رواية الموروث نصل حاد – الفصل الخامس والثلاثون
♛ 35 ♛
لزمت ظهري وايد الثانية على راسي ولزمتني
الشهگة من الوجع ، گمز وارث من الچرباية
عليه يلبس بملابسه وبسرعة شالني على چرباية
_ شنو يوجعچ تعورتي ؟
اهز براسي اريد احچي ما اگدر الغصه ببلعومي
ركض جاب گلاص ماي ورجع يشربني وجهي
گب نار وعيوني تجري جري بالدموع فشلانه
خجلانه من ثولي واجرجر بالغطوة اغطي بروحي
امداني وامده هل غباء اكمز چني برغوثه .
غسل وجهي بيده يريد يسكتني ما اسكت عاط بيه
_ راح تختنگ راح تموووووت تنفسي ولچ .
_ ضـ.. ري… ضهري .
_ شبي بالله .
_ عيب .
_ لا عادي اني زوجچ .
_ استحي .
_ لچ العناد هذا بطلي .
_ لا تگول ولچ احسك عصبي .
غصب فر ضهري شافني وعض اصبعه
_ احاااا شسويتي بضهرچ .
_ انشلع موو ؟
_ شنو ؟
_ ضهري ، الجلد انشلع .
_ جلد هذا لو صبغ .
_ وارررررث .
_ يغدي فدوة لهل خدود ههههههه انصهرنااااا .
غطيت وجهي اريد اكمل مناحه ماقبل لزم ايدي
باسها وخلاها بحضنه ويحاول يسكتني
_ وين رايحة ؟
_ اسبح بس اجتني دوخه .
_ لأن ما اكلتي شي صار كم يوم ما تاكلين زين .
_ انتَ مو زين ويايه كله منك رجعني على امي .
_ هههههههههه بعلي اذا امچ تسمع صدك تاخذچ .
_ واصلاً عمو ضـلـيل يهز ويردح يريدها حجه .
شالني بين ايده يضحك ويبوس بخدي يريد
انسى وجع ضهري ، فوتني على حمام وفتح
الماي كشيت وصرت بالزاوية تمنيت اختفي من الخجل
_ اطلع حباب الله يخليك .
_ مو تريدين تسبحين ؟
_ اي .
_وعندچ دوخة .
_ راحت .
_ ترجع تعالي الجنتل مان مالتچ يسبحچ .
طنگرت ذيچ الطنگوره وصوتي راح
_ خجلانه منك خجل مابعده خجل .
_ ههههههه ميخالف تتعودين .
_ والقران اذا ما تطلع اتخربط اغيب من وعيي
واخليك ادوخ بيه روح اطلع ما تستحي انتَ اطلع .
ظل يتحارش ويضحك عليَّ انوب كلمة والثانية
يصيح لقب شكل ، من شافني ذبت خجل طلع
وشرط شرط يظل الباب مفتوح لا اتخربط
اول ما طلعت سبحت والگاع عبالك زلزال
بس كملت جريت المنشفة من الباب لفيت
روحي وبمجرد ما خطيت خطواتي برا
الحمام حلقت بين ايده يبوس بخدودي
وقبل لا افكر اعترض شالني وخطفني
الواقع حضنه وتفاصيله بوقت خاص بيناتنا .
وبعد ما نسج لمساته ساعدني اخذ حمام دافي
وهوَ من بعدي ، سندني ابدل ودخل باس راسي
وبدل ملابسه عدلت شالي واخذ ايدي بين ايده
محتضنها محتويها بحنيته الطاغية على ملامحة
الرجولية رغم قسوة وخشونه شكله ، لمعة عيونه
بمجرد ما يخلي نظراته تقابل شكلي واضحة وفاضحته .
نزلنا من الكوخ وصلني على مرجوحة گعدت
وهوَ راح الأصحاب الكوخ طول يمهم ربع ساعة
من رجع اخذ ايدي واخذني كلي بضحكته
صعدنا السيارة ساقها على مطعم إطلالته
على بحر تفتح النفس والهوى عالي بالمكان
نقي ضحكت بفرح منبهره بالمنظر
مُـرجانـة : الله وارث شنو هذا عبالك بالجنة .
_ عجبچ ؟
_ كون كل يومية اكل هنا ولا امل يجنن والله .
_والله انتَ تجننين وخبلتيني بيچ طماطيتي .
واحنا ننزل الدرج مكتوب بخط واضح
اسم المطعم çinik ردت اعثر بالدرج
من صفناتي گعدنا بالگعدات الخارجية
والبحر منظرة يرهب الگلب ، نزلوا اكلات
خاصة بيهم وحسب طلب والريحة تفتح
النفس اكلت من كل گلبي وارث بصفي
ياكل ويوكلني على واهس خلصنا المواعين
كلها مبين علينا صار كم يوم عدنا شحت اكل .
بقينا بالمنطقة نفتر بالساعتين وگفنا مقابيل
محل اخذت دفتر وقلم وارث يسأل ليش
واختصرها وياه بعدين تعرف ، ورجعنا على
نفس المنطقة القديمة بس من نزلنا اخذ ايدي
وغير طريقنا وصعدني على مجسر يصعد
على اكواخ اعلى ارتفاع والشلالات تصير قريبة
_ وين رايحين وارث ؟
_ غيرنا المكان .
_ ليش غيرته مو لازم نرجع على عراق .
_ كل عقلچ ؟
ثبتت بمكاني ما اتحرك من جوابة وانتظر تبرير منه
_ اي والله وارث مو على اساس نرجع !
_ ليش هوَ اني شنو فهمت منچ وارجعچ
صار كم يوم اطحل تعرفين شنو اطحل ردت اموت
يا عراق يا اهلي يا اهلچ يا رجعه وبدر الهواشم
ما اتحرك منااا اريد اعيش الراحة بعد الصبر ؟
برطمت شفايفي بدلع مو متعمدة
_ بس اشتاقيت اشوف امي .
_ نرجع والله بس مو هل ايام .
_ زين اخابرها .
_ بعدين مُـرجانـة بعدين تعالي شوفي .
توسعت عيوني اول ما فتح الباب
الكوخ مثل الحلم حقيقي ، هدوء وريحة الخشب
طاغية عليها عطر الشموع والورد الطبيعي الأحمر
وهوَ متوزع بخط مستقيم الشموع بكل زوايا الكوخ
جفلت من حضني من ضهري ويمشي خفيف طبگ
الباب برجله وصار يمشي بيه لوسط الكوخ صايرر
عبارة عن غرفة وحدة بيها السرير كله ورد وبانيو چبير
بصف الشباك وكراسي اثنين بالزاويا الثانية
مدفئة لونها اسود قريب منها تلفزيون
وارث : ما اعديها احقق احلامي وياچ ونرجع .
كمل ورفعني بين ايده ونزلني بوسط البانيو
صرخت فازه من دخل ويايَّ يدغدغ بجسمي
ويغطني بالماي ، شمرت عليه ماي وجريت
راسه غرگته اريده يهدني ما يهدني كل ما اطلع
يجرني محرجة الشباك مكشوف
مُـرجانـة: يشوفونه وارث عيب.
_ لالا محد يشوف هاي بس شلالات وجبال
ماكو احد لا تخافين لا تفكرين انسى الدنيا كلها .
طلعنا بعد فترة دخلت للحمام صاير
بالبداية مال كوخ سبحت وسمعت الباب
يندگ طلع وارث يحچي وياهم من خلص
رحت على جنط مالتي اخذت ملابس
نوم عروس بلون ابيض طويل بس
مفتوح من جانب واحد على طول رجلي
راد اتخربط من نظراته هاي امي بس
ارجع اتعارك وياها شنو هذني
الملابس السخيفة ، مدري شلون تعطرت
ردت اخلي مكياج صاحني بصوت مسموع
_ لالا ابقي على نفس البرائة ماحب المكياج عليچ .
اجه عندي شفت ميز مقابل الشباك الچبير
بي اكل وهوَ يدندن ويغني يرتب بيهن
وعلى صوت الدندنه مالته رحت اتمايل
وارگص بلا تفكير من شافني ابتسم
اخذ ايدي يفر بيه وحضني يتمايل ويايَّ
ورفع صوته وهوَ يغني وكل شوية يگطع
الأغنية ويجر شفايفي يبوسهن ويكمل
ابتعد يصفگ ويغني اغنية عبالك تهديد
بس لحنها وهو يغنيها ترگص
بقيت اهز واتمايل واضحك على ضحكته
فرحانة والله فرحانة واتمنى الزمن يوگف هنا .
من بعد لحظات حلوة نساني بيها الكل
اخذني بحضنه نايمين مقابيل الخضار
الجبال مقابيلنا نايمين على چرباية
مستنده على صدره وبيدي دفتر وقلم اسأل بي
_ خطك حلو ؟
_ يعني مفهوم .
_ لا انتَ طبيب تخدير يعني تعبان على خطك .
_ ههههههه مو شرط .
_ وارررث شبيك تشلع بگلبي .
_ غير تفهمني شنو براسها .
_ آكتب قصتنا .
رفع جسمه اكثر مبتسم ومستغرب بنفس الوقت
_ يعني شلون اكتبها .
_ من البداية اكتب منها قليل حتى لو توصفها .
_ ما اعرف .
_ اذا تكتب ابوسك بوسة ام الساعة .
_ ههههههههه دقيقة اجمع الكلمات بعقلي .
_ اي بالله انتَ ذكي تگدر تجمع احسن مني .
_ برج العقرب بعد اجمعچ أنتِ والكلمات بثانية .
اخذ القلم وبلش يكتب ويحذف وأستقر على
” فتاة بحاجب كسيف نصل حـاد ، دخلت أراضي محرمة
بالعناد تطلب الأمان في مكان يفتقد الحنان
فاستوطن حبها في قلّب صاحبها حتى امتلكته هوَ والمكان ”
ملِكه ..
بهتت وكل الألوان صارت سواد بعيوني واني
اسمع الشرط من صوته الخشن وهوَ يترك
مسافة بين رگبتو والقميص حتى اشوف
رجلي ما حملتني بعد ذبيت روحي على چرباية
ملِكه : صح قريت الرسالة وعرفت بيك سرطان
بس ما اخفي عليك فكرتها ملعوب بينك وبين وارث
بس خيبت كل ظنوني بهذا كلامك والشرط .
اجه بصفي گلبي دمام صار ما يهدي ولا يستقر
بيرغ : ملِكه عندي اجازة عشر ايام ولازم اسوي
عملية استئصال واخلص منها وطلبي
الوحيد توگفين ويايَّ وهذا اخر طلب اطلبه منچ .
رفعت عيوني ولزمت ايده أتوسله
ملِكه : الله يخليك بلغ اخوانك حباب خليهم
يعرفون حتى لو مو اخوانك على اقل امك
ميصير هاي عملية خطيرة ومرض مو سهل
بيها خطورة على حياتك وحسب كلامك
تگول الدكتور خايف منك ومن حالتك .
