رواية الموروث نصل حاد – الفصل الخمسون
♛ 50 ♛
نزل رجله وسكن صوت نحيبه وبصوت مكسور يحاجيني
_ كتلتهم الخاطرج مُـرجانـة .
بقيت على حالي ما انطي رد فعل تحرك من
مكانه وصل يمي كاعد على ركبه يرفع بشعري
من عيوني وبعد ماعندي حيل حتى اجر النفس
_ مُـرجانـة حاچيني بعدچ تكرهيني ؟
وگعت دموعي على ايدي وشهگت
مُـرجانـة : اني كتلت صلوات موتتها بيدي .
هَو مصدوم مثلي من ذكرته بأمه اختنك
رفعت راسي اضرب بنفسي وأصرخ گطعت
روحي لزمني قوي رگعته على وجهه وصرخت
_ خليتني اكتلهاا حتى تورطني اني ما اسويها
والله ما اسويها ضربتها بهاي ايدي من وراك
رجعني لو ترجعني لو تموتني لا تورطني بعد
اكثر لا تخليني احس بروحي قذره مثلك .
غطيت وجهي خفت يضربني من نفض روحه
وكف سريع يأشر بأصبعه وگب نار مني
شهاب : تورطت بقضيتين خطف وقتل هسة
ما تورطت بيهن حتى ترجعين الهم راح نسافر
اني مطلوب راح ادبر طريقة نطلع بيها منا
ادفع كل ما املك واخلص منهم .
هزيت راسي لا ما رضيت على كلامه من
شاف رفضي سحبني من زنديّ وگفني
_ ماجنت اريد اكتلهم خلصت عليهم
حتى ما تتأذين وصلت نفسي لحبل المشنقه
وتريدين ترجعين وتكملين حياتج ويه وارث
مرتاحة واني مُـرجانـة واني شلون اكمل
ما تفكرين بيه ما تحنين ما تنقهرين
فات الوكت بعد مو بكيفچ ترجعين
تبقين هنا ويايه وبمرور السنين
تتعودين مال ترجعين انسيها مُـرجانـة .
انشلع گلبي ويه كل كلمه يحچيها عيوني
حرگتني حرك وراسي يفتر بعد ما اكدر اتحمل
وهوَ يصيح وكف يخلي قهره يكسر بيده
بالحايط ، بلا فراش ولا مخده خليت راسي
بالگاع وتمددت وايدي كدام عيوني الدم
تارسها ترس ، دم صلوات الحقيرة .
رجع كعد متحير رجع راسه على حايط
يمرد بيده قوي ويحجي يسمعني
_ خسرت مستقبلي وحياتي واهلي وبقيتي
انتِ اخر شي اذا بيوم رحتي اموتچ واموت واخلص
بعد ماعندي شي اخسره ادمرت على اخير نهوني .
غمضت عيوني منه كارهه شوفته وجهه
محتقرته لدرجة اقرف من المحه ، الصداع
مرد راسي والصار بالمزرعة مثل الشريط ومر على راسي
“تذكرت ”
من اول ما دخل عليَّ والبوب مقفولة شمر القميص
وأقترب يفتح بالسلاسل بيدي الخوف تملكني
وماعندي حل غير اتوسله واعوف المسبه
مُـرجانـة : لا تسمع الهم انتَ ادمرني وادمر نفسك
الله يخليك لا تخليني اكره روحي لا تسويها استرني
ما راح اسامحك ابد والله واظل ادعي عليك عمري كله .
تقرب اكثر يفتح بيدي ما يباع بوجهي
_ شهاب بشنو احلفك انتَ مو تگول ندمان
شلون ندمان وتريد تكسرني الله يخليك احجي
ويايه اني خايفة گلبي راح يوكف شهاب حلفتك بالله .
رفع راسه مركز بعيوني كمزت من مكاني ورحت امشي
بعيد منه وجسمي تحول مثل السعفه استصعبها
اتوسل بواحد مثله بس مضطره والكلام ضاع .
استحقرت نفسي من نظراته اللي تاكل بيه اكل برغبة
رمشه ما رمش يقترب واعصابه مشدوده وصدره
يصعد وينزل بجنون ، ركضت بزاويه ثانية وصرخت
_ شهااااااااااب حرام بالقران حرررام اني متزوجة
شنو تستفاد اذا تقترب بس گول شنو تستفاد
انتحر وراها والقران وروح ابوية وداعت امي انتحر
اني احب وارررررث ما اگدر اتقبل غيره دخيلك كافي .
فكه تشنج وابتسامة حقد بانت على ملامحة
شهاب : اثبتي مُـرجانـة اريد اتأكد انتِ صدك يمي .
گعدت بالگاع مكوره على روحي واشهگ
_ شهاااااب ابوس ايدك لا تسويها لا تسمع منهم
راح يدمروك والله امك راح ادمرك هذا اللي ديصير
غلط ، ليش تخجل بيرغ گدامهم من يعرف يهون عليك
بعده ما ناسي من سمعت كلام امك ودمرتوا زوجته
الله يخليك هل مرة لاااا شهاب صحح اخطائك.
هدوء صوته ، وسكون سيطر على مكان وبضياع صفن بيه
شهاب : نسافر ؟
ما فهمت مقصد كلامه ضغطت على روحي وسألته
_ منو ؟
_ اسافر وتجين ويايَّ ؟
_ ما اكدر اريد اهلي .
_ كم سنة ونرجع .
_ لا والف لا شلون اسافر وياك على اي اساس .
_ اكمل ؟
_ شهاب افهم اني على ذمة وارث حرام .
_ مُـرجانـة نسافر او اكمل ؟
اول ما تقدم جرني من ايده بعدت روحي وصرخت
_ قبلت قبلت اسافر وياك اسافرر .
حجيتها وجريت ايدي منه امسح بدموعي
والف فكرة براسي افكر ببها حتى اشرد منهم
ماعندي اي حل غير أسايس بي في سبيل يقتنع
عافني وجر القميص مالته يلبس بي ورجعني بفراشي
شهاب : نامي هنا كملنا .
ما فهمت قصده لحد ماطلع يعدل بنفسه
واسمع صوته بكل وقاحة ما تستحي تگله
_ كسرت راسها وراس وارث الچلب ابن الچلب .
