رواية الموروث نصل حاد – الفصل الثاني والثلاثون
♛32 ♛
ضـلـيل : ساعة بالباب انتظر ما تفتهن المهجوم .
غـاليـة : مو لابسين مال نوم خفيف .
ضـلـيل : هاي مو نقش لابسه تراك بعد منين نوم .
نقش : هسة بدلت ونزلت .
ضـلـيل : گلبي يلعب منچن .
غـاليـة : لا تكبرها وهيَّ صغيرة .
_ امشي اريدنچ بالغرفة .
فزيت على صوت ورايَّ وانضربت بصدره من التفتت
وارث : انا هم اريدچ بالغرفة .
دفعته ورجلي اطگطگ عضيتله اصبعي ودخلته للغرفة
مُـرجانـة: اگعد هنا واسكت لا يسمع عمو ضـلـيل
ويخليني اني وياك ويملخني ويملخك
هو شلون يحبك.
وارث : اذا تصعد امچ ترزلني احط طلقة براسي .
مُـرجانـة: يلة ميخالف تحمل الخاطري .
وارث : الخاطرچ عفت شغلي ، الخاطرچ دخلت
ديوان الناس الغربة التقيت بشيوخ وانا رافضهم
الخاطرچ خليت ايدي بيد ال ضـلـيل بقت على
رزايل والسب عادي نتقبلها العوض بيوم العرس .
غـاليـة …
اول ما دخل طلع اربع اوراق وفتح الكنتور
طلع فلوس يحسب بيهم وبدون ما يلتفت گال
_ يمكن اطول عليكم على ما ارد بعد .
_ ليش .
_ عندي شغل وعزيزة مريضة صعب اعوف
الغربية وانتِ راسچ يابس ماتقبلين تردين
مخليتني وحدي من احتاجچ .
تنهدت حيرانه كمل حساب الفلوس رتبهم
بجنطه ومستعجل حتى ما ينتظر اخذهن
وطلع بلا ما يودع ولا يلتفت مكسور خاطره .
انتظرت بس حرك سيارته رجعت دخلت للبيت
وأمي مصكوكة جانت من عرفت راح حچت
_ هاي بنيتچ شنو جانت طالعة هيَّ والموروث ؟
غـاليـة : لا يمه جاي للبيت .
_ وطالعه بهذا الفستان مشلتح والدنيا فجر .
احتاريت شنو اجاوب صعدت ولفيت شالي
اول ما دخلت فزت وختلت بظهره وفستانها
على گولت امي مشلتح وگدامه وفلا تستحي
من شفته حتى استحي احچي وياه زلمة
شكبره شگول وشلون اعاتبه اجه بهل وقت
على بنتي خزي ، جبرت روحي احچي بهدوء
غـاليـة : المفروض تتفق وتتواصل ويايه
بالنهار وتجي تشوفها ميصير تجي بهل وقت
اذا يشوفون الجوارين شنو يفكرون ؟ لو داخل
ضـلـيل وشايفك انتَ وياها بهل وقت وبهل لبس
شنو رده والله يتسودن ويوجر لا يرحمك ولا يرحمها .
وارث : الغلط مني هيَّ ماقبلت ، غلط ما يتكرر
واذا على جوارين محد شاف ، وضليل عدت ومرت
وان شاء الله راح احاول اقرب موعد العرس
وبلا امر عليچ تستعجلين بتجهيزاتها انا رايدها عندي.
وقبل لا ارجع اتنفس وياه قطع كلامي
_ اذا مابيها احراج احتاج طريق حتى اطلع .
استحيت منه هزيت راسي بقبول ورحت
للدرج نزلت وهوَ ورايَّ ، وصل عد امي
دگ على صدره وبصوت مسموع گال
_ عذريني حجية اذا سببت ازعاج حقچ عليه.
_ معذور يمه .
وصلته للباب قبل لا افتح الباب نزل عيونه
ما رفع راسه ولا شافني بس توسلني
وارث : ام مُـرجانـة امانة الله ورسولة
عليچ العباس لا تقهريها ولا تتعاركين وياها
والحسين الغلط مني انا لحيت عليها
وبعد اخذيها كلمة ما تتكرر انتظر عرسنا
بروح الوالد تخليها تنام بعلي هيَّ تعبانة .
شگد جنت ضايجة منه ومنها من سمعت
كلامه وخوفه أبتسمت وبنبرة ساكنة رديت
_ لا تخاف هسة تلگاها من الخوف نامت
راح اخليها ، وانا مو من حقي أحاسبكم هي مرتك
بس اني عتبي عليك الوقت متأخر واني ماعندي علم .
وارث : حقچ على عين والراس ، اردها الچ من اتزوجها
اذا تردين تشوفيها حتى لو الفجر اجيبها الچ
وشوكت ما تريديني انا بالخدمة .
غـاليـة : ما تقصر من يوم يومك اعرفك زلمة معدل .
فتح الباب يريد يطلع وتذكر رجع سد الباب وسألني
_ ليش طلبتي بالأسم تصير مُـرجانـة دخيلة عندي ؟
غـاليـة : انتَ تتذكر عابد ؟
وارث : چا شلون ما اتذكره ، هوَ چان يجيب مصروفي
من ابوي كل فترة ، ويذكر ابوي بيه وياخذني من البصرة
للغربية حتى اشوف ابوي ، وبيوم تخرجي اجه
من الغربية للبصرة ذبح ذبايح اثنين حتى يباركلي .
غـاليـة : كل ما يرجع منك يعيدها لو عندي بنية چبيرة
ازوجها لوارث ابن ساجر زلمة معدل يخاف الله
الزمن يقسى وياه بس هوَ يتحدى الظروف
ووصل وجنت بوقتها تشتغل انتَ وتراث
بشغل السقوف الثانوية حتى ما تطلب
من ابوك فلوس ، اتذكر من كبرت بعد
ما قبلت تاخذ من ساجر فلوس .
وارث : اكو سبب ثاني ؟
غـاليـة : اسباب مو سبب وصعب أذكرها اخاف
تعوف بنتي وهيَّ تحتاجك .
وارث : انا اعوفها ؟ مستحيل .
غـاليـة: تعوفها اخذها مني
بس اريد تعرف مصالحنا وحده حلالنا
عندك ، وردت شخص مثلك يحمينا اذا الزمن يميل بينا .
وارث : عد عيناچ .
غـاليـة : وعندي علم من اختارك ساجر الوريث
وأمن بيك وسجل كل أملاكه بأسمك مو بأسم
اخوانه ولا اولاده فهو كشف بيك شي انا هم
كشفته واختاريتك لبنتي، وما ندمانة ولا غلطت
بالأختيار ابد ما غلطت ولا تندمت لأن اعرف شنو اختاريت .
وارث : ولا راح تتندمين بيوم اخذيها من هل شارب
اذا بيوم تحتاجيني بأتصال واحد اجرد تاريخهم
واكرز بيهم دگ وكتل وحق كافل زينب اجرم بيهم .
غـاليـة : وردة وارث زلمة كلف مثل ما گال شيخ فؤاد .
ترخص وطلع ، قفلت البوب وفتت وصاحت بيه امي
_ ولچن فجر شصار ساعة تحچين وياه خزيتنا .
غـاليـة : راح يمه نامي .
_ وعلي اذا يعرف ضـلـيل يطحن عظامچ انتَ وبناتچ .
شمرت الشال وصعدت على غرفتهن فتحت
الباب لگيتها متلفلفه تلفلف بالبطانية
نقش : اول ما نزلتي بدلت ونامت حتى بدون سبح .
غـاليـة : خليها تشبع نوم قابل باجر ما تگعد العرمة
عبالي فقيرة جايبة الزلمة وطالعة الفجر وياه خاتله
بس العاب مو عليچ على هاي الغبيرة الچبيرة اختچ .
طبگت الباب بكل حيلي ونزلت راسي مصدع
انتظرت الصلاة صليت واخذت تلفوني خابرت ضـلـيل
_ ها شيخهم وصلت .
_ ربع ساعة وافوت للبيت شعندچ .
_ اسأل عليك شيخهم .
_ استغفر الله تعيد شيخهم بالثانية اربع مرات .
_ شيخهم عندي احساس يگول انتَ تحب كلمة شيخهم .
_ هم نعمة عندچ احساس خبري ماعندچ .
_ لا والله شيخهم عندي .
_ هلبت احساسچ يستحي على روحو ويخليچ
تحسين عندچ زلمة يريد حرمة عندو يالعرمة يالبغدادية .
تغطيت ولا اراديا بعد ابتسمت
_ چا شيخهم مو عندك حرمة يمك بعد طلابة
لو متعودين على مثنى وثلاث ورباع .
