رواية الموروث نصل حاد – الفصل الأول والثلاثون
♛ 31 ♛
مُـرجانـة: وين نروح .
غـاليـة: مستشفى يمه .
_ لالا گعدت گعدت ما اروح بس دخت .
_ خشمچ نزف يمه نروح نشوف شبيچ .
_ خفت وفقدت عوفيني يمه حبابة .
بقت تحاول وضليل ساكت بس مكتف ايده ويستمع
خفت حتى اشوفه بعد ، تالي امي ملت واشرت على شارع
_ خلي الرجال يفوت بعده منتظر بالشارع عيب .
_ انعل شيب اهلو كون اطلع اگضي بي التوبة .
_ ضـلـيل كافي عيب والله عيب منه مو صغير وتقلل
من احترامه لهل درجة الفضيعة ترا محد يقبلها .
ماعجبه كلامها واشر بيده يوگفها بمعنى اسكتي
ضـلـيل : ابن ساجر غلط وهل زواج غلط بغلط
وعنادچ هذا والملحه على ابن ساجر غلط
وانا بعد ما اتحملكم وراح اشهركم بالمنطقة
واخليكم عبره لمن لا يعتبر وحق هو الله ادگ
بيكم مواويل اخليكم تستحون تتنفسون بعد .
عدلت روحي ارد اگعد ضربتني دوخة رجعت راسي
واني اخذت ضـلـيل من ايده وطلع للگراج دقايق
ورجعت صاحت بنقش : روحي هناك راح يفوت وارث .
لزمت ايد امي قوي من دخل وهيَّ تمسح خشمي
من الدم وگف فوك راسي لون وجهه مخطوف
وايده ترجف راسه يصب عرگ بگد ما مقهورة
وارث : ليش ماتقبلين تروحين للمستشفى
غير نشوف شنو بيچ اخاف صار عندچ ضغط .
مُـرجانـة: ما .
وارث : شنو ما ؟
_ ما .
_ ام مُـرجانـة انتِ راضيه بعد النزيف ماتروح ؟
غـاليـة : ماتقبل بعد يبست راسها .
وارث : مو بكيفها لازم نروح مُـرجانـة كبري عقلچ .
رفعت نظراتي على وارث وامي راحت تذب
الكلينكس ، استغل الفرصة گعد قريب مني
قوس حاجبة من ضـلـيل استغفر بصوت عالي
ما اهتم واخذ ايدي بين ايده ومسح عليها
_ نروح للدكتور مو مستشفى تولي المستشفى
صدك تخوف ، بس الدكتور احسن ، وها سريع
ندخل يچيك وضعچ ونرجع ركض .
بقيت ثابتة نظراتي بعيونه وايده نار صايرة
عكس ايدي ثلچ صايرة مسح دموعي ويريد يطمني
_ ليش وگعتي بشنو حسيتي دوخة
وضحيلي شصار وياچ حتى افتهم ؟
مُـرجانـة: من الصوت العالي اتذكر ذكريات مو حلوة
وراسي ينمل عبالك ينضغط وعيوني تنگلب
بعد ما ادري شيصير بس جسمي كله يوجعني .
وارث : ذكريات مو حلوة ؟ مثل شنو ؟
مُـرجانـة : ما اگدر احچي .
ضـلـيل : ليش ما تگدرين ؟ زين ويه امچ تحچين ؟ .
مُـرجانـة : لاا .
وارث : چا امشي نروح للدكتور .
_ اريد انام .
_ من نرجع نامي ، عمي بالسيارة نامي .
_ لا هسة انام .
_ مُـرجانـة شبيچ صغيرة شلعتي گلبي .
وگف ضـلـيل طلع مـن الأستقبال
يحچي هو وامي بالمطبخ وارث نزل
نفسه باس راسي وتمسك اكثر بيدي
_ شصاير وياچ بعد عيونه وگلبه لوارث .
_ ليش تعاركتوا ؟
حچيتها ونزلت دموعي اكثر من الخوف
_ سوء فهم ليش ادوخين نفسچ وتخافين
وتتعبين ، مو إتفقت وياچ تخلين المشاكل عليَّّ
انا احلها انتِ اهتمي بنفسچ وبصحتچ ؟
سندت نفسي على تخم وساعدني انزل رجلي
تقرب اكثر ماكو بيني وبينه مسافة
مُـرجانـة: شنو شاف عمي ضـلـيل ؟
_ ناس سفله يريدون يخربونه.
_ وراح يخربونه عمي ضـلـيل كرهك .
_ لا مُـرجانـة وعلي فلا اعوفچ .
_ راح تمل والله تمل من مشاكلهم وتعوفني .
_ يا امل وحق القران ليل نهار افكر أتنازل
عن الأملاك واطمئن على اخواني كل واحد
ياخذ حقه واخذچ انتِ وامي ونعيش بعيد
على الدنيا كلها ، انا مو بحاجة هل أملاك .
صفنت بعيونه وابتسمت بقهر
مُـرجانـة: بس حرام عليك تعوف اخوانك يحبّوك .
وارث : انكسر ظهري مُـرجانـة وعلي طلعت روحي
المسؤولية كبرتني سـاجر حملني مسؤلية كسرني بيها .
خليت ايدي على ايده وهمست
_ انتَ والله سبع لا تنكسر .
_ عبالهم ساجر لحاله سلمني وبالساهل اخذت
أملاكه وحولهن بأسمي ريتني اگدر احچي واگلهم
شلون تحولن بأسمي وشنو شروطه وشلون جبرني
استلم هل املاك وشنو من اسرار ضميتها بگلبي
حتى احافظ عليهم وعلى املاكهم .
حضن وجهي باس خدي ونظراته تلمع طيبة واحتواء
وارث : مو وكتها هل سوالف ، مُـرجانـة بس اريد
تصيرين زينة حتى نتزوج بسرعة تعب گلبي .
مُـرجانـة: مو متفقين ما تگول تعبان ؟
_ ههههههه تمام اروحلچ فدوة بعلي بس
يمچ انسى كل الدنيا واضحك من كل گلبي
انظف واحن بشر قابلته بكل حياتي انتِ
صدك انتِ نسمة هوى باردة بوسط عواصف سامة .
رفع راسي حتى تثبت عيونه بعيوني
اني صفنت بعيونه وعيونه صفنت بشفايفي
وارث : ما باقي هواي على عرسنا راح اتمم الوعد
كله واقفل الشوارع ناوي على نيه اخلي
بت عابد ترفع راسها ، واحرگ واموت واشعل
النار بگلوب الحاقدين عليها وما يريدون زواجنا يتم .
اشرت على باب وبقهر رديت
_ بس عمي ضـلـيل بعد مـا .
وارث : اششش اششش مستعد اقنعه وعلي
اليوم ما اطلع واتحمله الخاطرچ حتى لو سبني
وسب اهلي حتى لو يضربني هم اصبر وأقنعه وافهمه
حتى اخذچ عوفيها عليَّ يا گلبي بس عوفيها عليَّ .
ملت راسي وعيوني دمعت من كلماته
وبكل لهفة توسلني من گلبه طلعت كلماته
وارث : عليچ الحسين تفتحين التلفون ومن
اخابرچ تجاوبين لا تشلعين گلبي بروح ابوچ
وعلي تعبان عودتيني انام على صوتچ وعفتيني
وقفلتي التلفون واليوم صدگ تعبان لازم انام نحلة .
مُـرجانـة: راح اصعد انام بين ما انتَ تحلها
ومن تروح بين ما توصل على بيتكم اخابرك .
_ احلفي تخابريني .
_ والله اخابرك والله .
سحبت نفسي وابتعدت من دخلت اني وضليل
وارث : صارت زينة ، بلا امر عليچ ام مُـرجانـة
صعديها تنام فوك ، شيخ ضـلـيل احتاج اخذ من
وكتك فد ساعة نتفاهم على صار .
اخذتني امي تصعدني سمعت وارث يگول
_ احتاج منك تحلف على قران وتنطيني قسم
عظيم وبراس بناتك ما يطلع حرف من كلامي
برا هل بيت بيت بعمرك كله ما تفضح سري .
ضـلـيل : انا لو منك ما انطي سري لعدوي .
وارث : انا اضطريت ولو تريد روحي ما أغليها
عندك بنت رايدها وگلتها قبل مشتريها بروحي
ومستعد اسوي كلشي واخذها من بيتك عروس .
هذا اخر كلام سمعته ودخلت الغرفة اول
ما فتت اخذتني نقش وامي نزلت مستعجلة
تريد تسمع باقي الكلام ما يفوتها ، ثواني
ورجعت نقش تعض اصبعها مقهورة
_ قفلوا الباب حتى ما نسمع اني وياچ
يا ويلي يا قهر سنيني وليلي .
مُـرجانـة: ليش عود ما يريدون نسمع ؟
نقش : سمعت وارث گال بعد ما يسمع عمو ضـلـيل
وامي كلامه راح يوافقون على زواجكم بس هذا السر
ما يريد انتِ بالذات تعرفي .
ضربت على صدري وصحت بيها
_ اني بالذات بكيفه هوووَ ؟
نقش : اي مو گال لأن مُـرجانـة فطيرة وراح تدخل
بيتي ومن اول موقف ينباگ لسانها وتكت
الأسرار وناس هواي تروح بالرجلين
الظاهر الأسرار خطيرة مو شي عادي .
ضغطت على راسي وغفيت من الوجع
وگلبي مقبوض تمار ما يفارگ تفكيري
ولا احلامي صار كابوس بحياتي هوَ وشهاب .
