رواية الموروث نصل حاد – الفصل التاسع والأربعون
♛ 49 ♛
دفعت ايده وسحبت علبة الكلينكس چبيرة
رگعتها براسه وهو بثانية من التهور شال
المسدس وبطرف الشاجور رگعني براسي
من قوة ضربته فقدت وگعت وبخاخ صار
ينرش على وجهي يحرگ بعيوني ويثگل
بعقلي الى ان فقدت كل وعيي وتفكيري .
وعيت وبعيوني ظلام من الوصلة المربوطة بعيني
والأصوات من الخوف اسمعها بوضوح قريب
صوت السيارات ، تسجيل سماعات ابو مخصر
ومن بعيد يدوي صوت اهل السمج اني وين ياربي
حسيت رفعني بين ايده البارده وفوتني على بيت
من بداية دخلتي كفختني ريحة قديمة غريبة تسطر
الراس ، صگ جسمي من ذبني على فراش بالگاع
وجر ايدي يريد يربطها بزنجيل دفرته برجلي على گلبه بكل قوتي .
ما يحچي ولا يضرب ولا تظهر على وجهه ملامح
عبالك يمشي وهوَ نايم مو بعقله ، لزم ايدي قوي
_ عوفني الله لا يوفقك انتَ وين جايبني ولك
انتَ مخبل والله وارث يموتك يرتكب بيك جريمة
رجعني هسة ترجعني للبيت الله لا ينطيك العافية .
مرد جسمي برجله حتى يثبتني وما اگدر اقاوم
وربطها ايدي بكل قوته ونزل على رجلي قاتلت
رفست بكل حيلي وملابسي من ارفس تنرفع
ما گدرت اكثر اقاوم خجلت من روحي ربطها
وبقيت على طول ما يلف بيها ويحكم القفل اتوسل
_ احلفك بالله لا تغلط بعد ويايَّ ، امانة الله ورسولة
استرني غطي جسمي لا تكسرني والله تعبت بحياتي
لا تزيدها بعدني ما نسيت تعذيبك ألي اول مرة .
وهوَ مركز يربط رجلي لا يباع عليَّ ولا احس يسمعني
بس عيونه مشبعه شر داميه بلون احمر متقلصه
كمل وجر ملابسي نزلها وذب العبايه على جسمي
وطلع من الغرفة تلفونه يرن على طول ما يربط بيه
عاف الباب مفتوح نمت على مخده اصرخ بكل
ما عندي حيل وقوة وصوت صرخت والدوخة
من الضربة والبخاخ بعدها براسي ودموعي
ما نشفت ولا ثانية ، لمحته من بعيد يخابر
يهز راسه بـ اي ويفتر يرفع بشعره ويجره قوي
سد الخط شمر التلفون على ميز وظل صافن
على تلفون اكثر من خمس دقايق خلسني خلس .
صرخت استنجد بأمي ، وصحت بأسم وارث
انبح صوتي وهوَ بكل تأني يمشي ودخل على
غرفة وجر البردة ما فتحها وگعها هيَّ والبوري
مالتها سديت عيوني قوي من ضرب على حديد
الشباك وبخفة صوته جردني من كل أماي اخلص منه
شهاب : مزرعة متروكة حتى حيوانات مابيها تسمعچ
وفري تعبچ وصوتچ وحيلچ بغير وقت لا تستعجلين .
حركت جسمي قوي اضرب براسي بالحايط واصرخ
_ اريد اهلي الله لا ينطيك شمسويتلك تعبتني
عوفني خبلتني عوفني شنو تريد مني موتتني
والله تعبت ولك والله تعبت خايفة والله خايفة .
رفع شعره قوي واجه عليَّ جر الشال وسحب القراصة
كسرها بين ايده طگها وفر شعري بين ايده وسحبه
سحبه حسيت قبغ انجر ويه ايده من الوجع
صرخت صرخه بلعومي تشگگ منه وهوَ غمض
عيونه براحه وابتسم بكل حقاره مرتوي بأذيتي
كتمت صوتي من عاف شعري وبجساره نطق
_ مـا مصدگ انتِ گدامي والله .
جريت ايدي وهي مربوطه قبضتها حيل وضربته
بوكس على حلگه وبقيت ارافس اصرخ واستغيث
_ دخيلك ربي انتَ مريض مو بعقلك مخبل والله
يمههههه لحگيلي واررررررررث تعال وارث
ابوس ايدكم تعالوا خلصوني لا تعوووفوني يمههه .
غطيت راسي بيدي بس قبض ايده يريد يضربني
رگع الحايط القريب من راسي بكل بوكس تهفني
هواها من قوته نكث تراب قوي ونهض من مكانه
مو حاس حتى بوجع مثل الجماد يتحرك مسير
جر البوري من الگاع گلت متت والله متت اذا يضربني
وكف گدامي يرگع الحايط بي وشمره بعيد يهدد
_ اذا تجيبين اسم هذا المنبوذ بعد
اكسر البوري على راسچ حذرتچ
هل مرة مرة ثانية انفذها الشاهد الله .
ملخت شعري تملخ گطعت صوتي بصريخي
وهوَ طلع برا المكان كله وقفل الباب البرا اباع
عليه من الشباك يمشي بعيد من المزرعة والتلفون
بيده يخابر يهدي بخطواته ويرجع يصير اعصاب
ويدفر بالزرع ويحرك ايده قوي مو طبيعي والله
مو طبيعي ما احس عقله براسه يفتر بلا عقل يتصرف
لو بعقله ما يورط روحه هل ورطه ويجيبني هنااا
انسطرت من وجع راسي ضرب عيني نمت واني
اشهگ بأسم وإرث استنجدت منتظره يخلصني .
صحيت والدنيا ليل هواها ساكن بس كاسره
صوت نحيب عالي وبچي بصوت زلمة من برا
الغرفة ينوح مثل المذبوح ويختنگ يگح
ويرجع يون وينحب يصرخ آخ خوية بيرغ
على صوت نحيبه بچيت خايفة .
من سمع شهگتي سكن صوته سكن الى درجة
حتى انفاسه بعد ما اسمعها وحتى حركة
ما تحرك ، گعدت اجر بيدي قوي من الزنجيل
فات على غرفة استند على مسند الباب مكتف
ايده وداير ما داير عيونه سوده صايرة شعره
مبعثر وايده صايرة زرگه من الضرب على حايط
مورمات ، من شافني اباع عليهن قبضها حيل
ورجعها وره ظهره وبخشونة صوته سألني
_ تروحين للحمام .
_ رجعني الله يخليك شهاب اني زوجة اخوك
خاف الله بيه ليش تكسرني ليش ادخلوني بمشاكلكم .
_ صعبة ما اكدر .
اجه يمي فتح ايدي ورجلي وبكثر ما نايمة نفس
النومة رجلي ما تتحرك ما احس بيها وايدي
ثگلانه ، جرني من عباتي وگعت مني نزل اخذها
لفني بيها وسحبني غصب اخط برجلي شمرني
بالحمام وقفل الباب عليَّ وقبل لا يروح نبهني
_ خمس دقايق الچ وافتح الباب ارجعچ .
_ والله اذا يلزمك وارث يموووتك .
