رواية الموروث نصل حاد – الفصل السابع والعشرون
♛ 27 ♛
درت كل جسمي من قوة الوجع احمي
وجهي انتهيت صارت كل ضرباته على
ظهري وتمار لو عنده ايد يضرب بيها
ينهيني بس مخلي زلمة ضخم اسمه طه
ينهش بحيلي ويحطم اعظامي
تمار : نزلتي راسناااااااا .
_ لااااا والله بـ ، اخخخخ بووووية يابة ظهري
عليك الله عمي بروح ابوية بروح اخوك بس
احجي بس اتنفس راسي عمي راسي .
جرّ شعري صار يلفه بين ايده ويرگع
براسي بكل قوته بجام السيارة الى
ان تفلش الجام وانفطر سحبني تمار
من ايد طه صار ظهري على بطنه
مد ايده لفها على رگبتي وعصرها
بين ايده وطه يضرب ببطني ويصرخ
طه : شايلة ابن حرام وامچ تختل بيچ
وتقنع بشيخنا يتستررررر على عارچ .
روحي احس روحي طلعت من عيوني
وطگت رگبتي بين ايد تمار اللي مربوطة
بشغلات قوية عبالك حدايد وتنبت برگبتي
تنار : راح اذبحچ اليوووم ذبحتچ على ايدي .
حجاها وافتهمته من وگفت السيارة ونزلني
سحل طه من السيارة واجت سيارة ثانية
بيها اثنين زلم معگلين جروني ويطبطبون
على اكتاف تمار وبصوت واحد يصيحون
_ بارك الله بيك اغسلوا عارها وارجعوا مرفوعين الراس .
اخذني طه سحل من شعري وملابسي
صارت تتشگگ بين ايده سحلني التل
عالي يجر بيه بلا رحمة وصلني المكان
عالي بي حجار لون رصاصي كبار
مشمرات بلا ترتيب ولزم وجهي حيل
يمرد بي ويصرخ : هذا تل الرخيصات
بنات الشوارع وبنات الليل اللي لحمهن
رخيص هذا مكانهن هنا تاليها شوفي
حتى گبر ما ألهن مثل الچلبات ذبحوهن
ودفنوهن حتى اسم على گبر ماكو ومحد
يذكرهن ويزورهن نكرات وانتِ راح تودعين وياهن .
شفت بقايا ملابس بنات ، وبقايا اصابع بنات
اثار دم احمر يابس ، خصلات شعر طالعات
من الحجارة ، سوار مكسور وسجين مصدي
وريحة قوية تخنگ مو طيبة ضربت براسي
تخبلت بقيت اسحب بروحي من بين ايده اريد اخلص .
وگعت على رجع تمار بستها ورفعت راسي أتوسله
_ بروح ابوية بغلات اخوك عليك خلي ابوية
بين عيونك اني بنت اخوك الله يطول عمرك
حباب لا تموتني اخاف اموت ما اريد اموت
اريد امي لا تدفني هنا ابوس رجلك هاي
ابوس رجلك بس لا تموتني اخا….
ما گدرت اكمل من قوة دفرته صارت بين سنوني
عضيت لساني والدم يجري ظل من حلگي
وجسمي من الوجع يون طلع طه مسدس
صفنت على ايده هذولي صدك راح يموتوني
يمههههه وين امي اريد امي دموعي تصب
بعد ما اگدر اشوفها امي شلون امي يا يمه
نقش ننوس حتى وارث ما ودعته راح يمووتوني .
واحد من الشيوخ دفر الشعر الطالع من الحفرة
وبصوت واضح وبعدم رحمة يوجه بيهم
_ قبل لا ترميها صورها فديو احرك گلب امها
حتى بعد لا تبيع بطولات وتشرد بناتها
ونسخة ثانية دزها لهذا ابن ساجر اللي
فعل بيها هوَ واخو تونسوا بيها اثنينهم
وشمروها ردوها نغسل عارهـا حتى يبطل
بعد منه ويكف شرو ويعرفها ماتت يلة بساع .
عافني طه وطلع الطلق يملي الشاجور
وذاك الثاني فتح تصوير ، وتمار يگول
_ انا من خطيت هل خطوة بايعها ويه اخوي
دام ماعرف يطم عار بنت اخو وگعدها يوكل
بيها ويعزلهن بيت وحدهن مرتاحات ي****
بكيفهن هناك ببغداد ويتستر على حملها
وشرداتها و****** اطم عارها وافلت اطلع
من العراق كلو ، هو حتى ولدي واحد بالسجن
ابن ساجر شمرو والثاني ضـلـيل يريدو وياه
يتستر على ****** خرب بيها من *****
ما اريدها ما اگدر اعيش واحنا عار مرافگنه .
زحفت على ركباتي والتصوير مفتوح زحفت
وشهگت من سحب طه رجلي وگعت على بطني
ووجهي نلطمت بالگاع وسحلني سحل مثل الذبيحة
جرني على حل حال مسافة وصوت الطلق عصف المنطقة .
وارث …
دخلـت آلبيت بعد يوم متعب ادور على بيرغ
لگيت خلف منتظرني بالأستقبال وصوته عالي
شغلت جگارتي ودخلت سألته بدون مقدمات
_ خير شيخ خلّف زياراتك زايدة هل ايام ؟
_ يولو شيوخ ال ضـلـيل مو يخابرون عليكم
ما تردون شبلاكم ولد سـاجر فشلتونـا .
نظراتي توجهي على بيرغ زعلان وما راضي
يخلي عيونه بعيوني داير مني متعصب
وارث : لا تدخل اطلع منها بكل احترام .
خلف : راح توگعونا بيد ال ضـلـيل هذولي
الگاع ما تحملهم راعين شر يولو استروا علينا .
وارث: عليك الأمان اشرب چاي .
حجيتها ومديت ايدي بجيبي طلعت التلفون
من اهتز بجيبي يعلن عن شعار ، دخلت امي
بيدها صينية ضيافة خلتها مقابيل خلف
طفيت الجگارة وبعدني على وگفتي فتحت
الشعار من رقم غريب انتظرت ثواني يحمل
رفعت راسي على بيرغ وصحته
_ وينك تعال ويايه لغرفة امي اريدك دقايق .
بيرغ : بعدين هسة مو فارغ مشغول .
نزلت راسي شفت الفديو حمل بس زرع خضار
بالبداية وحجار ، بالي عند بيرغ رديته
وارث : لا تصير زعطوط عندي سالفة وياك .
بيرغ : صدك لو گال ابو المثل ان لم تستحي
فأفعل ما شئت ، عندو سالفة هوَ دروح مني بابا .
رفعت حاجبي هزيت ايدي ونزلت نظراتي
فتحت الفديو وانعصر گلبي من صوت الصريخ
هذا الصوت مو غريب بس عقلي مو راضي
يستوعب مصدر الصوت الى ان امي من بعيد
وگفت على حيلها وعاطت بعلو صوتها
_ يا يمه هذا صوت مُـرجانـة .
انكتمت اصوات الدنيا كلها وصار بس صوتها
يدوي ويتكرر بأذني مثل انذار موت واحتل گلبي
دماغي مو گادر يستوعب بيرغ اهلي كلها
صارت حواليه يشوفون الفديو والفديو نفسه
ينعاد غوشت على شاشة رفعت راسي وصحت
_ يمه هاي مُـرجانـة يمـه هاي مُـرجانـة تزحف
ويسحلوووهااااا هذااااا صوتهااااااا تصرررخ
يضرررربوهااااا كتلووووووهااااا
نار شبت بصدري اكلت گلبي لزمني بيرغ
يهز بيه واخذ التلفون همام من ايدي ضربت
على راسي ومن قهري ما اشوف تصرفاتي
خارج عن سيطرتي بعد فقدت
وارث : كتلوووووهاااا بيررررررغ ولك ذبحوووهااا
راحت مني موتوهاا وما رجعوووهااااا ولك
بيرررررررغ گلبي بيرغ ذبحوا گلبي .
فقدت بگد الصياح وامي تلطم ، شفت ملِكه
بصفها ادگ على راسها وميمونة وگعت
بالباب دموعها ترست ملامحها ، جريت
التلفون من همام اكبر بصورتها وجهه
من الضرب مختفية الملامح الدم بس الدم
ترس وجّهه رايدها تفوتها بتراب التل
تلزم بي حتى ما تتحرك بس قوتهم
اضعاف قوتها ، سحلوهااا واختفت
بس صوت الرمي بعد ينسمع ويرج التلفون .
زحفت وگفت اركض صعدت على درج
واتعثر بخطواتي دخلت الغرفة سحبت
“البي كي سي ” من الكنتور وخليته مفتوح
بلا عقل اهرول وصلت الباب الشارع وصحت
وارث : لا تجون ورايه لا تلحگوني لااااا تتورطون
اليوووم انا وال ضـلـيل دم ياهو يصير مقابيلي
ادگه بطلقة راسه اطيرررررره بيهااااا والعباس .
طلعت من البيت ركبت السيارة والشر تارس عيوني
واسمع خلف يخابر وبيرغ يهدد بي رحت مايهمني
شيصيرررر خلي يصير ماكو بشر بعيني بعد
فقدت ، دخلت منطقتهم بكبرها صايرة مظاهرات
من كثر العالم بيها والشيوخ والزلم ترس الشارع
جريت السلاح ونزلت والشر ترس عيوني رفعت
السلاح وفرغت نص الشاجور بالجو مشيت
بخطوات ثگيلة احس بروحي اريد اوگع
وقبل لا اوصل اربع سيارات وگفت خلف
وربعه واخوتي اول السيارات نزلوا كلهم
يحمون ظهري وصلت لضليل صحت بصوت يدوي
وارث : ليشششش ذبحتووووووهاااااا ليششش
مو طلبتهااا منك ، مو بلغتك رايدهاااا انا رايدهاااا
ليش تذبحوووهااااا بعدهاااا صغيرة حلفت ولك
حلفتلك طاهررررة البنية طاهرررة .
