رواية الموروث نصل حاد – الفصل الرابع
لزمت المسدس بيدي الثانية وهوَّ بعده يضغط
سديت عيوني بقوة موجوعة ومن كلامة محروگة :
ضـلـيل : متعمدة تبينيني بهاي الصورة گدامهم .
_ تأذيني ضـلـيل ضلوعي .
ضـلـيل : تريدين ترضين غرورچ .
_ يمه راح اتكسر ضـلـيل اخخخخخ .
ضـلـيل : قصدچ توصلين رسالتچ شوفوا يكتل روحه لخاطري .
ضربت ايدي بالحايط روحي طلعها وهو يثبت
وجهي قريب من وجهه وبأستفزاز يحاچيني :
ضـلـيل : ادوس على گلبي والله دست والله .
غـاليـة: لو دايس وما سامع گلبك چان هسة انا مو هنا .
ضـلـيل : صوتچ العالي سمعتو حاربت روحي وما تحركت .
غـاليـة : تعوفني لو شلون ضليل .
ضـلـيل : والركضة مالتچ من فوك للمطبخ حاربت بيها روحي .
غـاليـة : اي تجاهل احسن للطرفين .
ضـلـيل : تعمدتي تسوين هل فلم لأن مأمنه
انا بالبيت وضعيف يمچ .
اجر بروحي من بين ايده ملخ ايدي تملخ بقبضة ايده
ضـلـيل : من انا برا البيت صوتچ بعد ما ينسمع
ومن ارجع تدرين اكو كلب ابن كلب راح يتخبل عليچ .
دفعته من صدره رجعني على حايط اكثر يمرد
بيه ضغطت على اعصابي واسمع بي اهز راسي بـ لا
ضـلـيل : تتعمدين تبينين نقطة ضعفي لو بيدچ
تصيحين انا نقطة ضعفو لعبوا وانا العب عليه حتى اخبلوووو گدامكم .
درت وجهي منه وبعده يضغط ويكرر بالكلام
ضـلـيل : خبيثة انتِ خبيثة بطريقة كافرة .
غـاليـة : ما مجبور تتحملني اشمرني .
حجيتها وما احس غير تخبل ضربني بطرف كف
ايده على وجهي شاغت نفسي بقيت ادفع بي
وهوَّ يزيد وبعكس المسدس بتردد تام وخوف يضربني
ضـلـيل : وسفه شيخ قبيلة كاملة تلعب عليه حرمه مثلچ .
غـاليـة : كسر بيدك ضـلـيل كسررررر بيدك .
ضـلـيل : بعد ما اريدچ غـاليـة لمي هدومچ .
دفعته خلصت روحي منه مشيت
گعدت على طرف السرير صاح :
_ عقلي رافضچ رفض بس الله يستر منو .
اجه تقدم قريب مني ضرب گلبه ضرب من يمي تأذيت
_ وهذا گلبي اذا يوم يون عليچ بعد
اوگفوووو اعزم بالله اوگفووووو انذليت انااااا .
رفعت عيوني هيچ ثبتتها بعيونه
وابتسمت وروحي لعبانه منه :
غـاليـة : الله ياخذكم واخلص من صدك منكم .
سحب اقسام المسدس سديت عيوني بكل قوتي
رجع يضربني بالمسدس بالطرف مالته :
ضـلـيل : انتظرچ جوا اليوم بهل مهجوم ما تنامين
ما اريدچ بعد چزت روحي منچ بعد .
عافني وطلع جسمي ملابسي عبارة عن نفط
اخذت ملابس وفتت على حمام اغسل بروحي
طلعت امشط بشعري فاتت عزيزة ترجف
_ ضـلـيل منتظرچ برا غـاليـة .
_ خلي يحچي وحدّه اخوچ .
اجت وكفت قريب مني اخذت ايدي بين ايدها
_ غـاليـة عصبي شگد ما احذرچ
هل مرة قليل والله عصبي .
_ عزيزة اطلعي من الموضوع دخيلچ .
عضت إصبعها بأسف وحيرة :
_ ليش فضحتي غـاليـة ليش
بينتي حجم ضعفو گدام اهلو .
_ وروح ابوية ما متعمدة عصبت
تعرفين شنو فقدت عقلي .
_ هذا چبيرنا عيب يطلع بهل ضعف
گدامنا يريد ينتحر علمود حرمة .
بعدني اريد ارد عليها دفر الباب وتقدم قبض على ايدي
وسحبني بكل غضب قربني منه يهز بيه ويسألني
_ صار ساعة انتظر جوا بدلي اليوم هين ما تباتين .
غـاليـة : اخذ بناتي واطلع من مهجومكم .
_ ننوس ما تطلع هاي من صلبي وانا اخاف عليها منچ
دامچ تكررررهين ابووووها كلشي اتوقع منچ تسوين بيها .
فتحت عيوني بصدمه ضربته على صدره :
غـاليـة : لا تخربط بالحچي ضـلـيل اياك تستفزني ببناتي .
_ نقش بيت زلمتها ، ومرجانة ضيعتيها ، بنتي ما انطيها
ارجعي لأمچ فارغة بطرگ روحچ وعيشي حياتچ .
غـاليـة : فكرة حلوة .
اخذت روحي من بين ايده غصب وانا ابتعد منه كملت
_ بس ما عجبتني اريد بناتي حتى اطلع
وبعد حتى بالاحلام ما اخليك تلمح خيالي .
ضـلـيل : راح اندمچ راح اكسرررر عينچ
وعنادچ هذا عنادچ بقندرتي ادوسووو .
_ سمعناها هووواي ، اذا چنت گدها نفذها .
وقبل لا يطلع سألني ولأخر مرة
_ يعني ما راح تطلعين من هين .
_ اذا بناتي ويايه ليش لا رجع بناتي وتدلل .
_ سهلة بنت ذياب من اليوم اشيل ايدي منچ .
_ شيلها والي يتجرأ ويحاول يأذيني اموته وروح عابد .
_ ناركم تاكل حطبكم .
– دير بالك لا تاكلك .
_ ياهي ؟
_النار شيخهم النار .
_ غـاليـة .
يريد يطلع وگلبه ما ينطي يروح يرجع يلوب
وجهه محتقن من العصبية لو بيده يملخني
ضـلـيل : اطلع ابن كلب وساقط اذا بعد يرفلي جفن عليچ
هساع لو ادحگ يشرحون بيچ جدامي هم مايهمني .
اهز براسي وابتسم اريد ابطل من هل هل حركات
لان راح يفقد واتملخ بيده بس عنادي كافرررر :
غـاليـة : اذا تگدر ، يا عيني انا اگلك شيل ايدك
بعد عسى ما اموت بيدهم .
ضـلـيل : عجل اناااااا شحچي موووووو
گلت لووو تتشرحين انا مالي غرض بيچ .
غـاليـة : گدهـا نفذهـا دا نفذها يا عيني .
