رواية الموروث نصل حاد – الفصل الثامن
من غلقتو سحب ابوية التلفون من ايدي
ورگعو ليغاد شمرو ، تراجعت وهوَ يحچي محروگ دمو
_ ميصيررر تاخذين التلفون تخلين راسچ
برررراس الزلم انتِ تريدين تورطينا بوووووية .
ملِكه : يابه انت ليش تسكت من يتجاااااوز بس فهمني ؟
_ بنتي عيوني مو كلشي ينحل بالصوت
العالي والتجاوز مثل هيچ ناس ناخذهم
بالعيني واغاتي احنا مووو گدهم .
هزيت راسي ودموعي نزلت ما راضيه
يعني شنو هل زبايل ياخذونه بصوتهم
ولازم نسكت ونتحمل هم مخابر وهم يريد احترام
ظل ابوية يحچي ويفهمني الحد ما الباب صار
يندگ دگات خليت ايدي على كلبي اترقب
منو اجه ، فتح ابوية الباب دخل عمي عيونو تريد تنط
من الباب رفع ايدو ويأشر ويصيح : شمسووووويه هاااي ؟
ابو ملِكه : شسوت خوية شبيك ؟
_ خابروني يهدددددوني متجاوزه على هذا المقدم ؟
ابوية ظل يفهم بي وهوَ قافل يسب ويتوعد
ودخل عمي الثاني يتهجم على ابوية
لزموني اثنينهم ابوية يريد يخلصني
من ايدهم ما يگدر عليهم شمرت جنى روحها
عليه دفرها وسحلني من شعري بكل قوتو
يضرب ويملخ زلغني تزلغ ومن يشوفني
ما ابچي يزيد بالضرب ، جريت روحي
من بين ايدهم وجنى تركض بيه فوك
وابوية يطرد بيهم وهذولي يهددون بي الجبناء .
دخلت للغرفة گعدت بالگاع رجعت راسي
على حايط اجر النفس بصعوبة كسروا ظلوعي
صعد ابوية يعصر بگلبه گعد يمي وحضني
يمسح على راسي ويبچي مهضوم
_ يضربون بناتي وانا عايش ما گدرت أحميچ
وعيوني مفتوحة من أغمضها شلون تعيشن بوية .
بعدت روحي امسح بدموعه وابوس بخده
ملِكه : يومي قبل يومك بوية ، لا تحچي
هيچ انا غلطانة عادي يضربوني لان غلطت
هذولي اخوانك بمعزتك عادي لا تنقهر فدوة .
فر راسه وشهگ وصاح بعلو صوته
_ اخخخخخ بوية وين جانت لنا هل مصيبة .
ملِكه : بعد ما احچي شي والله حتى لو يسبنا
كلنا لوو شيصير ما احچي بس خلي يعوفنا .
ام ملِكه : عيوني هذولي رجعوا وياهم شيوخ اثنين .
نزل ابوية مستعجل اسمعهم يصيحون عليه
_ بسااااع بدل نروح نردّ اعتبار امرنا لله بس نريد نخلص .
ابوية بحيرة يركض وياهم يبدل مستعجل
وبعيونه حزن يهد جبال اشوفه من فوك
ودموعي تصب ، راح وياهم وامي قفلت البوب
اشرت اليه نزلت جسمي يون عليَّ خلّتني بحضنها
تمسح بشعري وتدعي عليهم ، اني عمامي ما قاهريني
حقهم يتهددون ويخافون ناس على گد حالهم
كافين خيرهم وشرهم يرحون ويرجعون بنفس الدرب
تحطمت من هذا الكافر ماكووو بگلبه رحمه
غضب ودخل بحياتنا كابوس وما اعرف شلون
اصحى منه اني واهلي شهگت بكل قهر صحت
_ حسبي الله ونعم الوكيل عليك يا بيرغ يا ابن ساجر
روح ان شاء الله عمرك كله ما ترتاح وين ما تلتفت
تجيك كفخات وصدمات روح كون الله يسلط عليك
الآكبر منك يهدون حيلك كووون يهدون حيلك
وحيل كل واحد عزيز على گلبك ، يمه كون يشوف
احباب گلبه يتعذبون مثل ما خلاني اشوفكم متعذبين .
بجيت الحد ما تعبت وراسي راد ينفجر
امي بقت تضغط على عيوني وتلعب بشعري
لحد ما غفيت والشهگه بصدري اشهگ بيها بضعف .
فزيت من رجعوا فايتين بالاستقبال يسولفون
بقيت امثل النوم واسمع عمي يفهم بأمي وهي تسأل
ام ملِكه : يعني شفتوهم ؟
_ رحنا على عمو خوش زلمة استقبلنا والرجال يتفاهم
خابره ماكو دقايق واجه هو واخوانو اثنين
اول ما فات لا سلام لا كلام يهدد ويطاول ويتشامخ
علينا ، وعمو واخوانو قنعوا گعد غير يتفاهم ماكو .
ضغطت على روحي واعصابي من سمعتو يكمل
_ صحنا بي عمي جايين نرد اعتبارك انتَ
مو هذا مطلبك ، وتعذرنا گدام الشيوخ منو
وحتى من اخوانو ، نريد نسدهـا بعد وخلصنا
هذا انتفض وصيح بنص الديوان والله ما مقتنع
والصار بيه بسببكم وبسبب بنتكم ما يمرر بهل سهولة .
ابو ملِكه : وعافنا وطلع اخوانو يصيحون
بي والشيوخ ويانا طلعوا برا يتفاهمون وياه
ولا يحترم ولا يقدر احد ما ينحمل .
كمل عمي على كلام ابوية :
_ هوَ حتى عمه من راحوا گال هذولي
الگاع ما تحملهم ما ينجرعون ولا يهابون احد .
ام ملِكه : والحل شلون بينا نظل هيچ ؟
ابو ملِكه : هوَ عندو غايه براسو وحگ القران .
وافقو عمي الرأي وهوَ يحچي كورت نفسي
موسعه عيوني بصدمة من اللي اسمعو
_ عمو يگلي هذا لا على خلاف ولا سيارة
بيرغ مخلي بنتكم براسو لان هانتو وما يرتاح
ولا يثبت على رأي اذا ما يكسرها ، حتى گال
خايف يتصرف تصرف لا يرضي الله ولا عبادة .
ابو ملِكه : شيسوووووي يعني يهددون هذولي ؟
_ يهددون وينفذون اخذها مني خوفك من هيچ
نماذچ من يخلون احد ضعيف مثلك ومثلنا براسهم
يطلعوا من الإسلام .
راحوا وابوية دخل هو امي غرفتهم تعبان
مر يومين وطلع ابوية من الصبح يدور شغل
رجع بليل ، كلنا گاعدين على مسلسل نشوفها
دخل فرحان وبيده مسواك اخذتهن امي منو
وهوَ ينزع بالحذاء يبشر بينا :
_ شفت شغل من اليوم باشرت فيترچي سيارات .
ام ملِكه : اخاف صعبة عليك ، وين بيك حيل .
راح يغسل ويجاوبها بحماس
_ لا سهلة كل الشغل بي تعب ماكو شي سهل
گعد بنص الصالة قريب من الصوبة فتحلي ايدو
ارتميت بأحضان وامانة گرص خدي وهمس
_ ذبلانات الخدود .
_ احسن حتى اخلص من الگرص مالتك .
_ لا هم ينگرصن بعدهن .
_ عوفهن بوووية راح يحمر وجهي والله .
باسني عليهن بكل قوته ورفع راسو على امي
_ بووووووية شگد احب هل بت بكلبي مزروعة .
اجني خواتي من المطبخ يركضن يدفعن
بيَّ اخذن مكاني رحت على امي اخذتها
نمت بين احضانها وكلنا اندمجنا بالحلقة
ونتوقع ونصيح وبنصنا الحب والفاكهة
الحد ما خلصنا فرشنا بنفس مكاننا اني
وخواتي وحدة بصف الثانية وامي وابوية بغرفتهم
جنى : شايفات اذا وحدة بيچن تدفرني وهيَّ
نايمة شسوووي بيها اسبحهاا والله ماعدنا ملاكمة .
دنيت فراشي شوية منها ورفعت ايدي غميتها من بعيد
_ امداچ كون هيَّ دفره شصار عليچ .
جنى : وكلياتي الصبح من يوجعني وانتن مرتاحات .
_ شلت فراشي انطمري خلصيني منچ .
درت وجهي منهن اريد انام عود بعيدة منهن
بقيت احوس حسيت بيهن نامن رجعت فراشي
قريب من جنى اخذت ايدها لزمتها وغمضت
جنى : عرفت راح ترجعين .
ضحكت واني ادفرها واجاوبها : هاي دفره مقدماً .
