رواية تراث النهروان – الفصل الخامس والعشرون
فتحت عيوني مصدومه بكلامها
– نهروان شداتحجين؟ تُـــراث مااميت!!
باوعتلي بسرعه وكالت
– لاا لاا برااء ماات ماتدرين؟؟ تُـــراث كتلوا بالسلاح كداامي مات اني شفته!!
– لااا نهروان تُـــراث ماميت عايش هو بس تصاوب حجالي كلشي اعرف شصار وياج هو ماميت بس تصااوب.
فتحت عيونها وتباوعلي بصدمه مامستوعبه اي شي
صارت تتلفت والدموع متعلگه برموشها
– واني… اني كل هاي الفتره عبالي مات!
تُـــراث ماميت!
كالتها وضحكت بصوت ورجعت تبجي وتمسح بدموعها
– يماما واني اني!!
ضحكت ومسحت عيونها وباوعت على قمر ورجعت باوعتلي
– عبالي مات ما ادري ما ادري بي.
بــــراء- لا عايش هو واجه ويانه هنا موجودين بره هو وبرهوم وعزيز.
كامت بسرعه وجرتني من ايدي تحجي بحماس وتكمز
– موجود هنا؟ كومي كومي اخذيني اله يله كوومي.
هزيت راسي وكمت واني اباوعلها معقولة راح ترفص تُـــراث وهي تحبه هيج؟
اخوية ليش يفكر هيج وخاصه بعد ماشفتها هيج
باوعتلها وهي تمسح بدموعها ومنتظرتني اخذها لـ تُـــراث
هزيت راسي بـ اي ومديتلها قمر
– اخذيها انتِ.
” نــهروان ”
باوعت عليها من مدتلي قمر اخذتها بسرعه منها وشلتها
باوعتلها وهي تباوعلي بأمل وكانها لكت الشي الي تريده
مشت هي كدامي واني امشي وراها وكلبي يريد يطلع من مكانه وصلنه لمكان اشرت من بعيد وهمست
– هذولاك.
باوعت من بعيد وعيوني تدور عليهم ثبتت عيني من شفتهم
تُـــراث نايم على رجل برهوم ويلعب بتلفونه وبرهوم
يسولف ويا وهو مغلس وبس يهز براسة وعزيز كاعد بصفهم ياكل جبس
مشت هي وصارت كدامهم باوعلها تُـــراث وطفر بسرعه كالها
– بــــراء قمر وين؟
هي ضلت ساكته باوعلها عيونها حمر مبينه باجية
بـرهـوم- شبيج بــــراء وين قمرر؟؟؟
باوعتلهم وكالت
– وراكم.
التفوا اثنينهم بسرعه عليّ اجه تُـــراث وجر قمر من حضني
بدون ما ينتبه لوجهي غمضت عيوني من صار قريب عليّ
وبدون ما احس لزمت قمر ماخليته ياخذها
رفع
راسة خازرني
ومن انتبه عليّ فتح عيونه مامستوعب ورجع يباوع على وجهي وخر ايده من قمر وكف يباوعلي
من فوك لجوه واني اباوعله وكلبي يدك وجسمي
يرجف وصوت نفسي عالي، يباوعلي والصدمه على وجهه
رمش ما مستوعب وهمس
– شـ شلالي؟؟
بلعت ريكي وهزيت راسي بـ اي
– تُـــراث.
بلع ريكه وباوع على براء ورجع باوعلي
– نهروان شجابج وشتسوين هنا!
لزمت ايده براء وهمست
– العالم يباوعون علينه خل نكعد ونحجي.
باوعتلها ومديت قمر الها
– ماكدر اضل بــارون ينتظرني.
اخذتها من عندي وهزت راسها باوعت على تُـــراث وهمست
– عبالي متت.
ضحك وباوع على عيوني
– مو كتلج بسبع ارواح.
ابتسمت ومسحت عيوني وباوعت عليهم، باوعت على برهوم ولوحتله بايدي
– شلونك برهوم؟
ابتسم وباوعلي
– الحمدلله بخير وانتِ شلونج؟
– مو زينه.
كلتها ودنكت راسي مقهوره
عقد حاجبة تُـــراث وجرني من ايدي وهمس
– شكو شبيج؟ شلال صاير شي؟ لبسج وكلامج احد مسويلج شي؟
اهلج حاجوج؟
جريت ايدي منه بسرعه
– لا لا محد سوالي شي بس اني ماكدرت اتخطه تُـــراث
كلشي بالي مانسيت شي تعبت نفسيتي كلش
احتاجيت
ارتاح لهل سبب جابني بــارون لهنا وهسه لازم ارجع.
تُـــراث- بس تغيرتي حيل اني مو وياج؟ شفت اسوء منج وعشت اصعب اللحظات.
– وعلى اساس انتَ عاقل هسه؟
ضحكوا برهوم وبراء وهو عض شفته ويضحك بفرح عبالك مدحته مو ضحكت عليّ
تُـــراث- شلال لا تروحين ضلي مشتاقلج.
باوعت بعيونه وهمست
– انجب.
ضحك برهوم بعلوا صوته وبراء ضحكت وهو گلب وجهه عود زعل
ابتسمت وباوعتلهم
– الحمدلله من شفتكم بخير ومرتاحين صدگوني كل لحظة عشتها وياكم ما نسيتها ابد
حسيت روحي بيتي الثاني والله وهواي دعيت الكم ربي يوفقكم.
بــــراء- ياروحي خيه واجبنه هذا الحمدلله من رجعتي سالمه لاهلج
شنريد احنه بعد الحمدلله على سلامتج والله فرحت من تُـــراث كال رجعت لاهلها.
هزيت راسي ولزمت اديها
– بس فرحتي مو كامله خسرت زميلي مات بسببي وجان عبالي تُـــراث هم مات
تأنيب الضمير ما فاركتي ابد.
تُـــراث- لا تكولين هيج رب العالمين كتبلج عمر جديد وهو خلص هذا حد عمره الله يرحمه.