شهاب: تممتها ، وهاي خلصنا رجع العمارة
وانكسر بالصور راح اخذها واسافر .
صلوات : وين تاخذها تبقيها هنا هذا
على اي ساعة يعرف مكانك ول خليها
مشموره معيوبة مخزايه هين يلگاها مكشفه كون .
عافته واجت فاتت للبيت انتهيت من البجي
معقولة اكو هيج بشر خبيث مثل صلوات
شافتني كاعدة دارت عليَّ تگله
_ شمالك لا ضربة لا شخطه لا دم يجي يدحگ عليها عروس .
شهاب : يمه اريد اخذها اليوم ونسافر .
هزت راسها اي وصاحت على اخوانها اثنينهم
وهذ وياهم تسولف بالنص ساعة بالمطبخ
طلع اخوها نوح وياه شهاب اباع عليهم
من الشباك يشربون جگاير برا واسمعها
تحچي هيَّ واخوها تتفق تگله
_ فوت عليها واقفل الباب اخذها حتى تطلع من نفسه
وتلعب روحه منها ويبطل من سالفة السفر والمصاريف .
ربي يحبني بذاك الوكت والبيت فارغ والصدى عالي
وسمعت خطتها ، غمضت عيوني وقريت الفاتحة
وبدموع تصب صحت بعالي صوتي
” يا كاشف الكرب عن وجه أخيه الحسين
اكشف كربي بحق أخيك الحسين ”
زحفت على بوري البرده شلته بين ايدي
دخل اخوها يريد يقفل الباب كسرت الجامة
وشهاب بعيد يم سيارته يبحوش بيها التفتت
من لمحني وخاله ورايه اجاني يركض وسبقه
خاله عادل دخل للبيت وهيَّ تصيح عليهم
يستعجلون متفقه وياهم من جان شهاب بالغرفة
وطبكت الباب قفلته حتى شهاب ما يفوت عليهم .
لمحت شهاب بالشباك ما مصدك مصدوم من منظر خواله
وعرف خطة امه فتحت عيني حيل والرعب تملك گلبي
لزمني اخوها يريد يشك ملابس ضربته وما قبلت
اعوف الحديده فلتت روحي وركضت فاير دمي
واول ما فاتت صلوات رگعتها براسها
ونمت فوكاها اول ما وگعت ارفع براسها
وارگعه بالگاع خليتها تفتح عينها ولازمه بيدي
ترافس واخوها يسحب بيه من شعري ما عفتها
لحد ما فقدت وماتت بين ايدي وعيونها گلبتها .
سحلني اخوها قابض ايده يضرب بيه
بوكسات بحيله كله صرخت وما اشوف
بعد بي هوسة وصياح ومن ضرب البوكسات
شفت شهاب لازم المسدس وجهه على خالة وصاح
_ عووفهاااا ايدك منها السلاح بيدي اضربك والله .
ما رد والثاني يدفع بشهاب يريد يطلعه يتلاوه وياه
قوي رفع شهاب سلاحه ضربه طلقة والثانية وشمره
وصدح صوت طلقة ثالثة ودم حار طاح على وجهي
وخاله وكع عليه الدم ينزل منه سريع .
جمدت وتصلب حتى الدم بيه ركض شهاب
دفعه مني وسحبني من ايدي طلعني وراح
يركض على امه يفحص بيها وايده ترجف
_ يمه تسمعيني يمه ليش هيج تسوووين بيه يمهههههه .
اريد اوكف على رجلي صار بيها شلل من المناظر گدامي .
عافني وياهم واحدهم ينزف والموت على وجهه واضح
صرخت بلعومي تگطع من الصريخ جن جنوني
وهوَ واكف برا يحجي بالتلفون ومنفعل ويذكر
مبالغ فلوس يرشي المتصل ، رجع جرني من ايدي
طلعني وعيونه على امه يلوم بيها لأن غدرته
عبر من فوكاهم ما گدرت اسويها لزمني بأثنين
اديناته ورفعني حيل وعبرني معدتي گلبت
اول ما طلعت البـاب استفرغت اريد اجر العباية
طبگت سيارة بعيد من عدنا ونزل شاب بعمره
مرد ايدي يغصبني على مشي ومشيت حافية
على زرع صعدني بالسيارة واول ما حركها واحنا
نمشي مرن سيارات مو غريبات عليَّ رف گلبي
اول ما شفتهم وارث واخوانا .
ضربت جام السيارة كمز شهاب گعد يمي يلزم
بيدي قوي ظل يخنك بيه وبخ بخاخ بعيني مثل
الفلفل الحار وگع بعيوني اريد افتحها ما اكدر
بقيت اصرخ من الوجع الى ان فقدت على اخير وعيي .
گعدت ولگيت روحي بهذا البيت والصار مو كابوس
ويعدي الصار كله حقيقة المصايب اللي رجعت لحياتي
من جديد مو جذبه ، واني جنت اتذكر من الروتين والملل
اريد ارجع الأيامي واماني وفرحتي ليش خسرتهن ليش .
عدلت گعدتي استمع الكلام شهاب برا الغرفة
وصور واحد عنده يتفق وياه على مبلغ 34 مليون
ويطلعه من الغربية لمنطقة مستحيل احد يوصلها
اذا ياخذني شهاب انسى اهلي بعد واعيش بالحرام
اذا ياخدني الموت ارحم الف مرة من عيشتي وياه
دخيلك ربي خلصني دخيلك ماعندي غيرك يارب .
وارث ..
بندر : لك هاي كارثة والعباس كاررررثة وارررررث ..
زلم اثنين مضروبين طلقات دست فوك دمهم
گلبت واحد بيهم حتى اشوف ملامحة
تراجعت كم خطوة اول ما عرفته اخو صلوات
اريد التفت على بيرغ وداس على خاله بلا قصد
وركض على اخر الغرفة من شاف امه واكعه والدم
ينزف من راسها ، رفعها على رجله حضنها على
صدره يمسح الدم من وجهه ما مصدك
بيرغ : يمه تسمعيني يمه فتحي عينچ
وارث امي وارث ماتت امي وارث كتلووها.
