رواية الموروث نصل حاد – الفصل السابع عشر
ام ضـلـيل : تريدها اطلبهاااا من عمك ليش واگع
بالحرام وغرگان انتَ وياها شفتها مطلقة گلت
اتونس وياها سهلة تحصلها رخيصة .
ظلمت الدنيا بعيوني ، جسمي اشتعل نار يا فشلتي
حسيت انفاسي بعد مو منتظمه ايدي على صدري
واشهگ ودموعي تهل على وجهي وصرخت
من شاهين صار يلزم بي ويرگع براسه بالحايط
ويصيح بعلو حسه انبح صوته وخشن
_ لااااا تكسرررر ظهري علاء جذبهم لا تصير وياهم
انا اعرررررفهااااااا نقش ما تسووويهاااا ما تحب الحرام
لا تصير وياهم بداعت الخووووووووة .
وهذا ماعند ومصمم على كلامو بس يبچي
شاهين : راح اموووتك ول راح اموووووتك
اصحى دخيل محمد دخيلك انا
دخيلك اصحى لا تجذب بس لا تجذب .
فات تمار مبحلق عيونه ومتحزم على شر ، عكس عمي
ضـلـيل كل هذا الصار وهوَ مشغل جگارة ويشاهد بصمت
بعد دخلت تمار ضحك عمي ضـلـيل ضحكه بصوت عالي
فززت الكل وجذب انظارهم ، حتى شاهين ترك علاء
وگعد فحطان يجر النفس بصعوبة .
ضـلـيل : تمار تأخرت جنت متصور تفوت أسرع
السلاح وينو عليش ما اجيت مسلح ولدك تذابحو .
تمار : وين ولدي وينهممم .
شاهين فقد اعصابه نهض من مكانه
يمشي بأتجاه ابو وعاط بدون شعور
_ لا تخليني اكرررررررررررهك ، هل ملعوب يوگف
لا اخليكم تعيشون بكابوس بطلوا قذارة .
رفع ايده يريد يضربه والصريخ فزز المنطقة مو بس
البيت ، رفع عمي ضـلـيل جهاز خلاط عصاير ضربة
براس تمار وگع لا من ايده ولا مر جسمه ، نزل عليه
بعده صاحي بس الدم يجري من راسه
وصوته ملچوم صار يدوي بكل البيت
ضـلـيل : ول عار تريد تلزم غـاليـة من ايدها التوجعها
وتاخذ بنتها تعذبها حتى تموتوها ، يمكن عقلك صار
بي شي انضرب من السجن ، نسيت اذا تگضها من
ايدها التوجعها بعد عدها ايدي هاي ايدي اموتك
بيهاااااااااا انعل خوتك القذرة .
ام ضـلـيل : عوف اخووووك مات اخيك ماااات بيدك .
ضـلـيل : هاي انتِ تريديهااا يموت اخوي بيدي
دام تخططين وتخليهم ينفذون شرچ اموتو واموتهم
كل واحد يوگف وياچ على باطل انهي وياهم .
لطمت على وجهي امنيتي اشرد لو امي تفوت
تعجبت ما اجت ولا نزلت تحميني وينهاااا
امي وينها، عطت من اجت جدتي جرتني من شعري
تبچي تعت بشعري الحقيرة وتصرخ
_ تكتل اخوك الخاطر بناتهاااا ، هاي بعيوني
دحگت عليها طايحه تراب بيد علاء ، ما تصدك
امك عجل انا اذبحها بيدي هل فوصه .
اخذتني للجرار جرت اكثر سجين حاده شاهين
ركض يلزم بيها ويسحب بيدي منها ، عمي ضـلـيل
لا بي يأذيها هاي امه ، واخو الدم يجري من راسه
بين ايده ، وهاي ما تخاف على ولدهـا .
شافته عمي ضليل صار دم من وجع راسه
والضغط ما همها ، هو هم وصل مرحلة بعد
ما يهمه نهض وصار إعصار خرب خطتهم
بالصوت العالي والتكسير ، الكاونتر طاح عليه تفليش
دفرات وشكو مواعين صارت تتكسر ويشمرهن
علينها مو بالگاع لا ظل جهاز كهرباء ما رفعه
واي واحد يصير مقابيله ينشمر عليه
كلنا يضرب بينا ملخنا تملخ الزين والشين بينا .
علاء رفع ابو بصعوبة وهج بليلة ظلمه ، ونسوان عمي
ضـلـيل سحلن جدتي وعزيزة ركضت جرتني ودفعت
شاهين حتى يطلع وصدك طلع ، اول ما صرنا بالصالة
انا وجدتي ونسوان ضـلـيل رفعنا راسنا على درج
امي واكفه فوك مكتفه ايدها وبكل هدوء ابتسمت .
جدتني تخبلت رسمي من شافتها ، عزيزة تسد بحلگها
وهيَّ تدفع بيدها وتضرب على راسها وتصيح
_ شامخة خلاها شامخه حتى بناتها ما دافع عليهن .
طلع عمي برا يسب ويتوعد ويهدد محد سلم من لسانه
امي عافتها بنارها ورجعت على غرفتها بكل برود
ام ضـلـيل : يا يمه گلبي راح يووووگف دحگتن
يوووولوووو بعيونچن هاااا شفتنهااا شلون شاده
ظهرررها بي مقوووي عينهااااا ، قانعهااا ما تدخل
ول هيَّ جانت هيچ مو تفرنا فر من نتنفس وياهن .
عفاف : عمه هساع انتِ من ادافع ما ترضين عليها
من هوَ يدافع عليهن ما تقبلين ، بشنو تقبلين
يلزمهن حتى لو حق يذبحهن .
ام ضـلـيل : اطلع مو بنت امي وابوي اذا ما اخلي
يطلگچ يا عفاف يا بنت الچلاب ، تدافعين على بنت ذياب .
عفاف : واحد يحچي حق الله لا ادافع ولا احيز الطرف .
ام ضـلـيل : شحچي وياچ لو بيچ خير
ما يرگعچ بالقندرة وباقي يعبد بنت ذياب .
عفاف : بنت ذياب انتِ دخلتيها على بيتنا
تحملي ثمن غلطچ مو زين احنه بنات عالم متحملين
ثمن اغلاطچ وضحينا الخاطر ابنچ كافي ظلم عمي كافي .
عزيزة : ما يبلعن هل لسان ويسكتن يبوو راح يسمع
ويفوت علينااااااااا ما بينا بعد اشتهرناااا العالم
مناا ، دنيا ليل والعالم نايمة فضحتونا .
دفر البوب ، ركضت على درج وجدتي فاتت على استقبال
وسدت الباب عليها ونسوان عمي كل وحده ركضت
على غرفتها ، اول ما فتحت الباب انسحب من شعري
شمرتني امي على چربايتي وصاحت
غـاليـة : احچي كلشي من البداية شصار
لا وروح ابوية نقش اشمرچ من فوك السطح .
بقيت احچي وياها بالتفصيل وابچي بكل حيلي
كفت ردن دشداشتها ونزلت بدون حس على استقبال
ركضت خايفة عليها دخلت على استقبال
والبيت كل نور ما بي عبالك الكهرباء طافية
بس الديوان مشتغل بي ضوء خفيف مبين عمو برا
ضربت على خدي من گعدت جدتي
وامي نزلت لمستواها تسألها
_ شنو غايتچ ؟ تشوهين سمعتها ، لو تگولين
غـاليـة ما عرفت تربي ، لووووو طمعععععع .
رفعت اصابعها امي واشرت بثقة هددتها
غـاليـة : على موتي اسلم بنتي الولد تمار
انا اخلي يلوي ذراعي بيهااا شايفتني غبية ؟
ام ضـلـيل : والله اخذها منچ وبعنادچ ازوجها
لو علاء لو شاهين وتمار ياخذ حقه من عيونچ .
غـاليـة : على جثتي ، ادري بيچ تصدگين
بكلامي لان بعدها يتنفذ ، راح تندمون
والله ما باقية هواي وتتندمون ، بس بذاك الوقت
انا ماكو راح اخلي راسكم يفتر راح العب
بيكم طوبة يا عجوزهم .
