء شوو ماابي شي والله هسه اجيبة هسه يجي فتحيي.!
فتحت عيونها على كيف وتهمس
– بـرهــوم تُـــراث، بـرهــوم رجعلي اخوية والله اموت اذا صارله شي، ماعندي غيره بـرهــوم رجعلياا.
– يررجع والله يرجع لا تخافين ياروحي يرجع.
شربتها مي بسرعه بسرعه اريد بس اطلع خليتها من صحت شوية
يله كدرت اعوفها، طلعت من البيت بسرعه اخابر على آدم
– هااا آددم.
– يمعودد انلاااصت.
– ضلل الطم انتَ، شصاار بعد؟؟
– ما اعرف يامركز ماخذينه دزيت جماعتي الي بإيران عليهم يگولون مالگينا غيروا المركز.
استغفرت وسديت الخط، حركت السيارة بسرعه ورحت للمركز
نزلت هناك، ورحت لنفس الضباط اليعرفون بسالفة العُثمان
سالت عليهم، ورحت للمكتب المتجمعين بي
دخلت وسلمت
كاموا وردوا السلام،
محمد – اهلا بـرهــوم، شعجب جاينه؟
بـرهــوم – تُـــراث صحه.
فتحوا عيونهم كلهم وكاموا يضحكون فرحانين ويتحمدولة بالسلامه
محمد – لا لازم نروحله للبيت.
– تُـــراث موو هناا راح لـ إيران.
عقد حاجبة وكال
– شوكت صحه وشوداه؟
– بنفس اليوم باليل رايح، تُـــراث بالتوقيف.
– اوووكف شووية شووية شنو بإيران شنو بالتوقيف شصاار؟؟
بـرهــوم – طلب اسولفلة كلشي صار هناك وحجيتله، ماتوقعت راح يروح لان العُثمان ماتت وخلص أمرة
بس ما اعرف راح بليل وبسرعه حاجز ورايح بسيارة مو طيارة
ومفلش گبر العُثمان ولازمينه الشرطه وماخذينه.
– وهسه؟؟؟ ترى هذا الشي حرام وبنفس الوقت مو قانوني يعني حتى لو صاير بالعراق يتحاسب عليّ.
بـرهــوم – ماايهمنيي.! لازم يطلعع اني ماكدر اروح لـ إيران محمد انتَ اكثر واحد تعرف تُـــراث!
– لك غبي هذاا اقسم بالله.
– مو غبي محترگ گلبة، محمد لا سامح الله وصار هيج بنتك شتسوي؟
سكت يمسح بوجهه متنرفز
وكفت بصفه وحطيت ايدي على جتفه
– تُـــراث اشكال سوة علمودكم هناك وتحمل لحد ما خسر بنته لا تعوفونه هسه
اريد تُـــراث يرجع من إيران ساالم وبسرعه مثا ما سوة كلشي تردونه وماعارض سوو اي شي علموده ورجعوا لبيته.
هز راسة وكال
– ان شاء الله، ارجع لبيتك واليوم تُـــراث يمك لا تخاف.
– ما تقصر.
طلعت من يمهم، دكيت على آدم
– آدم اعرف بيا مركز هو ودز اسمه للضابط محمد.
– تم.
سديت الخط ورجعت التلفون لجيبي وارتاجيت على السيارة
تُـــراث مستحيل راح ينسى لو يبرد گـلبة مستحيل
رجعت للبيت بسرعه اريد اطمن بـــراء، وصلت للبيت
طبگت السيارة ونزلت دخلت للبيت لكيتها كاعده على القنفه وصافنه وعزيز كاعد كدامها
من شافتني كامت بسرعه
حضنتها اهدي بيها وامسح على ظهرها
– اشش اهدي، اليوم راح يرجع راح يجيبونه.
ابتعدت تباوعلي
– والله؟ يرجع؟
– اي يرجع وين يروح لعد هسه يجي.
هزت راسها بسرعه وابتعدت تمسح دموعها
– والله شلع گلبي اكوا واحد طالع من حلگ الموت يساافر گـبل
والله عل گلبي عل خل يرجع اله اربطه بايدي.
– اي حبيبي مو هو مطي.
باوعتلي ضايجه وراحت كعدت، كعدت بصفها توني اريد ابوسها ودك تلفوني
– طاحظك آدم.
ابتسمت هيّ وباوعتلي بخجل، ضحكت وفتحت خط
– هاا آدم؟
– وصلني مقطع الكامرات.
– ياكامرات؟
– تصوير تُـــراث بالمقبرة ولك.
– بربك؟ دزة بالله بسرعه.
– دزيته بس ماعندك نت افتح نت.
سديته منه وفتحت نت، وصلني الفديو فتحته
وابتعدت من يم بـــراء
ماردتها تشوفة، فتحت الفديو، واشوف
تُـــراث يمشي
ورا ثنين چلاب وصل لقبر معزول وحده
وكف كدامه
وشال بأيده كرك، كبر العثمان ما مبني ضال بس تراب
الفديو مغوش التصوير من بعيد ما اشوف ملامحه ما مبينه
حفره كله ودنك سحله وشمر الجثة كدامهم
الي ماضال منها شي
كامن الجلاب يجرن بيها ويدنكن يردن ياكلنها ويرجعن
وهو واكف وبالكرك كام يضرب بيها حيل رجعت ليورة الجلاب خايفه
وهو ضل واكف بمكامه ويضرب بيها، اجوا مجموعه من الشرطه الإيرانيه
كاموا يجرون بي حيل وهو ينكث بروحه من عدهم
سحلوا اكثر من شخص واخذوا هو
بـــراء – شكو بـرهــوم؟
– ماكو شي حبيبي.
