رواية تراث النهروان – الفصل الثاني
حطيت ايدي على صدري
– اتشرفت بيك زميلي الحلو بس ما اصافح ولد .
ضحك ورجع ايدة
– الأسم ؟
– نـــهروان .
– ايباه عاشت الأسامي نهر .
– وان .
عقد حاجبة بأستغراب
– شنو ؟
– اسمي مو نهر نــهروان .
ضحك وكعد على المسطبة وأشرلي اكعد
غــيد – احم شباب احنه هنا ؟
ضحك وباوعلها
– روحي روحي خليني اتعرف .
باوعتلي غمزت وابتسمت وراحت
– شكد عمرج ؟
– شو انتَ زعتها فد مره كوم من يمي لا اهبدك .
ضحك بعلوا صوته
– شبيج بووووية .
رفع تك حاجبة وراد يحجي عفته ومشيت ركض وكف كدامي تخصرت وهزيت راسي
– هاا ؟
– بربج اوكفي احاجــ..
كلبت عيوني وكملت مشي وهو وكف كدامي وكال بعصبية
– اووكفي فحطتني ترى!
– تفضلل !
– خل نكون زمايل .
– لا زمايل ولا طليان ماريد زملاء ولد .
رفع تك حاجب وحط ايدة على خصره ويهز بروحه
– اكووولج شنو اسم حمرتج ؟
باوعتله مستغربه حركاته
– شنو ؟
– مو تكولين ماريد زملاء ولد ؟ اعتبريني صاحبتج .
حطيت ايدي على حلكي وضحكت بصوت دخيل الله هذا منين طلعلي
– هُمام .
– ها عيوني .
– لا لا هذا مو صاحي والله .
التفتت اريد اكمل مشي وهو وكف كدامي وضرب رجله بالكاع وصاح
– غضب الله عليج مو ذليتيني .
– ياخي منو جابرك .
– عيونج .
خزرته وهو ضحك ورفع ادية
– اسف اسف امزح .
سكت وانوب كال
– امزح لو اكنس ؟
صدك ضحكت باوعتله وكلت بضحكه
– انتَ منو دزك عليّ؟
– ربي العالمين دزني عليج .
ابتسمت ودرت وجهي عنه
– هسه شلون متخليني اروح ؟ ترى عندي محاضره ؟
– لا لا اعتذر اخذي راحتج .
– اتشرفت بيك هُمام .
ابتسم وحط ايده على كلبة عود تأثر ضحكت وعفته ومشيت
دخلت للقاعة وبلشت المحاضرة وغيد بس تسأل على هُمام غلست عليها ماريد الأستاذ يرزلنه
بس خلصت المحاضره طلعت ورحت للكافتريا اشتريت لفه وكعدت اكل
صفنت على باب الكافتريا واني اكل لفت انتباهي شخص لابس كمامه وقاط اسود
استغربت منو هذا ؟ اول مره اشوفة بالكلية
اباوعله كعد على واحد من الكراسي وحده ويباوع على الطلاب
درت وجهي ما اهتميت كملت اكل وشلت جنطتي وطلعت من الكافتريا
ويا طلعتي صادفني هًمام ابتسم ولوح بأيده
– هلو .
– هلا.
كلتها ومشيت راجعه للقاعه
كعدت هناك افرفر بالملازم واشخبط على الورق رفعت راسي على صوته
– السلام عليكم جميعا .
التفتت ادور بالقاعه ماكو احد غيري !
هزيت راسي هذا بي شي اكيد دنكت راسي اكمل وهو وكف يم راسي
هُمام – رد السلام واجب !
باوعتله ورجعت دنكت
– وعليكم السلام .
كعد كدامي وهمس
– شمشون شبيج ؟
– مابية شي ليش ؟؟
باوعلي بأستغرب
– بس شفتج ضايجة ردت اسألج !
– رحمالله والديك مابية شي .
ابتسم بهدوء وكام طلع من القاعه
دنكت راسي ورفعت شعري اشيله عن وجهي
همام مبين عليَ واحد يحجي يضحك ويشاقه حلو هذا الشي بس بارون لو يسمع يتخبل
شلت جنطتي وطلعت من القاعه لكيت غيد ومريم واكفات على جهة ويمهن بنات اثنين هم
وكفت يمهن وغيد تعدل بحجابها وتحجي ويا مريم
غيد – هش هشش ولج شمشون ,
باوعتلها وهزيت راسي بشنو ، اشرت بعيونه وراي
درت وجهي شفته نفسه ابو الكمامه
الفضول لعب بروحي لعب خاصه اتجاه بس درت وجهي وكعدت على المسطبة اباوع على البنات وهن يحجن بخصوص الدرس
خلصت المحاضرات وهمام ما رجع حجه وياي عرفته ضاج
اتنهدت ضايجة ماريد احد يضوج مني
رحت وكفت كدامة
نــهروان – زميلي الحلو ؟
باوعلي ابتسم وكام
– هلا نــهروان تفضلي .
