رواية بين قبضتهم وقلبه – الفصل الثالث والثلاثون
33
❂رقــــــو ـ الجـــوهر ❂
بـين قبضتهم وقلبه
💙 .
..
انا العَايش علىٰ عيونك
انا المايدري وَين يروح مِن دونك
..
كعدت لكيت روحي بالمستشفى و دَيهم يمي
ياقوت : دَيهم
ديهم : ها يحيلي ها يبعد ابوي ارتاحي انا يمچ
ياقوت : شجابني هنا
ديهم : بويه اجيت ولكيتج واكعه بالكاع المهم لا تعبين نفسج ارتاحي
ياقوت : شبيه
ديهم : مابيج شي ابوي انتِ بس يمكن شويه
جسمج تعبان لأن ما تنامين هواي
ياقوت : راسي دَيهم راسي يأذيني
ديهم : اسم الله عليج بيه ولا بيج بويه
من وجع راسي غفيت بعد مده كعدت حالتي احسن و دَيهم بعده يمي باوعلي وابتسم
ياقوت : دَيهم منروح للبيت؟
ديهم : يحيلي ربع ساع ونطلع
شواي وطلعنه رجعنه للبيت اول ما دخلت البيت احس شي خانگني ما اريد اكمل طريقي وكفت بالباب و دَيهم ماسكني
ديهم : شبيج بويه شي يوجعج كوليلي يعمري
ياقوت : حبيبي مابيه بس راسي يدور
ديهم : على كيفج يبعد حيلي بالهداوه
شافتني ريماس راحت لغرفتها وريهام كاعده بعيد ما اجت وام دَيهم اجتني ومرت بلال وريام ورغد وتحمدن لي بالسلامة دَيهم صعدني للغرفة انقبضت روحي بس دخلت بيها خلاني بالفراش وغطاني
ديهم : وليدي اسويلج شي تاكلينه ؟
ياقوت : حبيبي سبأ تسوي اهلك يشوفوك منا
عيب شيكولون
ديهم : خلهم يكولون ليريدو اذا بنيتي وحيدتي ما ادللها ادلل منو
ياقوت : يروحي حبيبي
ديهم : يعيون حبيبج هسه اجيج ما اطول
راح واني غفيت اول ما غطست بنومتي حلمت
شخص يموت من جماله طويل وضخم وملامحه خرافيه يشبه الملاك نايمه ع الجربايه ولابسه ثوب ابيض وطويل اجه يمي ومسد على شعري بس اتأمله من جماله يباوع بعيوني ومستمر يمسد بشعري كعد يمي ع طرف الجربايه ويبتسم بوجهي وجماله مينوصف ضليت بس صافنه بي كال
ـ انا جنتج وانا نارج بأي مكان تحبين تعيشين؟ ضليت ساكته ما جاوبته بس اتأمله واضحك نزل ايده على شفايفي تلمسهن انوب اني مدري شبيه فرحانه والله لو يدري رجلي المسودن يذبحني اني وياه كال
ـ بشنو صافنه؟
ـ بيك
ـ اختاري جنتي او ناري؟
يحجي ويتلمس شفايفي بأصابعه توا اريد اجاوبه وكعدني دَيهم
ديهم : ياقوتَ حبيبي
ياقوت : هممم
ديهم : كومي دتاكلين جُماره هواي تنامين هل ايام
ياقوت : ما ادري حبيبي احس ما ودي اكعد ابد كعدت غصباً عني وكلني يسولف وياي يضحك ويشاقه واني بس اريد ارجع انام كملت اكل ورجعت نمت اجاني نفس الشخص بالحلم وهم سولف وياي هواي وضل يكرر عليّ هذا السؤال
ـ اختاري جنتي او ناري!
بس ماجنت اجاوبه ماعرف الساني مثل المربوط .
مضت الايام وعمي طلع من المستشفى وحالته اتحسنت واني ما اشبع نوم صار عشقي بشكل مو طبيعي وحتى ملاحضة عيالي هواي ينامون ذوله شبيهم .
كاعده اني ورغد بالحديقة اجه دَيهم هوّ وابن خاله مُنير طفرت للبيت اركض لحكتني رغد تضحك
رغد : مو بس انتِ تخافين من دَيهم كلنا نخاف والله هههههههه
ياقوت : ولج هههههه والله لو شايفني اليوم
ما يخليني انام للصبح من غيرته سمعتنه ريام وكالت
ريام : احنا نحترمو لأن رجال لا اكثر
اجت ريهام وشاركتنه الحديث
ريهام : لا والله احنا نخاف من عندو ههههههههه لا تصدكين بيهن من يكولن لج نحترمو جذابات يخافون من عندو وانا اولهم
انصدمت اول مره تحجي وياي كتلها
ياقوت : ليش بلال ما يخوف مثله
ـ يبووو بلال فقيييررر هو مرتو مو مخوفها عاد يخوفنه احنا هههههه
ياقوت : و سالم ههههه
ـ سالم طامس بعشگ وحده محد يريدها بينه واحنا نسولف اجه دَيهم كال
ديهم : هيثم ابن خالي راح يتزوج هذا الاسبوع وكلنا معزومين .
البنات صارن يكمزن من الفرحة واني ساكته انتظره يگلي اخذج ونروح اباوعله ساكت دكول شبيك احجي البنات يسولفن ع شنو راح يلبسن وطايرات من الفرحة اباوع لـ دَيهم يشرب بجكارته وعاگد حواجبه عرفت مزاجه مو تمام رن تلفونه طلع برا يخابر واني صعدت لغرفتي شواي واجه
ـ حبيبي
ـ عيونها دَيهمي
ـ اتحضري اخذج تشترين ملابس للعرس
طرت من الفرحة بس سويت نفسي مو مهتمه كتله
ـ مو ضروري اروح مالي خلك
اجه يمي يضحك وكال
ـ عود مو مهتمه وكذا وهيه شويه واطيرر من
الفرحه
ماتحملت ضحكت كتله
ـ يلا روح للسيارة 5 دقايق واجيك
ـ 5 دقايق من يصيرن اكثر اجي اطلعج سحل
ـ منو يسحلني ولك؟
ـ انتِ حبيبي انتِ تسحليني انا والخلفوني
ضحكنه سوا فحطت وما شلعته من الغرفه
بدلت ونزلت بسرعة لكيته منتظرني ولكيت رغد وريماس يريدن يروحن ويانه كالت رغد
رغد : اخذنه وياك دَيهم ناقصنه شغلات نشتريها
ديهم : ذاك السايق خل يوديجن
رغد : خلي ياقوتَ تغيح ويانه
ديهم : مرتي انا اوديها ما ادزها وي احد
رغد : عجل نغيح وياكم
ريماس ساكته حشرت روحها ويانه هيه و رغد ورحنه للسوك اشترينه ملابس وصدفه شفت مسرة مرت نوار واخوها محمد
مسرة : شلونج ياقوتَ يعمري شو ماكو صار هواي ما اجيتي علينا
ياقوت : بخير يروحي وانتو شلونكم شلون نوار وحبيب عمته
مسرة : بخير يروحي كلنا تمام
محمد : شلونج ياقوتَ
ياقوت : هلا محمد بخير شلون الاهل
محمد : كلهم بخير
ياقوت : سلملي عل والده
محمد : يوصل .
