رواية تاني مجرة على اليمين الفصل الرابع 4 – بقلم ميمي عوالي

البارت الرابع

الكوماندا لمسعد : يبقى عاوزك تسمعني كويس و تفهم كل كلمة هقولهالك و تنفذها بالحرف الواحد ، و تعمل حسابك .. ان لو حرف واحد من اللي هقولهولك ده طلع برة ، اني زي ماعملتك ريس للعمال .. مش هخليك حتى تنفع انك تنضف صوامع التقاوى

مسعد برهبة : رقبتي جنابك

الكوماندا بشر : جمعة

مسعد : ماله

الكوماندا : خاين ، و عاوز يعمل ثو/رة على النظ/ام و يستولى على كوكب بكر و ياكل خيره لوحده

مسعد باستغراب : معقول الكلام ده

الكوماندا بحدة : هو انا هكدب عليك و اللا ايه

مسعد بخضة : العفو جنابك ، انا بس اتفاجئت بالكلام مش اكتر ، بس اقصد ان اكيد شيوخ القبايل مش هيسكتوا

الكوماندا : شيوخ القبايل نايمين فى العسل ومش دريانين باللى بيحصل حواليهم

مسعد : طب هو يعني بس ازاى هيستولى على الكوكب

الكوماندا : المزرعة اللى عاملها دى و قافلها على اللي فيها و ماحدش قادر يعرف هو بيعمل ايه جوة ، احنا عرفنا انه بيصنع سل/اح خط/يييير فى قلب المزرعة و ناوي يها/جمنا بيه و يصطادنا كلنا ، و احنا لازم نصطاده قبل ما يصطادنا

مسعد : هي وصلت لكده ، ده كده الخطر مش على المصنع بس ، ده الخطر على الكوكب كله

طب و ايه العمل يا جناب الكوماندا

الكوماندا : محتاجبن حد من جوة يبقى عيننا يا مسعد ، انا لما اختارتك انت بالذات عشان تبقى دراعي اليمين ، اختارتك لاني عارف ولائك ليا و لكوكب بكر كله ، و كمان عارف ان ليك علاقة حلوة مع جمعة

مسعد بغضب : و لا عاوز اعرفه تاني بعد كده

الكوماندا : لأ .. انا بس اللى اقول تعمل ايه و ماتعملش ايه ، انا بس اللى احددلك خطواتك .. انت فاهم .. اياك تتصرف اى تصرف من غير ماترجعلي

مسعد بخنوع : اللى تؤمر بيه جنابك انا هنفذه بالحرف الواحد

الكوماندا : تمام ، عرفت انك هتعدي عليه بعد الشغل عشان موضوع التربية بتاعة البهلوان

مسعد : لو عاوزني اروح هروح مش عاوزني اروح مش هروح

الكوماندا بابتسامة و هو بيطبطب على كتف مسعد بتشجيع : هتروح ، و هتشتكيله من ضيق المعايش ، و ان عيالك طلباتهم بتكتر كل يوم عن اللى قبله ، وانك بتدور على اى شغل جنب المصنع عشان تقدر تلاحق على طلباتهم

مسعد بابتسامة : يعني أطلب منه يشغلني معاه فى المزرعة

الكوماندا : بالظبط

مسعد بتفكير : طب لو قاللي ان موضوع التربية ده هيساعدني

الكوماندا : قول له على ماتبتدي الطيور تبيض و تنتج

مسعد : تمام سعادتك

الكوماندا : خلاص روح انت ، و عاوز اسمع منك بكرة اخبار كويسة ، عاوزك تبقى جوة المزرعة فى اسرع وقت ممكن

رامي و وائل راحوا جابوا عينة العلف من الفابريكان و وصلوا عند المزرعة بتاعة جمعة ، و بلغوا الامن برة انهم عاوزين يقابلوا جمعة اللى خرجلهم و فهم من عينيهم ان فى حاجة وراهم

خلاهم سلموا أجهزتهم عند البوابة و أخدهم للمكان الامن و قال : مالكم ، و ايه اللى رجعكم تاني

