رواية راعوث – الفصل السادس والأربعون
part 46 ”
راعوث :- كعدت على صوت افراح مادري الدنيا صبح لو ليل شفت فارشات البنات ونايمات رجعت غمضت واسمع افراح تحجي وياي ..
افراح :- مرت الهيبه كعدي الهيبه يتصل عليج
راعوث :- حاجيييي والكاظم نايمه ما
افراح :- كعدي ولج خاف يريد شي صارله ساعه يتصل
راعوث :- ما
افراح :- فتحي عيونج بس فتحي
راعوث :- ماكدررر الضووه بعيوني
افراح :- هاج حاجي
راعوث :- خليته على اذاني فتحته وسكتت وهوه ساكت انتهيت غفيت
افراح :- خابرتي راعوث
راعوث :- مغمضه ومنتهيه بالنوم همست ، ها عُقاب
عُقاب :- اخخخ خدرااان فريخييي منتهي
راعوث :- شتريد مني نعسانه
عُقاب :- رايدك يمي
راعوث :- شتسوي بيه
عُقاب :- انشهرنه منو يمج
راعوث :- اخواتي
عُقاب :- كومي
راعوث :- انطيك ابوي تخابره
عُقاب :- انعل ابوج لابو الخلفج شسوي بناصر
راعوث :- اريد انااام
عُقاب :- احجي بصوت عالي كافي تنعوص
راعوث :- كعدت باوعت على البنات طلعت من الغرفه رحت للاستقبال كعدت على التخم
عُقاب :- ها وين رحتي
راعوث :- للاستقبال
عُقاب :- شلون كاعده
راعوث :- شلون يعني
عُقاب :- شلابسه يا لون
راعوث :- كافييي
عُقاب :- اكلتي
راعوث :- اي
عُقاب :- وبعد
راعوث :- اكلت وسبحت ونمت
عُقاب :- سبحتي بربوگه
راعوث :- اي وانته شجاي تسوي
عُقاب :- بالسياره ادخن
راعوث :- ليش بالسياره
عُقاب :- الغرفه خنكه بدونك
راعوث :- جاي دخن
عُقاب :- اي عيني
راعوث :- اخذت نفس وزفرته ، ليش اتصلت
عُقاب :- اشتاقيتلك
راعوث :- كعدتني منو النوم
عُقاب :- تعال نام بحضني وداعتك بس باجر وره مايكمل العرس وترجعين العصر ياخذون شمس واني اخذج خوش
راعوث :- لا عفيه والله بعدني ماشبعت منهن
عُقاب :- ابني
راعوث :- ها
عُقاب :- ليش فرحه ماتوافق
راعوث :- ماتكدر تعوف بابا بعده مريض
عُقاب :- كليلها ينتضرج رائد لمن يطيب ابوها ويكوم على رجليه ويوكف بعرسها
راعوث :- مادري اكللها
عُقاب :- بعدها ام رائد بغداد احتمال تجيكم بعرس هذيج شسمها قمر
راعوث :- شمس شمس وعمتي تجي
عُقاب :- اي حبيبي ششتريت
راعوث :- اممم فستان
عُقاب :- صلوخ؟ طويل لو كصير
راعوث :- لا شسمه باوع شسمه طويل كلش كلش والردن طويل حيل
عُقاب :- الصدر ؟
راعوث :- مثل الدرع واصل لركبتي
عُقاب :- *** ام الجذب
راعوث :- سكتت سمعت صوت الجداحه ، ثانيه؟
عُقاب :- الرابعه
راعوث :- مو كافي
عُقاب :- اشششش
راعوث :- سكتت باوعت على الساعه بـ 2 بليل اخذت نفس وزفرته
عُقاب :- شمسوي بالغرفه شنو هلترتيب الفراشات من اشوفهن اشوفك كدامي
راعوث :- حلوه
عُقاب :- تكتل كتل تسحل الكلب سحل
راعوث :- ابتسمت ثواني وهمست ، عُقاب
عُقاب :- روحه
راعوث :- اكو واحد
عُقاب :- شبي هذا الواحد
راعوث :- جان يحب بنيه
عُقاب :- اي عيني
راعوث :- جان يحب بنيه من منطقتهم يخابرها وهاي
عُقاب :- شني الهاي البالي
راعوث :- شنو بالك يعني رسايل ومخابره وهذني السوالف
عُقاب :- يا سوالف بويه هاي قصه لو شني
راعوث :- يعني سوالف الحب
عُقاب :- اي شصار بعدين
راعوث :- يوم من الايام الولد طلب صور البنيه
عُقاب :- ختمت القصه وعرفت نهايتها بس كملي
راعوث :- البنيه صغيره وكالت عادي مو شايفني خلي ادز وهوه يحبني وحلف براس امه يتزوجني ف دزتله صورها يوم بعد يوم صار يطلب الها صور اكثر ويحلفلها يحذفهن دزتله صورها وثقت بي بعد فتره هددها بصورها
عُقاب :- ذكر وانتي منين جبتي هاي السالفه
راعوث :- اسمعني
عُقاب :- يلي مجنني
راعوث :- ابتسمت وكملت ، صار يهددها بصورها ويطلب منها تطلعله يريد منها فلوس و شسمه يريد شسمه
عُقاب :- يريد حقيقاته بالحرام الذكر وين هذا منو سولفلج عليه
راعوث :- هاي البنيه صديقتي
عُقاب :- عندج هيج صديقات ؟
راعوث :- اي عفيه ساعدها والله تبجي واهلها مايدرون بس اني وعدتها اساعدها
عُقاب :- سهله بويه صح ما تستاهل بس انطيني العنوان زين شكد طلب منها فلوس
راعوث :- خمسه وعشرين
عُقاب :- هسه انته مهدد مهدد اطلب مليون مليونين
راعوث :- راح تساعدها ، سمعت صوت اوراق يمه
عُقاب :- العنوان
راعوث :- بمنطقتنه
عُقاب :- اسمه اسم اهله أي شي تعرفي عنه احجي
راعوث :- انطيته التفاصيل كامله
عُقاب :- هاهيه الموضوع صار يمي طمنيها لا تخاف وهذا واحد ذكر و الذكور ماينخاف منهم يوم يومين وتشوفي جوه رجليه
راعوث :- شكراً
عُقاب :- حبيبي
راعوث :- سكتت احس مخنوكه خايفه كلبي مقبوض شعور مخيف نبضات كلبي توجعني ..
