رواية الموروث نصل حاد – الفصل الثالث والثلاثون
♛ 33 ♛
استغل وارث لحظات كلامهم وسألني
_ يا قندرة ابن قندرة ترس عقلچ حتى يخربنا .
_ ماكو احد ، بس اني تراجعت خليني وروح .
شيخ فؤاد : وين يخليچ بوية عدنا لعبة بيت بيوت .
وارث : يمههههه .
ام وارث : عيونها گول .
_ ام بيرغ وياكم ؟
_ لا .
_ چا ياهووو هنا من عدنا غريب شوفيهم .
فرت نظراتها تعاين بالوجوه ، ونظراتي راحت وياها
ادور بالوجوه على زهرة ، هل بنية فص مـلح وذاب
ما موجودة بكل مكان زادت دموعي من لخبطة عقلي
نزل وإرث المستوى طولي فلتت الكلام مني
اذا يظل الكلام مدثر بداخلي يحركني ويحولني رماد
مُـرجانـة : رجعت ام غريب وحمامة اطفالك ؟
طلعت عايشة ، خدعتني حسبتني طفلة
تضحك عليها مو كرهتك وارث .
عروق شرايينه برزت بكل مكان تريد تنفجر
تحجر فكه بغضب وجرني اكثر انضربت بصدره
_ منو ضحك على عقلچ ؟
_ روح وارث لا نصير مضحكة .
_ مُـرجانـة اسمعيني ، والكفل زينب وسترها
اذا ما تفكرين بعقلچ عدل ارتكب جريمة
واگلب هل عرس فواتح ونهر دم ينفتح
بعد ما يلتم ، صبر ماعندي صبر واتحمل بعد طفح صبري .
طگت عضلات وجهه من كثر الضغط
لزمت ايده أنبهه قبل لا اطگ بين كفوفه
مُـرجانـة : منو هاي ” حنين ” وارث ؟
قبل لا يردّ ويتجرأ يبرر كملت
_ توهمني بأمان وسند واكتشف غدر وخيانة
سمعت وهمتها بعشگ وغشيتها بكلامك مثل
ما غشيتني ، هي هاي رجولتك تجبرها تسقط ابنك .
شيخ فؤاد : بوية لا تصيرين علچ بحلوك
اليسوه والمايسوه اصعدوا بالسيارة وتفاهموا .
_ تجبروني عليه ما اريده ما اتزوج .
ضعت ادير بعيوني بين الناس ادور امي
اعرفه عمي ضـلـيل ما يسمح تفوت بسبب
الشيوخ تمنيت بهالحظه ارتمي بأحضانها
اثاري تشوفني خلت عبايتها ودخلت علينا
اريد اشكي عدها رفعت ايدها بوجهي
والتفتت على ضـلـيل وبنبرة حازمة متماسكة تكلمت
غـاليـة : شيخهم البشت مالتك بلا امر عليك عيوني .
اخذته مـن اكتافه وسلمت البشت بيد وارث
غـاليـة : غطي عروستك وغلفها بثوب الشيوخ
وآخذها العالم بدت تتهامس على بنتي .
عتيت بيد امي اتوسلها وأحاول اشرح
غـاليـة : انا جاية وياچ ما اخليچ وحدچ
لا تفشلينه وتشمتيهم بيكم تتورطين ولچ يمه روحي .
تقرب وارث لفني بالعباية والهلاهل تتعالى
والطبل ما وگف واول ما خطينا اول خطواتنا
وعبرت الباب اصوات اخوانه صدحت ورجت المكان
همام : وهاي الرادها وهاي التمناها
بنت الشيخ لأبن الشيخ جبناها .
رفع تراث السلاح بين ايده
وبصوت جمهوري خشن هتف
_ عالراس تاج ومحزمينه نياشين
بنت الأصل خذت ولد السلاطين .
رفع السلاح وصار يرمي بالجو وقاطعهم
بيرغ وهو يدگ الطبل وقبل لا نصعد بالسياره صاح
_يا أهل العز دگوا بالكفوف على دفوف
بنت الشيخ اتزوجت بشيخ مـعروف
ويا وارثنا فزت بيهاااا أرفع الراس .
والطبل ورگصهم يدگ بگلبي دفوف
يريد يطلعنا وگفنا بنص الگراج جمدت
وارث : مُـرجانـة تحركي .
_ اذا نطلع ونعتب البآب يموتونا
يضربونا حلف اصير ارملة بيوم عرسي.
غمضت فتحت لگيت روحي بالسيارة متعصب
يمشي بيه سريع ، ورفض احد يصعد ويانا
ركبني بصفة بالصدر ونزل من السيارة يحچي
هوَ وميمونة خلاها ترجع للبيت الخوف غطى
على عيوني وگلبي بسواد وزاد من رجعت
ميمونة بيدها تلفون اخذه منها من صعدت
ركزت بي عرفته تلفوني الرعب استولى
عليَّ خنگني خنگ نزلت دموعي وجريته منه
_ هذا تلفوني عوفه يلة عوفه .
حرك السيارة وسياراتهم ورانا مگلوب گلب الشارع
مسدود اعداد السيارات ترهب النفس اخترعت
شفت اني من بعيد هيَّ ونقش صعدوا بسيارة
تراث وشيخ فؤاد إيليا وياهم صاعدين .
أيدي فجأة صارت فارغة والتلفون وگع بين ايده
مُـرجانـة : تلفوني وارث تلفوني رجعه يلة رجعه.
ضايقتني البدلة وحتى بالمكياج ما اهتميت
من لطمت عيوني بقسوة امسح دموعها
وارث : مكبر عقلي وحق الحسين الشهيد
مو گالوا صغيرة ماترهم وياها ، لهالدرجة
منزل من روحي ومتحمل لا تجبريني افقد عليچ .
فتح الرمز جن جنوني اكمش بيده
اريد اجر التلفون وهوَ لازم التلفون بيدي
وأيده الثانية يسوق بيها وعيونه على طريق
ويدفع بيه بنفس الأيد بيها تلفون متخبل من رد فعلي.
ضيع السيارات متعمد ودخلنا بفرع بقيت اتلفت
_ ارجع ويه السيارات الله يخليك ابوس ايدك
راح يشفونا ويعرفون وحدنا ويموتوناااااااا .
