رواية تراث النهروان – الفصل السادس عشر
سكتت تهز براسها بـ اي تمددت على الجربايه وهي بحضني
ضليت امسح على راسها
لحد ما غفت ضليت حاضنتها ونايمة يمها لثاني يوم فزينه على صوت ماما
– يله كومن بنياتي هم يالله .
كعدنه وجوهتنه منفخه من الكتل والنوم وحده تباوع على الثانية ونضحك
ماما – مكتولات ويضحكن الله يعقلجن .
طلعت ماما واحنه كمنه غسلنه وبدلنه حطت غيد شوية مكياج تخفي بي اثار الضرب
طلعنه وماما راحت لـ دوامها واحنه مشينه للـكلية
وصلنه
لكينه الولد مثل كل مرة واكفين باب الكلية واحد منتظر الثاني
رحنه يمهم سلمن عليهم
هُمام – هلاا بوووية اني الوحيد الي ما اريد الجمعه تجي لان ما اشوفكم .
ابتسمنه وهو يضحك ويسولف ويا الولد
بعدنه نسولف واجت بنية سافره حلوة شكره وفاتحه شعرها الأصفر
وناعمه اجت وكف يمنه سلمت وباوعت على هُمام وراحت باسته وهو سلم عليها
– شلونك هُمام .
هُمام – هلا بيج ، شوكت اجيتي ؟
– اليوم اول يوم .
– نورتي الكلية .
ابتسمت ولوحت بأديها بـ باي وراحت
التفتنه كلنه عليّ وجواد راد يحجي وسكت
مريم – منو هاي الصاكة هُمام ؟؟؟
ضحك ورث جكارته
– هاي طالبة جانت وياي بالكلية القديمه وهسة انقلت لـ هاي من درت بية هنا .
جــواد – الف رحمة على اهلج مريم ردت اكله منو هاي الصاكه ومن شفتها باسته كلت هاي خاف تطلع اخته شو مدري من كرايبة وسكتت .
ضحكوا الولد وهُمام كال
– لا بس هي من انقلت لهنا هي لازم تجي .
مريم – خاف تحبك ؟
– لا لا غيرره هاي .
– تغار من رجال شنو من غيره هاي ؟
– شوفي مو هي اني ما اروح لـ كلية شلون ماجان وهي تكول ماطول هُمام بيها وطول اكيد خوش كلية .
– اها وصلت .
جــواد – اروح ؟
عبد الرحمن – وين ترروح ؟؟
– اجرب حظي .
هُمام – مدللة هاي ماتفيدك .
– واني هم مدلل .
مصطفى – ياخي ليش تفشل روحك .
جــواد – هسه دخلوونه نجررب شبيكم سديتوها بوجهيي .
راح تمشى وكف يمها ومانسمع شنو يحجي بس كالبه وجها وتباوعله صفح
رفع تك حاجب ومادري شنو حجه رفعت هي جتفها بمعنى ما اهتم
ابتسم تك خد ومدلها ايدة ورجع حجه رفعت تك حاجب رادت تصافحه
رفع ايده وسوة روحه يمشط بشعرة
احنه متنه من الضحك مصطفى وعبد الرحمن وكعوا على وجهم من الضحك
هُمام غطة وجهه ويضحك بعلوا صوته وهو يباوعلنه ويخزر بينه عود لا تضحكون
واحنه صدك متنه من الضحك
هزت اديها هي وعافته وراحت اجه كالب وجهه
– طاحظك وحظ افكارك السزز.
مصطفى – هههههههههههههههههههه بربك؟ مطي انتَ ليش رحتتتت؟؟
– هو هم صوجي.
هُمام – لا تخاف اني اوتسطلك يمها.
كلب وجهة
– دخل تولي هل …
مصطفى – هوب هوب اهدئ .
ضحكنه وجـواد كالب وجهة راح هُمام والولد هم راحوا
اتفرقته ورحنه كلمن لقاعته
بس خلصن المحاضرات التقينه باب الكلية
سلمنه
مريم – عبود نسرين وين؟ شو صارلي كم يوم مدا اشوفها؟
بس كلتها التفتوا كلهم عليّ بسرعة خايفين
عبد الرحمن – شبيكم ماكو شي ، البارحه حاجيتها مريضة وماكدرت تداوم .
غيد – والله روحي راحت .
مصطفى – ردت اخنك عبود .
مريم – اني ما خوفتني غير نظراتكم .
هُمام – لا يمعودين ان شاء الله ماكو شي .
طلعنه من الكلية بعد ما ودعنه الولد طلعت وغيد وياي
غيد – كلما احجي وياهم يباوعون على وجهي هيجي مبين الأثر ؟
باوعتلها شفتها منفوخه من جوة وجوه عينها مورم وخدها احمر وجها شاحب صاير
– ايي بس ماطول ما غسلوا انتِ هم غلسي .
سكتت تهز براسها
مشينه وعبرنه الفرع الي ياخذه لـ بيت بـــارون باوعت بأتجاهة
جرت حسرة ومشت كدامي ، سرعة مشيتي وصلنه الفرع مالتنه
شهكت من شفت دورية مال شرطة واكفه بابنه وماما لابسه عباتها
واكفه تبجي ومغطية وجها باوعتلي غيد وركضت بسرعة
ركضت وراها
واحس كلبي راح يوكف من الخوف
غــيد – مااامااا شكوووو .
جرنته ماما من اديها وتقدم واحد من الضباط وكف كدامنه
غيد – سيدي ؟ انتَ مو الضابط الي اشتكيت على عمامي يمه ؟
– اي نعم ، بس للأسف الشكوة انكلبت ضدج !
– ليششش وشلوووون ؟؟
– هذا البيت بيتهم وانتوا كاعدين بي مو من حقكم تضلون هنا.