طلع وهو يتوعد ويسب بيه وبأهله
كل ظني ينزل ويبلغهم شال ايده مني
وبعد مايدخل ، طلع وبعده يهدد محد
سلم منه ومن لسانه يمشي ويفشر ذاك
الغلط الي ما يلبس عليه ثوب ، صعدت ننوس
بيدهـا علاگة حلويات اخذتها بحضني بغير عالمنا :
_بابا شرالي حلويات .
_هوَ اخذچ ؟
_ اي .
_وينه هسه .
_بدل طلع .
_ وين طلع بهل ليل .
_ شعرفني .
گعدت تاكل وتغني الحد ما غفت بحضني
صفنت بملامحها شگد تشبه أبوها، اصابعها
مثله طوال وسمارها نسخة سمار أبوها
حتى نظراتها قوتها كلامها مثله شگد
ما احاول اغير بيها بس هيه دمها مثل دمه
معقولة ضـلـيل يفكر اكره ننوس لأن بنته
هو مو يعرف افدي بناتي بروحي شلون
يحچيها وبوجهي صح بنته بس هم بنتي .
سرح عقلي ورجعت اتذكر اول ليلة صرت بيها حرمته
اول ليلة وأنا مجبورة محطميني عمامي بيوم ما سحلوني
وبالضرب وتعنيفهم نطقتها وافقت على زواجي من شيخ
الـ ضـلـيل بعد ماجنت بودي امردهم بيدي ، بليلتها ما صدگت
بس يخلصون العقد حتى ارجع واشوف بناتي
من بعد ” سنة وخمس اشهر ”
حرموهن مني وانحرمت منهن ، استخدموا
بناتي مستمسك ضغط حتى بس اوافق واترك بغداد وامي واجي عدهم بحجة بناتنا ما يتربن بين الغربة .
دخلت شفت شيخة ال ضـلـيل لثاني مرة
اول موة بيوم دفن عابد والثانية هنا
جبروت بوگفتها وهي لازمة عكازتها مستندة
عليها وبناتي وراها بيد عماتهن
ما شايفتهن قبل بس جنت اسمع عنهن من عابد
ام ضـلـيل : اجيتي برجلچ للموت يا بنت ذياب .
غـاليـة: انا الموت دخلتي الموت لنص بيتچ يا عجوزهم .
عبالهم من ملامحي انا بريئة وراح اخافها
من كلامي كلها تعجبت صرت اشوف العجب
والاستغراب بعيونهم ، تعديتها وركضت على
نقش ومرجانة اخذتهن لحضني انا ابچي واصرخ
ونقش بس نقش اسمع صرخاتها بعالي صوتها تناشغ
دفعتهن مني اريد أشوف مرجانة ليش صوتها ماكو
بالعادة مرجانة اذا تحچي ترج اذني بضحكتها
حضنت وجهه وبس دموعها تعبر عن صدمتها :
غـاليـة: ماما مُـرجانـة سمعيني صوتچ .
ضربت على رگبتها وتملخ بروحها حضنتها وجريت
نقش من ملابسها اسأل بيها اريد اتخبل من الخوف :
غـاليـة : اختچ شبيهـاااااا وين صوتهاااا وين ؟
ام ضـلـيل : بنتچ بلعت لسانهـا .
استداريت عليها بعدها نفس وگفتها رافعه راسها بشموخ
غـاليـة : شسوووويتوا بيهاااا مُـرجانـة وين صوتها وين .
نقش : ماما هاي ام بابا خلتها تصير خرسة
لان مُـرجانـة غلطت عليها .
قبضت ايدي من انقبض كلبي
هجمت عليها اريد املخهااااا
اكلها اكل بسنوني بناتها
اعترضن طريقي واثنين نامن عليَّ
نيوم يملخن بيه نقش تملخ بروحها
ومرجان تسحب بيهن مني واني ادفر
بيهن بيدي ورجلي ما اگدر عليهن
شگد ما سمينات وحده گعدت فوك جسمي
بكل حيلها وتشيل براسي وترگعه
بالگاع بلا رحمه واسمع صوت امهن تدفع بيهن وتقويهن :
ام ضـلـيل : موتنها هل بغدادية اخذت ابني من بين ايدي
وحرمتني منووووو سنين ما خلتوو يشوفني بعد بعيونووووو .
اجت عزيزة تدفع بيهن مكسورة
على اخوها جانت الوحيدة
تتواصل ويه عابد كل السنين
الفاتت ، وهي تدفع تجاوب بأمها :
عزيزة : انتَ حرمتي ابنچ يشوفچ مات
عابد وهوَ بحسرة كلمة منچ جبروتچ هذا ما حن على اخوووي ، الغريبة مالها شغل انتِ ماعندچ حنية .
اسحب بروحي منهن وبناتي
يعدلن بيه من اشوف مُـرجانـة
اريد اكتلهم كلهم واحد واحد لطمت
على راسي ملخت روحي واصرخ واناشغ بگلب ام محروگ :
غـاليـة : الله اكبر عليكم شنو من ظلمممممم عدكممممم
ولكم بنتي شلووووون راح صوتهاااا حاجووووني
اليوم اگلبهاااا عليكم والله ما راح اعبررررررهاااا
لو تموتوني لووووو .
استداريت على صوت خشن حـاد
ضـلـيل : لو شنو يا بنت ذياب ؟
اول مرة بحياتي أشوفه ضليل شيخ الـ ضليل
واگف بدشداشته لابس عبايته على اكتافه وسبحته
بيده يفر بيها رافع حاجبه بتحدي منتظر جوابي :
غـاليـة : هسة اطلع واسوي تقرير طبي بحالة
بنتي وارفع عليكم بدل الدعوة دعااااوي الحد
ما اعرف شلون وشوكت بنتي صارت خررسة .
ضـلـيل : عليمن تفوتين مراكز وشني الفايدة
اخذي بناتچ يسولفن شصار وياهن واعرفي وانتِ ساكته .
غمزتله بعيوني وافر بيدي وانا امشي بتجاهه سألته :
غـاليـة : أي وبعدين من اعرررف شيصير ؟
ضـلـيل : بنت ذياب وراها تگعدين وتسكتين على بناتچ .
غـاليـة : تخسون وين عايشين بغابة بنية بعدهاااا
طفلة صوتهااااا راح من صدمة الله يعلم شنو
مسوين وياهااا وعرفت امكم السبب اسجن امك
واسجن شكووو شخص مشارك وياها
مو بنت ذياب تسكت على ظلم بناتهاااااا .
تمار : صووووتچ لا يرتفع بوجهه
شيخنا يول لا املص راسچ .
غـاليـة: تايهة الك وتملصصصص راسي لوبيكم صدك
ذرة رجوله جان حميتوها بنت اخوكم يتيمه وطفلة
موووو ادمروها وتريدون اسكت .
اجت عزيزة تجر بيه من ملابسي
تتوسلني حتى اصعد وانا انهار
بكل مرة تصير عيني على مُـرجانـة واشوف دموعها :
_ خابروا ابووووووية خابرووووا
يجي ياخذ بنتي وياخذني للمستشفى
اليوووم اعرف شصار وياهاااا اليووووم
ما ابردها عليكممم واخليكم ترتاحون
لا والله ما ترتاحووون اريد حق بنتي لحظة ما اظل هنااا .
