رواية بنات المنشاوي الجزء الثالث – الفصل السابع والعشرون
بارت ٢٧
بقلم خلود وائل 🌻
سيف : افطر ياحمزة وبطل برطمه
حمزة وهو يرمقها بغيظ : منك لله
نغم : بتقول حاجه يااخ
حمزة : بقول أمري لله
بعد دقائق
نغم : انت بتعمل ايه ياقلب مامي دة مش بيتاكل بالشوكه والسكينه
حمزة بسخرية: امال بيتاكل بالأيد يافلاحه
نغم :سلامه النظر كلنا اهوة بناكله بأيدينا وبس الصلصه علي الرز بالمعلقه
حمزة : انتي تسكتي خالص فاهمه
ظل حمزة يحاول عدة مرات ان يتناول السمك بأستخدام الشوكه والسكينه فلم يستطع وبالنهايه وضعهم جانبا وشمر عن ساعديه ثم بداء بتناول طعامه بأستمتاع بينما تختلس نغم النظرات وهي تقهقه علي هيئته
هايا وهي تلكزها : اتلمي بقي بدل ماتلبسي طبق الصلصه في وشك ولا انتي مبتحرميش
نغم هامسه هي الأخري : ميقدرش دة ابوكي كان علمه الأدب
هايا : كب كلي يختي وانتي ساكته
سيف : بكرة إن شاء الله تروح تستقبل عمتك يايونس من المطار
يونس : حاضر يابابا عامل حسابي
آيه بملل : الا صحيح يايونس انت مجبتش لخطيبتك الدلوعه فانوس ليه
يونس وهو يعقد حاجبيه: فانوس ايه ياماما !
آيه وهي تتناول طعامها وعلامات الاستياء علي وجهها : اصل لقيتها بتكلمني النهاردة وبتقولي يرضيكي ياطنط يونس ميجبليش فانوس ولا نتسحر سوا اول يوم
حمزة بقهقهه : وانتي قولتيلها ايه
آيه : قولتلها اه يرضيني
انفجر الجميع ضاحكا علي هيئتها وردها الاخير
يونس بضحكات مكبوته : ليه بس كدة ياست الكل
آيه: بت ملزقه انا عارفه جابت الجرآه دى منين علشان تكلمني في التفاهه دى
سيف وهو ينظر للطعام الذي يتناوله : والله الفانوس بقي تفاهه دلوقتي!
آيه بحمحمه : احم .. لا مش قصدي انا اققصد يعني ان دة مش موضوع تناقشني فيه وحتي لو حصل انا مبحبش اسلوبها المايع دة
حمزة : وحش الكون ياسيطرة
سيف : عملتي ايه بقي بعد مااحرجتيها ؟
آيه : ولا اتهزت اصلا فضلت تلف وتدور وعاوزة تعزمنا كلنا عندهم اخر الاسبوع
يونس : عمي حاتم ( والد مليكه ) كلمني بخصوص العزومه دى بردو
آيه : وقلتله ايه
يونس : صراحه معرفتش اخلع منه وهو صمم علي طلبه
سيف وهو يضع الملعقه من بين يدة وينظر ليونس باهتمام: سبق واتكلمت معاك في الموضوع دة ولحد النهاردة ملقتش منك اجابه
يونس : سيبني براحتي يابابا
سيف : راحتك دى في ركنه بنات الناس جمبك
يونس بثبات: مين قال اني راكنها جمبي احنا محددين سنه فترة خطوبه واظن مفاتش منها غير كام شهر ولحد دلوقتي انا وهي ملقيناش نقطه مشتركه مابينا نتقابل فيها واول ما دة يحصل هحدد معاد فرحنا علي طول
آيه وهي تضع يدها برفق علي كف يد سيف وتنظر نحوة بحنو : سيبه براحته ياسيف دة مش وقته ولا مكانه
رمقها سيف بحب ثم اردف مبتسما : تمام .. بس هو لازم يصالح مليكه خليه ياخد الفانوس ال جبتهولك
آيه : نعم !! سيف انت بتهزر دة فانوسي انا
سيف بقهقهه : كبرنا علي الكلام دة ياقلبي
آيه : مين دة ال كبر انت لسه في عيني قمر متغيرتش عن اول مرة شفتك فيها وانا هفضل حبيبتك وبنتك ال ملزم تجبلها فانوس رمضان وعروسه المولد وشيكولاته وبالونات هيليوم وورد كمان فاهم
سيف بتمثيل الخوف بمرح : فاهم يابنوتي فاهم
هايا : مامي انتي مش واخدة بالك انتا قاعدين
آيه : دة جوزي وانتو عيالي يبقي اعمل ال انا عوزاة قال اديها فانوسي قال
نغم : انا بقول تسكتي اصل امك هتقلبها حرب وهتعمل من مليكه بانيه مقلي
هايا : الله وياريت بقي بطاطس مقرمشه وحبه كاتشب
نغم : انتو عيله لاسعه بالله 😂😂
____________________________________________
انتهي فارس وعائلته من الافطار واتجه كل منهم ينهي اعماله بينما جلس فارس برفقه دعاء بالحديقه يتسامرون
دعاء : وناوي تعمل ايه دلوك ريان باينه لساته زعلان وشايل چوي من فضه
فارس بتنهيدة : وهي عتكدب ليه يادعاء ولا حتي لو كدبت في حديتها عن ابرار تچوم ترمي حالها من علي السلم وتكسر رچليها ولا تفتح راسها !
