رواية الموروث نصل حاد – الفصل السادس
ام ضـلـيل : ينصدم يتمرض بس ما يموت راح يكرهچ
ويحقد عليچ يدور عليچ صحيح ويجي يوم يمل
وانا راح أساعده امه انا امه اخلي ينساچ انتِ وخلفتچ
ازوجو اسفرو حتى يخلص منچ ومن شرچ تقبليل لو لا بسرعة .
تصلبت بمكاني لدقايق ورجّعت جاوبتها
ماعندي حل ثاني اريد اخلص :
_ احتاج افكر .
_ باجر تردين جواب .
_ باجر اي باجر .
فتحت الباب وطلعت لو بيدها
هسة اطلعني وتشمرني من البيت
دخلن البنات نقش تقربت مني تمسح على ايدي وتهمس
_ غثتچ هاي عجوز النار .
_ لا تخسي الخايسة اخليها تغثني .
_ عمو ضـلـيل رجع وفاتت عمه عفاف
طردها وحتى دلال طردها .
مسحت على رجلي ورجعت اجاوبها :
_ مخبل مو صاحي .
_ عمه عفاف گالت ايده فايت بيها خشب من ضرب تمار .
_ مصايبهم ما تخلص الله يخلصني منهم وارتــاح .
نهضت من مكاني اروح وارجع بتوتر
اريد بس اوگف تفكيري ما اريد افكر كافي
واذا ايده يعني تأذت من شره وسوء اعماله
وهاي عصبيته الخايسة المبالغ بيها .
رجعت گعدت ونقش هي واختها يشوفون تلفزيون
التفتت وهمست : ماما سمعت جدتي گالت
هذولي ال سعد اهل زوجي عود سامعين
برجعتي ويريدون يجون باجر صحيح ؟
صفنت بوجهه لازم اتأكد منه
لاااا والف لااا اتحجج حتى اشوفه
اي وتالي شنوووو ما اروح يعني
ما انزل ولا اريد اشوفه مابيه حيل مشاكل
ولسانه الفالت اخذت دشداشتي ابدلها
بدشداشة اريح واوسع منها حتى اخذ راحتي بنومتي
ومشيت خليت من مرطب الشفايف ياربي
صار شكد ما مخليه هل اشياء وانا جنت
ادمن عليهن كلشي حلو واحبه
تنازلت عنه بعد موت عابد
لا تبديل لا مكياج لا عطور راقية
تذكرت العطر أمّي اشترته هديتي منها ، طلعته خليت
رشه بس على مكان النبض بيدي اريد اشم عطره
ابتسمت ورحت على نقش اخليها تشمه تنطيني رأيها
نقش : الله عطره بارد يرد الروح .
خلت منه وننوس بقت تگمز اله تبخين اشوفه
خليت الها وركضت على مرطب الشفه خربته بأصبعها
تاخذ وتوزع تكور شفتها عبالك حمره مو مرطب
غـاليـة: كافي بنت ضـلـيل عيني لا يشوفچ حظچ يطيحه .
ننوس : اني بنية عادي .
التفتت على صوت عفاف ادردم
برا مبين العركة بعدها ما خلصت
هم رجعت لهذا البيت يبوو علينا يبووو
دفرت باب غرفتي وعاطت
عفاف : هي العركة كلها من راس هاي
الساقطة ام الشوارع داحت
شبعت شوارع ودياحة ورجعت بدشداشتها
الحصر تفتر علينا تسوي إغراءات للزلم
وتتعزز عليهم بنت بغداد الفاسدة .
هجمت نقش على باب تريد تطلع
وبعلو حسها تكمز وتصرخ
_ خليني اطلع املخها تملخ يمه
عووووفيني ابرد نار كلبي بيهن .
منعتها ودفعتها من الباب اسد بشفايفها :
_ هي غايتها تسوي مشكلة ثاني تدري بي عصبي
واذا طلع صوتنا راح يصعد يملخهن ويملخني تملخ
وكلش زين يعرفن هو ضايج مني هسة يعني اني احصل
ضرب اذا ما يموتني بيده ، الخاطري
عوفيهن بعدين اشتغلهن على بارد .
عضت اصبعها ورجعت تضرب على طرف السرير
تحاول تسكت ، ساعة مرت والوضع دخل سكون
خليت راسي على مخدة البنات بصفي افكار تاخذني
وترجعني الى ان بلحظة تسرع تركت الغرفة وطلعت
واني الف روحي بالشال انزل ، بدون ما اصدر
اي صوت شفت ام ضـلـيل فارشه فراشها وصوبتها طافية
ونايمة بوسط الصالة مكانها ما تغيره
تعديتها وكملت طريقي لغرفته دگيت الباب
خفيف ما سمعت منه جواب
اول ما انفتح صار ضـلـيل مقابيلي گاعد على سرير يشرب
جگاير مشغل صوبة ودلال گعدة بالگاع تگشر برتقال .
تصلبت بمكاني اريد اتحرك صعبت حركتي
قشعريرة سرت بكل جسمي رجعت كم خطوة
للخلف وبعدت نظراتي على سريع منهم وهمست بخجل
_ اعتذر دخلت عليكم مو قصدي والله .
سديت الباب على سريع امشي بكل سرعتي احس
اريد اكتل روحي من القهر شكوووو تنزلين شكوووو
ايععععع احسن هسة شفت هيچ موقف امداني
تجاهلي غـاليـة كافي تجاهلي ، صعدت بعدني
بنص الصالة الفوك قريبة من الغرفة
وصوت دلال استوقفني:
_ انتظري .
غـاليـة : ترا مو قصدي والقران ما ادري بيچ عنده .
_ لو تحلفين منا لسنة ما اصدك كلامچ .
بنبرة حادة جاوبتها :
_ اي طبچ طوب لا تصدگين مشكلتچ .
دلال : انزلي يريدچ .
_ مستحيل انزل بعد ، مو اني اللي اخرب على احد .
_ بعد خربتيها علينا امشي انزلي .
_ ارجعي عنده .
عفتها ودخلت وقفلت بابي اخذت ننوس بحضني
التفتت تبوسني من خدي وحضنت ايدي ونامت
واني بقيت اجلد بروحي توبت انزل هووو ليش انزل
لووو بعد اموووووت شنووو اموت ما اعتب باب غرفته .
غفيت قبل لا يطلع نور الشمس بساعة
اخذتني النومة للظهر ، گعدتني نقش تشكي
من ننوس ورجعت نزلت جوة لملمت الغرفة
وغسلت وجهي ونزلت للمطبخ شربت كوب ماي
واخذت منظفات وصعدت فوك انظف
بين ما كملت صعدن البنات شوية وست ننوس
سمعت صوت ابوها ونزلت
بقت عنده للمغرب خليت نقش من خلصت ترجع المنظفات
عدلت ملابسنا اللي بالجنط ماعدنا
بعد غيرهن ما خلصت لليل
نزلت الف بشالي اريد گلاص
جاي بعدني اريد اصب فاتت امه :
ام ضـلـيل : ها فكرتي ؟
غـاليـة : فكرت ست كوثر .
_ ول تصيحين بأسمي ما تستحين ؟
_ ليش استحي ؟
_ ذرة تربية ما عندچ .