سديت الفديو بسرعه ودكيت على الضابط محمد
– الوو؟؟
– اهلا بـرهــوم.
– هلا بيك سيدي، بشر شصار؟
– والله بعدنه راح نروح بطيارات خاصة.
– توصلون بالسلامه.
– الله يسلمك.
سديت الخط منه والتفتت على بـــراء، صافنه عليّ تريد تعرف شصار وماتريد تسأل
بـرهــوم – راح يرحون طيارة خاصة يجيبون حظرت اخوج المخبل ويجون.
– ايي الحمدلله، هسه شنو واذا طيارة خاصة فدوة اله.
– اي الدولة ماعدها شغل وعمل بس تركض ورا، دخل يجي احش رجليه حش اذا طلع.
بـــراء – اي هو هم بعد ما يطلع شعنده طالع بعدد.
– مبينن.
كعدت على التخم وهي جرت عزيز من ايده
– اكعد يم بابا خل اجيبلك اكل.
هز راسة واجه يركض كمز بحضني، شلته كعدته بحضني
وهي راحت للمطبخ جابت الاكل واجت حطته يمي
كعدت عزيز بحضني اوكل بي وهو ياكل لگمة ويرفع ايده يعدد
– بعد هلكد ويجي بابا تولاث؟
– اي حبيبي.
وكلته ومن شبع كام يطبطب على بطنه ويحجي بضحكه
– الحمدلله، بابا شبعيت باع شلون كبرت بطني.
– ههههههه الف عافية بابا.
نزل من حضني وركض لـ بـــراء يصيح
– ماماا غثليلييي.
اخذته بـــراء وراحت تغسله شلت الصينية وراها واخذتها للمطبخ
حطيتها الها على الميز وهي تريد تشيل عزيز تغسله
– لاا وينن وينن.
باوعتلي باستغراب وكالت
– ها شنو؟
– وين شايلته يابة شنو السالفة بطنج.
اخذته وشلته من عدها وكفت اغسله وهي تضحك وتغسل بالماعين
– هسه شنو على ثگلة عزيز.
– لا ابد صاير زلمه شطولة تريد تشيلة وهي بطلنها لحلكها واصله.
– ياااء؟
– والله لعد شنو.؟
اخذته ومشيت للهول وهو يدردم
– والله مادلتلها شيليني هي تشيلني.
– اي گلها ماما لا تشيلني صرت زلمه بعد.
– ادلها اني ادلها، بث هي ما تسمعني.
– اذا ما سمعتك تعال كلي واني احاجيها.
– اي اثلا بعد ما اخليها تشيلني.
ابتسمت وكعدت على التخم وهو واكف بين رجلية
حضنت وجهه بثنين اديه وهو باوعلي عيونه يلمعن برائة
جريت حسره ودنكت بست راسة وشميته وبست خدوده ثنينهن ورفعت ايدي اعدل بشعره
– اريد من الله واهل البيت بس يحفظوك انتَ وامك وخالك الي وبس بس هذا الاريدة.
ابتسم وحط راسة على صدري يريد يحضني
– بابا لا تخاف اني يمك ما اعوفك مثل قمر.
ضميته لحضني اكثر وهمست
– اشش اسم الله عليك بابا اسم الله، خاف تُـــراث دخل غيبوبة ورا قمر
اني اموت بمكاني، يومي كبل يومكم اهلي انتوا.
ضل ساكت ما افتهم كلامي، ابتسمت وكعدت بصفي
اجت بـــراء تمشي كوة فحطانه اشرت على غرفة تُـــراث
– عزلت غرفته بسرعه هيج تعزيلة خفيفة خاف يجي تعبان.
– عاشت ايدج، تعبانه حبيبي؟
– لا لا ماتعبانه.
– تسبحين؟
– هو دا اخذ ملابس واروح اسبح، شوف انتبه على عزيز عفية لا يروح للمطبخ لو يطلع.
– روحي حبيبي لا تخافين.
هزت راسها وفاتت للغرفه اخذت ملابسها وراحت للحمام
حطيت عزيز بحضني واسولف ويا وهو يسولف ويضحك
، ضل يسولف لحد ما نعس وغفى بحضني شلته حطيته بالغرفه
ويا طلعتي دخلت بـــراء تمشي على كيفها ولافه شعرها بالمنشفة
– ياا هذا عزيز نام؟
– اي غفة.
– لا بــرهـوم هسه ما ينام باليل يشلع گلبي.
– نشمره على خالة.
ضحكت وكعد تمشط شعرها واني كعدت بالهول انتظر اتصال من اي احد من المركز يبشروني
وللأسف محد اتصل ولليل واحنه ننتظر ولا اتصلوا ولا طمنونه
حرت اهدي بـــراء لو اطلع اشوفهم، مر وقت طويل واحنه ننتظر
لحد ما اندكت الباب، طفرت بسرعه اركض فتحت باب الهول
وطلعت فتحت باب الشارع بسرعه بسرعه
فتحتها صار بوجهي تُـــراث واكفين ورا المكافحه كلهم مسلحين
والاسلحه على جتفهم وبملابسهم السود ومحاوطين تُـــراث وهو واكف بنصهم وصافن بدون روح
مشيت بجهته وجريته حضنته حيل بادلني الحضن واحس بجسمه يرجف بيدي
بــرهـوم – تُـــراث.
وخرته من حضني واشرت لمحمد هسه اجيك
فوتت تُـــراث للبيت سانده
تلكته بـــراء حضنته بسرعه تبجي وهو ساكت وبس حاضنها
طلعت بسرعه، سلمت عليهم ومحمد نزل اللثام من وجهه
– تُـــراث واحد مخبل والله دير بالك منه وعليّ، لا تخلي يخطي خطوة من البيت
ولك مسودنهن هنااك مسودنهم.