قفله تلفتت على حمام قديم وگدامي مرايا عكست
صورتي وجهي بيوم واحد تجردت منه الحياة
وذبل وعيوني منفوخه من البچي تحرگني
فتحت الماي غسلت وجهي واشهگ ما وگفت
نحيب على حالي ، فتح الباب شافني الفلف
بروحي بعباتي متضايقة من حالتي وملابسي
دار وجهه مني وجرني رجعني المكاني
مُـرجانـة : شنو تستفاد جبتني هنا ليش خربت
حياتك امك دمرتك انتَ ليش تسمع الها اصحى
الله يخليك اتوسل بيك رجعني قبل لا تكبر
واني ما اجيب اسمك ابد بس رجعني .
تجاهل كلامي ودفعني وگعني على دوشك
ورجع يربط بيدي ورجعلي بس كمل طلع
بقيت الوب بمكاني طلع الفجر وهوَ ماكو
عافني وحدي اتعذب من وجع ايدي وجسمي
غفيت ماعندي حل ومصدومة وارث وين ليش
الهذا الوكت ما لگاني ولا سمعت خبر شصاير
دخيلك ربي ساعدني ماعندي غيرك ربي ارحم حالي .
فزيت من حسيت ايده تفتح ايدي والشمس عالية
بعيوني ، طبگ الباب وطلع شفت ملابس بصفي
جريتها وفتحت العلاگة سريع اخذت تراك ولبسته
بأيد ترعش وعيني على باب لا يفوت ، جريت العباية
وهم لفيت روحي بيها ومسحت وجهي وعيوني
من فات اريد اشوف جرني من ايدي وطلعني برا
بنصّ المزرعة خضار بخضار ماكو ولا بيت قريب
ولا اكو شارع تخوف اتلفت بالغربة بوسط مجهول
شهاب : شعرفتي على وارث واختاريتي .
_ احسن منك .
_ بشنو ؟
_ زلمة ما بيوم مد ايده ضربني
بعمرك ما راح تصير مثله تروحله فدوة .
هز راسه اي وسحب الباكيت مال الجگاير
ورث جگارة وسحب منها نفس وذبه
شهاب : قبل لا تتزوجي جنت مستعد اسوي
كلشي حتى تسامحيني لأن اذبتچ .
_ اسامحك بس رجعني .
_ اتمنى يرجع الزمن مُـرجانـة وأصحح ذنبي .
لميت جسمي بعباتي وسحبت نفسي ابعد منه
وبصوت هلكان جر نفس ثاني وكمل
_ بس بعد ماكو شي يتصلح الصار صار
وبلأخير سواني اني المنبوذ المحتقر بينهم .
شمر الجگارة ولزمني قوي من ايدي ذبني بالغرفة
شهاب : غصباً عليهم يرجعون تعبي ساجر الچلب
سنين يضحك عليَّ ويوهمني اني ابنه الچبير
المعتمد عليه وعافني اخدمه وابني مستقبل ولده
شمر ولي العهد وارث عند خاله حتى يدرس وياخذ
عدالة خاله وتربيته وما يصير مثله خبيث ومثل
اخوانا الحيوانات كلهم غدارين كلهم غدروني
بيوم وليلة سحب السلطة مني وسلم تعبي الوارث
عافنا خدم يتأمر ويستعطف علينا كل اخر شهر براتب .
مُـرجانـة : انتَ عندك حق بس حقود ما فكرت مثل اخوك بيرغ .
شهاب : قصدچ ما قبلت اصير خدام وفي مثل اخوي
بيرغ ، ما قبلتها على نفسي لأن انا اشرفت على بناء
كل المصانع اللي يتنعم بخيرهن وارث ، اني جنت ما انام
ولا ارتاح ولا اسافر ولا ملتفت الحياتي حتى اكملهن
شغل الأراضي ويه ساجر ، انا جنت عايش بوهم
هذا ابوية ومحترمني لأن انا چبيرهم چان يضحك عليَّ
اخذ تعبي وارررث وتريدون اخدمههههه جنت مالك كلشي
وبعد كل هذا اصير خدام اخدمه حتى يمسح على راسي .
مُـرجانـة : وارث مو مثل تفكيرك امك حشت براسك
فكره غلط عليَّ والله هوَ يحب اخوانه ومخليهم بعيونه
هوَ تعبان حتى اخوانا يستقرون بحياتهم وبيرغ مو
خدام بالعكس هوَ اللي كلمته تمشي وارث ميسوي
شي اذا مو بموافقته ويحترمه والله العظيم يحبكم .
ضحك وجر الكرسي گعد وشغل جگاره
_ والله انتِ عقلچ مغسول وعايشة بوهم
ترا وارث شاطر بلعب مثل ابو مثل الذيب غدار هذا .
دفر الكرسي واقترب مني حشرني بالحايط وصاح
_ زهرة حامل من وارث يا غبية وانتِ ابقي عيونچ
معميه سديها لا تشوفين حقيقتهم مثلي خلي
يضحك عليچ ومعيشچ بأكبر وهم ، مثل ابو نسخة
يعدد بالنسوان وما يخلي وحده تعرف بالثانية
يصدمكم بعدين صدمات عمركم يكفخكم كفخ .
لزمني مغص ببطني وراسي افتر صفنت بوجهه
ضايعة دقايق وعقلي مشوش ، هزيت راسي
وبقهر وبنبرة استنكر كلامه بيها صحت
_ انتَ فد واحد مريض وجذاب ويمكن حقك
من تربية ساجر وامك اثنينهم لعبوا عليك
اني واثقة بوارث وادري بي يحبني وما راح
يعيد غلطات ابو ، اللي عاشه وارث بطفولته ما يعيده .
هز راسه وطلع ورقه وشمرها بحضني
_ تعرفين تقرين ؟
باوعت عليها اخذتها بيدي ما فهمت عليها
هزيت راسي لا وهوَ ثنه رجله وگعد مقابيلي
طلع تلفونه واخذ صوره للورقة گدامي وترجمها
_ فحص DNA لغريب وحمامة اطفال الواثقة
بيّ يحبچ وارثكم اللي مايعيد اخطاء ابو ضحك
عليكم هوَ وزهرته حتى يعيشوكم بوهم هل اطفال
على اساس اخونا من اخت زهرة اللي عايشة بالخارج
سبحان الله وفجأة قررت ترجع للعراق يا ترى ليش رجعت
ما سألتي نفسچ ليش اختها رجعت وهددته وهددت
اختها مقابيلكم وهزهزت صورته ؟
صفنت بالگاع وتذكرت بذاك اليوم شلون صار وجه
وارث اصفر ، ونرسمت عيونه من يخزر بزهرة
وزهرة بوقتها جانت خايفة وترجف وتحاول
تسكت أختها وكل شوية تتوسل بيها تفوت وياها بغرفة
شهاب : شغلي عقلچ لا تخلي يضحك عليچ مثل
ما ابو ضحك علينا ، ومثل ما وارث لعب على ساجر
واخذ كل املاكه واملاك ولده وسجلهن بأسمه
غريب وحمامة اطفال وارث من زهرة وهيَّ ما مربيتهم
زهرة امهم مووو خالتهم وچان عايش وياها بنفس
البيت اللي عازل بي زهرة على كل اخوانه لأن يخاف
عليها وعلى اطفاله وامه النغله تعرف والدليل تعلقها
بيهم تعرفهم احفادها مو اخوانه هذولي اطفاله .
