رواية تراث النهروان – الفصل الرابع والعشرون
مـريـم – يله بناات ماضل وكت .
طلعنه من البيت وبـــارون وسيف وماما اجوا ويانه كلهم
مشينه
كلنه للكلية رحنالها مشي سيف وبــارون يمشون كدامنه وماما ومريم سوة
وكفت نـــهروان بصفي تقربت عليّ وهمست
– شلونج مرت عمي.
فتحت عيوني بسرعه باوعتلها بلعت ريكي وهمست
– شمشون انجبي.
– ههههههههههههه والله وسوتها اخذتي عمو.
– شمشون!
كلتها والتفتت عليها مقهورة، راحت ضحكتها وعقدت حاجبه
– شنو؟
– مو مال مافكره شمشون.
– اعرف!! بس بنفس الوقت اعرف بــارون مستحيل يعوفج.
– يعوفني يعوفني بس يرجعلي البيت يعوفني.
– غيد..
– شمشون وصلنه.
هزت راسها وسكتت وصلنه للكلية لكيناهم كلهم هناك واكفين
ولابسين مال التخرج ومشغلين اغاني بصوت عالي
شمشون
راحت وكفت بغير مكان حتى بعدين تجيهم تريد تسويلهم مفاجأة
مشينه الهم لكينه الولد واكفين على صفحه وبصهم البنات
سلمنه عليهم وهم سلموا على بــارون وسيف وماما
مصطفى – راح يسوون الحفلة بالكلية.
عبد الرحمن – احسن.
غـيـد – ليش وين رادوا يسوونها؟
– عود يردون يسووها بحديقة عامه مدري وين .
نسرين – اصلا السنه ماعرف شلون مرت متأكده بعد الحفلة راح نطلع كُلنه راسبين ورجع نتخرج مره ثانية .
كالتها ورفعت كذلتها تعدل بيها
وهم كلهم كاموا يضحكون عليها وهي تحجي بجديه
اني مامركزه بحجيهم مثل ما متحمسه لـ نـــهروان من تشوفهم
باوعت اجه العميد ويا المصور يأشرون النه نرروح نوكف بمكان التصوير
وكفنه كلنه اخذنه اماكنه والمصور ينطينه تعليمات شنو سوي
وكلساع صايح على بنيه
– لااا تضحكين .
انوب لطم على كصته وصاح
– شعررج عووفي يخبلل والله يخبلل عوفي ، ام الحجااب بووية عوفي حجاابج اني اعدله الج بس اوكفي عدل ,
وبعد وقت طويلل عدله وكفاتنه والولد ورانه وسوينه فعاليات
واخذنه الصور وكال
– هسه الي عدها تسجيل دخول تجي .
كامن يجن بنات وعوائل البقيه يباروكلهم ويصورون ويرحون
اكثر شي متحمسه اله هو دخولية نــهروان، ابتسمت متحمسه من كال المصور
– دخولية لكُل الطلاب ركزوا هنا .
شغل الكامره وجها على باب الكُلية بلعت ريكي وكمت افرك بأيدي
باوعنه كلنه على باب الكلية، ضحكت بفرح من شفت نــهروان
طبت تركض من باب الكليه فاتحه اديها وتصرخ وتضحك
ماحسيت
من نزلوا الطلاب كلهم من يمي وراحوا يركضون كلهم بجهتها ويصيحون
– شمشوووووووووون !!
كمت اضحك واركض وراهم البنات حضنوها كلهم ويبجون
والولد يتحمدولها بالسلامه صارت تتنقل من حضن لحضن
لحد
ما وصلت لـ شلتنه
نــهروان – نووسة !
حضنت نسرين وهاي كامت تصرخ وتبجي ونــهروان وياها
وحضت ندى وابتعدت تمسح دموعها باوعت على الولد وغطت وجهي تبجي
تقربوا مصطفى عبد الرحمن وهُمام وجواد يباوعون عليها
وكلهم عيونهم مدمعه
احسهم يردون يحضنوها بس مايكدرون، وكفوا يمها كلهم
وهي بس مغطيه
وجها وتبجي باوعتلهم وشهكت
– مشتاقتلكم .
هُمام – نــــهروان .
باوعتله وشهكت وهي تبجي وكالت بضحكه
– الزميل الجميل .
ضحك والدمعه بعينه مسحها وهمس
– شمشون .
ضلوا يتحمدولها ويهوسون جرنها البنات والولد يهوسون ويغنون بالنص ويركصون فرحانين
وهُمام ما صعد يمنه ضل واكف جوة ومصطفى يدفع بـ شمشون
وهي تدفع بي وعبد الرحمن يصيح عليّ وهي تمسح دموعها
وترجع تتعارك وياهم
خلصنه التصوير وتفرقنه وكفنه على صفحه بـارون وماما والبقيه اجوا يمنه
والولد اجوا وندى ونسرين يمنه ويحجون ويا شمشون
بس هُمام
جان ساكت وبس يباوع عليها وعيونه مدمعه وكلها تعرف شنو السر
خلصت الحفلة على خير ومشينه نريد نرجع وهم اجوا كلهم ويانه
رجعنه للبيت كلنه نمشي بس هُمام ما قبل يجي رجع للبيت
بس نظراته اتجاه شمشون خلتني اتأكد مو اشك هُمام
معجب بيها ومو بعيده يحبها
وصلنه للبيت وكعدنه كلنه بالهول وهم يحجون ويا شمشون
ويضحكون فرحانين بيها
مصطفى- اييي سولفيلنه شصاار مااصار؟
نسرين- شمشون هم شفتي هناك هيجي ملثمين ويتعاركون بالمسدسات وانتِ تتعاركين وياهم؟؟
ضحكت شمشون وعيونها مدمعه
– اشكال شفت هناك هناك نسرين اشكال.
