رواية عروس الجبايش الفصل الرابع والعشرون 24 – بقلم ياسة الموسوي

عــروس الچبـــايــش🌼

بــقلم يـــاســـة الحلقة (24)

من غير كوكب اجت

بالأرض ماكو بشر يشبة ملامحها

أتمنى يمج أضل

والليل اخلصه سهر وياج ما أنامة

گلبي الصعب ينعجب صرتي أكبر أحلامة

…………………….

يُـمن :- هـوَ گال تزوجيني وانا گلبي طاح بحظني اريد بس اندل الدگمه التسد الخط ماكو نسيت منين ينقفل مدرين شلون قفلته و اباوع على إدية ترجف انهبطت تسودن هذا نص الليل

رجع دگ مره ثانية رفضته سريع وقفلت النقال بكبره وگلبي دمام صار اجت امي طبت لگتني لازمه النقال حيل وگاعدة وصافنه

شهيناز :- ها خابرتيها

خفت اگلها هذا اخوها وهيج گالي خاف احچي و تصير هوسه وامي ما تسكت تروح تخابره وتتعارك وياه وتوصل السالفه العمي والولد وزحمه بحقي رديت

— اي

— شبيها خو ما مسويلها شي اخوها

— لا لا ما مسوي

— لعد شكو تخابر نص الليل

— ما ادري ما حچت شي

— جوز استحت تحچي

— اي يمكن

رجعت طلعت و انا بعدني لازمة النقال

بـ ايدي و اريد اهدى و اسيطر على روحي

ماكو

ضليت گاعدة و صافنه مصدومة انوب تمددت و اباوع على البنكه واتذكر من اول يوم شفته لحد اليوم گمت اربط المشاهد بعقلي واگول معقوله جان يذبلي حچي ويتحرش بيه وانا ما حاسه بيـه

بس هوَ ما حچى شي غلط وياي من شفته لليوم ليش هسه هيج يسوي انوب ارجع اگول الروحي شـ مسوي هو ما مسوي شي خطبني على سنه ورسوله انوب ارجع ارد شني خطبني شو ما يستحي داك نص الليل وتعاي تتزوجين ما عندي اهل ما عندي بيت إذا يريد يخطب يدگ الباب ويجيب اهله خو مو بالختلات بنصاص الليالي

هسه يقبل واحد هيج يحچي وياه اخته بالليل بحجه الخطبـه والعرس

استغفر الله يربي اريد ارجع انام ماكو طارت النومه من عيوني ضليت گاعدة لحد ما إذن الصبح گمت توضيت وصليت ورجعت المكاني وافكر

هسه امي من تگعد الصبح وتاخذ النقال تشوف الرسائل الكتب بيهن انا اخوها وتصير هوسه شلون امسحهن وانا قفلته اخاف افتحه ويرجع يدگ مره ثانية

خل افتحه وإذا دگ ما اجاوب بس امسح الرسائل گبل لا انام وانساهن اكيد هسه نام قابل گاعد الهذا الوكت متانيني

فتحت النقال و تانيته لحد ما اشتغل كله

اول ما نفتح گامت الرسائل تجي داگ عليه وما محصلني طبيت بسرعة مسحت كل الرسائل بعدني امسح بيهن و دگ من جديد

فزيت و گمت وگفت وگفه شو هذا صدگ ما يستحي وسواها بليه ملح رفضته رجع دگ من جديد هم رفضته وكتبتله رساله

— الما تقبله على اختك لا تقبله على بنات الناس استحي و أحترم روحك اشفت عليه وتخابر بنصاص الليالي

انطيتها ارسال و رجعت مسحتها من السجل ومنها و بعد لا دگ ولا خابر وانا لو اعرف احظر چا حظرت رقم زهراء وبعد حتى هيَ ما خابرها واحچي  وياها

ضليت متمدده بفراشي و عيوني گامت تنفتح وتنسد لحد ما رجعت نمت من جديد و الصبح من گعدت لگيت امي ما خذه النقال گلبي ضل يدگ خاف راجع  داگ لو راسل وانا نايمة وشافته امي بمكاني

گمت طلعت غسلت و رحت للمطبخ لگيتها گاعدة قبلي ومتريكة هيَ وعمي واگفه على الطباخ تسوي غده صبحت عليه ردت بهدوء معناها الامور طبيبة وما مخابر ولا مراسل

گعدت تريگت و انوب التهيت انظف بالبيت واعزل هوَ ما بيه شي نظيف و يخبل بس انا وين اروح ما عندي شي وگاعدة وساكته اگوم اشتغل اخلص وكت

لحد ما صار الغده تغدينا انا وامي وعمـي

و شلنا الصينية امي سوت جاي واخذته العمي وانا وگفت على السنك اغسل مواعين شوية وسمعت عمي يحچي بالنقال ويگول

— اهلاً وسهلاً هلا بيكم

— زارتنا البركة

— خير ان شاءالله هلا بيهم

رجع قفله و يگول الامي

— هذا حسـن يگول العصر العلوية وزهراء يجن عليكم

شهيناز :- هلا بيهن ، يجن الهذاك البيت لو علينا

— عليكم گال الام يُـمن

— هاا اهلاً وسهلاً هلا بيهن

كملت انا المواعين ورحت الغرفتي طبيت وسديت الباب و متأكدة فشل من رسالتي ودز امه اليـوم و امه راح تخطب شلون

