رواية علشان ماليش غيرك الفصل الخامس عشر 15 – بقلم ميمي عوالي

الفصل الخامس عشر

عفاف : عاوزين نشوف سلافة عشان مش هنقعد كتير ، عشان لسه هنعمل عندى حنة لعمار

سميحة بضحكة : الله ….. انا بحب اوى الحنة الرجالى ، طب كان كل واحد عمل حنته فى يوم عشان احضر دى و دى

عفاف بمرح : احنا فيها ، سيبك من سلافة و تعالى معانا

سميحة بضحك : دى كانت سلافة تولع فيا

عفاف : بعد الشر على حضرتك ، بس ودينا ليها بقى عشان مانتأخرش

سميحة قامت و اخدتهم معاها ، وديتهم عند سلافة ، و اللى رمت كلام عمار كله فى الارض ، و كانت بترقص وسط اصحابها هى و الاء و هى بتضحك بشدة و لابسة حاجة زى فستان قصير جدا من غير كتاف و ضهرها عريان ، و الاء لابسة زيها بالظبط

عفاف اول ما شافتها اتضايقت انها ما سمعتش كلام عمار ، بس ما علقتش و راحت سلمت عليها هى و خديجة

الاء شدت خديجة و حاولت تفكلها الطرحة و هى بتقول لها : انبسطي لك شوية و سيبك من ابن عمك المعقد ده

خديجة شدت نفسها منها و عفاف وطت على ودن سلافة قالت لها : انا ما بتدخلش بينك انتى و عمار نهائى : بس كنت اتمنى انك لما تلاقى صحبتك بتشتم الراجل اللى هتبقى على ذمته بكرة ، انى اشوفك بتوقفيها عند حدها

عفاف و خديجة سابوها و مشيوا على طول  ولما سميحة حاولت تمسك فيهم شوية عفاف رفضت و قالت لها : معلش اعذرينا بقى ، بس ليا عندك رجاء يا طنط

سميحة : قولى يا عفاف ماتتكسفيش .. محتاجة حاجة

عفاف : محتاجاكى تفهمى سلافة ، ان عمار ابقى لها من الاء ، انا ما رضيتش اتكلم مع الاء عشان ما اعملش مشكلة فى يوم زى ده

سميحة : ايه اللى حصل

عفاف حكتلها اللى حصل باختصار ، و بعدين قالت لها ، انا اخويا مش معقد يا طنط ، هو بس راجل بيغير على اهل بيته زى كل راجل شرقى بجد  ، و زى ما هو قال لها و فهمها ، و كنت اتمنى ان سلافة هى اللى ترد عليها

سميحة بمهادنة : ماتزعليش يا عفاف ، هى بس تلاقيها ما اخدتش بالها من الكلمة بسبب الدوشة ، و اكيد الاء بتهزر برضة ماتقصدش ، و ان كان على الاء ، فانا اللى هتكلم معاها

خديجة و عفاف نزلوا لعمار اللى اتفاجئ انهم نزلوا باسرع مما توقع فقال لهم : ايه ده ، ده انا قلت هتلطع حبة حلوين على ما تنزلوا

عفاف بمرح : مانت صعبت علينا ، و قلنا كمان عشان نلحق احنا كمان ننبسط

بعد ما عمار طلع بالعربية سأل عفاف و قال لها : سلافة سمعت الكلام اللى قلته واللا برضة مشت اللى فى دماغها

عفاف بصت له و قالت بزهق : يوووه يا عمار ..  بقول لك ايه ، ما تعدى الليلة و بلاش نكد على الفاضى

عمار : يعنى ما سمعتش الكلام

خديجة و هى بتحاول تهدى الموقف : الوقت كان ضيق برضة يا عمار ، و ماكانتش هتلحق تجيب حاجة تانية ، و فعلا كلهم فوق بنات و ستات و اهم بيهيصوا و فرحانين بيها

عمار ما اتكلمش و اخدهم وصلهم ، لحد البيت ، و لما لقوه مانزلش معاهم ، عفاف قالت له : انت مش نازل ، ده الناس زمانها جاية