راحت ضحكتنه لان حجتها بحسرة وخوف
– شفت اشخاص يموتون كدامي شفت جثث جهال
يمثلون بيهن
اشكال شفت وكل لحظة عشتها ادعي اشوفكم قبل لا اموت
رعب رعب عشته هناك لو ما شخص هناك ساعدني
كدر
مو بس يساعدني لاا صار يهون عليّ ضلتي هناك
لو ما هو
جان اني متت من اول يوم.
عبد الرحمن- الله يوفقة ان شاء الله، لا تخافين شمشون
كل احنه وياج وما نعوفج بعد نسيج الي صار شوية شوية.
هزت راسها وهمست
– بس هو مات.
ندى- عززة ماات؟؟
– اي كتلوا.
– يمةة خطية الله يرحمه.
كاموا يترحموله وهي تسولف الهم شصار هناك وهم مركزين وياها كلهم عبالك تحجي الهن قصة
من كملت كامت تضحك وتمسح بدموعها
– عابت شبيكم وجوهكم صارت صفر.
مصطفى- ياصفر اني حصرتني بـ*ـولة من الخوف.
ضحكنه وهي غمته
التفتت تباوعلهم وتسمح بوجها
– لعد ابراهيم وين؟ ماشفته هناك؟
التفتنه بسرعه كلنه واحد على الثاني وهي راحت ضحكتها
– شبيكم؟ ابراهيم وين؟
كعد بصفها بـــارون حضها وهي عيونها دمعن باوعتله وهمست
– وين ابراهيم بـــارون؟
– انتِ مو كلتي طلع من يمكم؟
– اي كالي طلع من العمارة.
جر حسرة وباوعلهم ورجع باوعلها
– لاكينه مكتول وشامرينه بالمستشفى.
شهكت بعلوا صوتها وحطيت اديها على صدر بـــارون دفعته
– لاا بـــارون لااا.
وكفنه كلنه وهي كامت تبجي ومجلبة بتشريت بـــارون
– عليك الله كول ماميت عليك الله.
– نـــهروان اهددي بوية اهدي يروحي.
– يمااماا بـــارون ابراهيم مات؟؟ يماما.
كالتها وفتلتت روحها من حضن بـــارون وكعت بالكاع تبجي
البنات كعدن كدامها كلهن
– لاا لااا بـــارون شلوون يمووت هو اجه يريد يطلعني
هو كالي اجيت اطلعج اخيتي هو كاليي.
كامت تبجي وتشهك بجينه كلنه على بجيها وهي تكول
– اني فرحت عبالي طلع والله عبالي طلع ما ادرري بي ما ادري.
اباوعلها شهكت ولزمت صفحتها
طفرنه كلنه عليها وهي غضمت عيونها بوجع
بـارون- نهرواااان نهروواااان.
جرها لحضنه وهي عاضه شفتها بوجع وتهمس
– بـــارون بـــارون.
شالها كعدها على التخم وصاح يريد مي ركضت مريم جابت مي
وماما كعدت يم راسها تمسح بوجها، شربوها مي وهي
شربت الكلاص كله جابتلها مريم بعد وهم شربته
بـــارون- كلياتها ناشفاات ماا تشررب مي.
يحجي ويشرب بيها لحد ما هدئت بحضنه
عبد الرحمن- نروح للمستشفى؟ بـــارون ناخذها؟
باوعلها بـــارون ومسح وجها
– اخذج للمستشفى؟
هزت راسها بـ لا ورجعت راسها لـ حضن بـــارون
اترخصواا البقية وتحمدولها بالسلامه وراحوا ضلينه احنه
كاعدين يمها وهي ساعه تبجي ساعه تصفن بـــارون
خايف عليها
حيل خايف ، ضلت بحضنه لحد
ما غفت، شالها طببها للغرفه واجه كعد يمنه
بـــارون- مادري شسويلها تعبت حيل
ونفسيتها تدمرت مادري شسوي وشلون اطلعها من العاشته
اريد اغير نفسيتها وانسيها.
ماما- اخذها زورها يمة اخذها لـ كربله للكاظم للنجف
اخذها زورها خل يبرد كلبها.
هز راسة وهمس
– ان شاء الله.
” بـــراء ”
اباوع على تلفونه مصدومه وهو مبتسم ويباوع
– هاي شنو؟
– شوفي هذا.
فتحه وخلاه كدامي باوعتله جان فديو لـ نهروان
وهي نايمه على سدية ومبنجه وتحجي
نـــهروان- اااه بطنيي يماما.
تُـــراث- شبيها؟
– مادري شبيها.
