رواية الموروث نصل حاد – الفصل الرابع والثلاثون
♛ 34 ♛
لزم خاصرته متوجع الى درجه كل ملامحه مكشرها
شهاب : اذا صدك تحبيني ومحروگ گلبچ
عليه لا تحرگين گلبي بيهااااا عوفيهاا يمه
الخاطري لا توصلين عدها لا تخليها تكرهني
اكثر ، تعبت وانا اقنعها حلفتچ بخاطري .
صلوات : اريد احرك گلبه اريدو يبچي مثل
ما يبچي ولدي اخلي يدحگ عليها تنزف مثل
ما عيشني يعيش ابن سكينة المنبوذ ابو النسوووووان .
شهاب : أتبرى منچ يمه وكل اسرارنا اسلمهااااا
والله فلا ابيت بعد سرر واحد من اسرارچ بگلبي
عوووووفيهاااااا لا توصلين عدهااا تحركين
گلبي انتِ مو بس گلبه يمه ، شردي عوفيها واشردي .
سدت الخط بوجهه وهوَ جن جنونه يضرب
ايدو بالگاع ملخها تملخ ومن كمية الوجع
بي سحب بيرغ من قميصه يسحب بي
شهاب : اخذني عدهممم اخذني .
بيرغ : وين اخذك مخبل انتَ بعقلك ولك وارث يكمل عليك .
شهاب : همام تعال همام انتَ اخذني .
بيرغ : ماكووو روحه على مكان تاكل قندرة واگعد
شهاب : گلبي بيرررغ گلبي راح يطلع من مكانو .
بيرغ يخابر والممرض رجع يضمد بجروح شهاب
وينطي ابر ، همام وسهم طلعوا من البيت وهذا
شهاب صار مخبل رسمي مخبل يصررخ ويسب
يريد يروح وبيرغ راح عندو سحلو من قميصو
ويضرب بي راشديات يطبع ايدو بوجهه
بيرغ : شعندك تووولي زلمتهااا هنااك
حرمة اخوووووك يول هااي حرمة اخوك صارت .
شهاب : ما يستاهلها يعذبهاا هذا وارث مجرم
يحب بس روحووو راح يذبلهاا من القهررر يدمرها دمار .
بيرغ : انتَ شعليك هيَ اختارتو وحبتو انتَ
ممنوع تدخل عيب تذكرها عيب حرررام يول حرام .
شهاب : احـ…
قبل لا يكمل انهار بيرغ وگع على بيرغ بوكسات
الممرض وام وارث وام تراث وفاطمة وكلها تفكه
من ايده ما يفكه ملخه تمليخ گطع اخو تگطع
بلا اي رحمة يشيل بي ويدگ بي بالگاع
وگف بكل حيله يرفس بي ويصيح
وهو يلهث فحطان صدره تنفسه مضطرب
بيرغ : حقو وارث حقو من كسرك تكسيرررر
وانااا اكمل عليك يا عاااار ، اخوووك شنوو
من بشرر انتَ حلت بعيونك حرمة اخووووك يا سگط .
تركو جثة حتى الممرض رفع ايدو ويردد
_ يحتاج مستشفى مابيدي بعد شي عليه
يروح يموت بيدي كلشي بجسمه ينزف .
بيرغ : خلي هل ديوووث چلب وماااات خلي
ينزف ويموت ويندفن عااار والله عااار يستاهل .
وارث …
باب الشارع مفتوح وطفل غريب طلع من البيت
عرفتها خلت طفل يعبر الباب حتى يفتح الباب
نزلت ومفاتيح البيت بيدي فتت عليهم بعدها
بصف باب المطبخ مقفول تريد تفوت من شافتني
بيدها بطل من ريحته عرفته بانزين شمرته كله
على راسها غرگت روحها وصاحت
_ لا توصل عندي لا توصل أحرك روحي
وهذا اخوي على خط ، هاي گدامك خووية
انا اريد الموت احرك روحي بسبت هل منبوذ
هجم بيوتنا هجول ولدي بلع حقهم واملاكهم
ويعذب بيهم ينتقم مني بولدي لأن ابو چان
يحبني اني وخلفتي وطاردو هوَ وامه .
ابتسمت بكل برود ورجعت ايدي خلف
ظهري وبالثانية رفعت اصبعي افر بي
_ استعجلي ريحيني خليني اشوف
النار شبت بيچ احترگي حتى اطفي نار گلبي .
من شفت ملامحها وصدمتها زادت ابتسامتي
دخل تراث وشيخ فؤاد واخواني علينا وعاط بيها
_ عمي انتِ شني من حرمة فلا تنجرعين
ركدي وشمري هل جداحة من ايدچ .
بوسط هوستنا صدت نظراتي على باب المطبخ
لمحت مُـرجان تفرك بعيونها مطفيه من النعاس
قبل لا تستوعب وتشوف المهزلة هاي تعديتهم
وطلعت جداحة بيدي اقتربت من صلوات
وشغلت الجداحة طگيتها طگتين ، طفرت وصرخت
خايفة اعرفها تعبد روحها وجذابة تريد تغطي
على مصيبتها تسوي روحها تحرك نفسها .
دخلت المفاتيح بالباب فريتهن فرتين اول
ما انفتح الباب تراجعت مرجان وعيونها على برا
وبصوت خافت النعاس مستولي عليها تسألني
_ منو عدنا ؟
_ خطار .
_ هاي ام ش ..
_ بيررررغ ام بيرررغ هاي صلوات .
ماگدرت اخفي غضبي طبگت الباب برجلي سديته
بوجههم ورحت فكيت ماي السنگ غسلت ايدي
من الدم ودرت عليها قبضت على زندها بيدي
امشي بيها على درج سريع ، دخلتها على غرفة
ووفعت اللحاف بنفس الدقيقة صحت بيها بتحذير
_ نامي مرجان .
_ مُـرجانـة .
_ مرجان نامي .
_ اريد احچـ…
_ بطلي عناد ونامي خلي هل ليلة تمررر على
خيرر ، نامي ترا باقي كم ساعة ونساافررر وتتعبين .
طفيت كل الأنارة بالغرفة وقفلت الباب وطلعت
من الغرفة كلها مخنوك ، انزل والف فحرة وفكرةً
براسي ، من جهه حمامة وغريب ، واخوتي بصوب
وكلها بكوم ومرجانة وكسرتي بيها هاي ذبحتني .
مُـرجانـة …
عگطني بالفراش مثل الزعاطيط ورجع طلع
وآني متأكدة اكو عركة برا وهوَ يگول خطار
بقيت آكل بأظافري بفراشي ، مليت طگيت
وگفت لبست الشبشب وافتر بالغرفة
اخترعت من وجهي من شفت بالغلط روحي
بالمرايا وجهي مصخم من الكحل والمسكارا
صايرة عبالك باندا ، اخذت ملابس غير هاي
ملابسي ودگيت الباب اكثر من مرة فلشته
ارتديت من الباب ورديت من انفتح ودخل
رفع ايده يأشر شكو نظراته تفترس وجهي
بدون ما ينطق رجفت اعصر اصبعي
مُـرجانـة : اريد اسبح الباب مقفول .
_ هذا سويت مو غرفة .
_واذا ؟
_ الحمام هناك بالأخير ست .