أشر على المسطبة وكعد كعدت وباوعتله
– رجائاً اني ماحب احد يكلي نــهروان كلي شمشمون .
ضحك ودنك راسة
– صار شمشمون .
ابتسمت وهمست
– اني اعتذر شوية يعني مصختها وياك بس لا تلح حباب اني اضوج .
هُمام – لا عادي والله اني الاعتذر لحيت وياج حقج .
ابتسمت ودعته وكمت
طلعت من الكلية اخذت باسكلي من الكراج ورحت للمدرسة لكيت سيف راجع قبلي سلمت وبدلت وطلعت يمهم
بـــارون – شلونه اول يوم ؟
– مثل كل يوم .
سكت وضل يسولف ويا سيف ويدرسة واني طبيت للغرفه هم اقره
دك تلفوني رفعته جانت غيد
– هلا غيد .
– هلوو شمشون شداتسوين ؟
– والله ادرس خوماكو شي ؟
– لا حبيبي بس الجمعه مسوين سيارة نروح للبر هناك ونسوي تخييم واجواء وثاني يوم الصبح نرجع واتفقه الدفعه كلها راح تروح وحبيت ابلغج .
– فكره كلش حلووة بس مستحيل بـــارون يخليني اروح .
– لاا بربج شمشون اقنعيي والله ونسة من العمر العام مارحتي والسنه هم شنو السالفة !
– احاول ما اكلج اكدر بس اشوفة اذا قبل اروح ماعندي مانع .
– تمام انتظرج .
سديت الخط منها وضليت صافنه فكرة حلوة بس بـــارون ما اعتقد يقبل
ما كتله غلست بعد منا للجمعه توه اليوم احد
ثاني لبست بنطرون اسود وقميص بيجي وفوكاهن سترة سوده
مكياج ما احط لان بـــارون يطين عيشتي بس مجرد اخلي مرطب و واقي
طلعت وهاي المرة ما وصلت سيف هو يروح وحده زعم كبر ومايقبل اوصلة واني اتأخر بالتبديل والتمشيط وهو يروح قبلي
وصلت للكلية صبحت على البنات وغيد كالت
– كتيلة ؟
– لاا لسه خليها مو هسه غيد .
سكتت وراحت جابتلي كوب كهوة ابتسمت وتشكرتها
كعدنه على المسطبات ننتظر باقي البنات حتى ندخل كلنه سوة للقاعة
حسيت بظل صار فوك راسي حطيت ادية على عيوني وباوعت
جان هُمام ، ابتسمت وهو من ابتسمت ابتسم
– صباح الخير .
– هلا صباح النـور .
– راح تروحين ويانه مو ؟
– للبر قصدك ؟
– اي ؟
– ان شاء الله لسه ما بلغت الأهل .
– على راحتج .
كالها وراح حسيت ما راد يضغط عليَ ويلح مثل البارحه وهذا الشي احسن النه ثنينه
بدت المحاضره الثانية واحنه بس نتصفن وطلاب القسم يسولفون ويا الأستاذ
ويحششون ويا وهو ساعة يضحك ساعة يسكتهم
باوعت على عبد الرحمن طالب من دفعتنه جانت كاعده بصفه نسرين
سولفو وغمزلها هي ابتسمت وباوعت على الستاذ
– عيد الشرح .
التفت الأستاذ عليها وكل احنه التفتنه عليها وهو مصدوم اصلا لان هاي ثالث مره يعيده
ألأستاذ سمير – نسرين ؟
– شبيك عيده .
ضحك الأستاذ وأشرلها تجي ضحكوا طلاب القسم كلهم وهي كامت وكف كدامه
لزمها من جنطتها ودفعها بره القاعه
– اطلعي بره تخلص المحاضره وعود ارجعي .
خربنه ضحك عليهم وهو يحجي بكل جدية وصدك ضلت برة ومحد فوتها
بس خلصت المحاضرة وطلع الاستاذ سمير هي طبت تركض وضرب عبد الرحمن بالكتب
ضحكنه عليهم وعفناهم يتعاركون وطلعنه
كعدنه اني وغيد بالكافتريا
– شبيج شمشون شو صارلج كم يوم احسج ضايجة .
– ايي بصراحه موضوع بــارون متعبني .