مسح العرق من وجهه صار يتعرق بشكل
وأيده بين ايدي مثل الجمر ومشتعل
بيرغ : يا اخو منهم شهاب مخبل صاير مو بعينو
بنات العالم كلها راح عشگ وحده اخو متزوجها
لا ويگلي بس يرجعون استقبلها بالمطار اشوفها
حتى لو من بعيد اروح واشوفها صاير يگط درجة اولى .
ملِكه : هذا استخف يريد وارث يرتكب بي جريمة .
بيرغ : وارث حاد سنونه علينا خلينا نتنفس وياه
يگلب الدنيا ماينحمل ولا متحملنا كلنا ، وهمام
حاير بميمونة ومستلم شغل الأراضي هوَ وسهم
يعني مايگدر ليش احرجهم ، انتِ احسن واقرب ملِكه .
استسلمت ورحت ارتب الجنط وامشي واقترح
اشخاص حتى اهلي اقترحتهم وهوَ مو راضي
على اي نفر يعرف ويريد الموضوع يتم بسرية
بدون وداع ولا سلم ترك البيت واخذني وياه
الطريق كله عيوني ما نشفت واسب بأهله
نفر نفز حقدت عليهم حتى وارث كرهته .
وصلنا للشمال سامع بدكتور شاطر هناك
اخذنا سويت بفندق واستقرينا قبل المستشفى
ومن التعب نمت واني صافنه بوجهه ميته
اريد اموت من القهر على حالتو ، وهوَ ينام
وايده على رگبته حتى تنفسو يخووف .
الثاني يوم وعيت وگعدت قبله اجهز ملابسنا
اخذت حمام سريع وطلعت وهوَ گاعد ومبين
متوتر من هزت رجله من شافني ابتسم
بيرغ : والله بيچ تحرش .
نزلت دموعي غصب عني گلبي قابضني
وبقيت واگفه بمكاني وهوَ راح على حمام يغسل
ملِكه : تحرش مسموح تتحرش .
بيرغ : تشاقين مو .
_ لا عادي تحرش .
_ ام گلب الحنين ههههههه .
ضحكتو نبعت من گلبو وعيونو لمعت تقدم
عليه باس راسي واخذني بين احضانو
وبدون ما اتردد رفعت ايدي وحضنته
ودموعي الزم بيهن ويصبن صب على خدي
لزم وجهي يبوس بخدي ودموعي مبتسم
_ كافي دموع يولو من يمتى تبچين عليَّ .
_ كتلتك هواي اذا تموت شلون اسامح روحي .
_ هههههههه خوش فال بربوئه .
_ بعد منو يگول بربوئه ومنو يستاهل كلمة سويقط غيرك .
حضن وجهي وهوَ يهدد گلبها تهديدات ابن صلوات
بيرغ : اذا اموت وتتزوجين اجي احرگچ
انتِ وياه حتى لو انا ميت اتخبل عليچ .
لزمت ايده عضيتها ودفعتها جرني من خصري
وحضني بكل قوته راسه برگبتي
ملِكه : برغي شعليك بيه بعد غير انتَ عفتني سقط حقك .
بيرغ : انا مـا اعوفچ بس الموت يآخذني منچ
وانتِ تمنعيني منچ بس انا لا والف لا كلشي
بيه يريدچ گلبي وعقليّ وياچ لو تعرفين شگد
احبچ ومحمد ملِكه هنا انتِ معلگه بگلبي .
دفعته مني ورحت اكمل تبديل حتى ما يتماده
هوَ افتهم وابتعد كمل وبدل اخذنا عراضنا وطلعنا
على طول الطريق يعلمني على اسم الفندق
وطريقة، وشحن تلفوني وفوله رصيد يخلي
بالرصيد ويضحك يعرف تفكيري
ملِكه : من تمرضت خليت الرصيد صار شگد
ادگ وانوح عليك بس خليلي رصيد انتَ واخوانك
اخدم بيكم لا رصيد ولا نفع بنت اصول وساكته .
بيرغ : كلنا فگور .
_ والله تلعبون بالفلوس لعب بس چلوفه ويايه
مدري اني فگر ياهو يوصل يمي يصير فگر
وعند الغرب يشتغلون تكييت فلوس خرب حظي .
وگف السيارة مقابيل المستشفى وجاوبتي
بيرغ : هاي الدردمه كلها علمود رصيد .
ملِكه : ليش هوَ الرصيد شوية عمي هذا رصيد .
بيرغ : ادعيلي اطلع بالسلامة اغرگچ رصيد .
رفعت ايدي ونظراتي وادعي مبتسمة
_ روح يا ابن صلوات تگوم منها بالسلامة
حتى تعبي رصـ.
ماگدرت اكمل دموعي والغصة منعوني
انفجرت ابچي من كل گلبي بچيت ماتحملت
والتفتت حضنته ابوس برگبته واحلف بي
_ عليك الله صير قوي مثل ما عرفتك بيرغ
الهز عشيرتي كلها من چبيرهم لصغيرهم
لأن حب گلبه رادني واخذني حارب المرض
مثل ما حاربتهم وحاربتني واخذتني
انتَ بطل والله اعرفك بطل .
عيوني نطت بگد ما بچبت وغصيت وهوَ ساكت
وعلى طول الفترة اني بحضنو اسمع دگات
گلبو شگد سريعة ، نزلنا هوَ يمشي مقابيلي
صفنت بطولة والمرض صعب بس بعده نفس
هيبته وحضوره قدم اوراقه وكعدنا ننتظر دقايق
وصاحوا بأسمه ترك كل أغرضو عندي باس راسي
ودخل على تحاليل والإجراءات يكملها ، هوَ
راح واني گلبي اشتعل نار وحدي وهوَ وحده
هسة مثل بيرغ وهذا مرضو اخوتو سادين
المستشفى ويركضون وياه شنو من خوه هاي .
والله بس يطلع منها قبل لا ننفصل انصحو
يترك اهلو ويروح يعيش بعيد عنهم هذولي
ما ينعدون على اخوان ، ساعة وساعتين
والثالثة مرت طلعوا دكاترة اثنين بلغوني
_ السلام عليكم .
_ وعليكم السلام دكتور طمني بيرغ شلونه ؟
_ مع الأسف بس ما نكدر نكمل بالإجراء الجراحي حالياً .
_ ليش دكتور بي شي صاير شي ؟
_ بيرغ عنده ارتفاع واضح بدرجة الحرارة
وجسمه يمر بحالة إجهاد عام، وهذا مؤشر
إن جهازه المناعي مو مستقر العملية ممكن تكون مجازفة .
اكذب اذا اگول فهمت بس عقلي وگلبي عندو
جسمي ينفض وعيني على باب واستمع لكلامة
_ التقييم البدني لاحظنا مؤشرات توتر نفسي
واضح، وهاي أمور تؤثر على تعافي الجسم بعد الجراحة.
سحب ورقة من الملف وسلمني هل ورقة
_ سجّلنا له علاج داعم ومضاد حيوي يستمر
عليه لمدة 10 أيام، مع راحة تامة ومراقبة مستمرة
بعد ما يستقر وضعه الجسدي والنفسي نرجع
نعيد تقييم الحالة ونحدّد موعد جديد للجراحة.
هزيت راسي اتشكر منه هوَ راح وبقيت
انتظر بيرغ طلعوا ممرضين اثنين
تعبان وجهه شاحب وملامحو باهته
والله بدون ما يحچي ويشكي ادري
بي نفسيتو هلكت لأن اخوانو مو وياه
نقلوا على غرفة يرتاح بيها ساعة قبل لا يطلع
منتهي من التعب بسبب التحاليل والإجراءات
اقترب منو ما ترددت الزم ايدو أسندو بالشدة
سحب ايدي وقربني اخذ كف ايدي تحت راسو
حضنو ونام عليه متمسك بيه .
بقيت بمكاني ساعتين ورد حيله وضحته
ورجع بيرغ ابن صلوات السخيف ، طلعنا
من المستشفى جوعانين منتهين من التعب
يريد ياخذني على مطعم رفضت اخذنا
سفري واخذني على منطقة عبارة عن جبال
وخضار والعالم هي وعوائلهم فارشين
سفرة وگاعدين ،فتح الباب الخلفي تركو
مفتوح وفرش بالصندوق چبير وصله
نظيفة خلينا اكلنا والمنظر يخبل اريد
اكل ولمحته متألم من ايدو اخذتها منه
وقربت لفه اكل منها وشربته عصير وراها
بقيت اوكل بي بصعوبة يبلعها ويسولف
عبالك متعود ، يحز بخاطري وانقهر بي
ما بينت وبقيت احچي وياه على شغله .
بيرغ : ايام التدريب صعبة على كل متدرب
بس من تخرجت كل فترة احن ارجع لو يوم
واحد اعيشها صارت تعويد .
_ تحن للعذاب ؟
_ هو عذاب بس ايام حلوة وأصدقاء هناك زلم
ابطال اي زلمة تخرج هذا زلمة ابن زلمة مو اي
واحد يتحمل تعذيب التدريب ، شگد خطية يبطلون
تخيلي تگعدين من الـ4 الصبح بلا اكل تتمرنين
تمرينات غضب تشلع الگلب ساعتين للـ6
يرتبونا وحدات وحدة اولى وثانية للسادسة
تاكلين كاسة صغيرة شوربة وجبن اثنين
وصمونه صغيرة جنت انا وجماعتي نصب
الملح كله على شوربة ومانحس بالملح من تعذيب التدريب.
كمل اكله وهوَ يسولف اخذت اكلي اكل واستمع
_ ونجرها للطهر بعد تدريب يطگ الضهر
وابن ابو يعارض يخلونه يدگ ساحة التدريب
هرولة وتمارين ضغط بيوم التخرج طلعت هيكل
عظمي اذا تنفخين عليه اطير .
_ حرامات جنت ما موجودة احطك واكتلك كتله محترمة .
_ ههههههه بس تريد تكتلني .
_ هسة من اريد اكتلك اخاف شكبرك سويقط .
درت وجهي وهوَ يضحك ادحگ على عالم
وما احس غير سحب ايدي وباسها بوسة طويلة
_ انتِ والله بنت اصول وگفاتچ هاي شلون انساها
هاي وامتِ زعلانة عليه وما شايفة مني شي حلو
غصبتچ عليَّ وذاك اليوم ضربتچ .
_ سامحتك على ضربة لأن ادري بيك ما متعمد
وادري بيك تندمت وراها واذيت روحك .
_ هسة بس اصير زين اتزوج عليچ .
_ هههههههه مو ارگعك بدعوة انومك نومه
تشوف جهنم بيهاا .