ام ضـلـيل : على شنو ناوية ؟
غـاليـة : ما ناوية على خير ، راح آخذ حقي
وحق نقش وطلاگها بهذا عمرها ، وحق مُـرجانـة
وغربتها وذبيتها للمجهول من راسچ وراس ولدچ
كلكم اخذ حقي منكم كلكم .
مُـرجانـة …
بعد رحلة مسكنات ومهدئات طويلة گدرت انام
وعيوني تغمض والشهگه بعدها تطلع من صدري
جسمي بالكامل متخدر وثگيل ، مغمضة عيوني
احس بأقل حركه لان الوجع والخياطات يلچمني
والخوف والكوابيس تمكنن مني وذبلني .
بين الوهم والحقيقة سمعت صوت الباب انفتح
وخطوات تتقدم بأتجاهي ، شميت عطر مو غريب
عطر تغلغل بروحي بي ذكريات مو حلوة ابد مو حلوة
بس حسيت بلمسات باردة صارت على خدي
فكيت عيني اريد اصرخ من شفت شكله
سد حلگي بيده والثانية عبرها على راسي حتى
يتحكم بحركتي ويضمن صوتي ما يطلع
سند راسه على راسي وهمس بأبتسامه
شهاب : فرحت من عرفت بعدچ عايشة .
رفست بيدي ورجلي صار فوك السرير يطوق حركتي
وطلع سجين مدري منين طلعها حطها برگبتي
شهاب : اذا يطّلع صوتچ انهي دوم .
تلمس شعري وحضن وجهي بي ايده
اسحب بروحي منه يتحكم اكثر ويضغط اكثر
شهاب : سلبتي عقلي .
ضربته على وجهه اريد اصرخ ضغط على رگبتي
بالسجين شاغت روحي فتحت عيوني موجوعه
وتصب دموع ، مال راسه وهمس بأبتسامه
شهاب : شهل برائه بعيونچ ، هساع انا شلون اضربچ ؟
نزل ايده على بطني يتلمسها قرب شفايفه
من اذني وبصوت حقير يهمس بثقة
شهاب : منتظر اسمع خبر الحمل
لا تخافين اعترف بي ، ونتزوج .
هزيت راسي رافضه كلامه ضغط على اسنانه
غضبان وخزرني متعصب ويمرد بيدي كلها مخيطه
طلعت روحي من الوجع وفرفحت ولا عبالك
شهاب : بس لا تحبين هل منبوذ زير النساء الطماع
عبالچ خوش زلمة هذا سافل منحط يخلي ايدو
على كلشي بي فلوس ويستوطن عليه يتملكو
عاش عمرو منبوذ ما نعرفو ، من مات ابوي اخذ
كل املاكنا ويستعطف علينا بكم فلس ، راح ادمرو
وما اخلي شي يحبه يستمر وياه ، راح اخذچ منو
غصباً على راسووو ، واذا رفضتي تمووتين
واذا عرف بهذا كلو تمووووتون كلكم .
ثبت وجهي وجبرني افتح عيوني
شهاب : احفظي وجهي زين حفظي راح
تشوفيني هواي انا زلمتچ بالمستقبل أبو ابنچ .
جريت نفسي فحطانه وهو شافني انتهيت من الخوف
والوجع رگبتي وايدي تنزف ، طلع خايف مغطي
وجّهه عبالك احد يشوفه ، دنگ وصعد فوك ما طلع .
شمرت جسمي من فوك الچرباية
للگاع قفلت الباب وملخت روحي تملخ
لدرجة ما ادري الدم منين صار ينزل مني
جسمي رگبتي خشمي وصوت الضرب على باب
بيرغ يحاول يكسره بقيت گاعدة امنع بي بس
ماعندي قوة ايدي ارفعها توگع مهدود حيلي هد مهدود .
وبيرغ وملِكه صاروا يتراددون ويتعاركون هي
تصرخ خلست البنية ، وهوَ يصيح بيها تسكت
ورجع يسأل بأم وارث وينها وهيَّ تحلف جانت
بالحمام ، وهمام نزل يسأل شصاير ، دخل وارث
ما نطق بحرف واحد بس يكسر بالباب بكل قوته
ومن يتعب من التكسير وما ينكسر
يصيح بيهم يسكتون ويسايرني بالكلام
_ مُـرجانـة شفت كلشي ، راح اساعدچ افتحي الباب
والله اخذ حقچ ، لا تسوين شي بروحچ بداعت امچ .
نمّت بالگاع الدنيا تفتر بيَّ وعيوني تنگلب اجبرها
ترجع تنفتح ، والدم يسيل على ايدي ، غمضت اون
وگلبي ينقبض من تكسير الباب الحد ما اتفلش
ودخل وارث رفعني من الگاع يضرب على وجهي
حاضني على صدره يتوسلني
_ مُـرجانـة لا تفقدين ، اجيت والله .
دفعته من صدره وگعت روحي بالگاع اخذتني امه
تلطم على راسها من منظري ، وملِكه تصيح بيهم
ياخذوني مستشفى ، شالني وارث نومني على چرباية
يفتح بالضمادات وملِكه وياه اسمع تعليقاتها على جروح
بس ماعندي حيل افتح عيوني ، شاغت روحي من فك
رقبتي ويمسح بيها يعقم ويرجع يلفها ، وشد ايدي
وامه تدعي من صوب ، وام بيرغ تصيح عليمن
تصيحين وتدعين وتشمرين بسامير ، وبيرغ يسكت
بيها وصوته هز البيت يريد يعرف ياهوه وراها .
كمل من ضمادهن وسمعت صوته منتهي
وارث : بعد اخوچ بدلي ملابسها .
طلع وسد الباب ، ملِكه تبدل بملابسي وتفز من اصواتهم
ركضت على باب فتحته ، جبرت روحي اشوفهم
وارث يتضارب هو وبيرغ ويصيح
بيرغ : انتَ عينك عينك تبليني بجريمة .
وارث : منووو وراهاااا هو من اهل البيت مو برا
بعيني شفت صعد فووووووك لك عدهاااااا
فات عدهااااااا خررررب يضرب بيهااااااا
يهددهاااااا ، مغطي وجهه وبعدين صعد
يعني من اهل البيت ما طالع وبس انتَ
وهمام وسهم موجودين .
بيرغ : من البارحة عندي واجب هاي دخلتي على
بيت بعدني حتى ما صاعد وارث تخبلت .
وارث : اليوم كلكم اطردكم وحگ علي كلكم تطلعون
خاينين مو أمان انتوا شنوووو مجرمين انتوا مجرمين .
همام : وارث لا تاخذنا بصوتك عيب عليك احنا أخوتك .
وارث : طيح الله حظ هيچ اخوووووان
ولكم تضربوني كل ضربة بگلبي تصيح انا اموتك بيها
هسة كملوها بيه تروحون على هل بنية ليششششش
شلون شال سجين عليهاااااااااا يهددها بسجين
الله اكبرررر عليكممممممم .
همام : هو ياهو يمهاااااااااا والله حتى ما نازل .
ام بيرغ : هساع تطلع جذابة هيَّ تمثل وتضرب
بروحها وتصيح حتى تلفت الأنظار .
شهگت من كلامها وكورت روحي راح يمها امه صارت
بينهم وبيرغ صد بوجهه يصيح حتى يصحصح
_ تضرب امي تررريد وارث تضربهااااا
امشي روح مناااا دير بالك تعيدها روح مناااااااا .
وارث : بيرغ فهم امك انا بعيووووني شفت
شلون فات عليهاااااااا شفت كلشي بعيوني .
بيرغ : شلون شفت وانتَ توك وصلت لا تخبلني .
وارث : وهذا من فات بشك اشوف ومتعمد ما يخليني
اعرف خلقته واذا يوگع بيدي اشرب من دمه والله
نذر عليَّ اذا ما ارمي بطلقه تتوسط گلبه انا مو زلمة .
راح على همام عوج ملابسه بين ايده يهز بي وصاح
_ اشك بيك انااااااا ، نفس ضخامتك وطولك
اذا طلعت انت اعدمك على قبله وانعل شكو
ساقط ابن ساقط يدافع عليك ويحميك من شري .