يا ربي انا ما اريد اعرس بس لا امي تقبل بيه وتزوجني

ضليت گاعدة وحدي وميته شوية واجت امي گالت گومي سبحي و حضري الضيافة خاف تجي المره عيب منها

گمت للحمام سبحت و رجعت حضرت فواكة و الكيك ومن تجي عود اصب العصير

للعصر و اندگ الباب راحت امي فتحت الباب و استقبلتهن ترحب بيهن والمره

ترد على امي انا بس شفتهن جايات بسرعة شردت طبيت بغرفتي

گعدن بالصاله و صوت سولفهن يمي بالغرفه وصوت امي شلون ترحب بيهن

وراها بشوية امي صاحت يُـمن

گمت وگفت واگول دخيلك ياربي جسمي كله يرجف لبست ربطتي و طلعت المره بس شافتني أبتسمت و زهـراء ضحكت

سلمت عليهن و زهـراء گامت باستني وامها گالت

— عذريني يوم ما اگدر اگوم

شهيناز :- لا يمعودة صدگ جذب ولا تگومين

دنگت عليها و بستها ورحت للمطبخ جبت الضيافة و اجيت اروح للغرفه گالت المره

— تعاي گعدي يـمي خلينا نشوفج

باوعت على امي وامي رجعت باوعت عليه

اجيت يمها گعدت وزهـراء مگابلتني وتضحك وامها وامي يسولفن سوالف عادية على شغل رجولتهن وعلى المسؤولية انوب رجعت امها تسولف على ابنها وشلون يروح و يرجع للشغل وتعبان وعليه ضغط بالشغل هنا انا عرفت الشغلة

راح تتطور گلت خليني اگوم اشرد بس شلون اگوم والمره تريدني گاعدة يمها رجعت امي سألتها

— هـو منـاف شگد عمره الله يخليه

–مواليد 80

— ينطية طوله العمر يارب

— رحم الله والديج

رجعت باوعت عليه وأبتسمت و تگول

— يُـمن شگد عمرها الله يخليها

شهيناز :- يُـمن مواليد 92

— الله يحفظها ويخليها

— رحم الله والديج

اندگ الباب گمت بسرعة اجتني فرصة اشرد بيها رحت سريع افتح الباب وگفت وره الباب گلت منو اجاني صوت مـراد يگول إني ضحكت وفتحت بس شافني أبتسم خجلان وگال

— جنت فايت قريب عليكم گلت امر اشوفكم

— هههه اهلاً وسهلاً

— اختي حبيبتي الطيبة الحلوة الماكو منها اثتين تدرين بيه كلش احبچ

— هههه والله انا هم أحبك و أحترمك بس شتريد من الأخير

— بس اشوفها

— ههههههه

رجع ضحك و طب وگف بالحديقة ويباوع على باب الأستقبال گتله تفضل بالصالة لان گاعدين بالأستقبال گال

— لا اريد اروح بس اريد اشوفها من بعيد واروح

عفته وطبيت گعدت يمهن سألتني أمي منو رديت مـراد زهـراء أبتسمت و نزلت راسها

رجعت امي گالت

— وينه هسه

–بالحوش بقى

— ياا ليش بالحوش خلي يفوت جوا

— ما ادري شجاي يسوي بالسيارة مالته هسه يطب

أمي سكتت ورجعت هيَ و العلوية يسولفن وزهـراء عيونها گامت تطلع گلوبات احسها طارت طير

درت وجهي اباوع على الباب وعلى الشباك شفته واگف وره الشباك وما مبين غير منه شي قليل من ضليت گاعدة ولازمه گلبي

بـ ايدي لا امها تشوفه رجعت هيَ گالت

— يُـمن وين الحمام مالتكم

گمت مشيت وهيَ وراي بس شني گلبي يدك دمام عبالك انا الراح اشوف حبيبي مو هيَ ارجف طلعنا للصاله وبس طبينا اجى

ورانا

عفتهم ومشيت وگفت بالمطبخ و عين للباب وعين للصاله واطگطگ بـ اصابعي

و ارجف خمس دقايق و اجت وراي لگتني واگفه بالمطبخ ضحكت تقدمت عليه سريع حظنتني وباستني و تگول

— فدوة الگلبج حبيبتي

— كافي تعاي رجعي لا امج تحس بيج

— آمانة فدوة مو تحچين حتى الامج

— لا والله ما احچي شلون احچي بس انتِ ديري بالج لا واحد يحس بيج لو يلزمج ولا تضلون هيج خلي يجي يخطبج وعيشوا حبكم بالحلال

— ان شاءالله بس اخلص هاي السنه

— الله يجمعكم بالحلال

— أمين يا رب

رجعنا للأستقبال اول ما فتنا امي

و العلوية سكتن ويباوعن عليه اثنينهن وامي شكلها قلقه و متوترة بعدنا هسه گعدنا و باب الشارع انفتح ورجع انطبگ

عرفته مـراد راح

ضلن شوية و دگ عليهن منـاف امه سلمت  عليه و ردت اي تعال منتظرينك ربع ساعة

و رجع خابرهن گامن يردن يروحن امي جلبت بيهن يبقن للعشة ما قبلن ودعنا ومشن

اول ما طلعن أمي طبت الغرفتها وما فتحت موضوع وانا من شفتها ساكته وما فتحت موضوع هم سكتت وكيفت معناها ما موديهن هوَ هيج اجن من وحدهن يشوفنا

