رواية تراث النهروان – الفصل التاسع عشر
فتحت عيوني بصدمه والولد باوعوا واحد على الثاني
ردت اروح جرني مصطفى من جنطتي
– اووكفيييي اوكفيييييي .
التفتت عليّ واهمس بخوف
– مصطفى عوفني خل نروح مناا قبل لا يجون مصطفى .
– همه وين بيتهم وين ؟
– مو بهاي المحافظة .
– شكد يتأخرون ؟
باوعت على الساعة وبلعت ريكي
– ساعه ونص هيج .
هُمام – امشوا لـ بيت بـــارون هو يحلهاا امشن .
ركضنه صعدنه بسيارة هُمام شخطها بسرعة ومريم ترجف وتباوعلي
اريد اهدئها بس اني بنفسي ماكدر وماعرف شلون اواسيها
وصلنه لـ بيت بـــارون نزلنه نركض فتحت الباب وطبيت
لكيته موجود
هو وسيف بالهول وماما بالغرفه موجودة ، من شاف حالتي كام بسرعة
– شكووو شبيكم !!
شهكت بصوت وكمت احجي وابجي
– بــــارون عمامي جايين لهناا يردون يعقدولنه على الولد خلصنه منهم
عليك الله ضمنه من عدهمم ضمنه .
فتح عيونه مصدوم وكام بسرعة وكف كدامي ويحجي
– شنووو منو كالج ها منو كالج يجون ؟
مــريــم – بنت عمي خابرتنه من رقم غريب وتبجي وتصيح تكول جايين لـهنا .
بلع ريكه يباوع بسرعة ويجر نفس قوي ويباوع على الولد
اجت ماما تركض من المطبخ فتحت عيونها وصاحت
– وين اوديهن يمه ياخذوون بنااتي يمه .
ركضتلها مريم لزمتها والولد واحد يباوع على الثاني بحيرة
روحي راحت وحسيت الدنيا سودت بعيني
مصطفى – لا تخافين خاله كل احنه هنا شحده اليباوعلهن .
– يمه شبديكم انتوا عمامهن غصبا علينه ياخذونهن .
تحجي وتبجي
فرفحت روحي ، رفعت عيوني على بـــارون شفتي ترجف وعيوني مغوشات
من الدموع ، غمضت عيوني نزلت دموعي حارات على وجناتي
مسحتهن بسرعة والتفتت على ماما
غــيد – خل ياخذونه ماما .
التفتوا كلهم عليّ خازريني وبـــارون صاح
– يااخذوجن شنوو ؟؟؟؟؟ غيرر اكسر الأيد التنمد عليجن .
غــيد – مالك حق بــــارون خل ياخذونه هم يردونه ويردون البيت
خل ياخذونه واني اعرف شلون اتصرف وياهم هناك .
بـــارون – اسكتييييي اسكتيييي يااخذوجن شنووو؟؟؟
انتِ كل عقلج ؟؟ لج بااباا لاا تتخبلين شتتصرفين فهيمني ؟؟
عود عبالج من تردادديهم لو تلغطين راح يخافون منج ويسكتون ؟
اسكتي غيد اسكتي .
باوع على مريم رفع ايده يأشر ويجر نفس بعصبيه
– اخذيهاا اخذيها وطبن للغرفه اخذيهااا .
اجت مريم تركض جرتني من ايدي وطببتني للغرفه سدت الباب
وكفت كدامي تفرك براسها وتفتر بالغرفه كعدت على الجرباية
امسح بوجهي وحايرة شسوي وشلون اخلص منهم
مستحيل يعوفونه
بحالنة اذا ما طلعولنه كلب بصف كلبنه ،رفعت راسي على مريم من همست بخوف
– شنسوي غيد هسه تصير مشكله جبيرة بين الولد وبيت عمامي .
– لا تسألني مريم اني ماعرف شسوي احس روحي مخنوكه واريد بس شي يريح كلبي.
مر وقت قليل وما كدرت اضل كاعده طلعت بره يمهم لكيتهم وكفين ويحجون
غيد – هااا ؟؟؟
التفتوا عليّ وبــارون كال
– ترحن لـ بيت هُمام تضلن هناك بس كم يوم ؟؟
فتحت عيوني بسرعه وصحت
– مستحيللل !!
