رواية الموروث نصل حاد – الفصل الخامس
من الباب شافنا دكتور اشر علينا من بعيد
دخلنا طوارئ ترافس بنتي من الوجع
ترفع عيونها بعيوني وتميل براسها تگلي
_ يمه لا تعوفيني يمه ابقي يمي .
بست راسها وعيونها وخدها نزلت على ايدها
الثانية بستها وامسح بوجهه جسمي يرجف
مثل السعفه عيوني احس نار تطلع منها
غالية : كون بيه الوجع يا يمه يا نقش .
نقش : اشتريني .
غالية : ما بعتچ حتى اشتريچ وروح ابوچ ما بعتچ .
نقش : لا يرجعوني ابوس رجلچ ابوس ايدچ .
غـاليـة : اذا ارجعچ يعني اموتچ .
نقش : ضحيتي بنفسچ الخاطر اختي
مُـرجانـة وخلصتيها خلصيني انا هم بنتچ خلصيني .
غـاليـة : اسمعيني ، اذا ترجعين يعني تموتين
لو نموت انا وياچ لو نعيش انا وياچ اخذيها كلمة من امچ .
اجه دكتور ثاني وممرضات اثنين
تعجبوا ملامح الذهول ارتسمت على ملامحهم
يگلب بيدها منا ومنا ويهز براسه على كمية قوة حرگها
ما تردد ولا بدقيقة اوگف واعترف بالصار ويه
بنتي بالتفصيل بعد ما صار يتساءل عن سبب الحرگ
غـاليـة : عمامها زوجوهـا الواحد
شايب عايب كل ذرة رجولة ماعندة
عود شيخ شيخ مطايه حشاك ، عقله عقل زمايل لازمها
وحارگها والله شنو تعاندني وبعين صلفه جابها ويتعذر .
رفع عيونه متعجب مركز بكلامي وشاهين واگف يغمز
ويأشر بس يريدني اسكت ، يريدون يحلوها بالعشاير
بحلمكم والله لو انا لو انتوا عدلت عباتي وكملت كلامي :
غـاليـة : لزمنا طيحنا حظ حظه
بس گلبي ما يبرد اريد اشتكي .
الدكتور بسرعة هز راسه يأكد ويأيد بكلامي
وصاح بالممرضة تروح تكمل اجراءات حتى
يسوي تقرير طبي بحالتها ويتقدم من ضمن الشكوى .
حضنتني نقش بكل حيلها تبچي وتشكي للدكتور
شلون تجرأ الخايس وشغل النار بين ايدها
وهي تتوسل بي بس حتى ياخذها اليه غمضت
عيوني گلبي فحم منهم يحتررررك مو يحترگ خلص
وراح حيلي ، وقبل لا يطلع وجهه كلامه لشاهين
_ تفضلوا ويايه حتى تكملون
اجراءات البلاغ عن هذا المجرم .
شاهين : دكتور اسبقنا احنا جايين وراك .
غـاليـة : لا نروح وياه .
حجيتها وانا اطلع اشرت لننوس تظل عند اختها
والممرضه بعدها عدهن تكمل ضماد ايدها
طلعت امشي مستعجله تقرب مني شاهين يهمس بخفوت :
_ عمه اذا يدري عمي ضـلـيل يدوس بمصاريني .
غـاليـة : خايف منه روح ما جبرتك .
شاهين : على اقل انتظري انطيهم خبر .
غـاليـة : لا تنطي بداعت غلات امك وابوك عندك لا تنطيهم
خليني اخذ حق بنتي لا تضيع فرصتي من ايدي .
سكت بحيرة ينظر منا ومنا بممر المستشفى
العالم تفوت من عدنا فرك شعر راسه عدله واستسلم
شاهين : وياچ انا يلة نتوكل وخليها على الله .
ضحكت بوجهه ومسحت على ايده ومشيت بسرعة
هو بصفي ، دخلنا اخذنا التقرير وطلعنا على
اقرب مركز من المستشفى قدمنا كل الأوراق المطلوبة
والأسماء وشاهين طلع فلوس سلمهم
وطلعنا نركض للمستشفى البنات وحدهن
بقن محد عدهن اخذ شاهين ماي من الطريق
امشي واشرب ريگي نشف الهث من التعب
وكفت اجر نفس واصبر بروحي
قبل لا افوت على بناتي ، غسلت وجهي
وگعدت على كرسي قريب من الغرفة
ايدي ترجف رجف وملامح غضب ضـلـيل
بين عيوني صارت شلون من يعرف تصرفت من راسي
ودخلت مستشفى ومركز وحدي بلا ما ارجع واخذ برأيه .
عضيت شفايفي وبقلة حيلة
وگفت واول ما دخلت على بناتي
ضحكت بوجههم ورفعت ورقة اخذتها
من المركز وصحت بفرح اربد ازرع الفرحة بگلبها :
_ اشتكيت عليه امچ راح تخلي هل خايس
يخيس بالسجون اذا ما اخلي هو
وعشيرته كلها تبوس بيدچ .
نقش : انا ما اريد يبوس ايدي اريد يعوفني يطلگني .
شاهين : يجرالچ وعزة جلالة الله يجرالچ طلاگ يعني طلاگ .
شفت ايدها مكمليها وننوس على سرير الثاني
مغطيها ببطانية وعاكفة ايدها جوة خدها ونايمة
شالها شاهين وانا بالباقي من قوتي سندت نقش
وطلعنا ، الجو بارد يگص گص من البرد يطير بعبايتي
حضنتني نقش الحد ما وصلنا للسيارة
صعدتها وبست راسها خليتها تنام على رجلي
وننوس صعدها بالصدر نايمة ساق السيارة
من محافظتي لمحافظة اهلي اول ما شفت
مكتوب ” بغداد ترحب بكم ” درت وجهي وشهگت
يا ريحة اهلي هنا .
ذكريات طفولتي حبي الأول
حب ومشاعر عشتها هنااا ، زواجي ولادتي هنا
رفعت ايدي على گلبي كمية ذكريات هاجمت عقلي
جنت احارب ما اخليها ترجع حتى
لا اتخبل رجعت بهل دقيقة رجعت .
ما اريد ابچي بعد اريد ارجع اشوف شوارعها
زرعها الجسور بيها المباني العالم ، هنا كلشي
عندي يختلف منطقتي فات بمنطقي
ردت ابلع ريگي بعد ما ينبع نشف
وعيوني جمرت عفت بناتي بالسيارة
ونزلت اخط بعباتي اضرب بباب بيت اهلي
بكل قوتي واتلفتت منا هذا منا جنت
اجي من هذا الفرع بيتي القديم بيتي وبيت عابد منااا .
فكيت عيوني من انفتح الباب وشفت امي
وهنا صدگت الام تحس بعب بتها ويمر بگلبها
قبل لا يمر بگلب بنتها و
گعن دموعي وانا اصرخ بكل حيلي :
_ يمهههههه كلبي وظهرررري مكسووووورات
يمهههههههه اخذيني بحضني دخيلچ
يا يمه حگي عليچ لميني طشرني
الوكت لميني صارن هووواي على گلبي .
حضنتني وهي تصرخ على صراخي
تبوس بيدي وتجرني بين ايدها وانا فقدت
غـاليـة : تحسين بيه يمههه حاچيني تحسين بيه
تعبت اكابرررر ، بناتي يمه بناتي ضاعن بناتي
انا مو گدهـا شلون بيه شلون ارجع الزمن وارجعهن
ريتني ما جبتهن وعذبتهن ريتني ما تزوجت
هلكت يمه مو حملها انا مو بحمل هل مسؤولية .
