رواية لن اغفر لها – الفصل الثامن والعشرون والأخير
28 والاخير|وَنس عُمري.
وإنْ اخترتُ أن أري من جديد، فسأراك انت وأحبك انت .. وإن كان لي عوض في الحياة، فأنت عوَضي وإن كان لي أن أتغير من أجل أحد، ستكون أنت بكُل تأكيد.”.
_______
ابتسمت ونس بمرارة في حلقها قائلة:
-بس اللي بيحب مش بيسيب يا تميم، بعدين انت دايمًا بتهرب وبتتخلي، قولتلك خليك أقوى وتمسك.
نظر لها ببؤس ولم يتحدث واستدار ليصطدم بطفليه الذي نظروا اليه بخوف ورُعب شديد قال سيف بغضب:
-مين جاب عمو الوحش دا هنا…
بينما قالت جوري بخوف ايضًا:
-أنا بكرهك عشان عورت ماما.
حاولت ندي آخذهم بعيدًا، فحاول السير تميم بعيدًا فقالت ونس بدموع:
-هستناك، عارفة إنك هترجع.
التفت ينظر لها بضعف، وهو يبكي بقهر للمرة الالف أصبح ضعيف للغاية تلك الفترة، قرر الرحيل الي حيثُ لا يعلم احد .. الي أن يتعالج، ويشفي جروحه والآلمه التي تزداد ولا تنتهي.
عانقت ندي ونس بشدة وهي تضمها اليها، وتهون عليها.. فقالت ونس بتنهيدة:
-انا عايزة أبقى لوحدي شويه خدي الولاد وابعتيلي ساهر.
-حاضر .. بس كفاية عياط واهدي.
اومأت ونس برأسها وذهبت ندي بعيدًا بينما دلف ساهر بعدها قائلًا بتساؤل:
-مالك بس فيه ايه.. صحيح تميم كان هنا؟
مسحت ونس دموعها وقالت:
-انت مين؟
-نعم.
-انا عارفة انك مش صاحب تميم زي ما قولتلي من كام سنة .. انت اللي خدت كُل أملاك تميم، عملت كدا ليه وعشان ايه… انا خلاص قررت دلوقتي اصارحك، وعايزة انهى كل حاجة بينا بس قبلها لازم تقولى.
تنهد ساهر بضيق شديد وهو يقول:
-زمان أمى اتجوزت واحد في السر ، ولما عِرف انها حامل منه طلقها وسابها ومسألش فيها ولما هددته تفضحه بعت ناس ضربوها وعدموها العافية.. كانت هي وقتها ولدتني، وهو ميعرفش إني عايش اصلًا، وبعدين كِبر الحقد في قلبي والكره، تعرفي مين الراجل دا؟
قالت ونس مُحللة الموقف بصدمة:
-متقولش إنت قصدك ان دا رياض.. ؟
-ايوا.. هو الزفت ، وقتها كرهته وكرهت ابنه تميم وبنته يارا ، وقررت آخد منهم كل حاجة، وكنت ناوي آخد املاكه نفسها اللي ورثتها يارا بس معرفش.. معرفش انشغلت في شغلي وسفري معاكى، مش هنكر إني كنت معجب بيكي وبشخصيتك القوية بس مفكرتش فيكي كأُنثي، ومقدرتش اكمل انتقامي، بسبب ماما اللي كانت دايمًا خايفة عليا.. الحقيقة انا حاسس بالذنب تجاهك وتجاه تميم انا ظلمته وهو مالوش ذنب واتعذب زيي زيه وأكثر وانه اصلًا مش ابن رياض ودا عرفته مؤخرًا …
تابع بتوتر:
-امبارح فكرت اصارحك وارجع كل حاجة زى ماكانت، عارفة دا كله عشان مين؟ اليوم اللي روحت اجيب فيه ندي، ندي غيرت حياتي لما كلمتني عن الكدب، جمعني بيها مواقف قليلة بس فوقتني، وحسيت انها مسؤولة مني وانتِ برضو مسؤولة مني، حبيت اغير من نفسي يمكن هي تُعجب بيا زي ما أنا مُعجب بيها.. ونس انا آه غلطان، بس صدقيني انا ضحية ظروف كبيرة في حياتي.