حصرتني دموعي نترت جسمي اعدل بشعري
وهوَ حاد نظراته مثل السيف بوجهي ، تحاملت
على نفسي وكتمت خوفي وطلبت منه
مُـرجانـة: تگدر تسمعني ؟
_ لا .
_ دقيقة بس دقيقة .
_ مرجان تفوتين تسبحين وتنامين فوراً.
تألمت من ايده وضغطها على معصم ايدي وصلني
للحمام بلمح البصر وفتح الباب ويريد يروح
بهالبساطة واني بغباء بس اريد اطول واحچي
وياه اخذت هل موضوع حجه ما ادري راح اندم
مُـرجانـة : جوعانة .
قلص عيونه متعجب من طلبي نطق بحسرة
_ كملي وانزلي للمطبخ .
_ ونحچي ؟
_ لاااااا .
_ زين شوكت .
_ شنو ؟
_ شوكت تصاحبني ؟
تنهد مقهور الى درجة حسيت طلعت من گلبه
الحسرة ونزل وعافني مو طايق يخلي عيونه
بعيوني ، دخلت جوة الماي البارد جسمي گب نار
وگلبي محترك سبحت وذبيت كل المكياج والسبري
من شعري ، نشفت وطلعت لبست تراك ونزلت
صايرة مجزرة بالشموع كلها متكسرة والورد
كله ميت ومتگطع ، ركزت بميز الطعام من
صعدنا ما شفته بنص الصالة صايـر
عليه مواعين اثنين ومرتب بعده ونازل منه تول
والكراسي عليهم تزيين بلون الورد الأحمر
والشموع بالگاع وعلى ميز موزعات بطريقة حلوة .
وگفت باب المطبخ فاتح الثلاجة بيها اشكال
اكل وحلويات مجهز ابساط وادق الأشياء
على هل ليلة وكلامة بأيام خطبتنا كله منفذه
بحذافيره چان يحلم نعيش هل ليلة وتصيرر
مميزة بحياته لأن ماعنده ايام حلوة بحياته
جفلت اول ما طلع من المطبخ وراح على ميز
بيده ماعون اكل ، وبحركة وحدة بتك ايد شكو
شي عل ميز طشره وكسره بالگاع
كلشي تناثر وخرب مثلنا.
وارث : تعالي اكلي .
ايدي على راسي بقيت بمكاني دموعي تصب
_ اسف وارث اسفك اني خربت كـ .
وارث : مرجان بس تكملين اتصرف تصرفات
حتى ربنا بعد ما يسامحني عليها حسچ ما احس بي .
فزيت كتمت صوتي ومشيت من دگ الكرسي
بالگاع وعاط بيه حتى اجي واگعد ، نفذت
اول ما گعدت جر الكرسي مالتي عدل على ميز
_ تاكلين وتصعدين تنامين ورانا سفر .
_ عادي ما نسافر وانتَ عصـ..
_ ولا نفس .
تركني وحدي مثل الزمالة صافنه على ماعون
ودموعي تزخ على وجهي ، خليت الماعون مثل
ما هوَ وصعدت فوك ارجف مادري من روحي
مقهورة لو من وارث ورفضه المفروض يسمعني
طبيت بالفراش بچيث دموعي خلصت للصبح
گاعدة عيوني ما غمضت دقيقة ، مثلت النوم
من دخل وحسيته قريب مني فكرت راح يقترب
ويكمل كلامه بأيام خطوبته بس خاب ظني
من صاح بصوت خشن يخوف
_ مررررررجان مرررررجان .
رفعت جسمي عرفني من عيوني جنت گاعدة
بكل رسمية يحچي عبالك غريبة ولا اني نفسي
اللي حبها وجان يتغزل ويحچي احلى الكلام وياها
_ بدلي بساع .
_ اذا انتَ كارهني ليش نسافر .
_ كارهچ ؟
_ اي كارهني حتى ماتريد تشوفني .
_ بكيفي عندچ شي ويايَّ بكيفي
مرتي انتِ مرتي وين ما اريد اروح بيچ بكيفي .
طلع ومن خوفي طلعت ملابس بدلت وطلعت
وراه صوته واضح يحچي هوَ وسهم
_ اريدك تنطف البيت وتسلم المفاتيح
بأيد امي لو بأيد ميمونة حتى يبلشون
نقل وساعدهم انتَ .
سَــهم : تتأخر ؟
وارث : ما اعرف بس ما اريد ارجع هل فترة
ختى لا الزمك انتَ واخوتك اذبحكم واخلص
منكم ، اريد اصير ذباح حتى كلها ادافع عليَّ .
مشيت وگفت بالباب اعصر بيدي من شافني
طلع الجنط ورجع اشر حتى اصعد ، رحت ركبت
بسيارة تراث هذا مطفي من النعاس تراث ونايم
على ستيرن السيارة من كمل وارث من الجنط
وصعدهن وركب ضربة على راسه وعاط بي
_ كملنااااا تأخررررناااا سوووقهااا للقندرة .
_ ولك نعسااااان .
_ عفية عيون شگد تنام .
_ چا مثلك عندك مانع نوم بعيونك
تخوف من التعب صايرات چبود دم وما تنام .
دار وارث على شارع وشغل جگارة الطريق
كله هوَ وتراث يتسابقون بالچكاير سوولي
إبادة اختناق متعمد ، من نزلنا اني ايدي
على صدري اگح من صدري لعبت روحي
جر وارث ايدي لزمها بين ايده ويمشي
وتراث بيده الجنط مالتنا امي مجهزتها
قبل العرس بيومين ، بعدنا نكمل اجراءات
وتلفونه رن اكثر من مرة اجه اقترب مني وگال
_ امچ من البارحة تخابر هاچ جاوبيها .
اخذت الجهاز منه راح يكمل الاجراءات
وتراث مقابيلي بعيد بس يراقبني
_ الو يمه .
_ هلا بعدّ امچ ولچ وينكم من البارحة
متت الف موته مُـرجانـة الف موته متت
والأفكار السوداوية ماخلت عقل براسي
غير تذكريني يا ماما وطمنيني عنچ.
مسحت دموعي وحاولت أجاوبها
_ اني زينة لا تخافين .
_ ووارث ؟
_ عصبي .
_ ضربچ ؟
_ لالا بس عصبي ومايحب يحچي ويايه
ابد ولا يريد يسمع صوتي وكارهني .
_ حقه يمه الصار مو قليل اي شخص
مكانه يلعب لعب ، حتى اني ما راضية
عليچ بس گلبي ما ينطيني اگطع منچ
هي هاي عمله تعمليها ولچ تحچين انتِ وهذا المجرم .
_ يمه بس اعتذر مني و… رجع وارث اخاف يسمعني
ويعصبي اخاف يضربني .
امي مثله تخبلت عليه وصارت عصبية
تغلط وترزل واني بلعت صوتي لأن رجع
وصار قريب مني اذا ارد يملخني
غـاليـة : اسمعيني من توجعين اعرف شسوي
بيچ والله العظيم فلا عرفت اربيچ يا طايحة
الحظ اذا الزمچ اگطعچ تگطععععع .
شهگت غصب عني وهمست
_ يمه كافي اني خـايفة .
نزل وارث نظراته عليه يريد يسحب التلفون
رفضت وبقيت استمع لكلام امي
غـاليـة : اسمعي من تسافرون راح تبقون وحدكم
حاولي تفهمي واذا اسمع دافعتي على ذاك
المجرم اجرم بيچ ، صالحي وارث واسمعي
ركزي بكلامي زين واعرفي شنو تسوين .