مشيت رحت عنده من جسمه ظل يرجف
لزمتها من مكان النبض وقبل لا اجاوبه
اجت عيني على دوشك وسلاسل من حديد
عليه فتحت عيني حيل ما مصدك اللي اشوفه
نهضت على اعصابي تشنجت اخذت قطعة
فستانها وفتحته بيدي اتأكد ، اي هذا فستانها
متأكد نفسه هم شفته بالصورة من دزوها اليه
ملطخ بالدم فستانها وبقايه قراصتها مكسره
وعلى مخده كل خصله واگعه من شعرها وماكو بس اثرها .
رفع بيرغ امه وهمام يعين بي ركض بيها
للسيارة وتراث يخابر برا على شرطة يبلغهم
بالجريمة اختنكت من الدم ومنظرهم شلون
مضروبين ضربات قبل لا يموتون طلعت
امشي ضايع وكفت عباية صلوات هاي وهل
سيارة ك مال شهاب وينه هذا وينه
بندر : وارث .
_ لك بندر وينهاا وين اخذها شصار بيها
اخاف موتوهاااا خايف لا ضربوها
منين هسة اعرف مكانها وبيا وسيلة اوصل
الها شلون بيه بيا گاع ادورهااااا .
لزم ايدي يشوفني وعيني على بيرغ حرك
سيارته وجبر وهمام وياه وراحوا للمستشفى
بندر : اثار الدم مال الحذاء منا رايحة وارث
على هذا الطريق بس كم خطوة مبينه وبعد اختفى الأثر .
اشرت على سيارة بيرغ
_ لك من كون الله لا يسامحها ما مبريه الذمه
شگد يحبها بيرغ وخسرته وفوك كل مصايبها
بي اخذها وخايف يخسرها وهي ابد ما فكرت بي .
تراث : خبيثة ماتخاف الله ، بس تظل امه .
بندر : من نعل حشاكم على هيچ ام الله
يحركها بنار جهنهم ما اسامحها .
توجهت على سيارته كسرت جامها وفتحناها
صعد بيها ادور على اي مستمسك ماكو
فتحت المرايا تصير فوك السايق وگعت
صورة صغيرها بيها بيرغ وشهاب وهمه
صغار شهاب بعمر اربعة تقريباً وبيرغ
بعمر سنتين وشهاب حاضن بيرغ اخذها
تراث من ايدي وانا نزلت سمعته يگول
_ ساجر الله سبحانه بيا طريقة راح يحاسبه هجمهم ولده هجم .
مردت عيوني بأصابعي ورحت امشي ادور
بالباقي من المزرعة فارغة وبأطرافها قريب
من طريق طلعتها دم هواي بالگاع واضح
عرفته العار طالع من هذا الطريق صحت
الولد من وصلت الدوريات ونزلوا الضباط
على موقع القتل طلعوا اخوان صلوات اثنينهم
ميتين صوت الأسعاف والنداء منهم ومناظر الجثث
صلوات حتى اخوتها ما خلصوا من شرها ماتوا بسببها .
لا كاميرات بالمكان ولا دليل يوصلنا للقاتل
عفناهم يكملون مخبوصين وطلعنا بالسيارة
ويانا دوريه وحده للمستشفى بعد ما عرفنا
صلوات بعدها عايشة ما ماتت ، دخلنا ندورهم
لگيت بيرغ منتهي يحير بأمه وبقضية اخو
يفتر وايده على راسه من شافني اجه عليَّ
وگف تراجع متردد لا افشله ، تقدمت عليه
وسحبته من ايده حضني يصرخ
_ شهاب كتل امي وارث كتلهاااا ..
بنفسي اكله تستاهل والله ياخذها بس سكتت الخاطره
طلعوها من العمليات بعده التخدير بيها
اريد اموتها وعلي وما يبرد گلبي احس
نار وتحرك بيه بكل نفس اجره اختنك
وهيَّ عايشة ، كعدته على صفحه امسح
بوجهه وهمام اجه من بعيد يركض بيده
علاجات من شافني بصف بيرغ وكف
يباع علينا منتظر يسمع تصالحنا تراجعت
على قراري بس تنحل يروحون كل واحد بدربه .
وبندر وتراث بقوا بعيد يخابرون على اخوان تراث
بقوا بموقع الجريمة الصارت علمود التحقيقات
انتظرناها تصحى والضباط دخلوا اول ما صارر
عدها أفاقه دخلت وياهم هيَّ شافتني اختلست
الضابط : صارت بمزرعة تابعة الج جريمة
على اثرها فقد كل من نوح منصور و عادل منصور
حياتهم اخوانچ اثنينهم .
صرخت تضرب بروحها وشلعت المغذيات من ايدها
صلوات : ماتوا اخوتي لااا لااا ما ماتوووا
لا تكولها جذابين انتوا تريدون تموتوني اخوتي
عايشين ما يموتون اخوتي مابيهممم شي .
الضابط : ماتوا ، هل شهاب ساجر المسبب بمقتلهم ؟
باوعت عليه وتول مرة بحياتي اشوف صلوات
بهذا الكسر والضعف فات بيرغ وهي منتهية
صلوات : لا ابني ماله شغل ربع هذا ضربونا .
استغرب من جوابها وجاوبها عرفها جذابة
_ عدنا تواصل كامل وياهم واول ما تحركوا
لموقعكم احنا على علم بحركتهم وموت اخوانج
والإصابة صايرة تقريباً قبل وصولهم بساعتين .
رجعت تضرب بروحها لزمها بيرغ يمنعها
الضابط : اخر مرة اعيدها هل شهاب ساجر سبب المقتل .
صلوات : لااا ابني مايدري .
_ ما يعرف بالخطف ؟ شلون مايعرف وهوَ خاطف
زوجة اخو ؟ احجي الحقيقة راح تنسحلين للمركز
وبالتحقيق غصباً ما عليچ تعترفين .
بيرغ افتر خزره وهوَ تراجع يگله
_ سيدي لازم تتعاون ويانا هاي جريمة قتل .