ابتسمت ونس بهدوء قائلة:
-كُلنا ضحايا ظروف كبيرة في حياتنا يا ساهر مش لوحدك وكلنا غلطنا فعلاً وكونك مأذتش اكثر من كدا فدا فحد ذاته كويس، صلّح غلطك .. ورجع لتميم حاجته وندي اختي كويسة لو عرفت إنك اتغيرت مِن قلبك فعلًا مُمِكن تحبك، ليه لاء؟!
-تفتكري ياونس؟.
اومأت ونس برأسها في اطمئنان، لينظر بجانبه يجد ندي واقفة مصدومة مما استمعت، ركض ساهر نحوها قائلاً بقلق:
-ندي بصي انتِ فاهمة غلط…
قاطعته ندي بحدة:
-مش عاوزة اسمع منك حاجة .. كلكم واحد كلكم كدابين، تعرف والله العظيم كنت بدأت اغير فكرتي وأثق من تاني فيك، علي اللي عملته معايا بس طلعت واحد نصاب وكداب واناني، انا بجد مش عاوزة أكلمك تاني.
سارت بغضب شديد، بينما ركض ساهر نحوها يوضح لها، تنهدت ونس بوجع لتسقط دموعها مرة أخرى وهي تنظر للدبلة الموجودة في يديها ثم خلعتها بعنف قائلة:
-مبقاش ليها تلاتين لازمة .
بينما في منزل عاصي، هبط عاصي السلالم ليلتقي بشقيقته ملك عانقها بِحُبِ قائلًا:
-حبيبتي عامله ايه
-بخير يحبيبي اومال فين يارا؟
-فوق، مضايقة شويه
-بسبب الحمل برضو؟
-أيوا للاسف..
-هطلعها اشوفها.
اوما برأسه وذهب هو لعمله، دقت برفق علي باب غرفة يارا التي سمحت لها بالدخول، ودلفت بالفِعل عانقتها وجلسوا سويًا فقالت ملك بدعابة:
-إحكيلي بقى مالك، زعلانة برضو من الموضوع اياه مش قولنا نسيبها لربنا؟
-عندك حق، بس الموضوع نفسه مُوجع نفسيًا .. كونك تتحرمي من الخِلفة صعب.
-أقولك حل جبار؟ ادعي كتير بكلمك بأمانه، لِحي في الدُعاء وربنا هييجي يوم ويستجيب، تصدقي بحاجة لحد غلبان بنية ربنا يرزقك بطفل، أطعمي مسكين..
-بجد تفتكري الموضوع دا هينفع؟
-ايوا طبعًا
-طيب تعالي نعمل واجبات للغلابة، لمدة ٣٠ يوم حلو كدا.
-فكرة جبارة وانا هشارك فيها جدًا ، هقوم اكلم جمعية بتعمل الموضوع دا ونروح نطبخ بنفسنا فيها .
-يلا بجد.
بالفعل وقفت ملك تحدثهم في الهاتف للاتفاق معهم، وذهبت يارا الي المرحاض جلبت طبق مياه ووضعته في الشرفة ، وجاءت عصفورة شربت منها، فقالت يارا برجاء:
-يارب اطعمتها وهي مسكينة.. ارزقني يارب انا كمان بطفل أو طفلة ، انا راضية ارزقني يارب بحق العصفورة دي.
ومن وقتها قررت أن تكون عادتها، إطعام العصفورة كل يوم لعلها تكون سبب في حملها.
___________
في صباح يوم جديد .
ألقي بحقيبته امام الدكتور النفسي / فرويد هاني، تنهد تميم بهدوء:
-انا جيت عشان أتعالج.
-مش كُنت رافض من كام سنة ، لما جابتك إيلا؟
-بس انا جاي وكل أمل اتعالج، وابقي انسان بسيط سوي .. وانسي كل اللي فات اوعدك اني المرة دي قدها.
-معتقدش، ممكن تفشل.
-هحارب ومش هفشل.
-هنشوف! ودي الشنطة لاوضتك في العيادة ، وخد شاور وتعالي.