بقت تحچي وتعلمني وتوجهني واني ارد
بـ اي ، ومرات من الخجل اصفن وارجف
وحتى حلگي يبس ، سديت الخط وبقيت
اباع عليه الدنيا كلها ما طايقها يخووف يخووف
هذا وين يفيد وياه هيچ اشياء امي تحچي وحدهاا .
خلص صبري منّ الأنتظار الى ان سمعنا وجهتنا
ودع تراث ورجع اخذ ايدي واني امشي وياه
ماعندي حل ثاني صعدت بالطيارة دايخة
بس بگد ما عصبيته مو طبيعية اختنگت
حلقت الطيارة صگيت على اسناني
طلعوا صوت واخاف حتى انطق غمضت
عيني قوي غمضتها وقابضه على ايدي
وراسي منزلته اردد ايات قرانية ، حسيت
على دفو ايده تمتد على ايدي ياخذها
بين ايده يطبطب عليها وبصوت هامس يطمني
_ ثواني وتستقر بالجو بعد ما تحسين بيها .
_ لا تعوف ايدي لا تعووفها .
_ هوَ انا اگدر اعوفها .
استقرت وبقت ايدي بيده الى ان هبطت الطيارة
وصلنا على دولة اللي اختارينا اني وياه نخلص
احلى ايام حياتنا هناك بس كلشي خرب كل
تخطيطاتنا انتهت وهل شي دمرني ودمر اعصابه
والأصعب من اتذكر كلامة عن هل ايام بالتفصيل
ومتأكدة كل عاي عصبيته لأن يتذكر وعودنا اللي ما تحققت.
اجرنا سيارة وعيوني تحرگني من النعاس وبطني
تقرقر من الجوع ، وصلنا على مكان عبارة عن جبال
واكواخ محاطة بأشجار وخصار يرد الروح والهوى
نقي نقي اجر النفس عبالك توني اتنفس والبرودة
تعفي من الخضار ما تحملت ما انزع حذائي وامشي
على گاع عبارة عن عشب الأخضر البارد ، وهوَ راح
يجيب ورقة بيها الأتفاق بينا وبين صاحب المكان .
صعد على واحد من البيوت وفتحها المكان فارغ
هدوووء هدوء ماكو ولا نفس ، تقرب وصاحني
_ تعالي اصعدي .
رحت بدون تردد صعدت فوك وحذائي بيدي
وارث : فوتي ارتاحي انا رايح اجيب الجنط .
نفذت ودخلت بدون عناد اكتشفت المكان وحدي
اول ما دخلت الحمام على يميني وعلى يساري
غرفة النوم ، بعدها المطبخ والصالة الكبيرة
وكلها مؤثثة وشبابيكها مطلة على جبال .
فتحت الشباك ورجعت على حمام وذبيت
كل ملابسي واخذت حمام طويل ذبيت التعب كله
واول ما كملت اكتشفت اني ورطت روحي
بقيت بلا منشفه ، اضطريت امد راسي
وغصب عني اصيح بأسم وارث مرة واثنين
وطلع بعده ما داخل البيت على حطته
وحتى جنط ماكو ، عضيت شفايفي وضربت
گصتي وركضت على غرفة ادور على شي الفلف
روحي ماكو ، جريت الغطوه من السرير سترت
جسمي وبقيت گاعدة انتظرة ماكوو ذاب
هل رجال وراح بعد ما دخل .
خليت راسي على مخدة عيوني توجعني من التعب
انتظره وعبالك نساني ، هسة انتَ كاره تلتقي بيه
ليشش تسفرني ليش ، نمت مهضومة والدمعة بعيوني .
نبهتني حركة قريبة مني على الفراش بعد فترة
بس بعيوني النوم حتى ما اگدر اتحرك رجعت
غفيت بس بين نايمة وبين وعيي موجود حسيت
نسمات باردة تضرب بجسمي فكيت عيني
ورادت تضربني جلطة من شفت الغطوة
بصوب واني بصوب ثاني وصايرة بوسط
الچرباية وحركة وارث ورايَّ وانفاسة متخربطة
لو اموت ما اگعد وهوَ موجود واني بهل حالة
لو اموووت ما اتحرك لو امووت يمه لو يجي
هسة ابو بريص ويصعد عليه هم ما اتحرك .
بلعت ريگي وجسمي تشنج ما تحملت اكثر
جريت الغطوة والتفتت من سمعت صوت الماي
بالحمام ، وگفت اتعثر بالغطوة من رجعت لفيتها
وگعت على وجهي بصف الباب وما اهتميت
دام هوَ بالحمام ادور على جنط بكل مكان بالغرفة
ماكو ، هرولت على صالة ماكو جنط ، رجعت
ادور بالكنتور فارغات اريد ارجع اطلع وهوَ
طلع ردت اختل جوة الچرباية من الفشله
صار بالباب بطرگ المنشفه واني بطرگ هل غطوة
تجمع الدمع بعيوني واشرت على كنتور
_ عليمن تبچين تحرگين بگلبي ؟
_ ماكو ملابسي ضايعات ؟
سوالي مكان حتى اطاع من الغرفة ويحاوبني
_ موجودات هنا تعالي .
_ وين ؟ بكل البيت دورت وماكو والله ماكو .
_ شدعوة هل تعظيم لو تريدين حجه تبچين عليها .
_ اكو هواي حجج ابجي عليها وبجيت هم .
_ ابچي اذا تريدين لطمي مشكلتچ مو مشكلتي .
راح يمشي على واني امشي وراه امسح بدموعي
ليش ابجي ما ادري ليش ابجي بس عيوني تريد
وصلنا على باب لون ابيض حتى ما يبين زين
اول ما فتحه الأضاءه اشتغلت وحدها باوعت
بعيونه خجلانة وتمسكت ورفعت الغطوة زين
دخلت لگيت غرفة صغيرة بيها كنتور
كزاز والجنط بالگاع ، وميز ومرايا
مبين غرفة ملابس وتبديل .
تقدم على جنطته فتحها على حيلها اخذ ملابس
_ رتبيهن بالكنتور لأن مطولين هنا .
قبل لا أجاوب طلع من الغرفة ، بسطت بالگاع
ادگ وانوح يعني شنو مطولين وهوَ بهالطريقة
يعاملني عبالك غريبة ولا عبالك نفسه اللي جنت
احچي وياه بأيام الخطوبة ، مرعوبة لايكون كلامهم
حقيقي وارث بعد ما تزوجني يهملني .
ادور بالملابس كلهن مشلحات بس ملابس
الطلعة فساتين محتشمة ، لبست وحده
من شلاحه قصيرة تشبه الفستان مخصره على
جسم وأكمام الفستان ماكو بس خيط فضي
مثل السير على كتفي يلزم الفستان ، سرحت
شعري وايدي ترجف خايفة اطلع ، بقيت
بمكاني اباع على روحي اذا اطلع هيچ
هسة يفكر بيه تفكير مو حلووو هاي
تلبسها بنية بشهر العسل اني بشهر القلق والعصبية .
جريت شال لفيت روحي بس شنو يخفي ويضم
طلعت رجلي صارت عبالك مطاط اريد امشي
ما اعرف هوَ فاتح البالكون ويدخن گاعد على كرسي
صورتي تصير بجام باب البالكون بدون ما يلتفت گال
_ بدلي ملابس طلعة حتى نطلع .
