رواية تراث النهروان – الفصل التاسع و الثلاثون
part-39
سديت التلفون وهو كام كعد بصفي وباسني بخدي يحجي بخفوت
– شبيج حبيبي؟
ابتسمت بهدوء وهزيت راسي
– مابية شي.
– امم متأكده؟
كالها وقرب راسة اكثر على ركبتي، غمضت عيوني احرك برگبتي متحسسه من لحيته
ابتعد مبتسم حط راسة على جتفي باسني بجتفي وباع بعيوني
– تدرين شكد احبج؟
ابتسمت خجلانه ودنكت راسي اهزة بـ لا ضحك وباس خدي حيل وجر نفس منه يهمس
– ولا اني ادري.
دخل عزيز للغرفه يركض ويصيح، ابتعد بــرهــوم بسرعه باوعله وكاله
– ها بابا شبيك؟
تحمحمت اعدل كعدتي وهو وكف كدام ابو يسولف ويا
– بااباا توولااث واددف برره وحاط ايده هيج وادف هيج.
ارتاج على الحايط وحط ايده على راسه بضوجه ودنك عود تُــراث هيج واكف
باوعت على بــرهــوم بخوف وهو طفر بسرعه طلع بره
حاولت انزل من الجرباية من خوفي على تُــراث
نزلت
على كيفي، وكمت الزم الحايط وامشي على كيفي
طلعت بره
اسمع صوتهم بالحديقة، فتحت الباب وطلعت اباوع عليّ بقلق
من طلعت باوعلي بسرعه وبـرهوم باوع عليّ هم
بـــراء – تُــرااث شبيك شكوو؟
اجه عليّ بسرعه لزمني من ايدي يحجي عليّ ماقابل اطلع
– شطلعجج انتِ ماا تكليلييي.
– اشووفك، ليش واكف هناا شصار؟
– دطبي اني اسولفلج طبيي.
طببني للهول وطب برهوم وعزيز ورانه، كعدني على للتخم
وكعد بصفي، رفع شعره ليورة يجر نفس واحنه نباوعله منتظرينه يحجي
بــرهـوم – ماتحجيي شبيك شصار هناك؟
تُـــراث – متخربطه بالبيت وماخذينها للمستشفى
طلع عدها فشل كلوي.
شهكت بصدمه وحطيت ايدي على صدري
– يا خطيةة، وتالي؟
– سوولها غسل كلة ومنطيها علاج وادوية وخرجوها للبيت لان صحت وحالتها زينه.
– الحمدلله، الله يشافيها ان شاء الله ماتستاهل والله.
هز راسة ودنك حط راسة بين اديه ورجع رفعه ويتلفت بقهر
بـــراء – شكو تُــراث صار شي هناك؟ شبيك هيج مقهور وضايج؟
تُــــراث – بـــراء، اريد شلال.
عقدت حاجبي مافاهمه وهزيت راسي
– شنو تريدها مافتهمت؟
– ارريدهاا اريدهاا، اريد اتزوجهاا.
دگ كلبي بفرح وضحكت اهز راسي بـ اي بسرعه واضحك
– ايي ايي اخطبهاا الك تُــراث، بس ليش هيجي ضايج شكو؟
– بـــراء شلاال متدمره حيلل والله من اشوف حالتها العن روحي الف مره
ترررجف من تحجيي تررجف وتبجي وشصااير بيهاا
والله يحترگ كلبي من اشوفها هيج.
لزمته من ايده اهدي بي وهو يحجي بقهر روحه طالعه
– هسهه عليمن تصيح شجاك، تصير زينه وترجع مثل قبل واحسن.
– موو بسهوولة بـــراء مااشفتي حالتها بالمستشفى
اريد اضمهاا بكلبي
اريدد احضنهاا وادخلها بنص ضلوعي، بس من اشوفها ترجف من الزمها اشتعلل ناار اريدهاا يمي.
لزمت ايده بين اديه وبـرهـوم كعد بصفه طبطب على ظهره يحاجي
– هاهي نروح كلنه ونخطبها الك وجيبها يمك، عليمن تحرك بگلبك هيج؟
كام وكف يباوع علينه ويحجي ميت قهر
– بــرهـوم، ما تفهمووني، اريدهاا بس خاايف عليهاا ومنهاا والله.
– منن شنوو خاايف شبيكك خبلتنه؟؟
– ماريدد اشووف نظرات اللوم بعيونها امووت والله
ما اتحمل اشوفها تباوعلي بنظره كره ولوم والله اموت.
ردت اكوم تقرب هو صار كدامي، لزمت ايده وجريته
اريد احاجي كعد كدامي مايحط عينه بعيني
حضنت
وجهه بثنين اديه وامسح على شعره واحجي على كيف
– تُــراث، ياروحي انتَ بس اسمعني، هي مو تعرف كلشي؟
– ايي تعررف، سولفتلها كلشي اني!
هزيت راسي بـ اي مبتسمه واحاجي
– خلص بعد، تُــراث انتَ ماتعرف الحديث الي صار بيني وبينها
تتذكر من رحتلها للبيت وسولفت وياها گلت هي تفهمتك وسكتت مو؟
– ايي، تفهمت كلشي يله كدرت تباوع بوجهي.
– تدري قبل لا تعرف كلشي من حجيت وياها اني جانت
تسولف عليك وتبجي، ما تعرف الي صار ولا احد مفهمها
بس تقبلت كلشي وما حجت عليك ولا لامتك بالعكس
تعرف شنو كالت؟
رفع راسة حط عيني بعيني، عيونه حمر ومدمعات والقهر تارس وجهه
هز راسة بـ لا مايعرف، ابتسمت وحركت اصابيعي على خده وهمست
– اسمعها منها احسن.
عقد حاجبة وكام بسرعه يباوعلي
– بـــرااء سولفي شكو شكالت؟؟
ضحكت اهز راسي بـ لا وتجتفت
– ما احجي، بس هي كلمه حلوة، رغم كلشي مسوي بيها وبدون ما تبرر هي ما حجت وسولفت الي بكلبها
لا تضلمها وسوي الي بالك وجيبها يمك بالحلال تُــراث.
هز راسة وكعد على التخم كاله بــرهــوم
– شلون شفتها؟
باوعله دنك باوع للكاع ورجع باوع لـ برهوم كال
– صديقتها خطيبة عمها تصير، مبينه تعرف السالفه كلها
ساعدتني اشوفها وحدنه بالغرفه و..
بعده ماكمل فتحت عيوني خازرته وصحت
– تُــراااث؟؟؟؟؟
التفت بسرعه باوعلي، عض شفته ودنك راسة
– تُــرااث باوعليي طبيتت للغرفه البيهاا نـــهروان وحددكم؟
وصديقتهاا ساعدتك؟؟؟؟؟
هز راسة بـ اي، فتحت عيوني متسودنه هذا يريد يجلطني
– شعندددك تفووت يمهاا شعنددك؟؟؟
– غيرر شفتهااا؟؟؟
– ايي عمهااا موجود وصديقتها واطلب منه وفوت كداامه تحمد الها بالسلامه واطللع شنو وين كاعدين؟
صديقتها تفوتك وانتَ بكل سلاله تفوت وتطلع وعمها مايدري هذاا استهتااار لو مو استهتااار ؟؟؟
غمض عيونه وحط ايده على راسة وبـرهـوم مدنك راسة
ضام ضحكته، باوعله تُــراث وصاح بي
– اضحكك اضحكك طلعهااا.
– بيكك خيرر طلع رووحك.
باوعلي تُــراث شافني بعدنه على خنزورتي دار وجهه على بــرهــوم خازره
كلبت وجهي وهو ضل ساكت مارد عليّ بعد، سمعت صوت
روان تبجي، ردت اكوم كام هو بسرعه راح للغرفه
باوعلي بــرهـوم وتقرب عليّ يهمس
– على كيفج ويا، هو ضايج من نفسه لان مأذيها من تحجين هيج يضوج اكثر.