همام : مو انا والله مو انا وراس امي وداعت ميمونة
مو انا وروح ابوووووووي ليش دوم تشك بيَّ
شما اسووووي تشمر بلاك وبلاهم بررررراسي
انااااا بيا حال هذا حالي مال واحد يعذب بنية .
دفعه بكل قوته على بايات الدرج صاح متأذي
وارث ما مهتم صار بوسط البيت وصاح بعلو صوته
_ كلكم تطلعون بررررررا بيتي ، بررررررا يلة برررررا
ما اريد واحد بيكم يعيش ويايَّ كلكم مجرمين ما اثق
بيكم تطعنوني ، انا اشتغل ومكسور ظهري
وانتوا هنا تحفررررررون حتى تقهروني حتى تحرگون
گلبي ما اثق بيكممم برررررا تطلعون برا بيتي .
بيرغ : انعل ابو الذله ما ابري ابوووي الذمة
دام خلانا تحت رحمتك تطرد بينااااا بكيفك .
ام وارث : لا برضاي عليك اسكت انتَ عصبي
ولكم يمه لا تاخذون بكلامه الله يخليكم لا تاخذون بكلامه
ما يقصد روحوا بغرفكم ارتاحوا معليكم .
وارث : يرتاحون واناااا بگلبي نااااااار من ايدهمممم
ما اريدهم يمه كافي ما اتحملهم ، لا احبهم ولا هم
كفووووووو حتى اصبر واتحملهمممممم اطلعوا .
صعد بيرغ وصاح على امه تلم اغراضهم
وعاط بملِكه تروح وراه ، وام وارث حالها بالويل
تنوح عليهم ما تقبل يطرد اخوانه وتصيح بي
_ خاف الله هذول اخوانك .
وهمام راح على غرفة امه شافها تجمع بأغراضهم
انطحن گلبي طحن ، ضايعه وخايفة مقهورة
وما اعرف وين اروح وشلون اطلع منا ، دخل وارث
وسد الباب رجعت نفسي اكثر على حايط
شهگت من حضن ايدي وبصوت مهضوم همس
_ گلتها قبل انتِ اختاريتي الشخص الغلط يحميچ
انا اخوتي اول الناس تضربني قبل الغريب يغدروني .
جريت ايدي من ايده رافضته وهمست
مُـرجانـة : اذا تحب الله اذا تحب امك خليني اروح .
وارث : انا مو عايز ليش دخلتي حياتي
هسة شلون تروحين هي قابل سهلة
ورطت روحي انا ورطت گلبي .
ركزت بعيونه رفعت جسمي بصعوبة
منعني تالي استسلم وساعدني اعدل نفسي
واكعد ، مسحت دموعي وغمضت عيوني
من تلمس وجهي براحة ايده
وارث : انتِ نسمة هوى صافية بنص عواصف سامة .
مُـرجانـة: اذا ما تخليني اروح اشرد غصباً ما عليك .
_ اوووف .
_ راح يموتوني .
_ همام ، بيرغ ، سَــهم ؟
_ اذا احچي اموت واهلي هم يصير بيهم شي .
_ بيني وبينچ انعل خيرهم بيني وبينچ اشتغلهم سكتاوي .
هزيت راسي رافضه احچي خايفة مهزوزه
حتى ما اعرف افكر بالطريقة الصحيحة
متخربطة كلي على بعضي متخربط كلشي بيه
طلع مقهور مني ، وصاير نار عليهم ، امه ونت ون
بجت بجي من يمي گلبي انزرف ، فاتت تحلف
بيَّ احچي منو وراها حتى ما يطردهم كلهم
خفت وبس دموعي تعبر على خوفي وكسرتي
انهاريت من البچي من ضغطهم رجعت اصرخ
اتوسل بيهم يعوفوني بحالي .
صعدت على بيرغ تتوسل بي ، وارث من يصيح
لا تتوسلين بيهم وبيرغ صوته عالي يصيح
_ الله لا يعوزني على بيتك انا ما محتاجك
ولا احتاج هل ورّث ذليتني بي ، أسبحكم بالفلوس
ألعبكم بالفلوس ، مكون نفسي ومعتمد على روحي
قبل لا يموت ابوك انا معتمد على روحي
مو مثلكم عايشين على ورث شهادتي اكبر منكم كلكم .
وارث يحبهم مايهون عليَّ اسكت اذا اظل على
هذا سكوتي ادخل وجهول ناس مالهم ذنب بالصار
جريت روحي سحل من الچرباية ، أستند على حايط
والأغراض وطلعت كلها باوعت عليَّ وارث ركض
لزمني ما راضي على طلعتي رفعت ايدي وبدموع حجيت
_ بيرغ اريد احچي وياك .
ملامحه عصبيته مخيفه رغم هذا جـبر روحه
يتقرب ما يباع بوجهي بس سألني
_ اسمعچ خوية .
_ اريد احچي وياك وحدنا .
وارث : بشنو تفضلتي ؟
جريت نفس حتى اگدر اكمل وأجاريهم
من لزم وارث ايدي جريتها منه ما اتحمل
احد يطخني بعد لعبوا روحي من روحي
مُـرجانـة: اريد بيرغ حباب اريد احچي وياك الله يخليك .
بيرغ : لا تتوسلين خوية شسالفة تعالي نحچي .
وارث : بوجودي .
مُـرجانـة: انتَ لا .
خزرني معصب من جوابي تجاهلت عصبيته
وانفعاله ، بيرغ رفض يدخل الغرفة مشيت للاستقبال
اول ما دخل طلبت يسد الباب ، ورحت على تخم
ما اتحمل اوكف فترة طويلة ، اجه بصفي شال المسدس
من البنطلون حتى يكعد براحه ، وشغل جگارة يستمع
_ لا تروح وارث يحبكم ، لازم توگف وياه .
نفخ دخان الجگارة وبخجل سألني متردد
بيرغ : شهاب مو ؟ اخوي هيچ مسوي بيچ ؟
أومأت للتأكيد براسي وغصيت بالكلام ظل يهز برجله
يحير شنو يحچي يصيح يسكت يطلع
احتقن وجهه ورجع گعد يمي ايده على راسه
بيرغ : وارث اذا يعرف راح يموتو ، جنت اعرف
شسوي ياربي شسوي اثنينهم اخواني بمنو اضحي
انااااا هسة بمنوووو اضحي اثنينهم اعزاز گلبي .
مُـرجانـة: لا تضحي بيهم بس ساعدني اطلع منا .
_ وين تروحين ؟
_ رجعني على اهلي .
_ انتِ دخيلة وارث انا منو وارجع دخيلته ؟
راح يفتر يروح ويرجع وجعه چبير صار بموقف
لا يحسد عليه مصيبته جبيرة ، دخل وارث ما متحمل
شاف بيرغ يحوم ، لزمه من بدلته يهز بي
وارث : عررررفت منوووو وراها مو حجت ؟
بيرغ : وارك بلشت افقد اعصابي عليك
خليني محترمك لا تضرب نززززززل ايدك .
مُـرجانـة: واررررررث عوفه كافي تصيح .
وارث : أحجوا ليش تخلوني غافل منوووو وراهااا
همام مووووو احچي همااااااام .
همام : چلب بهمام الچلب ابن الچلب .
مُـرجانـة: بس انا ما حجيت الصار
طلبت منه يطلعني من هذا البيت انا ما اريدكم .
ام بيرغ : ديلة بالله هي هاي تطرد اهلك الخاطرها
حتى ما تقدر فوك ما يتعارك هو واخوانو عليها
تگول ما اريد هل بيت ، هل بيت ملفي شكولاتچ .
بيرغ : وارث اطلع بس اطلع دقايق .
وارث : امشي اطلع لا احط قهري بيك .
طلع بيرغ بس رفض يطلع من البيت
ام بيرغ : ليش كعدت هنا يمه اصعد بدل اكل
ارتاح لا تعلعل گلبك من البارحة بالدوام مكسور
ظهرك ترجع ادور هنا ينشلع گلبك .
