رواية الموروث نصل حاد – الفصل الثلاثون
♛ 30 ♛
بقيت حاضنتها وجاوبتها وجسمي يرتعش
_ احبچ يمه .
_ مرجانتي .
الشيخ فؤاد: بعد محاولات وأخيرة تحقق مبتغاك
بوية وارث والبنية حبها گلبك صارت بأسمك مرتك .
التفت عليَّ بارك هو وتراث انصهرت حتى بعد
ما اعرف ارد علبهم وخدودي صاروا نار
مد وإرث ايده حتى اطلع بعد ما تشكروا
من القاضي ، اخذ وارث ايدي بكل تملك
بين ايده واول ما وصلنا للباب الخارجي
رفع ايده وايدي عبالك بيده كأس مو ايد
وامه بالباب من شافته فتحت الچكليت
هي وخالته يشمرون بالچكليت
وارث : سويتها يمه وفيت بوعدي
توجت حبنا بعقد شرّعاً وقانوناً.
تقدم بيرغ حضنه وطبطب على ظهره قوي
بيرغ : زلمة كلف وعدت ونفذت رفعت راسنا وارثنا .
جر همام بيرغ وحضن وارث وبعدها ايدي بيده
ما يرضى يعرف ايدي ، وامه وخالته يسلمن عليه
همام : مبارك يولوو صوت زلمة متزوج ، يمتى تنطيني
فلوسي حتى اتزوج ابو لطعه لطعتنه لطع احنا وفلوسنا .
ضربه على رگبته اثنينهن يضحكون
وارث : لا تحلم ابو وجهه الأصفر طس منا يلة .
همام : وها وها تونس خوية تونس واحنا نباوع عليك .
سَــهم : اسكت غير المهر ورثنا كله
بالعافية على ال ضـلـيل .
ضـلـيل : عمي خليتوا عينكم بعدنا كلشي ما قابضين .
وارث : انوب يريد يقبض .
بوست امه وخالته اريد اتحرك من ايده ما اگدر
واهله واهلي صاروا يتباركون بيناتهم
جرني من ايدي غطاني عنهم صار ظهره عليهم همس
_ نحلة نشرد ؟
_ وين ؟
_ مكان وحدنا .
_ لا اريد امي .
گصني گص بعيونه حفظني حفظ واني ارجف
من المشاعر ونظراته توترني عضيت شفني
الجنطة مالتي تلعب بيدي بلع ريگه وشوش ذايب
_ احبچ والعباس .
_ طالع حلو .
_ والحسين اعشگچ .
_ فد هيبة .
_ اويلي على غربية انصهرنا يالبصرة .
فر راسه منا ومنا شاف ثراث غمز اجه تراث
بدون ما يخلي احد يحس عليهم
وارث : ليش من سلموني الموافقة بعد ما تجاوبيني
على التلفون واختفيتي ردت اعبر على فرحتي وماكو .
_ استحي .
_ اگلچ مشتاقلچ راح اطگ .
_ شلون اطگ .
_ اريدچ .
_ ها .
_ نداء من الغررربية للبصرة اغاااااتي .
فزيت ذيچ الفزعه من صوت صا ورانا
تراث : وصل النداء عُلم راح أتمم التغطية وافلت ابو فلته .
راح تراث عليهم اشر على درج وهو يصيح
_ الشرطي يگول القاضي ضاج من صوتنا
انزلوا اغاتي ننتظر الأوراق بعد ورقتين ونتوكل .
نزل الشيخ فؤاد هو وضليل ، وامي وام وارث مندمجات
بالسوالف ، واخوان وارث يمشون ويسولفون
بس بيرغ ما اعرف شنو تراث يحچي وياه بحيث
رجع علينا وبصوت مسموع گال
_ تعال وارث منا اطلعوا .
حضن ايدي واني عيني على اهلي وگلبي
گضني خفقان من هـذا المضبوط اريد امشي
بعد ولا اگدر دخيلك ياربي هذا وين ياخذني
بللت شفايفي يبست من التوتر وجسمي گب نار
طلعنا من الباب للگراج مباشر ، ورجع بيرغ عليهم
يمشي سريع وارث صار يلمس ايدي بكل استحواذ
وصلنا للسيارة فتح الباب هزيت راسي تنهدت ونطقت
مُـرجانـة : اريد امي اذا اروح تزعل مني .
وارث : نفتر ونرجع .
_ يعني وين نفتر ما اريد افتر .
_ اني اريد افتر مُـرجانـة اريد اظل وياچ .
استسلمت بسبب نظراته المتوسلة وصعده
ملخت الجنطة بيدي بگد ما مردتها ، صعد
مبتسم يضحك اول ما شغل السيارة شبك
ايدي بين ايده محتويها بكل سيطرة منه
اول ما تحركت السيارة شغل الصوت مال
اغنية وشغل بيت واحد من اغنية ويغني
وياها بصوت عالي وسوته بي بحه واضحه
” لو يبقى آخر يوم إلي هم أبقى اريدك
نبقى سوية للأبد وأيديه بيديك
عليك أغار من الهوى و أحبك هواي
حب قوي يبقى حبنا للأبد ما دامك وياي
مخليك بعيوني ما أنطيك لأي واحد أبد
غالي بغلاة أمي يالغالي تسوالك بلد ”
اخذ ايدي اثنينهم باسهم بوسة بعد بوسة
وارث : عهداً عليَّ يا مُـرجانـة ايدي بيدچ للموت .
مُـرجانـة : توووي وارث خجلتني شكراً .
_ دلوعتي جعل محد يدلع على گلبي غيرچ
وحق علي عمري من هل لحظة اكتبه بأسمچ وحدچ .
_ يمه كافي عزا .
_ احب صوتچ نحلتي .
عدلت شالي ضعت ياربي ضيعني رجلي
ترعش انوب فشلت منها اغطي بيها بالجنطه
وارث : لا تخافين مني انتِ ويايه لا ترتبكين
بعلي انا ما اريد منچ شي والله بس اريد اشوفچ
وتبقين يمي مشتاقلچ حرموني منچ كل هل فترة .
غطيت وجهي بيدي ، وارث ضحك بصوت مسموع
تخربطت احتريت من نظراته عبالك يلتهمني مو يباع
خليت ايدي على صدري اجر النفس ابتسم وجر
ايدي وهوَ يخلي ايده بمكان ايدي ويوشوش بتلاعب
_ تنفسي انصهرنا تنفسي .
_ اريد امي .
_ ههههههههه بودي اكل خدودچ الورديات .
_ يوووه والله انزل وارث .
_ بالعباس ما تتقاومين .
نظرت نظرات هيچ صفح حتى اخاف اشوفه وألتفت
وارث : بألف يا علي لازم روحي عنچ .
درت وجهي على شارع اريد اشرد
_ ترا اذا تكمل بعد گلبي يوگف وارث .
وارث : عسى گلبي يوگف قبل گلبچ .
_ اسم الله عليك .
مد ايده حضن وجهي عيونه تلمع وايده فد حارة
صدره يرتف وينزل بطريقة جنونية نطق بلا مقاومة
_ شطالعة مُـرجانـة بالحسين عبالك
حلقوم وردي ومغمسي بنشا .
بگد ما كلامه حلو عيوني دمعت
وتجمع الدموع بيها خايفة على
خجلانة بعد ما اتحمل ، من شاف
دمعتي نزلت عافني وفع ايده مستسلم
وارث : سكتت بعد ما احچي لا تنزليهن عمي
لا تنزليهن غلطان انا اسحب كلامي شسويت .
رفعت راسي مبتسمة على رد فعله
مُـرجانـة: مو كلامك يبچيني حلو .
وارث : نحلة تبچين على كلام الحلو ؟
_ مو مشاعري تتخربط .
_ ههههههههه
_ رجعني على امي .
_ خفت منچ بس لا من نتزوج هم تصيحين اريد امي .
_ ها ، لا .
_ مبين اي
استدار بالسيارة ذبلت عيونه من يباع على شفايفي
_ هاي شفايفچ مخليه حمره .
_ اي نقش خلت من مكياجها على شفايفي
اني ماعندي وگلت لماما اريد مكياج بس
ماعدها وقت اشترت بس عطور وكم شغله .
صفنت بالطريق يمشي وتذكرت ما تحملت اسكت
مُـرجانـة : وارث .
_ دلوعته نبضات گلبه گولي .
_ ليش المهر هيچ مبالغ بي .
_ لا بالعكس ليش مبالغ غير اخذت
نحلة شيخة بنت شيخة بنت شيوخ .
برطمت شفايفي مو راضية ابد
_ اي بس احس عيب هيچ مبالغ بحقي .
_ تستاهلين عيوني وماي عيوني .
_ عمو ضـلـيل شرط هيچ مبلغ عليك مو .
_ اي .
_ حتى ترفض ؟
_ وما رفضت احرگ الفلوس اللي
تحرمني من حب حياتي .
خنزرت لا ارادياً ورديت
_ موقفه موو حلووو يقهررر .
وارث : بالعكس مُـرجانـة بالعكس هو يغليچ
قيمتچ عالية بزوده لليوم كلامه بأذني بنص
الديوان گال ” انا موافق دام البنت موافقة عليك
بس خليها بعقلك انتَ راح تاخذ بنت المرحوم الغالي
بنتي من بعد اخوي راح تاخذ بنت الشيوخ شانها
عالي ومقامها غالي ، طالب شيخة بنت شيوخ ”
همست بضياع تام
_ يگول بنتي ؟
وارث : اي والله دوم يگول بنتي ويحبچ انتبهت عليه
فوك ما تتصورين يحبچ أنتِ واخواتچ .
_ لا هوَ ما يحبني .
_ مُـرجانـة لا تغمضين عيونچ الزلمة اكرهه ما احبه
بس كلام الحق سيف علينا ورانا حساب
الزلمة يحبچ أنتِ واختچ عبالك بناته مو بنات اخو
وكلامه عليچ وعلى اختچ يلقي بيچن شعر وعلي
بگد ما يحبچن وفخور بيچن ويعزكم هوواي .