توسلتني سحبتني من ايدي وفوتتني
اول ما دخلت صارت صورة ابوية شكبرررها
بزاوية الاستقبال رفعت راسي وبكسرتها صاحت
_ بنت ذياب ما تنكسر هو مربي ذيبة گال ما خلفت
زلمة ربيت غـاليـة العالية تصير بألف زلمة وبألف حرمة
گال هاي ذيبة تحمل ضيم سلف بكبره .
رفعت راسي على صورته اقتربت منها بسته
وصحت وغصه شكبرها بصدري عاتبته
غـاليـة : بس انا عاتبتك بوية گتلك ال ضـلـيل انا مو گدهم
يهدموني وهدموني ، گتلك خلصني بوية اشتريني
گلت عودي روحچ الدنيا ما بيها راحة الناس ذياب
انا مو حملهم يابه تسمعني انت تسمعني مو گدها
ارحموا بحالي بنتي تگلي اشتريني وخلصيني
وانا ما بعتهاااااا ، انا لمنوووو اگول اشتريني بعد
اعاتب منووو واگله بعتني تعال اشتريني .
خلتني امي على صدرهـا تون على وني
تعبت وخنگت روحي وسكتت من شفت نقش
وننوس گعدت يباعن عليه وضايعات رفعت
ايدي وفتحتها الهن ركضن عليه خليتهن بحضني
وانا منتهيه من التعب حلفت الهن
_ امچن من تنكسر تجبر كسرتها وترممها
واذا رممت قست ، اريد اشوف بعد زلمة
طالع من ظهر زلمة يتگرب عليچن .
استندت على حايط خليتهن على رجلي
امي گاعدة گبالي ، شاهين حتى ما فات من الباب رايح
غفيت بمكاني وانا گاعدة وبناتي
على رجلي بين ايدي نايمات
غمضت وانا اردد بأسم مُـرجانـة شلون حالچ هسة يمه .
بعد ما مر وقت انكسرت رگبتي وظهري
سحبتني امي من ايدي نومتني على مخده
وخلت بناتي بصفي نايمات كلمن مخدتها
شمرت علينا بطانيات ادفي بينا والصوبة
لمحتها مشتغله گدامنا المكان اظلم صار ودافي
نمت بس تمنين مُـرجانـة وياهن نايمة وبقت هل أمنية حلم ..
على صوت الاستكانات فتحت عيوني
واشوف امي گاعدة وبناتي داير ما دايرها
بنصهم صينية ريوگ وقوري الچاي على الصوبة
والسياح على جهة مخليته ضحكت من شافتني
_ گعدت امچن ، تعالي يمه غـاليـة خلصيني
من بناتچ شگد سألني عليچ من جنتي صغيرة
وانا ما قصرت حجيت گومه اللي ينحچن والي ما ينحچن .
مسحت وجهي وضحكت واني اطگطگ
بجسمي والملم بشعري بقراصتي
غـاليـة : بس لا حچيتي موقف البطة .
ننوس : شبيها البطة عليچ الله احچيها .
عفتهن ورحت للمغاسل مبتسمة وانا استمع
امي صارت تروي الهن قصتي انا والبطة
_ هاي يا بيبي جانت امچن صغيرة بحدود ثلاث سنين
شافت بطة عدها فروخ تعالي ودگي رجل على ابوچ
اله تاخذ بطة من هذني ، ابوها لو تريد روحه ينطيها
مو انوب فرخ بط اجه الحچي الله يرحمه واخذ فرخ واحد
من البطة المسكينة .
صرت گدام المرايا وجهي شصاير بي شگد تعبان
اصفر مصبوغ وشاحب عيوني فايتات بنگرة
وعظام صايرة هيكل ويمشي على ارض
بقيت اتلمس بوجهي واسمع بباقي قصة البطة من امي :
_ جابتها لهنا وركضت على طشت شكبره ترسته
ترس ماي ونزلت فرخ البط بي هي هم البطة ما گالت
باطل بقت تفتر بالماي وهاي امچن فرحانة وتگمز
طايرة تصفگ وتوگف تروح تجرجر ببوها وتسحب بيدي
تعالوا شوفوها شلون تسبح ، وانا وابوها على فرحتها فرحانين .
باوعت على ايدي شماغه بعده ملفوف بيدي
احلف والله احلف متعمد يبقي شماغه بين ايدي
حتى يظل بين عيوني ما يريد انسى لازم يفرض وجوده
فتحته بوجع ورغم الأذيه تحملت شمرته بالگاع
بصفّ المغسله ومديت ايدي بوسط الماي
الدافي بقيتها ورجعت استمع لباقي القصة :
_ اول دقايق تسبح كافي هاي هي
هذا فرخ بط صغير لازم يطلع وكل ما يطفر
يريد يطلع تبجي اله ترجع تسبح
ولچ ام الغيرة دخيلچ ارحمي هل فرخ خلي يرتاح تعب
ماكو عنادها بعد ركبت راسها مليت منها وابوها مل وتعب
عافها وراح اكل وسبح ونام وگعد وشافها على حطتها
الفرخ بعده بالماي هنا تخبل اخذه طلعه وهي تبچي
الفرخ رجله صگط بعد تگرم ما يگدر يوگف على رجله تگرم يبيبي .
غسلت وجهي وخربت ضحك سديت الماي ورجعت
للغرفة بناتي وامي يضحكن حجيت
من بين ضحكاتي وانا اگعد :
غـاليـة : اشك الضيم بحياتي الصار حوبة هل فرخ البط .
ضربتني على رجلي وبعدها خربانة ضحك
وننوس تگمز بمكانها تريدها تكمل شصار ويه البط
_ يا بيبي خلينا اكل بصفة حتى اكل بعد ما يريد
كلش تعبته طلعت روحه ، ما طول ساعة بعدها وسلمها ومات .
غـاليـة : سودة بوجهي والله ما جنت افتهم جاهلة
عبالي البط يعيش بس بالماي اذا طلع يموت گلت اهلي
يريدون هل فرخ يطلع حتى يذبحونه ويأكلوا لان اشوف
امي تطبخ دجاج وسمچ گلت هم تطبخ فرخ البط .
نقش : هههههه يمه هو وين بي لحمه
وينطبخ خطية البط المغدور .
صبت امي الچاي وگعدنا ناكل
وامي تروحي مغامرات طفولتي
خلصنا ولملمت المواعين وننوس
تساعد بيها ابتسمت وانا اباع بوجهه نقش
غـاليـة : انا وياچ تعوقت ايدنا ههههه .
نقش : عجل الله ما يضرب بحچارة
من يريد يعاقب حوبة البطة .
شوية وطلعنا بالحديقة الشمس عالية فتحت الصوندة
ارش بالزرعات واشم ريحة التراب والحايط تعط بريحة
المحنة والطفولة وايامي الدافية
صفنت على مسافة الحديقة ابتسمت
وانا مهدومة عابد هو رسم شكل الحديقة عدلها
هو يشتغل وانا واگفه اتغزل بي وهوَّ كل ما يتعب يجيني
بكل جرئته يحضني ويبوسني ويهمس اريد جرعة طاقة
مكافأة هل بوسات على تعبي .
درت وجهي على ننوس تمسح وتهوس
بينها وبين روحها تغني عود :
” ننوس يا جگليته ضـلـيل يا حامض حلو باكيته ”
غـاليـة : لچ ننوس ما تسكتين لا اسبحچ بالبرد هسة .
ننوس : تسبحيني مثل فرخ البط .
نقش : شيخلصچ بعد يمه كشفنا اول جريمة قتل الچ .