لزم راسه وجگارة تنطفي وجگارة تشتغل وارث
مقابيله هم يشرب ، مريت من يمهم ورجعت على غرفة
غفيت بالساعة والساعتين فزيت المغرب على صوت
ملِكه تسأل عني وام وارث تسألها اذا بيرغ رجع
_ لا من طلع بعد ما رجع .
ام وارث : احس حجت مُـرجانـة كلشي .
_ والله خالة ما اعرف حتى ما صعد فوك .
رجعت غفيت وبنص الليل سمعت صور تلفزيون
بالصالة ، البيت ظلام بظلام بس التلفزيون إضاءته
خافته ام وارث نايمة رايحه بسابع نومه
سمعت صوت تلفون وارث تسارعت دگات گلبي
وتخردلت طلعت ريگي يابس وعندي فضول اشوفه
بس انفتح الباب ما يلتفت عبالك يعرف منو
طلع بدون ما يشوف ، تحمحم وبصوت خافت يحچي
_ محتاجة شي .
_ اي ماي .
نهض من مكانه بيده بطل ماي ما مفتوح
من يمشي يفك بي الحد ما وصل يمي
اخذته منه وشربت قليل ، اخذه شرب ورجع
على مكانه مزعوج ما مرتاح ، تحمحمت مثله
ودخلت على غرفة ، رجعت بفراشي احوس
منا ومنا فتحت شعري عدلته ورجعت اخذت الشال
لبسته واباع على ملابسي مابيهم شي صح
هو غير مطبريني مو زين امشي ، عدلت حاجبي
وصلت للباب ورجعت عيب والله هسة شكو اطلع
كعدت على چرباية افكر اطلب اكل اي صار
هواي ما اكلت ، لا عيب هسة يبتلي بيه بليل
اذا ما گعد امه شنو خدامتي لا اطلب عصير
عصير اهلي ما اسكت وانطمر لا يطمروني .
صارت سولتي بحاجبي اعدل بي وارجع
لورا ، اخر شي بدون سيطرة على رجلي
طلعتني بدون ما يلتفت عرفني وصاح
وارث : تعالي مُـرجانـة قلقتيني يا رايحة
بالغرفة يا راجعة من يمي تعبت .
مُـرجانـة: ها صحتني .
وارث : اي تعالي .
_ عبالي اتوهم صحتني وطلعت اشوف شنو تريد .
_ لا ما تتوهمين .
اقتربت طبطب على تخم قريب منه
بصعوبة كعدت من شافني أتوجع انزعج
ورجع عيونه على تلفزيون ، فركت ايدي
مدري شبي استدار صفن بحاجبي لثواني
وارث : سيف .
_ شنو هوَ .
_ الحاجب سيف نصل حاد ، رماني وما سألني .
كلشي مافهمت اثول وكاعد بصف ذكي
بس حسيت كلام حلو وابتسمت ، شو هذا ما رجع ابتسم
دخل بيرغ فزيت اول ما صعد وارث صاح
_ وين جنت ؟
_ وانتَ شكوووو ؟
_ بيرررررررررغ .
_ دورت بيت .
كمل طريقة حسيت بيرغ منتظر وارث يمنعه
وارث منتظر بيرغ ما يروح ، زفر انفاسه بغضب
يهز برجله ، بعده يريد يعيش الزعل ودبچ صار فوك
وكفت ايدي على شفايفي ، والتخم صاير الدرج
بظهره استدار وارث حتى يشوف شصاير
بهتنا على منظر بيرغ فاتح اول كم دگم البدلة
ولازم ملِكه من ايدها صاروا مقابيلنا
ما شايفينه واحد يهدد بالثاني وبيرغ يعت بيها
صاح بيهم اثنينهم ما مستوعبين وجوههم
تذب ألوان ووجوهنا مو احسن منهم .
وارث : شبيكمممممم دايخ لا تخلوني استلمكم .
ملِكه : احم شسمه راح اروح اجهز اكل .
بيرغ : انا ردت تحضر زقنبوت .
وارث : چا شمالكم تتمالخون .
اثنينهم جاوبوا نفس الجملة بنفس الوقت
بيرغ : ماتسمع الكلام .
ملِكه : مايسمع الكلام .
بيرغ : الهامسترررررر .
وارث : هد ايدها لا توگع البت هدها .
عافها وهي عبالك عتوي لازم فارة بس هدها
انطلقت نزلت تركض وبيرغ صافن عليها
هز وارث ايده وبصوت يستهزأ ويقلد مسموع صاح
وارث : اريدهـا اريد انتقم منها ، اريد اربيها .
بيرغ قلد حركت وارث وهم هز ايده وراح على غرفته
خمس دقايق واجت ملِكه تطلب من وارث يخابر
بيرغ عرفتها تخاف تصعد لان هسة بيرغ
عيونه بگصته من عصبيته عليها ، ما فشلها
اتصل مرة والثانية بالثالثة رد بيرغ صوته خشن
_ تعال اكل .
بيرغ : نايم يمعود لا تخابر .
_ البنية سوت اكل تعال .
بيرغ : خليها تاكلو منو طلب منها اكل .
سد الخط وملِكه تخجل من وارث راحت على مطبخ
تريد ترجّع الاكل صاح بيها وارث حتى تجيبه
هنا ، اجت هي والصينية اخذها منها وراحت
نزلها يمي ورجع يشوف التلفزيون بدون ما يباع گال
_ اكلي حتى تشربين علاج وتنامين تأخر الوقت
بعدچ صغيرة السهر يتعب عيونچ .
حكيت راسي واريد اكل متت بدمي من الخجل
وبيه ثول من طراز خاص مدري شفكرت من سألته
_ اطفالك وزهرة شلونهم .
لثواني هوَ ملتزم الصمت من شافني انتظر رد
_ باجر زهرة والأطفال يجون هنا كم يوم .
رفعت حاجبي بلا وعي ما عاجبني
فر وجهه على جهه الثانية يضم ابتسامته
وارث : ها ما عجبچ .
نكتت ملابسي وكفت حتى ما اكلت وجاوبته
_ لا انا شكو البيت بيتك قابل بيتي وانتَ حر بي .
تمسك بيدي وسحبها بحذر استقام ونهض
رفعت رأسي حتى اشوف شبي يمنعني اروح
من ظهر سحب الشال نزله متعمد وقدم ايده
حرك اصبعه يرسم حد وجهي من اذني للفك
بخط مستقيم صفنت بعيونه خجلانه ونسيت
مو نسيت لا راح الوجع كله من جسمي وصار ينفض
يرجف رجفات مخيفه وزادها من رد بهدوء
وارث : وانتَ زوجة صاحب البيت بأمرچ يا نحلة منو
تريدين تستقبلين منو ما تريدين يتواجد نسمّع كلامچ .
بلعت ريگي بصعوبة غمضت عيني سلب روحي
ماعندي بعد حيل اوكف وهو شوية يبتسم بعدين
يرجع ينزعج ، بكل تأني وحذر يمشي اصبعه
من خدي لمحور عيني صار يرسم دوائر حسيت نعست
وجسمي راخي مدري شبي ، انضربت بالتخم وگعت
احس صحيت نزل جسمه لمستواي وقريب من اذني نطق
وارث : ديري بالچ على گلبچ نحلة .
دفعته ورجعت على غرفة ختلت بفراشي
بعد تصنمت الى ان غفيت الثاني يوم
صحيت على صوت زهرة تفتر بالبيت منا ومنا
وتفتح بالبوت وصوتها يلعلعل تحچي هي وام وارث
_ فتحوا البوب البيت يتنفس ، وهم الجهال يلعبون .
بقيت فاتحة عيني دخل وارث نام على فراش امه
والتفت شافني كاعدة لدقايق بس يناظرني
دخلت زهرة تسأله ومبتسمه
_ تريد ريوك .
وارث : اي بس مال شخصين .
بمجرد ما گال هيچ دارت على چرباية شافتني خزرتني
وبعين صلفه تضحك وتسلم عود ما تهتم
_ ها شلون صرتي .
مُـرجانـة : جنت زينة .
حجيتها ونهضت رحت على حمام غسلت
ورجعت لمكاني هوَ مخلي ايدي على عيونه وغافي
مُـرجانـة : منو گال اريد اكل وبالأخص من ايد زهرة ؟
وارث : نامي .