هُمام – ليشششش مستحيلل غيد ؟؟ الساالفة مو لعبه بس هل كم يوم علماا نحل السالفه .
– مااريدد مااريدد .
ماما – غيد …
– مااااماااا عووفينيي لحدد يحجيي وياي عوفونييي كلكم عوفونييييي .
كلتها وطلعت اركض من البجي وابجي واشهك اسمع صياحهم وراي
مسحت دموعي وطلعت اركض فتحت باب الشارع اريد اطلع
وانلطمت بشخص على اثره رجعت ليورة بسرعة، فتحت عيوني
مصدومة واني اشوف عمو جاسم كدامي!!
من شافني ابتسم ورفع تك حاجب
– وين رايحة غيد .
التفتت ليورة كلهم صافنين عليّ وبــــارون يباوعله ويخزر بي وعيونه حمر
غــيد – شتريد اجيت !
– اخذجن !! اخذ بنات اخوية خوما اعوفهن بيت غريب .
– ماااالك دخللل بينه !!
خزرني ومد ايده على ركبتي خانكني صحت ولزمت ايده
ما حسيت
اله بـــارون وهُمام ومصطفى ثلاثتهم خانكين عمو وهو بسرعة
هد ركبتي، رجعت ليورة اجر نفس واشهك فاتحه عيوني مصدومه
لزمتني مريم هي وماما واني اشهك وافرك بركبتي،طبوا
عمار
وسجاد وراهم عمو سالم ركضوا كلهم يدفعون بالولد من عمو جاسم
هُمام هد عمو جاسم وكام يتعارك هو وســـجاد ومصطفى يتعارك ويا عمار
وبـــارون مجلب بعمو جاسم وخانكه من ركبته وخازره وعمو
جاسم يدفع بي ويجر نفس وعمو سالم يصيح ويضرب بـــارون
على ايده يريده يهد عمو جاسم ، هده والتفت على عمو سالم خازرة
بـــــارون – امشواااا اطلعووا برااا بيتيييييي الكللل يطلععععع .
يصيح ويدفع بيهم بره وهم يغلطون ويدفعون بــ بارون
عـــمار – هاااا غيدد هم هذووولة كـ***ـيدج ؟
كالها وماحسيت غير بارون كمز عليّ يضرب بي بوكسات على وجهه
صرخت وفتحت عيني
– لااا بــــارون .
تخبل كام يصيح ويغلط على عــمار وهذا يعاند ويا ويفشر عليّ كدامهم كلهم وبلعوا صوته
متت بدمي من كلامه وفشايرة كدام الولد وهم كلهم يتعاركون ويتصايحون بالشارع
حسيت روحي بعد ما اكدر اتحرك ولا اكدر اقاوم جلبت بأيد مريم حيل
وهي باوعتلي وصرخت
– غيدددددد غيدددد شبيججج !!
اخر كلمه سمعتها من عدها وبعد ما حسيت بشي
” مـــريــــم ”
صرخت فازه من وكعت غيد بحضني ماما كامت تلطم على خدها وتصيح
– رااحتتتت بتيييي يمه راااحتتتت .
دفع بــــارون عمو جاسم لـ برة البيت واجه يركض راد يشيلها
يمد ايده ويوخرها باوعلي وصاح
– سنديهاااا سنديهااا كووومي .
– مااكدرر اشيلهاا وحديي .
باوع على ماما وصاح
– خااله سنديهااا وياهااا .
حاولنه اني وماما نشيلها وما كدرنه غيد طويلة وجسمها شوية متروس وماما كصيرة وماتكدر تشيلها
واني انعم منها
يادوب كدرنه كوه نشيلها نص شيله وطببناها للبيت
حطيناها
على القنفه وبـــارون جاب مي يرش عليها وينفخ على وجها
فتحت عيوني على كيف وترجع تغمض كمت اضربها راجديات خفيفه على وجها
– غيدد غيدد شووو اصحيي غيدد .
فتحت عيونها تباوع علينه من شافها بــارون صحت طلع يركض وصاح
– لحددد تطلعع .
قفل الباب من بره واحنه ضلينه وحده تباوع بوجهه الثانيه والقلق والخوف على وجهنه
نسمع صياحهم برة واحس من الخوف كلبي يريد يطلع
حضنت ماما غيد بوس براسها وهاي فاقده بحضنها كوه تتحرك
باوع علينه سيف ودنك يهمس
– لا تخافن عمو سبع يكدر يساعدكم .