بيرغ : احچي الهم شهاب وينه البنية وين وديتوها
حاجيني واساعدج بس كولي شهاب ضربكم ؟
عاندت وراسها يابس وسوت روحها عدها اغماء
طلعوا من الغرفة كلهم وانا وياهم ظل بيرغ
شربت جگارة ومشيت للصيدلية اخذت ابره
وماتحملت رديت عليها طبگت الباب علينا
قفلته بيرغ كاعد يمها لزمته بعدته ليغاد
منها وسويت الها افاقة غصب عنها كعدتها
جريت الأبره وخليتها قريب من رگبتها
وارث : صلوات احچي مرجان وين لا انعل والدي والديج
هسة والعباس اضربج هل ابره بنفس الثانية تودعين .
بيرغ : وارث .
وارث : اسكت من انعل ابهاتكم مرتي وينهاااااا .
صلوات : اغتصبها شهاب لگيته مشرحها تشريح
ومن عرفنا هوَ اخذها وشرد بيها ميته شوف بيا
صوب راح ودفنها حتى يطم جريمته .
ما تحملت ما اصفگها براشدي فريت وجهه
وخنگتها وعقلي بعد طار من راسي اخنك
بيها ما اسمع احد غير صوتها يتردد اغتصبها
رفعتها من رادت تموت بيدي
وارث : انتِ جذابههههه مرجاااااان وين
شهاب وينه احچي لچ احجي وينهممم .
صلوات : اخذهاااا والله اخذهاااا وراح .
رحت على ضباط دخلتهم عليها
_ اخذوها رافع انا عليها دعوة هسة تاخذوها
لا ارتكب بيها جريمة وابنها العار اريده زوجتي عنده .
الضابط راح عليها يسألها
_ اعترفتي ؟
صلوات : ابني ماله شغل صدك هوَ عايش
بيت صاحبة صار فترة ما يحاجيني .
وارث : جذابة ابنها ضاربهم وشارد اخي اذا ما تكثفون
بحث عليهم گول خلوني انا استلمه واحفر الگاع واطلعه .
راحوا ينادون وصاحوا على دكتور منع
صلوات تطلع الضربة قوية صايرة براسها
بحديدة بس اخوانها بطلق ميتين ، طلعت
وعفت المستشفى ما خليت مكان تابع لصلوات
واهلها ما دورت بي مثل فص ملح وذاب اثرها
خابرني ضـلـيل يسب ويهدد محتار بيا طريقة
اجاوب وابرر وهوَ كل حرف منه حقه يحچي .
خلص هل يوم وكلنا متجهولين كل واحد يدور بصوب
للساعة سبعة الصبح ثاني يوم وكفت السيارة
بمنطقة فارغة دخت ما اكدر اركز واسوق ، تمدد تراث
ليوره ونام بعد ما تحمل ، وبندر يفتر ويخابر ويستفسر
الساعة بـ 8 طفيت الجكارة واشوف بندر اجه يركض
_ وارث شهاب طلع برا الغربية .
ميمونة ..
فتت على استقبال بيدي صينية الجاي
انطيت الأم وارث ورحت على امي اخذت
وقدمت لجبر وهمام اثنينهم سوية ورحت
كعدت والصينية بيدي اسمع المصايب الصارت
وگلبي ممرود على بيرغ وحالته وملِكه واگفه
بالباب تسمعه وما اعرف بيها فرحت بالصار
بصلوات لو زعلت على زعل بيرغ على امه .
ام همام : اسوي ريوك قبل لا تروحون تاكلون .
جـبر : انا اريد اسبح متلطخ دم لعبت روحي .
اشرت اليه اني ارتب الحمام عفتهم ورحت
طلعت الملابس الوصخه خليتها بالغسالة
وجهزت صابونة وشامبو ومنشفه وصعدت
على ملابس همام اخذت منهن رتبتهن بالحمام
وكفت بصف ملِكه بالباب وهمست
_ الحمام جاهز جبر اذا تريد تسبح .
اخذه همام وفات للبيت جوة يحچي وياه الحد ما دخل
للمطبخ وهمام صعد سبح فوك ، دخلنا اني وملِكه
بينا ما بينا نجهز بالريوك ، ودخل وارث وراه تراث
واخوانه فاتوا على استقبال واخر واحد بيهم دخل
بندر انقبض گلبي من فكرت بعقليته كون يكبر عقله
ام وارث تحجي ويه تراث لان وارث منتهي الى درجة
عدوه اذا شافه ينقهر على ضيمه وجهه احس كبر
سنين على فراك وخوفه على مُـرجانـة .
طگيت بيض اكثر من قبل وزيدت ملِكه اجبان
والتفتت عليه عيونها مدمعه
ملِكه : لو مُـرجانـة هنا وتشوفهم هيج هواي
جان اختصرتها عليهم لفات وتجبر وارث يفوتهن .
گعدت على كرسي واهز براسي
ميمونة : اي سوده عليه تكلي مالها لزوم المواعين
بس هي من تاكل لازم تصب لروحها بماعون .
دخلت علينا امي عاطت بينا نكمل كلهم جوعانين
شفت جـبر طلع من الحمام لابس بنطرون وفانيله
والتشيرت مشموع على اكتافه والمنشفه بيده ينشف
وفات عليهم مايدري بوارث والولد جايين كلهم هنا .
اقل الدقيقة الدقيقة هواي ونرگع باب الأستقبال
وطلع بندر من البيت كله وارث وتراث طلعوا
واراه ما شافوا غير تراب شخطات سيارته شخطها
وراح ، رد وارث يخابر عليه ما يجاوبه تراث يخابر
ما يجاوب ، فاتوا وهمام نزل يعدل بشعره شافهم
مخبوصين وكف متعجب عليهم
همام : شكو خير شبيكم ؟
جـبر : ابن عمتك تخبل لأن شافني عدكم .
تراث : ها سالمين يمتى حجه الزلمة وعرفته
ضاج لأن شاف حضرة جنابك موجود هناا
لو تفر بحلگك بكيفك تحلل الموضوع من يمك .
همام : اعصابك انتَ سالمين اكلتو اكل شگال قابل
واذا ضاج هسة فد قندرتيش هوَ رجال غريب
تابع لهله ، عود امو عمتنا وماتت اللي رابطتنا ماكو
وجودو وعدمو واحد لا يقدم ولا يأخر .