دَيهم واكف يمي شويه ويدفنه اثنينه
راحو مسرة ومحمد
دَيهم مسك ايدي بقوة وكال
ديهم : هذا شجابووو هنا؟؟
ياقوت : واني شمدريني
ديهم : رراااح اكفرررر دا اسئلج شجابوووو وشدرااااه احنا هنا؟؟؟
ياقوت : اني خابرته وكتله تعال اشوفك يم المول
ديهم : حضرتج تستضرطيني؟؟
ياقوت : عجيب انتَ دَيهم تسألني اسئلة غريبة يعني شمدريني محمد ومسرة شيسوون هنا صدفة وشفتهم
ديهم : وتكولين اسموو يايمهه وتكولين اسموو ڪداامي بكل عين صلفة
ياقوت : هد ايدي منا العالم لا تفضحنه
ديهم : ياااااقوتَ
ياقوت : دا اكلك هد ايدي نوصل البيت ونتفاهم نفض ايدي بقوه وكال
ـ حسابج بعدين هذا لسانج الطويل اكصوو بس خل اوصل البيت
عفته ومشيت وهو يمشي وراي ويسولف متعصب
ـ يااقوتَ اوكفي احاجيج
التفتت له وكتله
ـ ها خير هم نفس السؤال خرا شعرفه اني هنا والله مادري يديهم ماااااا ادري ايمت تبطل شك وغيره زايده راح تضيعنه بهذا اسلوبك
يشرب بجكارته واني اسولف وياه وجهه ما يتفسر من العصبيه اخر شي رجعنه للبيت لأن كل ما اكله اشتري هذا يكلي لا ولا ما يرضه يريد شي مستور مال مخابيل نزلن خواته وراحن للبيت وهو نزل من السيارة وهو يصيح فتح لي الباب وكال
ـ انزززليي
عاندته ونزلت من الباب الثاني
ـ هذا راسج الگوي يرادلوو تفلش يلا تجرين عدل
رحت للبيت زعلانه وهو وراي يصيح اول ما دخلت البيت كدام اخته ريهام صاح بيه وكال
ـ ياااااقوتَ من اكل خرا وياج اوكفي لا
تتجاهليني
التفتت له وكتله
ـ احجي شعندك
ـ هاي اخر مره هيج تتصرفين وياي
عفته ومشيت اسمع ريهام تكله
ـ شبيك وياها لا تصيح عليها شمسويه البنت لحگني يحجي ويغلط فتح الباب وكال
ـ لا تستصغريني بعد هيج كدام اهلي والا
ـ والا شنو؟؟ ها تضربني لو شنو شتسوي مثلاً
هاي اقوى شي عندك تغلط وتسب وتصيح ههههه وبالشك والهوس تاخذ المرتبه الاولى
ـ لا تكفرررينيي
ـ اكفر حبيبي اكفرررر متشوف حتى الله ما رزقنه بأطفال من كفرك حتى وين ما اروح العدها طفل اتضم طفلها مني يكولن هاي محرومه ماعدها طفل من كفرررك دَيهم بطل كفر راح تهجم بيتنه
ـ لا تغيرين الموضوع وجاوبيني على سؤالي
محمد شيسوي بالمول وشعرفه انتِ هنا وبعدين ليش تسلمين عليه وتكليلوو هلا محمد شلونك شلون الاهل وانت شلج غرض بأهلو وبي انعل ابوج لابو محمد
ـ خلصت؟
ـ لا ما خلصت هيج طلعات انا ما تعجبني ولسانج ضبي هم ما يعجبني يسلم ع الرايح والجاي
ـ و النفس متريد اكطعه؟
ـ ياريت والله يكون افضل
ـ دَيهم قسماً بالله كلمة زايده منك بحقي اعوفك واولي لبيت اهلي
ـ سويها اذا انتِ سباعيه وبنت ابوج
ـ هه وشتسوي بالله
ـ احرگج وانتِ عايشه
ـ والله يا الله دروح روح
مسكني من ايدي وكال
ـ ياااقوت ترا گلبي خلصان ونوب زودها خرا محمد جاوبيني شعرفوو انتِ بالمول
ـ بشنو تريد احلفلك اني ما ادري يعني هيه صارت صدفة واجوي وشفناهم خلاص دَيهم لا تكبر الموضوع هو ما يعنيلي انتَ وبس انتَ حبيبي وزوجي وابو اطفالي ان شاء الله بالمستقبل ااالله يخليك حاول تخفف غيره وعصبيه شويه
ـ ليش تكولين اسمو كدامي
ـ حجيته بالغلط اسفه يبا والله العظيم اسفه هففف
ـ نار ومشتعله بگلبي حقج يبا حقج ما تحسين لأن النار بيه مو بيچ
عافني وطلع ضليت صافنه هذا شبي صدك يحجي
صار الليل والحبايب يحضرن للعرس واني الدنيا طالعه من عيني افكر بهذا المسودن رجلي زعل وراح بعد ما اجه
ريهام : ياقوتَ شنو تلبسين باجر بالحنه؟
ياقوت : اي شي حبيبي ملابسي هواي
ريهام : لا مو اي شي اكشخي انتِ چنه غيدان
لازم الكل يحجي بجمالج
رغد : عجل شلون والله اذا ما اتكشخت عدل وضبطت نفسها اطيح حضها
ريام : احجزي فستان ع النت اكو كلش حلوات
ياقوت : بنات حبيباتي وربي فساتيني هواي
وبعدين دَيهم ميقبل البس بكيفي لازم هو يختار
ريهام : اي مو مشكله ادزلج السايق يجيب ملابس واختاري على ذوقج وذوق اخوي المجنون
ياقوت : بعد هواي منا لباجر الله كريم عودينه هنه يجهزن للحفلة ومتحمسات واني صافنه وبالي يمه فتحت التيك اتصفح وطلعتلي اغنية الهجع وشلون يركصن عليها اجت فكرة براسي ليش ما اراضي بالهجع وهم اني ولا مره ركصتله وهو دوم يطلب مني واني استحي يبوووو
طفرت للغرفة فتحت الكنتور طلعت بدلة الرقص عندي مشتريتها بس ما لابستها
لبستها ونثرت شعري وكفت اتأملني كدام المرايه بووويه شنهاي طلعت اموت دزيت مسج لـ دَيهم وكتله
ـ حبيبي ايمت تجي؟
ـ انا بمضيف *** راجع للبيت دقايق واكون يمج
يمه دقايق والعباس دقايق ويكون يمي گلبي صار يدگ طبول مدري شجاني استحيت
وارتبكت صرت اخذ نفس شهيق زفير
هدي ياقوتَ هدي ماكو شي هو زوجج عادي عادي ههههههه
شواي واندگ الباب احس وجهي صار حار متووتررره فتحت الباب دخل لابس الدشداشه
والسبحه بأيده سد الباب وقفله رجع التفتلي يضحك بمكر وكال
ديهم : ناويه تذوبيني يول ؟
حجاها وابتسم وبعدها انمحت ابتسامته رفع حاجبه وهمس
ديهم : والخناجر ؟
احس سخنت من المستحه گتله بأرتباك
ياقوت : احمم و وين الخناجر ؟
مثبت نضراته على جسمي ويتبوسم
ديهم : بالكنتور
رحت للكنتور واحس بنضراته تاكلني من وره فتحت الكنتور الطم على خدي شلون ورطت روحي لكيت الخناجر اخذتهن والتفتتله سحب الكرسي وگعد يشرب جكارة يباوعلي والسبحه يفر بيها بأيده انوب نضراته يبوووي تسطر ما اكدر اقاومه حط اغنية ( عيني الهجع ) سويت نفسي ما اشوفه واتشجعت اركص كدامه بلشت الاغنية غمضت عيوني براحة وخليت الخناجر على خصري وصرت اتمايل ويا الاغنية
واندمجت وهو يباوعلي ويفر السبحة بأيده واني اتمايل وبخصري واهز بوركي وارفع
بصدري وارجع انزله واتمايل واتطوه بجسمي من صار بارت هذا الاغنية يعدل شواربه ويفر السبحة بأيده وهمس
ديهم :
عيني الهجع
من علمك رگص الهجع
بويه الهجع
ضليت اتقدمله واتمايل بخصري كدامه والخناجر على خصري اخليها لحد ما خلصت الاغنية وصرت گباله بيني وبينه مسافة كلش قصيرة جرني من خصري يضحك وهمس
ديهم : ام الهجع ذوبتيني بالاحمر
شمرت الخناجر بالكاع وحاوطت ركبته بأيديه كعدني بحضنه
يباوع بعيوني ذايب وگال
ـ طلعتي مو هينه ام الهجع
ـ ههههه هذا ولا شيء
ـ اكو اقوى بعد؟
ضليت ساكته
ـ مستحيه مني؟
قرب من شفايفي باسهن بخفه رجع احتضن خدي بكف ايده ابتعد خله مسافة شعره بيناتنه من يحجي شفايفه يطخن بشفايفي وهمس
ـ يول انا عاشگج
رجع اخذ شفايفي بقوة يبوس بيهن غمضت عيوني حيل احس گلبي يوجعني من دگاته القويه الصارت بصدري شواي ورجع باس خدي
اليوم الثاني
ديسبح بالحمام وبيت اهله هوسه كلها تتجهز لحنه ابن خالهم واني دا اعزل بالغرفة وسمعته صاحني
ديهم : جُماره جيبي المنشفه
اخذتها اله اخذها من ايدي وكال