عُقاب :- شبيك ابني
راعوث :- اخذت حسره ، مابيه شي
عُقاب :- لا بويه بيج احجيلي مشتاقلي ها مشتاقلي احجي يبووي انعل روحك حسيم شلون عفت فريخي بغداد
راعوث :- هم يجي يوم تعوفني
عُقاب :- لا اله الا الله منين تجيبين هذا الحجي
راعوث :- غصيت بعبرتي ، عُقاب خاف وحده تاخذك مني
عُقاب :- شلون تاخذني حتى بالعلاكه ما اصير
راعوث :- لا تضحك
عُقاب :- بابا تبجين ؟
راعوث :- مسحت دموعي شهكت بصوت ناصي وخرت الموبايل لبعيد وهدأت روحي اسمعه يحجي قربته من اذاني ..
عُقاب :- راعوث صاير شي بابا احجي اجي والله هسه اجي منو مضوجج شبيج تريدين شي صاير شي حاجيني جاي احجي وياج راعوث بابا اني يمج هاي جاي بس كليلي شصاير
راعوث :- رقيه جانت معجبه بيك وكلتلي جنت اريد أذيج واخليكم تطلكون اني ماريد اعوفك كلبي يوجعني اذا فكرت اعوفك
عُقاب :- بابا صدك جذب كولي غيرها هيه هاي رقيه معجبه بيه ط*** رائد
راعوث :- ابجي بصوت عالي واشهك ، لا تستهزء تره جاي اتأذه اني عندي مشاعر خلي نفسك بمكاني اخوك يكلك معجب بمرتك وردت اخرب بينكم شيصير بيك اقرب واحد الك يخونك ويريد يأذيك احس كلبي راح يوكف ضامتها السالفه من الصبح لهسه راح اموت كلبي يتكطع ماريد تعوفني اريدك انته اليه ليش متزوج زينب هااا ليششش ورقيه جانت معجبه بيك وتريد تاخذك مني اكرها اريدك يمي أذتني بكلامها ليش اجيت هنا ليش كلتلي ليش ما سكتت
عُقاب :- بروح امج لا تبجين بروح امج راعوث لا تبجين راح تخبليني بس سكتي هاي حركت السياره جاي لبغداد بس لا تبجين كاااافي رااااعوث
راعوث :- ماكدر اوقف دموعي ولا اكتم صوتي اذا فضفضت هاهيه بعد ماكدر اسكت من البجي امسح بدموعي واشهك ..
راعوث :- لا تجي عُقاب ماريد تجي مابيه شي سولفتلك ارتاحيت
عُقاب :- جاااا منوووو جاي يبجييي ابوووووي يالكعبه يا رررررب العباد ليش من احجي وياج تزيدين بالبجي وحك ربج جاي لبغداد محد ياخذني منج بس الموت لا تبجين اخخخ راعوووث هسه ليش تبجين
راعوث :- اسمع صوت السياره سريعه ويحجي بعصبيه ماكدر احجي ابجي بـ هستيريا مادري شصارلي بوقتها احس اريده يمي احس كرهت كل اهلي ماريد رقيه ماريد اسمع صوتها ماريد اتذكر كلامها ولا اعتذارها شلون كدرت تحاول تأذي اختها الصغيره عاط
عُقاب :- وچ بابا اهديييييي
راعوث :- لا تعوفني اذا عفتني اموت
– سمعت صوت السياره شخطت بصوت عالي وصارت طكه قويه حيل وصوت كزاز تكسر وانغلق الاتصال حسيت جمدت بمكاني انفاسي مسموعه فتحت عيوني على وسعهن وصرخت ..