انخطف الدم من وجهه وبصوت مبحوح سألني متعجب
ضـلـيل : ذبحوا منو ؟ شبلاك داخل علينا مسلح ؟
جريت المبايل شغلت الفديو هو شاف الفديو
وگع ما تحمل المنظر يدگ على راسه بكل
حيله وشمر العگال والعالم انخبصت
_ يا مصيبتنا يا يابا يا بوووية انهبنا .
جر بيرغ ايدي وهمس بأذني
_ مايعرف يول انصدم مثلك .
وارث : اسمع انتوا وشكو واحد بيكم ، دمها ما يروح
هدر اذا ما اذبح زلمكم اذا بيكم زلمة اطحنكم وادوس
راس كل زبالة يسندكم انتوا حيوانات مايصير
تعيشون حگهاااا والله حگها ما يبرد دام اشتم الهوا
والله اشبع الگاع بدمكم والله .
مقتدر : مـا تدحگ بعيونك حالنا من حالك
مانعرف بالصار بيها اخر مرة اخذوها
واختفت وكلنا مخبوصين عليهااااا .
وارث : چانكم مووو زلم وماتگدرون تحافظون عليهااا
ليششش ما سلمتني حرمتي ، اسمععععع ضـلـيل
اجاكم الموووت على گد عمرها كل سنة زلمة
وانتَ احسب شگد عمرها وكم زلمة راح يروح بيها .
سحبت السلاح وكملت رمي وحتى البيت فلشته
مقتدر : روح مناااااا لا تورطنا بشرك .
وارث : وگعتوا بحلوگ أسباااااع وحگ ابو دم الحار
وچفوفه اطلع مو زلمة اذا ما خليتكم تتوسلون بس
افك منكم وفلااا افك ولا يبرد گلبي بناركم .
واحد من زلمهم صاح
_ عمي مانعرف بالصار غير منك البت اختفت
وهسة وصل خبر موتها منك عرفنا شتريد انتَ ؟
وارث : ياهوووو چتالهاااااا تسلمني ذباحهااا
اذبحهمممم همه وعوايلهممممم والله .
_ ما نعرفه منووو .
وارث : اريدهم هذول بالفديو كلهممم تسلموني
راسهممممم اريدهم عايشين بيدي اذبحهممممم .
بس سمعت كلمة ما نعرف فقدت كل ذرة صبر بيه
ركضت وبيرغ قبلي لزم واحد بيهم گطعه
وانا كمزت على مقتدر اريد اوصل الضليل
واخوتي من صوت خلف وجماعته يفاككون
ويردون يضربون بيهم ويانا والعالم انخبصت
سحبنا خلف وجماعته بعد دخلوا علينا بسيارات
صعدت بس ماناوي على خير لا والله اليوم ما اعديها .
اول ما وصلنا على بيتنا اتصلت على شخص
ساعة وكفت سيارة بيها 16 تابوت خشب ، و16
چفن ابيض مغلف ، بقيتهن بنفس السيارة
وركبت بسيارتي انا وبيرغ وخليت همام وسهم
حماية على بيت بين ما نرجع ، فريت المناطق
على كل چبير من ال ضليل كل بيت بي شيخ
تابع الهم لو مساندهم خليت تابوت وچفن
وعلى كل واحد كتبت
” جهزت تابوتك والچفن موجود انتظر ساعة موتك ”
وزعتهن ورديت على اراضي مالتنا دخلت بيها
شغلت الفديو على شاشة الچبيرة خليته
يتكرر مقابيلي ياريتني المح شكل واحد بيهم
واعرفه ويوگع بيدي ، عيوني احس بيها نار
وجسمي من صياحها يتشنج گلبي اخخخ
يا نار گلبي ويا قهري وحسرتي عليها .
وگعت بالگاع رجلي بعد ما تشيلني ولا الجگاير تطفي
ناري دخل بيرغ شافني طايح سد التلفزيون
ونزل لمني بيده وباس راسي بكسرة خاطر
_ وارث راح تموووت يول صحصح .
_ ذبحوها وما رجعوووهاا لك بيرغ
كسروا گلبي دمروني والله دمروني .
دخلت امي بنفس هل لحظة سمعتني
نزلت راسي فشلان تشوّف دموعي
ام وارث : امشي اخذ حقهاااا لا تظل مثل النسوان تنوح .
_ تستاهل ابچي عيوني عليهاااا وانوح يمه .
ضرب بيرغ على ظهري وحزنه اضعاف حزني صاح
بيرغ : رعبتهم رعبناهم وحق الله وعيونك
ال ضـلـيل كلهم داخلين انذار مـن التوابيت
والچفن وبعد ناوي عليهم انهيهم ما عاش
بعدو ولا كان يكسر اخوي وينزل دموعو .
فات ابوي فؤاد ولده وياه كلهم گعد
بالگاع هو وعگاله والبشت وصاح
_ حقك زعلان مني وما تخلي عينك بعيني
وعلي حقك بس اخذها من هل شارب من هل
ساعة دم ال ضـلـيل مهدور مثل ما هادرين دم مرتك .
خليت ايدي على راسي وعاتبته
_ انتَ قنعتني اسلمهاااا گلت صاحبي انا اكفله
ما يذبحهااا غدرتني مثل ما غدروهـا نارررررررر
بگلبي منك ومنهمممممم راحت البنية انا كله
مني غبي انا غبي هي بعد شردت ودمها مهدورر
شلووون اردهااا وهيَّ دخيلة عندي شلووووون .
تراث : اذا تظل تعاتب ودگ وتنوح ما تبرد نار
امشي نعلگها عليهم ونلعن خيرهم امشي .
وارث : واخذت حقي منهممم وهيَّ منووو يردهااا
انا اريدهااا والله منتظر تخابرني جنت منتظرهاااا؟
طلعت من اراضينا رديت للبيت اجهز أسلحتنا
ساعة وصاحني ابوي نزلت ماعندي دخلت
على استقبال واشوفه استقبل كبار عشيرة
ال ضـلـيل ومن اول ما دخلت ردت اطلع سد الباب
_ بوية احنا حالنا من حالك ما نعرف والله .
_ منوووو ذبحهااا سلموني اسمائهم .
_ والله ما نعرف شلون تريد نثبت ما نعرف .
_ سلموني چتال حرمتي وألكم مني الأمان
هي مهلة 24 ساعة اذا ماوصلتني اسمائهم
واشكالهمممممم وحگ بدرّ الهواشم بيوتكم
كلهاااا مراقبهاااا اي واحد بيكم يطلع من بيته
اطگه چيله انثر مخه على حياطين هوَ وكل
واحد من اهل بيته چبير صغير ماعنده اوگف
حگ مرتي ودمها مايررروح هدررررر والعبااااس .
نهيت الكلام وطلعت خازر ابوي على استقباله الهم
طلعهم بيرغ والشر ينط من عيونه ، وظل برا يخابر
ماعندي حيل حتى اسأل شنو يگدر يسوي بس
اول ما رجعت صعدت شفت همام وسهم مجهزين
كل الأسلحة ، اخذنا كل واحد واحد ونزلت
وقبل لا يطلع النهار نزلنا والنفط بيدنا
ما خلينا بيت ما شمرنا على بابهم وشغلنا
النار كلنا بوقت واحد بوبهم كلهم اشتعلت
والصياح بصوت واحد هز المنطقة بكبرها
برزت روحي شوفتهم نفسي .
وقبل لا اصعد سيارتي فريت سلاحي وكسرت
سيارتين بالباب سويتهن تفصيخ اريد اطفي
نار گلبي لا بتوابيتهم ولا بالچفن ولا بالنار
ولا بالتكسير ولا بتهديدات طفت هل نار
جانت تزيد وتاكل بگلبي وحيلي .
مُـرجانـة ..
اخر ما سمعته طلقهم والرمي من كل صوب
والتل شلون تهزهز برميهم وغلهم ، متت جنت
اظن اني متت بس خاب ظني وفتحت عيوني
بنص خرابة بابها مقفول وارضيتها قذرة
جدرانها تريد تنهدم بأي لحظة ، ريتني
ميته بعد ما گعدت تمنيت انا ميته ومخلصه
على كمية التعذيب والضرب اللي عشته .
حاولت اتذكر اخر شي صار تذكرت شفت شخص
غريب ما اعرفه او يمكن اعرفه شايفته مره يمكن
هو هم صار يرمي عليهم يوگف بيهم حتى ما يموتوني
منو هذا ؟ وشنو غايته ؟ وليش منعهم ؟ ما ادري .
مر وقت طويل بين خوف وأوهام وجع من ضربهم
وخوف من مجهول انفتح الباب ودخل شخص
فكيت عيوني على وسعها اريد اشوف عيوني تغوش
على اثر صرخته العالية غمضت عيوني بكل قوتي
وعكفت كل جسمي جريت رجلي على صدري وحشرت
روحي بالحايط ارعش من الخوف والوجع ، اهتز كل
جسمي اثر لمست إيده الباردة آيدي المتألمة .
وكلامة عصر گلبي وقلص كل جسمي
من رفعني وثبت وجهي وبثبات نطق كلماته
_ لا يروح بالچ بعيد وعبالچ خلصتي موتچ
حيّ صلاة يصيررر يعني يتنفذ بس هسة مو وكتها .
