رواية تراث النهروان – الفصل السابع عشر
وكفت يمه وقبل لا اوقع كتله
– سيدي بس سؤال ؟
– تفضلي ؟
– اني مو اشتكيت عليهم عــمار شلون طلع ؟
– بكفاله وقع عدم التعرض الج .
هزيت راسي وقعت
غـيد – سيدي واريد من الكل يوقعون على هاي الورقه .
– اكيد بدون شك .
– شكرًا مرة ثانية .
– واجبي هذا .
ابتسمت بأمتنان وطلعت ويا طلعتي من المركز صادفني بـــارون
جان جاي لهنا ومورث من العصبية من شافني خزرني بسرعة
كزز على سنونه بعصبية واشر على السيارة
– اصعدي بسرعة .
– بس..
– اصعدييي .
بلعت ريكي وهزيت راسي بــ اي افتريت صعدت بالسيارة وهو صعد بالصدر
نزلنه ابو السيارة باب بيتنه طبيت وهو وكف يحاسبة
اتلكتني ماما
– تنازلتيي مووو ؟؟
– اي .
طب بــارون من برة باوع على ماما وكاللها
– ممكن اخذ غيد على انفراد شوية ؟
باوعتلي ماما ورجعت باوعتله هزت راسها بـ اي
بـــارون – تعالي بالحديقة غيد .
طلع كدامي باوعتلي ماما ما مرتاحه طلعت برة ورا لكيته مورث
جكارة واكف يدخنها وروحه طالعه من شافني اجه بأتجاهي وهمس بعصبية
بـــارون – اني مو بعينج ؟
– شبيك بــارون!
– جاوبيني غيد اني بعينج لو لا ؟
– بــارون .
– ليش غيد ليش ما حاسبتلي حساب شلون عــمار جاي لهنا ومهددج
وفوك هذا رايحة للمركز وحدج وحتى بدون ما تبلغيني !!
غــيد – والله ما خطر بالي من العصبية طلعت بسرعة ورحت
وماما ضلت تلح عليّ حتى اروح .
بـــارون – مع هذا لو كايلتلي غيد ، شوفي اتمنى ما تضوجين مني
صدكي مجاي افرض روحي عليج ولا اجبرج ولا امن عليج بالكعده عندي
بس انتِ مسؤليتي بدون ما تحجين احسج انتِ ومريم وامج مسؤليتي
يمكن من كلامنه من هذاك اليوم ضجتي مني بس صدكي مو نيتي اضوجج
بس ردت حل مُناسب ويرضيج .
سكتت ماعرفت شنو اجاوبة وهو يحجي محروك كلبة
غيد – ماتنعاد والله .
– اتمنى غيد اتمنى ما تنعاد .
هزيت راسي بـ اي ساكته وهو ترخص وطلع
تنهدت ورجعت للغرفه طبيت البس ملابسي حتى اروح للكلية واتذكر كلامنه الي صار هذاك اليوم
بـــارون – نتزوج ؟
فتحت عيوني اباوعله مصدومه كمت بسرعة مصدومه وهو يباوعلي منتظر ردة فعلي
غــيد – شنوو ؟
– ما اقصد شي غيد بس هذا الحل الوحيد الي يصير الي حق بيج واكدر احاسبهم !!
– ماامجبوور بــارون مامجبور تسوي هيجي علمودي اني اعرف شلون اتصرف وياهم .
– غيد .
– لاا لاا بــــارون مستحيل اقبل بهيجي شي مستحيل .
كلتها وطلعت اركض من البيت
شكد احبه واتمنا اليوم كبل باجر بس مستحيل اخلي زواجنه
نابع عن مصحله مستحيل ما اريد يكون بهاي الطريقة بس حتى
يساعدني ينجبر يتزوجني !! سكتت وبداخلي مقهروه
من عمامي
شلون ينطيهم كلبهم هيجي يسوون بينة!!
اتنهدت ولبست وطلعت اتلكتني مريم طلعنه اني وياها للكلية
من بيت بـــارون اقرب ، وصلنه بسرعة للكلية ، مشينه لمكان
الولد وتجمعاتنه شوية واجوا هٌمام ومصطفى وعبد الرحمن وجواد
واجن نسرين وندى صبحوا كلهم علينه ابتسمنه وردينه عليهم
هُمام – شلوونكم شو الوجوه ما تبشر بالخير ؟
نسرين – الصراحه هومي ؟ اني جوعانه لذلك وجهي ضعفان .