أوما تميم برأسه وخرج من الغرفة وجد إيلا تنتظره، قالت إيلا بحماس:
-قِبل ولا شو؟
-وافق اه.. شكرًا علي كل حاجة يا إيلا.. بس لحد اللحظة دي هكمل انا بنفسي.
قالت بحزن:
-ليش؟
-انتِ بنت جدعه ووقفتي جنبي كتير لو عوزتي حاجة هساعدك.
-مابدي غير اياك..
-وانتِ زي اختي، انا بحب ونس .. وهفضل أحبها، ولو خفيت هرجع وأصحح كُل حاجة وارجع لولادي اللي مقضتش معاهم يوم واحد.
هزت رأسها قائلة:
-ربنا معاك لكن انا هكون موجودة دايمًا، ممكن احضنك للمرة الاخيرة؟
-في الإسلام حرام أحضن ست لا تحل لي أو حتي ألمسها، اسف .. حابب أتغير، وأبطل كُل حاجة وحشة.
-تمام.
تركته وغادرت وهي تبكى، بينما بدأ هو علاجه النفسي.
________
قررت ملك الموافقة الخروج مع عمر وابنته آلاء فقد ألحت آلاء كثيرًا عليها، وذهبا الي الملاهي، وركبا الكثير من الألعاب الصعبة، وتضحك بشدة وسعادة وكأنها عادت طفلة للتو، وعمر ايضًا يضحك بشدة، وجلست ترتاح وهي تلفظ أنفاسها بتعب، وجلس عمر بجانبها بعيدًا ورفضت آلاء الجلوس وظلت تلعب..
قال عمر بضحك:
-من زمان ملعبتش كتير كدا..
-وانا كمان.
نظرا لبعضهم قليلًا فأشاحت هي بوجهها، وتنهدت وهي تعتدل بخجل، فقال عمر بهدوء:
-ينفع أسألك سؤال ومتزعليش؟
-اسال.
-ليه حسيتك حاطة حدود قوية وبينك وبين الرجالة، خايفة مثلًا تجربي تجربة جديدة.. انا اسف اني بدخل في خصوصيتك، بس عندي فضول رهيب ومش قادر.
-عاوز تعرف الماضي بتاعي يعني هيفيدك بإيه؟
-لا مش عاوز ماضيكِ يخصك لوحدك اكيد.
-بص انت عارف اني الدين بيمنعنا الاختلاط
-عارف طبعًا ومعاكِ فيه جدًا .. بس افرضي حد عاوز يدخل البيت من بابه؟
-مش بفكر في الموضوع دا .. بعد جوازتي الاولي مبقيتش أفكر
-علي فكرة انا حضرت جوازتك الاولي وقولتلك مبروك انا ومراتي…
-دا بجد مش فاكرة.
-انا كمان كنت زيك مش بفكر في الجواز مرة تانية، بس كلامك في إني أفكر واختار كويس كان بيبدأ من اني اختار شخص ارتاح معاه نفسيًا وشخص يخاف ربنا .. ودا حصل من ساعة ما شوفتك.
نظرت له ملك بحيرة وتساؤل، فقال وهو يعتدل بهدوء:
-مدام ملك، انا عاوز الحلال، اسمي عمر آمين، مهندس معماري، دخلي ١٠ آلاف وعندي شقة وعربية وممكن اغير ديكور البيت كله عشانك، كنت متجوز وطلقت لأسباب شخصية، عندي ولد وبنت ، الولد معاها والبنت معايا وآديكِ عارفة ، انا كبير شوية عندي ٣٢ سنة، الفرق بينا كبير وليكِ حق ترفضي، بس انا معجب بيكِ وشاريكِ في الحلال وحاسس اني مرتاح وعاوز فرصة منك أثبتلك اني شخص كويس.. وانك شخصية كويسة .
قالت ملك بغباء:
-مش فاهمة حاجة .
انفجر عمر بضحك ثم قال:
-تتجوزيني ؟
-آه .. اقصد لاء…
-كلمة الحق طلعت الاول.
-إنت إزاي تقولي كدا ؟..
-هو انا قولت حاجة غلط لسمح الله !
-ممكن توافقي.