باوعتله وتنهدت ساكته
طلع تُـــراث شايل روان محللها من گماطها وحاطها بحضنه
وكف كدامي وحطها بحضني يباوعلها بضوجه
– شوفيها فحطت من البجي خاف جوعانه لو بيها شي.
شلتها بخوف اباوعلها تبجي وفحطانه صايره زرگه
وخر من كدامي تُـــراث
وراح ورجع شايل شال بايده شمره عليّ وكعد على التخم
مدنك راسه
حاولت ارضعها بس ماسكتت ضلت تبجي وتصرخ بحضني
خافوا تُـــراث وبــرهــوم عليها حيل، وخرت صدري من حلكها
احرك اصبعي يمها اشوفها جوعانه بس ما تريد
دگ كلبي بخوف
حطيت ايدي على متنها افرك بي صرخت بصوت عرفتها ممتونه
تُـــراث – شكوو شبيهاا تبجيي؟؟ اخذهاا للمستشفى؟؟؟
بــــراء – لا، ممتونه.
بــرهـوم – هاي مثل من صارت مره بعزيز؟؟
– اي، هسه امتنها، بس اريد زيت زيتون والگماط مالتها.
كاموا ثنينهم تُـــراث جاب الگماط وبـرهـوم جاب زيت الزيتون
مديت رجلية على التخم وهي بحضني تصرخ وتبجي فحطت بنيتي صارت زرگه
نزعتها ملابسها ونيمتها على بطنها بحضني وخليت شوية زيت
فركت متنها صارت تصرخ اكثر وتُـــراث يصيح فوك راسي
– خاااب مو هيجج راح تمووت الطفلةة بـرااء على كيفجج.
– غيرر امتنهاا تُـــراث شبيك.
– لعدد هيج خطيةة على كيفجج.
فركت ظهرها وكلبتها على ظهره رجعت فركتها من يم صدرها
جريت رجلها اليسره وايدها اليمنه اطخن وحده بوحده
دفعني تُـــراث وشالها من حضني يصيح متخبل
– طااحظظج هو هيجج خلعتيي البنيةة شعرفجج بالمتنن انتِ.
يهز بيها ويسمي عليها واني صافنه عليّ وهي تبجي
بــرهـوم – ولكك مطيي رجعهاا مره عزيز هيج صار بي ومن سوتله هيج صار زين وسكتت رجعهاا.
– خااب دنجببب هو هيج.
بــــراء – تُـــراث انطينها والله هسه تشوفها من اكمل الها تسكت.
– وخرري هسه اخذهاا للمستشفى اخليهاا بايدج انييي.
– والله تسكتتت اذا ماسكتت اخذهاا بس انطينهاا كلبها تعب سوده عليه.
تأفأف ويستغفر وكلساع يريد يحجي، حطها بحضني ورجع ليورة
اخذتها منه ورجعت عدت المساج الها جريت رجلها اليسره
واديها اليمنه وعدت نفس الحركه بالرجل اليمنه والايد اليسرة
بعدين گلبتها وعدت نفس الحركه بس من ورا وتُـــراث
واكف فوك راسي يصيح ويسب ويغلط علينه اني وبـرهوم
وبـرهـوم يضحك عليّ، اخذت الگماط گمطتها وشلتها
حطيتها على راسي احني ظهرها ورجعت نزلتها حطيتها
على رجلية ودعبلتها لجوة ورجعت عدت نفس الحركه
ضبيت الگماط من يم صدرها خنست بحضني سكتت
بس شهگتها ضلت مجلبة، غطيت نفسي بالشال ورضعتها
سكتت وكامت ترضع، جريت نفس اباوع لـ تُـــراث
يباوعلي صفح ويدردم
– وعاابتت لهلل وجهه هذاا يا مطييي گلج سووي هيج؟؟
مرمطتييي البنيةة لعبتيي بيهاا جولةة ساعه تحطهاا على راسها ساعده تدعبلهاا تخبلتيي؟؟
بــــراء – ياا تُـــراث شجاك، غيرر تعلمت هااي الشغله من الدكتورة للمتن.
– هااي يا دكتورة كالتلج سوي هيج؟ اريد اجيبهااا وازرـ*ـب على شهادتهاااا.
– يااا شجااك، هي مو دكتوورة مره جبيرة تشتغل بالمستشفى
من شافت عزيز جان يبجي علمتني على هاي الحركات تكلي يصير الطفل زين ويسكت اذا ممتون هيج يطيب المتن.
هز بأيده مستهزء واني ساكته متحمله يتخبل من هيج شغلات
ويضل يستهزء بيهن، مره عيون عزيز طلعت بيهن حباية جبيرة بالجفن
فـ اعرف اذا طلعت هيجي شي بعيون طفل نحط جاي بعينه تصير زينه
سويتها مره كدامه تخبل لعب بينه طووبة من طابت عين عزيز يله سكت
هنه صح سوالف العقل ما يتوقعهن بس صدگ سوالف نسوان قبل تفيد
كام هو طب للغرفه وسد الباب باوعت على بــرهـوم اضحك
– غير احب سوالفه من يخاف على الجهال.
– يا سوالف غير تخبل.
– ههههههه لاا مو تخبل بــرهـوم، بس هو من يخاف على احد
يعبر بالغلط تعبيراااته مختلفه ماشاء الله.
ضحك وكام صاح لعزيز، اجاه عزيز يركض شاله وباسه كال
– راح اخذ عزيز اجيبلكم عشة من بره واجي.
– عليمن بــرهـوم مايسوى، يوميه اكل من بره هسه اكوم احمي هذا الجابة تُـــراث خير من الله حرامات ينترك وينذب.
هز راسة وكال
– خوش هسه اشوفة واحمي.
راح للمطبخ يشوف الاكل، شوية واجه كال
– صدك هذا هواي ما اكلنه منه قليل بس اني وياج
راح احمي واجيبة.
هزيت راسي وهو راح حما وصب كلشي وجابه واجه
نزلت روان بصفي على التخم، كعد عزيز بصفي وبرهوم راح صاح لـ تُـــراث واجه
كعدنه نتعشة وتُــراث اكل وكمل وكام غسل ورجع كعد
بعدني اوكل بعزيز كال تُـــراث
– بــــراء.
رفعت راسي باوعتله
– هاا عيني؟
– بس تصيرين زينه اخذج ونروح نخـطب شلال.
باوعتله والتفتت اباوع على بــرهـوم ابتسم بــرهـوم
ورفع تك حاجب متعجب بكلامه كاله
– متأكد؟
– اكيد!! مايرادلها سؤال، ننتظر كم يوم بس تصير بــــراء زينه
اخذها ونروح نخطبها رسمي، كافي تعبت اني وهي تعبت رواحنه طلعت ثنينه!
بــــراء – لا هاهي ميخالف بعيوني، اروح وياك نخطبها
واني من هسه ضامنه موافقتها من هسه.
هز راسة وكام كال
– راح اخذ الجاي وارجع للغرفه.
باوعلي بــرهـوم مبتسم وكال
– ايي الله يسهل ان شاء الله.
ضحكت وباوعتله بشك
– شبيك بــرهـوم؟؟
ضحك وهز راسة بـ مابية شي
– لعد ليش تضحك؟
– اضحك على سوالف اخوج، صارله اشهر ملوع روحه
هسه يله صحة شكد مطي.
هزيت راسي اضحك، كام هو وشال الاكل وصب جاي اله
عزيز ركض للمطبخ يصيح
– سوف اغسل يدي وانام.
باوعت على بــرهـوم وكتله اسمع عزيز
– بــرهـوم ترى عزيزز مايسمع الكلاام بسبب افلام الكارتون
لازم نااخذ التلفونه ونمنعه من التلفون.