انقبض گلبي والأفكار تعمقت بعقلي واستذكرت
غرفته بالبيت اللي عايشة بي زهرة والأطفال
چان غرفة بيها ملابسة واحتياجاته واكو غرفة
للأطفآل وماكو غرفة ثانية لزهرة ، معقولة زهرة
تنام بالصالة وهوَ ماكو غير هل غرفتين !
ضعت لدرجة ما عرف بعد شلون اجر النفس
شهاب : معقولة ما فكرتي بيوم ليش ام وارث
النغله ليش مستقتله على زهرة وما تنطي بيها !
رفعت ايدي سديت اذني وهوَ ما بطل
_ لا تسدين اذنچ على حقيقتهم كشفيهم
قبل لا تضيعين مثلي وتخسرين نفسچ
تحبها لأن ام احفادها وعدهم غاية يريدون
يوصلون الها ، وانتِ جنتي وسيلة استخدمچ
وارث بحجة اني حبيت بنية واستقتلت عليها
وتزوجتها وماعندي غيرها حتى يضحك على
اخوانا هل جهال اخوانهم مو اطفاله وياخذون
وياه حصه بالورث اللي غصباً عليه وعلى اهله
لازم يجي يوم ويوزعه لأن بيرغ وهمام ينعلون
والدي والدي اذا ما سلمهم حقهم .
مُـرجانـة : كافي بعد ما اريد اسمع اسكت .
شهاب : صدگي ما يحبچ اخذچ من شافني اريدچ
تذكري هوَ قبلها ما چان يريدچ ، وزهرة صابرة
ومرات من غيرتها تفضح روحها بتصرفاتها
تتذكرين امه قبل لا تتزوجي اول ما دخلتي بيتهم
وشرطت عليچ توقعين على ورقة حتى ابنها يتزوجچ
ما فكرتي بيها بيوم ليش هيچ سوت ؟
دفعته من صدره وگفت على حيلي اصرخ
_ كااافي ما اريد اسمع افهم ما اريد اسمعك .
_ غصباً عليچ تسمعيني اذا تعرفين الحقيقة
انا ارتاح ، الورقة حتى تتنازلين على حقّ ابوچ
بالأراضي وهم من تخلص لعبتها هيَّ وابنها
ويسافر هوَ وزهرة وجهالهم ما ألچ اي حق عنده
انتِ بس اطار يخفي بي وارث لعباته .
جر ايدي يثبتني بمكاني وكمل
_ اخت زهرة من رجعت ردت حتى تفضحهم
لأن چان وارث متفق وياها تگول متزوجة ساجر
بالسر وهذولي اطفالهم وسكتوها بالفلوس
واجت فترة استاذ وارث ملتهي ونساها
ومن زهرة بلغته اختها تهدد بيها دزلها
فلوس بس حنين طمعت وگالت اجي البغداد
اسحب منهم اكثر ليش بس اختي معيشها
بنعيم ، بس انتِ غبية ما فكرتي وين الأطفال
هسة شلون رجعهم لزهرة وهوَ عنده مشاكل
وياهن ، وليش حنين بعد ما رجعت عليكم وسوت مشاكل ؟
مُـرجانـة : جذاب جذاب انتَ جذاب وارث مايسويها
وارث يحبني ما يجذب انتَ وامك تكرهونه ما اصدگ .
_ زهرة ما تگدر تعيش بعيد على اطفالها
ولا هوَ يأمن احد يربي اطفاله غير زهرته
واختها سكتتها وسفرتها من وارث سجل
بأسمها قطعة ارض بالعراق استقرت شبعها
وسفرها وهوَ وزهرة كملوا لعباتهم .
رجعني على فراش يزنجل بيدي ورجلي
واني عقلي فاصل حتى ما منعته بقيت
استمع لكلامه واحس بي يكفخني راشديات
على وجهي ويه كل كلمه ينطق بيها
شهاب : وللعلم وارث مو بس يحب زهرة يعشقها
ومن سنين من ايام الحامعة وجابها من محافظتها
للغربية ما يتحمل يعيش بدونها ، وهاي من يسوي
روحه مشغول وعنده مشاكل وما يگدر يگعد بالبيت
جذاب زهرته ما تقبل يعوفها ، وكل ليلة يوهم بيچ
هوَ بايت بالأراضي يروح يبات عدها ، واذا رجع
للبيت بوقت متأخر معناها چان عدها نومها ونوم
أطفاله اطمئن عليهم ورجع يمچ يكمل لعبته يضحك
على عقلچ وعقل اهلچ لگاچ على گد ايده .
عدل گعدتي قوي يلزمني ومكمل كلامه
_ راح اخلص اخوانه منه ، بس اضغط عليه اجبره
ينطيهم ورثهم ويروحون منه بعد ماعنده اخوان
اخلي يرد منبوذ مثل قبل واخذ ثاري من بين عيونه .
كورت روحي من طلع وعقلي فصل من الخوف
دخلني بصدمة ما بعدها صدمة وكل ما اجي
اربط بالكلام شهاب ومواقف وارث اشوف شهاب
صح ، گعدت اهز بجسمي راسي يريد ينفجر
وما ظل بيه حيل اول ما سمعت صوت صلوات
برا تحچي هيَّ وشهاب وبصوت عالي تگله
_ اكسره مثل ما كسرك بيها .
وشهاب يسكت بيها يصيح بيها
_ خليني افهمچ امشي نطلع برا .
_ ول ماعدنا وكت هجم الغربية هجم علينا
ول روح اكسره وبقيها من يجي يشوفها
يعرف خلصت لعبته وانتهت مرته بعد ماكوو مرجانة .
خليت راسي على مخده احچي ويه روحي مثل
المخبله اجذب بكلامه واوهم نفسي واحاول اصلح
صورة وارث بعيني واتذكر زيناته وتصرفاته وكلامه
خوفه وحبه ودلاله ، بس هاي چانت بالبداية مُـرجانـة .
شفتها من الشباك تحچي وتصيح وبعدين لزمته
من ايدها تبجي وتملخ بروحها وهوَ يحضن بيها
ويرجع يبتعد يرجع بشعر راسه قوي وهيَّ تحجي
براسه ما عافته بس تحچي واخوانها واگفين بصفها
دقايق وراحوا بعيد بالمزرعة يمشون وشهاب گعد
بمدخل الباب يشرب جگارة كملها وشغل الثانية
قبض ايده قوي وگف على حيله وفات جوه
وما اسمع بس مفاتيح الباب تنقفل وخطواته
تتقدم على جهة غرفتي ، دخل وطبگ الباب
وسعت عيني وگعدت على حيلي اجر بعباتي
اغطي بروحي من شفته يفتح بدگم القميص .
ملِكه ..
خلصت مراجعتي عند الدكتور اول ما وصلنا
الباب البيت واشوف وارث طالع طاير من البيت
بيرغ طبگ السيارة وهمس
_ هذا شبي .
حچاها ونزل بسرعة لزمه وهمام وراه
بيرغ : خيرك شكو ؟
وارث : توني رجعت مُـرجانـة للبيت وهذا الغبي
خابرني گال سيارتي عطلت بالطريق ورحت
عليه وعفتها ام عقل الصغير هم زعلت وطلعت
من البيت وفوكاهااااا رايحة وحدهاا بهذا الوكت .
نزلت من السيارة من سمعت كلامة مستغربة
ملِكه : مستحيل لا مُـرجانـة ماتطلع وحدها تخاف .
