رواية بنات المنشاوي الجزء الثالث – الفصل السابع عشر
بارت ١٧
بقلم خلود وائل 🌻
حل الصباح واستيقظت الفتيات واستعدو للذهاب للجامعه واجتمعت العائله سويا علي مائدة الطعام لتناول الإفطار عدا نغم التي ظلت جالسه قليلا بغرفتها اما هايا فمالت علي حمزة هامسه : ايه ال انت هببته دة
حمزة باستنكار : انا يابنتي
هايا : حرام عليك والله قهرتها ونيمتها معيطه
حمزة وهو يمضغ طعامه : وهدومي ال مبقاش فيها حته سليمه اعرف البسها مش حرام
هايا بغيظ : دي هدوم مش شعرها ياغبي
حمزة : لا والله وشعري ال حلقته بسببها ايه نظامه !
هايا : انت راجل لو حلقت زيرو طول العمر محدش هيلوم عليك انما دي بنت وصعب عليها تقص فتفوته من شعرها انت مفتري وبعدين اذاي عرفت انه بتاعها افرض بتاعي وانا حطيت منه او افرض انها حطته علي شعرها كله كان هيبقي الوضع ايه ! وكمان غراء غراء يامفتري
حمزة : اولا انا مش مفتري وبقالي كام مقلب ساكت ومبردش ثانيا انا عارف شكل التسريحه بتاعتك ولما لقيتها مقسومه وكل حاجه في منظمات لوحدها عرفت ان الحجات التانيه بتاعتها وعلشان تعرفي اني مش مفتري انا اختارت الكريم ال مكتوب عليه لأطراف الشعر
هايا بغيظ : اطراف الشعر دي شبر بحاله ياظالم حسبي الله فيك
سيف : في ايه ياولاد بتتكلمو في ايه كدة وسايبين الفطار
حمزة : ابدا يابوب دى بس هايا كانت بتسالني علي حاجه
آيه : نغم منزلتش ليه ياهايا لحد دلوقتي
هايا : اصلها لسه بتلبس يامامي وكمان بتقول مش عايزة تفطر اول يوم بقي وكدة ومتوترة
سيف بحنو ابوي: لازم تفطر طبعا والا ضغطها هيوطي وتتعب اطلعي ناديلها ياحبيبتي
هايا بتوتر : معلش بلاش يابابي اصل يعني شكلها مش عاوزة تاكل بجد
سيف : براحتها بس خلي ام رباب تجهزلها لانش بوكس
حمزة بتريقه : ليه لسه نوغه في الحضانه
سيف : لم نفسك يامحترم
حمزة بأدب: أسف
يونس : كنت حابب استأذن حضرتك يابابا اني هرجع بدري من الشغل النهاردة علشان هتغدي انا ومليكه سوا
آيه مقاطعه : الغدا النهاردة عند عز ومنال وكلنا معزومين ومنال نبهت محدش يتأخر
يونس : بس انا وعدت مليكه
سيف : خلاص ياحبيبي هاتها معاك
آيه بضجر : متخليها في يوم تاني الاسبوع طويل
يونس : خلاص ياماما مش مشكله اعتذرولي من منال وفي اي وقت هبقي اروحلها الا العزومه دي بمناسبه ايه ؟
آيه : بيقولو عندهم مفاجئه لينا كلنا
حمزة : شكلها هتجوز عز ودي مفاجئه ضرب نار 😂😂🔥
يونس : انا ماشي قبل ماتجبلي الضغط
اتجه يونس وسيف لمقر عملهم و بسيارة خاصه بالسائق انطلق كل من حمزة وهايا ونغم التي ظلت شاردة طوال الطريق والحزن يكسو ملامحها
حمزة لنفسه : ” شكلها سلمت نمر ورفعت الرايه البيضه ايوة كدة كان لازم اغوط اوي معاكي في المقالب علشان تتلمي صحيح الخوف بالعين تسلك احموزة باشا والله ربنا يخليني لمصر ”
نغم لنفسها : ” بقي كدة ياحمزة هي وصلت لشعري طب والله لدفعك التمن غالي اووي واضحك الكل عليك ذي مابكيتني علي حالي ”