_ بنت ذياب وينهن المثنى والثلاث والطام بعينچ
يمتى هاااي يمتى هوَ انا وين اريد غيرچ بنت
الذين ، مو اطلع لساني بهل صبحية استفتح بيچ .
_ تزوج شيخهم تزوج ، شيخ ال ضـلـيل لازم يزوج .
_ هوَ انا لو اريد اليوم أتزوج وغلاتچ .
_ لعد ما تتزوج .
_ احب هل لعد عاشگها وعزة جلالتو .
ما تحملت ما اطگها بضحكة
_ ههههههههه .
_ اسمعي يول دنيا صبح وحق هل صبحية
ما ارغب غيرچ ولا اريدن ولا افكر بغيرچ
من يوم ما صرتي حرمتي عميتي عيوني بعد
على نساوين روحي صارت بيچ ، من ادحگ
بوجهچ وتضحكيلي چن فزت بالجنة
لو من تحچين وياي حلو ومحمد شگلچ غـاليـة
بس الدنيا كلها تصير حلوة بعيوني ومن
افرح اريدن افرح العالم كلها وياي .
سمعت طگ الجگارة بقيت ساكته هوَ كمل
_ ومن تغتاضين مني بودي اكتلهم كلهم
واكتل نفسي وياهم ، تنگلب عندي الدنيا سوده
وشني يطيح بيدي لو ملوك الدنيا كلاها فلا افرح
ادور راحتچ ومحمد بس اريدچ يمي گلبي
موجر نار وانتَ بعيده مني انتَ بصوب وانا بصوب
واخاف اجبرچ وتكرهيني بالزايد وباقي احترگ وحدي .
من شافني ما نطقت ولا رديت ختمها وسد التلفون
_ بس انتَ وحده بربو* عرمة الله يدوهنچ مثل ما
دوهنتيني غربلتي حالي شسوي بعد حتى تحسين .
خليت التلفون على صفحة ونمت على مخدة
فكرة تاخذني والثانية تردني بين ارجع وبين اظل
هنا ماعندي حيل اتحمل مشاكل كوثر وبناتها
غفيت حايرة حيرة ما بعدها حيرة .
ثاني يوم صحيت على صوت البنات بالمطبخ
لميت شعري وطلعت لگيتهن مجهزات الريوك
من شافتني مُـرجانـة ضحكت ورفعت تلفونها
مُـرجانـة : احچي كلشي ولا تصيرين عصبية .
رحت عدها جريت اذنها واشرت بيدي
_ طالعة عن الطريق ولچ كلش صايرة ما تستحين .
مُـرجانـة : شبيچ غـاليـة حبيبتي غلوله الحلوة
اروحلچ فدوة هسة اعصابچ ويانا شدعوة عليچ .
جريت التلفون من ايدها وعفتها اباع على تلفون
غـاليـة : منين تعلمتي هل دروب تنطيني
تلفون وتختل التلفون الثاني الحقيرة .
مُـرجانـة : ههههههه لعد اذا ما احچي
وياه ما يخطب ولا يقاتل ولا يتزوج .
غـاليـة : اثاري كل شوية يودي عالم من وراچ .
نقش : خبلته وهوَ هم خفيف يمها مو نفسه يمكم .
غـاليـة : اي طمنتيني اذا الرجال يتغير عندچ
قوي وما ينحمل يمهم وطيب وحنون يمچ يعني يحبچ .
مُـرجانـة : اصلاً بعده الحد اليوم ما يحب يقابل
عالم غربة هواي ويسولف وياهم ، حتى اهله
قليل يسولف وياهم ، بس من يحچي ويايه
يگول اضحك وافرح وينسى العالم .
وامي من يمها وشهرتني
_ رجعي التلفون طالعة على امها البنية الله
يرحم اخاف نسيتي يوم ما حبيتي عابد
وابوچ شافچ خلص عليچ من الكتل بليل
ثاني يوم الصبح منطقتنا انسدت من السيارات
مدري منين جايب هل وادم واهله ما يريدوها
عود وذبح روحه عابد الله يرحمة يصيح ما اتحرك
اذا ما تنطيني موافقتك وابوها ما قبل لأن اهله
ما راضين ، وللفجر واسمع صوت بالبيت
ابوها نايم واشوفها خاتله هيَّ وابوچن بالگراج
تشكيله على ابوها شلون ضربها .
نقش : امممم بس تشكيله ههههههه .
اغمز اريدها تفتهمني وماكو قفلت
غـاليـة : احممم انچبي الخايسة لا هاي هنا
خطبني يمههه خطبني .
_ لا يمه لا بعدكم ولزمتچ كتلتچ انتَ وياه
وطردته وما تاب ولا امچن تابت ، تالي هوَ
تودد لذياب وحبه صار مثل ابنه وقبل يزوجه امچن .
واحنا نحچي ونسمع صوت ننوس هم ادردم
مندمجين وهيَّ مندمجه واول ما درت عليها
واشوف البنية متمددة والتلفون على اذنها تخابر
جريت التلفون من اذنها قريت اسم ضـلـيل
طفيت المكالمة وغلقت التلفون كله بكبره
وشمرته بالگاع ارجف وايدي ترعش
_ سمع كلامنا .
مُـرجانـة: عرف بوارث ؟ سمع بالتلفون ؟
يمه گولي لاااا ما بيه حيل انضرب والله .
نقش : لالا اني لمحتها توها اجت ونامت هنا
يمكن بس سمع بيبي من حچت بعلاقة ابوية وامي .
غسلت وجهي بينت اني ما مهتمه بس بگلبي نار
صارت اعرفه اذا سمع راح يحرگ بروحه ويصير
بي شي ، گعدت وياهن اكل ونضحك ونزلت
مُـرجانـة الگلادة اللي هداها وارث وقريت
الكلام المحفور بيها وابتسمت
” تذكري لو سكتت كل قلوب الدنيا عن حبج كلبي يضل يحيج”
غـاليـة : وامچ بعمرها كله ما راح يسكت گلبها عن حبچ .
مُـرجانـة : اعرف ماما والله ادري بيچ تحبيني .
حضنتها شگد معزتها چبيرة بكلبي
عزيزة عابد هاي عزيزته روحه چانت بيها
معزتها خاصة بگلبي وعلى فطاريتها
واعرفها شگد على نيتها لو تريد روحي
مـا تغلى عليها ضحكتها عندي بالدنيا .
ومن بعد هل يوم راحت ورجعت بس اني وبناتي
ضـلـيل بعد ما اتصل بيه ولا انا اتصلت ومر على
هل موقف ايام حياتنا هدوء بهدوء ، الى ان
بيوم گاعدة اجهز كبة وبورك اني والبنات ومشغلين
مسلسل بالتفزيون مقابيلنا نشتغل ونباع وننوس
نايمة بصفي ، اندگ باب بيتي بعز الظهر والجو مغيم
والترابة تهفي على بيوت ، غسلت ايدي وجريت شالي
طلعت بالباب مستغربة منو يجيني هل وكت صحت
_ منو ؟
_ انا ام ضـلـيل يولووو البغدادية فكي الباب .
مُـرجانـة : سمعي حقيقي ؟
نقش : سمعي اني حقيقي ؟
غـاليـة : لا هلا ولا مرحبا شعدها كوثر تفتر علينا
چنها شمر بهل ظهريه والدنيا تراب .
مُـرجانـة : يمه اخاف اجت تموتنا .
خليت البنات يلملمون ورحت فتحت الباب
دگت عكازتها ودفعت الباب بكل حياها فاتت
لخصتني تلخص بعيونها ، وانوب دارت عيونها
على بيت وتهز بيدها ومقتدر وراها ما ينطق
كوثر : دحگ يول مقتدر وين گعدها شيخ ضـلـيل .
غـاليـة : شعندچ اجيتي شنو تريدين مشاكل ؟
دفعتني بيدها وراحت تمشي فاتت
شافت البنات يشيلن بالأعراض
كوثر : تسوين كبة مرتاحة ؟ بيت احسن بيت
يطرك بي الخيل ، وبناتچ عنچ حامل
عايشة بخير شيخ ضـلـيل وناكرة معروفو
وفضلو عليچ وعلى بناتچ ومخليتو مدوده .
غـاليـة : ضـلـيل يعرف بيچ هنا ؟
كوثر : صايرة كله ضـلـيل بدون شيخ
يول انا امو وما اصيح بي غير شيخ ضـلـيل .
بدون ما احچي ترأست التخم وگعدت لازمه عكازتها
سانده اديناتها اثنينهم عليها وتباوع على استقبال
أثاثه عدلته قبل خطوبة مُـرجانـة بأيام
كوثر : جايين من طريق طويل امشي جهزي اكل
انا وحماچ جوعانين ، سويلي من هاي الكبة بساعچ .
غـاليـة : نقش تلفوني بالله اخابر شيخهم
يعرف امه عدناااا ، يقبل امه تدخل علينا.