صعد سيارته رحت البيرغ واستأذنت منه
_ بيرغ روح وياه هذا عصبي وحباب
اني هم اروح وياكم حتى افوت ارزلها
على عملتها هاي شلون تطلع من البيت وحدها .
ركب سيارته وراح وراه مستعجل وارث طاير يسوق
بكل سرعته ، وبس نزل مو السيارة بعده يدگ بالباب
قوي واحنا وصلنا طلع شاب من اولاد عمها فتحه
وارث ما يشوف گدامه بس سلم صرخ على ولد
_ شيخ ضـلـيل وين ؟
سواله طريق دخل واحنا وياه على صوت
وارث طلع شيخ ضـلـيل من البيت مبين توه
راجع بعده بالدشداشة والعگال وخالة غـاليـة
وراه واگفه ومستغربة من دخلتنا عليهم بهذا الوقت
وعمها تقدم وحرك راسه بمعنى شكو شبيك وارث صاح
_ وينها صيحها اريد احچي وياها واروح
بعد هاي حركاتها ما اتحملها اني مو طفل
واخليها تلعب عليَّ ما غالط وياهااا انا ما غلطااان .
قلص حاجبة متعجب
شيخ ضـلـيل : هي ياهي ، على منو تحچي ؟
انفجر وارث بوجهه مفحم تفحم من العصبية
وارث : اكو غيرها مُـرجانـة شلون تطلع من البيت
وحدهااا شلون ، صيحها بعد ما اريدها صيحها
احچي كم كلمة وياها وبعد ما اريد اشوفها
تعبتني ليش هل زعل ليش بعد شنو اسوي
وياها وتسلك ما راضيه شسوي و ترضى .
طلعت امها تلزم بالشال وفاتحه عينها
غـاليـة : مُـرجانـة ما اجت هنا ، بنتي وين وارث .
ما ادحگ غير شيخ ضـلـيل لزم وارث من قميصه
وفره فر بيده وارث بعز صدمات حياته
_ بنيتي وين يول مُـرجانـة وينهااا
البنية البارحة رديتها الك وين وديتها .
وارث : البارحة اجت عندي وتصالحنا وما بيها شي
واخذتها للسوك ورجعنا وجانت تضحك خابرني
اخوي سيارته عطلانا عفتها ورحت وتأخرت
عنده اربع ساعات بين ما خلصنا ورجعت
لگيت باب الغرفة مفتوح ومرجان ماكو .
دفع شيخ ضـلـيل وارث وطلع التلفون يخابرها
رن التلفون بجيب وارث صفن عمها على جيبه
ودفعه بكل قوته دفعه على گلبه ورفع اصبعه
بكل حقد وغضب وبنبره التهديد صاح بي
شيخ ضـلـيل : وين وديتها ول ومحمد اشتكي
عليك بتهمة قتل والله ، وينهااا بنيتي وينهااا.
لزمت امها سندتها ونقش ركضت جابت كرسي
گعدتها واخذت گلاص الماي اغسل بوجهه
غـاليـة : مُـرجانـة ما تشرد على هذا السبب
تزعل اي تخابرني حتى تجي هناا اي صح
بس ما تطلع من البيت وحدها ما تسويها
تخاف بنتي واعرفها مُـرجانـة بيهاا شي .
بيرغ : يعني شنوو البنية وينها وارث
انتِ متأكد مابيها شي جانت ، انا هم
اگول ما تطلع وحدها ما تسويها .
هجم ضـلـيل على وارث ضربه بوكس
وكفت امها تلزم بي وبيرغ يسحب بوارث
شيخ ضـلـيل : دحگ عليَّ يول وعزة ربي
وحگ من رفع السما بلا عمد اذا يصير ببنيتي
شي ادفنك وانتَ عايش ، واذ لگيناها تحلم تنول
اظفرهاااا ، من البداية ما اريدك انتَ وهاي حياتك
المخربطه مثلك خلينا طفلة بيدك من انعل ابوك لابو
خيركم امشي اطلع برا بيتي وجيب بنتي لا الزمك
هنا هسة اخبزك اطلع روحك بيدي .
طلعه بيرغ وارث معگود السانه ما نطق بحرف
وقبل لا اطلع لزمت ايد امها وحچيت وياها
_ خالة امانة اذا تخابرچ لو تجيكم
خابريني رقمي عندچ .
غـاليـة : ملِكه مُـرجانـة ما تشرد والله .
_ اعرف والله العظيم من البداية گلت الهم
مُـرجانـة ما تطلع من البيت وحدها سوتها
مرة وشبعت خوف ما تعبدها هسة لو مدري شنو يصير .
دارت وجهه على شيخ ضـلـيل ودموعها ما وگفت
_ لعد وينها بنتي وين راحت ضـلـيل .
راد يحچي وجهه احتقن احمررر يريد يصيح
عليها قمض ايده عض اصبعه واكتفه بصيحه
شيخ ضـلـيل : اخ منچ غـاليـة اخ .
فلتت ايدها وطلعت من البيت من صاح بيرغ بأسمي
ركبت بالسيارة وما ادحگ من وارث غير بس تراب
سيارته ترس الجو ، ساق بيرغ السيارة وصافن
بنص الطريق ومن كثر الضغط على عقله همس
_ ربي بس هل مصيبة لا تخلي امي واخوي وراها .
ضربت على خدي وشهكت
_ صخام بوجهي اذا شهاب وراها
مُـرجانـة بس من خوفها منه تنجلط وتموت عزززا .
بيرغ : راح اوصلچ للبيت واروح اتأكد منها .
_ تروح الصلوات وحدك كل عقلك بيرغ
هي واخوانها وشهاب حادين سنونهم عليك
وهمَّ هاي غايتهم تجيهم حتى يأذوك
واحتمال مو عدهم لا ترووح بيرغ الله يخليك
اخاف والقران هذولي يموتون الواحد .
وصلني وما قبلت انزل جسمي ينفض خوف
_ بيرغ احلف انطيتي وعد ما تعوفني
وتروح البيت صلوات وحدك .
_ ملِكه نزلي فدوة اروحلچ اريد اولي
وارث وخده ما اعووفه .
_ لا تعوفه بيرغ ظل يمه بس لا تروح لصلوات وحدك
ابوس ايدك بيرررغ الله يخليك اتوسل بيك لا ترروح .
بقيت اناشغ وموت ابوية يتراوالي ما اتحمل فكرة
شخص ثاني يمووت بسبب مصايب هل شيطانة .
لزم ايدي ودمرات رگبته نطت من العصبية
_ وداعتچ والخاطرچ ما اروح وحدي كافي .
_ احلف بالله بيرغ اوعدني ما تتهور وتنساني وتروح .
_ وحگ اسم الله وحگ دموعچ الغالية وحدي ما اروح بعد .
سحب كلينكس مسح وجهي ومد ايده فتحلي الباب
نزلت دخلن جوه لگيت ميمونة لازمة ضلوعها واگفه
بالباب وامها وام وارث منتظراتنا بالمطبخ گاعدات
ميمونة : ها بشريني شفتيها رزلتيها .
ملِكه : ارزل منو يول البنية ما موجودة بيت اهلها .
ام وارث لطمت على وجهه وگفت على حيلها ادگ رجلها
_ يا يمه يا صخام وجهنا چا وينها اذا مو عدهم
وارث وين دخيلك يا حاضر الشدات يا علي احضرنا .