هزيت راسي بـ اي على كلامة ودرت وجهي على غيد الضلت تهمس
– ماراح يعوفونه مايعوفونه ماما .
ماما – سودة بوجهي ماما كله مني سودة بوجهي .
مريم – كافي فدووة اسكتن .
كمت من يمهن اباوع من الشباك بـــارون يصيح وهم يصيحون
وهُمام ومصطفى وعبد الرحمن وجواد كلهم واكفين برة هذولة
شوكت اجوا؟ ضلوا واحد يهدد بالثاني لحد ما راحوا
وخرت
من الشباك من راحوا وهم ضلوا بالحديقه ، شوية ونفتحت الباب
دخلوا الولد يجرون النفس كوة من العصبية ، باوع بارون على غيد
وهي بعدها نايمه على رجل ماما وماما تمسح على وجها
بــــارون – خاله لا تخافين ان شاء الله حلينها .
هزت راسها
ماما بشرود ورجعت باوعت على غيد ، كامت غيد تمسح بوجها
غـــيد – بــــارون خل نطلع منا .
بـــارون – وين تطلعين ؟؟؟
– من البيت.
– هذا ؟
– اي .
– خوش ارجعي كملي نومتج .
غــيد – ماما كومي خل نطلع .
تحجي وتريد توكف ما تكدر سندتها من اديها وهي كوة واكفه
بــــارون – دكعديي اكعدييي .
– لا اريد اروح .
– وينننن ترحين غيددد لا تسودنيني!!!
– مادري اريد اروح .
– خوش اكعدي وبعدين روحي .
كعدتها كوه هُمام اشر للولد وطلعوا كلهم باوع بـــارون على ماما وكالها
– خاله اريد احجي وياج بموضوع ؟
باوعت غــيد عليّ ورجعت دنكت هزت راسها ماما وكامت طلعت بره ويا
باوعتلي غيد بتعب حطت راسها على صدري عبرت اديه حضنتها امسح على راسها
مــريــم – شبيج هاي عود السباعية مالتنه اغمى عليج بسرعة .
غـــيد – ولج كلامهم يوجعني شلون يحجون عليّ هيجي كدام زُملائي !!
يفشرون ويطعنون بشرفي عود هم اهلي !
– انسيي عوفيهم شتترجين منهم غيد !
سكتت بحضني ضايجة ومقهورة ماما وبــارون طولوا اكثر من نص ساعة برة
واحد هسه ما طبوا للبيت شفت غيد نامت بحضني وغفت
نزلت
راسها على التخم وحطيت مخده جوة راسها ،كمت على كيفي
فتحت الباب وطلعت شفتهم واكفين بالحديق مشيت على كيفي ونصدمت من كلامهم !!
بـــارون – انتِ بس اقنعيها صدكيني الباقي وكلشي اني اسوي !
– خاف احاجيها وما تقبل؟!
– خاله قابل اكوا غير حل وما سويته ؟
– شتريديني اكللها؟
– كليلها بــــارون يعقد عليج علما يرجعلج البيت ويفصخ كلشي .
” بـــــــراء ”
اني براء اخت تُـــــراث الصغيرة بس ولا مره حسيت روحي اني الصغيره
ابوية متوفي واني صغيره وامي توفت ورا وضلينه اني وتُــــراث عايشين بيتنه وحدنه
دائما احس روحي اني الجبيرة بسبب احترام تُـــراث وحبه الي
ومعاملته الي تخليني احبة اكثر ولا اعتبره اكبر مني اعتبره ابني
اهتم بي واداري ، تُـــــراث من وهو صغيره عنده صديق وهو بـــرهوم
مرات احسهم اخوة اكثر من الأصدقاء على كد حبهم سوة
ماينام تُــــراث اذا ما يتصل على بــرهــوم ويتطمن عليّ لحد ما كبروا سوة
بـــرهــوم يجي لبيتنه جان دائما وكم مره اشوفة لحد ما تفاجأة
من اجاني تُــــراث وكالي بــرهــوم طلبج مني، رفضت وجنت متردده !!
