رواية عروس الجبايش الفصل الثالث عشر 13 – بقلم ياسة الموسوي

عــروس الچبـــايــش 🌼

بــقلم يـــاســـة الحلقة (13)

بسيطـة هــي أحلامنا ولكــن يبـدو

أنهــا جــاءت فـي زمــن بخيـل

أحببنــا الحيـاة وتمنينــا أن نعيــش

كمــا نــريـد خانتنــا وأرغمتنــا على أن نعيــش كمــا تـريد فـ سلامــاً علينـا

وعلـى أحـلامـنا وقلوبنـا وخطواتنـا

وجميـع محاولاتنــا

………………………………..

يُـمن :- بس سمعت صوته رجعت ليوره

و إحس رجليه ماتت ما اگدر اوگف عليهن كلش كسرني وكسر خاطري ما اريد اشوفه ولا اريد اسمع صوته

رجع يدگ بالباب و انا واگفه و ما اگدر افتح واشوفه گـال

— فتحـي

ما جاوبت عفته وطبيت اركض الامي گعدتها فزت من النوم مرعوبه وتگول

— اسم الله شبيج

— واثـق يدگ بالباب

گعدت گعده و هزت رأسها و راها گامت للحمام غسلت وانا امشي وراها وهيَ تمشي وتتحرك على راحتها ولا عبالك اكو واحد يدگ بالباب

يُـمن :- يما رائـف بالباب

— خلي واگف ساعه وساعتين ويوم وشهر لحد ما يتأدب

— ما راح تفتحين

— لا

اجت للمطبخ فتحت الثلاجة و گامت تحضر بالريوك دگ نقالها راحت تشوفه ورجعت تگول

— هذا هو جاي يخابر

— انا اگول طلعي واحچي وياه حتى يطلگني

— لا اطلع ولا احچي وياه عوفيه عليه الا اطيحلج حظه واندمه ، طفي الجاي راح احترك

طفيت الجاي واخذت إمي الصينية ورحنا للديوانية الباب بعد ما اندگ والنقال هم ما دگ بعد اضن راح

شهيناز :- اكلي لا تصفنين وتعيشين الدور

— ما اشتهي

— تشتهين وغصباً عليج يلا اكلي

شلت الجاي شربت شوية وهي سوت لفه وحطتها بـ ايدي اكلت و گلبي هناك يم الباب راح بعده واگف

دگ نقالها مره ثانية بس هاي المره عمي هاشـم ردت عليه وانا گمت للمطبخ غسلت المواعين وعزلت المطبخ اجت وراي وتگـول

— لبسي راح نروح للبيت الجديد

— مالي خلك عوفيني هنا إذا ما عندج شغل اليوم

— لا عندي يلا فضيها

راحت تبدل وانا كملت المواعين ورحت بدلت وطلعنا انا وياها للشارع اجرنا تكسي وبوجهنا للبيت من طبينا لگينا ابو الكاونتر

جاي يشد بيه وابو الاخشاب يشد بالغرفه

أمي ضحكت فرحانه عمي مسويلها مفاجأة ومشتري غراض جديدة ما تدري بيه

تذكرت أنـا شلون فرحت بـيوم الجابوا الغراض و شدوهن عبالي الي والبيت بيتي ثاري طلع يجهز المرته الجديدة منكم لله ماگول غير شي

گعدنا انا وامي بالديوانية وهمَ يشتغلون كل واحد بمكان ساعه وكملوا وراحوا

اجينا انا وامي نباوع للغراض تخبل تخبل

هاشم :- ها شلونهن

شهيناز :- حبيبي اروحلك فدوة الله لا يحرمني منك يجنن

— بعد عندي مفاجأة ليُـمن

حچى هيج وضحك وطلع من الغرفه وأشر النا نجي وراه طب للغرفه الثانية جايب بيها

غرفه اخشاب تركية صغيرة جانت مديل التركي هسه نازل ومسوي ضجة بوكتها باوعت عليها كاملة جرباية وكنتور وميز مراية و رف طويل بصف الميز