عبد الرحمن – شو حبيبي اشوف وجهج ؟
انطته وجه وهو لزم وجها يتلمس بخدودها وهي كالبه وجها
– لا حبيبي ماضعافان بس امشي للكافتريا ناكل يخسه الجوع .
مصطفى – زين احنه وياكم لو هيجي ؟
– امشي ابو الصوف عيناي كلكم يله .
ضحكنه ومشينه وياهم كعدنه هناك وهو نزل الريوك كله على حسابة
مريم – مصطفىى شنو هااي اووع .
ضحك وغمزلها
– احبها .
هو يحط ثوميه ويا اللفه وهي ما تحبها واذا تشم ريحتها فورًا معتدها تكلب
غــيد – مصطفى هسه تزوع فدوة لا تسوي هيجي .
ضحك مستغرب
– صدك عود لو تشاقين ؟
مريم – والله والله تلعب روحي من ريحتها فدوة سدها .
هز راسه وسدها بسرعة
نسولف ومندمجين والتفتنه كلنه على هُمام من ورث جكارة وهمس
– شمشمون مكانها خالي بهاي اللمة .
تنهدنه كلنه بحسرة وحتى الأكل عفنه نصه ، كمنه للمحاضرات
وكلنه ضايجين ، بدت محاضره ورا محاضرة واخر وحدة جانت
من نصيب استاذ سمير ، كمل محاضرته ومن طلعوا الطلاب اشرلي اجي
رحت يمه
– نعم استاذ ؟
– غيد ماكو شي جديد على نـــهروان ؟
– لا والله استاذ على حط ايدك .
هز راسه مقهورة وهمس
– الله يرجعها بالسلامة .
– امين .
اشرلي روحي ، هزيت راسي وطلعت لكيت هُمام ومصطفى ومريم
واكفين باب الكلية ويسولفون ، مشيت بأتجاهم
امشي
بسرعة واعدل بالكتب ملاتي ، ماحسيت غير انلطمت بأحد
رجعت ليورة
بسرعة رفعت راسي واشوفها الطالبه الجديده هي هم رجعت ليورة على اثر اللطمة
غــيد – اعتذر ماشفتج .
باوعتلها وهي خزرتني بسرعة ونترت بصوت
– عميةةة ؟؟ مداتشوفين كدامج ؟
– كتلج اعتذر لو تحبين تسوين مشاكل ؟
اجوا الولد ركض بأتجاهي ومريم صاحت بيها
– شبيجج ولجج ؟
– مالج دخلل انتِ كُولي لهاي الي ماتشووف تمشي وتلاطم بالناس .
هُمام – حسب ما شفت هي اعتذرت منج ؟ بعد ليش تكبرينها ؟
– طبعاا غصبًا عليها تعتذر بس هي ماا تعرررف انييي منوو!!
باوعلي مصطفى وصاح
– غيدد صدك انتِ شلوون تسوين هيجي تعرفين هاي منو ؟
باوعنه عليّ كلنه مصدومين وهو اشر عليها
– هاي المخترعه الباكلة بالدهن .
ماحسينه غير الكلية تضج بالضحك واحنه كلنه صرنه نضحك
هي وجها صار احمر من العصبية باوعت على مصطفى خزرته
ورفعت اصبعها بوجها رادت تحجي نزلته ودارت وجها بسرعة
وطلعت من الكلية مورثة
باوعت على مصطفى وكلت بضحكه
– ليش حجيت هيجي هسه انوب تضل تتعاير ومالنه خلكها .
– بالحسين اشكها شك شنو بكيفها هي اقدم عليها شكوة يم العميد
وانعل والد والديها .
هُمام – الأول مره اتفق ويا مصطفى .
مريم – عجبتني هاي الباكلة بالدهن .
ضحكنه وتمشينه كلنه نريد نطلع من الكلية وكفنه بالكراج نريد نفترق تونه
ماحسيت غير على صوت احد يصيح ، التفتت واشوف عــمار وســجاد
جايين بأتجاهن اثنينهم ، شهكت بصوت وباوعت على مريم
من شافوني اجوا علينه وسحلونه كدامهم من ادينه !!