راعوث :- عُقاااااااااااااااب عُقااااااااب جاوبنييييي بيك شي عُقااااااب رد عليه شصااااار عُقاااب تسمعنييييي بيك شي كلبي راح يوكف عُقاااااااااب
– على صوتي العالي دخلت افراح تركض
افراح :- شبيججج راعوووووث شصاااار حاجيني شصاااار شبي عُقاب
راعوث :- مادري مادري عُقاب مادري شبي اخذيني لـ عُقاب والقران اموت اذا ما اخذتوني
– كمت على حيلي اباوع للباب واباوع لافراح عقلي وكف مادري شسوي جسمي كله يرجف دموعي نشفن عضامي طكطك كلبي يخفق بشده بالي كله يم عُقاب مستعده اطلع اخلي الناس توصلني بس اريد اشوف شبي خاف اتأذه
افراح :- ولجججج بس فهمينيييي شصااااااير فهمينييييي شبي عُقاب كلبي وكفتي راح تخبلين ابووووي
راعوث :- خابري خابري رائد راااائد خابري رقم امه رقمها عفيه راح اوكع افراح خابري رائد هنا بغداد هوه خلي ياخذني والقران اذا ما رحت اليوم اكتل نفسي انطيني موبايلجججج وينننننه لا تصفنين راح امووووت حسي بكلبيييي راح يوكف على عُقااااب
– رحت ركض بدون تفاهم نسيت احنه بنص ليل نسيت كلشي اخذت موبايل افراح اتصل على ام رائد وبموبايلي اتصل على عُقاب محد يجاوبني حسيت روحي على حافة الموت منو ياخذني اله اريد عُقاب اريد اشوفه بس اشوفه بس اسمع صوته بقيت اتصل و اتصل لحد ان جاوبتني ام رائد بسرعه حجيت بدون ما اسمعلها
راعوث :- وين رائد خاله عليج الحسين الشهيد عليج جفوف العباس خلي يجي رااااائد خليييي يجيييي ياخذني للبصره عُقاب سوه حااادث حاجي عليج الكعبه خلي ياخذني والقران اذا ما اخذني لـ عُقاب اموت والقران اموت
ام رائد :- صخام الصخمني ياربييي ستركك هسه احاجي خاله لا تخافين
راعوث :- حطيت الموبايل بيد افراح وطلعت ركض باب الشارع لزمت الحايط اريد اوكع اشوف غواش كعدت على الصبه باب الشارع حطيت راسي بين ايدي وابجي بـ هستيريا ضربت على راسي حيل ملخت شعري كله مني
افراح :- كافي كومي والله مابي شي اني متاكده مابي شي راعوث لا تخافين مايصيرله شي ولج كومي من الباب بس كومي طبي جوه راح يجي رائد كومي يمه والله مايصيرله شي لا تكتلين روحج ولج راعوث كافي لا تبجين مو زين انتي حامل لا تأذين روحج كومي من الباب كومي
راعوث :- كللله منييييي اني السبب خليته يسوق السياره علمودي ان شاء الله اموت الله يطلع روحي ماريد اعيش والله اذا صار بي شي اكتل روحي
افراح :- لا اله الا الله راعوث كومي فدوه اروحلج طبي جوه ابوي خاف عليج مريض والله لا تخوفي لا يصير شي بكلبه
راعوث :- ما اكوم والقران ما اكوم لمن يجي رائد لو ابقه لصبح هم ما اكوم اريد عُقاب ليش ما يجاوبنييي ليششش يعني صاير بي شي
افراح :- اسمع ابوي يكح بصوت عالي طبيت ركض وعفت البنات يم راعوث
راعوث :- كعدت يمي ابرار واخذتني لحضنها من اخذتني بحضنها حسيت بالامان الجنت محتاجته الحضن المحتاجته بجيت على صدرها وحضنتها بكل قوتي اريد عُقاب بس احد يطمني عليه ليش سويت هيج كله بسببي دعيت على روحي الف دعوه ابجي بغزاره واشهك واسمع ابرار تحجي وياي
ابرار :- راعوث صيري قويه انتي اختي الاعرفها القويه الصبوره لا تخافين من شي بعده ما صاير اني متأكده عُقاب كلش زين حتى لو اتأذه بس ما يروح منج صدكيني ما يعوفج عُقاب عفيه لا تبجين هيج والله جاي تأذيني كافي لا تبجين راعوث هسه يجي رائد وياخذج والله حبابه لا تبجين
راعوث :- ابرار احبه اخاف يعوفني مايعوفني مو حبابه كليلي مايعوفج هوه يريد يشوف فروخنه مايعوفني
ابرار :- مايعوفج يروحي مايعوفج لا ترجفين والله اخاف عليج انتي حامل حبابه اهدي متاكده حادث خاف وكع منه الموبايل او شي
راعوث :- لا لا سمعت السياره والجام تكسر وراح صوته اختفى انطفه الموبايل مادري شبي هسه خاف متأذي ومحد يدري مسوي حادث خاف جاي ينزف خاف اكو شي يوجعه
ناصر :-روحي ويا اختج روحي لا تعوفيها وحدها بويه اريد اكوم على حيلي اريد اروح وياها ما جاي اكدر هذا السرطااان موتني اخذ روحيييي شوكت اموووت واخلص
افراح :- اسم الله عليك شنو هذا الحجي راح اموت راح يصير بيه جلطه والله العظيم احس كلبي راح يوكف منين تجينه هاي المصايب
راعوث :- فاتحه الموبايل واتصل عليه اباوع بصورته واناشغ ليش ما يجاوبني لو بس يجاوبني ارتاح وره دقايق شفت سيارة رائد بسرعه كمت فتحت الباب وصعدت شفت امه بالكدام كاعده
راعوث :- يله روححح روح لـ عُقاااااب
– شفت افراح اجت لابسه حجابها وبيدها قران طببت اخواتي سدن الباب صعدت بصفي
رائد :- بس فهميني شصاير فهميني خويه راعوث شصار شلون عرفتي حادث