ـ عفيه ابني
سندت نفسي على باب الحمام وهمست له بدلع
ـ بس؟
ذابن عيونه عض شفته وكال
ـ احبج
واني سانده نفسي عل باب اتقربت اكثر وكتله
ـ بس؟
خدرن عيونه فد مره وكال
ـ عاشگج
ـ بس؟
ـ ذايب بيچ
ـ بس؟
رغد : يمصكوعه عجل شتردين بعد انا من يمي ذبت
سمعت صوتها من الخرعه دخلت وياه بالحمام وسديت الباب
ديهم : كثر الله خيرج رغوده مشكوره
رغد : ولو خويا تدلل بس حسوو بينه احنا الحدايق
كمت الطم على خدي من الفشله
تقرب مني بمكر وطبع بوسه سريعة على شفايفي
ـ اوي
قلد صوتي وكال
ـ اووويي شبينه انبزز
ايديه حاوطت خصري ونزل على اردافي عصرها وضربها
ديهم ; سمنانه صايره دبدوبه
ـ اي بفضلك
ـ من ضرب ال***
فتحت عيوني على وسعهن وكتله
ـ عزه شكد سرسري
ضحك وشالني طلع من الحمام خلاني ع التخم الموجود بالغرفة نومني ونام فوكاي صار يبوس بيه وبكل جزء بوجهي نزل على ركبتي صار يبوس بيها توا يريد يترك اثر كتله
ـ لا حباب لتسويها
كام وراح يلبس بملابسه كعد ع القنفه ورث جكاره اشتهيتها رحت يمه كتله
ـ اريد
كعدني بحضنه وخلاها بشفايفي سحبت نفس منها اريد ازفر الدخان اخذ شفايفي بين شفايفه شواي وخر شفايفه من يحجي يطخن بشفايفي وهمس
ـ صايره ساقطة ودورين جكاير هم
ـ اتعلمت منك رَيس
ـ يعيون الرَيس انتِ
اندگ الباب رحت فتحته لكيت ريهام كالت
ـ ياقوتَ انزلي اختاري ملابس للحنه اجه السايق وجاب وياه ملابس هواي اختاري اليعجبج
ـ رهومه حبيبتي ماله داعي
دَيهم : غيحي ياقوتَ اختاري اليعجبج بويه باوعت له خازرني بمعنى لا تختارين شي ما يرضيني نزلت اختاريت ورجعت له شوفته اله
ديهم : والله لو تموتييين هيج لبس خايس
ماتلبسي
ـ ليييش ديهوووم والله عجبني
ـ جؤ انسي هيج لبس حتى يمي استحي اخليج تلبسينووو
ـ لا تبالغ ترا مستور
ـ بس ضيگ يطلع جسمج مخصر
ـ واذا
ـ شنووو ولج شو صايره ماتعرفين تسولفين شنو واذا لججج بابا انتِ مرتي وما ارضه عليج الشي المو زين وما اريد الله يحاسبج بعدين على لبسج
ـ هيه الحنه كلها نسوان
ـ حتـلو نسوان يبقى هلشي حرااام لكك ابني حرااام
ـ حبيبي ارووحلللك فدوه بس هلمره خليني البس بكيفي
ـ لا تناقشيني جُماره هذا الموضوع انسد يلا وانتهى النقاش
ـ دَيهههممم
ـ البسي من الكنتور مليان ملابس كلهن اختياري وها على فكرة الحجاب ما تنزعي
ـ لا بشرفك واني اريد اسوي تسريحة
ـ هلوووو وانا هيج گرن اخلي مرتي تنثر شعرها كدام الرايح والجاي تعاي يُبا تعاي شديلياهن كون ستيل واهم شي تشتريلي قاصر يلمعهن
ـ لاااا ابوس ايدك ديهوووم بس هل مره
لخااااطرييي بس هلمررررررهههه
ماسكه ايده واتوسل كال
ـ ولا نص مره هم كتلج لا يعني لا
دا اريد ابوسه من شفايفه ما اوصله وكفت على اطراف اصابعي وبسته بشفايفه يباوع لأصابع رجليه شلون واكفه على اطرافهن ضحك وگال
ـ شحلات طولج يحيلي والعباس ذبت ذبت
عيديها مره ثانيه واخليج عيدها
سويتها مره ثانيه وبسته بشفايفه كتله
ـ وهسه تخليني البسه؟
ـ اشد گرون اذا كتلج البسي
عافني وطلع ضليت اسب بي واصيح عليه
فجأة حسيت بخمول وتعب شمرت كلشي بأيدي ورحت اتمددت بالفراش غطست بنومي واجاني نفس الشخص الطويل والضخم هم كعد يمي يلعب بخدودي بس هل مره چنه كاعدين فوك بالغيم وكلشي ابيض وجان يضحك ضحكته حلوه وبريئة يباوعلي ويبتسم وكل شواي يصيحني اروح يمه العب واكمز وهو يضحك والمشكله اني مرتاحتله وعادي يعني شواي واسمع دَيهم يكعد بيه كعدت وكتله
ـ ها حبيبي
ـ شنييهاااي جُماره هواي تنامين بويه خاف بيج شي لا سامح الله
لا مابيه يروحي بس احس جسمي تعبان دا اريد انام عفيه
ـ جؤ حبيبي كومي حضريلي دشداشتي اريد اغيح ويا الولد دا يجهزون لعرس ابن خالي كمت حضرتله الدشداشه وبسرعه رجعت نمت اسمعه يحاول يكعدني بس اني بغير عالم متهنيه بأحلامي
حسيت بـ دَيهم طبع بوسه براسي وبخدي وكال
ـ نوم الهنا يعيوني انتِ وطفه الضوه سد الباب وراح شويه ورجع يگعد بيه ويكول
ديهم : ياقوتَ حبيبي شهل نوم كافي يحيلي اكعدي
فتحت عيوني بصعوبه شفته ورجعت غمضت مابيه حيل احس بيه خمول مو طبيعي رجع يكعدني
ديهم : حبيبي ياقوتَ اكعدي شهل نوم يا امي شجاريلج هيج تنامين
ياقوت : حباب بس شويه
ديهم : ولا شويه اكعدي اتحضري حتى نغيح انا وياج لحنه ابن خالي
ياقوت : اهووو ميصير يأجلوها
ديهم : اي ليش لا يأجلوهاا لخاطر عيونج جُماره ولج كووومي ماضل وكت .
كمت اسحل بروحي سحل دخلت سبحت شوي صحصحت طلعت من الحمام لبست ملابسي دا اسوي بالميكب وهو صافن بيه
ديهم : لا تكثرين
ياقوت : ترا هيه حفله
ديهم : واذا نعال حفله
عفته ما جاوبته مالي خلك اتعارك وياه اجيت اخلي رموش كال
ديهم : مالها داعي لا تخلين
ياقوت : دَيهم هنه رموش خفيفه
ديهم : دا اكلج لا تخلين
ذبيت الرموش وخليت بس ماسكرا كملت ميكبي والف عركه صارت بي من وراه ابو راس اجيت اخلي حمره اخذ القلم من ايدي وفرك شفايفي بأيده وكال
ديهم : ثلتالاف مره كتلج نعال بحلكج لا تخلين
ياقوت : يعني شلون راح ابطل ما اروح اني
ديهم : طبج مرض حتـلو بطلتي زباله حمره ماتخلين
ياقوت : لا اله الا الله دَيهم البنات كلها راح تخلي
ديهم : وانا شعليه بالنعالات البنات انا عليّ بيج انتِ
ياقوت : راح يكون هواي بنات غيري يعني مو اني محد راح يباوعلي بس اني
ديهم : وهوَ ياهو اليتجرأ يباوعلج غيري!
ياقوت : راح تفر الموضوع عليّ وتگلبها رومانسيات وتقنعني ما اخلي حمره شو دوخر اريد اخلي
ديهم : ياااقوتَ لا تجلطيني من اكلج هذا شي لا تسوي يعني لا تسوي لا تعانديني
رجع اخذ قلم الحمره وضربه بالحايط سوا وصلتين
ـ انا نازل من ابقى هنا ح انجلط وبسس اشوفج مخليه نعال بحلكج كدام الناس لأفرك حلكج تعرفيني ما استحي من اكبر واحد
عافني وطلع ضليت الوب واسب بي واغلط ماكدر اعلي صوتي يدفني بدلت وخليت حمره ورديه فاتحه حتى ماتبين ويدفني نزلت لكيت اهله كلهم متجهزين شافتني ريهام وكالت
ـ يمه چنتنه يمه شهل جمال عين البارده يعمري
ريام : يا حبيبي ما شاء الله على جمالك
رغد : اليوم شريفه وبناتها يطگن ويموتن بس يشوفن ياقوتَ
ريهام : لا تنسين ديرتنه كلها ماتحب ياقوتَ لأن اخذناها غريبه وما اخذنا من بناتهم
ام بلال : انتبهي على نفسج من عيون الناس يا يمه اقري المعوذات
اني ضليت بس اوزع ابتسامات مدري شجاني ومرت بلال واكفه بعيد ملامح وجهها كلها اتغيرت وهيه هم جانت متعاركه هيه وخوات دَيهم بيناتهن مشاكل هواي اجت رغد يمي وكالت
ـ باعي ياقوتَ اعلمج اي احد ينطيج شي بالحفله لا تاكلينو
ـ ليش
ـ بيهن طبع يسون سحوره اي وحده يكرهنها يرگعنها بسحر حتـلو ما مأذيتهن
ـ يمةةةة صدك تحجين!!