– توجعج؟
– اي اي يماما مدري شسوولها شكوها.
ضحك تُـــراث وهي عقجت وجها
– يردون يموتوني واني ماريد اموت.
– لاا افا شحده اليموتج.
– والله انتَ السگط وياهم تموتني.
– اني سگط؟
– اي انتَ واحد سربوت.
– ايبااه.
– والله.
تُـــراث- فوك ما اساعدج؟
– اوووي يماما بطني بطني.
– توجعج؟
– اي توجعني اني ميته ميته من وراكم ميته.
– لا والله هسه تطيبين.
– شطيب شطيب اني ادري بروحي ميته.
– اني بالجنه!
ضحك بالفديو تُـــراث بعلوا صوته وواني ضحكت
على صوت ضحكته وهو كالها
– وين انتِ؟
– بالجنه اني.
– منو يمج؟
– ها؟
– منو شفتي بالجنه منو؟
– شفت؟
– اي؟
– شفت النبي محمد.
فتحت عيوني وهي كالتها وصفنت ورجعت كالت
– شفته هو والأمام علي وياهم الأمام العباس والأمام الحُسين والأمام الحَسن
مسوين دائرة وكاعدين يحجون.
– سلام الله عليهم، اي وشسويتي انتِ؟
أشرت على نفسها وكالت
– اني؟ اني بجيت.
– ليش بجيتي؟
مسحت عيونها ورجعت فتحت وغمضت تحجي وتجر الكلمه جر
– شفتهم كاعدين واني ابجي بنصهم اكلهم اريد اطلع
والأمام علي يكلي انطلعج كلنه وياج والله هيجي كالي
اني دا اشوفة هياته والله.
تحجي وتأشر باديها بالغرفه وتُــراث يفر الكامره بالغرفه
ماكو أي شي يمها، بس هي مصره وتحجي وتأشر
رجعت تحجي بصوت ناصي بينها وبين روحها
قرب التلفون
عليها يريد الصوت يبين بس ما افتهمنه شنو تحجي رجعت
وخرت التلفون من وجها وصاحت
– لا تصور لا تصور اني مشهورة تصورني.
ضحك وبعد الكامره عنها
تُـــراث- توجعج بطنج؟
– كلشي يوجعني اني شسمه..
– اي؟
– حموت اني.
– لا ماتموتين.
– هي بكيفك هياته عزرائيل وراك.
تحجي وتأشر بأديها فر الكامره تُـــراث على باب وصاح
– دخيلك ربي خل ياخذج انتِ اني بعدني صغير.
هزت اديها وصاحت
– عزرائيللل اخذه هو هذا يستاهل يموت، والله لو ماخليت عزرائيل يشگك بالنص بسيطه.
– ياخذج انتِ احسن ام لسان.
رجعت تبجي فجأة وتحجي بأسم شخص اسمه بارون هو عمها وسيف ورجعت تغلط
– بنت الكلب احبها والله بس متحبني.
– منيه؟
– ماما البربـ*ـوك.
– امج؟ شبيها وياج؟
كامت تمسح عيونها وتحجي شلون امها عافتها
وشلون بارون رباهم هي واخوها سيف
ورجعت تغلط عليها وتبجي
– ماريد اغلط احبها.
– اني كتلج اغلطي؟
– هئ.
كامت ترمش بعيونها وغمضت طفه تُـــراث التصوير
التفتت عليّ متفاجأة بعد ماخلص الفديو
– شنو هاي؟
جر حسرة وهمس
– مبنجه.
– هو هذا الي تقصده؟
– اي.
– شمسوين الها تُـــراث!؟
– ماخذين كليتها.
فتحت عيوني مصدومه وشهكت وهو رفع ايده يمسح بوجهه
– عززة بعينيي!
– موو بيدي بـرااء مو بيدي والله حاولت امنعهم
والله شكد حاولت
بس بس لو ما مخليهن يكتلوها وياخذون اعضاها كلهن
اني ما مضحي بيها والله گوة عليّ سويت هيج
حتى من الغرفه مااطلعت
حتى لا يصير اي غلط بيها وجنت خايف عليها
بس ماكدرت اسوي اي شي.
يحجي بحسرة روحه رايحه ويجر النفس بتعب
كعدت بصفه وجريته عليّ مدد وخله راسة على رجلية
كمت امسد على شعره وهو يحجي
– طلعت قمر من عنده وفرحان كدرت اخلصها بس ماكدرت اخلصها هي منهم تعبت بوكتها
بـرااء حسيت نفسي عاجز بس الحمدلله من كدرت اخلصها على حساب نفسي.
كالها وجر حسرة
تنهدت امسح على راسة ساكته ماعرف شنو اكله
ولا اعرف شنو اسوي واكدر اخفف عنه وهو مبين
مهموم وضايج، من شفته نام خليت جوة راسة
مخدة
وشلت قمر نزلتها وياي خاف تكعد وتكوم تبجي
وتكعدة، نزلت جوة لكيت برهوم شايل عزيز
وعزيز يبجي
رحت حطيت قمر بالغرفه الجوة وطلعت
– ها شبي؟
– مادري يبجي من رجله يمكن واكع.