_ وين ؟
_ تاكلين .
_ انتَ صار كم يوم ما نايم تريد تنام على صو…
_ انتظرچ برا مرجان بدلي على سريع .
كمز مثل الخايف من مكانه وطلع مايتحمل
كلمة مني ابد ما متحملني عبالك مغصوب
عليه ، رجعت على غرفة شمرت الملابس
وگطعتها تگطع وجريت فستان لبسته
ولميت شعري لبست شالي بإهمال وطلعت
حتى عطر ما خليت حتى وجهي ما شفته .
مجبورة امشي وصلت عنده برا نزلت على درج وهوَ
يقفل بالبيت ، نزل ورايَّ يمشي قبلي مو مهتم بيه
وصلنا لمطعم وهوَ بين الدقيقة والثانية يلتفت
يشوفني موجودة قريبة لو لا ، اختار طاولة
مقابيل الماي والجبال والطيور طايرة والشمس
طالعة وعالم قليل بالمكان كلهم مبينين عرسان
او عائلة بدون اطفال ، قدم منيو واحد مقابيلي
وارث : شنو تشتهين طلبي.
شغل جگارة ودار وجهه بعيد عني بعدم مبالاة
_ وانتَ ما جوعان ؟
_ اممممم .
_ شنو ؟
_ لا .
_ بس انتَ ما اكلت شي من يوم العرس.
_ اكلت منو گال ما اكلت .
_ شوكت ؟
_ وكلتيني انتَ مرجان وكلتيني اكبر صدمات
بحياتي بيوم واحد حولتي احلامي كوابيس
كسرتي عيني وفشلتيني وبهذلتيني
مرغلتي شواربي بالطين .
صفنت بعيونه هوَ دار وجهه مني يجر نفس
من الجگارة بكل حيله لميت شفايفي والعبرة
خنگتني صار شگد اتوسل بي نحچي وهسة
من طلعنا نطق حتى استحي اجاوبة
جر المنيو وطلب اكل بدون ما انطق بحرف
بقيت على وضعي نزلوا الأكل ما تحركت
ولا رفعت راسي بعد اخاف واستحي من العالم .
وارث : اكلي .
_ رجعني على بيت .
_ اكلي ونرجع .
_ ما اگدر بعد ما اگدر رجعني .
دفع الكرسي نزيت وجفلت اباع على عالم
خفت يضربني افتر واجه قريب مني جر
كرسي وگعد يقرب بنفسه اكثر واكثر
اخذ مثل الخبز بيها سمسم اخذ بيض
على گد لگمة وقربتي عليه اكثر
_ اكليها .
_ مـ .. ما .. ما اريد .
_ اذا ما تاكلين افلش هل ميز اكلي .
_ وارث .
_ اكلي .
_ وارث لا تخوفني منك الله يخليك .
_ مرجان .
_ حباب كافي وارث الله يخليك رجعني للبيت .
رفع ايده وابتسم للبنية تشتغل على حساب
واشر بكفوفه يريد الحساب ، بسرعة اجت
بنية ثانية تحچي وياه كلام تركي مو مفهوم
من عرفته عراقي صارت تحچي وياه مكسر
وتسأل بي ليش ما كملنا ولا لمس الأكل اكو مشكلة ؟
وهوَ يفهم بيها الأكل مابي شي بس زوجته حامل
وتلعب روحها من الأكل ، وسعت عيوني من جذبته
من استوعبت الكلام وهمست بيني بهمس
_ جذاب .
_ مثلچ .
اخذ ايدي بيده وطلعنا من المكان ، اريد ارجع للبيت
ما يقبل جرني جر على ماي وبصفه اكو مرجوحة
چبيرة ركبت بيها وخليت رجلي تلعب بالماي
وفستاني يغط رفعته مد ايده ورجّع الفستان
وراح بعيد يمشي بقيت اباع على طوله
التفت عينه عليه وگعد بعيد ، اني اعرف طريق
البيت بعد ما اگدر استوعب تصرفاته لااا لااا
ركضت على بيت وگفت بالباب
اتبعتي اجه ورايَّ گض ايدي وقدمني عليه
_ انتِ شلون ت..
_ كافييي افتح الباب كافي خابر امي .
_ امچ شكووو امچ اخابرهااااا ممنوع بشر يدخل .
_ احچي وياها اريدهاا بس اسولف واقفل الخط .
_ ماعندي تلفون ماعندي خط وما اشتري خط
ولا اريد التلفون ولا افتح تلفون ولا نخابر احد .
فتح الباب خفت منه خفت احچي بعد ويضربني
بقيت بملابس ودخلت الغرفة قفلتها عليه
بچيت الى ان غفيت غصب عني من التعب
وما گعدت غير من اختفت الشمس وظهر القمر
لميت شعري وفكيت قفل الباب بلا صوت مشيت
اول ما وصلت للصالة شفته گاعد على كرسي
مقابيل الجام وطبلة يمه بيها گلاص چاي
وطفاية جگاير وتلفون بيده من اقتربت شفته
تلفوني انقبض گلبي وعيوني نطت من شفت الرسالة
مكتوب بيها وهوَ يقراها بكل تركيز عبالك يحفظها
بحيث اني موجودة ولا حس عليه
شهاب ” وارث انفرض عليچ وقبلتي بي هذا مو حب
لو عندچ طريق غير طريق وارث تختاري ومحمد
انتِ وياه ما متوالمين ولا يستاهلچ مُـرجانـتي ”
تلمس جوابي بالتلفون كاتبة
” عوفني بحالي الله يخليك ”
جاوبني
” لو مو تتزوجي حتى لو تخلفون راح تبقين
تريديني لا تظلمين نفسچ وياه هذا اكبر منچ
ب14 سنة ما يستاهلچ ، ما تعب عليچ اني
كل يوم اسوي المستحيل حتى احصل عليچ ”
ومن ما رديت بلش كلام مو حلو يشرح
بي اشياء بيه وبجسمي وبعيوني
وركز على عيوني ويفصل بشرح شفايفي
وكاتب كلام جريء اذا يلتقي بيه شيسوي
من قريت وتذكرت وعرفت وين وصل بالرسائل
انشليت وعقلي يوجعني من هول القرف بالرسائل
اول ما شهگت وعرف بوجودي رگع التلفون بالحايط
ورجع عليه اخذه ورگعه ورجع يعوج بي بيده
لزمني رفعني من ملابسي گعدني بمكانه
_ لچ ليششششششش ؟
_ والله فلا تجاوبت وياه والله العظيم .
_ ولچ صخمتي وجهي طينتي راسي
يا مصبيتي بيچ يا مصيبتي .
رفعت رجلي على صدري واحمي جسمي بيدي
مرجان : وروح ابوية وداعت امي والله العظيم
بالقران وارث بالقران ما جاوبته بعد بحرف
من حجه هيچ وغلقت التلفون خفت اسوي
بلوك ويروح يأذيني ويقهرني بيكم والله
العظيم ما اريده اكررررهه اكرررهه .
بثانية نزل رجلي وطوق ايدي بيد وحده
وعصر رجلي بين رجله سيطر على حركت
وجهي بأيده ورفعه صارت نظراتي عليه
وارث : تفكرين وتخلين نفسچ بمكاني وشفتي
هيچ كلام بتلفوني قبل عرسچ بيووووووم
لچ بيوووووووم واحد يووووم خنتچ شنوو تسوين ؟
عيوني بعيونه هوَ نار واني منهارة صرخت
_ ما خنتك والله العظيم ما اعرف شنو خيانة .