ـ والله العظيم انتبهي حتى لتكولين بعدين رغد ما كلتلي انتِ مرت الغالي واصغر چناين بيتنه واخاف عليچ مثل ما اخاف على خواتي
ـ يبعد روحي رغوده بس انتِ هم خليج يمي لأن ما اعرف احد استحي
ـ كلنا يمج ياعمري وبس ندخل القاعة اعلمج عليهن وحده وحده
ـ تمام حبيبتي
اخذهن السايق وبقيت اني و دَيهم رحت للسيارة لكيته ينتظرني يريد ياخذني بسيارتنه لأن ميقبل السواق يوصلونه صعدت يمه كال
ـ انا شكلت؟؟
غطيت شفايفي بأيدي وكتله
ـ شنوو!
ـ كلمتي ممماا اثنيهاا
سحبت كلينس ومسحت الحمره توا اريد اشمره كال
ـ لا خلي بالسيارة
خليته جوه القماش المقابيل الستيرن
ـ مره ثانيه لا تعبين نفسج وتتصرفين من راسج لأن بالتالي مايصير غير الـ براسي
وصلنه القاعة وبس نزلنه مسك ايدي عاصرها بقوة
ـ ما اطير ترا
ـ اشش امشي وانتِ ساكته
وصلني لباب القاعة وبس يخوزر بيه
ديهم : طبي جوه ولا تطلعين الا اتصل عليج
ياقوت : تمام حبيبي
ضل يباوعلي دخلت للقاعة وهو راح لكيت خوات دَيهم كلهن هناك كعدت يمي رغد و ريام و ريهام كاعده يم صديقاتها بالدوام تباوعلي وتبتسم تحجي الهن عني كالت رغد
ـ تشوفين ذيج الحرمه
ـ اي
ـ ذني الحواليها جناينها وبناتها كلهن حيايه
ـ ههههههه والله صدك
ـ والله وبالسحوره يا يااابه ياخذن المركز الاول ريام : وهذيج مرت خالي خالي لو تطلب روحو يقدمها الها من سحورتها الله ياخذها
ياقوت : بنات على كيفجن ويايه عقلي مدا يستوعب على حجيكم هذا ماكو احد طيب وحباب هنانه
ـ ههههههههه تكول حباب ولج هو منو بقى حباب بهل وكت كلها حيايه خيه
شواي واجت وحده كعدت يمنه سلمن عليها البنات واني
رغد : هاي بنت خالي مزوجه وعدها ٥ اطفال كالت بنت خالهم
ـ شلونج ياقوتَ شلون دَيهم وياج
ـ الحمد لله تمام دَيهم حباب وماكو منه
ـ امممم عجل ماحبلتي؟
ـ لا الله ما كتب لي لهسه
رغد : بعدها صغيره لاحگه تخلف عشره مو بس واحد
ضحكنه سوا كالت بنت خالهم
ـ شعجب لا انتِ حبلتي ولا مرت بلال الناس كلها تحجي ترا محد يرحم وانتِ صارلج سنه متزوجه مامعقوله مو بنفسج طفل
ـ اكيد ماكو احد ما يتمنى يكون عنده طفل بس كلشي بيد رب العالمين ولا اعتراض على حكم الله
ـ ونعم بالله
ريام : خليهاااا مانريد تحبل هسه يخرب جمالها
ـ والله لو سامعج دَيهم يسويج وصلتين هههههههههه
بنت خالهم : وليش يسويها وصلتين هيه شكالت؟
ياقوت : يغار عليّ حبيبتي يغار من هذا الهوى
ـ هذا شك ومرض مو غيره
ـ ولي يكون حتى لو شك ومرض اني احبه بكل اطباعه
خوات دَيهم فرحن لأن هيج حجيت وياها يريدني اقهرها
ـ ههههههههه ذاك اليوم ابن مريم باس ياقوتَ
و دَيهم ضل شهر ميحجي وياها ومنكد عليها وحتى ابن مريم صار يكرها
ياقوت : هههههههه يااا يمةةة ذيج الليلة مانمت من النكد والغيره مالته
رغد : بس ما الومو لأخوي والله لو اني ولد اكتل اخوي واخذج
ريام : هههههههه انتِ احجي بكيفج دَيهم مو يمج لو كدامج هسه ترجفين منوو بس لسانج يطول بس بضهروو
اني فاحطه ضحك عليهن كالت بنت خالهن
ـ ما اعرف احس هيج غيره مو حلوه وتجيب المشاكل للطرفين الحمد لله انا رجلي مو هيج اطباعو
رغد : حبيبتي رجلج كبير بالعمر وين الو خلگ يغاير عليج الغيره ضلت للصغار يلعبون بيها لعب يحركون الاخضر واليابس .
من الفشلة بنت خالهم سكتت وماحجت شي بعد شواي وراحت من يمنه
شواي واجن بنات عم دَيهم هم كعدن يمنه وكامن يسولفن ما سكتن وحده بيهن عدها ٣ اطفال كالت
ـ ياقوتَ
ـ ها يروحي
ـ ماحبلتي؟
ـ لا والله يحيلي
ـ ياااا ليش؟ شو انتِ ومرت بلال نفس شي شجاجن
كالتها وضحكن هيه وخواتها حسيت بفشله مو طبيعيه كتلها
ـ هذا شي كله بيد ربنا مو بأيدينه احنا البشر احنا مابدينه الا الدعاء وبعدين بعدني صغيره واني هم مو مفكره هسه
ـ لا ليش بالعكس تخلفين وانتِ صغيره احسن
و حتى دَيهم نعرفوو يحب الاطفال من قبل لا ياخذج
ريام : اووو دَيهم تغير هواي عن قبل هسه ماكوو بعقلوو وبكلبوو غير هاي المصكوعه ام خدود حلوه و بنات غيرن الموضوع عيفن الجهال على صفحه ترا بدت تلعب نفسي وشنو المشكله واذا وحده ما حبلت بسرعه
ياقوت : والله صح مو معناهه نهاية العالم يجي يوم ونسويها فريق اني و شيرين ( مرت بلال ) غيرنه الموضوع وكامن يحشن بالعريس والعروس
اجت اخت العريس كعدت يمنه سولفنه شويه كالت
ـ عجل دَيهم وين؟
خزرتها وكتلها
ـ شلج غرض بـرجلي !
