رواية أحفاد الشيخ علي – الفصل الثامن
هواي اذكرچ من احس
الدنيا ملتمة علية
اني مامعتبرج انسانه بحياتي
اني معتبرچ هدية
^—————————^
تراث:: هي ليش زعلانه؟
گال حمزة و مبين من نبرة صوته مقهور
حمزة:: تريد تطلگ
عراق:: اي و ما طلگها؟
حمزة:: شلون اطلگها غير اموت على التراب التمشي علية شعندي غيرها اني
سجاد:: هسع هي ليش تريد تطلگ؟
حمزة:: تگول اني ما اگدر اخلف و ما اريد احرمك من الجهال طلگني و روح تزوج گلتلها نطلع للخاج نتعالج تگول ما اريد ما يفيد ابد و كلما تشوف جاهل دحگ علية بحسرة و تبچي
تراث:: خطية
عراق:: خوية الله يعوضك أن شاء الله
سجاد:: تنحل ان شاء الله بس انت لا تعوفها ترى شهادة الله مرتك من ذهب
حمزة:: شايفني مجنون اعوفها غير ميت عليها و عشرة خمس سنوات مو سهلة
تراث:: جيبها و اني اخلي البنات يقنعنها و تطلع للخارج تتعالج ان شاء الله
حمزة:: ياريت والله
………
في مكان اخر::
سمرة:: شوفي الساعة ترى ماضل وكت
نور:: يابة شسالفة ترى بعد وكت
حور:: اي والله بعد
سمرة:: يولي ماضل باچر عدنه عرس ما نلحگ فضنها راح اخابر على واحد من الولد يجي ياخذنه
حور:: يبوو شسالفة
طلعت سمرة تخابر على واحد من الولد يجي ياخذنه
حور:: هسه ما تباتين؟
نور:: ولچ الله كريم غير يوم
حور:: يبوو
نور:: ههههههه
حور:: هسه غاح تبقين انتي هنا؟
نور:: اي خية باقية هنا
حور:: ليش؟
نور:: اني كلش مرتاحة هنا
حور:: يمكن اگول لبابا و نبقى احنه هم والله احسن
نور:: ههههه اي ولچ گليلة اذا ما قبل نقنعة
حور:: هاهية اتفقنه
سمرة:: هاا شيخات
نور:: على منو خابرتي؟
سمرة:: على تراث
نور:: هسه خلصو ولد العشيرة الا هذا؟
سمرة:: ههههه شبي هذا؟
عمزت حور و گالت
حور:: ما يعجبها هذا
نور:: يتورط اليحچي يمچن والله
مرت تقريباً نص ساعة و سمعنه صوت السيارة
سمرة:: يلا اجه تراث
ايلين:: چان بقيتن بتن بعد ما شبعت من نور
نور:: يمه اروحلچ فدوة قابل هاي اخر مرو اجيچ الا اخليچ تشبعين مني
سمرة:: ان شاء الله
حور:: تعاي خلي احضنچ
سمرة:: لو ما باچر تشوفيها شبيچن راح تگعدن تلطمن
حور:: ههههه
تراث:: يلاا
ايلين:: اگعد وليدي استريح نضيفك
تراث:: لا عمه تسلمين غير مرة ان شاء الله
ايلين:: كل الهلا بيك وليدي
صعدنه بالسيارة و گال تراث
تراث:: هلا بالدايحات لنص الليل
نور:: لو ما انت تطلع تسهر و ما ترجع للـ 3
نفضت حلگ البدي و گالت
نور:: الله يعلم وين تروح
سمرة:: ههههه متتت
تراث:: استغفر الله انتي شمدريچ ارجع
بالـ 3؟
نور:: هاا سمرة گالتلي
سمرة:: اني شعلية تحطين كلشي براسي ترى لا گلتلها ولا شي بس چنة سهرانات و شفناك راجع بالـ 3 معلية ترى
نور:: امداچ اي والله تنطين بالواحد بسرعة
تراث:: گبر اي والله
نور:: امداك اي والله
سمرة:: ههههه
وصلنه البيت و نزلنه من السيارة و رحنه على غرفة سمرة
سمرة:: اگلچ اشتريت شيرة من طلعنه تجين تسويلي؟
نور:: يلا تعالي
انوب هي شلون شيرة موتتنة تموع فد مرة و نبردها و ترجع تموع شلعت گلبي
نور:: سؤال
سمرة:: جواب خية
نور:: هسه الوحدة من تزوج شلون تسوي شيرة لكل جسمها؟
سمرة:: بربچ هذا هم سؤال اني شمدريني و ليش تسألين تريدين تزوجين؟
نور:: لا بس چنت افكر شني السالفة اشو اني اسوي رجلي اتعب هنه شلون كل جسمهن
سمرة:: شدخلچ عود من تزوجين شوفي شلون
نور:: لا خية اريد اعرف شنو ياخذن منشطات تا يكملن
سمرة:: اكو وحدة تسويلهن مو هنه يسون
نور:: و ليش لازم احنه نسوي شيرة ليش مو الرجال هو يسوي؟
سمرة:: شمدريني جاية تسأليني