_ ههههههههههه وافقت طلعيني .
حجيتها واقتربت منها اكثر واكمل جوابي بحدة وثبات
_ بس أريد اتأكد نكون بأمان على نفسي وعلى بناتي
اذا ما اتأكد البيت صار بأسمي وراح احتمي
بي اني وبناتي من هل عالم فلا اخطي خطوة
برا البيت وباقية على گلبچ .
ضحكت لا شنو ضحكت لو بيدها تحلق واطير من الفرح
جاوبتني ولأول مرة اشوفها فرحانة بهل طريقة العجيبة
_ ضـلـيل كم يوم ومسافر نروح انا وياچ وتمار
مسجل بيت بأسمچ وحتى فلوس مصاريفكم كلها
لا تفكرين بيها انا اشيلها انتِ بس روحي منا .
كملت وراحت بمكانها ماتريد احد يحس عليها
ويشوفوها تحجي ويايه ، ابتسمت ورجعت لغرفتي
وبيدي جاي خلصت يومي بعد بيها .
يومين يمرون على حالي باليوم الثالث
صعدت نقش تجر النفس بصعوبة
عفت الملابس من ايدي والتفتت اشوف شبيها
_ شكو شصاير ؟
نقش : يمه والله اثنين من شيوخ
ال سعد جايين هنا بالديوان ينطون خبر باجر
يريدون يحولون عدنا ويرجعوني شسوي
عليچ بروح بابا عابد لا ترجعيني بروح ابوچ ؟
غـاليـة : خليهم يجون واذا اسمع واحد من ال ضـلـيل
يحي ويعتب باب هل غرفة ويفتح موضوع الرجعه مالتچ اذبحه
حتى لو شيخ ال ضـلـيل يجي وينطق برجعتچ اذبحه .
ساعة وصاحتني عجوزهم نزلت وعيني عليها رفعت ايدي اشرت شكو
_ تعالي حدري هين .
غـاليـة : اسمع احجي .
_ هذولي اكثر من مرة يحولون عدنا يريدون حرمتهم .
غـاليـة : منو حرمتهم .
_ بنتج نقش .
ضحكت بعلو صوتي وانا ادري بي يسمعني
وموجود بعده بالديوان گاعد وحده وأكدتها
دلال من اخذت الجاي وفاتت
بكل استهزاء رجعت جاوبتها :
غـاليـة : باجر اروح للمركز اشوف الدعوة وين وصلت
واذا ترجعون تفكرون بنتي ارجعها لهذا الخايس
هم ارفع عليكم بلاغات ، اني صاعدة هسة اريد اشوف
بعد نفر يفتح الموضوع ويايَّ يا ويلكم والله يا ويلكم .
رجعت صعدت وقفلت بابنا علينا شفت
نقش فارشه السجادة تصلي ودموعها بللت خدها
گعدت گدامها امسح بدموعها ابوس بيدها ما اريدها تخاف
غـاليـة : لچ يمه ليش تحرگين بكلبي .
نقش : يمه اني ليش هيچ حظي مو حلو
ليش رب العالمين مايحبني .
سديت شفايفها ما اريد تكمل وجاوبتها
غـاليـة : لا تحچين هيچ حرام يمه والله العظيم
يا نقش بعد هذا التعب والقهر والعذاب
الي عشتي اكو عوض .
نقش : يمه اذا يرجعوني انتحر .
سحبتها بحضني امسح على راسها
وهي تناشغ وترجف بيدي :
غـاليـة : انا امچ يا نقش على موت امچ ترجعين .
نقش : يمه ما راح نگدر على ال ضـلـيل
هذولي وحوووووش .
غـاليـة : امچ تعرف تسيطر على اكبر
راس من بيت ال ضـلـيل خليها على امچ
وانتِ اضحكي وبطلي خوف صيري قوية .
رجعت تصلي وتدعي وتناشغ خايفة
منهم تعرفهم بلا رحمة اخذت ننوس اعدل
بشعرها ما منتبها عليها وعلى كلامها
طلعت من غرفتي اسمع عفاف تحچي هي ودلال
_ اليوم يمكن يصعد عندي .
دلال : اذا ما يصعد نزلي عجل بس البغدادية يقبل تنزل .
_ ذاك اليوم مو رحتي عنده .
دلال : اي بس مايقبل انام عندو وهاي يومين صار مايقبل
احد يفوت والله العظيم متأكدة يخاف تجي هم بنت ذياب
وتلگي احد عنده وتروح يريد الغرفة فارغة .
عفاف : عندي حجي وياه اريد اشوف بالله شلون مايقبل .
مريت منهم للحمام رفعت ايدها عفاف
_ اجت ام الزلم البغدادية .
غـاليـة : هلا بالمنبوذات المسحولات الممسوح بكرامتهن الگاع .
دلال : بنت شوارع الكلمة تردها بعشرة .
غـاليـة : وتفله تفوووو على هل شكول الخايسة .
رادت تجيني دلال وكفت الها وكتفت ايدي اضحك :
غـاليـة : اي بالله تعالي .
عفاف : عوفيها دلال ختولي .
دلال : والله ثوبچ اشگه عليچ .
عفاف : هي تتمناها تريد تستعرض
بجسمها عليهم بحجة كتلوني .
غـاليـة : انتِ اذا اشگ ثوبچ كلها تتجطل
وينجلطون يخترعون من الطبقات كومة شحم ولحم هههههه .
صعدت عزيزة تضرب على شفايفها وتركض :
_ ها ها اشششش اششش هساع فات للبيت
من البارحة طالع انطمي انتِ وياهم .
فتت للحمام وعفاف ودلال يحجن الصار وهي تسكت بيهن
تركتهن واسمع بعفاف تصيح :
_ هي تريده يسمع صوتها ويصعد ضايجة
صار كم يوم راجعه وما معبرها .
عزيزة : هههههههه ضحكتني هو غير
بيتنا صار فاتحة لان رادها ورفضته
بأول يوم رجعتها وكتلنا وعيوني الدليل
هاچ شوفي عيوني بوكسي لاحني من
عصبيتو ولهفتو عليها وحتى هو وتمار تعاركوا .
دلال : مو الخاطر لهفتو وحبو لا عيوني
غلطانة هي استفزازية وباردة وامچ ضغطت عليه .
عزيزة : لازم نسيتي من وگف وبنص البيت
صاح انا هاوي واحب بنت ذياب وما يگدر يعوفها يموت بلاها .
عافتهن دخلت نقش بقت تسألني شصاير
وننوس نزلت بعد ما صعدت عبرت المغربية وتجتني
شعرها مخربط ومخبوصه :
ننوس : بدليلي .
غـاليـة : وين جنتي ؟
ننوس : نايمة بحضن بابا شيخ ال ضـلـيل .
رفعت حاجبي ونقش ضحكت تأشر
بمعنى هو ملقنها بالكلام وهي لو اني
مو امها فلا افتهم على كلامها لسانها ثگيل :
غـاليـة : عفية لسان .
ننوس : بدليلي .
_ وين تروحين .
ننوس : شيخنا كلنا وتاج راسنا راح يطلعني .
_ تاج راسچ وراسهم حبيبتي .
ننوس : وانتِ هم .