وارث : بالله اكتم صوتك لا احرك البيت على راسكم هسة .
جـبر : عمي احنا نترخص نولي منا
مبين ما مرحب بيه ابد .
وارث : شوف لك انجب واكعدوا تزقنبوا زقنبوت
وكل واحد يولي يشوف شغله حجي زعاطيط ماريد
وعلى بندر هسة راجع لا يمك الزلمة ولا مهتملك .
فات همام علينا متعمد يسب بندر حتى يسمعني
دخلت للمخزن بحجة الشكر جبته اترس بالگلاصات
وهوَ ياخذ بالمواعين ، شاف بندر فات للبيت وگف
هوَ وتراث يحچون بالگراج شوية وطبوا وياهم
وگف همام بالمطبخ وصاح
_ جبررر وينك تعال .
دخل جـبر مستغرب لأن صاحه
اخذ مواعين البيض والجبن همام سلمهن بيد جـبر
_ ساعدني رتبهن على سفره شنو كلها گاعدة وانا اخدم .
ملِكه : صيح بدربك ولد فؤاد يعاونوكم على صواني
القوزي والمفطح خاف ما تگدر وحدك انتِ وجبر تتعبون .
هزت ايدها وراحت تخلي گيمر بالمواعين
من راحوا يودوهن خلت الماعون على كاونتر تگلي
ملِكه : هسة يغمس بيهم بندر ويدحس
شواربهم بمواعين المربى مدري شلون ساكت .
شردت منها من الخوف اول ما دخل همام يخوزر
وجبر وراه يريد صينية الگلاصات مال جاي صابتهن
اول ما طلع همام شالتهن هيه تريد تنطي وتگله
ملِكه : خوية ما انصحك انتَ توزعهن .
جـبر : ليش .
ملِكه : ياخذهن ويصبهن عليك سيد بندر .
اجه همام ابتسمت بوجه جـبر وانطته الصينية
لهمام اخذها ورجعت انطته صينية بيها سلطة
ملِكه : الخاطر سلامتك احجي والله ما عايزين .
ضميت شفايفي بحلگي اكتم ضحكتي
وجريت صمونه اعلس بيها اضيع السالفة
خزرني ابتسمت بوجهه وشلت جيس الزبالة
وركضت شمرتها برا ورجعت لگيته ماكو
ميمونة : ولچ ملِكه صمي حلگج لا تورطيني .
ملِكه : ما حجيت غير الصحيح خية وداعتج .
اخذت خيارة تاكل بيها وجرت حسرة شكبرها
ملِكه : الله هيج وهسة يخابرون ويگولون
صلوات ماتت يابه وروح ابوي صح حزينة
بس حتى هلاهل اهلهل عرس انصب عرس .
لملمت المطبخ وارد على تخيلاتها
_ المگابر ما اطم العاريه مثل صلوات
بس لا مو بعيده على رب العالمين ونخلص من شرها .
طلع بندر گلاص الجاي بيده يشرب
ميمونة : دباعي شلون غضبان غضبه .
ملِكه : افتحي الشباك صيحي عليه بسبس يغدي تراب .
ميمونة : واخوتي يدفنوني جوه التراب .
ملِكه : دصبحي بسبس .
اباع عليه ينافخ روحه بطرف خشمه اشرت عليه وجاوبتها
ميمونة : هوَ بندر مال بسبس يخوف .
سرحت وافكاري صارت تاخذني بعيد صافنه
بي وبحركاته ومركزه شلون يشرب الجاي
واتمعن بأثر الحرك وابتسم لا ارادياً من عقلي
يگلي صار احلى هوَ وهذا اثر الحرگ احسه
يوضح شخصيته هوَ غامض من زمان
صحيت على دفره من ملِكه برجلي ردت
اوكع من وراها تغمز جـبر ورايَّ يباع عليَّ ويشوف
بندر گدامي ذبيت الماعون من ايدي ومسحت ايدي
بملابسي ورحت اشغل بالطباخ ما ادري ليش .
وجبر راح يمشي للباب مال المطبخ فتحه
التفت عليَّ بندر خزره واني الغبيه من خوفي
من جـبر لا يروح يحچي الهمام تخربط عقلي اسأل بي
ميمونة : جـبر تريد جاي حميت القوري .
جـبر باوع عليه وابتسم
_ اي والله اريد جاي مهيل معدل .
وطلع وسد الباب شغل جگارة وملِكه طگتني
كفخه على راسي خلتني اعيد حساباتي بيها
ملِكه : سم بگلب عدوج يولو سمعچ ول بندر سمع صوتج
المعوق وانتِ تنعمي تسألين جـبر على چاي
راح يجبر عظامه بعد التكسير انوب طلع وياه ياا ياا .
عفت كلشي من ايدي من فات بندر متجاهل جـبر
وشردت للغرفة وطبكت بابها اطگطگ بأصابعي
واحوم منا ومنا ، خفت ياخذ نظره مو حلوة
لو يفكر تفكير مو صحيح بيه وعباله قبلت بجبر
عضيت اصبعي اجلد نفسي بالرزايل يعني واذا
عرررف واذا فكرك اريد جـبر اول وتالي اهلي يكتلوني
وما يرجعوني ، واني هم ما اريده اخاف يضربني
مثل ما سوه من خطفني بعد ما ترهمون ميمونه
استوعبي هل شي لازم اخليها براسي ما نرهم .
فزيت اعدل بروحي مو فاتت امي تصيح بيه
_ امشي يول البنية وحدها تغسل ساعديها
شعندج وحدج بالغرفة هسة وكتها ما تشوفين مخبوصين .
طلعت بلا ما اجادل لگيت باب الأستقبال
فتوح على وسعه فارغ كلهم طالعين
وام وارث تحجي ويه ملِكه تكول الها
_ بقيت يمهم اراقب بوارث لگمه ما يخلي بحلكه
يلوب يريدهم بس يخلصون حتى يهج يدورها
سودة عليه وين جانت الهمم هل مصيبة هاي .
