رواية بنات المنشاوي الجزء الثالث – الفصل الأربعون
بارت ٤٠
بقلم خلود وائل 🌻
عم المساء بعد يوم طويل ملئ بالمرح والسعادة للجميع وفي نهايه السهرة كانت تجلس فيروز برفقه هايا وخالتها ووالدتها اما نغم فتحججت بالنوم وصعدت للسطح ومنال تغط بنوم عميق برفقه عز بغرفتهم
ورد : لحد دلوقتي مشفتش عروسه ريان غير مرة بجد متشوقه اوي اشوفها في الفرح
دعاء : ابرار دى بدر منور كيف القمر ليله التمام
صفيه : كفايه حبها وخوفها علي ريان ياورد البنيه عتحبه چوي
آيه : الحمدلله انها من نصيبه
دعاء : لحد دلوك ممصدقاش ان الحكايه خلصت واتچوزها عاد
ورد : لسه الفرح يابنتي طولي بالك علي الكلمتين دول
دعاء : بكفاياه انها بقت مرته علي سنه الله ورسوله دى مطمنه قلبي
آيه : ياحبيبتي ربنا يفرحك بيهم وتشوفي احفادك منهم بيتنططو حواليكي
دعاء : يارب ياحبيبتي عقبال ولادك الاة صحيح يونس مناويش يتچوز عن قريب
آيه بتنهيدة : والله منا عارفه يادعاء ولا بقيت فهماله حال ولا اعرف هو خاطب ولا مش خاطب ولا ظروفه ايه
انتبهت فيروز للحديث و توقفت عن محادثه هايا
دعاء : ليه كفالنا الشر ماله ياحبيب قلبي
آيه : علي طول دافن نفسه في شغله ولا بيقعد معانا ولا بيخرج معاها ذي الأول وكل شويه متخانق معاها والفترة دى مبقتش اسمع عنها حاجه خالص لدرجه افتكرته سابها
ورد : طب ليه محاولتيش تصلحي مابينهم بغض النظر عن انك مبتحبيهاش بس دة واجب عليكي
آيه : انتي تايهه عن يونس منتي عارفه انه مبيتكلمش كتير ولا بيحكيلي حاجه انا بس بفهم حاله من منظرة قدامي
صفيه : اوعاكي تچبري ولدك عليها يابتي لو مرايدهاش فضيها ثيره
آيه : ياريت يما والله دة يوم المني
هناء : ليه كدة ياآيه مش يونس بيحبها
آيه : انا متأكدة انه مبيحبهاش
ورد : وايه ال مأكدلك ياام العريف
آيه بثقه : عنيه مفيهاش النظرة ال كلها شغف ناحيتها فهماني انا عمري مشفته بيبصلها ذي ماابوة بيبصلي
دعاء : وة عاوزة تچيبي عشرة سنين كيف عشرة كام شهر
آيه : مش بالسنين ولا الشهور يا دعاء صدقيني لو الحب موجود ممكن تلاقي النظرة دى من اول ثواني الاتنين يشوفو بعض ودة ال بيسموة حب من اول نظره
ورد : ياعميق انت
هايا : مامي بقت بتقول حكم ياخالتو
هناء : مامتك دى ياما دوخت ابوكي وراها وشوفي الوقتي قاعدة تقول ايه
آيه : الله كلكو عليا ليه كدة انا بتكلم صح علي فكرة
دلفت الخادمه تحمل بين يدها حقيبه سفر كبيرة ثم وضعتها بالقرب من مجلسهم
دعاء: شنطه مين دى يا زينات
زينات : شنطه سي يونس بيه
تعالت دقات قلب فيروز ثم نهضت من مقعدها لا اراديا وهتفت بتوتر : انا ..انا طالعه انام تصبحو علي خير
هناء: لسه بدري ياحبيبتي اققعدي شويه
هايا وهي تريد تشتيتها عن الصعود حتي لا تكتشف عدم وجود نغم : خليكي معايا شويه وهنطلع سوا
فيروز : لا انا منعوسه خالص وبعدين نغم فوق
هايا بتوتر : لا مهو .. اصل بصي..
