رواية احفاد عمران – الفصل العاشر
#احفاد عمران
بارت _10_
بجيت وما برد گلبي
احس بصدري شي اسود
قبل لانام يخنگني لان ما سولفت لحد
واي واحد يسولف يلجم جروحي
ومن گد ما دخت ياناس صافن
بالمرايه وما شفت روحي
مدري شلون عايش مدري شمتاني…
…………………………………
“”ريم””
حجيت واني مامصدكه عيوني
إلي شافته
ريم:: أسمر؟
كام واجه بتجاهي وهو عيونه تلمع
حضني حيل واني تعلكت بركبته
حضنته بقوه وصرت ابجي ماجاي
اصدك من بعد سنه ونص ارجع اشوفه
أسمر:: ريمايتي
ريم ببجي:: وين جنت ها وين ماكلت
عندي اخت تحتاجني
اسمر:: هاي أنا موجود بعد ماعوفج
ريم:: وين جنت هاا ليش سافرت وعفتنه
اسمر:: تعالي نكعد وبعدين احجيلج
اخذني ويا حاضني ماكو احد بس اني
ويا وامي إلياس وامجد كاعدين باستقبال
كعدنه على القنفه وبقيت حاضنته ماوخرت
منه حجيت واني ارفع راسي إله
ريم:: اسمر ليش سافرت وماتصلت غير
مره وحده
اسمر:: ريم اني تز…….
صافنه عليه واريده ينطيني تبرير الشي
إلي سوه بس قاطعه صوت طفل يبجي
بصوت عالي وكأن هذا الطفل ويانه بالبيت
باوعت على اسمر مانطه رده فعل على
الصوت وجن مايسمعه أصلا
رجعت التفتت
على امي تريد تكوم بس تباوع عليه حجيت
واني احاول اجذب إلي سمعته
ريم:: ههه تعرفون جاي اتخيل صوت طفل يبجي
ما حجو شي يعني صح إلي سمعته
كمت داامشي نحو الغرفه
صاحت عليه
امي بس مارديت عليها ولا التفتت الها
فتحت باب الغرفه مال اهلي بس
نصدمت واني اشوف طفل صغير
مخلينه على الجربايه وهو يدور براسه
تقربت عليه جان طفل ماعرف طفله
بس صغير حيل يطلع عمره بشهر
هيج شي ماعرف بس منو هذا ماعرف
التفتت ورايه لكيت اسمر وامي واكفين
باوعت على اسمر وكلت بتسائل
ريم:: المن هذا الطفل وشيسوي يمنه
دار وجهه مني ولا حجه ولا جاوب على
سؤالي اله رجعت التفتت على امي الي كبل جاوبت على سؤالي وكأن هي فرحانه وشبه ابتسامه مرسومه على خدها
امي:: هاي جمانه بنت اسمر
ريم بضحكه::: ههههههه بنت اسمر شبيج
يمه بنت اسمر شنو نسيتي هو عاف ليان
بيوم العرس
امي:: أي بس ازوج من رسل
باوعت على أسمر الي اريده يحجي ويجذب
هذا الحجي الي ماجاي اصدكه باوعت عليه وعيوني غوركت بالدموع
ريم:: سويته ها وجاي فوكاها تبشرنه
عندك اطفال منها هم
ماجاوبني وسكوته موتني
تقربت عليه
صرت مقابيله واردفت واني اباوع بعيونه
ريم:: شكد شفت انذال بس مثلك ماشفت
امي بصياح:: كاافييي ريمممم
هي كالت كافي لو تخبلت صرت اصيح
بوجهم واني الغصه واكفه بلعومي
ودموعي تنزل عشره عشره
ريم بصياح:: شنو الكافييي هااا شنوووو مايكفيكم دمرتووو حياتنه فوك كل هذا
تكولون كافي
مايكفيك دمرت حياة الابنيه
عفتها بليله عرسكم وماحجيت لاحددد
ورحت سافرتتت ومحد يعرف بيككككك…..