ملِكه …
بعد ماراح وارث اخوانه كلهم اجتمعوا بالاستقبال
يتفقون بيناتهم يروحون للمضيف تابع لشيخ ضـلـيل
يتدخلون حتى مُـرجانـة تصير لوارث ، دخلت بيدي
الچاي نهض بيرغ من مكانه اخذ الصينية من ايدي
ومستمر بعده يحچي وياهم مندمج بالكلام .
مشيت بصفّ ميمونة گعدت أستمع للكلام
خابر بيرغ على وارث ماكو رد وهمام وسهم
وام وارث وام همام گاعدات هم يتفاهمن وياهم
بس الشيطانة عزلت روحها هيَّ وابنها الچلب
همام : إذا اخابره ما يجاوبني زعلان مني .
سَــهم : حتى انا ولا يقبل يحاچيني معاند ويايَّ .
بيرغ : هو افتهم موقفكم غلط كل ظنه تريدون
تعوفون البيت لأن طرد شهاب ما وضحت الصورة عدل .
ميمونة : هذا الصح كلكم صرتوا ضده من طرد
واحد مجرم ذبح دخيلة بنية صغيرة مالها ذنب
ولا تعرف أدافع عن نفسها شرحها وعيشها
بوهم اغتصاب .
همام : والله الخاطر بيرغ مو الخاطر شهاب
بس بيرغ موقفو صعب يا اسلام صعب .
ميمونة : بالله اسكت همام ، لا وتريدون تجبرون وارث
يدخله بوسط بيته والله شنو حالته مو زينة
ونجحتوا يا اخوته وارث انجبررر يبيت
واحد مثل شهاب بالبيت ، فوگاها وارث طلع من
البيت ولا واحد بيكم گال خطية اخونا
طلع عاف البيت الخاطرنا وطلع بگد
ما يخاف يخسرنا يحير شيسوي ويرضيكم .
سَــهم : بس وارث يوم بعد يوم يبعدنا منه
ويعاملنا معاملة الغربة والله يقهرني .
ميمونة : حتى مشاكله يخاف يدخلكم
بيها حتى لا تملون من عنده وتعرفونه
اتمنى يغزر ويوگف بعينكم ولا تصيرون
نسخة من ساجر تنكرون التعب والزينات .
عافتهم وراحت غرفتها ، بيرغ طلع برا البيت
وهمام وسهم طلعوا وراه ، عفت ام وارث وهمام
وحدهن وصعدت رتبت كل الغرفة واكياس الحلويات
تأخر الوقت وبيرغ ما رجع بين ، رحت اريد ادحگ
واكتشف وين صار لمحت باب ام بيرغ مفتوح قليل
وبيردها صينية بيها اكل توكل خلتها على رجل
شهاب حتى ياكل ومبين مصار زمان من گعد
عبرت الدرج وگفت بصف باب الحمام حتى استمع
واذا طلعوا اگول اريد اروح للحمام حتى ما افشل.
لفت انتباهي كلامها وحقدها وهيَّ تلقن بي
ام بيرغ : والله حقك مقهور يمه حسبي الله
على هذا ابن سكينة البصراوية بعهد ابوك
انتَ الكل بالكل انتَ صاحب هل اراضي كلها
وحدك تعبت بيهن وحدك درت اعمالهن
وابوك علمك على شغل ، بنفسي اكشف
لعبات هذا ابن البصراوية واكشف شلون
غسل عقل ابوك واخد كل الحلال بأسمو
شلون يأمن بي على حلالو وهوَ بعرف
وارث من الغيرة حقد على كل اخوانو
وانتَ واخوك اكثرهم يكرهكم .
تذكرت كلام ميمونة جانت تگول من تحجي
تلقن الكلام وتخلي ينحفر بالعقل ويتنفذ بأعمالها
مثل الشيطان توسوس الى ان تحقق مبتغاها
صلوات : انا لو منك اعمل عمايل بيهم
ما اخليهم يرتاحون ولا يتهنون ومثل
ما اخذ كل حقوقك اخذ كل حقوقى
اكسرو مثل ما كسرك لا تخلّي يتهنى .
اشتعلت اعصابي شعل واريد افوت
اشعلها واشعل عشيرتها ياربي
ولا تخاف الله هاي ، والله نار وشبت بصدري
فزيت ومشيت سريع من انفتح باب المطبخ
صار بيرغ مقابيلي اني دحگت بوجهه
كرهتو على كرهي الأم بيرغ اريد اخلي حرگت
گلبي هاي كلها بي اصبها بگلبو ، خزرته وصحت
_ هم اجيت ، هم رجعت .
قوس حاجبة طبگه مزعوج من طريقتي بالكلام
اول ما ردت اتحرك واصعد سحب ايدي وشمرني
على حايط انضربت براسي ردت اصرخ منعني
بيرغ : الله يعلم الى متى اصبر روحي عليچ
يمكن بيوم ما اگدر اضبط اعصابي والزمچ
اخليچ تنسين حروف اسمچ واهلچ امحي
ذاكرتچ وروح ابوي اناااااااا مخبل اناااااا
مخبل ملِكه اناااااا مخبل موووو بعقلي مخبل .
شد بكل قسوة على فكي يمرد بوجهي وكمل بكل غضب
بيرغ : عدتها اكثر من مرة حتى تتأكدين انا خبل
حتى بيوم ما افقد اعصابي والصوچ اسلوبچ
هذا الهمجي ما تلوميني لأن انا سبق وحذرت فهمتي ؟
دفعت ايده عني اريد ابتعد منه اكره حتى عطره
ما اتحمل اطول ثواني وادحگ بوجهه انفر
بيرغ : منو وياچ ؟
_ امك شيطانة بيرغ امك شيطانة .
_ احترمي نفسچ راح اكسر سنونچ .
خزرتو وبكل احتقار رديت :
_ ما احترم نفسي ، امك گاعدة تترس
براس اخوك شهاب على اخو وارث حتى
يخرب حياتو والله العظيم بس يرجع وارث
شكو شي سمعتو اخلي يعرفو .
بيرغ : شنو سمعتي ؟
خفت لا تسمع طلعت للگراج فتح السيارة
صعدت بمكان السايق ونزلت رجلي هوَ
صار مقابيلي بلشت احچي كلشي سمعتو
وهوَ كل كم ثانية يلتفت يدحگ على مطبخ
اذا احد موجود ويسمع كلامنا، اول ما كملت
هز راسو ونطق كلماتو بحدة منفعل صار يغلي
بيرغ : روحي نامي بغرفتچ وبعد ممنوع
تنزلين وتفترين بالبيت بليل ، وجهزي روحچ باچر
الصبح اوصلچ على بيت اهلچ اخلص منچ .
ما رديت ولا نطيت رد فعل بس نظراتنا تشابكت
لا هوَ گدر يرمش ولا انا غمضت بعد ، والصمت
سيد الموقف والمكان ظلام بهدوء والهوا عالي
اقترب اكثر اول ما لمس خصري ، گمزت مرعوبة
على حس امو العالي وهيَّ تبث سمها بصوت
حنون لطيف حنين وكأنها ملاك بس هي شيطانة
صلوات : ها يمه رجعت سوده بوجهي تعبناك .
ابتعد مني وراح عدها فات على مطبخ
جر چيس چان بيده اول ما رجع ، نزلت
وطبگت باب السيارة حيل التفت على سيارة
عض شفايفو السفلية متوعد مبين تعصب
بس تماسك بوجود امو الشريفة
صلوات : ليش تضربين الباب حيل يمه
ملِكه قابل بايگها السيارة مو مكسور ظهرو
من التعب ومتحمل عالم اشكال الوان سوده بوجهي
اذا تتكسر ما ينراد تصليح ، ما تفكرين بزلمتچ
وتگولين خطية خلي اريح بالو وحالو.
ترست ماي من البراد وشربت اشرت بيدها
فتحتهم اثنينهم وتأشر منا ومنا وتندب
صلوات : على اقل لو مجهزة اكل خطية
بدون اكل ينام ، هساع ما تريدين تخدمين
هل بيت على اقل اخدمي زلمتچ ما اريد منچ
شي بس عينچ على ابني لبي احتياجاته .
ضحكت بس بداخلي بركان مفجور ردت بس
ابلع كلامي اخلي ينام ببطني بس ما تحملت
ملِكه : لو تخافين صدگ على ابنچ ما تترسين
راس ولدچ حقد وسم على اخوهم الچبير
چان گلتي اخاف عليهم يتذابحون ويخسرون شبابهم .
فتحت عينها بحلقتها بكل حيلها واجتها
رجفت عصبية ومن جهه ثانية ابنها
احتقن بغضبو شاط بس لازم اكمل گلبي يشوغ عليها
ملِكه : اذا تخافين على ولدچ خافي من الله لا يضربچ
بيهم ويسودنچ مثل ما سودنتي ناس قبل
اصحي على روحچ قبل لا يفوت الأوان والله
يفجعچ بأغلى ما تملكين بولدچ .
قبل لا اكمل لزمت ملابسها من بدايتها لنهايتها
شگتها على طولها وگعت بالگاع ادگ على راسها
وتصيح بعالي صوتها ملخت صدرها بأظفرها
بيرغ يلزم بيها يريدها بس تسكت شهرتنا .