هنا عرفته صدك هو من يحچي وياها تسمع وتحفظ
لزمتها من ملابسها وجريتها عليَّ رفعت اصبعي وحذرتها :
_ اني هم شنوووو اني هم .
ننوس : شيخة .
_ عبالي والله ردت اكفخچ كفخه محترمة .
نقش : ننوس غـاليـة الثانية .
غـاليـة : هاي على عماتها وابوها مو عليَّ .
نقش : والله العظيم عمو يحبها لان
تصرفاتها لسانها قوتها غـاليـة الثانية .
راحت طلعت ملابس مستعجلة خلتهن بحضني
بدلت الها على سريع كملتها شافت نفسها بالمرايا
وتدلع تفتر وتفر بالفستان وتلزم بشعرها وتغازل روحها
_ الله طالعة حلوة .
ركضت وهي تنزل تسحب بشعرها وتصيح
_ بابا .
_ نظر عيونه .
_ شوف شعري .
_ اروح فداء لخصلاته تعالي .
اخذت نقش اخليها تغير جو ، فريتها على
حديقة الخلفية مديت كارتون وگعدنا نباع
على أراضي داير ما دايرنا شگد جبيرة واسعة
الجو بارد مالت نقش راسها على كتفي وهمست :
_ ماما تتوقعين نرجع نشوف مُـرجانـة .
غـاليـة : حتى لو تظل بعيدة بس أتمناها تعيش مرتاحة .
سكت ثواني ورجعت عبالك تذكرت :
_ والله سمعت قبل همه الموروثين اخوان
بس واحد يذبح بالثاني .
غـاليـة : منين تسمعين ؟
_ من هذا الخايس زوجي حتى سمعت
يگولون الموروث عشگ بنية وخلف منها
اطفال بالحرام وطفرت وعنده اثنين نبذهم ما يعترف بيهم .
صفنت بوجهه وجاوبتها وكلبي ما ادري شبي يجذبهم
غـاليـة : تعلمت من ابوي مو كلشي نسمعه حقيقة .
_ يعني تتوقعين الحقيقة عكس .
غـاليـة : اني اعرف قليل عنهم من ابوية
ومرة سمعته يسولف عنهم ويگول الموروث
من ام جنوبية هل ولد اخذته امه وهوَّ صغير ربته
بنص خواله بالجنوب واخذ اطباعهم وكلامهم .
اخذتنا السوالف ومر الوقت والمكان احتله السواد
ومن بين كلامنا نسمع هوسة اصوات عالية وتكسير
فتحت عيني بصدمة اريد افوت واسمع ام ضـلـيل تعيط وتلطم
_ يا فضيحتك ول يمه ضـلـيل اخذت بتها الثانية
وشردت هيَّ وياها يا يمه بعد شلون يرفع راسو گدام العالم .
خليت ايدي على شفايفي من سمعت تمار يصيح
بعلو صوته وضليل گدامه على تخم
حاني ظهره ومنزل راسه لازمه بيده ضاغط وينود :
تمار : منين طلعت الشباب كلها برا شني من حرمه هاي
شهل قدرة والعرامة ما فكرت ما خافت .
ام ضـلـيل : هاي عدها وشايفة واحد زلمة يشرد
بيهن قبل شرد مُـرجانـة وهسة شردها هي ونقش .
غـاليـة : ثمني كلامچ قبل لا تنطقين مو بنت ذياب
تشرد وياها واحد واني على ذمة رجال .
رفع ضـلـيل راسه ما مصدك بوجودي نظراته تشرح
معاناته تعديتهم وصعدت تركتهم بصدمتهم ونقش
تفهم بيهم كل هل وقت اني وياها كاعدين برا صح
معزولات عن عيونهم بس موجودات
وفكرة الهرب ما مفكرين بيها .
ظنيت ضـلـيل راح يصعد ، بس صار عكس توقعاتي
وحتى ما سمعت منه ردت فعل صوته ابد ماكو
اجتني نقش حاقدة على عجوزهم وبناتها موجودات
نامت وعيونها تجري بگد ما قاهريها برجعتها .
ثاني يوم على هوسة گعدنا كلها مخبوصة تجهز
لضيافة شيوخ العشاير الداخلي صلح بين
ال ضـلـيل وال سعد شفت اعداد سياراتهم
خليت ايدي على گلبي خفت ضـلـيل يعاند
ويسويها بلحظة انتقام مني على اعترافاته
ووضعفه الصار مقابيل اهله قبل ايام
ويرجع نقش بين ايدهم .
وانا انزل اكف بردن دشداشتي طلع ضـلـيل
من غرفته لابس دشداشة النيلي وعباته على اكتافه
بكل ترتيب معدل الغترة والعگال ، وشاهين يمشي
وراه لابس دشداشة وعيون شاهين مصبوغة دم عبالك
باجي ونص وجهه صاير ازرگ ، تعداني وهو يمشي مني
امه صاحت وهي تفر بيدها :
كوثر : ها بنت ذياب كفيتي الردن على شني ناويه .
رفعت صوتي وبكل وضوح حجيت
وقبل لا يطلع شيخ ضـلـيل سمعته :
غـاليـة : انتظر قرار شيخكم وعلى نمط القرار أحدّد الأفعال .
رجع بهيبته ورزانته ما متحمل طريقة كلامي يتقدم
ورافع ايده يأشر بيها منفعل وجهه محتقن بغضب :
ضـلـيل : لا تهددين لا املص راسچ بنت ذيااااااااااااااب .
نزلت صرت اقرب وبصوت ناعم خافت همست :
غـاليـة : ما عاش اللي يهددك يا شيخهم وتاج راسهم .
وختمتها ببتسامة احس روحه انقبضت
وعيونه نظراته بيها رخت ، بلع ريگه واشر بيده
يحاول يعلي نبرة صوته اللي استولت الرجفة عليها :
ضـلـيل : امشي ولي على غرفتچ
ممنوع تفكين حلگچ الزلم تقرر .
غـاليـة : مايهمني حجي زلمهم كلامك يمشي سيف شيخهم .
رفع حاجبة بتحدي مبين يتحداني ويريد يغيضني
ينتقم والله ما ناوي على خير ، ضغط على
مخارج الحروف ونطق :
_ عجل روحي جهزي بنتچ حتى ترد وياهم .
غـاليـة : لعد انتَ جهز روحك تدفني بيدك اريد وراها .
تحركت من گدامه هوَ هم مايريد يبين الهوسة
اللي صارت بداخله ، بمجرد ما راح انا رجعت
نزلت رد شاهين فات يحاجيني :
_ شيخة اذا يقررون يرجعوها نقش
ارتكب جررررريمة ما اخليها تروح وياهم .
بقيت متصلبه بمكاني ما مستوعبه :
شاهين : وحگ الله اخذهـا واخذچ وياها اطلعكم من هين .
غـاليـة : ليش عمك يريد يرجعها .
شاهين : اعدادهم شيخة اعدادهم مو شوية
اخاف يأثرون على عمي ، بس انا بلغتهم لو
انا لو هذا شيخ ال سعد .