رامي : الكوماندا امرنا اننا نروح للفابريكان نجيبلك منهم عينة للعلف و نجيبهالك على هنا

جمعة بترقب : و بعدين

رامي : واحنا بنجيب العينة .. لاحظنا حاجة فى العبوات

جمعة : حاجة ايه

وائل : الغلاف بتاع العبوة فيه كاميرات صغيرة

جمعة ضحك اوي و قال : والله عفارم عليكم انكم اخدتوا بالكم

رامي : طب و الحل ، العينات موجودة برة فى المكوك ، هندخلها و اللا نعمل ايه

جمعة بابتسامة خبيثة : انا اللى هعمل .. تعالوا معايا

جمعة خرج معاهم و اول ما فتحوا فوهة المكوك جمعة شاور لاتنين من العمال اللى عنده و قال لهم : خدوا العبوات دى و فضوها حالا على سفح الجبل الاخضر عشان نقدر نجمع اكبر عدد من طيور البهلوان عشان نوزعهم على المربيين الجداد

وائل و رامي بصوا لبعض بصدمة و هم ماسكين نفسهم من الضحك ، و جمعة رجع اخدهم من تاني على جوة عند المكان الامن و قال لهم : مالاحظتوش حاجة غريبة عند الفابريكان

رامي : حاجة زى ايه

جمعة : اى حاجة ماكانتش موجودة قبل كده

وائل : انا لاحظت

جمعة : لاحظت ايه احكيلى

وائل : بوابة الكوكب بتاعهم كان لونها متغير

جمعة بانتباه : كان لونها ايه

وائل : مش لون معين اد ما هو زى شعاع النور

جمعة انتفض من مكانه و قال و هو بيطلع جهاز الاتصالات بتاعه من جيبه : واضح ان مابقاش فى وقت

رامي بقلق : فى ايه بس يا عم جمعة

جمعة اتكلم فى الجهاز بتاعه و قال : استعدوا كلكم .. البوابات اتفتحت ، قال جملته و قفل الجهاز و بص لرامي و وائل و قال : كنت فاكر ان لسه قدامنا وقت ، بس شكلها قربت اوى يا اولاد

وائل : قلقتنا يا عم جمعة .. ايه الحكاية

جمعة : الحكاية ان الارض اتدمرت

رامي : اتدمرت ازاى يعنى

جمعة : للاسف حرو/بهم اللى مابتنتهيش وصلت انهم ضربوا بعض باس/لحة دما/ر شامل ، اسل/حتهم دى قضت على الاخضر و اليابس ، مافضلش منهم غير زعماء الشر و بس ، اللى خططوا لكل ده و اللى كانوا عاملين حسابهم انهم يأمنوا روحهم من الهلاك

رامي : و بعدين

جمعة بسخرية : اتواصلوا مع حلفائهم فى المجرة بتاعتنا و قرروا انهم يغزوها و يستولوا عليها ، و كوكب بكر من اكتر الكواكب اللى طمعانين فيه بسبب موضوع الدهب

رامي بقلق : دي مصيبة ، طب و الحل يا عم بكر ، هنعمل ايه

جمعة : انا عاوزكم كلكم تبقوا عندي هنا بالليل

وائل : بس احنا ممكن نبقى متراقبين

جمعة مد ايده فى جيبه و طلع منها اساور شكلها حلو اوى بالوان مختلفة ، ادي لكل واحد فيهم اسورة و قاللهم البسوا دي ، و اول ما لبسوها اختفوا فجمعة قال لهم : ياللا اخلعوها

و لما خلعوها ظهروا من تاني وسط ذهولهم فجمعة قال لهم : الفابريكان معتقدين انهم متطورين عننا ، لكن احنا متطورين بمراحل اعلى بكتير بس من غير اعلان عشان نعرف نفاجئهم وقت المواجهة و نلخبطهم ، الاساور دى ماتستعملوهاش غير و انتم جايينلى هنا ، تلبسوها فى البيت قبل ماتخرجوا من الباب و اياكم حد يعرف