– شكوو محمدد شسووة؟
– ولك حاطينه بالسجن العام ولازم الإيرانين االهناك ودك فشاير وسب ويكتل بيهم ويصيحلهم بأسماء العُثمان والحرس مالته.
بــرهـوم – لا تخاف ما تتكرر ان شاء الله، ماقصرت ابو جاسم.
– لا واجبنه تُـــراث ساعدنه هواي وصدگ خاطر بنفسة وضحه بنته نفدي بعيونه بس خل ينتبه على نفسة
هاي المره كدرنه نساعده باضرار قليلة المره الجاية يمكن ما نكدر نساعده اصلا.
– لا ان شاء الله ماكو شي.
-ان شاء الله، يله شباااااااب، مع السلامه بــرهـوم.
– الله وياكم حبيبي.
اشر للولد صعدوا سياراتهم ومشوا، طبيت للبيت
لكيته كاعد على التخم وبـراء كاعده بصفه تحجي ويا وتبجي وهو بس صافن
حتى ما يرد عليها ولا يحجي كلمة ولا باوعلها
بلعت ريكي وتقربت وكفت كدامه رفعت راسة بايدي باوعلي بروح رايحه
رفعت ايدي وضربته راجدي بكل حيلي، شهكت بـــراء وحطت اديها على حلكها بصدمه
وهو غمض عيونه وفتحهن، صايرات حمر باوعلي وحسيته يريد ينفجر
رجعت ضربته راجدي اقوة منه، صاح وكام وكف خنكني ويصيح
– برررررهوووووم لااااا تخلينيييي اموووووتك لاااا تخلينيييييييي.
دفعته عندي بسرعه وكفت عصرت وجهه باثنين اديه
– موتني وشراح يصير هاا؟؟ شراح يصير؟
ترجعلك قمر؟؟
راح ترجع؟ ولك ماااتتت قمررر كاافي تصيرر مطييي لوو تكتلل العالم كلها ما ترجع لا تخليني اكسررر رجليك واخليك تحلم تشووف الشارع بعددد
تنجبببب وتاكللل خـ*ـرراا وتكعدد بالبيت وتنجببببب.
كام ضربني على صدري وكام يصيح
– لااا تحجييي هيج ولككك لاا تحجييي هيججج!
بـــراء – يمةةة تُـــراااااث يمةة كاافي شبيكم بررهوم اسكتتتت عووووفة اسكتتتت.
تُـــراث – خللل ينجببببب لااا يحجيي هيج.
– انتَ انجبببب وافتهمم ماتت رااايح نابشش كبرةةة شتحصلللل ولك ياامطيي شتحصللل؟؟ خلص ماااتت!!
تُـــراث – لاااا تكووووول ماااااتت ولك لاا تكوووول هيجج.
كعد على حيله يصيح بعلوا صوته ويلطم على راسة
– مااااشبعتتتت منهاااااا ولك مااشبعتتت منااااا شاالها من حضنييي
ولك صغيرره واخذووها من حضنييي.
كعدت كدامه حضنته حيل وهو كام يصيح بحركة گلب
ودموعه تنزل على ظهري ويصيح
– ولك بررهوم تكليي باباا بحضنهم وتكلي بااباا عبالها راح اخلصهاا منهمم عبالهاا راح اخلصهاااا، بااباا قمرر باباا سوده بوجه ابووج
يـا بابا شگالت روحج من متي كدام عيوني وماسويت شي شگـالت روحج بابا.
بــرهـوم – اششش هذا حد يومها اسكت كافي اشش.
نزل راسة على جتفي وهمس بصوت مخنوك
– اريد الحگها بــرهـوم.
وخرت من حضنه اباوعله خزرته بسرعه وحضنت وجهه بثنين اديه
– تريد تموت؟ كلنه نموت وراك، اكتلهم واكتل روحي وراكم وخطيتنه بركبتك.
نزل روحه وحط راسه على رجلي، كعدت عدل وخليت راسه على رجلي
بـــراء كاعده بمكانها وحاطه اديها على حلكها وتبجي بخنكه
شهك بقوة وحط ايده على وجهه يبجي ويحجي بخنگ
تُـــراث – مشابعت منها، وعلي ماشبعت منها ردت ارجعها لحضني، ولك ردت ارجعهااا ولك حافظت عليهاا ردت ارجعهاا شلون ماتت والله ما شبعت منها ضليت بحسرتهاا كلبي مشتعل ناار بــرهـوم اريد اموت اريد الحكها اريد احضنها ماشبعت من حضنهاا ماتت صغيرره برهوم ماتت صغيرره
والله ماشبعت منها تمنيتت اشوفها تكبر كداامي تمنيت اشوفها من تكبر اوديها للمدرسة واشيلها والعبهاا والله تمنيت اشوفهاا هيج.
دنكت حطيت راسي على راسة وهمست
– اشش كافي.
شهك يجر نفس وكال بحسره
– راحت الچــنت رايـد اكبرها اعـلى ايدي.
غمضت عيوني امسح على راسة وبـراء كاعده يم رجلية مفرفحه من البجي
دفعته من حضني ادك على ظهره وامسح بوجهي
– كووم يله كوم كافي بجي، يله كوم غسل لا تخليني اطيح حظك لا تصير ضعيف
يله كووم طفلة وراحت يم الأرحم من عندك عليها
لا تضل تبجي وتنعي مثل العجايز كوم اسبح شوف روحك شلون صاير كوووم يله.
ضل كاعد بمكانه يباوعلي جريته من ايده كومته سانده ودفعته بجهة الحمام
– امشي اسبح يله امشي.