رفعت اكتافي بمعنى ما ادري من رن التلفون
حتى ما جاوبت بعد ولا نطقت بحرف بس سمعته
وارث : ها تراث ، اي راجعين هاي بالگراج .
هوَ حجاها وصف السيارة مستعجل طفاها
واجه فتح بابي ونزلني يمشي سريع
دخلنا على محكمة من بعيد شفت ضـلـيل
يتلفت وامي قريب منه خفت مبين تهدي بي .
اريد اجر ايده منه لزگ بيدي خرب اوف منك وارث
وحذائي من المشي السريع بقت تأذيني
ضـلـيل : وين رحت ؟
وارث : كملنا الأجراءات .
ضـلـيل : يا إجراءات بعد غير خلصنا
شني ما متزوجين قبل ما نعررف الأجراءات .
التفت وارث عليَّ من جريت ايدي عيوني تلمع
اريد ابچي الدموع بالحافه من التعب
مُـرجانـة : الكعب جرح رجلي صارت تأذيني .
وارث : مُـرجانـة انتِ وينچ وين تتحملين كعب
بعد لا تلبسي تتكسرر اعظام رجلچ .
قاطعت الكلام امه ورجعت تشمر چكليت
اخذت ايدي من ايده من خزرنا ضـلـيل
ختلت بظهر امي من الخوف ولزمت ايدها
وارث قريب من عدنا يضحك ويه امه
واجت عجوز عمرها بالستين تقريباً
وهيَّ تمشي سريع لزمت ايد امي
وايد وارث اطبطب عليهن والواضح
همه هم عدهم عقد زواج باقي شوية
عدها بالچيس چكليت طشته عليهم وصاحت
_ الف مبروك عليكم يمه كون الله يهنيكم وليدي
دير بالك عليها لا تضيعها من ايدك مبين عليها
بنت عالم وناس ومن اهل الله وتخبل .
جحظت عيون الكل احسهم عيونهم راح
تطلع من الصدمة وضليل ملامحة بعد
ما تنوصف بكلمة اعصابه وصلت حدها
وامي باعت العافية وودعتها ، حتى وارث
ابتعد منها ليغاد ورفع ايده يگله
_ لا تخزر شني انا وصيتها تجفص بالمصارين .
وعمي ضـلـيل لا بي يگله انتَ شايب
وفكرت ام البنية هي حرمتك يعتبرها عيبه
ولا يگدر يبلعها ويعديها تقدم على وارض
وذب حسرة شكبررررها وعيونه تبث شر
ومن گلبه من صمصوم گلبه طلعت كلماته
ضـلـيل : اوووف منك اووووف ابو صدر المدلع .
حچاها والمحكمة علگت علگ بأصوات ضحكاتهم
تراث وابو واخوانه وامه وخالته احتقن وجههم دم
بگد الضحك بعالي صوتهم صار ، وارث يباع
على ملابسه ويضم بضحكته مو راضي يبتسم
على كلام ضـلـيل ولا يتجاوب وياه مبين يكرهه
تراث : هسة مو فحمت گلبه دگم القميص يمعود .
وارث : والعباس ترا افتح حتى مال بطني عوفوني .
امي راحت تمشي واني استغليتها رفعت
حاجبي خزرته عود شنو يفتح دگم قميصه
اتفق هل مرة اني وضليل ولو ما اريد اتفق
مريت من عنده اريد اروح على امي همست
مُـرجانـة: أقفل القميص ترا ارفع فستاني .
عديته ورحت على امي لزمت ايدها وشفت
ابتسامتها شگد احبها وبعدها تضحك على
ضـلـيل اول ما وگفت قريب منه شفته مشتعل
شعل من الغيظ والقهر ونظراته تحچي قبل شفايفه
ضـلـيل : فرحتي العرمة نعنشتي .
غـاليـة : اني شكو هي اجت شنو ماشافت
بنتي بطولي ولابسة فستان ابيض مبين عروس .
ضـلـيل : غير انتِ تصغرين بروحچ لابسه فستان
وتصيحين لا عباية خليجية خليج براسچ كووون .
غـاليـة : اصغر بروحي شنو هوَ اني صغيرة .
ضـلـيل : تريدين اتسودن عليچ ؟ يولو لا تستفزيني .
_ سكتنا كافي .
_ هي تصغر بروحها ادگ على شاب .
_ شيخهم تاج راسهم انتَ هم شاب .
لف البشت صفحة منه بين ايده ودار وجهه بعيد
استقر اطمئن بكلامها نريد نصعد وتقدموا كلهم
علينا وارث مقفل القميص ابتسمت لأن احترم كلامي
ما يعاند ويايَّ وهوَ رد ابتسم واجه بصفي .
وارث : حجزت بمطعم الـ**** نروح و…
ضـلـيل : لا ماعدنا وقت نريد نرد البنات وحدهن هناك .
وارث : ساعة زمان وارجعوا خطية من الصبح ما اكلو..
ضـلـيل : شيخ فؤاد أودعناك الغالي .
وارث : استغفر الله الصبر يا ربي الصبررر .
باوع وارث على امي وهيَّ تقربت على عمي ضـلـيل
وارث راح ليغاد اعتزلوا بس اسمعهم تگله
_ خطية غير بعد العقد يعزم لا تكسر بخاطره .
_ اگلچ ماظل صبر عندي راح اطگ بين عشيرتنا
وعشيرتووو عداوة انتِ وبنتچ جمعتن هل صوبين
راح نصيرررر مذابح اذا اظل جدامو دقيقة .
كفت ردن العباية من شافته قافل نزله ما قبل وصاح
ضـلـيل : ما اگعد اكل انا وهذا المدلع بمكان واحد
لوووو مو تكفين هل ردن لو تموتين يلة حسچ ما اسمعو .
غـاليـة : لعد انتَ هم رجعنا البغداد واخذ ابن
اخوك ورد للغربية بنفس الدقيقة عيوني شيخهم .
رجعت فتحت بابي تريد تسلّم عليهم وام وارث
توصي بيها تكمل كلشي بسرعة لأن مستعجلين
وشيخ فؤاد صاح بصوت عالي فرحان وعمي
ضـلـيل واگف عنده بس الغضب مبين بعيونه
شيخ فؤاد : يلة بوية اصعدوا سياراتكم نروح للمطعم .
قبل لا اصعد اجه شيخ فؤاد توسل بضليل
_ عليك الله بغلات نورا عندك تخلي
مُـرجانـة تصعد بسيارة وارث حلفتك بالغالية .
ضـلـيل : تراكم چثير ضغطتوها مصاريني اليوم .
_ ميخالف اليوم عقدهم واثنينهم فرحانين كمل فرحتهم .
_ لا خليها عندي هوَ هذا المطعم راح نوصل .
وارث بعيد واگف ينتظر على اعصابه
وضليل قافل واني سكتت بعد تعبت تدخل
صفگ الشيخ فؤاد بيده مستسلم وراح
غـاليـة : شلعت گلبهم كل شغله يطلبوها
تطلع روح روحهم على ما توافق .
ضـلـيل : غااااااالية اناااااا مووو مگرن تعبتني .
_ ترا زوجته صارت ومخطوبين شكو بيها .
_ امشي انزلي هذا اخر طلب اذا بعد تطلبون
شي وحگ الله انزل اكتل ابن ساجر بنص الشارع .
اخذت جنطتي ونزلت من سيارتهم وارث يشغل
بالسيارة وسهم صاعد هو وهمام وياه من شافني
اجيت فز ونزل من السيارة نزلهم وفتح الباب
مالتي صعدت وهوَ يدردم على ضـلـيل
من صعد اخذ ايدي بين ايده ورفعها يبوس بيها
_ بگد ما مشتاقلچ اخاف ابوسچ وتخافين مني .
_ لا ما اقبل تبوسني .
_ ليش ؟
_ ما اقبل وارث .
_ اذا ابوس هسة يا مرجانة معنى ما ارجعچ
واخلي ضـلـيل يدگ ويلطم وحق الله بس مانع روحي غصب .
مارديت بس بقت الأفكار بعقلي ادور بدائرة
وماتحملت ما اظل ساكته وما اسأل
_ تزوجتني بس لأن تحب تبوسني مو ؟
_ مافهمت !
_ تزوجتني حتى تبوسني مو لأن تحبني .
_ على اساس گطعت البوس تگطع هسة
ولچ نحلة لو ما باعد روحي منچ وروحي تلوب عليچ .
نزلت راسي خجلانة منه ومن كلامه احس غريب
سياراتنا اربعة يريدون يطلعون من گراج المحكمة
وصفت اثنين غير سياراتنا گطعت الطريق علينا
وارث اول ما شاف السيارات عرفهن همس
_ خلف يا خلف من الله لا يوفقك .
جر السلاح من تحت الكرسي مالته ونزل بيرغ
واخوانه واولاد شيخ فؤاد اسمر وتراث قبله
اول ماشفت شهاب نزل من السيارة نشف الدم
بجسمي والنفس بعد مايدخل ما اگدر اجر نفس
ابد وايدي فجأة جمدت عيوني صارت ادور امي
نزلت تركض عليه من نزل ضـلـيل راحوا عليهم
اخذتني امي وام وارث وياها همست وصوتي ثگل
_ يمه رجلي بعد ما تمشي .
_ لا تخافين لا تباعين عليه خيولي الخايس .
التف وارث ويسمع صوته من بعيد يگول
شهاب : شبيكم كلها خايفة من شهاب دخلتكم
انذار هيچ حضوري يرهب گلوبكم .
بيرغ : صوتك امشي اصعد يلة ولي انتَ وعمك .
خلف : هذا اخوكم حالو من حالكم اجه يبارك
لأخو على زواجو قابل عيب لو حرام غير اخو .
ضـلـيل : شلون اخ زبالة ابن زبالة وانت هم زبالة مثلو .