” نـــــهروان ”
طفروا ركض صعدوا فوك ونزلوا بسرعة مبدلين وطلعوا وبــرهــوم صاح
– بـــراء اقفلي الباااب ورااانه .
طلعت بــراء قفلت الباب واجت طبت استغربت شعجب ما سألت
او حجت شي عبالك متعوده عليهم كعدت بصفي وعزيز بحضنها
نـــهروان – تعرفين وين راحوا ؟
– لا .
– ماصابج فضول تعرفين ؟
– الصراحه بــرهــوم اذا يريد اعرف اكيد هو راح يكلي بس اذا ما يريد وما يكلي هو
مستحيل اسالة او ادور ورا لان هو لو يريد يكلي فـ تجنبا للمشاكل
ما اسال او ايصيبني فضول أتجاهة .
ضحكت وحجيت متفاجئه
– يماما هاي لو اني تكليني ابحش السالفة بحش .
ابتسمت وهزت راسها
– جنت هيجي بس بعدين صرت ما استفاد شي غير انُ يزعل مني
لان وهو مايريد يورجني على شغله تعلمت على طبعه وصرت
ما اسال ولا اتدخل بشغله مرات هو يتعب فَـ يجي يفضفض يمي
ويسولف الشغلات الي تضوجة بالشغل وهو ارتاح من هاي الناحية .
– مُستحيلل امووت غير يماما غير اطُك واموت .
ضحكت وهزت راسها
– كل البنات هيجي الفضول عدهم يقراه الف خاصه اتجاه الرجال .
– لا موبس الرجال بشكل عام اني .
– لازم تتعلمين تسيطرين على نفسج الفضول مرات يوديج بمشكال مالها حل .
– اخخ هنا كلامج صح شفت شغلات بدافع الفضول لحد هسة من اتذكرها جسمي يرجف .
– الله يعينج .
ضلت هي ساكته واني هم سكتت
شوية وحسيت روحي نعست
نــهروان – بـــراء من رخصتج بس نعست حيل فدوة تكدرين تاخذيني اروح انام ؟
– لا تدللين .
ابتسمت وهي سندتني صعدتني فوك حتى انام طبيت للغرفه وهي كالت
– رايحة اطبب سوكي واخذ عزيز انومه اذا حتاجيتي شي اني بالغرفه الي بصفج .
– ماتقصرين تعبتج .
– فدوة الج حبيبتي .
ابتسمت بأمتنان وهي طلعت وسدت الباب
بس انسدت الباب غطيت وجهي وشهكت ابجي بصوت
مختنكه
روحي تريد تطلع اريد اروح لـ بــارون وسيف ضليت ابجي وتذكرهم
اغمض عيوني واتخيل روحي دا احضن بيهم وهم حاضنيني ويبجون
نــــهروان – بـــارونتي مشتاقتلك والله .
مسحت وجهي ابجي هسه شدايسوي ؟ هم يتذكرني لو نساني ؟
معقولة أيس ارجع ونساني ؟
ماعرف شكد بس هواي بجيت لحد ما غفيت ودموعي تنزل
نايمة واحس بأيد تمشي على وجهي ، شهكت بسرعة وطفرت
جريت نفس من شفته ” تُــــراث ”
نـــهروان – تُـــراث ! شتسوي هنا ؟
– كملت شغلي واجيت بسرعة ، شنو هاي ؟ شبيهن عيونج ؟ وجهج شبي ؟ جنتي تبجين ؟؟
من كالها اتذكرت ليش جنت ابجي هزيت راسي بـ اي وبجيت
استغفر بصوت ومد ايده مسح دموعي
– ليش البجي ؟
– روحي راح تطلع خاف اموت وما شايفة بــارون وسيف .
– اسم الله ، تشوفينهم والله .
– وديني يمهم عليك الله .
– لا تتوسلين شلال وداعتج ما اكدر .
بجيت بصوت وصحت
– ليششش ليششش!!
– العُثمان مالاكج بالغرفه وتخبل سأل عليج كتله شردت وهو مراقب بغداد والمراكز خاف ترحين تشتكين
الخبر الزين الوحيد هو بـــارون مخلي الشرطة تحرس البيت مايكدر يتقرب الهم بس اذا لمحج عابرة سيطرة بغداد يكتلج قبل لا توصلين!!