– قصدج تردين تسويلة الأطراف ؟
– اي بس ..
– فلوس؟؟
– ايي غيد ايي تعبت تدرين كل مره اريد اخذنه مايقبل يكلي سعرها يعيشنه شهر كامل!! يمعود شساالفة خليني اسويها الك ترتاح مو تعبت من التكمز بسبب العكازه مايقبل .
باوعتلي وتقربت حضنتني
– احاجي اني ؟
رفعت تك حاجب ودفعتها
– حتى يشكني شك دكعدي هو اني ويكلي لا تسوين هيجي ما احب احد ينقهر عليّ .
– يووو زين اني اساعدج بس لا تكليله .
– وانتِ شبيج راح تبجين ؟
– ترى بارون انسان ماكو مثله والله العظيم ما يستاهل يضل هيج
شناقصه جمال ايمان اخلاق او ما شاء الله من كلشي كامل واذا رجلة مكطومه شنو اول واحد هو ؟
ابتسمت وباوعتلها بشك
– غيد .
– يوو شمشون لا تباوعلي هيج .
– تحبين عمي غيد ؟
ضحكت وغطت وجها عرفت الجواب بس غلست
نـــهروان – ترى بــارون طبعه صعب صح سبورتي بس بغير شغلات لا ابدا ما تعرفينه من يصير عصبي .
ابتسمت ودارت وجها
– ولج !
ضحكت وكامت ضليت بس اني كاعده اشرب ببسي واراجع الماده
رفعت راسي من حسيت احد يمي باوعتله هذا هُمام
– هلو .
– هلا .
سديت الكتاب وكعدت عدل
هُمام – اعتذر نـــهروان اذا حسيتي لحيت وياج وزعجتج كلش اعتذر .
– لا عادي اخوية انتَ مصار شي .
بس كملت لطم على كصته
– بربج شترين تسوين سوي بس لا تكولين خوية يكرم الله يصير بية اسهال .
ضحكت ودنكت
– خرب اوووع شجاااك .
– بربج هذا شكل واحد تكليله خوية ؟
– لا يبويه نعتذر .
ابتسمت وهو ضل كاعد يسولف ويضحك مرات اجاوبة ومرات اغلس
هُمام – اي ما كلتلي منو بـــارون ؟
– بــارون ؟ شعرفك بي ؟
– بالصدفه هااا بالصدفه سمعتج تحجين بي ويا غيد .
– بالصدفه كتلي ؟ اي المهم هذا عمي .
– هاا الله يحفظه الج .
– رحمالله والديك .
ابتسم وطلع جكارة يدخن سكتت ورجعت اكمل مراجعه
بس كملت ترخصت منه كمت رحت للقاعة وهو ضل كاعد
كملت كل المحاضرات
طلعت من الكلية وغيد اجت وكفت يمي
– شمشون راح احاجي ماما حتى اجي ويا ومريم راح ترجع وحدها .
ابتسمت وتخصرت
– هلا بيج بس شعجب ؟
– هاي شنو طرده …
– اش اش يله امشي لعد بس ترى اني ارجع بالباسكل !
– على اساس اني ارجع بطيارة .
ضحكنه وطلعنه سوة صعدتها وراي على الباسكل وهاي خربانه ضحك وتغطي وجها بالشال
غيد – بعللي فشلة نزلني خل امشي مشي .
خربت ضحك عليها نزلنه ومشينه مشي اني وياها واجر بالباسكل
طبيت للبيت اصيح
– بـــــااارونتيي ويااي خطاااار .
لكيتهم مثل كل مره سيف بعده بملابس المدرسة وبــارون كاعد يمه
بـــارون – ياهلا منو خطارج ؟
أشرتله على الباب وابتسمت
طبت غيد ابتسمت ولوحت بأديها
– هلاااو .
باوعلي بــارون ورجع باوعلها
– هلا غيد شلونج .
– هلا بيك بـــارون الحمدلله وانتَ ؟
– بخير اكعدي بوية استريحي .
كعدت اني وهي كعدت بصفي
غـيد – ســيف ؟ شو مسلمت عليَ؟
ضحك سيف وكاملها باسته وهو باسها بخدها ورجع كعد
بــارون – شعجب اجيتي ؟
– اشاقيت .
كالتها بأبتسامه وميلت راسها لكزتها بخصرها وهي فزت تعدل بحجابها
– اقصد اشتاقيتلكم ولسيوفي شلونكم انتوا ؟
ابتسم بــارون بخفه ودنك راسة
– الحمدلله بخير .
ضلوا كاعدين وهي تسولف كمت جبتلها مي شوية وكامت
– يله اني اترخص ان شاء الله غير مره هم اجيكم .