رامي : طب مسعد و بسنت هيعملوا ايه

جمعة : متشغلوش بالكم ، انا هعرف اتصرف

مسعد بعد الشعل راح هو و بسنت لجمعة زى ما كان متفق معاه و زى ما اتفق مع الكوماندا

و هو و بسنت ادوا اجهزة الاتصال بتاعه المصنع لجمعة من غير ماحد من المربيين اللى موجودين ماياخد باله ، و جمعة سلمها لحد كان معاه و التفت لمسعد و بسنت و قعد يتكلم معاهم و مع باقي اللى موجودين عن البهلوان و التربية ، و سلم الاقفاص اللى جهزت لكل الموجودين و عرفهم طريقة نصبها و تركيبها ، و قاللهم ان طيور التربية هتوصل لهم لحد عندهم خلال ايام قليلة مع كمية علف مناسبة

و بعد ما الناس انفضت ، فى الوقت ده رجع الشخص اللى معاه اجهزة الاتصال بتاعة بسنت و مسعد ، و جمعة رجعهالهم من تانى برضة فى السر فمسعد لبس الجهاز بتاعه و قرب من جمعة و ابتدى ينفذ اللى الكوماندا طلبه منه ، فبص لجمعة و قال له : انا كنت عاوزك فى حكاية كده يا عم جمعة

جمعة : حكاية ايه يا ترى

مسعد : انت عارف العيال قاطمين وسطي بطلباتهم ، و شغلي فى المصنع يادوب بياكلنا عيش حاف ، و كنت محتاج شغلانة جنب المصنع عشان اقدر اكفيهم

جمعة بص لمسعد بتمعن فمسعد هز له راسه ، فجمعة فهم ان دي اوامر الكوماندا ، فقال لمسعد : انت عاوز شغل معايا يا مسعد

مسعد : ياريت ياعم جمعة يبقى كتر خيرك

بسنت باستغراب : ده انت مافكرتش تعملها و انت مجرد ملاحظ ، تقوم تعملها لما تبقى ريس العمال و يوميتك تزيد بيضتين بحالهم

مسعد : و هم بيضتين و اللا خمسة حتى هيكفوا العيال يا بسنت ، مانتي عارفة اللى فيها

جمعة : ماشي يا مسعد من عينيا ، بس سيبني يومين كده

بسنت و مسعد اخدوا حاجتهم و مشيوا و هم فى الطريق سمعوا صوت جمعة بيقول فى اجهزة الاتصال : اول ما تروحوا بيوتكم و توضبوا حاجتكم ، كل واحد فيكم هيلاقي اسورة تحت عتبة باب بيته ، تاخدوها تخلوها معاكم و حذاري حد يعرف عنها حاجة ، و اول ما الساعة تيجي تمانية كل واحد يلبس الاسورة بتاعته من غير ماحد يكون شايفكم ، و اول ماهتلبسوها هتختفوا ، تجولي فورا على المزرعة و تدخلوا من الباب الخلفى .. و اوعوا حد يعرف حاجة عن الكلام ده ، و الاسورة تتلبس و انتو فى بيوتكم من قبل ماتخرجوا منها ، و اوعوا تتأخروا

بسنت و مسعد كانوا بيسمعوا بذهول لكن ركزوا فى كل كلمة و نفذوها بالحرف الواحد

و فى المعاد كل واحد وصل عند الباب الخلفى للمزرعة ، و اتفاجئوا انهم اول ما قربوا من باب المزرعة الباب اتفتح لحد ما عدوا منه و اتقفل فورا بعدها ، و سمعوا صوت جمعة بيقول لهم : ياللا ماتضيعوش وقت و اخلعوا الاساور

خلعوا الاساور و وصلوا لمكانهم الامن ، و اتفاجئوا ان المكان اتحول لقاعة كبيرة و فيها عدد كبير جدا من الشخصيات ، منهم اللى بيشتغل مع الكوماندا و منهم من المزرعة و منهم كتير من الاهالى العاديين