يونس من خلفهم وهو يدلف لمجلسهم برزانه : متجمعين عند حبيبنا المصطفى
جميعهم : عليه افضل الصلاه والسلام
تجمدت بمكانها فور سماعها صوته ولم تلتفت لرؤيته بعد اما هو فسلم علي جميع الموجودين عدا هناء التي تعجب بشدة من وجودها
يونس : طنط هناء ! ايه المفاجئه الحلوة دى
هناء : ربنا يحلي ايامك كلها ياحبيبي عامل ايه
يونس : في احسن حال الحمد لله
وقع بنظرة عن تلك الواقفه برفقه هايا واستغلت انشغالها وغادرت بهدوء ولم تلتفت بعد ليعلم من هي بينما اتجهت هايا نحوة تسلم عليه فقبل جبينها وهتف : انا طالع اغير واخد شاور ونازل علي طول خليهم يجهزولي العشا ياهيو الله يكرمك انا واقع من الجوع
هايا : عيوني
ارتقي درجات السلم وهو يتبعها و لا يتحمل ضربات قلبه التي تتسارع بقوة حتي قرر انهاء ذاك السباق الذي احتدم بداخله وهتف بأسمها
يونس : دكتورة فيروز !
توقفت بحيرة وتوتر شديد ثم التفتت له وهتفت : يونس !
مضي بضع خطوات نحوها مبتسما ثم توقف مردفا : ايه الصدف الحلوة دى
فيروز بخجل : حلوة بوجودك
يونس : انتي هنا من امتي
فيروز : من الصبح .. انت مجتش مع الجماعه ليه
يونس : كان عندي شغل لازم اخلصه قبل مااجي
فيروز : ربنا يعينك
يونس : احم.. ممكن طلب رفيع خالص قد كدة
فيروز بابتسامه : اتفضل
يونس : ممكن الاسبوع ال هنقضيه هنا متزعليش مني يعني اققصد بلاش نبقي كويسين وفجأه تزعلي مني لأسباب انا والله معرفها يعني اخر مرة اتقابلنا انني زعلتي مني وتقريبا كل مرة كدة
فيروز : انا اصلا لازم اعتذر منك علي اخر مرة كلمتك بأسلوب مش كويس .. وتقدر تقول ان كل مرة اصلا بيحصل نفس الموقف ف… انا اسفه
يونس : وانا كمان اسف لو كنت انفعلت عليكي او زعلتك بأي شكل
فيروز بابتسامه مرحه : صافيه لبن
يونس : صافيه لبن
فيروز: لا المفروض ترد تقول حليب ياقشطه
يونس : خلاص حليب ياقشطه
فيروز: لا استني من الاول خالص … صافيه لبن
يونس : حليب ياقشطه… تمام كدة
فيروز : تمام
يونس : اوضتك فين قصدي هتنامي مع حد ولا واخدة اوضه لوحدك
فيروز : هنام مع نغم وهايا
يونس : انضميتي للتشكيل العصابي بتاعهم
فيروز : اه 😅
يونس :نورتي العيله
فيروز بخجل : منورة بوجودك …. تصبح علي خير
يونس : تلاقي الخير .. انا هنا في اوضه زين قصادكو لو احتاجتي اي حاجه
فيروز : تمام
دلف كل منهم لغرفته وقلبه معلق بالأخر اما بالأعلي فكانت تجلس نغم شاردة الذهن عيناها معلقه بالسماء المليئه بالنجوم حاي افاقت من شرودها علي صوته الذي أعتاد قطع شرودها وصفاء ذهنها
حمزة : كنت متأكد ان هلاقيكي هنا
نغم بأبتسامه : وايه ال مأكدلك
حمزة وهو ينظر بأعجاب للمكان من حوله : يابنت الأيه انتي مظبطه الدنيا هنا كدة اذاي
كانت نغم قد تفننت في اعداد الركن الخاص بها وافترشت الارض نجيله صناعيه و وضعت طقم كامل من كراسي جريد النخل وطاولة بيضاويه في المنتصف بالاضافه لمكتبه صغيرة قديمه اعادت تدويرها وملئتها بالكتب والقصص وبعض الأنتيكات البلاستيكيه ولم تنسي بالفعل سلوك النور التي اضافت طابع هادي للمكان وبضع اصيصات من الفخار المليئه بالزروع والزهور الملونه