كوثر : بر*** مدخله عليچ زلم هساع
ام زلمچ انا امهم ام عابد وضليل .
نقش : يمه خابرت على عمو ضـلـيل ما يجاوبني .
كوثر : متخربط وين يجاوب نايم بسابع نومه .
غـاليـة : شبي متخربط شصاير ؟
كوثر : اأهووو أهووو عود رجفت .
_ شبي جاوبي تذبين الكلمة وتفريها .
_ ضغطه عاليه من وراچ يالبغدادية .
خليتها ورحت للمطبخ اخذت التلفون من نقش
اخابره مايجاوب، رديت على شاهين اخابر ماكو
غـاليـة : اختچ وينها نقش .
_ صعدت وقفلت غرفتها عليها تخاف منهم .
_ صعدي يمها لا تتخربط .
_ صعدت شفتها تحچي هيَّ وارث وعفتها ونزلت .
طبيت التلفون وقبل لا ارجع همست
_ جهزي صينية خليها تاكل حتى تحچي شنو
عدها وتروح نخلص منها .
وقبل لا اكمل كلامي فاتت علينا كوثر تهفي
وتضرب بالگاع تتمعن النظر بالمكان بكل تركيز
وتتفحص بناتي بعيونها حتى ما حنت عليهن
وسلمت على وحده بيهن جبروتها وكبريائها طاغي .
استقر مقتدر بالأستقبال وهيَّ گعدت
يمنا بالمطبخ اجهز بالأكل ولو بيدي
اخلي سمممم تاكل سم بس مجبورة
جهزت سفرة مدتها نقش بالاستقبال
وراحت تاكل هي وابنها خليتهم وحدهم
من كملت رفعت روحها على تخم وصاحت
_ تعالن شيلن السفرة ، وينچ بنت ذياب
جيبي ماي وصابون اغسل ايـدي بساعچ .
غـاليـة : لا مو معقولة هل انسانة .
نقش : تصيح البغدادية لو بنت ذياب
ما ينطيها گلبها تگول وينچ غـاليـة .
اخذت نقش ماي وراحت عليها غسلت ايدها
وشالت السفرة خطية كله وحدها وصبت چاي
بس حتى ماتصير مشاكل وضرب ونخلص وتروح
واول ما خلصت واخدت استكان الچاي صاحت
_ بنت ذياب تعالي هين گعدي .
_ گعدت هاي اني مقابيلچ گولي شنو عندچ ؟
_ اريد تردين وياي على غربية .
ضحكت مستغربة من طلبها
غـاليـة : نعم ؟
_ عسى ربي ما ينعم عليچ تراني
گاعدة على اعصابي اريد تردين ويايه
على غررربية وعلى بيت شيخ ضـلـيل
شني حچيت وياچ اجنبي ؟
فريت نظراتي على نقش واشرت على كوثر
_ سمعتي بيبيتچ شنو تگول ؟
نقش : سمعت يمكن مريضة .
كوثر : كون المرض بأمچ ، المطلقة ما اهيس حسچ .
غـاليـة : مطلقة من وراكممممم من وراچ انتِ
والنسوان اللي جبتيهمممم عووود مخليتهم شيوخ .
مقتدر : غـاليـة غااااااالية احترمي روحچ لاا .
غـاليـة : لا شنو تضربني جرب تضرب واشوفك
النسوان شنووو تسوي ، دام دگيت الباب انتَ
وامك وتحچووون بدون ما تثمنون كلامكم
تسمعون مني الجووواب بنفس صلافتكممم .
كوثر : حسك يمه مقتدر خليني انـا اتعلگ وياها
غـاليـة : كوووثررررر شررررايده ؟
مقتدر : كووووثرررر شني كوووثر .
غـاليـة : اسم امككككككككك كووووثرررر .
كوثر : لمي غراضچ انتِ وبناتچ حتى تردين ويايَّ
شني مخليه شيخ ضـلـيل وحده عود شني غايتچ ؟
غـاليـة : ماعندي كل غاية شردت هنا منچ ومن
بناتچ ، اريد اخلص منچ تالي اجيتي ورايه
لازم نسيتي جنتي تريدين تشرديني منه
هسة شنو تغير واجيتي ترديني .
دگت الگاع بالعكازة وبكل حياها مقهورة تهز براسها
كوثر : لازمتني من ايد توجعني يا بنت ذياب
گضيتيني من شيخ ضـلـيل مـن ابني .
_ شبي ابنچ ؟
_ چا مريض شني تخلين ابني مريض .
_ انااااا شكووووو ؟
_ ادحگ البغدادية البر*** شلون تغشم بروحهاا
ول بنت ذياب ابني مريض عليچ ردي ويايه
هوَ من يدحگ عليچ تفترين تلعبين علينا
يرتاح ويصير زين ترد روحو من يدحگ
بهل وجهه الخايس .
ضغطت على اعصابي وقبل لا ارد عليها
تفلش باب الشارع ودخل علينا ضـلـيل
وگفت على حيلي وحتى مقتدر خاف وگف
على طوله ، بس كوثر بقت على نفس گعدتها
هوَ شافهم وتخبل شال مال ورد گزاز رگعها
بالحايط سواها طشار وراح على ثانية
رگعها بالتلفزيون طشره وگعه بالگاع ويصيح
_ شعدكمممممم هين شكوووو تجين هين
وانتَ ليشششش وصلتهااااا بدون ما تاخذ موافقتي ؟؟
گعدت ولزمت راسي من صوته الصداح يزرف الأذن
كوثر : اگعد شيخنا اگعد وامشي انتِ جيبي ماي
خلي يشرب حلگه يابس سودة بوجه امك .
مشيت وصلت للباب واجت نقش بيدها گلاص
اخذته من ايدها ورجعت عليهم وصلت عنده صاحت
كوثر : اخذو منها اشرب بلكي الله يكتبلك الشفاء العاجل.
شال الريموت طگه بالگاع طشره وراح عدها
_ اخر مرة اسألكم شعدكم هين ؟
كوثر : اجيت اردها هل بغدادية للغربية .
ضـلـيل : وعليششش ترديهااا هوووو بكيفكم ؟
كوثر : تعالي انطي المااااي خلي يسكت يولو.
غاب الدم من ملامح ضـلـيل وگعد مقابيلها
كوثر : جهزي اكل امشي خلي ياكل
كون نفس هاي السفرة ، خوش والله سوتلنا اكل .
ضـلـيل : يمه انتِ تريدين تموتيني ؟
كوثر : لا اسم الله يومها قبل يومك .
ضـلـيل : يماااااااااااااااا .
خزرتني تريد تضربني بالعكاز
كوثر : بعدها واگفه هاي امشي سوي اكل ركضي
اگلك بطنها دائرية صغيرة مبين بيها وليد مو بت .
من حچت هيچ هوَ دار عيونه على بطني
كوثر : هي الحرمة اذا بطنها صغيرة وليد .
ضـلـيل : دام اكلتوا امشونا نرد للغربية يلة .
كوثر : وداعتك وروح ابوك ما اطلع من هذا
البيت ولا من بغداد اذا مو بنت ذياب ويانا .
فوتت نقش صينية بيها اكل خليته
وياهم وسديت الباب وصياحه يدوي دوي بالبيت
طلع مرتعد رعد من العصبية يمشي ويدگ
بخطواته بالگاع بكل حيله ، وصاح بغيظ
_ غـاليـة تعالي هين بساااااعچ .
دخل قبلي اول ما رحت سد الباب وصاح بيه
_ انتَ شلون تفتحين الباب قبل لا تعرفين منووو ؟
_ عرفتها أمك وفتحت الباب .
_ عليش تفتحين المهجوم .
_ اهلك ، بعدين استحي اطردهم .
هز راسه يريد يطلع لزمته من ايده
دار عيونه مني ما يريد يشوفني
غـاليـة : بيك شي گالت امك مريض ؟
ضـلـيل : انتِ شنووووو تلاحظين بيه شي .
_ اي مبين مريض .
_ اي يعني مريض لو تريدين تجذبين عيونچ !
عافني وطلع يصيح عليهم بعالي صوته
ويهدد بيهم ، اخذت نقش الصينية على حطتها
وكوثر جرت مخدة ونامت على تخم
_ وروح ابوك ما اطلع من هل بيت
شتسوي تضربني لو تطردوني
اگلك گلبي ما يتحمل ادحك وليدي تعبان
وانا ادحك عليك ما اسوي شي اموتن والله .
ضـلـيل : شبيه تعباااااان شبيه زين حيلي بعدال عشرة .
_ لا والله يمه انتَ چذاب راح تموت بس من القهر
خليها ترد يمك حتى نخلص ومرتاح بالك
جدام عيونك ، صار كم يوم حالتك مو خوش .