للمغرب وماكو شي والوضع طبيعي صليت المغرب والعشة و امي گامت تحضر بالعشة عمي خابرها يريد عشة وجاي بالطريق وگفت اساعد بيها بين ما اجه عمي حظرنا الامل وگعدنا سوى ناكل سأل عمي

— شعجب اليوم اجن العلوية و زهـراء

أمي سكتت ما ردت وره شوية ضحكت وگالت

شهيناز :- وره العشة نحچي ،  بس عندي سؤال محيرني

— شكو سألي

— العلوية گالت مواليد ابنها 80 بس هوَ ما شاءالله رتبته عالية يعني اعلى من رتبتك شلون هيج وهو بهذا العمر إني ما سألتها استحيت منها خاف تگول حاطه عينها على ابني

— منـاف اول ما شب فات للسلك العسكري وما شاءالله عليه مرتب ومعدل وذكي عرف شلون يصير قريب من لأمر مالته فـ جان بكل المداهمات المهمات يسحبونه وياهم وبنفس الوقت شجاع ما يخاف يشمر نفسه گدام الموت شمر خصوصاً بفترة المفخخات والتفجيرات اكثر من مهمه طلع واكثر من ارهابي لرزم وجان بعد كل مهمه ناجحة تجي ترقيـة وهي وصل الهذا المستوى وعبرني وعبر تميم

— هاا زين والله الله يوفقه

— و الولد يستاهل تعبان على نفسه ودارس ومثقف و شجاع وكل الترقيات يستحقن و بجدارة

— الله يحفظه ان شاءالله

رجعوا سكتوا بين ما خلصنا العشة غسلت المواعين وسويت جاي و جبته الهم لگيتهم يحچون بس طبيت يمهم سكتوا وانا رجعت الغرفتي وبعد ما طلعت منها

الليل كلش اجت امي فتحت الباب وطبت

لگتني اغفي اريد انام گالت

— نمتي

— لا بعدني

— گعدي اريد احچي وياج

گعدت عدل واباوع عليها ابتسمت و تگول

— تعرفين ليش اجت اليوم ام مناف

سكتت ما رديت انوب رجعت جاوبتها

— لا ليش

— اجت تخطبج الأبنها

بس كملت امي كلامها احس غصيت بريكي

ضليت بس صافنه رجعت أبتسمت و تگول

— إني ما رديت خبر ولا انطيتها اي امل واي كلمة گلت الها بعد وقت الهذا الموضوع وهيَ هسه طالعة من تجربة فاشلة وبعدهي صغيرة والعمر بعده بدايته وتريد تدرس يعني سديتها عليها فد مره بس رجعت المره و ردت ما عنده مانع تكمل دراستها وعادي ينخطبون فتره يتعرفون على بعض ومن يشوفون نفسهم مستعدين يتزوجون المهم الابنية هاي نريدها وننتظرها ما عدنا مشكلة

بقيت ساكته ما جاوبت رجعت امي تگول

— يُـمن يمه حبيبتي اريدج تعرفين مو كل الزلم مثل رائـف ولا كلها مثل غـازي والماله قسمة بالاول اله العوض بالثاني

ان شاءالله حبيبتي ماما انتِ حلوة والعيون عليج والكل تتمنى اظفر من اظافرج فـ لا تفكرين لان اطلگتي بعد محد ياخذج ولا تضغطين على روحي وتوافقين بـ اول شخص يتقدملج العمر گدامج والطريق بعده بدايته والناس كلها تهواج وتحبج وتشتريج لان ماكو مثلج ومثل اخلاقج وجمالج وترتيبج اني جاي احچي وياج هذا الحچي اريدج تعرفين قيمة نفسج وتعرفين المطلقة ما توگف الدنيا يمها ولا تضيع وتنتهي من بعد تجربة فاشلة لا بالعكس المطلقة بطلة لان انتفضت النفسها وما قبلت بالذل والأهانه و تركت كلشي وراها واختارت نفسها وكرامتها وسعادتها وثاني شيء لازم تفكرين زين قبل كل خطوة تخطينها وتختارين الصح وبنفس الوقت بعد وقت الهيج خطوة لان أنتِ هسه يلا بديتي تشوفين الدنيا بعده الطريق گدامج طويل ، وانتِ بعد بكيفج تردين تتعرفين على الولد وتتأكدين مو كلها مثل رائـف لو  تردين تنهين الموضوع من الاول بدون ما يبدي انتِ حره اني وياج بكل قرار

— انا بعدني صغيرة على المريت بيه بعدني ما شفت شي من حياتي ولا عشت عمري تعبت گبل ومريت بـ ايام الله وحده يعلم بيها وما مستعده ارجع اعيش تجربة العرس والرجال والعيال من جديد اريد اعيش تجربة الدراسة والنجاح اريد ابني مستقبلي و ادرس و اجتهد ما اريد العرس

— هذا هو ما تردينه منا وينتهي الموضوع بس ارجع واكول مو كل اصابعج سوى لا تبقين تشوفين كل الزلم نفس الشوفه