رفعت عيوني شفت شهاب فاصل عنهم عيونه
عليَّ اني وارث مركز تركيز مرعب الى درجة
ما تنوصف وبيرغ يفر بوجهه ، لزم وارث
وجهي وگعد من رجف جسمي من الرهبة
شگد مكروه بس يخووووف حضوره بمكان
يسوي رهبة لا ارادياً للكل مو بس عندي
وارث : خيولي لا تباعين عليهم لا تخافين .
مُـرجانـة : خلي يروح وارث روح اطردهم .
وارث : هسة اكسر راسه وحق القران بس هدي نفسچ .
هزيت راسي وبقيت منزله عيوني بالگاع
والباب مفتوح راسي على بطن امي حضنتني
راح وارث هوَ وامه عليهم صاح بعلو صوته
_ خلف حذرتك لوووو ما حذرتك چلاب ما اريد .
شهاب : شايف خير اخوي .
طگه وارث بوكس فر وجه شهاب فر وشيخ فؤاد منعه يكمل
شيخ فؤاد : منا المحكمة بعدنا بنص المحكمة
يشيلوكمممم كلكم ولكم اسكتوا برا المحكمة
تعاركوا واحد يدمي الثاني امشوا روحوا منا .
شهاب : اريد ابارك لحرمة اخوي شبلاكم خايفين .
نزع عمي ضـلـيل البشت مالته ورفع العگال
والشماغ شمرهن على سيارة وكمز على شهاب
ضـلـيل : خليهم يسجنوني اريد اذبحوو.
وگع عليه بوكسات من هاي التكسير وبس
فكوا منه رجع وگف الدم يجري من خشمه
وشفايفو ولا مهتم ثابت عيونه على سيارتنا .
اجه عمي ضـلـيل لزمني من ايدي وطلعني
من سيارة وارث يمشي سريع يريد يرجعني
على سيارتهم وشهاب عبر من سيارة وصار
قريب ، وارث يتجادل هو وخلف صايرين مذابح
من سمع شهگتي ركض علينا اول ما وصل
عفت عمي ضـلـيل صرت بظهر وارث لزمت
قميصه قوي ورجع ايده حضنتها
شهاب : مُـرجانـة اجيت اسلم عليچ .
وارث : شهاب وبدر الهواشم اليوم تنام مستشفى
ولو تصبح عايش لو مدفون بمگبررررررره .
ضـلـيل : وارث صعدهااااااا .
كمل وارث الطريق وشهاب يصيح
_ لك وارث دقيقة بس اكمل كلامي بس اعتذر منهااا .
ضـلـيل : اكل قنادر ابن القنادر .
شيخ فؤاد : يمعودين المحكمة مخابيل انتوووا خلف روح .
شهاب : وارث الـ*** عود صاير شريف مخليها
خاتله بظهرررررك عبالك ادوووم لا وحق الله ازين
شاربي اذا ادوم بس تعرف البنية حقيقتك راح
تكرررررهك بس تعرررف بيك مستگعد المربية
وداخل عليها و****** وتعرف عندك ******
نسوان وزير نساء وخبرة بالنسوان وليالي
الحمراء بالأراضي كل ليلة وفلوس ابوي
مخلصهن على ***** تصرف عليهن حتى *****
ما تظل وياك والله ما تظل وياك وتكرهك .
هجم بيرغ على شهاب يضرب بي بوكسات
صعدني وارث بالسيارة واسمع شهاب من بين
ضرباتهم وگعوا همام وبيرغ عليه بس ما سكت
بيرغ : ما مليتووووا تشوووهوو بسمعتوووً
ما مليت انتَ وخلف من هل اتهامات الباطلة .
شهاب : مُـرجانـة هذا جذاب ما يحبچ صدگي
والله مايحب احد يحب روحووو وبس يريدچ
حتى مايخسرررر املاك ابوچ ويخليهن عنده
من ضمن اعمالوووو ويلعب بفلوسهن راح
تنظلمين وياه راح يخليچ بالبيت وهوَ يلعب
بكيفه بدون ماتحسين عليَّ هذا زيرررر نساء
ما يقتنع لا بوحده ولا أثنين ولا اربعة .
سد الباب وارث حتى ما اسمع باوعت على
شهاب ينزف دم ومستقتل حتى يسمعني
ويحچي ويايَّ محروگ حرگ لزمه
وارث ما يقبل يسلم شهاب لخلف
غصب اخذه من قميصه شمره وارث بسيارته
وبيرغ يسحب بي حتى يعوفه دفع وارث بيرغ
وقفل السيارة صعد وساقهاا وعمي ضـلـيل
حرك السيارة مالته سريع ، وشيخ فؤاد يتصادم
هو وخلف وتراث يضرب بواحد وياهم صارت ملاطم .
رفع ضـلـيل اصبعه وصاح بأسمي
_ سمعتي مُـرجانـة لو ما سمعتي انا اكرهه
بس اصدگ بي هذا نسخة من ابو وحق الله
اشوف وارث اشوف ساجر وساجر معروف زير نساء
تزوج اربعة وطلگ ام وارث وطلگ ام سَــهم ماتت
ام سَــهم من القهر والضيم وظل كل فترة يتزوج
بنت ويطلگهاااا وهذا وارث مثل ابو كلها تگول
عنو يعبد النسوان وكلها تحچي على ليالي الحمراء
اللي تصير بالأراضي كل ليلة وحتى اخوانو يعرفون
بيها دحگتي بعينچ شلون ينفعلون من يكشفهم
اخوهممم ابن ابوهم يشهر بيهم لا تورطين روحچ.
تخشب جسمي وصوتي راح مني خليت راسي
على شباك ودموعي تجري حسيت روحي ضايعة
حتى تفكير ما اگدر او ما اعرف افكر عدل
بين اريد وارث وبين خفت منه ليكون مثل كلامهم
بقيت الطريق كله ساكته والطريق كله تلفون
عمي ضـلـيل ما يهدي من الرن وكل شوية
اشوف اسمائهم شيخ فؤاد واولادو وحتى بيرغ
وارث كلها تتصل غلق الخط .
واول ما وصلنا گال بصوت واضح
_ لازم نعيد تفكيرنا لازم نحسبها صح
اني ما اسلم بنيتي وما ضامن زلمتها شني
خليها عليَّ انا اكشفوا بطريقتي بس هساع
اي تواصل وياهم ما اريد الصبر حلو
الإستعجال ندم لا نستعجل احنا ما مستعجلين
على بنيتنا گاعدة معززه مكرمه بيت امها وابوها .
نزل من سيارته نزلني ومد ايده مسح دموعي
باس راسي بوسة طويلة ومن فصلها همس
_ اذا يكسر گلبچ اكسر گلبه واكسره، خاطرچ غالي .
طلع شاهين من البيت استقبلنا من شافنا
شلون مقهورين سأل ، تركتهم وفتت اني وامي
بيبي بيدها چكليت شمرته عليَّ وعلى صوتها
نزلت نقش من فوك تركض تهلهل بصوت خافت
وتتمايل وهي تهمس
_ اجت عروستنا هلا بنور عيوني الف مباررك
يا گلبي يا عيوني اروحلچ فدوة تعالي تعالي .
گعدنا تعبانين كلنا امي طلعت تلفونها يرن
شافت اسم المتصل ام وارث غلقت الخط
ورجعوا اكثر من رقم غريب يتصلون
دخل عمي ضـلـيل بلغته سحب التلفون
غلق الخط وشاهين وراه متكتف ومستند على باب
شاهين : خليهم لا تردون نتأكد من الكلام ويصير خير .
ضـلـيل : الموضوع ينسد گلت خلوها عليَّ بعد
بوية نقش الأكل جاهز لا .
نقش : عبالي تاكلون هناك ما طبخت .
شاهين : شلون تطبخين وانتَ خلصتيها نوم .
نقش : بكيفي انام اگعد بكيفي لا تدخل .
صفگ ضـلـيل وصاح بيهم
_ هاااا سلاماااات شكوووو ؟
شاهين : خلصتها نترر بنتررر .
نقش : لأن هوووو شايف روحه وحتى ما يسلم .
ضـلـيل : ما تسلم الخايس انعل ابوك لابو اهلك .
شغل شاهين جگارته ورد على كلام ضـلـيل
_ هي اول ما شافتني ما سلمت تريد انا اسلم
تالي شو هاي صيحت عليه واخذت ننوس وصعدت
وهاي نزلتها بعد فلا نزلت تستنكف تنزل .
غـاليـة : شگد عيب واكلت لا .
شاهين : اي الحجية سوتلي ريوك خطية انقهرت عليَّ .
نقش : تتمسكن سوي روحك مسكين .
ضـلـيل : حارگ گلبها ال**** .
شاهين : هههههه عمي انا محروگ گلبي
شسالفة أدافع بس على بنتك ترا انا هم يتيم .
دفعه برا البيت وصاح بي
_ امشي روح جيب اكل من برا .
_ اشتغل عدكم ؟
_ راح انعنع ظلوعك .
_ گلبي يوجعني عمييييييييييي .
_ من ايدك انطقهااا للجوهرة .
_ مو صلف مثلك شيخنااااا .
عفتهم وصعدت طلعت التلفون دخلت نقش
حجيت الها الصار كله والتلفون بيدي ما سكت
وحتى رسايل توصلني ما افتحها الى ان كملت
رأيها مثل رأي امي وضليل غلقت التلفون وشمرته
بالكنتور قفلته ودخلت للحمام سبحت وكملت
ودخلت بفراشي حتى ما اكلت نمت نومة طويلة .
ملِكه ..
اليوم غصب عن ميمونة خلينها تبدل ورسمت
شفايفها بحمره بلون مشمشي يجنن صار ويه بشرتها
واني كاشخه فرحانة بهل عقد ، البيت جلفته
جلف اني وميمونة تساعدني على خفيف وامها ويانا
الخاطر ام وارث نحبها ، بدلت وكشخت بثوب
طويل محتشم بس عبالك فستان مخصر على جسمي
ابيض والوردات لون اصفر والحمرة رسمتها خفيف
نزلت انتظرهم متحمسة يرجعون حتى چكليت
جبت والله وارث يستاهل وردة .