قالتها آلاء وهى تقف خلف ملك برجاء، نظرت لهم ملك بحيرة وقالت وهى تنهض علي عجله:
-انا لازم أمشي.
وبالفعل رحلت، قالت آلاء بخوف:
-بابا تفتكر هى هترفض؟
-مش عارف يا آلاء.. بس حاسس إني فيه امل، وإني ربنا هيعوضني، وشايلي حاجة أفضل وأحسن.
_________
في المساء.
جلست ملك امام شاشة الحاسوب، وهي تبحث في صور فرحها القديم لتلمح عمر، ابتسمت بشدة وهي تتذكر انها تمنت رجلًا مثله يكون زوجًا لها يومًا ما، تنهدت وهى تنظر للفراغ، وكتبت في مذكراتها
-كُنت مؤمنة بالعوض، ومؤمنة بالفرصة التانية.. وشكلي هجربهم، بعد تعب سنين.
مر حوالي ٩ شهور، تغيرت فيهم الاحداث قليلًا.
مازالت يارا تطعم العصفورة، والمساكين ولا تفعل شيء سوي الدعاء والصلاة ومساعدة الفقراء كي ينعم الله عليها بإلانجاب، وعاصي يدعمها حتي لا تحزن.
اتجهت ونس للعمل في محاولة للنسيان ولكنها تتابع مع دكتورة نفسية فهى مازالت مشوهة نفسيًا ومُتعبة، وظلت تهتم بأطفالها وأخبرتهم ان تميم والدهم وسافر في عمل وحاولت ان تجعل الأطفال يحبوه، ولكنها كازا تفشل.
مازالت ندي ترفض الحديث مع ساهر وتراه كاذب، وأنه لا يستحق اي شيء آخر.. رغم محاولاته العديدة للصُلح.
أما تميم فإستمر في العلاج والصلاة وورد القرآن ولم يفعل شيئًا آخر.
______
خرجت ندي من كليتها بعد انتهاء المحاضرات، لتجد من ينده عليها وكان ساهر، التفتت بغضب قائلة:
-قولتلك ميت مرة أنا مش عاوزة أتكلم.
-ندي اديني فرصة.
-متستحقش، وكل مرة هقولك نفس الكلام.
-ندي انا غلطت وكلنا بنغلط، ممكن ييجي عليكي وقت وتغلطي.. بعدين انا مالحقتش اعرفك كتير أوي عشان حتي اعترف
-بس خدعت اختي وخدعتني، وطلعت نصاب.. بعدين انا وثقت فيك وكنت هثق اكثر في واحد كداب…ولو زي ما انت بتقول مالحقتش تعرفني كويس فإمتي بقي حبتني!!
-مسمعتيش عن الحُب لاول مرة.
-لا بس سمعت عن كداب في أول مرة.
-ندي آخر مرة هسألك ومش هتشوفي وشي تاني… هتديني فرصة ولا لاء.
نظرت له بتوتر ثم حسمت امرها وقالت:
-لاء.
أوما برأسه ثم ارتدي النظارة وركب سياراته وغادر بغضب، بينما وقفت تنظر هي للسماء بتعب.. هي ايضًا تريده ولو قليلًا لكنها خائفة، أن يكون مِثل فريد وفي ذهنها من يُكذب مرة يُكذب ألف مرة.
بينما ولجت ملك خارج المدرسة، لتجد عمر في انتظارها، ابتسمت من خلف النُقاب ثم سارت وكإنها لا تراه، فقال عمر بتنهيدة:
-مدام ملك.
-مش هينفع كل يوم توقفني علي فكرة.
-انا كنت عاوز أسأل عن رايك، انتِ مردتيش من يومها وقولتي عايزة تفكري.. لسه محتاجة وقت برضو؟
تنهدت بحيرة فقال بخبث:
-مظنش واحدة تبقي رافضة، اول ما تشوفني من بعيد تضحك
قالت ملك بذهول:
-شوفتني إزاي…
تداركت خطأها بتوتر ، فضحك بشدة .. قالت بتنهيدة:
-عاوزة أعرف انت عاوزني عشان الاء ولا عشاني.. انا مش عاوزة اتعب.