جر شعري تگطع بين ايده وصرخ
_ احچيلي شلون صرتي **** امچ علمتچ مو ؟
شهگت متألمة وهمست بتعب
_ انتَ منو تمار وين و..
بهل ثانية حسيت إعظام وجهي تتكسر بين قبضة
ايده بكل حيله يضرب بلا رحمة ينزل ايده على وجهي
_ تمااااار حاف هيچ بلا عمي بنت الـ***** .
رگع راسي بالگاع وعت ملابسي صارت تشگگ بيده
لزمت بدايتها استر بيها من رجع رگع راسي عفتها
_ خاب بربوك بعدچ بگد چف ايدي فريتي عشاير
هجمتي زلم وسجنتي شباب ال ضـلـيل كلها
مجنده گ**** يتذابحون ويانا على عرضنا .
هزيت ايدي بـ لا ماعندي حيل احچي بعد عاط
_ احچي شسووويتي احچي ؟
_ مـ مـ ما …. ماسويت والله مـ ماسويت .
_ انتِ فد وحدة گ***** ما بقيتي بنفس واحد .
_ لا و والله والقر … والقران لا ابوس ايدك عوفني .
فقدت الوعي من ضربته على گلبي ورجعني
اصحيصح من شمر ماي بوچهي وصرخ
_ انتِ گ**** گولي انتِ گ**** .
داس على بطني فتحت عيوني حيل من صاح
_ احچي لااااااا اطلعععع روحچ احچي .
_ امي اريد امي .
دخل تمار على صفحة يشاهد وهذا رجع يملخ
بيه ويشيلني ويرگعني بالگاع گولي انتِ *****
مُـرجانـة: اني **** بس عوفني ابوس رجلك
ابوس ايدكم عوفوني اريد امي عمو شبيك
الله يخليك اذا تحب ابوية عوفني بروح اخوك .
تمار : انعل ابوچ لابو روّح ابوچ اشتعلت روح
ابوچ يوم ما تزوج امچ ا**** وعرفنا بيها
وجابت هيج نسل عاق مال ***** مثلها .
دموعي بعد ما اشوف بعيوني من دموعي
استسلمت بيدهم ضرب اهانة ذل ايام مرت
واني ما اعرف بالساعة بس من اشوف نور
معناها دنيا صبح ، واذا صارو الغرفة ظلام
معنى دخل علينا ليل ويبلش عذابي وضربهم .
غـاليـة ..
اصعب عشر ايام مرت عليَّ بكل حياتي گطعت الماي
والأكل مادخل بطني عشت على مغذيات نمت
مستشفيات وانهيارات ما فارگتني بنيتي
ما فارگتني گالوا مُـرجانـة ماتت نظر عيون
امها ماتت هل خبر ما تقبلته ولا گدرت استوعبه
ومن بعد هل ايام نايمة على سرير المستشفى
فتحت عيني على نحيب نقش خزرتها وگعدت
على حيلي لزمتها من ملابسها هزيتها وصرخت
_ لابسه اسوووووووود على اختچ لچ
لابسه اسوووووود على مرررررجانة على بنيتي
موتوها عمامچ ذبحوووووا بنتي عمامچ كتلوهااا .
دموعها تصب وعلى صوتي دخلت امي وخالي
واخر واحد بيهم وگف بالباب يخاف يفوت
ملخت وجهي اريد اموت روحي وراها لزمتني
امي وخالي يلزم بيدي حيل دخلت الدكتورة
والممرضين اثنين وصاحت بيهم
_ الزيارة مو بصالحهاا رجاءً لا تدخلون عليها بعد .
غـاليـة : ذبحوا بنتي ماتت يگولون ماتت دكتورة
عليچ بداعت عزيز گلبچ موتيني حلفتچ تمووتيني .
دخل ضـلـيل من شافهم ما بسيطرون على حركتي
لزمني بكل حيله يثبت بجسمي حتى يضربوني ابره
ضربته بكل حيلي على وجهه بلا احساس وصرخت
_ اسمعععع خبرك مثل ما ضحكت عليَّ وسمعتوني
خبرررررر موت بنتي روووح يا ضـلـيل عساك
تاكل حرگت گلبي واضعافها بعد تصير بيك
عساك ما تهنيت لا انتَ ولا اهلك المجررررررمين
عوفني هد ايدي انعل ابووووووك هدني .
ساكت هو ابد ما يحچي بس يباع بعيوني
وعيونه صايرة دم ناط منها دمار احمر
وجهه من التعب صاير اسود بلون دشداشته
ولحيته مصبوغة شيب ترس راسه ولحيته
ضربتني الدكتورة ثگلت جسمي بس
ما انام طلعتهم كلهم واجت ناخذ سونار
_ ابنچ حالته مو تمام مو حرام على اقل
اشربي ماي انتِ مو بس نفسچ تأذيها
تذكري اكو روح ثانية بداخلچ متضررة وياچ .
بللت شفايفي بعد ما تتبلل حتى لساني نشف
نمت هلكانه مو راضية اخذ بكلامها ولا بكلامهم
باليوم ال12 على التوالي وصل خبر هز ال ضـلـيل
بين نايمة وگاعدة سمعت تلفونه رن وجاوب
دفع الكرسي بلا احساس وبعلو صوته صاح
ضليل : ” تمار مات ” .
سكت لثواني وبصوت يرجف گال
_ عليك بروح امك احچي صدك يا خرابة ؟
يعني شني بس فهمني مُـرجانـة عايشة ؟
فكيت عيني وگعدت على حيلي نزلت من
الچرباية الدنيا كلها افترت بيه وگعت بكل
حيلي بالگاع اصيح : عايشة والله گلبي چان يگول ما ماتت .
اجه يوكض شمر التلفون ورفعني على تخم
غـاليـة : جاوب بس التلفووون احچي وينهاااااا .
ضـلـيل : ابن ساجر جايبها على مستشفى هين .
وارث …
اندفع الباب بلا سابق انذار وانا بوسط التفليش
الصاير بكل مكان بهل مكتب بوسط الأراضي
وبيدي ورقة من چبير ال ضـلـيل موقعة ومختومة
بيها اربع اسماء ذباحين مُـرجانـة وعلموا
ال ضـلـيل بعد الضغط عليهم التبرؤ الكامل من
تمار ، طه ، محمد، ابو عادل .
دخلوا بيرغ وتراث يركضون والأسلحة ترس
چفوفهم صاح بيرغ بعالي صوته
_ البشارة وارث البشارة .
رديت بلا نفس : شصار ؟
تراث : تمار وطه بين ايد ولدنا .
فزيت من مكاني عيونهم تتجول بالمكان جريت
سلاحي وبصوت واضح صحت فاير دمي
_ انا چتالهم ممنوع واحد بيكم يرمي عليهم .
حجيتها وصعدت سيارة بيرغ وصلنا لنفس
التل الموجود بالتصوير بس اول ما شفت
بس طه ماكو تمار والشباب مخلصين عليه
بگد ما ضاربي همام مخلص طاقته بگد
ما لاعب بوجهه بوكسات بحيث من التهب
گاعد بالگاع همام يتنفس بصعوبة
وسهم مخلي سلاح براسه وباقي ولد
ابوي فؤاد موجودين كلهم داير ما داير المكان
يباعون على اثار والبقايا الباقية من البنات .
ضربته بس بداخلي ما تبرد ناري شالفايده
اضربهم وراح اموتهم بس شيرجع مُـرجانـة
جريت اقسام أريد اضربة صاح
_ أكلك شغله قبل لا تموتني يمكن تخليك
تعفي عني وما تموتني انا صاحب اطفال .
ضربته بطرف السلاح على خشمه وصحت
_ اخلص الجهال من شررررررك عرفتك
من الشامة بيدك نفسك اللي سحلتها
انتَ رميت عليهاااااااااا .
طه : مرتك ما ماتت .
ضربته برفسة كسرت اسنانه بحيث
الدم صار يجري بكل بشاعة منه
طه : والله مُـرجانـة عايشة شيخ چبير
عدنا عرف راح نذبحها هنا وماقبل
گال خلوها بعيدة عن العين فترة
ونطلعها نبتز ضـلـيل حتى ياخذ
من عنده فلوس ، ونرجع نبتزك
على فلوس وهم اطلع ولدنا من السجن
ويريد يضربك راح يطلعون اخوكم شهاب متفقين .
بيرغ من سمع انا وتراث وباقي الولد نريد نخلص طه
من ايده ما گدرت خلص عليه كتل ورفسات بعد
ما اخذنا العنوان منه خليته يكمل عليه وصعدنا
بالسيارات متحذرين خوفاً من فخ هذولي ال
ضـلـيل الغدر بدمهم يجري
ما صدگت وگفنا جدام نفس الخرابة اللي وصفها
نزلت اخط بخطواتي ما اعون اوصل دفرت الباب تراث
واخوتي بظهري لگيت واحد منهم گاعد بداية الخرابة
يشرب جگاير ، لزموا الولد وركضت على باب
الغرفة من سألته وحيلي كله يرجف
_ وين البنية ؟
_ هناك هذآ المفتاح بس عوووفوني .
جريته من ايده فتحت الباب بالمفاتيح وريت
انعمت عيني قبل لا اشوفها بهل حالة
ركعت على ركباتي تهتلك جسمي وانتهت قوتي
رفعتها مـن الگاع ارفع بشعرها مگطعين شعرها
والدم يابس على ملامحها ، وجهه وعيونها
ما ينشافون من كمية الضرب ملامحها متغيرة
نزلت دموعي على حالها وصحت بعلو حسي
_ نحلة ، مُـرجانـة .
