رواية الليل وسماه – الفصل الخام
الفصل الخامس
خجلت سما من رده عليها ! كان صعب عليها بالفعل تستوعب الموقف والمكان اللي هي فيه و .. والشخص اللي هي قاعدة معاه ، ولكنها قررت تفوق نفسها ف قالت : طب ، طب هتصرف إزاي ؟ أنا مكانش قصدي أدخلك في المشاكل دي كُلها بجد
ليل إتنهد وقال : هتعملي كشف طبي إنك أنسة ، بعدين تشوفي محامي كويس يرفعلك القضية إنك متجوزة من سنة ونص ولسه أنسة ، والأهم تقولي الحقيقة إن جوزك غير سوي أو ميوله مش طبيعية فهمتيني ؟
سما بتوتر : بس خايفة أوي أنا هبقى لوحدي في إجراءات القضية دي وكمان مش معايا فلوس المحامي دي كلها فلوس جابر
ليل بتفكير : طب بصي طالما دي قضية طلاق مش خُلع ، ف وارد تكسبيها و تاخدي مستحقاتك ف ممكن أقوملك محامي على حسابي وتبقي ترديها بعد ما الطالق يتم ؟
سما بتفكير : طب وإفرض القضية خسرت ؟
ليل بإبتسامة : معتقدش ، أصل معندوش أي مبرر يسيبك سنة ونص كدة .. كمان أنا بساعدك عشان حاسس إن ربنا وقعني في طريقك لآني لحد دلوقتي مش مستوعب أنا إتصرفت كدة ليه وحصل كُل دة إزاي
بصت سما بعيونها السماوية للجهة التانية ف قال ليل بصوت واطي : بس اللي متأكد منه إني عملت الصح
إبتسمتله سما بعدين قالت بهدوء : هتصل على صاحبتي منار ، زمانها قلقانة عليا
في بيت أبو سما •
جوزها جابر بغضب : ومسكت إيد راجل غريب ! وجريت معاه وأنا كُنت بكلمها بالذوق و بالأدب عشان تروح معايا
أبوها بغيظ : طب لما ترجعي يا سما ، هربيكي بنفسي من أول وجديد
جابر وهو بيخلص قهوته : لا يا عمي أنا مش عاوزك تربيها ، أصل سما حساسة جدا مش هتتحمل أي ضرب أو إهانة ، أنا هعرفها غلطها بيني وبينها زي أي إتنين متجوزين
أمها : ربنا يكملك بعقلك يابني ويهديها
جابر وهو بيقوم : أستأذن أنا بقى ، طبعا مش محتاج أوصيكم إنها لو ظهرت تبلغوني عشان أجي أخدها من هنا لإني معتقدش ليها عين تجيلي بعد اللي عملته
والدتها : أكيد يابني متقلقش ، بالسلامة
عند ليل وسما •
منار بقلق في الفون : طب وإنتي واثقة ف ليل أوي يعني ؟
سما بهمس : بقولك ساب حفلته ونزل إتخانق مع جابر عشاني ! المُشكلة دلوقتي مش عارفة أروح فين أنا ورطته معايا في مُشكلة مش هينفع أبات في ستوديو الشغل وهو عايش مع والدته ست كبيرة وبرضو ميصحش أقعد عندهم وبيت بابا أكيد جابر راح بخ سمه عندهم
منار وهي بتاكل : تيجي لبيت أختك منار طبعا ، إنتي عبيطة يابنتي إزاي مفكرتيش فيا ما إنتي عارفة إني عايشة لوحدي ، يلا إركبي أول تاكسي وتعالي
قفلت سما معاها وهي بتشكر ليل للمرة الألف بعدين قالت : هروح أقعد مع صاحبتي الكام يوم دول لحد ما إجراءات القضية تتم ، وبالنسبة لأتعاب المحامي أنا همضيلك على وصل أمانة بفلوسك
ليل : اللي يريحك ، هاتي رقمك عشان أقدر أتواصل معاكي
سما : لا هات إنت رقمك عشان الخط دا بإسم جوزي ، هتواصل معاك من تليفون منار
إداها رقمه وخرجت ركبت تاكسي وقالت للسواق عنوان منار
الفصل التالي اضغط هنا
يتبع.. (رواية الليل وسماه) اضغط على اسم الرواية لتجد الفهرس كاملاً بجميع الفصول.