عمار : اطلعوا انتوا و انا هحصلكم على طول

بعد ما طلعوا ، عمار اتصل على سلافة ، بس طبعا ما سمعتش بسبب الدوشة ، فكلم سميحة ، و اللى ردت عليه ببهجة ، و قالت : اهلا يا عريس ، الف مبروك يا حبيبى

عمار : الله يبارك فى حضرتك يا طنط ، معلش انا كلمت سلافة و مارديتش ، اكيد مش سامعة التليفون من الدوشة ، ممكن تخليها ترد عليا

سميحة : طب استنى يا حبيبى هندهالك ترد عليك

عمار كان سامع دوشة و ضحك و تسقيف عالى جدا ، و سميحة عمالة تنده على سلافة ، و بعد شوية لقى الدوشة بتبعد  و سلافة بترد عليه و بتقول : ايوة يا عمار

عمار باختصار : لابسة ايه

سلافة بنرفزة : انت بتكلمنى عشان تقوللى لابسة ايه ، هكون لابسة ايه يعنى ، لابسة فستان يا عمار

عمار : افتحى الكاميرا

سلافة بلخبطة : لا طبعا ، كاميرة ايه اللى افتحها

عمار : يعنى كسرتى كلامى

سلافة : انت ليه مصمم تكسر فرحتى و تتحكم فيا بالشكل ده ، انا مابحبش الخنقة دى

عمار : و انا من امتى خنقتك و اللا اتحكمت فيكى ، انا على طول كل اللى انتى عاوزاه بمشيهولك علشان ما ازعلكيش ، و انتى اهو … اول مرة اقول لك على حاجة و ما تعمليهاش

سلافة : اصلها يعنى بصراحة كده تحكمات مالهاش اى لازمة غير انك تمشى كلامك و خلاص

عمار سكت شوية ، و بعدين قال لها بجمود شديد : تمام ، طالما بقى انى بتحكم و خلاص ، يبقى تحكمات بتحكمات يا سلافة …. لو ما غيرتيش حالا القرف اللى انتى لابساه ، و لبستى حاجة محترمة ، تكملى بيها اليوم ، اعتبرى ان الفرح بكرة ملغى ، و لو ما بعتيليش صورتك بعد ما تغيرى هدومك فى ظرف نص ساعة بالكتير و اظن انها كفاية انك تشتكى لالاء و غيرها  قبل ما تغيرى هدومك ، هطلع حالا على الاوتيل الغى كل حاجة و تنسى تماما انك فى يوم من الايام عرفتى واحد كان اسمه عمار ، و قفل التليفون و فضل فى عربيته

سلافة انصدمت ، من اللى حصل ، لما مشيت من عند عفاف ، كانت زعلانه بس كانت ناوية تنفذ له كلامه ، لكن الاء قعدت تزعق لها و تقول لها : انتى هبلة .. لو مشيتيله اللى هو عاوزة ، هيفضل طول عمره عاملك ممسحة تحت رجله ، انتى لسه فى بيت باباكى ، و لسه مش على ذمته عشان يتحكم فيكى كده

سلافة : بس هيزعل منى و ممكن يحصل مشكلة

الاء : انتى هبلة ، مشكلة ايه يعنى اللى هتحصل ، ده انتو فرحكم بكرة يا هبلة

سلافة بتردد : هيزعل منى يا الاء

الاء باستخفاف : و ايه يعنى ، هيزعل له شوية ، و بعد كده اول ما هيلاقيكى فى حضنه كل الزعل هيروح و هيتبخر

سلافة كانت قاعدة بتعيط لحد ما مامتها  و الاء دخلوا عليها فاتخضوا من شكلها ، و لما سألتها سلافة حكت لها اللى حصل باختصار فسميحة قالت لها بعتاب : انتى غلطانة ، المفروض كنتى سمعتى كلامة من الاول

الاء باعتراض : هو لسه مالوش حكم عليها يا طنط عشان يمنعها من حاجة هى عاوزاها

ميحة بصت لالاء و قالت لها : معلش يا الاء ، سيبينى مع سلافة شوية لوحدنا ، و ما تجيبيش سيرة برة باى حاجة