مر منتصف اليوم وامضت الفتاتان الوقت كاملا بين المحاضرات برفقه زميلاتهن وكونت نغم بعض الصداقات السطحيه كونها اجتماعيه قليلا اما هايا فجلست تنتظر نغم بالكافتيريا برفقه صديقاتها التي وعدتها بان تعرفهم عليها
داليا : وحشاني قد البحر وسمكاته بجد ياهيوو
هايا : انتي وحشاني اوووي قد الليل ونجماته
ريم بحنق : اجيب اتنين ليمون بقي
ريتال : متهدي شويه هي هايا علي قدك ولا ايه احنا كلنا اصحاب
ريم : يابنتي هايا دى شق الشقايق افهمي
هايا : وانتي غاليه عندي جدا ياريموو
صدع رنين هاتف هايا وكانت المتصله نغم
هايا : انتي فين يابنتي
نغم: انا وصلت للكافتيريا اهوة انتي فين قابليني
نظرت هايا نحو المدخل فوجدتها تقف بحيرة ثم اشارت لها : بصي كدة انا رافعه ايدي وبشورلك اهوة
بحثت عنها نغم بعينيها ثم هتفت : تمام شفتك اققفلي
انضمت نغم للفتيات وبدات هايا بتعريفها لهم
هايا : دي نغم يابنات بنت خالتي ال كلمتكو عنها
داليا : منورة مصر ياقمرايه انتي
نغم : منورة بالأسبوت ال في السقف يسطا
ريتال بقهقهه : لا دي بنت بلد اووي
ريم : شكلنا هنبقي صحاب جامد يانغم
داليا بقهقهه: دمك خفيف يانغوم
نغم وهي تهندم هيئتها بمرح : كفايه ياجماعه الواحد هيشوف نفسه ومش هتعرفو تكلموني تاني
ضحكت الفتيات جميعهم ثم اردفت داليا : انتي في كليه ايه بقي
نغم : انا وبكل ندم واسف شديد في صيدله
ريتال : لااا اجمد كدة يااشطر كتكوت هتبتدي صياح من اول يوم
نغم : من اول محاضره سيادتك
ريم : شكلك غاويه لعب بقي
نغم بمرح : اه الصراحه
هايا : ايه رايكو نروح نعمل بروڤه لفساتين خطوبه ريتال اخر الاسبوع
داليا : اشطاا جدا
ريتال : انا هختار فساتينكو واحدة واحدة علي زوقي ولا تمانعي يانغومه
نغم : ايه دة هو انا هحضر ؟
ريتال : ايوة اكيد من النهاردة انتي الضلع الخامس للشله بتاعتنا ولازم تحضري خطوبتي وبعدين الفرق مابينا سنه واحدة يعني فهنعتبرك دفعتنا قولتي ايه
نغم بتمثيل الجديه: هشوف جدول مواعيدي وابلغك
ضحك جميعهم علي اثر اسلوبها المرح
هايا : ساكته ليه ياريم !
ريم : يابنتي انتو اثرياء وكل مناسبه بفستان هروح فين في وسطكو بالكام فستان بتوعي
نغم بغيظ من اسلوب ريم المتعجرف: في حاجه اسمها مشاء الله لو تسمعي عنها وبعدين اجمد فستان ايجار مش بيع عامل ٣٥٠ جنيه اكيد مش هنروح لسامو هجرس يعني
ريم بحنق : انتي بتتكلمي معايا كدة ليه انا خصيتك بالكلام اصلا
داليا : صلو علي النبي ياجماعه
هايا : خلاص ياريم نغم اصلها متضايقه شويه ومش متعودة علي هزارك
ريم بعجرفه : متضايقه علي نفسها ياستي مش عليا
نغم : الحلوة مالها داخله شمال ليه أنا قلت ايه غلط ؟
ريم : لا دة الشمال دة يعرفوة امثالك انتي يادلوعه بابي
نهضت نغم من مجلسها وصاحت بها : بت انتي احترمي نفسك وقسما بالله لولا خاطر هايا لكنت قلباكي علي الأرض وحاطه راسك في اققرب جردل ومسحه بشعرك بلاط الكافتيريا
ريتال بأعجاب لثبات نغم : اوووف اين الجبهه ياريم انا لا اراها
ريم : في ايه انتي كمان ياريتال !