وكفت نظفت المكان مالتنا ورجعنا للسيارة
يسوق بالسيارة ويتحارش واني ما اعرف اسكت
وبمجرد ما دخلنا الفندق وغرفتنا جرني بحضنو
_ اريد طفل يشيل اسمي .
_ بيرغ احترم نفسك والزم حدك .
_ اخاف اموت وحلمي ما يتحقق .
_ عيش حلمك بعيد عني .
_ تعرفين شنو حلمي ؟
_ لا .
_ ترگصين ، ويصير عندي منچ ولد
حققي هل حلمين قبل لا اموت وتتندمين .
خزرته ودفعته مني رحت بعيد انزع بشالي
_ ماتموت ابن صلوات لا تخاف .
_ عندي احساس كن اسوي العملية اموت .
_ عود تقهرني فلا انقهررر عليك لا تحاول .
_ سيدة الحقارة اگدر اجبرچ بس اگول خطية .
_ ومحمد اذا تجبرني ا..
_ اشش اشش طلعت لسانها اسكتي لا بارك الله بلسانچ .
لليل طلع ساعة ورجع محمل علاليگ شغل
التلفزيون فرغهم طلعن اكل وحلويات رتبهم
وشغل فلم واجه يمي جرني بحضنو دفعتو
طلع المسدس من الجرارة وضغط على بطني
_ بنت ابوچ تگومين من حضني افرغو براسچ .
_ عود تهددني بالسلاح ؟
_ ما اهدد انا گول وفعل استقري واگعدي بحضني.
_ فلا اطيقك .
_ حقچ اميرة الحلوات انتَ ملِكه المربربة .
غصب خلاني بين احضنو گاعدة ادحگ وياه
اندمجت بالفلم وما احس غير عض اذني وهمس
_ احبچ .
_ بيررررغ .
_ حرمتو الشرسة .
_ عوفني .
_ بزونتي الشرسة احبچ احبها ربي احبها .
استقريت داخل حضنه الأول مرة بهذا السكون
وجنت خايفة ارفض واندم ، نمت على صدرة
غمضت بدون لا اجادل وهوَ لمني ونام مستقرة انفاسو .
الثاني يوم الظهر رجعنا على بيت بس صلوات
گاعدة وشهاب متمدد بالصالة مقابيله اوراق
يشتغل عليهن وتلفزيون مشتغل اغاني عالية
يستمع ويشتغل يمكن ، تعديتهم وصعدت فوك
صلوات : صغيرة بنت الفگر ماتعرف تسلم .
دفر بيرغ التخم والطبلة متنرفز منها ومن طريقة كلامها
_ تعايرين بالفگر على اساس جنتي عايشة
بالنعيم لومااااا انا استعطف على اخوتچ
وكل ما اروح عليهم احمل اشكال الوان
عبالهممم الفواكة تنطبخ لو هوَ اناء ونضح بال…
شهاب : حسسسسك شبلاك بيرررغ .
بيرغ : ما تسمعهاااااا اطرررش ؟
التفت شهاب على امه صاح بيها وقبل لا يصعد
بيرغ ويخليهم بعده على درج وصاح بي شهاب
_ اگلك .
_ احچي .
_ هذا الطنطل ابن الطنطل مخابر على سَــهم
ومبلغو يريد يظل هناك بعد مجدد المدة مالتو .
_ اي بكيفو عريس وبراحتو .
_بيرغ تچي توگف وتحچي عدل لا اصعد
اگضي بيك التوبة من فوووك اشمرك .
نزل بيرغ يركض لزمو من قميصو وگف على حيلو
صلوات : يول زايع الخجل بيرغ هد اخوك الچبيررر .
بيرغ : انتَ شعليك خلي يظل سنة ياهو مالتك .
شهاب : والشغل والهوسة يخليهااا علينا .
_ اشتغل بين مايرجع .
_ مانع فوتي على اراضي مبلغ همام
اشتغل من برا ومحدد الشغل ماعندي صلاحيات.
_ مشكلتك .
_ خابرة بلغووو يررررجع .
_ ما اخابر وما احچي وياه واعرف شنو براسك
وغايتك مووو شغل ، بس تحوس تريدهاا ترجع.
شمرو على تخم بكل حيلو ودفر الطبلة
_ ماعندك كرامة وفلا تخاف الله دام عينك
على حرمة اخوك ، وتكيد الحقد بگلبك على اخيك
وما تسندو وتحاربو هذا مرض بيك مرض غيرة
كسرتووو كسررتوو دمرتو وهوَ بعدو ثابت
كل ما يوگع يوگف اقوة من قبل وانتوا توگعون
بشر اعمالكم ، ركز ول عار البنية تزوجت واختارت
وتحبو وتريدو وهوَ حارب ال ضـلـيل بكبرررهم
وانتَ واني وامك كلنا نعرف شنو ال ضـلـيل واخذها
لا انتَ ولا جيش مثلك يخربوهم .
ضحك شهاب بصوت عالي ضحك مخيف
وامه على ضحكتو تضحك وطاح حيلي
بقيت اشبخ على درج اريد اوصلهم من
غدرو سهاب ونوم بيرغ على تخم يضرب بي
بوكسات مميته بلا رحمة وبيرغ يدفر بي
وهذا مثل المخبل يكتل بيرغ ويصيح
_ لاااااا تحچي هيچ لاااا تحرگون گلبي
ما تررريدوووو تكرررهووو انفرض عليهااا
والله اخذهااا منوو والله ومحمد اخليها
تكرهوو وتخونووو ويايَّ واحرگ گلبو
عليهاااااا هاااي من البداية بأسمي .
ضربتو على ظهرو يريد يضربني
ورفسو بيرغ على كلياتو وگع متألم
يرافس ونهض لازم عيونو ويحذر بأمه
بيرغ : تسيطرين على ابنچ وبطلي حش براسو
راح تصير دم من وراچ وبذاك الوكت يا يمه
ما اسامحچ لأن دمرتي عوائل بسبب طمعچ .
ضربت على صدرها وصاحت بي تبچي
_ يا طمع هذا شنو حصلت منكم لو من ابوكم .
بيرغ : سنين وانتَ تترسين براس ابوي على وارث
سنين خليتي ينبذ اخواني كلهم حتى على همام وسهم
وباقية انتِ تلعبين بالفلوس ، بسسسس ربچ
يمه ربنا بالمرصاد حوبتهم ما تتخطى واحد بينا
وراح تتندمين والله مثل ما حرگتي گلوب امهاتهم
عليهم ربنا راح يحرگ گلبچ على ولدچ .
اقترب منها وفتح ايده وبصوت منتهي صاح
_ وانا يمه انا وگعت بيه حوووبتهمممم يمه
صارت بيه ربنا عرف بمنووو يضربچ
مو انا وهذا اعز ما تملكين راح يعاقبچ بأعز ما تملكين .
نظراتها صارت عليَّ من سمعتني اختنگت
بالبچي حست صاير شي گعدت على بايات
الدرج فحطانه مهبوطه من العركة ومن كلامهم
لزمني من زندي رفعني يصعد بيَّ فوك يريد
وعرتت بي من ايدو تمنعو وعاطت وعيونها عليَّ
_ شصايررر ليش گلبي قمتني قمت عليك .
سحب ايدو وكمل طريقة صعدنا على غرفة
قفلها بقيت بمكاني ساعة وانضرب الباب
شهاب : وينك احچي وياك .
_ امشي ولي .
_ غير اعرف شبلاك ذبيت قنبلة وصعدت
صايرروياك شي محتاج شي فهمني .
_ يا افهمك على اساس انتَ مهتم .
_ شلون ما اهتم يا چلب يا ابن الچلاب
غير اخووووك الچبيررر اناااا افتح المهجوم احچي وياك .
_ لو عندك محنه من دحگت تعبان بالگوة احچي
ما تلزمني وتضربني يا عار الزلم امشي ولي منا .
ظل يحاول وياه وهذا رافض لليل من نزلت
اجهز اكل سألتني صلوات شصاير ما جاوبتها
وهيَّ مدري شبيها حتى ما تجادلت عبالك خايفة
ومن ثاني يوم من الصبح بلشوا همام وبيرغ وسهم
ينقلون اغراض البيت على بيت الثاني يرتبون
بيهن والشغل مايخلص احنا وياهم ولا يخلص
ومن بعد اسبوع دخل همام بيدو اكل فرشنا
سفرة اني وميمونة وگعدنا كلنا على سفرة وحده
من بعد شغل يوم كامل هاي اول وجبة ناكلها كلنا
همام : وارث مخابر على سَــهم على اساس باجر يرجعون .
غص بيرغ بالأكل ترست گلاص الماي شرب وصاح
_ كون شهاب عرف ؟
_ لا مايعرف هوَ صاير يومين مختفي .
ام وارث : اي فدوة خليني افرح بيهم مشاكل مانريد .
سَــهم : هاي اذا متصالحين .
جرها بيرخ احااااااا طويلة يصيح احاااا ويگطع لحم
بيرغ : والله بحلگي جواب بس البنات گاعدات
اي هي سگط صار 14 يوم هناك متخاربين وباقين 14
يوم عجل لو متصالحين شگد يظل سنة غير بربع
اخوك بالعسل تبرربععع بربعععع .
همام : عجل مثل حظنا انا وسهم اليتيم
بقينا التبربع البيرغ ووارث بالعافية عليكم .
بيرغ : اكل قندرة يا قندرة يا خايس وانطمممم
انطمممم طم لا احط ضيمي بيك .
دفعني من ايدي وعاط مقهور واني اختنگت من الضحك
_ جيبي صمووون اكل يحسدون العميان على سمع .
سَــهم : صدك گال على اساس راح يجون باجر
الصبح اثنين بنات مدري زلام مدري شنو يسوون
بالحديقة نبهني انطيكم علم ، وهم راح يجون خطار .
ام وارث : شكو ولك شعنده ؟
سَــهم : هوَ ابنچ اخذ منه حق باطل بس ينتر .
همام : فايخ .
سَــهم : حظه گاعد .
_ امده حظك .
_ وحظك .
بدل بيرغ وراح يلتحق هل ليلة عنده واجب
والثاني يوم اول ما گعدت لگيت اثنين بنات
واثنين زلم وياهن يرتبون بالحديقة ودخلت
صلوات تعبانة فحطانه عاطت بيه
_ امشي نظفي المشتمل ويايَّ تعبت وحدي .
انتبهت على عمال واسرت بيهم
_ هذولي ياهم شعدهم هين .
_ ما ادري .
_ شلون ما تدرين يا بربوك .
عافتني وراح من دخل شهاب وراها عليهم
وام وارث ركضت وراهم وهي مستهمة
صلوات : انتم منو شعدكم هين ؟
جاوبتها البنية المشرفة على شغل
_ خالة احنه من شركة الـ *** أجينا نرتب الحديقة .
صلوات : شني هل ابيض حفلة عدنا .