دفعته وسديت الباب عليّ ومشيت كومت بـــراء
– كومي برائي كومي عيوني يله كافي بجي مو زين عليج.
باوعتلي تبجي وتناشغ
– رااح يمووت من القهررر راح يموت.
– اشش مايموت كافي، روحي انطي ملابس يله يله مابي شي.
مسحت دموعها تهز راسها بـ اي، راحت لغرفته تطلع ملابس
كعدت بتعب على القنفة حاط ايد على راسي فركته بقوة وفركت عيوني وكمت
طبيت وراها، تدور بالكنتور وتشهك تنهدت ومشيت
كعدتها على الجرباية واخذت ملابس اني وطلعت
وكفت باب الحمام ادك بالباب
– تُـــرااث.
– هاا.
– افتح الباب.
– شتريد!
– هذني ملابسك.
– عوفهن يمك اني من اطلع اخذهن.
– افتح الباب لا تمسلت.
– مصللخ شكوو افتحهاااا.
– ميخااالف افتحهاا.
– مااا.
بــرهـوم – ولك مطيي افتحهااا عود يستحي منييي.
– ولي ما افتحهااا روح.
– افتح البااب ولك افتحهاا.
– مااااااااااااا.
– وجعاااا.
دفرت الباب وهو قافلها ما يرضى يفتحها
تُـــراث – خااااب جااي اسبح شبييكك روووح روووح.
– كااعد تبجييي جوة الدوووش جنك مطلقةة ما ادري بييك اطللع خاايس.
– اكلل خـ*ـرة.
– افتح الباب يله.
– مااا افتحهااااا رووح راح اسب اهلك واحد واحد وانبشهم نبشش.
– ايي نباااش مال گبورر صاااير الچلب.
– انتَ چلببببب.
– اعلمك بسيطه هذني مسلوباتك بالبااب.
شمرتهن بالكاع وعفته ورحت
فتت من يم غرفته واشوف بـــراء بعدها تبجي طبيت للغرفة
گعدت يم رجليها، وخرت اديها ونزلت راسها تباوعلي
– مو كافي؟
– خايفة عليّ.
– اني ويا مابي شي، هاج صارله ساعه ينبح بالحمام جنه مسودن هو هذا ينخاف عليّ.
بـــراء – هاي شبيك بــرهـوم لا تحجي عليّ هيج.
– حبيبي لا تخافين عليّ والله مابي شي هسه كم يوم ويتعود ويصير زين
وبعدين يشوف نهروان ينگلب حصان علينه.
هزت راسها ساكته كمت مسحت عيونها وخرت شالها من راسها
– امشي غسلي وجهج وخري هذا هسه منين لابسته.
– استحي من تُـــراث عوفة عوفة.
– بابا هسه تُـــراث يعوف الدنيا كلها ينتبه على لون شعرج ياعيني دعوفي اصلا خاف اللون.
– هيج تكول؟
– اي والله امشي غسلي حبيبي.
هزت راسها بـ وراحت للمطبخ تغسل وجها، حطيت الشال على الميز
وطلعت وراها، وكفت كبال المطبخ اباوع عليها وباوع على باب الحمام الي تصير بصف الغرفه
شلون ارجعكم مثل قبل؟ احس نفسي مخنوك واني اشوف اغلى ثنين على گـلبي متلوعين
التفتت عليّ تمسح بوجها من المي وباوعت على باب الحمام
– بعده يسبح؟
– اندري شو نام.
– شوفة حبااب خاف شو شبي.
هزيت راسي ومشيت دكيت باب الحمام
– تُـــرااث يمعوود.
– شكوو!!!
– ماا تطلع نمتتت بالحماام.
– بعددني روح.
– اددري جااي تسوي شيرررة بالحمااام صارلك ساعه.
تُـــراث – ساااقط سرسرري اطلع واعلمك.
– دييله اطلع.
– لا تضلل تلح لا اطيح حظظك.
– ديله ديله استعجل.
– انچب.
– اطللللعع.
– رررراح اجيكككك.
بـــراء – عززة عوفة اسكت عوفة.
جرتني من ايدي وتأشر اش
– اش عوفة اسكت اسكت عفيةة لا يسوي شي بروحه.
– شنوو السااالفة شو وخرري.
– لا عفية عووفة.
– دخل اطبلةة اكتله.
– لاا لاا برهوم عووفة لخاطرري.
تُـــراث – موو اجيكككك ولك ااجيييك.
بــرهـوم – ديله خووش اطلع.
ما رد بعد جرتني بـــراء من ايدي للهول
– خلي بالحمام عوفة يله عوفة، تعال اكعد هنا اكعد.
– شووو خل اشوفة.
– حباااب برهوم عوفة كافي.
كعدن على التخم وهي كعدت بصفي تمسح بوجها وتهمس
– بس يتعاركون بس يتعاركون.
سكتت من سمعنه باب الحمام انفتح، كمت اشوفة
طلع لابس بس شورت باوعلي صفح واخذ ملابسة ورجع طب للحمام
هزيت ايدي وضليت واكف باب الحمام انتظره
طلع مبدل
ويعدل بتشيرته، باوعتله محلق ومرتب شعره
ابتسمت
وتقربت وكفت كدامه
– عاشت ايدك.
تُـــراث – انجب.
– لا تضل تمسلت مو انطيتك مجال.
– انجب.
– هاا هاااا انعدددديت هاااا؟
– انجب.
– نهروان الثانية.
كلتها وعفته ورجعت للهول، التفتت عليّ لمحته واكفه بمكانه وصافن
ابتسمت وكعدت على القنفة، كامت بـــراء وكالت
– وينه؟
– اجه.