— لا ادري كلش زين مو كلهم سوى ابوي الله يرحمه يختلف على عمي غازي و عمي حاكـم يختلف على رائـف  و واثـق يختلف عليهم كلهم و هسه عمي هاشم يختلف على الباقين و ولده نفس الشي

— عفيه عاشت ايدج وهسه انسي الموضوع و بعد ولا تفكرين بيه

— ان شاءالله

— يلا نامي تصبحين على خير

— وانتِ بخير

راحت امي تنام وانا ضليت بفراشي اتكلب

واتذكر الايام العشتها بـبيت عمي حاكم

و معاملة رائـف اليه ومعاملة عمتي بديعـة والشغل الجنت اشتغله التعب التعبته

جنت من انام عبالك ميته مو نايمة من گد ما اتعب

تذكرتها من شمرت عليه الخبز و التنظيف وكل شغل البيت وگعت دمعتي بسرعه رفعت ايدي مسحتها واگول لا حول ولا قوة الا بالله العلي العظيم

غمضت عيوني وشريط ايامي وياهم كله مر عليه صح صغيرة بس عشت الما عاشة بشر وتحملت الما يتحمله بشر الدنيا شگد حقيرة وتدوس على الفقير وما ترحمة ضليت مغمضه واتذكرهم واتذكر مواقفهم وياي لحـد ما غفيت

عدت يومين ورجعت العلوية خابرت امي وامي تعذرت منها وگالت الها

–ما تريد الزواج تريد تكمل عذرونا

ردت

— قابلين تكمل وشوكت ما تحدد الزواج تحدده المهم هسه يعقدون وراها كلشي سهل وراها يتعرفون ويحددون الوقت المناسب للزواج هسه بس خطله

— والله يا داده ما ادري شگولج بس الابنية ما تريد وقافلة واني ما اگدر اضغط عليها عذريني وربي يكتب الكم الأحسن منها

— بعد انتوا بكيفكم واكيد ما نضغط عليكم بس خليها تفكر و تشاور عقلها و رجعيلنا خبر شوكت ما تاخذ قرارها احنه منتظرينها

امي قفلته منها واجت سولفتلي على المخابرة وانا نفس الشي ما مقتنعه بالموضوع وافكر البعيد اخر شي من گامت امي وبقيت وحدي تذكرت امه من تكول اتوسل بيه اريده يتزوج وما يقبل ابتسمت واگول ما صدگت ابنها اقتنع واجت تلح تريد بس تخلص منه

من يومها وبعد انسد الموضوع بيتنا وعمي هاشم ابد ما جاب طاري ولا تدخل نهائياً وامي سكتت وبعد ما اتذكر اي شي وره  عشر ايام رجعت امه اجت وبيومها انا لا طلعت ولا شوفتها روحي

شگد صاحتني امي رادت ما طلعت طبيت الغرفتي وبعد ما شفت واحد منهم استحي اروح اگعد يمهن واخاف اروح وامه تحرجني وتبقى تحچي وياي بالموضوع احسن شي ابقى بالغرفة وما اطلع منا لمن تروح

اخر شي راحت ومن راحت امي اجت تحچي عليه عيب وليش ما طلعت وليش ما شفتها انوب سولفت جايه تسأل وتشوف الوضع وامي رادتلها نفس الرد القديم الابنية ما تقبل

ومنا وبعد الموضوع ما انفتح وبعد ما اجوا ولا خابروا والايام مشت والوضع طبيعي وماكو شي يذكر حياتنا هادئه وحلوة وعايشين برحمة الله لحد ما وصل موعد النتائج التمهيدي والحمدلله طلعت مؤهله للأمتحانات النهائية

ومنا وبلشت من جديد اقرأ وشاده كل قوتي ويا القراية والمواد صارت عندي زلاطه وامي وياي تشرح وتفهم لحد ما بلشت امتحن اخر السنه والحمدلله الامتحانات كلها صارت سهله عليه واطلع من الأمتحان مجاوبه ومتأكدة من اجوبتي كلها صح

وره الامتحانات اخذتلي أسبوع بس نايمة اگعد اكل واسبح وارجع انام طلع عليه التعب مال الدراسة والسهر بوكت الامتحانات

وراها امي بقت تسأل على مود الدوام بلكي انقبل بالمدارس المسائية بس طلع عمري جبير وما اگدر اداوم مسائي فـ مراد اقرح انتظر سنوات الانتظار وراها اقدم سادس خارجي

ومنا وبلش مشوار السادس اول شي حرت بين العلمي والادبي جنت متردده بقراري وامي تركتلي الخيار بس مـراد سوالي واهس على العلمي وبقى يشجعني ادرس علمي ضليت متردده وحايرة اخر شي گلت لا الوكت طويل عندي ثلاث سنوات يله يحقلي امتحن خليني اشد حيلي هاي السنوات واقرأ علمي واطلع معدل حلو اروح بيه قسم بيه خير

ومنا وبلش عندي مشوار السادس علمي

وامي سودة عليه افترت بالمكاتب تدور ملازم وكتب لحد ما جهزتني تجهيز كامل ومنا وبلشت اقرأ سادس علمـي