-بصي لو عايز ل آلاء كنت اتجوزت من فترة انا مُطلق من سنتين وبقابل ستات كتيرة، انا لاقيت اللي تناسبني وتكلمني في فكرها.
-بس انت مشوفتش وشي حتي.
-انا عارفك من زمان وكنت بشوفك ايام ما كُنتِ في دروسك وقبل ما تتغيري كدا..
قالت بذهول:
-بجد إزاي.
-انا مهندس وانا اللي بنيت فيلتكم، علي فكرة.
-بجد ! ايه الصدف دي ؟
-أحياناً النصيب بيكون حوالينا ومش بنشوفه، اديني فرصة اعوضك وتعوضيني عن اللي فات.. ارجوكي.
تنهدت قائلة:
-عاوزة شوكلاته وورد أحمر.
-نعم؟
-وانت جاى تتقدم لو مجبتهومش اعتبر نفسك مرفوض
حاولت الرحيل فقال بسعادة:
-هجبلك كل حاجة هاجي أمتي
-انت عارف اخويا عاصي .. اتفق معاه وكلمه وشوفه.
رحلت وهي تبتسم داعية الله التوفيق، وظلت تصلي استخارة طوال تلك الفترة حتي ارتاحت أكثر وقررت الموافقة، بينما شعر عمر بالسعادة وظل يبحث عن رقم عاصى فلم يراه، فتحدث مع مساعده وطلب منه رقم عاصى وجاء به وحدثه واتفقوا علي ميعاد.
في نفس التوقيت، جاء رسالة بريد لتميم، وخرج يستلمها، وكانت الورقة هي استرداد أملاكه جميعها .. ضم شفتيه بتفكير، ثم قرر أن يذهب لونس بعد تلك الفترة، فهو شبه تعالج نفسيًا ببعده عن الجميع..
ارتدي ملابس أنيقة ورقيقة، وذهب الي فيلا ونس وجلب معه الكثير من الورد والالعاب، ادخلته الخادمة الي الصالون وكانت ونس جالسه تعمل وقالت بتساؤل:
-مين يا زينب؟
دلف تميم بهدوء لتنظر له مصدومة ومذهولة وهى تراه امامها، وقال ببسمة:
-وحشتيني أوي..
نظرت له بفاهٍ مفتوحه، فتابع:
-ياجوري.
ركضت جوري اليه وكذالك سيف هو الآخر مرددين:
-بابا…
نظرت لهم ونس بصدمة أكبر وهى في حالة عجيبة ولا تفهم شيئًا واحدًا مما يحدُث، وبعد قليل جلس تميم معها والاطفال يلعبون بالألعاب التي جلبها، تنهدت ونس قائلة:
-ممكن افهم بقي ؟
-الفترة اللي فاتت كُنت بتعالج نفسيًا عشان كُنت مدمر، وكُنت بخرج كل فترة اجي الفيلا اشوف الولاد وانتِ مش موجودة وندي الله يكرمها ساعدتني كتير، وكُنت بشوفهم في المدرسة واليوم اللي زعقتي فيه عشان اتأخروا كُنا بنلعب في الحديقة مع بعض.. حاولت أصلح علاقتي بيهم، فشلت في الاول بس نجحت بعدين ياونس وشكرا علي كل الكلام الحلو اللي قولتيه عليا.. بس انا نبهت محدش يقولك حتي الولاد.
ضغطت علي شفتيها بغضب قائلة:
-يعني انا آخر من يعلم بالموضوع صح ياتميم، خبيتوا عني ليه
-المفروض تنبسطي عشان علاقتي بيهم اتصلحت، بعدين الولاد متقبلين علاقتنا وانفصالنا وكدا كل واحد فينا يقدر يشوف حياته..
رددت بتوتر وضيق:
-اااه.. عندك حق.. اشوف حياتي بقي لو عايزة اتجوز بتاع.. انت هتتجوز؟
تساءلت في قلق، حاول كتم ضحكته ثم قال:
-اه هتجوز.. عقبالك يارب ان شاء الله
صمتت بغضب ولم تتحدث وكأن قلبها يعتصر المًا، فقالت بهدوء:
-عن إذنك عشان عندي شوية شغل.