هايا: خلاص بقي حرام عليكو
صدع رنين هاتفها مرة اخري فصمت الجميع واجابت المتصل سريعا
هايا : ايوة ياحمزة
حمزة : هتنامو جوة النهاردة
هايا : انت وصلت برة
حمزة : ايوة من بدري والبنات عماله تعاكسني اكمني مز جامد زوحليقه انجزي يلا
هايا : حاضر جايه اهوة
اغلقت الهاتف وهتفت : يلا يانغم حمزة برة .. نتقابل بكرة يابنات ان شاء الله سلام
جميعهم : سلام
مضت كلاهما بينما نغم تتحدث بأسف : عليفكرة مكانش قصدي اتحمق فيها بس فعلا اسلوبها وحش اوي
هايا بتفهم : انا عارفه بس احنا اتعودنا عليها كدة من زمان وعادي فكك بس والله هي طيبه اوي ولما تعرفيها كويس هتحبيها
نغم : لاه انسي اعرف مين دى انا صحتي علي قدى والدكتور مانعني من وجع القلب قالي كفايه عليكي حمزة 😂
ضحكت هايا رغما عنها ودلفو سويا للسيارة متجهين للمنزل وبعد فترة وكل منهم بغرفته
هايا : رايحه فين ؟
نغم : هنزل اجيب مايه سقعه انا عطشانه اوي
هايا : تمام هلف الحجاب واحصلك علي طول
نغم : اوكشن
دلفت نغم للخارج وهبطت درجات السلم ثم اتجهت نحو المطبخ وبعدما تأكدت من عدم وجود احد قامت بأخراج احدي الأطباق البلاستيكيه الكبيرة ثم ملئتها بالماء واضافت كميه لابأس بها من البريل ثم عاظت للأعلي مرة اخدي وبهدوء دلفت لغرفه حمزة بعدما تأكدت من وجودها بالمرحاض فهو لم يجيب طرقات الباب المتكررة ثم قامت سريعا بطي السجاد المفروش ارضا وسكبت المياه ثم اخرجت من حقيبتها الصغيرة بضع صواريخ واشعلتها ثم ألقت بها امام باب المرحاض وهرولت سريعا عائدة لغرفتها اما عن حمزة فدلف خارج المرحاض وهو يجفف خصلات شعرة ويدندن ليصعق فجاه من انفجارات الصواريخ الصغيرة فيهرول للامام محاولا تخطيها فينزلق بشدة ارضا وهاهو صاروخ ينفجر تلو الاخر فينهض مسرعا وتنزلق قدمه ويسقط مرارا وتكرارا وهو لا يعي مايحدث بعد اما بالغرفه المجاورة
هايا بخضه : ايه الصوت دة
نغم بهدوء الذئاب ومكرهم : تلاقيه حمزة مشغل التلفزيون ومعليه منتي عارفه انه بيحب يسمع الجيران معاه 😂
هزت هايا كتفها : ممكن بردو يلا بينا
دقائق وكان الجميع بالأسفل ينتظرون نزول حمزة الذي هبط السلم بأرق ثم اتجه نحوها دون انتباه الجميع لهم
نغم : حبه زحاليق انما ايه يستاهلو عمودك الفقري
حمزة بغيظ بعدما فرك وجهه وامسد علي خصلات شعره : الصراحه تتقال انتي كل نرة بتعلي بمستوي الجنان بتاعك وفي مرة هتخليني اجيب أجلك واريحك واريح نفسي واريح البشريه كلها منك
نغم بأبتسامه سمجه : انچوي ياحموزة
غادرت من امامه قبل ان ينفذ تهديدة وهو يتمتم : “اول يوم هنا وعملت كدة امال اخر الاسبوع هتعمل ايه هتعلقني مكان النجفه في الريسيبشن البت دى بقت خطر ..اه ياضهري ياااني”
________________________________
في شركه الحديدي وتحديدا بمكتب يونس كان يجلس في مكتبه يهاتفها معتذرا
يونس : حقك عليا ياملوكه هعوضهالك والله
مليكه بأستياء : يعني يوم ماتعزمني علي الغدا من نفسك ترجع في كلامك تاني
يونس : غصب عني والله الموضوع طلع فجأه كدة
مليكه : مفجأتك كترت يايونس وانا بجد زهقت من قله اهتمامك
يونس بترجي : ممكن مرة واحدة من نفسي منقفلش المكالمه واحنا متخانقين علشان خاطري
مليكه بتنهيدة : حاضر
يونس : ليكي عليا بكرة هاخدك ونقضي اخر اليوم برة ونتعشي سوا و شوفي نفسك تعملي ايه وانا معاكي
مليكه بفرحه : بجد يابيبي
يونس : بجد ياحبيبتي
مليكه : لاڤ يووو اوي بجد خلاص سماح المرة دي