حجاها والله حتى من الخوف
ما استوعب مشيت لباب المطبخ
وگفت واصواتهم تهز الديوان بكبره
اصواتهم مرعبة فتحوا باب الديوان رغم بعيد
بس اشوفهم بوضوح شيوخ معگلين بيهم كبار
وبيهم صغار ، بلشوا كلامهم بأحد القصص الصارت بعشيرتهم بين رجال وحرمته ولحظات غضب الرجل
ويبررون افعال البعض منهم القذره بالضرب واهانة نسوانهم .
بكل برود ، قاطعة ضـلـيل وبصوت مسموع
جلجل اركان الديوان بصوته وغضبه :
ضـلـيل : ال سعد ما أرحمكم وعندي ثار وياكم
واخذها كلمة من شيخ ال ضليل بعد استهانتك
بروح بنتي استهين بحياة ولدكم وزلمكم .
شاهين : عمي السيد وصل .
ضـلـيل : استقبل السيد بعد عمك .
سعد : السيد يا سيد هذا شيخنا .
ضـلـيل : اليوم ما تطلعون من مضيف
ال ضـلـيل اذا ما اطلگ بنتي .
واحد من الشيوخ وياهم حاول يهدي الوضع صاح
_ شيخنا هاي لمتنا والناس معگله گلها ما ألهم خاطر يمك .
ضـلـيل : على عيني وراسي كلها بس خاطر بنيتي
وغلاتها وكل دمعة نزلت منها اعز واغلى من اكبر عگال بيكم .
تمار : خوية بهداي .
شاهين : ما يهدي وحگ الله اذا ما يطلگ
افتح نهر دم بأسم ال سعد .
تمار : شاهين صووووووتك .
شاهين : اجرررررم بحالوووووو اذا ما يطلگ بووووية
خلي يطلگهاااا يلة هسة يطلگهاااااا تراني اليوم
ما ناوي على خير .
ضـلـيل : ال سعد تريد تطلع سلامات طلگها .
بين الرفض والصد واصوات عالية
وتدخلات من كل هدب وصوب
اصرار ضـلـيل أكبر اخذ تمار نقش
وبعدها بالباب طلگها وهو الممنون وقبل
لا يكملون اسمع صوت ضـلـيل يكمل باقي شروطه :
_ شيخ ال ضـلـيل مثل ما ردت انفصلت .
ضـلـيل : حگ حرگها وكل أذيه تعرضت ألها
اريد ارض تتسجل بأسمها اليوم قبل باجر
وغايبها يندفع اضعافو بخمس مرات غير
هل كلام ما يمشي عندي .
_ شگد غايب البنت ؟
تمار : خمسة وعشرين مليون تندفع الضعف بخمس مرات .
_ تم انتم اصحاب حگ واحنا اليوم خدام لقبيلة ال ضـلـيل .
دخل ابن مقتدر يركض من الباب عبالك شايف فلم رعب
بصوت يرجف دخل على مضيف ودخل شيوخها انذار
_ عمي قبيلة الـمـوروثـين هين سياراتهم گطعت شوارعنا .
همـام …
مهمة بتخطيط موروث ، كلام مدورس
سيارات رجال بأعداد تفوق اعدادهم ، دخلت مضيف غير مضيفنا هل قاعدة انكسرت ، المتعارف الموروثين
مانعين دخول مضيف غير مضيفهم توقفت
سياراتنا ، بلشوا ينزلون التفتت واني اوقف نص العدد
همام : بيرغ ، سَــهم ، جـبر ، شهاب
بس انتوا تدخلون الباقي تنتظرون هين .
طلعوا اخوان شيخ ال ضـلـيل رفعت عيوني انظر
الهم وعلى ملامحي ابتسامة خبيثة :
همام : متعنين قاصدين ال ضـلـيل .
تمار : مو من عوايدنا نستقبل امثالكم
بس شيخنا امر ندخلكم .
همام : يستقبلنا وهوَ الممنون ههههههههه .
صرنا بوسط المضيف كل شيوخها واگفين بالاستعداد
ما عدا شيخ ال ضـلـيل بمكر وكره يناظر بعيون الشر
بادلته بنفس الحيلة رجعت ايدي للخلف بمعنى
رافضين السلام على شخص بيهم وبصوته العالي هتف
ضـلـيل : المـوروثيـن .
همام : ال ضـلـيل .
جلسنا بمضيفهم قدموا الجايات رفعت ايدي رافضه
بيرغ : الله بالخير .
ضـلـيل : من يوم شفناكم وعرفناكم ما شفنا الخير .
همام : افاااااااااا لا تزعلني عليك تراني اذا زعلت
اخرب احذرك ، واذا خربت اهدم .
رفع اصبعه وبتحذير يلقي بتهديداته
ضـلـيل : لا تهددني بوسط مضيفي .
همام : ابشر .
ضـلـيل : شعندو مجندكم وباعثكم عندي
لو زلمة يجي ويواجهني .
بيرغ : زلمة وغصب عن اكبر شارب بيكم
بس مشكلتو ما يتشرف ويدخل مضيفك .
شاهين : فضها وادخل بالمفيد .
همام : المفيد عجبتني ،
واحد من شيوخ العشيرة الثانية صاح
_ الموروثين يريدون الصلح من ال ضـلـيل .
بيرغ : تخسي انطم .
من بعد سنين مرت بين العداوات والثار
اليوم رگبتهم صارت بيدنا :
همام : عدكم عدنا امانة واراضي مستولين عليها احنا
وعدنا يمكم امانة ومهمة وقاصديها نريدهـا .
_ صار سنين هسة تذكرتها .
همام : ما ناسيها وانت تدرين سلم الأمانة
حتى نعلن الصلح شيخ ضـلـيل .
بكل تلاعب وحقد رفع بيرغ صوته وهوَ يطلب :
بيرغ : ودليل صلحتنا احنا اليوم جايين نطلب ايد
بنت اخوك مُـرجانـة عابد على سنة الله ورسولة .
همام : نريد نزفها من بيتك .
فتح عيونه بصدمة من طلبنا يريد يحچي بعد
احتار بزمانه دنگ راسه والمضيف لو اشمر ابره ينسمع بيها
جانت اكبر اهانة وضربة لشيخ ال ضـلـيل من بعد هل سنين
همام : تسلم أمانتنا، ونسلم امانتكم
وناخذ بتكم على سنة الله ورسولة هدية من شيخ ال ضليل .
شغل بيرغ جگارته وعلى طرف شفايفه ابتسامة انتصار
لأول مرة شيخ ال ضـلـيل يعجز عن الرد وكل اخوانه صامتين
عرفت بيهم مايعرفون بنيتهم عدنا ، واحنا نمثل عليهم
بطلب ايد بتهم على اساس ما نعرف بيها شاردة منهم
طلبنا هذا يضعّف حركتهم ويقوي موقفنا .
بيرغ : همام خوية مو عبالك ال ضـلـيل
رافضين ينطونه بنيتهم ؟
همام : افااااااا يزعلني .
سَــهم : الموروث يبلّغكم بالايام الجاية راح يفتح سيولة
جديدة تخص مشاريعكم والأراضي والكم الحق بالبيع والشراء .
تمار : شعنده شعجب يريد يموت ؟
سَــهم : يومكم قبل يومه .