بقيت بمكاني ما تحركت بوسط الغرفة
شال ايده شاف عيوني مدمعه تربع وگعد على حيله
وارث : زهررررررة ما اريد ريوووووووووك
راح اناااااااااااام اكل ما اررررررررريد .
اجت امه تركض واستداريت شفت زهرة مصفر لونها
مخلوسه وبيده بيضات اثنين تريد تكسرهن بالكاسه
ام وارث : يا ستار يمه شبيك تصيح .
وارث : طفي هذا ظلمي الغرفة اريد انام .
_ سودة علية ليلك كله گاعد نام ارتاح .
رحت على سرير البس بالجواريب مالتي بردانه
ردت على مطبخ وقبل لا ينام نتر
وارث : فضت انام ست ؟
_ شنو كاعدة على عينك ما تنام .
_ هذا هم حظي .
مُـرجانـة : شبي حظك شنو قصدك ؟
_ اريد انام .
_ يا ما تنام .
_ وانتِ وين تروحين .
_ بالمطبخ .
_ لا ابقي هنا .
_ ليش .
_ اخاف تنفتح جروحچ .
مُـرجانـة : ما اتحرك .
_ ابقي هنا من انام روحي .
_ عود ليش .
_ احسن .
_ لا اذا ما تگول ليش اروح .
_ مُـرجانـة .
_ لا تنام وارث .
_ تعبان ليش .
_ مو جوعانة واريد اطلع واخاف .
_ روحي امي هناك .
صار هدوء لفترة من الزمن وانتهى بعد ما جر نفس
ونهض صار بصفي واشر على باب
_ يلة اطلعي كملي اكل وارجعي للغرفة حتى انام .
هزيت راسي موافقته ومتفهمه ، عيونه دم
من النعاس اخذ مخده بالصالة وتمدد ونظراته
على مطبخ من تصد عيونه بعيوني يبتسم براحه
اخذت امه اكل وراحت تريد تاكل هو وياه
وبقيت بس انا وزهرة بالمطبخ تريد تذب سمها صاح
_ مُـرجانـة تعالي اكلي هنا عوفي المطبخ .
مُـرجانـة : ما اكدر بالگاع رجلي تأذيني .
قبل لا تگعد امه اخذ الصينية واجه على ميز
جر كرسي قريب مني ، اكل شلون ما كان
من النعاس على اعصابه كمل ، رجع ظهره
على كرسي وشغل جگارة مركز على صمونتي
وشكد اكل من خجلي اغصغص واشرب چاي حتى تنبلع .
رحت اغسل على مغسله بصف الحمام مدري
منين ما منين طلعت ام بيرغ بصفي اريد اروح
لزمت ايدي جرتها وبلغت التهديد حاجتني
_ اذا تفكرين تنطقين اسم شهاب وحق ربچ
هل مرة انا اتفق وياه وادخله عليچ هو مفرفح عليچ
انا اتوسل وامنعه يريد يشرد بيچ مو حبن بيچ
لا يريد يكسر راس هذا زير النساء .
مُـرجانـة: انتِ دخلتيهم عليَّ ؟
ام بيرغ : لا وراس ولدي مو انا .
_ لعد منو .
_ ام وارث لا تأمنين بيها هاي حقيرة همها الورث
وانتِ تشكلين عليها خطر من دخلتي حياة ابنها
تريد تخلص منچ لان ما وقعتي على تعهد
اذا يموت لو يصير شي بوارث واذا تنفصلون
ما تاخذين منهم شي وجودچ مو بصالحها .
قشعريرة ضربت كل جسمي وبرودة صارت
بكامل اطراف ايدي ورجلي ، هزيت راسي وصحت
_ جذابة تغارين منهااااااا .
ام بيرغ : لا تصدگين المهم عندي لا تذكرين اسم
شهاب وعوفي عليَّ هذا ال**** انا وبيرغ
نشل حركته وبعد ما يتقرب منچ ابد وانا هم
احميچ من ام وارث ومن شهاب وشرهم .
مُـرجانـة: لا تخربطين ام وارث ما تسويها
انتِ وابنچ شياطين واذا يرجع يأذيني
والله ابلغ وارث حتى يتصرف وياكم الظاهر
انتوا ما تستحون .
دخل وارث على غرفة وصاح بصوت خلاها
ما تعرف وين تنطي وجهه ركضت صعدت فوك
انوب رجعت بنفس الدقيقة نزلت فاتت على مطبخ .
غسلت وجهي اكثر من مرة حتى اصحصح شفت
روحي بالمرايا صايرة اخوف وجهي ذبلان وتحت
عيوني سواد وضعيفة رگبتي ملفوفة ودم
منقط على جسمي ، شفت وارث منتظر بالغرفة
ما دخلت رحت على ام وارث وهاي ام المجرم تراقب
_ خالة اريد أسبح .
_ موزين الجروح ما تلتئم وتلتهب اذا يوصلها ماي .
نزلت ملِكه تفور من العصبية وجهه ما يگصه السيف
بلا نفس صبحت وبقت تلاخص بزهرة من نظراتها
الواضح محبتها ، خوزرتها ذيچ الخزرات وجهت
اسئلة ما مستفهمه الوضع ابد
_ منو حضرتچ ولا صغراً بيچ .
_ اني زهرة .
نطتها نظرة عدم رضا ومن فوك تباع عليها لتحت
ام وارث : مربية الأطفال .
زهرة : الكُل بالكل .
اخذت قطعة جبن صغيرة وابتسمت ملِكه ورفعت حاجبة
ملِكه : خدامة الأطفال ؟
عضيت شفايفي السفلية بقت ترجف لزمتني ضحكة
اجت بصفي وكفت مسحت على شالي وكملت
ملِكه : امشي مُـرجانـة اسبحچ بس ما اوصل المي للجروح .
عافتنا زهرة وفاتت على وارث مفوله عصبية
ملِكه: رجفتني انا روغان بجلالة قدره
وقدراته رجفته ونومته .
ام بيرغ : رجفتي ياهو ؟
ملِكه : روغان .
_ تغلطين على ابني .
ملِكه : ابنچ اسمه روغان ؟
ام وارث : عيوني دعوفي البنية تساعد مُـرجانـة
وتعالي اكلي من الصبح مشحونه عليها .
راحت ملِكه على غرفة ام وارث شفت من بعيد
زهرة تأشر وتبجي وارث نايم مخلي ايده على راسه
من دخلت ملِكه استغلها فرصة ونطاها ظهره .
دخلت بحالت صمت ملِكه اخذت ملابس
ودفت الحمام دخلتني ميتة خجل منها بس
بكلامها نستني صارت تسولف على اختها
ومن تتمرض تسبحها ، ورجعت تسب بيرغ
ملِكه : فطسني هل روغان ليلي كله على اعصابي خلصته .
لفت شعري بالمنشفه وبدلت بالحمام
جرتني من ايدي دخلتني على غرفة ام وارث
وارث نايم بمكاني على چرباية ، وزهرة بالصالة
فارشه اوراق وألوان تعلم الأطفال رسم
طلعت ملِكه جواريب ونزلت تلبسني وتتغزل
ملِكه : أوي فدوة شنو هل خدود ورديات
والخشم نتفه وردي وردي فدوة للرموش المبللة
الجمال الرباني سحرني اوي جمالچ يبنية لو عندي
اخو اخطبچ وازوجچ اخوي بس مع الاسف ماعنديش .
عضيت شفايفي اسكت بيهم معت وسحت من الخجل
وتبخرت من طلع بعده گاعد وصاح بيها
وارث : ملِكه المسحوره نشفي شعرها لا تتمرض علينا .
ملِكه : شدعوة خليها تتمرض وتدلل يرهم للنوني الدلع .
وارث : چا تدلع بالمرض .
ملِكه : تدلع النوني بكُل وكت يحلالها .
طلعت من الغرفة مستعجله تجيب الشسوار
فزيت من كعد عدل ، غطيت شعري زين ونزلت راسي
وارث : تعالي هنا على چرباية تتأذين من الگاع .
_ لا بعد كعدت نام .
وارث : حرمة روغان طيرت ابو النوم .