جمدت من دخل شهاب يلبس بالتيشيرت
وعيونو طلعت من مكانها من هول منظر امو
ولون بشرته تجرد صار ابيض طوخ يخوف
راح عدها لزمها هو وبيرغ وصوتو خشن
يقبض الگلب من ينطق ويصيح
شهاب: ياهووو وياچ حاچيني يمهههههه ؟
رفعت ايدها تأشر عليَّ اول ما دار نظراتو
تلهب غضب وحقد اول ما وگف على طولو
رجعت خطوات للخلف انضربت بالكاونتر
حسيت بهل ثانية رجلي مو بس صارت خيوط
لا حتى الخيوط تگطعت ، وشگد ما خايفة
من بيرغ لگيت روحي اطفر من شهاب واركض
احتمي ببيرغ واطلب حمايتو بدون ما انطق بحرف
سحبت ايدو وصار مواجهة هوَ وهذا المتوحش .
بيرغ : حدك مكانك هوب .
شهاب : شسوت وخبلتها خلتها تشگ ملااااااابسها ؟
اشتغلت ضوء البيت بالكامل واصواتهم
الواضح كلها صحت على أصواتنا العالية
ام وارث : خيرك يااا ياااا هاي شصاير بيچ صلوات .
فاتت ام همام من دحگت على ممثلة رجعت
على غرفتها جابت عباية من الباب تغطي بيها
وهاي تلطم وتملخ بروحها بكل حيلها تشيل
بجسمها ودگه بالگاع ردت اگضها املخها والله
تحملت هل ظلم والتمثيل وتهربت من بينهم
صعدت بعدني على درج وايدي حسيتها
طگت من ضغط بيرغ عليها ، سحلني
سحول غصب عني من ايدي اول
ما وصلت للغرفة دفر بابها گلبي
وگع من شمرني بلا رحمة بالگاع .
زحفت روحي الى ان انضربت بالچرباية
سحب الحزام من البنطلون يلف بي على ايدو
وكل ما يلتف يقترب خطوات بطيئة ويضرب
الحرام بالگاع يطلع صوت يرهب الگلب وترعدو
بيرغ : حذرتچ لو مـا حذرتچ ؟
طگ الحزام بالكنتور صرخت من الصوت
بس من الصوت واحس حيلي باد
وكل خطوة يخطيها وما اجاوب يرجع يضرب
بنفس القوة وبكل خطوة مكان ثاني يختلف
بيرغ : جاوبيني لا ارتكب بيچ جريمة .
ضغطت على روحي وشگد حاولت ما تنزل دموعي
بس بچبت مو خوف لا والله بچيت بلوعة اريد
اخلص منهم كاتمين انفاسب مو طايقتهم والله
ملِكه : صعب اتحملها ، استصعب اسكت على
حرمة هدمت بيوت ، وبعدها تمثل هيَّ زينة
واحنا ظالمين ، اكره امك هي تمثل تحبني
من انتَ موجود ، بس انا وراك ومقابيلك
ما اخاف اعترف ما كرهت بشر بگد ما اكره امك .
ضرب الچرباية ورايَّ وينكن چان قاصدني
بس تحركت بسرعة وصعدت على چرباية
من عصبيته بعد ما يستوعب صار يضرب
بشكل عشوائي بالمكان ويفلش بالأغراض
بضربته بالحزام الى ان ضربني على وجهي
بلا احساس لزمت وجهي ومن حلات روحي
شمرت جسمي بالگاع ارافس من الوجع .
ما اتفقد حالي استمر بالصياح والضرب
على أغراض وحتى مايعرف بنفسو ضربني
شگد امو حقيرة هو يحبها اضعاف
منظرها فقدو عقلو تماماً ، عكفت جسمي
اصرخ من ألم يفوق الوصف ما ينحمل ابد ما ينحمل .
طلع من الغرفة وقفل بابها ، أشكال الأصوات
سمعت والعركات ما اعرف بعد بين منو ومنو
كلها تتصايح وتتمالخ ، بقيت بمكاني بالساعتين
گاعدة بالگاع بين الچرباية وميز المجرات وجهي
نار ويشب حتى ما دحگت عليه ولا لمستو خايفة
رد فتح الباب خفت يضربني بعدو اعصاب
ويرعش ويسب بألفاظ ما سامعتها بحياتي .
ما تجرأت ارفع راسي وادحگ وين راح
بس فززني صوتو وهو ينادي بقمة اعصابو الغاضبة
بيرغ : لو اذبحچ هساع ما تبرد ناري لا ومحمد
ابرد ناري بيچ من باجر يجي ابوچ ويعرف
شلون بنتو ماعرف يرررررربيهاااااا .
بقيت على نفس الصمت راسي بين رجلي
وكلامو حز بداخلي جرح ينزف
بيرغ : خابرتووو باچر من الصبح يجي
واخلي بالصورة بنتووو ما تحب الستر
بنتووو مسترجلة لا محترمة روحها ويه
زلمتها ولا هي واهلو تتصافى رافعة هل خشم
علينااااا ليششش بت منووو انتِ ؟؟؟
شهگت وبچيت بصوت عالي غصب عني
بيرغ : اي ابچي على عرامتچ .
ملِكه : اخذني هسة على بيت اهلي لا تنتظر باجر .
_ اريد ابوچ يجي هين هووو ياخذچ
حتى ابلغووو ماعرف يررربي ماا عرف مع الأسف .
نشغت روحي تلوب من الوجع اون ومنا كلامة
وخوفي من رد فعل ابوية واهلي كلهم رهبت گلبي
مرت الساعة الثانية وجسمي تحطم تكسر من
الأرضية الناشفة عاط بصوت زرف اذني
واني بعدني مستمرة بين فترة
والثانية ابچي بعلو حسي
بيرغ : اريد انطمررر تعالي انطمري .
من بين دموعي جاوبته
_ اريد اهلي راح اموت اريدهم ما اريدكم .
تحرك يبدل يمكن افتر بالغرفة ورجع
على چرباية گلبي راد يوگف صبري
خلص الله يشهد صبري خلص ما اريد
اظل هين وياه بنفس المهجومة شسوي
بروحي اريد اخلص ياربي اريد اخلص
جرني من ايدي بلحظة شمرني على چرباية
مورت جسمي وگعدت نفس گعدتي بس
هل مرة على چرباية حاضنة روحي وعيوني
تحرگني بگد ما بچيت احسها انعمت
والشهگات گطعت صدري تگطع .
ملِكه : وديني على اهلي لا والله العظيم
بس تنام ابدل واشرد منك اريد اخلص .
بيرغ : بنت امچ وابوچ سويهاااااا حتى
اخليچ تعرفين الزلم شتسوووي بيچ
اخاف هسة تكرهيني من تسويها
اخليچ تكرهين طاري اسمي وحق خالق السموات
اشردچ انتِ واهلچ وعمامچ من بيوووووتكمممم .
فتح الشباك قليل حتى يطلع دخلت الچكاير
الغرفة من الدخان صارت ضباب ، رفعت وجهي
اجر كلينكس من الميز امسح بي خشمي
ورديت ودموعي ما وگفت بعد
ملِكه : الله لا يسامحك حسبي الله عليك .
بيرغ : بالله باجر ابوچ من يعرف بنتو تدعي
وتتحسب على زلمتها يرضى عادي عندو ؟
_ اي عادي عندو باجر ابوس ايدو ورجلو
حتى يخلصني منكم ينقذني من شركم .
اخذ وارد بالكلام وراسي مرفوع وكل ما تجي
عيونو على وجهي نبرة صوتو العالية تخف
بيرغ : ابقي نتري ارفعي صوتچ اكثر .
_ مو انتَ ما تفهم مجبورة ارفع صوتي .
_ ماعندچ تربية .
_ على اساس انتَ عندك .
فزيت من الخوف اول ما تقدم مبين شگد معصب
واعصابو ترجف يبعثر بشعر راسو ، غطيت وجهي
وراسي مد ايدو ورفع وجهي وعيونو مليانة قهر
_ يوجعچ وجهچ ؟
سحبت نفسي وعطت بي منهارة
_ لا تلزمني ايدك ما اريدها تلزمني ابد .
ابتعد كم خطوة يجر بشعره متوتر متلخبط وضعو
بيرغ : الله وحدو يعلم معزتچ بگلبي
وهوَ شاهد ما اريد اذيتچ وهاي الضربة
هسة بوچهچ لو ميت ولا شايفها بس انتَ .
ضحكت بقهر وامسح بدموعي واستمع
بيرغ : انا هم بشر وعندي قدرة تحمل .
ملِكه : لا تحاول تبرر ما اريدك بالحالتين
جنت زين لو انسان وحشي همجي هم ما اريدك
ما ارغبك بكل حالاتك وعلى اعصابي باقية وياك.
بيرغ : تجبريني الزم الحزام اگطعو عليچ
متعمدة والله تحبين الضرررررب خبلتيني
شسوووي وياچ فهميني شسوووي
شلووون اخلص منچ اررريد حل شلوون
اخلص منچ تقهررين بگلبي انتِ تمردين
بگلبي شسوي وأرضيچ وتحبيني
ملِكه : الحب مو اجباررري بيرررررغ
ما اطيقك موووو غصب اكرررهك مووو غصب .
بيرغ : ملِكه دخيل الله دخيل محمد كافي
تحرگين بگلبي كافي الله لا يسامحچ على
نار گلبي هاي دمرتيني وحق كل حرف
بالقران ما اعوفچ لو تموووتين ما اعوفچ .
غطيت وجهي رجعت انهاريت ضربت على وجهي
بعد دقايق وبكل حيلي وصوتي صرخت
ملِكه : اكرررررررهك والله العظيم وراس ابوية
كارهتك حرام عليك مخليني اعيش وياك والله
كرهت نفسي بسببك انتَ وامك .
بيرغ : اخذچ بيت وحدنا بعيد عنهم وتحبيني ؟
ملِكه : اكرهك .
_ يوووول ملِكه اريد حل بس انطيني حل .