عقد حاجبة يضحك ودنك عليّ يهمس
– شبي عزيز؟
– اسمع اسمع.
اجه يركض عزيز ويصيح
– لاا ابيي اناا امزززح.
ضحك بــرهـوم وجره لحضنه يبوس بي ويضحك
– ولك شنوو هااي ليش تعب ماماا هاا؟ ليش تعبهاا سرسرري.
عـزيـز – بااباا مامثوي شي والله بث احجي هيش هي تثيح عليّ.
– اي ويا ماما تحجي عدل واسمع كلامها ترى ماما عصبية واذا عصبت عليك تصيح عليك وتزعل منك ما تحبك بعد.
عقد حاجبة وباوعلي يتأكد من صحة كلام ابو
هزيت راسي بـ اي وهو ابتسم بسرعه يكول
– لا لا بعد ما اسوي هيش والله.
ضحك بــرهـوم وباسه حيل يضحك على سوالفه يكله
– دخيلل رب الـ هيشش اني اروح فدوة للمايعرف يسولف.
ضحكت عليهم وكتله
– صدك خبلني بسوالف، يعني الـ زاي مايعرف يلفظة يلفظ بمكانه الـ ذال والكلمة البيها حرف الشين يلفظها سين والـ سين يلفظة عدل بس يشمر الاحرف منا ومنا بس الكلمة البيها حرف الـ سـ يلفظة ثاء.
ضحك وباسه بخده حيل وكال
– وليدددي هذاا بعدد اروحله فدووة.
ضحكت وكمت على كيفي وشلت روان وياي ضلوا هم بالهول
يسولفون ويضحك على سوالف عزيز، غيرت لـ روان
ورضعتها ونيمتها، مابجت هواي الحمدلله تحسن المتن
هاي بسبب الشيل واكيد تُـــراث بس ماكدر احجي كدامه
لان هو شيلها عبالك ولد بحضنه وهي ناعمه حيل ومحلله ما تتحمل بس مستحيل اكدر اكله لا تشيلها او مايصير ماكدر
نامت روان واجه بــرهـوم شايل عزيز نايم بحضنه
خلاهم كلمن بفراشة
واجه تمدد، وطبعًا بعيد عني وبدون ما يلمسني
لان
جسمي كله يحركني بسبب الحرك وهو يخاف عليّ
مايكدر يلزمني
باوعتله دار وجهه ونام، ضحكت ونزلت روحي اني ونمت هم
مرن كم يوم وصدگ تُـــراث انتظرني اصير زينه
من صرت
احسن الحرك ما طاب كلش بس كدرت اكوم واكعد واتحرك
صرت احسن، تُـــراث من شاف حركتي زينه حدد يوم
نروح بي الهم، وبس حظرنه نفسنه طلعنه ورحنه لبيتهم
وصلنه وتُــراث مبتسم فرحانه وهو ومتحمس وبرهوم يضحك عليّ
دگ باب بيتهم واجنه صوت رجال يصيح
– اجيتت اجيتتت.
فتح الباب النه رجال طويل وابيض وعيونه زرگ
عرفت هو هذا عمها
رجعت ليورة اني بسرعه وهو باوعلنه مستغرب والصدمه اكثر هو جواب تُـــراث اله
– ابو عيون الزرگ جايينكم خطابة.
انصدم وضل يباوعلنه، كال بــرهـوم
– احمم، احنه عائلة تُـــراث.
هز راسة بـ اي وتحمحم، رجع ليورة وفتح الباب وكال
– تفضلوا تفضلوا.
دخلنه للبيت والمح احد فات من كدام الباب يركض
ابتسمت ودخلت وراهم
دخلنه لبيتهم ومتوتره حيل اكثر من تُـــراث
دخل
عمها الاسمه بــارون كعد كدامنه وصافن حسيته يريد يحجي بس حاير شيحجي فـ بدة بــرهـوم بالموضوع
– الله بالخير خوية.
بــارون – الله بالخير والعافية.
التفت على ولد صغير كاعد بصفه وكاله
– كوم عمو جيب مي وتعال.
هز راسة وكام
بــرهـوم – اني اصير رجل اخته لـ تُـــراث وصاحبه من الصغر
بمثابة اخو يعني، والمره اخت تُـــراث.
هز راسة وكال
– اهلا وسهلا بيكم تشرفت.
تُـــراث – بــرهـوم لا تطولها.
باوع عمها بطرف عينه احسه يريد يكوم يخنگه
اجه الولد جايب مي قدلمنه مبتسم وكعد بصف عمه
كلهم صافنين ومتوترين وكلساع واحد منهم يشمرله كلمه بمكان
توقعت امها يمها او اي مره حتى احاجيها اني ما توقعت
بس عمها موجود بالبيت، راد يحجي بــرهـوم والتفتنه كلنه على صوت نــهروان من ورانه
– سلااام.
كمنه كلنه بسرعه، اجت الضحكه شاگه حلكها ولابسة حجاب وفستان طالعه حلوة باوعتلي وضحكت
تقربت حضنتني حيل وتضحك
– عززة بــــراااء حبيبتيي.
– ياعمرري شلوونج نــهروان.
ابتعدت مبتسمه هزت راسها وتضحك
– ززينه وانتِ شلوونج؟؟ مشتاقتلج ههههههه.
ضحكت على ضحكتها
– الحمدلله.
ابتعدت وباوعت على بــرهـوم وتُــراث وكالت
– هلوو، شلوونك بــرهـوم.
ابتسم بــرهـوم وهز راسة
– بخير، الحمدلله على سلامتج.
هزت راسها مبتسمه وتضحك وباوعت على تُـــراث راحت ضحكتها
باوعت على عمها العاقد حاجبة ضايج
راحت وگفت يمه واشرت علينه مرتبكت كالت
– بـ بـارون تتذكر من كتلك ضليت يم عالم ساعدوني من انخطفت؟
هم هذولة، تُـــراث اخذني يم اهله، يعني همه اخته ورجلها.
ابتسم عمها وباوع علينه كال
– صح، سولفتلي روان عليكم ماقصرتوا وياها مشكورين.
بــرهـوم – لا لا بالعكس واجبنه هذا والله حالها حل
كل بنية جانت موجوده بهذاك المكان سوينه واجبنه لا اكثر.
هز راسة واشرلنه
– اكعدوا اكعدوا تفضلوا.
كعدنه وهي كعدت يم عمها، باوعت على روان بحضني كالت مبتسمه
– بنتج؟
هزيت راسي وهي كامت كعدت بصفي دنكت باستها تضحك بهمس
– فدووة شكد حلوة.
ابتسمت ودنكت عليها
– كومي خل نكوم منا بسرعه.
باوعتلي وهزت راسها، كامت وكالت تسمعهم
– تعاي هنا بــــراء.
هزيت راسي وكمت وياها، شلت روان وعدلت عباتي
دخلت للغرفه وهي سدت الباب وحطت اديها على حلكها تريد تصرخ
ضحكت ونزلت روان من حضني، تقربت حضنتني حيل
حضنتها اضحك وهي تكمز كدامي عبالك طفله وتهمس
– السمعته صدكك؟؟؟
– هههههه بس اهدي شنو شسمعتي؟
– رااح تخطبووني؟؟
– ههههههه اييي، بس شوو مدري شلونهم كلهم يتصفنون حتى تُـــراث اول مره اشوفة متوتر لهل درجه.
ضحكت فرحانه خلت كلبي يرتاح بفرحتها يعني مستحيل
ترفض، واعرف نــهروان تحب تُـــراث مثل ما هو يحبها
ارتاحيت حيل اخيرًا راح يرتاح اخوية ويا الشخص المُناسب اله
كعدت على جربايتها وهي كعدت كدام روان وتبوس بيها
– ياروحـي، فدووة اروحلج حبيبتي روانه؟ ياعمرري صغيرونه حيل بـــراء.