جفن عينها صار يرجف بگد ما حاولت تفك عينها
بهاي حالتها وتعبها ابتسمت اول ما شافتني ابتسمت
نفس ابتسامتها الطفولية، نزلت راسي بست راسها
اريد اطمنها من لزمت قميصي حيل
وبصعوبة همست : وارث .
نزعت قميصي لفيتها وخليت شعرها ما يبين
شلتها وانبح صوتي يهتز ، من الضرب والجوع
شايلها وما احس خفيفة مثل الوردة بيه ايدي
وارث : ترررراث عايشة لك بيررررررغ وينك .
فتح تراث باب السيارة بقيتها بحضني وهوَ
شغل وحرك وعلى طول الطريق تراث يخابر
نحتاج احد يحمي ظهرنا واحنا داخلين
على مستشفى، حضنت وجهه بين ايدي
اريد استوعب هاي صدك رجعت بين ايدي
لو متوهم ، رفعت راسي فوك جريت نفس
وسحبتها على صدري حاضنها بكل قوتي
ايدها ما عافتني ايدي من الخوف .
وگفت السيارة قابيل المستشفى شفت اخواني كلهم
موجودين وخلف واولاد عمومتي مدري منين
ما منين شيوخ وابو فؤاد واولاده طوقوا المستشفى
شلتها ومبين وصل خبرهم وال ضـلـيل عرفوا
اول ما نزلت خليتها على گلبي تقدم ابوية
فؤاد لفها وهي بيدي بالبشت مالته ركضت
دخلتها مجهزين سرير نومتها شبه فاقدة
واصله المرحلة يرثى لها هي والموت شعرايه .
گعدت بالگاع اريد اجر النفس ما اگدر ممرضين
اثنين اجوني يركضون وابوي فؤاد گعد بصفي
يبوس براسي ويضحك يمسح كتفي
_ ولك زلمة كلف انتَ معدل طلعتها من حلگ
الموووت افررح وارفع راسك لا توگع ولك بوية
لا توگع كلها تنتظر طيحتك گوم اخذهـا .
اول ما اخذوا ضغطي نهضت افتر عليهم
طلبت تقارير كاملة عن حالتها وايدي على
گلبي لا متعرضة اغتصاب ، لأن التعنيف هذا
مو معقول الضرب بكل جسمها صاير لونها ازرگ
بالساعتين اخذوا تحالين اشعة تقارير طلعوها
دخلت بعد محاولات وياهم شفت التقارير وگعت
على كرسي اريد استوعب كمية الرضوض
والكسور بكل جسمها والكدمات اي اكل ما مرها .
الساعة الثالثة تمر وفات ضـلـيل ساند امها
منتهية بسس ثابته وقبل لا يحچي اجاني صوتها
غـاليـة : وين بنتي ؟ عليك الله وينها .
رفعت ايدي اطمنها من نبرة صوتها عرفتها مو زينة
وارث : بالعناية لا تخافين عايشة تفضلي
ارتاحي هنا دقايق ويخلصون .
غـاليـة : اريد اشوفها .
وارث : اكيد حقچ بس يخلصون انتِ اول الناس تشوفيها .
چان هذا اول حديث دار بيني وبينها وبقينا ننتظر .
مُـرجانـة ..
صوت اجهزة بكل مكان ترن بمسامعي وريحة
ديتول طيبة اطيب من ريحة الخرابة احس
بالدگاترة والتحاليل وغيرها بس صعب افتح
عيوني نمت فترة كلش طويلة گعدت بيوم ثاني
على صوت تمنيت طول الأيام الفاات اسمعه
غـاليـة : يمه مُـرجانـة .
لزمت ايدها وفتحت عيوني اشهگ وما اگدر حتى
اشهگ وابچي من قوة وجع ضلوعي كلها رضوض .
غفيت قبل لا اكمل سلامي وياها وبقيت
على هل حال ايام افتح عيوني دقايق وارجع انام
ومرات اگعد ماكو احد يمي بس اجهزة صوتها عالي
والغرفة كلها ظلام وباردة ، ومرات افز على اصوات
عالية برا ، الى ان گدرت استعيد حيلي
وامي تدخل عليَّ كل ساعتين مرة تحاول توكلني
بس بنص الأكل انام ، وهيچ استمر حالتي الى
ان قرروا يطلعوني ويردوني البغداد
جنت ما احچي ماعندي حيل احچي بس
كلها عبالهم رجعت فقدت نطقي ، هل مرة اني
ما اريد انطق ولا احچي ولا اروي الصار بحالي
لأن شفت الموت بعيني اموت اذا احچي بالتفصيل .
الشرطة ما تركوا الغرفة مالتي والتحقيقات
مستمرة شلون صار بيها هيچ ؟ وين صار ؟
سلموا الأسماء للتحقيق وصار تمار مطلوب
لأن گدر يخلص نفسه ويشرد منهم .
اجت امي دخلتني الحمام المستشفى بداخل
الغرفة غسلتني وغيرت ملابس كلها طلعت عطر وهمست
_ اشتريت الچ البارحة كنتور كامل عطور وعناية
وبس تصيرين زينة هم ارجع اخذچ انتِ تختارين .
لزمت العطر بيدي وخليت راسي على حايط وهيَ
تلبسني بالحذاء وتمسح بيها ، حضنتني وقبل
لا اطلع فات ضـلـيل ، نزلت راسي بعدت نظراتي
وحتى من گال : الحمدلله على سلامتچ .
تجاهلته
سندتني امي يحضنها ومشتني بصعوبة
وضليل طلع قبلنا يجهز بالسيارات وياه
مدري منو ، اصلاً كلشي ما ادري بالدنيا
شصار ما صار بيها ، بس براسي مشهد
وجنت اتخيله وهم صار ويايه ” وارث ”
هوَ صدك اني شفته لو تخيلت واخاف
اسأل امي اخاف تگول مخبله لو عقلي بي شي .
قبل لا نتحرك واعبر اول بايات الدرج حتى
نطلع لمحت وارث من بعيد بالممر قبل لا اطلع
فتحت عيوني وهوَ فتح ايده بكل حيلها
واشر بيها بمعنى تعالي ، ابتسمت بتعب
وفكيت روحي من ايد امي بلا تفكير احس
عقلي بهل دقيقة فصل عن الكل مشيت بصعوبة
وامي تريد تلزمني من شافته ثبتت بمكانها
مصدومة ما تعرف شنو اريد بس عفتها
اريد اوصل عنده هذا كل تفكيري اوصل عنده
وجماعة ضـلـيل وضليل كلهم واگفين ، اسرع مشيته
ولمني بحضنه بكل قوته يضحك بقهر
وارث : أوف نحلتي اوف ردت روحي بشوفتچ .
همست بأذنه خجلانه
_ توني جنت افكر بيك .
رجع هو همس بأذني بدون ما يبعدني من حضنه
_ بشنو تفكرين ؟
_ انتَ خلصتني من عمامي لو اتخيل ؟
_ هذولاك مو عمامچ يولون انعل ابهاتهم .
نزلني من حضنه گعدني على كرسي
وبكل وقار ثنى ركبته وگعد بالگاع بكل
احترام واحتواء يباوعلي بعيون تلمع
_ شلون صرتي طمني گلبي ؟
_ احسن ، وارث شكراً .
_ على شنو بوية شبيچ .
_ خلصتني .
_ چا غير مرتي انتِ عرضي .
ابتسمت بتعب وعيوني تنسد من التعب والدنيا تفتر
دخل شيخ فؤاد وبيرغ مقابيله يمشي لابس عسكري
والمسدس بخاصرته ، ابتسم واني ابتسمت
بيرغ : الف الحمدلله على سلامتچ خوية .
_ سلامتك شكراً .
ضحك شيخ فؤاد وارث وبيرغ شفتهم
ترجف بيهم ضحكه ، انتبهت من گال
الشيخ فؤاد : لا الف الحمدلله احسن صارت
علي وياچ بوية ابو اليتامى يحرسچ .
وگف وارث وبعده لازم ايدي ودخلوا سَــهم وهمام
همام : فريتيني فررر ست الغربية كلها حفظتهااا
من وراچ شدعوة جنتي خاتله حتى نوم ما نايم .
مُـرجانـة : اسفة والله ت…
سَــهم : شوف هاي الفطيرة عمي فدوة اهم شي
رجعتي زينة وراح تصيرين عروس لهذا اخونا الزين .
همام : السبع .
سَــهم : الحوك .
همام : الثگيل .
سَــهم : الدكتور .
همام : الرجولي للنخاع .
ابتسمت بتعب وتوترت من نظرات وارث
تراث من بعيد شفته يحچي هو واهلي شوية
وتقدم علينا سلم بكل احترام وگال
_ يلة وارث خلي البنية تروح خواتها بالشارع
خطية تعبانات بالحر هم يلة يوصلون لبغداد .
وارث : بوية والله ما مقتنع انا اعرف ادير بالي عليها .
شيخ فؤاد : لك بعلي امها تموت وخطيتها برگبتك
خلي امها ادير بالها عليها وبس تصير زينة
بعد انتَ اخذت منهم كلمة مُـرجانـة مرتك كافي
يا بوية مو والله شيبت راسي وطلع شعر بالساني
بگد ما تعبت وياك ما تقتنع ولا ترد .
سحب ايدي يريد يحچي من طلعوا اخوانه
وشيخ فؤاد راح لضليل ما ادري شنو يحچون
وتعجبت شنو الصاير بس عقلي ما يربط
وارث : مبايلچ وين ؟
_ عند نقش بالبيت مال بغداد .
سدني بظهره حتى ما يشوفوني غطاني
طلع تلفون حديث من جيبه وهمس
_ ضمي التلفون بسرعة .