بس نظرات تُــــراث اثبتتلي ماكو احد غير بــرهـــوم يكون الي سند من بعد ربي وتُــــراث
وافقت وتزوجت وجبت منه احلى ولد هو عزيزي جنه عائله صغيره
ما تخلى من سوالف بـــرهــوم وتُــــراث وعزيز الي صاير ابنهم
اثنينهم ومتعلق بالأثنين ومرات يصيح لـ تُــــراث بابا
لحد ما
اجت تُــــراث وجان جايب ويا بنية !!
بالبداية استغربت حيل تُـــراث صح عنده سوالف مسكرة شوية
بس مستحيل يتعامل بهيجي شغلات ! بس من شفت حالتها
وخوفها واضح ايقنت تُــــراثي دايسوي شي زين وياها
صرت
لا أرادياً اركز على نظراتهم من يكعدون واشوف كلامهم
واشوف
تُــــراث من هي موجوده مايسكت ، لو يضحك لو يتشاقه وياها
ومن تعصب وتضل تجفص ويا اعرف مايصير عصبي هو من هيجي شي
بس مجرد يريد حجة حتى يلمسها وهي الله يسلمها بس عيونها
تجيب اكبر راس وسوالفها العسل الي تخلينه كلنه نصفن من تسولف
هنا ايقنت اخوية واكع ومحد مسمي عليً ويا خوفي يطلع
بس هو الواكع هنا راح تصبح كارثه لان نـــهروان كل همها
ترجع
لـ بيتها لـ لأهلها وتُـــراث يتمنى تضل مكالبته العمر كلة
فزيت على صوت عزيز يصيح
– ماما .
رحت للهول شلته
– ها ياروح ماما.
– جوعااان اريد ليوك ؟
من كالها فتحت عيوني بسرعه
– نـــهروان لحد هسه ما رجعت !
بلعت ريكي بخوف نزلت عزيز ورحت جريت عباتي حطيتها على راسي
ويا طلعتي صادفني تُــــــراث يريد يطب، ضحك من شافني
لزمني من عباتي ودفعني لجوة
– وين وين كلتي اليوم تُــــراث ما اجة خل اطلع مو؟
باوعتله وجهي اصفر وجسمي يرجف شحجي وشكله بلعت ريكي وهو عقد حاجبة بقلق
– شبيج ؟ نـــهروان بيها شي ؟ بطنها توجعها ؟؟
هزيت راسي بـ لا وهو راد يطب للهول لزمتها
– نــــهروان طلعت للمحل ولحد هسه ما رجعت .
فتح عينه بسرعه
ما مسوعب، نتر ايدي وطلع يركض من البيت سديت الباب على عزيز
وطلعت اركض من البيت ورا وهو عبر الركن واحنه نركض
وكف فجأه
باوع على الكاع باوعت ويا ولكينه علاكة بالكاع متطشر منها شغلات
ومن بينهم النستله الي وصيتها عليها لـ عزيز
ركض عليها كعد بالكاع فتح العلاكه طشرها وينكث بيها وفاتح عيونه ويصيح
– لكووهاااا لكوووهااا .
حاولت الزمه ما كدرت عليً باوعلي عيونه حمر ويملعن
– شسويي شسووي وين الكاهااا وين الكاهاااا !!
– والله صوووجيييي صوووجي كله مني ليش خليتهاا تطلعع .
ابجي واجر بأيدة اريد احجي ويا
تُـــــراث – ضيعتها راح يكتلوها يكتلوها بــراء يكتلوها .
يحجي وعيونه على العلاكه
فرفحت روحي من القهر شهكت وجريت ايده اكومة
– كوووم رجعهااا كوووم انتَ تكدر تلكاهاا كوووم .
بلع ريكة وباوعلي
– اكدر؟
– اي اي تكدر تلكاها وترجعها النه كوم الله يخليك .
كام ينفض بملابسه ويتلفت شال العلاكه من الكاع كمت ويا
وهو باوعلي عدل عباتي على راسي وجرني من ايدي لازمني
مشينه للبيت حط العلاكه على الميز يعدل بملابسه ويفرك بوجهه
– ديري بالج على عزيز اني رايح راح اشوفها وين وارجعها خوش؟
– راح ادعيلك .
– ادعيلي اي ادعيلي .
كالها وطلع يركض قفلت الباب ورا وطبيت اسوي اكل لـ عزيز وابجي
اخوي يرجف عليها شسويت اني شلون خليتها تطلع !!