اخذته من عنده اريد احاجي بس يبجي كعدته على التخم
اباوع على رجله حمره صايرة متعور بيها
– توجعك ماما؟
– اييي.
اخذه بـرهـوم من عندي وشاله يسكت بي من شافني مالي خلك
كعدت على صفحه حايرة بـ تُـــراث ماعرف شنو اسوي
هو مبين حيل مقهور وضايج، ضلينه كاعدين بالهول
اني مخلصتها صفنات وبـرهوم حاير بعزيز
سمعت
صوت قمر تبجي كمت بسرعه للغرفه شلتها طلعتها من الغرفه
شافها عزيز كام يضحك يريد يلعب وياها
بــراء- اوكف ماما خل ابدللها ملابسها واجيبها الك.
– مامااا.!
– اوكف حبيبي.
اخذتها وصعدت فوك طلعت الجنطه الجايبها تُـــراث
طلعت منها ملابس لقمر سبحتها وغيرتلها ملابسها ومشطت شعرها
– الله شنو هل جمال قمورةة.
ضحكت وكامت تصفك وتزحف تريد تمشي
جريتها شلتها ونزلنه جوة اني وياها خليتها بالكاع
يم عزيز وعزيز يضحك ويلاعب بيها ويجر باديها يريدها تكوم
– ماما خل تدوم.
– ماتكدر تكوم حبيبي بعدها عنونه.
– مااا.
جرها حيل من اديها وهي صرخت وكامت تجر باديها من عنده
– لاا ماما عزيز خطية صغيرونه بعدها ماتعرف تلعب عوفها.
شلتها من عنده زعل وراح لابو يبجي ويصيح
– بابااا اليدهااا اليدهاا.
التفتنه على صوت تُـــراث يصيح من ورانه
– هااي منو ويا قمرر؟؟
ضحكت وباوعتله نزل من الدرج شاف قمر بحضني
وعزيز يبجي يم برهوم
– هاي شبيك لك؟
عزيز من شاف برهوم مغلس عليّ ركض لـ تُـــراث يصيح
– باباا اليد هاااي.
كالها واشر على قمر ضحك تُـــراث واخذ قمر مني
نزلها بالكاع يمه وهو ضحك وكعد يجر باديها اله تكوم تلعب ويا
تُـــراث – ايد بنتي انخلعت ابن المخلوع هو هيج.
بـرهـوم – لا يامخلوع.
– انجب انتَ.
– انتَ انجب.
باوعتلهم وتخوصرت
– هاا سالمين؟
باوعولي وسكتوا اثنينهم، باوعت على الساعه وباوعتلهم
– يله أذن المُغرب يله صلاة.
تُـــراث- اني صليت فوك.
– تُـــراث شووكت لحكتت شوكت؟ توه اذن تووه.
– لا صليت تجذبيني؟
– اي ميخالف صلي كدامي اريد اشوفك شلون تصلي.
– اخبل من اصلي.
– اي اريد اتخبل اني.
باوعلي وگلب عيونه يقلد، راحوا هو وبـرهـوم يتوضون
واني كعدت يم الجهال، فرشوا سجادات وحطوا الترب
وكفوا يصلون، علما خلصوا عفتهم يم الجهال
وكمت صليت
بس كملت رحت للمطبخ سويتلهم العشه وحظرته على الميز
اجوا تُـــراث شايل قمر وبـرهـوم شايل عزيز
كعدوا يتعشون واني اوكل بقمر
تُـــراث- باجر اريد اروح لـ بغداد.
باوعنه اني وبـرهـوم واحد على الثاني بسرعه وهو كال
– شغل شبيكم شغل.؟
بـرهـوم- اي خوش نروح كلنه.
– وين كلكم؟
– كلنه نرجع لـ بغداد شعدنه هنا بعد؟
– بكيفك هي؟
– لعد بكيفك؟
بـــراء- اي تُـــراث خل نرجع كلنه لبغداد احسن.
– جؤؤ بس اني.
بـرهـوم- اي الله وياك روح اني اخذ مرتي واروح.
– اهوو هسه غير ينجب هذاا.
بـــراء- لا صدك تُـــراث خل نروح كلنه احسن والله.
– ميخالف ميخالف افكر لا تلحون.
سكتنه عنه وهو اكل وكام صعد فوك شلت قمر
نزلتها جوه وعزيز مصر يخليها توكف وتلعب ويا
وهي كوة توكف ماتسيطر توكع على وجها
بـــراء- بـرهـوم اخذهم بره خل اعزل المطبخ.
هز راسة
ودنك شال قمر ولزم عزيز من ايده اخذهم وطلع بره
عزلت المطبخ وكمت صعدت فوك، طبيت لغرفة
تُـــراث لكيته يلم الملابس بجنط كبار
– هاي شنو يعني نضل هناك لو نرجع؟
– اني ردت ارجع بس اذا ترحون وياي نضل هناك.
هزيت راسي بـ اي وطلعت، رحت لغرفتي لميت
غراضنه كلهن بجنك وشغلات النحتاجها كلهن
احنه
لان من زمان نشيل من بيت لبيت فـ بيت بغداد
وبيت بهاي المحافظة ماثثات بس البقية نكعد بيهن اجار
كم يوم ونرجع لهنا بس هسه اعتقد يريد يستقر بغداد
طب بـرهـوم شايل عزيز نايم حطه على الجرباية
– برهوم قمر وين؟
– نامت وديتها يم ابوها.