– شيريدد منيييي!!
– العُثمان شخص يكره اليستسلمون وانتِ وكفتي بوجهه!!!
شهكت بصوت وغطيت وجهي
– الله ياخذه ان شاء الله الله ينتقم منه الله يراويني بي يوم .
– والله الصوج صوجج .
– صوجييي!!!!!
– تررى هو شاايفج بالأمام الكاظم! وضل يراقبج لحد ما عرف بيج طالعة
وكدر ياخذج مناك .
– وهو شلون اخذني كدام ابو السيارة ليش ما سوالة شي ؟
– شيكدر ؟ اقل شي يشتكي عليّ وعُثمان ورا ظهر قوي
بأدينه ورجلينه
نحاول نوصله قبل لا…
سكت ما كمل كلامة
نـــهروان – قبل لا شنو ؟
– قبل لا يخلص الأطفال على ايده الخطف عنده مثل شربة المي!!
– وهذا الظهر القوي شلون ما تعرفونه هو اكيد سانده بشي معين مثل فلوس حماية شي ؟؟
ابتسم على كلامي وهمس
– خوش تجارين بالكلام .
– دا احجي الصدك!!
– واني هم ، شلال سدي السالفة الموضوع اخطر من الي بالج
مايخلص بيوم ويومين .
نــهروان – اخر سؤال ؟
– جواب ؟
– منو حجه وياك بالغرفه هذيج وكتله انطيني مهله بس هاي الفتره .
سكت ورفع تك حاجب
– هيجي فضولية بحيث ما نسيتيها ؟
– دجاوب .
– اشخاص رادوا يسطون على العمارة بس بنتي بيها وخفت عليها
وهسة من اخذتها رادوا يسطون عليها بس عُثمان عرف ورجع من السفر
وغير عمارته بلمح البصر!!
فتحت عيوني مصدومه
– هذا داهية !!
– كتلج الموضوع اخطر من هيج .
– زين زين زين زين .
ضليت اكرر بيها وهو يباوع بعيوني مد ايدة سد حلكي وهمس
– ليش تكررين الكلمة ؟
وخرت ايدة اجر نفس اهدئ روحي
نــهروان – من اتنرفز لو اخاف لو اخجل هيجي يصير بية .
– وهسة ليش صار ؟
– خايفة !!
– افاااا واني موجود ؟
– حيل خايفة تُــــراث ما اعرف شراح يصير ، ماخايفة على روحي
خايفة على بــــارون وســيف ماعندي غيرهم اني .
– واني وين رحت ؟
– تُــــراث .
كلتها وباوعت بعيونه وهو عيونه تفتر على ملامح وجهي
تُــــراث – لا تخافين اني موجود واي شخص يحاول يلمس اظفر من اظافيرج
هاي الـ الله كاتبها عليّ يتحمل الي راح يصير بي.
– بس..
– اسكتي غيري الموضوع لا تفكرين زايد .
هزيت راسي ساكته ابتسم ومد ايدة على خدي
– كومي غسلي شوفي الدموع شلون ناشفه على وجهج .
– راح تروح ؟
– اروح واجي ماكدر اعوفج .
– ليش ؟
– سألت روحي ومالكيت جواب .
سكتت اباوع عليّ كمت على كيفي طبيت للحمام غسلت وطلعت
تُــــراث – شلون صارت رجلج ؟
– لا زينة .
– تكدرين تمشي ؟
– اي اكدر .
مشيت ويا نريد ننزل جوة مجان اكو احد جوة استغربت
– شنو وينهم ؟
– بــرهــوم ضل هناك وبـــراء وعزيز نايمين .
– شعجب .
– ترى انتِ كاعدة من وكت ؟
اتلفتت اباوع على الساعة جانت بـ٨ وربع الصبح باوعتله ورفعت حواجبي
– ترى انتَ كعدتني .
– نعسانه ؟
– لا .
– خلص امشي .
طبينه للمطبخ وهو جر الكرسي
– اكعدي هنا .
كعدت وهو راح فتح باب الثلاجة رفع تك حاجب وارتاج على الباب
– زربـ*ـة .
– عليمن ؟
– ع المايندل دربة .
نـــهروان – هسة شكو شبيك ؟
– مابية شي .
طلع من المطبخ شوية ورجع
– وين رايح ؟
– اجيب ريوك .