ما جنت اواجهه صعوبة لان بعد وقت على تقديمي لازم انتظر كم سنه وراها امتحن

فـ قريت براحتي وبهدوء وبتركيز وامي وياي خطوة بخطوة

الايام تمشي والوضع هادئ وطبيعي وماكو شي مهم يتذكر و كل واحد بينا عايش حياته بـ احسن صورة

عمي هاشم ماكو مثله والليل ونهار ادعيله

هوَ ولده علاقتنا بيهم اكثر من اهل صاروا اخواني والبنات وامهن نفس الشي علاقتنا بيهم طيبة وامي كسبت امهم وصارن دهن ودبس هيَ وياها والطبات والطلعات كلها سوى

رائـف واهله صفحة وانطوت من حياتي

ومنـاف ما اعرف عنه شي ولا شفته بعد ولا راسل من يوم اللي رزلته وزهـراء بعد ما خابرتني ولا راسلتني انگطعت المواصله بيناتنا بس هيَ ومراد بعدهي علاقتهم

جان مراد يحچيلي شلون يحبها ويريد بس يخطبها وهيَ ترفض وتتحجج وباقين هيج بلاية خطبه بس علاقتهم متطورة وصايرة بينهم طلعات وطبات وعزايم بالمطاعم شگد جنت انصحه لان اخاف عليهم لا احد يشوفهم بس يگول ماخذ حذري وما انطلع هواي

لحد ما بيـوم من الأيام جانوا طالعين يتريكون بمطعم جانت من الدوام تطلع وياه للمطاعم وما تگعد ولا تخاف جريئة وما تحسب حساب احد يشوفها

لحد ما طاحت بيها بيومها جانت گاعدة هـيَ وياه بالمطعم يتريگون ويسولفون بكل اريحية وحب على گولته وراها طالعين من المطعم و جايبها بالسيارة يريد يوصلها للجامعة ويا ما ماشين بالسيارة شويـة  طابگ عليهم منـاف و ناز على مراد

جاره من السيارة ومنزله وشابعة كتل بالشارع انوب ماخذ اخته و ماشي بيها

شـ سوالها ما ندري بس بوكتها مـراد رجع مسگط تسگط وما راده ولا حاچي وياه باقي ساكت وما مدافع على روحه لان يدري بروحة غلطان

بيوم المشكلة جنه انا وامي بيتهم جاين نتغده يمهم، وطب علينا صاير بيه فلم وميت ويرجف عليها خايف لا يروح اخوها يسويلها شي

اهله انخبصوا وصارتلهم هوسة كلش جبيرة عمي ضربة وغلط عليه وامه وامي واگفات بالنص يحمنه و انوب عمي خابر على تميم وخطية تميم لا بيها ولا عليها حصله غلطة وسبه

گعدوا كلهم مخبوصين و عمي طرد مراد ما خلا يگعد يمهم راح الغرفته وبعد ما طلع منها بين ما اجى تميم استلمة عمي لعب بيه جوله وتميم يرد

— ادري إني شعلية والله حلوة هاي

— طايحين الحظ ولكم لا منا ولا منا بنت صاحبي واخوها صاحبكم وصاحب فضل علينا كلنا الله يطيح حظكم

ام تميم :- إذا يريدها ما حچى ما گال ليش هيج يفشلنا ويفشل نفسه طايح الحظ يقبلها على اخواته

شهيناز :- على كيفكم انطونا مجال نفتهم من عنده مو هيج تنحل

تميـم :- هسه هوَ وينه

هاشـم :- صيحوليااااه طايح الحظ

راحن البنات صاحنه اجى بس يكسر الخاطر كلها ضده ومضروب الموقف الهوَ بيه ما ينحسد عليه

هاشـم :- تعال عديم الغيرة والشرف تعال اگعد وفهمني

اجى گعد ومنزل راسه للگاع خجلان منهم

هاشم :- صار شگد انتَ وياها

مـراد :- من زمان

— الله لا ينطيك إذا من زمان ليش ما حچيت ولك ناس يحبونا ويحترمنه تحطنا وياهم بهذا الموقف ليشششش

ساكت ما يرد رجع تميـم يگول

— فهمنا وين لگاكم منـاف

— بالمطعم مدري برى المطعم ما ادري بس بالشارع طبگ علينا و نزلنا اول شي ضربني انوب جر اخته واخذها تلگاها موتها هسه

ام تميم :- يطبها مرض مودينها تدرس لو تلعب ويا الزلم

مـراد :- عيب هذا الحچي الابنية اني احبها واريدها بالحلال ما لاعبة لا تحچين هيج عليها

— وإذا تريدها بالحلال ما حچيت ما گلت نروح نخطبها

هاشـم :- الله يصخم وجهك مثل ما صخمت وجهي گدام الناس

شهيناز :- إذا رايدها خلونا نخطبها ونستر السالفة بعد الحچي والملامة ما تفيد

عمي سكت وميت مستحي من صاحبه وخالتي ام تميم رجعت تأيد موضوع الخطبة لحد ما اتفقوا يرحون العصر عمي وخالتي وامي وتميم ومرته يخطبونها

بيومها حتى محد تغده انسدت نفسنا وللعصر بدلوا وراحوا مـراد ما راح وياهم بقى بالبيت اجيت گعدت يـمه لگيته حاط ايده على راسه و حاير