شمر روحه على الجرباية وباوعلي
– شكالج تُـــراث على روحة بغداد؟
– يكول نضل هناك.
– صدك؟
– اي والله يريد نرجع لهناك ودا الم بالملابس.
هز راسة ومدد على الجرباية هو واني كملت لم الملابس والغراض كلهن
حطيتهن على جهه ورحت سألت تُـــراث شوكت نطلع
– الصبح نطلع.
– الغبشة لو الصبح كلش؟
– لا الصبح ورا الـ7.
– كول اريد اضل نايم كولل.
ضحك وهز راسة باوع على قمر ومسح على شعرها
طلعت وسديت الباب وراي عفتهم ينامون
رجعت للغرفه يم برهوم مددت بصفه حس عليّ
جرني لحضنه ابتسمت ونمت بسرعه علمود نكعد من وكت
وبس صبح الصبح كعدنه كلنه بـ8 بدلنه
وطلعنه
الغراض كلهن حطيناهن بسيارة تُـــراث لان الصندوك
مال سيارته جبير حطيناهن والبقية حطيناهن بالكشنات الورا صعد هو بسيارته وطلع كدامنه واني وقمر وعزيز ويا برهوم
حرك السيارة ومشينه
باوعت على تُـــراث يمشي سريع مشت كدامنه
واني كلبي كام يدك بسرعه
باوعت على برهوم وكلت بخوف
– برهوم هاي ليش يسوق هيج!
– ماتعرفين اخوج؟
– عفية كله خل يخفف شدعوه هل سرعه هاي باع شلون يزابگ بين السيارات.
طلع تلفونه ودك عليّ
– ها برهوم؟
– خفف سرعتك اختك راح يصير عدها ولاده.
– وين ترى ماشي 120؟
– ها نسيت هاي بالنسبه اله خفيف بس ميخالف لخاطر هاي الوجوه الطيبة خفف بعد.
تُـــراث- ميخالف ميخالف.
اباوع لسيارته واذاني يم التلفون
بـــراء- عفية خفف بعدها سريعه.
– براء بعد شكد امشي غير شارع دولي هذا.
– اي خفف خفف لعد هيجي تمشي يله خفف.
– يله خففت خففت.
باوعت سيارته خففت شوية جريت نفس براحه وهو سده
ضلينه نمشي ورا لحد ما وصلنه بيتنه جان اصغر من هذاك
على كدنه وبي ثلاث غرف ومطبخ وهول وطابق ثاني بس سطح
هنه هذني بيوت الولاية بغداد كلهن نفس التصميم ونفس الكبر
عدى كم منطقه مفتوحه بيوتها كبار
نزل تُـــراث قبلنه عفنه الغراض بالسيارة ونزلنه
البيت نظيف لان مفروش بس يرادله تعزيلة خفيفه
وكفوا هم يطببون الغراض واني امشي واعزل
على الماشي
كملنه تقريبا وكعدنه نرتاح بالهول
تُـــراث- رايح اجيبلكم غده من برة مو تسوون وكاحه؟
باوعلة برهوم وغمز
– شنو من وكاحه تقصد؟
فتح عيونه تُـــراث باوعلي بسرعه وباوعله خزر برهوم
وجره من شعره
– ليش ما تتأدب؟
صاح برهوم ولزم ايده يضرب بيها
– لك اخخخ هدي شعري طيح الله حظك.
– تتأدب لو لا؟
– انتَ تأدب مو اني.
دفع برهوم تُـــراث من عنده وتُـراث فتح عيونه مصدوم من دفعت برهوم
غمه برهوم وصاح
– مطي هو هيج؟
كمز عليه تُـــراث بدون ما يرد ويجر بشعره
وبرهوم
يجر بشعره وعزيز وقمر يضحكون عليهم
ضحكت وكمت ارد افاككهم اجتني ضربه ماعرف منين
شردت بريشاتي وعفتهم يتعاركون واحد فوك الثاني
كلب تُـــراث برهوم على ظهره وكعد فوكاه خانكه
تُـــراث- كول اسف يا تاج راسي.
– دولي سرسري.
تُـــراث- يعني ما تعتذر؟
– انجببب انتَ البديت انيي شكو اعتذررر.
– اي تعتذر لان هلستك ودفعتني.
فحطانين كوه يحجون وما مستسلمين
– لو تموت ما اعتذر.
– هاا؟؟
– ايي.
لزم تُـــراث شعر برهوم جره حيل صاح برهوم وراد يدفعه
بس تُـــراث ثكيل كاعد فوكاه ولازمه من شعره
– ما اكوم لحد ما تكول اسف يا تاج راسي.
– انعل ابوك ولابو راسي.
رفع رجله ودفر تُـــراث كلبه فوكاه وانداروا
صار برهوم فوك تُـــراث
بـرهـوم – تعتذر؟
– سويت ريمونتادا ساقط.
– اي يله اعتذر.
– اعتذر يا تاج نعالي.
بـرهـوم – لا يا نعال.