گطع كلامهن صوت جاي من الغرفة مسموع بي صدى
واحس مثل البلسم نزل على صدري ، امسح بيدي
وامشي للأستقبال ادور على مصدر الصوت وهوَ
بكل مرة تخلص ترجع تتكرر وصوتها يرن
” يهل عـايش على رموشي ، حـلم كل لحظة يتجسم
جسد واتمثلك كوكـــــــب ، أصد لجروحك اتوهــــم
أشوفن كل جرح منــــــك ، ثغر للدنيـــــــــــا يتبسم”
رفعت التلفون بين ايدي مكالمة جارية قريت الأسم
“وارث اخو المره ” غطيته شفايفي من الضحكه
وادير بالتلفون حتى امي ما تقره صارت ورايه
وفتحت خط مستعجله همست
_ ها وارث اني ميمونة .
بندر : اذا ما احرك أهل اهلچ كثل ما حرگتي
اهل اهلي اليوم سايب انا معناها مو خوووش .
_ احم اي هذا التلفون موجود هنا لگيته .
_ جـبر تريد چاي يريد قندره ودحس بحلگه
وحلگ ابووووو يررريد لچ تحرگين بدمي متعمده .
_ لا والقران ، احم لا والقران هذا محد لازمه التلفون .
گعدت على تخم وامي تسأل بيه
_ شكو ؟
_ ماكو شي يمه بس هذا تلفون ابن فؤاد ناسي هنا .
_ يا خلي يردون ياخذونه .
بندر : بقي يمچ لا والعباااااس اروح هسة للمستشفى
انوم همام وجبر بشعبة الكسور ابو ابوهم يشوفونه .
ميمونة : ماشي وارث راح ابقي عندي من تجي اخذه .
بندر : حافظ دروبچ ولچ بنت السحارين السحارة
اذا تغلقي اشمر وارث وتراث بعيد واخوتچ بالمستشفى
وافوت عليچ بليله ظلمه واخطفچ وما اردچ بعد وعلي .
طبگت الخط بوجهه ومشيت سريع
ميمونة : فد ساعة ويرجعون ياخذون التلفون
يگول بقي عندج بي اشياء مهمه ممنوع احد يلزمه .
ولزمت القوري بي چاي جديد جلفته جلف بلا وعي
والتلفون بصدري وگلبي يدك دگات يريد يطلع من مكانه
جلفت كل المطبخ وبس صعدت ملِكه فوك صعدت وياها
بحجة اساعدها والتلفون ما بطل هز همزين سويته صامت
دخلت على غرفة وارث وبقيت شوية من الباب مفتوح
فتحت الخط واعصابي مضروبة بخلاط متلخبطه
ميمونة : الو .
_ رايده تموتيني .
_ شعندي وياك بندر هوَ اني واصله يمك ؟
_ جبرررر ميمونة .
_ همه يفوتونه للبيت اني شعليه اطرده .
_ يريدون يجلطوني اجلطهم وعلي اجلطهم .
تضايق صدري بقهر جاوبته
_ لا تجلط ولا تنجلط فدوة ابتعد مني اعتبر
نفسك ما تعرفني ولا تزوجنا ولا صار اللي صار
اني نسيت كلشي ومبري الذمة روح فدوة .
بندر : تروحيلي فدوة ؟
_ بندر گلت ررروح فدوة يعني روح .
_ انا اروحلچ فدوة .
طبگت الخط حتى ما يروح زايد رجع يخابر
ميمونة : تعال اخذ تلفونك من ام وارث راح انزله
يمها ورجاءً اي كلام بيني وبينك ما اقبل بي بعد .
_ انجبي بنت السحارين السحارة الغداره المكاره .
ميمونة : والله احجي لهمام وخلي شيصير يصير .
_ يمتى نتزوج .
_ ماتصير شيلها من راسك .
_ اي هوَ وره ما تخلص هاي المشكله .
_ ما اقبل بيك ما اريدك .
_ وانا اريدج غصباً عليچ وعلى اهلچ وعلى
عشيرة اخذچ طالبچ من العباس ترجعين مرتي .
هدأت اصواتنا ، گعدت على تخم رجلي وايدي
يرجفن لزمت گلبي احس بدگاته السريعة
بندر : لچ ميمونة بعدنا ما محققين احلامنا سوية
نسيتي بأيام خطبتنا خططنا للمستقبل كلهن
عارضات بعيني ما يخلني اعوفچ وعلي شلون
انساچ واحنا حتى اسماء جهالنا مختاريهن ؟
انكتم نفسي من تذكرت جنت احلم نعيش
ببيت صغير بس الفسحه الخارجية مالته
واسعه وبي حديقة مليانه ورد حتى اشم
ريحة الورد كل ما اطلع ، وثيل اخضر هواي
حتى احس بالبروده مالته واسوي اجواء
بالحديقة بأيام الشتوية نسهر نلعب لعبتنا
المفضلة من ايام خطوبتنا اكس أو او وافوز
عليه بكل مرة ويحترگ دمه لأن راسمه خطة
ولازم اني العب بالبداية واذا ما قبل ازعل عليه .
غمضت عيوني وگعت دموعي على خدي
وبصوت خنگتن العبرة والغصه جاوبته
ميمونة : هل ايام راحت وبعد ما ترجع
واذا قبلت بيك راح نعيش اسوء من اللي
عشناه ، لا اهلك يريدوني ولا اهلي يطيقون
اسمك ، ولا اني ارهماك بعد ولا انتَ ترهملي
طريقنا يختلف بندر ، حتى بيوم اذا اهلي
وافقوا عليك اني ما اتقبل بعد الصار ارجع
على ذمتك ودام انتَ من ذاتك طلگت تحمل ثمن قرارك .
سديت الخط وبقيته صامت ونزلت ضايعه ضياع
تام عقلي يفكر بصوب وگلبي بصوب ثاني
ابتسم من اتذكر كلامه ، واعصب من روحي
حتى ما اتأمل ولا اخلي يتأمل بيه لأن واثقة
مانرجع بعد واني استصعبها على نفسي
اقبل بي وادري بأهله كارهيني وبنت عمه تحبه
ونفسها بي واني واكفه بطريق زواجهم ، واهله
كلهم يحبوها ويريدونها تصير هيَّ زوجته وام احفادهم .