كانوا كلهم متجمعين و زى ما يكونوا منتظرين وصول حد معين ، و فعلا بعد وقت قليل ، دخل عليهم واحد ماكانش من اهالى بكر ، كان شكله غريب و ماحدش فيهم يعرفه ، جمعة طلع على منصة صغيرة و معاه الشخص ده و قال : بسم الله الرحمن الرحيم .. طبعا معظمكم مستغرب من التجمع ده و في الوقت ده بالذات ، لكن الاول احب اعرفكم على المهندس العبقري اللى قدم لنا كل التقدم اللى احنا فيه دلوقتي.. المهندس فضل

و احب ابلغكم ان للاسف اللى كنا بنحضر له من سنين و بنتمنى انه مايحصلش .. خلاص حصل

الارض بعد ما سكانها سلموا نفسهم للذكاء الاصطناعى و الالات اللى انقلبت عليهم و اتحكمت فيهم ، الشوية الباقيين قرروا انهم ينهوا العالم باللي فيه ، قضوا على بعض بالنو/وى , دم/روا الاخضر و اليابس ، و دلوقتي طمعانين فى المنفى اللى نفوا جدودنا فيه

طمعانين فى المجرة بتاعتنا بعد ماعمرناها و خضرناها و بقت مليانة خير ، و طبعا ماكانش ممكن يفكروا تفكير زى ده من غير ما يبقى لهم حليف

المهندس فضل : تقصد يبقى ليهم خاين وسطنا

جمعة : عندك حق ، و الحقيقة هو مش خاين واحد

فضل : اسمحولي اوضحلكم اننا لو ما دافعناش عن المجرة كلنا هنضيع

بسنت : تقصد الكوكب بتاعنا .. كوكب بكر

فضل : للاسف لا .. انا فعلا اقصد المجرة نفسها ، مبدأيا انا قدرت اوصل لحماية لكوكب بكر ، قدرت اخترع غلاف اقدر انشره على الكوكب ، ماحدش يقدر يخترقه

الموجودين بانبهار : عظيم .. هايل

جمعة : بس للاسف .. احنا مانقدرش نعتمد على الغلاف ده طول الوقت

بسنت : طب ليه

جمعة : عشان ماعندناش اكتفاء ذاتي يا بسنت ، ماينفعش نقفل على روحنا و نقول مالناش دعوة ، سكان الارض لو وصلولنا هنا هيدمروا المجرة بالكامل ، لانهم مش هيكتفوا بانهم وصلوا لمكان آمن ، لا ، اول ما هيبتدوا يتطمنوا انهم بقوا في امان ، كل تفكيرهم هيروح انهم لازم يستردوا سلطتهم من تاني، و سلطتهم عمرها ماكانت بطرق مشروعة ابدا

هنا مسعد اتكلم و قال : فعلا يا عم جمعة ، بدليل ان الكوماندا حاول يفهمني النهاردة انك بتصنع اسل/حة خطيرة عندك هنا فى المزرعة عشان تقدر تستولى على كوكب بكر كله

جمعة بابتسامة سخرية : نفس الخطط القديمة ماتغيرتش ، هو هيحاول يقنع اكبر عدد ممكن بالنظرية دى عشان يبقى ده الداعي انهم يهاجموا المزرعة و يستولوا عليها

بعض الموجودين : طب و العمل

فضل : العمل اننا نسبقهم بخطوة

بسنت : ازاى

فضل : انا دلوقتي قدرت انى اوصل لطريقة اقدر بيها اني امنع بوابات المجرة من انها تنفتح او تعدي حد منها

واحد من الموجودين : بس ابواب المجرة بالكامل تحت سيطرة اهل الارض مش سكان مجرتنا

فضل : فعلا ، بس زى ما اي باب بينفتح من برة ، ممكن يبقى له حاجة زي الترباس مثلا من جوة يخلي اللى برة مايقدرش يخترقه

رامي : مع احترامي لعلمك و كلامك ، بس ماتنساش ان اللى عمل البوابات دي منهم ، و يقدر يلاقي مدخل تاني ليهم