يونس : يارب كدة دايما
مليكه : طب كلمني اول ماتوصل طمني عليك اوك
يونس : اوك .. سلام
مليكه : سلام يابيبي
اغلق الخط بارتياح كونها لم تغضب ولملم اشيائه وهبط للاسفل مستقلا سيارته قاصدا منزل منال
________________________________
بعد فترة في منزل منال كانت العائله مجتمعه ( فريد و ثناء والدا عز واخته نيرة وزوجها هشام وابنها سند و عاصم و ورد ومحمد وهناء وزياد وفيروز و سيف وآيه وحمزة و هايا ونغم ودكتورة رنا ) ارتفع صوت رنين الباب ⚡⚡⚡
منال : حد يشوف الباب ياجماعه
أسرعت فيروز نحو الباب وهي تحمل طبقين بين يديها فقد كانت تساعد الفتيات باعداد الطعام في المطبخ وقامت بفتح الباب وفي غضون ثوان تملك منها التوتر وسقطت الاطباق من بين يديها
يونس : السلام عليكم
فيروز : ⚡⚡⚡⚡
يونس بخضه : براحتك اوعي نفسك متخافيش وعلي فكرة انا مستحيل اكون السبب المرة دى شوفي مين زعلك صدفه قبل ماتشوفيني
انهي جملته وكلاهما يبتسمان و انحنو للاسفل لجمع قطع الاطباق المتناثرة
يونس : لا خليكي واقفه
فيروز : مفيش مشكله انا هلمهم اتفضل انت جوة
يونس باصرار : حاسبي بس ايدك لتتعوري ولو سمحتي اققفي وانا هجمعهم ميصحش كدة
نهضت منصته لطلبه وتجنبا للخجل الذي حاوطها ثم نهض هو بعد برهه وناولها قطع الاطباق التي قام بجمعها فوق قطعه كبيرة منهم
يونس بأبتسامه : اتفضلي
فيروز : شكر___ 😨ايه دة انت انجرحت
يونس : لا دي حاجه بسيطه حصل خير
فيروز : لا مش بسيطه ربنا يستر اتفضل جوة وانا هشوف عند منال مطهر
دلف يونس وانضم لمجلس الرجال وقام بلف اصبعه بمنديل وسط قلق الجميع عليه
سيف بلهفه : مالك يايونس ايه ال جرح صبعك كدة ؟
يونس : مفيش يابابا دة بس طبق اتكسر وانا داخل فجيت اشيله من علي الارض انجرحت حاجه بسيطه متقلقش
عز ممازحا : كسرت الصيني بتاع منال يايونس عليه العوض ومنه العوض يابني دة مكتوب في القايمه حرام عليك دة فيها حرمان من الاكل اسبوع
قهقه الجميع ثم دلفت آيه والجميع خلفها وفيروز تحمل علبه الاسعافات الاوليه
آيه بلهفه : مالك ياحبيبي ايه ال حصل
يونس بدهشه : مفيش والله ياحبيبتي انا كويس دة حاجه لا تذكر متقلقوش ياجماعه
آيه بتوتر: انت بجد كويس ياحبيبي بالله عليك متخبي عليا حاجه
محمد ممازحا : بس بقي علشان انا حساس ودمعتي قريبه اهئ اهئ اهئ
يونس بابتسامه جانبيه : انا قلت من الاول انك شيخ تيواني محدش صدقني
فريد : محمد دة ملهوش حل ومتعرفش تمسك عليه غلطه ربنا يحفظه
عز : طب ايه يادوك هتفضلي واقفه تتفرجي ومش هتسعفي الراجل دمه اتصفي ياشيخه
شعرت فيروز بالاحراج ثم اتجهت نحو يونس وبعمليه شديدة قامت بتعقيم جرحه الطولي بأحدي جوانب سبابته وضمضته ثم وصفت له حبه مضاد حيوي ليتناولها بعد الغداء
عاصم : طب ايه ياجماعه مش هنتغدي علشان نعرف المفاجئه ال جمعتونا علشانها
ورد : بصراحه انا متشوقه اعرف اووي
ثناء : يارب يكون ال في بالي ربنا يسعدكو ياولاد
عز : الجميع لاماكنهم يلا انتو معطلين الغدا ولا كانكو كنتو بتطبخو
منال : الله مش بنفضي الاكل في الاطباق
نغم بمشاغبه : ال اتكسر منهم اتنين
منال : بس بقي متفكرنيش بمأساتي 😂
جلس الرجال علي طاوله السفرة بينما جلست النساءعلي طاوله المطبخ وبعدما انتهو من تناول الطعام اجتمعو في الصالون وبعضهم في الريسبشن المتصل بغرفه الصالون
عاصم : المحشي جميل اوي مظبوط بالملي اللهم بارك