عض اصبعه ما متحمل وهوَ بصيح
_ ما يصير تكسرين كلمتي .
_ وداعتك تعبانة انامن ساعة ومن اگعد
احجي وياك ونتفاهمم .
نفذ صبري واستحي منهن من ناموا على مخاديد
غـاليـة : نقش جيبي فراشات امري لله خلي ينامون .
ضـلـيل : وين ينامون راح افلش الببيت عليكم
امشوا نرد للغربية عندي شغل بساااعكم .
وعاندت هوَ شهرهم وهيَّ تجاوب بكل برود
تالي صدك نامت وهوَ مايگدر يعوفهم عدنا ويروح
ظل گاعد ولازم راسه وننوس تفتر عليَّ وكل شوية صايح
_ بوية نورا مريض خليني بقهري .
بقيت بالمطبخ كملت الكبة ومن رحت اغسل
شفته من بعيد مرجع راسه على تخم
رحت للغرفة حضرت ملابس ورتبت الحمام ومشيت عنده
غـاليـة : وجهك شاحب لونه تعال اسبح ونام ساعة .
_ مرتاح الررررررراحة طالعة من خشمي عوفيني
بس افوتن تزيدها وتجلطيني وتموتيني .
خليته ورجعت على مطبخ وكلت البنات وانا سبحت
ورحت على غرفتي سديت بابها وتمددت تعبانة
مدري من الكبة ولفها، لو من كوثر وربعها
اقل الربع ساعة سمّعت طگطگه بالمطبخ رحت
اشوف منو شفت ضـلـيل بيده گلاص ماي وحب
وجع راس شربها وطگاني خزره على ماشي
ورجع لمكانه عبالك خايف يفوت على غرفة مالتي .
رجعت نمت ومن الصبح اول ما طلع الصبح
وگعدت على صوتهم هزنا هز واحدهم صوته
يدوي ويرن ، ولا طلعت تركته هوَ يتصرف وياهم
دفع الغرفة وفات شافتي بعدني بالفراش بس
رافعه جسمي گاعدة ومتغطيه وهوَ برجف
_ تعالي فهميهم ما تريدين تردين للغربية
خلصيني اريد ارد عندي شغل شلون مصيبة هاي .
كوثر وهيَّ بالاستقبال عاطت
_ لا بكيفها ولا بكيفك ترد يعني ترد ، لو انا اجي
اعيش عدها هنا حتى اشردها للغربية .
خفت من ضـلـيل وحالته وعيونه ناطه من التعب
ومبين ابد ما نايم وظل يلوب بين يصيح هناك
وبين يجي يمي يريد احچي ، وگفت على حيلي
لزمت ايده سحبتها وسديت باب الغرفة علينه
وتوسلته يگعد حتى نتفاهم خفت يصير بي شي
جريت بطل الماي شرب وما اكتفيت اخذته من ايده
خليت بيدي غسلت وجهه وهوَ گاعد واني مقابيله
دفع ايدي وجر كلينكس يمسح بوجهه ما راضي
رجعت شعره بأصابعي وضغطت على راسه
_ ما تخاف على نفسك ؟
_ لا ما اخافن .
_ راح يصير بيك شي والقران .
_ طبني مرض .
_ مو يزوجوني .
_ بنت الـ**** انعل عشيرتچ الصگط ومحمد .
يريد يدفعني منعته ومبتسمه على عصبيته
_ تضحك على نار گلبي بنت الـ*** .
_ مريض مو ؟
_ اي عجل شنو مو مريض .
_ ليش مريض ؟
_ حكمة ربچ بعد .
_ تريد ارجع وياك للغربية مو ؟
_ لا اكو واحد يجيب دوخة لراسو
لروحو ابقي هين مخلص منچ ومن شرچ .
لزمت بطني وگعدت على رجله حركته المفضلة
ومستحيل اسيطر على غضب ضـلـيل اذا
ما اگعد هل گعده سكن صوته وبلشت
أوتاره الصوتية ترتاح من الصيح
بست راسه ونزلت بست خده وهمست
_ شصاير شبيكم ؟
_ شعندچ عايشة هين وعايفتني هناك وحدي
ما تجين يمي مخليتني متعلعل مريض حتى
ما تخابريني وتسمعيني صوتچ شبلاچ وياي تعبتيني .
ذب حسرة طويلة وبعد عيونه من عيوني
_ البيت ياكل بيه هناك ودوم عصبي مو بيدي
خبلتهم ومحمد لا ليلهم ليل ولا نهارهم نهار
شني حرمتي مو عندي انا بصوب وهيَّ بصوب
من وراهم احرگهم وخالق السموات والأرض احرگهم .
حضنت وجهه بين ايده نزل عيونه على شفايفي
غـاليـة : تريد ارجع وياك ؟
_ اي رجعي بروّح ابوچ حتى هذول بعد ما يسون
وياچ مشاكل حتى لا تطلعين من البيت وتعوفيني
لان ومحمد اتسودن عليهم ، بوية ردي لعبي علينا
كلنا نعلي خيرهم كلشي بيدچ والقران كلشي بيدچ
ياهو يتنفسچ وياچ انتِ وبناتچ اذبحوووو اصلخهمم
بس ردي خليني ادحك عليچ تفترين بوسط بيتي .
غـاليـة : مو اگلك شيخهم تاج راسهم وتصير
عصبي واني مريضة مابيه حيل صياحك .
_ الحچي بيناتنا انا اسلمها من اسمع
شيخهم تاج راسهم منچ بس انا ابن *****
ابيع ثگل واسوي روحي عصبي حتى لا ابين
ضعيف افهمي يمتى تفهميني فحطتي گلبي .
ضحكت على كلامه ما يعرف اني حافظته
مو بس فاهمته بس اسوي روحي ما افهمه
غـاليـة : ارجع .
_ تردين ويايَّ ؟
_ اي ارجع وياك .
_ بروح ابوچ ؟
_ وروح ابوية ارجع وياك بس .
_ بس ما اريد أجبرچ على رجعه ومن تردين تعايريني .
_ ما أعايرك بس ما اريد احد يـ..
_ اششش غـاليـة محد يگرب منچ ومن البنات
بس رديلي فرفحتي گلبي رديلي .
من تأكد من موافقتي عافني وطلع عليهم
_ قبلت ترد يلة مقتدر اخذ امي وروحوا رجعوا
يومين واجيبها بين ما تلم أغراضها وتودع امها .
كوثر : وروح ابوك ما ارد اگلك اذا ما تصعد
ويام ادحك عليها صعدت وياك بالسيارة
ونرد كلنا هناك للغربية .
صعدت على بنات لگيتهن كلهن لازمات المحجر
منتظرات اصعد ويتأكدن من الكلام ومرجانة
نظراتها ما تتفسر ودموعها بطرف عينها
دخلت على غرفتهن واجت ورايَّ
مُـرجانـة: لو على موتي ما ارجع وياچ هناك
يروح يرجع تمار يخطفني ويضربني ويذلني
ويموتني لوووو تنگلب الدنيا ما اررررجع .
غـاليـة: اول تالي لازم ترجعين هناك على بيت ضـلـيل
لأن مستحيل يقبل تطلع زفة عرسچ منا يريدها
تصير مقابيل الغربية كلها ويرجعون صيتهم .
مُـرجانـة: منين عدهمممم صيت ويرجعونه
بزواجي مناك ، ذاك البيت مـا آروح بي ما افوووت .
غـاليـة : صوتچ راح يسمعچ .
_ وخلي يسمععع شنووو اخاف منه هو ما يگدرر
يحميني لا اني ولا خواتي ليش يريد يرجعنااااا
ليششش يخليني ملطشه خلي يتحمل بين ما اتزوج
وعود ياخذچ انتن وبنته يرجعچ يمهههه لو حبكت عنده .
صار وراح بالباب ما تدري بي ظهرها عليه
مُـرجانـة : مو بكيفه ترا والله اروح على وارث
عايش عنده بلا عرس ولا ادخل بيت ضـلـيل
اكررررهاااا واكره اهله تجبريني اعيش
عدهمممم انتِ تجبريني وانا تعذبت منهم يمه .
نقش : مُـرجانـة .
اول ما التفتت شافته ركضت ورايَّ
صاحت وصوتها يرجف ودموعها تنزل
_ ما اريدكم ما افوت بيتك خلوني عند بيبي .
ضـلـيل : تبقين هين واحنا هناك مگرن انا ؟
غير تبقين بوسط بيت ابوچ .
مُـرجانـة : ابوية مات ماعنده بيت هناك .
صليل : إنّا ابوچ .