غـاليـة : جريمة القتل الثانية شيخة العارية .
نقش : اي مساعدة تريدين بعد بناتچ احنا .
غـاليـة : والنعم من بنات عابد .
رفعت ننوس ما عاجبها كلامي تمسح وتباع بطرف عينها
_ انا بنت ضـلـيل مو عابد عيني .
تخصرت وگفت متعجبة عليها
_ ها اعترفتي بضليل ابوچ .
ننوس : ابو طول الحلو .
غـاليـة : منووو ولچ .
ننوس : ابوي شيخ العشيرة .
نقش : والقران هاي هو علمها ههههههه .
هزيت ايدي ما اتعجب على هل لسان منو ابوها
ومنو عماتها وجدتها عليمن تطلع قابل طالبتهاا العرامة
بالدم يسري بدمهم هل لسان متوارث عدهم .
سديت الماي وبتك ايد نشفت الگراج وفتت
اشم ريحة دولمة تهفهف بالبيت كله سديت كل البوب
ورحت للمطبخ گعدت ويه امي بالتفصيل اسولف الصار
ويانا بكل الفترة الفاتت ، وهي تسولفلي على حالها وحدتها
عرفت بين فترة وفترة ولد خالي يجون عدها يباتون
ويشوفون احتياجاتها من مسواك دكاترة
ما عايفيها وحدها ابد بس يحز بخاطري
امي وبهذا عمرها تعيش وحدها وحيده بلا ونيس .
فرشت سفرة وبوسطها صينية گلبت الدولمة
نتكل ونباع مسلسل وعلى صوبة اكسب خبزات
واوكل بناتي واشربهن بيدي الماي ، بس خلصنا
حاولت اساعد امي وبين حنيتها وسوالفها يمر الوگت
سريع ، ويوم بعد يوم ومر اسبوع وانا عدها .
عشت من بعد هوسة ايام طويلة
تلملم جروحي وتبنيني من جديد
ومن بعد هل ايام فزت ننوس من غفيتها
بحضني على صوت دگ الباب خلت امي
شالها وعبايتها على راسها وطلعت تركض
ثواني وصاحت بصوتها الدافي :
_ تفضل شاهين تفضل عيوني .
دخل محمل اشكال وانواع والوان المسواك
الحلويات الفاكهه بأنواعها نزلها بوسط الاستقبال
شاهين : شلونكم شيخة ؟
غـاليـة : بخير بنص الخير انا .
شاهين : ايدوم الخير بأيام عمركم
نقش بنت العم شلونچ شخبارچ .
جاوبتها نقش وهي تطلع للمطبخ
_ انا بخير بعيد عن جبروت عمامك وغدرهم .
هز راسه بلا جوابه منها اشر على برا وطلع
شاهين : شيخة تحتاجين بعد شي ؟
غـاليـة : تعبت روحك والله مالها الزوم .
شاهين : هذا خير عمي ضـلـيل .
حجاها وطلع ظرف فلوس وضاف على كلامه
_ وعمي ضـلـيل دز هل امانة بيدي
مصروفچ ومصروف البنات ، وهذا تلفون بقي عندچ .
اخذتهن بلا تصديق ضنيت راح يدز عليه
حتى ارجع صدمني بقراره معناها ابقي .
يارب كون يظل على نفس قراره وما يتراجع
وبعد ما يريدني من صدك
اخذتهن من عنده سلم وطلع رافض رفض
قطعي يظل عدنا يرتاح ، قفلت الباب ورحت
گعدت وحدي حسبت الفلوس
تكفيني انا وأربع عوايل ويايَّ ، التلفون بالباكيت
فكيته مشتغل ، فتحته ادور بي حديد نوعيته ما اعرف بي
دخلت على جهات الاتصال رقمين واحد مكتوب شاهين
والثاني مكتوب ” ابو نورا ” ضحكت على تفكيرة
دخيل الله شگد احتقر نفسي لأن حفظت طريقة تفكيرة
يقصد بهل حركة ويوضح بيها هو ابو نورا بنتي
يعني عندي صلة تربط بيناتنا ، مو على اساس مكابر
وكبرياء وكرامة وحلفان ووعود هسة لا تفضح روحك استقر .
قفلت التلفون ما خليته مفتوح ماعندي ثقة بي
كلشي يگدر يسوي يسجل صوت لو كاميرا
اتوقعها ، خليته بالكنتور بين الملابس وقفلت الباب
ورجعت من بعد هل ساعة أتناساهم واعيش بس لبناتي
وتعودت كل ليلة اطلع للمضمد انا وامي والبنات
يضمدها ويعقمها ونرجع البيت ، مر عشرة ايام
ورجع شاهين وهل مرة من الباب يتساءل
_ شيخة وين تلفونچ ؟
_ هناك بالبيت ليش ؟
_ ليش مغلق .
_ ما احتاجه لحظة اخذه وياك .
يريد يحچي قاطعته وركضت للبيت جبت التلفون
مثل ما هو بنفس باكيته وخليته بيده
_ ما اريده عيوني انتَ ما احبه رجعه يفيد عمك .
شاهين : عمه افتحي وخلي عندچ صار ايام اتصل
ومغلق نشف دمي عبالي صار بيكم شي ومحمد .
غـاليـة : دمك لو دم عمك ؟
شاهين : افتحي التلفون وبس من يتصل جاوبي .
غـاليـة : لا والله ابد وعلي فلا احبه اخذه .
تعب ومل مني هلك استسلم اخذه وراح
دخلت وانا واثقة خربت خطط شيخهم
رجعت گعدت انا والبنات وادفي بيدي
جمدت من البرد واشوف برنامج مسابقات
وفاتت نقش بيدها شامية گعدت هي وننوس تاكل
قفلت التلفزيون من خلصنا والباب ونمنا كلنا وحدة
بصف الثانية ، ومن بعد هل يوم رجع كابوس ال ضـلـيل يحوم .
وانا راجعه من المضمد العصر وهل مرة بس انا ونقش
امي عفتها بالبيت لان ست ننوس نايمة ما تقبل تطلع
شفت شاهين بالباب ينظر وبيده گلاص چاي
مبين امي طلعته اله بين ما ارجع ، هو شافني وكمز
_ عمه انتِ وين شلون تطلعون هيچ وحدكم .
غـاليـة : شوكت اجيت ؟
شاهين : صار كم ساعة طالعات بس انتن ؟
فوتت نقش ودخلته للحديقة بدون مقدمات
صح محتار واحس يعرف بالرد بس طلب
شاهين: عمه جهزي روحچ والبنات اليوم راجعين .
رفعت حاجبي كلامه ابد ما عجبني وهاي
للهجة مالته وأوامرهم صار عندي صد
غـاليـة : ابد والله مو هسة عوفونا انا وبناتي
بعيدات وسعيدات تعبنا نريد نرتاح وراحتنا بعيد عنكم .
شاهين : صار كلش هوووواي انتِ والبنات هين عمتي
انتِ غـاليـة على گلبي ما يهون عليَّ تصير مشاكل
دام گال تعالي بلا هل مشاكل وتعالي .
غـاليـة : ميخالف خليني بعد فترة وانا اتصل عليكم
من تلفون امي ابلغك تجي تاخذني حتى لا تگول تعاندين .
رفض وحتى امي صار يحچي وياها
بس شفت خوف بعين نقش تراجعت حتى
لو اريد ارجع اتراجع ، رفضت رفض قطعي
عافنا وراح ، وانقطعت اخبارهم بدل اليومين
صاروا ايام بدلال امي رجع الحيل بيه .