_ ماعندي جنطة وين اخلي .
_ بهاي شبيچ .
_ وين مو يشوفون ويحچون .
جر مقدمة ملابسه وبصوت خافت همس
_ هنا شبيچ ضمي محد يشوف .
اخذته ايدي ترجف بس متأكدة ما يشوفون
جريت مقدمة ملابسي وخليته بصدري
اخذ ايدي باسها وساعدني امشي
قبل لا اكمل وگفتي وشيخ فؤاد يغمز ظل لأن طولنا
وارث : مُـرجانـة .
_ ها .
بلع ريگه وبتردد طلبها
_ ما گلتي كلمة احبها تبرد گلبي .
_ شنو هي ؟
حجيتها ونزلت رأسي مبتسمة هو هم ابتسم
ورفع حاجبة منتظر انطقها عضيت شفتي وهمست
مُـرجانـة : وارث .
_ دلوعته .
_ انتَ جنتل مان مالتي .
_ اليوم بيها كلمة ملكية مالتي هههههه .
اجت امي اخذتني من ايده بدون كلام عافني
ورفع راسه وطلع يمشي بهيبته بقيت مركزه
بظهره نسيت الدنيا كلها مدري شصار بيه
بس الوجع خلاني ما اگدر اجر النفس عدل .
گعدتني امي شربتني ماي قليل وغسلت
وجهي طلعت باب المستشفى صايرة
هوسة برا خبصه من جهة سيارة كال
اخوان وارث وارث بالسيارة الثانية
منتظر وسيارة بصف سيارتنا
صاعد بيها تراث وابو واخوانه اثنين
شفت اخواتي اثنينهم بالسيارة مال
عمي ضـلـيل گاعدات ابتسمت بوجه
نقش جان وجهه احمر دم من البچي
اول ما صعدت حضنتني بكل قوتها
غـاليـة : ديري بالچ يمه على كيف وياها .
اخذت ايد نقش حضنتها تذكرت بذاك
اليوم شلون شمرت روحها عليَّ تحمينها
وتمار هو وطه فلشوها تفلش كسروا ظهرها
وهي ما تقبل تعوفني ابد وصريخها ظل بأذني .
خليت راسي بحضنها من صعد ضـلـيل بعد
ما حچيت بس مرت سيارتنا من سيارة وارث
غمّضت عيوني من باستني ننوس گرصت
خدها وبقت ايدي بيدها غفيت على مطبات
الشارع من التعب والمسكنات بس اسمع الأصوات
تأفف ضـلـيل وضرب على ستيرن السيارة متعصب
ضـلـيل : هسة غير كافي بس يگول تحملني زايد
يحس يولي لبيتهم بشرررر لا يهيد لا ينام
لا ياكل صار كم يوم يكمز بالمستشفى لعب روحي .
غـاليـة : منو ؟
_ هذا المتوحد بعده يمشي ورانا بالسيارة
من طلعنا من المستشفى الحد هسة ما تعب
راح نعبر السيطرة الأخيرة وبعده .
فكيت عيوني قليل حتى اشوف امي
ما نطت رد فعل بقت ساكته ودايره وجهه منه
والواضح الجو بيناتهم واصل حده من المشاحنات
عبّرنا السيطرة اخر سيطرة للغربية وتحركت
سيارة شيخ فؤاد على بصرة ، وارث سيارته
ما عبرت ظل هناك اخر سيطرة عبرنا وعافنا وراح .
ملِكه …
صار ايام حال الضيم حالنا لا اكلنا اكل ولا شربنا
شرب الوحيدة مرتاحة بينا ام بيرغ مخليه رجل
على رجل ومستمتعه بالمصايب ، خليت صينية
اكل رتبتها من كلشي قليل حتى ما ينذب وفتحت
باب غرفة ام همام قاصده ميمونة خايت الصينية
على ميز ومسحت على راسها عبالها مغطية
كل وجهه وتنفسها مو زين
ملِكه : دموعچ تفضح بيچ دوم ، امشي بالله
گعدي اكلي قليل حتى تشربين علاج
وكلمة لا ما اسمعها لا يرجعون اخوتچ
يگولون ملِكه الكريمة ام الحرم موتت
اختنا من الجوع ونستها تقبليها .
بقت ساكته بس تباع عليَّ بعيونها
جبرتها ترفع جسمها جريت كلينكس
مسحت وجهه كله وعدلت شعرها
ملِكه : والله حقچ فلا تنلامين مصيبتچ مصيبة
بس اذا تبقين هيچ صدگي ما تموتين بس
تخلصين عمرچ بالبچي ، وهاي دموعچ
تحسس الحقيرة فازت عليچ وانتهيتي .
ميمونة : قابل جذب هي فازت خلتني
اخسر كلشي احبه بحياتي هو ليش اكمل بعد
على شنو اكمل اريد بس انام ارتاح .
ملِكه : غلطانه عندچ اخوان يحبوچ ومن وگعتي
ذاك اليوم ورحتي للمستشفى همام يبچي
عليچ والله وامچ حالتها تصعب على عدو
بنتي هل لطم ميفيد خلي ايدچ بيدي
وداعت ابوية اخبلها هل نعاله .
ذبت حسرة بتعب وجبرتها تاكل قليل
على گد علاجها ورجعت غطت بنومها
طلعت على صوتهم كلهم رجعوا البيت
مهجوم فاتحين البوب شي فايت بالحذاء
وهذا همام شامر روحه على تخم ولابس حذاء
اي حقهم خدامة عدهم تنظف وراهم اسمها ملِكه .
وهذا العسكوري طر البيت عود مستعجل صعد
فوك هو والبدلة والرتبة نافخ روحو فرد نفخه
صعدت لگيتو مخلوص خبص دخل للحمام مستعجل
يمكن عنده طلعة مستعجلة مبين
ويصيح : جهزي ملابسي بسرررعة .
سبحت وطلع يركض طلعت بين ما مسحت
الحمام رجعت دحگت عليه مبدل مكمل يمشط
بس كمل تعذر وركض مستعجل جر تلفونه
ركبو على شحن وشمر روحو على فراشو نام
ادري شنو الفراش يريد يطير هذا هم حظي
بس لا امو هم خبلتو طگتو سحر سطرتو بي .
عفته ونزلت عود انقهرت اريد اصب
اكل للولد لگيتهم نايمين بمكانهم
وهذا همام حتى الحذاء ما نازعها
وسهم ساحب مخده ونايم بالگاع بلا فراش
والباب مفتوح والهوا يلعب بالغرفة
سديت عليهم الباب وفاتت ام وارث
_ رجعوا .
_ اي توهم .
_ سودة علية صارا كم يوم ما نايمين .
_ شلون ينامون ويعوفون اخوهم .
_ اسباع وعلي ، اروحلچ فدوة يمه خليهم
ينامون بعد لا يطاع صوت احد .
هزيت راسي وعفناهم وطلعنا ربع ساعة
ودخل وارث خاوي من التعب صعد
وامه صعدت وراه حتى ما عرفت شنو صار
ربع ساعة ونزلت وهوَ دخل سبح ونام .
الثاني يوم الظهر گعدت عبالي قبل الكل طبخت
لملمت البيت واشوف سَــهم وهمام دخلوا للبيت
نزل بيرغ وجهه مورم من النوم المسعد
وگعد بالاستقبال رافع ايده اثنينهن مرتاح صاح
_ صبوا اكل جوعانين ، سَــهم امشي گعد وارث .
راح سَــهم يگعد بي ما گعد ، رد همام راح ما قبل يگعد
صعد بيرغ من خليت الأكل نزل عصبي
طلع همام للدكان دقايق ورجع بيده شعالات
جر جداحة وصعد فوك شغلها بالصالة بيرغ
صاح بي : ولك اگعد لا ينجلط يمعوووووود .
همام : خاب ذبحني اليوم لو انا لو هوَ .
اول ما شغلها شمرها بالغرفة مال وارث
وسد الباب وصوت الطگه خلاني اعيط
واكلت خزره محترمة من بيرغ ، ختلت
بالمطبخ من طلع وارث نزل وصاح
_ هذا يا زعطوط ، يا چلب يا زمال يا ما متربي
يا طايح الحظ يا قندرة يا نعال حمام سواها ؟
بقوا ساكتين ياكلون حاصرتهم الضحكة
وارث : موووووو مخموووووووود
ولكمممممممم مووووو نايم اناااا ليش هل خباثة .
همام : جوعانين اگعد اكل .
وارث : هاي انتَ .
همام : لا وداعتك .
_ چا سَــهم ؟
سَــهم : وراس بيرغ مو اني .
وارث : بيرغ ؟
همام وسهم : اي وراسك وغلاتك هذا بيرغ .
استغلوا هل اثنين زعل بيرغ على وارث
يعرفون ما راح يجاوب وهذا داس بالغلط
وارث : شكبرك بعد تصيرررر عايز طول
لا ما عايز طول عايز عقل ماعندك يا جاهل
يا نعال حمام يا قندرة عتيگه يا ما تستحي .
حك بيرغ حاجبة يصبر بروحه عاط بي
_ ما تحچي اخررررس .
بيرغ : ياريت اخرس على اقل چان حبيتني.
وارث : شنو قصدك لك ؟
همام : يقصد نحلة .
سَــهم : اسكت ولك هسة اله يسويك دليمية
مو گال لا تگول بعد نحلة جيرة بگصتك .
ام وارث دخلت بيدها الخبز حار صاحت
_ انوب هاي يا نحلة ؟
وارث : جاوب حتى الزم راسك واخلي بالمرگة
وقدرت قادر يصير راس همام باچة اليووووم .