لككك انت شنو من بشررر مايهمك بس
نفسككك
اجه عليه وحضني حيل لمني بحضنه
وصرت ابجي بزايد بس بعدين دفعته
حيل وصحت بوجه
ريم:: كله بسببككك أنتَ كل إلي ديصير
ويانه بسبببكككك اني اني خلوني اترك
دراستي وزوجوني بسرعه بسببكككك
ليان يي ليان خلوها تترك دراستها
وحبسوها بالبيت بس حتى لا تجيب
الهم الحجي الموزين كله بسبب منوووووو بسبببككك أسمر أنت واحد نذل
أمي:: كاافي ريم شنهو هذا الحجي
ريم:: هههههه أي كافي طبعا ما أنتِ كل
العمر ضليتي اطمطمين إله
أمي:: لا مطمطمه ولا شيء وهسه يروح
أسمر ويحجي وي جده ويطلك ليان وأنا
راح ازوجه ياسمين بنت خالته هي تصير
أم الجمانه وزوجه الأسمر
ضحكت على تفكيرها إلي بس تريد
ياسمين تصير يمها وهسه راح يتحقق
هذا الشي بس فجأة حجه أسمر
من بين سكوته
اسمر:: لا ياسمين ولا غيرها ليان ترجع
بهذا البيت وهيه إلي تربي بنتي
ريم:: شكد نذل هسه اتذكرت عندك مره
هااا من صارت عندك طفلههه هسه يلا
اتذكرت عندك مرهههه وتريد فوك هذا
اتربي بنتككك على يااساس….. روح
الام طفلتك هي تربيها لا تدخل ليان
بهذا الشي
باوع عليه بس إلي صدمني نزلت
دمعه من عينه وهو يكول بصوت مخنوك
اسمر:: ماتت
عافنه وطلع بسرعه جتي عليه أمي
ولزمتني من أيدي حيل
أمي:: ماله داعي هذا حجيج إلي ماعرف شلونه
عافتني وطلعت وره اسمر ماطلعت ضليت
بالغرفه التفتت باوعت عليها تفتح بعيونه
كوه تقربت عليها صغيره حيل وناعمه
كعدت يمها على الجربايه مديت أيدي
ولمست ايدها الي جانت طالعه من
الحضينه ابتسمت لأن جانت عيونها
زرك يعني بيها شبه لاسمر شعوري
مااكدر اوصفه صح اسمر غلط بس
الطفله مالها أي ذنب وهي صارت
يتيمه ومو غلطها إذا محد تقبلها بس
هذا غلط ابوها الحقير
بستها براسها وكمت من يمها طلعت ماكو
أحد دخلت لاستقبال جان كاعد بس أمجد
واليأس باوعت على إلياس واشرت
إله بمعنى يلا
كام هو وسترخصنه من امجد وطلعنه
ضلينا الطريق هو يسئل وإني بس اجاوب
بس ماجبت طاري اسمر وأن هو راجع……….
////////////////////////////////
“”ليان””
كعدت الصبح كمت أخذت ملابس ودخلت
الحمام سبحت وطلعت بس شلت شعري
ليفوك وعفته
نزلت جوه لكيت أمي
بالمطبخ تسوي ريوك
ليان:: صباح الخير
أمي وهي تلتفت عليه:: هلا يمه صباح النور
ليان:: وين حمزه وعمر
أمي:: يايمه عمر راح يجيب صمون وحمزه
طالع من الصبح ماعرف بي وين
ليان بستغراب:: وين راح من الصبح
أمي:: ماعرف يمه…. تعالي اكعدي حتى
نتريك كلنا جميع
هزيت راسي بمعنى أي وكعدت عالميز دخل
عمر خله الصمون بسله مالته واجه باسني
براسي.