ما مهتم عيونه موسعها بصدمة من لمحت
دخل على برنامج الرسائل وفتح المحادثة
وبلش يقرأ بكل تمعن بكل حرف مكتوب
انسلبت قوتي وماتت رجلي ودموعي
غسلت مكياجي من قفل التلفون وجهه
عرگان من الصدمة وجسمه يهتز غضب
وارث : شـهااااااب مُـرجانـة شهاااااب .
_ اريد امي .
رفعت ايدي احمي روحي من غضبة
لأول مرة بحياتي اشوف وارث بهل
عصبية فلش السيارة بيده عصرت
روحي بالباب اريد اشرد صرخت برهبة
من بين شهگاتي گلبي راد يطلع من مكانه .
رجع فتح التلفون نزل من السيارة وقفلها
يخابر يصيح منفعل ورجع يفتش بتلفوني
وطلع تلفونه ينقل كل المحادثة سجلها
رجع اول ما صعد من الصياح تجرح صوته
_ اريد اسمع احچي مُـرجانـة احچي شي برري الصار.
_ اني معليه والله معليه هذا هوَ .
_ هوَ شنوووووو حاچيني فهميني ؟
_ هوَ راسلني شهاب راسلني .
بقيت اناشغ مخنوگة خنگ
وهوَ حنچه يرجف من العصبية
بقيت اكح روحي طلعت من عيوني
اريد استفرغ من الموقف والخوف
لزم راسه يضغط عليه ويهز بي
مُـرجانـة: والله وارث والله هو راسلني واني ما قبلت
شوف الرسائل وتأكد ، وتوسل بيه بس حتى اسمع منه
وخابر هواي واني رفضت احچي وياه احتراماً ألك
اعرف هل شي عيب و.
وارث : چااااا هاااااي المحادثة امي حچت بيهاااا ؟
رفعت ايدي بمعنى اصبر احاول اخلي يهدي
_ لا تصيح الله يخليك وارث بس ..
_ بس شنوووو صخام بوجهي بس شنووو
لچ كسرتي فرحتي انتِ كفختيني كفخ على وجهي
ما انقهرررتي عليه ما خليتيني بين عيونچ
مثل ما خليتچ بين عيوني مرررررررجان .
مُـرجانـة: هددني گال اذا ما تفهمين مني وتسمعيني
ما اعوفكم بحالكم وحتى اهلچ اموتهم وياچ.
وارث : وانتِ خليتي التهديد مبررر رحتي
دگيتي سوالف ويااااه وعتب مخلصيهااا عتاب
وندم صاير انا طرف ثالث مخرب العلاقات بينچ وبينه .
رفعت نظراتي التقت بعيونه گاعد على نار
يحارب بيده ملخها تملخ حتى ما يرفعها عليَّ
من الخوف حسيت گلبي يريد يوگف همست
مُـرجانـة : خايفة اريد امي .
وارث : ارجعچ مرجان ارجعچ اليوم تنامين عند امچ
بس گولي هي تستقبلچ من تعرف سبب هجمان
عرسچ ؟ تستقبلچ من تعرف داگه للفچ انتِ وذباحچ .
مُـرجانـة : بس شهاب ما ذبحني هوَ ت ..
ريتني ما نطقتها ريتني ميته وما حچيت
تمنيت لساني مشلول ورجعت خرسة ولا رديت
گطع ايده ملخها تملخ وهوَ يكسر بالسيارة
وارث : چااااا منووو ذبااااحچ انااااااا .
مُـرجانـة: اسفة والله اسفة اعتذر خليني ابرر .
وارث : غسل عقلچ قنعچ ؟ حاچيني لا ارتكب جريمة
تبررين لشهاب ولچ تبررين للمجررررم .
وگفت سيارة مقابيل سيارتنا نزل منها شيخ فؤاد
وتراث اجونا مستعجلين فتحوا باب وارث مستغربين
تراث : شعندك هنا الدنيا مگلوبة بالقاعة
ينتظركم شعندك خاتل بالفررع يمعووود .
مسح وارث وجهه قوي وبصعوبة يجر النفس
_ اريد ارجعها على اهلها بلا ما أضرها شلون ؟
شيخ فؤاد : هذا شماله شارب احطه وادگه .
تراث : شصاير ولك تسودنت مو جنت منتظر
هل يوم وطلعت روحك على ما وافقوا عليك
والعالم كلها لميتها حاضرين عرسك شلون تردها .
رد عليهم يجر بالكلام جر مو راضي يطلع بهت
وارث : ما اتفقنا بوية ما متفقين خليني اردها .
زادت دموعي وشهگاتي من سمعته ما ينطي بيه
شيخ فؤاد : ولك ذبحت روحك عليها مو تحبهاا
مو گلت بوية احبها وميت عليها چا شني تغير
حبكت وياك بيوم عرسك ما تتفاهمووون ؟
وارث : خنتها بوية وكشفتني ما تريدني .
سديت شفايفي خنگت روحي خنگ بيدي
يدافعلي يا ربي يدافعععع يريد يمووتني من القهرر
شيخ فؤاد : شوف لك انا مو واحد من عمامك
وتضحك عليهم ولا غريب وما اعرررفك انا ابوك
تربيتي انتَ واعرفنك سوالف الخيانة ما خيانة
ونسووووان انتَ تستحرررررم منهاا وما تتگرب
اشمرررر النظيف بسااااعك بديت افووور منك .
تراث : وارث مو وكتها والعباس اذا تخربون
العرس الشيوخ والعالم بالقاعة يسوون افلام
عليكم يا ابو افلام ويخلون براسكم مصايب
خلونا نرد للقاعة عديهااا امشينا .
شيخ فؤاد: ابن الچلب اول تالي هاي مريتك
بالشرع والقانون كملوووها وخلصوا العرس
وراهااا نگعد كلنا ونتفاهم ، ولك شيخ ضـلـيل
اذا يسمع كلامك يذبحك انتَ واخوانك اسمع مني .
هوَ بعالم ثاني مخنوگ خنگ وجهه صار دم
نزع رباط القميص وفتح الدگم بعثر شعره
ونزل من السيارة راح بعيد يحچي وياهم
دقايق ورجع صعد شغل السيارة يمشي وراهم
وارث : ايليا تنتظرچ تروحين تعدلين روحچ
العالم تنتظر نخلص هل هوسة ونكف حچي العالم.
مُـرجانـة : وارجع عند امي .