الاء سابتهم و هى متضايقة ، و اول ما خرجت سميحة قالت لسلافة : عارفة لو انتى عملتى اللى عملتيه ده بشورتك و من دماغك ، كنت قلت لك سيبيه يخبط دماغه فى الحيط ، لكن انتى عارضتيه عشان الاء زنت على دماغك بده ، و اهى اتسببتلك فى مشكلة كبيرة معاه

هااه ، هتسيبيه يروح يلغى الفرح فعلا ، و اللا هتستهدى بالله و تعمليله اللى هو قال لك عليه

سلافة : و لما يركبنى و يدلدل رجليه زى ما الاء قالت

سميحة : الاء من يوم طلاقها و هى الغل ماليها من ناحية الرجالة كلها ، بلاش تخربى على نفسك زيها ، لو ما بتحبيهوش و لا شايفة ان هو ده الراجل اللى هيسعدك سيبيه ، و ادينا لسه على البر

انما لو بتحبيه نفذيله رغبته … حتى و لو من باب انك تكسبى رضاه و خصوصا ان اللى عاوزه ده دليل انه فعلا بيحبك و بيغير عليكى ، يعنى ماهياش تحكمات و خلاص زى ما الاء بتحاول تفهمك

عمار فضل قاعد فى عربيته لحد ما جاله اشعار برسالة من تليفون سلافة ، لما فتحه … لقاها لابسة الفستان اللى كانت لابساه يوم ما جت تتعرف على عفاف اول مرة و كانت عينها حمرا جدا من اثر العياط

عمار اتنهد و بعت قال لها : صدقينى ما قصدتش ازعلك ابدا فى يوم زى ده ، بس مع الوقت هتعرفى انى عملت كده عشان بحبك ، بس كده انا هحبك اكتر ، روحى ياللا افرحى و انبسطى

عند عفاف ، عملت هيصة و اغانى و فرحة عشان عمار ، و لانه كان محبوب وسط جيرانه ، كلهم تقريبا حضروا الحنة و احتفلوا بيه

يوم الفرح عدى ما بين انشغال الكل ، سلافة كانت فى البيوتى سنتر ، و معاها كام واحدة من صاحباتها ، بس طبعا الاء كانت متزعمة الليلة كلها ، بس لقوا سميحة رايحالهم و معاها كيس زى بتاع البدل و اخدت سلافة على جنب و قالت لها : انا رحت الاتيلية جبت لك الشال بتاع الفستان

سلافة بتنهيدة و زعل : الفستان شكله هيبوظ

سميحة : لا مش هيبوظ ، و ماتنسيش انه اصلا كان معمول عشانه لولا ان الاء كالعادة اقنعتك ان من غيره احسن ، استهدى بالله و مش عاوزين مشاكل ، عمار كان زعلان انك لابسة عريان قدام الستات ، ما بالك بقى بضهر الفستان اللى مبين ضهرك كله و ياريتك مسيبة شعرك يداريه ده انتى كمان رفعاه كله لفوق ، و الفرح مليان رجالة اشكال و الوان

و كمان انا عاوزاكى  النهاردة بالذات تسدى ودانك عن اى كلمة ممكن تقولهالك الاء يا سلافة ، عشان ربنا يعدى اليوم على خير و تفرحى و تتهنى يا بنتى

انا هرجع البيت اخد شاور و اجيب حاجتى و هرجعلك ، و ياريت ماتجيبيش سيرة الشال قدام اى حد لحد اما تلبسيه يا سلافة … مفهوم

عمار رجع من عند الكوافير الرجالى دخل اخد دش و لبس وسط الزغاريد و الفرحة من عفاف و خديجة اللى فصلت قلبها تماما عنها و هى بتعد الدقايق و الثوانى عشان اليوم يخلص بسرعة

ابراهيم كان بيساعد عمار فى اللبس ، و اول ما خلص و خرج عفاف و خديجة قابلوه بالزغاريد و اول ماشافهم قال لهم بابتسامة : عاوزكم طول الفرح جنبى ماتسيبونيش و لا تبعدوا عنى ، مش ناقص حد يخطفكم النهاردة بالذات و انتو حلوين كده