_ الخيانة من تجذبين على زلمتچ وتكتبين
رايحة انخمد انااااااام وتطلعين داگه عتب
وسوالف طايح حظهاااا انتِ وذباحچ .
هزيت راسي اريد ابرر اريد اجاوبه سبقني
وارث : الخيانة مُـرجان من تحچين ويه
واحد يفصل جسمچ بكلامة تفصال
ويتغزل بعيونچ ورسمت شفايفچ
وانتِ تتنوعين للرسائل وحتى لو
ما جاوبتي يكفي يطلع عنده قريتي
وياه مندمجة وتنتظرين الرسالة هاااااي خياااانة
رجفت بيده وابتليت نطقت بهالكلام
مُـرجانـة : اسفة من خوفي ماتصرفت تصرّف صحيح .
_ قصدچ عجبچ الوووووضع .
_ لاااا واررث لاااا اني حتى انصدمت شلون
يحچي هيچ ويايَّ وشلون يعرف هيچ اشياء اا ..
_ گوليهاااا اي گوليهااا انتَ ماااا تعرررفهاااااا .
_ ما اعرف ما اعرف .
ثبت وجهي ارتعبت وجسمي
خشب من صرخته وكلماته
_ انتِ فد وحدة جذابة مرجان كلشي تعرررفين
تغشمين روحچ على كلشي ، اللي يعجبچ
تفكرين بي وتفتهمي واللي ما يعجبچ تغلسين عنه
دخلي اووولي هسة اخذچ على غرفة واتقرب منچ
تنگلبين لبوة وشاطررررررة بيهن شاطرة
وبغيررر اشياء تمثلين الغبااااااااء .
ضربته على صدرة اختنگت من كلامة وذبيت
روحي من التخم للگاع زحفت وگفت على حيلي
ودخلت للغرفة اريد اقفل الباب دفعه ودخل
طبگني بين الكنتور والحايط وصرخ
_ اريد تعرفين انتَ ما مجبورة عليَّ
اذا ما تريديني ارجعچ واشوف زلمة
من عمامچ يتنفس وياچ نفس وحگ
العباس اكفلچ وارجعچ معززة مكرررمة
ما مجبوووورة انتِ ما مجبورة .
لزم وجهي بين ايده ومن دموعي بعد
ما أشوفه بوضوح مهضومة منه مقهورة من كلامه
وارث : صح انا إكبر منچ ب14 سنة بس مو چبير
ولا طاخ بنية غيرچ بعمري كله وحتى بعمري
ما انعجبت ولا تغزلت ببنية غيرچ ، مرجان
محد راح يحبچ ويخاف عليچ بگدي بالحسين الشهيد .
مُـرجانـة : بس احچي وباك بس اسمعني
_ ما ارررريد ابقي الوكت والأيام عندچ
طويلة باقي سبع او عشر ايام ما ادري
فكري بيه زين هاي اناااا شوفيني هاي انا
تريديني لو ما تريديني ماكو قندرة يجبرچ
وانا اخذ وقتي واعيد حساباتي بمصيبتي .
اشرت على نفسي ومن بين دموعي همست
_ اني مصيبتك مو تقصدني .
_ تعبتيني كسرتي گلبي .
_ كرهتني ؟
_ من اشوفچ يتراوالي كلامكم مرجان كلامكم يتراوالي .
من طلع يمشي للصالة مشيت وراه صرخت
_ حلفت وروح ابوية ما خنتك حتى بتفكيري .
گعد بمكانه لازم راسه لدقايق وفززني من صرخ
_ لچ شلون گدرتي تحچين وياااااه والقران
من يوم ما عرفتچ زهرة گطعت روحهاااااا
ما خلت شي ما سوته بس حتى اباع بنظرة
بعيونها لو على اقل اجاوبهااااا عدل بالتلفون
بكل مرة هيچ لچ تصد ضحكتچ بعيني
وتحتلين عقلي حتى ما اتذكر بعد الرسائل
لچ ومحمد حتى صور دزت بحجة تصور
الجهال واطلع من جسمهااا وما افتح المحادثة .
سحبني اكثر يطلع بتلفونه يشوفني بالدليل
الصور ما محملهم ولا شايفهم بس وحده
_ بيتهم بعد ما وصلته بگد ما اخاف
عليچ وعلى مشاعرچ افكررر للبعيد اخاف
يصير موقف وتجي وحدة مثل زهرة تعاير بيچ
مثل ما خليتي شهاااااب يعيّرني يگلي ” هيَّ
تريد تسمع مني هي تتجاوب ويايه قابل
انا مخلي على رگبتهاا سجين هي تررريدني ”
دفعني عنه بقيت بمكاني اشهگ وهوَ
فتح الباب مال بالكون طلع بيها
لازم گلبه يتنفس بصعوبة ، رجعت ختلت
بالغرفة لثاني يوم بقيت سهرانه ، وهوَ دقيقة
شنو دقيقة ما نام ولا ياكل بس خلصها
چاي وجگاير گلبه خلص منهن .
مشيت مترددة اريد بطل ماي بمجرد ما شافني گال
_ بدلي حتى نطلع .
_ عادي ما نطلع ؟
_ بدلي .
هزيت راسي ورحت غسلت وطلعت على غرفة
بدلن فستان ورتبت شكلي هل مرة وطلعت
لگيته هم مبدل ومجهز نفسه ، نزلنا راح على
سيارة طلع ايجار صعدنا وصلنا گدام مول
اخذ ايدي بيده ودخلنا شگد چبير بقيت اتلفت
بالمكان منبهرة من العالم والترتيب المكآن والألوان
تفتح النفس دخلنا نفتر على محلات دخلني
محل بدون ما يحچي يريدني اختار واشتري
بقيت ساكته اباع واتحسر وامشي ، رحنا
على محل ثاني وصادفنا واحد من المحلات
يبين گلاصات بيها فواكة مقطعة اخذ واحد
والتفت مد ايده اخذته واكلته وهوَ يحاسب
جوعانة راسي يفتر من الجوع والدوخة
والفواكة تفتح النفس ، عافني اباع على محلات
واكل وهوَ ورايَّ يمشي بين فترة والثانية يگلي
_ تعالي منا فوتي مناك ،
ارتفعت صوت اغاني وهوسة صارت
مديت راسي من فوك شفت اثنين متنكرين
على شكل الدب وماشا ويرگصون
والدب يهز يهز ويضرب بماشا وماشا
تضرب بي براسها والعالم تضحك
وبلا احساس ضحكت بصوت عالي عليهم
والتفتت ملت راسي على صدر وارث خربانة ضحك
والعالم صارت يمي هوسة يشوفون ويضحكون
لزم من خصري وگفني وهوَ ورايَّ ماد ايده
منا ومنا حتى محد يطخني ، بقيت اكل ومن
ركض الدب ودفع ماشا وگعت وراسها طار وطلعت
بنية شكلها حلو لابستها والدب شال الراس
وطلع ولد راح عليها وجهه احمر من الضحك
شالها جرته وگعته والعالم تضحك وتوگف بيهم
درت على وارث صافن بوجهي ويضحك على
ضحكتي ويدگ على ظهري بگد ما غصيت من الضحك .