راعوث :- بس سووووق سوق السياره خلي تتحرك اريد ارتااح
رائد :- هاي والكاظم حركت السياره احجي خلي اسمعج خلي افهم خبلتوني بنص الليل
راعوث :- جنت جاي اخابره وحجيتله على سالفه مضوجتني وكمت ابجي عُقاب مايقبل ابجي يكلي سكتي واني ازيد ماكدر اسكت كلي جاي لبغداد بس لا تبجين واني ابجي سمعت سيارته سريعه وبعدين صارت طكه قويه والجام تفلش وانقفل الموبايل خايفه على عُقاب عفيه سوق بسرعه عفيه بداعت امك
ام رائد :- ولج خاله بس اهدي لا تخبلين روحج مو زين عليج انتي حامل لا يصير شي بالطفل
رائد :- خويه وداعتج ما ينخاف على عُقاب اني ما اعرفه لو يطلع من سبع عمليات هم مابي شي ويكوم على حيله اني اخو روح بالروح جا ما خايف عليه هلكد
راعوث :- احببببه تفهمممم كلبي راح يوكف ليش ماتحسون بيه
رائد :- بعد روحي يخويه والله نحس بيج بس لا تبجين خلي اسوق عدل لا توتريني
راعوث :- خابره انته هوه يحبك يمكن يرد عليك خاف زعل مني
رائد :- بس سكتي اني خابرته وكال مابيه شي لا تبجين بعد روح اخيج
راعوث :- تجذب عليه والقران ادري اريد عُقاب راح اموت اذا صار بي شي اكتل روحي والله ودفنوني يمه مشكوله ذمتكم دفنونه بنفس الكبر ماريد كبر وحدي اريد يمه دفنونه سوه
رائد :- يمعوووووووده كولي يالله هسه انتي راح توكفين كلبي راح ابجي بالعباس مابي شي صاحبي واعرفه اكثر من روحي
راعوث :- سوق بسرعه حباب
ام رائد :- عفك ربي يمه راح نسوي حادث فدوه اروحلج كافي بجي هوه سايق ويعرف مو كلبي راح يوكف من سرعة السياره بعد شتردين يطيرنه كولي يالله ذكري ربج استغفري ادعيله يطلع سالم بعد روحي يخاله لا تفرفحين
راعوث :- ماكدر اسكت ماكدرررر
رائد :- عوفيها حجيه براحتج ابجي
راعوث :- امسح بدموعي اريد ما ابجي ماكدر باوعت لافراح تقره قران باوعت على الطريق واحس كلبي راح يوكف شيوصلنه اتذكر الطريق شطوله وازيد بالبجي
– باوعت بالمرايه رائد يباوع على افراح وهيه ما منتبها تقره بالقران شافني كح بتوتر وباوع على الطريق سحب الكلينس وانطاني
– مسحت دموعي وصفنت على الطريق هدأت بس بداخلي صراخ وبجي وخوف دموعي ماتوقفت افكر معقوله يصير بي شي معقوله يعوفني ما شفته اريد اشوفه ما شابعه منه اريد اشوفه اريده اريد اباوع عليه لا يعوفني اموت معقوله هاي اخر ليله لـ عُقاب
– حسيت شي حار ينزل على شفايفي خليت ايدي على حلكي وباوعتلها كلها دم جمد الدم بعروكي اشوف كلشي يتمايل اريد اوكع همست
راعوث :- افراح
افراح :- صدق الله العظيم ، باوعت على راعوث حرفياً وجها مدماي خشمها ينزف دم بشكل مو طبيعي شعري وكف من الهلع والخوف ادنيت يمها جريتها لحضني امسح الدم بايدي وبعدها تنزف وهيه انتهت غمضت عيونها كمت ارجف اسحب بالكلينس وامسح بالدم
افراح :- خاله عفيه شسوي ماكو شي يمي شسوي راح يخلص دمها شسوي وين اروح
ام رائد :- يا سوده بوجهي هاي مين الدم ولج خاله شبيها اخيتج اوكف البنيه ماتت وكف السياره
افراح :- راعوث شبيج يمه شجاج سوده عليه جعلها بيه ولا بيج جعلني ميته ولا اشوفج بهاي وضعيتج ولج شبيج راح تموتين وانتي ماتدرين شبي مابي راعوث فتحي عيونج اني اختج يمج ولج خلص دمج شسوي يارب رحمتك يااارب
– وكف السياره رائد وراح فتح صندوك السياره جاب جرجف نزلت امه فتحت الباب من جهتي
ام رائد :- نزلي خاله نزلي كعدي لكدام اني اعرف لبنيه دنزلي راح تموت البنيه
افراح :- لا خاله شلون اني اعرفلها ما اكعد كدام مابيها شي هسه تصحه
ام رائد :- خاله نزلي فدوه اروحلج البنيه حامل لا تروح من ادينه
افراح :- باوعت لراعوث صحصحت ترجف وتهمس
– بردانه
– خفت يصير بيها شي بسببي نزلت صعدت لكدام ام رائد كعدت نيمتها على حضنها رائد فتح الباب وغط راعوث انطه لامه قماشه خلتها على خشم راعوث حتى توقف نزيفها
– فتحت القران وصرت اقره ودموعي تنزل على القران مادري شنو راح يصير بهاي الليله مادري اذا عُقاب عايش لو ميت مادري شنو راح يصير لراعوث اذا سمعت صاير شي بعُقاب هاي ماتدري شنو بي وراح تموت خايفه من هاي ليله
راعوث :- احس بوجع بطني مو طبيعي وعضامي تصل من البرد صخنت صرت نار مادري منو يمي مادري اني بحضن منو مادري اذا الصار حلم لو حقيقه احس عقلي توقف افتح اشوف ضلمه وغواش حضنت ام رائد بكل قوتي اريد اعرف منو هاي امي؟ افراح؟ عُقاب؟
رائد :- ها خويه راعوث شلون صرتي
راعوث :- اسمع صوت بعيد هذا صوت عُقاب لا عُقاب مو هيج صوته اعرفه صوته الاحبه هذا مو عُقاب وين عُقاب همست ..
