رواية مذكرات زوجة – الفصل السابع
ناطق : هاي هي لو بعد اكو عندج طلبات
هيله : بقه اهم طلب اني راح ارجع للدوام واذا لكيت وضيفه اتوضف
اريد اعيش حالي حال الناس مااريد اكعد بلبيت واسكت
ناطق : تمام يله نرجع البيتنا
هيله : لا ماكو رجعه قبل لا تخلي درج خارجي البيتنا
وتجيبلي عقد الكاع باسم جهالي
وتاثثلي مطبخ فوك اريد طباخ وكاونتر وثلاجه ومجمده
من تخلص كل هاي الشغلات ارجع البيتي
عمي ليش ماترحين ويانه واني اتكفل بكل هاي الشغلات
كلبنا طك على الجهال
هيله لا ماارجع اله ينفذ كل طلباتي
جمانه السعيدي
طلع عمي وناطق زعلانيين
ناطق جان يضن هاي الشروط بس كلام
يعني كلام بلحظة عصبيه هلكد ماكان واثق بحبي اله
كان يحس نفسه مسيطر
ومجرد ماراح يكعد كبالي راح احن اله وارجع
وكلمتين وحضن منه ارجع هيله القديمه
الي تقدم خدمات وتضحيات بدون مقابل
طلع مصدوم من كلامي كاعد يباوع عليه ولا كنما زوجته كدامه عبالك وحده غريبه مايعرفه ابد
بهاي الفتره وسن بيت اهله لان حمله كلش موزين
وهو يروح يطمن عليه ويرجع ينام بيت اهله
بعده بكم يوم طلع عمال ورتبولنا درج خارجي
وراح اشترا كاونتر جاهز وطباخ وثلاجه ومجمده
بعد عشر ايام بلضبط اجا ناطق وعمي يرجعوني البيتي
وناطق جايب عقد الكاع بجيبه
راح وياي بابا وفعلا وصلت لكيت كلشي مثل مااريد واحسن
كعدت ارتب اغراضي وبابا وعمي وناطق نزلو جوووه
واني راسا قفلت الباب وراهم
شويه وصعد ناطق دك الباب
هيله من ورا الباب منوووو
ناطق اني افتحي الباب
هيله انت مالك مكان بيتي ابد وبعد تحلم اكون الك زوجه
ناطق لا حبيبتي لاتكولين هيج
هيله اني مو حبيبتك وسن حبيبتك روح يمه يمكن محتاجتك
ولا تفكر بيوم اني وياك راح نرجع مثل قبل ابد
ناطق زين بس نكعد نحجي شويه
هيله روح ناطق
ناطق اشوف الجهال
هيله اريد اسبحهم وشويه ويجونكم
تخبل ناطق من تصرفي هذا لان هو بهاي الفتره عايش اعزب
وسن عد اهله ومريضه واني مااقبل يرجع الحياتي مره ثانيه
جمانه السعيدي
رجع ناطق كرر هاي المحاوله مرات مو مره وحده
بس اني قافله علي
وقررت لازم القنه درس ماينسا طول عمره
الطيبه مو غباء الطيبه حسن تربيه
العتب على الي يستغل هيج مواقف ويحاول يستفاد منهن
بدت المدرسه واجاني عمي كال اريد الجهال انقلهم مدرسه اهليه وادفع الاقصاد لان ناطق عدهم تفتيش هليومين
أخذهم عمي وسجلهم وخلاهم خط ياخذهم ويرجعهم
الخط عمي يدفع فلوسه
واني قررت أدير بالي على نفسي اريد ارجع مثل قبل
واحلى
حرامات ضاعت هاي السنيبن من عمري هيج
نزلت برامج رياضيه
وقررت اسوي دايت وارجع مثل قبل
اشتريت جهاز جري
ونضمت اكلي مانام اذا ما اخلي ماسك الوجهي واديه
اعتنيت بنفسي حيل
حرفيا الراتب مااصرف منه الي شي قليل
قسط المدرسه دفعه ناطق
الخط دفعه عمي
مسواك بين يومين والثالث بابا يدزلي مسواك
ماتتخيلون حتى الزيت والمعجون والجداحه والكلنس
وعمي يدز للجهال حلويات كل يوم
الامبيرات بيت عمي يدفعوهن وياهم
والانترنت بيت عمي يدفعونه
بقت بس الملابس والعطور والاحذيه وشغلات قليله
كمت اجمع فلوس
بديت انضم حياتي
كنت اركض النهار كله وكلشي مامفتهمه
هسه براحتي انام اكعد اتفرج تلفزيون