تمار : هاي جيتكم وطلباتكم مبين وراها شي ثاني وغاية
ما نعرفهااا وبس الله يستر منهااا انتوا على شنو ناوين .
بيرغ : شيخ ال ضـلـيل يعرف على شنو ناوين .
مقتدر : من شوكت وارث كريم ويوزع سيولة.
همام : افاااااا لا تزعلني وارثنا من يوم يومو كريم .
تمار : كريم بس للناس اللي يقدمون الولاء والطاعة .
بيرغ : شيخ ال ضـلـيل راح يقدم الولاء والطاعة
حتى يخدم مصالحكم ومصلحة كل قبيلة مقدمين
اله احترامهم وولاءهم .
بإشارة مني اخواني فهموا وكلها نهضت
همام : وهساع نرفع عنكم الزحمة نخليكم تكملون گعدتكم
بطلاگ بنت اخوك ، سلامتها سمعنا ايدها احترگت .
ضحكت بوجهه رفع ضليل نظراته
وبتحدي محافظ على هيمنته :
ضـلـيل : اريد أقابل وارث بأقرب وقت .
همام : ابلغ وارث واذا قبل هو بنفسو بالوقت المناسب يقابلك .
صاح واحد من الموجودين لابس عگال ونافخ روحو
يريد يتلوگ دحگت عليه هو يحچي وبنتر واثق من روحو :
_ شيخ ال ضـلـيل ما ينرفض طلبو .
همام : شيخ انت ياهو ؟
_ انا شيخ خالد .
سهم : كال انة شيخ فلان والعالي الوحة
من طكن الجيلات بال اعلى روحة .
همام : هههههههههههههههه .
همام : شيخ خالد احلف بكتاب الله ال سعد ما مطلعيك ب50 .
سَــهم : ما يگدر خوية ، يا حيف الصاية والسبحة معگل
يزامط وشيخ وطالع بورقة .
واحدهم وگف متردد يريد يتضارب ، اريد اطلع والوقت يمشي
ومو من عوايدنا نطول الكلمة وناخذ وننطي
صحت بچبير مجلسهم :
همام : شيخ ال ضـلـيل خلهم يگضون چلابهم
لا اطيح عگلهم واحرگ گلوب .
ضـلـيل : توكلوا ، شاهين تمار وصلوهم لعتبة الباب .
قبل لا اعبر عتبة الباب استوقفني بكلامة
ضـلـيل : بلغ الموروث هاي سالفته مردوده
مو شيخ ال ضـلـيل يهاب افعاله
انا لغير لله ما اقدم ولائي .
همام : يوصل .
طلع سَــهم قبلنا ينطي علم للشباب بطلعتنا
يفر بالسبحة وانا وبيرغ وجبر نمشي من بعده
سَــهم : تنخت ولكم تنخت نحميها من اهلهااااااا .
همام : هههههههههههههه هدف .
صعدنا سياراتنا تحت انظارهم الحاقدة وجود الموروثين
يلغي حضورهم يزعجهم وجودنا ، صعدنا اتصلت
بمجرد ما صعدت :
_ ها وارث ، تم قلبت الطاولات على ال ضـلـيل
ماكو شي بس جبيرهم راد ينجلط واكدت شكوكه
بوجود بتهم عندك .
وارث : يعني بلغته موجودها عندي ؟
همام : اي وطلبتها للزواج منه .
وارث : نعمممممممم .
همام : طلبت مُـرجانـة من عمها على سنة الله ورسولة .
لثواني ما سمعت صوته تحول
من الهدوء لقمة غضبه صاح :
وارث : نصيحة لله .
همام : اي .
وارث : اليوم لا ترجع .
همام : شاب اريد اتزوج .
وارث : احچي كلمة هسة ادگها بالعظم ليلك بعد ما تنامه .
ضحكت وفتحت صوته عالي تقدم سَــهم يستمع هو وجبر
بيرغ يسوق مال بجسمه وينفخ بدخان الجگارة
همام : شبيك عصبي تريدها ؟
وارث : بعد شسويت ؟
همام : ول اسمع طرت بنت صغيرة بالممر
التفتت بعيون ضايعة تنظر اتجاهنا
وياها شاهين يمشي وهي تستفهم منو .
وارث : وانا شكوووووو .
همام : تشبه الخرسة .
سَــهم : اسمها مُـرجانـة .
_ اي اللي مختلها وارث .
وارث : بس توصل اطرك نصين .
_ ومحمد نفسها تخزر بعيونها نفس الخرسة .
سَــهم : مُـرجانـة اسمها وجع بگلبك كون .
سد الخط بوجهنا ضحكت من كل گلبي على حالته
همام : ما يتحمل خرب اهله .
جـبر : جهز روحك اليوم يجيب تاريخنا كله الأسود .
همام : دخيل محمد لو اعرف منوووو يجيب المعلومات
الوارث ولك عبالك عنده كاشف شهيررررة هذا شهيرة .
بيرغ : تخيل يعرف بالخرط الصار بالديوان .
همام : ههههههههههه ينجلط .
بيرغ : اليوم عمكم سائد حبيبي وارث ينورنا .
سَــهم : هسة نلگي وارث طايحله بوووووس .
همام : بالسلاح هههههههه .
بعدنا نضحك وما نحس غير السيارة مالتنا
انضربت ضربة بحيث صارت تمشي وحدها
وضربت السيارة اللي تمشي مقابيلنا
يريد بيرغ يسيطر عليها موسع عيونه
مصدوم فتح دگم السترة ونزل من السيارة
يمشي ويأشر للسايق الـ ضربنا ، نزلنا اني والولد
من شفت بيرغ راح على ابو السيارة يضرب
على مقدمة سيارته بـ أثنين اديناته ودمه يفور
انا من يمي خفت من صار يصيح صياح مخيف :
بيرغ : ول ما تدحگ گدامككككككك معمي ابن الكلب انزل
لك انزززززززززل السيارة جديدة انزززززل ما صار اسبوع
مشتريهااااااااااا وينووووو ما ينززززززل .
ركض سَــهم يسحب بيد بيرغ وانا وگفت بوجهه
من شفت السايق رجال جبير بالعمر مشيب ولابس
دشداشة تعبانة مبين حالته مو تمام :
همام : يول اذكر الله لا ينجلط الرجال .
بيرغ : راح اكسر سيارته اذا ما ينزل خلي ينززززززل .
نزل الرجال عرگان من الخوف يرجف وهذا بيرغ يريد
يروح يهجم عليه سَــهم صاح بي بتهديد
_ بيررررغ مو احچي وياك الرجال مو قصده .
بيرغ : ما تعررررف تسووووق ما مجبووووور
السيارة ب100 مليووووووون تضررررربهاااا تفلشها .
مسح الرجال وجهه من ويحچي وصوته يرجف يقفل بسيارته
_ بوية انا اسف حرمتي مريضة ومستعجل اريد أوصل مستشفى وتارك السياقة مجلوط انا ، بشنو تأمرني خادم .
بيرغ : لوو ابيعك ما تنباع بسعررر سيارتي .