– اجي وياك ؟
– شتسوين ؟
– حباب ضوجة .
– امشي .
كمت ويا وهو راسًا جرني من ايدي
تُـــراث – تطلعين هيج ؟
– ترى اني مامجبة ؟
– بالدشداشة ؟؟؟
– لعد شلبس ؟
صعد وشوية ونزل جايب صاية
– البسي هاي فوكاها .
كمت اخذتها لبست الصاية فوكاها لزمني من ايدي وطلعنه برة
نـــهروان – تُــراث .
– ها ؟
– هد ايدي .
– ليش ؟
– عفيه صاير هواي تدوسني والله حرام .
– توج تذكرتي ؟
– من زمان بس شسويلك تكوم كعد تدوس بية والله كلما تلزمني
جسمي يكزبر من اتذكر حرام وانتَ كلساعة دايسني .
جر حسرة وهد ايدي
– ادري بس مو بيدي مجبور .
– مامجبور !
– اساعدج؟
– بدون لمس عفية .
ابتسم وهز راسة
مشينه شوية وكفنه كدام محل طب هو وحدة وشوية وطلع
اشرلي يله مشيت ويا راجعين للبيت بالراس الفرع جان اكو جلاب
تتعارك واحد يكمز على الثاني وينبحن باوعلهم تُــراث وصاح
– لاا تتعاركون اخووة انتوا .
وهن عبالك سمعن كلام تُـــراث ابتعدن وحدة عن الثانية وكعدن بالكاع
باوعتله مصدومه واضحك
– هههههههههههههه هاي شنووو ؟
ضحك على ضحكتي ودار وجهي يكمل مشي وصلنه للبيت
طبينه
حط العلاكة على الميز
تُـــراث – شتحبين اسويلج ريوك ؟
– اكل اي شي عادي .
هز راسة وكف يسوي الريوك واني صافنه عليّ خطواته ونظافته بالطبخ
اي شغله يطبخ بيها يغسلها ويرجعها لمكانها وينظف المكان ورا
كمت اخذت القوري جان مابي جاي
نــهروان – القوري مابي اخدر ؟
هز راسة وأشر بكيفج
وكفت اخدر جاي وهو باوعلي ضحك وكال بصوت يغني
– خـــدري الــجاي خـــدري، خــدري الـــجاي خــدري .
ضحكت وباوعتله وكلت
– عــــيوني المن اخدرة .
– شماالج يبعد الروح دومج مجدرة .
ضحكت بصوت وهو يضحك ويطبخ
نـــهروان – انصحك تشارك بذفويس .
– ههههههههههههههه رحت مره ردت اشارك .
– اي ؟
– وكالولي هاك الف وبعد لا تجي .
كالها وضحك بصوت غصيت من الضحك عليّ وهو يضحك ويقلد
نــهروان – لاا والله صدك صوتك حلوو!
– مو كتلج كلي حلو .
كلبت عيوني وكفت خدرت الجاي ورجعت كعدت على الكرسي
نزلت بــراء من فوك باوعت علينة وضحكت
– صباح الخير .
– صباح النور .
بـــراء – تُـــراث شوكت اجيت ؟
– الصبح حبيبي .
– هاي شنو كاعدين من زمان يعني ؟
– اي والله وانتِ تشخرين .
– لا والله بس نمت متأخرة من ورا عـزيز .
باوعلها بسرعة
– شبي ؟؟؟؟؟
– صخن وكوة نام .
– اخذة للمستشفى ؟؟
– لا صار زين احسن هسه نايم .
سكت ورجع يطبخ وهي غسلت واجت كعدت بصفي
بـــراء – منين جبت البيض ؟ البارحة خلص .
– رحنه اني وشلال جبنا من الأسواق .
– شلال منو ؟
– اقصد نـــهروان .
ضحكت وباوعتلي واني خزرته ولا يبطل
نــهروان – محد يصيحلي بأسمي كلها كالبته .
– منو يعني ؟
– اصدقائي بالكلية لو يختصرونه بـ روان لو شمشمون واخوية يكلي نونه وعمي يكلي نهري هاي يعني من مزاجة زين من يعصب يكلي نــــهروااااااان .
اخر كلمه خشنت صوتي وكلتها اثنينهم ضحكوا عليّ
تُـــراث – شكد خبله هاي ؟
– غير عاشرتك .