” نـــــهروان ”
فتحت عيني واحس ألم براسي قوي ومسطورة كوة فتحتهن
باوعت اني وين جانت غرفه من غرف العمارة، حركت راسي
على كيف اتلفت وشهكت بخوف من شفت العُثمان كدامي !!
من شافني فتحت عيوني كام بسرعة سحلني من شعري حيل
حط وجهه بوجهي وفاتح عيونه على وسعهن خازرني
– عبالج اخليج تطلعين بسهولة ؟؟
من الخوف والصدمه ماحجيت كلمه بس فاتحه عيوني بخوف واباوعله
الـعُثمــان – مو اني الأعوف حاجتي بدون ما اخلص مصلحتي منها!
– شــ.. شتريد شتريد شتريد شتريد مني .
ابتسم تك خد وتقرب اكثر رجعت راسي ليورة خازرته
– لا لا لا لا تتقرب مني لا تتقرب مني !
– احب صوتج نــــهروان .
– عوووفنيييييي شتريد شتريد مني !
– اريدج كلج، اول مره تعجبني بنية واول مرة اريد روحها مو جسمها .
ضربته على صدره وهو هزني من شعري
– صلافتج لا تطلعينها وياي !
– وخرر وخرر وخرر وخرر لا دوسني وخرر.
عض شفته وتقرب باسني من خدي روحي طلعت ضربته على راسة حيل وصرخت
– ولك عووفنييييييييي لاا تسويييي هيجج .
لوة ايدي ورا ظهري بأيد وحده ولزم وجهي وظهري صار على صدره
لزم وجهي من فكي ورفعه حط شفته على خدي باسني وضل يشم بخدي
كمت ارافس بأيده وهو ضل حاط شفته ولازمني حيل
– عووووووفنيييييييي ولك عووووووفنييييي .
كمت اصرخ واكمز وادفع بي بس ماكدرتله دفعني من ايدي وشمرني على الحايط
– عبالج من تشردين ما اكدر ارجعج ؟ لو بسابع كاع احفررررها واطلعج .
باوعتله اجر نفس بعصبيه ومسحت عيوني وصحت
– لأنك كلب .
خزرني وتقدم عليّ رجعت ليورة هو وكف بمكانة
– ارجعلج.
كالها وطلع بسرعة من الغرفه وقفلها، كعدت بالكاع ابجي وحاضنه رجلي واصرخ
– ليشش طلعتيييي ليشش ليشش ليشش ليش!!!!
كمت اصرخ وادك على رجلية
– تُــــــراث وينه وين تُـــــراث ليش ما أجاني ليش ما اجة!
مسحت عيوني اشهك وابجي بصوت
– ليش طلعتي !
كمت اتلفت بالغرفه عسى ولعل اكو مكان اطلع منه بس ماكو حتى شباك
كمت وكفت حطيت اذني على الباب ما اسمع صوت رجعت ليورة اصرخ واركض بأتجاه الباب واضربها دفره
– افتحوها افتحوها افتحووهاا افتحووهااا .
لا أحد رد ولا احد سمع اصلا شهكت وكعدت بالكاع حاضنه روحي
– اريد اطلع تعبت اريد بـــارون ليش مادور عليّ ليش ما طلعني ليش !
بجيت اكثر وروحي تريد تطلع اريدهم ميته على شوفتهم مشتاقتلهم
عله صوت البجي مالتي وشهكاتي تزيد ما تنقص واني اشهك بعلوا صوتي وصرخ
– اريد اطلع منااا الله ياخذكم الله ينقتم منكم .
” بـــــــراء ”
مرن يومين وتُــــــراث ما اجة للبيت ابد اجة بــرهــوم ثاني يوم
جان القلق على وجهه من شفته كمت بسرعه تلكيته
– هاا بشروا ؟؟
هز راسة بقلة حيرة
– مالكينها لحد هسه .
بلعت ريكي بخوف وقهر على اخوية وعلى نــــهروان
اخذت
مي لـ برهوم انطيته وكعدت يمة
– تُـــــراث وين ؟ هم تشوفة ؟ شلونه ؟
– اشوفة اشوفة بس مو دائما حاير يدور عليها .