راعوث :- عُقاب
رائد :- هذا عُقاب مابي شي شني السالفه لا تأذين فريخه تره مايقبل يزعل عليج
راعوث :- كمت من حضنها كعدت لفيت روحي بالغطه وبقيت لازمه القماش على خشمي اشوف غواش بدأ يخف
ام رائد :- ها خاله والله كلبي راح يوكف عليج شجاج يمه
راعوث :- وصلنه
رائد :- اي وصلنه بس شويه ونوصل للمستشفى
راعوث :- شرياني يوجعني خاف راح اموت
رائد :- كككافي لا تخوفيني عليج اخاف عليج لو على عُقاب بس تفائلي بالخير فدوه اروح لوجهج لا تفكرين بالسلبيات راح تموتين والقران يذبحني على ايده عُقاب اذا صار بيج شي واني يمج
راعوث :- تقربت من ام رائد حضنتني غمضت عيوني ودموعي حاره تنزل على خدي
افراح :- شفت موبايل رائد انفتح على مسج صار عندي فضول اشوف بقيت اباوع اخذ الموبايل فتح المحادثه شفت صورة سياره عُقاب منتهيه داخله بالرصيف ومدمره دمار والصوره الثانيه وجه عُقاب مدمه وبدون تيشيرت جوه صدره مشكوك شك مريب وصدره كله دم
– فتحت عيوني على وسعهن ردت اصرخ من المنضر المرعب الشفته باوعلي رائد وعض شفته الجوه بمعنى اسكتي واشرلي بعيونه على راعوث
– كتمت شهكتي وصرختي خوفاً على راعوث متاكده اذا شافته راح تتخبل او تموت صرت اقره القران وادعي لربي بتوسل يشافي عُقاب مادري شنو راح يصير براعوث اذا انتهت حياة عُقاب ما توقعت هلكد تحبه ولا هلكد راح تخاف عليه اذا صار بي شي
راعوث :- كلبي يأذيني اريد اتنفس اختنكت
ام رائد :- ها يمه شبيج يا بعد كلبي افتح الجامه ادري زوجج وصعبه بس صيري قويه اذا يشوفج هلكد ضعيفه راح يتأذه اكثر
راعوث :- كلبي يوجعني عُقاب بي شي والله اريد نفس انكطع نفسي اريد انزل كلبي خاله لزمي صدري شوفي كلبي شلون يدك راح اموت افراح تعاي يمي اريد اشوف بابا قبل لا اموت
افراح :- وكف السياره رائد وتغيرت نضرته حيل جان شويه مطمئن بس من شاف الصوره تغير واحس كلبه راح يوكف على عُقاب نزل من السياره لف جسم راعوث بالجرجف نزلتلها صاح
رائد :- صعدي لحد ينزل اني يمها صعدي افراح اريد احجي وياها خلي تهدى شويه انتو جاي تخوفوها
افراح :- صعدت وكلبي يم راعوث اباوعلها من الجامه كوه تمشي تريد توكع رائد مايكدر يلزمها كعدت على الصبه نزل لمستواها رائد ومادري شحجه وياها وهيه تبجي ماتكدر تتنفس فاتحه حلكها وتجر النفس جر ..
رائد :- خويه على كيفج ادري تحبي وماتكدرين بدونه بس هاي روحج حرام عليج جاي تعذبيها عُقاب مابي شي وحتى لو متأذي يعيش لا تخافين يعني اذا شفتي متعرض لحادث بسيط ويحتاج عمليه تموتين ما يصحه لباجر تموتين مايصير هالشكل انتي حامل تقبلين عُقاب يزعل عليج لان أذيتي ابنه حتى لو مو ابنه انتي تتأذين اعرف عُقاب يحبج اكثر من روحه اذا صار بيج شي شيخلصنه منه مسحي دموعج اخذي شهيق وزفير ريحي بالج واذا صار شي بركبتي
راعوث :- حجيت وطكيت بالبجي اقوه ، كول والله ما يموت
رائد :- كومي بعد اخوج اخذتي نفس يله كومي نروح نشوفه مو تاخرنه عليه
راعوث :- مسحت دموعي صعدت بالسياره رخيت جسمي خليت راسي على الجامه واباوع على الطريق وفكره تجيبني وفكره توديني لحد ان صار الفجر دخلنه للبصره روحي فرفحت بس اريد اشوفه ابوسه اريد ارتاح بعد ماخلي يعوفني ماخلي يروح لمكان بعيد ويعوفني اريد عُقاب …
راعوث :- شفت وصلنه يم المستشفى كلبي انقبض ليش جابنه للمستشفى صاير بي شي عُقاب نزلت من السياره وشفت المستشفى كلها ضباط احس كلبي راح يوكف ادور بالوجوه بلكت اشوف عُقاب بس مالكيته
– دخلت ركض المستشفى ممليه بالضباط كلبي يدك سريع شفت عمتي ركضت عليها حضنتها بكل قوتي وصرت ابجي اقوه
راعوث :- وين عُقااااب وينه عمه عفيييه صاير بي شي عُقاب وينه ليش ما واكف وياكم جاوبيني كلبي موتني بس كليلي مابي شي احجييي ليش ساكتتته
– باوعت بوجها ساكته وعيونها متروسه دموع معقوله صار البالي ليش ماتحجي اجت افراح اخذتني لحضنها
افراح :- شصاير خاله فدوه احجي فهمينه
ابتسام :- اكتفت بس بـ جم كلمه وسكتت ، مابي شي مابي شي هسه يكعد
راعوث :- يعني ما كاعد هسه تضحكون عليه موووو صار بي شيييي ليش كلكم هناا ليشش وخرررري عنييييي وخررري وين عُقاب اريد اشوفه
افراح :- حاضنتها بكل قوتي وهيه ملخت روحها تدفع بيه بكل قوتها وتصرخ لان ماعوفها تروح كلبت المستشفى على صريخها الكل اجه الدكاتره والناس تباوع علينه عبالهم واحد توفه عدنه اريد الزمها اثبتها ماتثبت ابتسام كعدت على الكراسي صافنه أيست من عُقاب من تصرفات امه اجه رائد لزم راعوث كوه من فوك ملابسها مايكدر يلمس حتى ايدها لازم كتفها من فوك الملابس وصاح بوجها حتى يصحيها