همام : هش نحلة ما تعرفين نحلة
وارث يريد يجيب نحلة للمزرعة ويخليها
تخلف نحل ونحلات اناث وذكور يصنعون العسل الطبيعي .
ام وارث : والله خوش مشروع بعد العسل بي
داء لكل دوام ليش والعباس دوم ادور على مكان
يبيع عسل طبيعي مو مخسوش قلة اكو .
اباع على بيرغ وجهه احتقن احمر ومنزل راسه
وارث ورثت اعصابه متخوصر واگف على راسهم
همام : عود لهناك واذكر امك بشيشة عسل
مو تجيب نحلة وتستجلب انوب تصير وين
العلاگة السودة تترسها وتصعد بيها للنحلة
مالتك تشبع بيها وامك حسرة عليها العسل .
وارث : تنطم لو اطمك ؟
سَــهم : ابن ساجر هذا اغسل ايدك منه .
وارث : هوَ غاسلها منكم اناااا من زمان .
سَــهم : لا ترا احچي انا واخوي همامي .
همام : غاسلها منه هذا ابو نحلة .
وارث : الصبررررر ربي الصبررررررر .
عافهم وصعد فوك مستعجل همام گعد ياكل
وارث ثواني ونزل لابس تشيرت والمفاتيح
بيده مستعجل يركض ركب سيارته وطلع
تربعوا الولد ياكلون وام وارث وهمام وياهم
لفيت شالي عدل واجت اريد اگعد دفع بيرغ
سَــهم وصلح بي يدفع بي من رجله
_ اطفر على صفحة الثانية .
سَــهم : هذا مكان خليها تگعد بصفي .
ملِكه : اي هذا مكان كمل اكلك سَــهم .
گعدت بالنص بين سَــهم وبيرغ بس بيناتنا
مسافات مديت جسمي اخذت خبز ورجعت
اريد اگعد هو ياكل وينافخ وبالي بعيد عن تفكيره
همام : يمه تعرفين ياهي النحلة .
بيرغ : انطم هذا شبي وثول .
ام وارث : لا والله يمه ياهي حتى لو
اعرف انسى ذكرني بالله .
جر خبز لف لحم خلاها بحلگه شرب وراها لبن
ميتين من الجوع عبالك صار سنة ما ماكلين
بس بلعها رجع شرب لبن ومن كل گلبه يشرح
همام : بيوم الهجمة من عرفنا مكان مُـرجانـة
غير كلنا مسلحين والعالم صايرة مذابح
ولزمنا ابن عمهم فطس بيد بيرغ انتهى
ورحنا قبل بيرغ نفزع لوارث بالخرابة
لا اگلچ ولا دگليلي يا يمه دخلنا الخرابة
وگعت لواحد گاعد بالخرابة دگ من الضرب
سلم المفتاح لوارث وانا تعبت خليت تراث
يستلمه دخيل محمد ضربة تراث منها
وللمگبرة مو ايد عندو توثيه .
ام وارث : گول ما شاء الله يمه لا ينكسر .
همام : تهي بهي العب عمي ما شاء الله
شدعوة لو ما تراث اچلح املح كاتله
الضيم من حر البصرة من يدخل الغربية
عبالك روسيا يگلي عدكم ثلوج باردة .
بيرغ : ههههههههه ومحمد صدك گال
شني شو باردة عدكم بقيت صافن .
ام وارث : اروحله فدوا اسمراني مملوح الف من تتمنى .
ملِكه : ما شاء الله الزلمة الأسمراني دمو يلعب
محبوب وبسرعة يدخل الگلب .
حجيتها بصفاء نيه ولا على بالي استوعبت
ورجعت اعيد الكلمات بعقلي من رجع بيرغ جسمو
وشمر الخاشوگة وبصوت يدوي صاح
_ الحمدلله .
التفتت اريد اسألو ليش ما كمل ما اكل زين
ودحگت عليه عيونو نطت ونظراتو سچاچين
كل خزره تخليني ارعد حتى ما نطقت بحرف
سحبني من ايدي يدنيني صارت مسافة
شكبرها بيني وبين سَــهم ، رجعت اكل
واستمع لكلام همام .
همام : اي يمه واكف ردني وادخل وراه ابنچ
وروثي شو هذا البنية ميته وحق محمد ميته
گعد بالگاع شالها چان يگول ” نحلة مُـرجانـتي ”
سَــهم : ههههههههه نحلة ممروده .
همام : ول ومحمد عصرتني الضحكة بس
مقهور على بنت وهذا متمغط بغير كوكب
مخبل ما ادري شني تسمعك ثووول حتى ثول .
ام وارث : سودة عليَّ تسودن والله انهد حيله
بين ما وجع حصلها وهم اخذوها .
همام : عجل امها تعوفها ومحمد لازمتها
ما خلتها دقيقة چثير تحبهاا .
شلت المواعين اخذت چاي ورجع وارث
شاف أمو بالأستقبال هي والولد
وام همام راحت تشوف ميمونة اول
ما اجت امو طلب منها على سريع
_ يمه اريد مبايلچ مستعجل فدوا .
اول ما راحت اخذ الجداحة وگفت قريب منو
من فتح العلاگة طلع شعالات بس من هاي
الكبار مو صغار شايفتها والله هاي صوتها
مرحب وضرباتها قوية توصل للغيوم
ملِكه : هاي شنو ؟
_ شنو تشوفين ؟
_ اقصد شتسوي بيهن ؟
_ هسة تشوفين بعينچ ، بس بشريني ذاك
الباب الخارجي مفتوح مقفول ؟
_ قفلته من رجعتوا قبل لا انام .
_ انتَ كفو منچ اخت رجال .
ابتسمت من شغلها اثنين كبار وتحرك بسرعة
شمرها بنص الأستقبال وقفل الباب عليهم
ضرباتها طلق عبالك هجوم والصراخ صار
بالأستقبال واحد بيهم صوت حرمة عدها
ولادة والضربات مستمرة وبيرغ يصرخ
_ يولووووو سهممممم انزززززل مني انزل.
همام : ول يمااااااااااا .
سهم : فاتوووووا علينه فاتووووا ولكممممم .
وصوت طااااااا طااااااا طاااااااا
بقت تضرب والصريخ بفلس گعدت بالگاع
اختنگت من الضحك بنفس الوقت خايفة عليهم
واسمع روغان وگع عليهم ضرب صوت الراشدي يرن
بيرغ : شعااااااالات يووولووو شعالاااات .
همام : گلبي يوووول گلبي اگلهممم گلبي .
طلعت امه تصرخ
_ هجمووووا علينا يبوووووووو .
ركض عليها خايف باس راسها وصاح
_ لا يمه لا نلعب انا واخوتي .
_ شني .
_ اقصد مو نلعب نضحك نضحك.
خلص الصوت راح عليهم فتح الباب بيرغ
گاعد على اخر تخم بالزاوية والدخان يعج
بالمكان وهمام وسهم اثنينهم نايمين فوك بيرغ
دفعهم وهم مايقبل يحچي هو وارث طلع برا
وهمام گعد بالگاع وسهم بصفه وام وارث
عصبت راحت جابت ماي وگعدت تغسل بوجههم
وهذولي مسلميها واگعين بالگاع فحطانين .
شوية وطلعوا برا لبيرغ يريدون يتفقون على وارث
غسل وارث حتى ما يحچي وياهم واجه للمطبخ
گعد على ميز الطعام والولد كلهم بالگراج
طلع تلفونه وفتح تطبيق عبالك خريطة
ومحدد موقع يباع على هذا الموقع بكل تركيز گال
_ صبيلي يمه جوعان .
من دخل سَــهم عرف وارث هنا اخذ ماي
ورجع طلع يهمس لهمام وبيرغ گاعد
بالسيارة ربط همام التلفون بالسيارة
وصووت علي يرن بالبيت يدوي طلعوا اغنية
” انا النحلة زنانة شو أمورة وحنانة
نشيطة كتير وما بمل لا أصنع اطيب عسل
من رحيق الزهرة يا عيني ما أحلى العمل
والكل يساعد الكل حلوة نكون مثل الاسرة
شغالات وملكات هات وخود خود وهات ”
وعلى صوت الأغنية سَــهم يتمايل
طلعت ميمونة عيونها تعبانة
لزم وارث ايدها ونهض من مكانه گعدها بمكانه
وارث : خوية ملِكه اكل نفرين انا وميمونة .
_ لالا ما اگدر اكل .
ما اهتم واول ما صبيته قرب الكرسي مالته
رجع شعرها ما رجع عدل نهض من مكانه
والتفتت رفعه بكل هدوء يلف بي ويلمه بالقراصة .
رجع گعد واخذ الخاشوگ اخذ تمن وشوي لحم وهمس
وارث : من ايدي اكليها لا تفشليني .
اكلتها وعيونها كلها دموع ، رجع يوكلها مرة
ثانية وهي ما گالت لا تاكل بس دموعها هل
مرة صبت ونزلت على خدها .
ذب الخاشوگه شربها ماي وتقرب اكثر
مسح وجهه من دموعها وبكل قهر گال
وارث : أي ليش تبچين يا خوية يا عيوني
ليش تقهريني ياهو وياچ بس حاجيني
والله لا اگطع لوزته والله دخيلچ لا تكسرين
گلبي عليچ حاجيني فهميني يا نظر عيني .
هي هم مسحت دموعها وهمست بخجل
_ هم خابرك ؟
_ بندر ؟
_ اي .
_ چا انتِ مو ما تريدين تشوفي ورافضته .
_ اي والله العظيم ما أريده بس اريد اعرف .