سكتت مقهورة كمت اسويلة اكل وبالي كله يم تُـــــراث اكيد
هسه ضايج عليها اخوية اعرفه من عيونه وعيونه من سمع بيها
ماموجودة لمعت، سويت اكل واخذته لـ برهوم وهو هم ضايج
بــــرهـــوم – عزيز وين؟
– نايم بالغرفه .
– جيبي .
صعدت جبت عزيز جان نايم اخذه بحضنه يبوس بي ويشمه
بــــراء – بــرهــوم عينك عليّ رايحة اصلي واجي .
– روحي بوية .
رحت توضيت وكفت اصلي ودموعي تنزل تشرح حركت كلبي
على اخوية وعلى البنيه الي ما اعرف شراح يصير بيها بسببي
كملت صلاتي وكفت ادعي من كل كلبي يلكاها ويرجعها هنا والله
اضمها بروحي بعد وما اخليها تتحرك ولا تطلع من البيت
كملت
صلاتي شلت السجادة ورحت لـ يم بـرهوم لكيت عزيز كاعد
ياكل
ويا كعدت يمهم وهو يوكلة وصافن
بــــراء – شبيك بـــرهـــوم؟
جر حسرة وباوعلي
– تدرين لو واصله نــــهروان للبيت وشايفينها هنا شيصير ؟؟
عقدت حاجبي مستغربه كلامة
– شيصير ؟
– ياخذوج انتِ وعزيز وياها !
بلعت ريكي بخوف وتقربت عليّ همست
– هم منو ؟
– مو تدرين مراح نكلج ليش تسألين !
– ردت اعرف منو هم اهلها ناس تكرها وليش هيجي يسوون وياها وهي بنية حبابة .
– جؤؤ ،ناس غربه .
سكتت ماحب اتدخل بشغلهم ولا اسأل وهم متطمنين من هاي الناحيه مني مو فضولية وكلمة وحده ترضيني وتسكتني
اخذت عزيز من عنده
– كوم صلي حتى تنام وترتاح شوية .
هز راسة وكام دخل يتوضى، غسلت لـ عزيز وكعدته على التخم
رحت شلت الصينيه وسويتله جاي كمل صلاته واجه كعد يمي
اخذه من عندي ضليت كاعده يمه من كمل كام
– رايح انام شوية حتى اروح لـ تُـــراث .
هزيت راسي بـ اي ابتسم بهدوء باس خدي وصعدت للغرفه
نيمت عزيز بحضني وحطيته على التخم وكمت اريد اجيبله غطه
سمعت صوت هورن سيارة تُــــراث، طلعت بسرعة اركض للحديقه
طب يمشي وحده وعاصر البصمه بأيده حيل رحتله من شافني وكف بمكانه
بــــراء – هاا بشر ؟؟
هز راسه بـ لا ورفعه لفوك وعصر عيونه
– ماكو شي بـــراء كلشي ما لكيت الها .
بلعت ريكي بخوف وهو يريد ينفجر من القهر جريته من ايده فوته للبيت
– دتعال ارتاح شوية شوف شصاير بيك .
– شيصير بعد بــراء شيصير وين الكاها روحي تريد تطلع .
– سودة بوجهي ياخوية .
كعد على التخم يعصر براسه ركضت جبتله حب ضغط وحميتله الجاي
اخذت مي والحب وديتهن اله
بـــراء – اشرب هذاا فدوة اروحلك شوف شلون صارن عيونك ضغط صعد .
هز راسة واخذهن مني شرب ورجع راسة على التخم مغمض عيونه
جريته خليته ينام على رجلي وهو نزل روحه وحط راسة على جليه
جريت حسرة اعصر براسه وامسح على شعره
– عسى الوجع بكلبي شلون خليتها تطلع وعذبتك .
رفع راسة خزرني وحط ايده على حلكي
– ماتسكين انتِ !! بــــراء الي براسي اكبر من هذا فدوة اروحلج لا تزيديها عليّ.
تنهدت افرك براسة وهو غمض عيونه وغفه سودة عليّ مانايم مبين
عيونه حمر وجهه تعبان ماجنت اعرف اخوية واصل لهل مرحله
ويا نــــهروان لان حبه واضح عليهم وبكل لمسه الها ونظره احس
روحه تضحك قبل وجهه، دنكت بست راسة وامسح عليّ
حطيت مخده جوة راسه وكمت على كيفي شلت عزيز صعدته فوك
لكيت بـــرهــوم بعده مانايم كاعده بمكانه اخذ عزيز من عندي
بـــرهــوم – الغرفه بارده ولج ليش ما غطيتي .