_ تردين تردين عدها ؟
شهگت ولزمت گلبي يريد يطلع من مكانه من الخوف
_ اي خايفة اريدها تگدر تخابرها ؟
_ وصلنا نزلي وگفتي گلبي ذبحتيني
مع الأسف وعلي جنت متصورچ غير عن الدنيا كلها .
وگف السيارة بالجهة الثانية للقاعة تراث
واگف وقريب منه ايليا تباع علينا اجت
تركض من شافتني رفعت البدلة ونزلتني
دخلتني من الباب وعلى غرفة فارغة
فتحت جنطة بيها مكياج ترتب بوجهي
ايليا : شصاير وياچ عزا وجهچ مورم ضاربچ ؟
_ لا بس صارت مصيبة ايليا .
_ احچي ولچ احچي شنو مصيبتچ هذا وارث
متخبل حتى گلبه يوجعه وتراث محتار بي
ولا يقبل يحچي بس يگول خاينها .
ماتحملت ما احچي الصار بالتفصيل
من الصدمة گعدت ايدها على راسها
مُـرجانـة : وروح ابوية ما غلطت وما خنت ثقته بيه
اني احب وارث وگلبي ممرود مرد عليه هسة .
ايليا : اووف منچ مُـرجانـة اوف هيَّ هاي هم عمله
تسويها هذولي مخابيل وين يفهمون والله عاتبته
من راسلني والمصيبة شاف كلشي بعيونه وشاف
خوفچ وقلقچ والمشكلة العظمى دفاعچ عن شهاب .
ضميت وجهي ورجعت ابچي بكل قهر
جرت ايدي ورجعت تعدل وتصيح عليَّ
ايليا : مو وقت دگ ولطم ولچ مُـرجانـة قشمروا
عليچ صار سنين اعرف وارث ماعنده سوالف الحرام
مخدوعة انتِ مخدوعة بكلامهم ، نصيحة لا تخسرين
وارث وحاولي تبررين الصار بهدوء وضحي كلشي
لا تضمين عليه وتخلي يكشف شي وحدة يتخبلون
بالزايد تحملي عصبيته بوقت اعترافچ انتِ
ترا صعب تتحملين عصبيته من يكتشف جذبة
منچ وحده يتهسترووون .
كملت تعديل وجهي وحاولت اضبط اعصابي
ودموعي خابرت عليهم ثواني واندفع الباب
وصار وارث مقابيلي هوَ هم معدل ملابسة
وشعره ، من شافني ذب حسرات ومد ايده
_ يلة انسي كلشي وخلينا نعدي هل كم ساعة .
رفعت بدلتي بيدي وتقربت خليت ايدي الثانية
بين ايده سحبني عليه وساعدني اطلع الباب
وعيونه تلمع من القهر يصفن بعيوني ما اعرف
بشنو يفكر بيه ويمكن رخصت بنظرة واخذ صورة
مو حلوة عني ، ايده صايرة نار ضغطت على
اصابعه اول ما طلعنا للقاعة بس نسوان فاصلين
الزلم عن النسوان مو مختلط گعدني وگعد على
اعصابة دقايق واول ما اجت امي يمي طلع .
غـاليـة : وين رحتي .
_ يمه اريد ماي .
_ احچي هسة فهميني سطرتي عقلي سطر
ليش تخبلتي وصحتي ما اريده يا خبلة ؟
_ يمه اني خايفة وروح ابوية عقلي يوجعني .
تمسكت ايدها گعدت بصفي خايفة احچي يمها
خفت وترددت ، صعدت ملِكه يمي وامي اجتها
حرمة نسلم عليها لزمت ملِكه ايدي وهمست
_ شفت زهرة بعيوني غسلت عقلچ بكلامها
ضحكت عليچ حتى توصل لوارث ماتت بغيضها
منچ شافته صار سنين ما معبرررها ومن اجيتي
قاتل عليچ وأفعاله ترفع الراس وصل للعرس
احتارت شلون تخربها وانتِ الغبية تنطيها على مرادها .
مُـرجانـة : يعني وارث ما رجع ام اطفاله
وهاي حنين منو تگول سقطت ابنها ؟
ملِكه : اشگ هدومي بنص القاعة هسة
يول يا غبية هوَ ليل مع نهار يحچي وياچ
دايخ بيچ وعلى وقت فراغة يصعد على غرفة
الفوك يتمرن وينزل ينام على صوتچ
ويحسب ساعة ساعة حتى تصيرين بيدو
خربتي فرحتو اغتصبتي فرررحتو يولووو .
مُـرجانـة: گلبي يوجعني ملِكه حايرة والله حايرة
الله لا يحير عبده مثل هل حيرة اخآف أتزوجه
ويطلع كلامهم صح بذاك الوكت اتخيل امووت
ملِكه احبه ما آتحمل يخوني ويتزوج غيري .
دخلت زهرة للقاعة مصدومة
ملِكه : رجعت كل ضنها تمت خطتها ومثل الزمال
انتِ مشيتي بكلامهااا انصدمت من عرفت اجيتوا
للقاعة ، حرگي گلبهااا مُـرجانـة حرگي گلبهااا
بوارث مثل ما حرگت وخربت فرحتكممم اسمعي مني .
اجت ايليا من بعد ما مر وقت مو قليل صاحوا
راح يدخل العريس وجماعته تستروا البنات
بدخولهم اجه يمي گعد واني نزلت للبنات
اخذت ملِكه إيدي وايليا وياها يحركوني
ايليا : تمايلي وغني ويه الأغاني لچ حرگيهمممم
كلهم منتظرين يتشمتوون بوارث لا تكسري
اكثر عملتچ ما تتسولف بلشي رگعيهاا خيطيها .
بقيت وياهن وارث على جهة ثانية هوَ واولاد
شيخ فؤاد وكل اخوانه مسوين هوسات
يغنون ويرگصون كلهم يضحكون ، تراث
كل شوي مقترب من وارث يحچي بأذنه
ومبين بيرغ هم يعرف صاير مشاكل بحيث
ياخذ بيده يجبره يضحك ويرگص وياهم
قلدته واني هم صرت اضحك وياهن واغني
بس گلبي مقبوض ودمي يغلي بس اريد
وارث اتفاهم وياه بس بعيد عني صاير
وبقيت بحيرة بين اثق بي واكمل وياه
هل يوم لو اخذ حذري ودام بعدنا بالبداية اتركه .