نغم : دة مكاني من ٣ اعدادي فطبيعي اكون مهتمه بيه وخد الكبيرة في الشتا بخلي بابا ينصبلي خيمه علشان اطلع اققعد براحتي في المطر
حمزة : ادارة انتي دماغ شغاله بردو اعملي حسابك بقي تعمليلي حبه الشغل دول عندنا هناك
نغم : حد قالك عليا مهنظسه ديكور
حمزة : مشاء الله شطورة اهوة
نغم بخجل : ميرسي
حمزة وهو يجلس بأرياحيه : مشفتكيش النهاردة خالص ولا عرفت اتكلم معاكي
نغم : اخت العريس بقي عقبالك
حمزة : عقبال متبقي اختي وانا عريس ؟
صمتت نغم ونظرت امامها مردفه : اذي حنين عامله ايه
حمزة : كويسه
نغم : انت طالع هنا ليه مش احنا اتفقنا مفيش قعدة تاني مع بعض علي السطح
حمزة : الكلام دة هناك في بيتنا مش هنا وبعدين فين الاكل قاعدة هنا من غير اكل وعملالي فيها مجروحه قومي اعمليلي كوبايه سحلب
نغم : انت اشتريتني من سوق الجواري متلم نفسك يبني
حمزة : انا ضيف عندكو هو دة اكرام الضيف ماشي ياستي شكرا
نغم : خلاص ياعم انت هتشحت
مدت يدها اسفل الطاوله واخرجت صينيه عليها كوب من السحلب وأخر من عصير البرتقال الذي تحبه
نغم وهي تعطيه كوبه : كنت متأكدة انك هتطلع فعملتلك من بدري زمانها بردت
حمزة بسعادة لا يعلم مصدرها وانما تشبه تلك التي ملئته فجر اليوم عندما وصل للقصر ووجدها بانتظارة برفقه الجميع: وايه ال اكدلك اني هطلع ؟
نغم بأرتباك : مجرد إحساس
حمزة وهو ينظر لها بهيام : وحشتيني
نغم : نعم 😳
حمزة بتوتر : اققصد يعني احم مفتقد قعدتي معاكي يعني ووحشني اكلك والحجات الحلوة ال كنتي بتعمليهالي
نغم وفؤادها اوشك ان يخرج من بين اضلعها : اااه
حمزا وهو يرتشف مشروبه : هتلبسي ايه في الفرح
نغم وهي تشرب العصير بأستمتاع : جبت فستان حكاايه هبقي اوريهولك
حمزة: اكيد لونه اسود صح
نغم : ايوة عرفت منين
حمزة : بتلبسي اللون دة كتير فحسيت انه لونك المفضل
نغم : انا فعلا بحبه اوي
حمزة : كل البنات الاسود بيليق بيهم بس انتي الوحيدة ال تليقي بيه
نغم بخجل : عنيك هي ال حلوة
حمزة : علشان شيفاكي بس
اتسعت عيناها بعدم تصديق ماتسمع اما هو فشعر بتسرعه فيما يقول وحلت دقائق من التوتر والحيرة قطعها رنين هاتف حمزة وكان المتصل حنين فأمسك بالهاتف بغيظ ثم قام بأغلاقه
نغم : مبتردش ليه
حمزة : فكك مش طالبه زن
نغم : حنين؟
حمزة : معروفه ان البنات زنانين ولا ايه
نغم : لا طبعا البنات الطف الكائنات بس لابد من حبه نكد صغننين قد كدهون
حمزة وهو يرتشف بقيه مشروبه : وهيجري ايه لو عشنا الحياه بدون نكد
نغم : طق هتبقي ماسخه مفيهاش اثارة لازم نكد
حمزة: البنات انكد الكائنات
نغم : طب سيبني ساكته بقي علشان لساني بياكلني اهوة
حمزة بأبتسامه جانبيه ساحرة : ماشي ياستي سكت خالص اهوة
صمت كلاهما لدقائق ثم اردف حمزة : نغم هو انتي بجد اسمعنا اختارتي جامعه القاهرة