امي ضحكت فرحانه من كل گلبها وانا ابتسمت وباوعتله واگـول

يُـمـن :- رحم الله والديك عمي ما تقصر ليش كلفت روحك

— ماكو اي تكلفه هاي غرفتج الخاصة وشي بسيط الج حتى تاخذين راحتج بيها الف عافية

— الله يعافيك ويطول بعمرك

طلع من الغرفـة وامي باستني فرحانه

بـ بيتها وبغراضها و بغرفتي و راحت طلعت وراه

گعدت على الجربايـة بعدهي مابيها دوش

وضليت اباوع للغرفـة واحچي ويا روحي شصار لو من الاول اجيت هنا و ما رحت عليهم ولا تزوجته وانكسر ظهري شصار

لو من الاول انا وامي مرتاحين وعايشين حالنا حال الناس

شوكت اصير مثل امي وانسى واتخطأ هيج بسرعة شو حتى أخوي تخطئته و ما تذكره ولا تفكر بيه معقوله ما تحن عليه ولا يجي على بالها شني نسته لو تكابر حتى تعيش بعدني گاعدة وصاحت عليه طلعت الها

شهيناز :- مسحي الاخشاب مال الغرف اثنينهن واني وعمج رايحين ساعه ونرجع

— وين رايحين

— نجيب الاجهزة الكهربائية وباقي النواقص

— صار

— لا تفتحين الباب لحد

— اي

طلعت هيَ وعمي وانا مسحت الاخشاب والكاونتر من بطنه ورجعت مسحت البيت من جديد بديتول لحد ما كملت كل شي

رجعت طبيت للغرفه مالتي حطيت ايدي جوه راسي و انمطلت

ما گدرت انام شبعانـة نوم و شغل ما عندي  اخلص بيه الوكت ضليت حسبه تاخذني وحسبه تجيبني و الدموع على خدودي ينزلن

خلص الظهر والعصر وانا بالبيت وحدي وامي ما رجعت واكل ماكو هو انا من الاصل ما اشتهي بس ضل بالي عليهم لان ما تعوفني بلاية اكل طلعت للحوش شغلت الماطور و غسلته الحوش ورشيت الحديقة وگعدت متانيتهم للمغرب وانفتح الباب وطبوا اثنينهم

شهيناز :- سودة عليه تأخرت عليج وانتِ لا اكل ولا شرب تعاي جبتلج اكل وياي

يُـمـن :- لا عادي ما اشتهي

— يلا تعاي بسرعـة لا تشلعين گلبي

طبينا انا وياها گعدنا بالهول انا اكل وهيَ رجعت ويا العمي اطبب بالغراض جايبة جدورة ومواعين و اشكال واللوان غراض مطبخ بعدهي تعزل بيهن واندگ الباب وجابوا باقي الغراض وراهم ثلاجة وطباخ

و اوفن و خلاط والفراش والمخاد كله جديد

گمت وياها عزلنا الغراض كلها كل واحد بمكانه الخاص وهي طايرة من الفرح بيهن

وانا اعزل و اسولف ويا روحي عمي شني شغله منين جاب هاي الغراض كلها والبيت هذا اليخبل الله يرزقه بس شني شغله هي گالت واصل بس ما گالت

شـ يـشتغل واستحيت بعد اسألها هسه تگول شافت الغراض والبيت و حطت عينها

لحد لليل يل كملنا كل شي و رجعنا البيتنا و بس وصلنا امي وعمي طبوا ناموا وانا ضليت گاعدة وايدي على خدي الوكت يمشي عليه يركض ركض وانا مثل الحايط

لا الي حياة ولا الي عيشة اضل هيج يتغير حاليالله أعلم

ثاني يوم اخذنا بس هدومنا و رحنا للبيت الجديد ومنا وبعد استقرينا بيه و البيت القديم سمعت على أساس راح يأجرونه

هو وغراضـة الغير ناس

مر اليوم والاثنين والاسبوع والعشر ايام والشهر وانا بيت امي و عمي صار يجي هنا اكثر من قبل و أمي عين الحارة باردة عليها عروس شوكت ما تجيها المكياج والتبديل والريحة التخبل والاكل اشكال والالوان مدللته ومدللها وهذيج السوالف التخبل وهذيج الگعدة الحلوة مسويتله واهس ما يفاركها تضيعونه تلگونه يمنا گاعد ويباوع عليها الليل ونهار

وانا بس اكل وانام لا اشتغل ولا اسوي شي اكثر شي اسوي اغسل المواعين مال الغده لو اطلع اغسل الحوش وباقي الوكت كله گاعدة على البلازمه واتابع مسلسلات تركيا