-طيب عيد ميلادهم بكرة صح، لازم المرة دي نحتفل سوا.
قالت بمرارة:
-كل سنة بنبقي لوحدنا مجتش علي دي.
تركته ورحلت للاعلي وهى تبكي بشدة وقهر وغيرة، بينما ضغط تميم علي شفتيه قائلًا:
-آسف ياونس حقك عليا والله هعوضك عن كل حاجة..
جلس بجانب الأطفال ويلعب معهم ثم قال:
-خلونا بقي نتفق علي خطة بكرة .. مين معايا؟
انتبهوا له قائلين في صوت واحد:
-انا..
_______
استفرغت يارا ما في بطنها بأكمله وهي تشعر بالضيق من كُل روائح الطعام، فقالت ملك وهي تطهي في المطبخ:
-مالك بس؟
-حاسة إن معدتي مقلوبة.
نظرت لها ملك بسعادة:
-مش يمكن حامل.
قالت يارا بحزن:
-لا متعشميش نفسك، دا يدوب وجع بطن مش اكثر او برد..
-يابنتي ليه لاء هاتي اختبار حمل ونشوف
-مش دلوقتي اي وقت بقي ، العريس برا خرجي القهوة وانا هحاول أكمل الاكل.
-انا خايفة أوي.
-متخافيش خليكِ قوية كدا اومال.
-حااضر.
تنهدت وخرجت بهدوء ووضعت القهوة والقت السلام، قدَّم عمر لها بوكية الورد وعلبة الشوكلاته قائلًا:
-أحلي ورد وشوكولاته، لأحلى بونبوناية.
تنحنح عاصي قائلًا بدعابة:
-كيس جوافة انا هنا.
ابتسم عمر وهو يجلس بحرج:
-معلش يا عم عاصى ما الهانم عذبتني علي ماوافقت اجي.
قال عاصي بفخر:
-اختي وانا اللي مربيها… هسيبكم، خمس دقايق سوا بس… ها.
جلست ملك بهدوء وهى تفرك يديها بتوتر ، فتسأل:
-مالك يا ملك فيه حاجة؟
فقالت:
-بص بصراحة انا فيه حاجة لازم تعرفها.. غلطة عملتها زمان وهى..
-شش.. مش حابب اعرف حاجة، أخطاء زمان فضلت زمان وكلنا غلطنا، وانا بحبك بغلطاتك، وعيوبك وعايزاك كدا … خلينا نبدأ سوا من جديد.
تنهدت وهى تنظر له قائلة:
-الرؤية؟
-خليها في كتب الكتاب أفضل، وانا برضو مستحيل أنسي شكلك.
ابتسمت بخجل صامته، وتناولوا العشاء بعدها ثم قرأوا الفاتحة علي إتفاق في كتب الكتاب بعد شهرًا علي الأقل فهو كان في عجلة، وهي لم ترفض فهي بدأت تثق فيه من بعد تقبله لها … وتمنت ان يكون خيرًا لها.
_________
في صباح يوم جديد.
كان عاصي نائمًا كالعادة، استفاق علي صوت بُكاءً تنهد بضيق فبالتأكيد هي يارا كعادة كُل يوم، حاول أن ينهض لكن أعاقه وجود سلوبته بجانبه وبها تيست الحمل وورقة تحليل، ومدون:
-هاي بابي.
في البداية لم يفهم شيء لكنه فيما بعد استعاب، ثم قال وهو ينهض بذهول:
-ي.. يارا أنتِ فين.
ولجت اليه من خارج المرحاض لتفزعه قائلة:
-انا هنا..
-الكلام دا صح انتِ حامل؟
قالت والدموع تتساقط من مقلتيها قائلة بفرحة:
-ايوا انا حامل واللهِ .. اخيرًا ياعاصي الحمدلله ربنا تمها علي خير الحمدلله بجد.
عانقها بشدة وهو يدور بها بسعادة رهيبة متمتم الحمدلله ، وقالت هي بعدها:
-يلا اتوضي عاوزين نصلي ركعتين لله نحمده انه رزقنا ويارب يدي كل محتاج.. كمان يكون ابن صالح ونعرف نربيه
-يارب ياحبيبتي يارب..