الثاني يوم حسيت على ابوية طلع من الصبح
بعدنا على نومتنا ورجع دخل ما طول حتى
گعد بنص الصالة يباع علينا فتحت عيوني
خليته يشوفني گاعدة سألته بدون تردد
بعد ما شفت لونو مخطوف يريد يبچي
_ بوية بيك شي ؟
ما جاوبني رحت گعدت مقابيلو افرك بعيوني
بعدني ما صحصحت رجعت سألت شبيك
وهوَ يجاوب بصوت هزيل ولونو صار اصفر
_ وصلت للشغل وطردني .
_ منو طردك ؟
_ ابو الشغل .
_ ليش ؟
_ يگلي توكل مابينا حيل مشاكل لا تورطنا .
_ مشاكل ماليش ويامن يتورطون .
_ ال موروث وراها .
طلعت امي متعجبة من وجوده تسأل بي
اني جامدة بمكاني عيوني بعين ابوية المكسورة
يباع على خواتي شلون نايمات ، بقت امي تصبر
بي ما ارتاح طلع بنفس اليوم يدور على شغل ثاني
واني تدعي تتيسر وتسهل ، ما ادخلت انقهرت
بس خليتها بكلبي ما اريد انفعل وارجع اخلي اهلي
بموقف مو حلو لو اقلل منهم .
رجع لليل شكد مقهور وتعبان بس ما يبين
كمل صلاته واجه يمنا واحنا گاعدين اتصلوا
من بعد السلام ضحك : أشكرك جداً أشكرك
ان شاء الله باجر اباشر وياك شغل ما قصرت .
ام ملِكه : ها طمن كلبي .
_ الحمدلله راح يشغلني صاحبي وياه بالمطعم
على حسابات هذا خوش شغل وسهل عليه .
وما جذب خبر من ثاني يوم باشر بالشغل
واخذ يومين فد مرتاح وعاجبه شغله
باليوم الثالث رجع اتصل بي صاحبة ب12 بليل ينتر
هو يحچي احنا نراقب بملامح ابوية سد الخط
عصر راسه عصررررر عصبي بشكل
_ الله لا يوفق شكو واحد يگطع برزقي .
حجاها وفات على غرفة مايريد يحچي گدامنا
بقينا وحده تباع بوجهه الثانية حايرات بزمانه .
تكررت المواقف وكل ما يشتغل ابوية
ينگطع رزقه ويرفضون يكمل گعد وسكت
التفت على عمامي ما ظل واحد ما گعده
بالبيت وبطلهم من أعمالهم اللي معيشين
بيها عوائلهم ، وبليلة باردة العالم ببيوتها
ما نسمع غير بابنا انضرب ضربة عبالك شي وگع
ركض ابوية متردد وامي تمنع بي فتح شوية من البردة
سمع صوت دراجة شخطت من بابنا وابتعد صوتها
فتح الباب يريد يطلع ورجله انضربت بشي
غريب مشمور صاح وطفر رجع للخلف
فتح كل أضويه شفت راس خروف يجري دم
مشمور بصف الباب صاح ابوية على امي
_ فووووتي البنات للغرفة اركضي .
بعده يحجي ودفعوا عمامي الباب
وكل واحد بيده راس خروف ينقط دم
من الرهبة ولعبان النفس تصلب جسمي
_ وبعدددددددين شلوووووون فهمني وبعددددين .
_ والله خوية حقك بس شني بيدي وما اسوي .
شغل عمي سيارته واخذوا الروس وراحوا
ماعرفت وين بس صار يوصي بأمي ما تطلع
والبوب ما تنفتح الحد ما يرجون بسلامة
رجعوا ولد عمي وعمامي كلها تصيح
ويهددون بأبويه وهوَ يسكت بهذا ويتوسل بذاك
_ ما اخلي بنتي تعتذر ما اذلها ما انزل راسها .
دفر ابن عمي الباب يكف بردان القميص
وعيونه تبث شرار وكفت بثبات عطت بي
_ شبيك عوووود شنووو تخوووفني .
_ شمسووووويه وياه وهيچ يهدد .
_ هي مرة شفته وبالتلفون غلطت وبس .
_ امشي راح تنهجم بيوتناااااا امشي اعتذري .
_ خاب انجب الخايس منين اعتذر .
رگعني براشدي حسيت بوجهي انشل
ما احس بي بعد ضربته وهو يملخ
واني اضرب بكل ماعندي من قوة
شمرني بالگاع يقيد بيدي واني ارافس
عمامي لازمين ابوية يتعاركون وياه
وهذا اريد استوعب الضربة منين تجيني
ما ادري منين رفعت عيوني على ابوية
صرخت وبكل حياي استنجد تعبت
_ يااااابه يمممممماااااا راح اموووووت .
مر شعري بين اصابعو وشمرني تحت اقدام ابو
_ اخذهـا خلصنا .
ملِكه : والقران ما اعتذر وغلات ابوية ما اعتذر .
_ العباية وووووووينهاااااااااا .
صاح وهوَ يرفعني ابو من شاف حالتي
عض شفايفو حتى يهدي الضرب وهذا
ولا عبالك فاصل جابت امي عباتي ابوية
صار مضارب هوَ واخو جرني عمي من ايدي
وطلعني يركض يصيح
_ منتظررررنا يول منتظرنا .
دفعني بالسيارة احس بركان ومشتغل صار بگلبي
لزمت راسي من الدوخة واعدل بشالي اضم بشعري
مسحت دموعي من شفت عمي وگف السيارة
وسيارة ثانية وگفت ورانا نزل ابوية بركض
اخذني من ايدهم وحضني اريد اضم الشهگة
ابو ملِكه : رجع البنية انا خابرتو وتفاهمت وياه
گال ما اريدهـا تچي والله ما يريد خابر وتأكد .
_ ميخالف خلينا ناخذها ونخلص ننهيها .
ابو ملِكه : ما نخلص هو طلبها مني .
_ يعني شنو طلبها ؟
_ يريدها يريد يعقد عليها .
رفعت عيونها انظر بعيون ابوية بصدمة
_ وانتَ وافقت ؟ موتوني ليش تخلون هل حيوان
يعذبني انتوا موتوني مـن هسة .
اخذني ابوية من ايدي صعدني بالسيارة
رجعت للبيت من البچي اختنگت اول ما دخلت
وگعت على رجل ابوية أتوسل بي
_ دافعت عنك من گد ما احبك وما أرضى عليك
لا ترضاهـا عليَّ انكسررر هيچ كسررره حباب الله يخليك .
گعد يمي بالگاع يمسح بوجهي ويبوس براسي
طلع تلفونو واتصل وفتح الصوت حتى اسمع
بيرغ : نعم .
_ رجعتها ، طلبك مثل ما بلغتك مرفوض
تريد تكتلنا تعال بس عوف اخواني طلابتك ويانا .
بيرغ : تمام .
امسح بعيوني حتى اشوف ابوية زين
سألته واني ما جاي استوعب الكلام
_ يعني شنو تمام ، هو احنا شسوينا هو شصار
هذا حالنا والضرب الصار والمصايب وگطع رزقنا
ليشششش غير يفهمنا .
ابو ملِكه : من اخذچ عمچ خابرته تجادلت وياه
وحجيت الصار گال وگفهم حتى لو تعتذر مني مايفيد
اخو ظل يتصايح وياه وانا على خط سأله
انهيها ويانا شنوو براسك ؟ يجاوبه اعقد عليها .
اجت امي تشربني بالبطل ماي حلگي يبس
احس روحي انضربت جلطة لساني ثگل
ملِكه : عصابة هذولي عصابة مجرمين .
هز ابوية راسو ويجاوبني وافقني :
_ هذا ما راح يشيل ايدو راح يظل ورانا .
دخلتني امي جسمي كله يصل عليَّ
نمت واني اون وگعدوني على مصيبة
انام على قهر واگعد على مصيبة
جنى : عمي موفق بالسجن .
_ ليش .
_ ابوية يگول تلفيق .
درت وجهي على درج وكفت بيَّ ما بيه
شفت دورية واگفين يريدون ابوية يصعد
طلعت امي تدعي وتتحسب وتسب بيهم
مت تقبل يروح وهمَّ يتصايحون اخذوا ابوية
وراحوا من الصدمة لساني احس انشل
الجوارين كلها اجتمعت على امي ما اعرف
شلون فتت للبيت وجريت عباتي وسحبت
تلفون ابوية جنى دفعتني ما قابلة اروح
_ عليچ القران عوفيني خليني اروح
اذا ما تنحل ولد عمچ راح يفوتون يذبحوني .
طلعت امي من شافتني جرت عباتها
تعرف ماكو غير حل لازم نواجهه
_ امشي انا وياچ .
حجتها واخذتني اجرنا تكسي لا اني اندل ولا هي
اتصلت على رقم الحيوان ما يجاوب بقيت ادگ
وادگ الحد ما سمعت صوته القذر
ودست على روحي وحچيت :
بيرغ : اسمع .