نغم : انا جاوبت سؤالك دة قبل كدة
حمزة وهو يريد التأكد من مشاعرها قبل ان يبوح بخاصته : جاوبيني تاني
نغم بتعجب وهي تعقد حاجبيها: عادي يعني ياحمزة كنت حابه اشوف الدنيا واخرج من دايرتي الصغيرة
حمزة : بس كدة
نغم : ايوة انت عاوز توصل لأيه
حمزة: لا عادي
نهض من مقعدة ثم أخرج كارت خشبي موضوع بداخله عدد من الاوراق فئه ال ٥٠ جنيها ومحفور عليه جمله ” كل عيد وانتي عيدي ” وقام بمناولته لها مردفا : كل سنه وانتي طيبه
نغم بسعادة طفوليه : دة علشاني
حمزة بابتسامه علي هيئتها الطفوليه : ايوة كدة العيد يكمل
نغم باندفاع: كمل بس بوجودك
ابتسم براحه ثم استأذن مغادرا
حمزة : انا لازم انزل علشان أنس ميحسش بحاجه تصبحي علي خير
نغم : تلاقي الخير
هبط للاسفل بينما هي تمسك بالكارت الخشبي وتتأمله ببلاهه ودقائق ثم عادت لغرفتها هي الاخري لتتفاجئ بفيروز جالسه بأحدي اركان الغرفه تتصفح هاتفها
نغم : زوزو .. جيتي امتي
فيروز : من بدري بس فكرتك نايمه انتي كنتي فين
نغم : انا … انا . انا ياستي كنت زهقانه شويه فطلعت في الهوا اتمشي
فيروز : في الجنينه يعني
نغم : ها ..اه .. اه
فيروز : معلش هضيق الأوضه عليكي انا وهايا اليومين دول
نغم : ولا يهمك الاوضه واسعه وتكفي من الحبايب ميه
_________________________________
في صباح اليوم التالي كان الشباب مجتمعين بالحديقه يتسامرون بمرح كعادتهم كلما تجمعو سويا
ريان : أني رايد نعمل ليله سهرة لينا كلياتنا اكدة بدون حد غريب وسطينا وتبقي ليله ضحك و فرفشه لأخوكم العريس
حمزة : عنينا انت بس شور
زين : ايه رأيك نعمل خيمه وصوان كبير ونلف الجنينه كلياتها بالنور ونچيب خروف ونشويه
ريان : فكرة زينه جوي بس اني بچول حاجه علي الضيق علي قدنا احنا
أنس : ياعم صلي علي النبي قدنا مين دة احنا وابوك وعمك سيف وعمك عاصم وعمك زياد وعمك كريم ونبعت كمان نچيب ماجد اخو العروسه وبالمرة يعرف شباب العيله
محمد : بردو علي قدنا متوصلش لدرجه صوان في كل الجنينه دة الكلام دة ليله الحنه
ريان : صوح دة ال عجول عليه
يونس : خلاص سهله احنا ننصب خيمه ذي نظام البدو كدة ونجيب فروع نور والشيخ محمد هيظبطها وحمزة وانس هيجيبو خروف ونشويه وتبقي ليله احتفال بطريقه البدو
أنس : حلو جوي الفكرة دى
عز : طب حيث كدة نقوم يلا نجهز من بدري ويسلام بقي لو في فوتوجرافر يعمل للعريس سيشن معتبر
حمزة : والله فكرة في الجون عندكو فوتوجرافر هنا ياريان
أنس بحماس : ايوة ودي تفوتني أني هچيبلكم اچدعها مصوراتي بالمركز كلياته
زين : الله يكرمك يخوي منقصاش هبل في الليله عاد دى ليله شباب
يونس : وهو هيجيب واحدة ست ايه مالك يازين
زين : انت مخابرش هو يقصد مين الغلباوي دى ناوي يچيب عائشه
محمد : مين عائشه ؟
ريان : تؤامه
عز : مين ؟؟ انتو ليكو اخوات بنات غير نغم واحنا منعرفش