اجه للهول راحتله وحضنته وهو حضنها حيل يبوس بيها براسها وجها
وهي حاطه راسها على صدره وبس تبجي
تُـــراث – بـــراء.
وخرها من حضنه يمسح على راسها
– كافي بجي تعبت.
مسحت عيونها بسرعه وتهز راسها
– بعد ما ابجي سكتت.
ابتسم بهدوء يباوعلها وحاضن وجها
رفع نظره لشعرها فتح عيونه ونزل نظره لعيونها خازرها
– هاااي شنو؟
– شنو؟
– صاابغه شعرج؟؟؟
– هاا؟
بــرهـوم – انجب، من زمان صابغته بس لابسة حجاب ماشفته.
– انتَ انچب.
التفت على بـــراء
– ليش صبغتي؟؟
بــرهـوم – صبغته اليّ.
– مووو كتلك انچببببب؟
بـــراء – من زمان صابغته والله.
– موو كتلج لا تبصيغينه احبب لوونه؟
– موو..
بــرهـوم – اني احب هذا اللون كتلها اصبغي.
تُـــراث – لك بااابااا انجببب.
هزيت ايدي وهو يباوع على صبغ شعرها جان لونه اسود وهسه صاير بُني وترابي ماعرف شسمه
بس لايك الها وهي تستحي منه
تُـــراث – بااجرر بااجر ترجعينه اسودد خوش؟
– شلون؟
– والله ما ادري مثل ما سويتي هيج ترجعينه اسود.
– خوش، يله لا تصير عصبي.
– مو عصبي اني.
كعد بصفي، باوعتله يرجف كوة مسيطر على نفسة
تنهدت وباوعت على بـــراء
– سويله شي ياكله على السريع.
هزت راسها ورادت تروح كال
– ما اشتهي شي تعاي ماريد.
التفتت عليّ ورفعت ايدي وصحت
– وعليي الطمك علىى حلكك ابلعك سنوونك دشووووف روحك كووة واااكف مطيي مطييي انتَ مااتحسس مطييي؟؟
دنك راسة ساكت، اشرت لـ بـــراء روحي، راحت واني رحت للغرفه
جبت علاجه وطلعت الي لازم ياخذه بهذا الوقت حظرته وحطيته بصفي
رفعت راسي على صوت حسرته، تنهدت وحطيت ايدي على رجله
– قوي روحك تُـــراث.
– ما تعرف البكلبي شنو، بنيتي ماتت بــرهـوم.
– اششش اششش اسكت كافي حرام تحجي هيج رب العالمين انطاها الك واخذها امانه رب العالمين واخذها كافي اسكت.
تقربت عليّ اكثر وجريته حضنته لصدري ابتسمت وطبطبت على ظهره
– ماشااء الله ماشااء الله، اريد احضنك ماكدر انتَ احضني خل اواسيك.
باوعلي وزفر نفس بروح رايحه، بسته براسة امسح على ظهره
– استغفر ربك وكول الحمدلله على كُل حال.
هز راسة وهمس
– الحمدلله
اجت بـــراء حطت الصينيه على الطبلة كدامه، وخرت عنه
وقربت الطبلة كدامه
– يله اكل شوية حتى تاخذ علاجك.
– ماكدر والله نفسيتي ما تتقبل ماكدر اكل.
– اجبر نفسك اجبرها تُـــراث لا توكع مره ثانيه والله تعبنه ومابينه حيل بعد صدمه ثانية.
كعدت بـــراء كدامه تسوي لفات اله وتمدهن اله
ندسته بخاصرته باوعلي، حركت عيوني بمعنى اخذ منها
تنهد واخذ منها ياكل وهي ابتسمت وكامت تسوي اله لفات وياكل
اكل قليل كوة وكال شبعت، انطيته علاجه وهو كام وكف
– اروح انام.
هزيت راسي وهو عافنه وراح للغرفه وسد الباب ورا
بـــراء – الحمدلله اكل شوية.
– اي، انتِ لا تجبرينه وتلحين عليّ حبيبي اقنعي بكلامج حتى لا يضوج.
– لا والله ما اجبره اني.
– ادري بيج حبيبي، روحي ارتاحي راح اقفل البوب واجي انام.
– ايي.
شالت الصنينه وراحت، واني طلعت قفلت البوب مال الشارع ومال الهول حتى لا يطلع بعد
قفلتهن وطبيت ضميت المفاتيح جوة دوشك الجرباية
طبت بـــراء تنشف باديها من المي
– ها شتسوي؟
– ماسوي شي، تعاي غطي عزيز بارده.
هزت راسها ومشت تطلع غطى لـ عزيز، ماكتلها
على المفتاح لان ادري بنظره من تُـــراث راح تكت سوالفها كلهن
اجت شالت عزيز لجربايته وغطته واجت تمددت بصفي
بـــراء – شسمة، بــرهـوم باجر جيبلي صبغ مال شعر اسود.
ضحكت وحطيت ايدي على وجهي، هزيت راسي بـ اي
– ميخالف ميخالف.
ابتسمت وتقرب ضمت راسها بحضني ضميتها لحضني اكثر ورفعت الغطه عليها
ضلت تسولف بحضني وتحجي بـ تُـــراث واني اهز راسي ساكت، شوية وسكتت باوعتلها نايمة كمت طفيت الضوة
ورجعت جريتها لحضني ونمت، بعدني نايم وفزيت بسرعه على صوت دك الباب قوي وصياح تُـــراث
– ووووولك بــرهـوووووهم ساااااقطط اكعدددد جلبب ابن الجلبببببب.