– بعد وكت شلون ترحين وحدج ؟
– لا عادي اصلا قريب البيت منا اروحله مشي .
بـــارون – اوصلج؟
باوعتله وتخوصرت
– ماا اني اوصلها .
ضحكوا وبــارون كال
– روحي .
ضحكت وكمت وياها وصلتها لبيتهم وسلمت على امها واختها وطلعت
غيد صديقه من ايام الأبتدائية ابوها متوفي وعمامها بعيدين عنها
وبس هي وامها ومريم اختها بالبيت امها دكتورة اسنان ومعيشته نفسها وبناتها وماشاء الله بناتها اثنين دارسات
رجعت للبيت تلكاني بــارون يصح
– انتِ مااتوبين ؟ شلون تكولين بــارونتي كدامها ؟ لج بابا عيب عيب انتِ ما تتعلمين ؟
– هسه شبيك واذا قابل جديده عليك غيد .
– بس فشله منها .
– لا تهتم اصلا ما ركزت .
طبيت للغرفه سبحت ونمت كبل ما كعدت غير لليل طلعت بره لكيت سيف نايم وبــارون كاعد يشتغل
بــارون – صح النوم .
– صح الله بدنك ، تعباانه ما حسيت من نمت .
كعدت بصفه وحطيت راسي على جتفة حط الماطور بصفه وكعد عدل حتى ارتاج عدل
نـــهروان – بــارون .
– ها .
– طلاب دفعتنه مسوين رحلة تخييم الجمعة .
– اي ؟
– ويردوني اروح وياهم .
– ماكو روحة .
رفعت راسي باوعتله
– ليش ؟ كلها راح تروح ولد وبنات ونسوي تخييم هناك واجواء ودنيا .
– نـــهروان اني شنو كلت ؟
سكتت ورجعت راسي على جتفه
– تمام .
ضليت كاعده شوية وكمت اكمل نومتي
ثاني يوم باردة الدنيا حيل لبست ستريج شتوي جوة الكيلوت
ولبست وياهن تشيرت هاينك اسود وكوت جوزي طويل رفعت شعري ذيل حصان ونزلت الذلة
رشيت عطري المفضل خليت هاي المره شوية مكياج خفيف وطلعت
لفيت روحي بالكوت لف ومشيت
وصلت للكلية لكيت طلاب هواي ملتمين وصوت صياح استغربت شصار ؟
مشيت من بيناتهم شهكت من لكيت بنات يتعاركن ويا غيد
يصيحن ويضربن بيها
انه اخوك اني صاحبتي هيج يسون بيها ؟ وسفة والله
وكفت يمهن وصحت
– هيووو منو سمحلجن تمدن اديجن عليهاا ؟؟؟
– شمشون خلي النفس طيبة وياج لا تدخلين .
– دكمي لج النفس طيبة وعلي اسحلج هنا وابجيج .
غـيد – شمشون بربجج انيي خااالة عيونيي على حساام ؟؟؟
تكلي عيوونج عليَ !! والله العظيم اصلا لو ما هي تحجي ما اعرف حساام منو وشيصير منها !
باوعت على سما وصحت
– سما ترى طوختيهااا منو هسه حساام سلطاان سليمان كله خلك حسام ابو الوصخ .
حسام – هيوو احترمي نفسج لا ادير وجهج براجدي .
شهكت والتفتت عليَ
توني اريد احجي ما حسيت اله احد سحله من تشيرته الفتت بسرعة وابتسمت من شفته هُمام
هُمام – شبيك حبيبي ياهو شامرلك عظم ؟
– وخررر هُماااام لا تدخل انتَ .
– هم صدك سوالف نسوان ليش ادخل .
– لك هُمااام .
دفعه وهُمام رجعله الدفعه وصار يتضاربون
صخام كبرت والله حاولت اجر هُمام بس ما ينجر سحلته حيل من سترته وهاي انرعطت من الردن
شهكت وحطيت ادية على حلكي وهو هد حسام وباوع على الستره
ضحك وصاح
– فدوووة فدووة .
ورجع يتعارك ويا حسام سما تصيح هي وغيد والطلاب حاولو يفاككونهم بس اثنيهم انهدوا
نـــهروان – هُماااام هُمااام كااافي عوووفة يمعوود كاافي شبيكم تردوون عذرررر .
عبد الرحمن – يااااخيي كااافي شنو زعاااطيط .
حسام – ليشش يدخللللللل ؟؟؟؟
مصطفى – يااخي دنجب جا شنو تكول لبينة ادير وجهج براجدي تسودنت ؟
نــهروان – استقر ابو الصوف منو العام تعارك وياي لان كسرت قلمه ؟
– جنت زعطوط .