بـــراء – راح يتعاركون .
كالتها وطلعت من المطبخ تركض
ضحكنه وباوعنه واحد على الثاني بس بسرعة اجتني لحظة ادراك
دنكت راسي عنه ، كمل هو الأكل حطه على الميز نزلت بــراء شايلة ابنها
حط ايدة تُــراث على كصته يتحسس حراته
– زين ما مصخن .
– اي احسن من البارحة .
جر البصمه واخذ الكوت مالته يلبسة
بـــراء – وين رايح ؟
– راجع .
– لعد ليش اجيت؟
باوعلي ورجع باوعلها
– علمود شغله ، يله اني رايح ديري بالج وعزيز لا تخلينه هيج كل ساعة شوفي لا ينشمر .
– لا اسم الله ماكو شي .
هز راسة وطلع وسد الباب ورا
كعدت بــراء تاكل وتوكل ابنها
بــراء – اكلي حبيبتي ليش صافنه .
– بطني توجعني والله .
كلتها ولزمت بطني وعصرتها بقوة
– خاف جوعانه ؟
– لا مو جوعانه بس اعتقد غير شي .
– الشهرية ؟؟
– يمكن .
كلتها وصفنت صارلها هواي مجايتني شلون ما اجت واني بهذاك المكان ؟؟
فتحت عيوني مصدومة وضليت صافنه ، رجعت بطني اوجعتني بقوة
حطيت راسي على الميز ومغمضة عيوني بقوة
بـــراء – انطيج براسيتول ؟
– اي شي فدوة .
كامت انطتني براسيتول اخذتها وكمت صعدت فوك وهي صعدت وياي
انطتني الألويز وطلعت غيرت ومدتت على الجرباية عاصرة بطني
غطيت راسي ردت بس انام خشبت جسمي خاف اتحرك وهم توجعني
ضليت نايمة بمكاني وبـــراء خطية كل شوية تصعد تشوفني
بـــراء – اجيبلج شي دافي تشربينه ؟
– لا لا ماكدر اخذ اي شي اتقيى .
– تمام اتغطي وادفي زين بالكت تنامين وتهدئ بطنج شوية .
هزيت راسي بـ اي وهي طلعت
غطيت حتى راسي وعاصرة بطني حيل من تجيني اموت الف موته
روحي تطلع من الوجع ، ضليت نايمة ومغطية راسي وحاضنة روحي
لحد ما هدئت شوية وكدرت انام
ماكعدت غير لليل بطني هدئت شوية كمت نزلت جوة لكيت بــراء وعزيز يباوعون بالتلفزيون وياكلون
نـــهروان – مساء الخير .
– هلا حبيبتي مساء النور .
كعدت يمها على التخم
بـــراء – شلون صارت بطنج ؟
– لا احسن .
– جوعانة ؟ اسويلج اكل ؟
– لا والله مااشتهي شي .
– حبيبي لا ريوك ولا غدة ولا عشة ؟ ميصير شوية اكلي .
كامت جابتلي صينية بيها اكلت اكلت شوية وكمت شلتها
وكفت اغسل المواعين
فشلة هي تشتغل واني كاعدة ماطول رجلي صارت احسن
اجت هي للمطبخ تجي ماراضية كوة خليتها تكعد
كعدنه بالهول
وهي شغلت التلفزيون لعزيز على افلام كارتون التفتت عليّ حسيتها
تريد تحجي شي ومترددة
نــهروان – اكو شي بــراء ؟
– اسألج سؤال ؟
– طبعا كولي .
بـــراء – نــهروان انتِ تحبين اخوية ؟؟
عقدت حاجبي مستغربة كلامها
– احبه ؟؟؟؟؟
– اي ؟
– مستحيلل شداتحجين انتِ بـــراء .
– شوفي اهدي بس مجرد سؤال هو .
– اني ما احبه مجرد ساعدته وهو بالماقبل راح يساعدني مابيناتنه اي شي .
– ونتظراتكم ؟
– أيي نظرررة بــراء ؟
سكتت ومسحت على رجلي
– ماكو شي .