هبطت وضربت على صدري من صراخ
ام وارث عبالك احد مات ، وام بيرغ ظهرت
من غرفتها عبالك عدها علم بكلشي ركضت
برا للگراج واحنا وياها شفت شهاب لو
القشعريرة كلها سرت بجسمي شگد اكرهه
واگف بكل ثبات وارث يقفل بالباب الخارجي
وبيرغ يحچي وياه وسهم وهمام يدفعون بشهاب
حنى يطفر من فوك الحايط وينهي هل مهزلة .
وهذا لا رجف گلبه ولا خاف من احد
وارث : انتَ حيوان ما تشبع ضرب
لك قبل فترة ملختك تملخ ما تشبععععع
جسمك متعود ما يتأثر من الضرب من الأهانة .
صار وياه طول بطول اثنينهم نفس الضخامة
قبل لا وارث يضرب شهاب شهاب ضربه ضربات
من يمي احس فكي انخلع مو بس فك وارث
هجم وارث قبل لا استوعب على شهاب
يضرب بالثاني وصريخنا صار بفلس ركضت
ميمونة تفاكك بيهم واخوانهم يفاككون واول
ما ابتعد منه وارث وبيرغ دافع شهاب على حايط
وهمام وسهم وام وارث لازمين بوارث يمنعونه .
رفع شهاب أصبعه صوته يرجف مهضوم
_ تحلم اعوفك بحالك تحلمممم .
وارث : اموتك وعلي .
_ تمثل يمها عود انتَ زين اطلع على حقيقتك .
وارث : تعال اشوفك حقيقتي تعاااااااال .
ام بيرغ : يول شهاب يمه على شنووو تتعارك
فد قندرة خلي ياخذها هو انتَ شبعت بيها .
فر شهاب وجهه على امه خزرها خزره مخيفه
وارث تهستر من كلامها احسها متعمدة تثير غضبه
ما ترك واحد ما دفعه جر شهاب يضرب بي ضرب
اجرامي گلت مات بيده بس هذا شهاب مدري گلب
وارث وصعد فوكاه يضرب بي بوكسات .
ويصرخ صوته يبچي بگد ما مقهور ويغار من وارث
شهاب : انتَ مرررريض انتَ تتعالج لازم تتعالچ
واحد نكره منبوذ فگر ما شايف وشفت اخذت
املاك ابوووي استوليت على املاكنااااااااا
على خيرررنا على تعبنا خليت كل املاكنا بأسمك
ضحكت على ابووووووي انتَ ضحكت عليه
وخليته يسجل كلشي بأسمك حتى تنتقم من
عدنااا مقهووور يا مريض تغاااار مني لأن تعرفه
يحبني اني ابوووية حبني وفضلني عليك
ومن چان يعطف عليك حتى يشوفك من تجي
تشوفني اناااا الكل بالكل اناااا صاحب الشغل
انا صاحب هل املاك والبيوت انتَ انتقمت من ابوك بينا .
لزمه وارث من رگبته مشكلتهم مو مُـرجانـة
مشكلتهم حقد بينهم على ورث على املاك على
فلوس قبض على رگبته وارث طبگ شهاب
على حايط يخنگ بي وشهاب ما سكت
وارث : اليوم موتك على ايدي ابن صلوات .
شهاب : لا تخاف ما اموت ما اخليك بحالك
وراك وراك والله وراك وراك ما اهدك .
صاح شهاب من الوجع وام بيرغ وگعت من طولها
تلطم بكل حياها على راسها وام وارث لازمه بيده
شهاب : خليتهااا تكرررهني تختل بظهرررك
تحتمي بيك مني عبالها انتَ تحميهااا تحبهااا
ولووو ذكية چان فهمت انتَ ما جنت تحبها ولا اطيقها
اناااا من شفتها وردتهااااا اجيت عليك بلغتك اريدهااااا
حلت بعيونك حبيتهااااا ورحت ركض عقدت عليهااا
تسبق الاحداث تعرفني اريدهااااا دريت بيه اريدهااا .
وارث : لك عااااااار ذبحتهااا انتَ شرررحتهاااا
وهمتها بأوهامك المريضة خليتها تكرهك
انتَ خليتهااا تكرهك انتَ عذبتهاااااا
المفروض انتَ بالسجن يا مجرم تستحق اعدام .
شهاب : اخذت مني كل املاكي وتعبي انا
تعبت ويه ابووووك اناااا انكسر ظهري بهذا
الشغل انتَ جنت مرتاح ببيت خالك واخذت
كلشي مني جردتني من كلشي حتى من ردت
بنية صرخت لا هاي دخيلتي هاي عقدت عليهااا .
وارث : راح امووووته لك منوووو عذبها منوووو ؟
شهاب : جذبوا عليه لك جذبوا عليه گالوا
اجت تاخذ أملاككم وانا تعبان بيهن محروگ گلبي
ما جنت ادري بيها هيچ صغيرة ما ادري والله
ما ادري من شفتهااا تندمت من اول ما شفتهااا
تندمت وردت انقلها مستشفى بس رجع بيرغ
رجع وراد يشوفني خفت وشردت ، جذبوا عليه
وهموني هيَّ حرمة چبيرة وخبيثة من ال ضـلـيل
وخليت اولاد خلف يفوتون عليها يعذبوها
من سمعت صوتها دخلت انا شفتها وانصعقت
وردت استسمح عن ذنبي واتزوجهاااااا وانتَ اخذتها .
بيرغ : وارررررث راح يمووووت بيدك بس هد رگبته .
شمر وارث شهاب من شافه انتهى
ودخلوا شيخ فؤاد واولاده يعتون بي
وگع شهاب ينزف وراسه يجري دم
وخشمه يصب ومن بين شفايفه دم
فقد وبيرغ ضرب على راسه صاح
_ شهاب خوووية تسمعني شهاااااااااب .
فتح عيونه بصعوبة وقبل لا يرفعه بيرغ نطق
شهاب : راح ارجع كل املاكنا منك يا مريض
انتقمت من ابوك بينا ارجع تعبنا واملاكنا منك
وارجع مُـرجانـة هم ما اخليك تتهنون انتَ وياها سافل .
وارث : بوووية راح اجرم بحاله بوية اخذوا مني .
طلعوا وخلف اجه من شاف حال شهاب جن جنونة
صعدوا بالسيارة وراحوا وام بيرغ لبست عبايتها
وركضت وراهم بسيارة خلف تلطم وتتحسب وتتوعد .
گعد وارث بالگاع يتنفس بصعوبة صدرو
يعلى ويهبط بشكل رهيب، فتح شيخ
فؤاد الصوندة غسل وجهه وجابت امه گلاص
ماي شرب منه مخنوگ باوع على شيخ فؤاد وهمس
وارث : ما اريد املاكهم خلوني اوزعهن
تعبت انا تعبت من اتهاماتهم انا ما بگت
ساجر خدعهم خلاهم يأمنون انا منبوذ
وصدمهم قبل لا يموت وسجل كلشي بأسمي
انا ما خدعته ولا اعرف اخدعه ولا اريد املاكهم
هو كسر ظهري وحملني مسؤولية اكبر من طاقتي .
شيخ فؤاد : لا تحچي اسكت .
عبرهم وصعد فوك يدور على تلفون بجيوبه
وشيخ فؤاد التفت على ام وارث وگال
_ شهاب نغل يعرف ضـلـيل اذا يسمع
هذا الكلام بعد ما يسلم مُـرجانـة ولو
يمووت ما يزوجهااا يخاف عليهن
وحرگت التفون عليه ما يجاوبني الله يستر منه .
كلها طلعت تلفوناتها تخابر يريدون يتفاهمون
وياهم وابد ماكو رد منهم نزل وارث متخبل يصيح
_ غلقت تلفووووونهاااااااا اذا صدگت
اموووت شهاب والحسين الزمه اموته .
شيخ فؤاد : اي وتضيع روحك .
وارث : وتضيع روحي هوووَ انا ضايع من زمان .
ختلت بالمطبخ اني وميمونة نباع عليهم
سحبه تراث على استقبال يفهم بي
_ نوصل لضليل قابل يختفي ونروح نفهمه .
وارث : اخلص عمري اتووووسل بضليل
هوَ مايصدگ يذلني ذلني بمرجانة ذل .
ام وارث : وحق الحسين كل شوية بالمحكمة اريد
اطگ عليه العب بي طوبة واسكت بروحي
الخاطرك خوية مخلي دوبه ودوب ابني
بعلي يكره وارث لأن يشبه ساجر ويعرف
ساجر خطب ام مُـرجانـة .
شيخ فؤاد : عمي قابل خطبها هي گلمة وحچاها .
ام وارث : لا ام بيرغ گالت رايح وخاطبها وهيَّ
قنعته ينطي حصة ام ضـلـيل من ورث عابد
بالأراضي، ومحولة الوكالة مال اراضي
لساجر حتى هوَ يديرها وال ضليل ما يحصلون
شي ، تالي ساجر قبل لا يموت حولها الوارث وهيَّ
وافقت واجت وقعت هي وابوها چان عايش
من سمعوا ال ضـلـيل اخذوا بناتها وجبروها
على ضـلـيل فروها فر بوكتها وفزع ساجر
عليها ولزمه ضـلـيل هو وباقي اخوته
بالأراضي منعنعين ضلوعة .
شيخ فؤاد : هههههههه والله سالفة هاي
هي فرتهم وهمَّ ما مقصرين بيها كارثة .
اسمر : بس بعلي هي ثلاثينية جادة لقطه .
شيخ فؤاد : اكل **** يا ابن الـ***** .
وارث : ماتجاوب ، خرب اهلك شهاب خرب والديك
خرب امك اروحله للمستشفى هسه ادفنه هوَ وامه .
ما هدأت الأصوات والمحاولات ابد صعدت
من رجعوا لأن البيت صار عبارة عن زلم
فات بيرغ قبل الكل وگف مقابيل وارث
بيرغ : رجعت شهاب ويايه حالته موزينه
الضربة براسه قوية ويمكن تصير عنده مضاعفات .