جاوبتها مبتسمة: اي حبيبتي حفلة عيد ميلاد .
دارت صلوات على شهاب عود تگله اسمع
صلوات : عيد ميلاد ياهو من يمتى نسوي ميلاد .
جاوبتها وهيَّ ترفع كتفها والورقة بيدها
_ والله يا خالة الكيكة والأحرف بأسم مُـرجانـة .
هوَ مو بس صلوات وابنها مصدومين حتى
اني فتحت حلگي وياهم على واهس وطلعت
اتأكد اخاف غلطانين بس بعدين تذكرت
صدك هل شهر ميلاد مُـرجانـة يعني وارث
جهز هل حفلة ، ابتسمت وخليتهم بقهرتهم
وصعدت فوك فكيت الكنتور ادور بالملابس
طلعت فستان كله تود واسع مخصر من فوك
وجهزت المكياج بعدني اقرر واخمن وصاحتني
ام وارث من فوك بصوت عالي
_ ملِكه وينچ هاي إيليا تريدچ .
نزلت عبالي بالتلفون بس صارت ايليا مقابيلي
عن حق وحقيقي حضنتها وبوستها وهيَّ مستعجلة
_ بدلي انتِ وميمونة تروحون ويايه للصالون
ترا اليوم عدكم حفلة ضخمة حالها حال العرس .
ملِكه : يا صدك تحچين ؟
_ اي والله راح يوصلون من السفر ويوصلها
وارث علينا للصالون تجهز نفسها بس هيَّ
ترا كلشي ما تدري ثور الله بأرض الله تهبد .
_ ههههههه ايليا ولا تگعدين .
ميمونة : روحوا انتوا اني اريد اعدل نفسي
ماحب مكياج الصالونات طوخ يمحي الملامح .
ملِكه : والله اني هم بالعرس ولا حبيت مكياجي
اني اسوي احلى منهن وخفيف ، روحي انتِ
وديري بالچ على مُـرجانـة ، واني وميمونة على
بيت راح نرتب ونعدل الحفلة حتى كن توصلون
كلشي جاهز على اتم وجه شنو رأيچ ؟
ايليا : اوكي عيّني اوكي يا صبايا يا حلوات .
قبل لا تطلع لزمت ايدها شاورتها
_ تصالحتوا انتِ وتراث .
_ لچ احنا تگب بيناتنا الحرب العالمية من اطلع
من نستقر بالبيت نرجع طبيعي ولا عبالك .
_ احلى شي .
_ شبيچ هسة جابني الطريق من البصرة للغربية
عرك اخر شي من نزلت هسة فشرت عليه وركضت .
_ هههههه هسة ترجعين ويلزمچ .
رفعت عبايتها تضحك وراحت تركض
تباع على بنات وراحت عدهن وتراث
وام وارث يسولفون وهيَّ تعلمن بيهن
شيلوا هاي وهاي هنا ، والزلم واگفين
تراث يحچي هوَ وام وارث راح يمشي
عدها وبعدو يجاوب ام وارث سحبها
من ايدها وطلعها وگفها بصفه مثبتها
دقيقة وراحوا اثنينهم وام وارث تفتر على بنات .
كملوا العصر كل شغلهم وراحوا بعدنا نجهز
اكل واجت سيارة دخلوا عمال ميز ابيض
ورتبوا الأكل نزلوا صنفين وعلى جهة الثانية
مكان الكيكة بس ضمتها ام وارث حتى لا تموع
رحت شفت الترتيب اريد ادخل ولمحت شهاب
واگف بالمشتمل بالغرفة المطلة على بالكون
تجاهلتو ودخلت خايفة منه لا يخزبها عليهم .
وبمجرد ما كملنا تبديل اندگ الباب واسمع ام وارث
ترحب : ياهلا بأم مُـرجانـة يا مرحبا بالشيخة
هلا يمه نقش تفضلوا هلا بيكم كل الهلا
فوتوا البيت بيّت بنيتچ عيوني بيتچ ومطرحكم .
اول ما دخلوا وياهم بنية ماعرفتها سألت نقش
_ هاي منو وياكم .
_ عمتي عزيزة .
_ فدوة بعدها صغيرة .
بوستهم واخذت نقش وعزيزة ويانا نكمل المكياج
عدلنا نفسنا ونزلنا ، ودخلت ام تراث وفاطمة
اسمر جايبهن وكلنا طلعنا من شغلنا الأنارة
برا وصار شكلها مثل السحر الحديقة
چبيرة والترتيب جملها بشكل لطيف .
اجت ايليا من الباب طگتها هلهولة رنانة
وفتحت البوب وام وارث راحت وياها ودموعها
نزلت على خدها وبيدها سلة مليانة چكليت
من نزلوا وارث ومرجانة تنثر الجكليت على
عرسان وتهلهل هيَّ وايليا بصوت واحد .
طلت مُـرجانـة بفستان ابيض طويل مغطي
كل جسمها مفصل جسمها بشكل انثوي
والشال ابيض على راسها نازل بأهمال
مكياجها خفيف وضحكتها ترد الروح
البرائة بعيونها تجبر الكل على حبها
بيدها ورد وايدها الثانية رافعة الفستان
وارث ساندها لازمها من ظهرها وضحكته
مرسومة على ملامحة الرجولية تبرز فرحته
افترقوا اول ما دخلوا البيت وارث حضن
امه ، ومرجانة ارتمت بين أحضان امها واختها .
مُـرجانـة …
عقلي بعده ما مستوعب الصالون وجود ايليا
وركض تمكيجت اسأل ايليا شصاير تغلس
تجاوبني سبرايز ، فتحت جنطة وضحكت
_ اتمنى ذوقيّ يعجبچ صار يومين اخور
بالمحلات ماخليت مكان يعتب عليه حتى
اشوف فستان ابيض يناسبچ .
اخذته اتلمس بي متعجبة بالتفاصيل وفتحت
باكيت طلعت الحذاء لونها ابيض ومن أمكيج
تجي عليهم تأكد على بنات
_ نريد الحمرة حمرة بلون دم الغزال
كون زلمتها من يشوفها تثور احاسيسه .
واجتني الصدمة الثانية من رجع وارث اخذنا
وصلنا على بيت من شفت امي طرت مو ردت
اطير لا طرت ركضت بحضنها تسلم عليَّ
وتتفحصني وتعاتب لأن ما خابرتها ابد ابد
مُـرجانـة : هذا وارث يعاند ومايقبل يخابر .
ضحك وتقرب اخذ ايدي بين ايده ويسلم
_ شلونچ ام مُـرجانـة شخبارچ ؟
_ بخير اذا انتَ ومرجانة بخير .
وارث : احنه عال العال عيوني .
سلموا على كل وعدل شالها على راسي من دخلوا
اخوانه سَــهم وهمام من الباب يدبچون چوبي
ام همام : يولو بوسوا راس اخوكم .
همام : غير چان يمنا بالأراضي .
سَــهم : عساكم لا شفتوا الرزايل .
همام: صلخ .
سَــهم : ذبح .
همام : مناطح .
سَــهم : احنا هم ما نفتهم .
همام : لو صالخي بوحدة وليدي يگعد وزن .
راح سَــهم على اغاني وصار يعليها والكل
يصفگ فات تراث من برا هوَ واسمر تلازموا
ايد بيد وسحبوا وارث وياهم يدگون چوبي
وارث مترأس الدبكة يفر سبحته وسلمها لتراث
رفع ايده سَــهم وطگها هلاهل من هاي المضبوطة
همام : هبي بير عيد ميلادچ يا مُـرجانـة .
سَــهم : هبي بير شنو ولك يا باير يا عانس .
اجه يمي سَــهم يصفگ وعلى صفگته صفگت
حط ايده على صدره وعود يهز شعر وامي
خربت عليه ضحك هي والبنات ، على صوت
الردح يردح ، بوسط الضحك دخل بيرغ مستغرب
تعداهم وراح يمشي وتراث دفع وارث
_ امشي صالح اخوك .
_ماتسكت تراث لا تخربها طس مني .
همام اخذ تراث وفاتوا للبيت على بيرغ
يريدون يصالحوهم ومن طلعوا عرفت بيرغ قافل
مشوها وغلسوا مؤقتاً وميمونة وملِكه طلعوا
الكيكة اخذ وارث ايدي وصرنا وراها همس
بأذني بكلمات جريئة جحظت عيني وسعتها
همام : عمي لا تهمسسس لا تهمس حرمتك
ملامحها مشهورة عوجت وجهه ضربتها جلطة
مبين الكلام ذاك هوَ مووو خوووش مووو خووش .
ضحك وارث ورگعه على رگبته واشتغلت
اغنية ” انسى كل الناس ” حضن خصري
واني اقتربت من الشموع اتمنى وطفيتهم
اخذوا الشباب كيك وطلعوا برا وارث تقرب
طلع علبة صغيرة وقبل لا استوعب رفع ايدي
ولبسني سوار حضنته ونسيت كل الناس
حضني يضحك خجلان وباس راسي من فوك
الشال ويمسح بوجهه ، رفعت عيوني بعيونه
وشفت امه گاعدة على كرسي قريب من عدنا
واطگ النا صور وابتسامتها الحنينة على وجهه .
رحت عدها بست راسها حضنتني وبچت بصوت
ام وارث : فرحانة بيكم يمه ، فرحانة لأن بقيتي
وياه انتِ بمعزة وارث وحيدي هذا .
وارث هوَ وامي يسولف ويضحك ، دقايق وطلع
عوَ والشباب برا واني والبنات علينا الأغاني
وردحنا من كل گلبنا طلعنا قهر العرس كله
دخل وارث رحت عنده اهز وهوَ خجلان ويضحك
لزم ايدي يفر بيدي وحضني يگرص بخدودي حيل .
شردت منه وركضنا اني والبنات للبيت ابرد من برا
كل وحدة وگعت بصوب نلهث من التعب وناكل
واسولف على مكان وسفرتنا ، ملِكه الوحيدة
شفت الحزن بعيونها تركتنا ونست طلعت
برا تلف بشالها من شافت وارث يملي ماعونه
اكل وگفت قريب منه وبمجرد ما بلشت تحچي
ذب الماعون وعاط بصوت كلنا دخلنا انذار
وارث : تحچين صدك لووووو تشااااقين ملِكه
لو تريدين نتصالح ولعبتي هل لعبة .
رفعت فستاني ومسيت فات مني طاير
وبصوت عالي عاط وهوَ داخل على بيت
_ همـــام سَــهم صيحي هل حيووواناااات ملِكه .
جرتني ام وارث من ايدي ودفعتني على درج
_ اصعدي وراه يمه حتى يستحي يتعارك .
لزمت شالي وصعدنا إني وميمونة
ورانا همام وسهم يتراكضون ويصيحون
همام : شسويت يول من طرگاعة على راسك .