– هو اجيت انيمه هنا .
حطه بصفه وغطا ويا بالغطه ويبوس بي
– بــرهــوم اجة تُـــراث جـوة.
رفع راسة بسرعة
– اجه ؟؟
– اي ونام على التخم اجه كوة يمشي ضغطه مرتفع مبين وعيونه حمر .
– غيرر من صارله يومين ما نايم سودني وعلي كتله لا يصير بيك شي ناام ناام .
يحجي محروك كلبة وحاط ايده فوك اذن عزيز حتى لايكعد
– شكالج هو عرف شي ؟
– لا والله كلشي ما عرف ولا لكاها .
– شوفي شراح يصير بي لعد راح يتسودن اخوج .
– خطية بــرهــوم غير البنيه بركبته صارت .
– طاايشة هي طاايشة تسوي كلشي بدون تفكير غبااااء غبيةةة غبيةةة تصرفاتها تستفزني !
يحجي متنرفز حيل من عدها
بـــراء – لعد يغلس ؟ اني الما اعرفها محترك كلبي وهو مبين علاقته قوية بيها .
– يا قوية غير صايرين سمنه وعسل .
– سودة عليّ.
– ماخايف غير على تُــــراث لا بساعة تسرع ويخرب كلشي علينه .
– لا أن شاء الله ماكوشي لتخاف .
هز راسة وغمض عيونه يريد ينام
كمت طلعت اخذت غطه الي بغرفه نــهروان ونزلت غطيته بي
كعدت على التخم صافنه عليّ وكلبي يريد يطلع من القهر مددت
على التخم وغفيت بدون ما احس،
ماحسيت غير بعد فتره مو طويلة بصوت طكطه بالمطبخ
كمت
بسرعه باوعت تُــــراث بعده نايم وحاضن اللحاف حيل
حطيت ايدي كلبي
خاف ينحسب ذنب عليّ لان انطيته لحافها وبي عطرها
كمت جبت اخذت اللحاف
الي متغطيه بي اني وردت اخذ لحافه طلع بـرهـوم من المطبخ
– شداتسوين ؟
رفعت راسي باوعتله ومقهروه من نفسي
– ابدل اللحاف .
– ليش؟!
– مو شوف هذا بي عطر نــهروان وخاف هو حضنه وشمه وينحسب ذنب عليّ وعلى تُـــراث شوف شلون حاضنه .
هز راسة ومسح على شعره
– عوفي بـــراء عوفي ماتشوفيه كوة نام .
– مو…
جرني من ايدي واخذ اللحاف شمره
– دتعالي يا حبيبتي .
طبيت ويا للمطبخ كعدني على الكرسي بالمطبخ وباسني بخدي
ابتسمت بخجل ودنكت راسي العصر بالدشداشه
– ياابوية شحب خجلج .
– بــرهــوم !
كلتها وكمت من الكرسي بسرعة صارلنه خمس سنين من تزوجنه
ولحد هسه كلما اشوفة عبالك اول مره واخجل من عنده حيل
بـــراء – روح بالهول خل اسويلكم اكل انت وتُـــراث علما يكعد .
هز راسة مبتسم وكرص خدي، طلع من المطبخ وكفت اني اسوي اكل
وبالي كله يم نــــهروان وادعي تكون بخير وتضل سالمه
سويته
وحطيته على الميز طب بــرهــوم وكف يغسل، رحت اكعد تُــــراث حتى ياكل
وكفت يمة ندسته على كيف بظهره
– تًـــــراث تُــــــراث شو اكعد سويتلك اكل يعيوني كوم اكل شوية ؟
جر الغطه عليّ اكثر وهمس
– جؤؤ عوفيني ماريد .
مسحت على راسه من فوك الغطه وهمست
– بداعتي كوم راح تتخربط ماماكل شي فدوة اروحلك .
– ماشتهي بـــراء .
– بداعت شلالك كوم بس شوية .
نزل الغطه من راسة باوعلي عيونه حمر من النوم وشعره مهوس
مديت ايدي اعدله اله واحجي ويا
– كوم عيوني كوم اكلك شوية حتى تدور عليه كوم .
وخر الغطه وكام
فرك وجهه وهمس
– اريد اسبح .