رائد :- ككككافي خوووويه عُقاب مابي شيييي بس مسوي عمليه وبعده ما صاحي فشله الناس شلون تباوع عليج تخبلتي روحي كعديييي هسه يصحه وتشبعين منه على كيفج مو هيج الحجي جا اذا اجت منيته شتسوين
راعوث :- حباب كول مابي شي حباب بس اريد اشوفه بس اشوفه من بعيد والله من بعيد بس ارتاح كلبي نار عليه كول والله ماتجذبون عليه كول والله عُقاب عايش
افراح :- راعوث فقدت حيل خفت عليها اخذها كعدها على الكراسي يم ابتسام وحجه وياها بصوت ناصي مسحت دموعي النزلت وارجف من الخوف على عُقاب وعلى راعوث واني هنا وحدي اني واختي صح ابتسام موجوده بس خايفه مامتعوده اعوف ابوي واطلع لمكان بعيد
راعوث :- كعدني على الكرسي ودنك عليه فاتح عيونه على وسعهن وحجه بصوت خافت
رائد :-بعد اخوج انتي عرض اخوي كعدي هنا لا تبقين تفترين بالمستشفى هذوله جماعته كلهم هنا واني اعرف عُقاب مايقبل بهاي الوضعيه ولو ترجعين للبيت احسن بس كعدي واهدي نصي صوتج وهسه يكعد عُقاب والله العظيم انتي اول وحده تشوفي خوش خويه
راعوث :- هزيت راسي بـ اي ومسح بدموعي
افراح :- اجه من يمي رائد حجه بصوت خافت وهوه يباوع على جماعته
رائد :- غطي ركبتج وكعدي يم اختج
افراح :- بسرعه عدلت شالي وكعدت يم راعوث
راعوث :- حضنت رجليه وصفنت بالكاع نسيت كل الحولي اتذكر كل كلمه كل حركه كل شي صار بيناتنه اني و عُقاب نشفن دموعي عيوني يحركني من البجي و ما نمت ولا ثانيه اكره هذا الهدوء بعد البجي والصراخ احس روحي اريد انعزل ماريد واحد يباوعلي اتنرفز اريد ابجي واسكت براحتي
– شفت ام رائد اجت على عمتي مادري وين جانت دنكت على عمتي وحضنتها وعمتي طكت بالبجي وتحجي بخوف ودموعها ماتوقفت وام رائد تسكت بيها
ابتسام :- عُقاب راح مني عُقاب يمه يا ام رائد عُقاب راح من ايدي هوه مو بس ابني حزام ضهري وابو بيتي ام رائد اذا راح عُقاب اموت اضيع
– اجه رائد وخر امه من عمتي
رائد :- كافي بواجي رحمه لدينجن كافي مابي شي والله مابي شي خبلتن البنيه كافي شلون صافنه عليجن هسه اني خوفتني بس كعدن خلي افهم الموضوع
راعوث :- دنكت راسي منتضره أي شي منه منتضره اسمع صوته حسه نفسه اشوف شواربه عيونه طوله ضخامته اشتاقيتله احس سنه ما شايفته اصعب ساعات احس الوقت كوه يتحرك ..
– بقيت كاعده ساعات رائد اختفى مدري وين راح احس اريد اغفه بس ماكدر انام وما شايفته شفت رائد اجه بيده غراض عُقاب كمت ركض اخذتهن منه محفظته وجاكيته وجداحه حضنتهن بكل قوتي وبستهن
رائد :- كعدي بعد اخوج
راعوث :- كعدت وحضنتهن شميت جاكيته بكل قوتي نزلت دمعه من عيني مسحتها وباوعت لرائد
راعوث :- شصار وينه هسه
رائد :- مسوي عمليه ونايم يمكن ما يصحه هسه دكومو ارجعكم للبيت والضهر اني اجيبكم والله العظيم مايصير تبقون كاعدين هنا كومي حجيه ان شاء الله عُقاب يصحه وتشوفو
راعوث :- شنو من عمليه شبي متأذي
رائد :- لا خويه جرح بسيط
راعوث :- جرح بسيط وعمليه ؟
رائد :- يله كومي حجيه ارجعكم للبيت
ابتسام :- شلون اكدر اعوفه
رائد :- اني والولد يمه صدك تحجين تخافين على عُقاب هوه ينخاف منه مو ينخاف عليه
ابتسام :- شكال الدكتور
رائد :- الحمدالله صحته زينه كومن للبيت نامن ارتاحن اكلن فد شي بين ما يصحه
ابتسام :- لا ماكدر اعوفه اريد اشوفه
رائد :- لا اله الا الله حجيه فدوه اروحلج كومي اخذي البنات شنو الفائده من هاي كعدتجن هنا الرايح والجاي يباوع دكومي فدوه لعيونج
ام رائد :- اي كومي يخيه كومي سويله فد اكله جيبيله ملابس ورجعيله الضهر هاي الولد كلها يمه مابي شي والله المهم اطمنتي عليه شوفي عيونج شلون صارن نامي شويه
ابتسام :- لا والله العظيم ما اعوف عُقاب كومي افراح وراعوث روحن يم فرح اني ابقه هنا لحد ان يصحه واشوفه بعيوني
راعوث :- والقران لو تكلبون الدنيا ماروح
ابتسام :- والله العظيم اني يمه روحي ارتاحي انتي حامل لا يصير بيج شي مو زين عليج
راعوث :- حلفتلج بالقران ماروح لمن هوه يطلع وياي
رائد :- عض اصبعه وعاط ، اخخخخ الله يسااااعد عُقاب اكول شبي يابووويه وحق الحسين شالعه كلبه وحق الحسين شكد تبجين شكد تلحين شنو هذا العناد شنو هاي الصلافه
راعوث :- والله ما اروح لمن يكعد عُقاب
– بقه خازرني بطرف عينه لحد ان حجت افراح باوعلها وعيونه لمعن
افراح :- خلينه هنا مايصير شي شلون نكدر نعوفه صعبه
رائد :- حجه بارتباك ، هاهيه براحتكم براحتكم