وخر من فوكاه واحد يباوع للثاني ويعدلون بشعرهم
ولا عبالك توهم جانوا يتعاركون باوعلي برهوم يجر نفس كوة
– وانتِ مكيفه لا تحركتي ولا وخرتي من فوكاي
جنه ثور.
– ياا والله ردت اوخركم اجتني ضربة خفت على الطفل ما تقربت بعد.
– هنيال امي.
تُـــراث- صير زلمه واجهني انتَ عوف اختي.
– طاحظك وحظ اختك.
بـــراء – اني شلي شغل؟
بـرهـوم- مو يمج، طلعيلي ملابس خل اسبح طيح حظي هذا.
ضحك تُـــراث متشمت ويعدل بشعره وكام بسرعه
اخذ ملابسة وركض للحمام قبل برهوم خلاه يكمز
ضميت ضحكتي كوة لا يشوفني، بس هو ضحك
على حركات تُـــراث وكام شرب مي وشال قمر
يلاعب بيها
وعزيز يدفعها يغار على ابو منها، هو عادي يلعب وياها
ويحبها بس اذا احد شالها من عدنه ميقبل يغار
كمل تُـــراث سبح وطب ورا برهوم بس كلموا
طببت عزيز سبحته
وسبحت قمر وسبحت اني كعدنه بالهول
وتُـراث
واكف يشد الراوتر مال النت ويدردم
– هسه انتوا شلكم بالنت عدكم العاب والعب اله نت.
باوعت على برهوم من شافه يشد بي ويحجي ما منتبه
وكف ورا ولزمه من ظهره وصرخ بصوت مال نسوان
صاح تُـــراث ويا وركعه بالراوتر على راسة
شهكت بسرعه وحطيت ايدي على حلكي، تُـــراث
من شافه برهوم مات من الضحك كعد بالكاع يضحك
وجهه صار احمرر وبرهوم لازم راسة ويغلط على تُـــراث ويفشر عليّ
تُـــراث- ههههههههههههههههه طيح الله حظك هي هاي هم سالفة.
– گـ****، اشوف الناس تخاف تخترع من يسوون هيج
هو هيج تركعني كلب ابن الكلب.
تُـــراث- منو كلك تخرعني؟
– مااكو كلشش على اساس انتَ اخترعت هيجي صار بيك صررع.
– والله انهبطت باع وجهي شلون صار اصفر.
– كلشي مابيك جنك طـ****.
– تروحلي فدوة القرد.
بـــراء- عفية كافي ماتعبتوا؟
تُـــراث- اني انهبطت زوروني.
– وين ناخذك؟
بـرهـوم -خل نروح للامام الكاظم نزور بلكت تروح الهبطة.
تُـــراث – هبطة مال وجه.
– كافي كافي عود حشااش.
– اهوو كبت الغيرره.
بـــراء – صدك نروح للأمام الكاظم نتعشه هناك؟
هزوا روسهم اثنيهم، كمنه بسرعه بسرعه بدلنه
كلنه
وطلعنه بسيارة تُـــراث لان برهوم يكول راسي يوجعني ماكدر اسوق
تُـــراث- ههههههههههههههههههههه.
– شكو تضحك؟
– ليش يوجعك راسك؟
– اسكت اسكت.
– هههههههههههههههههههاي.
بـرهـوم- ويااج اخذي حبل نربطه هناك بلكت الكاظم يعقلة.
– اعقل انتَ أول سرسري.
– عاقل اني تروحلي فدوة.
بـــراء- عفية كافي رايحين للأمام شوية اهدو.
سكتوا ثنينهن بس ضلوا واحد يخبث على الثاني
من وصلنه نزلنه تُـــراث شال قمر وبـرهـوم شايل عزيز
لان جانت ازدحام وهواي ناس مو مال نخلي يمشي
مشينه سوه وكعدنه بمكان فارغ، باوعت على الصحن من بره
حسيت روحي بردت ورتاحيت بشوفة ضريح الامام
( موسَى ابنَ جَعفر)
باوعت عليهم وابتسمت عزيز يضحك فرحان
سوده عليه
صاره فتره ماطالع مخلصها بالبيت محد مطلعه
باوعت على تُـــراث حاط قمر بحضنه ويباوع على الصحن
جذبني كلامه وهو يهمس بصوت مسموع
– انتَ السبب بجيتها الي
اريدك تكون السبب بجمعتي بيها.
باوعتله وهو كالها ودنك باس راس قمر وهي بحضنه
ابتسمت هي ورفعت اديها تضرب بي على وجهه وتضحك
باوعت على تُـــراث وكتله
– ردت اشربها حليب بس شفتها تاركته وكله تاكل اكل عادي.
– اي هي من طلعن سنونها كامت ماترضع بس تاكل.
– فدوة اروحلها.
– اسم الله عليج حبيبتي.
بـــراء- اني راح اروح ازور واصلي جوة اذا تاخرت عليكم دكوا عليّ.
هزوا روسهم ثنينهن واني دنكت شلت قمر
– راح ازورها وياي.