يُـمن :- شگد حچيت وياك تاخذ حذرك شلون ما تنتبه هيج

مـراد :- مو إني هيَ ما ترد وتلح وإذا اكلها ما نطلع تزعل بحچه ما تريد تشوفني ولا تقبل اجي اخطب ولا تقبل نقلل اللقاءات وتالي انحطينا بهذا الموقف من وره غبائها

— ان شاءالله راح يحلون الموضوع وياهم ويخطبونها وتصير حلالك ومحد اله يمكم شي لا تضوج

— خايف عليها خاف ضربها

— ان شاءالله ما مسويلها شي

بقينا انا والبنات ومـراد بالبيت متانينهم

وره ساعة رجعوا بس شنو عمي وتميم عيونهم تطلع شرار وامي وخالتي وجهن صفر عمي اول ما طب اجى على مـراد

جره من ياخته و گومه اول ما گام ضربه راشدي ويگول

— بعد مالك گعده هنا اطلع ديح بالشوارع وخلي يلوحك ويحط طلقة بگلبك ويكتلك مثل جلاب الشوارع السايبة

تميـم :- ترى هذاك هم واحد ما يستحي وما يقدر ولا يحترم شدعوة هيج رحنا واعتذرنا وخطبنا إذا هوَ هيج حريص ما لزم اخته من البداية ما عافها علي حل شعرها

هاشم :- انجب طايح الحظ ولا صوت

مـراد :- هسه شكو شـ صار غير تفهموني

— شتريد تفهم ولك متحلف بيك وين ما يلوحك يحط طلقة بگلبك وما انطه اخته وطردنا

مراد سكت و عيونه صارت حمر وانا والبنات متنه من سمعنا بهذا الحچي رجعت امه تگول

— يمه شجابك شورطك وياهم اخوها هذا مشكلجي وعبالك متحمل علينا وعنده عداوة قديمة ويانا

هاشـم :- لا متحمل ولا مشكلجي ابنج دايح ساقط و الولد مأمن بينه وحسبها غدر وخيانة

تميـم :- والله واحد سزز وما يتناسب عمي شجابنه عليه باچر إذا صارت وتزوجوا حرام إذا تزعل لو تصير مشكلة بيناتهم يشرنا على الحبل

عمـي گعد وكل جسمة يرجف ومراد راح الغرفته وبعد ما طلع من عدها امي مشت للمطبخ تجيب مي العمي رحت وراها واسأل بيها والبنات اثنينهن اجن ورانا يسألن گالت

— يبو شنو هذا شمسوي بـ اخته شمسوي بـ اهله لاعب جوله بيهم

يُـمن :- شني كاتلها

— اموتها موت ما باقي عظم صاحي بيها شايفها من جانت بالمطعم بس جماعته وياه وما جاي عليهم انوب طالع وراهم وهناك بالشارع لازمهم وناهي نهي امها تسولف وتبچي

— خطية

— انوب تعارك ويا عمج وتميم يگول هذا جزاءة الثقة والاحترام هيج تخونون العشرة

سكتت واگول بگلبي عليه حلال وعلى العالم حرام مو خابرني نص الليل مسوي روحه زهـراء ولو منطيته مجال چا سوى اكثر من مراد واخته

شهيناز :- يمـه يُـمن عمت عيني إذا بيوم من الايام انطيج اله ربج يحبج وخلاج ترفضينه وما تورطنا وياه

مهـا :- شنو خاطب يُـمن

شهيناز :- اي قبل فترة امه اجت تخطب

— والله اني اشوفه خوش ولد بس اخته واخوي غلطانين وهاي ردت فعله طبيعية اخته گاعدة ويا ولد بمطعم وانوب تصعد بسيارته شتردونه يسوي

شهيناز :- اي حقه وزايد الحق حقين لان مراد صديقهم ويثقون بيه ويأمنون بيه بس مو الهاي الدرجة اعصابة ما تنحمل ما يتفاهم وما يحسب للمقابل حساب يعني كل البشر تجي ساعة يصير عصبي بيها بس يبقى يقدر ويحترم مو الهاي الدرجة ابو ما اله كلمة وياه وامه خارطه العافية والابنية مزوركة ومكسرة مو هيج كلشي بالتفاهم ينحل واحنه اجينا نخطبها ونعتذر ماكو داعي يتجاوز ويهدد ولا اكو داعي يطردنا

— شگالكم

— گال وين ما اشوفه احط طلقة بگلبة ومالكم مـره يمنا وبعد هذا الموضوع ما ينفتح واهلاً وسهلاً بيكم

يُـمن :- خطية هسه شلون حالها

اخذت امي والماي ورجعت گعدت يمهم وانا والبنات رجعنا وراها هم گعدنا وياهم

لليل كلش يلا  وصلنا تميم البيتنا

وراها عدن يومين وعمي ما جاي علينا

و امي باقية تخابر كل شوية تسأل على الوضع انوب عمي وخالتي راحوا مره ثانية عليهم واعتذروا و هاي المره ما لاگينه بس ابو جان موجود

الرجال معاتبهم وعمي باقي يعتذر وخاطبها منهم من جديد راجع ابوها يگول  ما يقبل ينطيها وقافل عليها وعلى مراد فد مره

ومراد باقي خطية كاتله القهر عليها يريد بس يعرف شلونها وشلون وضعها خابر على امي و حچى وياي يريدني اخابر على خطها واجرب اشوفها بلكي احصلها