نور:: تخيلي تزوجين واحد جسمة كلة شعر چنه قرد
سمرة:: هههه شلچ بهل سالفة كملي مو وكتها
………
في مكان اخر::
جواهر:: دريتو عمتكم تريد تجي؟
عراق:: يمه هي شني تريد تجي تعلگها و تمشي
مروة:: ياريت بس تعلگها و تمشي يول هذي تريد تجي تسكن هين
ايسر:: شني ليش بالله؟
مروة:: تگول البيت بيت ابوي و الما يعجبو يطلع و انتو متمكنين الما يعجبة ياخذ مرته و مع الف سلامة
ايمن:: و عمامي ما حچو وياها شي؟
جواهر:: شنو يريدون يحچون يگولون هذي اختنه الوحيدة شنو نريد نحچي وياها
يامن:: هو شنو الطلع عينها هاذي
بنت الـ*** غير سوالف عمامي
جواهر:: عيب وليد شنو هاذه الحچي شما تكون مسوية تضل عمتك نتحمل والله كريم
مروة:: ان شاء الله
حمزة:: اريد باچر اروح اجيب مرتي عمه جواهر تروحين وياي؟
جواهر:: اي وليدي ابشر اروح وياك و ان شاء الله نگدر نرجعها و اني احچي وياها
حمزة:: راح اگول لأبوي و بعدين نروح
جواهر:: هاهية وليدي
يامن:: الايام الجاية يرادلها خلگ و صبر أطول من صبر أيوب
سجاد:: اي والله
………
في مكان اخر الساعة 11 الضهر::
اني و عمه جواهر و امي نسوي غدة و نور چانت تسبح كملنا غدة و اجت نور تتمشى و حاطة منشفة على شعرها و تنشف بي
ما شاء الله شعرها ناعم يجنن
نور:: يابة فطست جوع
جواهر:: هههه كملنة ضل بس نصب اخذي السفرة روحي افرشيها
نور:: تمام بس السفرة وين حاطيها
مروة:: بأول جرار بالكاونتر
جواهر:: اليوم تروحن على عرس؟
سمرة:: اي عراق راح يوصلنه العصر للصالون صديقتي و العروس ينتضرنه هناك و من الصالون نروح للعرس
مروة:: ديرن بالچن على نفسچن
سمرة:: شني يمه قابل جهال احنه هههه
نور:: اني ادري؟
كملت كلامها و اخذت السفرة و طلعت للاستقبال
الگاعدين بالاستقبال عمي حازم و ابوي و عمي حسين و عراق و يامن و تراث و سجاد و ايسر و ايمن و حمزة كلهم گاعدين و يحچون بسالفة عمتي نجلاء
عراق:: هسع شنو راح تجي تگعد ويانه؟
تنهد حازم و گال…..
حازم:: ما ادري يا وليدي لحد هسع الله كريم ربك يحلها ان شاء الله
حسين:: ترى حچيها صحيح البيت بيت ابوي و احنه كلمن عندو بيت الما يعجبو الوضع ياخذ عيلتو و يطلع
تراث:: عمي على عيني و راسي بس احنه صارلنا سنين سوة على اي اساس هسع من كبرنه و الشيب بروسنه كلمن ياخذ عيلتو و يطلع؟
وليد:: والله يا وليدي كلامك صحيح
حسين:: عجل خلي تجيب بناتها و تجي هلا بيها و التريدو يجرالها حضرولها غرفتين غرفة الها و غرفة لبناتها
ايمن:: راح اگول لأمي
وليد:: هاذهو وليدي
نور:: ايسر تعال گابلني افرشها وياي
حسين:: الله حيها بنت اخوي ههههه
نور:: هههه حياك الله عمي
گام ايسر و فرشها وياي خلصت و طلعت للمطبخ
نور:: هاي من البارحه يحچون بسالفه نجلاء هلگد مخوفتكم؟
جواهر:: يولي يا مخوفتنه بس هي وحدة شيطانه و حية تجي تفتن بيناتنه و تمشي
مروة:: اي والله و اله احنه ما نضوج من احد لو ما تسوي مشاكل نحطها بعيونه
سمرة:: اي يولي تجي تعلگها و تمشي ههههه نصير فلم هندي انوب هي حضها خرا تخرب بيوت والله ما تحب تشوف احد فرحان ابد
نور:: يبوو هاي شبيها؟
جواهر:: يولن خلصن ما ضللچن وكت
صبت ماما جواهر و عمه مروة الاكل و أخذنا اني و سمرة للاستقبال و گعدنه ناكل و نضحك و نشاقة والله الگعدة ويه الاهل
فد شي يجنن هسه عرفت ليش عمامي ما بيهم واحد طالع بيت وحدة مع انو عدهم فلوس و متمكنين بس عمو ابو تراث هو الي
جامعهم و مسيطر عليهم لو ما عمو حازم چان ما بقى احد بهذا البيت و لاحظت عمو حسين طاگة روحة على الطلعة هو و مرته كوثر بس ان شاء الله خير