ملِكه : عنوانكم وين ؟
بمجرد ما سمع صوتي سد الخط
رجعت اتصل يتجاهل اتصالي
اتصلت امي على ابن عمي بلغتو وحدها رايحة
اخذ ابو السيارة التلفون الحد ما وصلنا
مقابيل بيت جبير گال هذا بيت عمو بيتهم محد يندل وين
دگت امي بابهم طلعت ولد شاب صغير استقبلنا
بالديوان وعبالك عرفني بس گعدنا بالاستقبال سألني
_ انتِ مو نفسها لبنية بالفديو من تعارك بيرغ .
_ اي اني الي سحلتو .
دخل عمهم رجال متوسط العمو مو كبير كلش
مدري من الراحة هيچ بعدو نافخ روحهو
حجت امي الصار وياهم اليوم بالتفصيل
وهوَ بس يهز براسو ويستمع ومن خلصت بلغنا
_ انا بلغتو بوجودكم وهوَ على وصول .
فاتت بنية شابة قدمت چاي ما اخذت
منها گاعدة على اعصابي اهز برجلي
احس بروحي اريد اوگع لا نايمة عدل
وضرب البارحة هدّم إعظامي ، سمعنا
صوت سيارة وگفت وانفتح الباب دخل
يكرز حب شمس ويشمر دخل علينا امي
من شافتو لابس عسكري والسلام بخصرو
بأرتباك نطقت السلام رد السلام وگعد
بيرغ : امر ، خدمة ؟
دست على روحي وعيوني حتى ما رفعتها
امي تحچي وياه بالموضوع وهوَّ يعاتب
ويرجع ينتر ويذكرها بكلامي والسب
واني امرد بروحي وأضغط عليها واستمع
بقت امي تحاول وياه وهوَ يتعمد يستفزني
بكلامو صار ابوية بين عيوني رفعت راسي من گال
_ هي حتى ما اعتذرت .
ملِكه : اذا اعتذر ترضي رجولتك يعني ؟
بيرغ : شوفي يولو اذا تتجاوزين اسويها ظلمة عليكم .
ملِكه : هو انتَ سوووويتها شنو باقي ما سووويتوو .
بيرغ : بعد وبعد وبعد .
ملِكه : ليششششش ؟
بيرغ : گلتي اشوفك النسوان شتسوي بيك
ما نفذتي ، هساع انا خليتچ تشوفين الزلم
شتسوي اذا امثالچ تخلي راسهن براسنا .
ملِكه : اخاف اهلك ناسين يعلموك خليني اعلمك
الزلمة الصح ابن العشاير المتربي صح
ما يخلي راسو براس حرمة لووو مهما
جانت غلطانة وصلت عرفت شنو اقصد ؟
بيرغ : معلومة نحتفظ بيها بمتحف
انتِ حاسبة روحچ على حريم ؟
ملِكه : غصباً عنك .
بيرغ : انتِ بلاء بلاااااااااء تقودين سلف .
گرصتني امي من صار عصبي شغل جگارته
وامي تتفاهم وياه ساكت منها ولا يحچي
كمل الجگارة وگف مترهي حط ايدو
بجيب البنطلون يريد يطلع وقبل
لا يروح دحگ على امي ونطق بكلامو :
بيرغ : ابوكم ، وعمامكم ، وعمامي صار عدهم
عـلم شنو براسي وشنو اريد وقراري ما اتراجع عنو .
سايرت كلامو تحاول تتفاهم وتحچي وياه
بكل احترام وصوتها خافت الى ابعد الحدود
_ والله يمه يشرفنا نسبكم وانت زلمة معدل
عين الله تحرسك وترعاك والف من تتمناك
الرتبة ترس اكتافك ومبين ابن عالم وناس
ما شاء الله عليكم ، بس يا يمه عدها اخت اكبر
منها ميصير نزوجها قبل لا تتزوج اختها عيب
وترا لا تشوفها لسان والله بعدها صغيرة
ما تتحمل مسؤولية زواج وبيت مو گدها
كون الله يرزقك بالأحسن والأفهم منها هاي تعذبك .
دار وجهو منها يعدل بشواربو الخايسات
يعيش بيهن صگر ورفع ايده اكثر يعدل بحاجبو
وعبالك ما سمع كلام امي بكل برود نطق
_ المهم ابوكم ، وعمامكم ، وعمامي صار
عدهم علم شنو براسي ، وراح يتنفذ اليوم باجر
بعد اسبوع شهرررر سنة راح يتنفذ وقراري ما يتغير .
جريت ايدي من امي بعد ما اتحملو هذا حدي
مشيت وگفت مقابيلو اريد املخو رفعت اصبعي
بوجهه اريد انفجر صحت بي :
ملِكه : انتَ مهبووووول تريد اهينك
بعقلك انتَ بعقلك لووو يذبحوني ما اقبل لوو يذبحوني .
بيرغ : ما اخليهم يذبحوچ انا من اخذچ اتفنن بذبحتچ .
عافنا وهوَ يطلع امي تسد بحلگي
ملخت روحي تملخ وهي تلزم بيَّ
غسلت وجهي كون يخلوني والله
املخووو تملخ والله ، من عمو دحگ
على حالي وحالة امي طلع ورقة
كتب بيها وقدمها بيد امي
_ روحي على هل عنوان واطلبي تقابلين الموروث .
_ ياهو هذا ؟
لزمت راسي بيدي واهز بروحي وامي
متمسكة بيدي وتستمع لكلامو
_ هذا اخوهم الچبير اني قبل فترة دخلتو
وحلها هوَ عندو كلمة على اخو ، انتوا
جازفوا وروحوا بس هوَ لو يستقبلكم لو لا
بعد انتوا وحظكم ، اذا دخلتي هناك اعتبريها محلولة .
اخذت الورقة من امي وانا امشي وامسح بدموعي
اجرنا تكسي صعدت امي واني ما سكتت
سبيت هل حيوان انواع المسبات
ملِكه : راح اروح هناك والله ما اتحرك اذا
ما يطلع هذا اخو يحل مصيبتنا لو اكتل روحي وأبلي .
وصلنا قريب من مزارع سألنا عليهم
نمشي نمشي ويأشرون بعد ليغاد
هلكت ورجلي وگعت وامي صارت دم
من التعب الله لا يوفقو بهذلنا ، انتهيت
الى ان وگفت مقابل سياجهم تقربت من الباب
ادگ بي وما اشوف غير ذيابة اثنين هجموا
على باب بقيت ثابتة بمكاني امي تصيح
بيه تريدني ارجع عدلت شالي وجاوبتها
_ يمه بيني وبينهن سياج عوفيني حبابة عوفيني .
ضربت الباب بكل قوتي على صوت الذيابة
طلعوا اثنين شفتهم بيوم الحادث من شافوني
ملامح التعجب انرسمت عليهم
_ سَــهم انتظر .
سَــهم : دقيقة همام اصبر ، نعم اختي شكو هنـا .
ملِكه : اريد الموروث مالتكم .
همام : دهر دهر الموروث كون ما بقت بنت تعتب عليه .
التفت الثاني عليَّ يجاوبه :
سَــهم : صارت بنفسي تجي بنت تسأل عليَّ .
همام : حظنا مو مثل حظو جيره كون بفرگنا .
ملِكه : شبيكم مخااااااابيل .
سَــهم ؛ ما تريديني ؟
اجت امي بصفي ورجعتني وراها
_ خالة وين اخوكم عدنا قضية ونريد يحلها .
همام : خالتي قابل اخونا قاضي ؟
سَــهم : هسة هوَ خلي يحل قضية حياته .
همام : اندري حاير يفتر بـ بنت ال ضـلـيل .
سَــهم : اكلك گال لا تحچون انطم لا يطمنا .
ملِكه : والقران فلا اتحرك من مكاني اريد
يطلع اخوكم يخلصنا من اخوكم هذاك .
همام : اخذيها مني ما يگدر على بيروغه .
سَــهم : عبن بيروغه صلف قبل كم يوم خنگ
هذا الحيد شوفي شكبره ظل يرافس مثل الذبيحة
ربچ انا موجود خلصته بمعجزة چان هسة هيمو مدفون .
بقت امي تصفن بوجهي واني اصفن عليها
هاي عود اخوانو عجل اني شيسوي بيَّ
تربعت بالگاع گعدت وبكل اصرار صحت
ملِكه : وحتى لووو ما اتحرك ابدددددد والله .
ابتعد همام يخابر بالتلفون ما أسمع
شنو يحچي ورجع علينا :
_ خالتي وارث ما يقابل الغربة بس اذا تريدين
شي بلغيني انا ابلغو ومايكون خاطرچ الا طيب .