و القهر باقي بروحي لا احچي ولا اشاركة الواحد ولا اشكي جنت اشرد منه واروح اباوع على مسلسلات وبعد ماكو اخبار عليه ولا أنا سألت أمي ولا أمي فتحت موضوعهم بعد انسد بيتنا

لحد ما بيوم من الايام جنت اباوع مسلسل تركـي بوكتها جان المسلسل التركي هسه طاش والناس كلها متابعته والدنيا كلها مگلوبه عليه

جنه انا وامي گاعدين نباوع بالهول وعمي وأبنه تميم الجبير بالديوانية يشتغلون

جان تميم يجي كلش هواي علينا بس ما يحچي وياي شي غير بس السلام وهذا هو يگعد يم ابوه لحد ما يخلص شغله و يروح

صدگ مرات عود يحشش ويشاقة بس ما متجاوز حدودة وياي ابد و من عاشرتهم عرفت طبعه هوَ هيج يحب يسولف ويتشاقة وماله قصد بشي عكس گبل عبالي عوينج وابو نسوان

صاح عمـي على امي گامت تشوفه شوية واجت وجهها مگلوب وضايجة باوعتلي وگالت

— عمج حاكم و رائـف جايين علينا

فزيت من مكاني رجعت گالت

— لا تفزين ولا تعيشين اللحظه ماكو رجعه لو يشعل العشرة شمع

ما حچيت عفتها وگمت الغرفتي كلي ارجف و الغصه وگفت بنص روحي باوعت الروحي بالمراية واگول

— شبيه ارجف خايفه منه لو مشتاقتله لو مقهورة على روحي وشيـريد جاي مو عرس وشاف حياته شيـريد بعد جاي ولا ارجع ولا اريدة لو يموت ويموتني

ضليت اخذ الغرفه واجيبها و دمي نشف واظافري اكلتها كلها لحد ما عدت ساعـة وشوية و سمعت باب الشارع اندگ وراها صوت عمي ابو رائـف يسلم وعمي هاشم يرحب بيهم

گعدت بالگاع ارجف طبت امي عليه لگتني گاعدة باوعتلي ما عاجبها حالي وحچت

— ديري بالج تجين حتى لو صاحوا عليج لو اني صحت عليج وكتلج تعاي ما تجين سمعتي

— انا ما اريد ارجع ما اريدة

—  اي هوَ ما ترجعين بس ديري بالج تجين مفهوم

عافتني وراحت يمهم بالديوانية و أنا اجيت وحطيت إذني على الباب مال الديوانية من جهه الهول اريد اسمع الوعود الجايين بيها هاي المره شني

سمعت عمي حاكـم يحچي شلون من راح على وجهه للچبايش ولگاني يردون يكتلوني وشلون جبر أبنه عليه وأبنه يحب بنت خالته ويريدها من الصغر يعني كله الحچي الجاي يحچي بس حتى يبرر عرس أبنـه ويطلعه مظلوم ومجبور و ماكو منه

الكل ساكت وبس عمي يحچي شلون ابنه تعب وخربت حياته بس بقى محافظ عليه وما عافنـي  حتى سالفه الانتحار مال أديان سولفها انا من سمعت الحچي هذا افتريت ورحت الغرفتي گاطعه الامل حتى من عمي

ساعه تقريباً وهمَ عدنا ويحچون بهدوء وراها سمعت صوته ضل يحچي بعصبيه وراها اجاني صوت أمـي انوب علگت بينهم

لحد ما عمـي هاشـم صاح على امي وسكتها عافتهم وطلعت وهـيَ تگول

— والله لو تتعلك نخله براسه ما يلوح شعره من راسها بعد

اجت امي للهول و همَ بعد مناك طلعوا بس طلعوا اجـه عمـي هـاشم على امي بيومها تجاوز عليها لان صيحت وهو گاعد وما أحترمته بقى يصيح ويغلط و هيَ ما سكتت منه ضلت ترد عليه وابنـه موجود وكل الهوسة صارت گـدامه وهـوَ غلط عليها وگالها طايحة الحظ هنا هيَ طاحت وگالتله