هزيت راسي وهم ترحموا اله كلهم بصوت رفعت
العباية اعدلها على راسي باوعلي تُـــراث وكال مبتسم
– طالعه حلوة بالحجاب والعبا.
ابتسمت و بــــراء ضحكت مأيده كلامة
– اي والله استغربت من شفتها لوما عيونها ولا اعرفها هاي نفسها نهروان.
ابتسمت تُـــراث وميل راسة
– اني اعرفها لو من بين ألف مره.
رفعت تك حاجب وضحكت
– لا تجذب واكفه كدامك وشايله قمر ما عرفتني.
– هههههههه لا مو اني شفت بس شي اسود يعني شمدريني انتِ تلبسين عباية؟
شفت بنيه لابسة عبا ماباوعت على وجها.
ضحكت وهزيت راسي
– صاير تستحرم.
– من زمان استحرم، بس جد المره المُحجبه مالي عين اباوعلها.
رفعت تك حاجب وباوعتله شلون بسمار
باوعتلهم اخر مره وهمست
– لازم اروح بــارون ينتظرني.
تُـــراث- خليج يمنه؟ واني اوديج.
– ماكدر راح يخاف عليّ اكثر، الحمدلله من شفتكم وتطمنت عليكم.
– تمنيت تطولين اكثر.
– ان شاء الله نتشاوف مره ثانيه مع السلامه.
– الله وياج.
ابتسمت ولوحت الهم بايدي درت وجهي ومشيت
بعدني ما ابتعدت وسمعت صوت بــــراء
– اووكفي اووكفي.
التفتت عليها بسرعه ورجعت الهم
– ها براء؟
– عندج تلفون؟ عادي ناخذ رقمج؟
باوعت على تُـــراث شفته داير وجهه مسوي روحه يحجي ويا برهوم
ابتسمت وهزيت راسي
– اي عندي.
مدت تلفونها اخذته كتبت رقمي وانطيته الها
– بس ما فاتحته من يوم السفره اليوم افتحه ودكي عليّ بليل احفظ رقمج.
– تمام.
ابتسمت ومشيت من يمهم
وصلت للمكان الي بــارون ينتظرني بي مالكيته
ضليت واكفه امسح بوجهي واعدل عباتي واتلفت ادور عليّ
المُشكله مجايبة تلفوني وياي عليمن ادك عليّ
درت
وجهي باتجاهم شفتهم من بعيد رجعوا كعدوا
بالكاع
وعيونهم عليّ ابتسمت واحس كلبي يرفرف من الفرح
ماتوقعت ارجع اشوفة مره ثانيه واني كل هاي الفتره
راسمه بعقلي انوا هو مات اني ماجنت متأكده
بس
من شفت حالته وضعه بيناتهم ما توقعت يطلع عايش
فزيت على صوت بــارون يكول
– روان؟!
باوعتله بسرعه ومشيتله
– وين رحت عني بــارون!
اجه وكف كدامي يعدل بالشال مالتي ويحجي
– خفت عليج يروحي شفتج تأخرتي خفت صايرلج شي.
– لا بس ضليت كاعده هناك يم الشباك.
– زيارة مقبولة.
– منا ومنكم بارونتي.
ضحك وجر ايدي نمشي سوة
بــارون- جوعانه؟ شتدرين تاكلين؟
– اي شي.
– لا اني مصدوم، اسالج شتاكلين وتكليلي اي شي؟
ضحكت وحطيت ايدي يم حلكي افكر
– اريد لفة صاج ولفة كص وبطل ببسي.
– بعيني.
مشينه اني ويا يم مطعم طلب اللفات وضلينه ننتظر
شوية واخذهن واخذ اله ورجعنه كعدنه ناكل
بــارون- شلون تحسين نفسج روان؟
– احسن.
ابتسم وهمس
– الحمدلله.
ابتسمت وكملت اكل واحس العبا بهذلتني مال خاله ام غيد
جبيرة عليّ وتسحل كوة امشي بيها وانوب مابيها تچه
ما اعرف البس عبا بدونها لان تزلك من راسي
باوعلي
بــارون وكال بضحكه
– طالعة جنج هذني النسوان من يشدن العبي على خصرهن ويحشن.
ضحكت وكتله
– لعد شبية هسه اشدها واكوم اشحلك.
ضحك بقوة وكام يكح ، ضحكت عليّ وكتله
– شبيك؟
– اشحلك؟ اسمها احشلك.
ضحكت وهزيت جتفي بمعنى عادي
– عادي عادي مشيها.
ضحك وهز راسة بـ اي، كملنه اكل وكمنه طلبت منه اطب اصلي صلاة المغرب والعشة وصلاة الزيارة واطلع
بــارون- تمام واني راح اصليهن هنا بس تكملين تعاي.
هزيت راسي بـ اي ورجعت دخلت جوة صليت وقريت دعاء الزيارة وطلعت
لكيت بــارون مكمل وكاعده ينتظرني طلعتله
ابتسم
واشر يله، دنكت لبست حذائي وطلعنه سوة
صرت
امشي واتلفت بالمكان عسى ولعل اشوفهم هنا
بس
جان ازدحام وهواي ناس حتلوا اشوفهم مراح اعرفهم
مشينه يم المحلات وهو اشتره كم شغله للبنات
واني شتريت لخالة ولـ سيف بس كملنه رجعنه للبيت
تعبانين وصايرة دنيا اليل لكيناهم كاعدين بالهول
ينتظرونه، سلمنه عليهم وكعدنه يمهم
ام غيد- شلون صرتي روان؟
– الحمدلله خاله احسن.
غـيـد- هههههههههه ماما شوفي عباتج شصاير بيها.
ضحكت خالة وباوعت عليها
– فدوة الج حبيبتي.
ابتسمت وكمت اغمز لـ غيد واضحك
– على عناادج.
طلعت العلاكه مال خاله ومديتها الها
– وهذاا العووض.
اخذتها ومن شافتها عبا ضلت تحجي علينه واني مغلسه
باوعت على غيد ومريم
– غراضجن عند بــارون مو عندي!