وانا احچي ما احس غير عودة ومن ورايه صارت تضرب
درت وجهي صارت الضربة على وجهي وام ضـلـيل
ترفع بالعكازة وترجع تضرب بقيت ارفع بيدي اريد اوگفها
وهيَّ بكل شراسة وحقد تضرب وتضرب وتضرب
وبناتي عماتهن دافعيهن على حايط
وعزيزة تمار يمنع بيها حتى محد يدافع عني ويخلصني
تمار : خليها تتربى الظاهر ما عدها تربية .
وگعت من الضرب على راسي اشوف
ضـلـيل صعد وعافهم بكل برود :
ام ضـلـيل : هذا درس اخذي بس انا بهل بيت مسموح
ينسمع حسي العالي ، هاي كتلت النسوان يحدد مقامچ .
شمرت العكاز بعد ما كسرتها عليه اخذتها وما باقي
بيه حيل بس مو بالحيف اسكت عليهم
واخليها تفرح بضربي وتگول كتلتها
وسكتت ولصمناها بالضرب وتاخذ ايدهم
جريت العكاز وضربتها اربع
ضربات بالحايط وانا ارفع صوتي
وبأعلى من صوتها هددتها وهزيتها بكلامي :
غـاليـة : بنت ذياب تنطي دروس ما تاخذ .
قريب مني معرض يصير عبارة عن خشب وجام
وبداخلة مواعين وتحفيات من الغاليات واثريات
رفعت ايدي بكل قوتي اضرب بالجام اكسر بي
وبالغراض بداخله وهي تصرخ وبناتها تتعايط
رفست طاسة بالگاع كلها استكاين وقوري الجاي
بكل حيل رفعته وشمرته قريب منهن حتى ما يطافرن
حتى ما يلزموني ، واني اضرب باقي الغراض
اي شي يصير گدامي افلشه الهم مثل ما شغلوا النار بكلبي
اليوم اهجم بيوتهمممم والله ، لمحت ضـلـيل ينزل وامه
واخواته يصرخن ويأشرت عليه ينزل سريع على
درج ويكف بردن الدشداشة هو اقترب وحسيت
البيت وكلشي يفتر بيه من الضرب والتعب وگعت
وقبل لا اصير على ارض انشمرت بين احضان ضـلـيل .
احس واسمع بس ماعندي حيل افتح بعد عيني
واذا اگعد راح يموتوني واخسر روحي وبناتي
حسيت بماي بارد وايده شكبرها يغسل بوجهي
مُـرجانـة خلتني على رجلها اول ما ونيت بوجع
حسيت رفعني من الأرض الباردة وحضني على گلبه
يصعدني فوك وامه تدعي وتتوعد تموتني
دفر الباب وفوتني على غرفة بمجرد
ما نزلني على سرير طلع من الغرفة بسرعة .
طلع وبناتي فاتوا يركضن يگعدني
رفعت ايدي حضنتهن نومتهن بين ايدي
انا ابچي وبناتتي منهارات من الصدمات
بعد ما جانت عيشتهن مثل الملكات
انهدم كل دلالهن بموت ابوهن .
نمت وما ادري بيهن فقدت كل قوتي اتمنى احاجيهن
واسمع عذابهن بيوم عفناهن نمت مهضومة
من يوم موتت عابد وانا روحي ماتت
دفنت گلبي بيوم دفنته ، عافني بنص الطريق
بعمر صغير أتحمل مسؤولية بنات اثنين وحدي
راح وراح وياه اماني وفرحتي وكل احلامنا تبخرت
مو بس زوجي وابو بناتي عابد حب عمري
وعشگ مراهقتي ، صديقته انا وهو صديقي
تحمل الضيم الخاطري من الصفر بديت وياه
حياتنا الحد ما كوننا بيت واطفال ومات .
فزيت الصبح على صياح غريبين ما اعرف
عنهم غير القليل من عابد ، وكفت واحس إعظامي متكسره
فتحت قليل من الباب واسمع امهم تتجادل هي وضليل
_ انا گطعت علاقتي ببني لان أخذها تالي
مات وانا محرومه من شوفتو كم سنة وما اعرف حتى اخبارو
تالي ماتت ورحت انتَ فوتتها بيتي عليش فهمني عليش .
جاوبها بصوت خافت ويشرب بالچاي ويرجع يحاچيها
_ انطيها بناتها وهساع اطلگها وتروح .
ام ضـلـيل : هذّني بناتنا من ريحة اخيك تروح
امهن تتزوج ويربيهن الغريب شلون ترضاها .
ضـلـيل : وبنات ابنچ بناتها هاي بنت ذياب
شهرتنا بين العشاير اذا ما أجيبها هين
نصير علچ على كل لسان .
_ اكتلهااا وروح اخيك وروح ابيك احطهااا واموتها .
ضـلـيل : اي براحتچ روحي هساع لزميها وموتيها
انا شلي غرض ، خلي العالم تحچي بينا .
ضربت على رجلها وتنود من
القهر وتباع على معرض مكسر :
ام ضـلـيل : البارحة عرفت ليش عابد مات
عمي هاي ما تتعاشر .
طگ رگبته ويستمع لها شلون محروگ گلبها مني
ام ضـلـيل : حيلها يعادل سلف فرتنا فر بتك
ايد لا وگف بوجهه چبير ولا صغير
بنت الشوارع بعدها بحيلها .
عفتهم ورجعت على غرفة گعدت البنات اريد اسمع منهن
لصار وحده تباع على ثانية ومرجانة تبچي
غـاليـة : لا تخافين من احد احچيلي .
نقش : اتفقنا اني ومرجانة ابد ما نحچي على صار
لان راح تصيرين عصبية وتنزلين تتعاركين وتنضربين
اخاف يمه اخاف تموتين بيدهم وبعد نخسر امنا مثل ابونا .
على اعصابي احچي واعاتب بيهن
نقش تنتهي من البچي وما تسولف
ومرجانة بس نايمة بحضني ما تريد حتى تتحرك
وعلى هل حال يوم بعد يوم وصار اربعة ايام
على حالتي احاول احافظ عليهن منهم
اسمع بأصواتهم بس ما ننزل لا اني ولا بناتي
وبيوم من ايامهم الهوسة دزت بناتها تريد انظف وياهم
وگرايبها موجودين لازم انزل اصير مسرحية الهم
رفضت وبقيت اسمع بيها تحچي وتألف عليَّ قصص
وحكايات كفار ما يسووها شي اجت نقش تلطم على وجهه
رحت بفضول اسمعها تروي أكاذيبها :
ام ضـلـيل : وعلى اخر لحظات لحگ ضـلـيل عقد عليها
مجهزة بدلة وحاجزة قاعة عرس تريد تعرس
وابني تراب گبرو ما نشف .