ـ ها لا بس اسئل لأن مُنير اخوي توا سئلني عنوو
ـ وليش يسألج ماهو صاحبه لـ دَيهم واكيد عنده رقمه
رغد: يول ميمونه ترا ياقوتَ تغار على دَيهم والنبي هسه تدفنج
ريام : هههههه يمةة حقها تغار عليه انا من يمي وذايبه بحبهم
سكتت بنت خالهم وضلت بس تباوعلي من فوك ليجوه واني خازرتها ودي ادفنها اجت طفله صغيرة يمي
ـ عمه عمه
ـ ها يروح عمه
ـ عمو دَيهم يكول خل تضم المحفظه والسويچ يمها
انطتهن الي وگالت
ـ شو انزلي عمه
نزلت يمها باستني بخدي وكالت
ـ هاي البوسه من عمو دَيهم ويكول لا تضحك ويه الرايح والجاي
ـ كولي لعمو صا
ر بستها بخدها وكتلها
ـ كوليله هاي البوسه الچ مو اله
راحت تكله وبعد مارجعت يمكن انكتلت البنيه خطيه شواي واجه دَيهم دخل للقاعة يفر بسبحته شواي وادفنه ونوب منا البنات يباوعوله اخخخ اجه يمي مسك ايدي كدام الحبايب وباسها صدمني وصدمهن وياي
ديهم : شلونها اميرتي
ياقوت : زينه
ديهم : مليت مانرجع للبيت
ياقوت : التشوفه حبيبي
ديهم : تعاي نكعد شواي ونغيح
كعدنه ضل ماسك ايدي ويسولف وياي والحبايب بس يدحگن علينه ويتهامسن
ياقوت : حبيبي طگن وماتن
ديهم : يولن يغارن منج
بس يضحك بيه واني ما اسيطر اضحك كدامهن كال
ـ خوما ركصتي
ـ هئ
ـ عفيه يحيلي
شواي ودخلو ولد خواله وعمامه وصارت هوسه كلها تردح اجت ريام تريد تاخذني اركص وياها كتله
ـ راح اكوم اركص
ـ اذا بيج حض كومي
ـ ح اكوم
ـ حتى اشگ **** اكعدي طايحة الحض
ـ ههههه لعد كوم انتَ اركص ويه الزلم
ـ الرگص بس للنسوان احنا زلم خشنه يُبا
ـ وبعرسنه مو ذبيت لحم هسه صار الركص للنسوان
ـ ذاك اليوم يختلف جان مميز وتعبت ما اخذتج تستاهلين اذبلج شواربي مو بس لحم
ـ الا شواربك ديهوم احبهن
فرح الرجال كام يعدل بشواربه ويغمزلي
ديهم : كومي نرجع ما اتحمل بعد
ـ ولا شويه؟
ـ ولا ربع شويه هم هسه اطفر عليج كدامهم يلا يول كومي
مسكني من ايدي وطلعني من القاعة طلعنه بلطريق للبيت حجيتله كلشي صار ويامن حجيت كال
ـ يولن حبيبي يغارون منج
ـ كل شوي وحدن تكلي ماحبلتي وما حبلتي
ـ حبيبي ماعرف حتى انا دايخ مع العلم تحاليلنه كلها سليمه ليش مصار عدنه طفل لهسه
ـ كول يالله دَيهوم ماصار سنه من ازوجنه
ـ الله كريم يحيلي الله يسوي اللي بي الخير وصلنه البيت والاضويه طافيه اول مادخلنه البيت جرني دَيهم وحصرني يم الحايط يباوع بعيوني وگال
ـ شمشتاگلج يول
قيدني وصرت بين ايديه مسكت دشداشته من يم رگبته
ـ بس؟؟؟
باسني بشفتي بسرعه وكال
ـ متسودن بيچ
ـ بس؟؟
كرر البوسه وگال
ـ هايم بيج
ـ بس؟؟
رجع باسني بقوه وگال
ـ اعشگج
توا يريد يبوسني مره ثانيه واجانه صوت عمو ابو دَيهم وهو يتحمحم فززنه اثنينه دفعته وهو وگف بصفي من المستحه شردت للغرفه دَيهم غير الموضوع وضل يسولف وياه شواي ولحگني
ديهم : هههههههه ولج ابوي شجابه ع البيت
ياقوت : شمدريني دَيهم بطل هل حركات فشلتني كدام عمو
ـ توا يگلي اضبط نفسك المره هاي انا شفتكم مره ثانيه يمكن خواتك يشوفنكم
ـ اي صلاوات عين النبي خوش فشايل
كعدت ع الجربايه وكلت
ـ هفففف
راح يسبح واني طبيت سبحت وراه هو كاعد يخابر ويا ابن خاله مُنير رحت اسويله شي ياكله لأن ما اكل هواي لكيت سبأ بالمطبخ
ـ روح ماما انا يسوي اكل لبابا
ـ. لا حبيبتي بابا ميقبل ياكل الا من ايدي
ـ انا يساعدك ماما
ـ اي حبيبتي عادي ساعديني
سويت العشه وصعدته للغرفة اول مافتحت باب الغرفة شفت دَيهم ياخذ حبوب بس شافني ضمهن بالجنطه عيوني صارن براسي عرفته راجع يكبسل شمرت الصينيه بالكاع وكتله
ـ شتسوي دَيهم
ـ ما اسوي
ـ انطيني الجنطه
ـ شلج غرض بيها
ـ دا اكلك انطيني النعال الجنطه
ـ ياقوتَ اهدي افهمج
ـ شتفهمني يديهم تفهمني راجع تكبسل وصرت مدمن اكثر من قبل لوو شنووووو احجي
ـ اشش لا تعلين صوتج
ـ اعلي وغصب هم لأن انتَ ماتفهم ولك اني قبل ليش اعترفت عليك علمود تتعالج عشت ايام سوده وما ارتاحيت ولا اتهنيت حتى بس انتَ تتعالج وتتعافى من هذا السم التاخذه
ـ ما اكدر ياقوتَ احس جسمي ياكل بيه اذا ما اخذه
ـ لا والله!! وتعترف هم ولككك شنو من بشرررر انتتتتت راح تضيع نفسك وتضيعني ويااااك هذا سم على فكره الي يدمن عليه ميتعالج من عنده بعد .
ـ ما جاي اخذوو بكثره انا بس احياناً اتوتر واخذوو
ـ ههههههه
ـ احياناً تقنع ع الناس كلها بس اني ماتقنعني لأن اعرفك شنو انت دَيههمم انتَ عايش حياتك على هذا السم گلي منو علمك عليه احجيي لا تكفرني اريد انعل والديه
ـ اشتريتوو محد علمني
ـ افتهمنه قبل مو مرتاح وتاخذه بس هسه شنو ناقصك دَيهم اني يمك واتزوجنه واستقرينه والمشاكل كلها انتهت شوف شحلاتنه ليش ادمر كلشي بتصرفاتك
ضل ساكت واني الوم بي وارزله
ـ خلاص اوعدج اخفف منو
ـ لا توعدني لأن بنهاية ماراح توفي بوعدك وراح تبقى تاخذه واني ما ادري لا نضل نضحك على بعض انتَ ادمنته وخلاص
ـ انطيني فرصة وساعديني اقلل منوو
ـ شكد صار من اخذته؟
ـ 4 اشهر
ـ اربعة اشهر وضام عليّ وتاخذه بدون ما اني ادري شلون كدرت فهمني شلوووون
على صوت صياحنه اجت امه
ام بلال : شبيكم يا يمه حسكم واصل سابع جار
ـ ماكو شي خاله بس دَيهم مايبطل غيره وشك سمطته برزاله وكالت
ـبنيتي تعاي نامي يمي خله يولي شوكت ما احترمج ارجعيلوو هذا ما يستاهل هيج بنيه
ـ روحي خاله شواي الحگج
راحت ورجعت احجي ويا
ـ وهسه شلون نبقى هيج طول اعمارنه بالمشاكل مانرتاح يعني
ـ جاي اكلج ما اكدر اتررركهااا بس اوعدج ا…. قاطعته وكتله
ـ لا توعدنيي خرب يووومك لا توعد وعودك كلها خرطي توعد منا وتخلف منا احنا مو متفقين محد يضم ع الثاني اي شي
ـ اي
ـ طيب ليش ضميت عني موضوع الكبسله؟ ساكت مايرد ضربت الطبله وكتله
ـ لييييش ضميت جاوووبني
ـ يلاااا عااااد لا تعلين صوتج
ـ لأنك انسان ضعيف لدرجة حبوب تسيطر على عقلك وتخليك تدمنها
ـ انا حُر باللي اريدوو اسووويي محد يكدر يمنعني انجبي وسكتي لا تحاسبيني
ـ هااا يعني هيج صارت؟ لعد من اليوم انتَ هم لا تحاسبني اسوي الاريده
فتت من يمه وهو يسولف ويصيح بدلت ملابسي لبست تراك ودخلت بالفراش وهو طلع حتى عشه ماتعشه واني نمت .
اول ماغطست بنومي اجاني نفس الشخص بس هل مره الحلم بالغرفة واني متمدده ع الجربايه حسيته يتلمس بأطراف رجليه صارن باردات باوعت له يبتسم وجهه يشبه الملاك مرر اصابعه على طول جسمي لحد ما وصل وجهي باسه وكعد يمي ع طرف الجربايه كال
ـ اختاري جنتي او ناري؟
بدون وعي واني اتأمله كتله
ـ جنتك
ابتسم ابتسامه قويه واختفى ضليت ادوره وادوره وهو ماكو مالكيته تعبت واني ادوره اخر شي فزيت من نومي سابحه بالعرگ سبح كمت سبحت ورجعت للفراش احس اريد انام بعد اول ما اتمددت بسرعه غطست بحلم ثاني لكيته موجود بحلمي
ـ افتقدتيني!
ـ وين رحت
ـ رجعت علمودج انتِ اختاريتي جنتي صح؟
ـ اي
اسولف ويا وفرحانه مدري شبيه كال
ـ اي شي اطلبه منج تنفذي؟
بدون وعي كتله
ـ اي شي تطلبه اسوي
ـ هاج هذا القلم ارسمي على بطنج دائرة وبداخلها النجمة الخماسيه
ـ ليش وشتسوي هاي النجمه؟
ـ تحميج من كل اذى يصيبج انتِ مهدده بالخطر وانا ملاك اجيت احميج من كل شر يصيبج . اخذت القلم من ايده ورسمت دائرة على بطني وهو علمني شلون اكتب النجمة الخماسيه طبقت كلشي يكوله الي حرفياً بدون وعي كال
ـ ما اعوفج انا يمج مايكدر اي شي يأذيج انا درعج الحامي .