اللعب رياضه ادرس جهالي
اشتريت ملابس تخبل مال بيت كله شلحات قصيره وبرموده
وبديات ربع ردن
جمانه السعيدي
يعني فعلا عايشه حياتي بلطول والعرض
اني شكد غبيه كنت مفرطه بهاي الحياة الحلوه علمود منو
علمود ناس ماتستاهل ابد
طولت وسن عد اهله لان الجهال كلماينزلون يكولون بابا نايم لو بابا يتغده
بابا سئلنا عليج يكول سلمولي على امكم
كلت بكلبي هذا حجي يفيدك ماتهز بيه ولا شعره
قررت اطور نفسي واكون قويه كافي ضعف
هنا خالتي حيل تعبت من الخدمه رجعت تخدم بيته من جديد بعد ماكنت اني مدللته دلال
ناطق تغسل ملابسه وتكويهن وتحضرله اكل
وحيدر طلع تعيينه ونفس الشي
وعمي مريض يريد مداره
كامت تركض وماتلحك ابد
قررو يزوجون حيدر لان خالتي ماتكدر على هاي الخدمه ابد
وفعلا خالتي بدت ادور عروسه وسمعت خطبوله وحده من الجوارين
وبدون يحضرون للزواج السعيد
حياتي الجديده قوتني حيل
بسبب الرياضه و الدايت
خلال ٣ اشهر نزلت ١٥ كيلوات
رجع جسمي كلش حلوووو
حسيت نفسي رجعت طفله كلي طاقه وحيويه
كل هاي الفتره وناطق ماشايفني ابد
كلما يصعد اقفل الباب وامنعه يدخل للبيت
شكد توسل وعتذر بس بدون فايده ابد
اتخيلو ٣ اشهر لا شايفني ولا شايفته ابد
حددو يوم العرس وعمي صعد عزمني على حنة البنات
بلبدايه فكرت مااروح
بس بعدين كلت ليش مااروح
خل اروح اتونس شويه
جمانه السعيدي
رحت اشتريت ملابس للجهال تخبل
واني اشتريت فستان اسود ضيك و قصير الحد الركبه
وبي شغل فضي قليل والردن قصيره تور اسود ساده
وتراجي فضي حلق كبار
حذاء اسود عالي وخلخال فضي نازك لان الفستان قصير
رحت للصالون
درجت شعري على طوله وسويت خصل قليله كلش حلوات
حفيت وغيرت رسمت حواجبي
رجعت شابه عمره عشرين سنه
صحيح الانسان لازم يشتغل على نفسه
واذا شافه حلوه الناس كله تشوفه حلوه
اجا يوم الحنه عمي كال يله انزلي البنات اجن يقصد بناته حتى ترحن سويه
لبست فستاني والحذاء وفتحت شعري وشسورته
ومكياج يخبل احلى من مكياج لصالونات
لبست عدسات ورموش
ولبست الخلخال
والتراجي
اني من شفت شكلي ماصدكت هاي اني
الحمد لله وعيت على نفسي ولو الوقت اتأخر حيل
الجهال نزلو قبلي واني نزلت والرداء بايدي من اطلع البسه
نزلت على الدرج الداخلي
وحذائي صوته واني نازله طك طك طك طك
نزلت ودخلت عليهن هلووووو
الكل بقه صافن عليه من الصدمه محد رد عليه
ابتسمت ابتسامة خبث شبيكم ليش ماتردون السلام
ولله اني عاذرتهم لان اني ماعرفت نفسي بذيج الساعه
البنات كالن هاي هيله ولج شطالعه
ناطق اني برا واسمعهن يكولن هيله شطالعه
صار اشكد ماشايفه ولله مشتاق اله
هيله سلمت على البنات التفتت واذا وسن كاعده على الكرسي
بطنه الخشمه هي سمره ووجه صاير كله كلف
لا بسه فستان بنفسجي طوخ وضارب على وجه
حرفيا تخوف
عيونه داخلات جوه اني اتفاجئت منه
باوعت عليه متعجبه مني واني التفتت على البنات
شلونجن ياحلوات
راسا دخل ناطق لابس قاط جوزي وقميص كريمي
وكف بلباب وبقه صافن عليه
مثل الي مامصدك هي هاي هيله نفسه القديمه
الفصل التالي اضغط هنا
يتبع.. (رواية مذكرات زوجة) اضغط على اسم الرواية لتجد الفهرس كاملاً بجميع الفصول.