” نـــهروان ”
كاعده بمكاني صافنه واجر حسرات مقهوره وضايجه
واحس اريد شخص احجي ويا بس احس ماكو شي يفتهم الي اريد احجي
وما يفتهمه بالطريقة الي اريده اني يفتهمها
تنهدت وكمت امسح بوجهي، عزلت الباب وكعدت اراجع لـ عزيز اشوفة قاري لو لا
بعد كم يوم وتبدي المدارس
من بده يخف المرض واصلا لابسينه ولا عبالك اكوا شي اسمه كارونا
كل الدول جانت متحفضه وملتزمه بالوقاية
اله احنه
بكلشي مخالفين ماشاء الله
للعصر خابرني بــارون
– هاا بارون؟
– حظري نفسج انتِ وسيف جايكم اني.
– تمام.
سديته وكلت لـ سيف يبدله، رايحين نشتري ملابس للدوام
المضوجني السنه اداوم وحدي محد من البنات او الولد يداوم وياي كلهم تخرجوا
لبست ثوب بسيط وشال وسيف بدل وكعدنه ننتظر بــارون
شوية ودخل للبيت اشر يله
نـــهروان – اكعد ارتاح شوية اشرب مي ليش مستعجل؟
– ماطول بية حيل اذا اكعد اتعاجز اكوم بعد يله.
هزيت راسي وكمت، طلعنه وهو قفل الباب ومشه كدامنه
رحنه مشي للسوك لان اصلا قريب مو بعيد كلش
وصلنه لمحلات جان موسم المدارس والمحلات والاسواق مليانه
دخلنه لمحل اخذ ملابس لـ سيف وطلعنه
دخلت
اني كلية يعني مو زي واحد، اخذت ثوبين وتنورة
وكم قميص عندي بناطير جدد، واحذت احذية وطلعنه
بــارون – خل نروح للمكتبة.
– خليها على باجر ليش مستعجل.
– ماعدنه شي بابا، وقريبة علينه ناخذهن فد مره ونرجع.
هزيت راسي بـ اي ومشينه لمكتبة اخذ دفاتر واقلام لـ سيف
واني اخذت اقلام الـSoft واخذت سجلات وكتله البقيات اخذهن بعدين
اشترينه وكلمنه ورجعنه للبيت، حظرت غراض الكلية كلهن
كملت وكعدت على صفحه ارفع بشعري عركانه
زفرت نفس بتعب وكمت كملت تعزيل البيت كله ورحت للهول لكيت سيف كاعد بالهول وفارش الكتب كدامه
سـيف – اكلج متأكده هذني كتب ثاني متوسط؟ شو يخوفن.
ضحكت وكعدت كدامه على القنفة
– اي حبيبي مو كل سنه يغيرون المنهج.
– صعبات حيل.
– مايصعب عليك شي ونهروان يمك.
ابتسم وشمر بوسة بالهوى
ضحكت وكمت، دخلت للغرفه اخذت ملابس وطبيت للحمام
سبحت وطلعت انشف بشعري، تلكاني بــارون
توه جاي
نـــهروان – الله يساعدك.
– ويساعدج، اخذتي علاجج؟
– هاا؟
– استغفر الله.
كالها وكعد على التخم بتعب، كعدت بصفه وحطيت راسي على صدره
– والله انسه.
– نـــهروان كتلج سوي منبه علمود علاجج كلتلج بس من اني ماموجود اخذي ليش تخلين بالي يمج مو راح انجلط انيي.
– بــارون والله انسه شبيك انسه قابل متعمده.
– حااولي ماتنين منا وهيج دوام شلوون اركض وراج للكلية هنااك هم.
– لا والله راح اوقت الجهاز بكل وقت العلاج ومن يدك اخذه.
– اوووو هاي هواي حجيناها وتغلسين.
– لا ما اغلس انسه انسه.
– اي خوش تنسين.
هز راسه وسكت، وخرني من حضنه وكام ينفض ملابسه
– ليش تحضنيني مو سابحه وملابسي وصخات شوف شلون تدمر تراكج.
– لا والله؟ ما احضنك من تجي من الشغل حتى ما ادمر؟ بارونتي فدااك اني وملابسي صدك جذذب.
كلتها وكمزت عليّ متعلكه بركبته، ضحك وحضني وسيف صاح
– خطية على كيفج ويا عمو ركبته راحت.
نـــهروان – معليك ولك حاروكه.
ضحك بــارون وكال
– خل اروح اسبح، وانتِ سويلنه عشه حلو من هاي الادين الحلوة.
– لك مو تدلل.
مشيت للمطبخ وهو راح طلع ملابس وراح للحمام
وكفت اسويلة اكل علمى كملته طلع من الحمام وديته للهول وهو نشف شعره وكعد
كام سيف كعد يمه، وكعدوا يتعشون، تعشيت وياهم وكمت بسرعه اخذت العلاج
حتى بس يسالني اكله اخذته
سويتله جاي وديته اله وغسلت الماعين وكعدنه اني وسيف بالهول
ادرس وادرسه وياي وبـارون ضل كاعد يمنه يخابر ولد صديقة
” مـريـم ”
احلى شعور من تحسين اكوا شخص يهتملج ويخاف عليج
وكل كلمة تكوليها تشوفين تأثريها عليّ شكد حلو
هيج بده شعوري ويا مصطفى
كلامه وياي واهتمامه يخليني افرح وغصب عني احس بأنجذاب اله
بسبب كلامه وياي، هو مايدري بنفسة مفضوح
وكلنه نعرف مشاعره شنو
وهو بذات نفسة يريد يبين النه، بس اني الي جنت غافله عنه
وبيوم وليلة اكتشفت كل هذا
فززني من تخيلاتي صوت رساله، سحبت تلفوني من الميز شفتها من ماما كاتبة
– بنات اني بالعياده بـ5 العصر اني بالبيت اذا تردون شي كولوا.