وبيوم صافي نسمات الهوا بي باردة اخذتني
امي انا وبناتي وتوجهنا للكاظمية ، طريق يجنن
نقش حاضنه ايدي ومايله براسها على كتفي
وتمشي ، ننوس بيدي امي يمشن قبلنا ويسولفن
دخلت الضريح الامام ناس قليلة گعدت بالگاع
حاضنته واباع على عمامته صايرة گدامي
لذت بكل جوارحي ودعيته نخيتهم مايردوني
ادريهم ما يردوني .
بجيت ورويت قصتي وسلمت امري الهم
وتركت مُـرجانـة امانة موسى ابن جعفر .
طلعت بخطوات مترددة برا صليت انا وبناتي
وامي بفرحتها اخذتنا على مطعم طلبت اشكال
وانواع المشاوي ، ومناك رحت على سوك اشتريت
ملابس للبنات وملابس احتاجها لروحي صار
شگد ما مشتريه لنفسي هملت روحي فد اهمال مخيف
امشي واصف على موديلات تاخذ العقل بلا وعي امشي
واشتري ، دخلت على محل عطور وعناية فرحت نقش
وكم غرض اشتريت لنفسي ، عجبني مرطب شفايف اخذته
وطلعت فرحانة اجرب بي زين او مو زين ، اخذنا تكسي
والعلاليگ ثگال بس اريد اصعد ، ما عونت وصلنا
شمرتهن بنص الغرفة وننوس تفتح
بيهن تريد تقيس ملابسها گاعدة ابدل لها
وجمدت فرد جمدة انا ونقش من سمعت صوته :
ضـلـيل : يزيد فضلچ امي اشكرچ .
شمرت عباتي من راسي وايدي تحولت سعفة الخايسة
تتراعش تتراعش جنها مخبلة ، عدلت الشال بأهمال
وبقيت بنفس فستاني جنت لابسته جوة العباية
اريد اطلع واشوف امي فوتت شاهين يغسل ايده
من شافني تقدم عليه يحذر بيه
_ شيخة دخيل محمد لا تعاندي ولا تراددي .
غـاليـة : ها شبي ؟
_ فاصل بعد جن جنونه هذا حده على گولت جدتي .
راحت نظراتي على امي لزمت ايدي وهمست
_ روحي بأدب احچي عوفي النتر
والتحديات مالتچ مو وكتها رجال شطوله شعرضه
حتى خفت اسلم عليه شلون تگدرين تتراددين وياه ما ادري .
غسل شاهين وطلع من الباب الثاني وامي
فاتت عند البنات يمكن انا لملمت شتات تفكيري
وقلق روحه من شوفته ودخلت وبصوت مسموع تكلمت
غـاليـة : حياك الله شيخهم .
ضـلـيل : الله يحي اصلچ .
نطقها بدون ما يشوفني وصارت عنده رد فعل سريعة
عباله يمكن ظن صوت امي يمكن لان بعد ما رفع
راسه وشافني خزرني بكل غضب فر سبحته واشر بيده
_ حدري بالله هين .
رحت بلا تردد صرت گدامه ورفعت حاجبي بمعنى شكو
ضـلـيل : كم مرة دزيت عليچ حتى ترجعين ؟
غـاليـة : اريد اظل بعد .
ضـلـيل : غـاليـة يا غـاليـة لمي هدمچ
وهدم بنياتنا وخلينا نتوكل .
ابتسمت ونزلت روحي استندت على رجله
وجهي صار قريب من وجهه بيني وبينه خطوة
نزلت عيونه المتكبرة على رسم صدر دشداشتي
غـاليـة : لعد انتَ مو گلت بعد ما تريدني
يا شيخ ال ضـلـيل الموقر .
ضـلـيل : شفتيني كاتل روحي عليچ .
غـاليـة : لعد عوفني .
غمض عيونه بلع ريگه ونهض وكأنه تكهرب
ابتسمت بأنتصار وسرعان ما خفيتها
سحبني من ايدي ورفع اصبعه بوجهي
_ ديري بالچ تلعبين ويايَّ روحي محمله عليچ
هساع اگضچ هين اطلع روحچ واموتچ بيت امچ
ولا عبالچ توكف امچ بعيوني بيوم اريد اموتچ محد يگضني .
غـاليـة : صح كائن من يكن ما يگدر يوگف بوجهك
بس سؤالي واضح ليش تتنرفز ، انتَ مو بعد ما تريدني ؟
قبض ايده بوجهي يريد يضربني بوكس
رفعت راسي وهزيته بمعنى شبيك
كز على اسنانه وجهه صار احمر دم
وعيونه تبث الشر ، جرني اكثر عليه بأذني هددني
ضـلـيل : بنت ذياب خليها تمر على خير ونولي بسلامة .
غـاليـة : هدي شيخهم هدي لا يصير بيك شي مبين تعبان .
شمرني ورجع گعد سحب باكيت الجگاير شغل وحده
ويشمر بيده يكابر بعده يكابر ويمثل القوة والثبات گدامي
ضـلـيل : ولي لمي ملابسچ بساعچ ورانا طريق .
غـاليـة : اجهز عشاكم واجبكم ، چاي گهوة ؟
ضـلـيل : غـاليـة تكفي شري ولي مني .
غـاليـة : تمام تمام گهوة مرة .
ضـلـيل : غاليةةةةةةة راح انعل خيرچ صابر انا بعدني .
عفته وطلعت امشي بطيء گلبي يريد يطلع من مكانه
حتى ما گدرت اتجرأ واحجيها بعد اريد اعيش عند امي
اذا احجيها يمكن يرتكب جريمة
شلون اگدر واقنعه هذا جايني روحه بطرف خشمه .
حجيت لأمي وانا اشكي بجيت حضنتني
وگعدتني وبيني وبينها بالمطبخ وصتني
_ لا تخلي يشوف عناد منچ ويسحب بناتچ ويطلع
تالي هل عجوز ترجع بنتچ نقش من انتِ ماكو
هذني بناتهم بزمن ابوچ وقوته ما گدر عليهم
واخذوهن وگلبچ خلص ورجعتيهن لا تخلين
الصار قبل يرجع يصير ويتبهذل حالچ روحي يمه
روحي وانتِ شاطرة وهو مبين واگع گلش
ما تشوفين امه متخبله عليچ
وانتِ اعرفچ بنتي واعرفچ تلعبين
صح روحي وبعدين ارجعي ما اطير اني .
سمعت كلمتها ولملمت اغراضنا تحت نظرات خوف نقش
وامي راحت قدمت الهم چاي ، بين ما خلصوا طلعت
جنطنا اخذهن شاهين بسيارته
سلم قبلي وراح واخذ ننوس وياه .
نزلت على رجل امي بوستها وبست راسها خليت فلوس
الظرف الي دزها اليه الباقي منها بين ايدها وبست ايدها
وراسها ما يهون اعوفها بس مجبورة ودعتها
وطلعت مكسور خاطري عليها تنشف
دموعها بحجابها ، رفع ضـلـيل ايده سلم
واني صعدت بصفه والبنات ورانا ، شاهين بسيارته راح
ما فاتت امي لحد ما ابتعدت واختفت سيارتنا .
هاي اول مرة بحياتي اصعد وياه بسيارة واگعد بالصدر
ما اهتميت فلا تهمني هل اموو بس عدهم بعشيرتهم
ألي تگعد بسيارة صدر الشيخ هاي الها عزة ومكانة
واني اتذكر تفكيرهن تلعب روحي من روحي .
وهوَّ يسوق حضنته ننوس تبوس
بخده وتلعب بلحيته تهمس بأذنه :
_ جنت بالأمام وماما شرتلي لعبة وحمرة وملابس .