ضليت اسولف وياه وقت طووويل فزيت من نومي اباوع لديهم نايم يمي وحاضني اتسحبت منه ببطئ ورحت وكفت كدام المرايه كشفت بطني اشوف الرسمته ماكو ماموجود وجسمي منتعش ولا كأنو جنت بحلم وفرحانه مدري شبيه رجعت نمت بالفراش بس ما اتقربت من دَيهم زعلانه منه على عمايله السوده اول ماغطست بنومي هم حلمت واجاني نفس الشخص اني وياه بمكان غريب وفارغ مابي احد والجو ضباب وكلشي اضلم والضوه بس علينا اني وياه كاعد يرسم دائرة كلش جبيره وبداخلها رسم النجمه الخماسيه ويهمس همسات مو مفهومه بصوت كلش هادئ ومريح ارتخه جسمي وغفيت بالكاع حسيت ايديه ترفعني من الكاع شالني وخلاني بنص الدائرةه صارت النجمه الخماسيه جواي كعد هو خارج الدائرة وبأيده كتاب فتحه وطلع ضوه منه كلش قوي وكدامه شمعة و حجر كريم صار يهمس ويكرر الكلمات همساته مو مفهومه
ـ شتسوي؟
ـ اشش احاول احميج من كل اذى يصيبج سكتت وهو يكرر الهمسات ويكول
ـ ايتها النجمة الخماسيه استقوي وبكِ قوني حين تقل قوتي يااا روحها التي مختبئة خلف النجوم والغيوم والامطار والسماء اخرجي انا استدعيك ان تأتي من النار من الماء من الحجر من الشمعة من التراب من الريح من الهواء تعالي وساعديني اسمعي دعواتي ولتلبي امنياتي .
يردد هذا الكلام ومغمض عيونه وجهه كل ماله يصير اجمل من قبل كمل وفتح عيونه باوعلي وابتسم وكال
ـ اطلبي اي شي على بالج
غمضت عيوني وبدون تفكير كلت
ـ اتمنى طفل
فتحت عيوني باوعت له وگال
ـ اطلبي وتمني من نجمة السماء الخماسيه فهي لا ترد حلم احد
ضليت مغمضه واردد بأمنياتي حسيت على صوت التلفون يرن كعدت لكيت امي تتصل جاوبتها تسأل علينه سلمت عليها وسديت الخط كمت سبحت دَيهم نايم نزلت لكيت الحبايب ملتمات يتجهزن للعرس وصايره هوسه
مشغلات الديجي و رغد تركص تدرب للعرس جرتني من ايدي كالت
ـ يلا وياي وياي
ريهام : ولج عيفيها رغد خطيه بعدها ما اتريكت
صاحت العامله وكلتلها
ـ سبأ حبيبتي حضري الريوك لـ ياقوتَ
سبأ : حاضر ماما
ريماس كاعده ع القنفه مسافة عنه تخوزر بيه واخوزر بيها اتريكت ورغد وريام بعدهن يركصن و ريماس تسويلهن فعاليات شغلن اغنية حسام الرسام للكاع وما اتحملت كمت وشديت الشال على خصري ونثرت شعري وصرت اتمايل كعدن البنات يسون لي فعاليات
رغد : اي ولج للگاع اييي
ريهام : هزيهاااا يول كسري الكاع
حاوطني كل ما اميل خصري يعيطن ام دَيهم جرت المخده واتمددت وكالت
ـ فلك سطرتني مو نسوان ولجن دختتت من صوت السماعه
وهنه مستمرات يسونلي فعاليات واني اهز اندمجت
ـ حييييل للگاع بعد ايييي
لمحت صوت دَيهم من ورا وهو يگول
ديهم : ييي للگاع بعد شيبي .
سويت نفسي ما سمعته وكملت كال بعلوو صوته
ديهم : للكاااااع بنت حكووومي
سمعنه البنات وضحكن خزرهن طفن الديجي واني كعدت خاتله ورا ريهام عود استحيت
ديهم : يول ماجده هاي چنتج المتباهيه بيها ضحكت وكالتله
ـ يول غير چنها العافيه
طلع يخوزر بينه واحنا ساكتين كوه ماسكين الضحكه و ريام تكفخ بـ رغد وتكلها
ـ انتِ الصخله فضحتينه وعاندتي الا تشغلينوو للديجي
كعدنه نسولف شبعنه ضحك وويانه مرت بلال هم شواي واجه دَيهم صاحني للغرفة وصعد كدامي
ريهام : انفتح مركز التحقيق
ياقوت : ماينسد بعد ههههههه
رغد : هذا لو رجلي اشمرو من الطابق الثاني
عفتهن يضحكن وصعدت لحكت المسودن
ديهم : مرتاحه شابعه ضحك وياهن وانا مشعول جدي
ياقوت : اها صدك والله؟ موجوده الحبوب تخفف من اشتعالك انتَ وجدك هسه فضني شتريد
ديهم : ياقوتَ لا تحجين وياي هيج احسن ما ادفنج
ياقوت : حاضر رَيس اوامر ثانيه
احجي ومكتفه جسمي بأيديه ضربني بالسبحه على ايديه وكال
ـ نزليهن لا اموتج
مانزلتهن وكتله
ـ احجي شتريد
عض شفايفه بعصبيه وضربني اقوه بالسبحه
ـ اوويي ايدي اوويي لا تضرُب
ـ اوي شبيج اوي اوي لا تضروب اخخ منك يلساني گوه تهيجين الغالي علينه
ـ الغالي منو؟
انرسمت الابتسامه على وجها محاها وكال
ـ تردين تشوفيه؟
عض شفته بعدها استوعبت فتحت عيوني على وسعهن رجعت خزرته وكفخته على ايده
ـ انجببب
ـ لا لا صدگ متردين تشوفي ؟
ضربته على ايده اقوه
ـ مررريضه دَيهم مررييضههه اني وتعبانه
ـ ااه صدك والله ؟ … ليش هيه شگد صارلها ؟
ـ دَيهههممم
دنكت راسي خجلانه
ـ شوف العياااارة شوف عود تستحي انا رجلج يُباا
تقرب مني توا يريد يبوسني ابتعدت منه مسك فكي وطبع بوسه خفيفه درت وجهي على صفحه
ـ شبيج
ـ تعرف شبيه
ـ ماتفض يعني هيه حبه وحده ماتأثر
ـ شلوون ما تأثر بالله وياريت حبه وحده دتاخذ هواااي انتَ دَيهم والله لو ما خوفي عليك ما ازعل منك يا اخي انتَ تعاند
ـ اشش انچبي لا تكولين يا اخي
ـ يا اخي
كفخني على حلكي عاض شفته وكال
ـ اشش اذوب من تعانديني
تقرب مني طبك جسمي على جسمه يتلمس شفايفي بأصابعه ومركز بعيوني
ـ تعبت ياقوتَ تعبتني الحبوب وادماني الها وتعبتني العلاجات وتعبتني المصحات النفسيه تعبتني السجون والمراكز من كلشي تعبان وبس انتِ راحتي جُماره بس هل مره كوني وياي وخليني اتركها بس انتِ تكدرين تنسيني الادمان بس عطرج يگدر يطلع ريحتها من راسي
دمعت شويه وابچي حضنته وايديه حاوطت ركبته وهو هم ضمني قيدني بين ايديه دفن راسه بركبتي يشمها ويكول
ـ بس عطرج يگدر ينسينيالمخدرات والله
صار الليل وهم اتجهزنه لعرس ابن خال دَيهم وكالعادة طبعاً دَيهم يدقق ويسأل على اقل التفاصيل ويحاسبني على كلشي نزلت بالصاله كلهم موجودين وهو يمهم اول ما شافني يلعب بسبحته وگال
ـ حيك … حيك بابه حيك
الف رحمه على ابيك .