هو نطق بهل كلمات واشوف باب سيارة الرجال صار
ينهز وجام السيارة ينضرب كلّنا التفتنا ونشوف بنية
تعض بأصبعها وتإشر على ابوها تريد يفتح الباب
وهي وجهه احمرررر محتقن وتسب بس ما نسمع
راح بيرغ طلع لاسلكي من سيارته وصار ينادي
رحت اسكت بي قافل ورجع يشوف السيارة
بيرغ : فلشهاااا تفلششششش حتى ما تهنيت بيها
اذا ما اشمره بالسجوووون حتى يتعلم ما يعيدها .
_ بس اوصل حرمتي للمستشفى وارجع
هاي هويتي خليها عندك اروح وارد والله .
سحب بيرغ الهوية ورجع يضرب على سيارة الرجال فلشها
جريته من سترته ادفع بي اضخم واحد بينه بيرغ
لو مهما نوگف بوجهه من يصير عصبي يتحول ثور بعد
همام : يول هدنة بس صبرررر عائلته وياه حرمته متخربطة .
كلنا بهتنا مركزين على بنت الرجال الشايب لازمه تلفونها
وتفلش بجام السيارة بكل قوتها فلشتها تفلش
ركض الرجال يوگفها صرخت صراخ
ردت اركب سيارة واشرد منها :
_ الخاااااايس هذا الكلب ابن الكلب شنوووو يغلط عليك
يهددك بووووية يهددك افتح الباب بوية افتح الباب
ابوس ايدك اليوم لو انا لو هوووَ اذا ما اخلي
اللي ما يشتري يتفرچ عليه اسوي مثال ينضرب به .
بيرغ : ايا بنت الكلب تسب ابوووينا .
لزمته من ايده وسهم يدفع بي فك روحه منه
وركض على سيارة بكل قوته يفك الباب مالتها
خلعه خلع ، نزلت قبل لا يستوعب استلمته بالتلفون
تضرب بي وما تسكت هو حط الباب گدامه
_ تهدد ابووووية تريد تسجن ابوية ساقط غيررررر
انت وگفت وضربك عااااار يااااااا ناس يا عالم
هذا يتجاوز على ابوووووووووي .
شمر بيرغ الباب لزمها من ايدها يريد يسحب
التلفون منها رفسته بضربة وگف سَــهم بنصهم
وركضت اجر بيرغ وانا وجبر طوقنا حركته
غير تعوفه وتروح جرت تلفونها رجعت وتضرب
براسو وهو بس يريد نعوفو ملخت راسو
واحنا مقيدي لا يروح يدفرها ويموتها
ابوها گضها من ايدها ويحضن بوجهه يصيح
_ بوية مـلكـِه اسكتي الخاطري فوووتي للسيارة .
مـلكـِه : يعتذر منك يبوس ايدك وراسك شافك
رجال چبير وحدك مابيك حيل وهو ثووووووو ابن ثووور
كلب ابن كلب زمال ياكل لحم زمايل ما تشووووف شكبرررره
وبلاااااا عقل ما عنده عقل اكووو قندرة براسة اخلي نعالك
ترررس حلگه وحگ الله .
همام : خوية شسالفة عيب .
مـلكـِه : انچب لك حيوووووان .
جرتها امها وهي متخربطة تسد بحلگها وابوها
يحچي بعد بيرغ قفل عليها رجع ينادي
بيرغ : ارررريد دوريه هين بساااااع اليوم
اخليها تخيس بالسجن هي وابوووووووها العاريه
اشوفهاااا منوووو ابن كلب فوكاهاااااا مفلشين سيارتي
وتعتدي عليه .
مـلكـِه : خليهم يجون انا اعترف اگلهم كتلته هذا البغل .
عض بيرغ اصابعه ونزع السترة يريدها الزم بي ادفعه
يسب ويعد صار عليها انواع الفشار الي ما مطروق بتاريخ السب
بيرغ : انتِ تكتليني ***** غيرررررر هذولي لازميني يول
بنفخه اطيرچ وانعل ابهاتهم اذا يطلعوووون وراچ .
وهي بهتت لدقايق استوعبت هو شنو يحچي
وگف سَــهم بوجهه هو وابوها يقنعون بيها
سَــهم : انا اخوچ امسحيها بوجهي هذا مو بعقله
عوووفي اصعدوا تعالوا انا أوصلكم مستشفى
عمي اخذ بنتك راح تصيررررر دم دخيل محمد .
رفعت ايدها وعدلت شالها وهي تهدد بي
مـلكـِه : اذا ما ازين شاربك وادوسوووو
بقندرتي الثور ابن الثور .
رجع هو انوب راح يكسر بسيارته
ومن وصلت الدوريه تقرب منها وصاح
بيرغ : حتى لو ردت اعبرها بعد ما تعبر خليتچ
برررراسي هين محفورة بعد اذا ما صلافتچ اعدمهااااا
اذا ما ابچي هاي عيونچ الصلفة ما انحسب على زلم
الظاهر انتِ ما تعرفين ويامن اندگيتي وضربتي مين .
مـلكـِه : خاب امشي سويتك مضحكه .
_ مو بيرغ ال موروث يصير مضحكه وسفه يا بنت وسفه .
راح على دورية طلع الباچ مالته
وبعالي صوته عرف على نفسو :
_ وياك مقدم بيرغ ساجر ال موروث .
_ سيدي ، بخدمتك .
شغلت جگارة طفح صبري بعد لا هذا يسكت
وهاي ما تبلع لسانها عطت بي بلكي يتهدد :
همام : بيرغ لا تخليني اخابرررررر وارث خلينا نتفاهم .
اشر بيرغ على رجال وفتح السيارة
_ يلة اخذ بنتك واصعد بالدورية
اريد ارجع اربي بنتك انت ما مربيها زين .
تركو الرجال عرف قافل بعد بيرغ اجه علينا
_ خلي ياخذني انا ويعوف البنت اذا تفوت مركز اموت والله .
بيرغ : اتنازل عليك وعليها ما أتنازل اسجنها يعني اسجنها .
مـلكـِه : ما يتنازل مسحت بشواربو الگاع .
صفگت وصحت على رجال :
همام : غير تسكت بنتك عمي خبلتووووو دكافي .
_ بنتي بشاربك اعتبرها اخيتك اخذوني
وخليها تاخذ امها للمستشفى .
وگف سَــهم كدام البنية لان ما وگفت حركات استفزازية
لبيرغ شبعته غم وهو يشيل روحو ويرگعها
وكفت سيارة نزلوا شباب اثنين وياهم ابهاتهم
اول ما شافوني عرفوني ابوها شرح الصار
ودخلوا علينا البنية ما تروح وانا واسهم وجبر
وعمامها نتوسل ببرغ يعوها اخذوها ولد عمها
هي وامها وكملوا طريقهم على طريق المستشفى
وابوها صعد بالدورية وياهم ، بيرغ عافنا وراح ويه الدورية .
ركبنا السيارة رحنا وراهم وعمامها بتكسي ورانا
دخلنا على المركز قدم البلاغ وكمله ودخل الرجال سجن
طلع بيرغ لا يسمع ولا يتفاهم لازم راسو محفورة جهه
منه من قوة الضربة مالتها الدم يبس على وجهه .