ضـلـيل : اي .
_ وماما دفعت فلوس مطعم كباب اكلت هواي .
ضـلـيل : صاحبة واجب .
لو بيدي اسحلها من ظفايرها هاي
الخايسة بنت الزمايل انوب غير
تسكت وتسد حلگها ابد بقت تشمر قنابل :
ننوس : ماما بعد مانروح للمنتزه
هذا بصف محل عمو دكتور .
درت وجهي على شارع اسوي روحي
ما اسمع واعض بشفتي لازمتني ضحكة
بس مال خوف كون توگع بيدي يا بوية يا ذياب .
مر بفرع بيتي القديم بدون مايدري ولا على باله
صعقته وخلته يجمد يريد يسيطر
على ستيرن فقد من سمعها :
نقش : ماما هذا بيتنا القديم بيت ابوية عابد .
صارت عيوني على باب وهو يتحرك رگبتي افترت
اركز بي بقيت وجهي على شارع حتى
بعد ما راح البيت خفت يشوف الكسرة
ودمعتي بطرف عيني ينكسر گلبي
من اذكر احلامنا اللي ما كملت وتغيرت كلها .
عبرنا عبارة بغداد ولزمتني الشهگه ما اريد اطلع منها والله
عصرت اصابعي اصبر بروحي ، غمضت عيني ومددت
راسي واسمع بننوس تسأل
بنقش : بيتكم ليش ما اخذتوني
وياكم من عشتوا بي ها خايسة تفو عليچ .
درت عليها خزرتها واشرت النقش گرصتها بيدها عاطت :
ننوس : لا تگرصيني خايسة .
ضـلـيل : بنت الكلب نورا اگعدي .
مر شاهين بصف سيارتنا يأشر بيده بمعنى جوعان
يريد اكل اتصل بي ضـلـيل بس جاوبه صار يشمر بيده
ضـلـيل : ابن الـ مو خوش خلينا نوصل بساع .
_ عمي جوعان من الصبح ساحني حيوان انا .
ضـلـيل : اطبگ على محل واشتري .
طبگ الخط وهذا شاهين ما گال باطل
طبگ على سوبر ماركت بدون ما اشوفه
حجيت وانا اعدل عباتي على راسي :
_ عيب الولد جوعان بالطريق اطبگ
على مطعم ونزله ياكل زحمة .
ضـلـيل : ما ألچ غرض انتِ لا تدخلين
وديري وجهچ على طريق .
هزيت ايدي والله مدري شلون الله مصبرني وساكته
تصرفت بكل برود ورجعت عيوني على شارع
ونقش تلعب بننوس حتى تخلصني من لسانها
اقل الساعة وطبگ السيارة بگراچ مطعم سحب
المفاتيح وباكيت الجگاير ونزل يعدل بشماغه
ويفر بساعته اشر لشاهين من بعيد اجه وگف
يسولف وياه شغل جگارة يشرب وشاهين
ركض على مطعم دقيقة ورجع فتح الباب وصاح :
ضـلـيل : حدري نزلي انتِ وبناتچ بساعچ .
خليت عيني بعيونه دار وجهه مني بغرور
انفه بشكل فضيع جاوبته بكل برود :
_ اكل انت وياه بالعافية انا والبنات شبعانين .
طبگ بابي بكل قوته عبالك منتظرها حجه وشمر بيده
يصيح على شاهين ويمشي يفتر سيارته وصعد :
ضـلـيل : امشي ول اصعد لا ارتكب جريمة بنص الشارع .
غـاليـة : ننزل راح ننزل اوگف يااا .
شغل السيارة وشخطها وطلع الطريق
بقيت اهدي بروحي ما اريد اسويها مجزره
وبسكون اعصاب وصوت خافت
والسيارة هدوئها مخيف حچيت :
غـاليـة : جوعانة .
لا التفت ولا تنفس كمل الشارع شطووووله
بدون ما يرد وعبالك ما سمعني وشاهين
قريب من سيارتنا يعلس حلويات وهذا هم صار عصبي
غـاليـة : ضـلـيل جوعانة انا اريد انزل .
فر السيارة فره بحيث ملت بيها ما سيطرت
طبگها ونزل ما راضي باوعت على مطعم گدامنا
اشرت للبنات ينزلون وقبل لا انزل همست : الله يكمل عقلك شبي هذا .
هو فتح الباب شال ننوس ويمشي
بيها گدامنا لزمت نقش ايدي وشاهين ورانا
وهاي بعلو صوتها تسأل بي وهو يمشي
ننوس : بابا ليش عقلك مو كامل .
ضـلـيل : شنو بنت الكلب ؟
ننوس : ماما گالت الله يكمل عقلك .
وگف بنص الطريق وانا اختنگت مدري اريد اشرد
لو اطفر لو اضحك احتاريت وين اضم وجهي منه
دخلنا المطعم طلب مشاوي على عددنا وقوزي لحم
ولبن ، گعدوا ياكلون وانا ما أليه نفس بعدني شبعانة
بين ما خلصوا اخذت البنات غسلنا شفته يشرب چاي
هو وشاهين ويأشرون على اراضي گدامهم فارغة
مريت من عنده متوجهه على سيارة وانا امشي حجيت :
غـاليـة : اريد چاي .
ما ينطي رد فعل بس فالح رافع خشمه ما يتحاجه ابد
متعجرف فد متعجرف ، فتح بوب السيارة صعدنا
وشاهين يمشي بسيارته ويخابر ، وهوَّ راح على كشك
الچاي يدفع حساب ورجع بيده سفري صعد وجر
كلينكس يلف بالكوب لف لأن حار ومد ايده اخذته
صفگ ايده ينظفها وهمس وهو يشغل سيارته من جديد :
_ يا الله .
بقت بس ننوس تلوب هي وعرامتها بقت تفرك بعيونها
وتاخذ بيدي تمسح ببها وتبوسها توگف وترجع تگعد
اخر شي گمزت بحضني فتحت عباتي لفيتها بيها
خليتها على ايدي ارسم بحاجبها واحرك برمشها
اتلمس شعرها وهي تختل بحضني وتهمس
ننوس : احبچ ماما .
_ واني اموت عليچ .
ننوس : احبچ هواي .
_ احبچ اكثر ماماتي .
ننوس : انتِ گلبي .
ضـلـيل : غير تنام وتخلصنا گلوبنا خلصانا .
وكفت ضربته على ايده وهو يسوق لأن فززها ورجعت
ختلت بحضني ، سكتت ونامت ونقش قبلها غفت
خليت راسي على جامة وغفيت الطريق كله نايمة
الحد ما وكفت السيارة گدام الباب واشوف شاهين
يفتح باب الگراج حتى يفوت ضـلـيل السيارة للبيت .
نزلت قبلي ننوس تركض على عزيزة الي طلعت
ترحب وتهلي بينا من الباب ، اجت حضنتني
تبوس بيه هو ظل يخابر بالگراج تالي فات جوا
شافت عزيزة ايد نقش باست راسها وحضنتها
فوتتها وقبل لا ادخل استدارت تتوسلني
_ عليچ بروح ابوچ من تفوتين تسلمين عليهم .
ما انتظرت جوابي دخلت للبيت شفت مرته
الثانية مرجعيها مدري هو مرجعها ، تعجبت
ما توقعتها ترجع بعد ابد ، البيت عبالك صار بي سكون
وهوَ گاعد بنص الصالة بنفس مكانة وامه نفس مكانها
عرفتهم كلها داخله انذار ينتظرون مني الغلطة حطمت تخطيطهم وانا امشي اريد اصعد
مستعجلة رفعت صوتي بوضوح :
غـاليـة : السلام عليكم جميعاً .