دفع الباب وارث جر كرسي صعد عليه
ونزل كاميرا بيده رگعها بالگاع فلشها تفليش
وارث : طافيه ينعل اهلهاااااااا .
اباع على ميمونة انخطف لونها ورفعت
ايدها تغطي شفايفها تيبست بمكانها
ملِكه : شبلاچ انتِ الثانية ؟
ميمونة : اكو كاميرات بالگراج .
_ اني هم انصدمت .
_ عزا ملِكه عزززا اكو كاميرات اذا يرجعوهن
يذبحوني كلهم والله اخ رجلي اخ گلبي اخ يمه .
لزمتها من ايدها فوتتها للغرفة
ملِكه : ليش ولچ شنو شردتي مُـرجانـة .
_ دولي اشردها شنو ، لچ بندر ذاك اليوم اجه هنا
بالگراج وحجيت وياه وره البيت همام يكتلني
لچ جاب الطريقة كله يهدد بيه اذا يحس اريده يذبحني .
على صيحت وارث برا طلعنا لگيت اخوانا موجودين
وبالباب شيخ ضـلـيل وياه زلم وشباب
_ لگيتهااا .
وارث : راح ألگاها .
_ ماعندي صبر وارث البنية وينها شني وحدهاا
بالشوارع صار ساعات مو مخليها امانة عندك
هي هاي الأمانة من نص بيتك وتختفي .
والزلمة حقه بحيث نحير كلنا شنو نحچي وارث
مخبوص يخابر التلفون ما شمره ابد وطلع بالسيارة
وشيخ ضـلـيل وربعه بمكالمة كلهم هجوا والبيت فرغ
بس نسوان اقل الربع ساعة ورجع سَــهم ظل بالباب
حتى ما نظل وحدنا بس هم بخابر ما فات للبيت
صار الليل ودخلنا يوم جديد وعبرت الوحده ودخل
وارث للبيت مخبوص صعد فوك ونزل بيده اوراق
مرتبات بفايل وبيرغ فات وارث بعده على درج لزمه
بيرغ : وين رايح وارث .
وارث : لا تدخلون ابد .
دفعه وطلع وام وارث لزمت بيد بيرغ يم الدرج
_ بس فهمني يمه شصاير البنية وينها .
بيرغ : ما اعرف شحچي وشنو اگول يمه
بس ادعي مايطلع الكلام اللي وصل الوارث صح .
يريد يرجع يطلع لزمته تتوسل بي
_ عليك بغلات وارث عندك تحچي .
_ ما اگدر احچيها والله صعبة عليَّ فهميني .
_ شنو ماتت أغديك فدوة بس طمن گلبي على بنية .
هز راسه وجهه يعرگ يمسح بي ومرتبك
_ لا ما ماتت .
_ چا وينها .
دخل همام عيونه تريد تنط من العصبية راحت عليَّ
ام وراث : ولكم بس حاجوني البنية وينها .
همام : وصلت صورة مطبوعة لوارث استغفر الله ما شفتها
بس وارث من شافها تخبل رسمي .
ام وارث : احجوووا شلعتوووا گلبي .
همام : استغفر الله بس يمكن مُـرجانـة شردت ويه شهاب .
ملخت وجهه زلغته تزلغ والولد يلزمون بيدها
وهي لا بقت وجهه لا شعر لا شال لا دشداشة
سگطت روحها ملخت نفسها تملخ
_ يا صخام وجهك يا يمه يا وارث يمهههه
ولكممم يمممهههه يموت وعلي يموت ما يعيش بعد .
فات الشيخ فؤاد رفع ايده من الباب وهيَّ تباع
عليه وتلطم على وجهه عدلنا شالاتنا من تقدم عليها
فؤاد : حچي ما اريد بچي ما نريد تريدين ابنچ
يموت خلي يشوف هـذا حالچ هوَ هم متسودن
مدري صار عنده سكر حچي ما يگدر بعد يحچي
بطل الماي بيده يشرب اله يحاجينا .
ام وارث : هاي وين جانت المصيبة خوية فؤاد
شني هل صخام الوجهه شلون سوتها
والله اجت يمه ضحكت ومابيها شي وصعدت
شلون تشرد ما خافت من زلمتها واهلها يذبحوها
ذاك اليوم طلعها من حلگ المووت .
عاط بيها حتى تسكت بعد ورجع طلع والولد وياه
واحدهم من صدمته الجگارة ما وگعت من حلگه
ملِكه : بالقران مستحيل مُـرجانـة تسويها
اني اعرفها هي ما تشوف بعيونها غير وارث
روحها بي لااا لاا اكو غلطط والقران اكو غلط .
ميمونة گاعدة ايدها على راسها ميحت دموعها وهمست
_ الله لا يوفقچ صلوات لا انتِ ولا شهاب
حتى لو اخوي هم ادعي عليه شنو من بشرر
لچ لزگ بحرمة اخوو قلة بنات ، لچ ملِكه شلوون
والله اني حسيت الفترة الفاتت البنية متغيرة ودايخة
اخاف هاي صلوات يحرتها خلتها مو بعقلها وشردت
لأن مُـرجانـة ما تسوويهاا وتعوف وارث عبث .
للساعة بالخمسة الصبح وكلنا داخلين انذار
شيوخ من اهلها ومن طرفنا والمشكلة ما نعرف
منين يسمعون ويجون وبيرغ يوصي بالكي
يتكتمون وهمام يصيح منين هل عالم تعرف
صرنا على كل لسان من ربع خلف والمصيبة
حتى عمامها واولاد عمومتها عرفوا وصار
الحچي عليها بفلس خزي ومخازي وكلها متحلفه .
صعد وارث فوك گوه يجر بروحه والقميص مالته
مبلل بدله ونزل مستعجل وبيده تلفونها ركضت
على ميمونة لگيتها تقرا قران وتبچي گعدت يمها
تصدقت وسدته تمسح بعيونها وتگلي شكو
ملِكه : اگلچ ميمونة هيَّ مُـرجانـة حذفت
مكالمات بندر والرسائل ؟
ميمونة : اذا مصيبة اكبر هسة هم عباله عدها
تواصل ويه بندر انوب تتشوه صورتها بالزايد
اروح اني احچي قبل لا يشوف شي اگول اله
اني خابرت مو هيَّ لا تتثبت عليها كلمة مو حلوة .
لزمتها منعتها بقيت ارزل بيها
_ انوب لا تطلع حاذفتهم وتورط روحها خلينا ساكتين هسة .
شفت عمها من الشباك يحجي هو وشيخ فؤاد اسمعه يگول
_ ومحمد ما تسويها وهذا كلامهم لعبة
بنيتي واعرفهاا انا اعرف شلون اخذ حگها واطلعها .
طلعوا الشيوخ الساعة بالسته وارث صوته صدى بكل البيت
_ وحگ هو علي احفررر الگاع واوصل لشهاااب
واشرب من دمه هوَ وامه ال**** هل مرة صلوات
اذا توگع بيدي وبدر الهواشم عطم صاحي ما اخلي بيها .
همام : جاي ندور كل ربعنا متوزعين
انتَ بس اگعد اشرب ماي جر نفس واطلع .
وارث : ما اگعد اررريدهمممم اكو شي غلط
والحسين ما مستوعب لك ما مستوعب كلامهممم .