رديت بسرعه لان اذا تأخرت تقلق علينه
– تمام ماما، لا حبيبتي مانريد شي.
شافتها وماردت، عود مشغولة وكذااا اوف منج ام غيد
سديت التلفون وكمت، طلعت من الغرفه افرك بعيوني
شفت غيد مبلشه بالبيت تنظيف لان ماما مو هنا
لان اذا هنا تضل سوي هيج هاي عوجه هاي بعدها وصخه
تعاي سوي هاي انتِ سوي كذا انتِ لا تسوين كذا
وتشدهنه، رحت غسلت وجهي ورجعت للغرفه عزلتها وطلعت
لكيتها مكمله بس رشت معطر وكعدت
باوعتلي وشمرت روحها على التخم بتعب
غـيـد – هااه بعد وكتت؟
– توهاا بـ11 شسالفة.
– صدك والله؟
مدت راسها شافت الساعه ورجعت ضربت كصتها
– واني عبالي بـ2 طلعت ساعة غرفتنه عطلاانه امدااني.
– اي من زمان مخلص باتريها يرادلها جديد.
– من تجي ماما خليها تجيب النه.
هزيت راسي وهي كامت وكالت
– رايحه اسبح خلي تلفوني يمج خاف ماما تراسل لو تدك جاوبيها.
– تمام.
دخلت للحمام واني رحت للغرفه خلت تلفونها يمي
وفتحت تلفوني، دخلت على محادثتنه اني ومصطفى
باوعتلها وضحكت من تذكرت البارحه باليل شسوة
جنه دانحجي مثل كل مره بالكروب عدى نـــهروان وهُـمام
ما موجودين، ودانتشاقة ونحشش على نسرين الي مصخنه وعبالها بيها كارونا
وكاتبة رسالة وداعيه ودازتها لـ عبود ودازه رسالة بالكروب كاتبة
– ابروني الذمه حبابين والله احبكم.
متنه من الضحك وعبود يدز فويزات يكلها
– عبودددي ابريني الذمه ولك عبودي حبيبي.
نسرين – عبودي تصنف عليّ؟
– لا حبيبي.
– تماام عبودي تمام.
زعلت وغادرت من الكروب عبودي دز ايموجيات ضحك وكاتب
عبودي – اصالحها واجيكم.
ضحكت وخرجت من الكروب، لكيت مصطفى كاتبلي بالخاص
– تعرفين تزعلين مثل نسرين؟
– لا، اني أزعِل ما ازعَل.
– زعليني وصالحيني.
– اصالحك بطانية جوجو مو؟
– ههههههههههههه اي بسرعه ارضى.
– عابت.
خرجت من المحداثة من دك تلفون غيد، شلته شفته
بــارون يتصل فتحت خط وجاوبته
– هلاو.
– هلا، مريم؟
– ايي، شلونك؟
– هلا الحمدلله وانتِ شلونج؟
– زينه.
– لعد غيد وين؟
– بالحمام داتسبح ليش؟
– لا هيج، يله اخذي راحتج وسلميلي على امج.
– يوصل.
سد الخط وراح، ابتسمت ورجعت التلفون على الجرباية
احب علاقتهم هو وغيد من زمان اتمنى غيد تصير لـ بــارون
لان اشوفهم واحد يحب الثاني وثنينهم مبتعدين يحبون من بعيد
والحمدلله من صارت اله وماضل شي لعرسهم..
دك تلفوني، رفعته بسرعه مستغربة منو يتصل بهيج وقت؟
رفعته شفته مصطفى، يعني بربج منو مكلبج غيره؟
ضحكت وفتحت خط
– ها مصطفى.؟
مصطفى – ولك ياااااحلووو تدري شغلةة؟
– ايي؟
– كلتت لامي اريد اتزوج وهي تكلي بس اشرررر بس اشرررر.
– هااا تمام، واشرت لو بعدك؟
– لاع صرت مثل جوجو، هو شايل بطانيته ويفتر واني شايل اصبعي وافتر عليمن اأشر.
ضحكت وهزيت ايدي
– شاخط.
– ولج بس شاخط اني حتى فوزاتي طكن.
– ياا منين؟
– منج.
– تأدب.
– ما اتأدب اني، باعي مريم.
– هاا؟
– دخلي على المحادثة هسه.
خرجت من المكالمه ودخلت على المحادثه لكيته
داز صوره اله مأشر على الكامره ومبتسم، حطيت ايدي على حلكي اضحك
– هههههههههههههه هااي شنو؟؟
جر نفس طويل وهمس
– أشرت عليج رومــة.
سكتت فاتحه عيوني مصدومه وخجلانه كمت بسرعه حاطه ايدي على حلكي
كمت افتر بالغرفه واتنفس بسرعه وكلبي يدك سريع وارجف
مصطفى – الووو؟؟ مررريم؟؟ وين رحتيي الوو؟؟
شمرت التلفون على الجرباية وحاطه ايدي على حلكي اباوعله بصدمه
طبت غيد للغرفه باوعتلي وركضت عليّ بسرعه
– شكوووو شبيج؟؟ ولج ياااا شبيج ولج؟؟؟
مصطفى – خاااااب هناااااا.
التفتت بالغرفه بسرعه تدور على الصوت سمعته من تلفوني
شالته وكالت
– مصطفى؟
– غيد؟
– شكووو؟
– شبيهاا مريم؟
– شمدرريني شبيكم شكوو؟
– مصدومه؟
– ولك شكووو؟؟
– ماكو، مع السلامه.
– ولك اوكفف..