دعاء : الموضوع كلياته مش داخل راسي ومنظر ابرار وهي معاودة دارهم بيأكدلي انها مظلومه
فارس : الموضوع دة ينقفل لأن الحديت فيه عيچيب وچع الراس وزعل بين ريان وزين
دعاء: لو اكدة ماشي بس دي مش عيشه يوم دة عمر بحاله ولو في خلاف بين البنتين يبقي متستنظرش ان ولادك تدوم لمتهم حواليك
فارس : أني چولت نقفل الحديت دلوك لكن مش نغمض عيونا ونسكت لاة أني لازمن اعرف مين الظالم ومين ال انظلم بس بالهداوة أنتي خابرة زين أني بكرة المشاكل والخراب ولا نسيتي
دعاء بتفهم : لاه ياواد عمي منسيتش بس الحقيقه عنعرفوها كيف وحتي لما تروح للسلانتيه عتچولهم أيه ؟!
أستند برأسه علي كف يدة المرتكز علي طرف الكرسي ثم اردف : يحلها ربنا .. چومي اعمليلي فنچان قهوة محوچه من ايديكي الحلوين ال فيهم الشفا دول
ابتسمت دعاء ثم اردفت : من عنيا وبالمرة هسأل البنات ال چوة عن البت ثنيه دى واعرف حديتها صوح ولا لاة
فارس : وة انتي مخبراش الخدم حداكي يادعاء ولا ايه
دعاء : وة كيف دة يافارس! اني اققصد ان البت دى شغاله حدانا اديلها كام شهر بس مبقالهاش سنين معدة كيف البت بنادر وزينات وتماضر و فرحه دول متربيين بالقصر واهليهم كمان كانو عيشتغلو حدانا اما البت دى چات چديدة اهنيه ولولا الحاچه بهيجه هي ال چابتها أني مكنتش شغلتها حدانا
فارس : لاه اوعاكي تزعلي الحاچه بهيجه دى حبيبه أمي
دعاء بحب : ايوة طبعا
استأذنت منه مغادرة للداخل ثم تقدمت ناحيه المطبخ حيث استوقفها حديث الخدم بنبرة مسموعه
بنادر بشهقه : وة اش اش اش ايه يابت يا ثنيه الفلوس والدهبات دى
ثنيه وهي تمسك بصرة القماش التي تمسك بها زميلتها وتهتف بضيق : ايدك ال عايزة قطعها دى
بنادر : وة أني كنت بنضف الحته اهنيه ولقيتها وسط خلجاتك چيباهم منين اوعي تكوني يدك طولت اهنيه ولا اهنيه يابت انتي
ثنيه : لاه ياشاطرة دول چيباهم من عرق چبيني
بنادر : وة عتشتغلي فين تاني غير اهنيه
ثنيه بأبتسامه ماكرة : وهو فيه ذي الشغل اهنيه طب دة اليومين الچايين الشغل هيكون علي ودنه
بنادر بعدم فهم : تقصدي ايه
نظرت ثنيه حولها لتتأكد من عدم وجود احد ثم اردفت : فيكي تكتمي سر واعر چوي وتكسبي من وراة دهبات كيفي اكدة
بنادر : شغل ايه دة يابت ياثنيه اوعاكي يكون حرام حد لله