ضحكت وهزيت راسي
– مو هي اجت قبل شهرها وبعدها ما طالعه الاربعين لهل سبب تشوفيها ناعمه.
– بس حليوة فدوة ماشاء الله.
رفعت راسها باوعتلي وعضت شفتها
– زين، شراح يصير هسه؟
– والله مادري توقعت امج يمج بالبيت او اي مره عدكم اطلبج منها
ماتوقعت بس انتِ وعمج لو ادري اخلي بس همه يجون عليكم.
رفعت اديها بمعنى لا تهتمين وكالت مبتسمه
– اووو، لا يمعوده بالعكس همزين اجيتي مشتاقتلج هواي.
ابتسمت حضنتها اضحك
– ياحبيبتي.
مديت ايدي حطيتها على جهة كليتها، رفعت راسها بلعت ريگها وباوعتلي
بـــراء – شلون صارت كليتج؟ بعدها تأذيج؟
– لا الحمدلله احسن، بفضل الله وبــارون صرت احسن
ما اكلج طبت كلش بس احسن من قبل بهواي جنت ما اكدر اتحرك خطوة جسمي خامل واتعب بسرعه
بس هسه احسن الحمدلله.
– ان شاء الله احسن.
” غـيـد ”
واكفات نلبش شالاتنه وماما تنتظرنه بالباب، لفيناهن بسرعه
وطلعنه من البيت رايحين لبيت شمشون، نريد نتطمن عليها
خابرت ماما على امها وشكد حجت وياها وهي تبجي
متعاركه ويا رجبها ومايخليها تجي بس هي عناد بي
مأجره تكسي وجايه وحدها تريد تشوف شمشون
مرات انقهر عليها
تحب رجلها حيل وهو يحبها هم بس يكره شمشون
لان تتعارك ويا
وتغلط وهواي تتجاوز عليّ وهو يسكت علمود خاله ازدهار
لان مايريدها تضوج فـ ما يجي ومايريد يجيبها حتى يتجنب يتعارك وياها
وكفنه بالباب ننتظرها شوية وطبكت السيارة كدام بيتنه
نزلت من سيارة التكسي لابسة بنطرون عريض اسود وهي
جسمها رشيق ولابسة قميص زيتوتي طويل وعايفه
شعرها مفتوح مجرد حاطه قراصة بالوسط ومامخليه ميكب
بس وجها احمر مبينه باجية، خرب خاله ازدهار دخلت الاربعينات واني بالعشرينات؟
حاسبت ابو التسكي ونزلت جنطتها
مشة ابو التكسي
رحنه سلمنه عليها وماما تسألها وتطمن عليها خاف مسويلها شي
ازدهــار – لا ماسوع بس يكلي ما اخذج لبنتج وما اريد اشوفها
ضليت اتعارك ويا وتزاعلنه وعفته واجيت اشوفها
هواي مقصره وياها كلش هواي.
دنكت تتحسر وماما تهدي بيها، بعدنه واكفين بالشارع
وكفت سياره كدامنه، باوعنه مستغربات منو هذا؟
شوية
وصفنت من عرفتها سيارة هُــمام، طبكها يم باب بيتنه
ونزل من عدها يمشي كوة مبين مريض، ابتسم من شافنه واجه علينه سلم وكال
– هاي وين رايحات؟
مـريـم – رايحات نشوف شمشون شلون صارت.
ابتسم وهز راسة واشر بايده
– اي يله وياچن لعد.
اباوعله مقهوره حيل عليّ، مايستاهل هُــمام يتأذة هيج
جريت حسره ومشينه ويا كلنه، وصلنه لبيت شمشون
شفنه سيارة باب بيتهم، باوعتلها وركزت زين
فتحت عيوني
مصدومه من تذكرت هاي سيارة تُـــراث!!!
باوعنه اني ومـريـم وحده على الثانية بصدمه وهمه كملوا مشيهم عبالهم السياره مو الهم
دخيلك ياعلي شلون ثنين راح يتلاگون يمهه
جسمي
كام يرجف واني مالي شغل، الله يساعدج شمشون
فتحت الباب خاله
ازدهار وفاتت فتنه كلنه وراها واني ومـريـم نتلفت بخوف
دخلنه كلنه للهول وانصدمنه من شفنه الموجودين!
جانوا
تُـــراث ويا بعد رجال ومره بحضنها طفله ونـهروان
كاعده بصفهم
كاموا كلهم من دخلنه وشمشون من شافنته ضحكت
وركضت على امها حضنتها حيل وخاله تبجي
– ماما نــهروان بنيتي حبيبتي.
– يماماا مشتاقتلج.
ابتعدت تسمح دموع خاله، سلمت علينه ومبينه فرحانه
وكفنه كلنه بالهول صار المكان ضيگ لان واكفات كلنه باب الهول
دخلنه لجوة وهي وكفت تعرفنه عليهم وتعرفهم علينه
كامت خاله ازدهار تتشكرهم وهمه يردون عليها مبتسمين
كعدنه كلنه بالهول دخل هُــمام جان واكف ورانه
باوعله تُـــراث مستغرب
وبــارون دار وجهه على الحايط يهمس بقلة صبر
– كملت السبحه.
تحمحمت نــهروان واشرت على هُــمام وكالت مبتسمه
– هذا هُــمام زميلي جان وياي بالكلية، و..
كالتها وسكتت، ابتسم هو وكمل بدالها
– خطيبها .
باوعوا همه كلهم بصدمه لدرجه كل احنه خفنه من رد فعلهم
عضيت شفتي ارجف من يمي يا حظج يا شمشون
شلون
راح تخلصين نفسج من هاي الورطه، كال بــارون بسرعه
– جان، بس ماكوا نصيب كلشي قسمه ونصيب بعد.
باوعوا عليّ تُـــراث والرجال الاسمه بــرهــوم عرفنه
هذا رجل اخته واخته المره الي جايه وياهم
باوعله
بنظره حاده ودار وجهه بسرعه وهُـمام باوع لـ بـــارون ودنك راسة مقهور
كامت ماما من شافت
الاجواء متوتره كلش يمهم وكلها تشمر نظرات استغراب واساله
مـامـا – يله يمه احنه نترخص نجي بغير وقت ان شاء الله، عندج العافية يمه نــهروان.
كامت ويانه نــهروان تحجي بسرعه
– الله يعافيج حبيبتي.
طلعنه ويا ماما وهي اجت ويانه، طلعت ماما وياها مريم من البيت
وكفت بالحديقة، اجت شمشون تلطم على وجها بهمس وتحجي
– شيخلصنيي انيي بعد شيخلصنييي.
– اشش اششش اسكتي هسه من نطلع حاولي تسدين السالفه منا منااا وبــارون وياج.
– شيسدهاا ولج، كاعدين ثنينهم واحد كبال الثاني
والخزرات وعود محد يعرف الثاني.
– دروحي لحكيي احنه رايحين من يرحون دكلي سولفيليي.
– ايي الله ويااج.
” نــهروان ”
سديت الباب وراها وكفت اجر نفس بالحديقة وايدي على كلبي
– اشش اهدي شمشون تنحل! هسه يروح هُــمام
وتحجي بـــراء
ويا ماما وتخلص السالفه وكأن شيً لم يكن!
دخلت للهول مبتسمه واعدل بحجابي كال تُـــراث
يحجي ويا ماما
– يعني انتِ ام شلال؟
باوعوله كلهم مستغربين وبـرهـوم شرگ يكح حاصرته الضحكه
دنكت راسي اشرد عيوني من بــارون
مافهمت ماما كلامه كالت
– يا شلال؟
– العفوا، اقصد نــهروان بنتج غير؟
– اي بنتي.