اسمعهم يتفقون للساعة ب8 يشكلون دعوة
وبيرغ يحضر دوريات وياهم هم يدورون
للساعة بـ7 وكأن اكو شخص يعبر الهم اخبار
دفره على باب وشمروا طابوگه على شباك
طلعوا الولد كلهم اخدوا الطابوگة بيها ورقة
جرها وارث وفتحها سريع من قراها عقچها بيده
جرها منه بيرغ وهوَ تخبل على اخير جن
همام قراها بصوت عالي حتى خاله فؤاد يسمع
” تعرفها عدنا، بس ما خلينا أي دليل ورانا عبالك أغبياء
ونتصل برقم بعيده على شاربك نترك أثر ونتورط؟
إحنا أذكى من هيچ ، انتبه وركز زين لك
العمارة اللي بمنطقة (****) حقنا وتعبنا
تتسجّل بأسمنا بالعجل ، وإذا ناوي تشتكي
جرّب تطلع بـ ٨ وصل هالرسالة للنجدة راح يضحكون
عليك ويعتبرونها دعوى كيدية، لأن ماكو دليل يربطها بينا
اللعبة نظيفة صارت وأنتَ لازم تعيد حساباتك تحياتي ”
اتصل شيخ ضـلـيل عصبي يصيح
_ وصلتني رسالة البنية عدهم ويريدون
عمارة ما اعررف شنو يخربطون هذا
الكلب ابن الكلب وارث يعرررف قصدهم اجيته .
ما وگف وارث وطلع من البيت قدم دعوة
كاملة بالأسماء رغم تهديداتهم وضغطهم
عليهم ما يشتكون ، وناس تگول غلط نشتكي
يأذوها ، ومن جهه يصيحون ضروري نشتكي
ومن كلام الشيوخ عرفت شيخ ضـلـيل عمم
كل اسماء صلوات واخوانها بالسيطرات .
مر اليوم بالويل حالتنا صعبة الى درجة
اقل عيطه نفز ونتراجف ، وبس دخل الليل
وارث شكو شخص يجي عنده يطرده ما تحمل
احد لزم الأستقبال فلشه تفلش بگد ما دوروهم
كلهم هلكوا هلاك ومثل فص الملح وذابوا
فؤاد : عصبيتك هاي ما تفيد .
وارث : شلون اوصل الهم رسالة قابل انا موافق
اسجلها بأسمهم بس يرجعوها .
فؤاد : لازم ننتظر .
بس وارث ما گدر يصبر وهج من البيت والسلاح
بيده نكت كل الأماكن اللي ممكن يلگاهم بيها وماكو
الثاني يوم على صوت طبه بالگراج طلعنا اني وام وارث
لگيت رسالة بحجارة اخذتها اني اقرا بيها
واخابر عليهم بلغت بيرغ واجونا كلهم
سحبها وارث من ايد امه قراها مكتوب
” راح يوصل شخص ما يعرف شي علينا
هذا الشخص وسيط ماعنده علاقة بالمشكلة
ولا بالخطف ، العمارة راح تتسجل بإسمه بشكل
رسمي وبعدها هوَ ينتقلها بأسامينا حسب الاتفاق
بمجرّد ما تتم الإجراءات ترجع مُـرجانـة سالمة
أي محاولة للعب حياة مرجانة تكون الثمن
اخليها تروح الك مثل الماي وينطش
خليك ذكي مثل ما نعرفك ههههههه
وحافظ على الوسيط لأن هو الوحيد حبل الوصل بيناتنا .
لللساعة 10 الصبح وصل رجال چبير بالعمر
تقريباً عمره ب60 سنة سلم بكل احترام عليهم
وارث ما گدر حتى يباع بوجهه من القهر بس
يريد يخلص اخذه بالسيارة وراحوا وياه الولد
سجل العمارة بأسمه وكمل الأجراءات مثل ما متفقين
ورجع للبيت ينتظر خبر وماكو ولا اي اخبار .
دخل سَــهم الساعة ب2 باليل گوه يجر النفس
_ وارث شيخ ضـلـيل حرگ منطقة اهل صلوات
بيوت اخوانها كلهن وهدد شكو واحد يعرفهم .
وارث ما رد ولا بحرف الثاني يوم تلوع ويه الظهر
الكل محتارين بأم وارث ورجعع نفس الطبه صارت
عرفها وارث وطلع مستعجل اخذها لمحت صوره
ما خلاهم يشوفوها كورها بيده وگع بالگاع بكل
حيله نشل ورجله بعد ما تعينه يوگف .
سنده بيرغ وهمام سحب الصونده فتحها
يغسل بوجهه وهوَ ضاغط على صدره
بيرغ : شبيك وارث اخذك مستشفى.
لزم رگبته قوي لزمها وعيونه نطت
وبصوت يشخر يحاول يفهم بيرغ
_ اختنگت روحي أحسها تطلع .
اشر بيرغ على سيارة
_ همام شغل السيارة شغلهاا ناخذه للمستشفى.
ولزم ايد وارث يصيح عليه
_ وارث شيل ايدك من رگبتك وارث تنفس .
وارث حيل لازم رگبته عبالك واحد لازم روحه يگله
_ تطلع روحي .
من الصدمة القهر ما تحمل انهار تماماً
اخذوا منتهي للمستشفى وكلفهم يكملون
يدوروهم جريت الرسالة مكتوب بيها
” مُـرجانـة سافرت هيَّ واخوكم ههههههه باي ”
بس الصورة بقت بيد وارث ما ذبها من ايده
ام وارث ما خليناها تسمع بقت بالغرفة
وميمونة انتهت من البچي على اخوها
گعدنا بالمطبخ عيوننا على باب ننتظر
احد يجي صوت اذان المغرب دخل لكل البيت
فرشنا السجادات نصلي ودخلوا الولد
وياهم وارث وجهه ما يتفسر من التعب
شيخ فؤاد ما عافه گاعد يمه يصيح بي
_ بوية وارث هاي انتَ العاقل بينهم
لا تسوي هيچ بروحك بوية بينك وبين
الجلطة شعرايه وصلت 20 الخاطر ربك
نام ساعة اكل شوية حتى تعرف تفكر .
وارث : ابد وحگ هوَ علي عيني ما تغمض
اذا ما الزمهم واشرب من دمهم وادفنهم بيدي
دمروني مو يوم يومهم يدمرون بيه .
كسر هوستهم ضربات الباب فتحه سَــهم
دخل بندر مستعجل طلع وارث واخوته
وياه وگف مقابيلهم وصوته عالي يصدح بلغه
بندر : وارث عرفت مكان شهاب وصلوات واخوانها .
وارث : احلف وينهم شلوو عرفتهم وينهم هسة وينهم .
بندر : موجودين بمزرعة على طريق (****) .
فات وارث وطلع بيده السلاح وبيرغ يهدي بي
حتى يستمع الكلام بندر وهو مستعجل
لزمه بندر قوي ودفعه على حايط معترض على روحته
_ بيتكم مراقبي حتى يعرفون وين تروحون وين ترجعون
اذا تطلع هسة يا وارث واتجاهك يصير على مزرعتهم
انسى بعد تلگاهم لو تحصل بنت ال ضـلـيل.
ضرب السلاح بالحايط وصاح بصيحه من كل گلبه
وارث : چا اعرف مكانهم واگعد هناا .
بندر : بس اسمعني حيوان مو الزم عقلك
واضربه بالقندره صار ساعة محترمك اگول
خطية اسمع لا والعباس اعوفك واروح
وطبك مرض روح للمزرعة تلگاها فارغة .