عمر:: صباح الخير حبيبتي
ليان:: صباح النور
صبت أمي الجاي وكعدنه ناكل شويه واجه
حمزه هم كمت صبيتله الجاي وكعد
ويانه ناكل
مر كم يوم نفس الروتين وما متغير منه
شي حمزه راح لانبار يكمل السنه
الاجلها علمودي
تعودت عليه وماردته يروح بس لازم ايروح
لأن هاي دراسته بلاخير ابوي شوي
رجع يحاجيني
جنت كاعده بالمطبخ اثرم بتيته لأن أريد
إني اليوم اسوي الغده
عمر طالع وبس
إني وابوي وأمي
بالبيت قليت البتيته
وسويت لحم هم حمسته وجيت أريد
اسوي البرياني بس ماعرف أي نوع
من البهارات لازم اخلي كمت غسلت
ايدي ورحت الغرفتهم بس قبل مادخل
سمعت حجيهم وهم يحجون
ابوي:: ماعرف شسوي هسه
أمي:: وشلون ويا طفله يعني شنو ذنب ليان
ابوي:: صابرين ابوي يريد ليان ترجع
أمي:: شنهووو ترجع شنو لا وشماله ويا
طفله يوسف تره هاي بتك لا تضلمها
ماعرف شنو إلي جاي يحجو بس انجاب
اسمي بطاري فتحت الباب ثنينهم سكتو
أو بلاحسن نكول نصدمو من دخولي
باوعت عليهم
واردفت ببتسامه
ليان:: شبيكم عبالك شفتو جني
أمي:: ها…. لا يمه ماكو شي شعجب جيتي
ليان:: مو شسمه….. جيت اريدج تكليلي
يانوع البهارات اخليها
أمي وهي تكوم:: يلا إني اجيت
طلعت قبلها وتأكدت يعني أكو شي لهذا
انصدمو من شافوني
طلعت إلي الابهارات وسويت البرياني صار
يخبل اجه عمر وطلع بابا من الغرفه وراحو
يصلون صعدت إني الغرفه وصليت بغرفتي
وقريت صفحتين القرآن الكريم ونزلت لكيت
أمي صابه ومحضره لأن إني اتاخرت بصلاتي ودينه الاكل على الميز ووكعدنه ناكل بس
ماكو أحد حجه بس أحس العيون عليه
وكلهم يباوعولي ماعرف إذا جانو يباوعولي
أو لا بس هذا احساسي
خلصنه وكمت إني خليت الجاي عالطباخ
ولميت المواعين غسلتهن وصبيت الجاي
وديته الهم وإني صعدت انام ….
للعصر كعدت نزلت جوه جان عمر كاعد بصاله يكلب بجهازه نزلت كعدت يمه وهو طفه الجهاز وباوع عليه وكال
عمر:: الله ليان تعرفين شنو مشتهي
ليان بابتسامه:: شنو
عمر:: مشتهي كيكه من ايدج
كمت وإني احجي:: جنك على كيكه……
دكوم نسويها اني وياك
ضحك وكام وياي دخلنا المطبخ
طلعت نجانه وخليت بيها بيض وشكر
وزيت ونطيتها اله
ليان:: يله اخلطهن
اخذهن وصار يخلط بيهن رحت اني
طلعت طحين وصرت اسويهن على قياس
ماما مثل متسوي دائما وعمر كمل البيده
خليتله طحين ورجع يخلط رجعت خليتله
حليب وضل يخلط رجعت اني دهنت
القالب مال الكيكه وانطيت العمر
الكباودر حتى يضيفه للخليط
اردف وهو يضحك
عمر:: أنا كلت اريدها من ايدج صارت من ايدي
ضحكت واخذت الخليط منه وخليته
بالقالب ورحت شغلت الفرن وخليتها
ضلينه اني وعمر نسولف ونضحك
“”واني اعرف الضحك ميدوملي””
كمت على الكيكه اشوفها لكيتها هاي هيه
مستويه وصايره تخبل طلعتها وخليتها
على الطباخ تفوخ وقطعتها وخليتها لأن
مضل وكت بعد واحد ياكل وكت
صلاه وعشه
رحت صرت أحضر العشه طلعت كبه وبورك وطلعت فنكر وصرت اكلي بيهن اجتي امي يمي
امي:: ها يمه ليش ماعفتي اني اسوي العشه
ليان:: يله اليوم اني اسويلكم_بضحكه_
كملت ورحت خليتهن على الميز كملو صلاه