ملِكه : لا عزيزي بلغو اقابلو يعني اقابلو
باقين ما متحرك روحوا گاعدة هنا اني .
رجع التلفون على اذنو يحچي
_ ها سمعت ، ما تقبل قافلين ، اي بس هيَ وامها تمام .
سد الخط ورجع يبلغنا
_ ربع ساعة ويوصل .
ملِكه : يعني قبل يقابلنا .
همام : اي خوية قبل .
مُـرجانـة ..
_ ها بندر اجيت اي دقايق واوصل ، اي ويايَّ .
ضاقت نظراته عليه وكأنه يحاول يحاصرني
كتمت حتى انفاسي بس غلق المكالمة ضربت
على هاي الصندوگ اريد يوگف شمر الجگارة
من الجامه واشر بيده شكو بدون ما ينطق بحرف
بالله هذا شحچي وياه اني اشرد من بندر
وهوَ ياخذني على بيت بندر
يااا بوية شنووو انوب اروح البندر برجلي
شبيه مخبله ماعندي عقل اذا يشوفني بندر
شيسووووي دخيلك ربي لااا يماااااااا
اخذت تلفونه كتبت وايدي فضحتني
” ما اروح على هذا صاحبك هسة لو ابات بالشارع ”
فريت التلفون وايدي ترعش رعشات بحيث
يريد يقراها ما يگدر مد ايده وعـاط بنفاذ صبر
_ اهتزاز صار بعيوني احتاج عملية بعد هل ضيم .
قراها واني افر بيدي واضمها احارب حتى مايحس
وارث : ليش بالله ؟
رجعت التلفون وكتبت
” مخيف اخاف منه اخذني يمك ”
وارث : مايظل بالبيت .
” لا عيب بيت غريب ما اظل عنده ”
وارث : چا انااااااا عرررررررف اناااا موووو غريب .
ملامحي هفتت هيچ بس رافعه حاجبي
احير شكتب وشلون افرها واخلي يغير رأيه
” شو تصيح اذا ثگلت عليك اشمرني هنا بالچول ”
وارث : فدوة للعباس .
تذكرت امي من تريد شي من عمو ضـلـيل اطگه
تهديد ، ماعندي غير حل لازم اطگ هذا الطنطل تهديد
” اكلك نزلني ارجع مشي على بيت اهلي
بلكي اموووت واخلص من هذا العذاب
اني الى متى اظل متلوعه تخلوني هنا وتجيبوني هناك ”
وارث : طنطني بعددددد طنطني فارغ انااااااا
ابدل بيوووت بمزاجچ نولي هناك يعني
هناك ماعندي غير مكان .
” وانا بلغتك بعد هناك ما اظل اشرررد ”
وارث : شردتهم ما تشردين تمنني شني
اخاف انااااا اجيت شارد عليچ نزل ويدبچ على سطح .
شمرت التلفون وغطيت اذني من صوته
مايفيدددددد هذآ ياخذني على موووت برجلي
اخاف حتى احچي انوب لا يطلع يقربله وهوَ
هم بسحلني ناقصني سحل كلها تريد تمرعدني
وانا اركض والتمرعد يركض ورايَّ ، شگد حاولت
امي تبطلني من هذا الطبع من انحصر جنت
بالمدرسة امتحان لو واجب ، لو حتى مشكلة
تصير بحياتي حتى لو نقش تاكل اكلي
دمعتي فد رخيصة بسرعة تغورگ وتنزل دموعي
شلالات فني بعد اگدر اسيطر عليها
درت وجهي وعيوني انفتحت بعد وما ينسمع
مني بس الشهگات وجسمي ينهز امرد بيدي
وامسح بالدموع وترجع تنزل .
رن تلفونه رد حصرت روحي بالباب بگد
ما صوته عالي وينتر وبعدني ابجي
هو يصيح عليهم واني دموعي تجري
وارث : شبيكممممممم شكووووووو
منووو هذني عايززززين ، اكلك اسمعععع
راح اجي اورم گلبك مثل ما گلبي مورم اسمععععع
همااااااام افتح الأراضي ملجأ احسن افتحهاااااااا .
فتحت حلگي بصدمة ابچي بس درت وجهي
عليه عوووود شنو قصده ملجأ شدعوة هل مبالغة
هو بس اني يريد حجه يصيح الطنطل
وارث : منو هذني شغلتهم عند بيرغ انا شكو
احل قضيتهم شنو ؟ اكلك بيه خير احل قضيتك انت واخوتك
واخلص منكم احل قضية جهالي تزيدوهـا عليَّ انتووووا .
سكت يستمع وضرب على ستيرن السيارة
وارث : اي بالله روح اسمعهن امشي .
التفت عليه شال الكلينكس كله شمره بحضني
وارث : عليمن تبچين تسكتين لا افقد عليكم كلكم
وحگ العباس احرگ الأخضر واليابس .
رفعت اكتافي ودرت وجهي منه بمعنى معليك
وكملت بچي وهوَ يستمع للتلفون صاح
_ سمعتهن ربع ساعة وأوصل .
فر السيارة وغير الطريق كله رفع اصبعه
يضرب على شاشة الصغيرة فوك مسجل السيارة
وارث : لا عبالچ غيرت طريقي ومشيت بكلامچ
صار عندي ظرف طارئ اخلصه ونروووح
تالي عمري النسوان تمشيني حتى ياريت نسوان .
باوعت عليه بطرف عيني وبعدني اشهگ
وامسح بالكلينكس قبل لا نوصل صار يستغفر
وارث : هسة غيررررر كافي عليمن هل بچي ضربتچ ؟
اشرتله مو بكيفي وامسح بدموعي گدامه
ويرجعن ينزلن احس مخنوگه بس اني اريد اسكت
وارث : چا بكيف منووو غير دموعچ وعيونچ
نخابررررر عليهم يطفون دموعچ اسكتي .
بقيت اخذ نفس احاول بس هو صوته عالي خبلني
درت وجهي حتى بس مايشوفني بين ما تخلص
هـاي بچيتي طلعت شهگة بلا ارادتي عود اني سكتت
وارث : دخيل الحسين كافي ، دخيل العباس كافي
مووو گلبي تعب انا من يمي گلبي تعب بس كافي
شلون اتوسل بيچ العباس عليچ اسكتي .
اخذت تلفونه كتبت واني اشهگ
” سكتت بس بقت الشهگة هسة تروح لا تصيح حباب ”
قراها ودار وجهه واني رجعت التلفون بمكانه
دار جسمه بنص الطريق سحب بطل ماي مخلي درزن وراه
وارث : اخذي اشربي غسلي وجهچ .
وگف السيارة ونزل فتح الباب مالتي
_ تعالي هنا انزلي بالله نشوف وين تاليها
خلي تروح هاي الشهگة مالتچ غسلي وجهچ .
كمل وراح مبتعد شوية يشرب جگارة ويخابر
وبين فترة والثانية يسرق نظرة اتجاهي
رجعت صعدت من راحت مني ورجع تنفسي طبيعي
هوَ هم صعد بدون ما يحچي الحد ما رجعت اشوف
اراضيهم ورجّعت تذكرت اول مرة شفتها شگد خفت منها
ومن الشخص القاصدة التقي بي واشوفه
التفتت شفته ساند ايده على باب وبطرف اصبعه
يعدل بشاربه ومركز بالطريق ، درت عيوني على
شارع بس استدار اتجاهي يشوف عليمن اباوع .
لمحت بنية شابة گاعدة بالگاع بصف السياج
وياها حرمة چبيرة عيونها على سيارتنا
مغطيه بنتها بعبايتها من الشمس
ومحد يمهن من اقتربت السيارة وگفت البنية
تنفض بملابسها وتعدلهن وگف السيارة گدام الباب
سحب مناظر لبسهم وطلع كاسكيته رياضية لونها اسود
ونزل الجام اجت البنية وامها وراهـا
وارث : اتفضلي اختي .
_ اني ملِكه اذا تتذكر قبل فترة صار حادث و.
وارث : اعرفكم اتفضلي .
ركزت وياهم اشوف عيونه تباوع عليها
وارجع على بنية اشوفها شلون تركز بي لو لا
ملِكه : يعني منين اتفضل غير احجي بالتسلسل .
وارث : جيتكم شنو سببها ؟
ملِكه : اخوك سجن ابوية وعمي ويهدد تقبلها ؟
شلت ايدي اكل بأظافري بتوتر وصافنه بوجهه وارث
والبنية تحچي وتبچي بكل حياها وامها تبچي وياها
تشكيلة من بيرغ ، عفت الموضوع وعقلي شدد عليه
اريد اشوف هم يضوج من البچي لو بس من اني
ابچي يضوج من صوتي ويظل يصيح ينزعج الطنطل
خليت ايدي على حنچي وثبتت هيچ فتحت عيوني .