_ لا انا ما اتصلت بعد عليهم تريدين أخابره .
_ اي .
سحب التلفون طلع من الموقع ودخل على
اتصالات اتصل ثواني ورد صوت خشن
وارث : السلام عليكم سيد مصطفى
شلونك شخبارك يا طيب .
شغل جگارة واستمع لكلام السيد
_ هلا وليدي هلا بيك الحمدلله والله نسأل عليكم .
_ تاج راسي سيد بشرني شلونه سيد بندر ؟
_ والله يا وارث ما اعرف شگول بعده عناد
وعصبية وتكسير خبلني وساعة يريد يرد
للعراق وبعدين يگول لا ما ارد اريد اتعالج
وباقي بهل حرب النفسية يوم يتعالج
ويوم يعاند ما يرضى يروح .
هوَ يحچي سمعنا صوت طگطگه قريبه منه
سيد مصطفى: هذا بندر تريده ؟
بندر : منو ؟
_ وارث .
اختفى صوته وبعد ما اسمعه ابد والتلفون
فجأة انغلق وراحوا لا من الأب ولا ابنو
انوب البنية عبالك عرفت صارت مصيبة همست
ميمونة: تعارك وياه ما يريدنا .
وارث : اهم شي عرفنا الوضع ، هوَ راح سافر
يريد يعالج روحه وانتِ لازم تلتفتين لروحچ
تعالجين نفسچ وترجعين ميمونة القوية .
دخل حمام يضحك وياها
_ تردين ميمونة الجذابة بنت مسيلمة الكذاب .
ميمونة : ابن الراهبة .
هي حجتها وهو كمز عليها رفعها ويفتر
بيها وهي لزمت بي حيل ابتسمت على ضحكته
من نزلها باوعت عليَّ نظرة مكسورة واجت يمي
همست : هسة عرفتي ليش ما احچي حتى
ما اخسر واحد بيهم لازم اسكت .
ملِكه : اخذي حقچ بيدچ .
حجيتها والتفتت اغسل المواعين وتذكرت
يوم انهيارها من عرفت نفسها اطلگت اول
” رجعت لنفس ذاك اليوم ”
انهيارها وفضفضتها وصلتها المرحلة
التشنج وفقدت الوعي بحيث طلعت الطم
الطم على راسي اصرخ ماتت البنية ماتت
دخلوا اخوانها يركضون شالوها وكلهم
طلعوا للمستشفى، صعدت فوك اركض
خابرت اختي جنى ما اگدر احچي بس
انفجرت ابچي بكل حيلي وصعب ابين
اني عايشة بوسط بيت كلو اعمال شيطانية
ختمت الأتصال بعد ما عرفت ورطت روحي
فريتها ومن بين شهگاتي جذبت
_ مابيه شي بس اشتاقيت لأبوية وامي
وگعداتنا قبل وسوالفنا هسة شوية وتروح الضوجة .
ما صدگت اغلق الخط گعدت بالگاع
استندت على چرباية ما تدخل عقلي
اكو هيچ بشر بهل كم من الخباثة
اول ما رجعوا بقيت بعرفتي اخوتها كلهم
عدهم بس بالي عند واحد واول ما صعد
ركضت قبل لا يسد الباب دخلت غرفته
من شافني بهتّ واني بلا عقل صرت
اريد اقفل الباب حتى احچي براحتي
لزم اليده مال باب سحبها من ايدي وصاح
وارث : سالمين خوية شبيچ ؟
مسحت على وجهي جر بطل ماي فتحته وكمل
_ هاچ اشربي ماي اگعدي خوية واحچي .
اخذته منه شربت قليل وعيني على باب
اخاف بيرغ او واحد منهم يصعد ويكشفني
حجيت كل كلام ميمونة وسببها شلون حرگته
ومنو شربها مخدرات او يمكن مو مخدرات
احتمال بس اعمال .
احچي وارجف من الهبطة گعد وبصوت مخنوگ گال
وارث : ادري ، هيَ حتى ابوي موتته بسحرها
وخلته سنين مايعترف بيه ولا يحب يشوفني
خلتني عايش سنين غريب اشوف حنان خالي
على اولاده وانا فارض روحي عليهم
خلتني سنين معتاز وهي الوحيدة من نسوانه
لعبت بالفلوس وصلت ولدها دراسة وسيارات
بالفلوس بحقي وحق اخوتي .
ملِكه : معقولة هاي بشر ؟
وارث : انا ما اعديها هاي لازم تتعاقب
بس بالوقت المناسب وبالجرم المشهود والمصور .
“رجعت لوعيي وللواقع الحالي ”
على اصواتهم العالية بعد ما دخلت ميمونة
على غرفتها وبيرغ بعده بالصالة طلع همام
للسيارة ورجع بيده شعالات نفس مال وارث
دخل مشغلها شمرها بالمطبخ وسمعت صراخ بيرغ
_ يول ملِكه يولووووو مررررتي .
ما احس غير سحلني مو الخوف من شعري
سحلني وطلعتي من المطبخ والشعالات
لان ما مقفول الباب تضرب عشوائي
ختلت بظهر بيرغ وادفع بظهره
اجت وحده فاتت بيه من الخوف گمزت
على ظهره وعضيته من اجتافه عود اريده يمشي
بس ما اگدر احچي لساني ثگيل وهذا ما يتحرك
ضربته على راسه وعطت بعلو صوتي
_ صعدني ياااا يااا احترگت راح احترگ .
ام بيرغ : وكون وجع حتى وجع لهل اصوات
الخاااايسة الله ياخذكم ويخلصني منكم
كووووون وجععععع وجععععع گبووووور .
بيرغ : شبلاچ يمههههه ليش هل دعااااوي .
ام بيرغ : شبلاكم انتم صغااااار عيب منا
العالم الجوارين كل يوم صوتنا طالع .
بيرغ : بكيفنا بيتنا ونلعب بي
شلهااا دخل بينا النااااااس .
زعل من دعاويها واكتظ صعد فوك فاير
رجعت للمطبخ افرغ الدخان البيت صار
عبالك ضباب ، فزيت من سمعت صوت وارث ورايه
التفتت نزلت عيوني على ايدو شفت بيها شعالات
اثنين وبعيونو عصبية مو فرح گال
وارث : دفوخي گلبي بيها .
_ منو ؟
_ ام بيرغ بعلي اذا تسويها اشتري كلشي
تريدي فرحي گلبي ريحي گلبي .
_ مو اخاف من بيرغ والله قبل فترة
من خوفتها حلفني ما اسوي بيها شي بعد .
_ ملِكه طلبتچ لا ترديني لعبي بيها لعب .
اخذتها من ايده وجريت الجداحة وهمست
_ وبيرغ ؟
_ شغليها شمريها من جوا الباب واركضي
على غرفة امي عود تنطيني چاي .
_ متفقين .
حجيتها وهوَ فات غرفة امه واني اقتربت من غرفتها
شغلتها وشمرتها بعيد من تحت الباب
وبكل سرعتي ركضت ابطنش دخلت غرفة ام وارث
بهتت من شافتني وبعدها ما گدرت تحچي
والصوت مال شعالات ترس البيت وصراخ
ام بيرغ وصل السابع جار .
نزل بيرغ طفر الدرج من فوك المحجر وفتح الغرفة
مالتها شافها ترعش ركضنا كلنا عليها نشوفها
وهيَ طلعت من غرفتها تبچي گعدت بنص الصالة
ادگ وتلطم وارث ظل بالغرفة ما متحمل يطلع
خربان ضحك ، ومن همام طلع من غرفة امه
الباب مالتها مفتوح ميمونة تباع من بعيد
ابتسمت بوجهها وهي فهمت رجعت ابتسمت .
جبت ماي من المطبخ اخذه من ايدي بعنف
غسل وجهها وشربها وحضنها حيل
_ لا تخافين مصار شي يمه ماكو شي .
رفع راسه علينا واحد واحد وبصوت مليان غضب عاط
_ هذا ياااااا حيووووووان سواهاااااا .
همام : انا جنت بغرفة امي وسهم طالع .
ام وارث : والله يمه جنت اشرب جاي بالغرفة
انا ووارث نسولف گلبي راد يوگف مو الخوف .
بيرغ : عجل منووووووو ؟
وجهه نظراتو اتجاهي رفعت ايدي وصحت
_ اني جنت اقدم الجاي اسأل ام وارث ووارث هم .
طلع وارث بصوت مليان جدية وهدوء گال
_ كلامها صحيح .
حجاها وصعد بعدم مبالاة على غرفته
بيرغ : افتحي الشباك صارت الغرفة دخااااان .
طلعها برا على كرسي اخذتها فرصة بنفسي
ادخل غرفتها خليت الباب مفتوح ودخلت نفضت
الكناتير كلهن ادور بيهن ماكو شي غير
كياس صغار بيهن مثل ملح بس لونو اسود
فكيتو وطشرتو على فراشها وشمرت واحد ثاني
تحت سريرها والثالث طشيته بكل مكان بالغرفة
وطلعت اركض خايفة غسلت ايدي وصعدت .
سبحت على سريع وتوضأت فرشت
سجادتي واني احاول اصلي اغفي عيوني تنام
ما اركز وارجع اجبر روحي اكمل ، ضاقت انفاسي
گعدت على سجادة فحطانه احس الدم بعد
ما يصعد لراسي ، لفيت السجادة رجعتها
واحس انكتمت انفاسي وحيل ما عندي .
ختلت بفراشي خايفة ما ادري من شنو
بس اخي اكو انفاس ثانية بالغرفة غير انفاسي
الثاني يوم فزيت عرگانه عبالك سابحة
والكوابيس ما افتهم منها شي غير السواد
وشفت الملح الأسود تنعاد صورتو بكوابيسي .