وجوي كعدو صعدت على الدرج وصاح
عليه عمر
عمر:: وين ليون تعالي تعشي
ليان:: ماشتهي راح اروح اصلي
صعدت الغرفتي رحت توضيت ووكفت
على سجادتي اصلي وقريت قرآن كملت
وذبيت ازرار الصلاه ونزلت جوه لكيتهم
مخلصين لميت المواعين وكفت بالمطبخ
اغسل المواعين
فجأة ندك الباب طلع عمر يفتحه طلعو
جاين بيت عمو ماجد ووياهم جدو دخلو
من الاستقبال واني حرت شسوي طول
هلسنه ونص اني ماشايفتهم ولا اكعد
يمهم واصلا همه هم ميسئلون عليه نوب
دخلو لصاله واني ردت اصعد فوك
كملت المواعين وغسلت أيدي ومشيت
خطوات سريعه واني مدنكه راسي طلعت
من المطبخ وردت اصعد الدرج بس
استوقفني صوت جدو عمران وهو
يصيح عليه
جدو عمران:: ليانننن
رجعت خطوتين ليورا بس بقيت مدنكه
راسي ومارفعته رجع ابوي حجه
يوسف:: بابا ليان سلمي
ليان وهي مدنكه راسها:: السلام عليكم
الكل:: وعليكم السلام
جدو عمران:: يله انا استرخص منكم
عندي حجي وي ليان…. تعالي ورايه
باوعت عليه راح بتجاه الاستقبال واشر
إلي اروح وره أتأكدت هاي جيته بيها
قصه مو عاديه مشيت وره واشر إلي
أسد الباب سديته ورحت كعدت بس
كعدت بعيد عليه شويه
باوع عليه وحجه
جدو عمران:: أي يابويه شلونج جدو
كلت بكلبي ايبااا منين جتي هاي الحنيه
ونزلت عليك دفجرها للقنبله مالتك لا
تروح تنفجر بيك
ليان:: زينه جدو
جدو عمران:: ليان بنيتي اريدن احجي
وياج بموضوع واريدج تتفهميني
ليان:: احجي جدو اسمعك
ليان بهمس :: دفجرها مو راح اطك
جدو عمران:: أي يبنيتي تعرفين الشرع
حلل اربعه ورجال مو حرام إذا اخذ
سنين وتلاثه واربعه
ليان بستغراب:: أي جدو أعرف بس ليش
دتكلي هيج
جدو عمران:: جايج بلحجي جدو اسمعيني
سكتت ماحجيت شي بس هزيت براسي
بمعنى أي وهو رجع يحجي
جدو عمران:: اسمر رجع من السفر
باوعت على جدو بصدمه رجع شنو رجع
مو كال بعد مارجع وماخليج تشوفين
وجهي ليش رجع اديه صارت ترجف
وكمت ماسيطر على نفسي باوعت
على جدو إلي جان يتانيني احجي
حجيت واني كوه لازمه أيدي علمود
متبين رجفتهن
ليان:: أي أحسن حتى نتطلك
جدو عمران بعصبيه:: تطلكين شنو
ماعدنه نسوان تطلك هاي الشغله
شيليها من راسج
ليان بتحدي:: وهسه شنو رايدين مني
وإذا رجع شسويله اني
جدو عمران بثقه:: ترجعيله لزوجج وتربين
البنيه لأن خطيه يتيمه هسه اكسبي
بيها أجر
نصدمت من حجيه وكان هو ديامرني
مو يطلب بس عفت هذا الحجي كله
وركزت على كلمه تربين البنيه على
أي بنيه حجه
ليان:: على أي بنيه تحجي جدو
جدو عمران:: بنت اسمر جمانه
مانطيت رده فعل هو أصلا حجالي وكالي
أحب غيرج شنو قابل جنت متوقعه يضل
عليه وهي تضل مجرد حبيبه إله اكيد
راح يزوجها
ليان:: جدو اني مال ارجعله مستحيل
هذا الشي ولا تخلون أمل بأن اني
ارجعله وإذا على بنته خلي يطلكني
ويروح يزوج
جدو عمران:: ليان بلا حجي زايد
وترجعين وانتِ الممنونه
ليان:: مارجع وهذا قراري…. واني
هسه استرخص
كمت ووكفت يم باب الاستقبال مديت
أيدي ليده لباب داريد افتحه بس اجاني
صوته وهو يكول
جدو عمران:: أن طلعتي من هذا الباب
وانتِ مامطيه موافقتج على الرجعه…..