بنفسي اعرف الهوسة الصارت براسها
سكوتها ودموعها النزلت على خدها من
سمعت كلامه خلتها ترجف وتگعد على چربايتها
مُـرجانـة: بعمرك ما راح تاخذ دور ابوية
طلبتها منك وماصرت گدها ، بعد لا ترگعها
خرابي والمصايب الصارت بيه من وراك
بعمري ما راح اسامحك اريد ربي ياخذ
حقي منك دوم ادعي الله ياخذ حقي منك .
سكتها غصب من خليت ايدي على حلگها
حضنتني وصرخت بكل حيلها
_ اذا تحبيني لا تروحين ويااااه يمه ابوس ايدچ .
رفعت راسي على ضـلـيل يتنفس بشكل مخيف
صدره يصعد وينزل ضاغط على روحه حتى
ما يصيح ويخوفها ، عافنا ونزل خليتها بحضني
جسمها يهتز بين ايدي من الخوف ودموعها ما وگفت
نقش : البارحة ليلها كله ما نامت بس تبچي
حتى وارث حرگ التلفون وابد ما جاوبته .
هزيت راسي وبقيت گاعدة راسها بحضني
الى ان نامت خليتها على مخدة وجريت تلفونها
وطلعت للسطح فوك بلا ما يحس احد ادور على
رقم وارث ماكو هوَ بس رقم واحد ومكتوب على اسم
” وليدي ” صفنت بالدقايق على اسم وصغطت
عليه وادعي ما يطلع وارث نفسه وليد بنتي .
اول ما اتصلت وصلني صوته خشن وعالي
يصدح حصرتني الضحكة وسديت الخط
ما تحملت ضحكت من كل گلبي ورجع هوَ يخابر
غـاليـة : احممم صباح الخير وارث .
_ مُـرجانـة شبيهااا ؟
_ مابيها شي .
_ عليچ العباس شبيها چا ليش تلفونها عندچ ؟
شفت ماكو احد ورجعت أجاوب
_ نايمة وردت منك خدمة .
_ عليچ الحسين مابيها شي .
_ لا زينة نايمة .
_ گلبي مقبوض بيها شي .
_ قابل اجذب عليك ؟
سحب نفس ويمكن وگف اسمع خطواته
_ لا حشاچ بس هيَّ جانت ضايجة
لليل بعد ما جاوبتني ردت اجيكم .
_ وين تجي دخيل الله اگعد مكانك
غير ضـلـيل واهل ضـلـيل عدنا .
_ اي عرفتهم عدكم .
_ شلون عرفت ؟
_ مو اجيت وشفت السيارات بالباب .
رحت على باب تأكدت ماكو احد ورجعت اسأل
_ يعني انتَ هسة وين ؟
_ موجود يمكم ببغداد .
_ والله ما ادري شگول .
_ اذا مابيها احراج اريد بس احچي وياها
_ تدلل بس اريد منك خدمة .
_ امريني اذا اگدر من عيوني .
بقيت احچي وياه وافهم بي الى ان وصلت اخر
شي صار وشلون نامت عاف گلشي وحلگي ناشف گال
_ ونامت هيَّ تبچي ؟
_ لا سكتتها .
تحمحم ورجع يستفسر
_ المطلوب مني شنو ؟
_ تقنعها تجي ويانا للغربية .
_ واذا انا ما مقتنع شلون اقنعها ؟
_ ليش ما مقتنع مو فهمتك ماكو احد بالبيت .
_ وهذا ابن تمار شاهين يفتر عليهاا .
_ شاهين ابن تمار هاوي نقش عاشگها ورايدها .
رجعت اقنع بي واحاول افهمه عقله قافل اكثر
من بنتي تالي من نشف حلگي گال
_ سهلة هسة الله كريم بس كون من تگعد
هليها تجاوبني حتى متفاهم انا وياها
وان شاء الله ما يكون خاطرچ غير طيب تدللين .
نزلت رجعت التلفون بصف مخدتها
ونزلت اساعد نقش بتجهيز الأكل
بعدها ما خلصت رحت شفت ضـلـيل
ماكو بالاستقبال وياهم مشيت على غرفتنا
لگيته نايم بسابع نومه ، خليت نقش تاخذ الأكل
ورجعت صعدت بعدني بالباب وسمعتها تحچي
هيَ وارث بالتلفون وتشكيله تالي خلصتها
اي ولا اي ولا وختمتها غيرت الموضوع على عرسهم .
خليتها على راحتها لملمت الفوك
ونزلت اجت الظهر ساكته ما نطقت بحرف
وبقت گاعدة يمي من سمعت طگطگه بالغرفة
مالتي خطتت خطوات متردده وراحت عليها
فتحت الباب وگفت يمها شفت ضـلـيل مبدل
من شافها تصرف طبيعي يلبس بالساعة مالته
مُـرجانـة : اجي وياكم عادي .
ضـلـيل : شعجب ؟
_ الخاطر امي .
_ وانا مگرن طرطور ذابحچ اناااا وما ادري بروحي .
دارت عليَّ مسحت على ظهرها وهمست
_ اصعدي فوك .
ضـلـيل : بلشي من هسة جهزي أغراضكم
باجر نرد للغربية لازم باجر عندي شغل .
وخلصت اليوم تجهيزات ولملمت كلشي
اكتفيت بالمهمات وبقيت البيت على حاله
اثاثه بي ، لليل اخذني سلمت على امي ودعتها
ومن الفجر طلعنا امه ومقتدر بسيارة
واني وياه والبنات بسيارة ثانية
وخلص الطريق كله يتعارك ويه ذبان وجهه
وساعة يصير شلونه يضحك ويسولف
وتالي اذا مرت سيارة يعيط عبالك ينگرص .
اول ما وصلنا اثنين شباب اجونا ما عرفتهم
نزلوا اغراضنا من السيارة واول ما دخلت
طلع شاهين ملابسة وايده وجهه كلها صبغ
_ يابه حيهممممم هلا بالرد ونور الغربية خالي .
كوثر : ها الخايس مشتغل صباغ مستهم .
نزل روحه يبوس بننوس وهي تبوس بي
شاهين : نصبغ غرفة الحلوات ونجهزها
صبغتها لون ابيض واختاريت اثاثها ابيض .
دخلنا للمطبخ اجتني نبراس رادت تبوسني
رفعت ايدي امنعها ما خليتها وصعدت فوك
والبنات ورايَّ يمشن وشاهين قبلنا
شاهين : كملتها وحتى نظفتها وهسة
رتبت اخشابها ، رأيچ نريدووو شيخة .
دخلت على غرفة بيها ثلاث اسره
منفصلة وكنتور ومرايا ولوحة چبيرة
البنات فرحن بيها تشكرت منه ذبيت عباتي
ونزلت شفت ضـلـيل بنفس مكانه على نفس كرسيه
گاعد اني نزلت رفع راسه شافني ورجع نزل عيونه
كوثر : نزلت بنت ذياب ينراد هلهولة
مات راد ينحلط على هل نزله سممنا وسمم حياتنا
چن ماكو حريم بعد ، ومحمد بنت شيخ ضاري احلى .
ضـلـيل : شيخ النعوله شيخ الـ***** وال****
لابو ***** لا تخليني اصف واعد ا****** لساني
لا يغرد و****** يطلع وحق الله مواويل انطي من *****
انعل خيركم لابو****** مو بديتي بعدنا ما ***** .
مد شاهين راسه وصاح بعلو صوته
_ تمنجدناااااا خالي هوووووب هووووب .
واني اول مرة ما اضوج من اسلوبة بالعكس
مدري شبيه ابتسمت ونزلت گعدت قريب منه
من اجت نبراس قدمت الچاي همست
_ لعد دلال ماكو ؟
كوثر : طلگها زلمتچ .
_ يا يمه ليش .
ضـلـيل : شعدها هين بس تخدم خليها
تلتفت لنفسها وحياتها ، سلمتها حقوقها
وسجلت بيت بأسمها وعفتها تروح بحال سبيلها .
قبل لا ارد رن تلفونه طلع برا يحچي
نبراس : وحده ماتت والثانية عافها حتى تبقين
بس انتِ ومحمد لو نجي على حقيقة
ما تستاهلي تغدين فدوة لطولو وهيبتو
شيخ الناس تحلف براسو كون ياخذ بنت
شيوخ مو وحده لگف بغدادية سمعتها تخزي .
غـاليـة : سمعت زلمتچ طلگچ وارث يگول
سحله خوش سحله رجله مگرمها وبعده
ما مخلص منه ، واخذوا منچ جهالچ
حقچ بعد متهسترة ماتعرفين تحچي
لأن لو تعرفين تحچين چان حسبتي
حساب وخفتي هسة بعيطه وحده
اخلي يلزمچ يطشر راسچ ويگص لسانچ .
كوثر : نبراس ولي صعدي فوك لا اگضبچ اكسرچ .
ضـلـيل : شكوووو مشتغلات تردم ؟
كوثر : سلامتك معاتب نسوان تگلها ليش ما سلمتي .