خواته وامه واخوانه ضحكوو لأن هيج گالي طلعو وراحو للعرس بقينه اني وياه
ياقوت : يلا حبيب روحي نمشي ت
وا اريد امشي كال
ديهم : اوكفي
تقرب مني ويخوزر بيه كال
ـ هاي العلى حلكج شنو
صار يمسحها بأيده كتله
ـ هاي مات
ـ منو المات ؟
ـ هههههه لا ديهوم يعني حمره متنمسح
ـ شنو هذا المات انوب يُبا
طلع كلينس من جيبه يمسحها الي
ـ خرب انه خرررررب انهههههه ماتنمسح
ميلت راسي وابتسمت وكتله
ـ خليها حلوه دَيهوم
ـ جؤ ما اخليها انا امسحها بطريقتي
مسك راسي واخذ شفايفي بين شفايفه يبوسهن ويلتهم بيهن يحاول يمسح الحمره احس بشواربه تنغز بيه اكل الحمره اكل بشفايفه دا اريد ابعده وذبت اخذني الواهس ودي ما يبتعد انفاسي تسارعت وخر شفايفه مغمض وكال
ـ مره ثانيه لا تكسرين كلمتي وتخلين شي انا مو راضي عليه
فتح عيونه يباوع لي ذايب وهمس
ـ ترا اعاقبج اقوى من هذا العقاب
ضليت صافنه بي ذايبه ابتعد مني
ـ ها خدرتي ؟ نصعد للغرفة نكمل لو نمشي عدلت ملابسي احاول اصحصح وكتله
ـ يلا نصعد
ـ اه صدك
ـ لا نروح قصدي نرووحح
اخذني من ايدي يضحك صعدنه سيارة ورحنه
بنص العرس القاعة صارت مختلطه شباب وبنات اجه دَيهم يمي
ديهم : الفففف مرررره كتلج هذا اللبس لا تلبسي الا تعانديني
ياقوت : دَيهم شبيك شكو بي لبسي مستور وحلوو
ديهم : اي خوش مستور وهذا **** المرفوع وصدرج ليش تكفريينيي
ياقوت : وينهن وين المرفوع على فكرة ترا اني ضعفانه
ديهم : اخخخخ لو بس مره تكليلي حاضر بدون ما تعاندين
ياقوت : كافي دَيهم بلبيت نحجي
ديهم : ياقوتَ امشي نطلع منا
ياقوت : تخلص الحفله ونطلع
احجي ويا واصفگ اباوع للنسوان واتبوسم حتى لحد يشك بشي
ديهم : جاي اكلج امشي نطلع ماتشوفين الزلم الخراااا شلون يباوعون
ياقوت : خلي عقلك براسي دَيهم خوما بس عليّ يباوعون هواي اكو بنات غيري هنا وحده احلى من وحده
ديهم : اكلي خرااا ولا تقيسين نفسج بالقنادر الباقيات
ياقوت : لا اله الا الله
ديهم : امشي كداااامي
يحجي وضام الحركه بگلبه مايكدر يعلي صوته
ياقوت : روح للسيارة هسه الحگك من نطلع سوا يشكون بينه متعاركين
ديهم : واذا عرفووو جاي اكلج امشيييي كداااامي ياقوتَ ح اتخبلللل
ياقوت : كتلككك روووح واني الحگك
طلع يدردم وخشمه ينفر من العصبيه مرو ولد عمامه من يمي سلمو عليّ ورديت الهم السلام عادي خلص العرس وطلعت برا لكيته ينتظرني رحت يمه
ـ ها گلبي ها يروحي شكو ضايج
مسكني من ايدي وشمرني بالسيارة بقوه حتى راسي انضرب بالباب صعد يمي ومشينه وكل الطريق يسب ويغلط ويصيح نزلت من السيارة دموعي عشرة عشرة وميكبي سايح مثل البومه صعدت للغرفة ابجي ما اريد خواته وامه يشوفوني هم زين رجعنه قبلهن
صعد للغرفة وصوته تارس البيت ويعيط عياط قفلت باب الغرفة حتى لا يدخل ضربه بكل قوته وصاح
ديهم : افتحيي الخراااا
ياقوت : رووووح والله ما افتحه
ديهم : افتحي دا اكلج
ياقوت : دَيهم الله يخليك روح نام بالصاله بديوانيه وين ماجان بس عوفني اريد ارتاح مشاكلنه متخلص
ديهم :اخخخخ ياالله تدرين اذا مافتحتي هسه شراح اسوي
ياقوت : شتسوي
ديهم : اكسرووو للكواااااد واشلعووو من مكانووو
ضربه بقبضه ايده وصااااح
ـ افتحييييي
من الخوف طرت فتحته
ـ خيرررر شكووو شرااايد هم نفس الطلابه!!
ـ انا شحجيت قبل هل مره؟؟؟ حجيت هوااااي واكلت خراااا جثيرررر بس انتِ ماتفهمين بالكلام تريديني افهمج بالغصب مووو؟؟؟
يحجي ويتقدم لي واني ارجع ليوره كال
ـ اسئلج سؤال واحد وجاوبيني بكل صراحة
ـ اا اسئل
ابلع بريگي ناشف من الخرعه يمهههه كال
ـ ولد عمامي
ـ اي شبيهم
ـ شلون يسلمون عليج وترديلهم السلام
ضليت ساكته المراية بصفنه ضربها وكسرها وصرخ
ـ جااااااووبي
ـ هما والله همااا سلمو خوما افشلهم
ـ وهذا الكوااااد يگلج هلا بنت السااادة والثاني يكلج هلا بمرت الرَيس شمدريهم بهاي الاسماء كلها هاااا من خرب بهيج ***** لابوو *** الكوااااااد
ـ كاااافي تكفرررر كااافي متشوف الله شديسوي بينه من ورا كفرك حتى اني انحرمت من الاطفال بسبب كفرك
ـ ها صرتي اطلعين حجج اطفال وما اطفال كوليي اريدك اطلكني واروح اتزوج حتى اخلف وفضيهااااااا
حاصرني ع الحايط ويعيط بوجهي كال
ـ قسماً بذات الله يا ياقوته هذا لسانج اذا ما كصيتوو الج ما اكون انا دَيهم وهاي الشوارب مو عليّ
ـ وانتَ شعرفك سلمو عليّ منو الشاحنك ودازك عليّ؟؟
ـ شوفي لججج انا مو رجل كرسي ياهو ليجي يدفعني وهاي مال شحنوك وما شحنوك لا تعيديها بعد شنييي مو بعينج انااا تعلمي سولفي مثل البشر
ـ لا تغلس جاااوبني شدراااك سلمو عليّ ولد عمك
قرب مني بهدوء ومد ايده جوه الفستان من خصري وطلع كاميرا صغيره تسجل صوت
ـ هسه عرفتي شلون عرفت؟؟
شمرها بوجهي وطلع ضليت ابجي لحد ما تعبت كمت سبحت ولبست ملابسي وغطست بنومي بس اريد انام هيج جسمي خامل ويأذيني
اول مانمت حلمت بنفس الشخص بس جان بصوره اجمل من قبل جنت متمدده مرر اصابعه على خصري ودنگ همس بأذني
ـ كرري كتابه النجمة الخماسيه
رفعني من الجربايه وكفني كباله وانطاني وبدون تفكير رسمت دائرة ورسمت بداخلها النجمة الخماسيه اخذني لأماكن اول مره اشوفها بحياتي ماكو هيج جمال وكأنو عايشه بالجنه اني العب بوسط البساتين والربيع وماي الانهار يجي بصفي وهو صافن بيه تقرب يمي وكال
ـ بقت مره وحده نرسم النجمه الخماسيه وتتحقق كل احلامج
ـ منو يحققهن ومو انتَ وليش تجي بأحلامي
ـ انا ملاكج الحارس مُلبي لجميع امنياتج اكول لأي شي كُن فيكُن
هم رسم دائرة ورسم بداخلها النجمة الخماسيه بس هل مره لونها بألوان زاهيه وفاتحه كعدني بنصها ومسك ايدي وصار يردد همسات مقلوبه وهمسات صحيحه اغلبه كلام مو مفهوم واني اباوعله كال
ـ لا غمضي عيونج واتخيلي جمال الدنيا وياي شد على ايدي بقوة غمضت عيوني واخذني لغير عالم مكان مليئ بالفواكه وانواع الانهار والاشجار وكائنات غريبه ولطيفة تسبح وتلعب وتقطف من الفواكه وتاكل حسيت براحة نفسيه شواي واسمع صوت دَيهم يكعد بيه وفززني من الحلم
ياقوت : فلك فلكك ادري انتَ طالبني بطلابه كل مانمت تفززني
ديهم : شكد تنامين غاح اتخبل منج انا اكعدي مشتاگلج
يسولف ويمسد بشعري واني عيوني بصعوبه افتحهن ضل يتحارش بيه لحد ما صحاني من نومي كعدت لكيته مسويلي عشه
ديهم : تعال ابني اوكلك امس ما اكلت شي
ياقوت : وخررر لا تتلوك ابني وما ابني ترا لهسه زعلانه .