شغل جگارة والتفت اتجاهي وگعت ايدي
من حنچي امثل اني مو وياهم نزل المناظر
ورفع حاجبة اشرت بوجهي شكو رجعها
واستدار حتى ما فهمت قصده شبي
ام ملِكه : أعتبرني امك لا تردني كون الله
يرفع من شانك ويخلي ألك حرمتك هل حلوة
ويرزقكم بالذرية الصالحة بحق محمد .
نظر اتجاهي يشوف ردة فعلي شافني
عاقچه وجهي ذيچ العقچه ما راضية
ورافعه طرف شفايفي نطاني نظرة
هاي من فوك ليجوة عود ما عاجبة
وارث : مو حرمتي هاي حجيّة اعصابچ .
هزيت ايدي فريتها وطبگت شفايفي وجهي كش
شافتني ملِكه ابتسمت بوجهي من الفشله
اني رجعت أبتسمت ودرت من الطنطل .
بقت تعتذر هوَ بس يهز براسه وهي
تحاول وياه استسلم فتح قفل بوب السيارة
_ اصعدي حجيه .
ركبت بسرعة هي وملِكه وياها طلعوا همام
وسهم فتحوا الباب دخل سيارته مر بصف
همام صافن على جهة مالتي مصدوم
يمكن لو استغرب من وجودي فر وارث وجهه وهوَ يمشي
_ دير وجهك لك .
يمشي بطيء وگفها قريب من غرفته الي
يشتغل بيها ، نزلت من نزل عيوني على
غرفة الي جنت بيها اول ما اجيت
رحت بأفكاري بعيد جفلت ودرت اشوفه
وارث : منااااا مناااااا وين ؟
دخل قبلنا للمكتب ودخلوا وياه الأم وبنتها
وراهم اني فتت مشيت للمكتب سحبت الكرسي
وگعدت جريت ورقة وقلم ورفعت راسي
شفته يتصل ونزل المناظر واجه بتجاه المكتب
كتبت بالورقة
” اذا ترفع صوتك بعد ابچي ”
قراها بطرف عينه شو هذا قلص عيونه
وگلبها وابتعد عود قصده مايهم
ظل يتصل على بيرغ ما يجاوب والبنية
گاعدة على اعصابها تهز برجلها وتبلع بريگها
مبين شگد تعبانة انقهرت عليهن گمت شغلت
الغلاية احمي ماي وخليت قوري الچاي مبين
حار وجديد مو قديم وطلعت گلاصات صبيت
وقدمت الهن مريت قريب منه شمر عليه ورقة قريتها
كاتب ” هذا مو بيت تقدمين ضيافة بكيفچ ؟”
كتبت ” جنت سامعة الأغنياء بخلاء هسة تأكدت ”
ورجعت الورقة هو قراها حتى ما شفت ردت فعله
بس مدري شنو رجع كتب بالورقة شلتها بدون
ما اقراها شمرتها بالسلة مال زبالة ورفعت حاجبي
من شفت الصدمة شلون صارت على وجهه رجعت
ظهري على كرسي وكتفت ايدي .
هز راسه ورجع يخابر ويدردرم بصوت ما مسموع
اخر شي همَّ ما يفتهمون عليه استفزني
_ اخخ بس خليني اخلص اذا ما اخذها على بندر .
جريت ورقة ردت اكتب وگف شال علبة الأقلام كلها
وخلاها على رف عالي كلش يمكن عرف اريد اهدده .
نهض من مكانه من جاوب بيرغ
وارث : انتَ وين صار ساعة اخابر بيك ؟
بيرغ : نايم .
وارث : نايم كل هذا نــايم نومة اهل الكهف ؟
بيرغ : اهووووو شتريد .
وارث : امشي بدل وتعال اريدك بساع .
بيرغ : بليل من تچي خليتي نايم .
وارث : بيرررغ ملِكه وامها عندي .
رفع التلفون سد المكالمة بيرغ دخل همام وسهم
گعدوا وام ملِكه تشكي على صار وشلون
خرب شغل زوجها ويشمر بالروس مال طليان
ما عدا التهديدات بالورقة ، بقيت اتبع همام
شلون شال كرسي وصار قريب من المكتب
وقريب عليَّ ابتسم ومال جسمه اتجاهي
همام : بعدچ عايشة ؟
هزيت راسي بـ اي غمز ودگ على صدره
همام : المفروض تشكريني انا نقذت حياتچ .
اشرت أله شلون يعني نقذني ما فهمت قصده
همام : من وگعتي وارث اخذ اطفاله واني
شفت حالتچ طلعتچ من البيت والقران انمرد
گلبي مرد عليچ وصلتچ على مستشفى ميته .
ملت راسي وابتسمت خليت ايدي على صدري
واشرت بيدي الثانية على راسي بمعنى
أتذكر احد شالني بسرعة فهمني ، طلبت منه
قلم ورفعت ايدي عليهن راح شالهن رجعهن بمكانهم
اخذت واحد وجريت ورقة كتبت
” شكراً حسيت من شلتني بس بعدين فقدت ”
غمض عيونه مبتسم وسند ايده على كرسي
خلاها على خده ويجاوبني بصوت خافت هامس :
همام : واجبي ، هسة شلونچ ؟
” احسن صرت بفضلك ، الأطفال زينين ؟ ”
همام : ابوهم خفاهم بس زينين عايشين .
رجع سألني بفضول وتركيز
همام : راح ترجعين للبيت ويانا ؟
” وارث مايقبل ”
همام : اذا تريدين ترجعين انا ارجعچ حتى لو مايقبل ”
استغربت من تغيير همام بداية دخلتي
هو اول من عارض وعصب من وجودي
وحار شيسوي حتى اطلع منا شهل تغير ؟
ردت اكتب لمحت همام رفع ايده يأشر شكو
وجهت نظري وين ما يأشر همام شفت وارث مورث
وجهه محتقن حقن صاير دم وسهم مختل وجهه
بيده على منظر وارث ، رجع همام قدم الورقة
_ اكتبي وين وصلنا .
عدلت گعدتي وكتبت سريع
” خليها على وارث احس هو يعرف وين امان احسن مني ”
همام : تفترين برا تغيرين جو ؟
وارث : سَــهم امشي نكمل شغل تعال انت ويانا همام .
همام : روحوا انتوا ارتاح خمس دقايق واجي وراكم .
وارث : امشي گدامي امشي وقت راحة هسة امشي .
اخذهم وطلع عافني بي اني والنسوان
حتى ياخذن راحتهن وكفت ملِكه اجت يمي
_ انتِ خطيبته ؟
هزيت راسي بـ لا
_ عجل شنو تصيرين منو ؟
صفنت صفنا وعقل على واهس اخذ استراحة
من التفكير وفصل فيشه ركزت من گالت
ملِكه : عبالي زوجته لو خطيبته لان
يتناگر ومركز وياچ تركيز فضيععععع .
رجعت على امها وسبلت عيونها بأعجاب :
ملِكه : هذا زلمة وهذاك الخايس الروغان زلمة
شفتي الهدوء الرزانة الثگل الاحترام هذاك
هوووسة هووسة اني هيچ اريد كون .
حكيت راسي على اساس ما اسمع
بس والله صوتها واضح :
ام ملِكه : يمه هذا وين يعيش وياچ انتِ وصوتچ ولسانچ .
ملِكه : مو من ادحگ الهدوء مالته حتى استحي اطلع لساني .
دخل وارث سحب قمصلته ومر مني اني
عيني بقت على ملِكه شلون تباع عليه
بس طلع خطفت عيوني على مكتب
ادور على ورقه اللي كتبت بيها لهمام مختفيه
مشيت من الشباك باوعت ماكو طلعت من الباب
لمحته صاعد بالسيارة يقراها شگگها تشگگ
ونزل شمرها وراح عليهم .
رجعت عليهن من شفت بيرغ فات من بعيد و وارث
رد يمشي سريع حتى يوصل دخل ودفر الباب
لابس بنطلون اسود والقميص كف نص الردن
وشعره مبعثر عيونه تبث غضب وگفت ام ملِكه
خلت بنتها وراها رفعت ملِكه ايدهـا وصاحت
_ دحگي على الهمچ واسلوبوووو .
بيرغ : شعندج هنا يول ما تگعدين انتِ تزاگطين منا ومنا .
_ اريد ابوية وعمي طلعهم واحترم نفسك .
دخل وارث سحب بيرغ من ايده وجر الكرسي وگعده
رفع اصبعه على شفايفه وبصوت عالي حذرهم
_ اششششش ، اشششش ولا اسمع نفس .
بيرغ : ول ومحمد دوختني دوووووختني .
وارث : اسكت واسمعني اذا تحچي ، تعرف بعد الباقي .