— اي أني طايحة الحظ و أنتَ لا تتدخل بـبنتي ولا تگعد بگعدتها هاي بنتي مو بنتك ومالك اي حق تحچي عوفني اني أربيهم هذول الادب سززية

— هو منو متدخل بنتج أني احچي على صوتج العالي وتجاوزج واني واگف

— من حقي اتجاوز واصيح والدنيا اگلبها ما تدري بيهم شمسوين بيها لعبوا بيها فلم وساكته ما تحچي وترد عليهم

— كل عائله بيت تصير بيها مشاكل وإذا على زواجه ترى بنتج اجت وخربت حياته هو من الاصل جان يريد غيرها ماكو داعي الهاي الهوسه بعدين شكو گلبتي الدنيه تزوج عليها وتزوج عليها مو انتِ تزوجتي واحد متزوج لو على الناس حرام وعليج حلال

— ماكو داعي الهذا الحچي وعيب عليك تحچي بيه وبنتي مالك شغل بيها وما مسموحلك تتدخل بحياتها لا من قريب ولا من بعيد هاي گدام أبنك ممنوع يحطونك وسيط وتبقى تضغط عليه اطلع منها وعوفني أني وياهم

— خره بيج وبـنتج وخره باليدخل بيها بس سمعي زين وحطي هذا الحچي براسج إذا سمعت بيج متصايحه وياهم لو معليه صوت ادفنج هنا بهذا البيت وانعل اليطلع وراج

هسه غير شافته عصبي ويصيح تسكت منه وتتكفى الشر ماكو ضلت تاخذ وتنطي وياه گـدام أبنه وهيَ من الاصل معليه صوتها

و متعاركه ويا الناس گدامه غير تكف ماكو قفلت و بس گالها ادفنج ردت عليه

—  اي يدفني غير دفان أبن دفان

هيَ گالتله هيج وهو تخبل ركض عليها موتها موت اجى وگف تميم بينهم وجر ابو منها ويحچي وياه يريده بس يهدى و امـي طبت الغرفتها وصوت البچي وصل للشارع

و عمـي باقي يغلط عليها وأبنه كل شويه وگاله صلِ على محمد گول يا الله مو هيج

وانا تمنيت الگاع تنشگ وتبلعني وبعد ما يطلعلي ذكرت ولا اشوف احد على الموقف الانا بيه الدنيا انگلبت من وراي ومن وره مشاكلي

عمي هاشـم وابنه راحوا و البيت فرغ محد بقى بس احنه رحت انا وره امـي الغرفتها لگيتها تبچي من شافتني طبيت بسـرعه گالت

— كله مني اني الوديتج للتهلكه بـ اديه

— تعاركتي ويا عمي وطگج من وراي گدام أبنه

— لو اعرف يموتني ما اسكت على هذاك الناقص فوگاها جاي يشمر عليه بالحچي وهو ابو الراهي ابن الكلب فوك ما كسر بختج جاي وحاسب الخالقه ما خلق غيره بسيطـة اني اله

— عوفيه لا تحچين وياه بعد هوَ ما يسكت وانتِ ما تسكتين وعمـي ما يرضا وتخرب حياتج من وراي

— معليج بعمج واصلاً ماله حق يدخل بيج انتِ بنتي مو بنته وماله حق حتى يحچي بموضوعج

سكتت وعفتها ومر هذا اليوم علينا والوراه والوراه كلها قهر بقهر روحـي گمت ما اتحملها الدنيا احسها ضايگه عليه عمي هاشم بعد ما رجع و أمـي ضايجة ومقهورة شوكت ما تجيلها

باقيـة تروح للصالون مالها و ترجع بس بخلك ضيك وانا كل الوكت بالبيت إحس البيت صاير سجن صدگ انا ما اطلع ولا متعلمه على الطلعه بس هسه گايمة اختنك وحدي الليل ونهار بالبيت والقهر بگلبي لا احچي ولا اسولف ولا اشتكي كله گام يأثر عليه

شوكت ما تجيني گاعدة و بگلبي گومه سوالف عـدت أسبوعين تقريباً على جيتهم والمشكلة الصار وعمـي الهسه ما جاي ولا متصالح وياه أمـي واأمي صايرة روحها بخشمها بهاي الايام اجه تميم مره جاب مسواك و طب گعد شوية يم امي بالهول