سَــهم : اخاف عرف خربنا السيارة مالته .
همام : لا اخاف عرف بعدنا ما مشتغلين على جرد الشهري .
سَــهم : بس لا عرف طردنا اربع عمال .
كلنا بالباب نباع على وارث جر بيرغ من ايده
وگفه سحبه سحب مقابيله ورفع رگبته يباع عليها
همام : ياااا يااا هاي ملِكه شهرت بيرغ
مبين من فحص الرگبة اكو طبع ملكية
خاينها ابن صلوات .
سَــهم : طالع على ابوو قابل طالبها من الغربة .
غابت كل الملامح وتجمد الدم براسنا من صاح
وارث : بيك سررررررطان بيررررغ بيك مرض
مثل هذا وماتبلغغغغغ اخوانك ماتريد نعرررف!
فاتت ام وارث ادگ على راسها وركضت على بيرغ
_ يمه لاااا گول غيررهاااا يمه اسم الله
شني هل حچي ولك وارث تسووودنت .
وبيرغ عافهم كلهم وخزر ملِكه جاوبته وهيَّ تبچي
ملِكه : هذولي اخوانك حزام ضهرك لازم يعرفون
بمرضك ويسندون اخوهم بوكت طيحتو ، هاي الشدة
والأخ اذا ما يسند اخو بشدتو هذا مايعتبر بعد اخ
وبذاك الوكت حقك والله يلوم كلمن يلومك اذا گاطعتهم .
وگعت ميمونة من طولها لزمها همام من ايدها
سند ضهرها بالحايط برا الغرفة ، دفع بيرغ
ايد وارث وطلع الميمونة حضنته وصرخت
_ بيه المررررض كون بيه اني كله مني دعيت
على امك يحترك گلبهاااا ، بس ما قصدت اخوتي
لا اقصدك ولا اقصد شهاب ما اريدكم تتأذون
اريدها هي تتمرض مووو انتوا مووو اخووتي.
بيرغ : مابيَّ شي هاي دحگي بعينچ ومحمد مابيَّ
شي هي بس تحتاج عملية اسوي استئصال ورم ويروح .
همام : تحچي صدك لو تخوفنا صدك بيك .
حچاها وعيونه بقبقت بالدموع وسهم
كمز حضن بيرغ ، مشيت على غرفة
دخلت لوارث گاعد وايده على راسه
لزمت ايده وهمست بصوت ناصي
_ خطية اذا يشوفكم كلكم منهارين يخاف
بالزايد ، اني من جنت اتمرض اذا اشوف
احد من اهلي يبچي يزيد الوجع ، لازم تبين
هل شي عادي ويتعالج .
هز راسه مستمع لكلامي وجر نفس طويل
راح يمهم وجر سَــهم من بيرغ عاط بيهم
_ كافي شبيكم تخبلتوا ماتخوف هذا
النوع يطيب ولكم 90% نجاح يتعافى
بس يسوي العملية ويخلص من الورم .
صرت قريبة من ملِكه لزمت ايدها همست
_ فاطمة اخت ام وارث ركضت على مشتمل صلوات .
_ ليش .
_ تگول ابلغ امه .
وگف سَــهم بعيد صافن على اخوانه ويبچي
اني شفته ودموعي شلال صارت ، رحت قريب
منه قبل لا احجي حرف واجت صلوات بلا
شال وشعرها بيدها تگطع بي وتركض
وگعت مرتين ، بيرغ ماتحمل وراح يلزمها
شگت دشداشتها ولطمت على راسها
_ جابوا اخبارررك الشماااات يمه بيررررغ
اجوني يتشمتون بمرضك ول يمه امووت
اذا صدك اموت اكتلني اذبحني يااااا ولك
بيرررغ يمه صدك صخام بوجهي لطام على
راسي وراس الخلفووووتي يبوووووو ،
بيرغ : شني يمه متت شبيكمممم يوووولووو
ملِكه ماعرفتي تبيتين السالفة بنص بطنچ
يول هسة ارتاحيتي كون اگضچ اليوووم .
دخل شهاب كزبر جسمي وروحي لعبت
بس شفته تراجعت وارث وگف على درج
من فوك وهوَ جوا يغطي بأمه وحضن وجهه
شهاب : يمه لا يصير بيچ شي كافي مو خطر
هذا المرض والله مو خطر يتعالج .
صلوات : مو حچيت وياك والله يمه شهاب گلبي
علمني اخيك بي شي ما صدگتني .
شهاب : الخاطري اهدي خلي نفتهم .
التفت على بيرغ يسأل بي بكل برود
_ من يمتى بيك .
بيرغ : شهرين أقل بشوي .
_ باجر نسافر و .
_ مايحتاج رحت وبعد اربع ايام عمليتي .
زلغت صلوات خدودها تزلغ تلطم على صدرها
بيرغ وشهاب اثنينهم اخذوها رجعوها على مشتمل
دخل وارث على غرفة يفتر بيها افتررر افترررر
انگلب گلب لا يحچي ولا يشكي صافن ويفتر
والجگاير ما طاحت من حلگه ، لزمت ايده
ذبيت الجگارة ومسحت وجهه
مُـرجانـة : بطل صفنات وروح طمن اخوك .
وارث : اريد احضنه اگله انا وياه بس اخاف
ينفر مني اكثر وما يتقبلني .
بست ايده وخده احاول افتهم منه وافهمه
_ جرب انتَ بعمرك ما جربت لازم تجرب
تلم اخوك وتحسسه بوجودك حتى تكسرر
هاي الحواجز بيناتكم ، والله لو تسمعهم
شلون يحچون عنك ويحبونك ويعتبروك
چبيرهم ما تتردد بالعكس انتَ تلمهم اكثر بحنانك .
رفع راسه جر نفس طوبل وذبه حسرات
وارث : مُـرجانـة خليني وحدي روحي شوفي امچ .
ما عاندت وخليته ورحت على غرفة ملِكه
توني احضنها وصوت خطوات على درج صارت
وارث : بيرررغ لحظة .
رجعت وعلى گمزتي گمزت ملِكه اجت يمي
ومن وراه الباب اختلسنا النطر عليهم
وارث : على يا مستشفى رحت .
_ على هاي بالشمال مال ال*** .
_ انتَ ومنو رحت وشوكت ؟
_ قبل اسبوع انا وملِكه .
_ بس ؟ ماتعرف تنطي علم لواحد من اخوانك .
_ ماردت أدوخكم كل واحد ملتهي بحياتو .
_ انتَ مخبل لو عاقل .
_ وارث شتريد هوَ وقت معاتب هدني يمعود بطران .
راد يتحرك لزمه وارث وحضنه وبيرغ جمد
فاتح عينه بدون رد فعل ثانية ، انتظر وارث
بيرغ هم يحضنه بس ماكو يريد يبتعد
واشوف بيرغ يلم وارث يضرب على ضهره
بيرغ : خايف انا خايف وارث .
وارث : انا اخوك بيرغ افاااا انتَ الكفو تخاف
وبدر الهواشم اگضي المرض گضيان علاج وصلاة
ودعاء الحد ما اطيب وترجع تلعلع بصوتك .
ابتعد بيرغ مخلي عينه بعين وارث
_ انا امانة من ابوي عندك لا تهدني وحدي
المرض أكلني السرطان خبيث خوية انا مو گده .
_ احزام ضهري انتَ واخوتك بعيني اخليكم
ولك اشيل منك المرض واعيشه وياك لو ما گدرت وحدك .
لزم بيرغ راس وارث يبوسه واخد ايده باسها
سحبها وارث ورجع يلمه بحضنا .
وارث : وابو فاضل لو يكلف علاجك روحي
يا بيرغ انطيهم روحي وصحتي ومالي وحالي
وترد سالم منها ، ابد لا تخاف ابد دام اخوتك وياك
ربك ما ينسى عبده والله تگوم منها والله .
اثنينهم مسحوا وجههم وبيرغ تحمحم وگال
_ انا اعتذر تجاوزت عليك مقابيل خالك وابنه .
_ مصار شي معذور لو انا بمكان اخوك
القندرة العتيگة نعال الحمام شهاب ، يخسي
يضربني بس فرضاً انا بمكانه انتَ هم تجاوز عليه
وتضربه وتعاركه لأن ضربني .
_ اذبحه اذا يگرب منك ويضربك ومحمد
بس انا بوكتها ما ضربتك بس هددت .
_ عوزك تضربني الچلب امطلك بصف اخوك .
نزلوا اثنينهم طلعوا نزلنا اني وملِكه
اريد اشوف امي وصدمتني ام وارث من گالت
_ اجه عليهن إبن عمج شاهين وصاروا
امالخ هوَ وتراث برا بالشارع اخذهن وراح
بيرغ وهمام وشهاب وسهم فاككوهم .
غـاليـة …
الطريق صار طريقين وهذا گطع روحه
احچي وياه اهدي بي ولا يسمع عبالك طبگات
عمه اول ما وصلنا طبگ السيارة وعافها مشتغله
والباب مفتوح ونزل شايط شوطه بحيث وجهه
احمرر دم وشرايين حتى براسه طگت ، جويت
المفتاح من السيارة ونزلت اطبگ بالبوب
مصدومة منه هذا كل عقله .
دخلت للبيت فايت للديوان يصيح صياح
ركضهم كلهم اجت كوثر وبتها تهفي من البيت تركض
شاهين : تررريدني اموووت گلي اموتك واريحك مني .
ضـلـيل : شبلاك من وجع لوجعك شمالك
چنك چلب محصور ويعوي .
شاهين : تخلي هذا السگط يضحك وياها
امداني وامده فرگي ازين شااااربي تررريد ازينه .
ضـلـيل : راح اجي انزع حزامي اصلخك
صلخ بي بنص الديوان اخليك حالك حال
الحرمة من تطلگ يا چلب يا ابن الچلب
وين البنات وغالية من خفه لهل وجه .
من دخلت شفت بس ضـلـيل ومقتدر گاعدين
بالديوان قدمت ايدي بيها مفاتيح لشاهين
ضـلـيل : يولو هذا بس لا نساهن بالسيارة ؟
شاهين : اعصاب ما اركززز عقلي مو براسي .
ضـلـيل : عجل وين عقلك ب***** .
رجعت كم خطوة من صراخ شاهين من تقدم على ضـلـيل
شاهين : ارتكب جريمة وعزة جلالتو جريمة ارتكب
بأبن شيخ فؤاد اروح على بصرة اجلدووو .
بأثناء كلامه اتصل شيخ فؤاد وضليل جاوب
بعد السلام صار يستمع وضليل يرد
_ والله يا خوية بعدني ما ادري بهذا الكلام
هساع وصلوا صح عصبي بس بعدني ما سامع م..