ثنيه : حرام ايه يامخبله انتي دة اني بس عملت خدمه للست فضه وهي كافئتني عليها
بنادر : خدمه ايه دى
ثنيه : يعني لو چولتلك تعملي ذيي
بنادر : بت ياثنيه اوعاكي تكوني شهدتي زور علي الست ابرار حرام عليكي دى بلسم
ثنيه : وة فيها ايه يعني ومين قالك انها بلسم دى الست فضه برقبتها ويدها فرطه شوفي الفلوس قد ايه
بنادر : بصي ياخيتي ال عملتيه دة غلط وممكن يهد القصر علي ال فيه احسنلك تروحي لفارس بيه وتحكيله ال حوصل وهو عيسامحك ويصلح ال خربتيه انتي والست فضه بتاعتك دى
ثنيه : چرا لعقلك حاچه اياك
بنادر : اسمعي مني اني خايفه عليكي وحطي براسك ان المنشاويه دول زعلهم واعر چوي وال عيدوسلهم علي طرف يقطعو رچليه ولا انتي والست فضه تقدرو توقفو بوشهم وانتي حرة
ثنيه : اوعاكي تروحي تحكي للست دعاء
بنادر : يعز عليا محكيلهاش كفايه قهرتها النهاردة بأول يوم رمضان بس والله لو مرچعتي عن ال براسك لكون حكيالها كل حاچه
بعد لحظات دلفت دعاء للمطبخ وهي تنادي بنادر وكأنها لم تنتبه لحديثهم وساعدتها بأعداد القهوة تحت انظار ثنيه المتوترة وبينما تهم دعاء بالخروج توقف امامها مردفه : الا چوليلي ياثنيه هو ايه ال حوصل النهاردة بالظبط بين ستك ابرار وستك فضه
ثنيه بتوتر : الست ابرار ضربتها وقالتلها أنتي ملكيش مكان اهنيه أني ست القصر دة كلياته بال فيه وزقتها من علي السلم
دعاء : وة بچي اكدة
ثنيه : ايوة ياست هانم
دعاء : ولما انتي شفتي الحديت دة ياثنيه مروحتيش تحچزي مابينهم ليه او تيچي تناديلي
ثنيه بتوتر : اصل . اصل ياست هانم أني خفت يعني لواحدة منيهم تزعل مني وبعدين أني مخبراش ايه الحكايه
دعاء : تؤ تؤ البت ابرار دى طلعت واعرة چوي صحيح ال تحسبه موسي يطلع فرعون
ثنيه : ايوة .. غلبانه ست فضه انكسر بخاطرها هي وزين بيه
دعاء : لاه معاش ولا كان ال يكسر بخاطر ولادي وال يفكر يعملها عكسرله رقبته
القت جملتها الأخيرة بنبرة محذرة أقرب للتهديد ثم غادرت المطبخ متجهه للحديقه مرة أخرى
بنادر : مش قلتلك چولي الحقيقه
ثنيه : اسكتي انتي
بالخارج جلست دعاء برفقه فارس بعدما وضعت امامه القهوة
فارس : اتأخرتي چوي يادعوتي
دعاء : ربنا معيرضاش بالظلم واصل وسبحان من خلاني اسمع بودني ومحد يحكيلي
فارس بعد استيعاب : وة ايه الحديت ال عتچوليه دة !