ساعة كاملة ماتركوا فعاليه تعتب عليهم من رگص
من هوسات من أغاني وارث مكتفي يصفگ وبعدين
اندمج وياهم رفع اصبعة يطگ اصبع هو وتراث
ويهزون چتف بكل رزانة وثگل ما يشيلون
رجلهم من الگاع حاسبين خطواتهم حساب
اي احد يشوفهم اكيد يفكر ويگول الله هذا
شگد فرحان وطاير بعرسه وبالتحقيق هو بركان
ضعت بأبتسامة وإرث وحركاته وجسمي رجف
من تذكرت مصيبتي وعملتي وياه ما اعتقد يسامحني .
بنص ضحك البنات من بعيد شفت زهرة گاعدة
بصف ام وارث وفاتحة التلفون ما ادري شنو تشوفها
بحيث خلت عيونها تصير بگصتها وتخزر بيه وبوارث .
سندت جسمي على نقش وهمست
_ اريد ماي نقش ماي بارد دخت .
عافتني وراحت ادور على ماي وصادف
تراث شغل جگارة يريد يشربها برا تصادم وياها
ابتسم من شافها ونزل راسه ما رفع عيونه عليها
وبس شفايفهم تتحرك يحچون سوية وتأشر على
باب الخارجي ، هز راسه الها واشر بيده تجي وراه
ايليا نطت عيونها عليهم وين ما يتحركون عيونها
تروح وراهم الى ان اختفوا رجعت تصفگ وتتمايل
بكل هدوء هي وملِكه على أنغام الأغنية .
الدوخة گلبت حتى معدتي امي حست
اجت يمي ورجعتني بمكاني وكفت
مقابيلي تعدل بيه وتحاول تسحب مني كلام
_ ليش وارث مو على بعضه؟ شصاير فهميني
وانتِ كل شوية تريدين تتخربطين شبيكم ؟
قبل لا اجاوبها صارت نظراتي على ام وارث
استهمت بغضب ودگ الگاع بخطواتها من تجيني
غيرت طريقها راحت الوارث ضربته على ظهره
كذا مرة التفت عليها عتت ايده تحچي وياه
خلته يبحلق عينه على وسعها وخلته واجت
عندي ، لزمها من عبايتها يريد يمنعها عاندت
وصلت يمي قبل لا هوَ يوصل ومقابيل امي عاطت
_ تغدرين وارث بشهاب ولچ ، اخووو هذا شني
خلصوا الزلم بعد رحتي على اخووو ماعندچ تربية ؟
غـاليـة : عدها تربية ليش ما عدها ، يا اخو هذا
وتغدر وارث بي هااا ؟ عندچ دليل على هذا كلامچ
لو بس سمعتي واجيتي طعنتي شرفهااا ؟
وارث : وحق علي اذا صوتكم يطلع اگلب القاعة
كافي نفس ما اسمععععع يمه تعالي ويايه.
جرها من ايدها طلعها ، وامي گعدت يمي صوتها
كفي يهزني هز ودموعي تكت صارت من السؤال
_ ما اريد تلفين ودورين جاوبيني بكل اختصار
كلام ام وارث صح لو تلفيق ؟
نزلت راسي اشهگ راسي راد يطگ والله
_ هوَ راسلني يمه والله العظيم هوَ راسلني .
_ لا تبررين لنفسچ جاوبي على گد السؤال
وارث عرف موو ؟
_ اي عرف يمه عرف شاف كلشي
بس ما غلطت وداعتچ وروح ابوية
ما خنته اني ما خنت بس ت .
_ تعزيتي وتصخم راسچ كون يا مُـرجانـة يا بنت غـاليـة .
حجتها ورفعت راسها للمعازيم عيونهم
وتركيزهم كله صار ويانا والكل شك صايرة
مصيبة هل الجو منها توتر ، ابتسمت امي
وبصوت مسموع بررت الصار بكلمتين
_ عروس خايفة .
رجع وارث سمعها وعرف من كلامها الكل شك
تقرب مني مد ايده طلع كلينكس مسح دموعها
ومد ايده غصب عن روحه جـبر نفسه گال
_ اي كلام بعد ما اريد اسكتوا منها عوفوها
لا تتخرربط علينا لا تتنفسوون وياها كلكم
المعازيم بلشوا يشكون ما اريد جنس
مخلوق يجيب طاريها بالموزين .
خليت ايدي بيده تحولت الأغاني وطلعوا
اغنية هدوء نزلنا الوسط الصالة حضن
خصري وايدي مردها بين ايده وسحبني
على جسمة بكل تملك جذبني ، ما گدرت
ارفع عيني بعينه ابد بقيت منزله راسي
من صرت عنده ضجيج عقلي سكن
وبس صوت الأغنية تتردد بالمكان
” هذه اول مرة احس كلي عشق انطيني فرصة اتنفسك
اخاف اختنك ، وياك انت اتأكدت اني قبلك ما عشت
وعلى كل لحظة بدونك يا حبيبي تندمت إنسى عمرك
و أنسى عمري امتزج بيا وصير عطري ليش وانا وياك
احس بالوقت يجري انسى كل الناس خليني احضنك ”
صوتها عالي الى درجة يدگ بگلبي وبگلبه
رفع وجهي بطرف عينه ورجعني للقهر من عاتبني
_ صعبة عليچ تحچين الصار وتريحين گلبي
شلون تواصل وياچ ؟ مو اربعة وعشرين ساعة
اني وياچ ليش ضميتي عليَّ ما بلغتيني
استغفلتيني ودستي عليه ليش ، خليتيني افشل
اتعارك وياه يگلي ” هيَّ ما نستني باقي مطبوع
براسها وحتى لو تاخذها تريدني مرجوعها ترجع عندي ”
هزيت راسي ودموعي وگعت على خدي
_ لا تبچين لا تبچين اشش مُـرجان لا تبچين .
_ اني ما اريد غيرك .
_ كفختيني كفخ على وجهي وعلي .
_ جذاب هوَ انقهر لأن گتله اني اريدك .
_ يگلي انتَ طرف ثالث بيني وبينهاااااا .
_ شنو يعني طرف ثالث ؟
_ استغفر الله مرجان استغفر الله .
بعد عيونه مني مايريد يشوفني دموعي
غوشت نظري سألته ورجفت بين ايده
_ حباب گول جذب ما رجعت ام اطفالك .
تعمد يفرني حتى يصير ظهره على ناس
ويغطيني مايريدهم يشوفون حالتي ودموعي
حتى يفكرون ابچي على كلمات ولحن الأغنية
والكل يعرف شگد تعبنا الى ان وصلنا هنا .