زين : عائشه دى تبقي بت عمي حكيم ولد جدي عبد الله محامي عيلتنا وتبقي من نفس سنه ولما امي ولدته تعبت هبابه اكمنه چه خبط لزق ورا نغم ومبقتش تقدر ترضعه فخالتي وداد ام عائشه كانت بترضعه معاها
عز : وليه اللفه دى هو اللبن الجاف قصر معاكو في حاجه يابني
ريان : وة لبن جاف ! مسمعتكش ستي صفيه
قهقه الجميع بينما اردف عز : دي منال مخلياني ادور من الوقتي علي افضل انواع لبن جاف انا لازم اخد موقف ياجماعه
حمزة : ياعم اتلهي واسكت بلا موقف بلا اوتوبيس هي منال حد بيعرف ياخد معاها حق ولا باطل
عز بتمثيل التأثر : دعني ابكي في صمت
جميعهم : 😅😂😂
انطلق كل منهم باتجاه لتنفيذ المطلوب منه استعدادا لتلك الليله وعندما انتهي يونس من نصب الخيمه برفقه محمد جلس كلاهما أسفل شجرة يستظلان بظلها في انتظار عودة بقيه الشباب
يونس : وحشني كلامك ال بيريح قلبي ياشيخنا
محمد : شكلك عندك استفسار قول واشجيني
يونس : بذمتك في شيخ بيقول اشجيني دى
محمد بمرح : خلاص اطرب مسامعي
ضحك يونس ثم اردف : انا محتار وضايع يامحمد
محمد : الا بذكر الله تطمئن القلوب
يونس : ونعم بالله بس مقصدش الضياع دة انا اققصد اني محتار قلبي تايه ومتشعلق في حاجه مش ليه وخايف تروح مني
محمد : مفيش حد بيخسر حاجه مكتوباله وبردو محدش هياخد حاجه مش ليه وخلي عندك امل في ربنا سبحانه وتعالي خليك ذي سيدنا موسي عليه السلام كان واقف هو وقومه والبحر قدامه وفرعون وجيشه من وراة لكن هو عندة أمل بالله عز وجل وقال ” كلا ان معي ربي سيهدين ”
يونس : ونعم بالله بس ليه ربنا بيعلق قلبي بحاجه مينفعش تكون ليا ولا من نصيبي ؟
محمد : لو ليك نصيب في حاجه وكل السكك ليها مقفوله ربنا سبحانه وتعالى هيرتبلك كل الاسباب لحد ماتبقي في ايدك ولو ملكش نصيب فيها ربنا هيراضي قلبك بحجات احسن منها ربنا سبحانه وتعالى قال ” لكي لا تأسوا علي مافاتكم ولا تفرحو بما اتاكم ” رزقك مش هيجيلك غلطه وال فاتك مكانش مكتوب ليك اصلا .. ممكن تفهمني معذب نفسك ليه يايونس ربنا غفور رحيم عالم بحال عبادة الضعاف وبيحبر بخواطرهم
يونس : انا بحب يامحمد
محمد بابتسامه عذبه : والحب دة احلي شئ في الدنيا ربنا يرزقنا حبه وحب كل عمل يقربنا اليه
يونس : اللهم آمين
محمد بمرح: طلعت بتحب وماذا بعد ؟
يونس : بحب واحدة مكانش ينفع احبها بس غصب عني
محمد : محدش ليه علي قلبه سلطان .. تلك القلوب بين اصبعي من اصابع الرحمن يقلبها كيفما يشاء
يونس : انا بحب واحدة مخطوبه وهتتجوز قريب بس غصب عني ظهرت في حياتي فجأه ودخلت قلبي من غير استأذان حبيتها وشغلت تفكيري ليل ونهار بقيت شايفها في كل ال حواليا بتلكك علشان اكلمها وجودها قدامي بيريح قلبي انت فاهمني يامحمد