فضل : كلامك منطقى و خصوصا ان الريبوتات بتاعتهم فى منتهى الذكاء ، بس فى الاول والاخر ريبوت .. يعني بكل سهولة ممكن بفيروس صغير يهنج و يتد/مر

وائل : و انت تقدر تعمل كده

فضل : الحقيقة انا وصلت للفيروس فعلا ، بس عشان انشره على البيبان الخارجية للمجرة محتاج معايا حد يكون عارف كل مداخل و مخارج المجرة بالميللى

مسعد بحماس : بسنت

الكل بص لبسنت اللى قالت بمرح : اهو نومي و لعبي على السحاب جه بفايدة

فضل باهتمام : الكلام ده حقيقي؟ ، انا بتكلم عن المجرة بالكامل مش كوكب بكر بس

بسنت : ايوة ، انا طبعا حافظة كوكب بكر زي بيتنا ، بس كمان عارفة و حافظة بقية الكواكب ، لما كنا بنروحها عشان اي طلبية ، ماكنتش بنام ، كنت بلفها شبر شبر ، و كمان عندي صور و خرايط لكل المجرة

فضل بسعادة : برافو عليكي ، يبقى تعملي حسابك ان مهمتك كلها هتبقى معايا من هنا و رايح

بسنت بتردد : طب و المصنع

جمعة : هتفضلي فى المصنع ، و كل واحد فيكم هيفضل فى مكانه المعتاد ، لكن كل واحد فيكم هيعرف المهمة اللى هيتكلف بيها و يأديها

فضل : اهم حاجة لازم تعرفوها .. ان الفابريكان اكتر خونة موجودين على المجرة ، و لازم تاخدوا بالكم جدا و انتو بتتعاملوا مع اي حد فيهم

جمعة : و الاهم ، انهم منتشرين هنا على كوكب بكر ، و من غير ما نشوفهم ، و عشان كده مش عاوز حد فيكم ييجي هنا او يخرج من هنا قبل مايلبس الاسورة بتاعته ، و لو فى اي لحظة جالكم نداء او تنبيهات على الموجة بتاعتنا اوعوا حد يبان عليه

مسعد : طب و انا ارد على الكوماندا فى موضوع شغلي هنا اقول له ايه

جمعة : انا هفهمك ترد عليه تقول له ايه بالظبط

فضل : اهم حاجة احنا جمعناكم عشانها النهاردة ، و طبعا لو لاحظتوا انكم بالكامل موجودين فى قايمة المربيين الجداد لطير الفابريكان

كلهم بصوا لبعض وسط همهمة تاكيد لكلام فضل اللى كمل كلامه و قال : الطيور اللى هتوصل لكم بعد ماتحطوها فى الاقفاص بتاعتها ماتقفلوش عليها الابواب عشان تولف على اصحابها بسرعة ، و على ما اعتقد ان كلكم عارفين .. الطيور اللى تحت مستوى السحاب ده للمقايضة و الاكل ، انما اللى فوق السحاب ده ، محتاجين نشيله بعيد عن العينين لاننا هنحتاجه قريب

جمعة : المهندس فضل عاوز يبلغكم ان البيض اللى هيتحول للدهب هنحتاجه فى الس/لاح اللى هنمنع بيه اهل الارض من انهم يحتلوا المجرة

فضل : انا عملت جهاز ردع يحمي المجرة من اي هجوم ، و الجهاز ده للاسف مابيتشحنش غير بالدهب ، و عشان كده هنحتاج لمعظم كمية البيض المتحول للدهب

ده غير الجهاز اللى هيتزرع بمساعدة بسنت عند كل ابواب المجرة اللى ممكن اهل الارض يحاولوا يدخلولنا منها ، و ده كمان اساسه متصنع من الدهب لانه المعدن الوحيد اللى متوفر لنا هنا على كوكب بكر

رامي : طب احنا كده تفكيرنا كله منصب على مواجهة الهجوم اللى هييجي للمجرة من برة ، طب و الهجوم اللى ممكن نتعرض له من جوة ، هنعمل فيه ايه