بقيت حايرة بين مراد وبينها خطية وبنفس الوكت اخاف اخابر خاف اسويلها مشكلة

من بعد تفكير طويل وملحه من مـراد

طلعت رقمها و دگيت عليها اشو بسرعة دگ ما مقفول الخط بس محد يجاوب

رجعت دگيت مره ثانيـة انفتح الخط بس بدون صوت گلت

— الو

ماكو صوت رجعت گلت الو اجاني صوته يگول

— الوو

بسرعة قفلت الخط بوجهه بس قفلته اجتني رساله مكتوب بيها الظاهر يا مراد

ناوي تموت قبل يومك وما تجوز ولا تتأدب

اصبرلي جايك

انا قريتها وانا گلبي طاح بين اديه يمه هذا عباله مراد گاعد يمي ويريد يحچي وياها

حرت شلون بيه يربي راح يروح الولد بيها

رجعت كتبتله

— لا والله هاي انا يُـمن من وحدي اخابر والله محد يمي مراد معليه

ردلي

— وشعندج مخابرة شنو المناسبة

— اسأل على زهراء والله بعد ما اخابر بس لا تحاجيها ولا تحاجي مراد والله معليه انا من وحدي دگيت

رجع دگ عليه گمت وگفت وگفه وميته من الخوف رديت عليه وگلت هي خربانه خربانه خل اجاوبة وابري الولد لا يروح بيها گال

— الوو

— الو

— وينه مراد انطيناه

— لا والله ماكو مو يمي و محد يمي والله

— انطينياااااه اگلج

— والعباس مو يمي والزهرة محد يمي

سكت ما سمعته بعد رجعت اگول

— الوو

— شعندج مخابرة

— اريد اشوف زهراء حرام عليك هيَ مو اختك ليش هيج تسوي وياها ما تخاف من ربك تكتلها هيج كتله وتاخذ نقالها وتبقى تراقب بالنقال بلكي تحصل لزمه جديدة عليها انوب من يجون يخطبونها ما تنطيها يعني وين تريد توصل شني هذا الظلم هسه هيَ غلطت وحقك بس اجوا الناس يخطبونها و يعتذرون خليها تتزوج وتنستر لو مكيف بالفضايح انتِ لو تحبها وتفكر بيها صدك چا صاحبتها و خليتها تحچيلك كلشي وما تضم عليك ومن تشوف منها غلط تصلحه الها بلاية هوسة وفضيحة البشر مو معصوم وكلنا نغلط ونتحاسب حتى بعد ما نعيد الغلط بس مو باقي الطريقة ما تستحي تطبق اساليب السجون والمراكز ويا اختك

ما جاوبني رجعت اگول الوو الوو ما يرد عبالي انگطع الخط و جنت احچي وحدي كل هذا الحچي باوعت للنقال بعده مفتوح والمكالمة ما مگطوعه رجعت گلت الووو

نفس الشي ماكو صوت انا مو ما اعرف بسوالف النقالات كل ضني الشبكة راحت

وما يسمعني رجعت اگول

— انطرش بعد ما يسمع المجرم

حچيت هيج وسديت الخط رجع دگ مره ثانية رديت

— الوو

منـاف :- اي وبعدين

— شني البعدين

— هسه اني اطرش و مجرم واطبق سوالف السجون بـ اختي مو

سكتت ما جاوبت رجع گال

— زين والله ست سايلنت طالع اللسانج وگايمة تحچين  يلا اني احب اسمع صوتج علميني هسه شـأسوي اصفك الها وعادي اعبر الموضوع واغلس هيج اني گرن

— لا حشاك بس مو بهاي الطريقة تعاقبها هسه مو كتلتها و كتلت مراد كافي بعد زوجهم وخليهم ينسترون حرام عليك توكف بقسمتهم

— اي صح

— يعني راح تتنطيها المراد

— لاا

— چا إذا لا شعندك باقي تاخذ وتنطي وياي بالسوالف لا تنطيها خليها يمك واتحمل ذنبها وذنب الولد برگبتك وخليها بعد يومين يجيها غير واحد يخطبها لا تحبه ولا يحبها ويشبعها ظيم وقهر وتعض وتالي اصابع ندم عليها وتضل شايل ذنبها طول عمرك

حچيت بعصبيه وسديت الخط بوجهه شلون قهرني هذا صدگ مدري شبيه وانا عبالي ادامي وصار ساعة احچي وياه واقنع بيه

شوية وخابرت على مراد گتله النقال عند اخوها دير بالك تخابرها

مـراد :- جاوبج

— اي عباله انتَ گاعد يمي

— زين شگال بعده قافل ما حچيتي وياه

— حچيت بس مدري شبيه ما يسمع الحچي و شايف روحه شوفه

— والحل شأسوي يُـمن راح اموت

— ماكو مشكلة مالها حل گول يا الله

وان شاءالله تنحل إذا الكم قسمة لو مو اخوها تنجمعون وإذا ما الكم لو الدنيا كلها وياكم ما تصير بس انتَ لا تگطع الأمل وخلي عمي يروح الهم مره ثانية

وان شاءالله يقتنع بس لا تأيس من رحمة الله

— ونعم بالله

قفلته من عنده ورحت سوالفت الامي وامي لعبت بيه طوبة شلون احچي وياه واخذي وانطي ما قبلت عليه لان خابرت وتدخل