فتحت عيونها بسرعة وباوعت على ماما
– لاا لاا هذاا بيتنه ماما اشترته بأسم ماما مو بيتهم بيتنه هذاا .
الضابط – بس هذا مو كلام أمج هذا البيت بأسمهم وشوفنه السند
هم حاليا بالسجن بس بنفس الوقت نسوانهم اشتكن عليكم
بأنُ ماخذات بيتهم ورجائا فرغوا البيت واطلعوا منه .
غــيد – بسس بس انتَ كلت اااخذج حقج!!
– وأخذته! بس البيت بأسمهم مابدينه شي
احنه نمشي على قانون وأدلة انتِ اشتكيتي عليهم بسبب الأعتاء
وعائلتهم اشتكوا عليكم بسبب البيت .
غــيد – مااماا احجيلجج كلمةةة هذاا مو بيتنهه شوكت صاار بيتهم مااماا .
ماما – مو بتينه هذا غيد البيت بأسم عمج جاسم وسالم .
كامت تصرخ وتصيح بالشارع وتحلف ما تطلع من البيت الضابط
احسه يريد يساعدنه بس مابيدة شي ، طلعت تلفوني واتصلت على
شخص الي يكدر يساعدنه “بــارون” وكفت على صفحه احاجي وغيد تتعارك وياهم
وماما لازمتها ما ترضى تطلع من البيت
بـــارون – الو ؟
– الو بــارون .
– مريم ؟
– اي.
– هلا مريم ..شنو هذا الصياح اليمج مريم صااير شي ؟؟ احجييي ؟؟؟
اني ساكته اباوع على غيد الأنهارت وكعت بالكاع تصرخ وتلطم على رجليها
بــارون – مرررريم شكووو .
– بـــارون عليك الله تعال الدورية واكفه بابنه وتريد تطلعنه من البيت .
– شنوووو ؟؟ اجيتتت مريمم اجيتت .
سد التلفون بسرعة
رجعت التلفون للجنطه وركضت عليها اريد الزمها
غــيد – والله ماااا اطلعع منااا هذااا تعب اميي شلوون انطيهم البيتت
شلووون خدعوووج مااماا شلوون اخذوو البيتت .
وكف شرطي ونتر عليها
– كوميي خلصينيييي وراانه شغلل هواي احنه اطلعن خل يفرفون البيت .
– مااااا اطللععععع مناااااااااااااا .
الضابط – كوومي خوية مايصير هيجي بعلي مايصير .
ماما – بس انطونه صبر شوية فدوة اروحلكم .
تحجي وتكوم بـ غيد وهاي بس تبجي
اجانه صوت بــاون
التفتنه كلنه عليّ باوع علينه وراحت عيونه على غيد فتح عيونه مصدوم
ركض عليها يريد يكومها ورجع وخر ايدة
بــارون – شكووو شصاااايرر هناااا .. خاله شكو ؟؟
ماما – يمه لازم نطلع من البيت لان البيت بأسم عمام غيد ويردون يطلعونه .
– وهذووولة مااعدهم غيرره يشمررون ثلاث نسووان بالشااارع ؟؟
الضابط – تكدر تاخذهم لـ غير مكان لازم نفرغ البيت .
بـــارون – بس البيت بيتهم ؟
– البيت بأسم جاسم وسالم وسند البيت الأصلي شوفونيا
وللأسف هسة يطلعن من البيت
لان اشكتوا عليهم اذا ما طلعن ورفضن لازم نسحبهم للحبس .
فتح عيونه بسرعة وصاح
– لاا لاا هسة يطلعن هسة ، كومي خاله كوومي غيدد .
غيد – وينن نرووح طلعوونه من بيتنه وووووين نرووح .
– بيتي موجوود كوومي غيدد .
– ماا اطلعع منااااا .
كالتها وكامت تشهك
دنك كدامها ودنك راسه عليها وهمس
– كومي وياي غيد وعد ارجعلج البيت .
رفعت راسها تباوع بعيونه
– مايرجع ما يرجعونه ما يرجعوونه .
– ارجعه وعيونج ارجعه اللج بس كومي وياي .
– مااريد اطلع .
دنكت تبجي وتشهك كاموا يصيحون العمال الي واكفين يم الضابط صاح بيهم
– الززززلمة بيكم بعدددد يفتح حلكةةةة .
سكتوا كلهم بسرعة ودنكوا روسهم
بـــارون – وداعت نـــهروان ارجعلج البيت والله يرجع .
باوعتله وعيونها مليانات دموع
دنكت راسها باوعلي وأشر براسة كوميها مسحت دموعي وهزيت راسي بـ اي
كومتها وماما هم كامت تعدل بعباتها عدلت شال غيد وحضنتها وكومتها
بــارون – سيف بالبيت روحن كدامي هسه اجي .
هزيت راسي ومشيت واني لازمة غيد
راح هو وكف يسولف ويا الضابط واحنه رحنه لـ بيتهم
طبينه
للبيت لكينه سيف فارش كتبه وكاعد يقره من شافنه ابتسم وكام
– هلوووو غيدددد .
بجت غيد بصوت وراحت حضنته وهو حضنها حيل
هو يحب غيد حيل لان من صغرها هي تجي لبيت بـــارون علمود نــهروان
ونـــهروان من تجي تجيبه ويانه ويضل يمنه من جان صغير لهذا عمره
هو ويانه ، شاف غيد تبجي باوعلها ومسح دموعها
– ليش تبجين غيد ؟
اذا علمود نـــهروان هي راح ترجع اني جاي ادعيلها .
شهكت ومسحت عيونها
– ادري بيك ادري .