نزعت عباتي وانا اصعد على درج تحت انظارهم
وبكل ثبات صعدت بعدم اهتمام الهم ما انطيهم اي اهميه
بناتي باقيات عدهم جوا حتى نقش .
فتحت الباب بهتت بهته من شفت الغرفة
وكلشي بيها متغير وكفختني
ريحة صبغ جديدة حيطانها كلها مصبوغة بالجديد
ركضت على كنتور شهگت وضربت على صدري
من شفت ولا قطعة ملابس موجودة كلها فارغة
اريد اطلع واعترضت طريقي عزيزة
_ وين ملابس مُـرجانـة غراضنا كلهااا وينهن ؟
_ انا راح احچي كلشي بس اسكتي تصي صوتچ .
_ بس جاوبيني ملابس مُـرجانـة وينهن غراضها ماكوووووو .
طبگت الباب وگمزت عليه تسد بحلگي
وتضرب على خدها وترجع تتوسلني وادگ عاى صدرها
_ الخاطري تسكتين وتسمعيني احلفچ بروح ابوچ .
_ ليش اسكت غير افتهم ؟
عزيزة : اذا ما تسكتين تصير مشكلة وضليل
مريض وروح ابوي مريض لا يروح
يصير بي شي الخاطري اسكتي .
ضربت على رجلي وسديت حلگي ما نطقت بحرف
انتظرتها تحچي وهي لزمت ايدي وبطريقتها فهمتني
خايفة بي من كلامها ومترددة وبنظراتها الحيرة واضحة
_ امي تعاركت هي وضليل وعركة مو من هاي العادية
لا عركة من عركة اسبوعين داخلين انذار وداعت نظر عيوني .
عضيت اصبعي ودگيت دگ على رجلي
غـاليـة : راح تخليني اتخبل امچ شبيهااااا .
عزيزة : عاندت وياه ما ترجعين ومن يريد يرجعچ
تروح تزعل لبيت اخوانها وهذولي حجيهم سم
يجون هنا يصيحون تبيع امك الخاطر حرمة
وهو يتخبل عليهم لان هو ما بايع احد ابد والله
لا يحب ينطي بيچ ولا ينطي بأمي تعرفيها
شگد عزيزة عليه ويحبها .
غـاليـة : وامچ ما تحبه لوووو تحبه
مثل ما يحبها ما تشلع گلبه .
عزيزة : راح عدها وتنازل ورجعها وعود عاف موضوعچ
لزمته بسالفة جديدة اريد ازوجك بنت صغيرة ترد شبابك بيها
وتخليك تشيل الولد بين ايدك وتصيح
ما اخليك تحت رحمة البغدادية .
ضحكت بعز قهري واهدي بنفسي ضحكت
_ عبالها اذا يتزوج ازعل مايهمني شبيها هاي .
كملت بتردد : هو حاول يسكتها من السالفة راد عالج
تالي راحت رجعت دلال وصلت بيها تنزل روحها
وهي تروح ترجع بس حتى ما ترجعين والله غـاليـة
انا نمردت روحي عليچ وعلى بنات لان اعرف امي وغايتها
تريد يكرهچ حتى البنات ينسحبن من ايدچ بعد .
غـاليـة : وتزوج بيهن وتكسرهن .
عزيزة : لان تكرهچ كرهت بناتچ .
لزمت راسي كضني صداع من عمايل هل عجوز
هسة مو مال انزل اشرب من دمهااا احد يلووومني
عزيزة : هو هم سكت قبل بهاي هم زوجته
عباله تنسى سالفة الزواج من جديد ، شو من شافت
ماكو تغير وبعده بس يطر هل ليل يصعد على غرفتچ
يقفلها وينام بيها ما ينزل لثاني يوم .
رفعت خصلات شعرها من عيونها وكملت
_ يگعد شوية ويطلع لو شغل لو ديوان ، رجعت
تتعارك هي وعفاف ودلال ما بيچن خير واله
ازوجه الخايسات وسب وغلط
ورجعت فتحت الزواج وياه تالي صدك طلعت تريد تزوجه
بنت 14 هو تسودن غـاليـة فقد لا تكسير لا فشار
تعرفين لسان اخوي شطوله دخلت اخوانها كلهم
طاح بيهم وطردهم كلهم دلمي غراضچ واصعدي
على غرفة احرگيها وسدي بابها وانزلي راحت ويه اخوانها .
نزلت دموعها وعبالك رجعت
تتذكر وتعيش الموقف بحذافيرة :
عزيزة : ما نشوف غير الدخان وريحة
الشعواط وطگطگ فوك لا تريدين حالنا
هنا غـاليـة بجيت على ضـلـيل مو عبالك
غرفة واحترگت لچ يطفيها عبالك انتِ والبنات موجودات .
خلص كلبي اريدها تسكت بس هي گلبها مورم
_ طفاها وخابرها تمار من دحگ ضـلـيل شلون وگع
هددها اجت تركض خافت لان بس طفت النار من الهبطة
نقلوا اخواني ضـلـيل على مستشفى
هم جانت متعبته بمشاكلها
وهو تعبان حيله تعبان من فراگچ
وبوكتها دز تلفون وانتِ قافلته
وگع هلك شگد ما اگلچ هلك بهل ايام
واستنزفت امي كل طاقته
ظل ليلة كاملة بالمستشفى بعدين طلع خافت .
وكفت اشرب بالبطل مال ماي يبست حلگي
وهي تمسح بدموعها وترجف وتروي الصار :
عزيزة : من خوفها فزعت ولد عمامي بيوم
لملموها للغرفة كلها وصبغوها ، ومن خوفها حتى
من لملم حيله وعلى علاج وسمعت يريد يرجعچ ولا حجت
ولا نطقت بحرف ، وهسة بالعناد بيها فات ودخل بالصالة
گعد منتظرها هيچ بس تغلططططط حتى ينفجر باقي
على اعصابه متحمل ، بس هي هم دورت حجه تگلي
والله اذا فاتت البغدادية وما سلمت أخزي واخزيها .
عزيزة : ألها عين انووووب فوووووگاهااااا .
دخلن بناتي متعجبات على الغرفة بس عجبتهن
ما گدرت احچي وحلفتني بروح ابوي اكسر الشر
وكسرته خليت على جروحي ملح ولصمت حلگي منهم .
عافتنا ونزلت قبل لا تگلب عليها امها
طلعت من الجنط ملابس جديدة لنا
بدلن البنات وانا دخلت اسبح احس نار
وشبت بجسمي ولا قطعة بقت ولا ذكرى من مُـرجانـة
وانا جنت بس اريد ارجع واشم عطرها بملابسها .
لگيت نقش نايمة وننوس على جهة الثانية بالگاع نايمة
شلتها على سرير نومتها على ايدي ونمت وياها
الثاني يوم طر النهار كله خلص ولا نزلت
ونقش ختلت بالغرفة تخاف لا يرجعوها
وتسكت بننوس وتلهي بيها في سبيل ما تنزل
بس خلصت المغربية صليت واخذتهن ونزلت جوا بدون
ما احچي وياهم حرف تعديتهم ودخلت على مطبخ
شلت ننوس على كاونتر انا اگشر بتيته وانطي لنقش تگليهم
وبعدني لليوم ما اگدر اضغط على ايدي بس مجبورة
درت اطلع الخبز واشوف ضـلـيل گعد وياهم
اجتني عزيزة تبوس بننوس وتگرص بخدها وتهمسلي
_ والله طلع لأن عرف بيچ بالمطبخ .