امج تروح لاهلها زعلانه
نداريت عليه جان كاعد ومترخي وفرحان
بالحجي إلي يحجي تقربت عليه واني احجي ودمعتي بطرف عيني
ليان:: جدو لا تسوي هيج لا تدخلون
امي بمشاكلي
جدو عمران:: القرار الج يا تطلعين هسه
ودتكولين أنا ارجع لاسمر واربي بنته
يا امج تروح زعلانه لاهلها
ليان ببجي:: جدو الله عليك لا تضلمني
مثل قبل اني ماريده ماكدر بعد اعيش
وياه
جدو عمران:: يابنتي وين ضالمجج أنا
وين تلكين أحسن من اسمر
ليان ببجي:: ماريده فدوه ماريده ماريد
ارجع إله
جدو عمران:: أنا بعد مالي دخل القرار قرارج
كام جدو وواني ابجي وكف مقابيلي
ومسح على راسي وطلع واني انهاريت
بالبجي يعني هم يردون يرجعوني إله
وهم يردون اعيش وي واحد عافني
بين حجي الكل وفوك هذا يردون اربي
بنته ماعرف شعوري بهذاك الوكت وجان
كل همي امي مستحيل اخلي شخص
يحجي عليها وجدو يريد يختبرني
بامي مستحيل أخليه
كمت مسحت دموعي وطلعت كلهم بعدهم
كاعدين بصاله جدو عمران وعمو ماجد
وابنه أحمد وابوي وعمه زهور وامي
كلهم يباوعون عليه كسر الهدوء جدو
وهو يكول
جدو عمران:: ليان بنتي كولي الهم مثل
ماكتيلي اهناك
حجيت واني احاول اسيطر على الرجفه إلي احتلت جسمي كله
ليان:: عرفت باسمر رجع واني قررت
واخذت قراري وهو أن إني ارجع لاسمر
وهو بعده زوجي
حجه أبوي وهو يكوم:: ليان بابا
ليان:: هذا قراري لا تعترضون عليه
ماخليت أحد يحجي وكبل صعدت فوك
نمت على جربايتي وضليت ابجي محد
يفتهمني ولا أحد يحس بيه وكل همهم
حجي العالم ولا تمسهم حجايه من
بين دموعي غفيت
كعدت الصبح على صوت أمي وهي تكول
أمي:: كومي ليان
ليان:: هممم كايمه
أمي:: كومي يمه أسمر جاي يتانيج
كمت على حيلي وإني اباوع على أمي
ليان:: شنو شكو جاي
امي:: مو ردتي ترجعين إله وجدج
انطه خبر يجي يأخذج
ليان:: اللهم طولج ياروح
كمت اخذت ملابس ودخلت للحمام
طلعت رتبت نفسي على المرايا
وسويت شعري كعكه ونزلت خصلاتي
ورجعت أخذت جنطه واخذت كم لبسه
بيهن وإني احجي وي نفسي
_ مو راح ارجع إله هو الي يشتريلي
إلي اريده بعد
أخذت الجنطه ورجعت على الميز
أخذت كم قرض ووكلت
_امشي بيهن اموري لحد مافلسه
اخذت جنطتي ونزلت على كيفي
وإني اسمعهم يحجون
ابوي:: دير بالك عليها
اسمر:: بعيوني اخليها
نزلت وقاطعت حديثهم وإني أسلم
من وره خشمي
ليان:: السلام عليكم
ابوي+ اسمر:: وعليكم السلام
ماباوعت عليه ولا اهتميت الوجوده
كام هو وكال
_يله نمشي
هزيت راسي بمعنى أي بدون ماباوع عليه
مشه وإني سلمت على ماما وبابا بس عمر
ماموجود ماشفته من امس طلعت وره أخذ
الجنطه من أيدي وشالها هو رجعت ودعت
أهلي وهو مشه مشيت ورآه ماحجينه شي
ولا تناضرنه البعض كان احنه غربه
وصلنا دخلنا ماشفت أحد خليت وصعدت
فوك كبل رحت على غرفه ريم فتحت
الباب مقفوله باوعت عليه صعد ورأي
حجيت وإني احاول افتح الباب
ليان:: وين المفتاح اريده
اسمر:: شسوين بي!
ليان بضحكه:: شي اكيد ماراح انام
إني وياك بغرفه وحده
بحركه سريعه اجه لزم أيدي بقوه ومشاني
بتجاه غرفته اريده يهد أيدي ماريد أدخل
غرفته بس هو أقوى مني فتح الباب
ودخلني الغرفه نترت أيدي منه وصحت
ليان:: شبيككك
اسمر:: لتصيحين لججج
ابتسمت ابتسامه مزيفه ومشيت بتجاه
ومشيت اصبعي على خده هو بقه واكف
بمكانه وكأنه مصدوم من حركتي هاي
باوعت بعيونه واردفت
ليان:: أريد اعترفلك بشغله
اسمر بستغراب:: بشنو
ليان ببتسامه وهمس:: أنتَ مو رجال
لو رجال جان التزمت بحجايتك مثل
الزلم………….
يتبععععععععع…………..
////////////////////////////
الفصل التالي: اضغط هنا
يتبع.. (رواية احفاد عمران) اضغط على اسم الرواية لتجد الفهرس كاملاً بجميع الفصول.