– دكل واسبح فد مره .
هز راسة بـ اي وكام طب للمطبخ وكف يغسل ايده وبرهوم كعد وبحضنه عزيز
بــرهـوم – شجاك انتَ شو صاير رجيج فد نوب؟
يحجي ويا تُــراث وتُــراث مغلس جر خاولي ينشف بوجهه
تُــراث – شبية؟
– ما تسأل روحك .
– بــرهــوم !
– وحمس شجاك انكلب على وجهك تلكاها لا تضل تلطم وتنسه الي انريد نسوي !
– اكلك انتَ ما تنجب ؟
– انتَ انجب .
جر كرسي كعد وجر خبز وكعد ياكل ويحجي
– مانسيت شي اني اعرف شغلي بس مو معناها انسه شلال
بـــرهــوم اني طلعتها منها لازم احميها ! انتَ شجاي تحجي ؟
بــرهــوم – طلعها منو كلك لا تطلعها بس مو هيج لا تاكل ولا تنام .
– ماطول ما اموت ماعليّ شي .
– واني اكابل نـــهروان اذا صارلك شي ؟
– بـــرهــــوم !!!
كالها وعقد حاجبة
– ماتكليي شبيك وياها ؟
– شبيه ياخي هسه اني حاحجي عليها لو انتَ الي بالغت حيل دباع حالتك جنك مدمن .
غلس عليّ مارد كمل اكله وكام غسل صب جاي اله وراح للهول
باوعت على بــرهـــوم وهمست
– شجاك ويا.
جر حسرة ودنك باس عزيز ونزلنه
– روح غسل بابا .
ركض عزيز يغسل وهو باوعلي
– شسوي بـــراء احنه شغلنه مو حي الله وهو عوطفه راح تحكمه غير انتبه عليّ
اخسر صاحبي واخوية علمود مرة عرفها قبل كم شهر بربج ؟
– بس هو يريدها .
– ادورها ويا معايفه اني بس اريده يشد نفسه شوية .
كالها وكام يغسل وصب جاي اله ولحك تُــــراث، تنهدت وكمت
عزلت المطبخ ورحت وراهم للهول كعدنه هناك وهم كلمن ملتهي بشغله
وتُــــراث يدخن ويشرب جاي وصافن ولا يباوع على احد
” نـــــــهروان ”
شهكت من البردوه الي اجتني فتحت عيوني بسرعة فازة
رفعت
راسي واشوفها بنية اكبر مني لابسه بنطرون اسود وستره سوده وجوها قميص
ومشلحتهن اثنينهن، اشرتلي بأيدها ونترت
– كوومي بسررعة .
طفرت خايفه واباوع عليها وهي فاتحه عيونه تخزرني وعيونه كبار وهي سمرة
ومعانيها خشنه واضحه، جرتني من ايدي وفتحت باب الغرفه تسحل بيه
– ويييننن مااخذتنيييي وين !!
التفتت خزرتني وصاحت
– تسكتين لوو افررغ نخزن براااسج !!
فتحت عيوني بسرعة اني نــــهروان بنية مثلج تصيح بوجهي ؟ وسفه
جريت ايدي منها حيل وكفت وهي فتحت عيونه خزرتني والتفت عليّ
– ولج !
– لسااانج اكصه اذا تصيحين بوجهيي احترمنيي نفسجج يااصخله .
– هااي علية ؟؟؟
كالتها واجت بأتجاهي صفكتني راجدي رجعتلها الراجدي وهي تخبلت
لزمتني من شعري وكامت تصفك بية راجديات روحي اشتعلت
دفرته على رجلها هدت شعري ورجعت ليورة فاتحه عينها وخازرتني
رجعت تركض وراي تريد تضربني ركضت من الممر وهي تركض وراي
تريد تلزمني نزلت اركض من الطوابق وهي وراي وتصيح
– تعاااييي ولج!
نزلت اركض بكل سرعتي واصرخ وهي وراي ماحسيت غير انلطمت بأحد
وقبل لا اوخر حضني حيل وعصرني بحضنه رفعت راسي بسرعة
وانصدمت من شفته !!
يتبع …
الفصل التالي اضغط هنا
يتبع.. (رواية تراث النهروان) اضغط على اسم الرواية لتجد الفهرس كاملاً بجميع الفصول.