باوعن على بــارون واني اخذت علاكة سيف وانطيتها اله
– هذا لسيووفي.
اخذها من عندي وضحك من شافه دريس مال طوبة ورجع كلب وجهه
سـيف- نوونه شنوو هااي؟؟
– شنو؟
– برشلونه؟ مو تدرين بية ريالي!
ضحكت واخذته من عنده
– ايي نسيت هاك شوف هذا؟
اخذ الثاني شافه بي ريال مدريد ضحك وباس علامة الريال
– الله اموت عليكم.
ضحكنه وبــارون يقلد عليّ
– اكعد راحه.
ضحكت وباوعت على بارون طلع علاليك البنات
وانطاهن الهم
اخذنهن وفتحنهن طلعن شالات وياهن سوار
ابتسمن
وتشكرنه هز راسة وباوعلي
– انتِ اجيتي وياي بس ماشتريتي شي فـ اني اشتريتلج.
ضحكت جريته من خده بسته وهمّ يباوعولي بفرح
لان كدرت ارجع اندمج وياهم واضحك من بعد فتره
كُلش طويلة، باوعتله منتظرته ينطيني الهديه مالتي
طلع سواء مكتوب عليّ ( وحيدتي ) قوست شفايفي
بحزن وباوعتله جريته حضنته حيل وبسته بخده
– اروحلك فدوة اني.
ابتسم وحضنتي باوع عليهم وكال
– اخذوا راحتكم مبينين نعسانين واحنه تأخرنه بره.
كاموا كلهم للغرفه ضلينه بس اني وبــارون كاعدين
باوعلي وجر حسره، باوعتله وهمست
– شبيك بــارون؟؟؟
– نـهروان، كدرت ارجع البيت لـ خاله ام غيد.
” بـــراء ”
راحت نهروان بعد ما ودعتنه، عيون تُـــراث مافاركتها
بس اختفت عن نظرنه التفت باوعلي وجرني باس
راسي حيل ورجع جر تلفوني، اخذته من عنده
– ممنووووع!!!
– بداعت الكااظم.
– والكااظم ما انطي وخر تُـــراث.
جريت التلفون منه وهو كلب وجهه يريد رقمها
كعدنه وبرهوم يكله
– هسه ارتاحيت؟ مو شفتها بخير ومرتاحه وحتى من شافتك فرحت
ليش ما تبادر وتنجب؟ تحب تسوي روحك العشاق الولهان المتعذب.؟
ضحكت وضميت وجهي وتُــراث يباوعله صفح
– اليشفعلك احنه هسه بالأمام.
– خاب دگم.
– غير انتوا ما تعرفوها اني ادري راح تكرهني والله
ماكدر اعلق روحي اكثر ولا اعلقها هي وبعدين من تدري تكرهني وتتأذه.
– ياخي صارحها؟
– لا ماكدر برهوم اسكت.
كام من يمنه وحط قمر بحضني وكف على صفحه يصلي
وبرهوم كام ويا حطوا الجهال يمي وبدون يصلون ثنينهم
ورا فتره من كملوا رجعوا كعدوا يمي كام تُـــراث
جاب اكل واجه كعدنه نتعشه وهو يدور بعيونه
بس
ماشفناها بعد اختفت من نظرنه
كملوا واجوا كعدوا خليت الجهال يمهم ودخلت
جوة صليت ومن كملت طلعت لكيتهم شايلين
الجهال
واكفين ينتظروني دنكت لبست حذائي ومشيت وياهم
طلعنه اخذو اكل حتى ناكل بالبيت مو هنا
صعدنه
بالسيارة ورجعنه للبيت
طبينه نزعت العبا مالتي وبدلت بسرعه لبيت دشداشة
وكعدت افرغ الاكل بالمواعين وهم يبدلون ويتعاركون
وعزيز حاط قمر ويسحل بيها اله تكومين توكفين وياي
ضحكت وجريتها لحضني
– عوفها ماما هي من تكبر شوية تكوم توكف وتلعب وياك.
هز راسة ضايج وراح كعد بحضن ابو كعدنه نتعشه
وتُــراث خلصها صفنات
– اكل تُـــراث.
– لعد شداسوي.
اكلوا كاموا شلت الصينيه وغسلت الماعين وبدلت
للجهال ونيمتهم رحت للهول كاعدين تُـــراث وبرهوم يعمرون بالنركيلة
باوعلي تُـــراث وكال
– تعاي اوخشتي.
– تُـــراث اوختي شنو مو حلوة هاااي.
– لا مو اوختي اوختشي.
ضحكت عليّ شلون يكولها جرني من ايدي كعدني بصفه
– انطيني رقمها.
– لااا.
اندار يباوعلي وصاح
– شنوو لاا شبيجج.
– تُـــراث لاا ترضة تصارحها ولا ترضه تكلها على الي صار ليش تريد رقمها؟ تريد تضل تحاجيها لاا مايصيرر يمةة حراام حرااام.
– هااي شبيج شمسووي اني.
– مااااكو امسحه هسه ماريد رقمها اني.
– لاااا يله ماااريده طنكررت بعد طنكررت.
بـرهـوم- حيلل بعد ايدي لا تنطي اله.
– انچببب لا اخذ اختي منك واشرد.
– بــــراء انطي رقمها.
جر تُـــراث التلفون وحطه بحضني
– دكي عليهااا حاجيها.
– ماريد.
– برااء شبيج دكي دكي.
– مايحتاج ادك عليها.
– لا دكي شوفيها وصلت للبيت.
– اي وصلت شوف الوقت قابل تضل لسه برة.
– برااء لا تشلعين كلبي دكي!
باوعتله من حجاها بتعب جريت نفس واخذت التلفون ادك عليها
طلعت رقمها ودكيت عليّ طلع يرن، باوعت على
تُـــراث ابتسم ونزل عينه على التلفون شوية واجانه صوتها
نــهروان- الو، بــــراء؟
– اي حبيبتي.
– همزين دكيتي توني فتحته التلفون.
– ها تمام.