عدل البشت على اكتافه وظل يستنگي بالأحذية
اخذ وحده لبسها وجر اغراضه وصاح
_ انا رايح للديوان غاد ارجع على غده .
اول ما راح خليت شال على راسي عدل
ومن صعد بالسيارة قبل لا يطلعها ويسد
فتحت الباب مالته احچي وياه
ضـلـيل : اجت تغثني .
_ لالا .
_ شعندچ ؟
_ غرفة البنات بس 3 اسره وانا ؟
_ تنامين عندي عوزها تنامين بعد عدهن .
اريد احچي انفجر اسكت بي
اضرب على شفايفي وهو يصرخ
ضـلـيل : معترضه عجل هناك مووو انامن
بغرفتچ تجين هين وتستنكفين عود ما اريدووووو
ومحمد تنامين عندي وانعل **** اذا تعانديني .
ردت اشرد منه وافوت جر ايدي وغير نبرة صوته
ضـلـيل : اليوم انتِ طبخي مشتهي طبخچ .
_ الله يصبرني عليك .
_ سوي وليمة لحم چثري صار هواي ماكليت شي .
_ لا بالله .
_ تمنيت اسمع منچ الصار والحاضر .
_ ما يجن بالساني دوم .
_ انا اعرف شلون اجرهن من لسانچ وشوكت العرمة .
دخلت للبيت والشباب فتحوا الباب طلع وراح
جهزت الأكل ومثل ما يريد كثرت لحم وصحت
نقش تساعدني ومرجانة نزلت تسولف على
عرسها وتشوفني صور افكار بدلات وملابس
كوثر لفت راسها ونامت ، وبتها صعدت بغرفة عفاف
تنام اخذتها ألها، بس كملت الطبخ رحت
على غرفة عزيزة هيَّ شافتني وگعدت من فراشها
تبچي حضنتها وحضنتني غديت نار على حالتها
متغير شكلها وجهه شاحب ، سندتها ونزلتها
گعدتها ويانا بالمطبخ غيرت من نفسيتها
وانطلقت هي والبنات تضحك وتسولف .
للظهر رجع ضـلـيل من شافها ضحك واجه يمها
_ لا اليوم احسن الحمدلله ونازلة .
عزيزة : نزلتني غـاليـة للبنات رجعتهم ردت صحتي .
ضـلـيل : وردت حيلي بردتهم .
نقش : ما تگدرون بدونه وبدون مشاكلنا .
ضـلـيل : يا محلى مشاكلچن ولا وحشة هل بيت بدونچن .
اجت ننوس تركض شالها على گلبه خلاها
ورجع رفعها يرگصها وهيَّ تضحك
بكل صوتها فرحانة بي ، شوي والتفت
_ بوية نقش انتِ ومرجانة فوتوا الكراتين بالسيارة
وهاچ هذا المفتاح ارجعي قفليها .
اخذت نقش المفتاح وراحت وياها مُـرجانـة
يدخلن بيهن من ثاني كارتون حلويات صاحت
مُـرجانـة : ايدي توجعني ثگيلات يمه .
نقش : الفاااااهية حركي روحچ .
عزيزة : وراچ زواج يول تعلمي .
مُـرجانـة : يمه اصابعي تنجرح .
سحلتها نقش اخذتها تنطيها الخفيف
ما مخلي مخضر ولا لحوم وحلويات اشكال
العصاير والببسي وكوثر وگفت باب المطبخ
تصيح وتتأمر بس مدري ليش حسيت
بيها فرحانة بينا وبالبنات ، من تفوت منها
نقش تضربها على ظهرها بالعكازة عود عصبية .
ضـلـيل سبح وگعد بمكانه ومقتدر وعايلته دخلوا
علينا كلهم وشاهين نزل مغسل ومبدل گعد عنده
يسولف وياه شنو مسوي وشلون خلص الشغل
كوثر : ابشرك مقتدر انفك الحصار اليوم تسوك
اخوك راح ناكل مثل العالم والناس ، سواها علينا
حصار مجاعة صرنا من راحت لليوم مسواك
حرام يفوت للبيت ، هساع گعدت رحت وادحگ
كراتين وصناديگ السيارة تارسها ترس ردت بنت ذياب .
مد ايده على تخم فرشها ودار وجهه على
تلفزيون عود يغلس عليهم ، باب المطبخ مقابيله
من شافني اضحك ما سيطر على ابتسامته
ابتسم يضحك وبانت أسنانه وكأنه يگلي صح كلامها .
مدت نقش السفرة وگف شاهين على حيله وياها
اصب وهيَّ تاخذ من ايدي وتضحك ، وهوَ
بالباب ياخذها من ايدها ويرتب على سفرة
حتى ما ادنگ عليها ما يقبل ، اخر شي اخذت
صينية بيها لبن وگلاصات دفع ضـلـيل شاهين
ضـلـيل : امشي هناك اگعد بصف اخيتك نقش
خلي حرمتي تگعد يمي يلة .
رمقه بنظره صفح فر ايده عود ما قابل
وراح گعد هناك يصيح بنقش
_ كون يجي اليوم واگعد بي يم حرمتي
اوووف ، بالله مكان اريد ماعون متروس ترس .
ضـلـيل : صبيلي لبن بالله نستفتح بي .
صبيت گلاص بارد شربة كله وصاح بصوت مسموع
_ يلة بسم الله اكلوا اكل شيخة ال ضليل بالعافية عليكم .
عدلت شالي ونزلت راسي خجلانه حتى ريگي
نشف وهل زلمة ما يستحي ، والأبتسامة مو راضية
تختفي فشلتني وطيرت الهيبة ، من بلش
ياكل من كل گلبه مستمتع بالأكل ومستلذ
ملت جسمي عليه ويألته صارت نظراته بين عيني
_ طيب .
_ كلشي من ايدچ يختلف ويرد روحي .
ابتسمت بادلني ابتسامتي وكملنا اخذت
ننوس والبنات نقش ومرجانة لملمن كلشي
وغسلن ورتبن الصناديگ والكراتين وانا گاعدة
على كرسي ظهري واگف وننوس مقابيلي
اعدل بشعرها وارفعه كعكة مثل ما نحبه
اول ما خلصتها راحت على ابوها اخذها وطلع
بيها بالسيارة ، بالساعة ورجعوا اول ما فات صاح
_ غـاليـة چاي .
جهزته واخذته الهم لزم ايدي حتى اگعد گعدت
بس كمل مقتدر اخذ اهله وراح ، وكوثر عينها
على تلفزيون هي ونبراس ، عزيزة بالمطبخ
سحب ايدي وفتح علبة لبسني سوار بيدي
_ هاي شنو ؟
_ حق تعبچ اليوم .
_ شسالفة هذا واجبي .
كوثر : دخذيهااا عيني اخذيها نسوان
مشغلات العشرة شمع وما يفيد بزلمة
ونسوان هاجرات وگاطعات ومن طبخة
لبسوهن سوارات حگ التعب .
ضـلـيل : تستاهل ماي العيون .
كوثر : اگضب ايدك يولوووو هاي
اول مشكلة اطگك بدعوة اطشرك بيها .
ضـلـيل : عادي اليوم مستلم فصل فلوسي حلال عليها .
كوثر : شعدكم من فصل ؟
ضـلـيل : سالفة چبيرة صارت بس سديتها .
كوثر : جيبك ثگيل .
ضـلـيل : گدامچ حجية .
ساعة وصعدت للبنات رتبت وياهن غرفهن
ولليل نزلت نقش دقايق وصعدت گالت
_ عني يريدچ .
نزلت لگيته ماكو بس امه گاعدة اسرت على غرفة
كوثر : يغرفتو يريدچ خلي السوار بين
عيونچ وصيري زينة وياه لا يهجولنا من بيوتنا .
خليتها ودگيت باب غرفة عاط بعلو حسه
_ بعد ترخصي مو فايته ديووووان .
_ والله صوتك شهيرة .
_ گضبي اثمچ وفوتي .
اول ما دخلت بعدني بوسط الغرفة
هوَ راح گعد على چرباية وسألني
_ باقي كم يوم على زواج مُـرجانـة جهزتيها ؟
ملِكه …
انذار تحول البيت أنذار ليل مع نهار
كلها تشتغل عبالك مو عرس ، وارث وشيخ
فؤاد يجهزون بالعزايم وتجهيزات القاعة
ماناوي يسويها بالبيت ، بيرغ وهمام
على سيارات والأكل وشكو زايده ناقصة
البيت راح نعوفه بعد العرس بس نسوان
ساجر عدهن رأي اخر يتحزمن عليه اني
وميمونه روحنا تطلع لليل نشمر نفسنا
جنايز من الركض والتنظيف .