جمعة ابتسم و قال : ده اهم جزء فى خطة المقاومة ، لكن الاول .. لازم نبطل جهاز التخفي اللى بيستعملوه وسطنا

مسعد : طب و ده هنعمله ازاي

فضل : لازم اوصل لجهاز من الاجهزة دي عشان اعرف و اتأكد من تصميمه و طريقة السيطرة عليه

مسعد : انتو كده بتصعبوها زيادة ، طب هنجيب الجهاز ده منين و ازاى

جمعة : الحقيقة يا مسعد .. احنا اعتمادنا الكلي عليك فى الحكاية دى

مسعد : رقبتي يا عم جمعة بس قوللي اعمل ايه

جمعة بابتسامة : هنعمل هجمة مرتدة على الكوماندا

مسعد بفضول : ازاي مش فاهم

جمعة : انا هفهمك كل حاجة ، بس المهم ان كل واحد يفهم دوره هيبقى ايه و ازاى بالظبط

تاني يوم مسعد دخل على الكوماندا و قال : صباح الخير جنابك

الكوماندا : ها يا مسعد سبع و اللا ضبع

مسعد بزعل : الحقيقة انا مكسوف منك جنابك و مش عارف اقوللك ايه

الكوماندا : احكيلي اللي حصل

مسعد : عملت زي ما جنابك أمرتني بالظبط ، و عم جمعة قاللي ماشي

الكوماندا : طب تمام اهو ، اومال فيه ايه بقى مالك

مسعد بامتعاض : فيه ان الشغلانة اللى هيشغلهالى .. انه عاوزني اساعد المربيين الجداد ، يعني برة المزرعة جنابك ، كده احنا مش هنقدر نعرف اللى بيحصل جوة بالظبط

مسعد سكت شوية و كل علامات الغيظ و الاحباط على وشه قبل ما يقول .. ااه يا ناري، الواحد من امبارح و هو نفسه لو يعتر في الجهاز بتاع الفابريكان اللى بيختفوا بيه ده ، كنت دخلت المزرعة جيبت قرارها

الكوماندا بتفكير : بس الاجهزة دى ممكن تعمل اشارة عند البوابات و ياخدوها منك زي اجهزة الاتصال كده

مسعد بتفكير : الاجهزة بتاعتنا هم اللى بيطلبوا مننا تسليمها لانهم عارفين انها معانا من الاساس ، لكن لو انا معايا الجهاز بتاع التخفى ده هيعرفوا منين اصلا عشان يطلبوها ، ثم ما اكيد الاجهزة دي ليها نظام يقفلها ، يعني ممكن ادخل المزرعة عادي و هي معايا فى جيبى و مقفولة ، و اول ما ادخل اشغلها و انطلق بقى بيها جوة و اعرف اللى عاوز اعرفه ، بس يا خسارة

الكوماندا بخبث : خسارة ايه

مسعد بتنهيدة حسرة : هنجيب الجهاز ده منين

الكوماندا بتفكير : روح على شغلك انت دلوقتي و نبقى نشوف الحكاية دى بعدين

مسعد خرج بعد ما قال بقلة حيلة و حسرة : اوامر جنابك

بعد ما مسعد خرج الكوماندا اتصل على عزرا اللى صورته بانت بعرض الحيطة و قال : خير يا كوماندا ، فيه جديد

الكوماندا : الحقيقة لا ، بس فى اقتراح

عزرا : اقتراح ايه .. اتكلم

الكوماندا : ايه رايك لو ادي اسورة تخفي لمسعد يدخل بيها المزرعة يجيبلنا سر الدهب

عزرا بحدة : انت اتجننت .. ازاى تخلي س/لاح زى ده فى ايد حد من ولاد بكر

الكوماندا : كل الطرق و الحيل اللى حاولنا نعملها عشان نعرف اللى بيحصل فشلت ، حتى الكاميرات اللى اتزرعت فى عبوات التقاوى ، انتهى بيها الحال مرمية على سفح الجبل ، و مادخلتش المزرعة من اصله