هز راسة وكاللها مبتسم
– طلعت السالفه وراثة.
عقدت حاجبها ما فاهمه وهُــمام باوعلي بسرعه ورجع باوعله خازره
بــارون كاعد على اعصابه وهو يباوعلهم، مد ايده بــرهــوم
كرص تُـــراث من رجله وهمس بس اني لان قريبة عليهم سمعته يكله
– الزم روحك مو ربعك هذوول.
باوعله تُـــراث ومثل الي حس، كام وكف واشر لـ بــارون وهُــمام
– خل نطلع بره نحجي مو مال نكعد يم النسوان.
كام بــارون بسرعه
وكاموا هُــمام وبـرهـوم وسيف ، طلعوا من الهول للحديقة
وطلعوا للشارع
جريت نفس وباوعت على بـــراء مبتسمه، كالت بـــراء لـ ماما
– ماشاء الله خاله، صدگ نــهروان طالعه عليج نسخه مصغره منج.
ابتسمت ماما وباوعتلي ورجعت باوعتلها
– عمري انتِ، نــهروان صح تشبهني بس هي تنطي شبيه لبيت جدها اكثر
يعني لو تشوفين عمتها العيون نفس الشي.
– ايي العيون وراثه من دخلت انتبهت عمها واخوها عيونهم ملونه ماشاء الله.
ابتسمت ماما، باوعتلي بـــراء وهزت راسها بمعنى احجي؟
اشرتلها بمعنى ما ادري، جرت نفس وباوعت على ماما وكالت الها
– والله يا خاله ليش اجذب عليج، سالفة اجينه نتطمن على نــهروان
هاي حجه، احنه اجينه نطلب اديها لاخوي تُـــراث
على سنة الله ورسوله.
عقدت حاجبها ماما وكالت الها
– شلون يعني ما افتهمت؟
باوعتلي مستغربه واني اكل بشفتي خجلانه، كالت الها بـــراء
– اعرف السالفه شوية غريبة، بس خاله نــهروان من عاشت يمنه
الله شاهد وهاي اسأليها ما حسسناها بشي ولا ضايقناها
وحتى اخوي تُـــراث رغم هو جان يمها بالشقه بس من دخلت بيتي
اذا تُـــراث باليمين نــهروان باليسار، واخوية حالف لو نــهروان لو مايريد ودگ رجل ترحون تخطبوها الي.
باوعت على ماما خطيه ما متعلمه احد يخطب منها
ابتسمت الها وكالت
– واضح من جيتكم لهنا نيتكم وياها مو سوء بس والله
اتمنى اكدر اكلج موافقة بس مالي حق، صح اني امها
بس عمها بــارون اولى بالجواب مني هو ابوها وامها واخوها وعمها ماكدر اتخذ قرار بدون ما يوافق هو من بعد قرارها هي طبعًا.
ابتسمت فرحانه بردها وهزت راسها مبتسمه
– صح، كلامج صحيح خالتي بس انتِ امها اكيد
لازم
تنصحيها وتعلميها تختار وتقرر صح.
هزت راسها ماما وباوعتلي شافتني مبتسمه وفرحانه والخجل ماخذني كالت
– مايحتاج اقرر اني.
باوعتلي بـــراء مبتسمه، التفتنه على ماما من كالت
– منو من البره تُـــراث ما انتهبت عليهم؟ الابيض؟
ضحكت بـــراء تهز راسها
– لا هذا رجلي، اخوي تُـــراث الولد الاسمر الطويل.
رفعت حاجبها ماما وضحكت
– ماشاء الله عليّ، اول ماشفته ومن طريقة كلامه
مبين جاي واثق ياخذها.
– ههههههه يعجبج تُـــراث.
شفت من الشباك باب الشارع انفتح وصوتهم يسولفون بصوت عالي
خفت بس لا صارت مشكله، كمت بسرعه فتحت الباب
مال الهول اباوعلهم واكفين بالحديقة مبينين يردون يطبون توهم
فاتوا كلهم للحديقة وبــارون يكول لـ هُــمام
– اي مبين عليك مصخن، اول ما طبيت شفت عيونك حمر صايرات.
هُــمام – كلش قوية، انوب دگ بالعظم ماخلت بية.
– هسه اشوفلك نــهروان عدها خافض حراره.
باوعلهم تُـــراث صفح وباوعلي من شافني واكفه بالباب
خنزر ما عاجبة وفات للهول من يمي وهمس يسمعني
– انطي خافض گـوا**، احسن.
فتحت عيوني اباوعله وهو فات، دخلوا ورا كلهم
ضلوا واكفين
ومبين ماحجوا بموضوع الخطوبة بـره كدام هُــمام
باوعلي بـــارون وكال
– نـــهروان بوية، اكوا خافض حرارة؟
باوعت على تُــراث رأسًا خزرني يهز راسة بـ لا، التفتت على بـــارون وهزيت راسي
– لا ماعدنه.
ابتسم هُــمام ورفع ايده فرك عيونه كال
– يله ميخالف هسه من اطلع منا اروح للصيدلية واخذ علاج.
ابتسم تُــراث ورفعلي حاجبة،
اشر الهم بــرهــوم يمعنى يله كامت بـــراء تعدل عباتها
وبـرهـوم كال
– تشرفنه كلش بمعرفتكم أخ بــارون.
– اهلا وسهلا بيكم بكل وقت.
طلعوا من الهول وتُـــراث كالب وجهه مايريد يطلع احسه
باوعت على بــارون شفته كعد وهُــمام كعد كدامه على القنفه
وسيف كعد يم ماما يسلم عليها، طلعت بسرعه وراهم
شفتهم راحوا صعدوا بس تُـــراث ضال واكفلي بالباب
ابتسمت من شفته، حضنت الباب وراتاجيت عليها
وهو ابتسم وراحت ضوجته، حط ايده على الحايط مرتاج
ودنك راسة عليّ يهمس
– وافقي بسرعه، حضني بارد شلال.
خزرته ورجعت ليورة مبتسمه بخجل وهو ضحك وبعدين عقد حاجبة وكلب وجهه
– عندي سالفه طويلة اوصل واتصل عليج ردي لا تغلسين.
وقبل لا يسمع جوابي راح من صاحله بــرهــوم
صعد
بالسيارة، حرك السيارة بسرعه ومشة، سديت الباب
وطبيت للهول
كعدت يمهم يسولفون بغير موضوع من شافوني كال هُــمام
– نــهروان، شو ما ارتاحتلهم هذولة؟ خاصه هذا الاسمه تُـــراث
احسه ملعب وماعرف شي مو راحه يباوعلي بنظرات
اليشوفه يكول كاتل اهله.
باوعت على بــارون باوعلي بنظره طويلة واحسها تكلي
– شوفي شراح يصير بسببج.
واني باوعتله بنظره تكول
– مايهمني الراح يصير اهمشي اصير للشخص الاحبه وهو يصير الي!!
كعدت على القنفة وكتله
– بالعكس، مابي شي بس هو هيج نظراته يعني جان يشتغل
ويا المجرمين طبعا هيج تكون نظراته توتر شوية.
هز راسه يضحك كال
– شووف بــارون نــهروان صايرة سباعيه وتميز بالنظرات.
– لا مو كل النظرات بس نظرة تُـــراث.
باوعلي هُــمام بسرعه عيونه الحمر التعبانه تتنقل
بين نظرات عيوني
الي كلهن فرح وسعاده انُ الي بالي راح يصير اخيرًا!!
نزلت عيوني من عيونه بتوتر وهو كام بسرعه كال يغير الموضوع
– ردنه نجي كلنه نسويلج مفاجأة بس الشله صار عدهم ظرف
كلت امر على غيد ومريم اجيبهن ونجي عليج نشوفج شلون صرتي.