احجي وتُــراث يكرص بية يريد ياخذه واني ادفع بايده
– بــــراء بيج شي؟
– ها، لا لا حبيبتي بس..
تُـــراث- نهروان اريد احجي وياج.
باوعتله بزعل ماراضية ابتسم بخباثة هي سكتت
شوية واجه صوتها
– احجي اسمعك.
– لا وحدنه.
بــــراء- صخام الصخمني.
بـرهـوم- طك اصبع يا وطن.
نــهروان- تمام.
باوعت على التلفون بصدمه وهو جره مني بسرعه وطب للغرفه وسد الباب
فتحت عيوني مصدومه وبـرهـوم يضحك
بــــراء- ديله اني احاجي منو اعتب على منو.؟
– حبيبي خليهم براحتهم.
باوعتله وصحت
– ياااء!!
طفر من مكانه وراح للغرفه
– شعليةةة انيي.
” نـــهروان ”
بلعت ريكي وجريت نفس باوعت على الغرف كلها
مسدوده ونايمين كلهم حطيت التلفون على اذني
اجاني صوته
– شلال.
– تُـــراث.
– اويلي.
– بدون استهتار عفية.
– شنو قصدج اني مستهتر؟
– كلششش.
– عبالي تكولين لا.
– لا اني صريحه.
تُـــراث- بربج شنو تحسين من حجين ويا شخص عبالج ميت؟
– لحد هسه مصدومه اني عبالي انتَ متت وبنفس الوقت ما متأكده
يعني اريد اجذب نفسي بس من شفتك واكع بنصهم
والدم ينزل منك بالكاع كلت هذا مات.
– هم بجيتي عليّ؟
نـــهروان- اي، بجيت وهواي هم تدري مو علمودك
بس انقهرت يعني لان ردت تساعدني.
– شصار وياج من اخذج العُثمان؟
بلعت ريكي وجسمي رجف من تذكرت الي صار
غمضت
عيوني وصرت احجيله كلشي حسيت دا احجي
ويا نفسي
كأنُ محد يسمعني ولا احد يمي
نـــهروان- ماعرف كل لحظة اتذكر اختنك احس شي ويقبض نفسي
ماعرف شيصير بية بس من شفتك نسيتهن
ليش
وشلون ما ادري بس احس ارتاحيت واتطمنت من شفتك بخير.
سمعت صوت الجداحه واجاني صوت نفسه وهمس
– اتمنى اصير مثلج واكدر احجي كلشي بدون ما افكر.
– ماكو شي يبقى مضموم كلشي راح ينكشف بعدين
ماكو داعي تضمه بكلبك وتخلي يأذيك احجي.
– ماكدر.
كالها وسكت ضليت ساكته وهو ساكت فتره طويلة
باوعت على الخط لسه متفوح همست
– الو؟
– وياج.
– ليش ساكت؟
– لعد شحجي؟ اني حاليا بحاله اذا احجي اجفص خليني ساكت.
– وشنو الجديد دومك تجفص.
– طيح الله حظج.
ضحكت وهو ضحك وكال
– مشتااااق.
– امشي ولي.
– لاا ليششش توني نشنشتتت.
– نشنش على روحك اريد انام اني.
– نامي وخلي الخط مفتوح.
– ايعع هسه يكلي اريد اغفة على انفاسج.
كلتها وهو ضحك بعلوا صوته وكال
– خررب روحج ولي نطمرري.
ضحكت وسديت الخط خليت التلفون يم راسي ومددت
نمت بالهول على القنفه وعيني على التلفون
ابتسمت
ماعرف شنو هذا الشعور الأجاني فجأه تالي وكت
حطيت راسي على المخده وغفيت بسرعه مرتاحه
وماعرف شنو السبب..
” غــيـد ”
فزيت بليل عطشانه جريت تلفوني شفت الساعه
جريت نفس وكمت بسرعه للمطبخ شربت مي
وبالرجعه
سمعت الأذان بعد مو مال اغلس
توضيت ورحت للهول اصلي لكيت شمشون نايمة
فرشت السجاده وحطيت التربة وبديت اصلي كملت
وكعدت بمكاني على السجاده اسّبح ومرات اصفن
فزيت على صوت شمشون
– بسسس ادعيلي وياج.
باوعتلها وضحكت كمت وشلت السجاده
– ادعيلج شلون ما ادعيلج.
باوعتلها كامت تثاوب وتتكلب بمكانها
غيد- طردناج من غرفتج تحملينه.
ضحكت وهز راسها
– ايي بعد كم يوم وترجعون لبيتكم.
– ان شاء الله.
كلتها وكمت وهي طكت اصبع يمي
– الوو ترى بيتكم رجع بـ اسم امج؟
باوعتلها بسرعه شلت السجاده حطيتها على الميز وكعدت يمها
– شتكووولين؟؟؟؟؟
– ايييي بــارون كال رجع بيتكم.
– شلوون؟
– والله ما اعرف بس الاعرفه کدر يارجعه الكم.
ضليت اباوع عليها
وهي صافنه هزيت راسي بـ اي وكمت من يمها بسرعه
رجعت للغرفه كعدت وحطيت ايدي على راسي
ماعرف ليش اختنكت وعيوني دمعن حسيت نفسي
مختنكه اريد ابجي ماعرف ليش بدال ما افرح
بيتنه
رجع النه بس فكرت اعوفهم وارجع غريبة صعبه عليّ
شفتهم بدون يكعدون غطيت راسي بسرعه ونمت
بس حطيت راسي غفيت بسرعه بدون ما احس
وماعرف شلون، كعدت ورا كم ساعه يله حسيت
عليهم صوتهم وهوستهم، كمت عزلت الغرفه
وطلعت
بالهول احس كلبي مقبوض اكيد راح يحجي بالموضوع
وما خاب ضني لكيت شمشون وامي ومريم واكفين
يسوون الريوك وسيف يفتر يمهم وشمشون اول مره
من بعد فتره طويل تضحك وتسولف ويانه بس مرات
ترجع تصفن فادتها الزيارة كدرت تغير من نفسيتها
شوية، صبحت عليهم وكفت اساعدهم بالريوك
وكفت بصفي شمشون وهمست
– شبيج؟
ابتسمت وهزيت راسي
– مابية شي.