وارث : اي يطبه مرررض يستاهل وابو زايد
رجعته حتى اطلع اكمل عليه هل قنزرة العتيگة ؟
بيرغ : رجّعتو حتى ادير بالي عليه هنا
اريد ادخلو على بيت وارث .
وارث : تخبلت امشي من وجهي .
_ ما امشي وارث هذا بيتنا مثل ما هوَ بيتك
وهذا اخوووية مثل ما انتَ اخووووي
انا مو ماقص غيرة اخلي اخوية بالشارع
ووضعو مووو تمام راسو وجسمو كلو رضوض
لوو مهما علط الأخ عزززيز .
دفع وارث بيرغ من صدرو وصاح بي
_ يعني راضي على اخوك حتى لو غلط .
_ ما واضي وروح ابوووي ما راضي
وشمرتو سجن وتحاسب وتفلش هناك ومن طلع
كملنا عليه بس هسة هوووو مو زين صعب
اخلي بالشارع ولا اگدر اخلي خلف يستعطف
على اولاد ساجر ويدير بالو على اخووي .
گعد وارث بكل ثبات واشر بيدو بمعنى ” اطلع ”
بيرغ : اريد يومين مهلة سلمني مهلة احصل بيت
وانقل اغراضنا ونطلع منك هساع ماعندي مكان
غير هذا البيت واخووووي مووو زين حالته صعبة
ادبر فلوس بيت وأجر لو اشتري واطلععع منك
ونخلصك من عدنا وانتَ حقك تعبت من عدنا
ومشكور وكثر الله خيرك بس تحملنا عندك هل يومين .
همام : بيرغ اذا تطلع من البيت اطلع وياك .
سَــهم : وانا بعد اذا بيرغ يطلع اروحن وياه .
بيرغ : تحملنا بس هل يومين ونخلصك عيش وحدك .
عيون وارث نطت تلمع وايده قابضهن
اثنينهن قوي يباع عليهم ضايع مقهور مهضوم
من كلامهم يريد يجر النفس ما يگدر بلع ريگه
بكل صعوبة وما شال عينه عنهم حواجبه
طابگهن حيل ، نزل راسه وصفگ ايد بيده وصاح
وارث : تعوفوني الخاطر شهاب ؟
انتظر منهم جواب ماكو كمل بصوت عالي
وارث : قصرت وياكم انا قصرت ؟ مخلين الشغل كله
على ظهري وانتَ بيرغ عندك شغلك ، وانتَ همام
ملتهي طلعات وسفرات ، وانتَ لك سَــهم مخليك بعيوني
اگول خليهم ما اضغط عليهم ما مقصر وياكم تعوفوني
هسة هاي جزاتي الخاطر واحد مجرررم مثل شهاب ؟
همام : انتَ دوم عصبي ما جاي تفهمنا تعبنا
صاير تشبه ياجر بالجبروت والعصبية
ابوي جنت حسرة عليَّ احچي وياي يكتلني
وانتَ نفس الحال شگد ما نحاول نصلح
ونشيل الحواجز اللي بناها ساجر انتَ
ترجع وتبني حواجز اكبر من قبل كافي وارث كافي .
خلاها بلا جواب وصعد لغرفته يرجف من القهر
مر مني عبالك ما شافني مقهووور حيل مقهور
وام وارث اسمعها هي وشيخ فؤاد گالوا لبيرغ
_ دخل اخوك هذا البيت بيتك مثل ماهو بيت وارث .
وبيرغ ما گال لا راح بسرعة دخل شهاب اباع
عليه ملفوف راسه وايده فات على غرفة ام بيرغ
وشيخ فؤاد هو واولاده طلعوا من البيت ما بقوا
سَــهم وهمام وصلوهم للباب وطلعوا على أراضي
وام وارث ختلت بغرفتها حتى مايصير تصادم بالكلام
عكس ام بيرغ بقت تحوم على غرف بحيث ميمونة
قفلت باب غرفة امها وبعد ما طلعت منها ابد ابد .
وظل بس صوت بيرغ يصيح عليهم وختمها
بيرغ : والله طاح حيلي وصرت صغير جدامهم
من عمايلكم انتَ وابنچ هي هاي هم دگه
يسويها بأخو غير عاقدين وفرحانين يجي
يذب سم عليهم خلاهم يطافرون ليش يولو
انتَ من شنو مخلوق ماعندك احساس .
شهاب : ظل تحت رحمة وارث يضحك عليكم
مثل ما ضحك على ابوكم وسجل كل املاكو بأسمه .
بيرغ : الله اكبرر عليك وعلى راسك شعليك .
شهاب : وانتوا يستعطف عليكم بمبلغ كل نهاية
شهر ، شلون چان ابوك يعامله عاملكم والله
چان يدز بين هذا ال**** عابد مبلغ كل نهاية
شهر استعطاف ومخلينا انا وياكم الكل بالكل .
بيرغ : وحلوة عود راضي على فعل ابوووك ؟
شهاب : اي راضي يعرفو سگط وامه ال*** سگط
تالي سواها لعبة هو وهذا شيخ **** فؤاد
لعبوها صح وحولوا كلشي بأسم هل حافي
الفگر اخذ كلشي من ايدكم وصدك شكو شي
تحبه وتگول احبه راح ياخذه من ايدكم
يكرهكم يكرهناااااا افتهم يكرررهنااا ينتقم من عدنا .
تركو وطلع من الغرفة كلها راح برا دخلت على
غرفة بالربع ساعة وسمعت خطواته تقترب من الغرفة
اول ما دخل ذب كل اغراضه ودخل سبح وطلع
واني بعدني على نفس مكاني وگعدتي على چرباية
نام على جهة الثانية يذب كل حسرة تكسر باب الگلب
وهوَ حتى مانطق حرف ويايه شگد حاولت
اجبر نفسي عليه واواسي صعبة تركته ونزلت .
رتبت الهوسة وگعدت بوسط الصالة اسمع صوت
يجي من غرفة ام همام وميمونة ويتردد كل ما يخلص
” يهل عـــايـش على رمـوشـي
حــلــم كــل لـحـظـه يــتـجســم
ســحـر شـوگـك يـبـو الاكـبــــــر
يـسـايـرني بـخـلايـا الــــــــــــدم
جــسـد واتـمثـلك كـوكـــــــب
أصــــد لـجروحـك اتوهــــم
أشــوفن كـل جــرح منــــــك
ثــغر للدنيـــــــــــا يــتبـسم ”
رحت على غرفة ميمونة فتحت امها الباب
شفتها نايمة على تلفون والصوت تحت راسها
ومغمضة عيونها براحة، من حست على وجودي
فتحت عيونها ورجعت غمضت وهي تگول
_ ام بيرغ بعد الصار راح ادمرنا كلنا دمار .
_ الله موجود .
_ اقنعي بيرغ ما يطلعكم اذا تروحين وياهم تموتچ .
_ اذا يطلع من هل بيت اشرد على بيت اهلي .
هزت راسها ورجعت علت الصوت حتى ماتسمع احد .
صعدت بعد ما نزلت الثاني يوم گعدت لگيت بيرغ
ماكو وطول اليوم كل الولد ما يبينون بس شهاب
خلصها نوم وام بيرغ ما خلت اكله تعتب عليها
كله مشاوي على شوربات على لحم على دجاج
تقوي عظامه تقوي بي حتى يعذب اخوته زين .
ثالث يوم رجع وارث على بيت وجهه ما يتفسر
اول ما صعد دخلوا شيخ فؤاد وتراث ترخصوا
وصعدوا فوك عليه ، وبدون ما يحس احد
صعدت خلسه على سكيتي ختلت بغرفتي اسمعهم
وارث : سمعت كلامة سمعتوا الشروط الجديدة
يعجزني يربط ايدي بالشروط يريد ابطل
يريد اعوووفهااا لو يموووت .
شيخ فؤاد : والله مصدوم مثلك انا بوية .
وارث : شلون اروح على زهرة واطلب منها
هيچ طلب والله تعالي ويايه نروح لشيخ ضلولي
حتى تحلفين انتِ مو زوجتي تقسمين قسم
شنو هيَّ مجبورة تقيم لو مجبورة تروح ويايه ؟
تراث : هو حتى ما يتفاهم شلون ورطة هاي .
وارث : انا ما حارگ گلبي غيرررررررهااااا
شلوو صدگتهممممم وعلقت التلفون وماتقبل
تتواصل ويايه احس دمي يغلي وعلي راح انجلططط .
تراث : كلها بصوب وهاي مال من تثبت برائتك
يخليك تنتظر سنة وبعدين تتزوجون هاي ماتنبلع .
وارث : سهلة اني اعلمه هل اخخخ منك يا لساني .
ظل بالساعة ياخذ وينطي بالكلام
صاحتني ام وارث نزلت جهزت چاي
واخذته مني وصعدت دقايق ونزل
وارث سد باب المطبخ ودخلهم على استقبال
وسد البوب بالساعة وطلع هذا الولد اسمه اسمر
بالگراج يحچي بالتلفون اسمعه يگول
_ هلا ايليا ، اي بعدنا بالغربية اليوم نرد للبصرة
اي تراث ويانا تريدي ؟ هاا اي اي ليش عود اخابرچ
قبل لا نوصل شقصدچ ؟ هههههههه مخليه مكياج
مو تخافين يرجع ويشوفچ هههههههه بعلي خايفة .
سكت وراح ختل وراه السيارة وكمل سوالف
اسمر : يا ما تخافين غير تتراجفين
صح انتِ شخصيتچ قوية بس هاي
على شيخ فؤاد مو على تراث ، هسة المطلوب
شنوو احچي اريد افوت اگعد ، تمام اخابرچ متفقين قبل
لا نوصل بساعة اخابرچ لو ادزلچ رسالة اخافن منه
اذا يلگفني افتن شوكت نرد يذبحني .
طلع تراث حتى ما لبس الحذاء راح يمشي خلسه
كتف ايده ويستمع من سد الخط رفعله حاجبة
اسمر : هاي انتَ هنا .