وصلت الأخر شي جلف الكراج وميمونة
تجلف ويايَّ بس بالها مو يمي
_ ميمونة مو احچي وياچ ؟
_ هاا ها وياچ .
_ شبيچ يا ستار استر مو على بعضچ .
_ تعاركت اني وصلوات .
_ ليش .
_ تقهر بيه تگلي والله مجهزه مصيبة
لوارث اخلي يبچي مثل ما يقهر بشهاب .
رفعت ايدي اشرت على سماء العالية والزاهي
يقطر من ايدي على ملابس صحت
_ وحق هذا الله الزمهاا ادگهااا دگ الزمايل
گلبي منفوووخ منهاااا ومن عمايلهااا
انوب الحوبة من وراهاااا بيرررغ تمرررض .
انرعبت شمرت الصوندة وضربت على صدرها
_ يمه اسم الله شبي ؟
استوعبت چفصتي انوب لا تروح البنية
اموت من تعرف هي بالدفرات عايشة
ملِكه : يول راسه واذنه دوم توجعه بي التهاب .
ميمونة : خلي يروح للدكتور انوب تزيد .
_ راح وكتب على علاج وشرب لا تخافين صار زين .
فاتوا همام وسهم يضحكون ويقلدون
همام : نحلة راح تصيرين مرتي .
سَــهم : نحلة ميت على هل يوم .
همام : نحلة ما مصدگ ننجمع .
سَــهم : نحلة سويتيني طلي .
همام : نحلة اني قليل ادب .
سَــهم : اوووي وليدي هههههههه .
ميمونة : شبيكم ولكم تخبلتوااا .
همام : يولو يگول الها نحلة عديناها .
سَــهم : دلوعتي وغلست انا وهذا .
همام : انصهر وعذرنا .
سَــهم : بي طفگه على عرس حقه يريد يعرس .
همام : بس تگله وليدي لاااااا گلش لاااااا
واررررررث الطنطل ابن الطنطل هل طوله
وليد مرررررجانة وسفه على الزم وسفه .
ملِكه : شعرفك .
سَــهم : سمعنا .
همام : ريت اذاني نطرررشت قبل لا اسمع .
سَــهم : ولك بعد شلون نحترمه .
همام : يا احترام بعد اسوگ عليه منا وجاي اسحله .
دخل بيرغ غمزلي عود گومي يأشر
عدلت شالي وركضت للمطبخ فات وارث
وشيخ فؤاد ، وهذا سَــهم وهمام وجوهم صارت
دممممم دمممم احمرررررر واحد لازم الثاني
يترافسون من يباعون على وارث
ميمونة : والله لو يعرف بيهم .
ملِكه : يطردهم والله .
طلع بيرغ من الأستقبال عاط بيهم
_ شبيكم حيوانات وجعععع .
سحبه همام من ايده يزاگط يضحكون
يريدون يسولفون السالفة لبيرغ ما يگدرون
وارث : هذولي شبيهمم راح اطلع اگطع
الحذاء على راسهم وحق هذا الله .
بيرغ : روح للرجل انا هسة اگضي بيهم التوبة .
من فات وارث وهمام غسل وجهه حتى يگدر
يتنفس ويحچي وبالغصب حچاها
_ يول بيرغ مُـرجانـة النتفه تگول لوارث وليدي .
بيرغ : هههههههههههههه خرب اهلكمممم
يا چلاب ولكمممم اسكتوووووا لااا يسمععع هههههه .
وارث : انووووب انتَ وياهمممم صوتكممممم .
همام : سكتنا وليدي يا بعد امك يا يمه .
يحچي وفات للبيت وارث اختفت ملامح
الغضب من وجهه وحلت عليه لعنة الصدمة
صبينا اكل واول ما نام شيخ فؤاد صعد وارث
فات على غرفة التدريب مالته ، كملنا الشغل
لليل وبيرغ لزم واجب واني لزمت واجب
تنظيف واهتمام بنفسي وميمونة جبرتها
ويايه لازم نبلش تجهيزات العرس .
ومن يومها بين التجهيز والترتيب صار
وحل علينا احلى يوم واحلى عرس
حضرتو بحياتي كلها ، من الليل واهل
شيخ فؤاد كلهم نورونا على بيتنا
وطبگت ويانا ايليا ترتيبات وللصبح
ما نايمين مرجانة فاتحة ويانا كاميرا
ونسولف على تجهيزات وتشوفنا اغراض سألتها
_ اگلج شو ملابسچ ما جابوها ؟
مُـرجانـة: قبل ساعتين اجه وارث وتراث علينا
اخذوهن وصلهم على بيت الجديد وراحت
امي ونقش وعمه عزيزة وياهم رتبوا الأغراض بغرفتي .
ايليا : منو اخذهم ؟
مُـرجانـة : جايين بسيارة تراث وراحوا وياه .
ايليا : ممتاز واووو .
للصبح تواعدنا احنا والعروس وصلنا همام
على نفس المركز دخلنا وكلنا بلشنا حمام غسل
وتدليك من هذا المضبوط عبالك احنا معرسات
وهاي الفاهية مُـرجانـة اذنها راحت من التلفون
ملتهية بالمكالمات بس ادردم هي ووارث اربعة وعشرين ساعة .
كملنا العصر مُـرجانـة ابد ما يوالمها مكياج مبالغ
اختارت كلشي على ذوق ايليا خفيف بخفيف
وشعرها خلته مفتوح على طوله بكل ترتيب
وعلى راسها تاج والبدلة راسمة جسمها
بطريقة تاخذ العقل ، كملت قبلنا وابن
عمهن شاهين اجه اخذهن قبلنا
سيارتين يمشن وراه شكيت صاير شي .
على ما كملنا خابرت على همام اجه اخذنا
اول ما وصلنا تراث وبيرغ بالباب نريد ننزل
على فد عيطه يعيطون خلونه ننرعص
_ اوگفن اوگفن وين ناااازلااااات بالفساتين
مگرنين مركبيهنننننن اوگفن ولك سهممممم
سوي درب خلي يفوت السيارة يولوووووو .
ملِكه : لابسات عبي صيح بيهم همام لابسات عبي .
همام : شني شواربهمممم ديكووووور يغارون .
اول ما نزلنا وهمام نزل يهوس
ووارث مختفي والوجوه ما تبشر بخير
من دخلت ام وارث بيدها تلفون سألتها
_ شصاير خالة .
_ هذا شهاب لاعب لعبته مايريد هل ولد يفرح .
ميمونة : شمسوي ؟
ام وارث : گاطع الطريق على سيارة ابن عمها
متضارب وياه يگله اريد احچي وياها
والبنية متخربطة من شايفته
ووارث تخبل راح عليهم هوَ واخوي فؤاد
بس من ساعة اختفوا وما عرفت شنو الصار هناك
خايفة والله خايفة مبين من اختفائهم كل هل
فترة الأخبار ما تبشّر بخير خايفة وگلبي
قابضني لا صاير شي بالبنية .
ملِكه : بيرغ ما يلزم اخو .
_ خابر بيرغ شهاب ما يرد وارث يحلف بي ما يسوي شي
وهم بيرغ ما يريد يكسر بكلمته وتخرب فرحة وارث
بس الله يستر كون ويمر اليوم على خير .
ملِكه : كون يلزمه وارث ويموتو .
صلوات : كون يموتچ يا سايبه يا بنت الفگر .
ملِكه : احترمي نفسچ ترا واصله ويااااچ للهامة .
بيرغ : شكووووو شهرتنااااا .
ملِكه : ماكو شي نسولف على صالون .
حجيتها ولملمت المشكلة خايفة تسوء حالتو بسببي .
تنفست بغضب وصعدت فوك البس حذائي الثانية
ودخل بيرغ وگفت على حيلي من دحگت نظراته
مردت اصابيعي اول ما اقترب سحب ايدي حضني
طبع بوسة على رگبتي وهمس بأذني
_ مكحلة العيون وهيَّ بلا كحل تكتل .
طبع بوسة على طرف شفايفي ويتأمل عيوني
_ عجل مو تعرفيني نار اصير عليچ ، ما حسبتي
حسابي لابسة كل هل جمال ، هاي مو طلعة طلقة .
ملِكه : وانتَ طالع عريس بعرسك ما جنت هيچ حلو .
بيرغ : ههههههه شگد بربوئه هل بت يول
هاي نفسها ملابسي بيوم عرسي .
ابتسمنا ونظراته تذوب بيه بكل خطوة يخطيها
توترت وتخربط وضعي وخجلت شردت من ايدو
رحت ارش عطري صار بظهري مال شعري
استنشق عطري طلعت منه حسرة صبر طويل
بيرغ : هواي على گلبي ، خطواتچ تسوي زلزال بگلبي
ما تمشين گاعدة تتمايلين عليَّ شگد حلوة
طالعة الخاطر الله وعبادو والكائنات .