– لا الحمدلله احسن حالتي.
هز راسة ودنك شال تلفونه حطه بجيبة وباوعلي بحيره وكال
– يله اني رايح، تضل يمج العافية روان.
– الله يعافيك هُمهم.
ابتسم بهدوء وطلع
بس طلع سديت الباب ورجع دخلت للهول، باوعلي بــارون وكال بعصبية
– شجاااي يصيررر روااان!!!!
نــهروان – ماعرررف والله ماجان عندي أي علم بالموضوع!
باوعتلنه ماما مستغربة وكالت
– شكوو؟ بــارون شصاير ليش تصيح عليها؟
باوعلها ورجع باوعلي وهز راسة مستهزء
– حليهاا، هذاا هُــمام حاالف مايعوفج وتُـــراث يفتر وراانه
واني عبالك شاد گروون كلشي مااكدرر احجي ولاا اكدر اصخم
رأسًاا تبجين وتمووتين رووحج واني مااكل خررا غصبًاا عليّ!!
نــهروان – شعلية انيي بــارون! اني گلتت لـ هُــمام تعاال حبني؟؟
تصررفت وياا مثل أي زميلل جاان وياي بالكليةة
شسويلةة اذا هو بنه أماله على لاا شيء!
– وهذااا تُـــراث شسويللةة بالله؟؟؟
– موو كلتت موافقق! انتَ كتليي موافق بــارون شتغيرر هسه!
وشفتهم من طبوا اخته ورجلهاا عيونهم ما شالوها ومابيهم شي ينعاب ليشش لهل درجه صااير عصبيي على شي مايسوى!
كعد على التخم يفرك براسة ورجع باوعلي يحجي بتعب
– نــهروان، اني ماعندي مشكله ويا احد وبالعكس
مبينين خووش ناس، بس اني مشكلتي هي تُـــراث
ولج والله مو بيدي
من اتذكر الشغلات المسويها اخاف عليج منه اني شعندي غيرج مضحي بيج!
بنت اخوي وبنتي واختي الصغيره انتِ اريدج الشي الزين واريدلج الراحه ماريدج تتعذبين
من اشوفه احسج راح تعبين وياا وراح يعذبج وانتِ
مريضه اخاف اقل عركه بيناتكم تروحين بيهاا واني بهذاك الوقت اكعد الطم يفيدني الندم بعدين؟؟
تنهدت كلامه صحيح، رغم اعرف تُـــراث بس هو مايعرفه
يحجي من وجهة نظره يحجي كَـ عم وكَـ اب واخ خايف
مشيت كعدت بصفه وضميت روحي بحضنه تنهد حاضني حيل ويمسح على ظهري
– والله اريدج ترتاحين وبس مايهمني اي شي ثاني.
– راحتي ويا تُـــراث بــارون.
ابتعد يباوعلي وهز راسه بـ اي وكال بتنهيده
– خلص، هذا هو اذا انتِ موافقة اكيد انتِ اعرف
بيهم
اذا تشوفين هو الشخص الممكن ترتاحين ويا وتعيشين مرتاحه وسعيده ويا خلص، اني موافق مستحيل
اوكف بوجه سعادتج رواني خلي هذا الشي دائمًا بالج.
ابتسمت وحضنته اكثر، ابتعدت من حضنه من كالت ماما
– وهُــمام؟؟
باوعنه اني وبــارون واحد على الثاني، باوعتلها وهزيت راسي
– كلمن ونصيبة ماما واني مو نصيب هُــمام!
بــارون – مالنه دخل بـ هُــمام، ماله الحق يحجي
خطب
ورفضنه وانتهى كلشي ماكو داعي نحط سيرته بكل شي
انتهت سالفته كلشي قسمه ونصيب بعد.
هزت راسها ساكته كاللها
– منو جابج؟
– اجيت تكسي.
نــهروان – ليش؟ شعجب فـراس وين لعد؟ شلون يخليج تجين وحدج؟
– ماقبل يجيبني، واني ماكدر ما اجي اشوفج.
ابتسمت ورحت كعدت يمها
حضنتني حيل وباستني بخدي، باوعتلها مبينه ضايجه من شي
نــهروان – ماما، شنو متعاركه انتِ وفـراس؟
– لا ماما.
– مااماا متعاركين مو؟؟ مسويللج شيي؟ احجيي ماماا والله اطيح حظظة لو مسويلج شي احجيي؟؟
– لا حبيبتي ماما ما مسوي شي، كتلج ماقبل يجيبني
لان طيبة مريضة بس خليته يمها واجيت اشوفج.
هزيت راسي ساكته وهو كامت وكالت
– خل اخذ الجنطه للغرفه.
دخلت جنطتها للغرفه واجت مغيره ملابسها لابسة لبس بيت
ازدهــار – هسه شنو يعني موافقين على الخطوبة؟؟
كام بــارون يعدل بالطرف مال رجله وكال
– اي، بس لحد تحجي كلمه هسه ولا تردن خبر خليها كم يوم يله.
هزت راسها ماما وكالتله
– ميخالف، واصلا اني مطولة هنا اريد ادير بالي على بنتي واعوضها.
ابتسمت الها وبــارون رفع حاجبة وهز راسة اخذ تلفونه
وكال
– رايح للشغل اني ويمكن اتأخر لان مارحت من وكت.
هزيت راسي وهو طلع من البيت
كامت ماما كالت
– اكوم اشوف شسويلج اكل.
نــهروان – لا ماما اني اسوي.
– لا حبيبتي اكعدي اني اسويلج.
راحت بجهة المطبخ، مبينه مقهورة وضايجه انقهرت عليها
ادري بيهل تحب فـراس حيل بس اني اكرهه حيل وهو هم يكرهني وما نتراهم اذا اجه لازم نتعارك وهي ماتجي علمود هذا السبب
بس والله مو بيدي من اشوفه اتمنى اخنگه بثنين اديه واخلص منه
حسيت بسيف كعد بصفي، التفتت عليّ باوعلي وكال مبتسم
– جهال هاي المره حلوين.
هزيت راسي بـ اي الضحكه شاگه حلكي
– ايي الولد اسمه عزيز والبنية روان.
– هههههه مثل اسمج.
– ايي يعني تقريبًا قريب عليّ.
صفن وكال بأبتسامه
– الطفله البحضن المره حلوة.
ضحكت عليّ وهو كال
– والله حلوة، ردت اشيلها بس استحيت والله شلون حلوة عبالك لعابه.
– من يجون مره ثانية اخذها منها واخليك تشيلها.
ابتسم ساكت
كمت من يمه غيرت ملابسي لبست تراك بيت نص ردن
يله ارتاحيت الحجاب وللثوب ضايقني، كعدت على
الجرباية
افتح بشعري وانثر بي على جتفي اباوعله مبتسه فرحانه لان طولان
انفتح باب غرفتي، رفعت راسي شفته سيف شايل العلاج وكلاص مي
– هذا علاجج نونه ما اخذتي.
هزيت راسي مبتسمه، اخذته من عنده شربت العلاج وهو طلع وسد الباب
كمت من دك تلفوني على الميز، شلته شفته تُــراث يتصل
عضيت شفتي اضحك، مددت على الجرباية اباوع على اسمه
ارد لو لا؟ ابتسمت بخبث ومارديت، خلصت المكالمه
ورجع اتصل مره ثانية، هم ما رديت رجع اتصل لحد ما صارن خمس مكالمات
انقهرت عليّ، خطية خاف تعب چـؤؤ
بس اتصل فتحت خط عليّ اجاني صوته يرعد
– وووين جنتتيييي مو صاارليي ساعه ادگ عليج؟؟؟؟
موو كتللج من ادگ رددي بسااع حيواانه انتِ؟؟
– حمسس حمسك ليشش تصيحح عليةة؟؟
– اخخخ، ولج رااسي رااد ينجفرر وعلي الف فكرره اجت بالليي
ساعه اكوول خاف عمهاا سوالها شيي ورانه ساعه خاف تعاركوا وتخربطت هوو هييج شلااال برربج!!