اخو الرجال يحچي وياه بكل
استصغار دحگ عليه من فوك ليجوة وعبرهم وطلع
وقبل لا احنا نعوفهم لزمنا واحد بيهم
_ الرجال جبير وبرگبته اربع بنات عيشتهم برگبتو
وامهن مريضة لا يموت بالسجن وتيتم هل بنيات .
سَــهم ما تحمل طلع عصبي على ببرغ يركض
دفعه وهو يركض اندفع بيرغ على سيارة صاح بي :
_ طلععععع الرجال لاااا يمووووووت .
بيرغ : على جثتي اذا ما اندمهممممم .
كمشت سَــهم وبيرغ ركب سيارته واحنا وياه نحچي
قافل ولا يتفاهم ولا يتجاوب ، اول ما وصلنا بعدنا بالباب
وارث طلع فتح باب السيارة من جهة بيرغ لزمه وضربه
بوكس عوج وجهه ، دفره بيرغ وفات على بيت
عرفت سَــهم بلغ وارث بالصار .
فات وارث على بيرغ يرجف من العصبية يهدد
_ امشي طلعععع الرجال بيررررررغ .
بيرغ : وحگ الله ما يطلع .
_ اني اسلمك فلوس السيارة بس طلع الزلمة .
بيرغ : طزززز بالسيارة بنتووووو لك بنتووو .
_ اي شبيها .
همام : اعتدت عليه .
سَــهم : اغتصبت رجولته .
همام : شگته بالنص .
سَــهم : دگ وين ليوجعه .
همام : شهرته بين الناس .
سَــهم : مسحت بكرامته الگاع .
بيرغ اله فقد طلع على سيارة كمل عليها فلشها تفليش
وارث مصدوم بي يعرف بيرغ يكتم بي اذا انفجر
معناها دايسين ببطنو ، ما ظل بالبيت طلع بيرغ
وارث استلمنا تحقيق بنص الاستقبال .
مُـرجانـة ..
نزلنا اني وميمونة من فوك على اصوت اخوانها العالية
دخلت وياهم تستفسر عافهم وارث وصعد فوك
ام بيرغ عافت البيت وطلعت تريد تشوف ابنها
وهمام وسهم طلعوا على اراضي يشوفون الشغل
طلعت من المطبخ شفت حمامة وغريب صعدوا
وميمونة ركضت على ام وارث فتحت الباب تسولف الصار
خطفت رجلي وصعدت أشوف الأطفال وين راحوا .
بهتت من شفت وارث حاضنهم يشم بحمامة
گعد على ارض وغريب على رجله وبالجهه الثانية حمامة
وارث : شلونهم الحلويات مالتي .
حمامة : غريب يضربني .
غريب : وحمامة تاخذ اغراضي .
وارث : عادي اختك لو تريد روحك ما تغلى عليها مو علمتك .
هز غريب راسه ويغطي بوجهه برگبة وارث خجلان من ابو
حمامة : بابا شوكت نروح بذاك البيت
ونرجع نلعب اني وياك وغريب .
وارث : لو بيدي هسة نرجع بس بيبي
شلون نعوفها هنا وحدها .
غريب : اريد انام يمك ونلعب وناكل ونباوع افلام كارتون .
وارث : وحگ العباس نرجع .
ضحكت حمامة وهوَ افتهمها
وارث : ولچ ليش تحضنين بيه جوة .
حمامة : شبيك بابا احبك .
وارث : على اعصابي ما اخذكم بحضني بوية تشلعون گلبي .
غريب : بابا اني احسن من حمامة التزم بالوعد مو .
حمامة : اني هم التزم ما بابا شوفه .
وارث : تعالوا خلوني اكل هل خدود تعالوا .
شالهم وشمرهم على سرير يلاعبهم وياكل بيهم
طفرت من سمعت ميمونة شهگت ، سحبتني من ايدي
وشمرتني بالغرفة تفتر منا وتجي مناك تهمس بصدمة
ميمونة : شفتي وارث يبوس بيهم ويحضنهم .
هزيت راسي بـ اي عضت شفايفها وابتسمت
ميمونة : يعني وارث يحب اطفاله مو مثل
ما يمثل علينا يكرههم .
خفت ما ادري ليش خفت من كلامها هي مو اخته ليش
يضم عليها حبه لأطفاله ، الرهبة دخلت كلبي خفت يتضرر
هوَ وهل اطفال اذا ينكشف حبه الهم
ميمونة: لا تخلي يعرف احنا كشفنا الموضوع .
اشرت الها ونبهتها هي هم ما تحجي اخاف يتضرر .
نزلت ميمونة على غرفة ام وارث ، اخذت الدفتر من المجر
ودفعت باب غرفة وارث ودخلت من شافني عدل نفسه
وتركهم مبتعد عنهم وصاح مزعوج : المفروض الباب يندگ ؟
طلعت ورقة وكتبت بيها
” ميمونة شافتك تلعب انت وأطفالك ”
اخذتها وتقدمت صرت قريبة علية قراها
ورفع عيونه بعيوني صاح بأطفاله حتى
يطلعون اول ما راحوا سد الباب وهمس :
_ وانتِ شفتي وعرفتي .
كتبت : اي طلعت جذاب تحبهم وتمثل تكرههم .
_ جذاب شنووو عيب بابا احچي عدل .
كتبت ” حبل الكذب قصير ”
نظراته جانت صارمة حادة تشبه نبرة صوته
وارث : اجيتي تبلغيني من خوفچ لو تهدديني ؟
بعدت نفسي وهوَ يتابع جوابي بكثب واهتمام
سحب ايدي رفعها يريدني اكتب
عضيت شفايفي وكتبت :
” شبيك ”
_ مُـرجانـة .
رفعت راسي وبكُل هدوء حركته بمعنى شكو
_ مُـرجانـة عاقلة اريدچ .
حجاها وابتعد يسحب بسترته
ضربني الفضول على راسي كتبت :
_ وين مرتك ؟
وكثرت علامات استفهام قطعت طريقها قرأها وجاوب
_ ماعندي .
بقيت اكتب وهوَ يجاوبني بكلمة او
بالزايد كلمتين واني اكثر استفهام :
_ طلگتها ؟؟؟
_ ما متروج .
_ تكرهه عزا ؟؟؟؟
_ اكره منو .
_ خانتك ؟؟؟؟؟
_ ما عاش ليخون وارث .
_ لعد ماتت الله يرحمها ويصبرك ؟
_ المفروض تكتبين ست استفهامات لان بديتي بـ تلاثة .
راد يروح اعترضت طريقة وگفت على باب رفعت اكتافي
وايدي خليها گدامه بس اريده ينتظر ترجع للخلف وسألني
_ بعد شعندچ ؟
كتبت :
_ تصير زوجي ؟؟؟؟؟
_ مُـرجانـة شتعرفين عني واصير
زوجج تريدين تشبعين ضيم .
حط ايده على مقبض الباب يفتح
بي واني احاول بكل سرعتي اكتب :
_ اقصد امك گالت انت تصير زوجي .
خليتها گدامه هو رافض يقراها سحبني
من طرف ملابسي ويعاتبني :
وارث : ما اورط بنت مثلچ ويايَّ انا حياتي ما طايقها .