مر الصمت بيننا لثواني معدودة وانتهى من سألني
وارث : احممم هاي ملِكه خلت لوجهچ الوان ؟
مسحت وجهي فهمت يقصد مكياج
مُـرجانـة: لالا والله ما خليت بس سبحت .
وارث : چا ليش هيچ وردية ؟
مُـرجانـة : هاي شسمه من اسبح بماي حار لوّ ابچي .
وارث : ادوخ .
مُـرجانـة : ها .
وارث : دخت هوسة هنا اروح انام بغرفتي اشرف .
فاتت ملِكه فحطانه صعد وارث فوك ، نشفت كل شعري
وفاتت ام بيرغ تنتر بيها تريد تنظف غرفتها
كملتني وراحت وياها نظفت غرفتها كلها
وطلعت ساعدتهم بالمطبخ وعيونها على زهرة
وتراقب بأم بيرغ ، من صار الغده كل شبابهم تجمعت
وسهم صعد يكعد وارث ، توه نزل واجت ام بيرغ
تركض على بيرغ تگله
_ عفية يمه اخوك رجع انطي عنوان البيت الجديد
خلي يجي ياكل ويانا سودة عليه طگ گلبي عليه .
بيرغ ركّز لوارث شافه ما عاجبه الموضوع
ومايريد رجعت شهاب سد الخط وجاوبها
_ يمه عوفي لا يرجع هسة .
ام وارث : امك صار اشهر ما شايفه اخوك شمالكم گطع .
من سمع وارث امه تجاهلهم بيرغ جاوبه ينطي
العنوان من ورا خشمه يعرفه يندل الدرب
بعده على خط ودخل شهاب السيارة
طفرت من مكاني اريد اروح على غرفة
كضتني من ايدي تمنعني
ام بيرغ : وحق الله اذا تفوتين اخلي يدخل عليچ
كلها راح تلتهي بالأكل والسوالف ، وانتِ وحدچ بالغرفة
هذا يفوت ماعنده اعتراض خبل ابني خبل
اذا يشك وارث ما تلومين غير روحچ .
تجمعت الدموع بعيوني ورجفت ، بس دخل عبر ام وارث
وام همام يسوي روحه ما يشوفهن وراح باس راس امه
ودخل للصالة كلهم موجودين وصوته وطريقة كلامه
ولا عبالك مجرم حيوان بصوت رفيع محترم صاح
_ السلام عليكم .
وكف بيرغ تصافح وياه ، وهمام وسهم حضنه
مسح هلى راس سَــهم وجهه نظراته على وارث
ما منطي اي أهميه مسوي هو والحايط واحد
شهاب : هو هذا اسقبال اخوك من السفر .
وارث : وجودك وعدم وجودك واحد .
شهاب : ههههههههه المنبوذ هم عندو لسان .
بيرغ خزره وارث تجاهله ، راح يمشي بكل رزانه
كعد يعدل بالساعة يفر بيها رجع ظهره
وايده مدها على تخم ، طبگ رجل على رجل وصدح صوته
شهاب : جنت معزوم بيت عمي خلف ، سمعت اخبار
ما تسر خاطري صايرين اربعتكم خرطي .
وارث : وانتَ مطي .
حجاها وطلع تلفونه وغض بصره عن شهاب
كاره وجوده وشوفته بطريقة عجيبة ، وهذاك
يعدد بالمشاكل الصارت وختمها بمشكلة بندر وميمونة
هو ذكر بندر وجسمي كفخته رجفة من هاي الزينة
بلعت ريگي وصرت اهز برجلي نزلت عيوني وبس استمع .
شهاب : شنو مهنتها ياخذها من وسط بيتكم
خرفان انتوا ، لو قنادر مستصغركم هذا ابن السادة ؟
بيرغ : خايف على اختك ؟ عود تخاف الله ؟
ما خفت الله من ..
شهاب : بيرررررررررغ ، بيرغ خليني مهدي لعب
وضابط اعصابي وافتهم بأسلوب شنو يصير
صايرين حرب بين عشيرة
اختكم مخطوفة وكاعدين طبيعي عادي عدكم .
نزل رجله وصار يأشر ويصيح عليهم واحد واحد
شهاب : وهذا الجبير مستگعد غريبة بحجة تربي
جهالي يابه جهالك منين ما سامعين بيك متزوج
ماتت ، انفصلت ، انغوله اطفال بالحرام ماكو جواب
وجوهنا هل گدها جدام الشيوووخ مخليها .
فر ايده على بيرغ وما سلم من لسانه وصاح بي
شهاب ؛ زين هذا مجمع شيوخنا كلها مشوفهم
فديو وحده ادگ على فرگه مسحت بي الشارع والمنطقة
زط بط اريد اتزوجها زط بط جابها هنا حتى ما ادري .
وارث : زرط برط معناها لابسيك لبست القندرة .
شهاب : انتَ مو هسة ارد عليك يجي وكتك
ارد عليك بأفعالي ، هستع هذولي اجلدهم رزايل .
همام : ما تعرف تحچي تجلد منو بالرزايل ؟
شهاب : اختك وين اغممممم كاعد مشدد راسك
مربط وشبلااااااكمممممم استخنثت انتَ ويااااه .
بيرغ : هذا شبي راجع حامي .
وارث : بالله عوفه يهذرم بكيفه هسة ابرده بكتله
غسل ولبس يتذكرها على مدار تاريخه .
همام : شهاب بيك خير گدها ؟ لا تبيع بطولات براسنا
هي مثل ما اختنا اختك روح دورهم هي وبندر
وتواجهه وياه واخذهاا .
وارث : حتى يشوهه مثل ما اتفقوا عليَّ ومشوهي .
شهاب : رجع شمرها براسي .
وارث : هسة حي على صلاة ميمونة كتتهن كلهن
وعرف كلشي وما راح يرحمكم كلكم وانا وياه .
شهاب : نرجع للحقيقة ما شوهته لأجل هل سبب
البنية عدها اسبابها وجانت مرعوبة من المصايب
مالتو ليش افعالو وتجارتو قليلة هل سا*** .
وارث : تجارته هههههههه ما تسكت عمي
لا هسة اجي اجرم بحالك والكفل زبنب
هنا اخليك ترعص مثل الكتكوت المديوس .
شهاب : لااااااااا تجااااااااوز .
وارث : لا تسب السادة حتى ما اطاول عليك واهينك .
ادخلت بنصهم ام وارث كلمة منها كلمة من ام بيرغ
سكتوهم وام همام محروك گلبي عليها اخذت زاوية
وتبچي على بنتها اجتها ام وارث تصبر بيها تگلها
_ ياريت بس يخلوني اسمع صوتها قبل لا اموت
تعبانة واحس بروحي يومي قريب ، اريد اسمع منها
زينة بنيتي زينة يضربها اخاف يحرگها يگول
همام ايدها محروگه شلون بيه ، مجوعها والله
أغص بالأكل من اكل الله لا يوفقهم ورطوها
وخلوها هي بوجهه المدفع ما راح يرحمها .
نومت زهرة الجهال وطلعت وشهاب من شافها
عيونه صارت براسه تشنج وشرايين وجهه طگت
ما يقبل عليها تتواجد ، فرشوا سفره وبيرغ
اجه على مطبخ اخذ الخبز من ايد ام وارث
وعيونه نطت جدحت غضب شمر الخبز وراح
على سنك تغسل ملِكه المواعين ومكفكفه دشداشتها
بالصفاح منا ومنا ، عتها من الطرف ونزلها
التفتت عليه بودها تنطي راشدي رفع أصابعه
وايده يعض بروحه بكل قوته وهوَ يعض يصيح اخخخخ .
ملِكه ..
ذهلت من جرئته ، وتغابيت من الفشله
وهاي امه صحت لها فرصة تخرط عليه سوالف
_ صار ساعة انصح بيه ول يمه نزلي الملابس
مايصير هيچ ترفعيها جسمچ بارز عيب ولا عبالك .
ملِكه : تخط بالگاع على ساعة اعثر واصير مضحكة .
بيرغ : صيري مضحكة بالوگعه ولا بالسحله .
_ منو يسحلني ؟
_ صگارچ .