طلع بيرغ باكيت الجگاير ورث وحده وجر منها نفس
ورفع عيونه خزرهـا خزره وهيَّ رجعتها نفسها
وارث : شنو مشكلتك احچي بلا عصبية
وصوت عالي وتاخذنا بصوتك بالتفاهم خلينا نحلها .
بيرغ : دشوفها شلون تخزرني وعود نحچي .
ملِكه : هذا شبي غير انت خزرتني .
بدون ما يلتفت عليها فتح ايده وصاح بيهم :
وارث : شني زعاطيط خزرتني وخزرني ؟
راد يحچي بيرغ قاطعه ورجع سأله
وارث : جاوبني شنوووو مشكلتك وين تريد توصل .
بيرغ : اتزوجهااااااا .
ملِكه : هوووو بكيفك ؟
وارث : اختي رجاءً لا تحچين رجاء اخوي خلينا نحلها .
بيرغ : انا بلغتك السيارة تولي اشتري غيرها
بس موقفها وشلون تهين بيَّ وتسب مايروح من بالي
وحگ الله نوم ما انام وما تبررد ناري اذا ما اردهـا .
وارث : تنتقم من بنت ؟
بيرغ : اكسررر راسها .
وارث : اطبعها براسك القوارير يدمرن اكبر شارب اذا تنكسر .
ضرب بيرغ الميز وگف على حيله يصيح بيهم
_ امشي ارجعكم يلة هسة يرجعون البيتهم .
وارث : ما تطلع منا اذا ما تنحل هل مهزلة .
دفر الكرسي وگف طول بطول هو وارث :
بيرغ : وارررررث اطلع منهااااا اطلععععع .
وارث : فاتت دخيلة عندي ارجعها تخسي لك .
فتح عيونه على وارث دخل همام وسهم من برا :
بيرغ : وبعدين شتسوووي يعني .
وارث : خاب والعباس بالصياح ماتحل المشكلة .
بيرغ : منو ضحك عليك وبلغك اريد احلها .
همام : بيرغ عيب اگعد نتفاهم .
بيرغ : انجب واكل نعال واسكت لا تدخل .
جر سَــهم همام يمنعه من بيرغ مو راد يفوت يضربه
وارث : خالتي هذا مايريد يتفاهم خلينا
على اتفاقنا بناتچ الباقيات بالطريق
اخذكم لمكان محد يندل بعد خيالكم اخفيكم بحمايتي .
بيرغ : ووووووارث ول ووووارث .
وارث : تگعد نتفاهم خيراً على خير ما تريد انا اتصرف .
سحب بيرغ الكرسي وگعد طبگ اصابيعه
شي وجر نفس طويل بصوت مسموع غضبان
_ يلة بالله اتفاهم .
وارث : لا تصيح .
_ اي اي يلة اختصررر .
وارث : البنية ما تريدك .
بيرغ : ما اتذكر طلبت رأيها .
ام ملِكه : ابني قدر وصار والبنية دافعت عن ابوها
هسة ليش تكبرها نعتذر منك وامسحها بوجهي
اني مثل امك يمه وطلع الزلم وعوفنا بحالنا .
التزم الصمت لثواني عبالنا اقتنع
وارث : ها شگلت .
بيرغ : وارث خلينا نلملمها رسمي على سنة الله ورسولة
احسن ، ليش اسوي مصيبة شكبررررهاااا اخليكم
تترادمون وما تعرفون شلون تلموها .
الهدوء سيد المكان كلها هدأت وبكل
عين صلفة التفت على امها يهددها مدري يحذرها
بيرغ : اذا صدك تحبيها وتخافين عليها لملمي
الموضوع وخليها تصير رسمي بكل احترام
انا ما اشيلها بعد من راسي لا وروح ابوووي
هناااا طبعت هناااا براسي ما تصير
بالحلال اسويها بالحرام ، استري على بنتچ
وكفكفي الموضوع هاي انا هديت ونصحت
الباقي من افعالي افعالكم تحدده .
وارث : عيب لك تخبلت .
بيرغ : وصفيت ابوها وعمامها مو عبث
غاية بررراسي رفضوني اقلعهم وانفذها
وبعد راح اكمل عليهم وأفرغ الجو اخلي
بس النسوووان وبنتچ بكل سهولة اخذها .
چان الحايط نطق همَّ نطقوا الكلام صار بس تحذير
بيرغ : تريدون على سنة الله ورسولة وبرضاكم
وگدام العالم متزوجة واطلعها عروس من بيتكم
انا جاهز ، رافضين بلغوني اطرهـا بلمح البصر .
غـاليـة ..
لفلفت سجادة الصلاة وقفلت باب السطح
صار فترة احب اصلي فوك وادعي ربي براحتي
بعدني على درج واشوف ضـلـيل بيده جنطة صغيرة
دگ باب غرفتنا ودخل اسمع نقش ترحب بي
ضـلـيل : بس لا نايمات .
ننوس : هلا هلا اجه بابا .
ضـلـيل : تعالي يا بعد نظر عين بابا .
شالها يبوس بيها ونزلها نزلت بدون ما اطلع صوت
صرت وراه عطره انتشر بالمكان ،اشرت للبنات ما يحچون
شي صار ايام يتعمد ما يخليني اشوفه وصرت
اني مثله اتعمد ما اخلي يلمحني جن
جنونه علينا بعد ما أجونا الموروثين
شگد حاولت اعرف الصار بس قافل وانا قفلت وياه .
مد الجنطة خلاهـا بيد نقش وعيونه ادور بالغرفة
ضـلـيل : هـاي الأمانة اضعاف حگچ بخمس مرات
مثل ما ردت ، وبداخلها ورقة گاع بأسمچ حگ الضرر
ورقة الطلاگ كلهن بهل جنطة .
شمرت نقش الجنطه ومن فرحتها ركضت حضنته
تصلب بالكامل ويرفع بيده وينزلها محتار :
نقش : عمو شلون انسى وگفتك هاي شكراً .
رفع ايده متردد مسح على راسها وسحب روحه :
ضـلـيل : وبعد ما عفيت عنهم حگ ايدچ والصار
بيها ما يروح ارجعها ألهم وابرد گلبچ بيهم .
نقش : كفيت ووفيت شلون أجازيك اخذ امي .
ضـلـيل : هههههههه خلنها عدچن ما أريدنها .
نقش : افاااا ماتريد غـاليـة .
على ضحكاتهم ما ادري بروحي اضحك
وفاتحة حلگي ، هز راسه رافضني عود
هههههه احلف عليك عايش على نـار
ضـلـيل : هيَّ امچن وينها ؟
رفعت نقش ايدهـا اشرت على باب
ألتفت صارت مقابيله تخربط وضعه ابتعد
وانا اقتربت مريت من عنده وسلمت
_ شلونه شيخهم .
ضـلـيل : محتاجات شي بعد نقش ننوس .
ابتسمت واستندت على كنتور گدامه كلش
ومكتفه ايدي وعلى وجهي ابتسامة ما گدرت اخفيها
ننوس : جبت حلويات لو بس نقش جيب الها فلوس .
ضـلـيل : امشي اخلي واحد منهم ياخذچ تشترين .
ننوس : لعد مو اشتريت لنقش غير اشتريلي وياها .
ضـلـيل : العناد هذا يهجم بيوووووت .
عافها وطلع وكفت بالباب زعلانه منه
سدت الباب ومدت راسها صاحت بعلو صوتها
ننوس : اني بعد صرت ننوووس عابد
عموو ضـلـيل شيخهم تاج راسهم .
ضـلـيل : بنت الكلب بالقندرة اجي هسة دگ وين يوجعچ .
جريتها خنگتني من الضحك هنا كشفت
هل حقيرة نسخة مني بالاستفزاز وشاطرات
بس نستفز بضليل حضنتها وگعدت ادغدغ بيها
ننوس : بعد اصيح عمو لا گولين صيحي بابا .
غـاليـة : حتى يضربچ والله بس تصيحين عمو .
ننوس : اشرد اصعد فوك .
غـاليـة : يصعد وراچ .
بعدهـا بحضني والباب ندگ فتحته نقش
طلع شاهين من شافها تراجع يعدل بشعره
_ شلونچ ، شلون صرتي ، ايدچ كون توجعچ ؟
نقش : خليني اجاوب وأسأل زرگتنا تلاث
اسئلة بثواني شبيك تنفس جر شهيق زفير .
غـاليـة : ولچ شبيچ مو زين يسأل عليچ .
نقش : زينة الصبح سألني والظهر هم سألني .
شاهين : وكل خمس دقايق اسأل شكو بيها ؟
عافته وفاتت گعدت على سريرها
شاهين بسرعة يبين مقهور لو فرحان لو عصبي
بحيث بنفس اللحظة ملامحة وصوته كلها تبدلت
شاهين : ننوس تعالي هاي علاگة ابوچ دزهـا .