ام رائد :- بعد روحي ام عُقاب الله يشافي ويعافي ويكومه بسلامه عُقاب اني لازم اروح والله العظيم احس ضغطي صاعد وراسي يوجعني اريد اخذلي كسره وهم اخلي البنيات يسون فد شي تاكلو احسن من اكل البره
ابتسام :- يا بعد كلبي ما اعتب عليج براحتج لا يضل بالج بعد روحي
راعوث :- راحت ام رائد راح وياها رائد دقايق واجه واحد من الولد وصلها بقه يفتر بالممر ورث جكاره ياخذ نضرات على افراح بس مو حيل يركز ولا يخليها تشك يباوعلها بس اني انتبهتله
ابتسام :- يمه رايحه بالحديقه شويه تكومين وياي شو احس اختنكت
راعوث :- ماريد اطلع من المستشفى اريد عُقاب
ابتسام :- جا اني اكوم شويه بره بعد روحي فروحه ديربالج على راعوث
افراح :- براحتج خاله لا توصين عليها
راعوث :- كامت عمتي فتحت المحفظة سحبت الهويه مالته بست صورته اباوع على اسمه وفخامته باوعت على اسمي بضهر الجنسيه شكد راحه نفسيه بست صورته ورجعتها للمحفظة شفت الحجل مالتي طلعته باوعت عليه وابتسمت حسيت واحد كعد يمي باوعتله رائد اخذت حسره
رائد :- هذا الج
راعوث :- اي
رائد :- شكد يحبج حتى بالشغل دوم يغلط باسمج يابعد اخوتي شوكت تكوم واشوف طولك كدامي
راعوث :- رجعته للمحفظة باوعت على افراح كاعده مدنكه واني بنصهم اخذت غراضه وكمت
رائد :- ها بعد اخوج وين
راعوث :- هنا ماروح بعيد
– سكت دخن جكاره تمشيت للشباج اخذت نفس وزفرته شفت فراشتين يطيرن ابتسمت واحس كلبي يرجف رجليه كوه واكفه عليهن مركزه على الفراشات وعيوني تتحرك وراهن لفت انتباهي انعكاس افراح و رائد بالجامه باوعت عليهم من الانعكاس رائد بمكانه وبعيد عنها مدنك ويحجي وافراح مدنكه سويت نفسي ما منتبها ولا درت وجهي
رائد :- افراح
افراح :- احس كلبي راح يوكف من حجه باسمي بقيت ساكته مدنكه بعد ماكدر اكوم ولا ابقه توترت
رائد :- اتقدملج مره ثانيه وتوافقين اجيب اهلي وعشيرتي وتوافقين افراح رايدج شريكة حياتي لا تاخذيني بغير نضره بس لازم احجي وياج اني حابج اعرف تربيتجن واخلاقجن بس كلام عُقاب يكفي بس سترج يكفي حبج وخوفج واهتمامج لابوج يكفي وحتى ماريد اسأل عليكم ولا احاول بس كولي موافقه اسويلج احلى عرس ومتأكد راح اسعدج
افراح :- خويه سد هذا الموضوع واعتبرني اختك ولا تحاول تفكر اني شريكة حياتك لان مستحيل اتزوج واعوف ابوي بهذا وضعه تدري شصاير بكلبي هسه بس اريد اعرف شلونه خاف بي شي ف اعذرني ما راح اوافق وطلعني من بالك
رائد :- حاولت ما طلعتي انام اكعد اكل صورتج كبالي كلامج خوفج على ابوج نضراتج احسج ام صغيره
افراح :- خويه كلتلك ما وافق معتبرتك اخوي ماكدر
رائد :- لا تكولين خويه شلعتي كلبي والله اخذ بيت وحدنه وابوج يعيش ويانه وروح امج قابل ينام وياي بنفس الغرفه بس وافقي
افراح :- ابتسمت ودنكت
رائد :- حتى بـ اسمانه احرف تشابه حرف ا وحرف ر يعني متوالمين
افراح :- كوه كتمت ضحكتي درت وجهي مسحت كصتي اخذت نفس وزفرته دنكت احس يباوع عليه
رائد :- وروح امج اخلي ابوج يعيش ويانه وادورله مره هم بعد شيريد
افراح :- عندي اخوات مامتزوجات ماكدر اعوفهن
رائد :- جا شبيها ناخذهن يمنه اشتريلج بيت بصف بيت وداعتج حايط على حايط شوكت ماتريدين روحيلهم وهم اخواتج يم ابوج عندج اخت ثانيه اتذكر شفتها جبيره يعني كد المسؤولية شدعوه هلكد بس انتي تعرفين لابوج شتسويله هنياله
افراح :- باوعتله وسكتت ما جاوبته
رائد :- راح ادز امي مره ثانيه و ان شاء الله اسمع موافقتج
افراح :- كام من يمي رفعت راسي اخذت حسره وهمست ، لا اله الا الله
راعوث :- بعد ما كام ركزت بانعكاسي ابتسمت ودعيت بكلبي يتزوجون وشوفهم سوه ثواني وسمعت صوت صريخ درت وجهي لباب الدخول شفت ولد كاعد على كرسي متحرك ومدماي من فوك لجوه وجها مختفي بالدم ومره جبيره تملخ بروحها وهوه يصرخ
– ماشووووف ضلللللمه ما جاي اشووووف ليشش الدنيا ضلممممه
– يمه سوده بوجهي يمه جم مره كلتلك عوف الدراجه هاي جم مره وصيتك ليش يمه ليش أذيت روحك مو كلتلك لا تطلع بيها ولكك يممه شبيك شنو اليأذيككك
راعوث :- كلبي صار يرجف من المنضر الشفته والدم وصراخه مايكدر يشوف احس كلبي نمرد مرد تمشيت بالممر لازمه بطني تأذيني احس بلعبان نفس رحت يم افراح كعدت انشلع كلبي من الانتضار شوكت يخلوني اشوفه
– اجت عمتي بيدها بطل مي ونستلتين اخذت بس مي شربت خليت غراض عُقاب يم عمتي وكمت من يمهن
ابتسام :- ها يمه وين
راعوث :- هسه اجي رايحه يم رائد
– حسيت رائد اخوي وعبالك اعرفه من سنين ما حسبته صديق عُقاب وبس رحت يمه مطلع صوره مدري شنو بسرعه طفه الموبايل باوعلي بنضره خوف عباله شفت ..