تسألها گرايبهم : شني تعرفه شبسرعة حصلت واحد ؟
تردها : اي خيه سمعنا تحب ويمكن
ابني مات من قهرته وخياناتها .
ما تحملت والله فلا اگدر اكتم
صوتي نزلت على درج وصحت :
غـاليـة : ابنچ ما مات مني بالعكس
انتوا اهله سبب موت عابد مات بسكتة دماغية
بگد ما يبچي وينوح على اهله
شگد حاولت اعوضه بس هوَ رادكم انتوووا
وانتِ بالذات موتي ابنچ ماكو بگلبكم
لا رحمة ولا محنه يا ظالمين .
اريد اكمل دفعني تمار بكل قوته
بالغرفة الجوة يدفع بيه وفات
من برا على صوتي شيخهم
دخلت وياهم امهم تلطم على وجهه وتصيح :
_ يولو شهرتنا يولوووو .
غـاليـة : انتِ خربتي سمعتي اني شوكت
عشگت شلون لحگت اجهز ومشتريه بدلة
وحاجزه قاعة هاي ياااا قاعة عزا العزاچ كوووووون
يحجزون صالة موووتچ ان شاء الله يا بلوة .
كفخني تمار على راسي جرني ضـلـيل من ايد تمار
لطمني على حلگي فاتح عيونه على وسعها مصدوم
وابتعد يأشر ويشمر بيده بس يهددون هاي فالحين بيها :
_ تدعين على امي گدامنااااااا .
_ تطعن بشررررررررفي تعرررف شنووو تطعن بشرفي .
ضـلـيل : روحي ولي صعدي يا بنت الناس تكفي شرنا .
غـاليـة : يا ابن الناس انتوا تكفون شركم
لا تبقون تحچون انا ما ابلعععع الاهانة
واسكت منكم وروح عابد .
تمار : ول ارتكب جريمة هساع روحي
منااااا عيب تتراددين ويه الشيخ .
غـاليـة: شيخ عليكم وعلى روحه مو عليَّ .
ضحك وفر سبحته وهوَّ يرفع راسه يأشر بيده
ضـلـيل : چان انتِ بنت ابوچ وگد كلامچ
حدري چدامي وعيديها .
صرت گدامه ورفعت اصبعي أشر بي واحچي :
غـاليـة : انتَ شيخ عليهم وعليهن
مو على بنت ذياب شيخ الـ ضـلـيل .
ضـلـيل : بنت ذيـاب شيخ وتاچ راسچ وراس اهلچ انا .
عفته يحچي بعده واريد اصعد طبگني
على ميز گدامهم يعصر بفكي حسيت جسمي تملخ :
ضـلـيل : بنت ذياب اعتذري .
غـاليـة : ما غلطت لو تموتني ما اعتذر
لا منك ولا من اللي اكبر منك .
ضـلـيل : وروح ابوي اذا ما تعتذرين
هساع اكسر هذا خشمچ وعينچ .
غـاليـة : لا تهدد لان من اسمع نبرة
تهديد عقلي يودع الملاعب واتخبل .
ضـلـيل : اخر تحذيررررر اعتذري .
غـاليـة : لو تموتون لا تحلمون .
فتح الباب وهو خانگني من رگبتي عـاط بيهم :
ضـلـيل : تمار اخذ الشيخة واطلععععع بسااااع .
ام ضـلـيل : لااا لااا انا سامحتهااا
عووفها انطيني هل حيوانة .
ضـلـيل : اطلعععععععي يمههههه اطلععععععي .
ام ضـلـيل : اگلك انا حجيت عليها صدك طعنت بشرفها يمه .
ضـلـيل : تطلعووون لو هساع اسوي مصايب بيكم .
بهل دقيقة عرفت ام ضـلـيل خايفة لا يقترب مني ضـلـيل
ما عرفت ليش بوقتها واستغربت بعز صدمتي .
شمرني بالغرفة ودفعهم يطلع بيهم تهستر من العصبية
طلعهم كلهم وقفل باب المهجومة ، جسمي تحول سعفة
اريد بس اوگف على حيلي بعد حيلي كله باد
وانا على ارض وهو گدامي يشمر بساعته
وشمر عباته لاف شماغ عگطه وهو يفتح
بدگم الدشداشه دنگ لمستواي :
_ وروح ابوي ما ألي نيه اتگرب منچ
ول ولا عندي نفس بيچ اريد اكسررررر راسچ
على هل عرامة اللي بعمري ما مر عليَّ مثلها .
ضربته على صدره ونهضت اريد اطلع
دفعني على حايط صرخت بوجع ولزمت ظهري :
غـاليـة: اي وتثبت رجولتك اذا تتقرب مني
عود تصير رجال وتكسر عيني ، ما ابريك الذمة اذا تتقرب مني والله
ولا راح اسامحك واخلص عمري كلووو حاقده عليك
وبعمري ما اعتبرك زلمة ولا شيخ لأنك قذر حالك حال اهلك الوحوش .
لزم دشداشتي شگگها عليه ملخها تملخ رفعني من شعري وهدد
ضـلـيل : انطقيها گولي اعتذر وخلي هل مهزلة تگضي .
غـاليـة : لو تنحررررني ما انطق بيهاااا ، ومو أسفة .
جانت اسوأ شعور وارخص ساعات عشتها بحياتي
لمساتها جانت تحرگني كلامة جانت سچاچين تملخ بروحي
تمنيت المووت اول مرة جانت يتجرأ بيها ويلمسني وهاي اخر مرة .
فزيت من اهم اسوأ ذكريات حياتي على صوت ننوس وهي
تريد اغطيها ، صفنت بننوس بهذا الغلط وبهذاك اليوم حملت بننوس
ومن يومها وبالمواقف اللي صارت منع نفسه مني وانا مانعته
يمكن يفكر اكره ننوس لأن صارت لا برضاتي ولا رغبتي
ننوس اول طفلة لشيخ ضـلـيل اجت بوقت چان فاقد الآمل بالأطفال .
فزيت من انفتح الباب دخلت عزيزة گعدت يمي
ما راضية على تصرفاتهم كلهن ، اعتزلت على گد
ارتب الفوك وأنظفه اكف لسانها مني ولو اعرفها بعد
الصار راح تاخذ لها فترة تكتم بگلبها وما تندگ بيه
اسبح بننوس وعيني صدك على ساعة من سمعت
صوت صياح جوا شفتها ب10 لبست ننوس وانا
شعري ينگط ماي لبست الدشداشة بدون ما نشف
وطلعت ركش بس المنشفة على راسي وجهي من الماي
الحار صاير دم ، عفت ننوس بنص الصالة وركضت على
درج اشوف نقش حاضنة ايدها مفرفحة روحها تگمز وتتبحرث
منا ومنا تستنجد بالكل ركضت ام ضـلـيل تگلب بيدها
مثل المخبلة مزلت اركض واتعثر
_ ياااا يمه نقشششش يمه .
نقش : حرگني يمه حرگ ايدي لحگيلي گلبي راح يوگف .