_ ها .
_ يعرف امي بس تبزچ بكلمة انتِ تخزينا هسة .
غـاليـة : قصدچ يدري تحملت عليهن لان احترگت غرفتنا .
عزيزة : كملي براحتچ .
غـاليـة : ما تسكتين مني عزيزة .
عزيزة : ننوس امچ بربوك .
حجتها واخذتها وراحت ودتها لضليل
نزلتها بحضنه طبگ رجل على رجل نومها
على ايده ويبوس بخدودها وهي خربانة ضحك ترافس بيده
درت وجهي على نقش اشوف كملت تگلب بالطاوة
وصافنة عليهم وتضحك على ضحكت اختها
رحت يمها بست خدها وحضنتها
_ انا امچ وابوچ فهمتي .
عيونها لمعت بدموعها وصوتها انترس بعبرتها
نقش : تمنيت ابوي عايش يمه ياريت ما مات ياريت .
طفرت منها شردت ليغاد ادير بعيوني ودموعي
فاتت عزيزة غسلت قوري الچاي خدرت جديد
وعافته يتخدر وقبل لا تروح گالت
_ يريد من ايدچ چاي من راس القوري .
لزمت بيدها واعض اصبعي اجر بيها
وهي تضحك وتجر بروحها مني
همزين ما يشوفونا تروح هيبتي
غـاليـة : ولا اخذ لو تموتين انتِ وياه تصير مشكلة
انا هسة عصبية وهو بارررررود تعالي اخذي .
عزيزة : وروح ابوية گدامهم گال خليها هي تسويلي چاي .
راحت وخلتني هوَ گاعد على اعصابه لسانه شطوله
ما يهدي من السب ما راضي حتى على روحه يغلط
شدعي عليچ وعلى اخوچ هذا وامچ يا عزيزة بالله
هسة اني بيه حيله حرت بين اروح وبين اگعد واسكت
وهي غصب عنها تجي تاخذه .
تكفيت شر هل زلمة وصبيت اخذته بصينية
فتت على صالة عبالي موجود بقيت اتصفن بوجوههم
ماكو كلهن گاعدات واخوانه يسولفون
همه وامهم ولدهم وهوَ اختفى :
غـاليـة : وينه ؟
ام ضـلـيل : راح نام رجعي بعد وكت صار ساعة من راد چاي .
باوعت الها بقرررف هيچ من فوك ليجوه خزرتها
ودرت وجهي اريد ارجع للمطبخ وهيَّ تريد تحچي
لطمنه لطم على وجهنا بصوته وهو يدوي بالبيت :
ضـلـيل : الچاي ووووووووووين ؟
ام ضـلـيل : امشي ركض اخذي لا يشهرنا .
نسوانه فاتحات عيونهن عشرة عشرة اشرت
لنقش تاخذ اخذتها وتصعد الأكل قبلي غصبت
روحي ومشيت لغرفته الجوة دگيت الباب مرتين وفتت
بعدني توني صرت بوسط الغرفة صاح :
_ سدي الغضب وراچ وفوتي .
نفذت وانا اتصرف بطبيعتي بدون تكلفة حتى
ما ابين على نفسي توتري ولا قلق روحي منه
وصلت عنده انزل بالصينية ولفت نظري قبضات
ايدي اثنينهن هيچ بگد ما قابضهم صايرات دم
خليته على طبلة گدامه اريد اتحرك واطلع
تمسك بيدي بدون ما يرفع راسه جرني
طابگ حاجبه ورافعه وبصوت الغضب يأمرني :
_ خوطي الچاي خلي بيدي .
_ أبشر .
سويت مثل ما طلب عاف ايدي بس كملت ردت
اطلع رجع ضغط عليها ، يريد اطول وقت عنده
كرامته ما تسمح يطلبها ، ولا اني انطي مجال
يضطر يدور مشاكل حتى يخلق حديث مشكلته
مايعرف يحچي ولا يعبر بلا عصبية :
ضـلـيل : كم مرة دزيت عليچ بيت اهلچ عود تعانديني ؟
غـاليـة : لا انا وين اگدر اعاندك شيخهم بس جنت تعبانة .
هز راسه ونتر وشمر ايدي يشغل جگارة ويشرب چاي
ضـلـيل : بعد ما تتكرر هاي لعب الزعاطيط
والله تعبانة اريد اروح البيت امي ماكوووو هيچ
ماعندي ما تمشي عندي اكسر راسچ وراس عشيرتچ .
غـاليـة : اعصابك ويه روحك سمعت بيك مريض
انتَ هم رجال جبير مو زين عليك هل عصبية وحرگ الأعصاب .
ضـلـيل : بنت الزمايل شني رجال
چبير شايفتني امشي على عكاز .
رجع يفشرررر يعني هذا الطبع نتضارك
ونتباعد بسببه وفلا يبطله ، مشيت صاح
_ اگلچ ياهو اجاكم بيت اهلچ .
_ منو يجي يعني ؟
_ انا سألت لا ترجعين تسأليني جاوبيني .
_ ولا بشر أجاني .
_ وولد خوالچ ؟
_ اي كم مرة .
_ عجل شلون ولا بشر ذول حيوانات مو بشر .
_ استغفر الله .
_ ما عاجبج الحجي ؟
_ تأمر بشي ثاني ؟
_ امشي ولي .
صرت بوسط الغرفة باقي بوسط النار
محتار دايخ بزمانه ، صاح بصوت : ارجعي بالله .
كتفت ايدي وگفت گدامه شمر گلاص الچاي وعت ايدي
_ لا تفكرين ناسي مصيبتچ مستشفيات ومراكز
وبلاغات ولعب ، تالي تروحين ..
قاطعت كلامه وانا اتقرب اكثر صرت مقابيله :
غـاليـة : لا تهدد ولا تنسى ما اخاف واذا تحب نفذ .
دار وجهه مني يبلل بشفايفه يبست وجهه انخطف لونه
رجع ينظر بعيوني بضياع وضعف شفايفه ترجف
_ اريد اضمچ غـاليـة .
كمل كلامه وقبل لا ارفض سحبني من خصري گعدني
على رجله يدفع راسه برگبتي يجر النفس وكأنه مخنوگ
_ اريد احچي واشكي من فراگچ .
غمضت اريد اخلص روحي من ايده بس هو فاقد
تحركاته كلها تتلاشى حضن وجهي والتعب بعيونه
سند راسه على راسي وبهذيان يكرر بكلامه :
_ ترضيها هذا حالي ، تهدمين بيه فراگچ يذبحني .
تلمست ايده امنعه يتجرأ اكثر فتحت عيني
وصوتي وحالي تبهذل مدري شصار بيه :
غـاليـة : ضـلـيل .
_ يا بعد نظر عيونه .
تكهرب كل وضعي وصعد الدم الراسي من
شاف سكوني زاد بالتمادي ضغط على وجهي
حيل واخذ شفايفي تخبلت دفعته بكل حيلي
ضربته على صدره ادفع بي هوَ فاقد جر شالي
وسحب شعري يفر بي بيده ورجع اخذ شفايفي
شمرت روحي من السرير للأرض ورجعت نهضت
اريد ابتعد قيد حركتي وطبگ ايدي يحذرني
_ اششششش بنت ذياب اششششش .
_ لا تخبلني وعوفني .
يريد يحچي ملخت روحي من بيت قبضته
وركضت للباب فتحته وطلعت أمشي بفوضة
اعدل بروحي ودلال تغسل قريب من ممر غرفته شافتني
يمكن من حالتي عرفت رافضي ورغبته .