نغم من الخارج : انا ال غرفاه في الطبق ياعمو
قهقه الجميع علي اثر كلماتها وصوتها المرح الذي يجبر من حولها علي الاندماج بحاله من المرح
فريد : مش هتعرفونا ايه هي المفاجأه بقي ياولاد
منال : استني ياعمي لما يوسف يجي مش عارفه اتأخر ليه
رنا :زمانه جاي هو قال انه هيتأخر بس مقالش لأمتي
عز : اكيد هيجي المغرب انا عارفه مواعيدة مظبوطه بالسنتي
منال : بالملي ياعم
عز : اسمعي الكلام بالسنتي يعني مش جي اصلا
ورد : قولو بقي هتشوقونا اكتر من كدة .. بعدين لما يوسف يجي هنبقي نعرفه مش مشكله يعني
نهضت منال وبرفقتها عز وامسك كلاهما بيدي بعضهما ثم نظرو لجميع الموجودين بسعادة غامرة
منال : جاهزين
جميعهم : هااااا
منال : عز حامل
جميعهم :😨😨🥴🥴
نزع عز كف يدة ثم نظر لها هاتفا : نعم يختي
منال بتوتر : قصدي انا حامل انا حامل براحه ياعم انت الله
قهقه الجميع بقوة علي حديثهم وتبدل ملامح عز للصدمه ومنال للتوتر ثم سريعا ابتسم كل منهم للاخر وقبل جبينها ثم امسد بكف يدة علي بطنها بحنو بينما انهالت عليهم المباركات والتهنئات من الجميع بسعادة غامرة
ومن بين اللحظه والأخري كانت تتقابل عيون فيروز ويونس عن طريق الخطاء ولكن أثرها بداخل كلاهم كان يشبه التيار الكهربائى الذي ينتشر في جميع اوصالهم ….وبعد فترة ارتفعت طرقات الباب ثم اتجه عز لفتحه وكان يوسف ثم دلف للداخل وحي الجميع ثم جلس برفقه الرجال وابتسم بفرحه عندما علم بخبر حمل منال وهنأها هي وعز ثم ظل يبحث عنها بعينيه فوجدها تتصنع الانشغال بالحديث برفقه الفتيات
يونس : استاذن انا ياعز لازم أرجع الشغل اخلص كام حاجه كدة ومرة تانيه الف مبروك وعقبال ماتشيله في حضنك بالسلامه يارب
عز وهو يربت علي كتفه : عقبال مانفرح بيك نورت يايونس وخلينا نشوفك متبقاش ذي كحك العيد ياراجل
ابتسم يونس ثم غادر متجها نحو باب الشقه فتفاجئ بها علي وشك ان تصتدم به وهي تخرج من المطبخ حامله بين يديها طبق به بعض ثمار التفاح الاي سقطت احداهم ارضا فهم هو باحضارها وإعادتها للطبق مرة اخري
يونس ممازحا: مستحيل كدة دى مش طريقه كل ماتشوفيني توتريني بس اكيد دى صدفه علشان انا حد مزعلني
ابتسمت بخجل مردفه : انا اسفه
يونس : علي ايه !
فيروز بأرتباك وهي تخفض بصرها بعيدا عن زرقاوتيه التي ورثها عن والديه : يعني عن اسلوبي معاك واني يعني تصرفاتي مش متزنه وكدة حقيقي احرجتك اكتر من مرة بس غصب عني معلش
يونس بتفهم : علي فكرة انا اصلا مش زعلان وانا متفهم لخبطك دى ومقدر جدا وياريت انتي ال متزعلش لو كنت انفعلت عليكي انا بردو غلط بس حقيقي كنت مش فاهم اي حاجه وبحس اني عامل حاجه غلط
فيروز بابتسامه : حصل خير
يونس بابتسامه : خير ولا يهمك .. بعد اذنك
فيروز : اتفضل مع السلامه
غادر يونس واغلق الباب خلفه وهو يشعر براحه وسعادة داخليه لا يعلم مصدرها ايعقل ان تكون لأجل خبر منال السعيد ام ان هناك شئ اخر لا يعلمه بعد
_________________________
رايكم ياحلوين 🙈🥰 بصو مش هنزل البارت الجاي غير لما اشوف توقعاتكو ال بتفرحني اووووي ❤️❤️ والڤوت ال بيشجعني 🤩🤩 ولو معملتوش كدة هنزل بردو تدري ليش .. علشان انا طيوبه 🙈😇 نسيت اسالكو رأيكو ايه في اغلفه الروايه بعد ماعدلتها التلات اغلفه💙 في رعايه الله وحفظه
الفصل التالي: اضغط هنا
يتبع.. (رواية بنات المنشاوي الجزء الثالث) اضغط على اسم الرواية لتجد الفهرس كاملاً بجميع الفصول.