من راحوا اخذ الگلاص فارغ من ايدي
وحضن ايدي يمشي بدون ما يحچي
مرينا من محل عطور صعب اقاوم
وگفت وايدي بيده اشر براسه شكو
جريت نفس واشرت على محل
_ عطرهم طيب عادي اشتري .
_ لا .
_ ليش لا احبهم .
_ مو هسة العطر فراگ .
راح يمشي واني صوت امشي بلا نفس
التفت عليه شافني برطمت شفايفي
خزرني حتى ما يبتسم وصاح
_ هذا المول كلشي تريدي اخذه عطر لا
هوَ بلا عطرر انا ايدي على گلبي بعدين مُـرجان بعدين .
بقيت اباع منا ومنا شفت جهاز چبير بداخله
دببة صغار لونهم ازرگ ووردي يجننون
لازم يخلي فلوس ويلعب هل لعبة بيها مثل
دگمة تحكم يفرها وينزل الكماشة مخلب
ويشيل الدب ولو تصيب لو تخيب
_ لعد اريد دبدوب .
بدون اعتراض راح عليهم وقبلنا اثنين
واحد اخذ لبنته دبدوب والثاني ما فاز وخسر
وصل دورنا اقترب يحط فلوس واني تقربت
همست بأذنه متحمسة
_ وردي اريد وردي
_ انا هم اريد الوردي .
_ انتَ هم حبيتهم .
_ عندي .
التفت وركزت وياه ونسيت العركة والدنيا
مسحت على ظهره واردد
_ يلة زوجي البطل فووز فوززز .
خسر وعطت ياا ، دفع مرة ثانية حاول وهم خسر
وصل للرابعة خسر بأخر محاولة رفع الوردي
وفاز ، نزل اخذه والتفتت سلمني الدب خطفته
من ايده ومن فرحتي احچي واحچي بفرح
_ اوووي والله جنتل مان نسنسم وارث كيوت وليدي .
رفعت الدبدوب بعد فترة اريد يشوفه
لگيت وجهه مبتسم مغمض عيونه من فتحها
صايرات دم الدمارات عبالك طاگات
ويباوعلي وتلمع عيونه اقترب وهوَ يتحول
_ مو حذرتچ من هاي مال وليدي .
_ وليدي .
_ احچيها بعد وشوفي شسوي بيچ .
حچاها مخنزر سكتت وهمست بخوف
_ اسفة .
كمل طريقة يتعارك وبه ذبان وجهه شايل الدنيا
بكلرها على راسه وايدي بيده وكف مقابل محل گال
_ تريدين موطة .
_ اي اريد .
_ بيا طعم ؟
باوعت على بنية تبيع بيها كل الألوان موجودة
وشكلهن مرتب عبالك وردات مو موطة ، اشرت
على كم لون وكلهن حوامض وسوتهن
اخذ كلينكس يلف الموطة بي واني بعدني
صافنه على جمال البنية فاتحة شعرها
وبشرتها صافية بياض يذبح ندسني وهمس
_ هاچ الموطة ماعت .
اخذتها من ايده اكلت منها هواي ما تخلص
گتله تريدها اشر لا اول ما وصلنا للزباله ذبيتها
تعبت من الفر راح على محل استره قبعة صيفية
لبسني ودخل على محل ثاني بي مكياج
اول ما صعدنا بالسيارة فتح العصارة
ولزم وجهي يخلي منه ومن شافني
غمضت مستغربة گال
_ شمس برا هذا واقي ما اريد وجهچ اسمر .
السيارة تمشي وحلگي وگع بگد ما صفنت على
مباني وعلى جمال المكان هلي اول مرة بحياتي
اسافر تعجبت على عالم غير عالمنا ، ركن بگراج
على خارطة بالتلفون يعرف ونزلنا المطعم المدخل
مالته عبارة عن ورد ومن فتح الباب ودخلت هم
كله ورد وعطره ورد واصحاب المطعم يسقون
بيهن ماي ، گعدني وگعد مقابيلي وبيده منيو
وارث : هل تاكلين .
_ ما اكل اذا انتَ ما تاكل شي
گلبي يوجعني والله صار كم يوم انتَ
ما نايم ىلا حتى تاكل وجهك اصفر
وتعبان دايخ ، اعتذرت منك وبعد اعتذر
اني غلطانة اعترف بغلطي شنو اگدر بعد
اسوي واخليك تصاحبني وتنسى ؟
تجاهل كلامي ورفع ايده طلب اكل لشخصين
من نزلوا هوَ هم اكل وصح كلش قليل بس اكل
والتفت اجه يمي يسوي لفات يوكلني ويمسح
بشفايفي ويدردم معصب روحه ما طايقها
_ شبي حلگچ فكاكه حتى اكل ما تعرفين تاكلين
مضروب شرجي لوچي هل لگمة خفيهااا .
بلعت لگمتي غصيت من وراه شربت عصير وهمست
_ شنو وراك شي ليش مستعجل بعد وكت .
_ اريد ارجع للبيت وصلت حدها فورت .
_ حارة ؟
_ اشتعلت .
صفگت ايدي ولزمت بطني وعينه نزلت ويه ايدي
_ خلص شبعت .
_ كملي بعد .
_ لا والله كملت .
_ چا امشي يلة بساع راسي صار نارررر .
رجعنا على بيت مبين دايخ ، اول ما فتت
ذب القميص ودخل للحمام والماي انفتح
رحت على ثلاجة شربت ماي واخذت
بطل ورحت على غرفة الملابس اخذت
شلاحة ثانية لو اسود وبيها ورد ناعم ابيض
وبقيت ارتب بجنطته بالكنتور بين ما طلع
اني كملت جنطتين ، اخذت ملابسي واني
اخذت حمام ودخلت على غرفة عيوني قفلت
وارث طلع من البيت كله .
ملِكه ..
ليلتين تشبه البركان ومفجور بالعائلة هاي
بكل صلافة رجعت صلوات مستغلة وارث ماكو
ما تحملت ام وارث واول ما شافتها مشت عليها
وسحلتها من شالها ونامت عليها وميمونه
شالت چفچير حديد چبير مال طبخ وراح
ادگ بيها وتملخها وضرباتها كلها على ظهرها
وام وارث گطعت شهرها تگطع وشيخ فؤاد
يسحب بأخته جرها هوَ وتراث ، بس ميمونة
يستحرمون يطخوها وهاي محمل گلبها عليها .
تضرب تضرب وتصررخ وصوتها تجرح
ميمونة : كفينا من شرچ ولچ دمرتينا انااا واخووتي
دمرتي عايلتنا كلهااا شرايده منه ليش
ما تخلين اخواني يفرررحون دمرتي اخوية
أنتِ وابنچ دمرتوا كسرتوووووا فررحته .
وشيخ فؤاد يصيح بيه حتى ارفعها ما قبلت
ومن راحوا عليها ام تراث وفاطمة اخت شيخ
فؤاد وايليا ضربتهن ميمونة وركضت على
جليكان نفط كله صبته على صلوات
وراحت وهي تصرخ وتبچي محروگ گلبها
جابت جداحة تريد تحرگها وطلع همام
چان نايم دحگ عليها ودگ على راسه يتوسلها
_ بالخوة لاااااا ميمونة اصحي عليچ الله
تنسجنين تنحكمين اعدام لا تسووويهاا .