عزرا : ماينفعش سر زي ده يتعرف

الكوماندا : من ساعة الوليمة بتاعة الفقس مابقاش سر

عزرا : بس برضة مش فى ايديهم

الكوماندا : مسعد بقى زى الخاتم فى صباعي ، و لو فى اى لحظة لعب بديله ممكن نص/فيه هو و الجهاز

فى ثانية ، مسعد خلاص بقى فى ايدي و علاقته بجمعة تقدر تسهل له الدخول و الخروج من المزرعة فى اى وقت ، و زى ما قلتلك ولائه الكامل بقى ليا لوحدي

عزرا : و انت تضمن انه لو عرف انك معانا يفضل على ولائه ده

الكوماندا : ايوة

عزرا بتهد/يد : فشلك المرة دي فيه موتك و موته

الكوماندا بثقة : ماتقلقش .. اديني انت بس اشارة البداية و اديهم الاذن انهم يبعتولي اسورة عشانه

بعد ما اليوم انتهى فى المصنع .. بسنت رجعت بيتها استريحت شوية و لبست اسورة التخفى و راحت على المزرعة اللى كان فضل مستنيها هناك ، و ركبت معاه مكوك فضل مصنعه بطريقة ان هو كمان يبقى مخفى ، و ابتدت رحلتهم فى ذرع الفيروس اللى يبوظ ريبوتات اهل الارض و كمان يزرعوا اجهزة الحماية و الغلق عند كل الابواب اللى ممكن اهل الارض يحاولوا انهم يدخلوا المجرة منها ، لحد ما وصلوا عند اخر باب و اللى كان عند الفابريكان ، فبسنت لقت فضل بيزرع جهاز مختلف عن كل الاجهزة اللى اتزرعت عند الابواب التانية ، فسألته باستغراب و قالت : اشمعنى الجهاز ده مختلف عنهم كلهم

فضل : لان الجهاز ده بيخلى البوابة هنا لو ما اتفتحش عن طريقي انا … بيدمر اللى بيحاول يفتحها من ناحية الارض و من جوة المجرة كمان

بما ان الفابريكان هم الشريك الاوحد لسكان الارض اللي عاوزين يحتلونا ، يبقى لازم التامين عندهم يبقى اكتر من اى مكان تاني

بسنت : انت ادرى ، و عموما كده ما فاضلش غير باب كوكب بكر

فضل بابتسامة : لا ده هيبقى له تعامل خاص

بسنت : يعني هتاخدنى معاك و انت بتزرع الجهاز برضة و اللا انت عارف مكانه

فضل : الحقيقة انا عارف مكانه كويس ، بس انا عاوزك تودينى عند شط الثقب الاسود اللى بتحبى تتنططى فيها على السحاب

بسنت بمرح : ايه ، عاوز تلعب شوية

فضل ضحك جامد و قال : من ناحية هلعب ، فانا هلعب ، بس هاخدك تلعبي معايا مكافأة ليكي على تعبك معايا

بسنت : رغم اني مش مرتاحالك بعد الكلمتين دول بس ماشى .. ياللا بينا

فضل : اهم حاجة اما نوصل هناك .. قبل ماتخرجى من المكوك .. شغلى الاسورة على وضع الحماية

بسنت : ايه وضع الحماية ده

فضل : ده وضع يخليكى جوة مجال كهرومغناطيسى خاص بيكى الى جانب انك متخفية ، لاننا عند الثقب الاسود ممكن نتعرض اننا نحتك باى حد متخفى من الفابريكان و يكون موجود هناك

بسنت بقلق : يا خبر .. طب و بعدين

فضل : ماتقلقيش ، الحقل الكهرومغناطيسى اللى هيبقى حوالينا ده ، هيخلينا سامعين و شايفين كل حاجة حوالينا بوضوح من غير ما اى حد يقدر يسمعنا و لا يحس بينا

بسنت بسعادة : الله .. اهو هو ده اللعب اللى بصحيح