دارت وجها على عزيز جريت حسرة ولزمت اديها
– ادري شنو يدور بالج بــراء اعتذر على انفعالي بس انتِ ماتعرفين الي صاير
لذلك حجيتي هيج بس صدكي ما بيناتنه اي شي مجرد تبادل المساعدات .
ابتسمت وهزت راسها
كمت من يمها رجعت فوك مددت بفراشي تغطيت حسيت بطني
اوجعتني حيل عضيت شفتي وعصرتها حيل من كد الوجع الحسيته
ضربت بطني بوكس بقوة من كد الوجع وحضنت روحي حيل وغمضت عيوني
حاولت انام ماكدرت اول مره توجعني هلكد!
مغضمت عسى ولعل اكدر انام حتى يهدئ وصدك نعست وبديت اغفي
توني غفيت وفزيت على صوت فتحة الباب نزلت الغطة من فوك راسي
جان تُــــراث باوعتله مسترغبة هذا شجابة ، باوعلي بنظرة خوف
اجة بأتجاهي حط ايدة على كصتي بسرعة ويحجي
– شبيج ؟؟ بـــراء كالت مالها خلك ونايمة ؟
بلعت ريكي اباوع بعيونة ، وخرت ايدة من كصتي وهو
وكف عدل ورجع دنك عليَ
– شبيج ؟
كعدت عدل وهمست
– بطني توجعني .
– شبيها ؟؟
باوعتله بالله هسة شكله هزيت راسي بـ مابية شي ودنكت
– عليج الدور* ؟
فتحت عيوني بسرعة اباوعله وهو كالها بخوف وقلق
خزرته وضربته على ايدة
– انجببببب .
– شبيج غير جاي احاجيج ، عليج الدور* ؟
– تُــــــررراااث!!!!!!
– دعووفيي الخجلل جاي احجي وياج ؟؟؟
– ماتستحيي .
– كتلج ما استحي ، عليج الدور* ؟
سكتت ودنكت راسي اجر نفس متنرفزه من صلافته
تُــــراث – توقعت راح تجيج هاي الأيام .
– شبيك انتَ ليششش تخلينيييي اغلطط !!
– وجعع لسااانج لاا اكصه جاي اوكلج خر* اكلي وانجبييي .
– لااا تغلطط يلااااا .
– انجبي .
كالها وكعد يمي على الجرباية رفع شعره وكال
– جنت انطيج حب بالأكل ماتخليها تنزل بهذيج الفتره .
فتحت عيوني بسرعة
– شنوو ؟؟؟
– اي شبيج ؟
– يعني..
– شوفي اني خفت لا احد يغتصبج ردتها تجيج بس بهذاك المكان ادري شراح يصير بيج
لذلك صرت احطها الج بالأكل حتى ما تجيج الدورة بهذاك المكان
بس اخر فتره ما حطيتها لان ردت اطلعج .
بلعت ريكي بخوف ودنكت راسي ميته من الخجل شلون يشرح الخايس
مد ايدة رفع راسي بطرف اصبعه اجت عينه بعيني
ماعرف
ليش اتذكرت كلام بـــراء من تكول “ونظراتكم” صرت اباوع بعيونه
واشوف الخوف بيهن أتجاهي ولمعة عيونه من يصفن بوجهي
ميل راسة لا ارديا مليت راسي ويا ابتسم وهمس
– توجعج بطنج ؟
هزيت راسي بـ اي وخرت ايدة من وجهي جر حسرة صرت اركز بملامحه
وبكلامة وبنظراته من يحجي وياي من يباوعلي وياخوفي
يطلع احساسي
اني وبـــراء صدك ساعتها صدك كارثـــــة
باوعلي بقهر وكال
– اخذتي علاج ؟
هزيت راسي بـ اي كام للحمام عبالي راح يغسل نزلت روحي على الجرباية ومددت
شوية وطلع شايل كيس حراري وبي مي
تُـــراث – عوفي الخجل على صفحه خل احطلج هذا راح ترتاحين .
بلعت ريكي واحس وجهي مبوخ من الخجل وهو يتصرف طبيعي بس بقلق
اخذته من عنده طببته جوة الدشداشة ونزلتها عليّ وهو كام
– تنامين ؟
– مانعسانه بس ردت انام من الوجع .
– هسه تصيرين زينة .
هزيت راسي ساكتة وهو كعد كدامي
رفعت راسي اباوعله جان التعب مبين على وجهة
نـــهروان – شبيك ؟
– ميت من التعب .