جر شاهين التلفون من ضـلـيل وراح وثبت
عيونه بعيون عمامه وبعالي صوته صاح
شاهين : شيخ فؤاد ماعدكم حرمة يمنا ماعدنا
حررريم للزواج بنت عمي عابد انا ناهي عليها
وعاشگها من الصغرر هاووويهاااا انااا هاويهاااا .
دگت كوثر على صدرها ونبراس على وجهه
واني عيوني فكيتها على وسعها دمي يغلي صار يغلي
جر ضـلـيل التلفون تعذر من شيخ فؤاد وطبگ الخط
عگط التلفون بعيد وعته من قميصه صاح بي
_ بكيفك تتصرف ما تحشم ولا تحسب حساب احد .
دفع شاهين ايد ضـلـيل انفجر
وصوته صار يدوي بالديوان
_ چان انتَ حسبت حساب لأبن اخووووك
صااااار سنين وانتَ تگلي اصبر ميخالف اليوم باجر
وكفختني انتَ وابووووي على وجهي وزوجتوها
وخليتوني اهچ من الغربية كلها تالي اطلگت
وتعرررف اطلگت لأن انااا نفسي بيها ورايدهاا
بالحلال وبعمري ما لطختها بلمسة حرام لو كلمة
وبقيت تگلي اليوم باجر بعد سنة بعد شهرررر
الى متى فهمني الى متى الشيب اكل راسي
شگد بعد اصبرررررر جماااد اناااا جمااااد .
كوثر : يا مفلوك يول غير مـ..
شاهين : عمي انااا ناهي عليهاااا اريد ادحگ
عاااار ابن عار بعد يحچي بيهاااا ادخل بخطيتووو
رحت مدري منين جبت هاا والله ابن فؤاد رايدهااا
عجل وانااااااا واناااااااا مووو منتظرررررر .
ضـلـيل : يجبرني ألحن مواويل هي سگط
شبلاااااك تسودنت اعقل ول اثگل .
شاهين : اسمعني بس اسمعني گاعد بالسيارة
انتطرهن اول ما طلعن هذا الچلب تراث اجه
تگرب سلم عليهم ويسويها بضحكة يگلها
ها بشري نريد نفرح يمتى نسمع الموافقة
وسفه بعد عليمن مربي شووووارب على
شيب الخلفووووني ازينهن احسن
تريد ازينهن واصير حالي حال الحررريم .
ضـلـيل : اگعد نتفاهم يول راح يمووووت
طگ خشمك دم هي چلب ابن الچلب
انتَ شني تسكت تسكت وتنفجر فد انفجااار .
شاهين : هسة تخااااابررررر هسة .
_ اخابررر منووو ؟
_ فؤاد وسمع اولادووووو .
_ عليش اخاااابرهم زمال ابن الزمال .
_ خااابرررر بلغوووو انا ناهي عليها
ورايدهااا وهواويهااا واسبوع الجاي خطبتنا .
نقش : موو بكيفك احترم نفسك شو هذا مايحترم
بكيفه ينهي ويحدد موعد خطوبة شكوو عيني ؟
شاهين : ولا حس ولا نفس انتِ اخذچ يعني اخذچ
صار سنين صابر عليچ طگت حوصلتي
مرارتي طگت اذا ما نعقد اسوي عمايل اشيب
راسكم وراس اهاليكم ومحمد وصلت حدهااااا .
نقش : مووو بكيفك .
_ بكيفي ونص تتزوجيني اريدنچ انااا من سنين .
_ شگد جذاب ومخبل هذا عموووو تسمعه ؟
_ اي يسمعني وسامعني من سنين ويصبرني
بس انا لهنااا حدي ، صار سنين يگلي اعترف
وجيس نبضها اذا تريدك تاخذهااا ، انااا اعتراف
بالسر وبالحرررام ما اگدر اصووم واصلي استحررم
انا زلمة اخاااف الله بيچ اي ذنب ما اريد يلوحچ مني
هاي جدام اهلنا كلهم عمامنا وامچ وجدتي وعماتچ
انا يابنت احبنچ صار سنين انتَ بكلبي عايشة
باليسرة هين ومحمد اريدچ ما رايد غيرچ
برضاچ غصب عنچ ماتصيرين حرمة الغيري .
التفتت عليه لزمت ايدي قوي واشرت عليه
_ يمه سمعتي كلامة شفتي شـ..
شاهين : شيخناااا انتَ كبرتهااا انتَ تحلها
هذا اخر شهر مهلة عدكم اتزوجهاا يعني اتزوجها .
يريد يطلع رفعت صوتي وبلغته مقابيل الكل
غـاليـة : شاهين ، انتظر دقيقة .
وگف منزل الراس بعرف هوَ وعمه اني
مستحيل بخلوني بعد امام امر الواقع
غـاليـة : البنية بنتي وإني ولي امرها هنا
تعرف معزتك بگلبي بس اعذرني لو تعنس
ما ازوج بنية من بناتي الأولاد تمار .
شاهين : تحمليني ذنب ابووي ؟
_ انتَ گلتها ابوك هذا ابوك ما اخلي
بنتي چنته ابوك شيطان ظالم ، اذا اسلمك
بنتي ياخذها تمار حجه ويطلع ويرجع
واذا بيوم رجع تمار اخذ بناتي واطلع من هل بيت .
عفّتهم لسكونهم وتوجهت على غرفة ضـلـيل
ونقش اخذت ننوس وصعدت فوك ، بين ما سبحت
وغيرت ملابسي ، وساعة زمان دخل ضـلـيل
نزع البشت والعگال والشماغ وهوَ يعدل
بشعره وانا اعدل بالكنتور يناقشني
ضـلـيل : عندي حچي وياچ .
_ ما ابدل قراري لا تحاول .
_ خليني امضررررط .
_ حشاك .
_ بقيتي حشاك هساااع اگلچ اريد امضرط
احچي وياچ سالفة ، بسرعة ما ابدل قنادري .
عصرت الضحكة وسويت روحي أعدل بالملابس
راح على تخم گعد وشغل جگارته ودخل بالموضوع
_ هذا صار سنين ينتظرها وانا اضمنو
شاهين تربيتي وبنتچ تظل عندچ ازوجهم هين .
_ لا تعب روحك ما اگدر .
_ مو بكيفچ والله ازوج نقش الشاهين
مثل ما دگيتي رجل وزوجتي مُـرجانـة للمنبوذ .
_ للموروث چبير اخوته .
_ شني المنبوذ المتوحد المدلع ابو صدر احسن من شاهين ؟
طبگت باب الكنتور وگفت ارد عليه
غالية : هسة اني قارنت بينهم ؟
_ قارني بعد ظلت على مقارنة يالعرمة
تعاند هسة من البارحة صحت بيچ لا تروحين
لحفلة ابو صدر الطنطل ادري بهذا ابن فؤاد
تك ابن ساجر لازگ ب**** بيمن لازگ ؟
غـاليـة : يعني شلون بالله اجاوب واعيد
وراك الفشار تعلمني گاعد تريد اتلفظ مثلك .
شمر الجگارة بالطفاية وهزلي ايده يغمز
ضـلـيل : تريدين اگوم افلش الغرفة ؟
غـاليـة : مابيها شي فرغ غضبك بالحديد ولا بالعزيز .
دفر الطبلة وجر نفس غضبان وصاح
_ ومحمد يا بنت ذياب نقش الشاهين .
_ ما انطي بنت الولد تمار .
_ مو بكيفچ العرمة تريدين تمشين عشيرة
بكبررررهااا بقرارچ تلعبين بكيفچ تخططين
وتنفذين بكيفچ ، ماعندچ رجال ماعندچ احد يسيطر
عليچ ، يول دام انااا گلتها نقش الشاهين اريد
ادحگ بنت ابووهااا تفتح حلگهااا وتعترررض
بالله ادحگ قرار شيخ ال ضـلـيل يمشي لو بنت ساجر .
لزمت بطني وايدي الثانية رجعتها على ظهري
غـاليـة : تمام اگعد هنا وشوف براحتك
اني انام عندي تقلصات ببطني وظهري وگف .
نزلت روحيّ على چرباية بصعوبة وتمددت
وهوَ گاعد بعده على تخم محروگ دمه
ضـلـيل : العيارة تقلصات عدها العرمة
الفووصة القادرة نامي ظالمة يا ظالمة
دخيلك ربي شني من حرمة بليتني بيهااااا
هاي النسوان الفقيرات شلونهن يخافن
لو زلمتهن دخل البيت يتراجفن مراجف منهم
شسويت عندك ربي وتمتحني بغالية بنت ذياب.
طگ جگارة ثانية ويحچي من كل گلبه وينشغ
من العصبية واني على كلامة ختلت وغطيت
راسي باللحاف فطست بس من الضحك
ضـلـيل : اللهم عطفك ورحمتك ارحم بعبدك
امتحانك صعب راسي هذا راسي شيب منها
ومن عنادها ، هسة ومحمد صلاة وملتزم بيها
زايدة ناقصة ماعندي ماشي مسطرة ، زكاة
ازكي تعبت من الزكاة والجوعانين عرفوني
بگد ما اطعمت جوعانين من الحلفان هي
تخليني احلف واخلف القسم .
جر نفس وگف على حيله ميتهم ورگع الميز دفره
_ الصوم انا ما ملتزم بي من هل چلاب والزمايل
بحياتي يخلوني اغرد مواويل اعزف فشارر
وما اعرف اصبر وألزم نفسي وابطل منها
لأن زمايل اذا ما افشر ما يجرون عدل
الصيااااام يبطل يبطل هل الله عاقبني .
صفن صفن وراها من ما حچيت وقبل لا يطلع هدد
_ اذا ما ازوجهمم وغصباً عليچ فلا اعتبر شيخ
شني ماعدنا كلمة تمشينا نسوان تالي عمرنااااا .
طبگ الباب وراح يدردم برا تالي راح على ديوان
توني بديت اغفي وعيوني ثگلت وفتحت كوثر
الباب وبقت بمكانها تريد تسولف ادور حجج
كوثر : خبلتي الزلمة وطلعتي بالشوارع .
_ ابنچ عصبي ما ينجرع .
_ ومحمد انتَ ما تنبلعين خليتي يسولف
ويه روحو وطلع من البين كلو عمي خافي الله .
_ هسة اخابرة ويرجع .
بقت ادور مواضيع منا منا حتى اطول
والله من رجعت الحد هسة بس تريد تحچي ويانا
احسها واذا گعدت يمها اذب كلام بس احس تفرح
وبعد ما اعرف اذا هذا احساس لو حقيقة
لو كوثر عدها ملعوب عليَّ وعلى بناتي وگاعدة تحوكه ؟
_ هذني البنات صعدن ما نزلن بعد شمالهن ؟
_ آكلنا هناك بالحفلة .
_ ما اخذتيني وياچ تستنكفين .
_ مو توسلت بيچ البارحة بقيتي تفشرين .
_ نسوان دايحة عمي ما تنگدرن .