ميمونة : خليني امووتها قبل لا تموتكم
هل شيطانة دمرتكم ، اذا ما تخليني احرگ
روحي والله كلي نفط خليني اموووتها .
تقربت بلا ما تحس ولزمت ايدها قوي
وكمز عليها همام شمر الجداحة وحضنها
يرجف يغطي بشعرها وصلوات ممطوله
مثل الچلبة بالگراج ، شالتها ام تراث وفاطمة
تغسل بوجهه وبصعوبة دخلنها للبيت
اوا ما صحت هددت ام وارث
صلوات : عهداً عليه يا سُكينة لا انبت
سچين بگلبچ وهل سچين ابنچ عهداً
عليَّ مخبل اسوي مخبل يهبت بالشوارع
ويكتل روحووو ، وهاي ام الزلم الزعطوطة
وياه شهاب بعيني حتى ما اگدر اسوي وياها
شي بس مرجوعها اخليها لأبني ابني رايدهااا
وهذا ال**** اخذها مثل ما اخذ أملاك ولدي
بس اگمع ولدي اثنينهم لا اهلي يفرح ويسرح
ويمرح بحلالهم ولا يعيش مرتاح وياها .
ميمونة : بسحووورتچ .
صلوات: انتِ راجعة عود قوية مووو سهلة
اصبري شلون متحلفه عليچ اخليچ بعد
ما تصحين من هل مصيبة ادوهن راسچ .
ملِكه : شگد مجرمة شنو من حرمة انتِ .
صلوات : تباعين عليهم يكتلون بيه ما تحميني
مووو خووش يا بنت الفگر خوش اذا ما اخبله عليچ .
فاطمة : اكلي **** ساقـ**** بنت الـ****
لأبوچ لابو اهلچ احطچ وامردغچ بالگاع
هسة انا وايليا اخليچ بعد عميه دربچ ما تندلي.
ايليا : عاد اني ضربتي منها وللمقبرة .
اقتربت منها وهمست وهمه هوستهم هرج
ملِكه : يولو هوَ انتِ حياتچ جايبتها تلزيگ
لا ادگج بسحر تخليچ تنبطحين .
ايليا : اكثر من بطحات حياتي ؟
_ تخلي تراث يمثل بيچ .
راحت ايليا جابت گلاص ماي وقدمته لصلوات
ايليا : هاچ عيني هذا ماي اشربي لا تموتين
وكافي بعد انتوا هم اسكتوا منا الجوارين
خالة تريدين اصب غده جوعانة .
دفعت صلوات ايدها ودارت وجهه تتعارك هي وام وارث
وتترادد وياها وميمونة امها تلزم بيها تريد تطفر عليها
بعدنا نريد نهدي الوضع ودخل بيرغ وسهم
ساندين شهاب امه من دحگت حالتو ما تعرف
بيرغ كمل عليه من راحت دگت على وجهه ملخت
نفسها وراحت عليه تبوس بيده وتصرخ
_ والله لا ارجعهم كلهم خدم جوة رجلك يمه
خلي ذاك علگهااا واخذ الزعطوطة وسافر وعافنا
نتذابحح يجي يووم واذبحه راح يررررتاح
يدور راحه ابن سااااااجرررر يريد يرتاح .
ام وارث : تذبح منو هل فوصه العرمة ام الزلم .
ركضت عليها وحده تملخ بالثانية وبيرغ
خزاهن وشهرهن بالصياح فلش الغرفة عليهم
حتى شهاب ظل يتوسل بي يهدي ويسكت
طلعت ام وارث خايفة منه وشيخ فؤاد صاحها
_ جهزي روحچ تجين ويانا على بصرة لا تبقين
هناا وارث وصاني وحلفني تجين ويانا .
ام وارث : لا خوية اعذرني اريد اخذ البنات
ونرتب ذاك البيت قبل لا يرد وارث خطية
يشوفنا بعدنا ما مخلصين يصير عصبي .
صاح على اهله ، اخذت ايليا وصعدت حتى
تبدل وتلم ملابسها جانت خايفة ومتوترة
ملِكه : عليچ الله شبيچ هيچ خايفة وترجفين
عبالك تتعنفين ، اذا يضربچ گولي انزل
ابلغ ام وارث والله حتى اني احچي وياه .
ايليا : هاي رجفتي اعصابي تالفه مو خايفة
بس اني شسمه اوووف ياربي والله ملِكه
اني تعبانة احس كتمه على صدري.
_ زين ليش ؟
_ اني وتراث ، ياربي والله حتى استحي احچي .
لزمت ايدها مقهورة على حالتها
_ لا تستحين مني يمعودة اني اختچ .
_ الله شگد حلوة هاي اني اختچ ، شوكت
يرجع اخوية ويگول رجعت اني اخوچ تعالي ويايه
وياخذني ويخلصني بگلبي كلام واسرار اذا
احچيها تحتاج سنة ما تخلص بس اني تعبانة .
عاطت عليها فاطمة فزت وركضت تلف الشال
زين وحتى عبايه خلت على راسها باستني
ونزلت وگفت بالمطبخ ودعتهم اول ما وصلت
للباب لزمها تراث من طرف عبايتها وسحبها
عبالك منتظرها على نار ، شغل السيارة وصعدها
بعدهم ما طالعين وظل يشمر بيده وهيَّ بس تباع .
من شافهم ابو راح مستعجل عليهم وامه وفاطمة
راحن يتراددن امه تحچي على ايليا وفاطمة
تسب بتراث وامو انواع المسبات .
جريت الكرسي من دخل خلف وبوجهه
بلا احترام راح على غرفة شهاب وظل
يتوعد ويهدد بأم وارث بعلو حسه
وبيرغ وگف بوجهه يدفع بي
خلف : خلي يرد ازين شاربي اذا مو اول
يوم واجيب زلم حوك اخليهم يلزمون
هل نغل ابن النغل وارث وينعنعون ضلوعه
اخيسه تخيس لا اخلي ايد لا رجل لا اظافر
لا اصابع ما اگطعهن وهااااي جريت شاربي .
صلوات : مابيكم زلمة يگدر يفر ويهز هل منبوذ باقي
يلعب على چبير والصغير يولووو دمرر ولدي
دمرررهم وين ساجر ويجي يشوف شنو من
جبروت عاف علينا شنو من بشر ما يرحم .
خلف : انتظري يا صلوات وراح
تشرفين الزلم شنو تسوي .
وهيَّ تتمسكن وتبچي مدري شلون تشحن بي
صلوات : هجمنا هجم بمزاجه يمشي زلم ونسوان
روح يا ابن سكينة عساك ما تتهنى ابني
متألم لا اصابع لا جسم مكسر ابني يا اهل
الرحمة عد منو اوگع دخيلة ويگعد حظي مثل
الـ**** يدخلن دخيلة ودخيلة وصار براسهن
خيرر وزلم تتذابح عليهن ويسفرون بيهن يتونسن
كون اسمع خبرك يا ابن سكينة البصراوية .
اخذت ام وارث ميمونة وامها وهمام وسهم
وطلعت على بيت الثاني ترتب بي ، وبيرغ
ظل گاعد وهوَ وخلف بالساعة وطلع خلف
بقت صلوات تسب بولدها وتترس براسهم
على وارث ختمها بيرغ وياها من وگف
بيرغ : اني ما اقبل يأذي واحد بيكم
ولا اقبل انتوا تأذون اخوي ، اذا يرجع
وادحگ واحد بيكم غلط وياه انا بوجهكم
اصير واطيركم الله يشهد اصير وياه ضدكم .