انا ما طلعت يمهم ولا شوفته روحي أستحي و مره ثانية اجه مـراد بس ما فات من الباب جاب مسواك و سأل إذا محتاجين شي لو لا وراح

رائـف بعد ما اجه ولا سمعت شي عليه

لحـد ما عـده شهـر تقـريباً جانت الدنيا عصـر وأمـي بالصالون يوميـه تروح بال11 لو بالعشرة الصبح و ترجع ويا المغرب لو وره المغرب وكل هذا الوكت انا وحدي بالبيت

اندگ الباب رحت اشوف منو بالاول عبالي

واحـد من ولـد عمـي هاشـم لان بس هم يجون علينا يجيبون غراض البيت بس تفاجأت من سمعت صوت عمـي حاكم يگول هذا انا

بقيت واگفه وره الباب و حايرة افتح لو لا

رجع گال فتحي عمو وياي خطار استحيت منه و انجبرت افتح الباب اول ما فتحت شفته هوَ و بُــرهان و ابـو بُـرهـان

يُـمن :- هلا و كل الهلا تفضلوا

حاكـم :- هلا بيج حبيبتي عمو شلونج

— الحمدلله

محمد :- شلونج عمو

— الحمدلله على الله تفضلوا

طبوا جوا وانا امشي وراهم و ارحب بيهم بُـرهـان ما سلم عليه فات بلاية سلام وانا هم ما سلمت عليه إذا هذا الخير مالهم هيج لا عتب على الباقيـن

طبوا بالديوانية ويسألون على حالي واحوالي وانا ارد على گد السؤال سألوا على امـي رديت بالصالون ويا ردي صارت عيني على بُــرهان لوره شفته وهز راسـه مثل المستهزء بالموضوع ما ادري شبيهم على أمـي قابل اول وحده تتزوج عليهم حلال وعلى الوادم حرام

غلست ما حچيت شي وعفتهم ورحت للمطبخ حضرت الماي والجاي و خابرت امي گالت الها عليهم ردت

— ديري بالج ترجعين وياهم مسافـة الطريق واوصل

— لا شلون ارجع بس لا تتأخرين

— ما اتأخر

سديته منها واخذت الماي ورحت عليهم

گـال عمـي حـاكم

— خابرنا زوج امج أبو تميم گال مسافر ما ردنا نجي البيته بدون علمه

— البيت بيتكم مو غربة انتم

— شنو وضعج عمو حبيبتي لشوكت تبقين عايفه بيتج و زوجج

— ما ضل لا بيت ولا رجل عمي كلهن راحن وهوَ عافني انا ما عفت احد

— لا هذا الكلام ما مقبول منج تدرين كلش زين محد عايفج رائـف رايدج و مشتريج

— اي ادري من گد ما رايدني ومشتريني جاب شريجة على راسي

محمد :- بصراحة اني ما احب ادخل بين الازواج لا بخير ولا بشر لان اول شي البيوت اسرار وثاني شي اليدخل بنصهم دائماً يطلع بالوجه الاسود اول واخر يتصالحون

و الناس تطلع بالوجه الاسود وتتفشل الهذا السبب ما ادخل بينهم ابداً لا من قريب ولا من بعيد بس انتِ طيبة و حبابة ومؤدبـة

و ما يهون عليه يصير كل هذا الزعل بينج وبين زوجج الهذا السبب اجيت اليوم عليج و بنفس الوقت رائـف بمثابة بُـرهـان يعني انتوا الاثنين الكم معزه خاصه عندي

— الله يحفظك ويستر عليك

— رحم الله والديج ، شوفي بابا ما اريد ارجع احچي بنفس الموضوع واگول جان يريد بنت خالته وجان ناوي يخطبها وابو جابج وحطه گدام الامر الوقع لان هذا الحچي بعد ميفيد اللي صار صار و كل شيء انتهى وصرتي زوجته بس بنفس الوقت هو يگول اني منطيها خبر من قبل احب أديان واريدها يعني من الاول متفق وياج ومن الاول تعرفين بيه يريد غيرج يعني ما خلاج وراه صح تزوج بدون علمج بس هذا الزواج جان معروف من البداية وحسب كلامة من ضم عليج موضوع الزواج ما رادج تنقهرين هيج جاي يگول