سد الخط وهي بسرعه التفتت عليّ
غـيـد – شكوو شبيكم؟
نزلت ايدي من حلكي وهمست
– مصطفى يريد يتزوجني!
– شنوووو؟؟؟
– اي وعلي شوفي.
جريت التلفون شوفتها صورته عقدت حاجبها مافهمه
سولفتلها الي صار وهي كالت
– يحجي صدك لو يتشاقة؟
– مادرري والله.
سكتت تباوع بعيوني هزت راسها وكالت
– عوفي لا تردين عليّ بعد اني احاجي وافتهم منه هذا انرعص اخر فتره.
شمرت التلفون على الجرباية واخذت تلفونها
مـريـم – بــارون دك عليج.
– صدك؟ شيريد؟
– مبين يريد يحجي وياج لان لو يريد شي جان گالي بس مايريد.
هزت راسها وطلعت هتفون دك عليّ وحطت التلفون بجيبها ولبست الهتفون وكفت تمشط
اخذت تلفوني وطلعت كعدت بالهول اضرب صنفات
مصطفى يحجي صدك لو يتشاقة؟ ضحكت من تذكرت شكله بالصورة
مسحت وجهي وكمت غسلت وكمت سويت لفة اكل بيها
وغيد تسولف ويا بــارون بالغرفه استحي اطب وهي تسولف ويا
لان مرات ينجرفون ويرحون زايد وهي تنسى اني يمها ماخذين راحتهم زياده
سمعت صوت اشعار على تلفوني، فتحته وشفت
الرساله من فوك من مصطفى كاتب
– مريم بيج شي؟ ليش ما رديتي بعد؟ خوفتيني عليج!
لا دخلت على المحادثة ولا رديت غسلت وسكتت
ضليت صافنه وافكر معقولة مصطفى صدك يحبني؟
شو ما احس مصطفى شخص جدي بهيج موضوع
تنهدت ساكته خلص خلي غيد هي تحاجي
كمت للمطبخ
غسلت ورجعت كعدت بالهول اباوع بالتلفون ومنتظره شوكت ترجع من العياده
” نـــهروان ”
كاعده اقره بالهول واراجع لـ سيف وارجع اكمب قراية
البنات دزلي السجلات كلهم الي كاتبات بيهن اقره بيهن
والملازم ومصطفى عود السچاج كلساع يكلي
– هاي اقريها مهمه، هذني اتركيهن بس شكل، عندج هاي ركزي عليها صعبه.
واني اسلكله اي وصار وتدلل واني مغسله اصلا
انفتح الباب
ودخل بــارون من بره باوعلنه وابتسم
نـــهروان – الله يساعدك.
– ويساعدج حبيبتي، عاشت اديكم شدو حيلكم ماضل شي يومين للدوام.
– هو دا قره ما تركت القراية.
– عفية.
نزع حذائة واجه كعد على التخم كام سيف جابله مي
شرب وباوعلي يرفع شعره عن وجهه
– ابو هُـمام تشافى من كارونا، طلعوا من المستشفىى ورجعوا للبيت.
جريت نفس براحه وحطيت ايدي على صدري
– ايي الحمدلله ياارب.
بــارون – اليوم باليل اروح اشوفة.
– اجي وياك؟
– لا.! اني اشوفة وارجع بسرعه ما تأخر.
– تمام، جوعان؟
– لا اكلت هناك ويا الولد.
– بالعافية.
– الله يعافيج حبيبتي، رايح اسبح اني.
هزيت راسي وهو كام
باوعلي سيف وتقرب عليّ همس
– شبي عمو نتر عليج؟
– مابي شي، يله كمل هذني حتى نبدي بالانكليزي.
هز راسة ورجع يكمل دراسة
كمت لميت كتبي كلهن وحطيتهن بالغرفه اخذت تلفوني
كتبت رساله لـ هُـمام
– الحمدلله على سلامة عمو ابو هادي.
دزيتها وخرجت من المحادثة، طفيت التلفون وحطيته على الميز
توني اريد اطلع واجاني صوت اشعار، فتحتها شفتها رساله من هُـمام كاتب
– الله يسلمج يروحي، ابوية زين بس اني المو زين والله.
تنهدت وسديت التلفون، اخ ياهُمام شحطلك وتطيب؟
طلعت من الغرفه رجعت للهول، طلع بــارون ينشف شعره
بــارون – اليوم فد تعبت تعببب ضليت اشتغل وحدي الولد تأخروا والچفوف عدهم ماكو بالمخزن واشتغلت بايدي طاح حظي.
وكفت قريب عليّ رفعت ايده اباوعلها اصابعه متشككات وصايرات حمر ومشخطات
برطمت ورفعت ايده لوجهي بستها وضميت روحي بحضنه
ضحك وضمني لحضنه اكثر يمسح على ظهري
– هاا بابا شبيج؟
– انقهرت.
– فدوة يابة.
ابتعدت من عنده وهو مسح على شعري يهمس
– اخذتي علاجج؟
– اي، بس مال هسه بعدني ما اخذته.
– ميخالف، اكلي واخذي يله حبيبتي.
هزيت راسي ومشيت ويا للمطبخ اسوي العشه بسرعه بسرعه
كملته واخذته للهول، تعشينه وكمت اخذت العلاج وهو كام
بــارون – اروح وارجع بسرعه ما اتأخر.
هزيت راسي بـ اي وكام، بعده يلبس بحذائه واندك الباب
طلع واني وكفت باب الهول اباوعله فتح الباب وكال بصوت متفاجاء
– الضابط رضا؟؟؟؟؟؟
الفصل التالي اضغط هنا
يتبع.. (رواية تراث النهروان) اضغط على اسم الرواية لتجد الفهرس كاملاً بجميع الفصول.