_ الحل باجر اشرد منك وانتَ واهلي تصارع وياهم
حتى على اهلي ما اروح حتى ما يضربوني عمامي
ويرجعوني تحت رحمتك ، واذا ما گدرت اخلص على روحي .
رجع على حزام لف الحزام على ايدو ورجعلي
_ عيدي كلامچ ؟
_ عندي كلام جديد .
_ وحق القران افقد واموتچ وصلت حدها .
_ موتني لازم احچي وتعرف انتَ بلا كرامة
وهاي صراحة لان حرمة تگول اكرهك ما احبك
انساني عوفني يا ابن الناس اعتقني لوجه الله .
ضربني بيدو بخفه على راسي ويصيح بصوت
اعلى بأضعاف من صوتي بحيث صار يدودي بالغرفة
بيرغ : فهمي ااااااااحبچ اناااااا اااااحبچ تعبتيني
هو سهل فراگچ وما اعووووفچ وأخلّص منچ
هيَّ قابل سهلة وما اشمرچ واخلصصصص .
دفعني وطلع بگد ما بچيت راسي يريد يطگ
وجهي احسو منتفخ ما اگدر حتى اطخه ابد
نزلت راسي على مخدة وكل شهگه تطلع مني
تحز بصدري حز مثل السيف وتذبح بگلبي
غمضت عيوني الى ان غفيت واستسلمت
للوجع والكوابيس لا انا گاعدة مرتاحة
ولا من انام ارتاح هلكت من الخوف هلكت .
بعد ما عبرت الساعة 3 الفجر حسيت على باب
ينفتح بقيت على نفس نومتي ما تحركت
تقرب رفع لحاف وغطاني وراح ابتعد بس
اسمع طگ الجگارة وحركتو يروح بعيد
ويرجع يمي تفوح بقربو عطر الجگارة
وعطرو المألوف ، كورت روحي ورجعت
نمت اتهرب حتى من وجوده بنفس المكان .
الثاني يوم خلص الصبح وصار الظهر فزيت
من نومتي على امل اشوف اهلي وماكو
وگفت بتعب رحت للكنتور طلعت ملابسي
بدلت الغرفة ما اعرف شبيها باردة اعظامي
البرد آحس بعظامي ، جريت شالي اريد
اهلي على راسي وصلت للباب وانفتح
بابس بدلتو العسكرية والمفاتيح بيدو
مبين رايح باصم وراجع للبيت
ملِكه : وينهم اهلي ليش ما يجوني .
كمل طريقة يطلع بالمحفظة ويرد ببرود
بيرغ : اهلچ شعدهم يجون عليچ ؟
_ مو گلت خابرت ابووية حتى يجي يشوف تربيته
ويعرررف روحوو مايعرف ينطي تربية ليش بعدهم ماكو ؟
بيرغ : وانا من يمتى ادخل اهلي لو اهلچ
بمشاكلنا ، اذا حرمتي ماعدها تربية انا اربيها
ما ادخل اهلها بعد انتِ بعصمتي اهلچ مالهم شغل .
ماتحملت كلامو ولا طريقتو ولا مبالاه احرگني
هو صفير ثلج وانا نار مشتعلة مشيت وطلعت
من الغرفة اليوم وياه لو اموت ما اظل نزلت
الدرج ركض اركض بلا وعي بعد دخلت المطبخ
لگيت ميمونة تثرم زلاطة وام وارث تطبخ
وام همام تنظف بالخضرة على ميز الطعام
ملِكه : خالة ام وارث وارث وينوو ؟
شهگت ميمونة وگفت على طولها ضربت على صدرها
على شهگتها ام وارث التفتت من شافتني عاطت
ام وارث : طيح الله صبغك وسود وجهك
يا بيرغ يا ابن صلوووات على هاي الدگه
شمسوووووي بالبنية ولك شمسووووي .
بهتت خايفة بعدني ما شفت وجهي من القهر
ولا ببالي نسيتو احس بوجع بس نسيت
طلعت صلوات من غرفتها هي دحگت بوجهي
وعبالك عرست وانتصرت ضحگت بصوت
عالي جسمي من العصبية رجف عليها
ردت اهجم عليها بس دخلت وارث وگفتني
ومبين تعبان الى درجة وهاي وصلته من بغداد
بعده بالباب يباع بالوجوه وسألهم بحيرة
_ شصاير ؟ شبيكم جامدين ، يمه بيچ شي ؟
اول ما لمح وجهي نزل بيرغ على صوت
بكل هدوء رفع ايدو اسر على وجهي ونطق بتساؤل
وارث : هاي انتَ سويت بيها هيچ اجرمت بوجهه ؟
ام بيرغ : تجاسر على ام زلمتها وعلى زلمتها
عجل هيَّ متزوجه خرگه يلزمها ويموتها ومحد يلومو .
نزل وارث نظراته على بيرغ وبضحكه مصطنعه
والحزن ترس عيونه وصعب يمنع جسمه من رجفة الخوف
وارث : واضح من حال ايدك متندم .
كلها تحولت نظراتهم على ايد بيرغ من ضمنهم
انا الفضول دعني التفت ، ايدو ملفلفات اثنينهم
همام نزل وبصوت مسموع رد بدل بيرغ
_ ما متعمد يضربها .
وارث : وشبيها ايدو .
_ تملخت من كسر جام سيارتو البارحة بليل .
خربت فرحتها الشيطانة ومن فرحها تحولت
دموع ولطم ما تقبل على حال ابنها بس
بنات العالم عادي تتملخ وتنضرب تفرح
مسحت دموعي وبصوت مسموع طلبت
ملِكه : بداعت امك تگدر توصلني لبيت اهلي .
نظر نظرة سريعة على بيرغ وجاوبتي
وارث : روحي بدلي حتى اوصلچ .
طلع شهاب من الحمام سابح المنشفه على راسه
سحبها شمرها على درج وقبل لا اصعد خزرني
وراح على مطبخ الظاهر چاي يسمع
شهاب : بكيفك توصلهااا ؟ يمكن زلمتها مو راضي .
ماسمعت رد وارث على كلام شهاب بس دفعه
من طريقة وهوَ يصعد صاح على بيرغ
دخلت للغرفة وارث وبيرغ راحوا على غرفة وارث
طلعت عباتي البس بيها وبين دقيقة والثانية
استمع لصوتهم من يرتفع وتقربت من وارث گال
_ بيررررغ لا تگول عصبية وتجاوززز ووووو .
بيرغ : وارث صرت عصبي مو بعقلي
تعاند وما تحترررمني تعرف شنو حرمة ما تحترم .
وارث : لا تحچي هيچ هي الله خلقها هيچ عدها
بس لسان ماعدها قوة وانتَ خلقك قوي لازم
تصبرر عليهااا وعلى عصبيتها ولسانها
وتصرفاتها هاي اذا صدك تحبها
الرجال قوامون على النساااء بيررررغ مووو بالضرررب .
بيرغ : والله وارث داست بمصاريني فقدت .
_ يا اخي ما تتحملهااا ماعندك صبررر ايدك
اكسررهاا تعرف شنو تكسرها ولا ترفعها
على حرمة بيوم من الأيام ما تگدر تكسرها
رجع حرمتك على بيت اهلها محد جابرك
عليهاااا منو جبرك تتحملها رجعها بيش
ضاربها هيچ على وجهه تقبلها على اختك ؟
بيرغ : گلبي جابرني وانتَ تعرف شگد اعزهاا .
وارث : جاوبني تقبلهاااا على اختك ؟
_ لا ما اقبلها ولا اقبلها على حرمتي والله .
وارث : ملِكه اخيتي حالها حال ميمونة
وما ارضى عليها اوصلها على اهلها
وانتَ مابيدي شي عليك هي بس ايدك
والصار بيها وفراگها كافي عليك .
بيرغ : وارث ابوها گال اذا بنتي تجي زعلانة ما ارجعها .
وارث : والبنية ما تقبل تظل عندك .
بيرغ : سوي شي ما اريدها تررروح .
مشيت على مرايا صابني فضول اول مالمحت
وجهي گعدت على چرباية رجلي ما تشيلني
الضربة صايرة على طول وجهي وحتى عيوني
صايرة زراگ تخوف ومنتفخات غطيت وجهي
وبچيت بكل حيلي مقهورة على صوتي فات
حسيت بي جر ايدي عيونه تلمع فزيت
من عرفتو گاعد ثاني رجلو مقابيلي
ملِكه : هاي انتَ شمسوي بوجهي ؟
بيرغ : حقچ عليَّ ما متعمد بس غلطان
انتِ شنو تفصلين وتأمرين انا جاهز .
زحفت روحي بالجهة المعاكسة للچرباية
نزلت منها وطلعت مستعجلة رحت
على غرفة وارث ماكو نزلت على صوتو
يتجادل هو وام بيرغ وحسب ما سمعت يگول
وارث : لا تفرحين لا عبالچ هذا الوضع يدوم
راح ارجعچ على نظام القديم بس افرغ هل فترة
مشغول بعررررسي ، افرغ واجيبها وارجع اعيد
تكوين الهدوء مالتچ اصگرچ صگر بس اصبريلي .
ام بيرغ : سامعه ابنچ عينة سكينة لو ما تسمعين ؟
وارث : تسمع ليش ما تسمع ، وهذا البيت مسويته
يا طالع يا طاب انتِ وربعچ هذا انتهى انباع هذا
البيت باح بعد ماكو خلف وربع خلف انتهوا من قاموسي .