ارتب وبالي مشغول واجه براسي ترا تلفونه عندي
واذا عندي عوزها افوت ابحوش بخصوصياته
بس شكو بيها يعني اشوف اشياء بسيطة
لا عيب واذا بيها اشياء خاصة شلون زحمة اشوفهن
يمعودة قابل شكو خاصة صور ما افوت ادخل
بالله على محادثات شكو بنية بتلفونه اشوف مصاحب
هوَ بندر وينه وين المصاحبة بشبابه ما سواها
ويمكن من كبر سواها وحب وصادق بنات
معليه بي حتى لو مصادق بس فضولي بريد
يشوف محادثاته هوَ وزهراء غيرها ما اشوف لان عيب .
فتت على مخزن وختلت وره الباب فتحت
التلفون مقفول برمز صار ساعة اخطط تالي
مقفول برمز ، بس اني هم ثوله يعني بندر
هيج غبي وتفوته انتِ فضولية وتفتشين
طبعاً يقفله فد واحد لوتي وملعب .
رجعته بصدري وكملت شغلي وصلت للكراج
غسلته وفكري كله بمرجانة الله يخلصها
وترد سالمة لوارث واهله يارب ، فتت على
استقبال شغلت قران بصوت عالي ونرج
التلفون بصدري خفت اشوف منو رحت
على مطبخ بدون ما اطلعه وسعت فتحت
الدشداشة شفت اسم المتصل زهراء وانسدت
المكالمة دزت رسالة مو الشعارات قريتها كاتبة
” عيني سيد لا تنسى وقت علاجك هسة أشربه ”
ورجعت تخابر واني غليت غلي الدم صعد الراسي
فتت للمخزن وفتحت خط على سريع وبكل غباء
وبلا تفكير حجيت وياها
زهراء : الو سيد .
ميمونة : السيد طالع .
صوتها انكتم كتم ما ينسمع بعد ابد
سمعت بلع ريگها وصوتها رجف
_ انتِ منو ؟
_ من يجي بندر عود ابلغه خابرتي .
_ مـ ميمو .. ميمونة انتِ ؟
زاد قهري منها من عرفت صوتها بالتلفون
نفسها اللي خابرتني وغلطت وخلتني اسمع
كلام اهله عني وهمام كتلني بيومها هوَ هذا نفس
الصوت ونفس النبرة
_ اي ميمونة .
_ تلفون السيد شيسوي عندچ .
_ بندر عافه عندي من تريك يمنا .
_ تريك يمكم ؟
_ اممممم .
_ صيحي بسرعة .
_ طلع من يرجع اذا اتذكر اخلي يخابرچ تدللين .
طبگت الخط بوجهه ، وبقيت بحيرة والنار ما طفت بگلبي
ومغص مرد بطني وقلق زرف راسي زرف ، بقيت احاول
واحاول بالرمز وعصرت دماغي تدكرت رمزه القديم 111000
فتح واتصلت برقم وارث وبقيت ساكته اسمع صوت
منو يرد حتى اذا وارث اطبگ الخط ، كمل رن ماكو رد
رجعت ارن مره ثانية وصلني صوته ومبين يمشي بعيد منهم
ميمونة : عيني سيد لا تنسى وقت علاجك ك هسة اشربه .
_ شعرفچ بعلاجي .
_ من العلوية زهراء والله عرفت .
_ فتحتي الرمز شلون فتحتي ؟ قريتي المحادثة .
_ هههه لازم متعود على هيج رسائل منها
خوش تهتم بيك العلوية حتى وقت علاجك
ما تنساه وتذكرك بي والله بنت اصول .
بندر : ميمونة والعباس هي تراسل .
_ سيد هسة اني شعليه عسى ما تتزوجها .
_ لا ميمونة وعلي لان انسى علاجي هي تذكرني .
_ تحب تهتم بتفاصيل حياتك لو هيج بنات العم لو بلاهن .
_ وابو عبدلله اسايرها إني ميمونة والعباس
ما بيناتنا شي والله وداعتچ .
_ الله يكتبلكم الخير ويوفقكم ويجمعكم
متوالمين سيد وعلوية ربي يرزقكم ساده وعلويات صغنونين
كملت وطبگت الخط وغلقت التلفون كله مالته .
مُـرجانـة …
يوم كامل واني احاول اگوم على حيلي واستوعب
الصار ، ابواب الغرف مفتوحة ما يقفلهن وكفت على
طولي امشي للحمام قفلت الباب ودخلت جوه المي
اغسل الدم مني وماكو بالحمام لا صابون ولا شامبو
والماي صاير بارد الدنيا بدت تبرد ، لفلفت روحي
ولزمت الملابس نفسهن كاهن دم كلبي ما ينطيني
ارجع البسهن ، غسلتهن بيدي وشريتهن على تعلاگه
وبقيت بالحمام ما اكدر اطلع بس منتظرته يرجع .
رد بعد ما خلص صبري دگيت الباب وبصوت
مبحوح من الصريخ همست من حسيته وره الباب
_ اريد ملابس ابدل ملابسي غسلتهن
وبردانا البرد بعظامي و .
گطع كلامي من راح وطبگ الباب رجعت كعدت
والوكت يمشي جسمي نشف ودمي جمد بعروگي
وبعد ما طبگت بلاعيمي رجع للبيت يضرب بالباب
_ فتحي جـبر ملابس .
_ علگهن على باب واني اطلع اخذهن .
سواها مثل ما اريد جريت الملابس لگيت تراك
رجالي وجبير عليَّ صحت وامرد بي بيدي
_ هذا شنو .
_ ملابسي دبري امرج بيهن بين ما ينشفن .
ذبيتهن من الباب لعبانه روحي
_ ايعع ما البس ملابسك لو اموت من البرد .
_ مشكلتچ ما اگدر اجازف واطلع بعيد
من البيت وينكشف مكاننا اصبري مو باجر كلشي يتغير .