نزلت بعد ما وجعت سبحت سمعت صوت اطفال
اول ما نزلت صارت زهرة جدامي ابتسمت بوجهه
گاعدة هي وام بيرغ يسولفن والجهال يلعبون
بحضن ام وارث ، وام همام منومه ميمونة بحضنها
رحت بوستها وبوست الجهال سألتهم
_ عجل الزلم وينهم ؟
ام وارث : بيرغ طلع على دوام من الصبح
والشباب راحوا على اراضيهم وشغلهم
بس وارث فوك بغرفة الحديد هاي مالته مال تدريب .
هزيت راسي اريد اگعد وياهم وعاطت ام بيرغ
_ هااااا وين .
ملِكه : اگعد وياكم .
_ امشي نظفي المطبخ صاير خزززي منو ينظف
انااااااا شنووو تزوجتي حتى انطف خيستچ
غير تنظفين تريد تگعد الخايسة .
گعدت بعنادها طبگت رجل على رجل ورديتها
_ والله واني ما تزوجت حتى انطف خيستكم
الي يخيس خلي مظف خيسته بروحوووو اوكي .
جرت تلفونها وهزت راسها تتوعد
ام بيرغ : هو متحلف بيچ من البارحة خلي
اخابرو اخلي يسمع مرادد وتجاوز بنت الشوارع
اللي يلفيها علينا وفوتها على بيتنا .
ملِكه : يلة فدوة لله على اساس شلون بيك
العالم تاخذ بركات منوووو هو بيت كلو
مشاكل وعالم فحطانه من مصايبچ بيهم .
كملت اخر كلمة وغمزت وكملت
_ خابري ابنچ بالله خابري .
اول ما خابرت اخذت التلفون من ايدها وعطت
_ اكلككككك شنوووووو متروجني خداااااامة ؟
بيرغ : شنوووو ؟
_ لااااااا تصيح جااااااوب .
_ انتِ ليششششش تصيحين .
_ جاااااااااوب متزووووجني خداااااامة .
_ شكووووووو ؟
_ جاااااااووووب .
_ وجععععععع الببررررررربوووووئه شبلاااااچ .
_ سوووويفل مووووو خدامتكممممم اناااااا .
سكت فحطان من الصياح ويحچي بينو
وبين روحو متعجب يگول
” بالله هاي شبيها راح صوتي من الصياح ”
سديت الخط وشمرت التلفون ودخلت للمطبخ اصيح
_ وداعت ابوية اليوووم فلا انظف .
خابرته تصيح وتسب بيه وهو ما ادري شنو يرد
عليها سدت الخط تسب وتغلط عليَّ وعلى بيرغ
عرفتو ردها وما رضت عليه بقت تسب وتدعي .
رجعوا همام وسهم الظهر بسيارة وارث
هو بسرعة نزل من فوك لابس فانيلة رياضية
طويلة ورابط على خصرو حزام حديد
شعرو مبعثر وعرگان ، من طلع وكفت زهرة
انتبهت عليها شلون مبحلقه عيونها
وبكل تركيز تباع دخلت وياها للمطبخ
تدحگ من الشباك بقيت اغسل بلا وعي
وسيطرة على افعالها عضت شفتها
من مد وارث تك ايد وفك الحزام من خصره
وگع بالگاع صدر صوت عالي وبصوت هيمان همست
_ اويلي .
من التفتت شافتني ابتسمت واني هم ابتسمت
عبرتني وراحت شالت حمامة من الگاع وطلعت
شعرها شوية من الشال وطلعت للگراج
وارث : وغسلتهاا حتى من جوا لو بس البراني ؟
زهرة : عيني بابا حمامة تريدك .
دحگ عليها ابتسم لحمامة وفتح ايده
وارث : عرگان بابا بس اسبح اخذچ بحضني .
ورجع يتفحص السيارة ما مهتم ، صعد ركض
واني لزمتني الخوفة من دخل بيرغ حتى
ما سلم عليه دخل سلم عليهم وصعد بدل
ملابسو ونزل گعد بالأستقبال، رحت فوك
اخذت تلفوني وخابرت على جنى صحت بيها
_ ها جنى رجع من الشغل بالله خابري هسة
واريدچ قوووية ترا ما يحب الفااهيات
مثل ما علمتچ احچي ، ومن ادخل عليكم ألعبي
لعبتچ خوووووش ؟
جنى : ملِكه انا مو گدها هاي ليا اخليها
تحچي وياه هي ام السان مثلچ .
ملِكه : خووش بس علميها مثل ما متفقين
بلكي يخوني وياكم حتى تصي. حجه يطلگني .
سديت الخط من ضحكت وبقيت اعدل بشعري
وشالي ونزلت بوجهي على استقبال
من سمعت صوتو يحچي بالتلفون
دخلت مداهمة وهزيت ايدي ورفعت حاجبي
غلق المكالمة وشمر التلفون وصفن بالفرشة مال ارضية
ملِكه : تريد اكل ؟
قبل لا يجاوب رن تلفونه شاف الرقم غلق المكالمة
ملِكه : جاوب شبلاك مرتبك .
_ عليششش ارتبك بعدين انتِ شلون اليوم
تصيحين عليَّ وتتجاوووووزين هاااااا ؟
ملِكه : جاوب عيني التلفون احترك .
اخذتو من حسيت ما راح يفتح فتحتو وحدي
ملِكه : الو ؟
اجاني صوت ليا الأنثوي بزيادة وهي تتدلع
_ وين المقدم عيني ؟
_ انتِ منو ؟
_ عشيقتو ، انتِ منو ؟
_ زوجة سيادة المقدم .
شمرت الجهاز على صدرو جر ايدي حضنها
وشال التلفون يصيح بعلو صوتو
_ جذابة يووولووو والله جذابة ما اعرفهاااا
ما عندي لا عشيقة ولا متگرب من النسووووان .
ليا : لا ما حبيتها منك سيادة المقدم تنكرني .
ملِكه : لااا تنكرها سيادة المقدم تجرح احاسيسها .
جريت روحي من ايدو ركض طبگ الباب وقفلو علينا
بيرغ : وراسچ ما اعررررفهااااا جذابة
والله فلا اعرررف غيرچ هااااي تريد تهجم بيوتنا.
ليا : هسة صرت كخه مو جنت رايدني اوف منك .
بيرغ : اذا ما اشتكي عليچ وعلى رقمچ ياا*****
انعل ابوچ بنت ال***** يمتى اعرررفچ انااا
هااا يمتى شايفچ تتبلين على رجل دولة
وحق الله اسحلچ سحل المجرمين بسيطة .
ملِكه : كافي تمثيل شگد تكذب عوف ايدي عوفها .
سد المكالمة وجسمو كلو يرجف لزمني بيدو
طوق حركتي صرت بين الباب وبينو ويلزم بوجهي
ملِكه : طلگني يلة اليوم اريد طلاق معليه بعد
ما اعيش وياك فوك ما اكرهك ومجبورة عليك
طلعت ابو بنات لااا لااا والف لاااا .
حضن وجهي بين ايدو باس راسي
ورفع اصبعو يحلف من كل گلبو
بيرغ : وغلاتچ والله وعيونچ بعمررري ما حبيت
ولا بيوم حرمة جذبتني وردتها ابد والله ابد
انتِ اول بنيه لفتتني واخذت گلبي وو .
قبل لا يكمل غص بالكلمة ما يريد يعترف بيها
باس شفتي وفصلها من دفعتو ثبت راسي
وبصوت كلو ثقة صاح
بيرغ : اول بنية تعجبني انتِ واخذتچ بالحلال
ما اگرب مو الحرام انا ما اگوب ما احب
گلبي ما يخب وما يريد يحب غـ…
سكت رجع سكت دفعته من صدره .
ورجعت اتصلت انوب هاي اخذها الواهس
مو تعرفوا گعدت توصف بشكلو وهو مصعوق
ويحلف ما يعرفها ويصرخ ويسب بيها
طگت مرارتي من صوت دلعها ومن همست
ليا : شبيك يا عيني تنكرني واني احبك .
ملِكه : حبتچ حيه يا خايسة اخذج الواهس
انعل ابوووووچ شووو تووووصف مدري
شلووون اني مرته استحي الخاااايسة
ما متفقين هيچ امداچ امداچ قهرررتيني .
قلص عيونو سد الخط وضرب الحايط بوكس
بكل غضب صرخ بصوت احس گلبي صار يهز
بيرغ : ما متفقين هيچ ؟ متفقين ؟ تتفقين يولوو ؟
ملِكه : اريد فرصة ادافع عن نفسي .
بيرغ : هو سؤال واريد جوابوووووو
تعرررفين هل بنت لووووو شنوووو الوجبة ؟
_ اعرفها .
بوسط كلامنا صرت اركز بملامح بيرغ تغوش تصير
سواد وترجع نفسها جسمي من الرعشة الخوف يهتز
واحس بشعري وگف ، وعيوني صارت تنعمي
اجتني قوة من العدم ركضت بلا عقل على حديدة
ديكور لونها ذهبي لزمتها بيدي واول ما حاول
يتقرب اسمعو يگول : ملِكه نزلي هاي من ايدچ
رفعتها وضحكت بعلو صوتي ضحكت بغباء
ضحكت ضحكة صوتها غريب واني اضربه
بيها ضربة بعد ضربة بلا شعور ولا احساس .
يتبع …
الفصل التالي اضغط هنا
يتبع.. (رواية الموروث نصل حاد) اضغط على اسم الرواية لتجد الفهرس كاملاً بجميع الفصول.