ضحكت وهو ضحك وجر حسام وعبد الرحمن جر هُمام وفرقوهم
اخذت غيد ومشيت عنهم
– لا تضوجين خل تولي .
عدل شالها وهمست
– لا طُز يمعودة شايفتني اهتم لهيج شكولات .
ابتسمت واخذتها رحنه للقاعه
كعدنه هناك نسولف وسولفتلها على بــارون
– لاااا شنو السالفة ترى والله حتى ننعزل البنات وحد والولد وحد .
– ما يقبل غيد يتخبل عليَ .
سكتت وانوب كالت
– زين خل هو هم يجي وسيف وياهم اصلا نروح الجمعه يعني ماكو دوام .
– مايقبل ادري بي العالم كتله يكلي تضلين حايرة بية كدام العالم انوب نزاعا للمشاكل لا ترحين ولا اروح واني ما لحيت ادري بي يضوج .
سكتت وطكتها صفنه ررجعنه للقاعة وبس خلصت المحاظرة طلعنه اني وياها
لكيتنه مريم اختها سلمت وراحت للكافتريا
غيد – هاي تجي علمود الكافتريا اقسم بالله .
ضحكت بعلوا صوتي ومريم باوعتلنه ورجعت دارت وجها
كعدنه على المسطبه وحده تراجع للثانية كعد يمنه عبد الرحمن
– شمشون اشرحيلي هاي وترجميها بسرعة .
ضحكت عليّ شلون مستعجل طبعا هنا بالكلية محد يكلي نــهروان لان كصيرة وعلى اساس خبيثة يعني هم يكولون مو اني
فـ يكلولي شمشون الي ويا سبونج بوب
دنكت على الكتاب اشرحلة وهو مركز وياي ترجمتها اله كام وكف وشمر بوسة
– فدوة لوجهج ام الشدايد .
– اكوم افرك حلكك ؟
– العفوا يااابة .
ابتسم وراح ضحكت غيد وكالت
– هسه تجيج نسرين وتكب عليج .
– هو هذا حظي ياهو اليحجي ويانه يطلع مرتبط وحبيبته تكلب الدنيا فوكانه .
ضحكت وهزت راسها بأي سريع وتضحك
ضلينه نراجع والطلاب يفترون فوك روسنه
الخميس بليل ورا العشة كاعدين كلنه اني مدده اباوع بالتلفون على القنفه
وسيف وبــارون يباوعون فلم بالتلفزيون
دك تلفون بـــارون باوعله وباوعلي مستغرب
بــارون – هاي صديقتج غيد .
كمت بسرعة
– صدك ؟ شعجب دكت عليك خاف اكو شي جاوبها .
هز راسة وفتح خط
غـيد – هلااااوو باااارون .
باوعلي ابتسم ورد عليها
– ياهلا بغيد شلونج .
– الحمدلله بخير وانتَ ؟
– زينه زينه ، اكلك بارون خابرتك اريد اطلب منك طلب .
باوعتله مستغربة وهو باوعلي وهز راسة بعمنى شنو
رفعت اكتافي بعمنى ما ادري
بــارون – تأمرين بوية كولي .
– شكرااا ، بــارون حبااااااااااااب خلي شمشون تروح ويانة للبرر باجر عليك الله .
باوعلي عض شفته ورجع يحجي وياها
– غيد ماكدر اخليها تروح لان..
قاطعته بسرعة
– باااااااااارون عليك الله خطية يعني شنو كل دفعتنه حتروح
واصلا البنات وحد والولد وحد ليش شتعرف امي لو تدري اكو عنصفه واستهتار تخليني اروح ؟ واصلا المكان الي نروحله فارغ يعني امان والأستاذ سمير يجي ويانة .
ما انطته مجال يحجي كتتهن كت حجت حجي خلته كبل يكول
– هاهي لعد خل تروح .
ضحكت وطفرت للغرفه وهو سد السبيكر وضل يحجي وياها
تحمستتتت حيل ركض ركض صرت احضر الملابس شلبس باجر وشحنت البور حتى اشحن هناك
ولميت ملابس كلشي يصير ينكشن يتوصخن وطبيت سبحت وجنت متحمسه اول مره اروح
ولو ادري الي راح يصير هناك وكل الي راح امر بي ما ما اطلع لو خطوة وحدة برة البيت وما تحمست …
يبتع ..
الفصل التالي اضغط هنا
يتبع.. (رواية تراث النهروان) اضغط على اسم الرواية لتجد الفهرس كاملاً بجميع الفصول.