و بعدين بص لخديجة و قال لها : اعملى حسابك هتبقى معايا فى العربية

جنى : انا كمان عاوزة ابقى معاك فى العربية

ابراهيم : و تسيبى عربية بابا اللى مزوقهالك و ماليهالك انتى و حلا بلالين

جنى : عاوزة اركب عربية العروسة

عمار : سيب جنى و حلا معايا فى عربيتى على ما نوصل البيوتى سنتر ، و ابقى خدهم بعد كده فى عربيتك

عفاف : هو انت اللى هتسوق عربيتك بنفسك

عمار : لحد البيوتى سنتر بس ، بعد كده سالم صأحبى هو اللى هيسوق

فى البيوتى سنتر اول ما سلافة لبست الفستان و عليه الشال بتاعه و اللى كان من  الحرير التركى و الاورجانزا و كان له مشابك بتثبته فى الفستان و خرجت عشان تكمل الميكب بتاعها ، الاء وقتها كانت بتعمل هى كمان الميكب بتاعها ، فشافتها فى المراية ، و اول ماشافتها اتدورت بسرعة و قالت لها بدهشة : انتى ايه القرف اللى انتى عاملاه فى روحك ده

سميحة قالت بحدة : الاء .. لو سمحتى .. الفستان بالشال بتاعه تحفة و رقيق و محترم ، و جوزها مش هيسمح بغير كده ، ممكن بقى تهدى على نفسك كده شوية عشان مش عاوزين مشاكل

الاء بصت لسلافة بغيظ و عينها بتطلع شرار و التفتت بحدة عشان تكمل الميكب بتاعها

سلافة قعدت تعمل الميكب بتاعها هى كمان بس كان باين عليها الزعل ، فالبنت اللى هتعمل لها الميكب قالت لها : على فكرة فستانك تحفة و الشال زود جماله ، و انتى زى القمر و بعد ما نخلص الميكب هتبقى قمرين ، سيبك من اى حد الليلة دى و ما تفكريش غير فى الفرحة و بس

سلافة اندمجت مع كلام الميكب ارتست اللى كانت عمالة تهزر و تضحك معاها و نسيت معاها كل اللى حصل

عمار و اللى معاه وصلوا البيوتى سنتر ، عفاف طلعت قبله عشان تشوف سلافة خلصت واللا لا ، و اول ما شافتها و لقت انها جهزت خلاص ، قعدت تزغرد و تسمى و تكبر ، و راحت باستها برقة و باركتلها و قالت لها ان عمار هيطلع ياخدها

عمار لما راح لها ، اول ما شافها ابتسم و راح باس ايدها و اخدها و نزلوا عشان يركبوا العربية

بعد ما ركبها العربية و بيلف عشان يركب اتفاجئ ان الاء ركبت مكان ما كانت خديجة هتركب ، عمار راح ناحيتها و كان هينزل الاء من العربية ، بس خديجة اتحايلت عليه ما يحرجهاش عشان خاطر سلافة ، و راحت هى ركبت مع عفاف

عفاف كانت متغاظة جدا من الاء من ساعة الحنة ، بس خديجة قالت لها … فوتى بقى يا عفاف ، بلاش احنا بالذات نتسبب فى اى مشاكل الليلة دى

فى عربية عمار …. الاء قالت بشبه سخرية  : مبروك يا عرسان

عمار : عقبالك يا الاء ، اومال انتى عربيتك فين

الاء : ما جيتش بيها

عمار : اومال هتروحى ازاى

الاء بسماجة : لا ، ما انتو هتوصلونى فى سكتكم بعد الفرح

عمار و هو بيهز رأسه : نواااااصلك ، امممم ، طب ابقى اعملى حسابك تروحى مع طنط سميحة ، لاننا مش هينفع نوصلك

الاء : و ليه يعنى ، ما انا اصلا هبقى فى سكتكم

عمار : معلش ، اريحلك … و اريحلنا

طول الفرح كانت سلافة بترقص وسط اصحابها بسعادة ، و عمار سايبها تفرح و تنبسط ، و شوية كان يرقص معاها ، و شوية مع عفاف و خديجة ، و شوية مع اصحابه اللى كانوا عاملين له هيصة جامدة جدا