شمر وارث السلاح بالگاع وراح على بوري مال
ماي گعد يغسل براسه نگع حتى ملامسه مختنگ
وگف يمسح بعيونه ويحچي
_ اسمعك بندر اسمعك احجي .
بندر : تراث واخوانا وصيتهم ما يوصلون هنا
راح ينتظرونا هنآك بالأفرع بعيد عن العين
بين ما نشوف طريقة نطلع بيها من البيت
بس مو من هذا الباب هنا ننكشف .
بيرغ : خلينا نرجع للمستشفى لأن اذا مراقبينا
عرفوا وارث چان بالمستشفى ورجع فقد ، وهناك
نضيعهم ونطلع من غير مخرج .
بندر ما حجه وياه ولا باع على بيرغ بس وارث
ظل يباع على بندر منتظر جوابه
بندر : تگدر تروح ؟
وارث : اي .
بندر : هاي هيَّ من المستشفى ونطلع عليهم .
همام : نحتاج اسلحه .
بندر : وارث الأسلحة عند تراث من نلتقي ناخذهن منه .
هز وارث راسه وعاف السلاح هذا بالبيت
وما قبل بأي شكل من الأشكال سَــهم يروح
وياهم وعافه حتى يحرس البيت بغيابهم
لزمه فؤاد بالباب من ايده بحذره
_ ظل تذكر يا وارث اخوك مو بعقله
وهذا اخوك من لحمك ودمك حاسبه بس لا .
قاطع كلامه وهوَ بوسطهم كلهم وكلنا نستمع
وبكل وضوح وبدون اي تردد كشفهم
وارث : مو اخونا ، شهاب مو ابن ساجر .
تجمد بيرغ بمكانه عيونه وسعها وحرك راسه
لوارث لأن وارث نظراته راحت على بيرغ اول ما نطق
وارث : اعذرني بيرغ اليوم وانا بهذا الموقف
اي سر من اسرار صلوات ما اگدر ادفنه ببطني .
بيرغ : اذا تكرههم مو معناها تنكر نسبه بكيفك
وارث احترم روحك وثمن كلامك گدام العالم الغربه .
وارث : ما بيهم غريب هذا ابوي ، وهذا ابن عمتنا
وشهاب مو ابن ساجر وعندي اوراق تثبت نسبه
هوَ ابن صلوات بس مو ابن أبووك .
فؤاد : مستحيل ولك من جابت صلوات جانت
متزوجة من ساجر وانا اشهد وامك شاهده .
بيرغ : هذا يخرربط تخبل .
وارث : انا ما اخربط بيرغ اعقل منكم وصار سنين متستر
ساجر چان عنده صديق غير عابد هذولي عزازه
واسراره كله يمهم يعزهم ويحبهم اكثر من اخوانه
صاحبه صالح خطب بنية وقبل لا يتزوجها
صار اللي صار وبعد اشهر قبل زواجهم ب15 يوم
صالح راح البغداد يجيب اخته وجهالها وبالطريق
غافي والسيارة نگلبت بيهم واخته وجهالها
ماتوا ، صالح نقلوا للمستشفى ومن راح ابوك
يشوفه قبل لا يسلمها كشف سر صلوات
وابنه عند ساجر وگال اذا ما يستر عليها
راح يموتوها اهلها هي والطفل وكلنا نعرف
ساجر على غريب كريم راح بعد موت صاحبة
بشهرين خطبها وتزوجها حتى يتستر على حملها
وسجله على اسمه كل هل سنين وكبره ورباه وياكم .
كلها صرخت عليهم من هجم بيرغ على وارث
يهز بي من ملابسه حيل ما راضي
بيرغ : جذاب والله انتَ جذاب تخبلت يول
فقدت عقلك لا تحچي هيچ حجي قوي وارث .
وارث : بيوم ما تشوف امك العايقه اسألها
گول الها شهاب اخوك من ساجر لو من صالح .
سحبوهم الولد وبندر يسكت بوارث
وبيرغ انفجر شلون يحچي هيچ
وحقه سنين وهوَ غافل على حقيقتهم
زين ما فقد عقله وتخبل من صلوات ومصايبها .
فؤاد وگف طول بطول يهدي ببيرغ دخله للأستقبال
يحچي وياه ما يقبل يتفاهم وهمام مو اقل منهم
صدمة بس فات على بيرغ خايف عليه لأن ظل
يرجف من قهرهم وصدماتهم
بيرغ : ما اصدك بي چان على اقل عرفوني بحقيقتهم
ليش سكتوا صار سنين ، وانتِ شنو جابرك ما تفضحهم
واعرفك تكرهك قابل حباً بيهم مغطي اسرارهم .
صعد وارث ونزل بيده اوراق شمرهن على بيرغ
اخذهن يقرا ببهن وضحك مقهور مخنوك
بيرغ : هذني شنو واصدك بيهن اكدر هسة
ازور الك الف وحدة نفسها بدقايق .
جرهن وارث من ايده ورفع اصبعه وبصوته غصه
_ ولا تصدك ابقوا مضحكه صار سنين يضحكون
عليكم واني شاركتهم وهم ضحكت عليكم لأن عندي
امانة اريد اخلصها ما جنت اكدر اخسركم واخليكم
بيد ابن صلوات من خوفي عليكم سكتت عليهم .
همام : انتَ صاحي وارث شنو تضحك علينا
بيا حق تضحكون عليناااا زعاطيط گدامكم .
وارث : شوف لك انتَ واخوك انا هذا حدي وياكم
تعبت من حمل ساجر حملني مسؤولية كسرت
ظهري نصين هلكت منكم ومن هل ورث والمشاكل
بس تخلص هل مشكله نگعد واسلم كل واحد حصته
والورث مالته كامل وروحوا وين ما تريدون تولي
انتِ واخوك روح ، كل واحد بيكم ياخد عايلته ويولي
مني كسرتوا طهري حياتي كلها مصايب على ورث
من انعل ابو الورث لابو لفلوس كااافي شال راسي كافي
انهجم بيتي خسرت انا هلكت خسرررت .
همام وبيرغ گاعدين واثنينهم عيونهم
ما شالوها من وارث على طول ما هوَ يحچي
والقهر والضياع نحت دموعهم ونزلت بكسره
وارث انهار يحجي ويصرخ مدمع بعيون حمره
ومبين الكلام طالع منه غصب عنه من تعبه
وارث : انتَ اخذ مرتك وروح وانصحك تتأكد من امك قبلها
وانتَ اسلمك حصتك وحصص امك وميمونة واخذهن
وتوكل ، وحتى سَــهم حصتك تاخذها وين ما تريد تروح
روح وانا هم ما اظل هنا تعبت هذا حدي احل مشكلتي
واسافر ، حتى امي تريد تجي ويايَّ على عيني وراسي
ما تريد ما تلزمني أبقيها عندك خالي واولي اهج برا .
كلها عيونها على وارث من هول الموقف
ومنظر اخوانه وكسرتهم وخوفهم من خسارته
ودموعهم وضعفهم نبچي وامه تسمع ودموعها
تهل على خدها ، سَــهم صافن عليَّ مصدوم بكلامه
احس كسره كسره چبيرة ما تتصلح بگلبه ضربه .