ركضت اخذتها من ايده وطشرتها بالگاع
تتأكد مشتري كلشي تحبه لو اكو نقص
من شافت كلشي على مرامها رجعتهن بالعلاگة
وعبرت شاهين وتمددت بالگاع لازمة المحجر
تشوف ابوهـا موجود بمكانه، مدت راسها
اكثر من المحجر تتعاجز تنزل وعلاگتها بيدها صاحت
ننوس : بابا .
ضـلـيل : هـاي وينها .
ننوس : هنـا يا شبيك هبيبي .
من شافها صاح بيها :
ضـلـيل : صرت حبيبچ بنت الكلب .
ننوس : شيخنا تاج راسنا احبك .
ضـلـيل : افيشششششش جعل محد يحبني غيرچ .
ننوس : هبيبي تحبني ؟
ضـلـيل : نظر عيون هبيبچ .
مدت راسها اكثر صوته مبين خلته من الخوف
يگوم من مكانه عاط بيها بنفاذ صبر
_ بابا خليني اتزوهر جاي براحه طلعي راسچ .
ننوس : احچي وياك شبيك .
_ حدري هين يمي واحچي .
ننوس : هذا عصير بارد مو زين ماما ماتقبل .
_ يول لا توگعين علعلتي كلبي بوية .
ام ضـلـيل : ولي يول خلي يگعد يرتاح .
ننوس : معليچ .
ام ضـلـيل : شلون اخلي البنات يجيبوها
وانعنع ضلوعها بالعصا العرمة .
ننوس : باباااااااااا .
ضـلـيل : يمه دخيل محمد عوفيها زعطوط .
ننوس : بابا اكلهن هسة لو من اريد انام .
ضـلـيل : بحضني بس انزلي .
ننوس : اصبر .
ام ضـلـيل : شلعت گلبه هل بربوك ول نقشششش
اخذي اختچ عوفن الزلمة يگعد يرتاح شووووية .
غـاليـة : اركضي جيبيها لزگت سطريها راشدي
شنو من عناد عدهـا جيبيها يمي .
صعد ضـلـيل نص الدرج حتى ياخذها
هي من شافت نقش عرفت دزيتها تضربها طلعت راسها
واخذت العلاگة ونزلت تركض على ابوهـا
شالها ونزلها وامه تصيح
_ وين ما روح غـاليـة تفر عليَّ .
راح شاهين وبيده علاگة ثانية قبل لا ينزل صحته
غـاليـة : هاي شنو بيدك شاهين ؟
وكفت وهوَ رجع خلاهـا بيدي وبتردد نطق
_ جنت طالع اكلت برا وصوتوا گدامي انتِ ونقش .
فتحتها طلعت مواعين اثنين كباب ومشاوي وببسي
غـاليـة : هسة گالت اريد اكل محظوظة اجه اكلچ .
نقش : اذا بارد ما اريد .
شاهين : لا والله حار وگدامي جهزه اكلي زين .
فتحت المواعين تشكرت منه وراح
كعدت يمها اكلت قليل واخذتهن ونزلت
خلتهن بالثلاجة، شفت الساعة 11 خليتها
تجي هي وننوس اول ما فاتت بلغتني :
نقش : يمه عمو ضـلـيل مدري شبي معصب
وگال هسة هسسسسة ضروري تنزل امچ
عندي حجي وياها ما اريد تتأخر .
غـاليـة : ها شحچت العجوز دهر دهرها .
اريد اطلع لزمتني وسدت الباب وبخجل حجت
نقش : يمه يعني اكول لو تبدلين هاي الدشداشة
وألبسي من الجديدات وخلي عطر وانزلي .
ضربتها بخفة على راسها اريدها تبتعد ماتقبل
ركضت على كنتور سحبت دشداشة ماروني
وبقت لازمتها وتتوسل لبستها اول لبسه
واني اعدل بيها رشت عطر اجه نصه بعيني
دفعت ايدها وضربتها على ايدها
نقش : اعصابچ شيخة اعصابچ .
فتحت مرطب الشفه دفعتها وصحت
_ انجبي لچ هذا بي لون بس من انام اخلي .
_ بررروح جدوووو حلفتچ بعد خلي .
اخذت قليل واني انزل امشي اصبعي على شفتي
اول ما وصلت جوة صارت عمتي گدامي تشمشم
فرت شفايفها ما عاجبها الوضع
_ معطره اليوم الله يستر .
اريد اعبرها ماعندي حيل احچي كمشت ايدي
_ باجر مسافر نطلع ب10 نكمل البيت .
غـاليـة : لا يسمع احد ، تمام باجر .
حجيتها ومشيت منها دگيت الباب سمعت صوته صاح
_ منوووو ؟
غـاليـة : اني .
بقيت انتظر جوابة ماكو صوت
درت على امه منتظره مثلي
ام ضـلـيل : صدمتي الزلمة بس لا انجلط .
غـاليـة : هههههههههه .
رجعت دگيت الباب هسة غير يجاوب هم طالبني
ومسوي روحه مصدوم همست واخر مرة هاي
غـاليـة : ضـلـيل ادخل ؟
_ تعالي .
فكيت الباب ودخلت عيونه صارت على باب فهمته
يريدني بس اقفله رديته ومدري وين انطي
وجهي من عيونه ، واگف فاتح الكنتور يطلع
يشوفهن مرتبات مثل مايحب ، استند على طرف
الباب من گدام ورفع حاجبه بتعجب
غـاليـة : نقش گالت تريدني ؟
ضـلـيل : إنا اريدچ ؟ يمتى ما حجيت وياها .
عضيت شفايفي يا گاع ابلعيني
يمه اذا الزمچ يا مقش يا حقيرة
رضت عليه بعد شيخلصنا ، رفعت
حاجبي مثله وحجيت مستعجلة
غـاليـة : هاي نقش جذبت عليه
اعذرني اخاف أزعجتك اخذ راحتك مبين مشغول .
اريد اطلع وفزيت من سمعت صوته درّت وجهي
اشوفه، عيونه ذبلانة ينظر هيمان وضعه تخربط :
ضـلـيل : ويـن ويـن صبرررر .
بلع ريگه وهمس وصوته گوه يطلع يحير شنو يحچي
سوالف هووواي سوووالف عيونه ترويها :
غـاليـة : مو ما تريدني ؟
ضـلـيل : انا بكل وكت اريدچ يمتى اجتني غـاليـة ورديتها ؟
صار بين نارين يريد يحچي ويتراجع بس
عتب عنده عتب وقهر مني حاير واگف وحيران
رفع ايده وأشر على غرفة كلها من بدايتها لنهايتها
ضـلـيل : مفرغها الچ هوَّ انا يمتى ردت غيرچ ؟
اشر بيده وبلهفة يحاول يكبدها
بس ما يگدر بعد يكابر اكثر
ضـلـيل : تعالي تقربي غـاليـة .
تقربت بدون تردد صرت قريبة منه
شگد حارب روحه حتى يستمر ويرفض
مبادرته مايريد يتنازل خسر اول ما صرت گدامه
مال بجسمه لمستوى طولي وسحب شالي من راسي
طبع بوسة طويلة على طرف شفتي بس حس
اريد ابتعد سبقني وهوَ يحضني طوقني بكل قوته
بين ايده وراسه برگبتي يجر النفس وكأنه فاقد
النفس ورجع غمضت عيوني وجانت آول مرة
يحضني بيها وما ارفض قربه مني وانفر .
ابتعد مجبر عكس ارادته بس حتى ما اكره هل قرب
رجع مستند على باب الكنتور ، مد ايده وبأطراف
أصابعه رفع وجهي مبتسم : طاگ گلبي عليچ تدرين ؟
مشيت گعدت على سرير اعدل بشعري
وافر عيوني بغرفته مغيرات اماكن أثاثها
غـاليـة : شدتسوي ؟
ضـلـيل : مخليه لون على شفتچ .
غـاليـة : لا وين ، شدعوة لا تركز .
سد الكنتور وتعداني راح فتح الثاني
يريد يبين روحه ما مركز ابتسمت من نتر
_ دمشي عمري نرگيلة خليني اشربها .
غـاليـة : تأمر امر شيخهم .
_ دمشي عوفي حرگان الگلب لو ما تكدرين .
غـاليـة : اگدر تاج راسهم .
اول ما طلعت واشوف نقش تخلي الفحم على نرگيلة
بقيت بمكاني وامه تباوع علينا بعيونها
بس اجت نقش بيدها النرگيلة حچا ما تحملت
_ هاي اسم الله شني متفقات على زلمة اليوم
راضيات عليه لازم ، شدات فلوس نوم بحضنچ .
طلع سحبني من ايدي فوتني واخذ النرگيلة من نقش
ورجع طلع وگف بالباب ورفع ايده صاح بنص الصالة
ضـلـيل : وحگ الله اذا تصير مشكلة هل ليلة
محد يخلصكم مني خلووووووها تمرر على خيررر .