ملخت وجهي وشعري گطعته تگطع من شفت
ايدها الحم والجلد مأكول أكل والدم يجررري
لزمتني ام ضـلـيل تسد بحلگي وتصيح
_ اششش يول اشششش رجلها والشيوخ بالديوان يعتذرون .
غـاليـة : يعتذرورررون حرگهااااا يعتذذذذرون دخيلك ياااا علي .
ركضت على مطبخ اليوم ارتكب بهذا العار جريمة
اجت وراي امهم وبناتهم يريدون بس اسكت
بس ابد ما يوگفن بوجهي يعرفني من اصير
اعصاب بعد ما اشوف بعيوني وياهو يصيرر
گدامي يلوحه طشار ضرباتي، اخذت الهاون
من الجرارة بس حديدة الهاون اللي يطحنون بي
وضربت الباب بكل قوتي صار گدامي العار
وابو واخو وياه ، ركض تمار يغطي بيه بشماغه
ما ظل براسي عقلي جنت اصرخ بلا وعي
غـاليـة : بناااااتي خط احمررررررر لك اليوم
انعل والدي والديك يا ساقط يا عار على الزلم تفوووو على شواربك .
رفعت الهاون اريد اضربه ركض ابن مقتدر
يريد يسحبه من ايدي يجر بي واني اجر
شاهين : عمتي الخاطر محمد ادخلي اششششش .
ضـلـيل وگف بوجه شيخهم منتظر منه كلمة
صحت وبصوت واضح
_ اليوم حق بنتي اذا الزلم ما تگدر انا اخذه
وازلزل الگاع تحتهم وحق الله يا عار اخلي دمك بطولك
مثل ما خليت دم بنتي بطولهاااااااااا .
وهذا شاهين وتمار مردوني مرد ما يقبلون اتحرگ من حرگت
كلبي لزمت الهاون وبظهري صاير الحايط ضربت الهاون
وايدي بالحايد من نار گلبي ما احس بالوجع بس اصرخ
اريد اكلهمممم اكل لو اموووتهم ما يبرد هل نار ما تبررررد
بنتي تشوهت ايدهااااا ، وصوت صراخها يزيد من اعصابي
تهسترت اضرب اضرب بالهاون بكل ماعندي من حيل
استدار ضـلـيل بس يباع على ايدي تملخت تملخ .
رجع يباع عليهم منتظر الزله وصل الغايته من شيخهم صار
_ شيخ ضـلـيل أدب النثايه لعندك .
ضـلـيل : يأدبنك النثايه اللي عندي يول نعالها تاج راسك .
وگع عليهم وشاهين عافني هو واخوانه وگمزوا ويه ضـلـيل
نام عليهم يضرب فاقد بوكسات دخلوا باقي ولد مقتدر
صار الاستقبال امالخ وضليل شال عگال شيخهم داس
عليه برجله وبعالي صوته جلجل الديوان بصوته
ضـلـيل : مو بنات ضـلـيل يحترگن وتنهان بيتك
اهينك انت وكل شيخ يطلع وراك قندرتهاااا بنتي بنتي قندرتها
اخليك بحلگك لك عار اذا ما اخليك تبوس بيدها ورجلها
شاربي مووووو عليَّ شاربي هذا شاربي ازينوووووووو
اهز عرش قبيلتك وانهيكم من الدولة اعلن عليكم غضب الـ ضـلـيل .
شمرت الهاون وطلعت اخذت نفش من ايدها
مفرفح روحهااا وجهه من الراشديات مصبوغ ازرگ
وانا اصعد على درج ادعي عليهمممم :
_ حسبي الله على اللي چان سبب بزواج هل طفلة
الله لا يوفقك يا ضـلـيل لا انت ولا امك بيوووم ما عاندت
انت وشيخة العارية وزوجت بنتي وكسرتهاااااااا .
والعجوز تضرب على حلگها وتملخ بوجهه تصيح
_ ول اسكتي لا يجي يكمل عليچ مو بوعييه
لا يرتكب بيچ جريمة سويتيهااا دم ما ارتاحت وفاخت الدودة
خليتي الزلم والشيوخ تترادم يا بغدادية شتردين من عدنا بعد .
دفعت نقش فوك وبقيت انا اترادد وياها
غـاليـة : غير انتوا زوجتوها من البداية عود
صرتوا زلم خيرة وخفتوا عليهن من الغريب
وغصب اخذتوهن مني هسة غصباً ما عليچ وعلى
ولدچ تحموهن واذا ما تگدرون احنا نووولي نحمي نفسناااا .
صعدت على غرفة شمرت كلشي بالارض
اخذت عباتي ولبستها بتك ايد شمرتها شمر على راسي
اخذت نقش وننوس تركض لازمه ذيال عباتي
وانا انزل على درج كلها تباوع عليَّ ومنهم ضـلـيل
ضيق عيونه متعجب اول مرة اسويها من يوم
دخلت بيتهم والبس عباية هيچ بدون سابق انذار :
ام ضـلـيل : وين تولين اگعدي لا تكبررريها اگعدي .
غـاليـة : اريد اروح على امي اليوم انا ارررريد امي .
تمار : جديدة هااااي ماكوووو شي اسمه امي
الرجال ضغطووو صعد اكعدي بغرفتچ تكفي الشر .
غـاليـة : وروح ذياب اليوم بهل بيت ما ابات
ارررريد امي اليوووم انا احتاج امي .
عفتهم ورحت على ضـلـيل ما ابچي بس
اريد احچي ما اگدر العبرة خنگتني خنگ
ضربت رجلي بالارض وبأصرار صحت
غـاليـة : ضـلـيل اريد امي ، مابيه بعد احجي
صبري خلصان تهسترت ارررريدهااا احتاجها اليووووم .
ضـلـيل : اخذي بناتچ واصعدي فوك .
غـاليـة : بس اصعد احرگ روحي واحرگ بنات والله .
ما سمعت منه رد اريد صدك اصعد مستحيل اطلع وكلها موجودة
قبل لا اتحرك سحب ايدي ولا ادري ولا احس بيها اول ما صارت
ايدي بيده نزع شماغه من راسه ، اشوف ايدي تجري
دم ومنفوخه صاير عبارة عن زراگ واصبعي الصغير ما احس بي
عصرت عيوني وهو يلف ايدي وقبل لا يكمل بصوت واضح صاح
ضـلـيل : شاهين وصل عمتك وبناتها وين ما تريد .
مُـرجانـة ..
ابتعدت خليت ايدي على شفايفي بمعنى ما اعيدها
تقدم بلا وعي احس فاقد من العصبية لزمني
من ايدي ثبتني وقبض على وجهي بيده الثانية
وارث : مُـرجانـة عابد الـ ضـلـيل مو وارث ينضحك عليه .