_________
وقفت ونس امام المرآة ترتدي فستانًا جميلاً وأنيق، وقررت ان تنظر لنفسها ولن تُفكر في أية رجُل آخر، قالت ندي وهى تقترب منها:
-إنتِ لسه زعلانة ؟
-ماليش نفس أتكلم ياندي.
-انا حقيقي آسفة مكنش قصدي أزعلك والله بس تميم اترجاني كتير وقولت ان دا ممكن يبسطك..
-مفيش حاجة تفرق معايا خلاص ومش عاوزة أسمع لا اسمه ولا سيرته ولا أتكلم في الموضوع من أساسه، روحي اجهزي عشان عيد ميلاد الاولاد.
-حاضر ياونس اللي تشوفيه
بالفعل ذهبت ندي الي الخارج وأكملت ونس ترتيب نفسها وتجمُلها، الي أن انتهت .. وذهبت هي وطفليها وندي مع السائق الي المكان التي رتبته للحفلة.
قالت ندي بإطراء:
-بس شكلك حلو اوي.
-قررت اهتم بنفسي وأعوض اللي معشتوش كويس بقي..
-عندك حق.
وصل بهم السائق الي المكان ونهضت هي والاطفال ومعهم ندي، دلفوا بالداخل فقالت ندي بتحجج:
-سيف وجوري عاوزين يدخلوا الحمام روحى وهاجي وراكى
-هاجى معاكم
-لا روحي انتِ وإطمنى علي المكان هنااك.
-ماشي ياستي.
بالفعل دلفت ونس لكنها تحيرت من انغلاق الضوء قائلة:
-هو النور مطفي ليه!!
أكملت الدخول لكنها صرخت مما امسكها من يديها بسرعة فائقة، قال بصوت هاديء:
-إهدي… انا تميم.
-سيبني ماسكني ليه اوعي كدا
فجأة اشتعل الضوء لتظهر ترتيبات جميلة في المكان من اضواء وشموع وورد وصور لهم جميلة وذكريات حُلوة، اردف بهدوء:
-حبيت أقولك إني الانسان من الصعب يتغير إلا عشان حد بيحبه من قلبه فعلًا، وأنا بحِبك ودايب فيكِ وعاوزك معايا دايمًا، كٌلنا بنغلط، إنتِ غلطتي وانا غلطت، وأننا نسامح بعض حاجة جميلة، ربنا بيسامح وإحنا كمان لازم نسامح ونغفر لِبعض، بحِبك ياونس عُمرى وأيامي اللي جاية وآسف علي كل حاجة عملتها، ولو فاضل في عُمري يوم بتمني أعيشه معاكِ ..
اكمل وهو يخرج خاتمًا جديدًا مردفًا:
-تتجوزيني؟.
-نعم؟.
ابتسم قائلًا:
-إيه مسمعتيش؟ هي بتتقال مرة واحدة، على فكرة انتِ محظوظة ألف واحدة غيرك تتمني تسمعها مني، وانتِ أول واحدة هتسمعها مني .
-أتجوز مين شكلك مجنون ! لا حقيقي مجنون.
ضحكا كلاهما علي هذا الكلام الذي قاله في الماضي، ثم قالت وهى تمسح دموعها:
-وايلا؟
-مفيش في ست في الدنيا هتاخد مكانتك في قلبي ياونس.
-انا اسفة علي كل حاجة عملتها فيك ، تميم انا بحبك أوي.
-انسي كل حاجة وخلينا نبدأ من جديد… مردتيش!
-موافقة بس بشرط.
-اممم اشرطى براحتك ياستي.
-عاوزة تعملي فرح.
-أحسن فرح في الدُنيا لأحلي ونس في حياتي.
وقفت ندي والاطفال يسقفون بحرارة، ركضوا الأطفال بتجاههم وعانقوهم بشدة، بينما جاء ساهر ووقف بجانبهم، مبتسمًا فهو ساعد تميم علي ترتيب الحفلة فقال:
-أتمني اكون صلحت غلطتي.