نقش تريد تطفر فوك وگفها وصاح
_ تعالي انتِ تعالي نقششش .
نزلت تمشي للغرفة دخل للغرفة فتح
الكنتور فتح جنطة بيها فلوس سلت
منها ثمانية حمر : تعالي يولو تستاهلين اكثر .
اخذتهن من إيده خجلانه طلعت تركض صعدت
قفل الباب وگعد على تخم يعدل بالفحم
ضـلـيل : حدري هين يمي ، واشمري الشال لا .
غـاليـة : لاا تهدد بس لا تهدد هذا شمرته .
ضـلـيل : شو خلّيني امتع عيوني بوجهچ تگربي .
گعدت بصفه جر نفس من النرگيلة يحچي
شي وافعاله تختلف ، ولا رفع وجهه ولا شافني
يسوي روحه صافن بالتلفزيون ، اريد امشي
لزم ايدي رجعني اقرب وبدون مقدمات سألني
_ ليش ما تجين يمي ابد ؟
_ ما احب افرض روحي على احد .
_ ماتحبين تفرضين روحچ لو ما تحبين تنزلين من نفسچ
وتكسرين العناد مالتچ هذا لشيب راسي وراس اهلي ؟
_ ماحب اجذب الثاني صح .
بكل فخر وكبرياء هيچ رجع ايده على تخم
وجر نفس اطول من النرگيلة وقبل لا ينفخ الدخان رد
ضـلـيل : اي انا هم هل مرة ما اجيت ولا نزلت من نفسي .
_ ألي يريد غـاليـة يجيها .
_ ليريد ضـلـيل يجي وغصباً عنو .
ضحكت وافتريت من النرگيله لزمت أكتافه استندت
عليها وتقدمت هو فاتح عيونه ضايع گعدت
على رجله بدون مقدمات حاوط خصري بيده
بعدني على نفس ضحكتي همست
_ صاير قوي شيخ ال ضليل عجبتني هل قوة .
ضـلـيل : غـاليـة لا نتعارك دخيل محمد .
غـاليـة : لعد لا تستفزني صير حباب .
ضـلـيل : عجل انتِ مو صار ساعة تحرگين بگلبي .
غـاليـة : شسويت ؟
ضـلـيل : خلينا نتفاهم صـار فترة اعلم روحي .
غـاليـة : على شنو تعلم روحك شيخ ال ضـلـيل .
ضـلـيل : تجين كل يومية وبعد وحگ الله
لا اصيح ولا اسب ومن تصير مشكلة
نحلها بهذا صخام البين الهدوء .
رفعت راسي ضحكت من كل گلبي وهوَ
يضحك على ضحكتي طوقت رگبته بيدي ورديت
غـاليـة : ههههههههه شيخ ضـلـيل بعد ما يصيح
ولا يسب ويحل المشاكل بهدوء مستحيل .
ضـلـيل : الخاطرچ وبس وياچ ، برا معليچ انا شيخ
وصوتي عالي قابل احچي ناعم مثل النثايه .
دخلت اصابعي بين شعره رجع
راسه مرتاح وبعده يستمع
غـاليـة : وبعد على شنو علمت روحك .
ضـلـيل : تجين يومية قبلتي ؟
رفع راسه ثبت وجهي بيده ابتسم بقهر
_ ول ومحمد هضيمة انا صاحب الراي
جدام العالم وشيوخ معگله عليها العتب تاخذ برايي
وهنا انتظر رأي بنت ذياب تتنازل وتجيني لو لا وتتعزز .
عدلت حاجبة بأصبعي وبست عيونه
ظل مغمض صفنت بوجهه واجه السؤال على بالي
غـاليـة : اذا بيوم اشرد منك وبعد ما تلگاني شتسوين ؟
ظل على نفس وضعه مرجع راسه على تخم
ومغمض عيونه ، بقيت انتظر الجواب الى
ان مليت ردت ارجع اكرره قاطع كلامي من نهض
وسحب النرگيلة جر نفس منها ودار وجهه عيونه
صايرة دم من العصبية ابتسم عكس البركان بداخله
نفخ الدخان بوجهي ورد بكل برود
_ سويها حتى تعرفين الجواب .
عافها على صفحة واخذني من ايدي
ضـلـيل : عوفچ من هل سوالف وتعالي يمي .
فتح لحاف ونام مد ايده طبطب عليها
_ تعالي انام عندي سفر باجر .
_ تتأخر ؟
_ يومين اربعة .
دخلت بفراشة بعد ايام طويلة نمت على ايده
ودرت وجهي حضني من ظهري واخذ مساحته
باس رگبتي وابتعد بسرعة
ضـلـيل : غـاليـة .
_ اممممم .
_ انتِ تدرين لو تردين روحي ما اعزهـا عليچ ؟
_ ليش ؟
_ الله زرع محبتچ بكلبي حتى خلفتي
سنين انتظرها تزوجت اثنين وما صارت بس منچ .
درت وجهي عليه رفع خصلات شعري
من عيوني وبكل جدية يسألني مقهور
_ يمتى تحبيني ؟
_ اندري .
ضحك وهوَ يتلمس بوجهي وصافن
_ اغدي فداء لوجهچ .
_ اسمعني .
_ انتِ اسمعيني وحگ الله قابل شريد منچ
بس كل يوم تعالي هين اگعد وياچ نسولف
وانام وكلمة زلمة اخذيها مني ما اتگرب منچ
اي شي تكرهينو ما اسوي .
رفعت اصابع اثنين اشرت بيهن واضحك
_ عندك اثنين اثنين غيرررري شلون كل يوم اجي .
_ انتِ شيخة ال ضـلـيل اتناقش وياچ على كلشي لازم .
_ ما اريد اصير شيخة ال ضـلـيل .
_ مو بكيفچ انا اختار هنا .
ما سمع جوابي غمضت عيوني وغفيت
حسيت بي الصبح يبدل فتحت عفاف الباب
بدون مـا يندگ من شافتني همست
_ شعجب تريد تموت واجت .
ضـلـيل : اكفخچ من الصبح ، امشي جيبي الحذاء .
طلعت ورجعت تسأل على لون ودلال فاتت
تفهم بي على جنطة ملابسه هوَ ساكت عبالك
فاصل منهن بس كملن طلعت يجهزن ريوگ
رفعت نفسي وهمست : صباح الخير شيخهم .
ضـلـيل : هلا بشيخة النسوان .
جريت الشال عفاف فاتت بيدهـا استكان چاي
اخذه من ايدها وطلع من الغرفة اريد اطلع ذبت سمها
_ ها تردين تموتين اجيتي تذكرتي عندچ زلمة لو مصلحة ؟
غـاليـة : اشتاقلي واشتاقيتلوووو .
حجيتها وطلعت بسرعة صعدت فوك البنات نايمات
گعدت صليت وهو ربع ساعة وطلع ، صاحت امه
من جوا نزلت الها لابسه عباتي ، طلعنا بسرعة
بالسيارة وصلنا واخذتني سوينا مكاتبه
وتوقيع وبصمة بقيت ساعتين وكمل كلشي
تمار كله قوة بس يريد يخلص من عدنا
طلعنا والأوراق بيدي بس تخركت السيارة صاحت
_ باجر من الصبح اطلعي انتِ وبناتچ .
ضحكت ودرت وجهي تمار شافني بالمرايا صاح
_ تضحكين بنت ذياب .
غـاليـة : اضحك عليكم .
_ المعنى .
غـاليـة : ههههههه ماكو شي شبيك كمل طريقك .
صايرة ذكية براسي تريد تورطني ويه ضـلـيل
اخذت البيت وما انفذ خطتها احرگ گلبها
ما راح تگدر تحچي گدام ضـلـيل لان تعرف
يتخبل عليها اذا يصير عنده علم بخطتها
وتريد تشردني منه هي وابنها اخوو الحقير .
الطريق كله اكلت راسي شلون اروح وشلون اسكت
البنات وبعد لو شيصير بينا ما نرجع ووووووو
الحد ما دخلنا منطقتنا واني اقرا بالأوراق شهگت
من صاح تمار : يممممممه ضـلـيل هذا ضـلـيل بالباب .
وگفت السيارة رفعت عيوني وياريت ميته ولا اشوفه
واگف بالباب وشاهين وراه يهدي بي قابض ايده
اثنينهم ونظراته تتوعد ، جمدت اطرافي رجلي وايدي
والأوراق كلها وگعت مني دخيلك وبي شسويت بنفسي
جنيت على روحي والله جنيت على نفسي .
يتبع ..
الفصل التالي اضغط هنا
يتبع.. (رواية الموروث نصل حاد) اضغط على اسم الرواية لتجد الفهرس كاملاً بجميع الفصول.