گلبت عيوني وجريت نفس طويل
كون الله يصبرني عليها وعلى ابنها
اثنينهم واحدهم لسانه لو يتوزع على عراق يزود
طبگت الباب مثل ابنها تسب وتدردم خلصتها .
غفت عيوني من بعد تفكير وقلق على مُـرجانـة
وحياتها الجديدة رغم والله وبعد ما شفت الحب
بعيون وارث واحتوائه ونظراته وهوَ يركز
بأبسط حركاتها ، وحب امه وفرحتها على فرحتهم
بس موضوع اخو قالقني ومتأكدة مو بس اني لا
كل شخص بالحفلة شاف اخو شهاب شلون يراقبهم
بنتي فاهية اعرفها وعدها تفكير طفولي ويا خوفي
يستغلون هل فطاريه لأن واضح عليهم شرهم
وحقدهم على اخوهم وارث وغيرتهم .
مثلت النوم من رجع دخل الغرفة يحاول مايطلع
صوت ويفززني ، ابتسمت من تقرب ومدد ايده
ورفع راسي بكل هدوء نومني وسحبني صار
ظهري على صدره وقرب شفايفه من اذني
_ غـاليـة نايمة .
_ لا .
_ زعلتي مني مو ؟ چفصت چثير بالكلام
وخربطت بس وعزة جلالتو فلا اتذكر شني
حچيت ، هاي مصيبتي مصيبة من اصير
عصبي عقلي ولا يفكر يركبو زمال .
عضيت شفتي لميتها لا تطلع الضحكة صوت
غـاليـة : سويتني اختبار وعقاب من الله .
ضـلـيل : انتِ ربحي بهالدنيا ودين محمد
وحق من خلق السموات والأرض انتِ ربحي بالدنيا.
درت جسمي بصعوبة قابلت وجهه عيونه
صارت بعيوني وتنزل بين فترة والثانية على شفايفي
غـاليـة : ادور فقيرات شيخهم تاج راسهم
ماتروح تتزوج فقير مانعك .
_ هي الفاهية تنراد تجلط الگلب ، محلاها العرمة
تلون ايامي بعرامتها وتخلي الدنيا حلوة ، عجل
انا شني ما تزوجت الفقيرة تزوجت وجربت ما عشگت غيرچ .
رفعت ايدي أتلمس لحيته حب اشوف تأثير لمساتي
عليه من بعد البركان المفجور من العصبية والكلام
يرجع اخر شي يرتمي بين احضاني يعتذر
غـاليـة : اخاف عليك بعد انتَ شيخهم ماعدهم
غيرك وراسك يشيب من قهري ومصايبي عوفني .
_ هذا الصبغ خايس بالمحلات اشتري صبغ
واصبغ شيباتي واصير شباب مثل بنت ذياب
صعب اعوفچ اهوجس بيچ بكل وكت .
ابتسمت ونظرت نظرات شر ضحك وجرني
اكثر يبوس بيه ، دفعته من صدره وهمست
_ هسة صرت شباب وحلوة ووو هاي واليوم
مو بدلت اريد اروح وگفت بنص الديوان تصيح
اجت المراهقة محمره ومتكشخه متجهزه للدياحة .
ضـلـيل : اغار عليچ .
_ ايبااااااه .
_ ومحمد غير اغار عليچ رايحة البيت ساجر كاشخة .
_ هههههههه قابل ساجر موجود .
_ لا تذكرين اسمه انا زلمة لحية مسرحة ماعندي
حتى لو دنيا ليل اگعد البيت كله بصياحي .
_ بخبالك .
_ فلا تستحين انا مخبل ؟
_ اي شيخهم اي اي انتَ مخبل .
باس شفايفي خطفها خطف بوسة انتقام
ضـلـيل : هساع برد گلبي بعد كله هيچ
الصياح مايفيد وياچ .
_ فلا تستحي شيخهم فلا تستحي .
_ مو من اليوم ولا من امس صار سنين .
صلابته عصبيته درع الصلافة يتلاشى بلحظة
ما تصير ايده على بطني عيونه برقت بحنية
وابتسامته اشع حنية وهوَ يهمس بخفوت
_ ها بوية فارس طگ گلبي عليك
متلف اخليك يمي بصدر الديوان
ملابسك افصلها مثل ملابسي
وعگال تلبس وانتَ تعادل الف عگال .
غـاليـة : فارس ؟
_ فارس ضـلـيل هم شجاع يصير وهم فارس .
ردت اگعد ما خلاني وثبتني برجله
ضـلـيل : تريد تگعد عدها حچي يجلطني بمكاني .
_ هههههه مو انتَ تحچي ومتأكد ولد .
_ ولد گلبي يگلي ولد واسمه فارس .
_ واذا بنية م ..
_ اسميها كوثر على اسم امي .
_ ههههههههههااااااااااييييي .
_ على هل ضحكة كوثرنا راح يروح بالها بعيد .
منعني من الحركة غفيت بحضنه واستقرت
افكاري وسلبيات ايامي ضمني اكثر واكثر
لصدره مثل شخص وحصل حلمه .
نمت الثاني يوم لوقت متأخر حسيت على نفسي
اباع على ساعة بـ2 الظهر فزيت من مكاني
اريد اركض بس بطني متشنجه ، جريت
دشداشة لبستها على سريع واخذت شالي
وطلعت عليهم كلها گاعدة ومبين ضـلـيل طالع
ومصار هواي من راجع ، من شافني نزل عيونه
يخوط بالچاي منتظر اني اسلم ما خليتها بنفسه
_ صباح الخير شيخهم .
ضـلـيل : مساچ الله بالخير .
كوثر : صباح العرايس هذا .
ضـلـيل : نسوان مرتاحات فايخات يمه .
كوثر : حظهن گاعد يمه سودة علية بناتي .
ضـلـيل : كلمن وحظه .
كوثر : زلمهن يتنوعون لحلوگتهن لو حچن .
ضـلـيل : ما يگدرون عليهن .
كوثر : هم صدگ .
بعدني ما مصحصحة وهذا يرفع امه تكبس
خليتهم وفتت للمطبخ لگيت عزيزة هيَّ
ونقش طابخات ونقش بيدها كيك تگطع بي
وننوس نزلت على درج بيدها ورقة الرسم
حتى تشوفها لأبوها ، نزل بكل هدوء الاستكان
على طبلة قريب منه ورفعها يلفها بالبشت مالته
_ هاي انتِ رسمتي ؟
_ والله هبيبي والله اني .
_ يعني نقش ما خططتها .
رفعت اصبعها مقابيل عيونها واشرت بمسافة قليلة
ننوس : عنوني خطت قلم واني ضربتها على وجهه .
_ عيب يولو اختچ الچبيرة .
ننوس : اني اختها الچبير .
تحچي ويستمع ويجاوبها من حماسها نزعت
قراصتها وفتحت شعرها من خلصت كلام انتبهت
على شعرها نزل على عيونها زعجها للست
باست خده ونزلت من حضنه هرولت على غرفة
ورجعت بيها الفرشة مالته واجت عنده رفعت
ايدها وهوَ مندمج يسولف ويه امه على موقف
ضربت رجله اخذها صعدها على رجله وبعده
ما منتبه عليها شنو تريد تحچي وحدها
مشيت يمها من اجيت عاف السوالف ركز وياها
غـاليـة : تعالي اعدل شعرچ عوفي ابوچ براحته .
دارت وجهه مني ظهرها صار عليه وضمت
الفرشة على صدره دارت وتجر بالبشت حتى
تختفي وبعد ما اشوفها وتصيح
_ روحي انتِ ماما روحي بابا يسوي شعري .
رفع ايده يضحك ويأشر عود روحي منها
ضـلـيل : اخاف اگطع شعرچ ول بوية ما اعرف .
ننوس : هبيبي بيك على كيف سوي .
اخذه من ايدها وذب البشت نزع العگال
وعدلها ينزل بشعرها ويبوس بي
ورجع يندمج بالسوالف كوثر سكتت
بس تناظر عليهم ، دخل مقتدر وياه شاهين
بيده ابرة كانونه ، صفنت ننوس على ضـلـيل
على طول ما هوَ يسرح بشعرها صاح بمقتدر
_ شبي هذا بزر النستلة معلگ مغذي .
راد يطلع شاهين عيونه صايرة براسه
مقدر : ضـلـيل دخلي الزلمة بحالو
غير ضغطو معلگ وراسو يريد ينفجر .
ضـلـيل : ياهو جبرو يحب هوَ هذا الحب
خوية ما يتحملو بس الزلم .
باسته ننوس بخده رجع باسها ويضحك
وياها ، اخذت عزيزة الكيكة ولحگتها نقش
بالچاي ، غلست على اكل وصارت بنفسي
الكيكة رحت اريد اكعد وسع ضـلـيل مكان
متعمد حتى اگعد قريب من عنده ، مقتدرر
اجاه اتصال طلع وصاح شاهين برا وياه
گصگصت نقش الكيك ورفعت راسها على ضـلـيل
_ عمو اريد رأيك بدون مجاملة طيبة كيكتي لو لا .
غـاليـة : لا تخافين ماعنده لحية مسرحة
ينطي طگ بطگ شيخكم .
اخذ ماعون الكيك ورجع صبت چاي
اكل اول قطعة بلش بالثانية وبعده
غـاليـة : بعد خلص الكيكة كلها وفكر وراها
بيومين انطيها رأيك اشلع گلبهاا .
ضـلـيل : شلچ غرض ياهووو مالتچ .
نقش : عمو احچي حباب خفقان صار بيه .
ضـلـيل : طيبة مثل امچ .
طگتها ضحكة هي وعزيزة واني كل تركيزي
وضحكي على كوثر كتفت ايدها وهزت الثاني
كوثر : يول دليني يالبغدادية سحرچ وين سويتي .
غـاليـة : عند واحد بعيد .
ضـلـيل : وغالي هم يحتاج فلوس چثير .
كوثر : اخذيني بالله عنده عنده بنت مطلگه
والثانية مشاكل عدها ما گعد حطها مثلچ
وهاي مريضة وقسمتها واگفه بلكي
تطل الزلم تتكاتف على بناتي مثل ما يتكاتلون
عليچ أنتِ وبناتچ صايرة مذابح .
ضـلـيل : هوَ السحر مالتچ ويه الأكل لو بالشرب تخلي .
غـاليـة : اثنينهن .
رجع مقتدر گعد وشاهين وياه ونقش قسمت
الكيك بالمواعين وزعت على كل متجاهله وجود شاهين
شاهين : اريد كيك .
وگفت عزيزة تريد تنطي عينه ركزها على نقش
شاهين : گعدي عمه اريد كيك منهااا
مثل ما تحترم الكل تحترمني .
صبت نقش الچاي وسربت منه واكلت
قطعة صغيرة ورفعت راسها عليَّ تذكرني
نقش : كيكتي اطيب من كيكة الحلفة مو ههههه ؟
شاهين : نقشششششششششش .