دعاء : ابرار مظلومه يافارس كيف ماقلتلك
فارس : وايه ال مخليكي متوكدة اكدة
روت له دعاء ماحدث منذ قليل بينما تبدلت ملامح فارس للضيق الشديد ثم اردف : بچي اكدة للدرچادي الغل عاميها بت چابر
دعاء : نقاوتك يانضري
فارس : ايه ياوليه ال عتچوليه دة
دعاء: وة عتبلي عليك ولا إيه
فارس : لاه حديتك صوح بس دلوك لازمن تاخد چزائها وجزاء ماهروح للسلانتيه وأني خچلان منيهم
دعاء : وة اوعاك تفكر اكدة تاني انت راسك مرفوعه فوق چوي وال حوصل دة ملناش يد فيه بس طالما الحق ظهر يبقي لازمن ابرار ترچع وسطينا معززة مكرمه
فارس : تقصدي ايه
دعاء بسعادة تحمل مخطط بداخلها : أني عچولك قصدي إيه
__________________________________________
كانت تجلس فيروز بالتراس الملحق بصاله شقتهم تتأمل السماء منتظرة أذان العشاء والتراويح بينما انضم لها والدها وجلس علي كرسي بجوارها
زياد : الجميل سرحان في ايه
فيروز : في خلق ربنا سبحانه وتعالى
زياد : وايه ال شاغل بالك وخلاكي تسرحي في جمال خلق الله
فيروز وهي تنظر له باهتمام: بابا هو فعلا يوسف جه لحضرتك واتفق معاك علي معاد الفرح
زياد بهدوء : ايوة ياحبيبتي
فيروز بأعين تلمع بالدموع : طب مش تسألني يابابا
زياد : واخرتها ياحبيبه بابا … يابنتي العمر بيجري وانا وامك نفسنا نتطمن عليكي ونفرح بيكي وبعيالك حوالينا قبل مانموت
فيروز : بعد الشر عليك يابابا بس انا لسه مخلصتش علاجي وحالتي مش مستقره خالص اذاي عايزيني اشيل مسئوليه بيت
زياد : دكتورة ميرڤت قالت ان حالتك اتحسنت الشهر دة كتير عن الاول ودة مؤشر حلو ولما تدخلي في دوامه تجهيزات الفرح هتحسي بدنيا حلوة جديدة عليكي وهتفرحي في النهايه بجوزك جمبك وهتنسي كل التعب ال مريتي بيه
فيروز : بس انا يابابا مبح_____
قطعت كلمتها وابتلعت الباقي بجوفها خشيه ان تحزن أباها ثم استأذنت منه وهمت بالأنصراف
زياد : رايحه فين يابنتي
فيروز : هنزل المعمل ولا حضرتك ناسي ان عندي شغل
زياد : ربنا يعينك ياحبيبتي
دلفت لغرفتها وما ان اغلقت الباب حتي تكورت ارضا وظلت تبكي بقهرة
______________________________
طرقت نغم باب غرفه حمزة عدة مرات وبالنهايه فتح لها
حمزة بتأفأف : ارزل واحدة علي الكوكب عايزة ايه
نغم بأبتسامه : حبيبي انشالا تسلم
حمزة: باردة
نغم : طالعه لحمزة ابن خالتي
صفع الباب بوجهها بينما اردفت بغيظ : بيموت فيا
طرقت الباب مرة اخري فقام بفتحه هاتفا : اخلصي يانغم مش فايقاك
نغم ببرود: والله لو كلمتني كدة تاني لهحرمك من الميراث ☝🏻
حمزة : يامصبر الوحش علي الجحش يارب
نغم : عندك حق انت محدش يتحملك الصراحه
اغتاظ منها بشدة واحمرت عيناه ودفعها للخلف حتي ارتطمت بالحائط وحاوط رقبتها النحيله بقبصه يدة من فوق حجابها حتي شعرت بالأختناق
نغم : اااه…. هه..همووت يامجنون
حمزة : لمي ام لسانك ال هقطعهولك في يوم من الايام دة ولما تتكلمي معايا تتكلمي بأدب فاهمه
نغم بأختناق: فف فاهممه
ترك عنقها وسمح لها بتذوق الاكسچين ثم عاد لغرفته فأستوقفته بحديثها وهي تلهث : بيقولك عمي سيف البس يلا وتعالي معايا
حمزة وهو بقمه غضبه: كان يوم مايعلم بيه الا ربنا يوم مارجلك خطت عتبه البيت دة غوري من وشي
القي كلمته الأخيرة بحدة جعلتها تفر مهروله من امامه وهبطت للأسفل تنتظرة لدقائق
هايا : مالك وشك مخطوف ليه كدة
نغم بتوتر : اخوكي قلب تنين مجنح وكان هيموتني ابن الملسوعه
هايا بقهقهه : بت لمي نفسك الملسوعه دى تبقي مامي
نغم : بقولك ايه مينفعش تطلبي السواق يجي يوصلني انا بجد خايفه منه