— عمي انتَ على عيني وراسي وگبل شوية خوش حچيت حچي گلت البيوت اسرار وانا اگلك لا عاب حلگك صدگ البيوت اسرار واكو سوالف انتَ ما تدري بيهن انا صدگ اجيت غصب عليه واخذني مجبور وكثر الله خير كسب بيه اجر وخلصني من الموت بس من كتلني عمتي والبنات

و جبتوني بـ بيتكم  وراها اجيت الامي طلبت منه يطلگني و يروح يشوف حياته بس ما رضا و امي گالت الهم ما تتحمل الشرج وما تگدر عليه گالوا لا بعد ما يعرس خرب الخطبه و كل شي تريدة يصير مو صدگ عمي لو انا غلطانه

حاكم :- لا ما غلطانه بالله العلي العظيم فركش خطبته و بُـرهان شاهد و عمج محمد شاهد على كل حرف احچي الناس كلها درت بيه من خربها بس من انتحرت

تغير الموضوع ورجعها

— وانا يا عمي لعبه فركش رجع عرس يريدج انتحرت صحت

— لا مو هيج بس اكو شغلات صارت ما تعرفين بيها الهذا السبب رجعها و تزوجها

— وشني الشغلات عمي هذا مو مبرر حتى يرجعها ويكسر خاطري

— لا هذا مبرر و مبرر كلش كبير عمو حبيبتي تدري بيه شگد احبج وشگد اتمنالج السعادة والاستقرار بس الوضع مو مثل ما مفكرته صدگيني رائـف انجبر يتزوج أديان و ما اگدر احچي الاسباب صعبه بس ثقي هو يحبج لو ما يحبج ما يضم عليج زوجه

— شـضم وهو جايبها بيتي المتانيته يوم يوم يعني بـ رأيك ضم عليه بيوم العرس ما فكر ثاني يوم من ارجع ما راح اشوفه واشوف مرتـه

محمد :- يگول ما ردتها تنقهر وتشوف الزفه وتسمع الناس على أساس مفكر يفتح الموضوع وياج شوية شوية

— ههه چا ما فتحه گبل الزفه ما فتحه من خلاني بـ ايدي اغسل البيت واعدله وارتبه

يريد يفتحه وراه البدله والهلهوله حتى يحطني گدام الامر الواقع لو شني سالفته

سكتوا محد رد و عمي حاكـم بـاوع البُـرهان ورجع گالـي

— عمر بلا امر عليج جيبيلنا نفاضه

گمت جبت نفاضه ومن رجعت قبل لا اطب عليهم سمعت بُـرهان يگول

— گتلكم ما اجي وياكم من الاول جلبتوا اله تجي هسه شراح يغير وجودي وياكم عذركم اقبح من ذنب ما اشوف اي مبرر الهذا التمسك راح تگولون يحبها فـ اني اكثر واحد يعرفه بالعالم لا يحبها ولا هم يحزنون بس ليش هذا التمسك بيها ما اعرف گتله يا أخي انتَ تزوجت و مشيت عوف الابنيه تشوف حالها ماكو ما يرد وبشنو يفكر ما اعرف

محمد :- مو وقت هذا الحچي هسه جايين نهدي النفوس مو نزيد النار حطب يا أبني

— يابة مو كل الحچي ينحچي جان يشكي ويبچي بس يريد يخلص منها وياخذ حبيبته اشو من عافته و راح تزوج حبيبته رادها وصارت عزيزة والله هاي الابنية مسكينة صارت ضحيه أم انانيـة و زوج نـرجسي

حاكـم :- كله من عندي صوجي اني وصلتها الهذا الحال

طبيت عليهم بسرعـة سكتوا گعدت يمهم

محد يحچي ساكتين وراها بشوية رجعوا فتحوا الموضوع من جديد و بقوا يقنعون بيه ورجعوا يحاولون يثبتون هو يريدني

و يحبني لحد ما اجت امـي

گعدت يمهم و رجع الموضوع انفتح من جديد أمـي اللسان ما يگدرون عليها منين

ما يفوتون عليها تطلع الهم بسالفه تفرهم بيه ما انطتهم مجال و أخر شي خصمتها وياهم وگالت الهم

— رجعه ما ترجع لو يركع راسه بالحايط

و وصلوله هذا الحچي اني وياه والزمن طويل

توسلوا رادو عدلي بدلي حطي شروط ماكو ما ردت عليهم موقفها ثابت اله اخليه يعض اصابعه ندم اخر شي سلموا وطلعوا