طلعوا وارث بالسيارة ويه بندر وحركوها للمستشفى
فؤاد : عذروا اخيكم وخلوا روحكم مكانه
هذا كلامه من الضغط وداعت ولدي وروح بنيتي
قسه عليكم بكلامه وعلى روحه والله يحچي
ودموعه تصب وياكم .
لزم همام راسه مهضوم يگله
_ قبل ما نعرفه زين ردنا ورثنا منه لأن ابوية نقلهن
بطريقة تخلي اكبر عقل يستغرب ليش ، بس بالمواقف
والأيام ثبتت وارثنا زين اخذ مكان أبونا وكلنا نحتمي
بي وحتى ورثنا بعد ما طالبنا بي وما نريده نريد
خوتنا تستمر ما تفرگنا فلوس ولا ورث .
سَــهم : وگفاته ويانا حتى ابوي ما يهتم بينا بگده
عمي والله هو بعينه يشوف الحياة إشلون تصفگ بينا
وناخذ القوه منه حتى بآخر فترة ضغطنا على نفسنا
وهملنا حياتنا حتى ما يتعب ما يحس المسؤولية بس
عليه , الأراضي نصها اشتغلنا بيها في سبيل ما يمل ويطردنا .
صفگ بيرغ على رجله وكتم قهره وطلع من البيت
واضح ما ناويها على خير الشر واضح بملامحه .
وارث …
متوجهين على مستشفى بندر يسوّق بالسيارة
وقبق راسي يريد يطير من مكانه بيا مصيبة احتار
وبمنو منين ما أميل اغرف مشاكل يمتى ارتاح
بندر : من زمان تعرف شهاب مو اخوكم .
_ اممممم .
_ ومخلي عادي يظل بنص بيتكم مكشف على ميمونة ؟
_ اخو بيرغ .
_ شنو نوعهن الگرون .
_ شنوه .
_ كرونك يا نوع يا لون .
_ احچي عدل لا افر وجهك فر بوكس اصب غضبي ببك .
_ من كون جيره وخفت للغيره الممسوحه .
فتحت باب السيارة هيَّ تمشي وضربته على صدره
_ نزلني من انعل خيرك انا هم غلطان اجيت وياك
بيا حال احنا وانتَ مرتاح عندك سوالف جايفه مثلك .
_ يسطركم جدي رسول الله كون ويصب الغيرة بيكم كول امين .
مد جسمه طبگ الباب وقفله بعد ما حجه الكلب
دخلت المستشفى ركن السيارة وسندني على جسمه
دخلني على قسم الطوارئ، ومن بين زخم العالم
طلع قبلي واني وراه امشي حتى محد ينتبه بين الممرات
عبرنا على باب الثاني يطلعون منه الموته بس صريخ
العوايل يزرف طبلة الأذن، صعدنا بأقرب تكسي عبرتنا
المستشفى وصلنا المكان تراث ونزلنا بالفرع يمهم .
لگيتهم كل واحد مخلي بحلگه چكارة يشرب بيها
من شافوني نزلوهن يطفون بيهن وتراث ماكو وياهم
خزرتهم وماعندي طاقة حتى احچي عطت بيهم
_ جبيركم وينه تراث .
_ احم يحجي ويه حرمته .
_ صيحه .
تاج : انتظر بس دقيقة عدهم عركة .
اسمر : خالاتي الطاهرات عدنا وقيس حجم العركة .
وارث : صيحه راح اصلخك براشدي .
اسمر : يصبر الحرمه لا تصير مذابح يمعود انتظر .
باوعت عليَّ من بعيد يفتر ويجول يعض اصبعه
ويرفع راسه ليفوك يشيل التلفون من اذنه وجهه
يحمر من يحجي من شافنه سد الخط واجه فاير دمه
تراث : شني من الصبح ننتظر وين جنتوا
مو كلبي فحمممم امشونا بساع يعني تعرفون
مكانهم وساكتين منهم صار لا ساعة ولا ساعتين .
بندر : عمي خليني ساكت بعد دخلت دخيل عند جدي
وبقت يمه كون يلتفت على ولد ساجر لو يخلصنا
منهم لو يعدلهم لأن حتى كلبي شيب صار ابيض منهم .
وارث : شوف لك انتَ وياه حرف ما اسمع منكم وين السلاح
بساع خلونا نتحرك لا هسة اعوفكم واروح افوت عليهم وحدي .
شفت السلاح بالسيارة سحبته رتبته وصعدنا
بالسيارة اول ما حركنا تراث گال
_ اكو سيارة ورانا سوده ، يمكن هاي مال اخوانك .
ضربته على ايده صاعد بصفه بالصدر
وبندر وسهم ورانا وتاج وحاتم وكريم
بالسيارة اللي ورانا ، وراهم سيارة بيرغ
نزلت من السيارة رحت عليهم دكيت الجامة
ما يفتحوها رگعتها حيل ادري بي ما يتحمل
واحد يضرب سيارته نزلها وداير وجهه
هوَ وهمام وجبر وسهم صاعدين
_ شعدكم هنا .
جـبر : عجل غير متفقين كلنا نروح
شني تروح وحدك نخليك ما نرضى .
نزل بندر وتراث علينا ملفلفين كم سلاح وياهم
دخلوهن بسيارة بيرغ ، بندر افتر يمي من شاف
جـبر نگلبت خلقته
بندر : هذا الفاره شعنده هنا جاي وياكم .
جـبر : احترم نفسك لا انزلك .
بندر : الله جابك لا تنزلني دخلي يصير
هناك رمي وحق جدي رسول الله وحگ هوَ
علي والحسين استخدمك درع الزمك اخليك
كدامي وامشي وارمي عليهم اخليهم يزرفوك
تزرف بالطلق اليوم حتى اذا ما يتعاركون
انعارك وياهم الخاطرك .
سحبه تراث وبيرغ قفل السيارة حتى جـبر ما ينزل
بندر : تعال جـبر تعال اصعد يمي اكعد تعال .
همام : امشي اصعد يلة لا ننزلك .
بندر : خاي تخلص هاي المشكلة واتفاهم
وياهم تفاهم انتَ وجبر ما صاير صبركم ابن ساجر وابن خلف.
وارث : وكتهاااااااااااا .
بندر : سكتنا امشي اصعد يلة.
رحت على سيارة السلاح بحضني خليته
شمرنا السيارة بعيد حتى ما ينسمع صوتها
ودخلنا عليهم من بعيد بيرغ يمشي مقابيلنا
واحنا وراه شاف سيارة شهاب وعباية صايرة
على باب مدخل البيت الصغير بوسط المزرعه
ركضت بعد ماعندي صبر واتحمل دفرت الباب
ونزلت نظراتي على عتبة الباب كلها طبع
حذاء بس الطبع مو من طين من دم ، عبالك
واحد دايس بدم وماشي بالكاع والدم طابع
كفختني ريحة الدم القوية هزيت راسي ادعي
اللي براسي مو صح ما يسووها ما يموتوها
ما يتجرأون غايتهم العمارة واخذوها يخافون
ما يكتلون دخيلك يا علي دخيلك يا علي
اريد اخطي واسمعهم ورايَّ يتهامسون من صدمتهم
بالدم والمنظر ، صارت غرفة گدامي اول ما باوعت
بيها فقدت كل قوتي هاي مو جريمة قتل هاي وحشيه .
يتبع ..
الفصل التالي اضغط هنا
يتبع.. (رواية الموروث نصل حاد) اضغط على اسم الرواية لتجد الفهرس كاملاً بجميع الفصول.