راعوث :- وين الغرفه البيها عُقاب
رائد :- دكعدي ومن يصحه ادليج
راعوث :- عفيه بس دليني وين هوه
– كام رائد رحت وراه وكف يم باب مسدود
رائد :- بهاي الغرفه يابعد اخيج
راعوث :- زين منو مايقبل انشوفه
رائد :- الدكتور
راعوث :- ليش
رائد :- اممم لان مخلي اجهزه مو زينه
راعوث :- تجذب والله
رائد :- امشي كعدي بكد الاصبع تكلي تجذب
راعوث :- وين الدكتور والعباس اني اعلمه
رائد :- ها عيني على كيفج خاف ادليج بي ودخلين عليه مداهمه
راعوث :- ليش تحجي هواي وتاكل هواي
رائد :- اخو عُقاب
راعوث :- لا عُقاب مو مثلك وين الدكتور
رائد :- دكتور زُهير كدامج باب على ايدج اليمنى وجاي وياج احب العركات
راعوث :- مشيت بكل ثقه فتحت الباب ودخلت صحت
– وين دكتور زُهيرررر؟
– بنيه نايمه على الجربايه و رجال واثنين بنات كاعدين بالكاع صفنو عليه
– عيني يادكتور هاي ردهة خاصه
راعوث :- صفنت عليهم درت وجهي شفت رائد كوه كاتم ضحكته
رائد :- نعتذر عيني اول مره تجي للمستشفى عبالها غرفة الدكتور
راعوث :- حجه وطكها بضحكه ابد ما ضحكت طلعت من الغرفه ومشيت وهوه اجه يمشي بصفي ويحجي ويضحك عبالك اخته الصغيره
رائد :- اشاقه وياج علمود تضحكين شويه وداعتج اشاقه زعلتي يمعوده مرت عُقاب يابويه علمها على هاي المشيه والهدوء ما قبل العاصفه
راعوث :- والله بس يكعد اسولفله عليكم كلكم والله وين زُهيرررررر وينننه
رائد :- لا عيب خويه تعاي كعدي هسه اني احجي ويا واقنعه واخلي يطببج
– منو ويا الرائد عُقاب حسام
راعوث :- درت وجهي شفته الدكتور
رائد :- اني اخو اني تفضل بي شي عُقاب
– المريض بدأ يتحرك ونبضه منتضم الحمدالله عدت على خير يكدر شخص واحد يدخل يشوفه شخص واحد لا أكثر
راعوث :- اني
ابتسام :- لا اني فدوه لوجهج اني اريد اشوفه اريد ارتاح اني اشوفه
راعوث :- لا عفيه عمه ابوس ايدج والله كلبي راح يطك عليه عفيه خليني اني ادخل اشوفه والله بطني تأذيني تقبلين يوكع الطفل
رائد :- حجيه خليها تشوفه ماتشوفين شصاير بحالها خلي يطمن كلبها عليه
ابتسام :- هاهيه يمه طبي انتي شوفي
راعوث :- راح الدكتور للغرفه رحت ركض وراه فتح الباب دخلت سد الباب شفت عُقاب نايم على السديه جوه صدره ملفوف بالشاش وعلى صدره اجهزه ملونه وبيده كانونه رماديه رحت ركض حضنته بكل قوتي وبوس بي من كل مكان وابجي بـ هستيريا فقدت من شفته
– بست كل وجها وصدره سحبت ايده بستها تقربت من وجها امسح بشواربه علكيف بست رموش عيونه وكلبي يدك بقوه الضحكه شاكه حلكي وعيوني كلها دموع ماريد اعوفه تقربت من ركبته شميت عطره بست عروك ركبته تقربت من اذانه همست
راعوث :- كاعد؟
– ما جاوبني نزلت دموعي
راعوث :- كل مره من اباوع عليك او اكعد من النوم الكاك كاعد ليش هسه متكعد وتفرحني كلبي راح يوكف عليك انته مو كلتلي الذيب ما ينام يله اكعد اشتاقيتلك عفيه اكعد انته مو ما تقبل ابجي يله اكعد احرك الدنيا على المبجيني سمعني صوتك
– ما كعد اسمع صوت الاجهزه كسر كلبي اكره هذا الصوت باوعت على جهاز نبضات الكلب اختنكت اريده يكعد سحبت ايده وبست اصبع اصبع واهمس
– هاي من امك وهاي من رائد وهاي من افراح ومن بابا ومن شمس ومن رقي… ، سكتت اخذت نفس وزفرته ، ومن ابرار ومن زيد ومن فرح ومن علي ومن جود ، بست خده ، هاي من قمر ، بست خده الثانيه ، هاي منه كلنه
– يله اكعد عاد شتاقيتلك اذا كعدت اشتريلك جكاير امم اذا كعدت اجيب الفريخ الي بطني يله فتح اذا ما كعدت اشخبط على الملفات اكعد كلي فريخي كلي زقوچتي كلي بربوگه كلي عروك گلبي حرك عيونك بس اتحرك
– لا حركه ولا صوت نمت بصفه ولازمه ايده بيها كانونه ابوس بيها اهمس ..
راعوث :- يله عُقاب اكعد حتى نرجع للبيت يله تره اموت بدونك جربت اعيش بدونك لمدة ساعات ماكدرت سمعني صوتك حرك اصبعك اصبعك الصغيرون مو اله الجبير
– اتحرك اصبعه الصغير كمزت من مكاني بست وجها بكل قوتي
راعوث :- يعني تسمعني اني يمك لا تخاف من حسام ولا من السياره اكعد عفيه حاجيني
– همس بتعب وصوته منتهي وبي بحه
عُقاب :- بربوگتي ..
الفصل التالي اضغط هنا
يتبع.. (رواية راعوث) اضغط على اسم الرواية لتجد الفهرس كاملاً بجميع الفصول.