نقش : شاهين احترم نفسك كافي عاد زودتهااا .
ضـلـيل : امشي ويايَّ بطل ****** حيوان .
شاهين : تحترمين لوووو شلون فهميني .
نقش ي من انتَ تحترمني عود افكر احترمك .
شاهين : ادحگ بعينك عمي كل واحد يمشي
على سراط المستقيم يحترم ويحسب حساب
ومشتري ورايدددددددهااااا هذا تعاملهااا
او صاير ***** وسگط وياها وخفيف
چان ما صارت هيچ .
وگف ضـلـيل سحبه من ايده يريد يطلعه صاح بيها
_ وحق مالك العرررس يا نقش هل شهر رضيتي
ما رضيتي خطبتنا تصيررررر وتتسجلين حلالي .
نقش : بأحلامك ما اريدك عموو اني
موافقة على ابن الشيخ فؤاد ..
مُـرجانـة ..
على كمية المواقف والمصايب الصارت من
اول ما خلصت الحفلة الى ان انتهى الليل
ما تعد ولا تحصى وما انتهت هل مواقف ما انتهت
وبين ما جنت البس ملابسي واتعطر منتظرة
دخلت وارث بكل حماس حتى اشكره على الحفلة
وعلى كل مواقفنا، زلزل گلبي صوت صريخ
ام وارث وهي تلطم وروحها فرفحت .
جريت عباية خليجية على باب لفيت نفسي
اغطي جسمي وسحبت شال اغطي بشعري
نزات اركض لگيتها بالمطبخ واگعه وملِكه
وميمونة يسكتون بيها حاضنتها
وارث يركض هوَ واخوانه كلهم طلعوا يركضون
للسيارة شغلوها وراحوا ، خليت ايدي على
صدري وهمست وصوتي بصعوبة يطلع
_ شصاير هنا شكو ؟
ملِكه : ام زهرة خابرت داخلين اثنين على بيت
ملثمين الوجه ضاربين زهرة والأطفال وناقليهم للمستشفى .
ضربت على وجهي وقبل لا استوعب
دخل شهاب اريد اندل دربي اريد التفت
انصدمت بالباب وانضربت بالباب بنفس الوقت
جرتني ميمونة واجت يمي وگف وهوَ اجه
وگف بالباب مال مطبخ عيونه عليه ويحچي
موجّهه سؤاله الأم وارث ودخل ايده بجيوبه
_ شصاير وياكم اصواتكم طالعة خيركم ؟
قبل لا تجاوبه التفت طلعت من المكان صاح
بصوت مسموع بأسمي ما وگفت وكملت طريق
وصعدت واسمع ام وارث ترزل بي ، وهوَ يتجادل
وياها وراح يمكن وراهم .
دخلت للغرفة فتحت الجنط اخذت تلفوني الجديد
من الباكيت شحنته واتصلت على وارث ما جاوبني
ابد ، رجعته على شحن ونزلت لگيتهم كلهم
ينتظرون ، گعدنا ننتظر وعيوني تحرگني
من طريق السفر والحفلة تعبت البيت كله تعبان
ملِكه من شافتتي اغفي لزمت راسي طبطبت
على رجلها نمت واحنا على تخم گاعدات بالصالة .
ومن بعد فترة مو قليلة صحيت على صوته
وارث : مُـرجانـة .
گعدت اتلفت لزمت ايده وهوَ واگف مقابيلي
_ اطفالك وينهم طمني .
_ دخلتهم بغرفة امي .
_ زينين ؟
_ لا حمامة تعبانة ورجلها كاسريها .
سحب ايدي يمشي بيه رحت على غرفة امه
من دخلت فتحت عيوني على زهرة تغطي بيهم
وراسها ملفوف مضروبة وعيونها وارمات
مُـرجانـة : انتِ شعندچ هناااااا امشي اطلعي بررررا.
زهرة : وارث رجاءً خليها تحترم نفسها .
مُـرجانـة : اكلي قنادر احسن احترم نفسي
الخايسة بالقندرة واكمل عليچ يلة امشي اطلعي
من البيت ما اريد اشوف وجهچ لا عبالچ
بالعرررس سكتت منچ جنت مرتبكة هسة
قابل مرتبكة اطلعي واررررث طلعهاااا من البيت.
جر ايدي وارث يريد يطلعني اخذتها منه
كتفت ايدي ودگيت رجلي وعاندت وياهم
وارث : مُـرجانـة امشي نصعد فوك نتفاهم .
مُـرجانـة : ما اروح وياك مكان اذا ما تطلعععع
هل قندرة من البيت هجامة البيوت الكذابة
كذبت عليَّ گالت وارث رجع مرته وعنده عشيقه
اسمهاااا حنين وخلتني اخرب فررررحتي .
زهرة : عزززززا شگد جذابة هل بنية اني شوكت
حچيت هيچ ليش هل تلفيق ليش هل حقد والغيرة .
مُـرجانـة : يا غيرة يا سـ****** يا و******
يا كلبة يا عـ****** ام الزلم الرخيصة ال****** .
جرني وارث سحبتي على صدره يسد بحلگي
من نزلوا اخوانه على صوتنا طلعوا من غرفهم
وارث : عذرونا شيخ ضـلـيل فرض شخصيته
هاي وراثة مو بيدهاااا ، لچ مُـرجانـة كافي .
مُـرجانـة : شيل ايدك شيلهاااااااا اروح ابدل
ارجع على اهلي دام انتَ ما اطلع هاي السگط
ال***** من هل بيت خليها هنا تفيدك .
زهرة : ول اني شسويت وياچ شعندي وياچ .
عضيت اصبعي اشيل بروحي خلتني وارگعها
اريد اهجم عليها اريد اشرب من دمهااا هل حقيرة
وهوَ مثبتني لازمني من خصري حتى شالني
_ عوووووفني اذبحهاااا عوفني اشرررررشحهااااا .
بالدفرات والعذاب وصلت عدها ضربتها
نص ضربة وهيَّ تخبلت لطمت على وجهه
وتجر بعبايتها تلبس بيها وام وارث تتوسل بيها
زهرة : كلشي ولا كرامتي خط احمررر اني
تالي عمري هل متر تهين بيه وتضربني
وارث صافن عليها ومبتسم سعيد بأفعالها .
ما تحمل وارث جسمه صار يختض التفتت
واشرفه صدك وجهه احمررر ويضحك رفع ايده
وصاح وقاصد اهله بالكلام لأن الكل مصدوم من رد فعله
_ عذرونا يا جماعة توني اكتشف هل شخصية
العصبية من عرفتها وعرفتني كلمتين ما تجمع .
كملت زهرة تبديل رفعت ايدي أشرت الها
_ يلة يلة طسي يلة طلعي برررا بيتي .
زهرة : بيتچ ؟
_ اي بيتي .
ام وارث : وارث يمه سكت مرتك .
زهرة : هاي جزات التعب فنيت عمري بتربية
هل اطفال تالي هيچ تجازون الأحسان بالسوء .
مُـرجانـة : هذا يا احسان عيني تراا خربتي
عررسناااا وخررربتي فرررحتناااا .
زهرة: اني شلي غرض بيچ وين اجيت يمچ.
ملِكه : لا تجذبين لا امطلچ هناااااا اطلع
ضيمممم گلبي وتعبي بيچ يا حيوانه
موو انتِ اجيتي على بيتهم وشاورتيهاااا
وخليتي البنية تتخبل ، بعيوني هااااي
عيوووني دحگت عليچ شلون وسويتي مثل الشيطان.
زهرة : وهيَّ هيچ زعطوطة وتندفع بالكلام شگد عيب .
اريد اهجم عليها اريد اذبحهاااا ياربي دخيلك
اخذتها ام وارث فوتتها وطبگت الباب عليهن
وارث اخذني من ايدي عاندت بس خفت
من نظرات بيرغ وخجلت رحت وياه بس دخلت
للسويت مشيت سريع على الصالة قفلت بابها
وظل هوَ بالغرفة دگ الباب وصاح
_ نحلة تعالي نتفاهم .
_ كرهتك وارث كرهتك .
ضرب على باب ويرد عليَّ بكل حنية
_ لچ ليش .
_ ما تسمع كلامي فشلتني
طلبت منك اطلعهاااا بقيتهاا هل چلبة .
_ مُـرجانـة بس اطلعي افهمچ ليش ما اگدر اطردها .
_ طردها واطلع .
_ ما اگدر يا گلبي يا عيوني ويا نظرها
ما اگدر يحيلي بس اطلعي نتفاهم
ومايكون خاطرچ بعدها غير طيب .
عاندت وبقيت بمكاني وهوَ طلع من المكان
ونزل ، دخلت للحمام غسلت المكياج والخربطة
شمرت ملابسي واسمع صوت طگطگه برا الغرفة
دقيقة وراح اصوت ، لفيت المنشفة على جسمي
ورحت بدلت بالغرفة وفزيت على صوت شعار
بالتلفون مالتي تقربت مترددة فتحت الرسالة
مكتوب ” تعالي وشوفي بنفسچ
اطّلعي للحديقة واشهدي على خيانة
زوجچ الشريف متمتع بأحضان زهرته المفضلة ”
غبية اني غبية بكل غباء بدلت وعقل ماكو براسي
مثل اي بنية مندفعة خايفة من خيانة واقع غامض
اجر بالشال وألبس وادعي هل كلام مو حقيقي
ما اتحمل خيانة وارث مستحيل اموووت والله .
وصلت للباب فتحته بدون ما اطلع صوت
حتى ما ينتبهون ويكشفون اكو أحّد اجاهم
طلعت امشي على إطراف اصابيعي وبمجرد
ما وصلت الحديقة شهاب صار بمواجهتي
وعلى وجهه ابتسامة چبيرة فرحان احس
بي طاير من الفرررررح يريد يحلق واجه
يقترب مني وعيونه تلمع بلمعة غريبة
بس بعيني يخووووف بخوف
شهاب : ما صدگت من دحگت وصلتني رسالة
منچ ومحمد مرجانة انا هسة بهالحظه عايش
بحلم لو هاي حقيقة طلبتيني تريديني ؟
تجمدت أطرافي وعيوني رادت تطلع
من محاجرها أتلفت منا ومنا بلا وعي
كل جسدي يرجف ودموعي وگعت بلا انذار
والله والله أعضائي انشلت من هول الموقف وقسوته
ولحظات واندفع علينا الباب الخارجي ودخل وارث
فتح الباب بكل غضب وعنف يركض يلهث
وعيونه جاحظة عبالك شاف كابوس .
يتبع …
الفصل التالي اضغط هنا
يتبع.. (رواية الموروث نصل حاد) اضغط على اسم الرواية لتجد الفهرس كاملاً بجميع الفصول.