تراث : ويامن تحچي وتتمضحك .
_ هذا اخوك تاج شوف حتى هذا رقمة .
_ تاج اسمة ايليا ؟
_ مو ايليا سلمت عليه گالت اشتاقيت لتراث يمتى يرد .
راح اقرب منه وبعده مكتف ايده على صدره
تراث : ايليا گالت مشتاقه لتراث .
_ اي .
_ گون ومرضي يا املحححح يا اچلح
هي غير عدها عيد من اطلعععع يمتى تشتاق ام المكياج .
لزمه من ملابسه وصاح بي
_ شتريد منك طالعة مو طلعتها عمتك فطيمه ؟
_ لا والعباس ما طالعة .
_ چا شتريد منك احچي لا اخلي واسك بالتواليت هذا .
_ گالت قبل لا تردون بساعة خابر لو ادز رسالة .
_ عووود ليشششش ؟
_ مخليه مكياج عمتك افطيم اشترته ألها
قبل يومين ومن تجي انتَ تمسحه حتى ما تشوفها .
عض اصبعه ولطمه على راسه
_ غير انتَ رحت ويه فطيمه .
_ لا ابوك اخذها حتى يفرحون ايليا .
_ وتخلي فوك لو من تنزل هم .
_ بعلي چنها مسودنه تخلي بغرفتها
امي تگول ومن تسمع صوتك تمسحه
هي اظن مو بعقلها امي تگول حتى تكشخ
بغرفتها وتلبس كعب واطگطگ عود هي عارضة ازياء .
_ عارضة شنوووو ؟
_ ازياء .
_ قنادر احسن على فطيمهههههه وعلى هاي ام المكياج.
راح يريد يرجع انوب رد على ولد هم لزمه
تراث : وراس ابوي وعگاله وداعت امي
ونظر عيني يا اسمر اذا تخابرها من نرد وتگول
الهااا رادين الزمك اگضي بيك التوووبة ابوووي
شني ابوووي بكبره ما يخلصك من ايدي انتَ وياها .
وقبل لا يسمع الرد من اخو فات على استقبال .
ساعتين وطلعوا ما سمعت على منو اتصلوا
صايرة هوسة من دخل بيرغ للبيت وصعد
بعده بالممر الفوك بين الغرف وطلع وارث
من الاستقبال وصعد ختلت جني عتوي
اسمعه شنو يحچون بقيت عيوني
مبحلقه تبحلق من جر وارث بيرغ وحضنه
وارث : لا تروح لا تطلع من البيت هذا بيتك .
عدل بيرغ ملابسو ورد مكسور خاطر
_ حصلت بيت بعد وراح اجره اليوم ونطلع .
وارث : انا اطلع انتَ تظل بالبيت خليهم
كلهم يولون بس انتَ تعرف بعد معزتك عندي
حتى لو نتعارك ومن اصير عصبي اخربط بس
والحسين انا معتبرك حزام ظهري تختلف عنهم كلهم .
بيرغ : وانا معتبرك سند ومحترمك ومحترم امك
وانتَ صعبة عليك تحترم امي اگلك صح امي
غلط راكبها الغلط بس هاي امي وارث امي
وشهاب اخوي انا باقي بنصكم محتار بينكم .
طفرت بالحمام من طلعت ام بيرغ ما اريدها تلمحني
ظلوا اثنينهم يتعاتبون ما يسمعوها اضطريت
اطلع واتحمحم حتى اجذب انتباههم واشرت
على باب مال ام بيرغ وعلى اذني بمعنى
” يتسمعون عليكم ” وفزيت من عاط بيرغ
_ امشي تعالي اصعدي شعندچ جوا والبيت بي زلم .
من الخوف حتى ما فكرت صعدت اركض
مريت من عدهم وفتت على غرفة وارث يبرر
وارث : لا خطية بالمطبخ اني سديت الباب عليها
من صعدوا ومن نزلوا محد شاف وهذولي امان .
بقيت بالغرفة دقايق ودخل اجه اتجاهي
رفعت ايدي خفت يضربني جر ايدي
وحضني قوي راسه نزله برگبتي يتنفس
سريع عبالك مختنگ حاولت ابعد راسي
كارهه لمساته مو متقبلته ثبتني اكثر
جسمي رفض هل قرب تكلمت بأرتباك
_ بيرغ لا تجبرني على هل قرب .
_ بس دقايق ملِكه عليچ الله لا تعوفيني
صدري مختنگ وهذا قربچ فد يطمني ويهدي دگات گلبي .
نزلت ايدي اثنينهم منتظره شوكت يبتعد عني
مرت دقايق ابتعد متحسر گعد على چرباية وهمس
بيرغ : هاي المصايب بحياتي بكوم وانتِ
وهذا نفورچ وكرهچ وهاي وجفت الكره بيچ
كل ما اقترب وتزيد بكل يوم تبقين ويايه بكوم .
ملِكه : مو اجباري احبك ما اگدر اتقبلك
والله العظيم ويوم بعد يوم گلبي احس يموت
وجاي انطفي مو متحمله وجودي بمكان ما متقبلتو .
بيرغ : والحل فهميني ؟
_ ابوس ايدك رجعني على اهلي .
_ زين بس حاولي بس اريد فرصة تقبليني
اضغطي على نفسچ بس شوية والقران انا
زين شبيه شنو ناقصني بس گوليلي ؟
ملِكه : والله ابد ما ناقصك شي بس ما نرهم
انتَ مو مثل تخيلاتي اني اريد رجال مثل
ابوية هدوء وحنية وحياة روتينية .
بيرغ : عجل انا گ***** شمسووي .
_ عصبي ما تتفاهم ايدك والسلاح
مشاكل حياتك كلها مشاكل .
بيرغ : غصباً ما عليچ تحبيني انا عم صوچي
منزل روحي واتفاهم وياچ تعالي يلة تعالي هنا يمي .
سحب الشال شمره جرني من ايدي قوي شمرني على فراش بقيت
ارافس نومني بصفه وحضني حيل عاصر رجلي
بين رجله ولازم ايدي بيده مسيطر على كل حركتي
اقاوم ولا يفيد يصعبها اكثر واكثر الى ان هديت
فر روحه على جهه الثانية وصار وجهي بوجهه
بيرغ : غصباً عليچ تحبيني .
_ اكرهك .
_ حبيني .
_ اكررررهك .
_ حبيني اگلها حبيني .
وقبل لا اجاوب جر شفتي وباسها قوي
وسعت عيوني ضحك على منظري همس
_ اطيب من هيچ بوسة ماكو انوب حاصرها .
ملِكه : بعد لا تعيدها ترا والله انتقم منـ…
رجع قبل لا اكمل التهديد صارت شفايفي بين شفايفه
بكل تملك يبوسهم ويحضن بيه اكثر واكثر
من ابتعد عيونه ذبلت واني جسمي
مدري شبي عبالك صار ينمل ويوجعني .
مرر ايده على شعري وظل وثبتني عصرني عصر
اخذ شعري فتحو ويشم بي ويغمض بعينه
وبنبرة مخنوگة همس قريب من اذني خلاني اغمض
ببرغ : ريحة شعرچ تطفي نار گلبي شگد احب
عطر شعرچ ملِكه ، شمسويه بيه انتِ وبگلبي
شعملتي ، هذا گلبچ ليش ما يحن على گلبي
حنينة على دنيا كلها بس انا معذبتني لأن احتاجچ .
بعد راسه باس گصتي قوي ويسحب بالنفس
صعد ايده يحضن وجهي يتوسلني بعيونو وبكلامو
بيرغ : عليچ الله حبيني يوم واحد لا مو يوم على اقل
ساعة شكو بيها ما اريد منچ اكثر شني صعبة عليچ ؟
نزلت دموعي مقهورة عليه وعلى روحي
ألي مو گادره تتقبلو ، درت بس وجهي اخفي
دموعي عنو بس لمحني بعد والله غصب عني
مو متقبلته كلشي بيه ما يريده وصوت بداخلي
يگلي ابتعدي كافي لا تخلي يتأمل لا تضعفين
سيطر اكثر على جسمي بحضنتو وهيمنته
بيرغ : والله ما اگدر بعد اعيش بدونچ تعلقت بيچ .
حرك ايده على خدي يتحسسو ويرسم
ملامحي بكل اهتمام من وصل لشفايفي
نزل نفسه يبوس بيهن واول ما ابتعد هددني
بيرغ : اريدچ ملِكه حتى لو تكرهيني
حتى لو ما طايقتني اظل احاول حتى
احصل على گلبچ واخليچ تحبيني غصب
عنچ ترا لا عبالچ بهذا نفورچ امل منچ
لا احاربچ حتى احصل عليچ .
اخذت مساحتي وهربت من بين ايدو
ركضت طلعت برا الغرفة ما اگدر انزل
عدلت شالي وصعدت فوك على سطح
اول ما هطيت اول خطوات جريت نفس
طويل مخنوگة ومسحت شفايفي حيل
لو بيدي اسبح من گد ما كرهت لمساته .
ملِكه اصحي انتِ من شوكت تكرهين
شخص هوَ زين ويايَّ وحباب اذا
ما اخلي يصير عصبي ليش ما ارحم
نفسي واحاول اتقبله ياربي ساعدني
يارب لو تخلصني منو ويطلگني
لو اتقبله واعيش طبيعي وياه
التفتت على صوتو ورايَّ يهمس
بيرغ : انتَ زينة ؟
_ مخنوگة .
_ حقچ المشاكل بالبيت ماتخلص .
_ اي والله وانتَ هم الله يساعدك .
_ شعجب حسيتي هههههه .
_ حسيت بعد امري لله .
_ نطلع ؟
_ وين ؟
_ نفتر بالسيارة ونرجع .
_ ياريت والله مليت من البيت .
قلص عيونه وهمس بتلاعب
_ ابد ما طالعين سوية من تزوجنا لليوم .
_ اي ابد .