سكتت عاضة اصبعي، همست
– اسفه مو قصدي.
– ااخخ.
– شبيك؟؟
– كلبي.
– شبي كلبك؟
– كلب ابن الكلب.
– هههههه ليش؟
– ما ينطيني اضوجج، لا تعتذرين فدوة الج راسي وكلبي وتُــراث كله يروحلج فددوة.
ابتسمت ساكته ومدنكه راسي سرحانه بكلامه ومبتسمه بفرح
وبعدني مندمجه كال بجدية
– شلال.
– هاا؟
– هذاا هُــمام شجان يمضـ*ـرط هناك؟
– شنو شحجه؟
– شنوو يكول خطيبها؟ وروح بنتي ردت اكوم اسحگ رااسة
شنوو يحجيهاا هيج كداامنه؟؟ هذاا كدام ياهو الجانن وكال هيججج؟
عضيت شفتي هذا الخايفه منه ماردته يدري بسالفة هُــمام بس بعد ماكدر اضم عليّ
– تُــراث، بوقت ما جنت انتَ بالغيبوبة، اني جنت منهارة
حيل ومخنوكه وتوني طالعه من حاله نفسية
جنت
انتَ تهون عليّ بس فجأه اختفيت ومن اتصل على بـــراء
لو بــرهــوم محد منهم يكلي شي يطمني ساعه مسافر
ساعه بشغل، واني ماجنت ادري بيك بغيبوبة فـ ضجت منكم كلكم حيل وحذفت رقمكم لان عبالي محد يريدني منكم..
– شلاال شتحجيين انتِ منوو مايريددج!!
نـــهروان – تُــراث بس لحظة، ماتدري شنو عشت اني
وشحسيت وراكم، هُــمام صار اقرب شخص الي
مايخلي
يوم اذا ما يسال عليّ ويخابر ويطمن ويجي يطلعني
ما قصر وياي، وبيوم عرفت هو..
سكتت ماكدر اكمل واكولها بوجهه، نتر هو بسرعه
– اييي شبيي هوو شعرفتيي؟؟
– هُــمام يحبني وحيل هم تُــراث.
– هيوووو شتحجينن انتِ شلاال لا تخليني افشررر فشااار حتى بقاموس الفشاار مااناازل.
– والله تُــراث،واجه طلب ايدي واحنه وافقنه.
– شواافقتيييي ووولجج شلاال شجااي تخررطين انتِ!!
نـــهروان – هسه شلوون تخليني اكملل لو شلوون؟
– كملييي بسرررعه كملييي.
– ايييي، وبعدين خطبني وافقنه وكلشي صار يعني وراد يكمل بس ابوا انصاب بمرض كورونا وانلغه كلشي.
جر نفس يهمس “الحمدلله” حصرتني الضحكه عليّ
هو غير انلغه واجيت انتَ تخطبني!!
تأدبت ولميت ضحكتي وكتله
– بعدين تخرطبت واخذوني المستشفى، محد جان يعرف
اني ماخذين كليتي، ولا حتى اني ومن تخربطت عبالهم
بسبب كورونا، بس من سوولي سونار واشعه عرفوا عندي بس كلة وحده
غيد تعرف لان شافت الاثر بطني، سولفت كلشي لـ بــارون
سمعوها هُــمام وامه وامه صارت تغلط وتحجي بشرفي وتصيح بــارون تخبل ورفض رفض قاطع يكون بينه نصيب اني وهُــمام
بس هُــمام ضل يجي ويفتح نفس الموضوع واني جنت ضايجه منك ومنه وكارهة روحي
بس بــارون ضل يحاجي بهدوء وينصحه لحد ما سد السالفه بس هُــمام لسه دايحاول رغم كلنه نكله لا بس هو ما مهتم.
ضل ساكت واسمع صوت الجداحه، سحب نفس وزفره وكال
– اني اأدبة هذا هو وامه لو اشوفة واصل بيتكم بعد.
– تُـــراث!! لاا تسووي شيي السالفة صاارت وخلصت بنفس اليووم
ماكو داعي تدخل وتكبرهاا.
– شلووون ما اكبرررها لا اكبررها واطيح حظظة وحظظ..
سكت يستغفر بصوت، كعدت عدل احاجي
– تُـــراث لا تخليني اتندم حجيتلك!
تُـــراث – اييي لاا مو انيي شايفتني حاط كرون براسيي وكاعدد
مثلل الگـو**، كاعدد وطب هوو وبكل عين صلفة يكوول خطيبهاا
واني اصفكله واكله مبرووك تعزمنيي على عررسك؟؟
– شجااك تُـــراث! والله مابية حيل احجي حباب لا تسوي شي
لخاطري بروح بنتك عوفه والله هسه كم يوم وينسى
اصلا وراكم كال ردنه نجي اني والزملاء نتطمن عليج
نيته صافية لا تسوي ويا مشكله تخلي يحقد علينه تُـــراث خلص سدينها وبــارون سدها ويا من الاخير وخلص!
سكت يتنفس بعصبية تندمت حجيتله بس هو اول وتالي
راح يعرف، ردت انسي السالفة كتله
– صدك تُـــراث.
– هممم.
– هاي صارلك كم يوم مختفي علمود تفاجاني هيج؟؟
– اي تقريبًا، ردت اجي من زمان بس انتظرت بـــراء
تصير زينه
حتى تجي ويانه، تدرين بيها بسبب الحرك ما تكدر تتحرك.
– اي خطيةة، زين شلون صار طابت كلش لو بعدها؟؟
– لا زين احسن، صدك هي مو فاتت وياج للغرفه؟
شنو ما سألتيها؟
– لا جنه نحجي بغير شي والتينه نسيت.
همهم ساكت جر نفس طويل وكال
– اي، شكال عمج؟ خوما ضاج لو حجه شي؟
– لا ليش يضوج؟
– هيج.
سكتت وهو هم سكت صار صوت يمه كال
– يله اني رايح، اجوا الولد اصدقائي من يرحون نحجي.
– تمام.
– مع السلامه.
– الله وياك، سلملي عليهم.
– وولجج شلااالل.
سديته بوجهه بسرعه اضحك على صوته، رجعت التلفون على الميز وطلعت يم ماما اساعدها بالعشة..
” بــــراء ”
طلعنه من بيتهم فرحانين بس تُـــراث جان كالب وجهه ضايج
حطيت روان بالعش الصغير مالتها بصفي وعزيز كاعد
بحضن ابوا بالصدر و تُـــراث يسوق، باوعلي بالمراية وكال
– كلتيلهم؟
هزيت راسي بـ اي
– كلت لامها من طلعتوا وجانت مبينه فرحانه لبنتها
بس كالت القرار لعمها اني مالي حق بيها.
تُـــراث – طبعا مالها حق هي غير شامره بنتها على عمها
ومتزوجه، بس رجها هيج ماعنده غيره ولا احساس؟؟
والله من شفتها كلت شلال وكبرت، انوب نفس الوجهه ثنينهن
بس شلال عيونها ملونه، ما استغرب شلون شلال ماجانت محجبة اذا امها هيج.
بـــراء – تُـــراث! منشوكت نحكم على الشخص من لبسه؟؟
– لاا بـــراء ماا حاكم عليها اني بالعكس على راسي
بس اقصد
يعني لو هي محجبة جان حجبت بنتها من زمان بس هي ماتلبس
وهي مره جبيره لهل سبب استغربت.
– بس والله هي فد حبابه وفقيرره ما تشوفها شلون حجت وياي من طلعتوا
حسيتها هيج فطيره يعني ولطيفة هي ونهروان نسخه بكلشي فدووة.