وانا بين غضبه وتمسكه بيدي بكُل وحشية
أندفع باب الغرفة اللي انا بيها ودخلت
حجية وجهه ابيض كالغيوم عيونها
ملونها بلون بلون السماء السمائي الصافي
جسمها مليان بترتيب لابسة عباية راس ومناظر
بأطار ذهبي ملامحها مريحة للعين مشت بتجاه
وارث اخذتني منه وخلتني خلف ظهرها ارجف
وهي حاضنة ايدي بيدهـا الدافية :
_ لا تشمر قهرك من اخوانك بأضعف شخص يصير گدامك .
وارث : حجية شعندچ هنااااااااا .
_ صوتك ولك امشي اطلع خلست البنت جنك طنطل .
وارث : حجية انتِ اطلعي قبلي شلوو اجيتي لكككك سهمممم .
من برا عاط سَــهم ويضرب بالبوب
_ يمووووت كون سهممممم .
وارث : اذا ما اطيح حظ حظك اصبر .
_ شبيك وروثي شفتك زعلان رحت
خابرت امك تخفف عليك لا تروح
تنجلط وهمام يدگ رداحي رداحي للصبح .
التفتت امه وابتسمت بوجهي وتمسح على راسي
وارث : امشي يمه نروح هناك .
_ مو اخابر عليك شني معناها ما تجاوبني .
وارث : مشغول .
_ على امك مشغول چا خوش .
وارث : شصاير ؟
_ اريدك تجي ويانا للبيت .
وارث : ما أعتب عتبته ارتكب جريمة .
_ چا هاي هي وولدها طردوني ما ينحملون
وهاي المظلومة ميمونة شبعت كفخات منهم لا تتخبل .
صدت عيونه عليَّ عبالك تذكرني اخذها من ايدها
يطلعها وراح هو وياها كلها اقل من خمس دقايق
وقفل الباب مالته لهناك ، اسمعها من بعيد تگله
_ انا اريدها خليها جوا ايدي لحد ما تشوف حل .
وارث : حجية لا تخليني اصبح بهل ليلة
هاي البنت مكانها هناااا ممنووووع تطلععع .
_ هدي لا تنفجر جنك طنطل .
راح يمشي صعد بسيارة لون اسود عالية
وانا بالشباك شافتني سدت عيونها اثنينهم
بمعنى أطمئني ، ورجعت اشرت لسهم وجبر
على غرفتي ، ما فهمت شنو قصدها ، الحد
خا طلعت سيارتهم اجه سَــهم وجبر يركضون
بتجاه الغرفة فتحوا بابها وجبر ياخذ بالجنطه :
سَــهم : يلة يا بنِت استعجلي .
ثبتت بمكاني اهز براسي اخاف اطلع
منو يگول ما يرجعوني على اهلي
اذا اطلع هل اراضي يمكن اموت :
سَــهم : الحجية تريدچ يا بنت لا تخافين .
رسمت شوارب بيدي واشرت على غرفة وارث
سَــهم : لا تخافين دام الحجية امرت يعني واثقة من قرارها .
جـبر يقفل ومستعجل ، خفت مشيت وياهم
ماعندي حل ثاني غير اطلع واروح وياهم
صعدوني بالسيارة وانا أفكآري صارت اشكال
شلون اذا نيتهم يتخلصون مني لان شافوني خطر
قريت القران شگد ما اگدر ورجلي ترعش رعش مخيف
بعد ساعة من الطريق وگف مقابيل بوابة كبيرة
ترهب القاب ، نزلت ورفعت نظراتي من اكبر وافخم
ما شافت عيوني بيت بعواميد ضخمة احتار
اباع على نظافة لو التصميم اشياء رهيبة
دخلنا الگراج وطار كلشي من راسي
شفت ميمونة لازمة اثنين اطفال تحمي بيهم
واثنين زلم جسمهم ضخم الى درجة بكل
مرة يضربها احس ظلوعي تتكسر مو ظلوعها .
ركضوا سَــهم وجبر عليهم يريدون يخلصوها
من ايدهم ، وما اشوف غير همام دخل ومبين يدري
احد متصل عليَّ يمكن ميمونة ، صاروا يتضربون
رفعت راسها من شافتني فتحت عيونها متأذية صاحت
_ الجهاااااااال اخذي الجهال .
ولد وبنت بعمر ننوس تقريباً دفعتهم
ميمونة إثنينهم يراكضون عليَّ جمدت رجلي
والبنية الصغيرة صارت تسحب بيدي تريد اتحرك
طلعوا نسوان اثنين يسحلن بميمونة
طبگتها بين رجلها نومتها ولازمة ايدها
والثانية تريد تگص شعرها ، لطمت على وجهي
وركضت على كليدور صاير قريب مني خليت الجهال
وهرولت على ماسحة سحبتها ورحت عليهن
ما اعرفهن بس منظر ميمونة فقدت عقلي من شفت حالها
بقيت اضرب بيهن بكل حياي اثنينهن ومغمضة
من الخوف يمكن حتى ميمونة ضربتها .
وما اشوف غير همام طلع هو واحد يتماطلون
بالگاع واحد يخنگ بالثاني ويتضاربون ضرب
مووووت بحيث يتصايحون بصوت خشن مرعب
متأذين بس لا هذاك يوگف ولا همام يسكت .
وانا اشاهد بقمة الرعب وما اشوف روحي
غير صرت بالگاع وحده جبيرة بالعكر صارت
تضرب وتملخ بشعري ميمونة وكفت طفرت
عليها تعض بيها من راسهااا بكل حيلها
خلتها تزاگط ، بس گامت مني رحت ازحف
اشرد بريشاتي يمههههههههه انا وين يمهههههه
زحفت زحوف على كليدور گعدت ويه الجهال
وقفلت الباب علينا ، وهذولي كلهم صايرين دمايه .
من الشباك الصغير ما اشوف غير دخلت ام وارث
وراها هو مبين عليهم شلون مصدومين بحيث
وارث بالدقيقة يحاول يستوعب منو يضرب منووو
صايرة لحمممم لحممم مضارب ، طلع المسدس
ومن بعيد ما اشوف غير طگ هذا الي يضرب
ويخنگ بهمام بطلقة قريب من ايده
صار يزاگط مثل الديچ من الخوف
بينه وبين الطلقة شعرايه وراح يركض
على اثنين لازميهم جـبر وسهم يصيح :
وارث : ولك اطلعووووووووا برررا بيتي هسة تطلعون .
وگف بوجهه مبين بعمر وإرث هذاك وجهه يجري دم
_ سلم الورث وارث ونطلع كلنا ما نطيق
نظل بمكان واحد لا تجمعنا بنص بيت واحد وتنتظر نتراهم .
وارث : انعل ابوووووو الورث حقق شروطه واخذ .
_ استوليت على خيرنا لك فگررررررر .
ضربه بعكس المسدس على وجهه
لزمه ويريد يرجع يضربه ضحك وارث وصاح :
_ اي بالله اضربني تجرآ بالله خليني اشوف رجولتك .
فاتت نفس الحرمه اللي كفشتني تدعي على وارث
وعود تبلغه بكل صلافة ضربت ميمونة گدامه :
_ اختك هاي موتتها على ايدي .