كملنه الريوك وديناه للهول وصبيتا كعدنه بالهول نتريك
شوية وطلع بــارون من الغرفه
– صباح الخير.
بلعت ريكي من سمعت صوته ضليت مدنكه وهم ردوا عليّ
كعد يمنه وكال
– الحمدلله بدت الامور تتحسن واول شي رواني صارت زينه بفضل الله والأمام الكاظم.
ابتسمت شمشون
ودنكت تاكل
رجع باوع على ماما وكالها
– وبيت ام غيد رجعلها بالحفظ والصون.
رفعنه روسنه
كلنه مصدومين منه وهو ابتسم وباوعبنه
ماما- صدكك يمة؟؟؟
– اي والله خاله رجعته الكم مو كتلج بيتج يرجعلج؟
– شلون رجعته؟ وشلون كدروا ينطوك البيت بهاي السرعه!!
باوعنه عليّ وهو باوعلنه وبده يحجي
– اني مو كتلكم البيت يرجع؟
ومن يومها اني ما تركت الموضوع ولا خليت الضابط يتركه وياي
سألته شلون اكدر ارجعه كال ماكو اي طريقه غير هم يتنازلون عنه
هنا أيست اكدر لان همه اخذوا بالحيله وأجبار
اكيد مراح ينطونه بسهوله
بس بمساعدة الضابط كدرنه ناخذه، مثل ما همه اخذوا بالحيله
احنه بالمقابل هم راح ناخذه هيج حاجيتهم
واتفقت وياهم
اشوفهم بمكان نحجي جانوا مترددين بس
جاسم
جان الموضوع عادي عنده اجه هو وعمار
وسجاد
سالم ما اجه وياهم وكفنه بمكان عام وضلينه نسولف
كدرت استفزهم بكم كلمه وبالمقابل هم تهجموا عليّ
سجاد ابن عمج عبالك مكيف شايل سلاح بسرعه طلعه.
فتحت عيونها شمشون وصاحت
– عززة وانتَ شسووويت؟
ابتسم وسوه لفه ومدها الها
– اكليها حتى اكمل.
اخذتها تاكل بيها وصافنه عليّ
بــارون- اني ماسويت شي ضليت استفز بيهم
لحد ما راد يرمي
هنا طلع الضابط وجرجرهم للمركز كلهم واخذهم
ضلوا يحجون عليّ وشلون استفزيتهم هنا كال الضابط
– انتوا مو منحقكم تشيلون السلاح والتصوير عندي تهجمتوا عليّ ورفعتوا سلاح بوجههه وهو وحده.
كاموا يصيحون ويتعاركون شلون سويت هيج والضابط
يهدد بيهم يذبهم بالحبس ويخوف بيهم وهم خافوا صدك
استسلموا بسرعه وبالمقابل كتله اريد اشتكي رجعوا يتهوسون ويتعاركون هنا ساومتها ما اتنازل اذا مو ترجعون البيت.
جر نفس واخذ كلاص المي يشرب ورجع يكمل
– ماقبلوا وعاندوا بس بتهديد الضابط وافقوا وكل عقلهم
بعدين يرجعونه الهم بس الضابط ذكي عجبني كدر
يساعدني ويكتب بيهم تعهد لا يتعرضون النه ولا يلفون لهاي المنطقه بعد.
كمل كلامه وماما صارت تتشكره ومريم فرحانه
ابتسمت وسويت روحي فرحانه وتشكرته
– ماقصرت گد كلمتك كدرت ترجع النه البيت وهسه
ننقل الاغراض حتى وراها نتطلك.
عقد حاجبه مستغرب طريقة كلامي والبنات باوعولي مستغربين
بــارون- اي ان شاء الله الطلاك ما يطول مثل العقد
بسهوله نكدر ولا يهمج.
كالها وهمس
– الحمدلله.
نفض ايده من الاكل وكام
باوعوا واحد على الثاني ورجعوا ياكلون حسيت روحي
زودتها بس ماحجيت شي غلط هو هذا الي راح يصير
كمت وياهن شلنه المواعين وكفت مريم تغسلهن
واحنه كعدنه بالهول بــارون كاعد بالهول يشد بالطرف مال رجله
بس كمل كام عدل ملابسه وكال
– خاله رايح اجيب السند مال البيت والمفاتيح واجيج حضروا نفسكم حتى نروح نشوفة.
هزينه روسنه وهو طلع عزلنه البيت بسرعه هذا
وصرنه نلم بملابسنه على صفحه وشمشون
تفتر وتحجي
– وين وين تلموون بيهن ترى بس نشووفة بعد وكتتت.
غـيد- ميخالف هم اول وتالي راح نلمهم.
سكتت تباوعلي كالبة وجها
بدلنه وهي تبدل ويانه وتدردم علينه وسيف ويانه
كملنه وطلعنه بالهول وضلت هي بالغرفه تبدل
لكينه ماما لابسه عباتها واكفه بالهول باوعت عليها
لابسة العبا الجابتها الها شمشون باوعتلها وابتسمت
ولا عبالك مره جبيرة بالعمر كصيرونه وناعمه وضعيفه
وملامحها حلوة ولا عبالك اني ومريم بناتها ثنينه طواله
وجسمنه متروس بس هي ناعمه ولابسه نظارات
وكفت يمها وهي باوعتلي وكلبت عيونها
– ها ماما شبيج؟
ماما- وخري وخري شلون تحجين هيج ويا الولد
هسه اليشوفج يكول مسويتله منيه مو عيب؟
– ياماما شمدريني بالغلط.
– بالغلط وخري.
عبست وجهي وهي ضلت ترزل بية ومريم تتبسم
وكف سيف يمنه ويحجي ويا مريم
دخل بــارون من بره باوع علينه وكال مستغرب
– هاي شكو؟
مـريـم- نروح وياك لبيتنه.