هايا : ماقلتلك بلاش تنكشيه زعله وحش
نغم : توبه توبه ياهايا دة متخلف
هايا بقهقهه : طب المتخلف نزل استلمي بقي
حمزة بجمود : هنروح فين
نغم ببحه : مركز الليزر
حمزة : نعم يختي متتكلمي عدل
سيف : هتوديها مركز الليزر ياحمزة تعمل الجلسه بتاعتهت وتيجي مفيش ساعه زمن
حمزة : حد عايز حاجه من برة
هايا بمرح : ارجع بيها وان بيس يابرو
نغم وهي تلكزها : انتي بتطمنيني
انطلقا سويا نحو المركز الذي تجري به جلستها العلاجيه لقدمها وحمزة لم يتفوة بكلمه واحدة ولم يهتم لأي من الفتيات المتواجدين حوله برغم انهم يفوقون نغم جمالا وبعد فترة قاربت الساعه والنصف هبطو سويا من المركز وانطلقو بطريق عودتهم للمنزل وبمنتصف الطريق توقف حمزة بمحطه تزويد الوقود ( بنزينه ) ينتظر دورة
نغم بضيق : طب صالحني ياعم طيب
حمزة: ______
نغم : طب هاتلي كنزايه ابل ريقي انا من ساعه الفطار مأكلتش حاجه ________
حان دور حمزة وتوقف امام الماكينه الخاصه بتزويد البنزين
نغم : بجد انا جعانه وعاوزة اشرب اي حاجه هموت منك هنا
اشار حمزة باصبعه ناحيه باب السيارة بجوارها واردف ببرود : الباب اهوة والكافتيريا قدامك وخمس دقايق لو مرجعتيش هسيبك وامشي
نغم بغيظ : ماشي متشكرين يارجوله
هبطت من السيارة واتجهت لداخل الكافتيريا التيركانت شبه فارغه من الزبائن وبحثت سريعا عن الكانز ولكنها لم تجدة فأتجهت نحو البائع مردفه : لو سمحت هو مفيش هنا كانز
البائع: اي نوع ؟
نغم : بيبسي
البائع : الصف الاخير هناك صف التلااجات علي ايدك اليمين
نغم : تمام
اتجهت نغم مثلما اخبرها البائع وما ان انعطفت للجهه التي يوجد بها الكانز حتي تفاجئت بشابين احدهم يتناول سيجارته بشراهه والأخر يتناول كيس من المقبلات ومن هيئتهم شعرت نغم بعدم الارتياح وسريعا قامت بفتح احدي الثلاجات واخذت تنتقي ماارادت
الشاب ١ : بص ياض المزة دى
الشاب ٢: ياعم لا ياعم شكلها محترمه مش سكتنا
الشاب ١: ياض ماكلهم كدة وبيجو سكه في الأخر تعالي بس نشوف
شاب ٢ : طب مش هنا يازميلي
شاب ١: تعالي بس
اتجه كلاهما نحو نغم التي انتقت ماارادت واغلقت الباب وهمت بالمغادرة حتي تفاجئت بهم يقفون خلفها
شاب ١ وهو ينفث دخان سيجارته : الحلوة جايه لوحدها متأخر ليه
شاب ٢: متيجي نشرب سوا دة حتي قلبي استوي
نغم بحدة عكس الرعب الذي بث بداخلها : جتك وجع قلبك انت وهو غور يلا من قدامي احسنلك
شاب ١ : اموت انا في الشراسه طب وريني هتعملي ايه يامزة اصلك كلك علي بعضك كدة تلزميني
همت نغم بالصراخ ولكن الشاب الذي يقف خلفها كان اسرع منها وكمم فمها بيدة بينما الأخر أخرج من جيب بنطاله مطوة قرن غزال وصوبها ناحيه وجهها مردفا : لا ياقطه خليكي حلوة لشرحك هنا وقتي ومسبش حته فيكي سليمه
حاولت التملص منهم ولكن احداهم حاوطها من ذراعيها والأخر امسك بقدميها ورفعوها عن الأرض وهم يبحثون بأعينهم عن مكان ليفعلو به فعلتهم الدنيئه وبينما هي تحاول الصراخ والخروب منهم لمحت حمزة يتحرك بسيارته مغادرا من خلف زجاج الكافتيريا الملئ بالأرفف التي تضم اكياس المقبلات فأنهمرت الدموع بهستيريه من مقلتيها وظلت تأن محاوله النجاه
_____________________________________
نغم هتروح في شربه ميه ياولاد علشان كنزايه 💔 توقعاتكو بقي علشان الجد دخل 🙏🏻🎉 + محدش يعرف يعمل ميمز علي الروايه بأجزائها يابنات وهنزلها هنا ونفرفش كلنا
الفصل التالي: اضغط هنا
يتبع.. (رواية بنات المنشاوي الجزء الثالث) اضغط على اسم الرواية لتجد الفهرس كاملاً بجميع الفصول.