هز راسة بـ اي، عفتهم وفتت بأتجاه التفتيش
دخلت
زرت وزورت قمر، صرت على جهه كعدت قمر كدامي
واخذت تربة، وكفت توني كلت الأذان وزحفت قمر بعيد عني
كطعت صلاتي وركضت جريتها كعدتها كدامي
ضليت صافنه بالله هسه شلون اصلي وهاي ماتثبت
حطيت جنطتي كدامها شفتها التهت بيها
رجعت
وكفت اصلي وسجدت اول سجده ورجعت رفعت راسي
قمر ماشيه مسافه صغيره عني، وكفت بسرعه وهي تزحف وتوكف بمكانها تلعب
اكيد علما اخلص صلاتي مراح تروح مكان بعيد
دنكت سجدت وطولت وبالسجده رجعت رفعت راسي
اقره زيارة الامام الكاظم، كملت رفعت ايدي مسحت بيها وجهي
التفتت بالصحن شفت جنطتي مشموره بالكاع
وقمر مختفية!!!
” نــــهروان ”
نايمه بالغرفه وروحي رايحه مصدومه مامستوعبه الي صار
شلون مات ابراهيم وتُــراب يكول طلع!!!
تكأبت
حسيت روحي راحت تأذيت وتعذبت حسيت نفسيتي
تعبت العشته ماكدر انسا لحد هسه كلما انام
تجيني
الكوابيس، اني بغرفه، العُثمان، مرات اشوفه
يمثل بجثه
بس هاي جقه سيف اخوية!!!!
افز خايفه مرعوبة اسوء ايام مرت عليّ جنت اكول
بس ارجع اكدر اتخطه بس ماكدرت ابد ماكدرت
لا كدرت انسه ولا اتعود لحد هسه اتذكر البنيه الكال
عليها تُـــراث شلون اغتصبوها وكتلوها واخذوا اعضائها
ياماما شنو من عيشة هاي؟ شلون تحملت!!
روحي مفرفحه حابسة روحي بالغرفه ماحب اشوف احد
يجون علينه خطار يتحمدولي بالسلامه يجون مصطفى وهمام والبقية
ما اطلع لاحد حابسه روحي بالغرفه وبارون حار شيسويلي
اريد اراجع نفسي اريد اقتنع اريد اعرف العشته
هذا كله
صدك؟ مرات اكول خاف جنت داخله بغيبوبه من جنت بالتخييم
وهذا كله وهم وحلم بس!!
بس مو بيدي كلشي ينعاد عليّ يأذيني انجبر اصدك
هذا كله صدك بسبب الأثار الي بجسمي والكدمات
الي تخليني اصدك، جريت حسره وصعدت الغطه
على راسي من سمعت صوت الباب يندك
– روح باارزم ما اطلع.
ازدهــار- مااماا نــــهروان مااماا اني امچ افتحليليي الباب ماماا.
فتحت عيوتي بسرعه وخرت الغطه من فوكاي ونزلت من الجرباية
– مااامااا اجتتت مااماا اجتيي.
فتحت الباب بسرعه شفتها كدامي نسيت!!
نسيت كلشي
نسيت كلشي سوته الي اعرفه بس هاي امي كدامي
شهكت وهي حضنتني حيل واني ضميت روحي
بحضنها ابجي
– مااماا.
– ياروح ماما بنيتي نونه.
شهكت ابجي بصوت وهي تبجي وياي وضامتني لحظنها
– اشش ياروح ماما لا تبجين بنيتي كافي ماماتي.
جرتني للهول حاضنتني كعدت على التخم وهي حاضنتني
واني ضامه روحي بحضنها حيل واشهك
– ماماا مشتاقتلج بس انتِ ما تجينييي ماتجينيي تحركين كلبيييي.
وخرتني من حضنها تباوعلي بقهر وتعدل بشعري
– حقج ياروحي حقج كافي لا تبجين ياروح ماما لا تبجين.
– ماماا اني نفسيتي تعبت ماتعرفين شعشت ماما.
رجعتني لحضنها تمسح على شعري وتبوس بوجهي
– سوده عليه بنيتي سوده عليه الحمدلله على سلامتج
الف الحمدلله من رجعتيلي سالمه.
وخرت من حضنها امسح دموعي باوعت بالهول
كلهم كاعدين ومن ضمنهم جهالها ورجلها كاعدين
باوعتله وخزرته والدموع بعيني وهو ابتسم مستهزء
ودار وجهه، ماكدرت اسكت باوعتله ونترت بصوت مبحوح من البجي
– شكوو تضحك ماا عااجبك؟؟؟
ابتسم وعدل الستره مالته ورفع تك حاحب
– حجيت شي اني؟
– لا تستهزءء بية وعينك نزلها.
ازدهــار- نونه ماما.!
– ماما كليله لا يبااوعلي ويضحك هيج.
– مو عليج بنيتي ويا جهاله.
– لاا عليّ اني شفته.
جرتني تحضن بية وتمسح على شعري
– كافي ماما لا تحركين بدمج مو دا احجي وياج؟
شهكت ابجي وخرت من حضنها باوعتله وصحت
– اخذتهااا من عنددي يله ارتاحيتتت اخذهاا؟
بــارون- روااان.