ابتسم ودار وجهه على الجامه لگزه بــرهــوم بعكسه يكله
– شبيك من طلعنه كالب وجهك؟ عليمن ضايج؟
كلب عيونه مثل التذكر وجر نفس كال
– هذاا الكلب الطب للبيت زميلها الاسمه هُــمام
سمعته شيكوول؟؟
يكول خطيبها، والله لو ماكاعدين جان شگيته بالنصص.
– دگعددد ياابة مو سمعا عمهاا شكال؟ كال جاان جاااان
بس يمكن هو بعده متأمل.
ضرب الستيرن مريتن بقوة ونتر
– ايي خل يضل يتأمللل لاان شلاال الي واشلع عينه اليحطها عليهاا
ناقصنيي سرسريةة وهتليةة تاللي وكتتت، والله رووحي بخشميي
ما اتحملل احد اشووفة مره ثانية قرريب بيتهم
احط
طلقةة برااسة واخلصص منه.
بـــراء – تُـــراااث ياا شساالفة شبيكمم؟؟
– اسكتي بـــراء.
سكتت لان صاير عصبي وماريد احجي شي يضوجه اكثر
وصلنه للبيت نزل بــرهــوم ونزل عزيز من حضنه
افتر
شال روان هي والعش مالتها نزلنه طبينه للبيت
نزل
بــرهــوم روان على التخم واني مشيت للغرفه
ذبيت عباتي
وشالي وطلعت للهول
تُـــراث طب للغرفه وركع الباب حيل روحه طالعه
باوع بــرهــوم على الباب وصاح
– مخبلللل اررررعن عميييي عووف البنيةةة لاا تخبلهاا من وراااك المسوددن
يركع بالبوووب الارررعن ابووك يطللع يصلحهن اذاا انكسرررن.
مشة بــرهــوم للحمام يدردم على تُـــراث وهذاك ساد
الباب مافتحته، سمعته يغلط ويفشر على ولد بالغرفه مادري عليمن
بس يمكن يتصل على احد ومحد يجاوبة لان اسمعه يصيح
– محدد يرردد التلفوونات حطوها للهواااايشش.
چـؤؤ، شوكت يبطل عصبية وصياح على اتفه شي ما ادري
بجت روان، رحت للهول شلتها لحضني بستها حيل
اشمها من ركبتها
– اووف ياروحي ماما، جوعانه؟؟ هاا يروحي جوعانه روح امها؟ افيشش يكلبي انتِ.
اخذتها ودخلت للغرفه حطتها كدامي غيرت الها حفوضتها
وملابسها توني ردت اكمطها طب عزيز يركض
– مااماا حطيهاا بحضني هنااا.
كابلني وكعد اله تحطيها بحضني، حطيتها بحضنه واني لازمتها
ضحك مكيف وعصرها حيلل بحضنه، صحت بي بسرعه حتى يهدها ماكدر اجرها منه
– عزيز لاا هدهاااا.
هدها بسرعه فاز من صوتي بجت روان مفرفحه
باوعتله وخزرته
– ليشش تسووي هيج ويا اختك عزيز!!
باوعلي خايف وضل ساكت، حطيت روان بحضني رضعتها
واهز بيها حتى تسكت، سكتت ونامت كمطتها ورجعتها
لفراشها، نزل من الجرباية وركض يريد يطلع بره
ويا
طلعته تلكاه بــرهــوم، باوعله ورجع باوعلي
– شكوو شبي؟
ضليت ساكته باوع لعزيز وعزيز عيونه مليانه دموع
دنك
بــرهــوم شاله يباوعله مستغرب
– شبيك بابا؟
باوعلي عزيز ودار وجهه ضم راسة بركبة بــرهــوم خانس
باوع عليّ بــرهــوم وكال ضايج
– ليش تصيحين عليّ بـــراء شكتلج اني؟؟
بـــراء – بــرهــوم قاابل مصيحة عليّ كرره بي!
بس صاير مايكعد
يعاند وما يسمع كلامي، وهسه حطيت روان بحضنه
يعاند ويجعها بحضنه حيل، هذيج المره سواها وانمتنت
وكتله لا تعيدها ماماا وهسه هم عادهاا ماحب الجاهلل الوكح اني!
سكت عزيز من سمع سوالفه باوعلي بــرهــوم بنظرة لوم
مسح على ظهر عزيز وكاله
– روح بره بابا هسه اجيك.
نزل من حضنه وطلع يركض كعد بالهول، اجه بــرهــوم باوعلي وكال
– بـــراء، عزيز ضاايج ويغارر منهاا طبعا يخبث عليهاا
هوو طفلل ومن تسوين بي هيج علمودها يضوج اكثرر
لا تحجين عليّ ولاا تضوجينه بحجيج ما اقبللل.
– بــرهــوم، اذا ما احاسبة يبقة يعيدها ماريده يعادي اخته.
– من عزيز يمج نزلي روان من ايدج ذبيها لا تشيليها
عزيز كضه عمره يشوف روحه الوحيد النه والمدلل
تالي وكت يشوفنه كلنه ملتهين بروان طبعا يضوج!!
ضليت ساكته وهو كال
– صيحيله وراضي يله حبيبي.
– عزيززز، عزيززز مامااا تعاال.
نزل من التخم واجه يركض عليّ، شلته كعدته بحضني
وهو يباوعلي ويباوع على ابو يعرف روحه غلطان كالي
– مااماا انيي احبهاا لواان بس اتيي ما تحبينيي!
– اني ما احبك؟؟
– اييي تحطين لوان بحضنش واني لاا.
ضحك بــرهــوم وكالي يهمس
– هاك استلم هسه يكلج رضعيني ويا روان.
ضحكت والتفتت عليّ، وضليت ساعه اني افهمه
اني
احبهم نفس الحب ويرجع يكلي
– ماا تنيميني بحضنششش ماماا.
– انيمك بحضني ميخالف بس لازم نحب اختنه العنونه ونصير حبابين خوش ماما؟؟
هز راسة بـ اي وباسني بخدي
ابتسمت وحضنته ابوس بي وخليته يبوس روان وكتله
– من تكبر تكوم تحبك وتسمع كلامك وتخاف عليك وتدير بالها عليك دائمًا.
هز راسة مبتسم كال
– يعني مثل بابا تولاث وانتِ؟
– اي يروحـي.
ابتسم ويباوع لاب بنظرات فرح، سمع باب الشارع يندك
نزل من حضني يركض وراح يريد يشوف الباب
باوعله بــرهــوم
رجع طب يركض ويصيح
– اجوواا بااباا آددم وبااباا حمذذة وبااباا ذيدد وبااباا لائـدد تلهم بررة.
فتحت عيوني ولطمت على خدي
– صخاام الصخمنيي، ولك منينن جبتتهم وسويتهمم باباا ولك عزيزز.
ضحك بــرهــوم بصوت عليّ ودنك فاتحله ايده
– تعال نروح نشوفهم.
ركضله عزيز شاله وطلعوا يفتحون الباب، سديت الباب
وكعدت بالغرفه، سمعت صوتهم دخلوا للهول وتُـــراث
طلع الهم واسمعهم يسلمون، شوية وسمعت واحد منهم كال
– تُـــراث.
– ها آددم؟
آدم- شووف السالفة قديمة بس ماكدر اضم عليك
ردت اسدها من يمي
بس صارت وما اكدر ادخل بكيفي لازم اكلك.
– شكو شصاير؟
– خال قـمر، الي مره اجه لهنا عليها.
– ايي شبي؟؟؟
– جاي لهنا ويريد يشوفك.
الفصل التالي اضغط هنا
يتبع.. (رواية تراث النهروان) اضغط على اسم الرواية لتجد الفهرس كاملاً بجميع الفصول.