– كلكم؟؟؟؟
– ايي.
رفع تك حاجب وهز راسة بـ اي
باوعنه عليّ باوعلنه ودار وجهه ورانه وعقد حاجبه مستغرب
التفتنه كلنه وين ما هو يباوع وانصدمنه من شفنه
شمشون لابسة حجاب!!!
ضحكنه مستغربين جانت لابسة تنورة سوده وقميص بيجي
وحجاب اسود لافته لفه عاديه بس ضامه شعرها
طالعه كلش حلوة، هي من نروح زيارات تلبس ازار
ومرات تلبس العبي اول مره تلبس هيج كلش لايكلها
ابتسم بــارون وراح حضنها من جتفها
– شهل جمال هذا؟
– لايكلي؟
– تخبلين بي اروحلج فدوة.
ضحكت وباوعتلي
– شلون طالعه؟
غـيد- كلشش حلووة.
ابتسمت وصارت تباوع عليهم وتسألهم واحد واحد
طلعنه من البيت وماما تسولف وياها فرحانه بيها
ماما- الله يثبتج يمه خوش خطوة هاي.
– اي خاله اصلا اني من زمان اريد اتحجب بس ماما من تجي تكلي بعدج صغيره واشوفها ماتلبس حجاب واهسي يروح.
– لا حبيبتي خليج هيج البسي وهسه تتعودين عليّ وبعد ماتكدرين تذبينه.
– ان شاء الله.
باوعت على بــارون يباوعلها ومبتسم وهي تباوعله وتضحك
وصلنه لبيتنه جريت نفس من شفته شكد مشتاقتله
طلع المفتاح انطاه لماما فتحته ودخلنه للبيت
فتحته
ودخلنه نفتر بي فارغ كلشي فترينه بي وبـــارون كال
– غراضكم كلها موجوده شوكت ماتردون تكعدون بي
اخليهم يرجعوهن هنا.
غـيـد- باجر.
باوعوا علينه واني كتله
– خليهم باجر يبلشون بي؟
نــهروان- ليش مستعجله غيد!
– مامستعجله شمشون بس الحمدلله من رجع خلينه نرجع لبيتنه مشتاقتله.
هزت راسها ساكته وبـــارون جر نفس وهز راسة
فترينه شوية بي وماما وبـــارون يسولفون طلعنه من البيت
كال بــارون
– ماطول مبدلين وكاشخين نفتر شوية على الشارع ونشوف وين نروح ونرجع للبيت.
كيفوا سيف وشمشون وأيدوا ومريم وياهم واني ماما ماحجينه شي
طلعنه على الشارع العام سيارات والشمس عاليه
نحمسنه حمس ومريم وسيف وشمشون مكيفين
عليمن ما ادري
دخلنه لحديقه عامه وجان بيها العاب مال حهال
ومكان يكعدون بي الاهل جوا مظلات ومبردات
كعدنه وبـــارون نزل النه عصاير وكعدنه نشرب
وسيف
دك رجل اله يروح يلعب وياهم وشمشون ماتقبل
– اكعد سيف حاره هسه يصير بيك تيفوا.
هز راسة
وكعد بسرعه يمها بتسمت ورفعت تك حاجب
– الخطف فادني بشغله.
ضحك بــارون وهي ابتسمت، كامت مريم ومدت اديها لامها
– ماما تعالي وياي لهذا السنترررر.
كامت ماما وياها
لان مستحيل تخليها تروح وحدها، كامت شمشون وياهن وجرت سيف وياهن
ردت اكوم حطت شمشون جنطتها يمي
– ضلي هنا خلي الجنط يمج.
باوعتله بخزره وهي تحرك بحواجبها وراحت ويا سيف ومريم
بلعت ريكي متوتره ماكدر اضل ويا بمكان وحدنه
رفعت راسي من كال
– غيد؟
– هاه!
جر نفس وهمس
– ضايجه من شي؟
– اني؟ لا والله ابد ماضايجه.
– لعد ليش تتهربين مني؟ وبس تردين تطلعين من البيت.
– لا والله ماكو شي بالعكس بس هو تدري بيه من زمان اريد اطلع من البيت.
هز راسة بـ اي
– والطلاك؟ تدرين تطلكين بسرعة!
– مو شسمه علمودك غير يعني المن نضل متقدين بعد.
– اي هم صح.
كالها وهز راسة، دار عينه يباوع بالمكان وساعه يصفن
انوب يحجي كلمه ويرجع يسكت
ضلينه كاعدين ننتظرهم، شوية ورجعن البنات مشتريات
علاليك من شافهن باوعلي
– تردين شي؟
– لا لا ماريد.
كمنه وشلت الجنط وطلعنه من الحديقه محموسين
اهمشي طلعنه حتلوا حارة
رجعنه للبيت مشي وبـــارون وسيف يمشون ورانه
ويسولفون وصلنه للبيت طبينه ولزمنه سره على الحمام
منو يكمل يكعد بالهول على التبريد من الحر
كعدنه
وبـــارون يسولف ويا ماما شلون باجر يطلعون الكيه
ترجع الغراض وعمال يشدوهن ويرجعون كلشي لمكلنه
بس هذا كله وماما ما متطمنه لعمامي تكول ادري
بيهم ما يسكتون بسرعه خاصه وهم ناس ماديين
” نــهروان ”
مددت بالغرفه مالتي على الجرباية وهم كاعدين بالهول
وخاله ام غيد تسوي الغده وسيف يفتر يمها عود يساعدها
اجتني رسالة من رقم باوعت مستغربه رقم منو هذا؟
دخلت على الحساب وعلى الصورة الشخصية
ابتسمت
من شفتها صورة هُمام، كاتب
– السلام عليكم، شلونج شمشون؟
ابتسمت ورديت عليّ
– الحمدلله بخير وانتَ شلونك؟
شافها ورد بسرعه
– بخير دام انتِ بخير، شعجب رديتي؟ توقعت ماتردين.
– الزميل الجميل شلون ما ارد.
دز بصمه يضحك وكال
– لا الزميل الجميل راح وياج هُمام وبس.