_ تعالي بوسيني وانزلي بدلي حتى نروح .
_ استغلالي ابو الرتب السويقط .
ضحك بصوت عالي وغمزلي
_ يلة عمي ما نريد امشي بدلي .
اول ما مريت من عنده جر ايدي وباسني قوي من خدي
طفرت ركضت على درج امسح بالبوسة حيل
بيرغ : اي مو ابو الزبالة باس خدچ .
ملِكه : لا الرتب .
_ شمحلاها الرتب تبوس بيچ .
_ وانا اكره الرتب واكره الضباط واكره أجوائكم .
_ والرتب تحبچ عبن مربربة نرعص على مربربات
اذوب على مربربة اسلهممم على مربربة
اذب زروگ على مربربات فداء للوطن وللمربربات
اويلي على مربربات دخيل رب المربربات .
دخلت للغرفة وهوَ بعدو يحچي
جريت فستاني من الكنتور ورديته
_ شگد فاسد المنحرف الفاجر ابن صلوات السحارة .
هوَ يبدل من سمعني هيچ حچيت ضحك
رحت على حمام بدلت سريع ورجعت عدلت
الشال زين ورشيت عطر گلت ارتب وجهي
اخلي مكياجي مسكارا على حمره لون خفيف
خزرني وجر ايدي وطلعني بسرعة من البيت بدون
ما ينطي خبر لأي شخص صعدت بسيارتو
شغلها واول ما تحركنا باع على وجهيّ ضحك وگال
بيرغ : قبل فترة امي گالت رحت على شيخ يختم
على ماي بالقران تگول خليت مرتك تشربه حتى
تخليك سعيد مرتاح انا هم كيفت گلت اليوم
للصبح انا والمربربة ، اجيت عليچ متحمس
لزمتيني ودگيتيني ذيچ الكتلة الزينة .
ملِكه : تلوگ الوجهك ، هاي اهانة للرتب .
بيرغ : ههههههه هو انتِ خليتي رتب
رحت على امي صحت بيها يمه هاي ساحرتها
محبة ودگتني لو ما ساحرتها شتسوي تذبحني .
ملِكه : ههههههه ايعععع شگد مكروه .
مد ايدو گرصني من رجلي خلاني ازاگط
وصف السيارة وبعدني افرك برجلي
افتر فتح السيارة ولزم ايدي ما يهدها
دخلني مطعم مرتب شكلو من الداخل والخارج
وروائح الأكل تفتح النفس ، والناس گاعدين كل
طاولة بيها عائلة مبين المطعم عائلي
بيرغ : هذا المنيو اطلبي شنو على بالچ
اشري واختاري وأمريني بنت الزينين .
فتحت المنيو اتفرج وريحة الگص دخلت خشمي
بلعت ريگي وصفنت على شيش مال گص
صح ابوية چان مايقصر ويانا بس ابد ما نطلع
مطاعم هوَ يشتري الأكل من يصير عنده ويجيبه
للبيت ، بقيت ساكته منحرجة حسيت عيب اطلب
بيرغ : ها عجبچ شي ؟
_ اطلب على ذوقك .
_ انتِ ذوقي افديچ من الجدم للراس .
فكيت حلگي خجلانة من العالم مصدومة من جرأتو
_ والله اموت بدمي لا تحچي هيچ جدام العالم عفية .
_ يولون انا عيوني وكل تركيزي بيچ شگد حلوة
شفتچ والله تسحن الروح اغدي فدوة يابه تكتلين .
دنجت راسي ما متحمله ضحك صحت بي
_ اريد گص اطلب حتى ناكل ونطلع بسرعة .
رفع ايدو طلب ودقايق نزلوا الأكل مرتب
من نظراتو حتى لگمتي ما تنبلع وعيونو
راحت بگد ما يباع على عالم يخاف احد
يباع علينا ما يقبل ساحلتو الغيرة .
اول ما كملت ردت اروح اغسل جر ايدي رجعني
_ لا تتمشين جدام العالم ومحمد روحي تروح
دخيل الله ودخيلچ اگعدي يتهزهز جسمچ من تمشين .
گعدت وعضيت اصبعي همست بعصبية
_ هوَ شنوووو اتهزهز عصبتني .
_ مدور طري متروس فديتوووو .
_ اذا ما اطلگك يا ما تستحي .
دفع الحساب والضحكة ما فارگت مبسمو
وسنونو واضحات نظيفات لونهم ابيض
ومن لزمني عطرو ثبت بيدي بگد ما طيب
وگف عدل ملابسو ويمشي شخصيتو
هيبة بارز حضورو ومبين ذاك هوَ عسكري
اخذ ايدي بين ايدو ، وحرمة باوعت علينا
ابتسمت بوجهي ابتسمت وطلعت بكل هدوء .
حرك السيارة فاتح الشبابيك والهوا يلعب
لعب بالسيارة ، وگفني جدام محل چبير
_ شنسوي هنا .
_ اخذي حلويات اي شي تحبي
الثلاجة مالتچ فارغة فوك قابل ما
تجوعين تشتهين حلويات بليل واخاف
اما ملتحق هل يومين حتى عندچ اشياء تاكليهن .
نزل قبل لا ارد اخذ سلة صغيرة وهمس
_ امشي مقابيلي عيوني .
رحت امشي هوَ يختار واني من يعجبني
فد نستلة او شي معين اخذ قطعة واخليها
النص الطريق من اخذت نساتل بعد التفتت
اخليها انتبهت وگفت ادحگ على سلة
من كل وحدة اخذتها اكو ست قطع
_ هاي ليش ؟
_ شنو وحدة مجديه مني لعبي بخيري .
_ العب بشنو تفضلت .
_ لعبي بخيري ، بخير زلمتچ .
رمقتو بنظرة انزعاج وضحكت على غمزتو
ورجع على نفّس النستله اخذ بعد منها
بيرغ : اكليهن زين حتى تربربين بعد فديت الطري .
هزيت ايدي وگفت احچي وياه ما تحملت
_ اكلك روغان .
_ يولووووو .
_ اقصد برغي .
_ ملِكه البربوئه .
_ اني لو منك على هاي الرزايل واكرهك
وما احبك ووو وووو طلعت روحك المفروض
هسة طالعة روحك مني ولازمني وكاتلني .
لزم ايدي وهوَ يمشي يحاوبني
بيرغ : هاي يا طويلة العمر ان شاء الله
بس تحبيني وتذوبين بيه وبجمالي وبالرتب
هنا اثگل واخذ بثاري منچ ومن كلامچ الغثيث
اخاف هسة اضربچ وتكرهيني عبن بربوئه .
دفع الحساب وگفت على صفحة صاروا
اربع علاليك مليانات بس وحدة منهم فصلها
صعدنا اخذ إيدي وهمس بخفوت وعيونو شو حلوة
_ عليچ بداعت ابوچ محتاجة بعد شي ؟
_ لا والله اشتريت كلشي نفسي بي .
_ زين عليچ بداعت امچ شبعتي ؟
_ اي والله شبعت شكراً .
_ تأمرين أمر والله .
ابتسمت ومن حرك السيارة اخذت ايدي من ايده
بيرغ : حتى من انزل من الواحب نروح
انا وياچ ان شاء الله للسوك اخاف محتاجة شي .
_ وشوكت اروح على اهلي ؟
_ هل فترة اخذچ ، بس هسة والله محتاج تبقين يمي .
_ بس اشتاقيت اشوفهم .
_ تحمليني بس هل فترة .
_ اوف ياربي .
التزم الصمت الى ان نزلنا نزل كلّ الأغراض
وخلاهم بغرفتنا ورجع نزل اخذ العلاگة الثانية
ودخل على غرفة ميمونة گعد يمها گرص خدها
_ شلونها اكتئاب؟
_ هاي ملِكه رعصه علمتك مو ؟
_ هههههههه اي هيَ خلتها بحلگي
دوم من اسألها عنچ تگلي ميمونة اكتئاب زينة .
اريد اصعد نزل وارث هز الدرج هز بنزلتو
جفلت ورجعت ليورا وعلى صوت طلع بيرغ
_ وين رايح واررررث ؟
وارث : بعد ماعندي صبر رايح لبغداد .
مُـرجانـة ..
مر اليوم وانا خاتله بفراشي ما تحركت
شگد اضوج من نفسي دوم الفرح ما يدوم
عندي اول ما ابلش اضحك انكفخ ، امي ما عافتني
والله لو ما امي ونقش اسوي بروحي شي من القهر
كل يوم ادعي وارث مو مثل ما گال هذا المجرم
كل لحظة افكر اتنازل وما اخذ بكلامهم واروح اسمع
صوته بس بعدين اخاف واتراجع ما اريد اتورط
شسوي بروحي اذا طلع كلام هذا الحيون صح ياربي .
رحت على حمام سمعت صوت ضـلـيل عدنا
اليوم من الصبح وصل وابد ما نزلت وحتى
ما سلمت ، بس اليوم قليل شفت اخواتي
ملتهيات وياه بس بين فترة والثانية
امي ونقش يصعدون يشوفوني
ومرات امي تتوسل بيه حتى انزل
بس ما اتحمل اشوفه موجود ما اطيقه .
فزيت وردت اوگع من الچرباية من فاتت
نقش تضرب على خدها خايفة خلت
ايدها على صدرها تلتقط انفاسها وايدها
الثانية اشرت على باب تلهث لأن صعدت سريع
_ اجه وارث استقبله عمي ضـلـيل وارث بالبيت .
صعدت امي لازمة بطنها واشرت عليه
غـاليـة : مايقبل يحچي شي يريد يصير
الكلام مقابيلها لبسيها وخليها تنزل فدوة .
ماقبلت بگد ما خايفة وگلبي يدگ سريع
لبست تراك واخذت شال وحتى ما رتبت
وجهي طلعر ونقش تركض وراي ترش عطر
وگفت تخصرت وصحت بيها
_ شبيچ قابل ريحتي مو طيبة .
_ لچ حتى من تفوتين ريحتچ تهفهف عليه .