شهاب : اخذها مني ادمر حياة هل كلب
مثل ما دمرني يول حسرة عليَّ احب شي
يهجم وياخذه وتريد ارحمه لا والله لاا .
بيرغ : يموتك وحق الله .
شهاب : جنت على ورث بس هسة رايدها .
_ لا تخليني اعيد بيك الصار البارحة حرمتو
يول حرمتووو حرمة اخوووووووك يعني
صارت اختك اختك تفتهم لو لا .
شهاب : بيرغ اذا بيوم يأذيها ادمره دمار
اذا ينزل دموعها انعل والدي والدي
اوگف مثل السلايه بزردومه .
بيرغ : الى متى ، بدل من هل خربطة عيش حياتك .
شهاب : خرب حياتي اخذ تعبي واملاكي وحب حياتي .
بيرغ : هذا كل عقله راح املخه .
شهاب : كل عقلي والله الى ان اشوف صرفه
واخلص منه وارجع املاكي وحب حياتي .
بيرغ : راح اموتك وحق الله اذبحك .
شهاب : اذبحني ما تطلع من گلبي الحد ما يوگف گلبي .
بيرغ فقد عليه من جديد كسره من تخربطت
صلوات خلاهم وصعد يتنفس بصعوبة
جر الجنطة ويشمر بيها ملابسنا منا ومنا يخلي
بيرغ : ملِكه بدلي .
_ وين ؟
_ نسافر .
_ ما اريد اسافر و.
شمر الجنطة واجه يمي غطيت وجهي
خفت يضربني باس ايدي ونزلها يتوسلني
_ عقلي راح يطير اذا اظل بهالبيت بعد
بس انسافر يومين ونرجع بس يومين عندي عطلة
والله نرجع والله ملِكه تعبان لا تخليني اتوسل
ذليتيني والله شكوو بيها اذا سافرت وياچ .
من عصبيته خفت ارفض هزيت راسي
وقبل لا اوافق شرط عليه شرط
_ من ارجع ترجعني على بيت اهلي مو هنا .
_ وانا عندي شرط ، اذا وافقتي تروحين بيت اهلچ ؟
مُـرجانـة ..
مر سبع ايام وبين طلعاتنا الأماكن عامة
وبين هل طبيعة يمرون وارث على نفس موقفه
وعصبيته وصرت أتجنبه بگد ما تخوف عصبيته .
بين يوم ويوم يروح القاعة حديد يتمرن لگاها حجه
يصب كل غضبه يرجع منتهي ينقط عرگ يسبح
ويصفن على شباك وهل ايام كلها مانام غير
مرتين وعلى تخم مايطول اقل من الساعتين ويفز .
طلع من غرفة الملابس لابس ملابسه يريد ينزل
للقاعة وقبل لا يطلع اول ما فتح الباب همست
_ شوكت نرجع وارث مليت اريد امي .
_ اليوم الفجر نرجع جهـ..
جاوبني والتفت بطرف عينه ورجع يريد يطلع
التفت مصدوم مبحلق عيونه نطت تريد تطلع
من مكانها حسيت حضني بنظراته ما جانت
عادية سحب نفس وطلعه على شكل حسرات
وقناع الكبرياء بلش يهتز وصلابته انتهت .
قبض ايده قوي وطلع من البيت كله بحارب
نفسه حتى ما يضعف ولا طايقني وحتى
من اعصابه تهدي عبالك اني ثگيله عليه
تلمست ملابسي هذا الفستان شلاحه
هديته دخلت على مرايا اشوفه ملابسي
وردي وتذكرت كلامه من يگلي بلون
خدودچ ، لزمت گلبي وگعدت دمرعي
تصب منتظرة يجي باجر وارجع عند
امي وننتهي وارث مو حركاته واسلوبه
واضح وضوح الشمس بعد يرغب بزواجنا.
بعد ساعة وگفت الملم بالجنط ، رجع سبح
واعتزل مني لو بيده يطردني والله ما متحملني
وهل شي يعز على گلبي لو بيدي اشرد منه
باليل جاب اكل رفضت اكل وبقيت بالغرفة
بس صار الفجر والساعة المناسبة مثل
الغرگانه وطلعوها استعجلت بمشيتي
وفتت من عنده اول ما دخلت غرفة الملابس
صاح بإسمي وكفت بالباب مالتها ولو
يقهرني بكلمة بس گلبي انفجر والله
_ مُـرجان .
_ ها .
_ تعالي هنا .
تقربت عنده رجع ضهره على كرسي
وسحب ايدي گعدني على رجله وفتح
كف ايده بي ورقتين صفنت بعيونه مستغربة
وارث : اختاري وحدة .
سحبت نفس وغمضت فزيت من باس شفتي
فتحت عيني وتلمست شفتي وهوَ يرجف
_ اختاري ورقة اختاري .
جريت وحده وقبل لا افتحها رفع شعري
بيده رجعه ورا اذني وقرب شفايفه يهس
_ انا مختار وخاتم القرار بس اريد أشوف اختيارچ .
فتحتها طلب اقراها بصوت مسموع
” تلبسين الأبيض من جديد بيوم ميلادچ
وتصيرين ملكي بلا فواصل ولا حواجز ”
رفع حاجبة وباس خدي ايده ترجف بشكل مخيف
وارث : بيها صبر لازم اصبر هاي الورقة چلبة .
_ منو كتبها .
_ انا الچلب .
رفعت ايدي على شفايفي وهزيت راسي
_ حشاك .
_ شمريها تولي بعدين نحققها .
_ ميصير لازم نحترم قواعد العبة .
_ وياچ ما احترمها نطلع من قواعدها .
غمض عيونه متخربط كل وضعه وحاضن
خصري يقربني اكثر واكثر هيمان ذبلان
_ شمرتها بعد شسوي ؟
_ اختاري الثانية .
_ اختاريت وارث .
_ افتحيها مرجان .
_ مُـرجانـة .
_ مرجان .
_ گول مُـرجانـة .
_ مُـرجانـة .
نزلت راسي افتحها واني اخذ ثار قهري منه
_ بس مُـرجانـة ؟
_ افتحي الورقة بس افتحيها اقريها .
_ مقهورة منك وارث مقهورة .
صفن بعيوني وحضني بتملك يجر نفس من رگبتي
_ افتحيها اقريها مرجان .
فتحتها قريتها بيني وبين نفسي وشهگت
وخدودي گبت نار دخان وطلع من اذني من
الخجل وجسمي قشعر ضربت على صدري
وهوَ استغل الفرصة شالني خفت لا اوگع
حاوطته برجلي متمسكه بي وهوَ يمشي
بيه للغرفة واعرف شنو نيته كاتبها بالتفصيل
بالورقة بالتفصيل الممل ومقرر عليها وبصم
عيونه انتهت وجسمه متصلب حاضني
يرتل بأحلى كلمات وكأنه يعزف على گلبي
_ يا اثمن املاك وارث واعظم وأندر واهم
واغلى واحب املاكه ، روحي بيچ لچ روحي
تعلگت بروحچ صعب ارجعچ واعوفچ اريدچ .
يتبع …
الفصل التالي اضغط هنا
يتبع.. (رواية الموروث نصل حاد) اضغط على اسم الرواية لتجد الفهرس كاملاً بجميع الفصول.