اردف تميم ببسمة:
-شكرًا يا زميلي.
أوما ساهر برأسه مبتسمًا، قالت ندي بهدوء:
– ونس قالتلي انك مسافر دبي.. مش هترجع تاني.
-أغلب شغلي هناك .. فلازم أرجع.
ابتلعت ندي ريقها وقالت بهدوء:
-فاكر لما قولتلك اني مستحيل اثق في حد تاني أو اسامح حد كدب عليا، ونس وتميم قصتهم علمتني التسامح وإني ممكن أدى فرصة تانية لحد كِذب يصلح دا.. حاسة إني هثق في حد من تاني واديله فرصة، وحاسة اني ممكن أحب من جديد بس مش عاوزة أتخذل المرة دي.
قال ساهر بعبط:
-قصدك ايه..
فقالت هي الاخري بإستعباط:
-لازم اعترف مش قادرة استني اكثر من كدا.. انا اتعلمت آكل السوشي بالعصيان الصينية ، ومش لازم أكلها بإيدي تاني
رمت بقنبلتها و غادرت وهي تضحك، ضيق ساهر عينيه بشدة وركض خلفها قائلًا:
-قال سوشي قال إستني هنا…
أمسك كتفيها بيديه:
-ندي ارجوكي بلاش هزارك الغِلس دا.. انتِ فعلًا خلاص ..
-اه ياساهر .. هديك فرصة بس توعدني متخذلنيش.
-اوعدك يا ندي اوعدك هتغير ومش هكذب وهكون شخص صالح عشانك.
___________
بعد مرور فترة .
تجمع الجميع في بيت عاصي بعد كتب كتاب ملك وعُمر علي حفلة شواء في الحديقة، وذهب تميم مع ونس بعدما تزوجوا .. وحضرت شذي من السعودية مخصوص لأجل شقيقتها، وحضرت ندي هي وساهر بعدما تزوجوا اخيرًا من فترة ..
ابتسمت ونس وهى تلمحهم، ثم ابتعدت قليلاً تنتظر الطعام وبدأت تكتب في مُفكرتها:
-متستغربوش النهاية اوي كدا، ربنا كريم وعوضه كبير مش بناخد كل حاجة بس برضو مش بنخسر كل حاجة دايما فيه حاجة حلوة احنا مش شايفينها، رغم العذاب والقسى ربنا عوضي بطفلين بدال اللي مات وطفل في بطني، عوضني بأمي عن ندي اختي وب ابويا عن تميم اخ وصاحب وصديق وحبيبي وجوزي وكل ما املك، وعن تعليمي اللي وقف باستكماله، وشركة كبيرة بدأت صغيرة خلي عندكم أمل في ربنا كبير.
وعاصي اتعوض بحبيبته اللي اتمنته، واتجوزها.. وعوضهم بطفل بعد صبر ودعاء وصدقة خير للناس، وملك ربنا عوضها بعد عذاب سنين بشخص محترم بيقدروا بعض، واختي ندي قلبها اتوجع بسبب حبها لراجل مش بيقدر بس اتعوضت بعدين بشخص بيقدّر.. كلنا بشكلٍ ما في النهاية حصلنا علي حاجة حلوة، وربنا عوضنا وعوض قلوبنا الجميلة، دي الحياة هتاخد منك الف حاجة.. بس حتمًا ربنا هيعوضك عنها بحاجة بقيمة الالف، المهم رضا.. والحمدلله دائمًا وابدًا.
قاطع كلامها صوت حبيبها تميم وهو يقول:
-ونس عُمري، اللحمة استوت يلا قبل ما يخلصوها.
ابتسمت وهي تسير معه بسعادة وجلس الجميع في سفرة واحدة يتناولون طعام الافطار بكل سعادة وحيوية… بعد تعب ومرار.
تمت بحمدِ_ الله 🌊
للكاتبه/ ساميه صابر ♥️
- اقرأ ايضا روايات سامية صابر – كوكب الروايات
الفهرس كاملاً بجميع الفصول عبر الرابط التالي (رواية لن اغفر لها) اضغط على اسم الرواية لتجد الفهرس كاملاً بجميع الفصول.