ابتسم وكام للمطبخ ماما مغطيه وجها بعباتها وتبجي وغيد كاعده بالكاع وتبجي
اجه سيف شايل دولكة مي وكلاص صب المي بالكلاص
وانطه لماما
– اشربي خاله .
هزت راسها واخذت الكلاص منه تشرب انطته الكلاص صب ورجع انطه لـ غيد
هزت راسها بـ ما اريد ميل راسة وهمس
– بس شويونه ؟
اخذته منه شربت شوية وانطته اله صب ومده الي اخذته اشرب وهو حط الدولكة بالكاع وكعد على القنفه
دخل بــارون باوع علينه وجر حسرة
بــارون – شصاير خالة ؟ تكدرين تحجيلي اعتبريني ابنج واحجيلي .
هزت راسها ماما وسولفتله الي صار بالتفاصيل وهو دخن من العصبيه
بــــارون – وشنوو بكيفكم يزوجوون البناات لولدهم ؟ هيته هيييي ؟؟ بالعباس اهجم بيتهم عليهم
الطمع لهل دررجه وصل وانتِ خااله شلوون تقبلين تسجلين بيتج وتعبج بأسمه ؟؟
ماما – ولك يمه ياخذهن مني ويحرمني منهن ادري بيهم كلشي يسوون .
– مو بكيفكم هنه مو بنات صغار خاله عبرن السن القانوني يعني قانونا
مستحيل ياخذوهن من عندج بدون موافقتهن!!
سكتت ماما تبجي
لان كلام بـــارون كله صح
ماما – من هددوني ما فكرت بشي ثاني ردت بس اخلص منهم واحافظ على بناتي .
سكت بـــارون يدخن وضايج
ماما – لا تخاف يمه هنه كم يوم واخذهن واطلع .
باوعلها بسرعة مصدوم
– وين تااخذيهن وينن ؟؟
– لعد يمه نضل العمر كله هنا .
– والله تضللين انيي اطلع وانتِ تضلين تاخذيهن شنوو ؟
وين ترحين بنات اثنين
والعباس طلعه ما تطلعين من البيت واني اخذ سيف واكعد بيت أجار اذا ما نكددر نضل هنا
وما اخليج تعتبين عتبة الباب واني موجود .
– بس يمه الى متى ؟
– الله كريم تفرج بيتكم اني ارجعه الكم بس مال تكولين نطلع منا لا هنا نتخارب والله .
مــريــم – وغراضنه .
بـــارون – كتلهم ينقلون الغراض كلهم لهنا ويحطوهن بالأستقبال البره
اخذن التحتاجنه خلنه بالبيت هنا والأثاث والباقي راح ينقلونه كله بغير بيت لحد ما الله يفرجها .
هو يحجي وغيد مدنكه راسها وتبجي سكتاوي
بـــارون – خاله ما تسكتيهاا هااي .
اشر على غيد ماما باوعتله بسرعة
– ترى والله هاي اهانه الي بيتي وتبجن ؟ والله فشله
غيد بوية بس اسكتي واني كتلج البيت يرجع .
– شلووون يررجع شلوون .
– مالج دخل شلوون يرجع بس ارجعه الكم ارجعه لا تخافين
هسه اني طالع للشغل وبس انتن وسيوفي بالبيت البيت بيتكم
خاله الحسين عليج اي شغله تردنيها اني موجود وكولي .
ماما – ماقصرت يمه فدوة لطولك .
ابتسم ودار على سيف خربط شعره وكام طلع بسرعة من البيت
ماما – كومن ماما خل انعزله البيت خطية شوف شلون مهوس .
غــيد – اكعدييي وين تكومين شوفي روحج راح تتخربطين .
مريم – دشووفن وجهنجن اثنينجن راح تتخرطبن اني اكوم .
كمت وسيف كام وياي عزلنه البيت وكنسنه وكامت ماما وغيد ويانه
عزلنه البيت تعزيلة زينه ومسحنه وعطرنه ورجعنه للصاله
لليل
كاعدات كلنه غيد كاعده بالكاع عيونها حمر وصوتها مبحوح من البجي
وكاعد تدرس بـ سيف وماما تسولف ويا خاله بس ماكالتلها على الي صار
لان خاله كاعده ويا عيالها واذا درت راح تخبصنه اله نجي يمها
ومانكدر نروح يمها لان بيتهم صغير وهي ويا عيالها
لليل فات بــــارون ابتسم وباوعله جان شايل علاكة جبيرة
– السلام عليكم .
– وعليكم السلام .
بـــارون – يله مريم كومي حطي هاي بصينيه وجيبيها .
مريم – شنو هاي ؟
– عشة يله كومي .
ماما – ليش كلفت روحك يمه جان كلت النه احنه نسوي .
– يله بس اليوم باجر غيد ومريم يطبخن .
كالها بـ ابتسامه
اخذتهن منه وكمت جانن مشاوي حطيتهن بصينية وديتهن
كعدنه كلنه وغيد ما ترضى تاكل
بـــارون – ليش ما تردين ؟
– ما اشتهي .
– غيد اني شكتلج ؟ مو كتلج يرجع ليش ما تثقين بية ؟
– اني ما اشتهي اكل البيت ماله دخل .
ماما – من البارحه لسه ما ماكله شي اله يصير بيج شي يله ؟ ادني اكلي .
بـــارون – خليها خاله خليها تريد تموت روحها بس ماتعرف شلون .
غيد – والله ما اشتهي .
دنكت ماما ضايجة باوع بــارون على غيد واشر بعيونه على ماما
جرت حسرة وتقربت على الصينية
غيد – يله اكلي راح اكل .
ابتسمت ماما ومسحت على ظهرها كعدنه ناكل بهدوء وسيف يضحك ويسولف ويا بــارون
باوع علينه بــارون وكال
– خاله اعرف ضلتي هنا مو صحيحه وبنات اثنين بالبيت راح اروح اليوم ابات يم واحد من الولد ربعي
والصبح اجيكم .