_ منو صگاري ؟
_ الرتب .
_ منو الرتب ؟
_ المقدم بيرغ .
_ مقدم لو مؤخر هههاي هااااي هوووي .
رجع عض اصبعو ومشيت رفعت ايدي اثنينهم
هبالك مستسمله وادور منا ومنا دحگت على
مُـرجانـة الفاهية وسألتها
_ وين نعالي .
مُـرجانـة: بصف المغاسل .
رحت مستعجله وارث يغسل وبيرغ بيده الخبز صحت
ملِكه : نعالي الروغان وينو .
ذب الخبز على درج وركض عليهم كمزت
صرت بظهر وارث وادفع بي يحميني منو
بيرغ : حاصرتك الضحكة اذا تضحك اسويها مو خوش .
وارث : وين ضاحك البنية ادور على نعالهااااا .
بيرغ : تقصد غيرررر شي .
ام وارث : ولك يمه تريد النعال انا اخذته مالتها
هذا جوا الدرج والچ تعالي اخذي .
شالته نرعصت من عاط ونظراته على ايدي
بيرغ : شيلي ايدچ ولچ من عندوووو .
باوعت على ايدي متمسكة بقميص وارث
ملِكه : غير يحميني شبيك .
بيرغ : ايدچ ايدچ خرررررب شيليهاااا وارررث .
جر وارث روحه مني حاصرتو ضحكه
جابت ام وارث النعال لبسته صفن بي
ملِكه : هذا نعالي شبيك عصبي .
وارث : نعال روغان بعمرك ما شفت نعال روغان ؟
ملِكه : حتى ابيض جديد يلمع مال عرسي .
كسرها وارث لطفتها وابتسمت ردنا حاولنا
هذا فور صار نار ، عاف كلشي وصعد
وبعلو صوتو هتف
_ ملِكه حدري فوك بساعچ .
بقيت بمكاني ما تحركت وارث لمحني
عرفني خايفة ابتسم وهز راسو مر مني وطمني
وارث : ارجعي بالمطبخ انا صاعد اتفاهم وياه لا تخافين .
ما صدگت رجعت ركض على مطبخ ميته نعاس
بس اشتغلت بكل حيلي ، بالربع ساعة ونزل وارث
_ ملِكه خوية .
_ ها .
_ بيرغ يصيح بأسمچ فوك اصعدي .
انوب حتى هذا عافني يبو على حظي
صعدت رجلي تخط اجر بروحي جر اتراعش
واعدل بملابسي حتى ماكو ملاحظات
فتحت الباب وبقيت بالعتبة ما دخلت
وبيرغ على سرير گاعد يهز برجلو منتظرني
غمض عيونك يتنفس سريع عاقد حاجبة
بيرغ : سدي الباب حتى اغرد .
صدت نظراتي على مجر أحذيتي فاتحها
ومطشرهن كلهن تمنيت الگاع تنشگ وتبلعني
عرفتو ليش معصب اخذيتي كلها روغان
بيرغ : متعمدة مو ؟
ملِكه : شنو جنت منتظر من تزوجتني
ارضيك واخاف منك لو اسوي كلشي حتى تمل وننفصل ؟
كمز من مكانو يمشي سريع خليت ايدي على راسي
وصرخت من جرني من ملابسي شمرني بنص الغرفة
طحت بكل حيلي على كوعي صرخت الضربة
وجعها دگ بگلبي زحفت من شال المسدس
وتقدم بتجاهي رجعت الحد ما انضربت بالكنتور
لزمت ايده من دفع السلاح ببطني
ملِكه : انتَ تخبلت لا تضربني .
بيرغ : عبالچ ضحكت بوجهچ الخايس
كم مرة نسيت شسووويتي مووو ؟
عصر فكّي بين ايدو يفر بوجهي منا ومنا
ويضرب راشديات بطرف اصابعو على خدي
بيرغ : بعدني محمل مصايبچ بگلبي
ما نسيت شي من مواقفچ وكت ماكو
وانتِ تزيديهن على روحچ وحتى لو اريد اتعداها
ما تخليني وتذكريني انتِ فد وحدة صلفة بلا تربية .
ملِكه : تروحلي فدوة ، انتَ ما متربي .
عطت بعلو حسي من جر شعري ، سد شفايفي بيدو
ويضغط المسدس شاغت روحي من الوجع ودموعي
تصب على خدي وهو مستمر يهدد
بيرغ : فرغت وحتى لو ما افرغ فرغت روحي
حتى اربيچ ، عبالها ضحكت وياها وبستها
گالت هذا جذاب ناسي افعالي تزوجني لأن
ذايب بيه خلي امشي واغري بي ادوخو
حتى اضحك عليه وازيد بوكاحتي .
ملِكه : اغريك؟ أغريك لهل درجة انا رخيصة
لو اريد اضحك عليك واغريك ما ألبس ملابس
اسود بأسود بيوم عرسي ، لو اريد اغريك
البارحة ما نمّت بالگاع اگدر اجي انام يمك
لو اريد اغريك افتح الكنتور واطلع احلى فستان
حصر ومغري اخليك تتخرفن مو بس اغريك
وغصباً ما عليك ، بس انا اكررررهك وما اطيقك
وداعت ابوية وعافية امي بعمري ما كرهت شخص
بگد ما كرهتك .
ضربتو على بطنو تمنيت يسويلي مكان حتى اطلع
منعني وثبتني اضطريت اكمل كلامي وانا تحت
تهديد سلاحو وقبضة ايدو يعت بشعري
ملِكه : من يوم دخلت حياتي عرفت شنو اهانة
وضرب ، عشت عمري ولا بيوم ابوية مد ايدو وضربني
من انتَ دخلت حياتي بلشوها اولاد عمي وعمامي
ضرب وذل وسب ، واجيت هناا وادري راح تكون اسوء منهم .
دفعني بعيد عنو وسحب اقسام ورجع المسدس
بخاصرتو ، وكفت على حيلي ابچي من كل حيلي
ملِكه : هي حياة نعيشها مرّة تريدني اخاف
منك بيها امداني فوكاها انتَ غلطاااااات
من بدايتها انتَ غلطان .
بيرغ : احنه الاثنين غلطططططط مو بس انا غلط
انتَ هم غلط ومعترفه بغلطچ سمعتچ بأذني
بيوم العرس اعترفتي بالغلط وگلت دامها
معترفة ما اشدد وياهاااااا بس انتِ مو ادمية.
ملِكه : اريد اطلع ما اتحمل انا وياك بمكان واحد
ما اطيقك ، واحد راسو يابس عندك انتَ صح والعالم
كلهااااا غلططططط ولو شنو احچي مايفيد بيك .
بيرغ : انا راسي يابس ملاحظة نفسچ تحتاجين تربية ؟
_ ما احتاج ابوية انكسر ظهرو على تربيتنا، انتَ تحتاج .
_ ملِكه .
_ شنو تريد مني عوفني اطلعععع .
_ شنو براسچ هااا شنووو براسچ .
_ براسي تزوجت مجبورة وعايشة وياك وانا اكرهك
حتى ما ملفت روحك تسأل يمكن هل بنية على هذا
رفضها تحب لو ..
قبض على ايدي صارت بين ايدو سحبني
وضربني بصدرو قوي عطت ، رفع اصبعو على شفايفو
بيرغ : ديري بالچ اياچ بالچ يخطر تذكرين زلمة
غيري نهايتچ تنكتب على ايدي ، وحتى لو اكوو
ينمحي الماضي من هل راس ، دام انتِ على
ذمتي ممنوع يمررر على بالچ زلمة غيري ، انا زلمة دمي حار
من اخوووووي اغار عليچ ، من ابوچ هم اغار عليچ
من شفت عمچ يمچ شبت بيه نارررر ديري بالچ
بيوم تفكرين تثيرين غيرتي اموتچ ملِكه اموتچ .