ديهم : افا يول تزعل مني وانا الحَبيب
سوالي لگمه خلاها يم شفايفي وكال
ديهم : يلا حبيبي اكلي
ما اكلتها
ـ لخاطري ام صماخ ام طنگوره
اكلتها كال
ـ جُماره كلشي سوي بيه العبي بيه جوله بس يم غيرتي كلشي يوكف الا غيرتي نار وماتطفى والله ـ ولا مره طلعت مثل الناس وخليتني متهنيه بكل مناسبه وطلعه تسوي مشكله وتبجيني
ـ مو بيدي والله مو بيدي احبچ واغار عليج من هذا الهوى
ما جاوبته تنهد بحسره وگال
ـ يجي يوم وتطفر غيحج وتعيفيني انا اعرف شو حاس بهذا الشي
ـ ثقتك معدومه بيه لهل درجه؟
ـ اثق بيج اكثر من نفسي بس ما اثق بنفسي واخفف غيره وضغط عليج
اريد احجيله ع الاحلام الاحلمها رن تلفونه ضل يخابر ويسولف سوا كتم وكالي
ـ حبيبي مُنير ينتظرني غاح اغيح شواي واجيج ما اطول
ـ والعباس ازعل لا ترووووح
باسني بشفتي وكال
ـ وعيونچ ما اطول
اخذ مفاتيح السيارة وطلع ضليت وحدي ضوجه ماكو شي اسوي
الدبدوب الهداه اليه دَيهم ع المرايه رحت جبته وحضنته ناعم ودافي رجعت اباوع له واتأمله شكد حلو ركزت بعيونه اكو ضوه يهمس من عين الدبدوب بشكل متكرر كعدت ركزت بي اكثر احاول اشوف شنو هذا شگيت الدبدوب من عينه وانصدمت باللي شفته
كاميرا صغيره بعين الدب يراقبني منها عيوني هذا شكد مريض شوكت يبطل هاي حركاته الخايسه .
شمرت الدب على صفحة وكمت نزلت بنص الصالة اعيط التموو اهله كلهم
ـ اابنكم اذا ما يعقل دقيقة ما ابقى يمه
امه تحاول تهدي بيه واني مستمره احجي واسب واغلط
ـ رووحووو عالجو ابنكم المختل شوفو شكو بعقله وبعدين ليش مخلي كاميرا بغررفتي شكلوله عليّ يمه بسلا شايفني مو شريفه
والله دقيقة بعد ما ابقى يمه اذا بقيت يعني اني بدون كرااامة وذرة شرف ماعندي
فتح الباب ودخل دَيهم بس شفته صعدت لغرفتي ماريد اشوفه وجهه لحگني
ـ ياقوتَ اوكفي احاجيج ياقوتَ
ـ دروووح تعالج روووح
ـ لا تمشين من اسولف وياااج اوكفي
امه ترزل بي وتغلط عليه بالصاله صوتها واصل ليمنه بالغرفة طبيت لبست عباتي والشال وگتله
ـ طلگني
ـ ياقوتَ فهميني شكو شبيج؟
ـ لا والله ماتدري شبيهههه!!! اني اكلك شبيه مسكت الدب وشمرته بوجهه وكتله
ـ شنووو هذا ديهممم شنوووو هههذااااااا وصلت بيك تخلي كاميرا بغرفتنه هيج ماعندك ثقه بيه
ضل ساكت واني ارزل بي واصيح واغلط خواته يباوعن من الباب علينه وامه ماتكدر تصعد طابق الثاني بالكوه اسمع بس صوتها من الارضيه تحجي عليه وتغلط
ـ ياقوتَ اكعدي نتفاهم
ـ هههههههه خبله ماكو براسي عقل اكعد اتفاهم ويا واحد مرررريييض ومختل عقلياً شو وخررر من دربي اريد اولي لبيت اهلي
ـ ووووين والله ماتعتبين عتبه الباب
ـ اهوووو درووووح
فتت من يمه اريد اروح مسكني من ايدي وشمرني بالكاع حسيت جسمي اتكسر كمت لحيلي وكفت بوجهه
ـ رووح عالج امراضك يلمريض وبعدين تعال تلگاني يم اهلي انتظرك بس هاااااا شوكت ماتغيرت وصرت ادمي وبطلت تشك بيه
ضرب راسه وصاح
ـ ياااااقوتَ لسااااانج لا تتمادين
ـ صيح صيح واغلط وسبني هم واضربني هاي رجولتك مو مكدورك عليّ بالضرب
مسك فكي بأيديه وعيونه صارت بعيوني وانفاسه تخوف ونتر بعصبيه
ـ عتبة الباااااب ماااا تعبريهااااا فااااهمه
دفعني بكل قوته ردت اوكع ومسكت نفسي كوه احس فك حلكي انشلع من مكانه
ـ والله ثم والله دقيقه ما ابقى يمك اليوم يا اني يا انتَ
ـ لا تمضرطين بسوالفج صمي لحلكج واكعدي نتفاهم
رغد : ماما تخربطت دَيهم الحگ
طلع من الغرفه وقفل الباب عليّ وراح على امه
ـ رغد ـ
كلناله امنه اتخربطت حتى ينزل ويترك ياقوتَ ترتاح شويه لأن من يبقى يمها يسوء الوضع بيناتهم نزل يركض على امي لكاها كاعده وكلشي مابيها
ديهم : يمه شبيج مو كالولي اتخربطتي
ـ كلشي مابيه يا يمه عيف البنيه بحالها خلها تغيح لبيت اهلها
غـيدان : اخذها لبيت اهلها البنيه تعبت من تصرفاتك ومن الشك والمرض اللي بيك. .
اخواني ثنينهم هم رزلوه هو الدمعة بعينو
ديهم : ما اكدر والله ماكدر اوديها مو بيدي
ام بلال : امشي وديها وسوي الها كلشي تريدو حتى لو تريد الطلاك طلكها البنيه تعبت من تصرفاتك يا يمه لا تلومها
دَيهم انهار بالبجي وكاللهم
ـ تكلي طلگني شلووون تكلي طلكنيي يا يمه ما اكدر بدونهااا شلون اطلكهااا افهمووو والله ما اعيش من غيرررهاااا
صرنه نبچي وياه ونحاول نهدي يقهر
ـ اهدأ دَيهم اهدأ
ام بلال : اهدأ يوليدي اهدأ لا يصير بيك شي يبعد عيني
ديهم : تريد تعيفيني يا يمه تريد تخليني وحدي وانا متت وما اخذتها يا يمههه تعبت هوواااي وما حصلتهااا وتگلي طلكنيي يمههههه تگووول طلگنييي وتكولها بكل برود
نبچي ونحاول نهدي وهو يكول
ـ انا احبهاااا والله احبهاااا ما اكدر اطلكها انا اريدهااا يمي ياا يمه افهموووني ماكدر اخليهااا اذا عتبت هذا الباب اموووتت والله اموووتت
صارت بي مثل الهستيريه وصار يحجي كلشي بعقلو من قهروو ويبچي دموعو عشرة عشرة ينفض بنفسوو ويضرب على رجليه
ديهم : تريدني اطلكهااا يا يمههه كوليلهااا بعد لا تكول طلكني والله انجن ياااا يمههه انجننن ابوس ايدج وگفيهااا لا تخليها تغييييح
ام بلال : اي يايمه بعيني بس اهدأ يا امي لا يصير بيك شي يا يمه
ديهم : ما اريد اطلكهااا ماتفهم يا يمه ماتفهم كل مانتعارك تكلي طلكنييي اموووت ومااا واطلگهااا والله ياخذون عمرري وما اطلگهااا انا اريدها يمه اررريدهااا وهيه تگول طلكنيي ماتبطل تكولهااا دوم تكولهاا
وگع بالگاع يبجي ويحجي
ديهم : ما اطلگها والله احبها فهموووهااا لا تعيد كلمة طلاگ كدامي بعد والله اتخبل ومدري شيصير بيه اريدها يا يمه ماكدر بدونها ما اعيفهاا
ضمته امي على صدرها وتبجي وياه وهو يبجي وبچانه كلنه وياه ياخويه ياديهم عمة عيني عليك .
صعدت امي تقنعها ماتغيح على اهلها و دَيهم يبچي جوه بالصاله اجانه بس صوت ياقوتَ وهيه تكول
ياقوت : ما اريده ماتفهموووون صار يخنگني بتصرفاته وغيرته والشك الماله داعي هاااااذا والله ثاااانيه ما ابقى هنااا
نزلت من الدرج متعصبه تريد تغيح لأهلها وامي وراها تركض وتبجي تحاول تمنعها
يتـبع …
▭𝅼▬࣪▭𝅼▬࣪▭𝅼▬࣪▭𝅼▬࣪▭𝅼▬࣪▭
بارت7380 كلمة انطوني رايكم يولو. وتعوقعاتكم
الفصل التالي: اضغط هنا
يتبع.. (رواية بين قبضتهم وقلبه) اضغط على اسم الرواية لتجد الفهرس كاملاً بجميع الفصول.