ماما – مايصير هيجي ياعيني تطلع من البيت بسببنه زدناك هم خاف انتَ عايز .
– مو هيجي والله بالعكس همي يكبر اذا تضلون برة شلون اتسمى زلمه
واني عايف ثلاث نسوان لاحول ولا قوة شنو السالفة .
ابتسمت ماما على كلامة وهو يحجي ويسوي لفات لـ سيف
بـــارون – غيد .
التفتت عليّ غيد وهو كالها
– اكدر احجي وياج؟
هزت راسها بـ اي
– نساومهم ؟
– بشنو ؟
– نطلعهم من السجن مقابل يتنازلون عن البيت ويكتبون تعهد عدم التعرض الجن مره ثانية ؟
ابتسمت بقهر وهزت راسها بـ لا
– ما يقبلون عدهم عادي ينسجنون اهمشي البيت عدهم .
– بس هم حسب ما سمعت عنهم مامعتازين وعدهم خير من الله .
– الطمع هذا لا عبالك كل هذا حلال فلوسهم كلها ربه وحرام .
سكت يستغفر كام غسل ورجع
– اني رايح رقمي يم البنات ويم سيف هم الي تحتاج شغله لا تتردد تتصل عليّ .
هزينه روسنه وهو طلع وسد الباب ورا كامت غيد غسلت الماعين
وطبت بالغرفه الجوه تنام مددت ماما على التخم واني كاعده يمها
حتى دراسة ما اكدر ادرس غراضنه لسه محد جابهم
ثاني يوم الصبح نايمات ونسمع صوت دك على الباب بقوة
طلعنه نركض عبالنه بــارون بس اتفاجئنه من شفنه عمار
ابن عمو جاسم!!
“نـــهروان”
باوعنه عليّ كلنه بخوف وهو فاتح عيونه بصدمه
بـــراء – شكوو شبيك لكوومن ؟؟؟؟
اشرلها اصبري وهو يستمع للتلفون ، باوعت عليّ خايفة
خاف يقصد لكوا بنته!
سكت هو يتسمع للتلفون شوية ووغمض عيونه متأسف
بكت طن هوه من شفته
– خوش خوش ،مثل ما كتلك ، باجر اجيك ، الله وياك .
سده وكعد يفرك براسة
بـــراء – شبيك تُــــراث صاير شي ؟
باوعتله منتظرته يحجي شي
تُــــراث – لا ماكو شي .
هزت راسها وسكتت
باوعتله وباوعت على بـــراء
نــهروان – اريد اروح انام من رخصتج بــراء .
– لا حبيبتي اخذي راحتج .
ابتسمت وهو اجه بسرعة شالني حصرتني الضحكه على شكل بــراء تباوعله بشك
وهو يتسم ويحرك بحواجبة الها
صعدني دخلني للغرفه نزلني على الجرباية ، نزلت الكبوس من راسي
ورجعت راسي على المخده
تُـــراث – بيج شي تحسين بوجع ؟
هزيت راسي بـ لا
نــهروان – قـــمر بيها شي ؟
جر نفس وهز راسة
– مابيها شي ، بس اكو بنية مثل حالتج واصغر منج جنت ضامها
بغير غرفه حتى احافظ عليها .
سكت وبلع ريكة رجع يكمل
– لكوها جماعة العُثمان واغتصبوها .
فتحت عيوني مصدومه حطيت ايدي على حلكي
– لاا لاا .
غطيت وجهي بأيدي وبجيت
جر حسرة هو وطلع جكارة يدخن وكعد على طرف الجرباية
– ليش ليش ما ضميتها بمكان زين ليش !
– ضميتها منهم والله ضميتها بس هم يندلون كل شبر بهاي العمارة شبيدي اني!!
وانتِ لو ما اني ضال وياج ويخافون مني لان العُثمان مايريد يخسرني
جان من زمان مسوين بيج هيج!
شهكت بصدمه وهو هز راسة وشمر جكارتة ورث غيرها
غطيت وجهي ابجي بخنك عليها الله يساعدها
شلون كدرت تتحمل الفكرة
اني متت الف موته بس من تقربوا عليّ وحاولوا يسوونها
لوما تُـراث وبـرهـوم جان اني حالي حالها
باوعتله بسرعة وشهكت
– تُـراث تُـراث والله اني اشكرك هواي لو ما انتَ اني يصير بيه مثلها
والله العظيم اشكرك هواية معروفك ما انسا.
ابتسم بقهر ومسح وجهه
– لا تكولين هيجي هذا واجبي وكل شخص يستغل احد
سواء بنية او حتى رجال وهم لا حول ولا قوة هذولة
مصيرهم على ايدي اني الراح انهيهم وانهي سلالتهم.
– تُـراث انتَ حباب بس ليش تشتغل ويااهم مو اخذت بنتك!
– شلال السالفة مو مثل ما تتوقعين السالفة خطرة واعمق من هيج بهواي!!
سكتت انوب رجعت كتله
– تُـراث، بـــراء تعرف بشغلكم انتَ وبـرهـوم؟؟
– تعرف الي احنه نريدها تعرفه.
– يعني؟
– ماكدر اوضح اكثر.
تُـراث – نامي يله مو نعسانه؟
هزيت راسي بـ اي نزلت روحي على المخده ورفعت الغطه لصدري
باوع عليّ ابتسم ورفع ايده مشاها على وجهي
– خاف اكلج شي وتضوجين.
– على اساس كلش مهتم لمشاعري انتَ.
– حيلل والله.
ضحكت وهزت راسي
– شنو؟
تُـراث – ماحب من تبجين.