كعد بصفي وجرني عليّ حاضني واني ابجي واباوعله بحقد
– كله من وراااك انتَ اخذت ماما من عندي وتحرك كلبي
تخليني اغلط عليهاا واني احبهاا تحرك كلبيييي.
باوعلي مصدوم مني لان بجيت كدامه واحجي بقهر
– وين ماخذها؟ غير صارت مرتي؟ اجي اكعد يمكم؟
مو جبتها الج كم مره وانتِ طردتيها؟
– ايي بسببك لان عاافتنه واحنه صغاار من وراك.
– لا تلوميني هو هذا نصيبنه وتزوجنه لا تضلين تخبطين نهروان.
– انتَ التخبططط مو ااانيييي.
سد حلكي بــارون وهو كام يعدل بالستره مالته
اشر لـ جهاله ولـ ماما
– يله نرجع.
وخرت بــارون وكمت بسرعه
– ماتروح مااماا روح انتَ وجهاالك.
– اخوتج هذولة.
– مااعنددي اخوة غيرر سيففففف.
– صوووتج!!
بــارون- لاا تصيحح عليهاااا.!!!
جرت اديها ماما مني بسرعه وراحتله تاشرله على الباب وتحجي
– اخذ الجهال وروح هسه اجي وراك اني.
هز راسة
واخذهم وطلع وهي التفتت عليّ جرتني حضنتني وهمست
– اجي عليج والله اجي اشوفج.
شهكت وهمست بخنك
– ضلي يمي.
– ماكدر يروحي بس والله افرغ روحي بيوم واجي اشوفج واضل يمج.
– حبابه ماما.
– يمه بنيتي.
رجعت حضنتني واني ابجي اريدها تضل بس ماسمعت مني باستني بخدي وطلعت ورا
شهكت وضميت روحي بحضن بــارون ابجي
عصرني بحضنه
يسكت بية واني ابجي بعلوا صوتي واشهك
– ماضلت يمي ماخلاها يمي ماخلاها الجلب ماخلاهااا.
– اششش روان كافي حبيبتي كافي بناتي لا تبجين.
كعدني على التخم يشربني مي واني راسي يريد ينفجر من البجي
اجن مريم وغيد من الغرفه وياهن خاله كعدن يمي
وغيد نيمتي على التخم وخلت راسي على رجلها
كامت تفرك براسي على كيفها وتهمس
– كافي حبيبتي لا تبجين راسج مو زين عليّ.
سكتت اشهك بصوت ناصي وهي تمسح بدموعي وتفرك براسي
اختنكت كلش ماكدرت اضل كاعده كمت بسرعه
من حضن غيد وباوعت بــارون وهمست بصوت مبحوح
– مخنوكة.
جرني لحضنه حضني حيل وباس راسي
– سوده عليه.
ام غيد- كوم يمه بارون اخذها للكاظم خل تزور شوية يرتاح كلبها
هم مو زين صارلها ايام محبوسة هنا بالغرفه وتبجي.
باوعلي بــارون وهمس
– اخذج؟
مسحت عيوني وهزيت راسي بـ اي، اشر لـ غيد تساعدني
اخذتني للغرفه لبستني قميص جوزي وبنطرون اسود
ولفتلي الشال ولبستني العبا وعدلتهن على راسي وهمست
– ادعيلنه وياج.
هزيت راسي بـ اي ومسحت عيوني
طلعت ويا بــارون اجر النه سيارة وصعدنه بيها
نزلنه بالكراج
دفع بــارون الكروة ولزم ايدي بين اديه
– سمي باسم الله وصلي على محمد خل يبرد گلبچ.
هزيت راسي وهمست
– بسم الله الرحمن الرحيم، اللهم صلّ على محمد وآل محمد.
عبرنه التفتيش لحد ما وصلنه للصحن افترقنه اني ويا
هو راح بجهة واني بجهةة واتفنه على مكان نجي بي
مشيت عبرت التفتيش وطبيت لجوه، حسيت
ريحة البخور
والهوه البارد دخلن لكلبي ونسمات الهوه الي تلامس بشرتي
جريت نفس وفتت كعدت يم الشباك كمت ابجي
وابجي وادعي من الكاظم يبرد كلبي وينسيني لو ربع الي مريت بي
وينتقم من كل شخص كتل طفل بريئ لو بنيه لاحول ولا قوة
كمت وكفت من اجت مره شايله ريشه وتصيح
– تحركي زاايرة تحركي ماتشوفيهن يردن يزورن تحرركي.
هزيت راسي وكمت عدلت عباتي وخرت من يمهن
وكفت على جهه اصلي صلاة الزيارة وبس كملت
كعدت بالكاع ومرجعه راسي على الحايط وصافنه
على النسوان الي تفوت كدامي ويرحن يزورن
فزيت من صفنتي من شفت بنيه تزحف كدامي
اجاني شعور غريب من شفتها
هي صح منطيتي ظهرها بس مبينه هاي قمر بنت تُـــراث!!!
طفرت بسرعه رحت عليها وصرت كدامها
شهكت
بصدمه، هاي صدك قمر!!!
يتبع…
الفصل التالي اضغط هنا
يتبع.. (رواية تراث النهروان) اضغط على اسم الرواية لتجد الفهرس كاملاً بجميع الفصول.