سكت واقترب أكثر همس بقهر
_ علميني شلون أتحمل أطلّعچ وانتي بهالشكل
گوليلي شلون أتحمل غيري يشوفچ ؟
وگع العطر من ايدي على صوت الصراخ
جوة بالبيت ركض واني اركض واستر بروحي
لگيت وارث نايم وارث و شهاب بوسط الصالة
يضرب بي بالمسدس وصايرين دمايه واحد
يضرب بالثاني يفاككون بيهم وامهاتهم
دگ لطم وصريخ ، تراث يضرب بشهاب من خنگ
وارث وبيرغ يجر بيهم بنص الهوسة وگع
بيرغ ما يتنفس فقدت عقلي وركضت
عليه اضرب بخدو واصرخ حتى يساعدونه .
شهاب زحف راح لبيرغ اخذو من بين ايدي
يضرب بوجهه وعاط بيهم
_ ضربته بالغلط براسوووو بالسلاح
همااااااام يول هماااااام السيارة .
گضب راسه يتفحص بي بيرغ بشرته
صارت بياض عبالك ميت وايدو اگضبها ثلچ
دموعي جرت على خدي فتح عيونو متألم
شهاب : هماااااام شغلت السيااااارة .
ملِكه : كله منك انتَ شنوووو من بشررررر .
شهاب : سدي اثمچ لا افررررركووووو .
انضرب بوكس على وجهه واخذ وارث
بيرغ فتح عيونو يشوفها ولزم ايده يفحص نبضه
ظل يسأل بي كم سؤال من يريدون باخذونه صاح بيهم
بيرغ : صرت زين ما اروح للمستشفى وارث .
وارث : مااا يروح كافي بس تعال اشرب ماي
اغسل وجهك هذا العار القندرة العتيگة ضربك بالمسدس .
بين ما غسل وارث صعد فوك ما نزل اله ما بعد ساعة
وشهاب گاعد بالصالة يتعارك هوَ وبيرغ ، من لمح
وارث نزل التلفون على اذنه يخابر هيبة يمشي
وريحة عطره تغلغلت انفاسهم كلهم ، لابس بدلة
سودة مفصلة على جسمه تبرز عضلاته العريضة
قميصه أبيض مفتح اول زرين مبين صدره
وربطة التقليدية بين ايده ما شادها بالقميص
ساعة سودة جلد بيده والحذاء تلمع لمع بس
أهم شي نظراتهنظراته متروّسة ثقة
يعرف نفسه انتصر غصب عنهم .
دخل على زلم وبصوت مسموع گال
_نتوكل ، ال ضـلـيل ينتظرونا ؟
بعدني بالهبطة ركضت فوك اني والبنات عدلنا
مكياجنا بغرفتي لبسنا عبي على راسنا وطلعونا
شفت اهلي گلبي راد يطلع من مكانه بوستهم
بس مستعجلين راحوا بسيارة ابوية ، بعدني
بالباب وأشر بيرغ بيدو
صعدت وياه خايفة الخوفة بگلبي
_ بيك شي .
_ لا بس دوخة هسة ساعة وتروح .
_ اذا تريد ما نروح نرجع للبيت نام .
_ تخافين عليَّ ملِكه ؟
_ لا بس اخاف ما تگدر تسرق ونسوي حادث .
درت وجهي على شارع وما گدرت ما اطلع تلفوني
واصور انبهرررت انبهررررت بعدد السيارات
لا تعد وكلها سيارات راقية اربعة اربعة يمشون
والهورنات والمزيقة ماوگفت ثانية ، زلزلوا الشارع
واولاد الشيخ فؤاد طللعين من سياراتهم
والأغاني هرجت الشوارع بعدنا نمشي
وبالمعنى الحقيقي الشوارع انگطعت
وصار ازدحام بحيث ساعة ونص وصلنا الهم .
نزلنا يتراجفون على نسوان منا لمن دخلت ردت
اشهرهم اختنگت طگيت ، وصلنا على بيت
ابيض چبيررر عالي والعالي ربي يمتح النفس
امشي والگراج ما يخلص دخلنا على صالة
چبيرة ومرجانة صارت مقابيلي ياربي شگد طالعة
حلوة ، رحنا عدها من الخوف خطية ما تجمع
كلام أتأتأت وايدها بيها رجفة مخيفة .
ميمونة لزمت ايدها تحچي وياها وتفهمها ماكو شي
ونقش تشربها ماي ، والنسوان اقاربهم واقاربنا
صارن تمن شي فوك شي اختنگنا ، وايليا
طفرت گعدت يمها گرصتها وصاحت بيها
_ هسة بس يحضنچ ابو الورث انتِ شنو تسمي .
مُـرجانـة : ابو الإرث .
_ اي بس يحضنچ تنسين الدنيا بين ايده
اخذيهااا مني انتِ تموعين تروحين تسيسين بالبلم
وبلمنه طگ بلمكم يهل الغررربية هههههههه .
ملِكه : شگد فويسده هل بت دقيقة
وشگول لأمي من اروح انكسرت الشيشة .
ميمونة : هاي عود رزلتيهااا زيديها انوب .
مُـرجانـة : اريد امي .
ايليا : والعباس اذا تگولين لوارث اريد امي .
ملِكه : يحطچ ويدگچ صبررر عليچ صبر ايوب .
مُـرجانـة : وين امي اريد امي .
جذب انتباهي همسات النسوان ، الزلم بالمضيف
وهوسة الشباب برا والمزيقة العراقية تطربهم
ركزت بالهمس وعيونهن بالتلفون سمعتهن
اقتربت من وحده قريت لمحت تلفونها
ورحت فتحت الفيس مالتي ابحث وبسرعة
طلعلي منشور مشترك بين ال ضـلـيل والموروثين
قبل دقايق يعني من وصلنا اتفقوا عليه
والشيوخ الكبار نشروا هل كلام بعد اتفاق مكتوب
” السلام عليكم ورحمة الله وبركاته
يتقدّم أهل العريس بخالص الاعتذار لأهالي المنطقة
الكرام عن الإزعاج الحاصل اليوم بسبب موكب
زفّة العرس الذي تسبب بانقطاع مؤقت لحركة
السير في الشارع ، نحن نثمّن صبركم وتفهمكم
وندرك تمامًا أن راحتكم فوق كل اعتبار، وما حصل
كان نتيجة للفرحة الكبيرة بزواج ابننا الكبير
ولم يكن القصد منه التسبّب بأي ضيق أو تأخير
نكرر اعتذارنا وامتناننا لتعاونكم وتسامحكم
ونتمنى أن تكون أيامكم عامرة بالأفراح والمسرات.
مع التقدير والاحترام
عشيرة ال ضـلـيل والموروث .
تعممت على كل مكان رحت على بنات
وهاي مُـرجانـة وجهه يتلاطم صحت بيها
_ الزلم تتعذر من الوادم برا والعروس تبچي تريد امها .
مُـرجانـة : اگلچ يمكن راح ابطل خفت .
كلنا صفنا بوجهه اني لو ما عيب اطگها
براشدي اصحيها على زمانها وراس ابوية
اجت امها يمها گعدت تحچي وياها بصوت خافت
والنسوان اقاربنا ما مصدگات هاي امها عيونهن
تبحلقن بصدمة بقيت اقرا معوذات من يمي
وامي بصفي تضحك عليَّ .
بقت دقايق تحچي وياها ، درت نظراتي
على باب وبقيت مذهوله من دخلت زهرة
وتركت الكل وتوجهت مباشر على مرجانة
تسلم عليها بس اطول بالبوسة وشفايفها
تتحرك مبين تحچي وياها ، وبعد كل كلمة
مُـرجانـة توسع عينها اكثر واكثر وزادوها
وكلنا فزينا من ضرب چبيرهم عمها لمرجانة
ضـلـيل على باب
_ طريق راح يفوتون زلم .
خلينا عبي على راسنا كلنا وتعالت اصوات المزيقة
اقتربوا من الباب صارن يدگن بگلوبنا
اول ما دخل وارث وخلفه شيخ فؤاد
وياهم بعد شيخ ثاني ، وشيخ ضليل
وهل مُـرجانـة نگلب حالها حال دموعها
على خدها تتسابق وگعدت لازمه رجلها
تهز براسها ولأن اني قريب منها من
اقتربوا منها اسمع كلامهم شفتها
ترجف ونظراتها ضايعة جسمها يهتز
گضب عمها ايدها يسألها شبيچ جاوبتو
_ عمي ما اريده ما اريد وارث .
يتبع …
الفصل التالي اضغط هنا
يتبع.. (رواية الموروث نصل حاد) اضغط على اسم الرواية لتجد الفهرس كاملاً بجميع الفصول.