– شنو؟
– اكره اشوفج تبجين رغم تصيرين تشكين شك بس ماريد اشوفج تبجين احس احس شي بداخلي يوجع كلبي
واحس بشي حار ينزل على كلبي ويا نزلة دموعج.
باوعتله كوة فاتحه عيوني من النعاس وهو عيونه تتنقل
على ملامح وجهي، عض شفته ومد ايدة كرص خدي
– انوب تسوي هيجي تهيج ابو سرحان علينه.
همست بنعاس
– منو هذا ابو سرحان؟ اني سامعه انو الي اسمه ذيب
يصيحولة ابو سرحان.
ضحك بصوت وصاح
– ايييييييي عفية هو هذا ابو سرحان الذيب مالتي.
فتحت عيوني
– عندك ذيب؟
ضحك بقوة وهز راسة بـ اي و ورث جكارة
– شلوون ذيب هو.
– يماما.
– شوف العيارة عود تخاف .
– لا اني صدك اخاف من الكلاب والذئاب.
– خرب بالكو***.
يحجي وخربان من الضحك غلست ودرت وجهي
– وخر اني كاتلني النعاس وانتَ حاير بـ ابو سرحان.
– خرب روحك ابو سرحان يكلك هسة هو مكيف
لان كلتي اسمه ينعنش.
– تُـراث عفية روح ارييد اناام.
– وابو سرحان؟
– وليييي انتَ وياااا.
– لااه اله الغالييي ابو العيشة هذاا.
– تُـررااااث هئ حبااب اريد اناام روح.
احجي ومغمضة عيوني
سمعت صوت مشيته والباب تنسد بس انسد الباب غمضت عيوني
وغفيت بسرعة بدون ما احس بشي ، ضليت نايمة وما كعدت
غير ثاني يوم شبعانه نوم ، فتحت عيوني وكمت على كيفي
رجلي صارت احسن صح ما اكدر امشي عليها زين
بس
اهون من ما احد يشيلني مشيت اعرج وصلت للحمام
غسلت وطلعت
باوعت على الساعة بـ ٩ الصبح فتحت الباب وطلعت من الغرفه
نزلت مجلبة بالمحجر انزل كوة تكلتني بــراء ضحكت واجت تريد تسندني
– صباح الخير .
– هلا حبيبتي صباح النور ، ليش نزلتي وحدج .
– هههههههه مو تُــراث راح وكلت انزل وحدي .
اجانه صوته من المطبخ يصيح
– موجودددد والله بس حُكم القوووي ع الضعيف .
ضحكنه وهي ضحكت وصاحت
– شبيك ابوو قـــمورةة ؟؟؟
– سلااامتج ام عزييززز .
ضحكت وساعدتني ننزل من وصلت الدرجه الأخيرة الي تصير اعلى من باقي الدرجات
طلع تُـــراث من المطبخ لابس صدرية مال طبخ تخصر وباوع علينه
بـــراء – شبيك ؟
– ديله دشوف شلون راح تنزليها .
ضحكت ونزلت قبلي وحضنتني من خصري حضنت ركبتها اضحك وهي نزلتني
ضحك تُـــراث وغمني
– طيح الله حظج انتِ شكدوتج ياهو اليجي يشيلج .
بـــراء – هههههههه والله ريشة .
ضحكت خجلانه وهي تبتسم وتباوعله شلون هو يباوعلي ويضحك
نــهروان – بعد عوفوني اني اكمل مشي .
ضحك هو واجه وكف كدامي لزم ادية يضحك ويغمز
– تاتي تواتي .
ضحكت من اتذكرته من غناها الي فورا صفنه واحد بوجه الثاني
تُــــراث – لااا مستحيللل .
فتحت عيوني وهزيت راسي بـ اي
– ايي اييي .
– خررب شلووون نسيته .
– راااح امووووت .
– ماا تموتين !!
نصيح وفاتحين عيونه واحد يباوع على الثاني صاحت بينه بــراء
– شكوو شبيكم ؟؟
نـــهروان – الخيااط لسه ماشاايلينه!!
تُـــراث – والله نسيته!!
بــراء – ياا خيااط ؟
– خياط بطنها مال شك تعورت وخيطوها ونسيت اشيله الها!
فتحت عيونها مصدومه
– عززة !
دمعن عيوني وجلبت بأيدة واكفه كوة وارجف
– يماماا .
– لا تخافين هسه اشيله ، بــراء جيبيلي سجينه وجداحه بسرعة .
هي راحت وهو شالني حطني على التخم ومددني
اجت بــراء انطتهن اله
تُـــراث – جيبي غطه اي شي غطيها بي .
هزت راسها وراحت جابت غطة دار وجهه وهي رفعته لحد بطني وغطتني
التفت تُـــراث كعد كدامي وهي لازمة الغطه ومسوية فتحه صغيرونه على كد الخياط
تُـــراث – بالله هسة شلوون اشووف اني شلوون .
بـــراء – تُـــراث .
استغفر وشعل الجداحه جوة السجينه من حمت دنك على بطني
نـــهروان – عليك الله لا تحركني .
– ما احركج .
– بـــراء كبريله الفتحه عليج الله لا يجويني .
– اي بــراء كبريها .
بـــراء – لا مايجويج .
ضل ماعرف شنو يسوي اخر شي شمر السجينه وسحب الخيوط
ما اوجعي هواية جريت نفس وباوعت عليها وبجيت
– شوووف شصااار بطني من ورااك تشووهت .
– ما تشوهت شبيها جنها العافية .
هو كالها وبـــراء غطت بطني بسرعة وباوعتله بطرف عينها
بــراء – لا حبيبتي مابيها شي شعليها اهمشي مابيج شي هسة كم يوم وتنلحم مابيها شي .