محمد : بص يايونس الخب الطاهر العفيف دة مفيش منه ضرر لكن انك تحب واحدة مخطوبه لغيرك فدة غلط كبير لأنك بتمني نفسك بحاجه احتمال كبير متكونش من نصيبك وخد بالك النظرة ليها حرام علشان انت مأمور بغض البصر والتفكير المفرط فيها نتايجه مش محمودة نهائي والحيرة صعبه ونصيحه مني كأخوك وحبيبك سلم امرك لله وحدة هو عالم بحال قلبك وقادر يسخرلك الدنيا كلها لحد ماتنول مرادك بس تودد ليه بالدعاء وقيام الليل ومش بس علشان تنول ال بتتمناها لا علشان ربنا يستاهل انك تعبدة حق عبادته واتأكد انها لو مكتوبالك هتاخدهت يعني هتاخدها حتي لو بعد كام سنه
يونس : انت حيرتني
محمد بضحك : سيأتي الله بايام ترضيك لن يدوم مابك للأبد
ابتسم يونس ونظر امامه فوجد الشباب عائدون وبعضهم يحمل صناديق كبيرة بين يديه
حمزة : الحلوين قاعدين في الضلواحنا منفوخين هنا
محمد : مش كل واحد واخد دورة بما يرضي الله
حمزة : اه منك ومن دقنك المسبسبه دى قوم يخويا ورينا شطارتك انا جبتلك كل السلوك واللمبات ال في المحل
محمد وهو ينهض من مكانه متجها للصناديق : استعنا بالله
برع محمد في تركيب الاضواء بشكل أكثر من رائع ولما لا فهو مهندس كهربائي وكذلك انتهي زين وحمزة من اعداد الطعام الذي فاحت رايحته في الارجاء اما عن بقيه الشباب فانتهو من ترتيب المقاعد الأرضية المكونه من مربعات قماشيه مليئه بالقطن الناعم وبضع طاولات صغيرة للغايه تناسب مستوي المجلس علي الطراز البدوي
وبعد ان انتهو من صلاه المغرب بدأ الاحتفال ومن بعيد دلفت فتاه بعمر انس تحمل حقيبه سفر صغيرة تجرها خلفها بعمليه وتتحه لداخل القصر مرورا من امام الخيمه ومن بها وماان وقع محمد بنظرة عليها حتي شعر بكهرباء تسري بجسدة فخقا كانت عائشه مثالا يحتذي به للفتاه المسلمه التي يزينها اللباس الفضفاض والحجاب الشي ملاء وجهها نور
محمد : استغفر الله العظيم ايه ال انا بعمله دة استغفر الله العظيم استغفر الله العظيم
يونس بقهقه من خلفه : ايه يامولانا فين غض البصر
محمد بأبتسامه رغما عنه : يابني لم نفسك كل ابن أدم خطاء وخير الخطائين التوابين
انس من خلفهم : عائشااااه
تسمرت مكانها وهي تشتعل غيظا في انتظارة حتي توقف امامها مردفا
انس : اتأخرتي ليه
عايشه بغيظ : ايه يابچم انت عتناديني قدام رجاله فين الخشا شكلك اتوحشت الشبشب بتاعي والله لو اتكررت عاد لكون ماسحه بكرامتك بلاط القصر كلياته
أنس : لسانك مبرد طول عمرك حاچه مش مستجديه عليكي هاتي الكمرات وفوتي لچوة
عائشه : نعم ياحبيبي دة الكاميرا الجديدة ب ٥ الاف جنيه روح العب بعيد ياشاطر واني ال هصور
أنس : اتعدلي يامخبله انتي عتصوري الرجاله كيف
عائشه: كيف الناس غور من وشي
عاد أنس وهو يشتعل غيظا منها كعادتهم بينما يقهقه محمد بشدة علي مافعلته تلك الصغيرة بهيئتها المشاكسه ثم دلفت للداخل ولم تعلم بانها استحوذت علي قلب احدهم
_____________________
اسمع حد يقول البارت صغنن هو حر انا صوابعي هتشتكيني 😂😂😂❤️ ايه الناس ال كلها عماله تحب دى 🙈😂😂😂😂في امان الله كيكاتي ونتقابل باءن الله بعد بكرة
الفصل التالي: اضغط هنا
يتبع.. (رواية بنات المنشاوي الجزء الثالث) اضغط على اسم الرواية لتجد الفهرس كاملاً بجميع الفصول.