مُـرجانـة: حنين منو بس فهمني منو ؟
وارث : انتِ اول بنية حبيتها وعيوني شافتها
برغبة محبة ، بعمري ما لفتتني وحدة ولا رف گلبي
غير يمچ ، لا حضنت ولا بست ولا تگربت لبنت
غيرچ ولا حاب ولا افكر اضعف عند بنت غيرچ
جنت وياچ بكل عقلي وتفكيري وفّيت مابيوم خنت .
مسحت دموعي من شفت نفوره وكاره
لمساتي لو ما المعازيم فلا يثبت ويايه
كلام شهاب الحقير بعقله استولى على تفكيره
مـن تحركنا شفت امي گاعدة لازمة راسها
وام وارث بصفها ونقش اجت من بعيد عليها
بيدها بطل ماي وتراث من الباب شاف ايليا وطلع
_ امي صارت عصبية .
_ حقها .
_ ماكو بشر يضبط اعصابه ويايه مثلك .
_ وما قدرتي وغدرتي .
قبل لا اجاوب نظر بعيني وتلفونه يرن
طلع التلفون من شاف اسم المتصل ابتعد
وتمسك بيدي رجعني المكان العروس وطلع
من العرس كله اختفى ، اجوني البنات شگد
سألت وخابروا عليهم ماكو جواب منهم
تعشوا كل المعازيم وبلشوا يتأخرون ويروحون
امي اجت يمي زعلانة مني بس ما خلتني وحدي
انقبض گلبي من دخل شيخ فؤاد واثنين من عمام وارث
غـاليـة : لعد وارث وينه ؟
گلبي من التوتر راد يطلع من مكانة اول ما دخل
وارث مغير ملابسة لابس نيلي وحتى السترة
تختلف وكف ايده ملفوف بشاش ابيض واكو
دم على شاش الأبيض بقت عيوني على ايده
وعيونه هوَ تتهرب مني والحزن بيهن
واضح مثل الشمس ، يتنهد وحسراته مسموعة
وگف يمي وتعالت الأصوات والتصفيق والهلاهل
اخوانه الباقين ساندين ظهره ما مخلي وحده
وتراث وياه خطوة بخطوة واسمر فاتح الباب الخارجي
شيخ فؤاد : يلة بوية يلة نزفكم ونفرح بيكم .
دخل ضـلـيل علينا الكل بهت ينتظرون رد فعله
تقرب مني ولزم أيدي يسألني
ضـلـيل : تريدينه ؟
_ خايفة .
ضـلـيل : انا اضمنه لا تخافين منه .
استدار على وارث وبنبرة حادة يحاور بي
_ ضمنتك اذا اضمن بيوم بشر ويكسر ضماني
ما يشوف مني خير ، اخذت بنت شيوخ ما اريد
الدمع يمر عيونها من هل ليلة ، واذا چان عندك
ماضي بيوم ما اخلي ايدك بيدها تمسح الماضي
وتبني مستقبلك على اساس حياتك وياها
ابن ساجر اذا بنيتي بيوم اجت زعلانه منك
ما اردها وفلا اتنازل على كلمتي واخليك تلمح خيالها .
اخذ وارث ايدي من ايد ضـلـيل باس ضـلـيل راسي
وقبل لا اتحرك همس بصوت ما يسمعه غيري
_ اذا ما تريدين ابن ساجر لا تجبرين روحچ
اخذچ وارجعچ لبيت بغداد انتِ وامچ واخلصچ منهم .
حرت بالرد اكتفيت بالسكوت وهوَ فسرها
ما اخذ بكلامه ترك مساحة بيناتنا وطلعت
وايدي بيد وارث وزهرة شمرت جسمها على
كرسي ودموعها بلا خجل ولا حياء تنزل
بحجة فرحانة بعرس وارث بس اني وياها
وهواي من عدنا نعرف دموع زهرة على وارث .
حرك السيارة بعد ما ساعدتني امي وصعدتني
ودموعها هي ونقش زرفن گلبي بيها ، طبگ وارث
الباب ودقيقة كاملة يستمع لكلام امي حتى
ما يجاوبها بس يهز برايها وقبل لا يصعد
ما اسمع شنو گال بحيث نقش وامي عيونهن
صكت صك على وارث وهوَ وكب بصفي
شغل السيارة وتحرك طايرررر بالمعنى الحرفي طاير .
ضيع السيارات وسلك طريق يختلف عن طريقهم
ضيعهم وهوَ شايط بركان حتى صوت انفاسه
يخوفني ، استوطنتني الرهبة وجسمي انكمش
خليت راسي على جام ما ادري نمت لو فقدت الوعي
بس عيوني نامت وعقلي وگف بعد ما غمضت .
صحيت بعد فترة على ايده وهو يحاوط رجلي
وايده تتسلل خلف ظهري ورفعني بخفة
على صدرة وايدي بلا شعور حضنته
وراسي صار بين رگبته اتنفس عطره
وهوَ متصلب ، طبگ باب السيارة برجله
وتحرك بيه يمشي بكل هدوء مع العلم يعرف
گعدت ويگدر ينزلني دخلني وعطر الشموع
كفخني بس ونور خفيف ضايق عيوني
فتحت عيوني وهوَ بصعدني الدرج بدون
ما يشوفني ، وهوَ يصعد اشوف الشموع
صايرة على طول الدرج واوراق ورد لون احمر
بلون الشمع متناثرات على درج والشموع موزعات
بكل ترتيب على درج مشتغلات .
تمسكت اكثر برگبته حاوطته ودفعت وجهي
اكثر برگبته من سرع مشيته على درج
دخلنا على سويت غرفتنا عرفتها من شفت
الباب تذكرت من دزلي صورة قبل لا يجهزها
وسعت عيوني بأعجاب من شفت ترتيب
مخلي نفاخات ، بالخيط مالتهم ورد نازل
من السگف ، والسرير كله اوراق ورد عبالك
واگعات من السگف على سرير وعطر الغرفة
ورد واضاءة خافته وبرودة معتدلة .
نزلني گعدت وأظافري غرزتها بجلدي من التوتر
نزلت راسي خايفة اشوفه ، كتمت حتى انفاسي
من گعد بصفي ومد ايده على خصري شدني عليَّ
بسيطرة وتحكم احس بأنفاسه تضرب ظهري
وجسمي صار مثل الخشبة خشب بيده
عضيت على شفايفي اول ما فتح السحابة وغمضت .