عمي حاكـم وعمـي محمد طلعوا و بُـرهـان بقى واگف بالحوش من تأكد منهم راحوا گال الامـي

— طول الگعده واني ساكت ما حچيت ولا ادخلت بس فهمت نيتج شنو عايفتها يمج حتى تجرين إذنه مو صح لو غلطان قبل لا تردين اني اجاوبج اي صح وزين تسوين وعاشت ايدج بـس يا ترى تعرفين بـ رائف

تمشي وياه سوالف جرت الاذن والعقاب لو ما تمشي

— شنو قصدك تهددني لو شنو

— ابداً بس اريدج تفهمين عنادج هذا راح يضر بنتج و راح تكسرين ظهرها للمره الثانية شـوفي يا أم يـوسف إذا خايفه على بنتج مثل ما تتدعين فـ طلبي طلاقها وخصمي الموضوع وإذا الشغله شغله عناد بـ رائف حتى تردين عليه التجاوز اللي تجاوزة عليج فـ خلي بالج رائـف دكتوراة بالعناد ومستعد يحرك الاخضر واليابس ولا واحد يكسر كلمته وابد لا تحسبين هذا تهديد مو اني اللي يهدد مره لا بالله بس جاي ابعدج وابعد بنتج المسكينة من النار

و اتمنى تاخذين كلامي بعين الاعتبار

و تفكرين بمصلحة بنتج وتتركين غرورج شويـة

افتر و طلع وصل يم الباب و ورجع تقدم علينا كم خطوة و گـال بهدوء

— و لا تنسين بنتج بـذمه رجال وما يصير تطلع واطب ويا ولد زوجج بدون علمه بحجه يجيبونها ويرجعونها ولا تنسين شلون بنتج عجينه ومن أهل الله والناس شياطين والوضع تعبان فكري عدل قبل لا تخلين فلان ياخذها وفلان يجيبها ترى الشيطان بعده ما مات

عافنا وطلع وامـي اول ما طلع گالت بعصبيه

— طايح الحـظ

عفتها و طبيت جوا و هي طبت وراي تحچي عليهم وتغلط عليهم واحد واحد

وره يومين اجه عمي حاكم ونفس الشي امي ما قبلت حتى يفتح الموضوع

بقيت بيت امي تقريباً ثلاث اشهر وره زواجه روحي بهتت ومشاعري بردت ما گمت احس بشي قوي مثل قبل صدگ تجيني ساعه انقهر وابچي بس باقي الوكت عادي عندي عكس گبل جنت الليل ونهار افكر بيه ومقهورة

جنت كل شويه اصفن واگول هسه

شـ گاعد يسوي يسولف وياها يضحك ياكل شرب نام گعـد وبالليل اشبع بچي يلا اغفه

هسه لا بعد ما افكر وگمت اتعود على فراگه وإذا اتذكرته وبديت افكر بيه بسرعـة ارد على روحي هذا مو الي مو مالي من الاول مو مالي و لا گلبه الي من الاول هو ملك غيري وانا الاجيت وهدمت حياتها مالي حق انقهر ولا الي حق احاسبه

ليش اسأل وينه وليش افكر شيسوي شعليه اسأل عليه مو ما اريد ارجعله بعد ليش افكر واشيل همه شـيسوي هسه اكيد لو گاعد يمه مرته لو ياكل وياها لو يسولفون ويضحكون لو طالعين لو نايمين بعد عليمن حايرة شيسوي وشيسوي

گمت اجبر روحي على هذا الوضع حتى اتقبل فكره عرسه وانسى وما اهتم

بهاي الثلاث اشهر عمي حاكم كل اسبوع يمنا يحاول بكل الطرق يصلح الوضع بينا ويرجعني بس امي جانت معاندة ويا رائـف وما تقبل ترجعني اله وانا من الاصل ما عندي كلمه ولا اعرف اخذ قرار و روحي باهته وكل لون ما بيها عايفتها وره أمي

هنا عمـي هـاشم رجع تصالح ويا امي ورجع يروح ويرجع علينا بس الرجال مالت الله ما سمعني كلمه باطلة لو ثكل عليه