دگيت رجلي من الفشله بالأرض واصريت
يقراها بمجرد حتى اصحح تفكيره وصوتي
طاحت عيونه على كتابتي نظراته تشتت
بضياع وتراجع وهوَ يسألني :
_ امي شبيها .
تلالت ولمعت عيوني بدموعها وحالتي
رجعت تخربطت اخذني من ايدي وسحب
كرسي گعدتي وهو يستفسر بخوف :
_ منو وياچ حاجيني ؟
طلع صفحة جديدة بالدفتر وبلع ريگه
وارث : اكتبي شبيچ ياريتني افتهمممم ياريت .
كتبت
” اني ما اريد اتزوج حباب ابوس ايدك ”
وارث : ما تتزوجين منوووو يتجرأ ويجبرچ تتزوجين .
كتبت : امك شرطت شرطين لو اتزوجك لو اروح منا .
شعرت بقشعريرة تسري بكل جسمي بمجرد ما اقترب
سحب الدفتر من بين ايدي ويفتح بالبطل مال ماي ويهمس :
وارث : اخذي نفس مُـرجانـة اشربي ماي شصاير
بيچ ليش ما تحچين من البداية تضمين عليَّ يا بنت .
اشرب بالماي والشهگه شگت گلبي ودموعي تجري
يريد يروح بلا وعي خفت ، لزمت ايده بكل
قوتي حضنتها حتى بس يوگف ما يروح
اريد اكمل اريد يسمعني .
نزل عيونه يشوف بيدي شلون حضنت
ايده همس بصوت خافت :
وارث : عوفي ايدي واسمع ، باقي يمچ .
كتبت
“مو اكرهك وما اريدك بس انتَ جبير اني صغيرة ”
وارث : مو موضوعنا انا رافض الزواج صار سنين .
كتبت : ما اگدر اربي اطفال والله حتى كلامي
ما يفهموني ما احچي انا ابد ما احچي .
مسحت دموعي ويرجعن ينزلن
سحب كرسي وگعد بصفي يرفع بأيده
بمعنى اهدي طلع كلينكس من جيبه
وارث : ما اريد اتزوجچ وبدر الهواشم
شبيچ ذكري الله والأطفال ولا تجين يمهم
ولا تقتربين انا قابل اجبرچ ولا تروحين
وانا ما اقبل تطلعين انتِ بحمايتي .
شهگت واني اركز بعيونه وارجف لزمت رگبتي
غمضت سحب الكرسي مالتي آكثر يقرّبه :
وارث : امي حجت هيچ تخاف عليچ من اخواني .
كتبت : اعرف بس ما اگدر اتزوجك
ما اريدك واخاف اطلع منا يموتوني .
وارث : حتى اموتهم ياهوووو يموتچ تاريخهم عندي .
شربت ماي مرة ثانية ريگي يبس يبسه احس بلاعيمي طگت
وايدي ثلچت تثلچ مدري شبيه اريد اسيطر وافهمه
وارث : بس اذكري الله لا يصير بيچ شي
وحگ هووو علي ما متحرك من مكاني اذا ما تخلصين .
فركت وجهي طلعت الضغوطات المريت بيها كلها بوجودة
كتبت : عبالهم اريد ورثك گالت توقعين على ورقة .
وارث : ورقة يا ورقة ؟
كتبت :
_ اتعهد اذا اتزوجك ويصير بيك شي ما أورثك .
وارث: امي طلبت هل طلب ؟
_ اي .
وارث : انعل ابووووووووو الورث دمررررررهم .
ضربت على شفايفي اطلب منه ما يعلي صوته ويسمعون
كتبت : ما اريد امك تكرهني .
وارث : جهزي نفسچ اني ما اخليچ تبقين هنا خطر .
_ وين نروح ؟
_ اخفي مُـرجانـة منهم .
نهض من گدامي وهو يعدل ملابسة مستعجل
وارث : نسيتي شي عندچ بعد كلام .
اشرت براسي بمعنى لا
وارث : ما اريد تضمين عني شي كلشي
تبلغيني حتى اثق بيچ .
كتبت : وداعت امي وماعندي اعز منها على گلبي
ما اجذب عليك وكلشي اعرفه اجي احجي
بس انت لا تعوفني اني اخاف وحدي
ولا تكرهني وتهددني لان اني بنـت اعدائك .
نزل منفعل طلعت لمحته من بعيد دخل
على غرفة امة واصواتهم بين الي تطلع وبين يخفيها
ام بيرغ رجعت وياها ام همام واگفات يتسمعن
عليهم وحدة تگول للثانية يا ما سمعت عدل
ميمونة اجت تصفگ بيدها وتهدد بيهن
_ يلة منااااا لا اصيح بـ اسمه تعرفن شيسوي .
دهلت ركض بغرفة ميمونة من طلع وجهه ما يتفسر
من العصبية وامه مو اقل منه بحيث طلعت من غرفتها تنادي
_ اذا ما ترجع يا وارث واكمل كلامي
اطلع من بيتك تعال وينك .
طلع وارث من البيت وامه ما گالت لا لبست وطلعت
تعجبوا كلهم خابرت ميمونة على همام ساعة
ورجع اخذها ، بقيت بغرفتي خايفة لا تعاركوا
واني السبب وبقيت بفضول وين يروحون ،
بنص افكاري وسمعت صوت حمامة وغريب
اصواتهم عالية نزلت بتردد وگفت على درج
واشوف من بعيد ام بيرغ بيدهـا مواعين
اثنين شالتهم وحمامة وغريب يتلوون بالأرض
لازمين بطنهم واثنينهم يذبون من راسهم يرافسون من الوجع .
ركضت دخلت ضربت ام بيرغ على ظهرها
وشمرت روحي على حمامة وغريب اگلب بيهم
واضرب على وجههم بعد ما فقدوا الوعي تماماً .
ملخت وجهي تملخ لطمت بكل حيلي اريد
اركض على باب وما احس غير ام بيرغ
شالت السجين وتضرب تريد تضربني بيها
ايدت انضربت اكثر من ضربة بالسجين
واني اصدها شمرتها بعيد من تعبت .
راحت على گلاصات ومواعين تضربني بيهن بكل قوتها
اخذت من الجرار حديدة ما عرفتها مال شنو
بس الضربة الوحدة منها تسحب الروح وتقبض الگلب
كل ما ترفعها وتضربني بيها وانا صوتي
ما يطلع احس روحي تطلع .
جرتني من شعري تدفر وفاتت ام همام من شافت
الجهال شگگت ملابسها وبقت تصيح بعلو صوتها
دخل وارث يركض ومن الباب عرف اكو مصيبة
دمي يجري ، صوتي ماعندي صوت خرسة
لا بيدي ادافع على روحي وحيلي يعيني
ولا صوتي ينقذني ، وانا بوسطهم دخيلة
اهلي يمهم دمي مهدور ، والغربة ما رحموني
دخل وام بيرغ تملخ بروحها وتلزم بيده
ام بيرغ : موتتهم جهالك راحو بيهممممم
هل غريبة الخرسة موووتت جهالك يا وارث .
يتبع ..
الفصل التالي اضغط هنا
يتبع.. (رواية الموروث نصل حاد) اضغط على اسم الرواية لتجد الفهرس كاملاً بجميع الفصول.