سحبت روحي منه دفعني على كنتور وحط
ايده منا ومنا يسد دربي عليَّ ، وانا غديت نار
من كلامو وتصرفاتو وجع بطني من المسدس وكوعي
رجع شعري خلف اذني واندمج بالغيرة
بيرغ : اريد اعزلچ بيت بعيد عن عيون الدنيا كلها
وتبقين بس البيرغ ملِكه ملكي ، تريديني
ما تريديني تكرهيني غصباً عنچ حرمتي
ومحسوبة عليَّ وشرفي اموتچ اذا تفكرين بغيري
واشحط كل كلب يفكر يمسچ بنظرة ما تعجبني .
اندك الباب دخلت ام وارث ابتعد يعدل بالسلاح
واني حال الضيم حالي شعري ملابسي دموعي
_ شبيكم شبيك وياها فحل شكبرك حاصر البت
تتمالخ وياها شمالك احطك هسة ادگك دگ بعلي .
بيرغ : ماكو شي يمه نتفاهم .
_ اصواتكم بكل ركن بالبيت يا تفاهم هذا
وارث راد يصعد انا لزمته عوف البنية
تنزل ما فايت شي ببطنها من نهد البارحة فكها .
عفتهم وركضت على حمام قفلته وفتحت الماي
اغسل بوجهي وادعي عليه الله يخلصني منه
سمعتها تنزل وادردم عليَّ ، ماردت يگول ضعيفة
شخصيتها وآم دميعة روغان صاير عود قوي براسي
فتحت الباب اريد اطلع واسب بي روغان ابن الروغان
ما راضي فوك ما .. انضربت بلوح مايل جسمه على
باب يسحب بنفس الجگارة بعدها وظل يفر بيدي
بمعنى كملي .
خزرته ناويه اكمل طريقي سحبني من ايدي
دفعته رفع الجگارة بوجهي وسيطر على حركتي
بيرغ : لا تتحركين ماكو طفاية اطفيها بيچ .
ملِكه : لا بالله ؟
_ وداعت عبدلله .
_ منو هذا .
_ انتِ ليش بربوئه ؟
_ لان انتَ سويقط .
قبضت ايده حيل وضغطت على اسناني فحطني
_ غير يخلصني ويروح من وجهي لا يطلع صوتنا
عيب كلهاااا تسمع استغفر الله ياربي .
_ راح ننزل هسة احضن ايدچ بين ايدي .
_ لو تموت .
_ وناكل تگعدين بصفي .
_ النجوم اقربلك .
_ عجل امشي اعيد تأهيل تربيتچ بالغرفة .
رفع راسي خازرني عيونو شكبرها ورموشو طويلة
بارز منو شريان بجهة عقلو ، ذب الجگارة بالگاع طفاها
وحضن خصري ردت انطي راشدي بس لمحت المسدس
عضيت شفايفي اصبر بروحي
ملِكه : ها راح تبدي لواگه .
بيرغ : امشي ننزل صيري حبابه يولو راح
امعط راسچ من مكانو وانعل خيرچ .
_ ما انزل وياك صار ساعة تضرب بيه بالغرفة .
_ ما ضربت عن الحلال والحرام شلت السلاح .
_ والدفعة حتى ايدي توجعني ما محسوبة ؟
_ ما ردت توگعين بس طلعتي ترفة جلي تتهزهزين .
اخذ ايدي بدون رضاتي نزل مترهي
رافع راسو ويمشي ولا عبالك قبل دقايق يتعارك
والأنظار كُلها متوجهه علينا ، دخلت على مطبخ
وبيرغ راح وياهم ، اخذ سَــهم السفرة من الطول للطول
فرشوها ، ورتبوا المواعين كلها ، تقربت من مُـرجانـة
الدمعه تريد توگع من عينها وتفرك بيدها
_ بيچ شي منو وياچ ؟
هزت راسها بـ لا صاحت ام وارث علينا بقينا
بس اني وياها بالمطبخ ، مديت راسي وناديت
_ وارث بالله فدوة تعال شوية ؟
قلص عيونو وطبگ حاجبه بمعنى شكو ، هو افتهم
ليش ناديت عليَّ بس صاحبنه بيرغ مرد اصابعه
مرد يصبر بروحه والزلمة صار يرجف عبالك منتول .
وصل وارث يمي ودخل للمطبخ جر كرسي
ومقابيلها صار اخذ ايدها بين ايدو لزمني
العيب والحرام خليت ايدي على ايدها وسحبتها
رفع راسو متعجب من حركتي
ملِكه : حرام ميصير تلزمها ذنوب عليك وعليها .
حك راسو واشر على باب ونتر
_ دروحي اكلي مبين جوعانة .
دخل بيرغ علينا يتنفس بصوت مسموع بگد ما اعصاب
ومطعون وجهه طعن احمر دم صاير يريد ينفجر
حتى ما يرمش ولا رفع عيونو مني .
تغاضيت عن بيرغ ، وركزت بقلق وخوف وارث
وارث : منو وياچ ليش خايفة .
قبل لا ترد بيرغ ادخل مسعجل خايف من ردها
بيرغ : يمكن تستحي تاكل ويانا خطية
اخذها على غرفة امك اريح تاكل .
وارث : ملِكه بلا امر عليچ جهزي صينية
انا وياها ، بيرغ جيبها منها بسرعة
خطر عليها هل قلق لا انوب تفقد الوعي .
سندها وهيَّ تضم بروحه بحضنو
هو منا اضخم منها واكبر منها تضيع بصفو
دخلها للغرفة وترك الباب قليل مفتوح .
طلعت صينية واصب بالتمن وهذا صار بصفي
_ تسويها شغلة عناد شنوووو وارث فدوة ؟
_ شنو فسرت كلامي ؟
_ عناد .
_ شوفك حقيقي .
شال جدر المرگة يريد يصبو فوك راسي طگيتها
ضحكة من الخوف وابتعدت ليغاد هو شايط مدخن
_ اعصابك بعدك بعز شبابك لا تنسجن .
_ يا قندرة ابن قندرة يسجني ؟
_ استغفر الله شكد ملوت وملعب يعني غلطت
كُل هل غلط هسة شلون اگول انا اسجنك .
الماعون شوية ويطيح من ايدي من مداهمة
هذا الثاني اخو شهاب يمشي مثل الإعصار يكسر
غادي نار ، اعترض بيرغ طريقو ودفعو
_ وين شبلاك .
ام بيرغ فاتت تضرب على خدها وعينها على باب
لا يجي احد عاطت بيه حتى اروح طلعت من المطبخ
وكفت بصف الحايط ومو سمعت كلامهم رجّعت
جحظت عيني من الصدمة وجفلت
ام بيرغ : ول بيرغ هذا يريد يخلي وارث يرمينا
ما يرحمنه ول ما يررررحمنا اذا سمع كلامك .
شهاب : خرب اهلها هل زعطوطة تريدها شغلت عناد
تحضن بي وفاتت وياه على غرفة قصدها تقهرررررني .
بيرغ : وانتَ شعليك بيهم يول وارث يريدهااا
وخطبها من اهلها ومتظر ردهممممم انتَ منووو
يمتى عرفتهاااا لو انتَ يعجبك شكو شي يعجب وارث .
شهاب : راح ادمروووو وادمرها اذا تصير وياه
حذرتها انا وهددتها اذا ما تنعدل اخذهاااااا .
ام بيرغ : هذا انوب ردت يصير عون صار فرعون
انوب هوَ صار اسوء من وارث أمداني وامده حظي .
شهاب : لذت البدايات بالألم والدم تختلف
ما راح تستوعبونه بس صار ويايَّ شي
غريب ما ظنيت بيوم يمر بيه .
ضربت على صدري وبعلو صوتي شهگت مرعوبة
مو بس مرعوبة حسيت گلبي راح يوگف وزادها
من هجم شهاب يريد يلزمني بيرغ يمنع بي
وهذا رفع ايدو وضرب بيرغ بوكس بعد بوكس
حتى اطيح بيده مخبل رسمي مو صاحي
ركضت على غرفة ام وارث ، دفعت الباب ودخلت
مداهمة على وارث ومرجانة نهض وارث
على حيلو انشده من حالتي واصواتهم العالية برا
ملِكه : ..
يتبع ..
الفصل التالي اضغط هنا
يتبع.. (رواية الموروث نصل حاد) اضغط على اسم الرواية لتجد الفهرس كاملاً بجميع الفصول.