ام بيرغ : اي طبعاً الفلوس عندك حلال ولدنا
كلها بيدك يا ابن سكينة وتلعب بيهن تشتري
وتبيع بمزاجك وتمشي اخوتك زلم مشوربين
بأمرك وعلى مرام عقلك ، وبعد كم يوم تزوج
هل زعطوطه وهم تخليها تحل وتربط بكيفها .
وارث : هههههههه عود تحركيهمممم عليَّ
هذا الحچي صار قديم صلوات العبي غيرها
الحلال حلالي وانتِ تعرفين بعد منو عنده
حق ومنو الوريث الحقيقي ومنو ابن ساجر
ومنو نسبه ما معروف و.
تكهربت وطلع شهاب مبدل وگف هو وارث طول بطول
شهاب : صوتك لا يرتفع بوجهه امي .
وارث : ايباه .
شهاب : لا تخليني افگس بيك وبعافيتك .
وارث : دير بالك لا تفش مو نفختك وطيرتك علينا
دير بالك بس ابزك اطگطگك .
رفع وارث اصبعو بكل صرامة وحده صاح بيهم يبلغهم
وارث : هذا البيت نباع راح ننتقل بيت ثاني
بعدني اجهز بي من اتزوج اسلمكم المفتاح
بوقت سفري كل واحد ينقل اغراضه هو وامه .
شهاب : كل عقلك مصدگ اخليك تتزوجهااااا ؟
ضحك وارث بصوت عالي ونهاها بأبتسامة مستفزه
وارث : بيرغ شاف البيت واختار سويت خاص بي
وبزوجته ، وهمام اختار غرف امه واخته وغرفته
وسهم اختار مكانه ، امي بالصدارة غرفتها جهزت
تظل صلوات وهاي لعيون بيرغ اتقبلها واخذتي
مشتمل بصف بيتنا حتى تاخذين راحتچ بي.
ام بيرغ : وشهااااااااب شنوووو ماعنده حق عدكم .
وارث : هههههههه مو من عدنا شهابچ مو من عدنا .
ام ببرغ : يعيش بالمشتمل ويايه دام المشتمل معزول
وحسبي الله ونعم الوكيل عليك ما تتهنى بالبيت
كون لا انتِ ولا امك ولا كل واحد يرضى على افعالك ببنا.
راحت تفووور تفور على غرفتها وهو مبتسم صاح
وارث : تخافين على ابن الغالي هههههههه
خلي عندچ ، خطية مفلس ماعنده مغدور
بعد ما ساجر جرده من كل أملاكه .
ام بيرغ : هو منو تعب بالأراضي غير شهاب .
وارث : اذا على تعبّ ابنچ بشغل الأراضي
اعتبرهن ابوية حق التربية والصرف
والأكل والشرب والمصاريف اكمل لو اخليهااا استوب .
شهاب : انطممممم وارث .
_ هاي لعيونك انطميت يا عار يا ابن العار
ام وارث : وارررررث ابووووك عااااااار
استحي وخاف ربك الزلمة ميت ولك ميت .
ظل وارث مبتسم بكل استفزاز متعمد
يحرگ اعصاب شهاب ونجح ، دخل
على مطبخ طلع بطل ماي وتلفونو
رن تخربط وضعو وذب الماي ورد بسرعة
_ لحظة ثواني ابقي على خط .
جر بطل ماي ثاني ما مفتوح واول ما صعد همست
_ توصلني مو ؟
وارث : اي تدللين بس انام ساعتين عيوني طفت .
هزيت راسي بالقبول خطية مبين عيونه
مصبوغة دم صايرة من النعاس
بعده بنص الدرج وصاحت بي امو
_ ماتريد تاكل الأكل جاهز .
وارث : تغديت انا وشيخ ضـلـيل قبل لا ارجع .
خلاهم تحت تأثير الصدمة عيونهم نطت
ما مستوعبين الحواب ابد ما مستوعبين
حتى امو جمدت وفتحت حلگها ، وشهاب
وجهه يذب الوان التفت على ام بيرغ واشر على درج
_ هذا راح يخبلني راح اجررررم بي .
ترك البيت وطلع واني ركضت صعدت فوك
انتظر وارث شوكت يگعد حتى يوصلني
لگيت بيرغ نايم على چرباية صدره مكشوف
الغرفة هدوء إنارتها الوحيدة ضوء الشمس
داخل بشكل طفيف من البردات ، وكسر هل
هدوء صوت رسالة على تلفون بيرغ
تجرأت تقربت رفعت التلفون قرأت
اول اسطر من الرسالة جسمي تصلب
وقشعريرة سرت بكامل جسمي
متت بهل دقيقة ألف موته .
اريد اكمل الرسالة عيوني غوشت وكأني
وگعت بحوض ماي ثلچ مو گادره اطلع
رفعت عيوني صفنت بوجهه ودموعي
تتسابق على خدي ، نفسي تگطع
رفعت راسي وهزيت راسي اهمس
بيني وبين روحي مثل المخبلة
_ لا يا ربي لااا مو وكتها اريد ابتعد
منه اريد اعوفه هاي المصيبة منين طلعت
هسة شلون اگدر اخلي ما اتخيل ياربي
بيرغ معقولة بيرغ بي ” مرض السرطان ” .
مُـرجانـة …
اول ما گعدت شفت الساعة غسلت وبدلت
وتعطرت عبالك راح يشوفني ختلت بفراشي
وخابرته اشتاقيت أخابره طگ گلبي على مكالماتنا
اول ما فتح خط وسلم سمعت صوت امه وصوته
_ ماتريد تاكل الأكل جاهز .
وارث : تغديت انا وشيخ ضـلـيل قبل لا ارجع .
مُـرجانـة: شگد جذاب عززززا .
ضحك بصوت عالي وسمعت الباب ينسد
رجعت شعري انفرش على مخدة من غلق
المكالمة واتصل فديو هاي ثاني مرة يسويها
احس بگلبي يريد يطلع من صدري اول
ما رد شفت شكله ابتسمت على ابتسامته
وهوَّ مثلي نايم على مخدة ، بقيت ارمش
بعبوني حتى الكلام ضاع مني وتهت بنظراته
وارث : هسة گعدتي ؟
_ اممممم .
_ اريد انام ، شنو هل عيون عبالك بزون .
غطيت وجهي وضحكت على ضحكته
مُـرجانـة : ها وارث اذا تخجلني اطفي المكالمة .
_ اتحمل هسة بس من تجين يمي
هم اطفين المكالمة هههههه ؟
_ اطفر منك وارجع البيت امي .
_ ههههههه ياهو يهدچ بعد هسة بس تعالي .
رفعت ايدي تعلمت كلماته وصارت بحلگي
مُـرجانـة: يلة طس ونام لا اطبش وجهك .
_ البوسة فد طيبة ، فد ترد الروح .
هو حچاها نزلت الكاميرا على فراش ما متحمله
كلامه والضحكه شگت حلگي وهو يضحك وبعده
مستمر يخجل بيه ويحچي منطلق بالكلام
وارث : هاي اول مرة ابوسهن بس ما تهنيت
طلعتيها من عيني من تخربطتي وهذا عمچ
يطير الفرحة من الواحد غصب .
تحمحم من ما رفعت التلفون وبعدين صاح
_ راح اغير الموضوع بعد انتِ مو مقابيلي
ما اگدر عليچ راح اسكت تعالي يلة .
رفعت المكالمة ابتسم وكمل كلامه
_ يلة استقريت صارت خدودج ورديات
والخشم انصبغ وردي ارتاحت نفسيتي .
_ عرفتك صار ساعة تخجل بيه علمودهم .
دخلت نقش اشرت بيدها ما اهتم واكمل كلامي
وراحت اطلع لنفسها ملابس تريد تسبح ركزت وياه
وارث : بعد اسبوع خطبتنا مُـرجانـة جهزي نفسچ .
_ ليش ما نتزوج بسرعة بدون خطوبة .
لم شفايفة يعض بيهم وحط ايده على وجهه
ونقش وگعت بالگاع مدت رجلها عبالي تخربطت
ملخت خدودها وعضت اصبعها وهمست
_ يا خزتنا يا شهرتنا ام دودة .
مُـرجانـة: شكو حجيت نكته غير اخاف من المشاكل .
وارث : يا مشاكل عيوني انتِ تريديني .
_ واررررث راح ازعل واطنگرررر منك والله .
_ اخاف من زعلچ .
_ اي والله اغلق التلفون وبعد ما اخليك تنام .
_ التهديد اذا يشد حيله يجلطني بمكاني .
ظنيت خاف مني صدك كملت تهديدي
مُـرجانـة : بعد عندي تهديدات بس اخاف عليك .
_ لا دخيلچ خليني اعرس اريد اتزوج .
_ دنام بالبداية نام ما تستحي .
زحفت نقش وهي تتوعد وراح للحمام
هزيت ايدي وهو جر المخدة عدل التلفون
وحضن المخده الثانية وصفن بوجهي
وارث : يلة سولفيلي شنو سويتي الفترة الفاتت ؟
استغليتها فرصة جريت الملابس من السلة
طشرتهن على چربايتي وقفلت باب الغرفة
سندت التلفون على باكيت الكلينكس مقابيلي
على ميز وگعدت اعدل بالملابس واحچي بكل هدوء
مُـرجانـة : بعد ما رجعنا من العقد قفلت تلفوني
گلت افكر ما استعجل وهم تعرف يعني مرات
اني ما اعرف اخذ قراري وحدي لازم امي
واختي يفكرون ويايَّ ، بقيت كله بغرفتي
مرات انزل لأن ضـلـيل عدنا هل يومين
متصالحين هو وامي الظاهر، وما حبيت
انزل بعد قليل انزل ومن اجه اخر مرة مشتري
سوارات على عددنا اني ما قبلت اخذ السوار
ما اريد البس شي يذكرني بي ، وامي حسيتها
زعلت بس بعدين گالت هل شي براحتچ .