ضحكت امي من جوه وصاحتني وهي تهمس
_ لچ تعالي لا يتذابحون خلي نفوت .
مُـرجانـة : ماما شبي گلبي يدگ سريع وبطني مغصتني .
_ هذا الحب يمه هيچ يسوي .
_ لا يولي زعلانة منه ما احبة .
_ ليش زعلانة منه مسوي شي مزعلچ ؟
_ والله ما ادري ، بس يمكن ما مسوي .
من عيطت ضـلـيل طخلنا هو من شافني
وگف على حيله عيونه فتحها على وسعها
وكأن ضـلـيل وامي مختفين بس اني موجودة
_ مرجانة شلونچ .
ضـلـيل : شلونها يعني زينة بعز الخيرر
بچال اهلها معززه مكرمة شايليها بعيونه .
ضغط على اعصابه من قبض ايده
واني حتى ما رديت بعد سكتت
ولزمت ايد امي وگعدت وهوَ اكلني بعيونه
بلعت ريگي ونزلت راسي ارجف رجلي اطگ
وحده بالثانية تحمحم وطلع ملفات اوراق
من جنطة لون اسود ، واكو جنطة ثانية
لون نيلي قدم الأورآق فايل بيد ضـلـيل .
وارث : هاي الوكالة مآل اراضي عابد الله يرحمة
حولوها بأسمي ام مُـرجانـة وابوية قبل لا
ينطيكم عمره بموافقتكم واليوم بموافقتي
اريد ننهي هل وكالة وما اريدها وخسارة
المعمل اللي بنيته على اراضي عابد بموافقتكم
انا ادفعها ما اريد منك شي ، رجعوا انتوا
المسؤولين الوحيدين عن هل اراضي
انا ما احتاجهن وما اريدهن ابد .
وقدم ملف ثاني بيد امي وجر الجنطة
فتحها مقابيل الكل وبكل جدية يحچي وياهم
_ هذا ملف الحسابات من بداية استلامي لهل يوم
وطلع هل مبلغ وقدره ***** وچان المبلغ امانة
برگبتي وانا احتفظت بي لأن ام مُـرجانـة طلبت
مني اكون مسؤول عن هل اراضي واحافظ
على مال اليتيم قبل لا اعرف مُـرجانـة قبل
ست او خمس سنوات تقريباً .
دگ صدره مقهور من عدنا وبكل وضوح عاتبنا
_ انا ما احتاج اراضي عابد حتى اربح فلوسها
واكل حقكم لا وبدر الهواشم بعمري ما فكرت بيها
عيوني مليانة واگدر بتعبي اشتري مثل اراضي
عابد اثنين وابني نفس المعامل بيهن واطور الشغل
اكثر واكثر انا ما مستفاد من اراضي عابد
هذا بس استثمار بنيت بي معاملنا اخذوها .
ذبت امي الفايل على صفحة وجاوبته
_ بس اني اريدك تظل انتَ اديرها
وما اريد انهي هل وكالة .
خزرها عمي ضـلـيل مو راضي ابد على كلامها
وارث : اعذرينيكبر الموضوع وصار بيها اتهامات
انا طمعان بمرجانة والله على ورث ابوها
وانتوا تصدگون وهي مع كل الأسف مقتنعة
ونهت كل التواصل بيناتنا ، انا كلشي
اتقبل منكم بس دام اتهامات باطلة
تصدگوها عذروني لهنا حدي وياكم بهل امانة .
وگف بهضم دگ رجله وگف
_ انتظركم برا حتى ننهي هل وكالة رسمي .
غـاليـة : انتظر اعصابك خلي نتفاهم .
وارث : شيخة غـاليـة الله شاهد انا تعبان
الصار مو قليل انذليت بيها والله انذليت
ابتليت وحبيت وحدة من عدكم طلعتوها من عيني .
ضـلـيل : كملت باقي اللي اتفقنا عليه .
وارث : ماعندك شي يمي وانا ما مجبور
ابرر افعال ما مسويها، صعبة اخليك
تلتقي بزهرة هل شي خارج عن طاقتي
بنت العالم شگول الها تعالي حلفي
بين الشيوخ ما متزوجتني كارثة هاي .
دار عليَّ وصار قريب رفعت راسي عليه
وهوَ يحچي محروگ گلبه يرجف رجف
وارث : هيَّ تعرف زين ماعندي ميانه
انا وزهرة حتى توصل مواصيل اطلب
مثل هيچ طلب صعب عليه، مُـرجانـة
تقبلين اروح على زهرة احچي تحچي
وياچ تقبلين اروح عليها واطلب منها هيچ طلب ؟
بقيت صافنه بعيونه ضايعة ومقهورة
انوب هاجت الغيرة عندي وگلبي خفق
غـاليـة : ضـلـيل بلا أمر عليك عندي كلام وياك .
ضـلـيل : بعدين .
_ لا هسة ضروري بخصوص الوكالة .
_ بعدين يعني بعدين .
_ ياربي دا اگول ضروري والله ضروري .
اسغفر وراح وياها خازرها ومستعجل
يريدها بسرعة تحچي طلعوا تمشي
على غرفتها وهوَ جر ايدها لزمت ايده
وهمست : لا يسمع .
گعد وغرز عيونه عليَّ حتى ما رمش بعد
واني اعصر بيدي والزم برجلي ترجف استحيت
_ نايمة عيونچ مبين جنتي نايمة .
_ اي .
_ وانا والحسين اليوم الرابع ما نايم
غير ساعة وحدة كل الأيام الفاتت لوعتيني .
صفنت بعيونه تعبان وشگد احب من ترجف
شفايفة من يباوع عليَّ بقيت صافنه عليهم
وارث : سلبتي حيلي مُـرجانـة مهضوم من عندچ .
احتاريت وين اخلي وجهي منه ومحتارة
بين اصدگ كلامة لو اصدگ كلامهم
بس بداخلي احساس يرغب وارث
وبودي بس اصفن بوجهه ، ارتعبت
من سحل ايدي عصرها بيده وگعدني على
رجله اللي جانت تنهز بشكل واضح يصبر روحه
وارث : تريديني لو لا حاچيني حتى اعرف اتصرف ؟
نزل نظراته على شفايفي منتظر جوابي
جسمي بعد ما احس بي من شميت عطره
وعيوني راحت على رگبته ، طردت هل افكار
من عقلي مو راضية على تفكيري المنحرف
بللت شفايفي جف ريگي ، تلمست ايده
حاضنه خصري وهمست بخجل
_ وجعتني ، اريد اروح .
غمض حيل غمض وسحب نفس وصار يجر
نفس ويذب حسرة اكثر من مرة فتح عيونه
صايرة قطعة دم وذبلانات الى درجة
وارث : بعد ما أكدر اريد ابوسهن تحملت هواي .
هزيت راسي سحب ايدي اثنينهم خلف ظهري
وارث : اريد اطفي نار گلبي بيچ .
نطق بيها واحس بروحي رفعني من رجله
وگعدني بمكانه نزل جسمه على مستواي
مثبت وجهي واخذ شفايفي يتفنن بالبوسة .
مر وقت طويل ما يفصلها انگطعت أنفاسي وبعده
دمعت عيوني متأذية حيل ودفعته من صدره
اول ما فصلها لزمت شفايفي وبزعل عاتبته
_ شبيك وارث .
حط شفايفه على رگبتي سرت رعشة بكامل
جسمي واول ما فصلها باس راسي وابتسم
_ وهاي بوسة من منحرچ الشريف الطاهر .
انصدمت بي الى درجة نسيت اسد حلگي
باسني وهوَ يضحك على صدمتي وهمس
_ ويگولون ليش متخبل عليها عمي اتخبل
اجاهد واقاتل واصارع الدنيا والظروف
وحتى اذا يقنعوچ انا مو زين اخطفچ
اخذچ ما اعوفچ ما اتحمل اعيش بدونچ بعد .
اول ما انفتح الباب من غرفة امي
طفرت من عنده وصعدت فوك نقش
اول ما شافتني شهگت وگرصتني
_ عزززا هاي شمسوي بيچ .
_ شمسوي .
_ شفايفچ بيها دم .
_ جذابة .
_ شوفي بالمرايا ههههههه .
شفت روحي رحت غسلت وجهي
وفزيت من صعدت امي بقيت منزله
راسي اخاف تشوف وتعرف باسني
دخلت الغرفة گعدت على سريع گالت
_ صدك اتفقتوا على موعد حفلة الخطوبة والعرس ؟
مُـرجانـة : ها .
_ اتفقتوا .
_ لا .
_ شگد ملعب يگول اتفقنا اسبوع الجاي الخطبة
نهاية الشهر عرسنا وراح احجز سفرتنا .
نقش : وعمو ضـلـيل شنو گال .
_ اذا مُـرجانـة قابلة اني اقنع ضـلـيل .
_ ما اعرف يمه انتِ تعرفين اكثر مني
هوَ زين لو مو زين شنو رأيچ ؟
گعدت يمي لزمت ايدي وبكل هدوء فهمتني
غـاليـة : اني من زمان اختاريت وارث لمرجانة
بس هم يظل القرار قرارچ لأن هاي حياتچ .
قبل لا ارد صوت ضـلـيل رج البيت مثل الأنفجار
ارتعد گلبي نزلت امي تركض على درج واني وراها
أول ما وصلت شفتهم وارث واگف ثابت وضـلـيل
مقابيله وعيونه تبث شرار الغضب ، بيده التلفون
وأصابع إيده تعصر بالتلفون بكل غل وحقد
عبالك يريد يفجره الجو صار فوك المشحون
نظراتهم ما تتفسر احس حتى الهوى
صار ثگيل ، ومبين من السكون إللي يسبق
العاصفة صاير شي مو طبيعي قلبي دگ بجنون
وحلقي نشف يا رب مايكون الصاير مثل تفكيري .
يتبع …
الفصل التالي اضغط هنا
يتبع.. (رواية الموروث نصل حاد) اضغط على اسم الرواية لتجد الفهرس كاملاً بجميع الفصول.