هزيت راسي ومديت ادية من جوة الغطه نزلت الدشداشة
وخرت الغطة وكمت
– يعني هسة هاهيّ ؟
– اي هاهيّ .
بـــراء – خل اكعد عزيز هسه اجيكم .
هزينه روسنه وهي كامت صعدت فوك
التفتت على تُـــراث
– مو على اساس تروح اليوم ؟
– اي بس العُثمان مسافر مو هنا .
– يعني ؟
– اني اروح لان هو هناك لازم اضل افتر كدامنه زعم اني السبع المخلص .
– اها وشوكت يجي ؟
– حسب شغله .
– برة البلد ؟
– لا رايح للشمال .
– وبــرهــوم ؟ شيسوي راح لعد ؟
كلب وجهه وخزرني
– وشعليج بــرهــوم انتِ ؟
– غير دا اسأل ؟
– مالج شغل بي ، تثأل .
كالها يقلد عليّ وكلب وجهة بالله هذا صاحي ؟
استغفرت ودرت وجهي كام هو كلب وجهه وطب للمطبخ نزلت بــراء من فوك شايلة عزيز وهو غافي بحضنها
ابتسمت وكتلها
– انطينيا .
حطتها بحضني وهو نايم ضحكت ورفعت شعره عن وجهه شعره طويلة ونازل على كصته
وهو يشبه بــرهــوم نسخه منه ابدا ما يشبه بـــراء مع انوا هي ما تقل جمال عنه
فتح عيونه بحضني ويتثاوب بنعاس
نــهروان – صباح الخير عزيز ؟
– ثباح النور .
ضحكت وجريت حسرة اتذكرت سيف ياماما شكد مشتاقتله روحي رايحة عليّ
ابتسمت بوجهه اعدل شعره وهو ضل مدد بحضني شوية ونزل
– ها وين رايح ؟
– الوح اغثل واجيج .
– تمام .
راح هو يغسل كمت وكفت كوة ورحت للمطبخ اعرج كوه وصلت
طبيت يمهم لكيتهم يفترون اثنينهم بالمطبخ
بــراء – لا تكثر ملح تُـــراث .
– لا ماكثرت بس لا تحجي فوك راسي حتى لا انسه .
– ما حجيت ماحجيت .
نـــهروان – عادي اشارك ؟
باوعوا عليّ اثنينهم ابتسم تُــراث وهز راسة
– هاج ثرمي البصل .
– بطلت ماريد اشارك .
– ثرمي الطماطة ؟
– جيب .
كعدت على الكرسي وهو حطهن كدامي ثرمتهن اله وانطيتهيا
اخذهن وكف مدري شيحمس وبــراء ويا
اجه عزيز كعد بصفي على الكرسي
تُــراث – هلااا بعزيز صباح الخير .
– ثباح النور خالو .
– حبيب خالو.
حطوا الاكل على الميز وكعدوا
بــراء – حبيبتي اذا معجبج الاكل هذا تُـراث مسوي لان حب يبدع بالاكل اليوم.
ابتسمت وباوعتله
– مبين طيب.
ابتسم وغمز لـ بــراء وهي ضحكت
اكلنه وصدك الاكل طيب كملنه وهي لمت الماعين
كمت غسلت وسندني تُـراث رجعني للهول كعدت هناك
نــهروان – تُـراث شوكت ترجعني لبيتنه؟
جر نفس بقوة وباوعلي
– نــهروان والله العظيم ردج ومردودج لبيتج ليش تسألين اول تالي راح ارجعج
بس لا تضلين تكولين شوكت شوكت لو بيدي من اليوم اوديج
بس ادري خطر عليج وعلى بـــارون واخوج صدكيني
حالتي
مثل حالتج واتعس بنتي الصغيرة عايفها بمكان بعيد عني وهي رضيعه!!
وكل هذا حتى احميها واحمي اختي وابن اختي الي جاي يصير مو بيدي
اني احاول بأدية ورجلية حتى اساعدج واساعد نفسي واساعد الي مثل حالتج .
سكتت ماحجيت شحجي وهو يحجي محروك كلبة مبين صدك مو بأيدة
طبت بـــراء شايله تلفونها وتخابر
– صدك ؟ شوكت ؟ ههههههه اي خوش راح احظره ، الله وياك .
تُــــراث – منو ؟
ابتسمت وهمست خجلانه منه
– بــرهــوم راح يجي لهنا ومن ترجع يروح وياك .
رفع تك حاجب
– وهاي الفرحه كلها لـ بــرهــوم ؟
هي سكتت خجلانه بس اني مكدرت اسكت
– لعد غير رجلها تفرح الك قابل .
هي ضحكت وهو باوعلها كالب وجها
– ضحكتيلها هاي السالفة .
نضحك اني وياها وهي وهو كلب وجهه
بـــراء – هسه انتَ ليش ضجت غير تكيف راح يرجع صاحبك ورجل اختك .
– اكيف ليش ما اكيف بس اختي تفرق بيناتنه .
– يمة شمفرقه اني ؟
– اسكتي اسكتي لا تحجيني .
ضحكت وسكتت مثل الأفتهمت على كلامه بس اني مافتهمت ولا طكه
نـــهروان – لا تحجين مشفر مثل اخوج ورجلج صيري مثلي احجي طك بـطك .
ضحك تُـــراث وهز راسة بسرعة
– اييي تعلمج تعلميي صيري مثلها بدون تفاهم كله مكص ولسان .
ضحكت ودنكت راسي وهي تباوع مستغربة
– مكص ولسان ؟ شنو يعني ؟
نـــهروان – ماعليج بي هو يغار لان اريد انصحج .
تُــــراث – دخيلج خليها هيج لا تنصحينها .
باوعتله وكلبت وجهي ضايجة
– اي يله .
بـــراء – هسه غير افتهم شبيكم .