و جه وقت كتب الكتاب ، الوقت اللى عمار حط ايده فى ايد سليمان ابو سلافة ، فى الوقت ده خديجة ما قدرتش تتحمل تفضل فى القاعة و حست انها بتتخنق ، فانسحبت من القاعة بهدوء من غير ما حد يحس بيها ، و خرجت برة فى التراس

كانت مركزة كل مجهودها ان دموعها ما تنزلش عشان ما حدش يلاحظ ده ، قعدت تعمل تمارين الشهيق و الزفير عشان تسيطر على اعصابها و قرب ما ابتدت تحس انها فعلا فى بداية استعادة سيطرتها دى لقت ايد بتتحط على كتفها و بتقول لها بتريقة : اد كده بتحبيه و مش قادرة تشوفيه بيروح لغيرك … تؤتؤتؤ … قلبى معاكى

خديجة رسمت معالم عدم الفهم على وشها و التفتت وراها لقت الاء بتبصلها بقرف ، فخديجة قالت لها : انتى ايه الكلام الفارغ اللى انتى بتقوليه ده

الاء و هى بتهز اكتافها : انا ما بقولش كلام فارغ ، دى الحقيقة ، و اللا ايه اللى خلاكى تتسحبى و تبعدى لما جم يكتبوا الكتاب ، غير انك يا عينى مش قادرة تعيشى معاهم اللحظة

خديجة و هى بتمثل القوة : طب لو هنفترض ان كلامك ده مظبوط ، ياترى بقى انتى كمان جيتى هنا عشان برضة مش قادرة تشوفيه مع غيرك

الاء اتعدلت فى وقفتها و قالت بغضب : ايه الهبل اللى بتهبليه ده

خديجة : الحقيقة وصلة الهبل ابتدت من ساعة ما انتى ابتديتى تتكلمى ، و راحت متاخراها بايدها و مشيت بعد ما قالت لها : و بعد اذنك عشان فرح اخويا شغال

و سابتها و رجعت القاعة تانى ، لقتهم خلصوا كتب الكتاب ، و بيرقصوا مع بعض سلو ، و شوية و رجعوا قعدوا مكانهم ، و اول ما قعدوا مكانهم عمار شاور لخديجة و عفاف يروحوا له ، و اول ما راحوا له عمار قال لخديجة : انتى اختفيتى روحتى فين

خديجة : حسيت ان الجو اتخنق فجأة فطلعت التراس اشم نفسى و رجعت على طول

عمار : طب خليكى جنبى ما تتحركيش

طول الفرح كانت سلافة ترقص مع عمار او مع اصحابها ، لكن وقت ما كان العرسان بيقعدوا مكانهم ، كان عمار يشاور لخديجة و عفاف انهم يروحوا يقفوا جنبه ، و الحكاية دى كانت طول الفرح على نفس النظام ، و ده كان مضايق سلافة جدا انه مهتم بحد تانى غيرها ، صحيح طول ما هم قاعدين كان ماسك ايدها و مغرقها كلام حب و غزل ، لكن كانت متضايقة من مشاركة اخته و خديجة لاهتمامه ده

بعد ما الفرح خلص عمار اخد سلافة بعد ما ودعوا المدعوين و شكروهم  و وصلها لحد العربية و ركبها ، و قبل ما يروح يركب لمح الاء راحت وقفت جنب شباك سلافة و وطت عليها وشوشتها بحاجة فى ودنها خلى ملامح سلافة اتغيرت ، كان نفسه يعرف قالت لها ايه ، بس طبعا مش وقته ، و بعد كده راحت وقفت قدام العربية بتاعتهم و هى عمالة بتبص لسلافة نظرة زعل على غضب ، فعمار راح لحماته و طلب منها انهم ياخدوا الاء فى عربيتهم ، عشان يوصلوها ، ونده على خديجة ركبها معاه ، و ركب جنب سلافة ، و ابتدوا يزفوهم لحد البيت

اول ما وصلوا عند البيت ، عملولهم زفة جميلة جدا لحد ما وصلوهم لباب الشقة و سلموا عليهم و سابوهم عشان يبتدوا حياتهم الجديدة مع بعض

يا ترى آلاء وشوشت سلافة قالت لها ايه .. ده اللى هنعرفه الفصل الجاى