حسيت بي نهض وابتعد وصوت الكنتور انفتح
فتحت عيوني ولزمت البدلة من صدرها خفت توگع
رجّع يقترب بين ايده تراك من ملابسي نزله بكل
اتزان على سرير وبصوت متزن ينضح وقار گال
_ بدلي ملابسچ .
بقت عيوني تتبع طولة الى ان طلع من الغرفة
ذبيت البدلة من جسمي ودموعي تعبر عن قهري
لبست التراك ودفعت الورد من رفعت اللحاف
ونمت على مخدة ودموعي ما وگفت ثانية حتى من نمت .
ملِكه …
ضايعة احتار بمُـرجانـة وارث اخذها ومن
صور شخط تايرات سيارتو واضحة عصبيتو
لو ايليا وضعها والمشاحنات الصارت بينها وبين
زوجها بنص الصالة ومن طلعت راحت على
سيارة وما ادحگ غير تراث فقد وراح يمشي
بكل سرعته على سيارة اهو وجرها من ايدها نزلها .
واني اقترب منهم حتى اوصل سيارة بيرغ
فزيت من جرت ايدها منه وبصوت مخنوگ صاحت
_ ما اريد اجي وياك عوفني روح رجعهم .
تراث : ارجع منو لچ بوية انتِ بعقلچ ؟
وهذا بيرغ راد يوگف گلبي من عاط بيه
_ اصعدي عيني ست يمتى تصعدين .
_ صعدت اووف منكم ما تخلون واحد يشاهد .
_ يشاهد صخامچ .
_ صخامك احس ، مشتده بين ايليا وتراث ابن الشيخ
بالله لا تتحرك سوي روحك مشغول حتى اسمع .
سحبها من ايدها وهيَّ تجر بيها وتگله
ايليا : كم مرة نبهتك لا طخ ايدي لا تلزمني .
تراث : منا العالم حسچ بلعي بلع .
ركبها بسيارتو غصب عنها وقفل الباب
ابو ملتهي بشيخ ضـلـيل وام مُـرجانـة
وخواتها اثنينهم واگفات يسولفن ونقش
تعدل بشالها خجلانة من كلام شيخ فؤاد
وياها ، وايليا عينها عليهم وما اسمع
شنو تحچي هيَّ وتراث بحيث انفعل وردم السيارة .
حرك بيرغ الخبيث سيارته وابتعدنا عنهم
صار يمشي خلف السيارات الى ان ضيعهم وارث
وبيرغ فر السيارة وبنبرة ممزوجة بحنية وترجي گال
_ نسافر هسة ؟
_ نسافر ؟
_ اي نطلع للشمال انا وياچ .
_ لا ، شنو نسوي هناك اني وياك وحدنا لا لا ما اقبل .
اخذ ايدي بين ايده جريتها منه من لمحت اثر
الضربة بعده على وجهي خفيته بالمكياج
بس رجع يبين من تعرق وجهي وخف التغطية
_ مو حلفت بعد العرس توصلني على اهلي ؟
_ وبعد ما ترجعين مو ؟
_ ارجع .
_ تصبرين بس شهرين وتخلصين مني ؟
التفتت وگلبي انمرد خايفة من السؤال والجواب
_ ليش شهرين شمعنى رحت دكتور ؟
_ الدكتور شكو ؟
_ بيرغ أعرف بمرضك وحالتك كلها .
_ يا حالة شبيچ .
_ قريت التقرير بيك كانسر .
شخط السيارة وطبگ على صفحة رجله
انشلت من الصدمة وكلامي ، ومن نظراته واضح
ما يريد احد يعرف بمرضه وثبت تفكيري من صاح
بيرغ : تفتشين ورايَّ ؟
_ لا والله بس بالصدفة قريته و .
_ وبقيتي استعطاف واني اگول شبيهاااا
بعد ما تخبلت طلعتي تستعطفين وباقية .
ما تحملت اخفي دموعي من شفت قهرتو
_ ما استعطف بس واجبي أسندك انتَ زوجي .
_ ولا حرف ملِكه اسكتي ما اسمع منچ حرف .
نزلني مقابيل الباب وحتى ما نزل شخطها وراح
دخلت للبيت محتارة بعدني بالباب وصلوات مبين
عليها جانت طالعة عبايتها على راسها نزعتها
استلمتني رزايل مقابيل العالم ام وارث واقاربها
من البصرة عدنا ما راجعين ، تحملتها وصعدت
فوك اطول بال وياها غصب على روحي
بدلت دشداشة ولفيت شالي وقبل لا انزل
اندفع باب الحمام طلعت قبل لا ينسد
شفت ايليا وجهه دم تبچي وقفلت الباب عليها .
انتظرتها الى ان طلعت عيونها مورمه
بس ابتسمت من عرفت بوجودي وصفگت
تخفي حزنها وتحچي سريع حتى ما يبين
صوتها مشخط من البچي والقهر
_ اريد ابدل بغرفتچ ملوكاتي .
اشرت على غرفة اول ما فاتت طبگت الباب علينا
ملِكه : اذا ما بيها تدخل بس وجهچ احمر واصابع
مطبوعة على خدچ ليكون تراث ضاربچ هيچ ضرب .
ايليا : هههههه لا شسالفة ما يضربني تراث ابد ابد.
هي تحچي وفتحت جنطتها اطلع ملابس
حتى تبعد عيونها مني ولا اكشفها
اخذت ملابس بين ايدها خليتها تاخذ راحتها
وطلعت نزلت اشوف ميمونة لگيتها تجهز
اكل بالمطبخ لسهم وهمام جوعانين ، وام وارث
تركض منا ومنا تجهز اكل للخطار وصوت
شيخ فؤاد مسموع هو وخلف عمهم وياه
بعد عمهم الثاني والولد يمهم ، ساعدتها
وفرشنا سفرة مديناها من الطول للطول اكلات
ام تراث : عيوني اذا مابيها زحمة تصيحين
على ايليا تنزل تاكل ويانا من الصبح على لحم بطنها .
قبل لا انزل هي سبقتني ونزلت مبتسمة
ضحكتها ولا ثانية غابت عن وجهه والحمرة
والمكياج خافي كل حزنها مجدده المكياج
اول ما گعدت يمها واني على واهس تربعت
وگعدت جوعانة ، لا مو جوعانة اريد استمع .