– لا مابينه شي بعد ما انصحج اخوج يخاف عليج مني .
– ياا هاي شبيكم انتوا ؟
سكتت كالبة وجهي وهي راحت للمطبخ بعد ما عجزت احد يحجليها
كام هو كعد كدامي رفع تك حاجب
– شبيج عود كلبتي وجهج ؟
– تُـــراث .
– عيونه ؟
– شاف هاي رجلي التوجعني ؟
– اي ؟
– اذا ما تكوم من يمي اركعك دفرة بيها ارجعك لمكانك .
فتح عيونه بسرعة ولزم اذاني
– شنو شنو ؟
– اوييييي اذاانيي .
– شتسوين ؟
– اركع روحي دفرة .
– لا قبلها شكلتي .
– اوووي مو وياااك اشااقه شبيك اووي اذاني هاي شبيك .
– تدفرين شنو ولج ترى اكصه للسانج والله اذا طولتي مره ثانية .
– اييي يله هد اذااني اووي .
هد اذاني خازرني درت وجهي عنه افرك بيها وهو بس يخزر
اندك الباب صاحت بـــراء
– هذا بــرهــوم رايح افتح الباب .
تُـــــراث – على كيفج لاا تعثررين طاارت طيووررر .
سمعت بس صوت ضحكتها
شوية ودخلوا هي ويا ضحك وراح سلم على تُـــراث وباوعلي
– ان شاء الله مرتاحه هنا ؟
بعدني مجاوبت واجاه الجواب يركض من تُــراث
– ايي ايي مرتاحه اكعد انتَ ارتاح .
نـــهروان – لااا منو كالك ما مرتاحه ، بــرهــوم اذا تريد تروح مره ثانية اخذه وياك .
راد يحجي بــرهــوم هو صاح
– انجبي لج انجبي ، بــرهــوم اخذه وياك بــرهوم .
كالها وكلب وجهه يقلد عليّ
باوعتله بطرف عيني ورفعت اصبعي بوجهه
– لاا تقلد على اساس انتَ شلوونك .
– زين الحمدلله .
– كهكهكهكه .
احنه نتعارك وبــرهــوم وبــراء ميتين ضحك حتى سكتنه من وراهم
تُـــراث – امشي امشي جيبي مي لـ رجلج لا تضحكين انتِ .
بــراء – انطيته بالمطبخ .
بــرهــوم – هسه نــهروان انتِ مامرتاحه بيتي ؟
تُـــراث – بــرهــوم حبيبي كوم ارتاح بغرفتك كوم .
– خل اسألها ؟
– مرتاحه كوم حبيبي كوم .
يحجي ويدفع بي وهذا يضحك تعجبت شلون ميزعلون منه لاعب بيهم طوبة وهم يضحكون
صعد وصاح على بــراء صعدت هي ورا وهو رأسًا خزرني
– بعد لا تضلين تحجين .
– شحاجية بالله ؟
– لا تحجين ويا اسكتي .
– شحااجية؟؟
– اايي مااصخمتي بس بعد لا تصخمين .
– شمصخمه .
– شلال راح اخنكج .
سكتت هذا يسويها صدك نزل بـرهـوم مبدل وابنه يركض ورا وبــراء بالمطبخ
كعدوا هو وتُـــراث وكاموا يحجون أيراني واني اريد الكط كلمة
كلشي ما افتهمت ومبينه بــراء مثل حالي هم ما مفتهمه عليهم
كامت صبتله اكل كعد هو ياكل وعزيز يسولف ويا ويرجع يحجي ويا تُــراث بالأيراني
شوية وصعد تُـــراث ونزل شايل بأيدة القفص الي حاط بي سوكي
ابتسمت من شفته هو شال الغطة عنه بس شالة صاح سوكي
– كلب ابن الكلب .
ضحكت بسرعة وحطيت ايدي على حلكي
تُـــراث – اذا ما تسكت ابيعك وعلي .
سكت وهو طلع برة وتأخر يله طب
عزيز – خالو وين اخذته ؟
– بالحديقة وحطيتله الأكل لا تطلع يمه هذا كـ*** بس يفشر .
نـــهروان – يعني اليفشر هذا كـ*** ؟
فتح عيونه خازرني واني بسرعة حطيت ايدي على حلكي
– يعني اقصد شسمه .
– انتِ تردين تكلبينهاا عليّ بس لصتيهاا اسكتي اسكتي .
– ايي ديله ديله .
– دشووف شووف لساانهاا شطوولة .
بــــراء – هسه شبيكم هو شصار؟
نـــهروان – اني لو هو ؟ واكفي على الكلمة وهو بس يفشر .
فتح عيونه خزرنه ورفع ايدة ينتر بيها
– ولجج تجيبين روحج عليّ؟؟؟ اني رجاال سااقط سرسري كلب ابن كلب افشر تفشررين كدامي لعد ؟
– مافشرررت انييي .
– لاا هذاا ابوووي ابووووي فشررر .
سكتت كالبة وجهي وهو جر جكارة يدخنها ويجر نفس محروك كلبة
بــرهــوم ياكل ومغلس وبـــراء نظراتها تتنقل بيناتنه
كام بــرهـوم
وشال الصينية ويا لحكه عزيز يركض ورا وبـــراء راحت ورا للمطبخ
باوعلي هو وخزرني كلبت عيوني وهو اجه ركض عصر وجهي
– شبيج انتِ لج شبيج ؟
– وخر تُـــراث .
– انعل ابو تُـــراث .
– اي خوش .
– خوش تنعلين ابوية ؟
– وخرر وخررر .
دفعته وكلبت وجهي رفع تك حاجب جريت نفس ودنكت وجهي بوجهه
– تُـــــراث .
باوع بعيوني عض شفته وقرب وجهه عليّ وهمس
– عـــيونة .