وره يومين عمي وامي وخالتي راحوا عليهم من جديد وانا ضليت بيت عمي ويا البنات بيومها تأخروا ما رجعوا واحنه گلبنا مثل النار وكلنه ندعي الخاطر مراد الميت عليها

وروحه مفرفحة

ومن رجعوا وجوهم مرتاحه تلگيناهم نسأل عمي صاح على مراد اجي گعد يمنا

هاشم :- قبلوا ينطونها بس بالاول تروح وتتصافه ويا منـاف وتطيح على حسن وعليه وتعتذر من غلطك

مـراد :- ادري بنفسي غلطان وعادي اروح اعتذر لان غلطت بحقهم ما عندي مشكلة المهم وافقوا وهذا هو

— اي وافقوا وباچر نروح عليهم وهناك نحدد موعد الخطبة ونتفق على باقي الاجراءات

عبير مرت تميم هلهلت و البنات گامن باسن اخوهن فرحانات وهوَ الفرحه من

ما شالته الگاع وثاني يوم راحوا واخذوه وياهم تميم گوه عليه ما قبل يروح وضايج من أسلوب مناف وياهم بس عمي اخذه غصباً عليه

ومن رجعوا اجوا متفقين على كلشي ومتصالحين ومحددين موعد الخطبة الجمعة الجاية

ومنا و بلشنا انا وامي نجهز للخطبة امي ما خلت حاجه ما اشترها الها والي واخذتني للصالون مالتها و هناك استلمني حفافة تنظيف رتيب تعديل عادني للحياة من جديد طلعلي شكل جديد

وامي گصت شعرها و صبغته وملابسها تخبل عبالك مال شيخات صارت تجنن لحد يوم الخطبة ما خلينا شي ما جهزنا والبنات اخواته ومرت تميم نفس الشي يجهزن ويحظرن

وبيوم الخطبة من الصبح رحنه البيت عمي وياهم بالشغل والترتيب وره الغده بدلنا

و طلعنا تميم ما خله واحد ما عزمة وكلهم ضباط سواها عناد وياه مناف عود مو بس انتَ ضابط وثكيل احنه هم مثلك وصارت هذيج المشية التخبل

طبينا البيتهم لگيناها رايحة للصالون ومشترية فستان يخبل وطالعه كلش حلوة

اول ما شافتني ضحكت وراها بچت اجيت سلمت عليها وبستها لزمتني من ايدي وتگول

— فضلج ما انساه طول عمري اريد ربي يسعدج ويفتحها بوجهج

ضحكت ورديت

— ليش انا شـ مسوية

— منـاف وافق واقتنع من وره ما خابرتيه اريد ربي يستر عليج ويكتبلج كل خير

ابتسمت بدون ما ارد واگول بيني وبين روحي الله يهديك ويصلح حالك لو ادري هيج تصير حباب وتسمع الحچي چا خابرتك من اول يوم الطلابة

بقينا منتظرين ربع ساعة تقريباً وراها خطبوا امي وخالتي ام مناف طشن جكليت ويهلهلن وراها لبسوها واخذوها للغرفه تعقد وانوب مـراد و عمي وابوها و منـاف طبوا يمشون سوى للعقد

باوعت عليه لابس دشداشة سودة وشكلة هيبة والله مو مجاملة بس صدك حلو وهيبة فات مدنك راسه و طب وياهم الغرفة العقد

بين ما عقدوا عمي والباقين طلعوا ومـراد اجى گعد يمها لبسها الحلقة و اخذوا صور واكلو كيك وشربت وطلع والبنات اخواته يركصن فرحانات لحد ما خلصت الخطبة

و طلعنا

انا جنت لابسه فستان وحجاب وحاطه مكياج خفيف كلش، صدك  هدومي حلوات ومرتبات بس عاديات مو شي بارز

و مبين يعني ضايعة بين باقي البنات وتبديلهن ومكياجهن

طلعنا من بيتهم الناس صعدت بالسيارت وانا ويا البنات صعدت و صوت المسجل عالي بالسيارة والبنات يصفگن ويهوسن وانا اباوع الهن مبتسمة انوب ما ادري شلون درت وجهي للشارع شفته واگف يم الباب وعيونه طابة بنص السيارة ويباوع عليه

من شافني شفته ما دار وجهه ولا اهتم بقى يباوع انا بسرعة درت وجهي من عنده لحد ما مشت السيارة ورجعنا للبيت وهناك سوينا حفلة من جديد

خلص هذا اليوم بخير وسلامه و بالليل دگت زهـراء على امي جاوبتها أمي

و سلمت عليها گالت الها اريد احچي ويا يُِـمن جابت امي النقال وانطتنياه گالت زهراء تريدج

رديت عليها وتسالمت وراها گالت يُـمن هذا منـاف گاعد يمي و يريد يحچي وياج بموضوع مهم الله عليج بس اسمعيه و لا تسدين الخط

يتبع…..

يـاسـة 🌱

جمعة مباركة عليكم حبايب گلبي

و تذكر بخصوص موعد النشر لحد الأن باقي مثل ما هوَ بين يوم ويوم وبيوم اللي ما انزل اكيد صار عندي شغل وما گدرت اكتب متابعة ممتعه  ♥️