ضربت ام تراث على رجل ايليا وگرصتها من ايدها
ام تراث : تستاهلين الصار بيچ عنودية
تخلين راسچ براسه ارتاحيتي هسة .
_ على اساس ابنچ فد مندله واخلي راسي براسه .
هزت ايدها ام تراث وتحچي هي وام وارث
_ سمعتيها خية شفتي بعينچ عيونها گويه
ما تنگدر ولسانها لا يحترم چبير ولا صغير .
فاطمة : على كيفچ عيني والله انتِ وابنچ
لا تنجرعون ولا تنحملون ، هسة صار ساعة
يخابر عليه يگلي خليها تطلع برا للگراج
يسوي عليها كشف يريد هوَ هذا ينحمل .
ام تراث : فوگاها هاي غير مرته وعينه عليها
ويراقبها چا شني تريدين ابني بلا غيرة .
فاطمة : والله خلصتينا ابني وابنچ
جيرة بفرگچ وفرگ ابنچ .
ام وارث : يبوووو علينا راح يتضاربن .
دگ تلفون ام تراث قبل لا تجاوب والتلفون
يطفر من ايد لأيد ثانية وتهمس
_ يااا يااا انوبه رد عليَّ خابرني انا ياهو مالتي
وين اگدر انا على ايليا ولسانهااا وصلافتها .
ايليا : قبل لا تفتحي والعباس ابو فاضل
اذا اطلع احرگ افاده حرگ مثل ما قهرني
اصب ضيمي بأبنچ اني مو لعابة بيده
طالعة واستعرض والله حضرته يريد يشوف
لبسي مستور لو مو مستور عدنا استعراض ؟
انوب فهيت على سوالفهم وانفعلت على
انفعال ايليا رجع دگ مرة ثاني وثالثة ردت
ام تراث : هلا يمه .
تراث : صار ساعة اخابر وينكم ؟ وهاي فطيم غلست .
_ گاعدين يمه گاعدين ناكل .
_ وايليا وياكم ؟
_ اي هم گاعدة ويانا ايليا جوعانة تاكل .
فرت حلگها وايليا خزرتها وهذا يدگ على حديد
تراث : دام الزلم كلهم ملتهين ياكلون خليها تطلع .
سدت ايليا الخط خلت ام تراث تريد تكتلها
ايليا : والله العظيم اخلي يرجعنا بهل ليل
اقنعي ما اطلع بس اطلع اخبل ابنچ .
رد خابر جاوبته وتعض اصبعها
_ ليش تسدين الخط خليهااا تطلع يلة .
_ يمه تاكل هي والبنات عيب بعدين عود بعدين .
_ اني باقي بمكاني دقيقتين اذا ما اشوفهااا
جدامي حضروا روحكم وراها هسة ارجعكم للبصرة .
ام وارث : وحق علي اطلع اكسر الماسحة عليك .
من حچت ام وارث عرف حتى ايليا تسمع
عبالك ما يحچي يهدد بلغة مبطنة
تراث : ايليااا .
_ ها .
_ تعالي .
_ اجيت .
حچتها وعصرت دشداشتها بين ايدها وضربت رجلها
راحت تمشي كلها ركزت وياهم اول ما وصلت
لباب المطبخ قبل لا تطلع جرت الشال من راسها
وشمرته على كاونتر وفتحت الباب طلعت
هو شافها وعيونه نطت من مكانها
ام وارث : ولك شبيك ما تروح تاكل .
تراث : عمه صيحيهم يجهرون روحهم حتى نرجع للبصرة.
كتفت ايليا ايدها تباع عليه بكل برود
وهوَ باقي بس دخان ما يطلع من راسه
تراث : امشي بدلي حتى نرجع .
ام وارث : مو باجر انتَ توصل وارث للمطار هوَ
وحرمته شلون ترجع وتخلي وحده ولك تسودنت .
تراث : ارجعهم ما اطول وارجع انا اوصله
وانتِ ما تتحركين مو گدامي امشي بدلي .
ايليا : اوكي .
تراث : انعل ابو الأوكي لابو شكو واحد اخترعهااا .
ايليا : اوكي .
فاتت وعكس برودها تحولت مثله نار
ايليا : استعرضت بروحي .
ام تراث : انتَ ردتيها معلينا بيكم من نوجع
عسى ما يذبحچ وتذبحي ولا نصعد .
بعدها تريد تصعد والهوسة وصوت الزلم
برا المنطقة بكبرها ودخلونا انذار من فات
بيرغ يفحط بالركض لزم الباب مال مخزن
يدفع بيها يريد يفتحها ما تنفتح ويضرب
حيل على باب وبصوت خبل الكل يصيح
_ شهااااااااب انتَ هناااااا شهااااب تسمعني خووووية .
طلع خلف مهبوط والتلفون على اذنه يصيح
خلف : ومحمد اگضي الدنيا امسح الغربية بيك
يا ***** اذا معتدي لو ضاربة انهي عليك .
تراث : اخاف هوَ يمسح بيكم الغربية ؟
فؤاد : ترررراث احتررررم .
تراث : ما يخليهم اليوم بوية ما صدگ
يخلص العرررس حتى يشتغلهمم اجاهم .
صوت سيارة برا الشارع مسموع بكل وضوح
الكل التفت من دخل وارث عليهم والله وجهه
يخوف من كثر ما عصبي ومخنزر عليهم
راح على باب ودفع بيرغ وعيونه على صلوات
وارث : سمعت بيچ محضرة مصايب حتى تصدميني
وسمعت حالفة تبچيني وتكسريني ، وسمعت بيچ
ناوية على شر ، لازم نسيتي انتِ لعبتي ويه منو
مو صلوات نسيتي مبين تحبين اذكرچ ؟
حچاها وفتح باب المخزن ودفره بيرغ
ركض اول ما وگف مقابيل الباب رجله
بعز ما شالته دار وجهه فاتح عينه على خلف ويصرخ
_ لاااااااا لاااااا اخووووووي شهااااااب لااااا .
مثل المخبلة صارت صلوات ما رحمها ولا انقهر
من كثر ما فاير وصاير بركان مفجور بسببهم
بأفعالها عمت على نفسها وما حسبتها صح
خلاها املخ روحها تملخ مثل ما هوَ ومرجانة
تملخت روحهم بوسط العرس ، فاتت على ابنها
شالتو بحضنها حضنت راسه وشهاب الدم
ما نعرف منين يصب منو لزمت ايدو وضربت
على عيونها وتهز براسها مثل المخبلة
_ مگطععععع اصااااااابعة يمه يا اهل الرحمن
ساعدوني مگطعععع أصابع ابني .