تعديتها ومريت منهم مضطره صعدت وانفاسي
گوه اجرها ، رفعت ايدي گدام عيوني اشوفها شلون ترعش
ودموعي وحدهـا تنزل درت وجهي على درج اشوفه يصعد
فتت للغرفة فارغة البنات نازلات دفع الباب ودخل
اول ما صار گدام ضرب الميز فطره من الطول للطول
_ امشي بدلي اطلگچ بنت الساقطين فد نموووونه انتِ .
من قوة ضربة ايده تقربت لزمت ايده اشوف شصار بيها
مبين من شكلها تأذت سد عيونه ورجع فتحها يضرب
بطرف اصابيعه على راسي ويسب
_ حيوانه بنت الحيوانات اطردچ وحگ الله
تحترمين روحچ وتجرين عدل ويايَّ لو اكفخچ تكفخ .
فتحت قبضة ايده حتى اشوف شصار بيدها من جوة
أتفحصها ورفعت راسي عيونه ذبلانه صافن بيه
_ روح تزوچ امك مو تريد تزوجك روح ارضيها وارضي روحك .
_ متزوج إثنين غيرچ وكلها تعرف انا هاوي بنت ذياب .
لطمت على خدي عفته وركضت على باب مفتوح
وكلها كاعدة جوة يسمعون اقل صوت يصير فوك
ضربت على شفايفي ورفعت اصبعي احذر بي
_ كافي بس تصيح ولا تضرب ونفسك لا تأذيها گدامي .
_ عجل حاجيني عدل بس حاجيني عدل صعبة ؟ .
غـاليـة : بيني وبينك كلمة وعد وحلفان اذا
ما تاخذ كلامنا بعين الاعتبار اهدم كلشي والله
انا ما اريدك ضـلـيل وانت تعرف ، وما جابرتك عليَّ
والك مني كل الحرية بعمري ما حاسبتك ولا راح اسويها .
دفعني وطلع ينزل مستعجل ويورث بالجگارة
بعده بنص الدرج واسمعها تصيح
_ تلومني على كره هل دايحة لو
تصح الفرصة من دمها اشرب
حقي اكرهه دام شالعه گلبك وفوك
شينها عينها گوية نزلت راسنا بالطين
وهي ام الراهي تفتر وراح تتعذر منها .
كمل الدرج وهي اعترضته مانعته يفوت تريد تكمل
هو رافع راسه وبقمة الغضب
واگف حتى ما يخلي عينه بعيونها :
_ خليني ازوجك اسمع مني بروح ابوك طلگها
وازوجك بدل الوحده اثنين
انتَ شيخ ال ضـلـيل ولك يمه الف وحده تتمناك .
ضـلـيل : وانا ما اتمنى غير بنت ذياب رايدها .
لطمت على وجهه بكل قوتها حيل ادگ على راسها
وتصيح تصرررخ ولدها يلزمون بيدها تريد تصعد :
_ تتمناهاااااا عذبت حالك ول كبرتك .
ضـلـيل : قابل انا قابل .
_ تاكل بحيلك عوووووفهااااااااا طردهاااااا
ما اريدهااااا بنت ذياب ما ارررريدها تعيش ببيتي .
_ بس انا اريدهـا صدر البيت ألها والعتبة النا .
_ موتت اخوك وراح تموتك ، نهايتك يا ضـلـيل
على ايد بنت ذياب اسمع ول اسمعععع مني انا امك
عوووفهااااا بروووح ابوووك عوفها .
ضـلـيل : احبـها وحگ الله مو بيدي هاويها .
عصرت عيوني بيدي وضعي وتوازني اختل
وانا اسمعهم ، عصرني گلبي من سمعت تمار يتجاوز :
تمار : والله زحمة شيخنا انتَ سلف بيدك وبشورك يمشون
حرمة تمشيك بشورها ، مو المفروض تحاسبها على فوتت
المرررررراكززززززز مرتك دخلت مركز من يمتى نسوانه
يدخلن مرررراكززز ، شردت بتها من شوكت نلفي نسوان
يشردن بناتهن ، اصحى على زمانك اصحى .
فك ضـلـيل عيونه وراح على تمار فر ملابسه بيده
وضربه راسه براسه وهذاك ما يسكت يسب
وضليل يكثر عناده مقتدر وشاهين يفكون بيهم
ما يگدرون ، امهم تفك بهذا وتتوسل بذاك
عزيزة : انتِ شعلتيهاااااااا بيناتهمممم يمه سكتيهم .
دفع ضـلـيل تمار وفلش الاستقبال ما يبقي
شنو يصير گدامه يهد بي بحيث من قوة الصراخ
جريت شال لفيت روحي والبنات يمنعون بيه
نقش : لا تنزلين عوفيهم يمه نارهم تاكل حطبهم .
غـاليـة : قفلوا الباب عليچ وعلى اختچ بسرعة .
نزلت على درج فاقد هذا رسمي ما يحس على روحه
تفلش ، مرادد ، عناد يلزم بي مقتدر وشاهين
وامه من صوب ونسوانه واگفات ولا عبالك شال
خشبه وهذا تمار بعده يستفز بي لان ضـلـيل يسب
ويغلط غلطات تخلي اكبر بارد يفور ويغلي
صرت بالنص اصيح بس اريد ينتبه ادفع بيده
ما احس غير ضربني بلا وعي ورجع ضربة ثانية
زادت الصراخات درت وجهي ورجعت افتريت اشوفه
يريد يضرب تمار بوكس اجه بوجهه عزيزة
رجع يشمر بيده لزمتها يريد يسحبها
وطگني بكل قوته على عيني
اختل توازني طلعت من بينهم راسي مفتر شلت گلاص
ماي شفته على طبلة وشمرته بوجهه فك فاح عيونه
طلع من البيت بكبره امه گعدت
عافت الكوكب واستلمتني دعاوي .
صعدت اغسل بوجهي عيوني احسها تغوش
داير ما دايرها صار كدمات ، دخلت بغرفتي
ما گدرت اخلي عيوني بعيون البنات
بعدني اريد اجر نفس وفاتت ام ضـلـيل واشرت بعكازتها
_ نقش اخذي اختچ واطلعي عندي حجي ويه امچ .
هزيت راسي بقبول لنقش اخذت ننوس وراحت
سدت ام ضـلـيل الباب واجت ضربت عكازتها
ثلاث ضربات بالأرض وبكل ثقة نطقت بكلماتها
_ ما اريدچ هين تعيشين ببيتي بنت ذياب .
غـاليـة : عبالچ انا اريدكم لو ذابحه
روحي حتى اعيش بهذا البيت ؟
ام ضـلـيل : تدرين انا شني اعرف
ادري بيچ تحبين ضـلـيل بس يعجبچ ضعفو گدامچ
ما تريدين تصيرين تقليدية مثل باقي نسوانو
وادري بيّ يحبچ لان انتِ ساقطه عينچ گويه .
اريد افتح الباب جرتني بكل حيلها
شمرتني وهيَّ تحارب حتى تتخلص مني
ام ضـلـيل : اشتري بيت يتسجل بأسمچ
وتاخذين بناتچ وامچ وتروحن بعيددددددد
ما اريد شبخ ضـلـيل بعد يلمح خيالچ
اريد ينسى ويحقد على بنت ذياب
مو تكرهي ما تريدين هل مهجوم
ولا تريدين تخسرين بناتچ اخذيهن
واطلعي روحي من هين وانا امحي اثرچ من گلبو موافقة ؟.
الفصل التالي اضغط هنا
يتبع.. (رواية الموروث نصل حاد) اضغط على اسم الرواية لتجد الفهرس كاملاً بجميع الفصول.