ضرب ابنها مثل ضربتها لميمونة وصاح :
وارث : ما اگدر ارفع ايدي عليچ
بس اذا تأذين اختي ارجعها بعظام ولدچ اضعاف .
_ مو هذولي هم اخوووتك .
وارث : ما اعتبرهم اخوان ذولي غدارين مثلچ .
ميمونة: وارث وووووووارث يممممهههههه .
التفت عليها راح يركض وهي ماعدها قوة
دم يجري من بين شفايفها تتلفت وتضرب بخدودها
هو بدون ما تحچي فهم قصدها وصار يدور بعيونه
مثلها وبرجفة صرخ وصدره يعلو ويهبط
وارث : الجهاااال وبن الجهال جهااااالي وينهممممم .
نزلت راسي انظر للأطفال بصدمة ما مستوعبة
كلمة اطفالي يعني وارث متزوج وعنده اطفال معقولة ؟
فصلت عن البرا الحد ما صار صوت
ميمونة بأذني يتردد اكثر من مرة
_ هاي البنية ، وارث البنية الصغيرة بالمزرعة اجت
ياربي عزززززززا سَــهم وجبر رجعوا وياهم هاي
البنية واخذت الجهال بوقت العركة .
وارث : شرررررودت ولكممممم شرررردت بجهالي
سهممممممم جبررررررر يمهههههه جهالي وينهم .
فتحت حلگي وعيوني كلامهم واريد ادگ الباب
واستوقفني بالغلط مالته وهو ويسبني
وارث : بنت الكلب ما ارتااااحيت الهاااااا عرفتهاا
والله عرفت مثل اهلهاااا غدارين الغدر بدمهم .
اريد افتح الباب اطلع اكسر راسه وما اشوف غير
ماكو مفك يفتح الباب لازم بس من برا
وهذا مستمر يفشر ويريدون يدوروني
ضربت الباب بكل قوتي حتى يسمعوني
لان صوتهم عالي ، وگعت ايدي الى ان سكتوا
وسمع صوت الكليدور ينضرب ، اجه يركض
بتجاه الباب اول ما فتحه صرت مقابيله
رافعه حاجبي وتخصرت كمزت بلا وعي
ضربتة اكثر من ضربة على جسمه وطلعت
اريد اركض اطلع اليوم من عدهم .
اعترض طريقي سَــهم وجبر يعتذرون
وامه اجت تريد تحضني منعتها واشرت على
باب اريد اطلععع ، فات همام من برا ما فاهم
لان طلع يمسح بوجهه برا
_ شصاير .
سَــهم راح قريب منه يحچي الصار همام جاوب
_ انا شفتها اخذت الجهال وختلت بعد ما شبعت كتل .
وارث : چا ما تحچي من البداية .
ميمونة : ابن الراهبة فاهي .
اجت ام همام تركض عليها ركضت
على همام صارت تحتمي بي
ام همام : انوب راهبة لزگت بيها .
ميمونة : هو همام يگول عليچ راهبة .
همام : انااااااا يمتى ؟
ميمونة : هسة .
همام : هاچ يمه طيحي حظها .
فتحت الباب اريد اطلع لزمت بيدي ام وارث
_ حبيبة يمه مسحيها بوجهي ما نقصد
تعالي ويايَّ تعالي فوتي ، خطية البت استقبلناها بعركة .
ثبتت من شفت الأطفال شلون يركضون
ويحضنون بوارث انتظرت ينزل يحضنهم
حتى لو بطرف ايده يمسح على راسهم
مثل الصنم تحول رفعت الطفلة وجهه وهمست
_ بابا .
وارث : يمههههههههههه .
راحت امه تركض هي وميمونة أخذنهم وهوَّ
عبرهم كلهم وفات للبيت مستعجل ، گعدت
البنية بالمرجوحة مبين من طفولتها مورم گلبها
بچت بدون صوت وتلعب بلعبة مالتها
راح اخوها يمها گعد ساكت ، انهضمت على منظرهم
مشيت گعدت يمهم سحبت البنية بحضني ابتسمت
بوجهه وهي بقت تتلمس بملامحي .
فاتوا كلهم وكأن الصار مو فد شي مهم
ولا جديد متعودين ، ميمونة اخذتها ام وارث
تمسح الدم منها وتدعي وتتعارك هي وباقي النسوان
عرفت من خلال كلامهن ام وارث وهذني الأثنين
النسوان ضراير ، وحدة ام همام وميمونة
والثانية ام سَــهم وباقي الولد الضخمين اللي ضربوا ميمونة
يصيرون اخوان سَــهم ، اما ام وارث عدها بس وارث .
اشرت للأطفال اسألهم عن اسمائهم
فهموني بصعوبة البنية فهمت اسرع
_ اسمي حمامة .
_ اسمي غريب .
” حمامة غريب ”
حسيت بغرابة كانوا توأم ما متشابهين
يشبهون وارض بس مايلين على شگار
عكس وارث رجل اسمراني ملتحي .
بيرغ : انتِ منو يول ؟
رفعت راسي اشوف نفس الرجال الضخم
الضرب ميمونة يشرب جگارته ويقترب
رفعت ايدي على رگبتي واشرت بمعنى ما اگدر احچي
بيرغ : خرسة ؟ هل مرة جابها وارث خرسة هههههههه .
طلعت امه هم اجت قريب منه يگلها
_ جايبها خرسة هاي اذا مو طرشة
هيچ اله تسلك وياه هل ساقط الملعب .
ام بيرغ : اشردي منه هل ظالم ترا ابو نسوان
اذا تبقين وياه حتى نسوان على فراشچ يطبب
يعبد النسوان هذا وارث يمشي ويخلف بالجهال
وحتى ما يعترف بيهم .
ركض غريب فات للمطبخ طلعت ميمونة تركض
_ سالمين عيني ام بيررررغ تريدين مشكلة
جديدة عيب ، عليكم تشوفون بسمعة وارث
والله هسة اصعد احچي كلامكم واخذ غريب ويايَّ .
ام بيرغ : على اساس شلون معترف بغريب هههههه .
طلع ابنها وكلامها حز بخاطري تحچي
بدون ما تراعي مشاعر الطفل ، دخلتني
ميمونة دخلتني قصرهم كلها عيونها
عليَّ ارتعشت خجل وخوف نزلت راسي
وام وارث تأشر حتى اگعد يمها ، اجت حمامة
بصفي تستند على رجلي تسألني بخوف
حمامة : انتِ عروسة بابا جديدة .
غريب : عروسة تضربنا ها حمامة العروسة تضربنا ؟
هزيت راسي بمعنى لااا من كل كلبي اشرت
الهم بـ لا لأن واضح شگد خايفين من فكرة زوجة اب
فهموني ابتسامة اطمئنان ارتسمت على ملامحهم
البريئة تبث امان وغربة ، خوف وانعدام استقرار .