بالعكس ، بس قبل لا يتصالحون امي ما قبلت تصالحه الا تحط عليه شرط ما يدخل بيه و يعوفها هي تأدبهم

ومنا والرجال اشال ايده من سالفتي واصلاً من يوم عركتهم شال ايده مني وحتى من اجه عمي محمد وعمي حاكم وخابروا گالهم مسافر ما راد يتدخل واخر مره مخابرة عمي حاكم وطالب منه يتدخل واسطه خير بيناتنا رادله هذا الموضوع ما ادخل بيه بينكم وبينها حتى ما ذاكر اسم امي شامرها براسي گايله بينكم وبين يُـمن

مشت الايام وحالي مثل ما هو و عمي حاكم مل وبعد ما خابر ولا اجه و هنا رائـف قرر يجي وحده و عسى ما اجه ولا قرر بيومها تعارك عركه ويا امـي بحيث وصلت بيه فشر على امـي و تلفظ بكلمات

عيب تنگال بحق المره

وامـي سمعته لو تخبلت و صارت بينهم

فد نوب يعني الوضع كلش خرب ولو جان أكو أمل واحد بالميه امي ترجعني هسه راح الواحد و انتهى الموضوع

بيومها الف الحمدلله عمي هاشم ما جان موجود لو جان موجود وسمع بالعركة والحچي لا چا امي اطلگت و رائـف فصلوا بالعشاير و سجنوا بالحكومة على غلطه وحچيه

انا بوكتها ما طلعت ضليت بغرفتي وهم بالحوش واسمع حچيهم وغلطهم بوضوح

لحد ما طلع من البيت و هو يگول سهلة بسيطـة

السهلة والبسيطة هاي ما همت أمي

و مرمت عليها حالها من حال اي كلام عادي بس هو جان يقصدها ويقصد معناها

طبت تغلط و تسب وتنعل بيه وبـ اهله وبعشيرتـة وحتى أبوي سبته وشعلته شعل وهو بالكبر على هذول الاهل وهذول الگرايب هنا من شفتها هيج انفعلت

گلت هـيَ ما جاي تهتم الحياتي بگد ما جاي يهمها عنادها ويا رائـف وكسرت خشمه هيَ لو تفكر بيه چا حلت الموضوع بالتفاهم و فكرت بحچي بُـرهان وتحذيراته من هذا العناد وطلبت منه يطلگني وفضت كل هاي الهوسه

ضلت معاندة وعاجبتها روحتهم ورجعتهم علينا تريد تذلهم عود لحد ما تعاركت وياه وصلت بينهم الطريق مسدود هوَ طلع من البيت يتوعد وهـيَ طبت للبيت تسب وتغلط عليه وبالأخير و عودة تنفذت وفاز عليها وانا صرت الضحية للمره المليون

وثانـي يوم هيَ راحت للصالون مثل كل يوم و وراها بنص ساعه تقريباً اندگ الباب رحت افتحه وگفت وره الباب وصحت منو بسرعـة گال انا عمج غازي

ضليت واگفه وحايره شعنده جاي وشيريد رجع دگ مره ثاني ويگول

— فتحي عمـي اريد احچي وياج خابرنا أمي هسه راح تجي فتحي الباب بين ما تجي

وانا من گد ما ثوله وما افتهم طحت وفتحت الباب عبالي صدگ مخابر أمي وحاچي وياها

اول ما فتحت جفتوا علينا النص البيت هو

و عمامي الباقين اول شي سواه طگني جلاق خلاني اطفر من الوجع وراها جرني من شعري واخذني للبيت الجوه والباقين وراه شمرني بنص الهول ويصيح

غـازي :- وين عباتج ولج دايحـه لبسي عباتج بسرعـة

لبدت بالزاويـة و انا اتشاهد واگول رحت بيها بعد محد يخلصني منه رجع سحلني سحل و جبرني اللبس حجابي وجبتي

و اطلع وياهم وين ما ادري شراح يصير بيه ما ادري كل الادري بيه رجعت تحت اديهم وانتهى امري

يتبع…..

طبعاً ما اعرف شلون اشكر كلامكم الحلو على المنشور اللي نـزل الظهر لو بـ ايدي ارد عليكم وحده وحده بس والله ما اگـدر كلش هواي تعليقات أحبكـم ♥️

يـاســة  🌱