تراث لزم بيرغ وارث فات عليهم للمخزن
ضربه بدفرة على خاصرته خلاه يستفرغ دم
وجر ايده يمرد بيها قوي والدم يطافر عليهم
وارث : لا تخافين ما گطمت اصابعة بس قلعت
اظافرة وهوَ يعررررف السبب .
مردهن اكثر اني من يمي توجعت وحتى
ما اگدر ادحگ شاغت روحي بصرخات شهاب
وارث : تعرررف ليششش قلعتهن تتذكررر مووو ؟
شهاب : ا… اي اي ات…. اتذكر .
شمر ايده على حضن امه وگف يمسح الدم بملابسه
وارث : وحگ ابو راس الحار وراس الحسين
مرة الثانية اذا تفكرين مجرد تفكير يا صلوات
تلعبين لعبة وبيها اسمي لووووو تخططين
انتِ وهذا الديوث عليَّ لو على زوجتي
خيركم ادوسه بقندرتي واجرد بتاريخكم
اخليكم سيرة على كل السان اكرز بيكم والعالم
تكرز بيكم اخليكم محور الفضايح والشهيرة انذال .
فات شيخ فؤاد طلعه وهذا خلف يخابر على نجدة
خلف : اسجنك اليووووم بلية عررسك اسجنك .
وارث : رجفتني لك چلب لا تخوووفني انا عررريس
اروح اگطع الخلفة مثل ما خليت الچلب مالتك
يگطع الخلفة هينوووووب صار حالة وحال امه .
بيرغ : تراث خليني اشرب من دم هذا الكلب
هدني ولك هدني انعل خيررررره موووته
حلفته مووو گدامك وگعت على راسه ابوس
بررراسه يخلي عليه اناااا احلهااا وياااه
شوووكت يول شوووكت لگفتع وشلون ضربته
وحدك لااا مو وحدك وياااااك تررراث موووو ؟
وارث : بالله تراث هد بيرغ حتى امثل بي
شلون گدرت انهي على اخو الـ**** وحدي
كم مرة تريدون اعيدها لا تخلوني اصير
عصبي يا حيوانات عصبي لا تخلوني
اصير افقد واذا افقد افقدكم ويايَّ تاريخكمممم .
خلف : اخيسك بالحبوووس
وارث : زلمة ابن زلمة ابن زلمة اذا تخابرهم
وتخليهم يجون هنا وتشتكون عليه ودخلوني
سجن زلم انتووووا اذا زلم واحد بيكم زلمة يسوويها
يا علي دخيلك يااااا علي شيصيررر بيكممم وراهاااا .
صلوات : بيررررغ اخووووووك مااااااات ول يممههه مات .
وارث : ما يموووت المگبرة ما اطم العارية
هاي الخاطررر بيرغ خابرت على ممرض
يجي هنا يعالجة ويخلي يلبس دشداشة
من صلوات وينام بدشداشة امه صوته
ما اسمعه راسه ما اريد يطلعه هوَ عرف
شيصيررر بي بعد اذا بريد يلعب ويايه .
شهاب : المهم عندي خربت عرسك وفرحتك .
وارث : بأحلامك ما يخرب والحسين هاي گدامكم
انا العرس تم مثل ما اريد عروستي بوسط بيتي
والفجر سفرتنا وانتوا هذا حالكم زبايل
مطشرة دمهااا بالگاعع هههههههههه .
بيرغ تخبل من استفزاز وارث يدفر ويضرب
بتراث بوكسات حتى يهده وهذا بارررد وارث
واگف وايده بجيوب البنطلون مبتسم
همام وسهم دفعوا اسمر وتاج وركضوا
على شهاب ويخابرون اسعاف وارث صاح
_ لك ماكوو اسعاف الممرض بالطريق .
همام : رررراح يمووووت .
وارث : موتتهم هل كلب ابن الكلب طبه وجععع .
دخل الممرض سلم على وارث وركضوا
كلهم على مخزن بيرغ وهمام وسهم يساعدون
الممرض وصلوات نست من بينهم وراحت
على غرفتهاا گلبي لعب منها بس ما تحركت
من مكاني علّى اصواتهم جمدت ام وارث
راحت على وارث بسكوت سحبت ايده تسأل بي
_ هذا اخيك وأجرمت بحالته چا الغريبة شسويت
ولك بيهااا بس لا ضرربتهاا ولك وعاركتهااا .
ظل ثابت رافع الراس وايده ما طلعها من الجيوب
وخلف ما سكت دقيقة يدعي ويسب سويه
لفت صلوات روحها بعبايتها وتريد تطلع
خلف : وين رايحه ردي للبيت .
_ اريد اخوتي يدورون حل بهذا وارث .
وارث : توكلي اريد زلم تواجهني يلة .
صلوات : احرگ گلبك مثل ما حرگت گلبي .
وارث : لا تهددين لا احط طلقة براس ابنچ .
راحت بعد ما جاوبت وراحت والله عرفتها جذابة
ونيتها مو اخوتها من لفت عبايتها والواضح
جوه عباتها اكو شي مضموم ، بعدهم بالهوسة
وارث يتصايح هوَ وخلف ، صعدت فوك اشرب
حباية راسي راح ينفجر واشوف كنتور بيرغ
مفتوح رحت اسد اكو شي ناقص قفلت الباب
ونزلت ابلغ بيرغ مشغرل هذا ، رحت على وارث
وتلفونه رن جاوب بسرعة وعگد حاجبة
وارث : ها صلوات بعدني ننتظر اخوانچ .
صلوات : البيت الجديد عنوانه ***** بمنطقة الـ***
الباب ابيض والبيت عالي و.
ركض وهوَ يسمعها على سيارة
وارث : صلوات ولدچ اثنينهم اذبحهم .
صلوات : ذبحتهم واحد ميت واخو يبچي
على اخو يريد يموووت من وراك وامهم
نزف گلبها من نزف ابنهاااا يا ابن سكينة
هاي الطفلة من فاتت علينا هجمتنا هجم .
يتبع …
الفصل التالي اضغط هنا
يتبع.. (رواية الموروث نصل حاد) اضغط على اسم الرواية لتجد الفهرس كاملاً بجميع الفصول.