كملنه اكل و رحنه لبسنه أخذنا عراق لبيت بابا هشام و أخذنا حور و طلعنا للصالون و عراق الطريق كلة يوصي بينه ما نكثر مكياج
زهراء هي العروس و صديقة سمرة اسمها ندوة……وصلنه
ندوة:: هلا هلا
كملت كلامها و حضنت سمرة و باستها و بعدين سلمت علينه و راحت سمرة تركض على زهراء
سمرة:: يمه يمه طالعة تموتين بالفستان ما اصدگ اجه اليوم الي اشوفچ بي عروس صحيح مقهورة لأن راح تتركينه بس فرحانه الچ حيل يمة حبيبتي
زهراء:: هههه يولن كافي انتي و ندوة ساعة تحچن والله احس اريد ابچي كافي امانه
ام الصالون:: هههه هي مو مال بچي يلا گعدن لأن راح نبدي بالمكياج
گعدنه و الأجواء تجنن و مشغلين اغاني و سوالف و ضحك
حور:: هههههه ولچ اول مغة احضغ عغس عغاقي
نور:: اي والله حتى اني
زهراء:: هههه هسع شلون الونسة متحمسة بس حيل خايفة و متوترة
سمرة:: بوية هي شيرادلها بس لا تخافين
ندوة:: لا تفشلينه مو اول ما تفوتين على الغرفة تگولين للولد انزع عيب بابا ما يصير
زهراء:: ههههه يمه يولن راح اموت من الخوف عفية چذب ما اريد اتزوج
سمرة:: عزاا العزاچ هههه
حور:: هههه ولچ مو وكتها شوفي الساعة بيش
كملنه مكياج و ما اشوف اله الساعة بالـ 5
اجو سيارات اخذو اخوات العروس
و العريس لأن كلهن حاجزات نفس الصالون
و احنه اجه عراق اخذنه و الطريق كلة ما شال عيونه عن حور
حور:: خية منو يصدگ صاغ عندچ اخوان ثنين
نور:: هههه اي والله
سمرة:: شفتن زهراء يولي هذي راح تموت من التوتر
عراق بقى ساكت ما حچة ولا كلمة بس يباوع على حور من المراية مالت السيارة
وصلنه القاعة و چانت تجنن كلش حلوة
و مرتبة العرس چان مثالي بس اشوف
زهراء كلش متوترة و خايفة و البنات يمها يهدن بيها و القاعة مو مختلطة هنه قاعتين
القاعة الفوگ صايرة للزلم و الي جوة للنسوان بدة العرس و كلها ترگص بدت
فقرات الصديقات گامن صديقات العروس صارن دائرة و بنصهن العروس شايلات
عصايات ملونه وهي لابسة نضارة ة العصايات تضوي و اضوية القاعة تطفي و
تشتغل يعني صار العرس يجنن ورة شويه خلصت الفقرات و دخل العريس و گعدو
على الكوشة و كلمن گعدت بمكانها و بدت رگصة العريس و العروس تجنن كلش حلوة
هو لازمها من خصرها و هي لازمه اكتافة واحد يباوع بعيون الثاني و مبين ماخذين على حب چنت مشتغله اغنية::
انت چنك دعوة امي
من تجي ينزاح همي
لحضة احسها و انت يمي الها معنى
بحبة يا هنياله حضي
يستقر بس يمه نبضي
لا سماي ولا هي ارضي
حضنه جنه
تفائلت خير و عشگتك
لذة الحب بحضنتك تسوى هاي الدنيا كلها
يا عشرتك
اني بالدنيا وحيدك
العمر لو ينعاد أريدك
اختصرت الكون كلة بلمسة ايدك………
الأغنية مشتغله و يباوعون بعيون بعض يجننون و من وصلت الأغنية يم::
يا حلالي
انت صدگ
الباقي چذبة
انت روتيني الاحبة
شالها و افتر بيها و هي من الفرح چنها الدنيا مو واسعتها والله ذوله يسوون واهس
للواحد يتزوج خلص العرس و طلعنه راحو العرسان للفندق و احنه طلعنه من القاعة و
عثرت حور و كضها عراق بعدت عنه بسرعة و گالت
حور:: اسفة والله لابسة كعب عالي و كل شوية اعثغ
عراق:: ههههه لا عادي و لا تعثغين بعد
حور:: ههههه تمام
اول مرة اشوف واحد يحچي او يقلد على لدغتها و ما تردلة او تحچي ويا شي رجعنه
للبيت الساعة بالـ 1 تقريباً دخلنا البيت و سمعت صوت عياط و عركة و صوت عمه
مروة تحچي و تصيح و صوت مرة غريبة دخلنا نركض تا نشوف شنو صاير؟……….
^————————^
الفصل التالي اضغط هنا
يتبع.. (رواية أحفاد الشيخ علي) اضغط على اسم الرواية لتجد الفهرس كاملاً بجميع الفصول.