– ههههه بكل حالاتك عزيز عليّ.
شافها
وتاخر بالرد عفت التلفون وردت اكوم دك
فتحت خط
ورجعت كعدت بمكاني
– هلو هُمام.
– هلا بشمشون.
– ههههه هلا بيك.
هُمام- شلون صرتي؟ ان شاء الله احسن وكدرتي تتخطين شوية.
– الصراحه صعب اتخطه بس نكول كدرت انسه شوية واتعود.
– الحمدلله، بالمُناسبة حبيت اكلج بعد كم يوم يروح عبود يخطب نسرين من بيت اهلها ويريدج ترحين ويا.
ضحكت بفرح وكتله
– يااروحي اروحله فدوة ماناسي، شلون ما اروح اول الناس اني.
– اوكفي اصعده ويانه بالمكالمه.
– صعده صعده.
حطيت التلفون على الميز وكمت صحت غيد ومريم
طبن يمي، فتحت سبيكر وسلمن عليهم
نــهروان- عبودددي.
– شمشوون.
– شووكت تروح تخطب؟
– بعد يومين ان شاء الله.
– بيها الخير.
– حظرري نفسج اجي اخذج ويانه.
– مو تدلل.
ضحك وهُمام كال
– احنه نوكفلك بالعقد.
– ان شاء الله.
صعد مصطفى ويانه وصاح
– السلام على اهل القبور.
ضحكنه وردينه السلام ومريم تكله
– تريد تموتنه؟
– يمةةة ليش ماكلتوا مريم هنا، احمم اقصد السلام عليكم مريم يابنت حوااء.
ضحكت مريم وردت السلام وعبود يصيح
– انيييي المُهم هناا مو همه ركزوا عليّ.
ضحكنه وهي تكله
– عبودي شوكت تسوي العقد؟
– مادري اول شي اروح اخطب بعدين نتفق على العقد.
ضلينه نحجي شوية وبدوا ينزلون شوية شوية ويرحون
طلعن البنات ضل بس هُمام على الخط
– روحي ارتاحي انتِ.
– اووه يرادلي قرن يله ارتاح ما ارتاح اني.
– ليش!؟
– شمدريني.
سكت شوية وهمس
– نهروان؟
بلعت ريكي مستغربة طريقته وهمست بنفس طبقة صوته
– ها؟
– تجين باجر؟
– وين؟
– اريد اشوفج بمكان وحدنه اسولف وياج بموضوع.
– ماكدر، بــارون مايخليني اطلع.
هُمام- لا ما اقصد هيجي يعني نطلع سوة شوية
ونسولف لان صارلنه فتره ماشايفنج.
– تمام اشوف اذا قبل بارون اكيد نسوي طلعه صغيره.
– انتظر ردج.
– ان شاء الله.
سديت الخط من عنده ومستغربة بس ماحجيت شي ولا خليت بالي
كمت رحت بالهول لكيتهم كاعدين وسيف يلعب
بالبلي الجابة اله بــارون بمُناسبة نجاحه من السادس
كبر حبيبي وراح للأول متوسط، ابتسمت فرحانه بي
ورجعت تذكرت لازم السنة التجي ارجع اداوم
كُلية
السنة الاخيرة الي طاح حظي بيها وما كملت
” بــــراء ”
واكفه بالمطبخ اسوي الهم الغده وهم اثنيهم بره البيت
باوعت على الساعه تأخر الوقت والجهال يمي تلعب
– عزيزز ماماا شووف قمر وين لا تخليها تروح بعيد.
– ماما تلعب بالدبدووب.
نصيت الجدورة ورحت للهول كعدت يم قمورة
– شتسووي ياحلو؟
ضحكت وزحفت بعيد عني ركض عزيز وراها يضحك ويصيح
– تعاااي تعاااي.
– على كيفك وياها ماما.
– ماا بتيفي.
يحجي ويجر بيها يريد يشيلها ومايكدرلها هي دبدوبه فدوة لوجها
انفتح الباب، كمت دخلوا تُـــراث وبرهوم يتعاركون
بــــراء- ياارب يسترر شبيكم؟
بـرهـوم- اذا الزمه احط راسة جوة لوري هم احد يكلي ليش؟
تُـــراث- خاااب انجب.
– شبيكم!!!
بـرهـوم- فرررني عكه ومكه تعال نشوف نهروان وين عايشة
وين الكاهاا وين؟ بغدادد شكبرهاا دورها بيت بيتتت.
– لاا تجذذذذذذب!
– انجبببب.
– راح ازرگه دفررررة.
بــــراء- ياااء شبيكم!! اهدوو شووية.
تُـــراث- انطيني رقمها.
– شتسوي بي.
-اسألها على بيتهم.
– ميخالف بعدين انطي الك هسه تغدوا وارتاحوا.
– لا هسه.
– تُـــراث!! توضة وصلي علما اصب الغده وبعدين انطي الك!
باوعلي عاقج وجهه وراح يتوضى ويصلي وبرهوم ضلي يمي
وكفت قريب عليّ وهمست
– شبيكم؟
– خبلني اكله حاجيها انتَ واعرف مكانها واعتذر وفهمها مايقبل يكول خليني هيج ولا اشوف الكره بعيونها الي.
– سوده عليه، والله احس اذا حاجها راح تتفهمه.
– لا تتوقعين هيج شوفي الموضوع من وجهة نظرها هيّ.
سكتت كلامهم اثنينهم صح ماعرف شنو اسوي
راح برهوم يصلي
واني خليت عزيز يم قمورة ورحت اصلي
كملت
ولكيتهم ينتظروني بالهول، رحت صبيت الغده
واخذنه الهم
جر قمر بحضنه يوكلها يبوس بيها وهي تضحك
وتفتح بحلكها منتظره اللكمة
تُـــراث- جوعانه؟ يابعد ابوووج.
بــــراء- والله وكلتها قبل الغده هي وعزيز.
– ادري بس ماتشوفيها صايرة دبدووبة هي تحب الاكل على امها.