ربع ساعة من جدال بيناتهن ما يملن
عافتنا ام وارث گاعدات همزين انا خرسة
هنا صدك عرفت النسوان من الحچي اذيه
ساعة كاملة ومشيت اريد حمام وصلتني
ميمونة ورجعت توكل بحمامة وغريب
غسلت وعدلت شالي طلعت منظر البيت
ولوحاته اخذت عقلي صرت امشي اتبع
جمال هل رسمات وضخامة السگف رگبتي طگت
بگد ما فريت راسي منبهره بجمال المكان
ما حسيت روحي غير قريبة من غرفة وصوت
وارث وامه مسموع بكُل وضوح :
وارث : تعبان انا يمه تعبان وحگ بدر الهواشم
ادعيلي الله يرحم بحالي ، أخاف اموت يمه
وانا لا راضي ربي ولا اخواني واطفالي منبوذين مني .
مديت راسي شفته نايم على حضنها
تلعب بشعره وهوَّ متمسك بيدها الثانية :
ام وارث : افتح عينك اريدك قوي مثل ما اعرفك .
وارث : راح يگضي عمري ومصايبهم ما گضت .
_ بعد عين امك هاي قسمتك من الدنيا
ينطيك كلبك تعوف اخوانك .
وارث : انا كاسرين ظهري ومصبريني سم وميمونة .
_ وهمام شگد ما يبين بينك وبين همام حقد
بس بوگت ما تحتاجة لو هو يحتاجك تاكلون الگاع
واحد يرجف على الثاني ، مخربة حنيتكم عصبيتكم .
وارث : خلي ياكل نعل هل خايس .
سكتوا لثواني رجعت تسأل بفضول :
_ شلون راح تتصرف ويه بنت ال ضـلـيل .
وارث : ارجعها للأرض احسن وامان اكثر .
_ امام علينا لو عليها .
_ عليكم يمه ، هي موضوعها منتهي فترة
واوصل لغايتي و …
قبل لا يكمل طفرت ختلت بغرفة ثانية
شفت همام مزل لابس دشداشة دخل عليهم
طلعت بدون ما يحسون اريد ارجع للحمام
بس عبرت غرفة ام وارث ، وصلت للثانية
انسحبت من ايدي ودخلت لوسط الغرفة
باعت ريگي بخوف وارتباك جسمي صار ينتفض
من قربة وصوته الخافت يسوي قشعريرة بكل جسمي
وارث : مُـرجانـة .
اريد اتنفس اختنگت لزمت رگبتي ودموعي تريد تنزل
وارث : مُـرجانـة بالله هنا بالله اشوف .
رفعت عيوني اريد اطلع قطع طريقي :
وارث : ممنوع تتسمعين على اي شخص كان بالبيت .
نفيت كلامة قاطع ايدي ونزلها :
وارث : هل مرة عبرتها ، تتكرر ارجع اكون تربية جديد بيچ .
ضغطت على اسناني اريد احچي هو يريد يطلع
قاطعت طريقة رفضت يطلع مو بس هو عود يحچي
وارث : عنادچ مو زين عليچ .
اشرت بيدي رفع حاجبة مو فاهم همس
_ نحلة طنانة .
رجعت اشرت ما راضية يلقب بكيفه هذا
جرني من الباب وطلع ، بقيت اكل بروحي
يماااااااااااااا يغثني يغثني نحلة طنانة شنوووو
اريد اطلع قطع طريقي ورجع بيدة دفتر لون
ازرگ مال ملاحظات وقلم صغير مد ايده وهمس
_ اخذي ما اريد ينزلن من ايدچ اكتبي بيهن نحلة .
جريتهم من ايده وخليته على حايط و گفت
بـ استقامة حتى اكتب بكل تركيز واستعجال كتبت
_ عيب عليك تتهمني اتسمع عليكم
جنت بالحمام وضيعت ومدري شلوو وصلت يمكم .
وارث : قدرت قادر .
كتبت : تقبل استهزاء بيك شنو نحلة طنانة
ترضاها اگول عليك طنطل .
وارث : ديري بالچ من الطنطل يمتلك قدرات
خارقة تتسبب بالعاهات أو الإعاقات أو الجنون
الطنطل محد يگدر يعاشره يخافون من عنده .
التفتت على اتجاه صوته اشوفه صار خلف ظهري
مباشر ، بحيث التفتت صار بوجهي من درجة
القرب تخربط وضعي طلعت اردم بالبوب
هو قصده يقرا بس درجة القرب وترت اعصاب اعصابي .
طلع من بعدي صاروا اطفاله مقابيله على درج
يلعبون رجع على غرفة وظل نص الباب مفتوح
يتابعهم من بعيد ويبتسم ، وسرعان ما تغيرت
نظراته وكأنه تذكر مصيبة بحيث طلع بسرعة
مو بس من الغرفة من البيت كله .
شفت ميمونة ردت اروح صاحتني ام وارث
دخلت للغرفة ابتسمت وهمست بخفوت
_ طبگي الباب وتعالي هنا بصفي .
سويت مثل ما طلبت وگعدت قريب منها
حاولت اسألها بالكتابة عنهم ما جانت تأمن وترد بتحفظ
ام وارث : عرفت كم شغله عنچ من وارث
وصرت على علم دمچ مهدور عند اهلچ .
انا هم مثلها ترددت احچي هي ماعدها ثقة بيه وانا ماعندي .
_ انا ام وارث گال امچ شردتچ من عمامچ
واعرف شنو شعور ام تضحي بروحها حتى
تحافظ على بناتها لو ولدها انا عانيت وفنيت عمري
لخاطر سلامة جياة وارث ، راح اساعد امچ وانا ما اعرفها .
ابتسمت بفرح ولزمت ايدها أشكرها بالأشارة
هي هم حضنت ايدي لثواني صفنت بوجهي ورجعت كملت :
_ بس بيتنا كله شباب عزابيه اذا تبقين هنا
ادمر حياتچ واوگع بخطيتچ يمه .
تجمع الدمع بعيوني لان اعرف كلامها صح
مسحت على عيني وقربتني منها وهيَّ تكمل
_ عندي شروط ثلاثة اذا وافقتي عنهن انتِ بأمان .
عدلت گعدتي وبلعت ريگي بأرتباك وفضول
ارمش بعيوني وايدي صارت قالب ثلچ وانا اسمعها :
_ الشرط الأول ، تتزوجين انتِ ووارث على ورق بس .
الشرط الثاني ، توقعين عقد بحال صار بوارث
شي انتِ ما تمتلكين ولو ابرة من أملاكه
الشرط الثالث ، تربين اطفاله تصيرين مربيتهم الخاصة .
في حال موافقتچ تطلعين من الموضوع
وانا اقنع وارث وتصيرين تحت حمايتي وحمايته
واذا ما وافقتي توكلي يمه وشوفي مكان يحميچ
لان هنا خطر وجودچ خطر صايرة فريسة بحلوگ اسود .
الفصل التالي اضغط هنا
يتبع.. (رواية الموروث نصل حاد) اضغط على اسم الرواية لتجد الفهرس كاملاً بجميع الفصول.