خليت وجبة مال ملابس بالكنتور وحسيت فحطت
اخذت من الثلاجة عصير ونستلة اكلت قليل وكملت
_ اگلك اريد البس فستان قصير بالخطبة
وبالعرس البدلة بوف كبيرة واريد شعري مفتوح
صدك تذكرت اشتريت الغرفة اللي دزيتلي صورتها
وعجبتني لو هاي الثانية اخذتها اني اريد هاي
لونها رصاصي وخشبي عجبتني ما احب لون ابيض .
قبل لا التفت على تلفون عرفت نام جريت
التلفون لأن شكله يفتح النفس وهوَ نايم
شمرت روحي على چربايتي فوك الملابس
صافنه ذيچ الصفونه بوجهه بست الشاشة
من تعبت من الصفنات ورجعت التلفون
على كلينكس وكملت ترتيب الملابس .
بس كملت سديت باب الغرفة ونزلت على سكيت
البيت هدوء صبيت اكل وقبل لا اصعد رادت
الصينية توگع من ايدي من طلع ضـلـيل من الحمام
ضـلـيل : شلون صرتي ؟
_ رتبت الملابس وغسلت وجهي .
رفع حاجبة مستغرب وگلبي تحول دمام
حسيته يريد راح يوگف وايدي جمدت رجع سألني
_ هم رجع خشمچ طگ دم ؟
_ گعدت جوعانة راح اكل زينة اني زينة .
طفرت فوك من امي طلعت التفت عليها وهي تضحك
على چفصاتي والله يخوف والقران ما اتحمل اوگف
مقابيله واجاوب آلكلام والأحرف تصيع ضياع رسمي
رجعت للغرفة وقبل لا افوت سحلتني نقش
نقش : ولچ ما تستحين شلون تگولين زواج بدون خطبة .
مُـرجانـة : هسة شكو خطبة ولعبان روح
هو زواج وابوچ الله يرحمة .
خليت الصينية على ميز بگد ما عتتني
نقش : شوف عل لسان شطوله قبل شوية نبلع .
مُـرجانـة : طبعاً ينبلع عمچ عبالك وحش ايع
امي ما اعرف شلون متحملته الله يساعدها .
اخذت الصينية وهي بعد ما فاتت على غرفة
ابد تعرف مكالمة فديو موجودة ، شغلت التلفزيون
وگعدت اكل واباع وطلعت دفتر سجلت كم شغله
واني اباع افكر بيهن احتاج اشتريهم واريد البسهم
بالخطوبة ، وحتى احرك روحي مسحت
اخشاب الغرفة وكنست الگاع تعبت ودخت
خليت مخدة مثله والتلفون مقابيلي
وبلشت اغفي وعيوني تغمض الى ان نمت .
صحيت ثاني يوم خايفة نسيت التلفون اذا
يشوفوني يسوني يثرموني ثرم ، عدلت گعدتي
وصوت بالتلفون يصيح
وارث : اسم الله اسم فزيتي من الصوت .
مُـرجانـة: لا نسيت التلفون ونمت ما ادري بروحي .
_ هههههه نقش فاتت قبل شوية خلت تلفونچ
على شحن وطلعت وگالت اهلچ طالعين للسوگ
لا تخافين بس نقش بالبيت الفطيرة .
مسحت وجهي وبعيوني النعاس همست
_مبدل وهاي وين رايح ؟
_ عندي شغل ، عريس لازم اجهز للخطبة والعرس .
_ الله شلون عريس نيالها زوجتك بيك .
_ ههههه اني نيالي عليها .
حچاها وفتح الباب نزل شعره رطب بس مرتبة
لابس قميص وفاتح اول دگمتين نزل الدرج
وفات على غرفة امة شافها تصلي باي راسها وگعد
وارث : جاهزة يمه ؟
_ على شني جاهزة ؟
_ الخطبة بعد كم يوم .
ظل يحچي وياها ويفهمها شلون قنع عني
دار التلفون عليها سلمت وطلع للسيارة
وارث : نحلة .
_ ها .
_ روحي اكلي بين ما اكمل شغلي واراسلچ .
_ تمام وهم اشوف امي بيباي وارث .
_ على ناشف باي وارث .
_ اي مابيه حيل اتغزل بيك .
_ هههههههه احبچ والحسين .
سديت الخط ورحت نزلت امي فاتت هيَّ
وضليل مكملين مسواك ترست المطبخ ترس
ونقش راحت تساعد بضليل ينزل بالمسواك
مشيت سريع على ماي صبيت گلاص
بارد وخليته بيد امي تشرب وفزيت على صوت ضـلـيل
_ واناااااا طرطورررر هين اريد مااااي .
لزمت امي الضحكة غصب واني بقيت
ارافس رجلي وحده تتقدم والثانية
ترجع من سرعتي صبيت ماي ورجعت
عليه اخذه مم ايدي شرب وصاح
_ بعد بعد .
اخذته من ايده اول ما طخت اصابعه
ايدي وگع الگلاص من ايدي همزين
ما تكسر قوي ، اخذته غسلته ورحت ترسته
ورجعت اخذه شربة وطلع برا يخابر
من فات اجه وياه شاهين سلم علينا كلنا
ردت اسلم تذكرت وارث محلفني ما اسلم
سويت روحي ما سمعت وخجلت درت
وجهي ارتب بالأغراض صاحت امي
_ روحي بدلي مُـرجانـة نروح نجهز الخطوبة .
عفت الهوسة على نقش خطية وحدها
انوب من شافت شاهين عصبت مدري شبيها
بدلت على سريع وكتبت رسالة
” وارث راح اروح اني وامي للسوگ ”
جاوبني على سريع
” وحدكم بس انتِ وامچ ؟”
عضيت شفايفي متردده من الجواب
” اي وحدنا ”
خابرني بنفس الدقيقة عاد نفس الكلام
_ ضـلـيل وين يقبل تروحين انتِ وامچ وحدكم
شني هل اقناع الخارق من امچ شنو مسويه
بي امچ وهيچ يقبل وحدكم تروحون مسودن مو بعقله .
باعت ريگي كشفني عاط
_ مررررررررجانة موووو اكو زمال يحچي ويااااچ .
_ شسمه هذا ويانا .
_ شاهين مووووو ؟
_ ليش تصيح ؟
_ شاااااهين ويااااااكممممم .
طبگت الخط بوجهه وغلقت الجهاز بدلت
ونزلت لگيتهم ينتظرون برا بالسيارة
ضرب ضـلـيل على سيارة وصاح بأمي
_ اشبعي اليوم تفرفر بنت ذياب العرمة .
شاهين : دروح شيخنا دير بالك على بيت .
ضـلـيل : اكل قنادر الفاهي الخايس هم يحچي
امداك وامده الرتب انا اعرف اهل الرتب صلفين
بس هذا طلع خابس جايف فاهي وخجول
ولي يلة ولي لا بارك الله بيك من زلمة .
ضرب السيارة حيل قبل لا تتحرك وعاط بي
_ عينك عليهن يولو دير بالك .
شاهين : الله يساعدچ شيخة شلون متحملتو .
دفر ضـلـيل للسيارة وشاهين شخطها وطار بينا
يضحكون هوَ وامي على عصبية ضـلـيل .
غـاليـة : كوثر مختفية .
شاهين: ليش عني ما بلغچ عمتي عزيزة مريضة
ومحتارين بيها هل ايام عدها سكر طلع .
غـاليـة : لا والله ولا يحچي ابد ما يذكرهم
ويمكن لأن اني ما اسأل عنهم هوَ ما يجيب طاريهم .
شاهين : والله عزيزة كلش مو زينة وحتى عمي ضـلـيل
گال بس نخلص هوسة الخطوبة يراجع بيها اكثرر
من دكتور خايفين عليها ما تستاهل .
اني هواي انقهرت وحتى اختفت ضحكتها
لأن تعرف عزيزة غـاليـة على ابوية والوحيدة
زينة بيهم وما تأذي بشر ، نزلنا على محلات
افتريت اني وامي الى ان وگعت رجلنا عجبني
اكثر من فستان تالي ثبتت على واحد قصير
لون احمر فاقع بدون أكمام فتوح الصدر
فصار الصدر على شكل قلب وعبارة عن ترتر
على شكل نجوم يلمع لمع من بعيد بكل هدوء
مابي تفاصيل هواي مرتب وشكله فخم بالبساطة .
رهمت امي وياه الحذاء بنفس الدرجة الأحمر
گالت لان اني بيضة هل لون يطلع مميز وبارز عليَّ
فرحت بيهم وكملت باقي كم شغله ، دخلتني على
افضل فقرة ما فرحت بشي مثل ما فرحت من
دخلتني على محل العطور افتر بينهم
ولو بيدي اخذهن كلهن كلهن اخذهن والله
احتاريت بين اثنين ما اگدر ابد اختار بينهم
لحيت على اني اخذتهن اثنينهن بي غاليات
ولا اهتميت غلفهن واخذتهن من ابو المحل
خليتهن على گلبي اريد اضمهن بگلبي هم
شگد حلو شكلهن اروحلهن فدوة عطوري .
رجعنا للبيت بعد ما الدنيا افترت بيه
اول ما دخلنا لگيت عمي ضـلـيل نايم
بالأستقبال ننوس بحضنه مخليها على گلبه
وافلام كارتون مستغل التلفزيون وغافين رايحين
سابع نومة ، اخذت نقش الأغراض صعدتهن
فوك ونزلت صبت اكل گعدنا اني واني وشاهين
ناكل ونقش حلفت ما تگعد وصعدت فوك
شاهين اكل قليل كلش وطلع من البيت .