ضحك متحسر ورجع يوكل بيها وعزيز مايقبل اوكله
يكول صرت جبير اني اكل، كملت الغده وكمت
حميت الجاي علما يكملون الغده ورجعت كعدت
مافتحت موضوع نهروان ولا حجيت ماريد اكون
سبب وادخل بيناتهم كلموا غده صبيتلهم الجاي
وشلت الصينيه اغسل المواعين واسمعهم يحجون
شلت قمر من تُـــراث وكمت
– رايحه انيمها.
هز راسة ساكت، دخلت للغرفه وماطلعت منها بعد
حتى لا يكلي دكي لو يريد رقمها ادري باخوية
بعدين
راح يضعف ويصير يحجي حجي حرام ويحصل ذنب
وياخوفي رب العالمين يعاقبة ويبعدها عنه
ميخالف
خلي يتحمل شوية لبين ما يلين كلبها واني احجي
وياها وافهمها على كلشي ولا هو يضعف ويغلط
نيمت قمر خليتها بفراشها وطلعت يمهم عبالي نسه
او شي بس بالعكس بس طلعت كال
– يله انطيني رقمها.
– تُـــراث.
– ها؟
– بعدين.
– لا هسه!
– احجي وياك؟ خليها بعدين حبيبي.
بلع ريكة يريد يحجي ورجع سكت وهز راسة بـ اي
عقدت حاجبي مستغربة شعجب سكت مالح عليّ
بس ماحجيت، كعدت على التخم وعزيز يلعب يمنه
سمعنه صوت قمر تبجي بالغرفه ردت اكوم اجيبها
ماخلاني تُـــراث كام هو جابها واجه خلاها بحضنه
يمسح على راسها باسها وباوعلي وكال بحسره
تُـــراث- بيت جدها يردونها.
باوعنه اني وبرهوم عليّ بسرعه وبرهوم كالة
– اي وشنو؟
يجون يشوفوها ويولون.
– يردون ياخذوها يمهم وبعدين يرجعوها.
– مو بكيفهم اليريدها يجي يشوفها وينجب.
– ماكدر امنعهم منها برهوم بيت عاداتهم تختلف عنه
يحبون البنيه ويردونها يمهم بس من كتلهم بالعراق
البنيه تضل عند اهلها سكتوا وهسه يكولون بنت بنته
بس خل نشوفها كم يوم واخذوها.
هز راسة برهوم ساكت بس اني ماكدرت اسكت
– وشلون تفارك قمرر؟ ااذا انت تكدر اني ما اكدرر!
– ميخالف حبيبتي همّ هم الهم حصه بيها شفتهم مره من اجوا شلون يحبوها.
– بس..
– كم يوم بــراء.
– ومنو ياخذها؟
– خالها باجر الصبح يجي لهنا ياخذها يمهم ورا كم يوم يجيبها.
هزيت راسي بـ اي ساكته وهو يلاعب بيها بحضنه
ويبوس بيها ادري ضوجته مو على قمر لان من زمان
هو متعود يفاركها لان دوم يمي وهو برة بس اني ماكدر
تعودت عليها قطعه من روحي صارت!
ثاني يوم الصبح اجه خالها وسبحان الله العيون والشعر
والبشره ولا عبالك رجال ابيض وعيونه زرگ والشعر اصفر
عبالك اجانب ماعرف وين لاكيهم تُـــراث وكلهم
نفس الشكل وقمر نسخه منهم بس الفرق ملامحهم ناعمه
وملامح قمر خشنه عيونها حلكها خشمها
من شافنه سلم علينه بالإيراني ردينه وضل يحجي
ويا تُـــراث ويحجي اللهجة مالته ضحكتني بس
استحيت
وسكتت، اخذ قمر من تُـــراث ويبوس بيها ويحجي
ويشرحله وعيونه مدمعه باوعت على برهوم وهمست
– شدايكول؟
– يكول تشبه امها الله يرحمها ذكرتني بالمرحومه.
– اها الله يرحمها.
اخذ قمر وسلم وطلع من البيت رجعنه طبينه
ضايجين
وعزيز نصبها منااحه وراها شبع بجي
– اريددد قمرررر مامااااا.
تُـــراث- هسه تجيك حبيبي.
– ماااااا.
يصرخ بعلو صوته ويبجي ردت اسكته ولا سكت
يجر بروحه
مني ويبجي وبرهوم يسكت بي وتُــراث وهو ماسكت
شاله تُـــراث بحضمه ويهز بي يريده يسكت لحد ماغفه
بحضن تُـــراث شاله طببه بالغرفه وسد الباب عليّ وطلع
طلع تُـــراث بره وبرهوم كعد يسأل على الحمل
واصر ياخذني للدكتور يشوف وضع الطفل
ماعارضت
رحنه واخذنه عزيز ويانه فره بالسيارة علمود يسكت
وصلنه للمستشفى اخذنه تحاليل وسونار وضعه
كلش زين وكالت بعدلي كم يوم وادخل بالرابع
ابتسمت
وحمدت ربي على النمعه وكال بس ادخل الرابع
اجيها حتى نشوف وضع الطفل ونعرف جنسه شنو
– ان شاء الله دكتورة اجيج على الموعد.
طلعت وبشرت برهوم، رجعنه للبيت تلكانه تُـــراث
– وين جنتوا خونه؟
– اخذتها للدكتورة.
– خير خوماكو شي؟
– لا الحمدلله ماكو شي بس تطمنه عليها واجينه.
– الحمدلله.
طبينه للبيت سوة وهو يحجي ويا برهوم على الشغل
وهي خلصنه هاي الكم يوم وهو اشوفه روحه رايحه
على قمر وكلساع يدك عليهم ويردون بعد وكت
بعد وكت لحد ما دك وكالهم
– جايكم اخذ بنتي باجر.
– لا تجي احنه ماموجودين وبنته تضل يمنه.
يتبع…
الفصل التالي اضغط هنا
يتبع.. (رواية تراث النهروان) اضغط على اسم الرواية لتجد الفهرس كاملاً بجميع الفصول.