– ليش ؟
– سويت الطريق من ٤ ساعات لساعتين اروح لعُثمان واجي يمج .
– ليش تُــــراث!!
سكت يباوع بعيوني واني كلبي يريد يطلع عض شفته ورجع روحه مرتاج على الجرباية
تُــــراث – اضحك عليج .
فتحت عيوني خازرته ودفرته
– كبر لفك .
– استغفر الله .
ضليت خازرته وهو جر حسرة طويلة وهو يباوع بعيوني
– اشتعلوا اهلك ابو سرحان .
– والله خبصتني بي منو هذاا ؟؟
اباوعله متنرفزة وهو يضحك يحرك بدمي
– واحد كتلج عزيز علية .
باوعتله وكل نيتي احرك كلبة من كد ما نرفزني
– الله يبعد ابو سرحان عنك .
اشو هذا طكها ضحكه من كد ما قوية غص وكام يكح
ضليت اباوعله مصدومة هذا شبي
نــــهروان – شبيككك شكوو تضحك !!
– ههههههههههههههههه ابو سرحان هذاا مثل ضلي ما يفاركني .
– الله يفرقكم .
– مانفترق كتلج .
– يله يله خوش .
سكت يباوعلي واني كالبة وجهي اشرلي بأيدة
– كومي ننزل جوة واكليلج لكمة .
– ما اشتهي .
– اني اخليج تشتهين كومي .
– ماريد مابية حيل انزل .
كلتها وردت وجهي ماحسيت غير انرفعت من الجرباية صرخت وجلبت بركبته
– شبيكككك انتَ هو هيجج !!
باوع بعيوني وعض شفته
– دخيل محمد .
– نزلنيييي .
– ما انزلج .
– والله بيك حيل تشيل وتفتر ما تتعب ؟؟
نزل ايد وشالني بأيد وحده ضرب على عضلات ايدة بأيدة الثانية وصاح
– قوووووي والقووي الله .
حصرتني الضحكه بس ماضحكت نزلني جوة وبــــراء كاعد توكل بأبنها
من شافته تخوصرت ورفعت تك حاجب
– هااا هم رجلها توجعها وشلتها ؟؟
– انقهرت عليها بطنها توجعها .
يحجي وهو شايلني ويفتر كرصته من ايدة ما تنكرص
– نزلنييييييي .
بــــراء – دا تكلك نزلني نزلهاا .
تُــــراث – وجبح لهل شكول .
كالها ونزلني على التخم كعدت واباوعله كالبة وجهي دفع وجهي بطرف اصبعه للجهه الثانية ونتر
– اطفين هسة والله .
كامت بـــراء جابت ببسي وانطتنه بكلاصات اخذته منها شربت شوية وتُــــراث هم اخذ كلاص
عزيز شرب كلاص وكال
– ماماا بعدد .
نــــهروان – لااا بـــراء لا تنطي بعد مو زين عليّ يصير عنده هشاشة بالعظام .
تُــــراث – هشاشة لو مسدس .
ضحكنه كلنه وهو كالها وعادي حتى ما ضحك دفع وجهي يضحك وباوعلي
خزرته ودرت وجهي وهو باوعلي ورفع تك حاجب
– اجيبلج شي تاكلينه؟
– لاا ماريد .
– ليش ؟؟؟؟
– نفسي تلعب .
– العبي وياها .
استغفرت وبـــراء تضحك بصوت علينه كام جاب صينية من المطبخ
حطها كدامي وبــراء عيونها عليّ وعلى حركاته وهو مامتهم
توترت من نظارتها ومن حركات تُــــراث سوة لفة وحطها بأيدي
كعد وطلع جكارة ورثها وكعد يدخن
بـــراء – لعد بــرهــوم شوكت يرجع ؟
– بعد.
سكتت وهو هم سكت يدخن ويباوعلنه دك تلفونه جر نفس كالب وجهه
فتح خط وصفن شوية حجة بالأيراني، فتح عيونه على وسعهن وصاح بصوت حايف
– بـــررررهـــووووم؟؟؟؟؟
يتبع….
الفصل التالي اضغط هنا
يتبع.. (رواية تراث النهروان) اضغط على اسم الرواية لتجد الفهرس كاملاً بجميع الفصول.