– شايف هاي رجلي التوجعني ؟
– اي ؟
– اذا ما تكوم من يمي اركعك دفره ارجعك لمكانك .
بس كملتها لزم وجهي وعصرة حيل ويحجي مكزز على سنونه
– ولج انتِ شنو من بشر لساانج اذا ما اكصه ما ارتاح تدفرين شنووو ولججج ؟
– مو عليكك هدنيي مو عليك .
– ولج بعلي ارجعج لـ عُثمان اثنينكم نفس الخــر* واحد لسانه انكس من الثاني .
– مااا اروح عووفني .
– تسكتين لو شلووون ؟؟
دفعت ايده عن وجهي وصحت
نــــهروان – اي ديله يله .
فتح عيونه وصفك ايد بأيد
– شكتنيييي شكك بهاي اللكلمة عوود شنو تسبيني لو تفشرين عليّ ؟؟
مو شكيتي امي بيها شبيج ؟
– اي ديله .
– الله اكـــــــبر .
– ديله يله يله .
بس كلتها مد ايدة على بطني وعصرها صرخت ولزمت ايده اريد اوخرها
– تعيدينها ؟؟
– ابد والله عووفنيي .
وخر ايدة واني اباوعلة بحقد ، حطيت ايدي على بطني مو اصابع تكول صيخ
عصر بطني عصر ، اجت بـــراء مبينه سمعت حجينه انطت جاي لـ تُــــراث وبرهوم شايل كوبة
كعدوا يشربون
دك تلفون تُــــراث شاله وحجة بالأيراني شوية وسده
تُـــراث – باجر الصبح يردونه .
بــرهــوم – رجع ؟؟
– اي .
– ماطول ؟
– نكس يكملها بسرعه .
هز راسة ساكت وتُـــراث يدخن ويرجع ليورة
شوية وطلعوا هو وبــرهــوم بالحديقة وبـــراء كعدت بصفي تسولف
ابتسمت احب كلامها كله حب وحنيه ومن تحجي تضل مبتسمه
هنيال بــرهــوم عليها حبيتهم سوة حيل حلوين
لليل واحنه على كعدتنه سوت هي العشه وجابته تعشينه وكملنه
وهي جابت الجاي وخلت تُـــراث وبــرهــوم يغسلون المواعين
بـــراء – البنيه ماتكدر تتحرك واني تعبت انتوا تاكلون على الحاضر ساعدونه شوية .
تُــــراث – الله يساعدك همزين ما اجي يومية .
ضحك بــرهــوم وباوعلها مبتسم
– مثل العسل على كلبي والله .
صفكه تُـــراث على ظهره وسحله للمطبخ
– امشيي اغسل الماااعين كلهن وحدك يله اريد اوكلك وحل مو عسلللل .
وبــرهــوم يضحك
يضحك!!!!! شلون ما يزعل منه شكت مستفزه تصرفاته يماما
يخنك يخنك مادري شلون متحملينه وبــرهـــوم احسه يكيف
من يحجي ويا حتلوا يغلط اهمشي تُــراث يحجي ويا ويضحكون
طبوا للهول مددوا على التخم وعزيز اخذ تلفون ابو وكعد يلعب بي
واني كاعده بمكاني لو اكوم افتر شوية علمود رجلي وبعدين ارجع اكعد
بــرهــوم – بـــراء ما تكومين تجيبيلنه شغلات نمزمز بيهن .
فتحت عيونها بـــراء وصاحت
– تمزمز شنوووو ؟؟؟؟ عزززززه .
باوعلها بسرعة وكعد عدل تُـــراث ضحك بصوت وكاله
– خلص روحك .
بـــراء – بـــرهــوم تشررررب ؟؟ نمزمز شنووو ؟ تريد مززه بـــرهــوم؟؟؟؟
التفت تُــراث خازره
– تشرب ولك بــرهــوم ؟
سودونوا وهو حاير شيحجي
– لاااا ولج والله مو اشرب شبي هاي الحاجات الناكلها بليل حتى نسيتيناهاا شجااج .
نـــهروان – قصدك نمنميات ؟
– ايييييييي الف رحمة على والديج نمنميات قصدي مو مزة شبيجج .
بــــراء – لعد منين ساامعهاااا ؟
راد يحجي رجعت خزرها وباوعلها بشك
– وشمدريج انتِ بالمزة ؟
– من المسلسلات يعني منين ؟
تُـــراث – فوك شينك تتهم اختي ؟؟ كومي بــراء لمي غراضج خل نطلع .
– كوم خوية .
اشو هذولة تحاضنوا وكاموا يردون يطلعون من الهول
بــرهــوم – هاي شبيك تُــراث استر علية .
ضحك وهي تضحك ورجعوا كعدوا بالله هذولة صاحين ؟
اني صافنه عليهم وساكته
حطت بـــراء حب وحبشكلات كدامنه مديت ايدي اريد اخذ صاح تُـــراث
– سنكرررر لاااا تسرررررق .
ضحكوا واني ضحكت جان يباوع ويا عزيز بالتلفون مطلعين دورا
كاعدين هم يسولفون سوة واني وبـــراء سوة دك تلفون تُــراث
باوعله طفر بسرعة يجاوب
– هاا ؟ مستحيلللل شجاي تحجيي انتَ ، مانلحك !!
صفن يتسمع سد التلفون وصاح على بـرهـوم يكوم وبــرهــوم كاله بقلق
– شصاير !!
– رجععع بدووون ماا ندرري اذا ما لكاانه كلشي ينكلب ضدنااا امشييي .
يتبع…
الفصل التالي اضغط هنا
يتبع.. (رواية تراث النهروان) اضغط على اسم الرواية لتجد الفهرس كاملاً بجميع الفصول.