بس كملت صعدت واني رتبت المطبخ اجت ورانا
عدلنا اغراضي كلهن وحاولت سألت نقش شنو
بيها رفضت تجاوبني ولا تسمع مني .
بليل قبل لا انام تذكرت التلفون خابرت
على وارث ما يجاوبني دزيت رسالة كتبت
” دا اخابرك وينك الو ”
ماكو رد رجعت كتبت
” اشتريت فستان وعطور جاوبني الو ”
يمكن نايم تركته هو الصبح يخابرني .
خليت عطوري على ميز مقابيلي وصفنت بيهن
ونمت الثاني يوم فزين على تلفون ماكو وارث
لا رسالة ولا مكالمة ، خابرت ماكو رد ، دزيت رسالة
ماكو جواب بس شافها ، فكرت يمكن مشغول
بقيت للظهر احوس رجعت خابرت العصر مختفي
ورجعت امي اخذتنا عل مرة ونقش ويانا
كملنا باقي الأغراض ونقش اختارت فستان
لون بنفسجي فاتح بي فراشات ناعمات
وامي اخذت فستان مريح بارد علمود حملها
لون اسود وبي ماروني قليل بس شكله فخم
وصار سعره حتى اغلى من سعر فستاني .
رجعت للبيت اخابر بي ولا يجاوب انوب
ظل بالي عنده حجيت لنقش جاوبتني
_ تلگي زعل منچ لان طفيتي التلفون بوجهه .
_ اي غير يصيح عليَّ .
_ عود يغار من شاهين وحقه هذا ابن تمار
الخايس عنده سوابق مو صاح بنت عمي ناهي
عليهاا واحبها امداك وامده وجهك الخايس
لو بيدي اخلي واذبحه هوَ وابووووووو .
انوب خلتني اخاف بقيت ساكته وهيَّ طلعت معصبه
ومر اليوم والثاني والثالث شگد حاولت اتواصل
وياه ماكو .
” بيوم الخطوبة ” وگفت گلبي نقش
من گالت : احلى شي من الصبح گاعدين نجهز
وهوَ العريس زعلان بس لا ما يجي للخطوبة .
مُـرجانـة : حتى اروح اتزوج شيخ الأشاجع
واخلي يرگع راسه بالحايط هذا ابو صدر المدلع المتوحد .
نقش : ههههههه انتِ ابوچ ضـلـيل لو عابد ؟
_ الله يبعدنا عن ضـلـيل .
_ والله نسخة انتِ نسخة مو ضليل
ماعندچ صاحب صديق مثله.
رجعنا الظهر على بيت لگيت بيبيتي ام امي
ونسوان اخوانها وعمات امي مدري نسوان عمها
ما اعرفهن اصلاً ونصهن نسيتهن وابد ما التقي
بيهن امي تعرفني عليهن ولا حفظت وحده مابيه
حيل وهذني هواي وعقلي مشوش بهذا ابو صدر المدلع .
بس صار العصر ضـلـيل وشاهين ومقتدر بالباب
وسبعة شيوخ مقربين من ضـلـيل موجودين وياه برا
دخل شاهين صاح بصوت مسموع
_ نقششششش .
جرت نقش الشال وطلعت بالفستان ومكياجها
اول ما فتحت الباب صاحت
_ هاااا شاهين .
ما سمعت صوت شاهين ابد وجفلت من عاطت
_ الووووو شاهين بيك شي تسمعني الوووو اجب .
شاهين : شنو منو اگلچ هذولي .
_ منو ؟
_ شعندچ هيچ لابسة عررروس .
_ لا تدخل ابن تمار احسلك لا اخزيك واشهرك .
_ العررررررمة عود تريديهم يخطبووووچ .
_ معليك .
_ نقششششش .
_ اهووووووو شاهين شبيككك .
طلعت امي على صوتهم وفات ضـلـيل عاط بيهم
ضـلـيل : شبيك انتَ وياهااا شهرتوناااااا .
شاهين : بنت اخوك تريد تتزوج .
ضـلـيل : اي خطبوها مني شعليك انتَ .
شاهين : انتَ تگول شعليك وهاي تصيح شعليك .
ضـلـيل : اي لأن شعليك صدك ابوها موجود
ابوهااااا قابل انتَ ظل لا حس ولا خبر ولي يلة برا .
شاهين : شيخة مو عيب تخلي هيچ مكياج عرايس
شلون تقبلين عليهااا ، وبعدين هذا منو خطبها .
ضـلـيل : ابن شيخ فؤاد خطبها ومنتظرين جوابهاا .
فاتت نقش من سمعت وضليل عاط بأمي
_ العالم وصلوا .
شاهين : اليوم الزم ابن فؤاد واذبحووووو .
_ حتى اذبحك ، تعال هنا يولووو شاهين الخبل .
ارتعد گلبي بيوم ما صاحوا وصلوا
واصوات السيارات ملت المنطقة ملي
واغاني بالشارع من السيارات صوتها عالي
دخلت ام وارث اول وحدة هي شافتني وبقت تصيح
_ اللهم صلي على محمد وال بيت محمد
أعوذ بكلمات الله التامات من شر ما خلق، ومن كل
حاسد اذا حسد، اللهم احفظها بعينك التي لا تنام .
بوستني بكل حيلها تحضن بيه وحتى راسي باسته
فاتت ميمونة شگد حلوة لابسة فستان محجبات
مستور بس شكله فخم ، ودخلت ملِكه جمالها
ياخذ العقل لابسه عباية ذبتها اول ما دخلت
وطلعت الجمال فستانها اكمامه خفيفة لونه
زيتوني طوخ بارز لون بشرتها ومكياجها خفيف
ناعم يخفي تعب ملامحها وحزن واضح بعيونها
حضنتها وحضنتني هي وميمونة .
وخطفت گلبي ايليا مـن دخلت كل الأنظار صارت عليها
والنسوان صارت تتهامس وحده تسأل الثانية هاي
بنت منو وتعود لمنو ووووو وهيَّ الها جاذبية
خاصة وتخلي روح بالمكان بگد ما مرحة
لابسة الفستان اسود فاقع مكياجها بسيط
بس بارز حدة ملامحها عطرها هف بالمكان
وضحكتها تهلي المقابل يضحك ، حضنتني
وگرصت خدي وهيَّ تتغزل بلا تقيد وتضحك
ويه الهوا الطاير الكل حبها الكل .
بعد سلام طويل وتعارف جمدت اطراف رجلي
واصابع ايدي من صاحوا بوضوح
_ وارث راح يدخل يلبسها الذهب .
بللت شفايفي وعمي غمضت عينها بمعنى لا تخافين
اول ما دخل ما گدرت ارفع عيونه منه بس غصبت
روحي عيب نزلت عيوني لابس نيلي بس هذا النيلي
الطوخ قميص وسترة والبنطلون والحذاء اسود
وعلى هاي دلع القميص احلف عمي ضـلـيل
هسة غادي نار برا وبمعجزة دخله علينا .
اول ما گعد يمي همست بعصبية
_ عود انتَ وينك .
_ اسكتي مني لا اتخبل عليچ .
درت عليه نسيت النسوان خزرته
مُـرجانـة : والقران اذا ما تحچي شي بي خيرر
هسة اطنگررررررر واصعد فوك اخليك تلبس
الحياطين ذهب يا مدلع يا …
قبل لا اكمل يمكن يعرفني مو بعقلي سحب
راسي باس راسي ولزم بيدي وهمس بعصبية
بس اكو ابتسامة على وجهه هذا وجهه المگلوب
وارث : متزوج ضـلـيل انااااااا ابتليت بضليلين
شمسوووي بدنيااااي غير اعررررف شمسوي .
دفعت ايده وكتفت ايدي طنگرت بعد مو بيدي
وارث : وحق هوَ علي اشلع شفايفچ مُـرجانـة
نزززلي ايدچ لا تشهررريناااااا يلة .
مُـرجانـة : ا تگول يلة .
ام وارث : حبكت اليوووم تتعاركون ولكم شبيكم .
مُـرجانـة : صار كم يوم اخابر بي ما يجاوب
يسوي روحه زعلان المدلععععع تقبليهاااا خالة ؟
ام وارث : اگول ليش خبلني وخبل البيت بالمشاكل
ولچ ملِكه تعالي ولچ اسمعي .
ملِكه : ها خالة .
_ ولچ طلع متعارك وياها وهل لعب علينا .
_ عرفت والله مبين .
وارث : زيدوهاااااا بعد زيدوهااااا .
مُـرجانـة : شكو اجيت اذا معصب .
بلع الكلمات وطل ساكت من تقربت اني
_ بيكم شي خيركم .
غيرت ملِكه الموضوع وبقت تتغزل بأمي
واخذتهن وراحت ورجعت سألته
_ شكووو اجيت وانتِ ما تريدني .
_ اريدچ شلون مـا اريدچ اجيت مخصوص
علمودچ وساحل شيوخ الدنيا حتى اگطعچ .
فتحت عيوني وجهي صارت بي عركة
احتار اخزر انصدم احارب ابچي
مُـرجانـة : تضربني تريد تكتلني ؟
وارث : لا مُـرجانـة لا ما اضربچ بس منتظر
اكمل الذهب واختلي بيچ بغرفة حتى اعلمچ
شلون اگطعچ ، اعلمچ شلون التلفون ينغلق بوجهي .