نغزني گلبي من كلامه وما ارتاحيت بعد ابد
من البرد رجعت اخذت التراك مغصوبة
لبسته كلشي جبير عليه والبجامة لازمتها
اخاف اطيح لفيت راسي بالشال وطلعت
معتكفه بالزاوية وريحة الدم بعدني اشمها
لليل ومن بعد هل ايام قدم صينية بيها
اكل دامي وابد ما يرفع عينه ويشوفني
اكلت لحمه صغيرة بطني تأذيني من الجوع
وخليت راسي على مخده الصغيرة ونمت
ما حاسه على روحي غير واني على طريق
مفتوح مثل مگطوع وقليل سيارات بي
ظل يمشي ويمشي واني مصدومة بلعت
لساني هذا شوكت صعدني ووين ياخذني .
دخل بمنطقة صغيرة بيوتها صغار
فتح باب ودخل السيارة بيها واني
ما ظل بيه حيل اصرخ ، نزلت ادگ بالباب
الشارع قوي واصرخ بكل ما ظل بصوتي
_ يا ناس يا عاام هذا محرم خااااطفني يا نااااس.
خنگني حيل بيده وشالني فتح الباب
دخل للمطبخ يمشي بيه شمرني بالصالة
حسيت بذني تگطعت من وگعتي شفت
بالگاع كزاز شلتها وركضت عليه شخطته
بنص ايده والدم يقطر منه ، مشه سريع
عليَّ فر وجهي فر براشدي خلاني ما اندل دربي .
ضربته وهوَ يرجع يزيد يضرب هلكت وتعبت وهوَ
ما تعب يحاول ما يضرب بس ما يتحكم باعصابه
ردت اسويها يا كاتل يا مكتول بس قوته تغلبت
على قوتي وگعت اظم براسي منه اتفادى ضرباته .
مُـرجانـة : اريد اهلي ولك وين جبتني
ما اريد اعيشش وياك ما اريدك .
شهاب : عجل تريدين واررث .
_ لا وارث ولا اي رجل بالكون بعد اريده
اني اريد بس امي امي .
لزمت بطني بأثنين اديناتي تكورت من المغص
ما فارگني صار ايام كله هذا من خوف واذيتهم
وبعد ما مر اليوم والثاني والثالث وهوَ ببن
يحاول يرتب بالبيت ويعدله حتى يكدر الشخص
يعيش بي لان مخربط ، وايام يجي مشغول يجيب
بالفلوس ويوزع بيهن حتى يأمن على نفسه
ما ينسحن ومحد يعرف مكانه ، دخل بيده
علاگه مال اكل عافها على ميز تعبان وجهه
ضعف صار ايام ما ينام ابد ما أشوفه ينام
راح للحمام وعيوني ما مصدكه عاف تلفونه
والتلفون جديد وشريحة جديدة بعده
حتى برامج مابي ولا مخلي رمز يقفله
حافظة رقم امي گلبي ظل يرفرف من سمعت
رن تلفونها جاوبتني نقش انفجرت ابجي
واكتم بصوتي وهي تركض من يمعت صوتي
نقش : مرررجانة هاااي مُـرجانـة .
ضـلـيل : بوية مُـرجانـة تسمعيني .
_ ابوس ايدك خلصني منه عمووو
احنا بمنطقة **** بفرع صغير اسمه ****
سمعته يحجي بالتلفون گال هذا بيت مال
رجال جبير بالعمر اجره اله ، عمو تعال خلصني
لا تعوفوني والله تعبت مريضة اني مريضة والله .
بعدني تحجي وفات للغرفة شاف التلفون بيدي
لزمه كسره وكير الشريحة ولزمني قوي من ايدي
يرجع بيه انضربت بالحايط صرخت من وجع
بطني لزمتها حيل وعطت بطنيييييي
_ شسوووي بيچ شسووي اموتچ
واكتل روحي واخلص من هاي العيشه
المصخمه دفعت اللي عندي وماعندي حتى
اوصل لهنااا لا تخربين عليَّ كلشي بنيته مرجاانة .
دفعته ودمار ضرب راسي لزمت معدتي
وركضت على حمام استفرغ ما اتحمله
ولا اطيق وجهه وكل ما يقترب لهل درجة
مني استفرغ بكد كرهي ، فات يغسل
بوجهي وادفع بيده اريده يروح مني
يعاند طلعني وشمرني ببطن السيارة
وجر مبايل ثاني من الصندوك مخلي
وظل يخابر بصاحبه وهذاك يطمن بي
من المستحيل يلگون عنوانه .
ميمونة …
بيرغ رجع بعد ايام البيت وارث باقي بالمستشفى
ويه صلوات وباقي اخواني وياه ، فات يغسل
وملِكه حبست روحها بغرفة ام وارث حتى ما تتعارك
وياه وهيَّ تشوفه متعاطف ويه امه رغم يعرفها شيطانه .
دخل همام البيت وراه سَــهم يركضون
ضامين الأسلحة بالمخزن اخذوهن
وام وارث تركض وراهم اسمعهم يصيحون
_ لگيناهااا مُـرجانـة عرفنا مكانها
عمها خابر رايحين نجيبهااا .
ها خبر وصل النا بعد ايام من تعب وعذاب عشناهن
مثل الماي البارد ونزل على گلوبنا كلنا ندعي
كعدت ام وارث بالأستقبال فاتحة الباب عينها
عليَّ تدعي الله يسلها عليهم ويحصلون مكانها
ويردوها ما طل صبر عزنا بعد ابد
خابرت على سَــهم وبصوت خافت جاوبني
_ مقابيل الباب مالتهم راح نفوت عليهم هسة ادعولنا .
فات بيرغ وام وارث تبلغه بالصار خابرهم يستفسر منهم
واثناء ما هوَ يحجي ويه همام الدكتور خابرة
طبگ الخط وجاوبه بسرعة
بيرغ : هلا دكتور هسة انا جايكم
اخوتي صار عدهم شغله ضروريه اعذرنا .
_خوية بيرغ ضروري تجي للمستشفى .
_ ليش دكتور صاير شي .
_ انا اعتذر منك اخي ويعز عليه ابلغك
والدتك انطتك عمرها قبل خمس دقايق وماتت .
يتبع ..
الفصل التالي اضغط هنا
يتبع.. (رواية الموروث نصل حاد) اضغط على اسم الرواية لتجد الفهرس كاملاً بجميع الفصول.