وترني بگد ما صفن بشفايفي ، اجت امه فتحت
علبتين ذهب خلتهم على ميز الخطوبة
المرتب بالكامل من تجهيزاته ، وفرته على وارث
وگف مرتبك يستحي من النسوان وجهه يصب
عرگ خجلان يلبس بيه ويمسح بوجهه
وعيونه فد نظراتها جريئة ردت اخلي شال
على اكتافي لأن حسيت كل وضعه تخربط بسبب
فتحت الفستان مالتي من فوك ، واول ما گعدت
الفستان بگد ما قصير طلعت كل سيقاني اغطي
ويطلع ، وهوَ يلبسني بالسوارات ، جر گلاص
ماي يشرب ورجع يكمل يلبسني بالمحبس
من كمل طلع باكيت الجگاير وتذكر هو بنص
النسوان ضم الباكيت ومسح وجهه خطية حارة عليه .
بعد دقايق عدلت نفسي وگفت هوَ ورايَّ گاعد
حريت السجين وهمست
_ نقطع الكيك .
وارث : اني تگطعت يا كيك يا عصير يا ببسي متت .
حتى ما فهمت قصده بس انجبر يوگف حضن
ايده بين ايدي صارت وقطعنا الكيك وكلها تهلهل
وتصفگ اخذت شي قليل وكلته وايدي مطاحت
وطيحت الكيكة الصغيرة ما اكلها ابتسم
واخذ من الكيك وكلني وشربني عصير
واني لا وكلته ولا شربته عصير ذابحتني الفهاوة .
گعدت قبله وهوَ يحچي ويه امه وعينه عليه
من الخجل انصهرت وحتى هوَ ترخص وطلع
بعد فترة وزعوا الأكل البنات كلهن واني اخذت
وياهن لفة وگعدنا ناكل ونسولف بس خلصنا
راحوا يغسلون البنات صعدنا فوك بغرفتي
وكفت ايليا وملِكه يعدلن بالمكياج مالتهن
التفتت ايليا والحمرة رسمتها لون احمر طوخ
رشت عطر واجت يمي اطوخ بحمرتي لان خفت
اول ما نزلت سمعت امي تحچي بالتلفون هيَّ وضليل
_ها ضـلـيل ، هسة ترجع للغربية ؟
_ عزيزة مو زينة متخربطة مقتدر وشاهين
يمكم من يروحون يجون ورايه وانتن قفلن الباب زين .
سد الخط وراح ، وايليا راحت شغلت اغاني
هي وملِكه يرگصون وميمونة تصفگ وياهن
حسيتها شوية احسن من قبل راجعة
جرت ايليا ايدي وملِكه يحبت نقش
انتبهت على ايليا ابد ما تضحك
هي ونقش ولا تخب تختلط بيها
واعصابها مشدودة وياها ونقش كذلك .
رگصت وياهن وضحكنا هووواي
عشت اجواء ردت بيها روحي
وكأن اعرف هل بنات من سنين
روحهن مرحة وكلهن طيبات گلبهن نظيف
ما تمنيت افارگهن ابد بس صار الوقت ولازم يروحون .
لبسن العبي فوك الفساتين وحتى ايليا
ضحكت من شفتها لبست العباية بس
ام تراث جرت كلينكس وراحت عدها صاحت بيها
_ امسحي هل حمرة تراث برا بس يشوفهاااا
على حلگچ وتطلعين بيها يتسودن علينا اليوم .
خلت الكلينكس على شفايفها وطلعت عود تمسح
بيها بس حسيتها تعاند بي ما مسحتها وطلعت
وگفت ودعتهم وفتحت البردة شفت ملِكه اول
ما طلعت اخذها بيرغ مستعجل صعدها للسيارة .
وتراث مو بعيد شاف ايليا متعمدة رفعت
راسها وسع عيونه وطلع لسانه يعض بي متحلف
وشيخ فؤاد اجاهم مو بعيد يضحك واخذها بسيارته
وتراث اعترض طريقهم ما اسمع شنو يحچون
بس جرها من طرف عبايتها واخذها على سيارته وراحوا .
صعدت فوك عفت هو اقارب امي على امي
سمعت تلفوني يدگ جاوبته اول ما شفت اسمه
مُـرجانـة: تذكرت رقمي .
_ لا تبدلين ملابسچ انتظريني .
_ وين انتظرك دا انزع اريد اسبح .
_ لاااااااا تنززززززعين الفستااااااااان مُـرجانـة .
_ وووووووارررررررث زودتهااااا ترا بالصياح .
سكت ثواني يستغفر وشمر التلفون دقايق
ورجع اخذه وبصوت تعبان طلب مني
_ ما وجعت وياهم بقيت هنا اريد اشوفچ
زين ما شبعان منچ روحي تلوب عليچ
گلبي طگ يريدچ عليچ العباس اريد اشوفچ .
مُـرجانـة : عدنا خطار .
_ هسة كلها تروح وحتى شاهين وعمچ
ما باقين عدهم مشكلة بالغربية يردون
بس تخف اجي اشوفچ ما اطول والله .
ارتبكت ولا هوَ يحچي ولا اني بس صوت انفاسنا
مسموع ، مر وقت طويل خليت تلتلفون بأذني
ونمت على برودة الغرفة وصوت انفاسه
الى ان فززتني نقش وتلفوني على اذنها تحچي
باوعت على ساعة بـ3 الفـجر هسة
نقش : راح اخاطر بس شيصير اني معليه
وارث مو تبلوني والله امي تذبحني .
سكتت دقايق وضحكت گالت
_ لا تردها اليه بالأفراح اريد بس تسعد اختي دوم
وتخاف الله بيها وتخليها بين عيونك .
استمعت للكلام وجاوبته
_ تمام راح انزلها هسة بس لا تتأخرون
اني قبل ساعتين نامت هي وننوس
وجدتي نايمة بالأستقبال ترا فـ لا تتأخرون امانة .
بقيت اطگطگ سدت المكالمة رحت غسلت ورجعت
عدلت مكياجي ورشيت عطر ونزلتني
على الخوف هذا لو حامل اجيب وصلتني للگراج
وهمست : خابري خلي يفوت ترا من المغرب
ينتظر ماكو هيچ قابلية ولاااا تتأخرين
وخلي اشوفچ تسيحين بيده اصيح
امي عليچ واخليها تشوف بنتها شلون تسيح .
مُـرجانـة : لا خلي يولي اصلاً كارهته
مو تدرين بيه صار ايام شلون كارهته وما اطيقه .
نقش : صحيح ، ديلة بسرعة خلصي لا يگعدون .
حريت نفس وهيَّ قفلت الباب حتى اذا احد
يگعد يشوف الباب مقفول وماكو شي ، خابرته
جاوبني فتحت الباب قليل وهمست بصوت يرعش
_ تعال وارث فتحت الباب .
درت وجهي على باب وبطني صار بيها مغص
وراسي يدگ عبالك مو راس صار گلبي براسي
وهذا گلبي والله يوجعني ويدگ بكل مكان بجسمي
حسيت روحي دخت اول ما شفته ودخل
وهوَ ما سلمني محال اتفاهم وياه شالني
اني والفستان ونزل راسه برگبتي يشمني .
وگفت بين الحايط وبينه صعد من رگبتي
يبوس بخدودي وراح على شفتي يتفنن بيها
حتى ما ينطيني محال اجر النفس بعد
جسمي كله مدري شي بي ما حسيت بي ابد
دفعته من صدره عيوني ما اگدر افتحهم
وهوَ حاضني بيد وحاضن وجهي بيد
عيونه تلمع وجهه صار بي حمرتي
مُـرجانـة : نقش .
_ شبيها ؟
حجاها وحط راسه برگبتي
_ گالت شسمه .
_ شنو گالت ؟
_ لا هاي ميصير .
_ ميصير شنو ؟
_ اريد انام .
_ ساحت البت .
جريت نفس وذبيته اريد اتنفس شفت ابتسامته
وبلع ريگه اكثر من مرة جرني بحضنه قوي حضني
انفاسه تلفح بوجهي حارة وشفايفه ما خلت
مكان بوجهي ما تركت اثر بوسة عليه
وارث : مدوختني مُـرجانـة مدوختني انتِ سلبتي عقلي .
ايده نزلت على فيتاني طوق خصري بكل تملك
وكل مسافة ما ترك بيناتنا اشرت بصعوبة على باب
_ ميصير وارث ميصير كافي گالت نقش مـ .
سبقني وهوَ يرجع يتفنن بالبوسة
وايده تتلمسني وكأنه يحفظ تفاصيلي
جفلت وابتعدت وكلشي طار من راسي
من رن تلفوني جاوبت بسرعة
نقش : لچ بيبي سمعت طگطگه برا
وگعدت امي اخذي وارث واختلي بالحمام برررا ركضي .
بعدها على الخط وباب الشارع الخارجي صار ينفتح
صوت احتكاك وخرخشة المفتاح بالباب ثگَل جسمي
ماتت رجلي، ووارث عيونه تبث شرار،محتار وين
يضمني، وهو يعرف ماكو أحد يقبل
يدخل بيوتنا بهالوقت.
ومن جهة باب الشارع علينا،ومن الجهة الثانية
باب الاستقبال من جوه هم دا ينفتح
نفس الخرخشة، نفس الطگطگة
وما بين البابين گلوبنا تحاصرت
لا مهرب نهرب عليه ولا وجه نكدر نضمه منهم .
يتبع …
الفصل التالي اضغط هنا
يتبع.. (رواية الموروث نصل حاد) اضغط على اسم الرواية لتجد الفهرس كاملاً بجميع الفصول.